ཚངས་སྲས་བཞད་པའི་རྡོ་རྗེའི་གསུང་འབུམ་ཐོར་བུ་ལས་དཔལ་ལྡན་འདོད་ཁམས་དབང་ཕྱུག་དམག་ཟོར་རྒྱལ་མོ་ལ་བསྟོད་པ་ནོར་བུ་དབང་གི་རྒྱལ་པོའི་དོ་ཤལ།
ཚངས་སྲས་བཞད་པའི་རྡོ་རྗེའི་གསུང་འབུམ་ཐོར་བུ་ལས་དཔལ་ལྡན་འདོད་ཁམས་དབང་ཕྱུག་དམག་ཟོར་རྒྱལ་མོ་ལ་བསྟོད་པ་ནོར་བུ་དབང་གི་རྒྱལ་པོའི་དོ་ཤལ་ཞེས་བྱ་བ་བཞུགས་སོ། །
ན་མ་མྶཱ་ར་སྭ་སྟ་ཡེ། འགྱུར་མེད་ཆོས་དབྱིངས་གསེར་ལྡན་ཡངས་པའི་དབུས། །གསང་གསུམ་མི་ཟད་ཡོན་ཏན་ལྷུན་པོའི་སྤོར། །འཇིགས་རུང་ལྷ་དབང་དཔུང་ཚོགས་འཕྲུལ་གྱི་སྒོས། །དགྲ་བགེགས་སྔོན་གྱི་ལྷ་རྣམས་འཇོམས་ལ་བསྟོད། །རབ་དམར་ཁྲག་གི་ན་ཀྲའི་གྲོང་ཁྱེར་ལས། །རབ་འཇིགས་འབབ་ལྡན་འཁྲིགས་ཤིང་ཆེན་འཁྲུགས་པ། །བར་མཐོ་སྲིད་རྩེར་འཕྱུང་ལྟའི་སྒྲ་ཆེན་པོས། །རབ་རྨོངས་བདུད་སྡེ་གདུང་པའི་ཅ་ཅོ་སྒྲོག །སྲ་བརྟན་འོད་སྲུངས་བྱིན་ཡང་གཡོ་བྱེད་པའི། །ཤུགས་དྲག་རྡུལ་གྱི་རྒྱལ་མཚན་འཚུབ་མ་ཡིས། །ས་འཛིན་དབང་པོ་འཇིག་ན་མི་རུང་ཞེས། །བཅུ་གཉིས་ཁྱིམ་གྱི་ཞགས་པས་རིང་དུ་བཅིངས། །མདོག་ལྔའི་འགྲོད་པའི་ཤུགས་ཀྱང་དུབ་བྱེད་ཅིང་། ཁྱུ་བདག་ལ་འགྲན་ཐེག་པའི་དབང་པོ་ལ། །འཕོང་གྲོགས་རུས་པའི་གཟེབ་དང་ཀ་ནེའི་སྒྲས། །ལེགས་སྤུད་མི་ཐོད་སྲབ་སྐྱོགས་རྣམ་པར་འཕྱང་། །ཀ་ཀ་ནི་ལའི་རྡུལ་རྩེགས་ལྷུན་པོ་ནི། །སྟང་ཟིལ་ལན་བརྒྱར་བྱུགས་ལ་སྣང་གཏེར་གྱི། །ཚ་ཟེར་གོས་ཀྱིས་ཀླུབས་ན་ཁྱོད་ཀྱི་སྐུའི། །ཆ་ཤས་ཙམ་ལ་འགྲན་པའི་དཔེ་རུ་བསྟན། །གཏུམ་དྲག་རབ་རྔམ་གཡར་ངོ་བསྟན་ཙམ་(༢ན)
