རྗེ་བཙུན་སེང་ལྡེང་ནགས་སྒྲོལ་ལ་བརྟེན་པའི་མདོས་ཆོག་མཐོང་བས་དོན་གྲུབ།
རྗེ་བཙུན་སེང་ལྡེང་ནགས་སྒྲོལ་ལ་བརྟེན་པའི་མདོས་ཆོག་མཐོང་བས་དོན་གྲུབ་བཞུགས་སོ། །
ན་མ་ཨཱཪྻ་ཏཱ་རཱ་ཡཻ། དུས་གསུམ་རྣམ་འདྲེན་བསྐྱེད་པའི་ཡུམ་གཅིག་མ། །ཁྱོད་ཀྱི་མཁྱེན་བརྩེ་ནུས་པས་བར་ཆད་ལས། །རྒྱལ་བྱེད་མདོས་ཀྱི་ཆོག་ཁྲིགས་མཐོང་བ་ཡིས། །དོན་ཀུན་འགྲུབ་པའི་འཕྲིན་ལས་འདི་ན་སྤེལ། །དེ་ལ་འདིར་རྗེ་བཙུན་སེང་ལྡེང་ནགས་སྒྲོལ་ལ་བརྟེན་པའི་མདོས་ཀྱི་ཆོ་ག་ཉམས་སུ་བླང་བ་ལ་བཅའ་གཞིའི་རིམ་པ་རྣམས་ཡིག་རྙིང་དང་མཐོང་བ་བརྒྱུད་པའི་ཕྱག་ལེན་ལྟར་ལེགས་པར་བཤམས། བདག་གསར་མ་སོར་བཞག་བྱེད་ན་བདག་བསྐྱེད་ཇོ་བོ་དང་བ་རིའི་ལུགས་གང་རུང་ནས་ལེན་ཅིང་སྨན་རག་ཚོགས་མཆོད་དོར་སྒོ་དབྱེ་མན་ནི་གཞན་ནས་ཁ་འགེང་བར་བཤད་པས་སྐྱོན་དུ་མི་འགྱུར་རོ། །བསྐྱེད་སྒོས་ཀྱི་བཅའ་གཞི་མཉྫི་དང་མཎྜལ་གྱི་སྟེང་དུ་བུམ་རྫས་ཉེར་ལྔ་བླུག་པའི་བུམ་པ་ཁ་རྒྱན་ཅན་སྨན་རཀ་གཏོར་གསུམ་མཆོད་པ་རྣམས་རྒྱས་པར་བཤམས། བུམ་པའི་ཁར་གཟུངས་ཐག་རྡོ་རྗེ་བཀོད། བདག་བསྐྱེད་ནི། ན་མོ་བླ་མ་བདེ་གཤེགས་འདུས་པའི་སྐུ༔ ཞེས་སོགས་ཤློཀ་གཉིས་ཀྱིས་སྐྱབས་སེམས་བྱ། འབྱུང་གཏོར་བཏང་ལ་བགེགས་ལ་བཀའ་བསྒོ་བ་ནི༔ ཧཱུཾ། ཉོན་ཅིག་བགེགས་དང་འབྱུང་པོ་རྣམས༔ བྱང་ཆུབ་སྒྲུབ་ལ་མི་དགའ་བའི༔ བདུད་སྡེ་དཔུང་དང་བཅས་པ་རྣམས༔ ང་ནི་རབ་འཇིགས་ཁྲོ་བོའི་རྒྱལ༔ ང་(༢ན)
ཡི་བཀའ་ལས་མ་འདའ་བར༔ ལན་ཆགས་གླུད་གཏོར་འདི་ལོང་ལ༔ གནས་འདིར་མ་འདུག་མྱུར་དུ་དེངས༔ གལ་ཏེ་མི་འགྲོ་འདུག་གྱུར་ན༔ ཁྲོ་བོ་ཁྲོ་མོའི་ཚོགས་བཅས་ཀྱིས༔ ཁྱོད་ཀྱི་ལུས་ངག་ཡིད་དང་བཅས༔ བརླག་པར་འགྱུར་གྱིས་གཞན་དུ་མིན༔ དེ་བས་མ་འདུག་མྱུར་དུ་དེངས༔ ཨོཾ་སུཾ་བྷ་ནི་སུཾ་བྷ་ཧཱུཾ༔ གྲྀཧྞ་གྲྀཧྞ་ཧཱུཾ༔ གྲྀཧྞ་པ་ཡ་གྲྀ་ཧྞ་པ་ཡ་ཧཱུཾ༔ ཨཱ་ན་ཡ་ཧོ༔ བྷ་ག་ཝན༔ བིདྱཱ་རཱ་ཛ་ཧཱུཾ་ཕཊ༔ གཉིས་པ་མཚམས་བཅད་པ་ནི༔ ཧཱུཾ། ང་ནི་དབང་ཆེན་རབ་འཇིགས་ཁྲོས་པའི་སྐུ༔ མཚོན་ཆའི་འོད་ཟེར་ཁྲོ་ཚོགས་དཔག་མེད་འཕྲོ༔ རྡོ་རྗེའི་འཁོར་ལོ་རལ་གྲི་འབར་བ་དང་༔ དབྱུག་ཏོ་རྒྱ་གྲམ་ཕུར་པ་ལ་སོགས་གུར༔ ཡེ་ཤེས་ལྔ་ཡི་མེ་དཔུང་ལྔ་རུ་འབར༔ ཁྲོ་ཆུང་ཡཀྴ་མང་པོ་སྐར་ལྟར་འཁྲུག༔ སྒྲུབ་ལ་བར་དུ་གཅོད་པའི་དགྲ་དང་བགེགས༔ ཐམས་ཅད་རྡུལ་ཕྲན་བཞིན་དུ་བརླག་པར་བྱེད༔ སྟེང་འོག་ཕྱོགས་མཚམས་ཀུན་ཏུ་ཁྱབ་པར་སྲུངས༔ བཀའ་དང་མཚམས་ལས་སུ་ཡང་འདའ་མ་བྱེད༔ ཨཱོཾ་བཛྲ་ཙཀྲ་ཏིཀྵཱ་ཀརྨ་ཀཱི་ལ་ཡ་ཛྭ་ལ་རཾ་ཡཀྵ་ཀྲོ་ཏ་ཛྭ་ལ་མ་དྷ་ལ་ཧཱུཾ་ཕཊ༔ ཅེས་མཚམས་བཅད་དོ༔ གསུམ་པ་མཆོད་རྫས་ལ་བསངས་ཆུ་གཏོར་ཞིང་བྱིན་གྱིས་བརླབ་པ་(༢བ)
ནི༔ སྭ་བྷཱ་ཝས་སྣོད་བཅུད་ཐམས་ཅད་སྟོང་པར་སྦྱངས༔ སྟོང་པའི་ངང་ལས་ཐོད་པ་དང་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨཱོཾ་ཨཱཿཧཱུཾ༔ ཨོཾ་བྷྲཱུཾ་ཏྲཱཾ་ཧྲཱཾ་ཨ༔ ཨོཾ་བཛྲ་པུཥྤེ༔ དྷཱུ་པེ༔ ཨཱ་ལོ་ཀེ༔ གནྡྷེ༔ ནཻ་ཝི་དྱེ༔ ཤཔྟ་ཨཱཿཧཱུཾཿ ན་མ༔ སརྦ་ཏ་ཐཱ་ག་ཏེ་བྷྱོ་བི་ཤྭ་མུ་གེ་བྷྱཿ སརྦ་ཐཱ་ཁཾ་ཨུདྒ་ཏེ་སྥ་ར་ཎ་ཨི་མཾ་ག་ག་ན་ཁཾ༔ ཞེས་བརྗོད་པས་མཆོད་གཏོར་རྣམས་ཡེ་ཤེས་ཀྱི་བདུད་རྩི་རོ་མཆོག་བརྒྱ་དང་ལྡན་པཿ གཟུགས་མཛེས༔ སྒྲ་སྙན༔ དྲི་ཞིམ༔ རོ་བདའ༔ རེག་འཇམ༔ ཞལ་བསིལ༔ ཞབས་བསིལ༔ ཡོན་ཆབ༔ དྲི་ཆབ་ལ་སོགས་པ་མཆོད་པའི་བྱེ་བྲག་དཔག་ཏུ་མེད་པས་ནམ་མཁའ་དང་ས་གཞི་འཇིག་རྟེན་གྱི་ཁམས་ཐམས་ཅད་མཆོད་པའི་བྱེ་བྲག་དང་འདོད་ཡོན་གྱི་ལྷ་མོས་གང་བར་ནན་གྱི་བྱིན་གྱིས་བརླབ་བོ༔ སྨན་རཀ་གཏོར་གསུམ་སོགས་ཕྱི་ནང་གསང་བའི་མཆོད་རྫས་རྣམས་རང་རང་གི་བྱེད་ལས་ཁྱད་པར་ཅན་དཔལ་ཀུན་ཏུ་བཟང་པོའི་རྣམ་པར་ཐར་བ་ལས་བྱུང་བའི་མཆོད་པའི་སྤྲིན་ཕུང་ནམ་མཁའི་ཁམས་གང་བར་གྱུར། ཨོཾ་མ་ཧཱ་པཉྩ་ཨ་མྲི་ཏ་ཧཱུཾ་ཧྲཱིཿཋ། མ་ཧཱ་བྷ་ལིཾ་དྷ་ཧཱུཾ་ཧྲཱིཿཋ། ནམ་མཁའ་མཛོད་ཀྱི་སྔགས་དང་ཕྱག་རྒྱ་བྱ། བཞི་པ་རྟེན་གྱི་ལྷ་བསྐྱེད་པ་ནི༔ སྭ་བྷཱ་ཝས་སྟོང་པར་སྦྱངས་པའི་ངང་ལས་གནས་དེ་ཉིད་འཇའ་ཚོན་ལྔའི་འོད་དང་ཟེར་དུ་འཁྲུག་པ༔ ཁྱད་པར་དུ་ཨིནྡྲ་ནཱི་ལའི་མདོག་སྟེང་འོག་ཕྱོགས་མཚམས་ཀུན་ཏུ་ཡང་ལྗང་གུར་གསལ་བ་དག་པར་གྱུར་པའི་དབུས་སུ་པཾ་ལས་པདྨ་སྔོན་པོ་འདབ་མ་སྟོང་དང་ལྡན་པའི་སྟེང་དུ་ཨ་ལས་ཟླ་བའི་གདན་དང་ཟླ་བའི་རྒྱབ་ཡོལ་གྱི་དབུས་སུ་ཧཱུཾ་ཡིག་ལྗང་གུ་འོད་ཟེར་ལྔ་རུ་འཕྲོས་པས༔ ཕྱོགས་བཅུའི་རྒྱལ་བ་ཐམས་ཅད་མཆོད༔ སེམས་ཅན་གྱི་སྒྲིབ་པ་སྦྱངས༔ དོན་བྱས་ཚུར་(༣ན)
འདུས་ཏཱཾ་ལ་ཐིམ༔ ཡོངས་སུ་གྱུར་བ་ལས༔ རྗེ་བཙུན་མ་ཞལ་གཅིག་ཕྱག་གཉིས་སྐུ་མདོག་ལྗང་གུ༔ ཕྱག་གཡས་པ་མཆོག་སྦྱིན༔ གཡོན་ཨུཏྤལའི་ཡུ་བ་མཐེབ་སྲིན་གྱིས་བཟུང་ནས་སྙན་གྱི་ཐད་ཀ་ནས་ཁ་བྱེ་བ༔ ཞབས་གཡས་བརྐྱང་གཡོན་བསྐུམ་ཞལ་འཛུམ་འོད་ཟེར་དང་ལྡན་ཞིང་དབུ་གཙུག་ན་སྣང་བ་མཐའ་ཡས་ཀྱིས་བརྒྱན་པ༔ གཞོན་ནུ་ལང་ཚོ་རྒྱས་པ༔ བཅུ་དྲུག་ལོན་པ༔ ནུ་མ་འབུར་བ༔ སྐུ་ལྡེམ་ལ་འགྱིང་བག་དང་ལྡན་པ༔ སངས་རྒྱས་ཀྱི་མཚན་ཐམས་ཅད་རྫོགས་པ༔ དབུ་རྒྱན་སྙན་རྒྱན་ཕྱག་གདུབ་ཞབས་གདུབ༔ དོ་ཤལ་དཔུང་རྒྱན་ལ་སོགས་རྒྱན་དུ་མས་སྤྲས་པ༔ དབུ་སྐྲ་སེར་ཞིང་ལི་བ་སྤྱི་བོར་བཅིངས་པ་ཟར་བུ་འཕྱང་བ༔ དར་ལྔའི་སྟོད་གཡོགས་དང་༔ དར་དམར་པོའི་ཤམ་ཐབས་ཅན༔ ནམ་མཁའི་འཇའམ་ཆུ་ནང་གི་ཟླ་བ་ལྟར་སྣང་བ་ལ་གདོས་བཅས་སུ་མ་གྲུབ་པ༔ འོད་ཟེར་དང་ལྡན་པ་ཞིག་གསལ་བར་ཡང་ཡང་བསྒོམ༔ དེའི་མཐའ་སྐོར་དུ་ཡང་སྒྲོལ་མ་ཉི་ཤུ་རྩ་གཅིག་དང་སངས་རྒྱས་བྱང་སེམས་ཡི་དམ་མཁའ་འགྲོ་ཆོས་སྐྱོང་དཔག་ཏུ་མེད་པས་བསྐོར་བར་བསྒོམ༔ རྗེ་བཙུན་མའི་སྤྱི་བོར་ཨོཾ་དཀར་པོ༔ མགྲིན་པར་ཨཱཿདམར་པོ༔ ཐུགས་ཀར་ཧཱུཾ་མཐིང་ག་དང་ཏཱཾ་ཡིག་ལྗང་གུ༔ ལྟེ་བར་ཧྲཱིཿསེར་པོ་རེ་བསམ༔ ཐུགས་ཀའི་ཡིག་འབྲུ་གཉིས་ལས་འོད་འཕྲོས༔ རྒྱ་གར་རྡོ་རྗེ་གདན་གྱི་ལྷོ་ནུབ༔ ནུབ་ཕྱོགས་ཨུ་རྒྱན་ཡུལ་གྱི་ཤར་རི་བོ་ཏ་ལ་བྱང་ཆུབ་སེམས་དཔའ་སྤྱན་རས་གཟིགས་ཀྱི་གནས་དང་༔ ལྷོ་ཕྱོགས་སེང་ལྡེང་གི་ནགས་ནས་ཐུགས་དམ་གྱི་རྒྱུད་བསྐུལ་ནས་བྱོན་པར་བསམ༔ ལྔ་པ་སྤྱན་དྲང་བ་ནི༔ རོལ་མོ་དང་དབྱངས་སྙན་པོས༔ ཧཱུཾ། ཆོས་སྐུ་སྐྱེ་མེད་ངང་ཉིད་ལས༔ ཐུགས་རྗེའི་སྨོན་ལམ་(༣བ)
