གཏེར་སྲུང་དཔལ་མགོན་སྟག་ཞོན་གྱི་གསོལ་མཆོད་བཀླགས་ཆོག་ཁྱེར་བདེ།
གཏེར་སྲུང་དཔལ་མགོན་སྟག་ཞོན་གྱི་གསོལ་མཆོད་བཀླགས་ཆོག་ཁྱེར་བདེ་བཞུགས་སོ། །
བླ་མ་ཕྱག་རྒྱ་ཟིལ་གནོན་ལ། །སྒོ་གསུམ་གུས་པས་རབ་བཏུད་ནས། །གཏེར་སྲུང་དཔལ་མགོན་སྟག་ཞོན་གྱི། །གསོལ་མཆོད་བཀླགས་ཆོག་འཁྱེར་བདེར་བཀོད། །མཆོད་གཏེར་སྤྱན་གཟིགས་རྣམས་ཕྱག་ལེན་ལྟར་འདུ་བྱས་ལ། ཧཱུཾ། རབ་འཇིགས་དུར་ཁྲོད་ཆེན་པོ་ལྕང་ལོ་ཅན། །རི་བོ་མ་ལ་ཡ་ཡི་གནས་མཆོག་ནས། །གནམ་ལྕགས་ཨུར་མོ་རབ་ཏུ་ཏ་ལ་ལ། །རཀྟའི་རྒྱ་མཚོ་རྦ་ཀློང་མེར་རེ་རེ། །ཞིང་ཆེན་རྐང་རུས་ལྷུ་དུམ་ཁྲོལ་ལོ་ལོ། །འདབ་ཆགས་ཤ་ཟ་མང་པོ་ལྡིང་ཞིང་འདུར། །གསུར་ཆེན་དུད་པའི་ཚོགས་ནི་འཁྱིལ་ཞིང་འཚུབ། །དེ་འདྲའི་དུར་ཁྲོད་རབ་ཏུ་འཇིགས་པ་ནས། །གྱིང་ཆེན་མགོན་པོ་ཡབ་ཡུམ་སྐུ་བསྐྱོད་ལ། །གྲུ་གསུམ་མཐིང་ནག་འབར་བའི་དཀྱིལ་འཁོར་འདིར། །གྱིང་བདུད་མ་མོ་འཁོར་དང་བཅས་པ་རྣམས། །དམ་ཚིག་དབང་གིས་སྤྱན་འདྲེན་གཤེགས་སུ་གསོལ། །ཨོཾ་ཤྲཱི་མ་ཧཱ་ཀཱ་ལཱ་མ་ཏི་ཡཾ་ཛཿཛཿ ཏྲག་ར་རཀྴ་ཧེ་ལ་ཛཿཛཿ དུན་རུ་ཏྲ་རུ་ཐུཾ་བྷ་ཏི་ཛཿ ཤུ་ལ་ར་ཙ་ཏྲི་ཤི་ཛ་ཡ་ཛ་བཛྲ་ཏྲི་རྣ་ས་དྷུ་ཁ་ཐུཾ་ཏྲི་ས་མ་ཡ་ཛཿཛཿ ས་པ་རི་ཝཱ་ར་ཨཱ་གཙྪ་ཡ་ཨཱ་གཙྪ་ཡ། པྲ་པེ་ཤཱ་ཡ། པྲ་པེ་ཤཱ་ཡ། ཏིཥྛ་ཏིཥྛ། བནྡྷཱ་ཨ་བནྡྷཱ་ཨ། ཨ་ཝ་ལོ་ཀཱ་ཡ་ཨ་ཝ་ལོ་ཀཱ་ཡ། ཨཱ་ཀཱ་ཪྵཱ་ཡ་ཧཱུཾ་ཛཿ རྡོ་རྗེ་བདེན་པའི་སྤྱན་སྔ་རུ། ཁས་བླངས་དམ་བཅས་མ་བསྙེལ་བར། །གྲུ་གསུམ་མཐིང་ནག་དཀྱིལ་འཁོར་འདིར། །བཞུགས་ལ་བཅོལ་པའི་འཕྲིན་(༢ན)