གྱིས། །སྲིད་གསུམ་རིགས་ལྡན་ཙིཏྟ་བཀས་གྱུར་ན། །ར་མ་ཎ་ཡིས་ནོར་སྦྱིན་གཅུང་པོ་དང་། །ལྔ་པའི་ལམ་དུ་གཏམ་སྨྲ་རྫུན་པའི་གཏམ། །དམར་སེར་གཙུག་ཕུད་འཁྱིལ་པའི་གཟི་འོད་ཀྱི། །ཚ་གདུང་འཇིགས་པས་འཕུར་བྱེད་ཚོགས་རྣམས་ཀུན། །བསྲུང་ཕྱིར་ཆུ་ཤེལ་དབང་པོའི་དཀྱིལ་འཁོར་གྱིས། །མངོན་པར་བརྒྱན་གྱི་ཟོལ་ལ་བསྟེན་པར་ངེས། །ཞལ་ཁྱིམ་འབྲས་ལྡན་དུས་ཀྱི་ཀུན་གསལ་དབུས། །སྣང་བྱེད་རྟ་བདུན་དཀྱིལ་འཁོར་མངོན་བསལ་ཟས། །ཇི་སྙེད་ཤེས་བྱའི་འདབ་སྟོང་བཞད་པ་ལས། །ལྐོག་གྱུར་ཐུན་གསུམ་མ་དེ་གང་དུ་བྲོས། །འདྲེན་བྱེད་འགྲམ་དཀྱུས་རབ་གསལ་བཞིན་སྣོད་ངོས། །ཐུན་མཚམས་སྒེག་མོ་འཁྱུག་པའི་གཟུགས་ཀྱི་འཕྲུལ། །འགོག་མེད་རྟག་ཏུ་ཤར་བའི་ལྕགས་ཀྱུ་ཡིས། །པི་ཤྭ་ཀརྨའི་ཡིད་ཀྱིས་ཁེངས་པ་ཕྲོགས། །མི་སྡུག་ཞལ་གྱི་ས་འཛིན་དཀར་པོ་ལས། །དམ་ཉམས་ཁྲག་གི་ཡན་ལག་བརྒྱད་ལྡན་ཆབ། །ཤུགས་དྲག་ཆེས་ཆེར་བབས་པའི་དབུ་ཕྲེང་གིས། །སོ་སྐྱེའི་གོས་སེར་འགྲོད་བྱེད་རྣམ་པར་བརླན། །རབ་གཙིགས་མཆེ་བའི་ཆུ་འཛིན་འཁྲིགས་པའི་དབུས། །གསུང་གི་ང་རོ་དབྱར་གྱི་(༢བ)
རྔ་གསངས་དང་། །རོ་འཛིན་མཇུག་བརྒྱ་རབ་འཁྱུག་རིགས་སྔགས་ཀྱི། །རྡོ་རྗེའི་ཟེགས་མས་ལོག་འདྲེན་བྲག་རི་འཇོམ། །འཛམ་བུ་ན་ད་ལས་གྲུབ་རྣ་རྒྱན་སྟེང་། །གཙུག་ཕུད་ལྔ་བ་འཁྱིལ་པའི་རྣམ་འགྱུར་གྱིས། །ས་གསུམ་དྲེགས་ལྡན་གཉིས་འཐུང་དབང་པོའི་ཚོགས། །འཇིགས་ཏེ་ལྔ་པའི་གྲོང་དུ་བྲོས་ཀྱིས་དོགས། །གཡོན་ཕྱོགས་ཐོས་འཛིན་དབང་པོ་མཛེས་བྱེད་པའི། །རླུང་གི་ཟས་ཅན་སྨྲ་བའི་འདབ་སྟེགས་ལས། །མི་ཟད་ཧ་ལའི་ཞགས་པས་བཅིངས་དོགས་ནས། །སྦྱིན་སྐྱེས་སྟོབས་ལྡན་ས་བོན་སྐྱབས་སུ་བསྟེན། །ཅོད་པན་རབ་དཀར་ཐོད་སྐམ་ལྔ་ཡི་ཕྲེང་། །མི་སྡུག་ཨཎྜའི་སྲད་བུ་ལ་བརྒྱུས་ཏེ། །ཡིད་འོང་སྣ་ཚོགས་རིན་ཆེན་ཕྲེང་བ་ཡི། །བཀོད་ལེགས་འདྲེན་བྱེད་དགའ་སྟོན་ཨེ་མ་མཚར། །འབྲུག་སྒྲ་མངལ་འཛིན་ལུས་འདེགས་ལས་གྲུབ་པའི། །