བོད་སྐྱོང་བསྟན་མ་བཅུ་གཉིས་ཀྱི་མདོས་ཀྱི་འཕྲིན་ལས་དཔྱིད་ཀྱི་རྒྱལ་མོའི་གླུ་དབྱངས།
བོད་སྐྱོང་བསྟན་མ་བཅུ་གཉིས་ཀྱི་མདོས་ཀྱི་འཕྲིན་ལས་དཔྱིད་ཀྱི་རྒྱལ་མོའི་གླུ་དབྱངས་བཞུགས་སོ། །
ན་མ་སྟྲཻ་ཀཱ་ལ་བུདྡྷ་པདྨཱ་ཀ་རཱ་ཡ། སྣང་སྲིད་དྲེགས་པ་ཀུན་གྱི་སྲོག་སྙིང་ལ། །དབང་སྒྱུར་མཚོ་སྐྱེས་པདྨ་ཐོད་ཕྲེང་རྩལ། །དབྱེར་མེད་ཁྱབ་བདག་ཆོས་དབྱིངས་རང་གྲོལ་ཞབས། །རྩ་གསུམ་ཀུན་འདུས་ངོ་བོར་གཙུག་ན་མཛེས། །བདེ་གཤེགས་ཞི་ཁྲོ་ཀུན་འདུས་བཀའ་བརྒྱད་ཀྱི། །མཆོད་བསྟོད་དྲེགས་པའི་དཀྱིལ་འཁོར་ལ་གནས་ལྷ། །རང་སེམས་ཀ་ནས་དག་པའི་མེ་ལོང་ངོས། །དཔལ་ལྡན་ཀུན་ཏུ་བཟང་མོའི་རོལ་གར་མཁན། །ཚུར་མཐོང་འགྲོ་བློར་གངས་ཅན་བོད་ཀྱི་ཡུལ། །རིང་ནས་སྐྱོང་བའི་བསྟན་མ་བཅུ་གཉིས་ཚོགས། །འཕྲིན་ལས་མདོས་ཀྱི་མཆོད་པས་དགྱེས་བསྐྱེད་པའི། །གྱེར་སྒོམ་དཔྱིད་ཀྱི་རྒྱལ་མོའི་གླུ་དབྱངས་ལེན། །དེའང་བོད་ཡུལ་ཁ་བ་ཅན་གྱི་ལྗོངས་འདི་བསྲུང་ཞིང་སྐྱོང་བའི་བསྟན་མ་བཅུ་གཉིས་མཉེས་པར་བྱེད་པའི་མདོས་ཀྱི་འཕྲིན་ལས་ཉམས་སུ་བསྟར་བ་ལ། སྤྱིར་མདོས་ལ་ལྷ་འདྲེ་སྟོང་གི་དྲ་བ་དང་། །མ་མོ་གླིང་བཞི། མགོན་པོ་གཡུལ་བཟློག རཀྴའི་གཏེར་བྱོན་གྱི་གཏོ་སྣང་སྲིད་སིལ་བུ། དགའ་རབ་རྡོ་རྗེའི་མདོས་འཆོང་སོགས་བཀའ་གཏེར་གྱི་ཡི་གེ་ཕྱི་མོ་རྣམས་ནས་ཁོག་ཕུབ་པ་ཞིག་དགོས་ཤིང་། བྱེ་བྲག་གི་(༢ན)
མདོས་ལའང་གསོགས་ཐོག་ནས་མདོས་དང་གྱེར་ཐོག་ནས་གསོགས་ངོས་ཟིན་པ། སོ་སོའི་མཐུན་རྫས་བཤམ་ལུགས། སྤྱི་མདོས་སྒོས་སུ་གཏོང་བ་དང་། སྒོས་མདོས་སྤྱིར་གཏོང་བ། ཕོ་མདོས་མོ་ལ་གཏོང་བ་དང་། མོ་མདོས་ཕོ་ལ་གཏོང་བ། ལས་བཞི་གང་འཚོལ་གྱི་ཁ་སྒྱུར། རྟེན་མདོས་བསྐང་མདོས་བཟློག་མདོས་སོགས་ཕྲ་ཞིབ་ལ་སྒྲོ་འདོགས་བཅད་ཅིང་། སྒྲུབ་པ་བཀའ་བརྒྱད་སྤྱི་བྱེ་བྲག་གི་དབང་དང་། སྲུང་མའི་སྲོག་གཏད་སོགས་ལེགས་པར་ནོས་པའི་རིགས་སྔགས་འཆང་བ་མཚན་ཉིད་འདི་དང་ལྡན་པ་ཞིག་གིས་ཉམས་སུ་བསྟན་དགོས་པའི་ཕྱིར་ན། མདོས་གཏོར་སོགས་ཀྱི་བཅའ་གཞི་རྣམས་གཏོར་གཞུང་དང་མཐོང་བརྒྱུད་ཀྱི་ཕྱག་ལེན་ལ་བལྟོས་པས། དང་པོ་རྫས་བསག་པ། གཉིས་པ་མདོས་བཤམས་པ་རྣམས་ཟུར་དུ་ཤེས་པར་བྱས་ཏེ། གསུམ་པ་མདོས་བྱིན་གྱིས་བརླབ་པ་ནི། སྔགས་པ་བདག་ཉིད་བེར་ནག་ཐོད་དམར་ཁ་གཡུ་ཁ་གསེར་སོགས་ཀྱི་ཆས་སུ་ཞུགས། འབྲུ་སྣ་བྲེ་བཅུ་གསུམ་གྱི་སྟེང་དུ་གསང་འཕྱི་ལ་མདའ་དར་རིན་ཆེན་བཏགས་པ་བཙུགས། རྒྱ་ཕོར་དང་དངུལ་སྐྱོགས་གསེར་སྐྱེམས་(༢བ)
ཀྱིས་བཀང་། སྔགས་དྲུག་ཕྱག་རྒྱ་དྲུག་གིས་བྱིན་གྱིས་བརླབས་ནས། མགྲོན་རྣམ་པ་བཞི་ལ་གསོལ་ཁ་བཏང་། དེ་ནས་བཀའ་བརྒྱད་སྤྱི་བྱེ་བྲག་གང་རུང་གི་འཕྲིན་ལས་གཞུང་བསྲང་། འཛབ་བཟླས་ཚོགས་ལས་ཡན་རྫོགས་པར་བྱས། རྡོ་རྗེ་གནོད་སྦྱིན་གྱི་སྐུར་བསྒྱུར་བ་ནི། པད་ཉི་ཆོས་དབང་གཏེར་གཞུང་གི་དགོངས་དོན་བསྡུས་པ་གསར་རྩོམ། རུ་དྲ་ཕོ་མོའི་གདན་སྟེང་དུ། །རང་ཉིད་ཁྲོ་བོ་རྡོ་རྗེ་གནོད་སྦྱིན་ཆེ། །རྩ་ཞལ་མཐིང་ནག་གཡས་དཀར་གཡོན་པ་དམར། །ཕྱག་དྲུག་རྡོ་རྗེ་ཐོད་ཁྲག་ཐུགས་ཀར་འཛིན། །བར་པ་གཉིས་ཀྱིས་རྡོ་རྗེ་དྲིལ་བུ་བསྣམས། །མཐའ་གཉིས་ཞིང་དབྱུག་འཕྱར་ཞིང་རི་རབ་འཛིན། །ཞབས་གཉིས་བརྐྱང་བསྐུམ་དུར་ཁྲོད་ཆས་གྱིས་བརྒྱན། །ཡེ་ཤེས་མེ་དཔུང་འབར་བའི་དབུས་ན་བཞུགས། །ཞེས་གསལ་བཏབ་མདོས་ཤེས་པ་རྣམ་པ་བཞི་དགོས་པའི་དང་པོ་རི་རབ་གཞལ་ཡས་ཁང་དུ་ཤེས་པ་ནི། སྭ་བྷཱ་ཝས་སྦྱངས། ཆོས་རྣམས་གསར་རྩོམ། མི་དམིགས་སྟོང་པ་ཉིད་ཀྱི་ངང་། །མཁའ་རླུང་ཆུ་ས་འབྱུང་བཞིའི་དཀྱིལ་འཁོར་སྟེང་། །རི་རབ་རིན་ཅེན་བཞི་ལས་ལེགས་གྲུབ་པ། །བང་རིམ་གསུམ་སྟེང་རིན་ཆེན་གཞལ་ཡས་ཁང་། །ཕྱོགས་མཚམས་ལྕོག་མཛེས་སྣ་ཚོགས་རྒྱན་གྱིས་སྤྲས། ཕྱི་རོལ་རྨད་དུ་གསེར་རི་རོལ་མཚོ་བདུན། །གླིང་བཞི་གླིང་ཕྲན་ལྕགས་རི་མུ་ཁྱུད་ཀྱིས། །ཡོངས་བསྐོར་འདོད་ཡོན་ཚོགས་ཀྱིས་གང་བར་གྱུར། །གཉིས་པ་དྲེགས་པའི་གཟུགས་བརྙན་ཕོ་ཉ་ལས་བྱེད་དུ་ཤེས་པ་ནི། དབུས་ཕྱོགས་རིན་ཆོས་དབང་དབང་གཏེར་གྱི་དགོངས་དོན་བསྡུས་པའི་གསར་རྩོམ། ཆེན་མཛེས་པའི་གཞལ་ཡས་སུ། ཁྲག་ཞག་རྒྱ་མཚོ་རྦ་ཀློང་འཁྲུག་པའི་དབུས། །དྲེའུ་ནག་པོ་སྒ་(༣ན)
སྲབ་རྒྱན་སྤྲས་སྟེང་། །བྷྱོཿལས་དཔལ་ལྡན་ནག་མོ་རེ་མ་ཏཱི། །ཕྱག་གཡས་ཤང་ལང་གཡོན་པ་ནད་རྐྱལ་འཛིན། །ཐོད་སྐམ་དབུ་བརྒྱན་ཐོད་རློན་དོ་ཤལ་འཕྱང་། །ཞིང་ཆེན་གཡང་གཞི་རེ་སྡེའི་ཤམ་ཐབས་གྱོན། །རིན་ཆེན་རུས་པ་སྦྲུལ་གྱིས་རྣམ་པར་བརྒྱན།༢ །སྐུ་ལ་ཁྲག་ཞག་ཐལ་ཆེན་རྫས་གསུམ་བྱུགས། །ཀླད་དུ་བྱ་རོག་ནག་པོ་ལྡིང་ཞིང་འཕུར། །མེ་དཔུང་འཚུབ་མར་འཁྱིལ་བའི་དབུས་ན་བཞུགས། །བཅུ་གཉིས་ལྕོག་ནད་མདུན་ནས་གཡས་སྐོར་དུ། །བདག་མངའ་བདག་གི་གཏེར་བྱོན། ཉིད་ཆེན་མོ་རྡོ་རྗེ་ཀུན་གྲགས་མ༔ སྐུ་མདོག་མཐིང་ནག་རིན་ཆེན་རྒྱན་གྱིས་སྤྲས༔ ཆུ་སྲིན་རྒྱལ་མཚན་དང་ནི་མེ་ལོང་བསྣམས༔ འབྲུག་ལ་བཅིབས་ནས་བསྟན་པའི་བྱ་ར་མཛད༔ དཔལ་ལྡན་ཧ་རི་རྡོ་རྗེ་གཡའ་མ་སྐྱོང་༔ སྐུ་མདོག་སྔོ་ནག་རིན་ཆེན་རུས་པས་བརྒྱན༔ རྣོ་བའི་ཤང་ལང་རྡོ་རྗེ་ཞགས་པ་བསྣམས༔ རྐྱང་ལ་བཅིབས་ནས་བསྟན་པའི་བྱ་ར་མཛད༔ གངས་ཀྱི་ཡུམ་ཆེན་རྡོ་རྗེ་ཀུན་ཏུ་བཟང་༔ སྐུ་མདོག་མཐིང་ནག་རིན་ཆེན་རྒྱན་གྱིས་སྤྲས༔ གསེར་གྱི་རྡོ་རྗེ་ཚེ་ཡི་བུམ་པ་བསྣམས༔ སེང་གེ་བཅིབས་ནས་བསྟན་པའི་བྱ་ར་མཛད༔ འབྲོག་ཆེན་འཁོར་འདུལ་རྡོ་རྗེ་བགེགས་ཀྱི་གཙོ༔ སྐུ་མདོག་མཐིང་ནག་མུན་པའི་གོ་ཟུ་ཅན༔ རུ་མཚོན་རྩེ་ལྔ་དང་ནི་ཞགས་པ་བསྣམས༔ དྲེའུ་བཅིབས་ནས་བསྟན་པའི་བྱ་ར་མཛད༔ གངས་དཀར་ཤ་མེད་རྡོ་རྗེ་གཡུ་བུན་མ༔ སྐུ་མདོག་དཀར་མོ་དར་གྱི་ལྷབ་ལྷུབ་ཅན༔ འཛོམས་པའི་ཟོར་བ་གཏེར་གྱི་བུམ་པ་(༣བ)
