སྤྲུལ་པའི་ཆོས་རྒྱལ་ཆེན་པོའི་མདོས་ཀྱི་གྱེར་གཞུང་བསམ་དོན་ལྷུན་གྲུབ།
སྤྲུལ་པའི་ཆོས་རྒྱལ་ཆེན་པོའི་མདོས་ཀྱི་གྱེར་གཞུང་བསམ་དོན་ལྷུན་གྲུབ་བཞུགས།
ཧཱུཾ། གདོད་ནས་དག་པ་ཀ་དག་ཆོས་ཀྱི་སྐུ། །ལྷུན་གྲུབ་ཞི་ཁྲོའི་ཟློས་གར་ལོངས་སྤྱོད་རྫོགས། །ཐུགས་རྗེ་སྤྲུལ་པའི་རྣམ་རོལ་པདྨ་འབྱུང་། །སྐུ་གསུམ་དབྱེར་མེད་དངོས་གྲུབ་སྩལ་དུ་གསོལ། །བསྐལ་བ་དང་པོར་བདུད་དང་ཀླུ་ཡི་སྲས། །མཐུ་སྟོབས་དབང་ཕྱུག་དགེ་བསྙེན་ཆེན་པོར་གྲགས། །བར་གྱི་བསྐལ་བར་བྷ་ཏ་ཧོར་ཡུལ་དུ། །སྒོམ་གྲའི་དཀོར་སྲུང་རྒྱལ་པོ་པེ་ཧ་ར། །ཐ་མའི་དུས་སུ་བོད་ཡུལ་གངས་ཅན་འདིར། །ཆོས་འཁོར་མ་ལུས་སྐྱོང་བའི་སྲུང་མ་ཆེ། །སྤྲུལ་པའི་ཆོས་རྒྱལ་ཆེན་པོ་འཁོར་བཅས་ལ། །དགྱེས་པ་སྐྱེད་པར་བྱེད་པའི་མཆོད་པ་ནི། །རིན་ཅེན་ཤེལ་དཀར་བཻཌཱཪྻ་སྔོན་པོ། །པདྨ་རཱ་ག་གསེར་ལས་གྲུབ་པ་ཡི། །རི་རབ་ལྷུན་པོ་བང་རིམ་བཞི་ཡི་སྟེང་། །ཕོ་བྲང་སྐུ་མཁར་རྒྱ་ཕུབས་ལྕོག་གིས་མཛེས། ཁོར་ཡུག་སྲ་བརྟན་ལྕགས་རིས་ཡོངས་སུ་བསྐོར། །ནང་དུ་ལྷ་དང་མི་ཡི་འདོད་ཡོན་ནི། །ཕུན་ཚོགས་ངོ་མཚར་རྒྱ་མཚོས་ཡོངས་གང་བ། །སྤྲུལ་པའི་ཆོས་རྒྱལ་འཁོར་བཅས་རྟེན་དུ་འབུལ། །བསྟན་འགྲོའི་ཕན་བདེ་བླ་མའི་སྐུ་ཚེ་སྤེལ། །སྔགས་འཆང་བདག་གིས་བཅོལ་བའི་དོན་རྣམས་ཀུན། །(༢ན)
འབད་མེད་ལྷུན་གྱིས་གྲུབ་པའི་འཕྲིན་ལས་མཛོད། །སྟེང་ན་འཇའ་ཚོན་ལྟར་བཀྲ་གདུགས་དང་ཏོག །སྒྲོ་ཕོད་ཡུངས་ཀར་གང་བཟང་དག་གིས་མཚན། །དར་གྱི་འཕན་དང་ཅོད་པན་ལྷབ་ལྷུབ་གཡོ། །ནམ་མཁའ་རྒྱང་བུ་སྤེལ་མར་ཚར་དུ་དངར། །ཆུ་གཉིས་ཉེར་སྤྱོད་ལྔ་དང་རོལ་མོའི་ཚོགས། །འདོད་ཡོན་སྣ་ལྔ་སྲ་བརྟན་རྡོ་རྗེའི་གོ །རྣོ་བའི་མཚོན་ཆ་ཞྭ་ཕོད་སག་ཐེབ་དང་། །རིན་ཅེན་རུས་རྒྱན་པགས་པའི་རྒྱལ་མཚན་ཚོགས། །སྤྲུལ་པའི་ཆོས་རྒྱལ་འཁོར་བཅས་རྟེན་དུ་འབུལ། །བསྟན་འགྲོའི་ཕན་བདེ་བླ་མའི་སྐུ་ཚེ་སྤེལ། །སྔགས་འཆང་བདག་གིས་བཅོལ་བའི་དོན་རྣམས་ཀུན། །འབད་མེད་ལྷུན་གྱིས་གྲུབ་པའི་འཕྲིན་ལས་མཛོད། །རྟ་ལུག་བྱ་ཁྱི་བྱི་བ་ར་དཀར་དང་། །སྤྲེའུ་སེང་གེ་སྟག་གཟིག་དོམ་དྲེད་གུང་། །འདབ་ཆགས་སྣ་ཚོགས་གླང་ཆེན་རྟ་གཡག་དྲེལ། །ཕུན་ཚོགས་འདོད་ཡོན་ཁུར་བའི་ཁལ་མ་དང་། །སྨྱུག་རྒོད་རྩེ་རྒྱལ་བྱ་དཀར་གསོབ་ཀྱི་ནང་། །རིན་ཅེན་གའུར་གསང་བའི་སྲོག་འཁོར་དང་། །སྟག་གཟིག་རས་མ་སྣམ་རས་དཀར་དམར་སྔོ། ཁ་དོག་ལྔ་ལྡན་རྔ་མའི་ཆུན་པོ་རྣམས། །སྤྲུལ་པའི་ཆོས་རྒྱལ་འཁོར་(༢བ)
