སྒོ་དབྱེར་ཟོར་སྲིན་མོའི་ཟ་ལམ་མ་རྣམས།
སྒོ་དབྱེར་ཟོར་སྲིན་མོའི་ཟ་ལམ་མ་རྣམས་བཞུགས་སོ། །
ཧཱུཾ། ཤར་གྱི་སྒོ་མ་རྟ་གདོང་དཀར༔ ཐབས་ཤེས་ལྕགས་ཀྱུའི་ཕྱག་རྒྱ་ཡིས༔ ཤར་ཕྱོགས་དུང་སྒོ་དཀར་པོ་ཕྱེ༔ གཏོར་མའི་ཟོར་ལམ་དགྲ་ལ་བྷྱོ༔ ཧཱུཾ། ལྷོ་ཡི་སྒོ་མ་ཕག་གདོང་ནག༔ ཐབས་ཤེས་ཞགས་པའི་ཕྱག་རྒྱ་ཡིས༔ ལྷོ་ཕྱོགས་གསེར་སྒོ་སེར་པོ་ཕྱེ༔ གཏོར་མའི་ཟོར་ལམ་དགྲ་ལ་བྷྱོ༔ ཧཱུཾ། ནུབ་ཀྱི་སྒོ་མ་དྲེད་གདོང་དམར༔ ཐབས་ཤེས་ལྕགས་སྒྲོག་ཕྱག་རྒྱ་ཡིས༔ ནུབ་ཕྱོགས་ཟངས་སྒོ་དམར་པོ་ཕྱེ༔ གཏོར་མའི་ཟོར་ལམ་དགྲ་ལ་བྷྱོ༔ ཧཱུཾ། བྱང་གི་སྒོ་མ་སྤྱང་གདོང་སྔོ༔ ཐབས་ཤེས་དྲིལ་བུའི་ཕྱག་རྒྱ་ཡིས༔ བྱང་ཕྱོགས་གཡུ་སྒོ་སྔོན་པོ་ཕྱེ༔ གཏོར་མའི་ཟོར་ལམ་དགྲ་ལ་བྷྱོ༔ བཛྲ་རཏྣ་པདྨ་ཀརྨ་པྲ་པེ་ཤ་ཡ་ཕཊ༔ བྷྱོ། བཟློག་བྱེད་མ་གཅིག་སྤྱན་འདྲེན་ནོ༔ བསྒྱུར་བྱེད་མ་གཅིག་སྤྱན་འདྲེན་ནོ༔ སྲིན་མོ་ཟ་ལམ་གོམ་པ་བདུན་ཅུ་འདས་པའི་ཕ་རོལ་ན༔ འཇིག་རྟེན་འདས་ཀྱང་འཁོར་བའི་ཆ་ལུགས་འཛིན༔ ཡེ་ཤེས་གྲུབ་ཀྱང་ལས་ཀྱི་མཁའ་འགྲོ་མ༔ རྡོ་རྗེ་སྡེར་མོས་ལྟས་ངན་བྷྱོ་བཟློག་ཅིག༔ སོ་སོའི་རིགས་དང་མིང་སྲིང་(༢ན)
ལྕམ་དྲལ་ཚུལ༔ འདོད་ཅིང་ཆགས་པའི་ཚུལ་འཆང་རྣལ་འབྱོར་མ༔ བྷྱོ། དཀར་མོ་སྤྱན་གཅིག་རྡོ་རྗེ་རིགས་ཀྱི་ལྕམ༔ ཉིད་ཀྱི་མིང་པོ་རྒྱལ་པོའི་བཀའ་བསྒྱུར་ལ༔ རྣལ་འབྱོར་བདག་གི་འཁོར་དུ་གཏོགས་པ་ལ༔ ཤར་ཕྱོགས་གློ་བུར་ཡེ་འབྲོག་ཤོར་ར་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་ཤར་ཕྱོགས་རྒྱལ་པོ་ཆོ་འཕྲུལ་དགྲ་ལ་སྒྱུར༔ བྷྱོ། སྲིན་མོ་ཤུགས་འཆང་རིན་ཅེན་རིགས་ཀྱི་ལྕམ༔ ཉིད་ཀྱི་མིང་པོ་གཤིན་རྗེའི་བཀའ་བསྒྱུར་ལ༔ རྣལ་འབྱོར་བདག་གི་འཁོར་དུ་གཏོགས་པ་ལ༔ འཆི་བདག་གཤིན་རྗེའི་ཁྲམ་ལ་བཏབ་པ་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་གཤིན་རྗེའི་ཆོ་འཕྲུལ་དགྲ་ལ་སྒྱུར༔ བྷྱོ། གར་གྱི་དབང་ཕྱུག་པདྨ་རིགས་ཀྱི་ལྕམ༔ ཉིད་ཀྱི་མིང་པོ་ཀླུ་ཡི་བཀའ་བསྒྱུར་ལ༔ རྣལ་འབྱོར་བདག་གི་འཁོར་ཏུ་གཏོགས་པ་ལ༔ ས་བདག་ཀླུ་ཡི་བྱད་དུ་ཚུད་པ་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་ཀླུ་ཡི་ཆོ་འཕྲུལ་དགྲ་ལ་སྒྱུར༔ བྷྱོ། གར་གྱི་དབང་ཕྱུག་ལས་ཀྱི་རིགས་ཀྱི་ལྕམ༔ ཉིད་ཀྱི་(༢བ)
མིང་པོ་གནོད་སྦྱིན་བཀའ་བསྒྱུར་ལ༔ རྣལ་འབྱོར་བདག་གི་འཁོར་དུ་གཏོགས་པ་ལ༔ གནོད་སྦྱིན་གདུག་པའི་གདོན་གྱིས་ཟིན་ཏ་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་གནོད་སྦྱིན་ཆོ་འཕྲུལ་དགྲ་ལ་སྒྱུར༔ བྷྱོ། དབྱིངས་ཕྱུག་དཔལ་ལྡན་རྡོ་རྗེ་མཁའ་འགྲོ་མ༔ ཀོང་བཙུན་མཚོན་ཆའི་ཚོགས་ཀྱི་བཀའ་བསྒྱུར་ལ༔ རྣལ་འབྱོར་བདག་གི་འཁོར་དུ་གཏོགས་པ་ལ༔ ཕྱི་ཡི་དགྲ་སྙིང་ཐམས་ཅད་ཕེབས་ཏ་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་མི་སྙིང་གློ་འཕྲོག་དགྲ་ལ་སྒྱུར༔ བྷྱོ། སྔགས་སྲུང་ཨེ་ཀ་ཛ་ཏི་རལ་གཅིག་མ༔ བདུད་པོ་སྐོས་རྗེ་བྲང་དཀར་བཀའ་བསྒྱུར་ལ༔ རྣལ་འབྱོར་བདག་གི་འཁོར་དུ་གཏོགས་པ་ལ༔ བདུད་ཀྱི་རྒྱལ་པོའི་ཁྲམ་ནང་བརྐྱང་བ་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་བདུད་ཀྱི་ཁྲམ་ཁ་དགྲ་ལ་སྒྱུར༔ བྷྱོ། ཨེ་ཀ་ཛ་ཏི་ནག་མོ་གློག་མ་སྤྲིན༔ བདུད་པོ་རེ་ཏི་འགོང་ཡག་བཀའ་བསྒྱུར་ལ༔ རྣལ་འབྱོར་བདག་གི་འཁོར་དུ་གཏོགས་པ་ལ༔ ནག་པོ་བདུད་ཀྱི་བྱན་པོས་བརྐུས་ཏ་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་བདུད་ཀྱི་ཆོ་འཕྲུལ་དགྲ་ལ་སྒྱུར༔ བྷྱོ། དཀར་མོ་ཆེན་མོ་ཉི་མའི་ཐོད་འཕྲེང་ཅན༔ ཉིད་ཀྱི་མིང་པོ་གནམ་ལྷའི་བཀའ་བསྒྱུར་ལ༔ རྣལ་འབྱོར་བདག་གི་འཁོར་དུ་གཏོགས་པ་ལ༔ རྒྱལ་པོ་དཀར་པོས་དམངས་སུ་འབེབས་ཏ་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་རྒྱལ་པོའི་ཆོ་འཕྲུལ་དགྲ་ལ་སྒྱུར༔ བྷྱོ། མ་མོ་ཨེ་ཀ་ཛ་ཏི་ཐལ་མདོག་མ༔ གྲོང་གི་ཐེ་བྲང་དགྲ་བོའི་བཀའ་
བསྒྱུར་ལ༔ རྣལ་འབྱོར་བདག་གི་འཁོར་དུ་གཏོགས་པ་ལ༔ འབྱུང་པོ་ཐེ་བྲང་ཡུལ་དུ་ཕེབས་ཏ་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་འབྱུང་པོའི་ཆོ་འཕྲུལ་དགྲ་ལ་སྒྱུར༔ བྷྱོ། ས་བདག་ཆེན་མོ་ནག་མོ་རལ་གཅིག་མ༔ ས་ཡི་ཐེ་བྲང་ནག་པོའི་བཀའ་བསྒྱུར་ལ༔ རྣལ་འབྱོར་བདག་གི་འཁོར་དུ་གཏོགས་པ་ལ༔ ཐེ་བྲང་རྣམས་ཀྱི་ཆོ་འཕྲུལ་ཤོར་ར་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་ཐེ་བྲང་ཆོ་འཕྲུལ་དགྲ་ལ་སྒྱུར༔ བྷྱོ། གནམ་ལ་ཤེལ་བཟའ་ལོ་རོ་སྨན་གཅིག་མ༔ དཀར་སྐྱ་གཟའ་བདུད་རྣམས་ཀྱི་བཀའ་བསྒྱུར་ལ༔ རྣལ་འབྱོར་བདག་གི་འཁོར་དུ་གཏོགས་པ་ལ༔ དྲང་སྲོང་གཟའ་ཡི་གདུག་རྩུབ་ཤོར་ར་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་གཟའ་ཡི་ཆོ་འཕྲུལ་དགྲ་ལ་སྒྱུར༔ བྷྱོ། བཙན་ལ་ལོ་རོ་རྡོ་རྗེ་སྨན་གཅིག་མ༔ ཉིད་ཀྱི་མིང་པོ་བཙན་གྱི་བཀའ་བསྒྱུར་ལ༔ རྣལ་འབྱོར་བདག་གི་འཁོར་དུ་གཏོགས་པ་ལ༔ བཙན་གྱི་རྒྱལ་པོའི་རྟ་བབས་ཤོར་ར་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་བཙན་གྱི་ཆོ་འཕྲུལ་དགྲ་ལ་སྒྱུར༔ བྷྱོ། ཉུལ་ལེ་འཇིགས་པ་ཁྲག་གི་རལ་གཅིག་མ༔ ཀླུ་སྲིན་ཕོ་མོ་ཡོངས་ཀྱི་བཀའ་བསྒྱུར་ལ༔ རྣལ་འབྱོར་བདག་གི་འཁོར་དུ་གཏོགས་པ་ལ༔ ཀླུ་སྲིན་རྣམས་ཀྱི་ཆོ་འཕྲུལ་ཤོར་ར་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་ཀླུ་སྲིན་ཆོ་འཕྲུལ་དགྲ་ལ་སྒྱུར༔ བྷྱོ། ལྷ་མོ་ནག་མོ་ལས་ཀྱི་དབང་མོ་ཆེ༔ སྣང་སྲིད་ལྷ་སྲིན་སྡེ་བརྒྱད་བཀའ་བསྒྱུར་ལ༔ མདོར་ན་བདག་ཅག་(༣བ)
འཁོར་དང་བཅས་པ་ལ༔ སྣང་སྲིད་མ་མོའི་ཁྲམ་ནག་བརྐྱང་བ་རེ༔ བཟློག་གོ་དམར་ཆེན་གཏོར་མ་འདི་ཡིས་བཟློག༔ བསྒྱུར་རོ་མ་མོའི་ཁྲམ་ཁ་དགྲ་ལ་སྒྱུར༔ ཧཱུཾ། ང་ནི་ཁྲོ་རྒྱལ་ཀུན་གྱི་རྗེཿ ང་ནི་བདེ་གཤེགས་ཀུན་གྱི་གཙོ༔ ང་ནི་གཤིན་རྗེ་ཀུན་གྱི་གཤེད༔ ང་ནི་མ་མོ་ཀུན་གྱི་ཡབ༔ ང་ནི་མཁའ་འགྲོ་ཀུན་གྱི་རྗེ༔ ང་ནི་གིང་ཆེན་ཀུན་གྱི་རྒྱལ༔ འཁོར་གྱི་མཁའ་འགྲོ་དམ་ལ་འདུས༔ དམ་ཅན་རྒྱ་མཚོ་དམག་ལ་འཆོས༔ མཁའ་འགྲོ་འབུམ་ཚོགས་སྤུངས་སེ་སྤུང་༔ ཞུབ་ཆེན་སྟོང་སྡེ་སིལ་ལི་ལི༔ དཔའ་བོ་མདའ་སྒྲ་སྒྲེངས་སེ་སྒྲེང་༔ དཔའ་མོ་དུལ་བརྡབ་ཆེམས་སེ་ཆེམ༔ དར་གྱི་རུ་མཚོན་ལྷབས་སེ་ལྷབ༔ མཚོན་རྩ་ཕུར་རྩེ་རོངས་སེ་རོང་༔ ཡུངས་ཀར་རྦབ་འདྲིལ་ཤར་ར་ར༔ མཚོ་ཡི་མདེའུ་ཐུང་ཐལ་ལ་ལ༔ གཏོར་མའི་སྒྱོགས་བརྡེག་ཆེམས་སེ་ཆེམ༔ ཁྲག་ཐུན་དུག་རླངས་ཆིལ་ལི་ལི༔ དགྲ་བགེགས་གནོད་བྱེད་རྡུལ་དུ་རློག༔ གདབ་སྔགས་ནི། ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཧཱུཾ་ཕཊ། བཛྲ་ཀི་ལི་ཀི་ལཱ་ཡ་སརྦ་བིགྷཱ་ན་པཾ། དགྲ་བགེགས་གནོད་བྱེད་མཱ་ར་ཡ་ཧཱུཾ་ཕཊ། ཅེས་པ་ཡང་དག་ནས་དམོད་པ་དྲག་སྔགས་བར་ལ་སྦྱར་ཞིང་དྲག་སྔགས་སོ་ལྔ་པའི་མཐར། དམ་ཉམས་གནོད་བྱེད་ཤ་ཏྲུན་ཧུར་ཐུཾ་ཛཿམཱ་ར་ཡ་རྦད། ཧཱུཾ་བྷྱོཿ སྡང་བའི་དགྲ་བགེགས་དམ་སྲི་འདི༔ དང་པོ་མ་རིག་གཏི་མུག་འཐིབས༔ བར་དུ་གཟུང་དང་འཛིན་པས་བསྐྱེད༔ ཐ་མ་ལས་ངན་དབང་གིས་འཁོར༔ ཞེ་སྡང་ང་ཡི་རྒྱུད་ལས་བྱུང་༔ འདོད་ཆགས་མ་ཡི་མངལ་དུ་བསྐྱེད༔ ང་རྒྱལ་ཕྲག་དོག་ལས་ངན་སྤྱོད༔ ལྔ་ཕུང་རྩད་ནས་གཅོད་པའི་(༤ན)
ཕྱིར༔ སྲོག་པའི་རྩ་ལ་ཕུར་ཟོར་རྒྱོབ༔ ང་རྒྱལ་སྙིང་ལ་གཏོར་ཟོར་ཡཱ༔ གཏི་མུག་ཤ་ལ་མདའ་ཟོར་རྒྱོབ༔ འདོད་ཆགས་ཁྲག་ལ་ཐུན་ཟོར་ཡཱ༔ ཞེ་སྡང་རུས་ལ་རྡོ་ཟོར་རྒྱོབ༔ ཕྲག་དོག་དབུགས་ལ་དུག་ཟོར་ཡཱ༔ ལྔ་ཕུང་ལུས་ལ་གྲི་ཟོར་རྒྱོབ༔ རྡོ་རྗེ་སློབ་དཔོན་སྐུ་དགྲ་དང་༔ མཆེད་དང་ལྕམ་དྲལ་སྤྱི་ཡི་དགྲ༔ རྣལ་འབྱོར་བདག་གི་སྒོས་དགྲ་དང་༔ གཟུགས་མེད་དམ་སྲི་གནོད་བྱེད་རྣམས༔ ཡོངས་རྫོགས་ཟོར་གྱིས་རྡུལ་དུ་རློག༔ དཔལ་ཆེན་རྔམས་པའི་ཞལ་དུ་སྟོབ༔ འཁོར་གྱི་ཁྲོ་ཚོགས་མཆོད་པར་བཞེས༔ མ་མོ་མཁའ་འགྲོའི་རྔམ་ཟས་ཀྱིས༔ གིང་ཆེན་རོལ་པའི་རྔམ་ཟས་མཛོད༔ སེམས་ནི་རྒྱལ་བའི་གནས་སུ་སྦོར༔ ཧཱུཾ། ཁྲག་གི་ཀོང་བུ་ལོ་ཚད་འདིས༔ སྣང་སྲིད་ལྷ་འདྲེའི་ཆད་པ་བཟློག༔ ཡུངས་ཀར་ཐུན་གྱི་གང་བུ་འདིས༔ གཤིན་རྗེ་རྣམས་ཀྱི་གནོད་པ་བཟློག༔ བྲག་ལ་སྐྱེས་པའི་མཚེ་ཟོར་འདིས༔ ནག་པོ་བདུད་ཀྱི་ཆད་པ་བཟློག༔ དྲི་ཞིམ་སྤོས་ཀྱི་སྡོང་བུ་འདིས༔ རྒྱལ་པོ་རྣམས་ཀྱི་གནོད་པ་བཟློག༔ ཡུགས་སའི་འཕང་གི་རྩང་རྣོན་འདིས༔ མ་བདུད་རྣམས་ཀྱི་གནོད་པ་བཟློག༔ རབས་ཆད་ཁང་པའི་དུད་པ་འདིས༔ གནོད་སྦྱིན་ཕོ་མོའི་གནོད་པ་བཟློག༔ ཤ་ཁྲག་སྣ་ཚོགས་བསགས་པ་འདིས༔ ཀླུ་བདུད་ཕོ་མོའི་གནོད་པ་བཟློག༔ མྱོས་བྱེད་ཆང་གི་སྦང་མ་འདིས༔ ཐེ་བྲང་རྣམས་ཀྱི་གནོད་པ་བཟློག༔ མར་མེ་གསལ་བྱེད་སྡོང་བུ་འདིས༔ མཁའ་འགྲོ་རྣམས་ཀྱི་གནོད་པ་བཟློག༔ གདུག་པ་ཤིང་གི་ཚེར་མ་འདིས༔ གཟའ་སྐར་རྣམས་ཀྱི་གནོད་པ་(༤བ)