བསྣམས༔ ཤ་བ་བཅིབས་ནས་བསྟན་པའི་བྱ་ར་མཛད༔ ཁ་རག་ཁྱུང་བཙུན་རྡོ་རྗེ་དཔལ་གྱི་ཡུམ༔ སྐུ་མདོག་དཀར་མོ་རྨ་བྱའི་ཐོད་དང་ལྡན༔ ཌཱ་མ་རུ་དང་གསལ་བའི་མེ་ལོང་བསྣམས༔ ཁྱུང་ལ་བཅིབས་ནས་བསྟན་པའི་བྱ་ར་མཛད༔ གཏེར་ཆེན་མཁའ་ལྡིང་རྡོ་རྗེ་ཀླུ་མོ་ནི༔ སྐུ་མདོག་དམར་མོ་དར་དང་རིན་ཆེན་བརྒྱན༔ སྦྲུལ་གྱི་ཞགས་པ་རིན་ཆེན་པར་བུ་བསྣམས༔ རྟ་མཆོག་བཅིབས་ནས་བསྟན་པའི་བྱ་ར་མཛད༔ རྨ་རི་རབ་འབྱམས་རྡོ་རྗེ་དྲག་མོ་རྒྱལ༔ སྐུ་མདོག་དཀར་གསལ་རིན་ཆེན་དར་ཟབ་མཛེས༔ བེ་ཅོན་དང་ནི་རིན་ཆེན་གཞོང་པ་བསྣམས༔ འཕར་བ་བཅིབས་ནས་བསྟན་པའི་བྱ་ར་མཛད༔ ཀོང་བཙུན་དེ་མོ་རྡོ་རྗེ་བོད་ཁམས་སྐྱོང་༔ སྨུག་ནག་དར་དང་ཞིང་ལྤགས་རློན་པས་བརྒྱན༔ མདའ་དར་དང་ནི་རིན་ཆེན་ཟ་མ་ཏོག༔ སྤྲིན་གསེབ་རླུང་བཅིབས་བསྟན་པའི་བྱ་ར་མཛད༔ བཙན་ལ་རག་མོ་རྡོ་རྗེ་སྨན་གཅིག་མ༔ སྐུ་མདོག་དམར་ལྗང་རིན་ཅེན་སྣ་ལྔས་བརྒྱན༔ ལྷབ་ལྷུབ་དར་དང་དངོས་གྲུབ་འབྲང་རྒྱས་བསྣམས༔ མཛོ་མོ་བཅིབས་ནས་བསྟན་པའི་བྱ་ར་མཛད༔ སྨན་བཙུན་ཁུག་ཆོས་རྡོ་རྗེ་གཡའ་མོ་བསིལ༔ སྐུ་མདོག་དམར་མོ་རིན་ཆེན་རྒྱན་གྱིས་སྤྲས༔ རིན་ཆེན་འབད་པ་སྒྲ་སྙན་ཏིང་ཤག་བསྣམས༔ ཤ་ཡུ་བཅིབས་ནས་བསྟན་པའི་བྱ་ར་མཛད༔ གཡུ་ཡི་དྲིལ་བུ་རྡོ་རྗེ་གཟུགས་ལེགས་མ༔ སྐུ་མདོག་དམར་སེར་རིན་ཆེན་རྒྱན་གྱིས་སྤྲས༔ སྙན་པའི་དྲིལ་བུ་རིན་ཆེན་པདྨ་བསྣམས༔ སྟག་ལ་བཅིབས་ནས་བསྟན་པའི་བྱ་ར་མཛད༔ གསར་བསྒྲིགས། ཀུན་ཀྱང་ཟ་(༤ན)
འོག་དར་གྱི་ཙེ་བེར་གསོལ། །སྣ་ཚོགས་རིན་ཆེན་མཛེས་པའི་རྒྱན་གྱིས་བརྒྱན། །སྨན་མོ་བདུད་དང་གནོད་སྦྱིན་ལ་སོགས་པ། གྲངས་མེད་འཁོར་ཚོགས་རྒྱ་མཚོས་བསྐོར་བར་གྱུར། གསུམ་པ་མཐུན་རྫས་ཕ་སྟགས་གླུད་སྐོངས་སུ་ཤེས་པ་ནི།རཾ་ལས་གསར་སྒྲིགས། མེ་ཡིས་དངོས་པོའི་སྐྱོན་རྣམས་བསྲེགས། །ཡཾ་ལས་རླུང་གིས་དངོས་པོའི་སྐྱོན་རྣམས་སྦྱངས། ཁཾ་ལས་ཆུ་ཡིས་དངོས་པོའི་སྐྱོན་རྣམས་བཀྲུས། །ཨོཾ་གྱིས་འདོད་པའི་ལོངས་སྤྱོད་ལྔ་དང་ལྡན། །ཨཱཿཡིས་ས་གཞི་བར་སྣང་ཡོངས་ཁྱབ་ནས། །མི་མཛད་ནམ་མཁའ་མཛོད་ཀྱི་ལོངས་སྤྱོད་སྤེལ། །ཧཱུཾ་གིས་རྨད་བྱུང་བདུད་རྩི་ཆེན་པོར་བསྒྱུར། །སྭཱ་ཡིས་གཟུགས་བརྙན་ཐམས་ཅད་དཔེ་བྱད་དང་། །ཕུང་པོ་ཁམས་དང་སྐྱེ་མཆེད་མ་ལུས་ལྡན༔ ཧཱ་ཡིས་རེ་ཏཱི་བསྟན་སྐྱོང་འཁོར་བཅས་ཀྱི། །སྐུ་གསུང་ཐུགས་དང་གཉིས་མེད་བྱིན་རླབས་ཀྱིས། །ཐུགས་དམ་གཉན་པོ་སྐོང་བའི་ནུས་ལྡན་གྱུར། །ཨཱོཾ་ཨཱཿཧཱུཾ་ཏྲེ་སྦཾ་བཾ་ཏྲཾ་རཏྣ་ཏྲཻ་ལོཀྱ་ཕཊ༔ བཞི་བ་མཐུན་རྫས་དུག་མཚོན་དང་དུག་དཔལ་དུ་ཤེས་པ་ནི། གསར་རྩོམ། སྣ་ཚོགས་མཚོན་ཕུར་རྩེད་སོགས་དྲག་པོའི་རྫས། །གནམ་ལྕགས་རྡོ་རྗེ་འབར་བའི་ཐོག་ལྟ་བུར། །གྱུར་ནས་དགྲ་བགེགས་མ་ལུས་རྩད་གཅོད་ཅིང་། །ཐལ་བའི་རྡུལ་དུ་རློག་པའི་ནུས་ལྡན་གྱུར། །སྔགས་དྲུག་དང་ཕྱག་རྒྱ་དྲུག་གིས་ཀྱང་བྱིན་བརླབ་བོ། བཞི་པ་སྤྱན་དྲང་བ་ནི། ཙནྡན། ཨཀརུ། སྤོས་དཀར། ཤིང་སྣ། ཚིལ་ཆེན་གྱི་དུད་པ་བཏང་། རོལ་མོ་དཀྲོལ། གཡབ་དར་དང་བཅས་ནས། ཆོས་དབང་གི་གཏེར་བྱོན། བྷྱོ། དད་པ་དང་ནི་དམ་ཚིག་གིས༔ མ་གཅིག་དཔལ་ལྡན་ལྷ་མོ་སྤྱན་འདྲེན་ནོ༔ སྐུ་གཅིག་མ་ལ་མཆེད་བཞི་མིང་དགུ་མ༔ ཉི་མ་བྱང་ཤར་མཚམས་ནས་གཤེགས་སུ་གསོལ༔ ཀུན་གྱི་གཙོ་(༤བ)
མོ་མཛད་པའི་རེ་མ་ཏཱི༔ སྐུ་ཡི་རྒྱན་དུ་ཞིང་ཆེན་གཡང་གཞི་གྱོནཿ གཡས་གཡོན་ཕྱག་ན་ནད་རྐྱལ་ཤང་ལང་བསྣམས༔ དྲེལ་རྟ་རྐང་གསུམ་བཅིབས་ནས་འདིར་སྐྱོད་ལ༔ མང་ཡུལ་དུར་ཁྲོད་ཀློང་ནས་གཤེགས་སུ་གསོལ༔ བདག་ཉིད་ཆེན་མོ་བཀྲ་ཤིས་ཚེ་རིང་མ༔ བེར་ནག་གྱོན་ནས་ཕྱག་ན་ཁྲཾ་བཾ་ཐོགས༔ བདུད་ཤ་ཞོན་ནས་བདུད་དཔུང་བཟློག་པའི་ཕྱིར༔ དོན་མཐིང་ཉ་ལམ་གངས་ནས་གཤེགས་སུ་གསོལ༔ དཔལ་ལྡན་ཧ་རི་རྡོ་རྗེ་གཡའ་མོ་སྐྱོང་༔ བེར་སོན་གྱོན་ནས་ཕྱག་ན་ཞགས་པ་འཛིན༔ གསེར་གྱི་མདོག་ཅན་རྟ་མཆོག་སེར་པོ་བཅིབས༔ གཟའ་བདུད་ནག་པོའི་གནོད་པ་བཟློག་པའི་ཕྱིར༔ ཕ་རི་གནས་ཀྱི་གངས་ནས་གཤེགས་སུ་གསོལ༔ གངས་ཀྱི་ཡུམ་ཆེན་རྡོ་རྗེ་ཀུན་ཏུ་བཟང་༔ བེར་དམར་གྱོན་ནས་ཕྱག་ན་ཐོད་ཁྲག་འཛིན༔ བོང་བུ་གླ་བ་ཞོན་ནས་སྟོང་ཁམས་གཡུལ༔ བཙན་ཐོགས་འདུལ་ཕྱིར་ལ་ཕྱིའི་གངས་ནས་གཤེགས་སུ་གསོལ༔ འབྲོག་ཆེན་འཁོར་འདུལ་རྡོ་རྗེ་བགེགས་ཀྱི་གཙོ༔ བེར་ལྗང་གྱོན་ནས་བེ་ཅོན་ཞགས་པ་འཛིན༔ ཁམས་ཀྱི་རྔ་མོ་ཞོན་ཞིང་འཇིག་རྟེན་གཡོ༔ གནོད་བྱེད་བགེགས་ཀྱི་བར་ཆད་བཟློག་པའི་ཕྱིར༔ འབྲོག་སྨན་ལུང་གི་མཚོ་ནས་གཤེགས་སུ་གསོལ༔ བདུད་མོ་འཁོར་བཅས་གནས་འདིར་སྤྱན་འདྲེན་གཤེགས༔ གངས་དཀར་ཤ་མེད་རྡོ་རྗེ་སྤྱན་གཅིག་མ༔ བེར་དཀར་གྱོན་ནས་ཐོད་དང་རལ་གྲི་འཛིན༔ སེང་གེ་ཞོན་ནས་དགྲ་བགེགས་འགུགས་པར་བྱེད༔ རྒྱལ་པོའི་བར་ཆད་ཆོ་འཕྲུལ་བཟློག་པའི་ཕྱིར༔ གྱ་བ་ཕུ་ཡི་གངས་ཟུར་གནས་ནས་གཤེགས༔ ཁ་རག་(༥ན)
ཁྱུང་བཙུན་རྡོ་རྗེ་དཔལ་གྱི་ཡུམ༔ བེར་སེར་གྱོན་ནས་ཕྱག་ན་དགྲ་སྟ་འཛིན༔ ཁྱུང་ལ་ཞོན་ནས་མི་བསྐྱོད་དབྱིངས་ན་བཞུགས༔ གཤིན་རྗེའི་གདོན་དང་དགྲ་དཔུང་འཇོམས་པའི་ཕྱིར༔ ཁ་རག་ཤར་གྱི་གནས་ནས་གཤེགས་སུ་གསོལ༔ སེང་ཆེན་མཁའ་ལྡིང་རྡོ་རྗེ་ཀླུ་མོ་ནི༔ བེར་དམར་གྱོན་ནས་ཕྱག་ན་ལྕགས་ཀྱུ་འཛིན༔ དོམ་ནག་ཞོན་ནས་ལྷོ་མོན་དབྱིངས་ལ་གཤེགས༔ རྨི་ལྟས་མཚན་མ་ངན་པ་བཟློག་པའི་ཕྱིར༔ ཇོ་མོ་ནགས་རྒྱལ་གནས་ནས་གཤེགས་སུ་གསོལ༔ རྨ་རི་རབ་འབྱམས་རྡོ་རྗེ་དྲག་མོ་རྒྱལ༔ བེར་ལྗང་གྱོན་ནས་ཕྱག་ན་ཙིཏྟ་བསྣམས༔ མི་དྲེད་ནག་མོ་ཞོན་ནས་དམ་ཉམས་འགུགས༔ གློ་བུར་སེམས་ཀྱི་ཡེ་འབྲོག་ཞི་བའི་ཕྱིར༔ བྱང་གི་སྨན་ཆེན་བོད་ནས་གཤེགས་སུ་གསོལ༔ གནོད་སྦྱིན་འཁོར་བཅས་གནས་འདིར་སྤྱན་འདྲེན་གཤེགས༔ ཀོང་བཙུན་དེ་མོ་རྡོ་རྗེ་བོད་ཁམས་སྐྱོང་༔ བེར་དཀར་གྱོན་ནས་འཆིང་བྱེད་ཞགས་པ་འཛིན༔ རྭ་བཅུ་ཤ་བ་ཞོན་ནས་བདུད་དཔུང་འཇོམས༔ ས་བདག་ཀླུ་ཡི་ནད་གདོན་ཞི་བའི་ཕྱིར༔ ཀོང་པོ་ཤར་གྱི་ཕྱོགས་ནས་གཤེགས་སུ་གསོལ༔ གཙང་ལ་ར་རོག་རྡོ་རྗེ་སྨན་གཅིག་མ༔ བེར་སེར་གྱོན་ནས་ཕྱག་ན་དྲིལ་བུ་འཛིན༔ མདངས་ཆེན་གཙོད་ལ་ཞོན་ནས་གཏད་བཟློག་མ༔ གནོད་སྦྱིན་གདུག་པའི་ནད་གདོན་ཞི་བའི་ཕྱིར༔ བསམ་སྡིངས་རྒྱབ་རིའི་གནས་ནས་གཤེགས་སུ་གསོལ༔ སྨན་བཙུན་ཨུག་ཆོས་རྡོ་རྗེ་གཡར་མོ་བསིལ༔ བེར་དམར་གྱོན་ནས་དམ་ཉམས་སྲོག་རྩ་གཅོད༔ ཕྱག་ན་ཚོན་སྣ་ལྔ་ཡི་དྲུ་བུ་འཛིན༔ འབྲི་ལ་ཞོན་ནས་དམ་ཉམས་ནད་ལ་འདེབས༔ རྟ་ནག་ཚ་ཚ་(༥བ)