ལས་འཁྲུངས་པ༔ ལོངས་སྤྱོད་རྫོགས་སྐུ་མཚན་དཔེས་སྤྲས༔ བཅོམ་ལྡན་ཐུགས་རྗེའི་ངང་ཅན་མ༔ ཚུར་གཤེགས་རྒྱལ་བ་བསྐྱེད་པའི་ཡུམ༔ འཕགས་མ་འཕགས་མ་གཤེགས་སུ་གསོལ༔ པོ་ཏ་ལ་ཡི་གནས་མཆོག་ནས༔ ཐུགས་རྗེའི་སྤྱན་དང་ཏཱཾ་ཡིག་ལ༔ འགྲོ་བ་སྐྱོབ་པར་སྐུ་སྤྲུལ་མ༔ ཡིད་བཞིན་དངོས་གྲུབ་ཀུན་གྱི་གཏེར༔ འགྲོ་བ་མགོན་མེད་རྣམས་ལ་ནི༔ བརྩེ་བ་ཆེན་པོས་གཤེགས་སུ་གསོལ༔ འཇིགས་བརྒྱད་ཞི་དང་ཚེ་དབང་རྒྱས༔ ཁམས་གསུམ་དབང་སྡུད་དྲག་པོ་ཡིས༔ མི་མཐུན་ཕྱོགས་རྣམས་བཟློག་པ་དང་༔ བདག་ལ་མཆོག་དང་ཐུན་མོང་སོགས༔ རེ་བའི་འདོད་དོན་མ་ལུས་པ༔ ཐམས་ཅད་སྩོལ་ཕྱིར་གཤེགས་སུ་གསོལ༔ ཨཱཪྻ་ཏཱ་ར་ས་མ་ཡ་ཛཿཧཱུཾ་བཾ་ཧོཿ ཞེས་རྗེ་བཙུན་མའི་ལྷ་ཚོགས་འཁོར་དང་བཅས་པ་སྐད་ཅིག་ལ་བྱོན་ནས་མདུན་གྱི་ནམ་མཁར་ཁྲ་ཕུང་ངེ་བཞུགས་པ་ལ་རང་ཐལ་མོ་སྦྱར་ལ༔ ཇི་སྙེད་སུ་དག་གམ༔ ཡན་ལག་བདུན་པ་གང་རུང་བ་ཞིག་འབུལ་ལོ༔ དྲུག་པ་བཞུགས་སུ་གསོལ་བ་ནི༔ ཧཱུཾ། བསོད་ནམས་དང་ནི་ཡེ་ཤེས་ཀྱིཿ ཚོགས་གཉིས་རྣམ་དག་ལས་གྲུབ་པའི༔ ཕོ་བྲང་གཞལ་ཡས་འོད་དུ་འབར༔ པདྨ་གེ་སར་ཟླ་བའི་སྟེང་༔ བཅོམ་ལྡན་འཕགས་མའི་ཚོགས་རྣམས་ཀུན༔ དགྱེས་ཤིང་བརྟན་པར་བཞུགས་སུ་གསོལ༔ ཨཱཪྻ་ཏཱ་ར་དྷེ་བ་དྷུ་ཀི་ནི་ས་མ་ཡ་ཏིཥྛ་ལྷན༔ ཞེས་ནམ་མཁའི་ཡེ་ཤེས་པ་རྣམས་དམ་ཚིག་བསྐྱེད་པ་ལ་ཆུ་འདྲེས་པ་ལྟར་དབྱེར་མེད་དུ་བཞུགས་པར་བསམ༔ ཡང་ཐུགས་ཀ་ནས་འོད་འཕྲོས་པས་ཕྱོགས་བཅུའི་རྒྱལ་བ་ཐམས་ཅད་རིགས་ལྔའི་ཚུལ་དུ་བྱོན་ནས་དབང་བསྐུར་བུམ་ཆུས་སྐུ་ནང་ཁེངས་སྤྱི་བོར་ལུད་པ་ལས་རིགས་ཀྱི་བདག་ཉིད་སྣང་བ་མཐའ་ཡས་ཀྱིས་དབུ་བརྒྱན་ཅིང་༔ གཞན་(༤ན)
ལྷ་རྣམས་ལའང་རང་རང་གི་རིགས་བདག་གིས་བརྒྱན་པར་བསམ༔ བདུན་པ་ཕྱག་འཚལ་བ་ནི༔ ཨེ་མ་ཧོ༔ དུས་གསུམ་སངས་རྒྱས་བསྐྱེད་པའི་ཡུམ༔ འགྲོ་དྲུག་བུ་བཞིན་སྐྱོང་བའི་མ༔ རྒྱལ་བའི་ཡུམ་ལ་ཕྱག་འཚལ་ལོ༔ འགྲོ་དྲུག་སྡུག་བསྔལ་གཟིར་བ་ལ༔ བྱམས་པའི་ཐུགས་རྗེས་སྐྱོབ་མཛད་མ༔ སྒྲོལ་མ་ཡུམ་ལ་ཕྱག་འཚལ་ལོ༔ ལས་ཀྱི་མེ་ཆེན་འབར་བ་ལ༔ ཐུགས་རྗེའི་ཆུ་ཡིས་བསིལ་མཛད་མ༔ འཕགས་མ་ཁྱོད་ལ་ཕྱག་འཚལ་ལོ༔ སྙིགས་མའི་འགྲོ་བ་ཉོན་མོངས་ལ༔ འཕགས་མ་ཁྱེད་ནི་ལྷག་པར་བརྩེ༔ ཐུགས་རྗེ་ཅན་ལ་ཕྱག་འཚལ་ལོ༔ གང་གིས་ཟོལ་མེད་བློ་ཡིས་ནི༔ མོས་པས་སྐད་ཅིག་དྲན་པས་ཀྱང་༔ སྡུག་བསྔལ་སྒྲོལ་ལ་ཕྱག་འཚལ་ལོ༔ ལྷ་མོ་ཐུགས་རྗེའི་ངང་ཅན་མ༔ བརྩེ་དང་མཁྱེན་དང་ནུས་པར་ལྡན༔ ཡིད་བཞིན་མ་ལ་ཕྱག་འཚལ་ལོ༔ དུས་མིན་འཆི་བ་ལ་སོགས་པ༔ མི་མཐུན་ཕྱོགས་རྣམས་ཀུན་སྐྱོབ་མ༔ སྐྱབས་ཆེན་མ་ལ་ཕྱག་འཚལ་ལོ༔ ཏཱ་ར་དྷེ་བ་དྷ་གི་ནི་ཨ་ཏི་པུ་ཧོ༔ པྲ་ཏི་ཛ་ཧོ༔ ཞེས་ཕྱག་བྱའོ༔ བརྒྱད་པ་སྐུ་ཁྲུས་གསོལ་བ་ནི༔ ཧཱུཾ། སྔོན་གྱི་རྒྱལ་བ་འཇིག་རྟེན་མགོན༔ ལུམྤིའི་ཚལ་དུ་བལྟམས་པ་ན༔ ཚངས་དང་བརྒྱ་བྱིན་ལྷ་རྣམས་ཀྱིས༔ ཇི་ལྟར་དག་པའི་ཁྲུས་གསོལ་ལྟར༔ དྲི་ལྡན་ཆབ་ནི་དགེ་བའི་ཆུས༔ དེ་བཞིན་བདག་གིས་སྐུ་ཁྲུས་གསོལ༔ ཡེ་ཤེས་མཆོག་གི་འཕགས་མ་ནི༔ གཙོ་འཁོར་ལྷ་ཡི་ཚོགས་རྣམས་ལ༔ སྐུ་ལ་སྒྲིབ་གཡོགས་མི་མངའ་ཡང་༔ བདག་ཅག་སྒྲིབ་པ་སྦྱང་བ་དང་༔ འགྲོ་རྣམས་བསོད་ནམས་བསག་པའི་ཕྱིར༔ དག་བྱེད་ཆུ་ཡིས་སྐུ་ཁྲུས་གསོལ༔ བདག་སོགས་ཉོན་མོངས་(༤བ)
སྒྲིབ་དག་ནས༔ དྲི་མ་མེད་པའི་སྐུ་ཐོབ་ཤོག༔ ཨཱོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ༔ ཞེས་མེ་ལོང་ངོས་ལ་སྐུ་ཁྲུས་གསོལ་ལོ༔ དེ་ནས་དར་རམ་རས་དྲི་མ་མེད་པ་ཐོགས་ལ༔ ཧཱུཾ། དྲི་བྲལ་ཡང་དག་མཆོག་གི་སྐུ་མངའ་བ༔ སྲེད་དང་ཆགས་སོགས་དྲི་མ་མི་མངའ་ཡང་༔ གཙང་དང་དྲི་ཞིམ་ལྡན་པའི་གོས་དག་གིས༔ འཕགས་མའི་ཚོགས་རྣམས་དགའ་བས་སྐུ་ཕྱིའོ༔ ཨཱོཾ་ཧཱུཾ་ཧྲཱིཿཀཱ་ཡ་བི་ཤོ་དྷ་ན་ཡེ་སྭཱ་ཧཱ༔ ལྷ་ཡི་ན་བཟའ་པཉྩ་ལི་ཀ་དང་༔ དྲི་མེད་དག་པ་ཀར་ཤི་ཀ་ཡི་རས༔ རྗེ་བཙུན་འཕགས་མ་འཁོར་དང་བཅས་པ་དང་༔ ཕྱོགས་བཅུའི་རྒྱལ་བ་ཀུན་ལ་དབུལ་བར་བགྱིའོ༔ ཨོཾ་སརྦ་ཏ་ཐཱ་ག་ཏ་ཨ་ལངྐ་ར་ཡེ་སྭཱ་ཧཱ༔ ཞེས་ན་བཟའ་དབུལ་ལོ༔ དགུ་པ་མཆོད་པའི་བྱེ་བྲག་རྣམས་འབུལ་བ་ནི༔ དང་པོ་ཕྱི་མཆོད་རྣམས་ལས་ཆུ་གསུམ་འབུལ་བ་ནི༔ ཧཱུཾ། དྲི་མེད་གཙང་ཞིང་དག་པ་བདུད་རྩིའི་ཆུ༔ ཡན་ལག་བརྒྱད་ལྡན་བཀྲ་ཤིས་དགེ་བའི་རྫས༔ སྤོས་དང་ག་པུར་ཙནྡན་ལ་སོགས་པ༔ བསིལ་དང་ངད་ལྡན་བདེ་བ་སྐྱེད་བྱེད་པ༔ ཞལ་བསིལ་ཞབས་བསིལ་ཡོན་ཆབ་ལ་སོགས་པ༔ རྗེ་བཙུན་འཕགས་མའི་ཚོགས་ལ་དབུལ་བར་བགྱི༔ ཨརྒྷཾ་པྲ་ཏཱི་ཙྪ་ཡེ་སྭཱ་ཧཱ༔ པཱ་དྱཾ་པྲ་ཏཱི་ཙྪ་ཡེ་སྭཱ་ཧཱ༔ དེ་ནས་མཎྜལ་འབུལ་བ་ནི༔ སྤྱི་དང་མཐུན་པར་རྒྱས་བསྡུས་གང་ཡང་རུང་བ་ལ་ཆ་གསུམ་དུ་འབུལ་ལོ༔ བཅུ་པ་འདོད་ཡོན་གྱི་མཆོད་པ་འབུལ་ཏེ༔ རྡོ་རྗེ་དྲིལ་བུ་གསོར་ཞིང་འཁྲོལ༔ རོལ་མོའི་སྒྲ་སྐབས་སུ་བསྒྲག་ཅིང་༔ ཧཱུཾ། སྟོང་གསུམ་འཇིག་རྟེན་ཕྱོགས་དུས་ཐམས་ཅད་དུ༔ འདོད་ཡོན་ལྔ་ལྡན་མཆོད་པའི་བྱེ་བྲག་ནི༔ དངོས་སུ་འབྱོར་དང་ཡིད་ཀྱིས་ལེགས་སྤྲུལ་ཏེ༔ རྒྱལ་བའི་ཡུམ་མཆོག་ཁྱོད་ལ་དབུལ་བར་བགྱིའོ༔ (༥ན)
ཧཱུཾ། རྒྱལ་བའི་དཀྱིལ་འཁོར་སྤྱན་ལ་མཆོད་འབུལ་མ༔ ལྷ་མོ་དཀར་མོ་རབ་མཛེས་ངང་ཚུལ་ཅན༔ དཀར་སེར་དམར་ལྗང་མཐིང་བའི་མདངས་ལྡན་པའི༔ སྒེག་མའི་ཕྱག་ན་མེ་ཏོག་སྣ་ཚོགས་ཐོགས༔ རྗེ་བཙུན་འཕགས་མའི་ཚོགས་ལ་དབུལ་བར་བགྱིའོ༔ ཨཱོཾ་ཨཱཿཧཱུཾ་ཏཱ་རེ་དྷེ་བ་དྷ་ཀི་ནི་བཛྲ་པུཥྤེ་ཧཱུཾ༔ རྒྱལ་བའི་དཀྱིལ་འཁོར་ཤངས་ལ་མཆོད་འབུལ་མ༔ ལྷ་མོ་སེར་མོ་རབ་མཛེས་ངང་ཚུལ་ཅན༔ ག་བུར་ཙནྡན་རྒྱ་ཤུག་ལ་སོགས་པའི༔ སྒེག་མའི་ཕྱག་ན་བདུག་སྤོས་སྣ་ཚོགས་བསྣམས༔ རྗེ་བཙུན་འཕགས་མའི་ཚོགས་ལ་དབུལ་བར་བགྱིའོ༔ ཨཱོཾ་ཨཱཿཧཱུཾ་ཏཱ་རེ་དྷེ་བ་དྷ་ཀི་ནི་བཛྲ་དྷཱུ་པེ་ཧཱུཾ༔ རྒྱལ་བའི་དཀྱིལ་འཁོར་ཐུགས་ལ་མཆོད་འབུལ་མ༔ ལྷ་མོ་དམར་མོ་རབ་མཛེས་ངང་ཚུལ་ཅན༔ འབྲུ་མར་རྩི་མར་སྣང་གསལ་འོད་ཀྱི་ཚོགས༔ སྒེག་མའི་ཕྱག་ན་སྣང་གསལ་དཔག་མེད་བསྣམས༔ རྗེ་བཙུན་འཕགས་མའི་ཚོགས་ལ་དབུལ་བར་བགྱིའོ༔ ཨཱོཾ་ཨཱཿཧཱུཾ་ཏཱ་རེ་དྷེ་བ་དྷ་ཀི་ནི་བཛྲ་ཨཱ་ལོ་ཀེ་ཧཱུཾ༔ རྒྱལ་བའི་དཀྱིལ་འཁོར་སྐུ་ལ་མཆོད་འབུལ་མ༔ ལྷ་མོ་ལྗང་གུ་རབ་མཛེས་ངང་ཚུལ་ཅན༔ ཙནྡན་གུར་ཀུམ་རྩི་ཆེན་དྲི་ལ་སོགས༔ སྒེག་མའི་ཕྱག་ན་དྲི་ཆབ་དཔག་མེད་བསྣམས༔ རྗེ་བཙུན་འཕགས་མའི་ཚོགས་ལ་དབུལ་བར་བགྱིའོ༔ ཨཱོཾ་ཨཱཿཧཱུཾ་ཏཱ་རེ་དྷེ་བ་དྷ་ཀི་ནི་བཛྲ་གྷནྡྷེ་ཧཱུཾ༔ རྒྱལ་བའི་དཀྱིལ་འཁོར་ལྗགས་ལ་མཆོད་འབུལ་མ༔ ལྷ་མོ་དཀར་མོ་རབ་མཛེས་ངང་ཚུལ་ཅན༔ རང་བྱུང་ལྷན་སྐྱེས་སྦྱར་བའི་ཞལ་ཟས་སོགས༔ སྒེག་མའི་ཕྱག་ན་ཞལ་ཟས་དཔག་མེད་བསྣམས༔ རྗེ་བཙུན་འཕགས་མའི་ཚོགས་ལ་དབུལ་བར་བགྱིའོ༔ ཨཱོཾ་ཨཱཿཧཱུཾ་ཏཱ་རེ་དྷེ་བ་དྷ་ཀི་ནི་བཛྲ་ནཻ་ཝི་དྱ་ཧཱུཾ༔ རྒྱལ་བའི་དཀྱིལ་འཁོར་སྙན་(༥བ)