བཅས་རྟེན་དུ་འབུལ། །བསྟན་འགྲོའི་ཕན་བདེ་བླ་མའི་སྐུ་ཚེ་སྤེལ། །སྔགས་འཆང་བདག་གིས་བཅོལ་བའི་དོན་རྣམས་ཀུན། །འབད་མེད་ལྷུན་གྱིས་གྲུབ་པའི་འཕྲིན་ལས་མཛོད། །ཕུན་ཚོགས་རོ་བརྒྱའི་དཔལ་ལྡན་གཏོར་མ་དང་། །སྡེ་བརྒྱད་བཤོས་བུ་འབྲུ་དར་སྨན་སྣ་ཤ །ཕོ་གདོང་མོ་གདོང་ཤིང་གྲི་ཡུལ་མཁར་རིས། །ཕུང་ཁམས་སྐྱེ་མཆེད་ཚང་བའི་ངར་གླུད་མཛེས། །བདུད་རྩིའི་གསེར་སྐྱེམས་འཕྱི་བའི་ཤ་ཚིལ་གསུར། །ཤ་ཆེན་སྤོས་དཀར་དུད་པ་མདའ་དར་ལྔ། །བཀྲ་ཤིས་རྟགས་བརྒྱད་རྒྱལ་སྲིད་རིན་ཅེན་བདུན། །ཕྱི་ནང་གསང་བའི་མཆོད་པ་དམ་པ་འདི། །སྤྲུལ་པའི་ཆོས་རྒྱལ་འཁོར་བཅས་རྟེན་དུ་འབུལ། །བསྟན་འགྲོའི་ཕན་བདེ་བླ་མའི་སྐུ་ཚེ་སྤེལ། །སྔགས་འཆང་བདག་གིས་བཅོལ་བའི་དོན་རྣམས་ཀུན། །འབད་མེད་ལྷུན་གྱིས་གྲུབ་པའི་འཕྲིན་ལས་མཛོད། །ཆོས་སྐྱོང་རྒྱལ་པོ་སྡེ་ལྔ་འཁོར་བཅས་རྣམས། །རྟེན་ལས་མི་གཡོ་དམ་ལས་མ་འདའ་བར། །སངས་རྒྱས་བསྟན་དང་དགེ་འདུན་སྡེ་རྣམས་སྐྱོངས། །རྡོ་རྗེའི་སློབ་དཔོན་སྐུ་ཚེ་འཕྲིན་ལས་སྤེལ། །གངས་ཅན་བོད་ཀྱི་ཡུལ་འདིར་མི་ཕྱུགས་ནད། །འཐབ་རྩོད་མུ་གེ་ཉེར་འཚེ་ཀུན་ཞི་ཞིང་། །ལུགས་གཉིས་ཁྲིམས་ཀྱིས་འགྲོ་བ་མ་ལུས་པ། །བདེ་ཞིང་སྐྱིད་པའི་དཔལ་ལ་སྤྱོད་པར་མཛོད། ཁྱད་པར་རིགས་འཛིན་བདག་གི་ནད་གདོན་བགེགས། །ཞི་ཞིང་ཚེ་དང་བསོད་ནམས་དཔལ་འབྱོར་རྒྱས། ཁམས་གསུམ་དབང་སྡུས་བརྣག་པའི་དགྲ་བགེགས་རྣམས། །མྱུར་དུ་སྙིང་ཁྲག་དྲོན་མོ་ཞལ་དུ་གསོལ། །མདོར་ན་རྒྱལ་དབང་པདྨ་ཉང་རལ་ཞབས། །རྒོད་ལྡེམ་ལེགས་ལྡན་རྗེ་དང་དབང་པོའི་སྡེ། ཁྱབ་བདག་བླ་མའི་དམ་ཚིག་ཉེར་དགོངས་ལ། །བསམ་དོན་ལྷུན་གྱིས་གྲུབ་པའི་དགེ་ལེགས་མཛོད། །ཅེས་མདོས་རྒྱུན་འཁྱེར་(༣ན)
ཚུལ་དུ་འཁྱེར་བདེ་བ་འདི་ནི་གནས་ཆུང་ལྕོག་ཏུ་རྟེན་མདོས་གསར་དུ་བཙུགས་སྐབས། ཆོས་སྐྱོང་ཆེན་པོས་འདི་ལྟ་བུ་བགྱིས་ཞེས་བཀས་བསྐུལ་བ་ལྟར། ཟ་ཧོར་གྱི་བནྡེས་བགྱིས་ཡི་གེ་པ་ནི་སྔགས་བན་ངག་དབང་འཕྲིན་ལས་སོ། །