མོ་ནས་གཤེགས་སུ་གསོལ༔ གཡུ་ཡི་དྲིལ་སྙན་རྡོ་རྗེ་གཟུགས་ལེགས་མ༔ བེར་ནག་གྱོན་ནས་འགུགས་བྱེད་ལྕགས་ཀྱུ་འཛིན༔ རྐྱང་ལ་ཞོན་ནས་སྟོང་གསུམ་གཡུལ་བར་བྱེད༔ འཕུང་བྱེད་ནག་མོའི་གདོན་རྣམས་བཟློག་པའི་ཕྱིར༔ བོད་ཀྱི་དབུས་རིའི་གནས་ནས་གཤེགས་སུ་གསོལ༔ སྨན་བཙུན་འཁོར་བཅས་གནས་འདིར་སྤྱན་འདྲེན་གཤེགས་སུ་གསོལ༔ ཧོཿ ནག་གཏེར་ཁ་འོག་མ་ནས་མངའ་རིསཔཎ་ཆེན་གྱིས་བསྒྲིགས། མོ་བཞིན་མི་སྡུག་གི་བུ་མོ་བདུད་མོ་བཞི། །དམར་མོ་ཁྲོ་གཉེར་ཅན་གྱི་བུ་མོ་གནོད་སྦྱིན་མོ་བཞི། །དཀར་མོ་མདངས་ལྡན་མའི་བུ་མོ་སྨན་བཙུན་མ་བཞི། །སྔོན་ཚེ་ཨ་སུ་ར་ཡི་བྲག་ཕུག་དབེན་གནས་སུ། །སློབ་དཔོན་ཆེན་མོ་པདྨ་འབྱུང་གནས་དང་། །བཤེས་གཉེན་གླང་ཆེན་དཔལ་གྱི་སེང་གེ་ཡིས། །ཞིང་ཆེན་བསྒྱེལ་བའི་སྟེང་དུ་བཞག་ནས་ཀྱང་། །རྡོ་རྗེ་ལག་གཏད་བདུད་རྩི་ལྕེ་ལ་བཞག །དེ་ཚེ་ཁས་བླངས་དམ་ལས་མ་འདའ་བར། །ཚུར་གཤེགས་ཚུར་སྤྱོན་བོད་སྐྱོང་བསྟན་མ་རྣམས། །ཀུན་ཀྱང་ལྷབ་ལྷུབ་མང་པོའི་རྒྱན་དང་བཅས། །རོལ་མོ་སིལ་སྙན་མང་པོའི་སྒྲ་དང་བཅས། །བྲན་གཡོག་མང་པོའི་འཁོར་དང་བཅས་ཏེ་སྤྱོན། །འདིར་གཤེགས་དམ་བསྐོང་འཕྲིན་ལས་གྲུབ་པར་མཛོད། །ཧཱུཾ སྔོན་ཉང་གཏེར། ཚེ་དུར་ཁྲོད་ཆེན་པོ་བསིལ་བའི་ཚལ། །ཡེ་ཤེས་མཁའ་འགྲོ་སེང་གེའི་གདོང་ཅན་གྱི༔ སྤྱན་སྔར་ཐུགས་དམ་ཞལ་བཞེས་དམ་བཅས་པའི༔ བསྟན་སྐྱོང་མཁའ་འགྲོའི་ཚོགས་རྣམས་གཤེགས་སུ་གསོལ༔ སྔོན་ཚེ་བལ་བོ་ཁ་ལམ་རོང་དགུ་རུ༔ སློབ་དཔོན་ཆེན་པོ་པདྨ་འབྱུང་གནས་ཀྱི༔ སྤྱན་སྔར་ཐུགས་དམ་ཞལ་བཞེས་དམ་བཅས་པའི༔ བོད་སྐྱོང་བསྟན་(༦ན)
མ་བཅུ་གཉིས་གནས་འདིར་གཤེགས༔ རང་རང་སྡེ་བརྒྱད་དུ་མའི་འཁོར་བཅས་རྣམས༔ དམ་ཅན་རྣལ་འབྱོར་སྒྲུབ་པོ་འཁོར་བཅས་ལ༔ ཐུགས་ནི་བརྩེ་བས་རྗེས་སུ་ཉེར་དགོངས་ལ༔ སྤྱན་འདྲེན་མཆོད་པའི་གནས་འདིར་གཤེགས་སུ་གསོལ༔ ཨཱོཾ་ཨེ་ཧྱེ་ཧིཿཌཱ་ཀི་ནི་ས་པ་རི་ཝཱ་ར་ས་མ་ཡ་ཛཿཛཿཛཿཛཿཧཱུཾ་བཾ་ཧོཿ ཨཱོཾ་མ་མ། མེ་མེ། ལ་ལ། ལེ་ལེ། ཏ་ཏ། ཏེ་ཏེ། ཁ་རགྨཿ མ་མ་སྲིང་འགྲོ་མ་ཧཱུཾ་བྷྱོ་ཧཱུཾཿ ལྔ་པ་བཞུགས་སུ་གསོལ་ཞིང་བཀའ་བསྒོ་བ་ནི། ཧཱུཾ་བྷྱོཿ རླུང་ཆོས་དབང་གི་གཏེར་བྱོན། ནག་འཚུབ་མའི་དཀྱིལ་འཁོར་དུ༔ མཐིང་ནག་གྲུ་གསུམ་འབར་བའི་གཞལ་ཡས་ནས༔ ལྕགས་ཀྱི་དྲེལ་རྟ་མགྱོགས་པའི་གདན་སྟེང་ན༔ ནག་མོ་མི་སྤྲུལ་བདུད་མོ་མཆེ་བ་ཅན༔ མངོན་སྤྱོད་ལས་ཀྱི་འཕྲིན་ལས་བསྒྲུབ་པའི་ཕྱིར༔ མཐིང་ནག་རོ་ཡི་གདན་ལ་བཞུགས་སུ་གསོལ༔ བྷྱོ། བདག་ཉིད་ཆེན་མོ་ལ་སོགས་བདུད་མོ་ཆེན་མོ་བཞི༔ བཞིན་མི་སྡུག་གི་བུ་མོ་བེར་ནག་གྱོན༔ རྣལ་འབྱོར་དབང་གི་འཕྲིན་ལས་བསྒྲུབ་པའི་ཕྱིར༔ དམར་ནག་རོ་ཡི་གདན་ལ་བཞུགས་སུ་གསོལ༔ བྷྱོ། གངས་དཀར་ཤ་མེད་ལ་སོགས་གནོད་སྦྱིན་བཞི༔ ཁྱོད་རྣམས་གནོད་སྦྱིན་དབང་སྒྱུར་རིགས་ཡིན་པར༔ ལས་སུ་གསོད་གཅོད་སྲོག་དབུགས་ལེན་པར་དགྱེས༔ སེར་ནག་རོ་ཡི་གདན་ལ་བཞུགས་སུ་གསོལ༔ བྷྱོ། ཀོང་བཙུན་དེ་མོ་ལ་སོགས་སྨན་བཙུན་བཞི༔ ཁྱོད་རྣམས་སྨན་བཙུན་དཀར་མོའི་རིགས་ཡིན་པས༔ སྐྱེ་འགྲོ་སེམས་ཅན་ཚེ་སྲོག་བསྲིང་བར་བྱེད༔ དཀར་ནག་རོ་ཡི་གདན་ལ་བཞུགས་སུ་གསོལ༔ ས་མ་ཡ་ཨ་ཕེབས༔ དེ་ནས་བཀའ་བསྒོ་བ་ནི།(༦བ)
ཧཱུཾ། ང་ནི་གཏེར་བདག་མ། ཆེ་མཆོག་ཧེ་རུ་ཀ༔ སངས་རྒྱས་ཀུན་དང་མཉམ་སྦྱོར་པའི༔ ཇི་སྙེད་སངས་རྒྱས་ཐམས་ཅད་ཀྱི༔ དེ་བཞིན་སྒྲུབ་པའི་རྣལ་འབྱོར་པའི༔ དད་པ་དང་ནི་དམ་ཚིག་གིས༔ མིང་སྲིང་བཞིན་དུ་དམ་བསྲེས་པའི༔ དམ་ཚིག་ཆེན་པོའི་དུས་ལ་བབ༔ རྡོ་རྗེ་དྲི་ཆུ་བདུད་རྩིའི་མཆོག༔ པཉྩ་ཨ་མྲྀ་ཏ་སྦྱར་ཏེ༔ དཔལ་ལྡན་ལྷ་མོ་རེ་མ་དང་༔ སྤྲུལ་པའི་བསྟན་མ་བཅུ་གཉིས་ལ༔ ཁྲོ་བོ་རྡོ་རྗེ་གནོད་སྦྱིན་གྱིས༔ ལྕེ་ལ་བདུད་རྩི་བཞག་ནས་ནི༔ སྔོན་ཚེ་ཇི་ལྟར་མནའ་བོར་བཞིན༔ ང་ཡང་དམ་ལས་མི་འདའ་འོ༔ ཁྱེད་རྣམས་དམ་ལས་མ་འདའ་ཞིག༔ གལ་ཏེ་དམ་ལས་ཁྱོད་འདས་ན༔ ཁྲོ་བོ་རྡོ་རྗེ་གནོད་སྦྱིན་གྱིས༔ སྙིང་ཁྲག་བཞོས་ཏེ་འཐུང་བར་བྱེད༔ དེ་བས་དམ་ལས་མ་འདའ་བར༔ བཅོལ་བའི་འཕྲིན་ལས་གྲུབ་པར་མཛོད༔ བཛྲ་ཡཀྴ་ཧཱུཾ་ཧཱུཾ། དྲུག་པ་མཆོད་པ་འབུལ་ཞིང་ཐུགས་དམ་བསྐང་བ་ནི། ཧཱུཾ། ཐབས་དང་གཏེར་ཁ་འོག་མ། ཤེས་རབ་གཉིས་མེད་པའི༔ རང་བྱུང་གདོད་ནས་རྣམ་པར་དག༔ རྩ་བརྒྱད་སྟོང་ལ་སྦྱར་བའི་སྨན༔ ར་ས་ཡ་ན་ལ་སོགས་པའི༔ བཅོམ་ལྡན་ཆེ་མཆོག་ཡབ་ཡུམ་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེ་བརྩེར་དགོངས་དབང་དང་དངོས་གྲུབ་སྩོལ༔ མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ཡེ་ཤེས་འོད་ཀྱི་དཀྱིལ་འཁོར་ནས༔ དཔལ་ལྡན་རེ་མ་ཏཱིའི་ཞལ་དུ་ཁ་རཾ་ཁཱ་ཧི༔ ཆོས་དབྱིངས་རྣམ་དག་གཞལ་ཡས་ནས༔ བདག་ཉིད་ཆེན་མོའི་ཞལ་དུ་ཁ་རཾ་ཁཱ་ཧི༔ ཡོངས་རྫོགས་དཔལ་ལྡན་དཀྱིལ་འཁོར་ནས༔ དཔལ་ལྡན་ལྷ་རིའི་ཞལ་དུ་ཁ་རཾ་ཁཱ་(༧ན)
ཧི༔ ཧིཿ ཉི་ཟླ་འོད་ཀྱི་དཀྱིལ་འཁོར་ནས༔ གངས་ཀྱི་ཡུམ་ཆེན་ཞལ་དུ་ཁ་རཾ་ཁཱ་ཧི༔ འཕུང་བྱེད་སྦས་པའི་དཀྱིལ་འཁོར་ནས༔ འབྲོག་ཆེན་འཁོར་འདུལ་ཞལ་དུ་ཁ་རཾ་ཁཱ་ཧི༔ སྙིང་རྗེ་བྱམས་པའི་དཀྱིལ་འཁོར་ནས༔ གངས་དཀར་ཤ་མེད་ཞལ་དུ་ཁ་རཾ་ཁཱ་ཧི༔ ཡང་གསང་དགོངས་པའི་དཀྱིལ་འཁོར་ནས༔ ཁ་རག་ཁྱུང་བཙུན་ཞལ་དུ་ཁ་རཾ་ཁཱ་ཧི༔ ཆགས་བྱེད་ཆ་སྙོམས་དཀྱིལ་འཁོར་ནས༔ སེར་ཆེན་མཁའ་ལྡིང་ཞལ་དུ་ཁ་རཾ་ཁཱ་ཧི༔ ཉུལ་ལེ་འབུམ་གྱི་དཀྱིལ་འཁོར་ནས༔ རྨ་རི་རབ་འབྱམས་ཞལ་དུ་ཁ་རཾ་ཁཱ་ཧི༔ ཕོ་ཉ་འབར་བའི་དཀྱིལ་འཁོར་ནས༔ ཀོང་བཙུན་དེ་མོའི་ཞལ་དུ་ཁ་རཾ་ཁཱ་ཧི༔ དུར་ཁྲོད་ཚོགས་ཀྱི་དཀྱིལ་འཁོར་ནས༔ བཙན་ལ་ར་རོག་ཞལ་དུ་ཁ་རཾ་ཁཱ་ཧི༔ གླིང་བཞི་རྩ་ཡི་དཀྱིལ་འཁོར་ནས༔ མ་བཙུན་ཨུག་ཆོས་ཞལ་དུ་ཁ་རཾ་ཁཱ་ཧི༔ དྲི་ཟ་ལ་སོགས་དཀྱིལ་འཁོར་ནས༔ གཡུའི་དྲིལ་སྙན་ཞལ་དུ་ཁ་རཾ་ཁཱ་ཧི༔ དུར་ཁྲོད་འབར་བའི་དཀྱིལ་འཁོར་ནས༔ ཨེ་ཀ་ཛ་ཏི་སྤུན་དྲུག་ཞལ་དུ་ཁ་རཾ་ཁཱ་ཧི༔ འབྱུང་བ་དབུགས་ཀྱི་དཀྱིལ་འཁོར་ནས༔ རྟག་པའི་རྒྱལ་མོ་ལྔའི་ཞལ་དུ་ཁ་རཾ་ཁཱ་ཧི༔ རྟེན་དུ་བཙུགས་ན་རང་དབང་མེད་པར་འདུ༔ སྲིད་པ་ཆགས་པའི་མ་མོའི་ཚོགས་བཅས་ཞལ་དུ་ཁ་རཾ་ཁཱ་ཧི༔ རྣམ་དག་བདུད་རྩིའི་དམ་རྫས་མཉེས་མཆོད་ལ༔ ཐུགས་རྗེ་བརྩེ་དགོངས་དབང་དང་དངོས་གྲུབ་སྩོལ༔ མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ བྷྱོ། འདོད་ཁམས་བསྟན་མ་བཅུ་གཉིས་ལ༔ ཕྱི་ཡི་མཆོད་པ་འབུལ་བ་ནི༔ མཛེས་པའི་མེ་ཏོག་དབུ་ལ་འབུལ༔ དྲི་ཞིམ་བདུག་སྤོས་ཤངས་ལ་འབུལ༔ སྣང་(༧བ)