ལ་མཆོད་འབུལ་མ༔ ལྷ་མོ་སྔོན་མོ་རབ་མཛེས་ངང་ཚུལ་ཅན༔ རྔ་དུང་དྲིལ་བུ་པི་ཝང་འབྱུང་བའི་སྒྲ༔ སྒེག་མའི་ཕྱག་ན་སིལ་སྙན་དཔག་མེད་བསྣམས༔ རྗེ་བཙུན་འཕགས་མའི་ཚོགས་ལ་དབུལ་བར་བགྱིའོ༔ ཨཱོཾ་ཨཱཿཧཱུཾ་ཏཱ་རེ་དྷེ་བ་དྷ་ཀི་ནི་བཛྲ་ཤཔྟ་ཧཱུཾ༔ བཅུ་གཅིག་པ་ནང་གི་མཆོད་པ་ནི༔ ཧཱུཾ། སྲིད་པར་གཏོགས་པའི་འཇིག་རྟེན་རབ་འབྱམས་ན༔ གཟུགས་མཆོག་རབ་མཛེས་ཇི་སྙེད་ཡོད་པ་ཀུན༔ རྡོ་རྗེ་གཟུགས་མའི་ཚོགས་སུ་ཀུན་སྤྲུལ་ནས༔ རྒྱལ་བ་བསྐྱེད་པའི་ཡུམ་ལ་དབུལ་བར་བགྱིའོ༔ ཨཱོཾ་ཨཱཿཧཱུཾ་བཛྲ་རཱུ་པ་པྲ་ཏཱི་ཙྪ་ཧཱུཾ༔ སྲིད་པར་གཏོགས་པའི་འཇིག་རྟེན་རབ་འབྱམས་ན༔ སྒྲ་མཆོག་སྐད་སྙན་ཇི་སྙེད་ཡོད་པ་ཀུན༔ རྡོ་རྗེ་སྒྲ་མའི་ཚོགས་སུ་ཀུན་སྤྲུལ་ནས༔ རྒྱལ་བ་བསྐྱེད་པའི་ཡུམ་ལ་དབུལ་བར་བགྱིའོ༔ ཨཱོཾ་ཨཱཿཧཱུཾ་བཛྲ་ཤཔྟ་ཧཱུཾ༔ སྲིད་པར་གཏོགས་པའི་འཇིག་རྟེན་རབ་འབྱམས་ན༔ དྲི་མཆོག་བཟང་པོ་ཇི་སྙེད་ཡོད་པ་ཀུན༔ རྡོ་རྗེ་དྲི་མའི་ཚོགས་སུ་ཀུན་སྤྲུལ་ནས༔ རྒྱལ་བ་བསྐྱེད་པའི་ཡུམ་ལ་དབུལ་བར་བགྱིའོ༔ ཨཱོཾ་ཨཱཿཧཱུཾ་བཛྲ་གྷནྡྷེ་ཧཱུཾ༔ སྲིད་པར་གཏོགས་པའི་འཇིག་རྟེན་རབ་འབྱམས་ན༔ ལོངས་སྤྱོད་རོ་མཆོག་ཇི་སྙེད་ཡོད་པ་ཀུན༔ རྡོ་རྗེ་རོ་མའི་ཚོགས་སུ་ཀུན་སྤྲུལ་ནས༔ རྒྱལ་བ་བསྐྱེད་པའི་ཡུམ་ལ་དབུལ་བར་བགྱིའོ༔ ཨཱོཾ་ཨཱཿཧཱུཾ་བཛྲ་རཱ་སེ་ཧཱུཾ༔ སྲིད་པར་གཏོགས་པའི་འཇིག་རྟེན་རབ་འབྱམས་ན༔ རབ་མཛེས་ན་བཟའ་ཇི་སྙེད་ཡོད་པ་ཀུན༔ རྡོ་རྗེ་རེག་མའི་ཚོགས་སུ་རྣམ་སྤྲུལ་ནས༔ རྒྱལ་བ་བསྐྱེད་པའི་ཡུམ་ལ་དབུལ་བར་བགྱིའོ༔ ཨཱོཾ་ཨཱཿཧཱུཾ་བཛྲ་སྤཪྴེ་ཧཱུཾ༔ སྲིད་པར་གཏོགས་པའི་འཇིག་རྟེན་རབ་འབྱམས་ན༔ སྣང་སྲིད་(༦ན)
ཆོས་མཆོག་ཇི་སྙེད་ཡོད་པ་ཀུན༔ རྡོ་རྗེ་ཆོས་མའི་ཚོགས་སུ་ཀུན་སྤྲུལ་ནས༔ རྒྱལ་བ་བསྐྱེད་པའི་ཡུམ་ལ་དབུལ་བར་བགྱིའོ༔ ཨཱོཾ་ཨཱཿཧཱུཾ་བཛྲ་དྷརྨ་མ་ཧཱ་མུ་དྲ་ཧཱུཾ༔ བཅུ་གཉིས་པ་བདེ་བའི་གསང་མཆོད་འབུལ་བ་ནི༔ ཧཱུཾ། རྡོ་རྗེ་རིགས་ཀྱི་རྗེ་བཙུན་འཕགས་མ་ལ༔ ཞེ་སྡང་ངོ་བོ་རྣམ་པར་དག་པ་ཡི༔ མེ་ལོང་ཡེ་ཤེས་བདེ་བའི་མཆོད་པ་འབུལ༔ ཀུན་ཏུ་བདེ་བའི་མཆོད་པས་མཉེས་གྱུར་ཅིག༔ རིན་ཅེན་རིགས་ཀྱི་རྗེ་བཙུན་འཕགས་མ་ལ༔ ང་རྒྱལ་ངོ་བོ་རྣམ་པར་དག་པ་ཡི༔ མཉམ་ཉིད་ཡེ་ཤེས་བདེ་བའི་མཆོད་པ་འབུལ༔ ཀུན་ཏུ་བདེ་བའི་མཆོད་པས་མཉེས་གྱུར་ཅིག༔ པདྨ་རིགས་ཀྱི་རྗེ་བཙུན་འཕགས་མ་ལ༔ འདོད་ཆགས་ངོ་བོ་རྣམ་པར་དག་པ་ཡི༔ སོར་རྟོག་ཡེ་ཤེས་བདེ་བའི་མཆོད་པ་འབུལ༔ ཀུན་ཏུ་བདེ་བའི་མཆོད་པས་མཉེས་གྱུར་ཅིག༔ ལས་ཀྱི་རིགས་ཀྱི་རྗེ་བཙུན་འཕགས་མ་ལ༔ ཕྲག་དོག་ངོ་བོ་རྣམ་པར་དག་པ་ཡི༔ བྱ་གྲུབ་ཡེ་ཤེས་བདེ་བའི་མཆོད་པ་འབུལ༔ ཀུན་ཏུ་བདེ་བའི་མཆོད་པས་མཉེས་གྱུར་ཅིག༔ དེ་བཞིན་རིགས་ཀྱི་རྗེ་བཙུན་འཕགས་མ་ལ༔ གཏི་མུག་ངོ་བོ་རྣམ་པར་དག་པ་ཡི༔ ཆོས་དབྱིངས་ཡེ་ཤེས་བདེ་བའི་མཆོད་པ་འབུལ༔ ཀུན་ཏུ་བདེ་བའི་མཆོད་པས་མཉེས་གྱུར་ཅིག༔ ཨཱོཾ་ཨཱཿཧཱུཾ་ཏཱ་ར་ཛྙཱ་ན་པཱུ་ཛ་ས་མ་ཡ་ཧཱུཾ༔ བཅུ་གསུམ་པ་གཏོར་མ་འབུལ་བ་ནི༔ མེ་རླུང་གི་སྦྱོར་བ་ལ་སོགས་སྤྱི་ལྟར་བྱིན་གྱིས་བརླབས༔ ཧཱུཾ། ངོ་མཚར་རྨད་དུ་བྱུང་བའི་གཏོར་མ་ནི༔ རང་བྱུང་རྣམ་དག་བདུད་རྩིའི་ངོ་བོ་ཉིད༔ ཡེ་ཤེས་ལྔ་ཡི་འོད་ཟེར་རྣམ་པར་འཕྲོ༔ འདོད་པའི་ཡོན་ཏན་ལྔ་ཡི་ཕུང་པོར་གསལ༔ མཆོད་པའི་ལྷ་མོར་དཔག་ཏུ་མེད་པས་གང་༔ (༦བ)
ཤ་ལྔ་བདུད་རྩི་སྨན་གཏོར་རཀྟའི་ཚོགས༔ དཔག་ཏུ་མེད་པའི་མཆོད་སྤྲིན་རྒྱ་མཚོ་འདིས༔ རྗེ་བཙུན་འཕགས་མའི་ལྷ་ཚོགས་མཉེས་གྱུར་ཅིག༔ ཏཱ་ར་དྷེ་པ་དྷ་ཀི་ནི་ཨ་མྲྀ་ཏ་མ་ཧཱ་བ་ལིངྟ་རཀྟ་སརྦ་པུ་ཛ་ཧཱུཾ༔ ཁ་ཁ་ཁཱ་ཧི་ཁཱ་ཧི༔ བཅུ་བཞི་པ་བསྟོད་པ་བྱ་བ་ནི༔ སངས་རྒྱས་ཀྱིས་བསྟོད་པ་ལས༔ གཉིས་གསུམ་བདུན་དུ་མངོན་པར་བརྗོད་ན༔ ཞེས་པས༔ ཧཱུཾ། སྤྱན་རས་གཟིགས་དབང་བརྩེ་བའི་ཐུགས་རྗེ་ཅན༔ འགྲོ་བ་ཀུན་གཟིགས་དག་པའི་སྦྱིན་ཉིད་ལས༔ འགྲོ་བའི་དོན་དུ་སྤྲུལ་པའི་བཅོམ་ལྡན་མ༔ བརྩེ་བའི་ཐུགས་རྗེ་ཅན་ལ་ཕྱག་འཚལ་བསྟོད༔ ཞལ་གཅིག་ཕྱག་གཉིས་ཨིནྡྲ་ནཱི་ལའི་མདོག༔ གཞོན་ནུ་ལང་ཚོ་བཅུ་དྲུག་ལོན་པའི་ཚུལ༔ གཡས་པ་མཆོག་སྦྱིན་གཡོན་པ་ཨུཏྤལ༔ དུས་གསུམ་རྒྱལ་བའི་ཡུམ་ལ་ཕྱག་འཚལ་བསྟོད༔ རིན་ཅེན་རྒྱན་སྤྲས་འཛུམ་པའི་འོད་ཟེར་ཅན༔ ལོངས་སྤྱོད་རབ་རྫོགས་རྒྱན་རྣམས་མ་ལུས་རྫོགས༔ འཕྲིན་ལས་རྣམ་བཞི་དངོས་གྲུབ་ཀུན་གྱི་གཏེར༔ དགོས་འདོད་རེ་བསྐོང་མ་ལ་ཕྱག་འཚལ་བསྟོད༔ ཅེས་བསྟོད་རྗེས་སུ་ཕྱག་འཚལ་ཉེར་གཅིག་བསྟོད་པ་ཚར་གཉིས་བཏོན་རྗེས་སུ༔ བུམ་པ་ལ་སྤྲོ་བསྡུ་བྱ་ཞིང་མང་དུ་བཟླས་སོ༔ ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔ ཞེས་བརྒྱ་དང་༔ ཨཱཪྻ་ཏཱ་ར༔ ཞེས་བརྒྱ་ཚར་གྱི་རྗེས་སུ་ཡང་བསྟོད་པ་ཚར་གསུམ་འདོན༔ ཡང་བསྙེན་པ་བརྒྱ་བཏོན་རྗེས་སུ་བསྟོད་པ་ཚར་བདུན་བྱའོ༔ བཅོ་ལྔ་པ་བཤགས་པ་བྱ་བ་ནི༔ མོས་གུས་ཚད་མེད་པས་ཡིད་སྨད་འགྱོད་པ་སྐྱེད་དེ༔ ཐལ་མོ་སྙིང་གར་སྦྱར་ལ༔ རྗེ་བཙུན་འཕགས་མའི་ལྷ་ཚོགས་ཐམས་ཅད་དགོངས༔ །བདག་ཅིག་མ་རིག་རྨོངས་ཤིང་ལས་ངན་པས༔ མི་དགེ་ལས་ཀྱི་སྒྲིབ་ཚོགས་ཅི་མཆིས་པ༔ གནོང་ཞིང་འགྱོད་(༧ན)
སེམས་དྲག་པོས་མཐོལ་ཞིང་བཤགས༔ མ་ལྟར་བྱམས་པའི་ཐུགས་རྗེས་དགོངས་ནས་ཀྱང་༔ ཉེས་བྱས་སྒྲིབ་པའི་ཚོགས་རྣམས་བྱང་བར་ཤོག༔ བཛྲ་ས་མ་ཡེ་ཤུདྡྷེ་ཨཿ ཞེས་པ་དང་ཡིག་བརྒྱ་བཟླས་སོ༔ བཅུ་དྲུག་པ་ཐུགས་དམ་གནད་ནས་བསྐུལ་ཞིང་སྨྲེ་སྔགས་ཀྱིས་གསོལ་བ་བཏབ་པ་ནི༔ རྗེ་བཙུན་མའི་རྟེན་གྱི་དྲུང་དུ་ཐལ་སྦྱར་པུས་བཙུགས་ལུས་བ་སྤུ་གཡོ་བས༔ གདོང་མཆི་མ་འབྱིན་ཅིང་བུ་མ་ལ་དུངས་ནས་ངུ་བའི་ཚུལ་དུ་བྱའོ༔ ཀྱེ་ཧུད་འཕགས་མ་འཕགས་མ་བྱམས་ལྡན་ཐུགས་རྗེ་ཅན༔ རྒྱལ་པའི་ཡུམ་ཁྱོད་གནས་མཆོག་ག་ན་བཞུགས༔ སྐྱབས་མེད་བདག་ལ་དགོས་པའི་དུས་བྱུང་ངོ༔ ཐོག་མེད་དུས་ནས་ད་ལྟ་ཐུག་གི་བར༔ རིགས་དྲུག་འཁོར་བའི་གཡང་ཟ་དོང་རིང་འདིར༔ སྐྱེ་བ་གྲངས་མེད་ཤ་ཁྲག་ལུས་བླངས་ཀྱང་༔ བྱས་པའི་ལས་ལ་དོན་མེད་ཆུད་རེ་ཟོས༔ སྐྱེ་བ་ལན་ཅིག་ཙམ་ཞིག་ཐར་པའི་ལམ༔ བསྒྲུབ་པའི་འབྲེལ་ཡང་བདག་གིས་མ་ཞོགས་སམ༔ འཕགས་མའི་ཐུགས་རྗེས་བདག་ཉིད་བཏང་སྲིད་དམ༔ ཐུགས་རྗེས་བཟུང་དང་འཕགས་མ་རྒྱལ་བའི་ཡུམ༔ བདག་ནི་མ་རིག་ལས་ངན་སྡིག་སྒྲིབ་ཅན༔ མགོན་མེད་བདག་ནི་མ་ཡིས་མ་གཟིགས་སམ༔ དུངས་པའི་ང་རོས་འོ་དོད་བོས་ལགས་ན༔ མ་ཁྱོད་བརྩེ་བའི་ཐུགས་རྗེས་མི་འཛིན་ནམ༔ རིགས་དྲུག་འཁོར་བའི་དོང་དུ་ལྷུངས་ལགས་ན༔ འཕགས་མ་ཐུགས་རྗེའི་ཞགས་པས་མི་འདྲེན་ནམ༔ མ་རིག་མུན་པའི་ཡུལ་དུ་གཏན་འཁྱམས་ན༔ འཕགས་མ་ཐུགས་རྗེའི་སྒྲོན་མེ་མི་སྤོར་རམ༔ ལས་ཀྱི་ཡུལ་དུ་དབང་མེད་འཁྱམས་ལགས་ན༔ མ་ཅིག་ཐུགས་རྗེའི་ལྕགས་ཀྱུས་མི་འཛིན་ནམ༔ དགེ་བའི་མྱུ་གུ་ལོ་ཏོག་སྐམས་(༧བ)
ལགས་ན༔ འཕགས་མ་ཐུགས་རྗེའི་ཆར་རྒྱུན་མི་འབེབས་སམ༔ ཞེ་སྡང་དུག་ལྔའི་མེ་ཆེན་འབར་ལགས་ན༔ མ་ཅིག་ཐུགས་རྗེའི་ཆུ་ཡིས་མི་བརླན་ནམ༔ དུག་གསུམ་འཁྲུལ་པའི་ནད་ཀྱིས་གདུངས་ལགས་ན༔ མ་ཁྱོད་ཐུགས་རྗེའི་སྨན་གྱིས་མི་གསོ་འམ༔ དུས་འདིར་མ་ཁྱོད་ཐུགས་རྗེས་མ་བཟུང་ན༔ དེང་ནས་ཕྱིན་ཆད་ངེས་པའི་གནས་མེད་དོ༔ ཀྱེ་མ་ཀྱེ་ཧུད་འཕགས་མ་ཐུགས་རྗེ་ཅན༔ བདག་ལ་རེ་ལྟོས་སྐྱབས་གནས་གཞན་ན་མེད༔ སྐྱིད་སྡུག་རེ་ལྟོས་གཅིག་ཤེས་ཁྱོད་ཤེས་ན༔ ཐུགས་རྗེའི་དཔའ་ཚན་སྐྱེད་ཅིག་རྗེ་བཙུན་མ༔ འཁོར་བའི་གནས་སུ་ཡུན་རིང་གཏན་འཁུམས་ན༔ ནམ་ཞིག་ལས་ཟད་འབྲས་བུ་ཐོབ་པའི་ཚེ༔ འཕགས་མའི་ཐུགས་རྗེས་མི་འཚལ་དོན་མ་མཆིས༔ ལས་དབང་བཙན་ཞེས་བདག་ཉིད་བོར་གྱུར་ན༔ ཐུགས་རྗེ་ཆེ་ཞེས་སྐྱབས་གནས་སུ་ལ་བྱེད༔ འཕགས་མ་ཁྱོད་ལ་ཐུགས་རྗེའི་སྟོབས་མངའ་ཞིང་༔ སྔོན་འབྲེལ་གསོལ་བཏབ་བདེན་པ་མི་བསླུ་ན༔ ཐུགས་ལ་ལེ་ལོ་བཏང་སྙོམས་མི་མཛད་པར༔ སྐད་ཅིག་ཉིད་ལ་ཐར་པར་འདྲེན་དུ་གསོལ༔ ཚེ་འདིར་མི་མཐུན་རྐྱེན་ངན་བར་ཆད་དང་༔ རྒྱལ་པོ་མེ་ཆུ་ལྕགས་སྒྲོག་དུག་དང་མཚོན༔ རིམས་ནད་སྣ་ཚོགས་ཆོམ་རྐུན་དུས་མིན་འཆི༔ དགྲ་དང་བགེགས་སོགས་རྨི་ལམ་མཚན་ལྟས་ངན༔ ཆགས་ཆེ་ཉམ་ང་འཇིགས་པ་བརྒྱད་ལ་སོགས༔ མ་ལུས་ཞི་ཞིང་བཟློག་པར་མཛད་དུ་གསོལ༔ ཚེ་དབང་ལོངས་སྤྱོད་དཔལ་འབྱོར་འཕྲིན་ལས་རྣམས༔ གོང་ནས་གོང་དུ་འཕེལ་ཞིང་རྒྱས་པར་མཛོད༔ ཁམས་གསུམ་སྲིད་གསུམ་སྣང་སྲིད་ཐམས་ཅད་ཀྱི༔ སྣང་བ་དབང་དུ་འདུ་(༨ན)
བར་མཛད་དུ་གསོལ༔ བདུད་དང་དགྲ་བགེགས་འབྱུང་པོའི་ཚོགས་རྣམས་ཀུན༔ ཚར་གཅོད་དྲག་པོའི་འཕྲིན་ལས་མཛད་དུ་གསོལ༔ བདག་ནི་རྩེ་གཅིག་ཟོལ་ཟོག་མེད་པ་ཡིས༔ ཁ་ཙམ་མ་ཡིན་སྙིང་ནས་གསོལ་བཏབ་པས༔ འགྲོ་འདུག་ལས་བྱེད་གང་གི་ཕྱོགས་དག་ཏུའང་༔ བུ་གཅིག་མ་བཞིན་བརྩེ་བས་བསྐྱེད་དུ་གསོལ༔ འདི་དང་ཕྱི་མ་བར་དོའི་གནས་སྐབས་སུ༔ འབྲལ་མེད་རྟག་ཏུ་ཐུགས་རྗེས་བཟུང་དུ་གསོལ༔ བདག་གི་རྒྱུད་ལ་མི་རྟག་བྱམས་སྙིང་རྗེ༔ དད་དང་བརྩོན་འགྲུས་ངེས་འབྱུང་སྐྱོ་ཤས་དང་༔ ཟབ་མོའི་དོན་དང་སྟོང་ཉིད་ལྟ་བའི་མཆོག༔ རྟག་ཏུ་ཉམས་ལེན་སྐྱོ་ངལ་མེད་པ་དང་༔ ཚེ་དང་སྒྲུབ་པ་མཐའ་རུ་ཕྱིན་པར་ཤོག༔ ཅེས་སྐད་ཅིག་མ་ཡེངས་པར་སེམས་དུང་དུང་བས་གསོལ་བ་གདབ་བོ༔ བཅུ་དྲུག་པ་དབང་བསྐུར་བ་ནི༔ བུམ་པ་རྗེ་བཙུན་མའི་རྟེན་དང་བཅས་པ་རང་དང་གཞན་གྱི་སྤྱི་བོར་བཞག་ལ༔ རྗེ་བཙུན་མ་དངོས་སུ་གསལ་བའི་གནས་བཞི་ནས་བསྐྱེད་རིམ་གྱི་སྐབས་ལྟར་གནས་བཞི་ནས་ཡིག་འབྲུ་བཞི་ལས་འོད་ཟེར་བར་མ་ཆད་པར་བདག་གི་གནས་བཞིར་འཕྲོས་ཤིང་ཐིམ་པར་བསྒོམས་ལ༔ ཧཱུཾ། རྗེ་བཙུན་འཕགས་མ་ཐུགས་རྗེ་ཅན༔ རྣམ་དག་སྐུ་ཡི་སྒོ་ཕྱེ་ལ༔ མི་འགྱུར་རྡོ་རྗེ་ཚེ་ཡི་དབང་༔ སྐལ་ལྡན་ལུས་ལ་བསྐུར་དུ་གསོལ༔ ཨཱཪྻ་ཏཱ་ར་ཀཱ་ཡ་ཨ་བྷིཥིཥྩ་ཨཱོཾ༔ རྗེ་བཙུན་འཕགས་མ་ཐུགས་རྗེ་ཅན༔ འགག་མེད་གསུང་གི་སྒོ་ཕྱེ་ལ༔ འགག་མེད་རྣམ་གྲོལ་གསུང་གི་དབང་༔ སྐལ་ལྡན་ངག་ལ་བསྐུར་དུ་གསོལ༔ ཨཱཪྻ་ཏཱ་རེ་ཝཱ་ག་ཨ་བྷིཥིཉྩ་ཨཱཿ རྗེ་བཙུན་འཕགས་མ་ཐུགས་རྗེ་ཅན༔ སྤྲོས་བྲལ་ཐུགས་ཀྱི་སྒོ་ཕྱེ་ལ༔ སྤྲོས་མེད་རྡོ་རྗེ་ཐུགས་ཀྱི་དབང་༔ སྐལ་ལྡན་(༨བ)
སེམས་ལ་བསྐུར་དུ་གསོལ༔ ཙིཏྟ་ཨ་བྷི་ཥིཉྩ་ཧཱུཾ༔ རྗེ་བཙུན་འཕགས་མ་ཐུགས་རྗེ་ཅན༔ སྐུ་གསུམ་ཡོངས་རྫོགས་སྒོ་ཕྱེ་ལ༔ འཕྲིན་ལས་རྣམ་བཞི་འགྲོ་འདུལ་དབང་༔ སྐལ་ལྡན་ལུས་ངག་ཡིད་ལ་བསྐུར༔ སརྦ་ཨ་བྷི་ཥིཉྩ་ཧྲཱིཿ ཞེས་གནས་བཞིར་བཏུག་ཅིང་བུམ་ཆུ་བཏུང་ཞིང་ཁྲུས་བྱའོ༔ མཆོད་གཏོར་མདོས་ཡས་བྱིན་བརླབ་ནི། བདུན་གྱི་མཆོད་པ་དང་མདོས་ཡས་རྣམས་ལ་དམིགས་ཏེ་བདག་བསྐྱེད་ཀྱི་མཆོད་གཏོར་བྱིན་རླབས་རྣམས་བྱས་རྗེས། ཨ་མྲྀ་ཏས་བསངས། སྭ་བྷཱ་ཝས་སྦྱངས། མདུན་དུ་རིན་པོ་ཆེ་ལས་གྲུབ་པའི་ཁང་བཟང་ལྕགས་རིས་བསྐོར་བ་རྩེ་ཞོལ་དུ་ཡོན་བདག་རྣམས་ཀྱི་གླུད་ཕུང་ཁམས་སྐྱེ་མཆེད་རྣམས་ཡོངས་སུ་རྫོགས་པ་མཛེས་ཤིང་ཡིད་དུ་འོང་། ནམ་མཁའ། རྒྱང་བུ། མདའ་ཁྲ། འཕང་ཁྲ། ཕོ་གདོང་། མོ་གདོང་། གཏོར་མ། རིན་པོ་ཆེ། འབྲུ། སྨན་སོགས་མཐུན་པའི་རྗེས་ཐམས་ཅད་བཟང་ཞིང་གྱ་ནོམ་པ་ས་དང་བར་སྣང་ནམ་མཁའི་ཁྱོན་ཐམས་ཅད་ཡོངས་སུ་གང་བ་འདོད་པའི་ཡོན་ཏན་ལྔ་དང་ལྡན་པར་གྱུར༔ བསངས་གཞུང་ལས་བྱུང་བའི་སྔགས་དྲུག་ཕྱག་རྒྱ་དྲུག་གིས་བྱིན་གྱིས་བརླབས༔ མདུན་བསྐྱེད་ནི་རྗེ་བཙུན་མའི་སྐུ་གཟུགས་ལ་དམིགས་ནས། ཨོཾ་བཛྲ་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་རང་གི་མདུན་དུ་ཐར་པ་ཆེན་པོའི་གཞལ་ཡས་ཁང་གྲུ་བཞི་སྒོ་བཞི། རྒྱན་རྟ་བབས། མཚན་ཉིད་ཡོངས་སུ་རྫོགས་པའི་དབུས་སུ་པདྨ་འདབ་བརྒྱད་ཀྱི་ལྟེ་བར་པ་ལས་པདྨ་དང་ཨ་ལས་ཟླ་བའི་གདན་གྱི་སྟེང་དུ་ཧཱུཾ་ལས་ཨུཏྤལ་ཏཱཾ་ལྗང་གུ་མཚན་པ་ལས་འོད་འཕྲོས། འཕགས་པ་མཆོད་སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། བཅོམ་ལྡན་འདས་རྗེ་(༩ན)