ལས་མཛོད། མ་ཧཱ་ཀཱ་ལ་ས་པ་རི་ཝཱ་ར་ཏིཥྛ་བཛྲ་ས་མ་ཡ་སྟྭཾ། ཧཱུཾ། བསྟན་པ་བསྲུང་བར་ཞལ་བཞེས་པའི། །ནག་པོ་ལྕམ་དྲལ་འཁོར་བཅས་ལ། །ཛ་གད་བདུད་རྩི་རཀྟ་དང་། དབང་པོའི་མེ་ཏོག་གསུར་ཆེན་སྤོས། །ཞུན་ཆེན་སྒྲོན་མེའི་སྣང་གསལ་དང་། །དམར་ཆེན་མཁྲིས་པའི་དྲིའི་བྱུག་པ། །དམར་ནག་བཤོས་བུ་འབར་བའི་ཟས། །རོལ་མོའི་སྒྲ་དབྱངས་མཆོད་པར་འབུལ། །ཨོཾ་ཤྲཱི་མ་ཧཱ་ཀཱ་ལཱ་ཡ་ས་པ་རི་ཝཱ་ར་ཨརྒྷཾ་ནས་ཤཔྟ་པྲ་ཏཱི་ཙྪ་ཡེ་སྭཱ་ཧཱའི་བར་བརྗོད། ཧཱུཾ། ལྕང་ལོར་བཅས་པའི་དུང་ཆེན་བནྡྷ་རུ། །བྱང་ཆུབ་སེམས་དང་མཾ་ས་རཀྟ་དང་། །དྲི་ཆེན་ཀུ་ཀུ་ཆུ་སྟེ་བདུད་རྩི་ལྔ། །གཉིས་མེད་སྦྱར་བའི་དམ་རྫས་ཨ་མྲི་ཏ། །ནག་པོ་སྟག་ཞོན་འཁོར་དང་བཅས་ལ་འབུལ། །ཨོཾ་ཤྲཱི་མ་ཧཱ་ཀཱ་ལཱ་ཡ་ས་པ་རི་ཝཱ་ར་མ་ཧཱ་པཉྩ་ཨ་མྲི་ཏ་ཁ་རཾ་ཁཱ་ཧི། ཧཱུཾ བདུད་འདུལ་དབང་ཕྱུག་ནག་པོ་འཇིགས་བྱེད་ཆེ། །མ་ཧ་ཀཱ་ལ་རྡོ་རྗེ་འཇིགས་པའི་ཚོགས། ཁམས་གསུམ་སྒྲོལ་གྱིང་ཆེན་པོའི་དངོས་གྲུབ་ནི། །སྒྲུབ་མཆོག་རྣལ་འབྱོར་བདག་ལ་དུས་འདིར་སྩོལ། །ཨོཾ་ཤྲཱི་མ་ཧཱ་ཀཱ་ལཱ་ཡ་ས་པ་རི་ཝཱ་ར་ཀཱ་ཡ་སིདྡྷི་ཨཱོཾ། ཝཱ་ཀ་སིདྡྷི་ཨཱཿ། ཙིཏྟ་སིདྡྷི་ཧཱུཾ། ཧཱུཾ། རླུང་ནག་འཚུབ་མའི་ཀློང་དཀྱིལ་ནས། །མོན་པ་ནག་པོ་བརྡ་མི་འཕྲོད། །མགྱོགས་བྱེད་དཔའ་བོ་སྟག་ལ་ཞོན། །བདུད་བཙན་སྲིན་པོ་མ་མོ་གྱིང་། །ཀླུ་ཡི་ཚོགས་དང་བཅས་པ་ཡི། །(༢བ)