གསལ་མར་མེ་སྤྱན་ལ་འབུལ༔ དམ་རྫས་གཏོར་མ་ལྗགས་ལ་འབུལ༔ ཐོད་རྔ་གླིང་བུ་སྙན་ལ་འབུལ༔ མི་ལྤགས་གཡང་གཞི་སྐུ་ལ་འབུལ༔ ཤ་ཆེན་སྤོས་ཀྱི་མཆོད་པ་འབུལ༔ ཞུན་ཆེན་མར་མེའི་མཆོད་པ་འབུལ༔ རྡོ་རྗེ་དྲི་ཆུ་བྱུག་པས་མཆོད༔ ཨོཾ་བཛྲ་པུཥྤེ། དྷཱུ་པེ་ཨཱ་ལོ་ཀེ །གནྡྷེ། ནེ་ཝི་དྱེ། ཤཔྟ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡ་ཧཱུཾ༔ བྷྱོ། རང་བྱུང་ནང་མཆོད་འབུལ་བ་ནི༔ འབྲས་ཆན་འཁུར་བ་ཟན་དང་ཆང་༔ མི་ཤ་ལ་སོགས་ཤ་ལྔས་བརྒྱན༔ གཏི་མུག་ཤ་ནི་ཟན་ལས་ཞིམ༔ འདོད་ཆགས་ཁྲག་ནི་ཆང་ལས་ཞིམ༔ ཞེ་སྡང་ཀེང་རུས་རྫ་ལྟར་སྤུངས༔ ནང་གི་མཆོད་པ་བཞེས་སུ་གསོལ༔ མ་ཧཱ་པཱུ་ཙ་ཧོ༔ བྷྱོ། གཉིས་མེད་གསང་མཆོད་འབུལ་བ་ནི༔ ཟག་བཅས་ཕུང་པོ་རྣམ་པ་ལྔ༔ སྐུ་ཡི་མཆོད་པར་བཞེས་སུ་གསོལ༔ འདོད་ཆགས་ཞེ་སྡང་ཉོན་མོངས་ལྔ༔ གསུང་གི་མཆོད་པར་བཞེས་སུ་གསོལ༔ ཐིག་ལེ་དཀར་དམར་བདེ་གསལ་དབྱིངས༔ ཐུགས་ཀྱི་མཆོད་པར་བཞེས་སུ་གསོལ༔ བླ་མེད་གསང་བའི་བློ་བྲལ་དང་༔ བློ་དང་ལྡན་པ་སྣ་ཚོགས་རྣམས༔ གཟུང་འཛིན་མེད་པར་འབུལ་ལགས་ཀྱི༔ དུག་གསུམ་ལུས་ངག་ཡིད་དང་གསུམ༔ སྐུ་གསུང་ཐུགས་ཀྱི་མཆོད་པར་བཞེས༔ མ་ཧཱ་པཱུ་ཙ་ཧོ༔ བསྐང་ངོ་བསྐལ་པའི་ཐུགས་དམ་བསྐང་༔ ཆོས་དབྱིངས་མཁའ་ཀློང་ཕོ་བྲང་ནས༔ མངོན་རྫོགས་རྒྱལ་བའི་ཐུགས་དམ་བསྐང་༔ ནམ་མཁའ་དབྱིངས་ཀྱི་དཀྱིལ་འཁོར་ནས༔ བདག་ཉིད་ཆེན་མོའི་ཐུགས་དམ་བསྐང་༔ འབྱུང་ལྔ་རྣམ་དག་དཀྱིལ་འཁོར་ནས༔ དཔལ་ལྡན་ལྷ་རིའི་ཐུགས་དམ་བསྐང་༔ དབྱིངས་(༨ན)
དང་ཡེ་ཤེས་གཉིས་མེད་པའི༔ གངས་ཀྱི་ཡུམ་ཆེན་ཐུགས་དམ་བསྐང་༔ སྣང་སྲིད་ཀུན་ལ་དབང་སྒྱུར་བའི༔ འབྲོག་ཆེན་འཁོར་འདུལ་ཐུགས་དམ་བསྐང་༔ སྦས་པའི་ལྷ་མོ་འདུལ་པའི་ཕྱིར༔ གངས་དཀར་ཤ་མེད་ཐུགས་དམ་བསྐང་༔ སྲིད་པ་མ་མོ་འདུལ་པའི་ཕྱིར༔ ཁ་རག་ཁྱུང་བཙུན་ཐུགས་དམ་བསྐང་༔ སྲིད་པ་བྷྱོ་ཟློག་མཛད་པའི་ཕྱིར༔ སེར་ཆེན་མཁའ་ལྡིང་ཐུགས་དམ་བསྐང་༔ གླིང་བཞིའི་མངའ་བདག་ཡིན་པའི་ཕྱིར༔ རྨ་རི་རབ་འབྱམས་ཐུགས་དམ་བསྐང་༔ སྨན་མོའི་གཙོ་མོ་ཡིན་པའི་ཕྱིར༔ ཀོང་བཙུན་དེ་མོའི་ཐུགས་དམ་བསྐང་༔ ས་བདག་ཆེན་མོ་ཡིན་པའི་ཕྱིར༔ བཙན་ལ་ར་རོའི་ཐུགས་དམ་བསྐང་༔ སྐྱེ་འཆི་མེད་པའི་སྐུ་བརྙེས་ཕྱིར༔ མོ་བཙུན་ཨུག་ཆོས་ཐུགས་དམ་བསྐང་༔ དཀྱིལ་འཁོར་མུ་རན་སྐྱོང་བའི་ཕྱིར༔ གཡུ་ཡི་དྲིལ་བུའི་ཐུགས་དམ་བསྐང་༔ བསྟན་མ་བཅུ་གཉིས་ཐུགས་དམ་བསྐང་༔ སྐྱོང་མ་བཅུ་གཉིས་ཐུགས་དམ་བསྐང་༔ ཏི་མ་བཅུ་གཉིས་ཐུགས་དམ་བསྐང་༔ ཡ་མ་བཅུ་གཉིས་ཐུགས་དམ་བསྐང་༔ འཁོར་བཅས་ཤ་སྣས་བསྐང་བ་ནི༔ རི་རབ་སྲིད་པའི་བུམ་རྩེ་ནས༔ ཡེ་ཤེས་མཆོག་གི་མ་མོ་ལ༔ སེང་གེ་དཀར་མོའི་ཤ་ཡིས་བསྐང་༔ མི་རྟོག་ནམ་མཁའི་མཁའ་སྟོང་ནས༔ བོད་སྐྱོང་བསྟན་མ་བཅུ་གཉིས་ལ༔ ཤ་ཆེན་མཆོག་གིས་ཐུགས་དམ་བསྐང་༔ བ་ལང་དཀར་པོའི་ཤ་ཡིས་བསྐང་༔ དཔའ་གཏུམ་སྟག་མོའི་ཤ་ཡིས་བསྐང་༔ པུ་ཤུད་རྨ་བྱའི་ཤ་ཡིས་བསྐང་༔ ཐོགས་མེད་བྱ་ཁྱུང་ཤ་ཡིས་བསྐང་༔ མི་སྣང་འཇོལ་མོའི་ཤ་ཡིས་བསྐང་༔ བྱ་རྒོད་དཀར་པོའི་ཤ་ཡིས་(༨བ)
བསྐང་༔ ཅེ་སྤྱང་ནག་པོའི་ཤ་ཡིས་བསྐང་༔ གཏི་མུག་དྲེད་མོའི་ཤ་ཡིས་བསྐང་༔ ང་རྒྱལ་འཕར་བའི་ཤ་ཡིས་བསྐང་༔ ཞེ་སྡང་སྦྲུལ་གྱི་ཤ་ཡིས་བསྐང་༔ བསྟེན་པའི་དམ་རྫས་ཡིན་པའི་ཕྱིར༔ ལུག་ནག་སྤྱི་དཀར་ཐུགས་དམ་བསྐང་༔ འབོད་པའི་དམ་རྫས་ཡིན་པའི་ཕྱིར༔ རོལ་མོ་སྒྲ་ཡིས་ཐུགས་དམ་བསྐང་༔ རྟག་ཏུ་མི་འབྲལ་འགྲོགས་པའི་ཕྱིར༔ རྟག་གཏོར་ཆེན་པོས་ཐུགས་དམ་བསྐང་༔ རྒྱུན་དུ་མི་འབྲལ་འགྲོགས་པའི་ཕྱིར༔ རྒྱུན་གྱི་གཏོར་མས་ཐུགས་དམ་བསྐང་༔ དམ་ཚིག་གཉན་པོ་བསྲེ་པའི་ཕྱིར༔ བདུད་རྩི་སྨན་གྱི་ཐུགས་དམ་བསྐང་༔ རཀྟ་སྐོམ་དུ་འཐུང་བའི་ཕྱིར༔ ཁྲག་གི་རྒྱ་མཚོས་ཐུགས་དམ་བསྐང་༔ སྲིན་བྱ་བྱ་རོག་ངུར་སོགས་ཀྱིས༔ འཁོར་དང་བཅས་པའི་ཐུགས་དམ་བསྐང་༔ ཤ་སྣ་སྟོང་གིས་ཐུགས་དམ་བསྐང་༔ སྙིང་སྣ་འབུམ་གྱི་ཐུགས་དམ་བསྐང་༔ བྷྱོ། སྲིད་པ་ཆགས་བྱེད་ལ་སོགས་ལ༔ གོང་རུ་སྟོད་ཀྱི་དཀོར་ཆ་དང་༔ རྒྱ་ཡུལ་མཐིལ་གྱི་དར་དང་ཟབ༔ མདོ་ཁམས་སྨད་ཀྱི་ཇ་དང་ཟོག༔ མང་ཡུལ་སྟོད་ཀྱི་སྨན་དང་སྤོས༔ སྤ་གྲོ་སྨད་ཀྱི་བཙོད་དང་ཞུན༔ བྱད་ཁ་སྟོད་ཀྱི་ཚྭ་དང་ཉ༔ བོད་ཁ་སྨད་ཀྱི་འབྲུ་དང་བཅུད༔ ལྷ་མོ་འཁོར་དང་བཅས་པའི་ཐུགས་དམ་བསྐང་༔ ཚོགས་བྱ་བ་ནི། བྷྱོ། གཏེར་ཁ་འོག་མ། ཚོགས་ཀྱི་དངོས་པོ་བསྲེག་སྦྱང་བཀྲུ༔ རཾ་ཡཾ་ཁཾ་ཨཱོཾ་ཨཱཿཧཱུཾ། བདེ་བར་གཤེགས་སོ་བཅོམ་ལྡན་འདས༔ སངས་རྒྱས་ཀུན་གྱི་བདག་ཉིད་ཅན༔ བོད་སྐྱོང་བསྟན་མ་བཅུ་གཉིས་ལ༔ ཞལ་ཟས་ཚོགས་ཀྱི་མཆོད་པ་འབུལ༔ ག་ཎ་ཙཀྲ་པཱུ་ཙ་པ་ལིཾ་ཏ་ཁཱ་ཧི༔ བྷྱོ། བསྟན་མ་བཅུ་གཉིས་འཁོར་བཅས་རྣམས༔ (༩ན)
ཕྱི་ནང་གསང་གསུམ་ཚོགས་ལ་རོལ༔ དམ་སྐོང་དབང་དང་དངོས་གྲུབ་སྩོལ༔ མི་མཐུན་རྐྱེན་དང་བར་ཆད་སོལ༔ རྩ་བ་ཡན་ལག་དམ་ཚིག་ཀུན༔ ཞལ་ཟས་ཚོགས་ཀྱིས་མཐོལ་ལོ་བཤགས༔ བཛྲ་ས་མ་ཡ་ཧོ༔ ཨེ་ཧྱེ་ཧི། ཚུར་སྤྱོན་འཁོར་དང་བཅས༔ མ་ཏྲཾ་ཤ་ལ་རོལ་གཅིག་མཆོད་པར་བཞེས༔ དམར་ཆེན་ཁྲག་ལ་རོལ་ཅིག་མཆོད་པར་བཞེས༔ གསུར་ཆེན་ཚལ་ལ་རོལ་ཅིག་མཆོད་པར་བཞེས༔ རུས་ཆེན་རྐང་ལ་རོལ་ཅིག་མཆོད་པར་བཞེས༔ དགྲ་བགེགས་ཤ་ཁྲག་རུས་པ་ལ་ཁཱ་ཧི་ཁཱ་ཧི༔ ལམ་བཏབ་བ། མ་མོ་ཐམས་ཅད་དབྱིངས་སུ་དགྱེས༔ ཕྱག་ན་དབང་དྲག་ཕུར་པ་འདྲིལ༔ བསད་མནན་སྤར་བའི་ལས་མཛོད་ཅིག༔ ཨཱོཾ་བྷོ་དྷེ་ཆེ་གེ་མོ་ལ་ཛཿ ཆེ་མཆོག་མ་མོའི་ལྷ་ཚོགས་རྣམས༔ ཞལ་གདངས་ལྗགས་འདྲིལ་ཚེམས་གཙིགས་ནས༔ དགྲ་བགེགས་དམ་ཉམས་ཞལ་དུ་བཏབ་བོ་ཁ་རཾ་ཁཱ་ཧི༔ མ་ཧཱ་མཾ་ས། མ་ཧཱ་རཀྟ། གོ་རོ་ཙ་ན་ཡ་ཁ་རཾ་ཁཱ་ཧི༔ ལྷག་མ་བཏང་བ། བྷྱོ། དང་པོ་ཕུད་ཀྱིས་མི་མཆོད་དུ༔ བཅོམ་ལྡན་དཔལ་ཆེན་ཕུད་ལ་དབང་༔ བར་དུ་ཚོགས་ལ་མི་རོལ་ཏུ༔ དམ་ཅན་སྲུང་མ་ཚོགས་ལ་བདག༔ དེ་ནས་དམར་གྱིས་མི་སྦྲོོན་དུ༔ མ་དང་མཁའ་འགྲོ་ཁྲག་ལ་དགྱེས༔ ལྷག་མ་ཁ་ཆུས་མི་སྦྲན་དུ༔ རྗེ་དང་འབངས་ཀྱི་ཁྱད་པར་ཆེ༔ ལྷག་མ་ཕུད་ཀྱི་གཏོར་མ་འདི་བཞེས་ལ༔ བཅོལ་བའི་འཕྲིན་ལས་མྱུར་དུ་གྲུབ་པར་མཛོད༔ ཡུལ་གཅིག་མ་ཧཱ་དེ་ཝ་ནིཿ གཏེར་ཁ་འོག་མ་ནས་མངའ་རིས་པཎ་ཆེན་རིན་པོ་ཆེས་བསྒྲིགས། གནམ་སྨན་རྡོ་རྗེ་ཀུན་གྲགས་མ༔ དཀར་གསལ་གངས་རིའི་ཉི་ཤར་འདྲ༔ ན་བཟའ་འཇའ་ཚོན་སྤེལ་ལེགས་འདྲ༔ གསེར་དང་གཡུ་ཡི་ཐོད་གདེངས་(༩བ)
ཅན༔ ཆིབས་སུ་གཡུ་འབྲུག་སྔོན་པོ་བཅིབས༔ འཁོར་དུ་སྨན་མོ་སྟོང་གིས་བསྐོར༔ བཤོས་བུ་སྙིང་དང་གཏོར་མས་བསྐང་༔ བདག་གི་བསམ་པའི་དོན་རྣམས་སྒྲུབས༔ བྷྱོ། ཡུལ་ཅིག་མོན་ཡུལ་སྤ་གྲོ་ན༔ སྐྱིན་མཐིང་རྡོ་རྗེ་གཡའ་མ་སྐྱོང་༔ སེར་ནག་མཛེས་པའི་འོད་འཕྲོ་མ༔ སྤྲིན་དཀར་སྤུངས་པའི་ཐུལ་པ་གསོལ༔ ཤེལ་དང་གཡུ་ཡི་ཐོད་གདེངས་ཅན༔ ཆིབས་སུ་ཤ་བ་དཀར་མོ་བཅིབས༔ འཁོར་དུ་སྨན་མོ་སྟོང་གིས་བསྐོར༔ བཤོས་བུ་སྙིང་དང་གཏོར་མས་བསྐང་༔ བདག་གི་བསམ་པའི་དོན་རྣམས་སྒྲུབས༔ བྷྱོ། ཡུལ་ཅིག་ན་ལན་ཤེལ་གོང་ན༔ ཡུམ་ཆེན་རྡོ་རྗེ་གཡུ་བུན་མ༔ དམར་སེལ་པདྨ་རཱ་གའི་མདོག༔ ན་བཟའ་གངས་དཀར་སྤུངས་པ་གསོལ༔ གསེར་དང་གཡུ་ཡི་ཐོད་གདེངས་ཅན༔ ཆིབས་སུ་སྟག་མོ་རི་ཁྲ་བཅིབས༔ འཁོར་དུ་སྨན་མོ་སྟོང་གིས་བསྐོར༔ བཤོས་བུ་སྙིང་དང་གཏོར་མས་བསྐང་༔ བདག་གི་བསམ་པའི་དོན་རྣམས་སྒྲུབས༔ བྷྱོ། ཡུལ་ཅིག་ཡར་འབྲོག་དང་གོང་ན༔ འབྲོག་ཆེན་རྡོ་རྗེ་བགེགས་ཀྱི་གཙོ༔ དམར་སྨུག་མཛེས་པའི་འོད་འཕྲོ་མ༔ དཀར་མཛེས་གཡུ་ཡི་མཐའ་ཅན་གསོལ༔ གསེར་དང་གཡུ་ཡི་ཐོད་གདེངས་ཅན༔ ཆིབས་སུ་འབྲོང་ཆེན་འགྱིང་བ་བཅིབས༔ འཁོར་དུ་སྨན་མོ་འབུམ་གྱི་བསྐོར༔ བཤོས་བུ་སྙིང་དང་གཏོར་མས་བསྐང་༔ བདག་གི་བསམ་པའི་དོན་རྣམས་སྒྲུབས༔ བྷྱོ། གཙང་འགྲམ་རྫ་རི་གངས་དཀར་ན༔ ཤ་མེད་རྡོ་རྗེ་ཀུན་ཏུ་བཟང་༔ དཀར་འཚེར་ཤེལ་ཀྱི་ཁ་དོག་བཀྲ༔ དར་དཀར་གཡུ་ཡི་མཐའ་ཅན་གསོལ༔ གསེར་གཡུ་མུ་ཏིག་ཐོད་གདེངས་ཅན༔ ཆིབས་སུ་སྨན་(༡༠ན)
ཤ་དཀར་མོ་བཅིབས༔ འཁོར་དུ་སྨན་མོ་སྟོང་གིས་བསྐོར༔ བཤོས་བུ་སྙིང་དང་གཏོར་མས་བསྐང་༔ བདག་གི་བསམ་པའི་དོན་རྣམས་སྒྲུབས༔ བྷྱོ། ཡུལ་ཅིག་སྲང་ཡུལ་པ་ཏྲ་ན༔ བཙན་མོ་རྡོ་རྗེ་ཡེ་ཤེས་མཆོག༔ མཐིང་ནག་དྲག་ཤུལ་རྔམ་པའི་ཞལ༔ རྨ་བྱ་མཛེས་པའི་ཐུལ་པ་གསོལ༔ གསེར་དང་གཡུ་ཡི་ཐོད་གདེངས་ཅན༔ ཆིབས་སུ་འོལ་མོ་ཁ་ཁྲ་བཅིབས༔ འཁོར་དུ་སྨན་མོ་སྟོང་གིས་བསྐོར༔ བཤོས་བུ་སྙིང་དང་གཏོར་མས་བསྐང༔ བདག་གི་བསམ་པའི་དོན་རྣམས་སྒྲུབས༔ བྷྱོ། ཡུལ་ཅིག་སྙེ་མོ་དབང་ཡུལ་ན༔ ཁྱུང་བཙུན་རྡོ་རྗེ་དཔལ་གྱི་ཡུམ༔ མཐིང་ནག་གདུག་པའི་རྔམས་ཚུལ་ཅན༔ ན་བཟའ་མུ་མེན་མཛེས་པ་གསོལ༔ བྲག་ནག་སྤུངས་པའི་ཐོད་གདེངས་ཅན༔ ཆིབས་སུ་དྲེལ་ནག་རྟིང་དཀར་བཅིབས༔ འཁོར་དུ་སྨན་མོ་སྟོང་གིས་བསྐོར༔ བཤོས་བུ་སྙིང་དང་གཏོར་མས་བསྐང་༔ བདག་གི་བསམ་པའི་དོན་རྣམས་སྒྲུབས༔ བྷྱོ། ཡུལ་ཅིག་དབུ་རུ་སྙེ་མཚམས་ན༔ རབ་འབྱམས་རྡོ་རྗེ་དྲག་མོ་རྒྱལ༔ དཀར་མོ་གསེར་གཡུའི་ཐོད་གདེངས་ཅན༔ ན་བཟའ་སྨུག་ནག་འབར་བ་གསོལ༔ རལ་པའི་ཐོར་ཚུགས་ལྕགས་ཐོད་འཛིན༔ ཆིབས་སུ་འབྲོང་ཆེན་རྭ་དགུ་བཅིབས༔ འཁོར་དུ་སྨན་མོ་སྟོང་གིས་བསྐོར༔ བཤོས་བུ་སྙིང་དང་གཏོར་མས་བསྐང་༔ བདག་གི་བསམ་པའི་དོན་རྣམས་སྒྲུབས༔ བྷྱོ། ཡུལ་ཅིག་ཀོང་ཡུལ་བྲེ་སྣ་ན༔ ཀོང་བཙུན་རྡོ་རྗེ་བོད་ཁམས་སྐྱོང་༔ སྐུ་མདོག་འཇའ་ཚོན་སྤེལ་ལེགས་འདི༔ སྨུག་ནག་མེ་སྟག་འབར་བ་གསོལ༔ གསེར་གཡུ་སྤེལ་བའི་ཐོད་གདེངས་ཅན༔ ཆིབས་སུ་རྟ་ནག་རྟིང་དཀར་(༡༠བ)
བཅིབས༔ འཁོར་དུ་སྨན་མོ་སྟོང་གིས་བསྐོར༔ བཤོས་བུ་སྙིང་དང་གཏོར་མས་བསྐང་༔ བདག་གི་བསམ་པའི་དོན་རྣམས་སྒྲུབས༔ བྷྱོ། ཡུལ་ཅིག་ན་ལེན་བྲི་ལེན་ན༔ ལ་རོ་རྡོ་རྗེ་སྨན་ཅིག་མ༔ སྐུ་མདོག་སྔོ་ནག་ནམ་མཁའ་ལྟར༔ སྤྲིན་ནག་སྤུངས་པའི་ཐུལ་པ་གསོལ༔ རལ་པའི་ཟར་བུ་གཡས་རྣམས་གཡོན་དུ་འཁྱིལ༔ ཆིབས་སུ་རྐྱང་བུ་དཀར་བཅིབས༔ འཁོར་དུ་སྨན་མོ་སྟོང་གིས་བསྐོར༔ བཤོས་བུ་སྙིང་དང་གཏོར་མས་བསྐང་༔ བདག་གི་བསམ་པའི་དོན་རྣམས་སྒྲུབས༔ བྷྱོ། ཡུལ་ཅིག་དར་ཚོན་གསེར་གདེངས་ན༔ ཁུག་ཆོས་རྡོ་རྗེ་གཡར་མོ་བསིལ༔ སྐུ་མདོག་གཟི་འོད་འབར་བ་ལ༔ ན་བཟའ་གཡུ་ཡི་སྟོང་ཞོལ་གསོལ༔ གསེར་གཡུ་སྤུངས་པའི་ཐོད་གདེངས་ཅན༔ ཆིབས་སུ་ཆུ་རྟ་སྔོན་པོ་བཅིབས༔ འཁོར་དུ་སྨན་མོ་སྟོང་གིས་བསྐོར༔ བཤོས་བུ་སྙིང་དང་གཏོར་མས་བསྐང་༔ བདག་གིས་བསམ་པའི་དོན་རྣམས་སྒྲུབས༔ བྷྱོ། ཡུལ་ཅིག་གནམ་མཚོ་ཕྱུག་མོ་ན༔ གཡུ་ཡི་དྲིལ་བུ་རྡོ་རྗེ་གསུང་སྙན་མ༔ དཀར་མོ་མདངས་ལྡན་འོད་འཕྲོ་མ༔ ན་བཟའ་སེར་ཁྲ་འབར་བ་གསོལ༔ གསེར་གཡུ་སྤེལ་མའི་ཐོད་གདེངས་ཅན༔ ཆིབས་སུ་ཆུ་གླང་ཟལ་པོ་བཅིབས༔ འཁོར་དུ་སྨན་མོ་སྟོང་གིས་བསྐོར༔ བཤོས་བུ་སྙིང་དང་གཏོར་མས་བསྐང་༔ བདག་གི་བསམ་པའི་དོན་རྣམས་སྒྲུབས༔ ཧོ། དཀྱིལ་འཁོར་གཉན་གྱི་སྲུང་མ་ཆེན་མོ། །མཁའ་འགྲོ་འབར་བའི་གཙོ་མོ་ཆེན་མོ། །སློབ་དཔོན་པདྨའི་བྲན་གཡོག་ཆེན་མོ། །སྒྲུབ་ཆེན་རྣམས་ཀྱི་བཀའ་ཉན་ཆེན་མོ། །ནོར་དང་ཆོས་ཀྱི་གཏེར་སྲུང་ཆེན་མོ། །བོད་ཁམས་སྐྱོང་བའི་བསྟན་མ་(༡༡ན)