རྣམ་བཀྲ་ངག་གི་མཚོན་ཆའི་རྫིང་རིང་རྒྱན། །ནོར་བུའི་ཏོག་གིས་མཚན་པར་རྒྱུ་སྐར་ཚོགས། །བལྟ་ཕྱིར་ལྷ་ཡི་ལམ་ལས་འོངས་པ་འདྲ། གནམ་ལྕགས་རྡོ་རྗེ་འབར་བའི་འཆང་བཟུང་ཅན། །བདུད་དཔུང་ཕྱེ་མར་འཐག་པའི་དབྱིག་པ་ནི། །འཛིན་བྱེད་གཡས་པར་མཁའ་ལ་ཕྱར་ཙམ་གྱིས། །ས་གསུམ་མ་ལུས་གཅིག་ཅར་འདར་བར་ངེས། །ལོག་འདྲེན་མགོ་བོ་བྲེགས་པའི་ཀ་པཱ་ལར། །དམར་ནག་ཁྲག་གིས་རབ་གང་ཕྱག་གཡོན་གྱིས། །ཞལ་དུ་བཏབ་པས་གངྒ་མ་གཉིས་ལ། །ཡན་ལག་མཆོག་དང་མི་ལྡན་གཏམ་གྱིས་རྫུ། །རྣམ་མང་གདུལ་བྱའི་བློ་ཡི་མེ་(༣ན)
ལོང་ངོས། །སྣ་ཚོགས་སྤྲུལ་བསྒྱུར་སྟོན་པའི་གཟུགས་སྐུའི་ཁྱོན། །ཚད་མས་གཞལ་ནས་མིན་འདི་ཞིང་བསལ་གྱིས། །ཚད་ལྡན་སྟོན་གྱི་གོས་སུ་རུང་བ་མཚར། །གང་གི་བྱམས་བརྩེའི་བཅུ་གཉིས་བདག་པོ་ཡིས། །ལུས་ཅན་སྦྲང་རྩིའི་རྒྱལ་མཚན་སྐྱོང་སྟོན་ཡང་། །རེ་སྟས་སྦགས་པའི་བམ་ཆེན་མགོ་རློན་གྱི། །མཁའ་དབང་གྲངས་ལྡན་འཕྲེང་འདི་བཞད་གད་རྒྱུ། །བསུས་ཁྱིམ་འཇིགས་བྲལ་རབ་མཐའི་བ་གམ་ལ། །ལེགས་བྲིས་དཔུང་ཚོགས་རྣམ་བཞིའི་གནས་བཅས་ནས། །བཅུད་བྲལ་མིང་གི་ལྷག་མར་གཏང་བའི་ཚུལ། །གསལ་བར་སྟོན་ཕྱིར་ནམ་མཁའི་ནོར་བུས་བརྒྱན། །ཕྱི་ནང་གསལ་འགྲིབ་མེད་པའི་ཡེ་ཤེས་སྐུར། རབ་བཀྲ་སྟག་ལྤགས་དར་ནག་ལྷུབ་ལྷུབ་དང་། །འཁྱོག་འགྲོ་ཟུང་གི་གསེར་ག་བདུན་པ་ཡིས། །མངོན་པར་བརྒྱན་པའི་བྱེད་པོ་སུ་ཞིག་ཡིན། ཁྲམ་ཤིང་ཤོ་དྷེ་མཚོན་གྱི་དྲུ་གུ་སོགས། །འཇིགས་རུང་ཤ་ཀྲའི་དཔལ་མགྲིན་སྣང་བྱེད་མེས། །དགྲ་བགེགས་ཆུ་སྲིན་རྒྱལ་མཚན་ཅན་གྱི་ལུས། །ལྷག་མར་བསྲེག་པའི་གུལ་བྱུང་སྟོབས་ནི་རྨད། །རྐྱང་སེར་རིགས་གཉིས་སྟེང་དུ་ཞབས་པད་ཟུང་། །སྐྱིལ་ཀྲུང་ཕྱེད་པའི་ཚུལ་གྱིས་མཁའ་དབྱིངས་ལ། །མངོན་པར་འཕགས་པའི་ཤུགས་དྲག་གར་ཉམས་ཀྱིས། །རྒྱ་ཆེན་སྲིད་གསུམ་ཚད་ཀྱིས་འཇལ་བ་བཞིན། ཁྱོད་སྐུ་རབ་དངས་ལྷ་ཡི་ལམ་ཡངས་པར། མཚན་དཔེའི་གཟི་བྱིན་དབང་གཞུས་ལེགས་སྤྲས་ན། །རིན་ཆེན་རུས་(༣བ)
