རྡོ་རྗེ་གཏུམ་པོའི་ལས་བྱང་རྒྱུན་འཁྱེར་མཐོང་བས་རྣམ་གྲོལ།
རྡོ་རྗེ་གཏུམ་པོའི་ལས་བྱང་རྒྱུན་འཁྱེར་མཐོང་བས་རྣམ་གྲོལ་ཞེས་བྱ་བ་བཞུགས་སོ། །
ན་མ་སྟྲི་མཱུ་ལ་སྱ་དེ་ཝཱ་ཡ། པདྨ་ཐོད་འཕྲེང་གན་ཇག་ཐང་ཏ་ཡི། །ཐུགས་རྗེའི་སྒྱུ་འཕྲུལ་གར་མཁན་གཏེར་བདག་གླིང་། །རྩ་གསུམ་འདུས་པའི་ངོ་བོར་གུས་བཏུད་ནས། །གཏུམ་པོའི་ལས་བྱང་རྒྱུན་ཁྱེར་ཉུང་ངུར་འདྲི། །དེ་ཡང་ལྷ་ལྕམ་པདྨ་གསལ་གྱི་རྣམ་སྤྲུལ། །གཏེར་སྟོན་ཆེན་པོ་པདྨ་གླིང་པས་ཡར་འབྲོག་བྲག་དམར་ནས་གདན་དྲངས་པའི་གསང་བདག་གཏུམ་པོའི་ཆོས་སྐོར་གྱི་ནང་ཚན་ལས་བྱང་གནམ་ལྕགས་འོད་ཀྱི་དྲ་བ་དབང་བསྐུར་གྱི་ངེས་པར་གྱེར་དགོས་ཀྱང་། བསྙེན་པ་དང་གདོན་འགྲོལ་གྱི་ཚེ་རྒྱུན་འཁྱེར་མཐོང་བས་རྣམ་གྲོལ་བཀོད་པ་ལ། སྐྱབས་འགྲོ་ནི། ཧཱུཾ བླ་མ་བདེ་གཤེགས་འདུས་པའི་སྐུ། ཞེས་སོགས་ལན་གསུམ་སེམས་བསྐྱེད་ནི། སེམས་བསྐྱེད་འགྲོ་བ་ཀུན་དོན་དུ། །ཞེས་སོགས་ལན་གསུམ་བརྗོད། ཚོགས་ཞིང་ནི། མདུན་གྱི་ནམ་མཁར་བླ་མ་རིགས་ཀྱི་བདག་པོར་བཞུགས་པའི་རྡོ་རྗེ་གཏུམ་པོ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨཱོཾ་བཛྲ་ས་མཱ་ཛཿ ཞེས་སྤྱན་དྲངས། རྡོ་རྗེ་སློབ་དཔོན་སངས་རྒྱས་དཔལ། །སོགས་ཡན་ལག་བཅུ་པ་བྱ། །སེམས་ཅན་བདེ་དང་ལྡན་གྱུར་
ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ཅེས་ཚད་མེད་བཞི་བསྒོམ། མཚམས་གཅོད་ནི་བགེགས་གཏོར་བསྔོས་རྗེས། ཧཱུཾ། བདག་ཉིད་གསང་བདག་ཐུགས་ཁྲོས་པས། །གནོད་བྱེད་འབྱུང་པོ་བགེགས་ཀྱི་ཚོགས། །ཁྱོད་ཀྱི་ལུས་ངག་ཡིད་གསུམ་པོ། །རྡུལ་ཕྲན་བཞིན་དུ་བརླག་པར་བྱེད། །དེ་བས་བགེགས་གཏོར་འདི་ཁྱེར་ལ། །འདི་རུ་མ་འདུག་གཞན་དུ་དེངས། །ཧཱུཾ་བཞིའི་སྔགས་བརྗོད། སྲུང་འཁོར་ནི། བདག་ཉིད་གསང་བདག་ཐུགས་ཀ་ནས། །དཀར་སེར་དམར་ལྗང་མཐིང་འོད་འཕྲོས། །རྡོ་རྗེ་ཕུར་པ་གྲི་གུག་གྲི། །འཁོར་ལོ་མེ་དཔུང་གུར་གྱིས་གཏམས། །གནོད་བྱེད་མི་མིན་བགེགས་ཀྱི་ཚོགས། །གསང་བདག་བཀའ་ལས་མ་འདའ་ཞིག །བཛྲ་ཀཱི་ལི་ཀཱི་ལཱ་ཡ་ཕེ་ལཾ་ཤོ་ཥ་ན་ཙཀྲ་ཛྲ་ལ་རཾ་རཀྵ་ཧཱུཾ་ཕཊ། བྱིན་འབེབས་ནི། རྟོག་མེད་སྤྲོས་བྲལ་ཆོས་ཀྱི་དབྱིངས་ཉིད་ལས། །སྟོང་པའི་ཆོས་ཉིད་ཡེ་ཤེས་རང་སྣང་བ། །གསང་བདག་རྡོ་རྗེ་གཏུམ་པོ་འཁོར་བཅས་ཀྱིས། །དབང་དང་བྱིན་རླབས་མཐུ་དང་དངོས་གྲུབ་སྩོལ། །ས་མ་ཡ་ཨ་(༢བ)
བེ་ཤ་ཡ་ཨ་ཨ། མཆོད་རྫས་བརླབ་པ་ནི། ཨཱོཾ་ཨཱཿཧཱུཾ་སྭ་བྷཱ་ཝ་བི་ཤུདྡྷཿ སརྦ་དྷརྨཱ་སྭ་བྷཱ་ཝ་བི་ཤུདྡྷོ྅ཧཾ། རཾ་ཡཾ་ཁཾ་གིས་མཆོད་གཏོར་རྣམས་ཀྱི་མ་དག་པའི་ཚོགས་བསྲེགས་གཏོར་བཀྲུས། སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བར་མཆོད་པ་རྣམས་ནམ་མཁའ་གང་བར་སྤེལ་ལ་ཨརྒྷཾ་སོགས་བརྗོད། ཨོཾ་མ་ཧཱ་ཀེཾ་ནི་རི་ཏི་ཧཱུཾ། ཨཱོཾ་བོདྷི་ཙིཏྟ་ག་ན་གུ་ཧྱ་ཧཱུཾ། ཨཱོཾ་སརྦ་པཉྩ་ཨ་མྲྀ་ཏ་ཧཱུཾ། ཨཱོཾ་མ་ཧཱ་རཀྟ་ཛྭ་ལ་མཎྜལ་ཧཱུཾ། ཨཱོཾ་མ་ཧཱ་བ་ལིཾ་ཏ་ཧཱུཾ། རྟེན་བརྟེན་པ་བསྐྱེད་པ་ནི། ཧཱུཾ། ཆོས་རྣམས་རང་བཞིན་སྤྲོས་དང་བྲལ། ནམ་མཁའ་ལྟ་བུའི་ངང་ཉིད་ལས། །འགྲོ་དྲུག་ཀུན་ལ་ཁྱབ་པ་ཡི། །བརྩེ་བའི་སྙིང་རྗེ་ཉི་ལྟར་བསྒོམ། །སྟོང་ཉིད་སྙིང་རྗེ་གསལ་བའི་གློང་། །རྒྱུ་ཡི་རིག་པ་ཧཱུཾ་དུ་གསལ། །དེ་ལས་འོད་འཕྲོས་འབྱུང་རིམ་བརྩེགས། །ཨེ་ཡཾ་རཾ་ཁཾ་སུཾ་ཀེཾ་བྷྲུཾ། བྷྲུཾ་ལས་དུར་ཁྲོད་གཞལ་ཡས་ཁང་། །ཐོད་པ་སྐམ་རློན་རྩིག་པ་བཅས། །ལྷ་ཆེན་ཀ་བརྒྱད་རྔམ་ཞིང་འགྱིང་། །རུས་སྦལ་ཀ་གདན་འཁུན་པ་འདེབས། །གཟའ་བརྒྱད་ཀ་གཞུ་གློག་ལྟར་འཁྱུག །ལྷ་ཀླུའི་གདུང་མ་གདུང་སྟེགས་དང་། །རྒྱུ་སྐར་ཉེར་བརྒྱད་དྲལ་ཕྱམ་བཅས། །ཞིང་ཆེན་ཐོག་ཕུབ་ཐོད་པའི་བད། །རྒྱུ་མའི་དྲ་ཕྱེད་སྤྲས་པ་ལ། །ཙིཏྟའི་ཕོད་དོ་དམར་ཆེན་རྒྱན། །མི་རོའི་རྒྱལ་མཚན་ཀེང་རུས་འཕེན། །རྩེ་ན་གནམ་ལྕགས་ཕྱོགས་བཅུར་ལྡིང་། །རྡོ་རྗེའི་ཡ་ཐེམ་མ་ཐེམ་དང་། །གཡས་གཡོན་རི་བཞི་བཅས་པ་དང་། །གནམ་ལྕགས་འབར་བའི་སྒོ་མོ་ལ། །རྡོ་རྗེ་ཉི་ཟླའི་གཡག་ཤིང་བཅས། །མི་འགྱུར་ཨུར་མོའི་ཟེར་གྱིས་བསྡམས། །ཕོ་བྲང་རབ་ཏུ་ཡངས་པའི་ནང་། །ཡེ་ཤེས་མེ་དཔུང་འབར་བའི་ཀློང་། །མཐིང་ནག་གྲུ་གསུམ་ཨེ་(༣ན)