ཆེན་མོ། །གསང་སྔགས་སྒྲུབ་པའི་རྣལ་འབྱོར་མ་ཆེན་མོ། །དགྲ་བགེགས་སྒྲོལ་བའི་མཐུ་མོ་ཆེ། །ནད་པ་གསོ་བའི་བྱིན་རླབས་ཅན། །སྲིའུ་གསོ་བའི་དཔལ་མོ་ཆེ། །རྣོ་མཐོང་སྟོན་པའི་མངོན་ཤེས་མཁན། །ཕྱུགས་མ་སྐྱོང་བའི་གཡག་རྫི་མོ། །སྔོན་ཚེ་ཁས་བླངས་དམ་བཅས་བཞིན༔ དམ་རྫས་མཆོད་གཏོར་འདི་བཞེས་ལ༔ བོད་ཁམས་རྟག་ཏུ་བདེ་བ་དང་༔ རིམས་ནད་ཡམས་ནད་བཅད་དུ་གསོལ༔ རྣལ་འབྱོར་འཁོར་བཅས་བསྲུང་བ་དང་༔ ནད་དང་བགེགས་རྣམས་མེད་པར་མཛོད༔ ཆགས་ཆེ་ཉམ་ང་ཐམས་ཅད་བཟློག༔ དགྲ་བགེགས་ཐམས་ཅད་རྡུལ་དུ་རློག༔ འཕྲིན་ལས་བཞི་སོགས་དངོས་གྲུབ་ཀུན༔ སྒྲུབ་པ་པོ་ལ་མྱུར་དུ་སྩོལ༔ ལ་ལ། ལི་ལི། ཏ་ཏ། ཏེ་ཏེ། མ་མ། མེ་མེ། རྡོ་རྗེ་སྲིང་འགྲོ་མ་ཧཱུཾ་བྷྱོ། མ་ཧཱ་པཉྩ་ཁཱ་ཧི། ཧཱུཾ། དཔལ་གྱི་སྤྲུལ་པའི་རྡོ་རྗེ་འཛིན༔ རྡོ་རྗེ་ཀུན་གྲགས་དཀར་གསལ་མདོག༔ ན་བཟའ་འཇའ་རིས་འབྲུག་སྔོན་བཅིབས༔ མཆོད་གཏོར་འདི་བཞེས་འཕྲིན་ལས་མཛོད༔ རྡོ་རྗེ་སྤྱན་མཐིང་སེར་ནག་མདོག༔ སྤྲིན་ཕུང་གོས་ཅན་ཤ་མོ་བཅིངས༔ མཆོད་གཏོར་འདི་བཞེས་འཕྲིན་ལས་མཛོད༔ རྡོ་རྗེ་གཡུ་བུན་དམར་གསལ་མདོག༔ གངས་དཀར་གོས་ཅན་སྟག་ཁྲག་བཅིབས༔ མཆོད་གཏོར་འདི་བཞེས་འཕྲིན་ལས་མཛོད༔ རྡོ་རྗེ་བགེགས་གཙོ་དམར་སྨུག་མདོག༔ དཀར་མཛེས་གོས་ཅན་འབྲོང་ཆེན་བཅིབས༔ མཆོད་གཏོར་(༡༡བ)
འདི་བཞེས་འཕྲིན་ལས་མཛོད༔ རྡོ་རྗེ་ཀུན་བཟང་ཤེལ་དཀར་མདོག༔ དར་དཀར་གོས་ཅན་ཡུ་མོ་བཅིབས༔ མཆོད་གཏོར་འདི་བཞེས་འཕྲིན་ལས་མཛོད༔ རྡོ་རྗེ་བཙན་མོ་མཐིང་ནག་རྔམས༔ རྨ་བྱའི་གོས་ཅན་འོལ་མོ་བཅིབས༔ མཆོད་གཏོར་འདི་བཞེས་འཕྲིན་ལས་མཛོད༔ རྡོ་རྗེ་ཁྱུང་བཙུན་མཐིང་ནག་རྔམས༔ མུ་མེན་གོས་ཅན་དྲེལ་ནག་བཅིབས༔ མཆོད་གཏོར་འདི་བཞེས་འཕྲིན་ལས་མཛོད༔ རྡོ་རྗེ་དྲག་རྒྱལ་དཀར་གསལ་མདོག༔ སྨུག་ནག་གོས་ཅན་རྭ་བཅུ་བཅིབས༔ མཆོད་གཏོར་འདི་བཞེས་འཕྲིན་ལས་མཛོད༔ རྡོ་རྗེ་ཀོང་བཙུན་འཇའ་ཚོན་མདོག༔ སྨུག་ནག་གོས་ཅན་རྟ་ནག་བཅིབས༔ མཆོད་གཏོར་འདི་བཞེས་འཕྲིན་ལས་མཛོད༔ རྡོ་རྗེ་སྨན་ཅིག་ནམ་མཁའི་མདོག༔ སྤྲིན་དཀར་གོས་ཅན་རྐྱང་བུ་བཅིབས༔ མཆོད་གཏོར་འདི་བཞེས་འཕྲིན་ལས་མཛོད༔ རྡོ་རྗེ་ཁུག་ཆོས་གཟི་འོད་འབར༔ གཡུ་ཡི་གོས་ཅན་རྟ་ཞོལ་བཅིབས༔ མཆོད་གཏོར་འདི་བཞེས་འཕྲིན་ལས་མཛོད༔ རྡོ་རྗེ་གཡུ་དྲིལ་དཀར་མདངས་ཅན༔ ན་བཟའ་སེར་ཁྲ་ཆུ་གླང་བཅིབས༔ མཆོད་གཏོར་འདི་བཞེས་འཕྲིན་ལས་མཛོད༔ ཀུན་ཀྱང་རྡོ་རྗེ་སྐུ་གསུང་ཐུགས༔ ཡབ་ནི་རྫི་རྒན་ཤེལ་གྲི་བུན༔ ཡུམ་ནི་བདུད་མོ་གནོད་སྦྱིན་སྨན༔ གཉིས་མེད་སྙོམས་ཞུགས་སྤྲུལ་པའི་སྲས༔ རྡོ་རྗེ་དྲིལ་འཛིན་བསྟན་མའི་ཚོགས༔ རང་རང་སྡེ་དཔུང་སྟོང་ཕྲག་འཁོར༔ ལ་ལ་དཀར་མོ་ཟླ་བའི་མདངས༔ ལ་ལ་སེར་འོད་ཀུན་ཏུ་འབར༔ ལ་ལ་དམར་དམངས་སྲིད་གསུམ་སྡུད༔ ལ་ལ་ལྗང་ནག་འོད་ཟེར་ཅན༔ ལ་ལ་ཞི་ཚུལ་དགྱེས་པ་ལ༔ ལ་ལ་ཁྲོ་ཚུལ་འཇིགས་བྱེད་མ༔ ལ་ལ་སྣ་ཚོགས་སྤྲུལ་པ་མོ༔ ཀུན་ཀྱང་ཕྱག་གཡས་རྡོ་རྗེ་དང་༔ གཡོན་པར་ནོར་བུ་འབར་བ་བསྣམས༔ རིན་ཆེན་(༡༢ན)
ཐོད་གདེངས་རྒྱན་ཕྲེང་ཅན༔ ཞི་རྒྱས་དབང་དྲག་འཕྲིན་ལས་ཀྱི༔ རང་རྟགས་དངོས་གྲུབ་ཀུན་གྱི་བདག༔ མཆོད་གཏོར་འདི་བཞེས་ཆོས་ནོར་སྤེལ༔ ཇི་ལྟར་བསམ་པའི་འདོད་དོན་ཀུན༔ བཅོལ་བ་ཙམ་གྱིས་གྲུབ་པར་མཛོད༔ བརྩེ་གདུང་དྲག་པོས་མ་དང་སྲིང་༔ བསྟན་མའི་ཚོགས་རྣམས་མཆོད་བསྟོད་ན༔ འཕྲིན་ལས་རྣམ་བཞི་ཐོགས་མེད་སྒྲུབས༔ བཅོལ་བའི་འཕྲིན་ལས་གྲུབ་པར་མཛོད༔ ཅེས་པའི་སྤོས་དང་རོལ་མོ་དང་༔ ཕུད་དང་གཏོར་མས་ཕྱོགས་བཞིར་མཆོད༔ གང་འདོད་རེ་བ་རྫོགས་པར་འགྱུར༔ དཔལ་གྱི་ཐུགས་སྤྲུལ་བདུད་མོ་བཞི༔ སྤྱིར་ནི་འཕྲིན་ལས་ཀུན་གྱི་བདག༔ ཁྱད་པར་དབང་དྲག་རྫོགས་པའི་དཔལ༔ མཆོད་གཏོར་འདི་བཞེས་སངས་རྒྱས་ཀྱི༔ བསྟན་པ་བཤིག་པའི་དགྲ་བོ་ལ༔ དྲག་པོའི་ལས་རྣམས་མཛད་དུ་གསོལ༔ ལ་ལ་ལེ་ལེ་ཏ་ཏ་ཏེ་ཏེ་མ་མ་མེ་མེ་རྡོ་རྗེ་སྲིང་འགྲོ་མ་བསྟན་པའི་དགྲ་བོ་མཱ་ར་ཡ་ཕཊ་ཧཱུཾ། དཔལ་གྱི་གསུང་ལས་བྱུང་བ་སྟེ༔ གནོད་སྦྱིན་ཆེན་མོ་རྣམ་པ་བཞི༔ ལས་ཀུན་བདག་ཉིད་ཁྱད་པར་དུ༔ ཞི་དང་དྲག་པོའི་ལས་མཛད་མ༔ བསྟན་འཛིན་སྐྱོང་ཞིང་བསྟན་བཤིག་རྣམས༔ གང་འཚམ་ཆད་པས་འདུལ་བར་མཛོད༔ སྔགས་གཤམ་ལའང་གང་འདོད་སྦྱར་བ་ཡིན། ཧཱུཾ། སྐུ་ལས་མངོན་པར་སྤྲུལ་པ་ཡི༔ སྨན་བཙུན་ཆེན་མོ་མཆེད་སྡེ་བཞི༔ ལས་བཞི་ཀུན་ལ་ཐོགས་མེད་ཅིང་༔ ཞི་རྒྱས་མངོན་དུ་ཕྱུང་མཛད་མ༔ རྣལ་འབྱོར་བདག་ཅག་བུ་སློབ་རྣམས༔ མི་ནོར་ཆོས་རྒྱུད་རྒྱས་པ་དང་༔ བཀྲ་ཤིས་བདེ་ལེགས་དཔལ་ཀུན་སྐྱེད༔ སྔགས་གཤམ་འདོགས། ཧཱུཾ། མ་མོ་རྡོ་རྗེ་བསྟན་(༡༢བ)
མའི་ཚོགས༔ མ་རྟོགས་རྟེན་འབྲེལ་བཅུ་གཉིས་པོ༔ རྣམ་དག་སྐྱེ་མཆེད་མཁའ་འགྲོ་མ༔ ཚོགས་དྲུག་ཡུལ་དྲུག་རབ་རྒྱས་ནས༔ དགེ་ལེགས་བསམ་པ་ཀུན་འགྲུབ་ཅིང་༔ བདེ་ཆེན་ཡེ་ཤེས་འབར་པར་མཛོད༔ འཇིག་རྟེན་འདུས་ཀྱང་འཁོར་བ་མོ༔ ཡེ་ཤེས་གྲུབ་ཀྱང་ལས་ཀྱི་གཉེར༔ རྫུ་འཕྲུལ་ཐོགས་མེད་སྙིང་ཉེའི་གྲོགས༔ སྔོན་ཚེ་རྡོ་རྗེ་སྲིན་པོའི་བཀའ༔ བར་དུ་པདྨ་ཐོད་ཕྲེང་ལུང་༔ དེ་ནས་རིགས་འཛིན་བླ་མའི་མཆིད༔ ད་ལྟ་བདག་གི་རེ་བ་སྐོང་༔ རྒྱན་གྱི་གཏོར་མ་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ ཧཱུཾ། དཔལ་ཆེན་ཁྲག་འཐུང་སྤྲུལ་པ་མོ༔ ཡེ་ཤེས་དབྱིངས་ལས་རྟེན་འབྲེལ་ཚུལ༔ ཕྱོགས་མ་བཞི་དང་མཚམས་མ་བཞི༔ སྙིང་པོའི་མ་མོ་ཆེན་མོ་བཞི༔ མ་རྟོགས་སྐྱེ་མཆེད་བཅུ་གཉིས་ཏེ༔ ཕྱི་རོལ་བསྟན་མ་བཅུ་གཉིས་པོ༔ ཀུན་ཀྱང་ཐུགས་ཀྱི་དབྱིངས་སུ་གཅིག༔ བཅུ་གསུམ་ས་དང་ལམ་གྱི་དངོས༔ ཕྱི་ནང་གསང་བའི་དགའ་བ་བཞི༔ དབྱེར་མེད་ཡེ་ཤེས་བཞི་དང་བཅས༔ བཅུ་དྲུག་བདག་ཉིད་ཆེན་པོ་མ༔ སྣང་སྲིད་ཐམས་ཅད་མཆོད་བསྟོད་བཞེས༔ ལུགས་འབྱུང་ལུགས་ལྡོག་རྟེན་འབྲེལ་རྣམས༔ དགའ་བཞིའི་ངོ་བོར་རྣམ་དག་ནས༔ མཐར་ཐུག་རྡོ་རྗེ་འཆང་གི་ས༔ སྐུ་གསུང་ཐུགས་དང་ཡེ་ཤེས་སུ༔ མངོན་དུ་འགྱུར་བའི་འཕྲིན་ལས་མཛོད༔ བླ་མ་རྡོ་རྗེ་སྲིན་པོ་ལ༔ ཕྱག་བྱས་མཁའ་འགྲོ་བཅུ་གཉིས་ཀྱི༔ ཕ་རབས་ཚུལ་དུ་བསྟོད་པར་བྱ༔ ཧཱུཾ། དོན་གྱི་དབྱིངས་ལས་ཡི་གེ་ཡབ༔ ཡུམ་ཆེན་རྡོ་རྗེ་མཁའ་འགྲོ་མ༔ སྣང་སྟོང་ཡབ་ཀྱི་རྗེས་དྲན་ལས༔ བདེ་སྟོང་མ་བདུད་