པ་བྲང་འགྲོའི་ཆུ་ཁུར་གྱི། །སྣ་ཚོགས་རྒྱན་གྱིས་སྤུད་ལ་མཚར་དུ་ཅི། །མིག་གིས་བལྟ་བར་བཟོད་དཀའི་དྲག་མོའི་སྐུར། །བསྟན་པ་ཙམ་གྱིས་སྟོབས་ལྡན་དྲེགས་པའི་ཚོགས། །སྙེམས་པ་བཏང་ནས་ཁྱོད་ཀྱི་བྲན་བགྱི་ན། །སྟོང་གསུམ་མི་མཇེད་བདག་པོ་གང་དུ་མཆིས། །རབ་དཀར་རི་དྭགས་རྒྱན་གྱིས་སྭ་བའི་ལུས། །མཛེས་སྡུག་ཆ་ཤས་རྫོགས་ལ་སྲེད་བྲལ་ཞེས། །མི་སྡུག་སྣང་གཏེར་གཟུགས་སྐུའི་དཀྱིལ་འཁོར་གྱིས། །ལོག་འདྲེན་སྲ་སྨོས་ཚལ་ཀུན་གཅིག་ཅར་ཟུམ། །སེང་གེ་མོའི་བུའི་སྟོབས་ཀྱང་ཟིལ་གནོན་པའི། །མིག་སྨན་འབུམ་སྡེའི་མདངས་ཅན་འཇིགས་གཟུགས་ལ། །སྐྲག་སྟེ་ཆོས་ཀུན་སྟོང་པའི་མཁར་བྲོོས་པས། །ཡེ་ཤེས་མེ་ལྕེ་འབར་བས་རྗེས་སུ་སྙེགས། །ཐོས་འཛིན་བདུད་རྩིའི་ལང་ཚོ་འཆི་མེད་དབྱངས། །སྙན་བརྗིད་ཡན་ལག་དྲུག་ཅུའི་ཕུལ་བྱུང་གསུང་། །འཇིགས་རུང་ང་རོ་དྲག་པོས་བདུད་སྡེའི་སྙིང་། །དུམ་བུར་གས་ཀྱང་རྣ་བའི་ཁུང་བུ་འགེབས། །ཆོས་དབྱིངས་འདམ་སྐྱེས་རྫིང་བུའི་བ་གམ་དབུས། །གང་ཐུགས་དཔལ་ཁྱིམ་ཟེའུ་འབྲུའི་སྒྱུ་རྩལ་སྤྱོད། །བདེ་ཆེན་བུང་བའི་རི་དྭགས་མིག་ཅན་མ། །ལིང་གཅུགས་གྲོགས་སུ་བཀུག་སྟེ་རྩེ་དགར་རོལ། །རབ་འབྱམས་དུས་གསུམ་རྒྱལ་བ་མ་ལུས་པའི། །གསང་གསུམ་ལས་བྱུང་མཁྱེན་བརྩེ་ནུས་མཐུའི་ཚོགས། གཅིག་བསྡུས་གང་གི་ཡོན་ཏན་ཕུང་པོའི་ཁུར། །གྲག་པའི་གསེར་ལྡན་ལུས་ནི་ཨེ་མ་བསྲ། །ལས་བཞིའི་འཕྲིན་ལས་བཅུ་གཉིས་བདག་པོ་ཡིས། །གང་འཚམས་ལེགས་བྲིས་ལམ་གྱི་ཁྱོན་ཡངས་པར། །འོངས་