དཀྱིལ་སྟེང་། །ཐབས་ཤེས་ཉི་ཟླ་པདྨའི་ཁར། །གཟའ་བརྒྱད་ཀླུ་བརྒྱད་བསྣོལ་བའི་སྟེང་། །རང་རིག་ཧཱུཾ་སྔོན་ཡོངས་གྱུར་ལས། །རྡོ་རྗེའི་ལྟ་བ་ཧཱུཾ་གིས་མཚན། །དེ་ལས་འོད་འཕྲོས་འཕགས་པ་མཆོད། །སེམས་ཅན་དོན་བྱས་ཚུར་འདུས་པ། །སྐད་ཅིག་ཡོངས་སུ་གྱུར་པ་ལས། །བདག་ཉིད་གསང་བདག་ཕྱག་རྡོར་ནི། །མཐིང་ནག་ཞལ་གཅིག་ཕྱག་གཉིས་པ། །ཕྱག་གཡས་གནམ་ལྕགས་རྡོ་རྗེ་གསོར། །ཕྱག་གཡོན་དུག་སྦྲུལ་ཞལ་དུ་འཁྱེར། །ཞལ་ནི་བགྲད་ཅིང་མཆེ་བ་གཙིགས། །སྤྱན་གསུམ་དམར་འཁྲུག་གྱེན་ཐུར་གཡོ། །སྨ་ར་ཁ་སྤུ་མེ་སྟག་འཕྲོ། །སྨིན་མ་རབ་འཇིགས་གློག་ལྟར་འཁྱུག །དབུ་སྐྲ་དམར་སེར་གྱེན་དུ་འཁྱིལ། །རིགས་བདག་སངས་རྒྱས་མི་བསྐྱོད་བཞུགས། །ཐོད་པའི་དབུ་རྒྱན་པྲོག་ཞུ་གསོལ། །སྐུ་སྟོད་སེང་གླང་སྟོད་གཡོགས་གསོལ། །སྨད་དཀྲིས་སྟག་གི་ཤམ་ཐབས་ཅན། །ཐོད་པ་སྐམ་རློན་དོ་ཤལ་དང་། །སྦྲུལ་ཆུན་སེ་རལ་ཁ་ཡིས་བརྒྱན། །དགའ་བོ་འཇོག་པོའི་ཐོད་བཅིངས་ཅན། །འདབ་བཟང་དཀར་མོའི་སྐུ་རགས་བྱས། །ཀླུ་རིས་བཞི་ཡིས་ཕྱག་ཞབས་བརྒྱན། །སྒེག་པ་དཔའ་བ་འཇིགས་ཚུལ་ཅན། །ཞབས་ནི་བརྐྱང་བསྐུམ་དོར་སྟབས་བགྲད། །མེ་དཔུང་ཀློང་ན་འགྱིང་ཚུལ་བཞུགས། །སྤྱི་གཙུག་དཔུང་པ་པུས་སྟེང་ལྔར། །གཏི་མུག་འཇོམས་པའི་ཁྱུང་ཆེན་མཐིང་། །ཞེ་སྡང་འཇོམས་པའི་ཁྱུང་ཆེན་དཀར། །ང་རྒྱལ་འཇོམས་པའི་ཁྱུང་ཆེན་སེར། །འདོད་ཆགས་འཇོམས་པའི་ཁྱུང་ཆེན་དམར། །ཕྲག་དོག་འཇོམས་པའི་ཁྱུང་ཆེན་ལྗང་། །རྡོ་རྗེ་མཆུ་ལ་གློག་དམར་ལྕེ། །སྤྱན་གསུམ་དམར་པོ་ཁྲག་ཀློང་འཁྲུག །གཡུ་ཡི་སྨིན་མ་བསྐལ་མེ་འབར། །ལྕགས་རྭ་དུ་བ་པུ་རུ་རུ། །(༣བ)
སྤྱི་གཙུག་ནོར་བུ་དགོས་འདོད་འབེབས། །འདབ་གཤོག་གདེངས་པས་གནམ་ས་གཡོ། །སྡེར་མོས་ཀླུ་རྣམས་ཕོ་ཉར་འགྱེད། །རིན་ཆེན་སྤུ་གསེབ་ཐོག་སེར་འབེབས། །སྦྲུལ་འཁྱེར་སྡེ་བརྒྱད་སྲོག་སྙིང་ཟ། ཁྲོ་བཅུས་བར་ཆད་འབྱུང་པོ་འདུལ། །སྒོ་སྲུང་བཞི་ཡིས་བགེགས་རྣམས་བསྲུང་། །ཨཱོཾ་བཛྲ་པཱ་ཎི་ག་རུ་ཌ་མ་ཧཱ་རཀྵ་ས་མ་ཡ་ཧཱུཾ། སྤྱན་འདྲེན་པ་ནི། ཧཱུཾ །ཀླུ་རྒྱལ་དབང་སྡུད་སྙིང་པོ་ཡེ་ཤེས་ལྷ། །ཐུགས་རྗེའི་དབང་གིས་གནས་འདིར་གཤེགས་སུ་གསོལ། །ཀླུ་བདུད་སྦྲུལ་འཛིན་རྡོ་རྗེ་རྒྱལ་ཐབས་ཅན། །རྡོ་རྗེ་རྩེ་བྲན་འབུམ་བརྒྱན་ཁྲོ་བོའི་རྗེ། །རྡོ་རྗེ་ཀླུ་འཇོམས་ནག་པོ་གཤེགས་སུ་གསོལ། །ཨོཾ་བཛྲ་པཱ་ཎི་ག་རུ་ཌ་ཛཿཧཱུཾ་བཾ་ཧོཿ བཞུགས་སུ་གསོལ་བ་ནི། ཧཱུཾ། ཀླུ་གཉན་པདྨ་ཉི་ཟླའི་གདན་སྟེང་དུ། །གསང་བདག་ཕྱག་ན་རྡོ་རྗེ་བཞུགས་སུ་གསོལ། །འཁོར་ལོ་པདྨ་ལྔ་ཡི་གདན་སྟེང་དུ། །མཁའ་ལྡིང་བྱ་ཁྱུང་ཀླུ་འདུལ་བཞུགས་སུ་གསོལ། །བཛྲ་པཱ་ཎི་ག་རུ་ཌ་ས་མ་ཡ་ཏིཥྛ་ལྷན། མཆོད་པ་འབུལ་བ་ནི། ཨོཾ་བཛྲ་པཱ་ཎི་ག་རུ་ཌ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། བོདྷི་ཙིཏྟ་ཧོ། མ་ཧཱ་པཉྩ་པཱུ་ཙ་ཧོ། མ་ཧཱ་རཀྟ་ཁཱ་ཧི། མ་ཧཱ་བ་ལིནྟ་ཁཱ་ཧི། བསྟོད་པ་ནི། ཧཱུ།ཾ གདུག་པ་འདུལ་མཛད་རྡོ་རྗེ་ཅན་གྱི་སྐུ། །མཐིང་ནག་འཇིགས་པ་རྡོ་རྗེའི་གར་སྟབས་ཅན། །གདུག་པའི་ཀླུ་འདུལ་བྱ་ཁྱུང་རིགས་ལྔས་མཚན། །གཉེན་པོར་གྱུར་པའི་ལྷ་ལ་ཕྱག་འཚལ་བསྟོད། །བཟླས་པ་བྱ་བ་ནི། རང་གི་སྙིང་གར་ཉི་མ་ལ་གནས་པའི་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུཾ་སྔོན་པོ། དེའི་མཐར་ཨཱོཾ་བཛྲ་ཙཎྜ་མ་ཧཱ་རོ་ཥ་ན་ཧཱུཾ་ཕཊ། ཅེས་སྤྲོ་བསྡུའི་དམིགས་པ་དང་བཅས་ཅི་ནུས་སུ་བཟླ། ཚོགས་མཆོད་སྤྲོ་ན་སྐབས་སུ་གང་བབས་(༤ན)
བྱ། །ཉེར་བསྡུ་ནི། ཧཱུཾ༔ གསང་བདག་ཕྱག་རྡོར་ལྷ་ཚོགས་རྣམས། ཐུགས་རྗེའི་དབང་གིས་འདིར་བྱོན་ཞིང་། །སེམས་ཅན་དོན་ཀུན་གྲུབ་ནས་ཀྱང་། །སླར་ཡང་སྐྱེ་མེད་ཀློང་དུ་བསྡུ། །བཛྲ་མུཿ བསྔོ་བ་སྨོན་ལམ་གྱི་མཐའ་བརྟེན་པར་བྱའོ། །སྤྲུལ་སྐུ་པདྨ་གླིང་པའི་གཏེར་བྱོན་རྡོ་རྗེ་གཏུམ་པོའི་ལས་བྱང་རྒྱུན་འཁྱེར་མཐོང་བས་རྣམ་གྲོལ་འདི་ནི་རང་དང་སྐལ་མཉམ་མང་པོ་ཕན་པའི་བློས་ཟ་ཧོར་སྔགས་སྨྱོན་གྱིས་རེག་ཟིག་ཏུ་བགྱིས་པའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ།། །།སརྦ་མངྒ་ལཾ། །