ཆེན་མོ་བཅུ༔ ཨ་ར་ལ་ཡི་ཡེ་ཤེས་ལས༔ སྙིང་པོའི་བདུད་མོ་ཆེན་མོ་བཞི༔ ས་ཆུ་མེ་རླུང་ཐུགས་དམ་སྐོང་༔ ནམ་གྱི་ཤེལ་གྲི་དཀར་པོ་ལས༔ ཆགས་པའི་མ་མོ་གནོད་སྦྱིན་མ༔ སྙོམས་པར་ཞུགས་པའི་བྱིན་རླབས་ལས༔ གནོད་སྦྱིན་ཆེན་མོ་སྡེ་བཞི་ལས༔ སྐྱེ་བ་རྣམ་བཞིས་ཐུགས་དམ་བསྐང་༔ ས་ཡི་ཁ་རླངས་བདུད་ཆེན་དང་༔ སྨན་བཙུན་ཆེན་མོ་རོལ་པ་ལས༔ སྨན་བཙུན་ཡེ་ཤེས་ཆེན་མོ་བཞི༔ ནམ་ཟླ་དུས་བཞིས་ཐུགས་དམ་བསྐང་༔ མཐར་ཐུག་བདེ་ཆེན་ཟུང་འཇུག་ལས༔ སྣང་སྲིད་བདེ་ཆེན་གཅིག་ཏུ་འཁྱིལ༔ སྣང་བ་ཡབ་ལ་སྟོང་པ་ཡུམ༔ རིག་རྩལ་སྲས་ཀྱི་ཚོགས་དང་བཅས༔ འཁོར་འདས་རོ་མཉམ་ཐུགས་དམ་བསྐང་༔ བསྐང་ངོ་མཆོད་དོ་མ་ཆེན་ཚོགས༔ དངོས་གྲུབ་དམ་པ་དེང་འདིར་སྩོལ༔ བསྟོད་པ་བྱ་བ་ནི། ཧཱུཾ། རྡོ་རྗེ་ཆོས་དབང་གི་གཏེར་བྱོན། དབང་ཕྱུག་ཡེ་ཤེས་ཁྲོ་རྒྱལ་གཙོ༔ གདུག་པའི་དབང་གིས་ཁྲོ་བོའི་སྐུར་བསྟན་པ༔ དུར་ཁྲོད་ཆས་བརྒྱད་སྐུ་ལ་རབ་ཏུ་བརྗིད༔ ཕྱག་དྲུག་ཕྱག་ན་མཚོན་ཆ་སྣ་ཚོགས་བསྣམས༔ ཞབས་གཉིས་རུ་དྲའི་སྟེང་ན་སྟབས་ཀྱིས་བཞུགས༔ ཁྲོ་བོ་རྡོ་རྗེ་གནོད་སྦྱིན་སྐུ་ལ་བསྟོད༔ བྷྱོ་མ་ཅིག་དཔལ་ལྡན་ལྷ་མོ་ནག་མོའི་ཚོགས༔ མ་མོ་མཁའ་འགྲོ་ཡོངས་ཀྱི་ལས་མཛད་མ༔ བསྟན་མ་ཡོངས་ཀྱི་མངའ་བདག་གཙོ་མོ་མཛད༔ བདུད་མོ་ཡོངས་ཀྱི་སྲོག་བདག་ལས་མཁན་མོ༔ རྣལ་འབྱོར་ཡོངས་ཀྱི་སྲུང་བ་ལས་བྱེད་མ༔ ནག་མོ་ཁྲག་འཐུང་གསེར་གྱི་རལ་པ་ཅན༔ སྦྱང་མེ་བུ་ཡུག་འཁྱིལ་པས་དབུ་ལ་བརྒྱན༔ སྦྲུལ་
གྱི་གདེངས་ཀས་ཀླུ་རྣམས་དབང་དུ་སྡུད༔ ཉི་ཟླ་རྐེད་བརྒྱན་ཁམས་གསུམ་ཟིལ་གྱིས་གནོན༔ རོ་དང་བོང་བུ་ཞིང་ཆེན་གདན་ལ་བཞུགས༔ ཁམས་གསུམ་སྒྲོལ་མཛད་གདུག་པ་རྩད་ནས་གཅོད༔ གཏི་མུག་རྩད་ནས་གཅོད་ལ་ཕྱག་འཚལ་བསྟོད༔ བདུད་ཤ་ཞོན་ནས་སྟོང་གསུམ་རྒྱུག་པར་བྱེད༔ བདག་ཉིད་ཆེན་མོའི་སྐུ་ལ་ཕྱག་འཚལ་བསྟོད༔ སྨུག་ནག་རལ་པ་གྱེན་དུ་འཁྱིལ་བ་ཡི༔ དཔལ་ལྡན་ལྷ་རིའི་སྐུ་ལ་ཕྱག་འཚལ་བསྟོད༔ བོང་བུ་ཞོན་ནས་བདུད་དཔུང་གཡོབ་པར་བྱེད༔ གངས་ཀྱི་ཡུམ་ཆེན་སྐུ་ལ་ཕྱག་འཚལ་བསྟོད༔ རྔ་མོ་ཞོན་ནས་སྟོང་གསུམ་ཟིལ་གྱིས་གནོན༔ འབྲོག་ཆེན་འཁོར་འདུལ་སྐུ་ལ་ཕྱག་འཚལ་བསྟོད༔ དཀར་ཆེན་རལ་སྤྲུག་སྲིན་པོ་དབང་དུ་སྡུད༔ གངས་དཀར་ཤ་མེད་སྐུ་ལ་ཕྱག་འཚལ་བསྟོད༔ ལྗང་སེར་རལ་པ་འབར་བའི་ཐོར་ཚུགས་ཅན༔ ཁ་རག་ཁྱུང་བཙུན་སྐུ་ལ་ཕྱག་འཚལ་བསྟོད༔ འོལ་པོ་ཞོན་ནས་གནོད་སྦྱིན་གཙོ་མོ་མཛད༔ སེར་ཆེན་མཁའ་ལྡིང་སྐུ་ལ་ཕྱག་འཚལ་བསྟོད༔ དམར་ནག་རལ་བ་འབར་ཞིང་དོམ་ནག་རྒྱུག༔ རྨ་རི་རབ་འབྱམས་སྐུ་ལ་ཕྱག་འཚལ་བསྟོད༔ དཀར་དམར་མདངས་ཅན་ཤ་ཞོན་གྲོང་ཁྱེར་རྒྱུག༔ ཀོང་བཙུན་དེ་མོའི་སྐུ་ལ་ཕྱག་འཚལ་བསྟོད༔ སེར་ནག་རལ་བ་སྤྲུག་ཅིང་མཛོ་མོ་ཞོན༔ བཙན་ལ་ར་རོག་སྐུ་ལ་ཕྱག་འཚལ་བསྟོད༔ རལ་པ་སྤྲུགས་ལ་རྐྱང་ཞོན་བུ་ཡིས་འདེབས༔ མོ་བཙུན་ཨུག་ཆོས་སྐུ་ལ་ཕྱག་འཚལ་བསྟོད༔ རལ་ལྗང་དགོ་ཞོན་སྲིད་པ་འཁྱམ་པར་རྒྱུག༔ གཡུ་ཡི་དྲིལ་སྙན་སྐུ་ལ་ཕྱག་འཚལ་བསྟོད༔ བདུན་པ་བསྐུལ་ཞིང་འཕྲིན་ལས་བཅོལ་བ་ནི། བྷྱོ། རླུང་ནག་གཏེར་ཁ་འོག་མ། འཚུབ་མ་འཁྱིལ་བའི་ནང་ཤེད་ན༔ (༡༤ན)
མ་ཅིག་འདོད་པ་ཁམས་ཀྱི་དབང་ཕྱུག་མ༔ བདུད་ཀྱི་ཡུམ་ལ་གཤིན་རྗེའི་ལྕམ་ཅིག་མ༔ རལ་བ་གཡས་ནས་གཡོན་དུ་འཁྱིལ་བ་ནི༔ ཡུམ་གྱི་མཁའ་ལ་སྤྲུལ་པ་འགྱེད་པའི་རྟགས༔ ཕྱག་གཡས་མཁའ་ལ་ཤང་ལང་འཕྱར་བ་ནི༔ དམ་ཉམས་སྲོག་རྩ་རྩད་ནས་གཅོད་པའི་རྟགས༔ ཕྱག་གཡོན་ནད་ཀྱི་རྐྱལ་པ་བསྣམས་པ་ནི༔ དགྲ་བོའི་ཡུལ་དུ་ནད་ཡམས་གཏོང་བའི་རྟགས༔ དྲེལ་རྟ་ཆིབས་ཀྱི་སྔ་ཤ་ཕྱི་ཤ་ལ༔ སྐྱེས་པ་བུད་མེད་ཐོད་པ་བཀལ་བ་ནི༔ དམ་ཉམས་མི་རྒྱུད་རྩད་ནས་གཅོད་པའི་རྟགས༔ ནག་མོ་འབུམ་ཕྲག་བྲན་དུ་བཀོལ་བ་ནི༔ གང་ལ་བྱ་བའི་སྙིང་ནས་འདྲེན་པའི་རྟགས༔ མ་བདུད་འབུམ་ཕྲག་ཕོ་ཉར་འགྱེད་པ་ནི༔ བསྟན་གཤིག་དམ་ཉམས་རྩད་ནས་གཅོད་པའི་རྟགས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ བདག་གིས་བཅོལ་བའི་འཕྲིན་ལས་གྲུབ་པར་མཛོད༔ བྷྱོ། བདག་ཉིད་ཆེན་མོ་ཉི་ཟླ་མདངས་འཕྲོག་མ༔ སྲིད་པ་གསུམ་ཡང་སྟོང་གསུམ་སྒྲོལ་མཛད་མ༔ བེར་ནག་གྱོན་ཞིང་ཕྱག་ན་ཁྲམ་བཾ་ཐོགས༔ བདག་གི་ལས་མཛད་ཁྲོ་མའི་ཐུགས་དམ་བསྐུལ༔ བྷྱོ། དཔལ་ལྡན་ཧ་རི་ཁྲག་ལ་དགྱེས་མཛད་མ༔ སྲིད་པ་གསུམ་ཡང་དབང་དུ་སྡུད་པར་བྱེད༔ བེར་སེར་གྱོན་ནས་ཕྱག་གིས་ཞགས་པ་འཛིན༔ ཁྲོས་པའི་རྒྱལ་པོ་མི་མངོན་དབྱིངས་ནས་བསྐུལ༔ བྷྱོ། གངས་ཡུམ་དཀར་མོ་སྲིད་པའི་རྒྱལ་བྱེད་མོ༔ སྲིད་པ་གསུམ་ཡང་འགྲོ་བའི་སྲོག་གཅོད་མ༔ བེར་དམར་གྱོན་ནས་དམ་ཉམས་ཐོད་ཁྲག་འཛིན༔ གངས་ཡུམ་དཀར་མོ་གསང་བའི་དབྱིངས་ནས་བསྐུལ༔ བྷྱོ། འབྲོག་ཆེན་ལྗང་ནག་སྲིད་པའི་ཁམས་རྒྱལ་(༡༤བ)
མོ༔ སྙིང་ཁྲག་བེ་ཅོན་དམ་ཉམས་སྙིང་ཁྲག་འབྱིན༔ དམ་ཉམས་དགྲ་བོའི་སྲོག་རྩ་རྩད་ནས་གཅོད༔ འབྲོག་ཆེན་ནག་མོ་དབྱིངས་ཕྱུག་ཐུགས་དམ་བསྐུལ༔ བྷྱོ། ཆ་བྱད་དཀར་མོ་ཆེན་མོ་ལས་མཁན་མ༔ གཏི་མུག་ཁུ་འཕང་དགྲ་བོའི་སྲོག་ལ་གཟིར༔ བེར་དཀར་གྱོན་ནས་རལ་གྲི་མཁའ་ལ་འཕྱར༔ དཀར་མོ་སྤྱན་གཅིག་མ་ཡི་ཐུགས་དམ་བསྐུལ༔ བྷྱོ། ཁྱུང་ཞོན་སེར་མོ་འཇིག་རྟེན་ལས་ལ་བསྐུལ༔ རླུང་ནག་འཚུབ་བྱེད་དཀྱིལ་འཁོར་ལས་ཀྱི་གཙོ༔ དམག་རྒྱལ་དགྲ་སྟ་གཡུག་ཅིང་ཀླད་ལ་བསྐོར༔ ཁྱུང་ནག་འཇིགས་བྱེད་མ་ཡི་ཐུགས་དམ་བསྐུལ༔ བྷྱོ། སེར་ཆེན་རྡོ་རྗེ་དབྱིངས་ཀྱི་བདག་མོའི་གཙོ༔ ཆུ་སྲིན་སྡེར་མོ་ཡང་བཀོལ་བྲན་དུ་བཀོལ༔ བེར་དམར་གྱོན་ཞིང་ལྕགས་ཀྱུས་དགྲ་བགེགས་འགུགས༔ སྲོག་གཅོད་ཆེན་མོ་དབྱིངས་ནས་འཕྲིན་ལས་བསྐུལ༔ བྷྱོ། རྨ་རི་ནམ་མཁའ་རིགས་ཀྱི་རྒྱལ་མོ་སྟེ༔ འཇིག་རྟེན་རིགས་ལ་དབང་སྒྱུར་ལས་མཁན་མ༔ བེར་ལྗང་གྱོན་ཞིང་དགྲ་བོའི་ཙིཏྟ་གསོལ༔ དམར་མོ་སྲོག་གཅོད་མ་ཡི་ཐུགས་དམ་བསྐུལ་༔ བྷྱོ། ཀོང་ལྷ་དཀར་མོ་བྱ་རྒོད་ཐུལ་པ་གསོལ༔ གླིང་བཞི་ལ་མྱུལ་གསང་བའི་ཡུམ་གཅིག་མ༔ གནོད་བྱེད་འཆིང་བྱེད་ཞགས་པ་མཁའ་ལ་རྡེག༔ ལྷ་མོ་དཀར་མོའི་ཐུགས་དམ་གནད་ནས་བསྐུལ༔ བྷྱོ། བཙན་གྱི་འཁོར་འདུལ་གླིང་བཞིའི་རྒྱལ་མོ་སྟེ༔ དགྲ་ལ་ཐན་གཏོང་གླིང་བཞི་དམག་གིས་བསྐོར༔ བེར་སེར་གྱོན་ནས་ཕྱོགས་བཅུར་དྲིལ་བུ་ཁྲོལ༔ བཙན་འཁོར་འདུལ་བྱེད་ཁྲོ་མོའི་ཐུགས་དམ་བསྐུལ་༔ བྷྱོ། མ་བཙུན་ཁྲོ་མོ་གཏུམ་བྱེད་སྲིང་མོའི་(༡༥ན)