པས་ལས་ལྡན་སྣང་གསལ་རབ་རྒྱས་ཤིང་། །དགྲ་བགེགས་འབྱུང་པོའི་སྤྱི་ཚོགས་ཕྱེ་མར་མཛད། །ཐུབ་བསྟན་ཟླ་བའི་མ་མའི་བཅུད་ཀྱི་ཕུལ། །རྡོ་རྗེ་ཐེག་པའི་ཟིལ་མདངས་ཀཱ་ལ་ཤར། །འཁུ་བའི་སེམས་འཆང་བདུད་དཔུང་སྦྱིན་སྐྱེས་ཚོགས། །འཇོམ་མཛད་མགྲིན་སྔོན་ལྷག་པའི་ལྷ་དེར་བསྟོད། །གཙུག་ཕུད་མགྲིན་པར་ཅོ་འདྲིའི་(༤ན)
པད་གདན་ལ། །མངོན་པར་ཆགས་པས་འཁྱུད་ལྟའི་ཚེས་བདག་སྟེང་། །སྣ་ཚོགས་རྒྱན་གྱིས་སྤུད་འདྲའི་ཀེ་ལ་ཤར། །གར་དགུའི་རྣམ་འགྱུར་སྟོན་པ་ཡོད་དམ་སྙམ། །ཡིད་ལ་དཔྱང་ཐག་འཛིན་པའི་གང་གི་སྐུ། །ཞལ་ཁྱིམ་དྲི་བཟང་ཁང་པ་རྒྱས་པའི་དབུས། །ཚེམས་ཀྱི་ཟེའུ་འབྲུ་རབ་འཁྲིགས་བུང་བའི་སྤྲིན། །དཀར་དམར་མདངས་སོགས་མ་འདྲེས་ཡིད་དུ་འོང་། །ཨུཏྤལ་འདབ་ལྟར་མཉེན་འཇམ་ཕྱག་ཟུང་གིས། །འདབ་ལྡན་མེལ་ཚེ་དར་གྱི་ཕང་ཕུང་ཅན། །བཀོད་ལེགས་གུཉྩ་ནམ་གྱི་ཡོལ་གོའི་ནང་། །ཡིད་འོང་རིན་ཆེན་ཕྱུར་བུར་གཏམས་པ་འཛིན། །མཚན་བཟང་ལང་ཚོའི་གཟི་ལྡན་ཁྱོད་ཀྱི་སྐུ། །འཆི་མེད་རྫས་ཀྱིས་ནད་གསུམ་ལྷབ་ལྷུབ་དང་། །རྩེ་ཕྲན་སེན་མོ་རོ་སོགས་རིན་ཆེན་ཕྲས། །ལེགས་པར་སྤྲས་པའི་རྒྱན་གྱིས་རྣམ་པར་མཛེས། །ཆགས་བྲལ་ཆོས་ཀྱི་སྤྲིན་གྱི་མཁའ་དབྱིངས་ལ། །གང་གི་གསང་གསུམ་རྟ་ལྗང་མངོན་རྫོགས་ཀྱང་། །འགྲོ་ཀུན་པད་དཀར་ལ་ཆགས་ཞབས་ཟུང་བ། །འོད་སྟོང་སྐྱིལ་ཀྲུང་ལས་ཅན་འདབ་བརྒྱ་བཞད། །རིགས་གཉིས་སྔོན་འགྲོ་འཇིགས་རུང་མུན་པའི་མདོག །འབོད་གྲོགས་ཟག་དུང་ན་ཀྲའི་སྤྱི་བོ་ཅན། །མངོན་པར་འགྱིངས་པས་དགྲ་དཔུང་གནམ་འཕྱོའི་ཚོགས། །བསུས་ཁྱིམ་ལྔ་པའི་གློང་དུ་འཇུག་ལས་གང་། །འཕྲོག་བྱེད་གདོང་ཅན་དམར་ནག་ཤ་ཟའི་གཟུགས། །བསྲ་བརྟན་ནོར་འཛིན་ལྟོ་བར་འགྲོད་བྱེད་ཟུང་། །ཤུགས་དྲག་སྟོབས