བཙུན་སྒྲོལ་མ་སྐུ་མདོག་རིན་པོ་ཆེ་མརྒད་ལྟར་ལྗང་བ་ཞལ་གཅིག་ཕྱག་གཉིས་པ་ཞབས་ཕྱེད་སྐྱིལ་དུ་བཞུགས་པ་ཕྱག་གི་ལས་མཆོག་སྦྱིན་གྱི་ཕྱག་རྒྱ་དང་། གཡོན་མེ་ཏོག་ཨུཏྤལ་སྔོན་པོའི་ཡུ་བ་མཐེབ་སྲིན་གྱི་བར་དུ་འཛིན་པས་འདབ་མ་སྙན་གྱི་ཐད་དུ་ཁ་བྱེ་བ། རིན་པོ་ཆེའི་དབུ་རྒྱན། མགུལ་རྒྱན། སྙན་རྒྱན། ཕྱག་གདུབ། ཞབས་གདུབ། སོར་གདུབ་ལ་སོགས་རྒྱན་དཔག་ཏུ་མེད་པས་སྤྲས་པ། དར་དཀར་པོའི་སྟོད་གཡོགས་དང་། དར་དམར་པོའི་ཤམ་ཐབས་ཅན་འོད་དཔག་མེད་ཀྱིས་དབུ་བརྒྱན་པ། ཡེ་ཤེས་འོད་ལྔ་འཁྲིགས་པའི་དབུས་སུ་བཞུགས་ཤིང་། སངས་རྒྱས་དང་བྱང་ཆུབ་སེམས་དཔའི་ཚོགས་སྤྲིན་གྱི་ཕུང་པོ་གཏིབས་པ་ལྟ་བུས་བསྐོར་བའི་སྤྱི་བོར་ཨཱོཾ། མགྲིན་པར་ཨཱཿ ཐུགས་གར་ཧཱུཾ་དེ་ལས་འོད་འཕྲོས། རང་བཞིན་གྱི་གནས་དང་། གཡུ་ལོ་བཀོད་པའི་ཞིང་ནས་རྗེ་བཙུན་མ་སྒྲོལ་མ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྱན་དྲངས། བཛྲ་ས་མཱ་ཛཿ མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་ཟད་འཇོམས་མཛད་ལྷ། །དངོས་རྣམས་མ་ལུས་ཡང་དག་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་བསྐལ་བ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེ་རྣམ་སྦྱངས་ཤིང་། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པ། ཁྱོད་བཞེད་འགྲོ་དོན་མཛད་དུས་འདི་ལགས་ན། །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས། །རྫུ་འཕྲུལ་བྱིན་རླབས་སྣ་ཚོགས་སྟོན་མཛད་ཅིང་། །མཐའ་ཡས་སེམས་ཅན་ཚོགས་རྣམས་བསྒྲལ་བྱའི་ཕྱིར། །ཡོངས་དག་འཁོར་དང་བཅས་ཏེ་གཤེགས་སུ་(༩བ)
གསོལ། །པོ་ཏ་ལ་ཡི་གནས་མཆོག་ནས། །ཏཱཾ་ཡིག་ལྗང་གུ་ལས་འཁྲུངས་ཤིང་། །འོད་དཔག་མེད་ཀྱིས་དབུ་ལ་བརྒྱན། །དུས་གསུམ་སངས་རྒྱས་འཕྲིན་ལས་མ། །འགྲོ་བའི་དོན་དུ་གཤེགས་སུ་གསོལ། །བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང་། །ཐུགས་ལ་དགོངས་ཤིང་གནང་བར་མཛོད། །བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་དང་། །བདག་གིས་གུས་པས་བཤམས་པ་འདི། །རྒྱལ་བ་སྲས་དང་བཅས་ལ་འབུལ། །ཨོཾ་ཨཱཪྻ་ཏཱ་ར་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ། དེ་བཞིན་དུ། རབ་འབྱམས་རྒྱ་མཚོ་དཔག་མེད་ན། །ཞབས་བསིལ་ཇི་སྙེད་ཡོད་པ་རྣམས། །ཞེས་པ་ནས་བཟུང་སྟེ་རོལ་མོའི་བར་ཚིགས་བཅད་སྔགས་འདོན་པ་བསྒྱུར། །ལྷ་དང་ལྷ་མིན་ཅོད་པན་གྱིས། །ཞབས་གཉིས་པདྨོ་ལ་བཏུད་ཅིང་། །ཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་ལོ། །ཕྱག་འཚལ་སྒྲོལ་མ་མྱུར་མ་དཔའ་མོ། །སྤྱན་ནི་སྐད་ཅིག་གློག་དང་འདྲ་མ། །འཇིག་རྟེན་གསུམ་མགོན་ཆུ་སྐྱེས་ཞལ་གྱི། །གེ་སར་བྱེ་བ་ལས་ནི་བྱུང་མ། །(༡༠ན)
ཞེས་ཕྱག་འཚལ་ཉེར་གཅིག་གི་དང་པོ་སོང་རྗེས། གོང་ལྟར་ཆུ་གཉིས་ཉེར་སྤྱོད་ཀྱི་མཆོད་པ་འབུལ། དེ་བཞིན་དུ། ཕྱག་འཚལ་སྟོན་ཀའི་ཟླ་བ་ཀུན་ཏུ་ཞེས་པ་ནས་བཟུང་སྟེ། ཕྱག་འཚལ་བ་ནི་ཉི་ཤུ་རྩ་གཅིག་གི་བར་ཤློ་ཀ་རེ་དང་། རབ་འབྱམས་རྒྱ་མཚོ་མ་ཚར་རེ་སྤེལ། དེ་ནས་གཏོར་མ་ཆ་བཞིའི་དང་པོ་ལ་དམིགས་ནས། ཨོཾ་མཱུ་ལ་མཱ་ལ་ཤྲཱི་མངྒུ་རུ། ཨ་ཀཱ་རོ་སོགས་བཏགས་ཏེ་ལན་གསུམ་མམ་བདུན་གྱིས་བླ་མ་ལ། ཨོཾ་ཏྲཻ་རཏྣ་ལ་གཏོར་སྔགས་གཏོར་མ་གཉིས་པ་དཀོན་ཅོག་སྤྱི་ལ། ཡི་གེ་བཅུ་པ་ལ་གཏོར་སྔགས་བཏགས་ནས་གསུམ་པ་སྒྲོལ་མ་ལ། གཏོར་མ་བཞི་པ་དམག་ཟོར་མ་གུར་ཞལ་སོགས་རང་གང་མོས་ཀྱི་ཆོས་སྐྱོང་ལ་འབུལ། མདོས་ཀྱི་མདུན་དུ་འཇིག་རྟེན་པའི་གཏོར་མ་ཆ་དྲུག་རེ་བྱས་ཏེ་དང་པོ་ཕྱོགས་སྐྱོང་ལ་ཆ་གསུམ་ལྟར་དང་། གཉིས་པ་གཞི་བདག་ལ། གསུམ་པ་སྡེ་བརྒྱད་ལ་ཆ་གསུམ་ལྟར་བསྔོས་རྗེས། བླ་མ་དཀོན་ཅོག་གསུམ་གྱི་མཐུ་དང་། གསང་སྔགས་དང་། རིག་སྔགས་དང་། གཟུངས་སྔགས་དང་། སྙིང་པོ་དང་། ཕྱག་རྒྱ་དང་། ཏིང་ངེ་འཛིན་གྱི་མཐུ་དང་། བདེན་པའི་བྱིན་གྱིས་རླབས་ཀྱི་མཐུས་ལྷ་དང་། ཀླུ་དང་། དྲི་ཟ་དང་། གྲུལ་བུམ་དང་། ཤ་ཟ་དང་། སྲུལ་པོ་དང་། བརྗེད་བྱེད་དང་། སྨྱོ་བྱེད་དང་། རྒད་པོ་དང་། རྒད་མོ་དང་། བུ་མོ་དང་། བུ་ཕོ་དང་། འཁོར་གཡོག་དང་། མ་མོ་དང་། མཁའ་འགྲོ་དང་། ལོག་འདྲེན་དང་། གཤིན་རྗེ་དང་། རྒྱལ་པོ་དང་། འགོང་པོ་དང་། ནམ་མཁའ་ལྡིང་དང་། གཉན་དང་། ས་བདག་དང་། ཀླུ་སྲིན་དང་། གནོད་སྦྱིན་དང་། འབྱུང་པོ་དང་། བཙན་དང་། བདུད་དང་། ཡི་དྭགས་དང་། (༡༠བ)
ཤ་ཟ་དང་། གཟའ་དང་། རྒྱུ་སྐར་དང་། ལོ་དང་། ཟླ་བ་དང་། ཞག་དང་། ཟ་མ་ལ་སོགས་པ་ལ་གནོད་པའི་སྦྱོར་བ་བྱེད་པ་རྣམས་ཞི་བར་གྱུར་ཅིག །ཅེས་བརྗོད། བཞི་པ་བགེགས་ལ་ཆ་གསུམ་ལྟར་བསྔོས་རྗེས། ན་མ་དཀོན་ཅོག་གསུམ་ནས་བྱིན་རླབས་ཀྱི་བར་གོང་ལྟར་ལ། བགེགས་རིགས་སྟོང་ཕྲག་བརྒྱད་ཅུའི་གནོད་སེམས་དང་གདུག་རྩུབ་ཞི་བར་གྱུར་ཅིག །ཅེས་བརྗོད། ལྔ་པ་རིགས་དྲུག་དང་དྲུག་པ་ལན་ཆགས་ལ་གཏོང་བ་གཏོར་མ་བརྒྱ་རྩ་ནས་ལེན། ཚོགས་འཁོར་གཏེར་གཞུང་གང་འོས་ནས་ཁ་བསྒྱུར་ཏེ་ཚོགས་ལྷག་ཡན་གཏོང་། དེ་ནས་རོལ་ཆེན་དང་བཅས་རང་རྣམ་པ་རྟ་མགྲིན་དུ་གནས་བསྒྱུར་ཏེ་འདི་སྐད་དོ། །ཧཱུཾ། དམ་པ་ཆོས་སྐྱོང་སྲུང་མ་རྣམས། །འདིར་ནི་བཅོལ་བའི་ལས་རྣམས་མཛོད། །མཆོད་སྦྱིན་གཏོར་མ་གླུད་རྫས་འབུལ། །གནས་འདིར་གནོད་པ་མ་མཛད་ཅིག །སྣང་སྲིད་ལྷ་འདྲེ་སྡེ་བརྒྱད་པོ། །སྔགས་འཆང་བདག་གི་བཀའ་ལ་ཉོན། །གཞན་གྱིས་རྦད་ལ་མ་ཉན་ཅིག །གདོན་བགེགས་ཆེན་པོ་ཐམས་ཅད་ཀྱང་། །བསམ་སྦྱོར་ངན་པ་ཞི་བར་གྱིས། ཁྱེད་རྣམས་དགྱེས་པའི་གཏོར་མ་དང་། །གཟུགས་བརྙན་མང་པོ་རྣམས་དང་ནི། །ལ་རྫས་ལུང་རྫས་འདོད་དགུར་བཅས། །ཡིད་འོང་མཆོད་པ་སྦེ་ཞོལ་དང་། །དར་གྱི་གུར་ཕུབ་ལྡིར་རི་རི། །འབྲུ་ཚེམ་དགུ་ཡི་ཁྲི་ལ་བཞུགས། །དར་གླུད་རྒྱན་ཆ་སྣ་ཚོགས་དང་། །ཡིད་འོང་རྟ་ཕོ་ལེགས་མགྱོགས་ལ། །འབྲུ་ཡི་ངར་མི་ཆེན་པོ་བསྐྱོན། །ལུས་ལ་གསེར་གཡུ་མང་པོས་བརྒྱན། །དར་གྱི་གོས་བྱོན་ལྷུབས་སེ་ལྷུབ། །སྨྲ་བ་མཁས་ལ་ངག་སྙན་པ། །བཞིན་ནི་ལེགས་ལ་མདངས་རེ་ཆེ། །འོག་ན་རྟ་ཞོན་ཞུངས་སེ་ཞུང་། །མགོ་ལ་ཐོད་བཅིངས་པུར་རུ་རུ། །(༡༡ན)
རྩེད་འཇོ་སྣ་ཚོགས་བསྒྱུར་ལ་མཁས། །གཡུ་ཡི་ལྷམ་ཆུང་ཟུལ་ལུ་ལུ། །གསེར་གྱི་སྐ་རགས་ཁྱུགས་སེ་ཁྱུག །རྣམ་རྒྱལ་ལྡེམ་པ་སྐུ་ལ་བརྒྱན། །ཕོ་གདོང་མོ་གདོང་མི་སྐད་སྨྲ། །མདའ་རིགས་འདོད་དགུ་ཚང་བ་རྣམས། །ཡོན་བདག་གླུད་དུ་ཁྱེད་ལ་འབུལ། །ཡིད་འོང་ནོར་རྫས་མང་པོ་རྣམས། །ཞལ་ཟས་ཞིམ་ལ་མངར་དགུ་དང་། །གཡོག་འཁོར་ངར་མི་བཅུ་གསུམ་དང་། །སྨན་སྤོས་མར་མེའི་མཆོད་པ་རྣམས། ཁྱེད་རྣམས་ཀུན་ལ་འབུལ་ལགས་ཀྱི། །སྔགས་པའི་ཕུར་ཁ་བསྒྲིལ་བ་དང་། །ཡུངས་ཀར་ཐུན་གྱིས་བྲབ་པ་དང་། །ཟོར་ཁ་སྣ་ཚོགས་འཕེན་པ་དང་། །དེ་དག་ནུས་པ་ཕྱིར་ལ་བཟློག །བོན་པོ་རྔ་གཤང་དཀྲོལ་བ་དང་། །སྡུན་མར་འུར་རྡོ་འཕེན་པ་དང་། །དྲག་སྔགས་ཕྲ་མེད་ཉེ་འབྱེད་དང་། །སྡེ་བརྒྱད་དྲག་པོ་བསྐུལ་བ་དང་། །དེ་དག་ནུས་པ་ཕྱིར་ལ་བཟློག །ཆོས་སྐྱོང་ལྷ་འདྲེ་ཐམས་ཅད་ཀྱང་། །ལ་ལ་དཀོར་ཆའི་བཤུལ་དུ་འབྲེང་། །ལ་ལ་སྔགས་པ་དྲག་པོས་རྦད། །ལ་ལ་ལས་དང་རྒྱུ་འབྲས་སྟོན། །ལ་ལ་རིམས་དང་དལ་ཡམས་སྟོན། །འགའ་ཞིག་བདེན་པའི་སེར་བ་འབེབས། །ཆར་པ་མི་འབབ་ལོ་ཉེས་བྱེད། །ལམ་ཆགས་བུ་ལོན་འདྲེན་པ་དང་། །ཉེ་འབྲེལ་རོགས་ཀྱི་བཤུལ་དུ་འབྲང་། །མཛེ་ནད་གཏོང་བའི་ཀླུ་རྣམས་དང་། །གནོད་བྱེད་ལན་ལེན་འདྲེ་རྣམས་དང་། །ཤ་ཁྲག་སྲོག་དབུགས་ཟ་བ་དང་། །ངར་སྣབས་མི་གཙང་ཟ་བ་དང་། །འབྱུང་པོའི་ལྷ་དང་ས་བདག་དང་། །ལོ་དང་སྨེ་བ་སྤར་ཁ་དང་། །ཀུན་ཀྱང་གླུད་ཀྱིས་མཉེས་གྱུར་ཅིག །གནོད་འགལ་ངན་པ་ཞི་བར་མཛོད། །བུ་ལོན་ལན་ཆགས་ཁྱེར་གྱུར་ཅིག །བདག་ཅག་ལོངས་(༡༡བ)