ནག་པོ་ཆེན་པོ་འཁོར་བཅས་ལ། །དམ་རྫས་རཀྟ་དམར་ཆེན་འབུལ། །བདག་གི་དགྲ་བགེགས་མྱུར་དུ་སྒྲོལ། །ཨཱོཾ་ཤྲཱི་མ་ཧཱ་ཀཱ་ལཱ་ཡ་པ་ས་པ་རི་ཝཱ་ར་མ་ཧཱ་མཾ་ས། མ་ཧཱ་ཙིཏྟ། མ་ཧཱ་ཀེཾ་ནྲྀ་ཏིག་ཁ་ཁཱ་ཧི་ཁཱ་ཧི། ཨོཾ་ཤྲཱི་མ་ཧཱ་ཀཱ་ལཱ་ཡ་ས་པ་རི་ཝཱ་ར་ས་མ་ཡ་སྨ་ར། ས་མ་ཡ་མ་ཏི་ཀྲ་མ། ས་མ་ཡ་རཀྵ་ནཱུ། ཀྱེ། སྟག་ལ་ཞོན་པའི་ནག་པོ་ཆེ། །འཁོར་དང་བཅས་པ་ཁྱེད་རྣམས་ཀྱིས། །ཞི་རྒྱས་དབང་དྲག་ལས་རྣམས་ཀུན། །བཅོལ་བ་ཇི་བཞིན་སྒྲུབ་པར་མཛོད། །ཧཱུཾ། གཏོར་ཚོགས་མི་དམིགས་སྟོང་པའི་ངང་། །ཨེ་ལས་གནམ་ལྕགས་འབྲུབ་ཁུང་ནང་། །ནྲི་དང་ཏྲི་ལས་དགྲ་བགེགས་ཀྱི། །གཟུགས་བརྙན་ཉམ་ཐག་རྣམ་པར་གྱུར། །ནྲི་ཛཿ ཏི་ཛཿབཛྲ་ཨཾ་ཀུ་ཤ་ཛཿ བཛྲ་པཱ་ཤ་ཧཱུཾ། བཛྲ་སྥོ་ཊ་བཾ། བཛྲ་གྷཎྚེ་ཧོ། བཛྲ་པྲ་བེ་ཤཱ་ཡ་ཕཊ། ཨ་བེ་ཤཱ་ཡ་ཨ། རང་དང་མགོན་པོའི་ཐུགས་ཀ་ནས། །འཕྲོས་པའི་འོད་ཟེར་ལྕགས་ཀྱུ་ཡིས། །གནོད་བྱེད་དམ་ཉམས་དགྲ་བགེགས་ཚོགས། །སྐད་ཅིག་ཙམ་ལ་འདིར་ཁུག་ཅིག །གྲི་གུག་འབར་བས་ཁོག་པར་ཤོགས། །ཚེ་སྲོག་དྲོད་དང་རྣམ་ཤེས་གོ །སྲུང་བ་འབྲུ་གསུམ་རྣམ་པར་ཐོན། །རང་གི་གནས་གསུམདག་ལ་ཐིམ། །ཨོཾ་ཨཱཿཧཱུཾ། ཕོ་ཉའི་ཚོགས་ཀྱི་མཚོན་ཆ་ཡིས། །ཤ་ཁྲག་རུས་པ་དུམ་བུར་གཏུབས། །འབྲུ་གསུམ་གྱིས་མཚན་འོད་ཟེར་གྱིས། །དུག་གསུམ་སྦྱངས་ནས་བདུད་རྩིར་བསྒྱུར། །ཧཱུཾ། ད་ནི་ཁྲོ་བོའི་རྒྱལ་པོ་སྟེ། །ལག་ན་རྡོ་རྗེ་རྡོ་རྗེ་འཆང་། །རྡོ་རྗེའི་ལུས་ལས་རྡོ་རྗེ་འཕྲོས། །ཐམས་ཅད་མ་ལུས་ཟིལ་གྱིས་མནོན། །དེ་ཡི་བཀའ་ཉན་མཐུ་བོ་ཆེ། །ཆོས་སྐྱོང་མགོན་པོ་བསྟན་སྲུང་མགོན། །མ་ཧཱ་ཀཱ་ལ་མཐུ་རྩལ་ཅན། །ཟས་སུ་དགྲ་བོའི་ཤ་ཟ་ཞིང་། །སྐོམ་དུ་དགྲ་བོའི་སྙིང་ཁྲག་འཐུང་། ཁྱོད་ནི་ཤ་ཟ་ཁྲག་འཐུང་སྟེ། །བསྟན་པ་གཉན་པོ་བསྲུང་སླད་དུ། །རྨད་དུ་བྱུང་བའི་གཏོང་མ་དང་། །དགྲ་བོའི་ཤ་ཁྲག་མཆོད་པར་བཞེས། །བཅོལ་(༣ན)