བཟློག༔ ལྷ་བཤོས་ཁྲག་གིས་བྱུགས་པ་འདིས༔ ས་བདག་རྣམས་ཀྱི་གནོད་པ་བཟློག༔ མེ་ཏོག་བཅུད་ཅན་ཕབ་རྩི་འདིས༔ དྲེ་བོ་རྣམས་ཀྱི་གནོད་པ་བཟློག༔ དྲག་པོའི་དུག་སྣ་མང་པོ་འདིས༔ འགོང་པོ་རྣམས་ཀྱི་གནོད་པ་བཟློག༔ གྱི་ལིང་རྟ་ཡི་ཚིལ་བུ་འདིས༔ དམར་པོ་བཙན་གྱི་གནོད་པ་བཟློག༔ རམས་ཀྱི་ཕྱི་མོའི་ཕྱེ་མ་འདིས༔ དམུ་ཡི་ཚོགས་ཀྱི་གནོད་པ་བཟློག༔ གུ་གུལ་སྦྱར་བའི་དྲི་བསྲུང་འདིས༔ ལྷ་ཆེན་རྣམས་ཀྱི་གནོད་པ་བཟློག༔ བལ་ཚོན་སྣ་ལྔའི་ཚོན་དཀྲིས་འདིས༔ རིམས་ནད་དལ་ཡམས་ཐམས་ཅད་བཟློག༔ སྐྱེས་པ་ཕོ་ཡི་མདའ་ཁྲ་འདིས༔ དགྲ་བགེགས་མཚོན་ཆ་ཐམས་ཅད་བཟློག༔ ཟ་མ་མོ་ཡི་འཕང་ཁྲ་འདིས༔ ལྟས་ངན་མཚན་མ་ངན་པ་བཟློག༔ ལུང་དགུ་འདུས་པའི་ཆུ་སྣ་འདིས༔ ཀླུ་སྲིན་ཕོ་མོའི་གནོད་པ་བཟློག༔ ལུང་དགུ་འདུས་པའི་ས་སྣ་དང་༔ ཕུང་བཤུལ་དགུ་ཡི་ས་སྣ་འདིས༔ ཡུལ་དང་མཁར་ལ་ཆགས་ཆེ་བཟློག༔ རྭ་གྲོད་རྫས་ཀྱིས་བཀང་བ་འདིས༔ མི་ཁ་སྨྲ་མཆུ་རྩོད་པ་བཟློག༔ བྱ་མོ་ནག་མོའི་སྒོ་ང་འདིས༔ སྨན་མོའི་ཚོགས་ཀྱི་གནོད་པ་བཟློག༔ ཕུར་པ་དར་ནག་བཏགས་པ་འདིས༔ གནོད་སྦྱིན་ཕོ་མོའི་གནོད་པ་བཟློག༔ ཕ་ཤིང་སྟག་པའི་ཁྲམ་ཤིང་འདིས༔ སྐྱེས་པ་ཕོ་ཡི་གནོད་པ་བཟློག༔ མ་ཤིང་གླང་མའི་ཁྲམ་ཤིང་འདིས༔ ཟ་མ་མོ་ཡི་གནོད་པ་བཟློག༔ རུ་མཚོན་མཚོན་ཆ་སྣ་ཚོགས་འདིས༔ ཕྱི་འཁྲུག་ནང་འཁྲུག་གཡུལ་ངོ་བཟློག༔ ལྕགས་ཕྱེ་ཟངས་ཕྱེའི་ཐུན་སྣ་འདིས༔ རྟགས་དང་མཚན་མ་ངན་པ་བཟློག༔ མི་མང་ཐལ་མོ་བརྡེབ་པ་འདིས༔ རྦད་འདྲེ་རྦོད་གཏོང་(༥ན)