སྤྱོད་འཕེལ་བར་མཛོད། །རྐྱེན་ངན་བར་ཆད་ཕྱིར་ལ་བཟློག །རྦོད་གཏོང་ནུས་པ་བཟློག་ཏུ་གསོལ། །བསམ་པའི་དོན་རྣམས་གྲུབ་པར་མཛོད། །བྱམས་པའི་སེམས་ཀྱིས་མཆོད་སྦྱིན་གྱིས། །སྙིང་རྗེའི་སྟོབས་ཀྱིས་དམ་ཆོས་བཤད། ཁྱོད་ཀྱང་མ་རིག་འཁོར་བར་འཁྱམས། །ད་ནི་བྱང་ཆུབ་སེམས་སྐྱེད་ཅིག །རང་གི་ལུས་ལ་དཔེ་ལོང་ལ། །གཞན་གྱི་ལུས་ལ་གནོད་མ་བྱེད། །སྡིག་སྤོངས་ཐར་པའི་ལམ་ལ་བཀོད། །ནད་དང་དལ་ཡམས་བཟློག་ཏུ་གསོལ། །ཚེ་དང་དབང་ཐང་ལོངས་སྤྱོད་དང་། །འབྲས་བུ་ཐམས་ཅད་འཕེལ་བར་མཛོད། །གློ་བུར་བརྒྱད་ཅུ་རྩ་བཞི་བཟློག །ཡེ་འབྲོག་སུམ་བརྒྱ་དྲུག་ཅུ་བཟློག །བཞི་བརྒྱ་རྩ་བཞིའི་ནད་རྣམས་བཟློག །སྟོང་ཕྲག་བརྒྱད་ཅུའི་གདོན་རྣམས་བཟློག །ཡས་ཀྱི་བདུད་དུ་གཡོས་པ་བཟློག །མས་ཀྱི་སྲི་རུ་ལངས་པ་བཟློག །ཕ་ཚན་ནང་གི་རྒྱ་འདྲེ་བཟློག །མ་ཡི་བྱུར་འདྲེ་ལ་སོགས་བཟློག །སྡང་བའི་དགྲ་རྣམས་བཟློག་པ་དང་། །གནོད་པའི་བགེགས་རྣམས་མ་ལུས་བཟློག །གཞན་ཡང་ལོ་ཀེག་ཟླ་ཀེག་དང་། །ཞག་ཀེག་མ་ལུས་བཟློག་ཏུ་གསོལ། །ལྷ་འདྲེ་སྲིས་ལ་རྐུ་བ་དང་། །འཕུང་འདྲེ་མ་ལུས་བཟློག་ཏུ་གསོལ། །མི་ནད་ཕྱུགས་ནད་ཐམས་ཅད་དང་། །བྱིས་པའི་གདོན་ཆེན་བཅོ་ལྔ་བཟློག །མི་ཁ་དགྲ་མཆུ་ཐམས་ཅད་བཟློག །གཡུལ་རྣམས་མ་ལུས་ཞི་བར་མཛོད། །དགྲ་དང་ཡམས་ནད་བཟློག་ཏུ་གསོལ། །མྱོས་ཤིང་འཐིབས་པ་བསལ་བར་མཛོད། །ཉིན་གཅིག་པ་དང་ཉིན་གཉིས་པ། །ཉིན་གསུམ་པ་ཡི་རིམས་རྣམས་དང་། །རིམས་རྣམས་ཐམས་ཅད་ཞི་བར་མཛོད། །ཉམ་ང་བག་ཚ་བཟློག་ཏུ་གསོལ། །འཐབ་རྩོད་འདུམས་པར་མཛད་དུ་གསོལ། །ཡུལ་ཕྱོགས་དགེ་ཞིང་དར་བ་དང་། །དམ་(༡༢ན)
ཆོས་ཕྱོགས་བཅུར་དར་བར་མཛོད། །ལོ་བརྒྱ་ཐུབ་ཅིང་སྟོན་བརྒྱ་མཐོང་བ་དང་། །བཀྲ་ཤིས་བདེ་ལེགས་ཕུན་སུམ་ཚོགས་པ་དང་། །ཚེ་དང་བསོད་ནམས་དཔལ་དུ་འབར་བར་མཛོད། །མི་ཚེ་དགེ་ཞིང་དངོས་གྲུབ་མ་ལུས་སྩོལ། ཞེས་བསྔོས་ནས་ལན་ཁ་ཡར་གཏོང་ཚེ་མཆོད་གཏོར་དང་ཡས་རྣམས་གསོས་ཏེ་བྱིན་རླབས་བྱ། ཕྱག་འཚལ་ཉེར་གཅིག་གི་མཆོད་པ་ནས་བཟུང་འདིའི་བར་ཚོགས་འཁོར་མ་གཏོགས་ཤར་མར་གཏོང་། མཐར་འཇིག་རྟེན་པའི་གཏོར་མ་རྣམས་མདོས་ཀྱི་ནང་དུ་བསྒྲིལ། མདོས་ལམ་ཐེན། སྒོ་དབྱེ་ནི། མདོས་ཁ་བསྒྱུར་ལ། ཀྱེ། སྐྱོད་དོ་གཤེགས་སོ་བགེགས་དང་དམ་སྲིན་ཚོགས། །ཕོ་བྲང་དེ་ནི་ད་སྐྱོད་འཚལ། ཆིབས་ཁ་དེ་ནི་ད་བསྒྱུར་འཚལ། །ཤར་གྱི་སྒོ་བས་སྒོ་དབྱེ་འཚལ། །རྣམ་པར་རྒྱལ་བས་འཕྲང་སོལ་འཚལ། །མདོས་འགྲོ་དེ་ནི་ཤར་དུ་འགྲོ། །གླུད་འགྲིམ་དེ་ནི་ཤར་དུ་འགྲིམ། །ཤར་ཕྱོགས་རྒྱལ་པོ་ཡུལ་འཁོར་སྲུང་། །དྲི་ཟ་འབུམ་གྱི་འཁོར་གྱིས་བསྐོར། ཁྱེད་ཀྱང་མདོས་ཀྱི་བདག་པོ་སྟེ། །མདོས་བདག་ལ་སོགས་མདོས་བཞེས་ཤིག །གླུད་བདག་ལ་སོགས་གླུད་བཞེས་ཤིག །ད་གཤེགས་དེ་ནི་ད་རེ་རན། །ཕོ་བྲང་དེ་ནི་ད་སྐྱོད་འཚལ། །ཆིབས་ཁ་དེ་ནི་ད་སྒྱུར་འཚལ། །ཧཱུཾ སྐྱོད་དོ་གཤེགས་སོ་བགེགས་དང་མ་སྲིན་ཚོགས། །ཕོ་བྲང་དེ་ནི་ད་སྐྱོད་འཚལ། །ཆིབས་ཁ་དེ་ནི་ད་སྒྱུར་འཚལ། །ལྷོ་ཡི་སྒོ་བས་སྒོ་ཕྱེ་འཚལ། །ལྷོ་ཕྱོགས་གསེར་སྒོ་སེར་པོ་ཕྱེ། །ལྷོ་ཡི་འཕྲང་བས་འཕྲང་སོལ་འཚལ། །གཤིན་རྗེ་གཤེད་པོས་འཕྲང་སོལ་འཚལ། །མདོས་འགྲོ་དེ་ནི་ལྷོ་རུ་འགྲོ། །གླུད་འགྲིམ་དེ་ནི་ལྷོ་རུ་འགྲིམ། །ལྷོ་ཕྱོགས་རྒྱལ་པོ་འཕགས་སྐྱེས་པོ། །ཤར་ཕྱོགས་དུང་སྒོ་དཀར་པོ་ཕྱེ། །ཤར་གྱི་འཕྲང་བས་འཕྲང་སོལ་འཚལ། །གཤིན་རྗེ་འབུམ་གྱི་(༡༢བ)
འཁོར་གྱིས་བསྐོར། ཁྱོད་ཀྱང་མདོས་ཀྱི་བདག་པོ་སྟེ། །མདོས་བདག་ལ་སོགས་མདོས་བཞེས་ཤིག །གླུད་བདག་ལ་སོགས་གླུད་བཞེས་ཤིག །དེ་གཤེགས་དེ་ནི་ད་རེ་རན། །ཕོ་བྲང་དེ་ནི་ད་སྐྱོད་འཚལ། །ཆིབས་ཁ་དེ་ནི་ད་སྒྱུར་འཚལ། །ཧཱུཾ། སྐྱོད་དོ་གཤེགས་སོ་བགེགས་དང་མ་སྲིན་ཚོགས། །ཕོ་བྲང་དེ་ནི་ད་སྐྱོད་འཚལ། །ཆིབས་ཁ་དེ་ནི་ད་སྒྱུར་འཚལ། །ནུབ་ཀྱི་སྒོ་བས་སྒོ་བྱེ་འཚལ། །ནུབ་ཕྱོགས་ཟངས་སྒོ་དམར་པོ་ཕྱེ། །ནུབ་ཀྱི་འཕྲང་བས་འཕྲང་སོལ་འཚལ། །རྟ་མགྲིན་རྒྱལ་པོས་འཕྲང་སོལ་འཚལ། །མདོས་འགྲོ་དེ་ནི་ནུབ་ཏུ་འགྲོ། །གླུད་འགྲིམ་དེ་ནི་ནུབ་ཏུ་འགྲིམ། །ནུབ་ཕྱོགས་རྒྱལ་པོ་སྤྱན་མི་བཟང་། །ཀླུ་དབང་འབུམ་གྱི་འཁོར་གྱིས་བསྐོར། ཁྱོད་ཀྱང་མདོས་ཀྱི་བདག་པོ་སྟེ། །མདོས་བདག་ལ་སོགས་མདོས་བཞེས་ཤིག །གླུད་བདག་ལ་སོགས་གླུད་བཞེས་ཤིག །ད་གཤེགས་དེ་ནི་ད་རེ་རན། །ཕོ་བྲང་དེ་ནི་ད་སྐྱོད་འཚལ། །ཆིབས་ཁ་དེ་ནི་ད་སྒྱུར་འཚལ། །ཧཱུཾ། སྐྱོད་དོ་གཤེགས་སོ་བགེགས་དང་མ་སྲིན་ཚོགས། །ཕོ་བྲང་དེ་ནི་ད་སྐྱོད་འཚལ། །ཆིབས་ཁ་དེ་ནི་ད་སྒྱུར་འཚལ། །བྱང་གི་སྒོ་བས་སྒོ་བྱེེ་འཚལ། །བྱང་ཕྱོགས་གཡུ་སྒོ་སྔོན་པོ་ཕྱེ། །བྱང་གི་འཕྲང་བས་འཕྲང་སོལ་འཚལ། །བདུད་རྩི་འཁྱིལ་བས་འཕྲང་སོལ་འཚལ། །མདོས་འགྲོ་དེ་ནི་བྱང་དུ་འགྲོ། །གླུད་འགྲིམ་དེ་ནི་བྱང་དུ་འགྲིམ། །བྱང་ཕྱོགས་རྒྱལ་པོ་རྣམ་ཐོས་སྲས། །གནོད་སྦྱིན་འབུམ་གྱི་འཁོར་གྱིས་བསྐོར། ཁྱོད་ཀྱང་མདོས་ཀྱི་བདག་པོ་སྟེ། །མདོས་བདག་ལ་སོགས་མདོས་བཞེས་ཤིག །གླུད་བདག་ལ་སོགས་གླུད་བཞེས་ཤིག །ད་གཤེགས་དེ་ནི་ད་རེ་རན། །ཕོ་བྲང་དེ་ནི་ད་སྐྱོད་འཚལ། །(༡༣ན)
ཆིབས་ཁ་དེ་ནི་ད་སྒྱུར་འཚལ། །དེ་ནས་མདོས་ཀྱི་ལམ་བསྟན་པ་ནི། ཧཱུཾ། སྲིད་པའི་མདོས་བདག་ཕོ་མོ་རྣམས༔ ལམ་བསྟན་ཤར་གྱི་ཕྱོགས་སུ་བསྟན༔ ཤར་གྱི་ཕྱོགས་སུ་མི་བསྟན་ན༔ དྲི་ཟ་ཕོ་མོ་མདོས་ལ་དགྱེས༔ དྲི་ཟ་ཕོ་མོ་བོད་ལྷང་ལྷང་༔ སྲིད་པའི་མདོས་ཆེན་ཁྱོད་སོང་ལ༔ བདག་ཅག་དཔོན་སློབ་འཁོར་བཅས་ལ༔ གནོད་པའི་རྐྱེན་ཆེན་མ་བཏང་ཞིག༔ ཆགས་ཆེ་ཉམ་ང་བསྒྱུར་དུ་གསོལ༔ ལམ་བསྟན་ཤར་ལྷོ་མཚམས་སུ་བསྟན༔ ཤར་ལྷོ་མཚམས་སུ་མི་བསྟན་ན༔ མེ་ལྷ་ཕོ་མོ་མདོས་ལ་དགྱེས༔ མེ་ལྷ་ཕོ་མོ་བོད་ལྷང་ལྷང་༔ སྲིད་པའི་མདོས་ཆེན་ཁྱོད་སོང་ལ༔ བདག་ཅག་དཔོན་སློབ་འཁོར་བཅས་ལ༔ གནོད་པའི་རྐྱེན་ཆེན་མ་བཏང་ཞིག༔ ཆགས་ཆེ་ཉམ་ང་བསྒྱུར་དུ་གསོལ༔ ལམ་བསྟན་ལྷོ་ཡི་ཕྱོགས་སུ་བསྟན༔ ལྷོ་ཡི་ཕྱོགས་སུ་མི་བསྟན་ན༔ གྲུལ་བུམ་ཕོ་མོ་མདོས་ལ་དགྱེས༔ གྲུལ་བུམ་ཕོ་མོ་བོད་ལྷང་ལྷང་༔ སྲིད་པའི་མདོས་ཆེན་ཁྱོད་སོང་ལ༔ བདག་ཅག་དཔོན་སློབ་འཁོར་བཅས་ལ༔ གནོད་པའི་རྐྱེན་ཆེན་མ་བཏང་ཞིག༔ ཆགས་ཆེ་ཉམ་ང་བསྒྱུར་དུ་གསོལ༔ ལམ་བསྟན་ལྷོ་ནུབ་མཚམས་སུ་བསྟན༔ ལྷོ་ནུབ་མཚམས་སུ་མི་བསྟན་ན༔ སྲིན་པོ་ཕོ་མོ་མདོས་ལ་དགྱེས༔ སྲིན་པོ་ཕོ་མོ་བོད་ལྷང་ལྷང་༔ སྲིད་པའི་མདོས་ཆེན་ཁྱོད་སོང་ལ༔ བདག་ཅག་དཔོན་སློབ་འཁོར་བཅས་ལ༔ གནོད་པའི་རྐྱེན་ཆེན་མ་བཏང་ཞིག༔ ཆགས་ཆེ་ཉམ་ང་བསྒྱུར་དུ་གསོལ༔ ལམ་བསྟན་ནུབ་ཀྱི་ཕྱོགས་སུ་བསྟན༔ ནུབ་ཀྱི་ཕྱོགས་སུ་མི་བསྟན་ན༔ ཀླུ་ལམ་(༡༣བ)
དཀར་པོ་མདོས་ལ་དགྱེས༔ ཀླུ་ལམ་དཀར་པོ་བོད་ལྷང་ལྷང་༔ སྲིད་པའི་མདོས་ཆེན་ཁྱོད་སོང་ལ༔ བདག་ཅག་དཔོན་སློབ་འཁོར་བཅས་ལ༔ གནོད་པའི་རྐྱེན་ཆེན་མ་བཏང་ཞིག༔ ཆགས་ཆེ་ཉམ་ང་བསྒྱུར་དུ་གསོལ༔ ལམ་བསྟན་ནུབ་བྱང་མཚམས་སུ་བསྟན༔ ནུབ་བྱང་མཚམས་སུ་མི་བསྟན་ན༔ རླུང་ལྷ་ཕོ་མོ་མདོས་ལ་དགྱེས༔ རླུང་ལྷ་ཕོ་མོ་བོད་ལྷང་ལྷང་༔ སྲིད་པའི་མདོས་ཆེན་ཁྱོད་སོང་ལ༔ བདག་ཅག་དཔོན་སློབ་འཁོར་བཅས་ལ༔ གནོད་པའི་རྐྱེན་ཆེན་མ་བཏང་ཞིག༔ ཆགས་ཆེ་ཉམ་ང་བསྒྱུར་དུ་གསོལ༔ ལམ་བསྟན་བྱང་གི་ཕྱོགས་སུ་བསྟན༔ བྱང་གི་ཕྱོགས་སུ་མི་བསྟན་ན༔ གནོད་སྦྱིན་ཕོ་མོ་མདོས་ལ་དགྱེས༔ གནོད་སྦྱིན་ཕོ་མོ་བོད་ལྷང་ལྷང་༔ སྲིད་པའི་མདོས་ཆེན་ཁྱོད་སོང་ལ༔ བདག་ཅག་དཔོན་སློབ་འཁོར་བཅས་ལ༔ གནོད་པའི་རྐྱེན་ཆེན་མ་བཏང་ཞིག༔ ཆགས་ཆེ་ཉམ་ང་བསྒྱུར་དུ་གསོལ༔ ལམ་བསྟན་བྱང་ཤར་མཚམས་སུ་བསྟན༔ བྱང་ཤར་མཚམས་སུ་མི་བསྟན་ན༔ དབང་ལྡན་ཕོ་མོ་མདོས་ལ་དགྱེས༔ དབང་ལྡན་ཕོ་མོ་བོད་ལྷང་ལྷང་༔ སྲིད་པའི་མདོས་ཆེན་ཁྱོད་སོང་ལ༔ བདག་ཅག་དཔོན་སློབ་འཁོར་བཅས་ལ༔ གནོད་པའི་རྐྱེན་ཆེན་མ་བཏང་ཞིག༔ ཆགས་ཆེ་ཉམ་ང་བསྒྱུར་དུ་གསོལ༔ ལམ་བསྟན་སྟེང་གི་ཕྱོགས་སུ་བསྟན༔ སྟེང་གི་ཕྱོགས་སུ་མི་བསྟན་ན༔ ཚངས་པ་ཕོ་མོ་མདོས་ལ་དགྱེས༔ ཚངས་པ་ཕོ་མོ་བོད་ལྷང་ལྷང་༔ སྲིད་པའི་མདོས་ཆེན་ཁྱོད་སོང་ལ༔ བདག་ཅག་དཔོན་སློབ་འཁོར་བཅས་ལ༔ གནོད་པའི་རྐྱེན་ཆེན་མ་བཏང་ཞིག༔
ཆགས་ཆེ་ཉམ་ང་བསྒྱུར་དུ་གསོལ༔ ལམ་བསྟན་འོག་གི་ཕྱོགས་སུ་བསྟན༔ འོག་གི་ཕྱོགས་སུ་མི་བསྟན་ན༔ ས་བདག་ཕོ་མོ་མདོས་ལ་དགྱེས༔ ས་བདག་ཕོ་མོ་བོད་ལྷང་ལྷང་༔ སྲིད་པའི་མདོས་ཆེན་ཁྱོད་སོང་ལ༔ བདག་ཅག་དཔོན་སློབ་འཁོར་བཅས་ལ༔ གནོད་པའི་རྐྱེན་ཆེན་མ་བཏང་ཞིག༔ ཆགས་ཆེ་ཉམ་ང་བསྒྱུར་དུ་གསོལ༔ ཀྱེ། ད་ནི་མདོས་ལ་ཁ་བསྒྱུར་འཚལ༔ ཧཱུཾ། ཕྱོགས་ཕྱོགས་ཉི་མ་ཤར་ཕྱོགས་ན༔ དུང་ལུང་དཀར་པོའི་ནང་ཤེད་ན༔ དུང་གི་རྟ་ཕོ་དགོ་བ་ཙམ༔ བང་རེ་མགྱོགས་ལ་རྒྱ་མ་རྒྱུག༔ དུང་གི་མི་ཕོ་ཆེ་བ་ཙམ༔ སྨྲ་རེ་མཁས་ཏེ་ལྡབ་མ་ལྡིབ༔ དེ་ན་མི་བཟང་རྟ་རེ་བཟང་༔ དེ་ན་འགྲོ་མཁས་གཏམ་རེ་སྡུག༔ དེ་ན་འཁོར་མང་གཡོག་རེ་ཧྲགས༔ དེ་ན་གསེར་བཟང་གཡུ་རེ་ཆེ༔ དེ་ན་སྟག་གཟིག་རི་མོ་བཀྲ༔ ཡ་བདུད་ཕོ་བྲང་དེ་རུ་སྐྱོད༔ མ་བདུད་ཕོ་བྲང་དེར་སྐྱོད་འཚལ༔ རྒྱལ་པོའི་ཕོ་བྲང་དེར་སྐྱོད་འཚལ༔ བཙན་གྱི་ཤོ་རྡེ་དེར་འགྲེམ་འཚལ༔ མ་མོ་འདུ་ས་དེ་རུ་འཚལ༔ ཐེའུ་བྲང་སྐྱས་ས་དེ་རུ་མཛོད༔ སྲིན་མོའི་མཚེར་ས་དེ་རུ་མཛོད༔ ཕྱག་གི་སོར་རྡོར་དེ་རུ་མཛོད༔ ཀུ་རེ་ཀྱལ་ག་དེ་རུ་མཛོད༔ འདི་ན་སྡོད་པའི་ཡུལ་མ་མཆིས༔ མདོས་འདི་འབུལ་ལོ་སླར་མ་ལོག༔ གླུད་འདི་འབུལ་ལོ་སྒབ་མ་ངན༔ ཚེ་འདི་འགུགས་སོ་སྙན་མ་གསང་༔ ཞེས་གསེར་སྐྱེམས་བཏང་ངོ་༔ ཀྱེ། ཕྱོགས་ཕྱོགས་ཉི་མ་ལྷོ་ཕྱོགས་ན༔ གསེར་ལུང་སེར་པོའི་ནང་ཤེད་ན༔ གསེར་གྱི་རྟ་ཕོ་དགོ་བ་ཙམ༔ བང་རེ་མགྱོགས་ཏེ་རྒྱ་མ་རྒྱུག༔ གསེར་གྱི་མི་ཕོ་ཆེ་བ་ཙམ༔ སྨྲ་རེ་མཁས་ཏེ་ལྡབ་མ་ལྡིབ༔ དེ་ན་མི་བཟང་རྟ་རེ་བཟང་༔ དེ་ན་འགྲོ་མཁས་གཏམ་རེ་སྡུག༔ དེ་ན་འཁོར་མང་གཡོག་རེ་ཧྲགས༔ དེ་ན་གསེར་བཟང་གཡུ་རེ་ཆེ༔ དེ་ན་སྟག་གཟིག་རི་མོ་བཀྲ༔ ཡ་བདུད་ཕོ་བྲང་དེ་རུ་སྐྱོད༔ མ་བདུད་ཕོ་བྲང་དེར་སྐྱོད་འཚལ༔ རྒྱལ་པོའི་ཕོ་བྲང་དེར་སྐྱོད་འཚལ༔ བཙན་(༡༤བ)
གྱི་ཤོ་རྡེ་དེར་འགྲེམ་འཚལ༔ མ་མོའི་འདུ་ས་དེ་རུ་འཚལ༔ ཐེའུ་བྲང་སྐྱས་ས་དེ་རུ་མཛོད༔ སྲིན་མོའི་མཚེར་ས་དེ་རུ་མཛོད༔ ཕྱག་གི་སོར་རྡོར་དེ་རུ་མཛོད༔ ཀུ་རེ་ཀྱལ་ག་དེ་རུ་མཛོད༔ འདི་ན་སྡོད་པའི་ཡུལ་མ་མཆིས༔ མདོས་འདི་འབུལ་ལོ་སླར་མ་ལོག༔ གླུད་འདི་འབུལ་ལོ་སྒབ་མ་ངན༔ ཚེ་འདི་འགུགས་སོ་སྙན་མ་གསང་༔ ཀྱེ། ཕྱོགས་ཕྱོགས་ཉི་མའི་ནུབ་ཕྱོགས་ན༔ ཟངས་ལུང་དམར་པོའི་ནང་ཤེད་ན༔ ཟངས་ཀྱི་རྟ་ཕོ་དགོ་བ་ཙམ༔ བང་རེ་མགྱོགས་ལ་རྒྱ་མ་རྒྱུག༔ ཟངས་ཀྱི་མི་ཕོ་ཆེ་བ་ཙམ༔ སྨྲ་རེ་མཁས་ཏེ་ལྡབ་མ་ལྡིབ༔ དེ་ན་མི་བཟང་རྟ་རེ་བཟང་༔ དེ་ན་འགྲོ་མཁས་གཏམ་རེ་སྡུག༔ དེ་ན་འཁོར་མང་གཡོག་རེ་ཧྲགས༔ དེ་ན་གསེར་བཟང་གཡུ་རེ་ཆེ༔ དེ་ན་སྟག་གཟིག་རི་མོ་བཀྲ༔ ཡ་བདུད་ཕོ་བྲང་དེ་རུ་སྐྱོད༔ མ་བདུད་ཕོ་བྲང་དེར་སྐྱོད་འཚལ༔ རྒྱལ་པོའི་ཕོ་བྲང་དེར་སྐྱོད་འཚལ༔ བཙན་གྱི་ཤོ་རྡོ་དེར་འགྲེམ་འཚལ༔ མ་མོའི་འདུ་ས་དེ་རུ་འཚལ༔ ཐེའུ་བྲང་སྐྱས་ས་དེ་རུ་མཛོད༔ སྲིན་མོའི་མཚེར་ས་དེ་རུ་མཛོད༔ ཕྱག་གི་སོར་རྡོར་དེ་རུ་མཛོད༔ ཀུ་རེ་ཀྱལ་ག་དེ་རུ་མཛོད༔ འདི་ན་སྡོད་པའི་ཡུལ་མ་མཆིས༔ མདོས་འདི་འབུལ་ལོ་སླར་མ་ལོག༔ གླུད་འདི་འབུལ་ལོ་སྒབ་མ་ངན༔ ཚེ་འདི་འགུགས་སོ་སྙན་མ་གསང་༔ ཀྱེ། ཕྱོགས་ཕྱོགས་ཉི་མའི་བྱང་ཕྱོགས་ན༔ གཡུ་ལུང་སྔོན་པོའི་ནང་ཤེད་ན༔ གཡུ་ཡི་རྟ་ཕོ་དགོ་བ་ཙམ༔ བང་རེ་མགྱོགས་ལ་རྒྱ་མ་རྒྱུག༔ གཡུ་ཡི་མི་ཕོ་ཆེ་བ་ཙམ༔ སྨྲ་རེ་མཁས་ཏེ་ལྡབ་མ་ལྡིབ༔ དེ་ན་མི་བཟང་རྟ་རེ་(༡༥ན)