པའི་འཕྲིན་ལས་མྱུར་དུ་སྒྲུབས། །དམ་ཉམས་དགྲ་འདི་ད་ལྟ་སྒྲོལ། །དུས་ལ་བབ་བོ་ས་མ་ཡ། །ཨོཾ་ཤྲཱི་སོགས། མགོན་པོ་ཡབ་ཡུམ་མོན་པ་དང་བཅས་པའི་སྔགས་སྦྲེལ་པའི་རྗེས་སུ་ས་པ་རི་ཝཱ་ར་སརྦ་བིགྷྣ་ན་ཤ་ཏྲུཾ་མཱ་ར་ཡ་ཨི་དམ་པ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་དབུལ། ཧཱུཾ། སྲིན་པོའི་གཟུགས་ཅན་མཐིང་ནག་འཇིགས་པའི་སྐུ། །རིན་ཅེན་རྒྱན་དང་མི་མགོའི་དོ་ཤལ་འཕྱང་། །འཇོལ་བེར་གསོལ་ཞིང་གསེར་སྒ་རྐེད་ལ་བཅིངས། སག་ཏིའི་ལྷམ་གསོལ་གར་དགུའི་ཉམས་ཀྱིས་བརྗིད། །ཕྱག་གཡས་བདེ་ཆེན་ལྷ་བདུད་དམག་དཔུང་འགྱེད། །གཡོན་པ་སྙིང་ཁྲག་ཁྲོལ་བའི་ལྕགས་པར་འཛིན། །གཟའ་བདུད་སྟག་ཆེམ་སྨྱོན་པར་སྤྲུལ་བ་ལ། །ཞོན་ནས་སྟོང་གསུམ་སྐད་ཅིག་ཙམ་གྱིས་བསྐོར། །སླད་ཀྱི་རྗེས་འབྲང་སྲོག་བདག་རྒྱལ་པོ་ཆེ། །སེང་གེ་རྔམ་པར་བརྫུས་ནས་ཕྱི་བཞིན་རྒྱུག །ཡེ་ཤེས་མེ་དཔུང་དམར་ནག་དབུས་བཞུགས་པའི། །དཔལ་ལྡན་མ་ཧཱ་ཀཱ་ལ་ཁྱོད་ལ་བསྟོད། །འདོད་ཁམས་བདག་མོ་ཁྲམ་ཤིང་ཐོད་ཁྲག་དང་། །ནད་རྐྱལ་འཛིན་ཞིང་ལྕགས་ཀྱི་དྲེལ་རྟ་ཞོན། །ཐོད་སྦྲུལ་རུས་རྒྱན་མི་ལྤགས་རེ་ལྡེའི་གོས། །དུག་སྦྲུལ་སྐ་རགས་སྤྱི་བོར་རྨ་བྱའི་མདོངས། །ལུས་ལ་ཁྲག་དང་ཞག་གི་ཐིག་ལེས་བརྒྱན། །སྒ་ཡི་སྔ་ཕྱིར་ནད་རྐྱལ་མཚོན་དྲུ་འཕྱང་། །སྣང་སྲིད་མ་མོ་བྱེ་བའི་འཁོར་གྱི་དབུས། །རབ་བཞུགས་མཁའ་འགྲོའི་གཙོ་མོ་ཁྱོད་ལ་བསྟོད། །གཡས་པ་རྩེ་གསུམ་མི་རོས་བརྒྱན་པ་འཛིན། །གཡོན་པ་རུ་མཚོན་འཕྱར་བས་དམག་སྣ་འདྲེན། །དར་ནག་བེར་གྱོན་འཇིགས་རུང་སྐུའི་སྤྲུལ་པ། ཁྲམ་ཐོགས་བདུད་ཀྱི་མོན་པ་ནག་པོར་བསྟོད། །གཡས་པ་མ་ཧེའི་རྭ་དུང་ཆེར་བུས་བས། །ལྷ་འདྲེའི་དམག་སྡུད་གཡོན་པ་ཞགས་པ་ཡིས། །དགྲ་བོའི་(༣བ)
སྐེ་འཆིང་བསེ་ཁྲབ་དམར་པོ་གྱོན། །གསུང་སྤྲུལ་སྲོག་གཅོད་བཙན་གྱི་མོན་པར་བསྟོད། །གཡས་པ་ལྕགས་ཀྱི་སྤུ་གྲིས་དགྲ་བགེགས་ཀྱི། ཁོག་པ་གཤོག་ཅིང་གཡོན་པ་སྙིང་དམར་པོ། །གཙོ་བོའི་ཞལ་སྟོབ་མི་ལྤགས་རློན་པ་གྱོན། །སྔོ་ནག་བླ་འགུགས་གྱིང་གི་མོན་པར་བསྟོད། །ཛ་ལ་ནག་པོ་ཕྱག་གཡས་ཐོད་ཁྲག་དང་། །གཡོན་པ་རིན་ཅེན་གཏེར་གྱི་ནེའུ་ལེ་འཛིན། །བར་སྦྲུལ་རྒྱན་ལྡན་རིགས་ངན་ཆ་ལུགས་ཅན། །ཞབས་གཉིས་ནོར་བདག་སེར་པོ་མནན་ལ་བསྟོད། །ཤ་ཟ་ཁྲག་འཐུང་སྙིང་འབྱིན་བླ་འགུགས་དང་། །གཟེར་འདེབས་ཚེ་འཕྲོག་སྲོག་གཅོད་མོན་པ་བདུན། །གྲི་ཐོད་འཛིན་ཅིང་བདུད་དམག་འབུམ་གྱིས་བསྐོར། །སྲོག་གཅོད་ལས་ལ་རྔམ་པ་ཁྱོད་ལ་བསྟོད། །མོན་མོ་ནག་མོ་བདུད་ཀྱང་རང་འདྲའི་འཁོར། །སྟོང་ཁམས་ཁེངས་ཤིང་བྷྱོ་དང་ཛ་སྒྲ་སྒྲོག །ཁྲག་ཐུན་ཟོར་གྱི་དཔུང་ཚོགས་ཆར་ལྟར་འབེབས། །མི་བསྲུན་ནད་བདག་མ་མོའི་ཚོགས་ལ་བསྟོད། །མདོག་ནག་རལ་བ་མུན་གཏིབས་པགས་རློན་གྱོན། ཁྲམ་ཤིང་ཞགས་པ་འཛིན་ཅིང་རྟ་ནག་ཞོན། །སྔ་ཤར་བདུད་ཁྲམ་ཕྱི་ཤར་མི་རོ་བཀལ། །བདུད་མགོན་རི་ནག་སྤུངས་པ་ཁྱོད་ལ་བསྟོད། །སྐུ་ལ་དར་དཀར་རལ་བ་ལྷབ་ལྷུབ་གྱོན། །རྒྱལ་ཞུས་དབུ་མཛེས་འཁོར་ལོ་ཤཀྟི་ཐོགས། །རྟ་དཀར་བྲུམ་དམར་ཞོན་ནས་སྟོང་གསུམ་མྱུལ། །ལྷ་མགོན་རྒྱལ་པོ་འོད་ལྷ་དཀར་པོར་བསྟོད། །འཇིགས་པའི་གཟུགས་ཅན་ཁྲག་རལ་ཐུར་དུ་གཏིབས། །གཡས་པ་རྩེ་གསུམ་གཡོན་པ་ཐོད་ཁྲག་འཛིན། །བསྐལ་པའི་མེ་རླུང་འཁྲུག་པའི་ཀློང་ན་བཞུགས། །གྱིང་མགོན་ལྕགས་ཞ་ནག་པོ་ཁྱོད་ལ་བསྟོད། །དར་དམར་བེར་དང་ཐོད་བཅིངས་བསེ་ཁྲབ་གྱོན། །མདུང་དམར་ཁྲག་གི་བ་དན་བཙན་ཞགས་ཐོགས། །རྟ་དམར་རླུང་གི་ཤུགས་ཅན་སྟེང་ན་ཞོན། །བཙན་མགོན་ཤུ་བོ་ལག་རིང་ཁྱོད་ལ་བསྟོད། །ཟ་འོག་བེར་དང་དར་ཐོད་མཛེས་པར་བཅིངས། །(༤ན)
རྡོ་རྗེ་རྩེ་གསུམ་སྟེང་དུ་བྱ་ཁྲ་ལྡིང་། །ར་སྙིང་དམར་པོ་ཐོགས་ནས་སྤྱང་ཀི་ཞོན། །གྱིང་མགོན་རྡོ་རྗེ་ལེགས་པ་ཁྱོད་ལ་བསྟོད། །གདུག་པའི་ཁ་རླངས་སྤྲིན་འཐིབས་སྦྲུལ་ནག་གིས། །གདེངས་ཀ་གཡོ་ཞིང་བྲང་འགྲོའི་མཇུག་མ་ཅན། །སྦྲུལ་གྱི་ཞགས་པ་སྦལ་པའི་རྒྱལ་མཚན་འཛིན། །ཀླུ་མགོན་ནག་པོ་ཁྱོད་ལ་བདག་བསྟོད་དོ། ཁྲག་གི་རལ་པ་འཕྱང་ཞིང་མི་ལྤགས་དང་། །རེ་ལྡེའི་གོས་གྱོན་རྩེ་གསུམ་བ་དན་འཛིན། །མཐིང་ནག་གུར་ཁྱིམ་དུག་མཚོའི་ཀློང་ན་བཞུགས། །མ་མགོན་རྡོ་རྗེའི་སྡེར་ཅན་ཁྱོད་ལ་བསྟོད། །ལུས་ཀུན་མིག་གང་མགོ་དགུ་སྦྲུལ་མཇུག་ཅན། །ཆུ་སྲིན་རྒྱལ་མཚན་རྭ་ཡི་མདའ་གཞུ་ཐོགས། །སྤྲིན་དང་རླུང་ནག་འཚུབ་མའི་ཁྲོད་ན་གནས། །གཟའ་མགོན་ཁྱབ་འཇུག་ཆེན་པོ་ཁྱེད་ལ་བསྟོད། །གཞན་ཡང་ཙན་བེང་ལས་སྤྲུལ་ལྷ་བདུད་དམག །མཁའ་དབྱིངས་འཛིན་མའི་ཁྱོད་ཀུན་རྣམ་པར་གང་། །གཡས་ཀྱི་རུ་འདྲེན་ལྷ་དམག་ཉི་ཁྲི་དང་། །ཆིག་སྟོང་གོ་སྲ་མཚོན་རྣོ་རྟ་མཆོག་ཞོན། །གཡོན་གྱི་རུ་འདྲེན་མ་མོ་བྱེ་བའི་ཚོགས། ཁྲམ་ཤིང་ནད་རྐྱལ་ཐོགས་ནས་དྲེལ་རྟ་ཞོན། །སྔོན་གྱི་སྣ་འདྲེན་ལྷོ་ཕྱོགས་གཤིན་རྗེ་བརྒྱད། །སྟག་གཟིག་དོམ་དྲེད་འཕར་སྤྱང་སྤྲུལ་ནས་རྒྱུག །སླད་ཀྱི་རྗེས་འབྲང་བྱང་གི་གནོད་སྦྱིན་བརྒྱད། །ལྕགས་ཀྱི་བྱ་ཁྲར་སྤྲུལ་ནས་མཁའ་ལ་ལྡིང་། །མདོར་ན་ས་དང་བར་སྣང་མ་ལུས་པ། །ཡོངས་གང་མཐུ་སྟོབས་རྫུ་འཕྲུལ་བསམ་མི་ཁྱབ། །བསྟན་པ་བསྲུང་ཞིང་རྣལ་འབྱོར་སྐྱོང་མཛད་པའི། །དམ་ཅན་འཁོར་ཚོགས་རྒྱ་མཚོའི་ཚོགས་ལ་བསྟོད། །སྟག་ཞོན་མགོན་པོ་འཁོར་བཅས་ཁྱེད་རྣམས་ཀྱིས། །ཁྱབ་བདག་རྡོ་རྗེ་འཆང་ཆེན་གསང་བའི་བདག །པདྨ་འབྱུང་གནས་ཤྲཱིནྟཾ་གརྦྷ་དང་། །གུ་ཧྱ་ཙནྡྲ་རྒྱ་གར་ཁྲག་འཐུང་ནག །སྒེག་པའི་རྡོ་རྗེ་བལ་བོ་ནོར་(༤བ)
བུ་འཛིན། །གནུབས་ཆེན་སངས་རྒྱས་དྲང་ང་ཀུན་གྲགས་དང་། །ས་བན་འབུམ་གྲགས་སྐྱོ་བན་མཐུ་པོ་ཆེ། །ལྕེ་བཙུན་མདོ་སེར་རོང་པ་རྒྱ་ལོའི་མཚན། །ལྕེ་བཙུན་བློ་ལྡན་བླ་མ་སྲི་བུ་ཆུང་། །རིན་ཅེན་རྒྱལ་མཚན་ཆོས་རྒྱལ་དཔལ་བཟང་པོ། །དཔོན་སྟོན་ཆོས་སྐྱོང་ཕ་རྒོད་སྔགས་འཆང་རྗེ། །ལྡོང་སྟོན་བློ་གསལ་འ་ཞྭ་མཁྱེན་བརྩེའི་དབང་། །བསོད་ནམས་ཆོས་འཕེལ་དབང་ཕྱུག་རབ་བརྟན་རྗེ། །རྡོ་རྗེ་འཆང་དངོས་མགོན་པོ་བསོད་ནམས་དང་། །བཀའ་དྲིན་མཉམ་མེད་ཟུར་ཆེན་ཀུན་དགའི་ཞབས། །རྩ་བརྒྱུད་བླ་མའི་དམ་ཚིག་གཉན་པོ་རྣམས། །ཉེ་བར་དགོངས་ལ་བཅོལ་བའི་འཕྲིན་ལས་མཛོད། ཁྱད་པར་གནུབས་བན་སངས་རྒྱས་ཡེ་ཤེས་ཀྱིས། །འཇམ་དཔལ་གཤིན་རྗེ་ཚེ་བདག་ཟབ་ཆོས་ཀྱི། །གཏེར་གྱི་སྲུང་མར་བསྐོས་ཤིང་གཉེར་གཏད་པ། །མ་གཡེལ་མཐུ་རྩལ་དབྱུང་བའི་དུས་ལ་བབ། །སངས་རྒྱས་བསྟན་དང་འགྲོ་བའི་བདེ་སྐྱིད་བཤིག །གསང་ཆེན་ཐེག་པ་མཆོག་ལ་ལོག་པར་བལྟ། །ཟབ་གཏེར་བདུད་ཀྱིས་བྱས་ཞེས་ཡ་ག་སྒྲོག །ཁྱད་པར་ཕྱག་རྒྱ་ཟིལ་གྱིས་གནོན་པའི་སྐོར། །བལ་ཡུལ་མུ་སྟེགས་ངན་པའི་ཆོས་ཡིན་ཟེར། །རིགས་འཛིན་བདག་ལ་ལྷ་མེད་ཟེར་ནས་བརྙས། །སྲུང་མ་ཁྱོད་ལ་མཐུ་མེད་ཟེར་ནས་སྨོད། །ལོག་པར་འདྲེན་པའི་དམ་ཉམས་དགྲ་བོ་ལ། །མ་རུང་ལྟས་ངན་གྲངས་མེད་ཆར་ལྟར་ཕོབ། །ལོ་ཟླར་མ་འཇོག་སྲོག་ཆོད་བླ་ཚེ་བསྐུམས། །ཤ་རུས་ཚོགས་སུ་རོལ་ཅིག་ཁ་རཾ་ཁཱ་ཧི། །ཐོགས་མེད་འཕྲིན་ལས་སྒྲུབས་ཤིག་ས་མ་ཡ། །ཞེས་འཇམ་དཔལ་ཚེ་བདག་གི་གཏེར་སྲུང་མགོན་པོ་སྟག་ཞོན་གྱི་མཆོད་གཏོར་འབུལ་ཚུལ་བདུད་སྡེ་ཕྱེར་འཐག་ཅེས་པ་འདི་ནི་གཤིན་རྗེ་ཚེ་བདག་ནག་པོའི་གཏེར་སྲུང་གི་གཙོ་བོ་ཞིག་ཏུ་འདུག་པ་བར་སྐབས་སུ་རྒྱུན་ཆད་པ་ལྟ་བུར་སྣང་བ་ལས། གཏེར་སྲུང་གི་གྲལ་དུ་མཆོད་གཏོར་འབུལ་པའི་ཕྱག་ལེན་གྱི་རྒྱུན་ཚུགས་(༥ན)
ན་ལེགས་པར་མངོན་ཞིང་། དེང་སང་འདི་ལ་རང་གཞན་གྱི་ཆེར་རློམ་མང་པོས་རྗེས་གནང་གི་རྒྱས་འདེབས་བྱས་པའི་རྒྱུན་མ་དག་པའི་ཕུང་པོ་ཆེན་པོ་ཡོང་འདུག་པ་རང་གཞན་བསླུ་བའི་བྱེད་པོར་མཐོང་ནས་ཡིད་བརྟན་མ་བྱས་ཀྱང་། སླར་སྔགས་རྙིང་མའི་ལུགས་མ་ཉམས་བ་ཚར་པ་རྡོ་རྗེ་འཆང་ནས་བརྒྱུད་པའི་སྐོར་ཐོབ་པ་ལ་བརྟེན་ནས་ཟ་ཧོར་གྱི་བནྡེ་ཟིལ་གནོན་དྲག་པོ་རྩལ་གྱིས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པ་རྣམས་ཀྱི་རྒྱུན་འཁྱེར་དུ་སྦྱར་བའི་ཡི་གེ་པ་ནི་སུདྷཱི་ཨཱ་ཡུརྡཱིརྒྷའི་མིང་ཅན་ནོ། །