་ཀྱིས་བསྡབས་པས་ས་གསུམ་ཡང་། །འཇིག་སྙམ་ཚངས་འཇོམས་ལུས་མེད་ཚུལ་གྱིས་གནས། །དྲི་བཞོན་འཁྲུག་པའི་བགྲང་བྱའི་ཆོ་འཕྲུལ་གྱིས། །ས་གསུམ་འགེང་མཛད་ཆུ་འཛིན་སྟུག་པོའི་ངོས། །བྱེད་པོས་རླུང་གི་རྒྱལ་མཚན་བྱུགས་འདྲའི་མདོག །སྟོབས་འགྲོའི་སྟེང་དུ་འཇིགས་རུང་གར་གྱིས་རོལ། །(༤བ)
རྡོ་རྗེའི་གཟེགས་མ་འཕྲིན་ལས་ཕོ་ཉ་ཅན། །རྣམ་འགྱུར་གྲངས་མེད་སྟོན་པའི་བྱི་རུའི་རི། །ངོ་མཚར་ཡིད་ལ་འགོད་པའི་ཁྱོད་ཀྱི་སྐུ། །ཆུ་གླང་གདན་ལ་མི་སྡུག་རྣམ་འགྱུར་ཚུལ། །གར་དགུའི་ཉམས་ལྡན་རི་སྐྱེས་ས་འཛིན་ལ། །འཁུ་བའི་ཁྱོད་སྐུ་ཕྱོགས་ཀྱི་རྭ་ལྡན་སྟེང་། །མངོན་པར་འཕགས་པའི་གཟི་འོད་མ་བཟོད་པར། །པད་གཉེར་གླིང་བཞི་བསྐོར་བའི་རྫས་ལ་བསྟེན། །ཐུན་གསུམ་དུས་ཀྱི་མཁའ་གང་སྟུག་པོའི་དབུས། །སྤྲིན་གྱི་ལྕུག་མ་འཁྱུག་ལྟའི་གཟུགས་ཀྱི་སྐུ། །མི་སྡུག་སྟེང་དུ་གཏུམ་དྲག་བརྔམ་ཚུལ་གྱིས། །ལོག་འདྲེན་དགྲ་སྡེའི་མགོ་བོ་ཅིག་ཅར་འགེམས། །སྣ་ཚོགས་ལས་བཞིའི་འཕྲིན་ལས་མེལ་ཚེའི་ངོམ། །བརྗོད་བྲལ་རྣམ་འགྱུར་གྲངས་མེད་སྟོན་པའི་སྐུ། །མཐུ་སྟོབས་རྫུ་འཕྲུལ་དཔག་དཀའ་སྲིད་གསུམ་ལ། །དབང་བསྒྱུར་བཀའ་སྡོད་དམ་ཅན་ཚོགས་ལ་བསྟོད། །གང་གི་ཐུགས་རྗེའི་རྒྱུ་སྐར་མུ་ཁྱུད་ཀྱིས། །མི་མཐུན་ཉེར་འཚེའི་ཀུན་ཁེབས་སྟུག་པོ་ཡི། །དཔུང་ཚོགས་མ་ལུས་འཇོམས་པའི་སྒྱུ་འཕྲུལ་གྱིས། །རབ་འབྱམས་ཞི་བའི་ལས་ཀུན་འགྲུབ་པར་མཛོད། །མི་ཟད་གསང་གསུམ་ཟླ་བའི་མ་མ་ལས། །ལེགས་འོངས་ཁྱེད་ཐུགས་རྟ་བདུན་དཀྱིལ་འཁོར་གྱིས། །ལུགས་ཟུང་མཐུན་རྐྱེན་འོད་སྟོང་འབར་བ་ཡིས། །རབ་འབྱམས་རྒྱས་པའི་ལས་ཀུན་འགྲུབ་པར་མཛོད། །གྲངས་མེད་མཛད་པའི་ཡིད་བཞིན་དབང་གི་རྒྱལ། །ཤུགས་དྲག་གསོལ་འདེབས་བ་ཤིའི་ཐབས་མཁས་གོས། །ཇི་སྙེད་སྲིད་གསུམ་རྒྱལ་མཚན་རྩེར་བཀོད་པའི། །རབ་འབྱམས་དབང་གི་ལས་ཀུན་འགྲུབ་པར་མཛོད། །དཔག་དཀར་ནུས་མཐུའི་ཕྱུགས་བདག་འདབ་ལྡན་ཅན། །རྫས་སྔགས་ཏིང་འཛིན་གནམ་རུའི་འཁྲུལ་འཁོར་གྱིས། །དགྲ་བགེགས་བཅུད་བྲལ་གྲོང་ཁྱེར་མཐར་བྱེད་པའི། །རབ་འབྱམས་མངོན་སྤྱོད་ལས་(༥ན)
ཀུན་འགྲུབ་པར་མཛོད། ཁྱད་པར་བདག་ཡིད་མཁའ་ལྡིང་རྒྱལ་མཚན་ཅན། །འདོད་དོན་ས་མནྟ་ཀ་ནོར་བུ་མཆོག །ལས་བཞིའི་ཏིམྦུའི་ན་ཆུང་ཐབས་ཀྱི་རྒྱུས། །ཐོགས་མེད་ཡིད་བཞིན་འགྲུབ་པའི་འཕྲིན་ལས་མཛོད། །དཔལ་སྟུག་བསྟན་པ་ཡོངས་འདུ་ས་བརྟོལ་ལ། །ཐུན་མོང་ཐེག་པའི་ཡལ་འདབ་རབ་རྒྱས་ཤིང་། །ངེས་གསང་བླ་མེད་གང་བུས་གཡུར་ཟ་བའི། །རིག་འཛིན་འཆི་མེད་དགའ་སྟོན་རྒྱས་གྱུར་ཅིག །ཅེས་དཔལ་ལྡན་འདོད་ཁམས་དབང་ཕྱུག་དམག་ཟོར་རྒྱལ་མོ་ལ་བསྟོད་པ་ནོར་བུ་དབང་གི་རྒྱལ་པོའི་དོ་ཤལ་ཞེས་བྱ་བ་འདི་ཡང་། རང་ཉིད་ལྷག་པའི་ལྷ་མོར་མི་ཕྱེད་དད་པའི་ཤུགས་ཀྱིས་མངོན་པར་བསྐུལ་ཞིང་། རབ་འབྱམས་སྨྲ་བ་ངག་དབང་བསོད་ནམས་རྣམ་རྒྱལ་དང་། རིག་བྱེད་པ་བློ་བཟང་འཇམ་དཔལ་སོགས་ཀྱིས་མཚམས་སྦྱར་བ་ལ་བརྟེན་ནས། ཚངས་སྲས་བཞད་པའི་རྡོ་རྗེ་ཡི་ས་ཡོས་སྤྲད་དུས་ཀྱི་ཟླ་བའི་དཀར་ཕྱོགས་བཟང་པོ་གཉིས་པར། ཀུན་མཁྱེན་བུ་རམ་ཤིང་པ་བལྟམས་པའི་དུས་ཆེན་གྱི་ཉིན། འཆི་མེད་སྐྱེད་ཚལ་ས་ལ་འཕོས་འདྲའི་དགའ་ལྡན་ཕོ་བྲང་གི་གཟིམས་ཆུང་མངོན་པར་དགའ་བར་སྦྱར་བའོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །རྒྱལ་བ་གཉིས་པའི་མཛད་པའི་རྒྱ་མཚོ་ལས། །དམག་ཟོར་ལྷ་མོ་བསྟོད་པའི་རབ་བྱེད་འདི། །བློ་གྲོས་རྒྱལ་མཚན་དད་པས་པར་དུ་བསྒྲུབས། །དགེ་དེས་རྟག་ཏུ་རྒྱལ་བ་དགྱེས་བྱེད་ཤོག །མངྒ་ལཾ།།