གནོད་པ་བཟློག༔ བྷྱོ། གཞན་ཡང་བཟློག་ཅིང་བསྒྱུར་པ་ནི༔ ལྷ་ཆེན་དྲག་པོའི་གདུག་རྩུབ་བཟློག༔ ལྷ་མ་ཡིན་གྱི་རྒྱུ་ཐབས་བཟློག༔ སྐེམ་བྱེད་ལྕགས་ཀྱུས་ཟིན་པ་བཟློག༔ དྲང་སྲོང་བཀའ་ཡི་དམོད་པ་བཟློག༔ མ་མོའི་ཐུན་སྔགས་བྱུང་བ་བཟློག༔ ཕྲ་མེན་མ་ཡི་ཉེ་འབྱེད་བཟློག༔ ས་བདག་ཀླུ་ཡི་གདུག་བྱད་བཟློག༔ ཕོ་ཉའི་རྦོད་གཏོང་བྱུང་བ་བཟློག༔ ཕུར་པའི་དབལ་ཁ་འཕེན་པ་བཟློག༔ ཡུངས་ཀར་ཟོར་ཁ་འཕེན་པ་བཟློག༔ མུ་སྟེགས་གདུག་པའི་བྱད་ཁ་བཟློག༔ བནྡེའི་ཧོམ་པའི་ངན་སྔགས་བཟློག༔ ཞང་ཞུང་བོན་གྱི་བཙོ་དམར་བཟློག༔ སུམ་པའི་གླང་དང་ལིང་ཀྱང་བཟློག༔ མི་ཉག་བོལ་ལེ་ཐམས་ཅད་བཟློག༔ ཁྱུང་པོའི་བཙན་དང་ངན་བྱེད་བཟློག༔ གླང་ལ་ཐོང་ཤ་བྱེད་པ་བཟློག༔ བཞི་བརྒྱ་རྩ་བཞིའི་ནད་རྣམས་བཟློག༔ བགེགས་རིགས་སྟོང་ཕྲག་བརྒྱད་ཅུ་བཟློག༔ གདོན་རིགས་སུམ་བརྒྱ་དྲུག་ཅུ་བཟློག༔ བྱིས་པའི་གདོན་ཆེན་བཅོ་ལྔ་བཟློག༔ དུས་མིན་འཆི་བ་རྣམ་བརྒྱད་བཟློག༔ གཤིས་ངན་འགུམ་པ་བཅོ་ལྔ་བཟློག༔ རྨི་ལམ་མཚན་ལྟས་ངན་པ་བཟློག༔ འབྱུང་བ་རྟེན་འབྲེལ་ངན་པ་བཟློག༔ གཞན་གྱི་བསམ་སྦྱོར་ངན་པ་བཟློག༔ ཡས་ཀྱི་བདུད་དུ་གཡོས་པ་བཟློག༔ མས་ཀྱི་སྲི་རུ་ལངས་པ་བཟློག༔ ལྟག་པའི་བདུད་དུ་བབས་པ་བཟློག༔ དཔྲལ་བའི་གཤེད་དུ་འཁོར་བ་བཟློག༔ ཕ་ཚན་ནང་གི་རྒྱ་འདྲེ་བཟློག༔ དར་ཚན་ནང་གི་སྟོང་འདྲེ་བཟློག༔ ཕོ་སྲི་མོ་སྲི་ཆུང་སྲི་བཟློག༔ དམ་སྲི་ཕུང་སྲི་གོད་སྲི་བཟློག༔ ཕ་མེས་དུར་སྲི་བཙན་སྲི་བཟློག༔ བདུད་ཀྱི་ཐན་ངན་(༥བ)
འཆའ་ངན་བཟློག༔ ལོ་སྐེག་ཟླ་སྐེག་བཞི་གཤེད་བཟློག༔ གནམ་ལ་ཟླ་གྲངས་འདེབས་པ་བཟློག༔ ས་ཞག་རྩིས་ལ་འདེབས་པ་བཟློག༔ གནམ་ནས་དལ་ཁ་བབས་པ་བཟློག༔ ས་ནས་དུག་ནད་ལངས་པ་བཟློག༔ དུས་ཚོད་རྩིས་པ་འདེབས་པ་བཟློག༔ མི་ནག་སྐྱེ་བོའི་ཡ་ག་བཟློག༔ ཡུལ་མི་ཁྱིམ་མཚེས་དམོད་མོ་བཟློག༔ གཡས་ནས་ཕོ་བརྒྱས་མཚོན་བརྡར་བཟློག༔ གཡོན་ནས་མོ་བརྒྱས་དུག་གཡོས་བཟློག༔ མདུན་ནས་རྩང་བཞིན་འཛུགས་པ་བཟློག༔ རྒྱབ་ནས་ཁྱི་བཞིན་འབྲང་བ་བཟློག༔ ངོས་ལ་སྤྲེལ་ལྟར་འཛེག་པ་བཟློག༔ ལྐོག་ནས་འབུ་བཞིན་གཡེང་བ་བཟློག༔ སྲོད་ལ་ཁྱིམ་བྱ་འཚེར་བ་བཟློག༔ གུང་ལ་རྟ་ཕོ་འཚེར་བ་བཟློག༔ ཐོ་རངས་སྒོ་ཁྱི་ངུ་བ་བཟློག༔ འུག་པ་སྤོ་ལ་རྒོད་པ་བཟློག༔ སྲིན་བྱ་གོང་ཁར་འཚེར་བ་བཟློག༔ ལོགས་ལ་ཝ་སྤྱང་བརྒྱལ་བ་བཟློག༔ གནམ་ལ་བྱ་རྒོད་སྡེར་འཛིངས་བཟློག༔ ཕུ་ནས་ཤ་ཕོ་རུ་འཛིངས་བཟློག༔ མདའ་ནས་ཉ་མོ་རྔ་འཛིངས་བཟློག༔ བར་ནས་བུད་མེད་སྡེར་འཛིངས་བཟློག༔ མ་བུའི་བྱུར་སྲི་ཐམས་ཅད་བཟློག༔ ཕོ་བདུད་དལ་ཁ་གཡས་སུ་སྒྱུར༔ མོ་བདུད་དལ་ཁ་གཡོན་དུ་སྒྱུར༔ སྤྱི་བདུད་དལ་ཁ་མཁའ་ལ་སྒྱུར༔ ཕས་ཀྱི་འཕུང་འདྲེ་བྱེད་པ་བཟློག༔ ཕུགས་ཀྱི་འདྲེ་ཆེན་ངན་པ་བཟློག༔ ལུས་ལ་ནད་ངན་གཏོང་བ་བཟློག༔ ཚེ་ལ་བར་གཅོད་བྱེད་པ་བཟློག༔ ས་ལ་བྱི་ལྟར་འཛུལ་པ་བཟློག༔ མཁའ་ལ་བྱ་ལྟར་ལྡིང་བ་བཟློག༔ ཐོག་ཏུ་རྦབ་ལྟར་རིལ་བ་བཟློག༔ གདུང་རིང་སྐེད་པ་ཚིགས་པ་བཟློག༔ མི་ལ་བར་དུ་གཅོད་པ་བཟློག༔
ཕྱུགས་ལ་གོད་ཁ་བྱེད་པ་བཟློག༔ མི་ཁ་སྨྲ་མཆུ་ཐམས་ཅད་བཟློག༔ ཆགས་ཆེ་ཉམ་ང་ཐམས་ཅད་བཟློག༔ བསམ་སྦྱོར་ངན་པ་གཏོང་བ་ཡི༔ སྡང་དགྲ་གནོད་བྱེད་ཐམས་ཅད་ཀུན༔ དཔལ་ཆེན་འཁོར་དང་བཅས་པ་ཡིས༔ ཐམས་ཅད་གཅིག་ཏུ་བསྡུས་ནས་ཀྱང་༔ གཞིག་དང་སྦར་དང་བཏུལ་བྱས་ནས༔ རྡུལ་ཕྲན་བཞིན་དུ་བརླག་པར་མཛོད༔ ཚལ་པ་ཚལ་པ༔ དུམ་བུ་དུམ་བུ༔ རྡུལ་ཕྲན་རྡུལ་ཕྲན༔ ཕྱེ་མ་ཕྱེ་མ༔ བརླག་བརླག༔ བཟློག་བཟློག༔ བྷྱོ་བྷྱོ༔ སརྦ་མངྒ་ལཾ།།