བཟང་༔ དེ་ན་འགྲོ་མཁས་གཏམ་རེ་སྡུག༔ དེ་ན་འཁོར་མང་གཡོག་རེ་ཧྲགས༔ དེ་ན་གསེར་བཟང་གཡུ་རེ་ཆེ༔ དེ་ན་སྟག་གཟིག་རི་མོ་བཀྲ༔ ཡ་བདུད་ཕོ་བྲང་དེ་རུ་སྐྱོད༔ མ་བདུད་ཕོ་བྲང་དེར་སྐྱོད་འཚལ༔ རྒྱལ་པོའི་ཕོ་བྲང་དེར་སྐྱོད་འཚལ༔ བཙན་གྱི་ཤོ་རྡེ་དེར་འགྲེམ་འཚལ༔ མ་མོའི་འདུ་ས་དེ་རུ་འཚལ༔ ཐེའུ་བྲང་སྐྱས་ས་དེ་རུ་མཛོད༔ སྲིན་མོའི་མཚེར་ས་དེ་རུ་མཛོད༔ ཕྱག་གི་སོར་རྡོར་དེ་རུ་མཛོད༔ ཀུ་རེ་ཀྱལ་ག་དེ་རུ་མཛོད༔ འདི་ན་སྡོད་པའི་ཡུལ་མ་མཆིས༔ མདོས་འདི་འབུལ་ལོ་སླར་མ་ལོག༔ གླུད་འདི་འབུལ་ལོ་སྒབ་མ་ངན༔ ཚེ་འདི་འགུགས་སོ་སྙན་མ་གསང་༔ གསེར་སྐྱེམས་གཏོར་རོ༔ ཟོར་ལམ་བསྟན་པ་ནི་འདི་སྐད་དོ༔ བྷྱོ། ཤར་ལྷོ་ནུབ་དང་བྱང་ཕྱོགས་སུ༔ སྟེང་འོག་ཕྱོགས་མཚམས་ཐམས་ཅད་དུ༔ འཕེན་ནོ་འཕེན་ནོ་ཟོར་འཕེན་ནོ༔ མཐོ་བ་རྣམས་ནི་ཞབས་སྡུས་ཤིག༔ དམའ་བ་རྣམས་ནི་དབུ་སྨད་ཅིག༔ ཀླུ་གཉན་རྣམས་ནི་དབུ་ཆུམ་ཞིག༔ བར་པ་རྣམས་ནི་སྐུ་གཟུར་ཅིག༔ ཡུལ་ལྷ་ཡུལ་བཙན་སྐུ་གཟུར་ཅིག༔ འཕྲང་པ་རྣམས་ནི་འཕྲང་སོལ་ཅིག༔ སྒོ་བ་རྣམས་ནི་སྒོ་ཕྱེ་ཞིག༔ ཁྲག་གི་དེ་ནི་ཟོར་འཕངས་པས༔ སྐུ་ལ་དེ་ནི་ཕོག་ཀ་རེ༔ ཡུངས་ཀར་གྱི་ནི་ཟོར་འཕངས་པས༔ སྐུ་ལ་དེ་ནི་ཕོག་ཀ་རེ༔ མཚེ་ཡི་དེ་ནི་ཟོར་འཕངས་པས༔ སྐུ་ལ་དེ་ནི་ཕོག་ཀ་རེ༔ གཏོར་མའི་དེ་ནི་ཟོར་འཕངས་པས༔ སྐུ་ལ་དེ་ནི་ཕོག་ཀ་རེ༔ ཁྲག་ཟོར་དེ་ནི་མདའ་ལས་ཚ༔ ཡུངས་(༡༥བ)
ཟོར་དེ་ནི་རྦབ་ལས་དྲག༔ མཚེ་ཟོར་དེ་ནི་མདུང་ལས་རྣོ༔ གོང་ཟོར་དེ་ནི་ཐོག་ལས་དྲག༔ དོ་ནུབ་ཟོར་ལམ་སྒོ་ཕྱེ་ཞིག༔ བྷྱོ། རྣལ་འབྱོར་གླིང་བཞིའི་དཀྱིལ་འཁོར་ནས༔ སྟག་སྲིན་དེ་ནི་ཟོར་བའི་གདོང་༔ དབུ་དགུ་ཕྱག་ནི་བཞི་པ་སྟེ༔ དོ་ནུབ་ཟོར་གྱི་དཔུང་མཛོད་ཅིག༔ ཟོར་བདག་ཆེན་པོ་གཤེགས་སུ་གསོལ༔ དེ་ནས་ཟོར་ལམ་བསྟན་པ་ནི༔ བྷྱོ། ཟོར་ལམ་ཤར་གྱི་ཕྱོགས་སུ་བསྟན༔ ཤར་གྱི་ཕྱོགས་སུ་ཟོར་འཕངས་པས༔ མ་མོའི་ཁྲག་ཟོར་ཉིན་ཆེས་སོ༔ དྲག་པོའི་དཔལ་ཟོར་ལྟོ་ཆེས་སོ༔ ཤར་གྱི་དྲི་ཟ་ཕོ་མོ་ནི༔ དྲི་ཟ་ཕོ་ནི་བུབ་ཅིང་བརྒྱལ༔ དྲི་ཟ་མོ་ནི་ཁྲག་ཏུ་སྐྱུག༔ དྲི་ཟ་སྤུན་དགུ་དམྱལ་ཐག་བཅད༔ སྡང་བ་དགྲ་ལ་འཕངས་པའི་ཚེ༔ ཐལ་བའི་རྡུལ་དུ་བརླགས་པར་བྱ༔ གནོད་པའི་བགེགས་ལ་འཕངས་པའི་ཚེ༔ གནམ་ལྷ་དཀར་པོ་ཁྲག་ཏུ་སྐྱུག༔ ཅེས་ཟོར་ལམ་བསྟན་ན༔ རྒྱས་པ་བྱེད་ན་ཕྱོགས་བཞི་ལའང་བྱའོ༔ ཕྱི་སྒོ་ཡན་ལ་ཐུན་བྲབ་དང་གུ་གུལ་གྱི་དུད་པ་གཏོང་། ཕྱི་རོལ་ཏུ་སླར་ཡང་གསེར་སྐྱེམས་བཏང་། འདྲེ་ལྔ་བདུད་གཅོད་དམ་ཐེབས་ཀྱི་སར་མདོས་གཏོང་། ཟོར་བསྐུལ་དང་བཅས་ཟོར་བརྡེག བསྟན་མ་སྐྱོང་། སྲུང་འཁོར་བསྒོམ། སྒོ་དྲུང་དུ་བྲོ་བརྡུང་། ནང་དུ་ལོག་ནས། བཅུ་བདུན་པ་སྨོན་ལམ་གདབ་པ་ནི། ཐལ་མོ་མེ་ཏོག་དང་བཅས་ལ༔ ཨཱོཾ་གྲུབ་པར་གྱུར་ཅིག་རྗེ་བཙུན་ཐུགས་རྗེ་ཅན༔ འཕགས་མ་ཁྱེད་ལ་བསྙེན་སྒྲུབ་མཆོག་པ་དང་། །བསྟོད་ཅིང་གསོལ་བ་བཏབ་པའི་མཐུ་བྱིན་གྱིས༔ དེང་ནས་བཟུང་སྟེ་བྱང་ཆུབ་མ་ཐོབ་པར༔ འཕགས་མ་ཁྱེད་དང་(༡༦ན)
རྟག་ཏུ་མི་འབྲལ་ཞིང་༔ ནད་མེད་ཚེ་དབང་ལོངས་སྤྱོད་འཕེལ་པ་དང་༔ བྱང་ཆུབ་བསྒྲུབ་ལ་བར་ཆད་མི་འབྱུང་ཞིང་༔ ས་དང་ལམ་གྱི་ཡོན་ཏན་རབ་རྫོགས་ནས༔ བདག་གཞན་དོན་གཉིས་ལྷུན་གྱིས་གྲུབ་པ་ཡི༔ རྣམ་མཁྱེན་རྫོགས་པའི་སངས་རྒྱས་ཐོབ་པར་ཤོག༔ ཅེས་ལན་གསུམ་བྱས་ནས༔ མདུན་སྐྱེད་ཀྱི་རྟེན་ལ་མཆོད་བསྟོད་བྱ། ཡི་གེ་བརྒྱ་པ་བརྗོད། ནོངས་པ་བཟོད་པར་གསོལ། རྟེན་ཡོད་པ་རྣམས་ལ་བརྟན་བཞུགས་དང་། མེད་པ་རྣམས་ལ་གཤེགས་གསོལ་བྱ། སྨོན་ལམ་ནི། བདག་གིས་དུས་གསུམ་བསགས་པ་ཡི༔ བསྙེན་སྒྲུབ་ལ་སོགས་དགེ་ཚོགས་དང་༔ གཞན་ཡང་དགེ་སྤྱད་བསྐུལ་བཏབ་དང་༔ རྗེས་སུ་ཡི་རང་ལས་བྱུང་ཞིང་༔ འཕགས་མ་ཁྱེད་མཆོད་བྱིན་རླབས་ཀྱིས༔ ནད་མེད་ཚེ་རིང་དཔལ་དང་གྲགས༔ བཀྲ་ཤིས་བདེ་ལེགས་མཆོག་ཐོབ་ཅིང་༔ བདག་གཞན་དོན་གཉིས་མཐར་ཕྱིན་ཤོག༔ ཅེས་ལན་གསུམ་རྗེས་སུ་མེ་ཏོག་འཐོར་ཞིང་བཀྲ་ཤིས་བྱ༔ ཧོ་དུས་གསུམ་རྒྱལ་བ་ཀུན་གྱི་ཡུམ་མཆོག་མ༔ དགོས་འདོད་རེ་སྐོང་ཡིད་བཞིན་ནོར་བུའི་མཆོག༔ བཀྲ་ཤིས་ཀུན་གྱི་མཆོག་བརྙེས་དོན་གྲུབ་མ༔ དཔལ་ལྡན་ཐོག་མ་བར་དང་མཐར་དགེ་བའི༔ འཕྲིན་ལས་ཀུན་འགྲུབ་མྱུར་མ་དཔའ་མོ་སྟེ༔ །རྗེ་བཙུན་འཕགས་མ་སྒྲོལ་མའི་བཀྲ་ཤིས་ཤོག༔ ཅེས་དང་། གཞན་ཡང་བཀྲ་ཤིས་སྨོན་ལམ་ཅི་རིགས་པ་བྱའོ། །རྗེ་བཙུན་སེང་ལྡེང་ནགས་སྒྲོལ་ལ་བརྟེན་ཏེ། །ནད་གདོན་ཟུག་རྡུ་དྲུངས་ནས་འབྱིན་པའི་ཐབས། །མདོས་(༡༦བ)
ཆོག་མཐོ་རིས་ཆུ་བོ་བརྒྱུད་ལྡན་གྱི། །བཞེད་སྲོལ་མེས་པོའི་རལ་བའི་ཀླུང་ལས་ཕབ། །སྦྱོར་དངོས་རྗེས་ཚང་ལག་ལེན་མི་ཤེས་པར། །འོལ་ཆོད་རྫུན་གཏམ་བསྒྲིགས་པའི་སྨིག་རྒྱུ་ལ། །བསིལ་བྱེད་ཉལ་འགྲོར་འཁྲུལ་པའི་སྐྱེ་རྒུ་རྣམས། །སྐོམ་ཚད་གདུང་བས་མྱ་ངམ་ཐང་འཁྱམས་དོགས། །དེ་ཕྱིར་མཁས་གྲུབ་ཚད་མེད་ཞལ་ལུང་ལས། །འོངས་པའི་ཡི་གེ་འདི་ལ་ཉེར་བརྟེན་དང་། །གླུ་མཁན་འཕྱོན་མའི་གར་དང་མི་འདྲ་བའི། །གོ་དོན་ལག་པའི་རྩེ་མོར་ད་གདོད་སོན། །དགེ་བས་རྗེ་བཙུན་བཅོམ་ལྡན་འདས་མ་ཡིས། །ཚེ་རབས་ཀུན་ཏུ་ལྷག་པའི་ལྷ་མཛད་ནས། །འཇིགས་ཆེན་བརྒྱད་དང་སྒྲིབ་གཉིས་བག་ཆགས་དགྲ། །ཕ་མཐར་བྱེད་པའི་སྐལ་བར་མྱུར་ལྡན་ཤོག །ཁྱད་པར་གངས་རིས་བསྐོར་བའི་སྨན་ལྗོངས་ཀྱི། །ལུས་ཅན་རྒྱུད་ལ་ལྷ་ཁྱོད་ཐུགས་རྗེའི་རྒྱུན། །འཇུག་པར་ཞལ་གྱིས་འཆེས་པ་འགྱུར་མེད་དུ། །མངོན་སུམ་ཉམས་སུ་མྱང་བའི་དགེ་ལེགས་སྩོལ། །ཞེས་རྗེ་བཙུན་སེང་ལྡེང་ནགས་སྒྲོལ་གྱི་སྒོ་ནས་བར་ཆད་བཟློག་པའི་མདོས་ཀྱི་གདམས་པ་དཔལ་དཱི་པཾ་ཀཱ་རས་འབྲོམ་ཆོས་ཀྱི་རྒྱལ་པོར་གནང་བ་བཀའ་གདམས་ཕྱོགས་ནས་རིམ་གྱིས་བརྒྱུད་ནའང་བར་སྐབས་ཕྱག་ལེན་ས་རྙིང་གི་ཕྱོགས་སུ་དར་ཞིང་། བྱ་རྒྱུད་ཀྱི་རྗེ་བཙུན་མའི་སྒྲུབ་ཐབས་སོར་བཞག་ལ་བརྟེན་པའང་ཁུངས་བཙུན་ཞིང་མི་ལེགས་པ་མེད་ཀྱང་མདོས་ཆོག་གི་རིགས་འདི་སྔ་འགྱུར་གྱི་འཕྲིན་ལས་ལ་བརྟེན་ན་ཁོག་ཕུགས་པས་ཁུངས་བཙུན་གྱི་ཕྱག་བཞེས་ལ་མཛད་སྲོལ་ཡོད་པས་བདག་བསྐྱེད་རིགས་འཛིན་རཏྣ་གླིང་པའི་གཏེར་བྱོན་འཚོ་རྒྱལ་སྐོར་གསུམ་གྱི་ནང་སྒྲུབ་ཡིད་བཞིན་ནོར་བུ་ལ་བརྟེན།
མདུན་སྐྱེད་དང་མདོས་ཆོག་སྐོར་ཡིག་རྙིང་འཁྲུགས་སྡེབས་སུ་བྱས། མདོས་ཟོར་གྱི་སྒོ་དབྱེ་བ་སོགས་སློབ་དཔོན་ཆེན་པོས་མཛད་པའི་མདོས་ནས་བཀང་སྟེ་ཆ་ལག་ཚང་བར་ཕྱོགས་གཅིག་ཏུ་བསྒྲིགས་པའི་མདོས་ཆོག་མཐོང་བས་དོན་གྲུབ་འདི་ནི་རང་གཞན་མང་པོར་ཕན་འདོད་ཀྱི་བློས་མཚམས་སྦྱར་ཏེ་ཟ་ཧོར་གྱི་བན་རྒན་བཞད་པ་རྩལ་གྱིས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ།། །།སརྦ་མངྒ་ལཾ།