གཙོ༔ ཉི་ཟླ་རྐེད་ལ་བརྒྱན་པའི་རྔམས་བྱེད་མ༔ བེར་དམར་གྱོན་ཞིང་མཚོན་དྲུ་ཕྱོགས་བཅུར་འཕེན༔ མ་བཙུན་ཆེན་མོའི་ཐུགས་དམ་གནད་ནས་བསྐུལ༔ བྷྱོ། གཡུ་དྲིལ་ཚངས་དབྱངས་གླིང་བཞིར་ཁྱབ་པར་སྒྲག༔ བསྒྲགས་པ་ཙམ་གྱིས་སྣང་སྲིད་དབང་དུ་སྡུད༔ བེར་ནག་གྱོན་ཞིང་འགུགས་བྱེད་ལྕགས་ཀྱུ་འཛིན༔ ཚངས་དབྱངས་གཡུ་དྲིལ་ཐུགས་དམ་རྒྱུད་བསྐུལ་དགྲ་བགེགས་རྩད་ནས་ཆོད༔ མ་གཅིག་ལྷ་མོ་འདིར་སྤྱོན་དགྲ་བོའི་ཤ་ལ་གསོལ༔ མ་གཅིག་ལྷ་མོ་འདིར་སྤྱོན་དགྲ་བོའི་ཁྲག་ལ་གསོལ༔ མ་གཅིག་ལྷ་མོ་འདིར་སྤྱོན་དགྲ་བོའི་རུས་པ་གསོལ༔ མ་གཅིག་ལྷ་མོ་འདིར་སྤྱོན་དགྲ་བོའི་ཞུན་ཆེན་ཚིལ་ལ་གསོལ༔ དམར་ཆེན་ཤ་ཁྲག་གཏོར་མ་འདི་བཞེས་ལ༔ བདག་གིས་བཅོལ་བའི་ལས་རྣམས་གྲུབ་པར་མཛོད༔ བྷྱོ། བདག་ཉིད་ཆེན་མོ་ཉང་གཏེར།རྡོ་རྗེ་ཀུན་གྲགས་མོ༔ ཆིབས་སུ་ཆུ་གླང་སྔོན་པོ་བཅིབས༔ སྨན་རཀ་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ རྡོ་རྗེ་སྐྱིན་མཐིང་གཡའ་མ་སྐྱོང་༔ ཆིབས་སུ་གསེར་ཤ་ཡུ་མོ་བཅིབས༔ སྨན་རཀ་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ ཨེ་ཀ་ཛ་ཏི་རལ་གཅིག་མ༔ ཆིབས་སུ་གཡུ་འབྲུག་སྔོན་པོ་བཅིབས༔ སྨན་རཀ་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ གངས་སྨན་རྡོ་རྗེ་གཡུ་སྒྲོན་མ༔ ཆིབས་སུ་ཆུ་རྟ་སྔོན་པོ་བཅིབས༔ སྨན་རཀ་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་(༡༥བ)
མཛོད༔ གནོད་སྦྱིན་གངས་དཀར་ཤ་མེད་མ༔ ཆིབས་སུ་དྲེའུ་རྟ་རྐང་གསུམ་བཅིབས༔ སྨན་རཀ་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ ཁ་རག་ཁྱུང་བཙུན་དཔལ་གྱི་ཡུམ༔ ཆིབས་སུ་གྱི་ལིང་ཁ་དཀར་བཅིབས༔ སྨན་རཀ་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ མདའ་ལ་བཙན་རོལ་གདུག་པ་འདུལ༔ ཆིབས་སུ་དོམ་བུ་སྙིང་དཀར་བཅིབས༔ སྨན་རཀ་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ རྩེ་ཞེས་གཙུག་ལག་འོད་འབར་མ༔ ཆིབས་སུ་འབྲོང་བུ་དར་མ་བཅིབས༔ སྨན་རཀ་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ བཙན་ལ་རོལ་པའི་སྨན་གཅིག་མ༔ ཆིབས་སུ་དྲེའུ་རྟ་རྐང་གསུམ་བཅིབས༔ སྨན་རཀ་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ རྡོ་རྗེ་ཁུག་ཆོས་གཡའ་མོ་བསིལ༔ ཆིབས་སུ་རུས་སྦལ་མགོ་དགུ་བཅིབས༔ སྨན་རག་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ བྱང་གི་སྨན་ཏིང་ཆེན་མོ་ནི༔ ཆིབས་སུ་འབྲོང་བུ་དར་མ་བཅིབས༔ སྨན་རཀ་མཆོད་གཏོར་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ ཞིང་སྐྱོང་བསྟན་མ་བཅུ་གཉིས་ཀྱང་༔ མ་མོ་མཁའ་འགྲོ་མ་ལུས་པའི༔ འཁོར་ཚོགས་དུ་མས་བསྐོར་བ་ནི༔ འབུམ་ཕྲག་ཡངས་པའི་མཁའ་འགྲོ་མ༔ ཚངས་པའི་བུ་མོ་འབུམ་ཕྲག་(༡༦ན)
གཅིག༔ དྲི་ཟ་ཆེན་མོ་འབུམ་ཕྲག་གཅིག༔ དྲང་སྲོང་ཆེན་མོ་འབུམ་ཕྲག་གཅིག༔ གྲུལ་བུམ་ཆེན་མོ་འབུམ་ཕྲག་གཅིག༔ སྲིན་མོ་ཆེན་མོ་འབུམ་ཕྲག་གཅིག༔ གནོད་སྦྱིན་ཆེན་མོ་འབུམ་ཕྲག་གཅིག༔ དཔལ་ལྡན་ཆེན་མོ་འབུམ་ཕྲག་གཅིག༔ ས་བདག་ཆེན་མོ་འབུམ་ཕྲག་གཅིག༔ སྨན་ཕྲན་ཆེན་མོ་འབུམ་ཕྲག་གཅིག༔ ཤ་ཟ་ཆེན་མོ་འབུམ་ཕྲག་གཅིག༔ བདུད་མོ་ཆེན་མོ་འབུམ་ཕྲག་གཅིག༔ མ་མོ་མཁའ་འགྲོ་ཁྱེད་རྣམས་ཀྱང་༔ ལ་ལ་གསེར་གྱི་རི་ལ་གནས༔ ལ་ལ་རྒྱ་མཚོའི་གཏིང་ལ་གནས༔ ལ་ལ་གླིང་ཆེན་བཞི་ལ་གནས༔ ལ་ལ་གངས་དཀར་རྩེ་ལ་གནས༔ ལ་ལ་ས་གཞིའི་འོག་ལ་གནས༔ ལ་ལ་ནམ་མཁའི་མཐོངས་ལ་གནས༔ ལ་ལ་དཔག་བསམ་ཤིང་ལ་གནས༔ ལ་ལ་ནམ་མཁའི་མཁར་ལ་གནས༔ ལ་ལ་གཅན་གཟན་སྡེར་ཆགས་ཞོན༔ ལ་ལ་རྨིག་པ་ཁ་དབྲག་ཞོན༔ ལ་ལ་རྨིག་པ་ཟླུམ་པོ་ཞོན༔ ལ་ལ་གདོང་པ་ཅན་ལ་ཞོན༔ ལ་ལ་འདབ་ཆགས་བྱ་ལ་ཞོན༔ ལ་ལ་རླུང་དང་བསེར་བུ་ཞོན༔ ལ་ལ་དགུ་ཚིགས་གཞུང་ལ་ཞོན༔ ལ་ལ་དུས་ལྔའི་གུང་ལ་རྒྱུ༔ ལ་ལ་ནམ་གྱི་གུང་ལ་རྒྱུ༔ ལ་ལ་ཉི་མའི་རྩེ་ལ་རྒྱུ༔ ལ་ལ་ཟླ་བའི་ཟེར་ལ་རྒྱུ༔ ལ་ལ་མུན་པའི་སྨག་ལ་རྒྱུ༔ ལ་ལ་གྲིབ་སོའི་རྟ་ལ་ཞོན༔ ལ་ལ་ནམ་གྱི་མདངས་ལ་ཞོན༔ ལ་ལ་སྐྱ་རེངས་རྐང་ལ་ཞོན༔ ལ་ལ་ཉི་མའི་ཟེར་ལ་ཞོན༔ ལ་ལ་ཆུ་བོའི་གཞུང་ལ་ཞོན༔ ལ་ལ་གསལ་(༡༦བ)
བའི་མེ་ལོང་ཐོགས༔ ལ་ལ་དར་དཀར་གཡབ་མོ་གཡོབ༔ ལ་ལ་ལྕགས་ཀྱུ་མདུང་དམར་ཐོགས༔ ལ་ལ་ཞགས་པ་ནག་པོ་ཐོགས༔ ལ་ལ་བེ་ཅོན་འབར་བ་ཐོགས༔ ལ་ལ་གཅོད་པའི་སྤུ་གྲི་ཐོགས༔ ལ་ལ་མགོ་ཡི་ཕོར་པ་ཐོགས༔ ལ་ལ་མི་སྙིང་རློན་པ་ཐོགས༔ ལ་ལ་མི་ལྤགས་གཡང་གཞི་ཐོགས༔ ལ་ལ་རུ་མཚོན་ནག་པོ་ཐོགས༔ ལ་ལ་བདུད་ཀྱི་ཁྲམ་ཁ་ཐོགས༔ ལ་ལ་ཤོ་རྡེལ་དཀར་ནག་ཐོགས༔ ལ་ལ་ནད་ཀྱི་རྐྱལ་པ་ཐོགས༔ ལ་ལ་ཚོན་གྱི་དྲུ་བུ་ཐོགས༔ ལ་ལ་བྱང་དམར་བམ་པོ་ཐོགས༔ ལ་ལ་ཏྲི་ཤུ་འབར་བ་ཐོགས༔ ལ་ལ་དབལ་རྩེ་རྣོན་པོ་ཐོགས༔ ཀུན་ཀྱང་གདུག་པའི་ལག་ཆ་ཐོགས༔ ཀུན་ཀྱང་སྲོག་དང་དབུགས་ལ་དགའ༔ ཀུན་ཀྱང་ཤ་ཟ་ཁྲག་ལ་དགའ༔ ཀུན་ཀྱང་མདངས་འཕྲོག་བཅུད་ལེན་མ༔ རྒྱལ་བློན་འབངས་དང་ཡང་གཡོག་སོགས༔ སྡེ་བརྒྱད་མང་པོའི་འཁོར་དང་བཅས༔ དེ་རིང་མཐུ་དང་དཔུང་སྐྱེད་ལ༔ བཞི་བརྒྱ་རྩ་བཞིའི་ནད་རྣམས་དང་༔ སྟོང་ཕྲག་དྲུག་ཅུའི་བགེགས་རྣམས་བཟློག༔ གཏད་ཁྲམ་ངན་སྔགས་རྦོད་གཏོང་དང་༔ དགྲ་འདྲེའི་གནོད་པ་ཐམས་ཅད་བཟློག༔ དམ་ཅན་བསྟན་སྲུང་ཁྱེད་རྣམས་ཀྱིས༔ རྣལ་འབྱོར་བདག་ཅག་འཁོར་བཅས་ལ༔ ཚེ་རིང་ནད་མེད་བདེ་སྐྱིད་སྤེལ༔ ཡིད་ལ་འདོད་པ་ཀུན་གྲུབ་མཛོད༔ འགྲོ་ཀུན་ཕན་བདེའི་དཔལ་འབྱོར་དང་༔ འཇིག་རྟེན་ཁམས་ཀྱི་འདོད་ཡོན་རྣམས༔ ཁུག་ཅིག་སྡུས་ཤིག་དབང་དུ་སྡུད༔ བླ་མའི་སྐུ་དགྲ་བསྟན་ལ་གནོད༔ སྔགས་འཆང་སྒྲུབ་(༡༧ན)
ལ་བར་གཅོད་པའི༔ སྡང་བའི་དགྲ་དང་གནོད་པའི་བགེགས༔ སོད་ཅིག་རྒྱོབ་ཅིག་རེངས་པར་མཛོད༔ ཟུངས་ཤིག་ཆིངས་ཤིག་རྡུལ་དུ་རློག༔ དེ་ཡི་ཤ་ཟོ་ཁྲག་ལ་འཐུང་༔ དགྲ་བགེགས་ཕ་རོལ་གནས་སུ་སྒྲོལ༔ སངས་རྒྱས་བསྟན་པ་དར་བ་དང་༔ བསྟན་འཛིན་སྐྱེས་བུ་འགྲོ་དོན་འཕེལ༔ རྒྱལ་ཁམས་བདེ་ཞིང་བཀྲ་ཤིས་པའི༔ བསྟན་མ་རྣམས་ཀྱི་འཕྲིན་ལས་མཛོད༔ བརྒྱད་བ་དབང་དུ་བསྔུ་བ་ནི། རང་ཉིད་ཁྲོ་བོའི་བསྐྱེད་རིམ་གསར་ཆེ་བའི་ང་རྒྱལ་བསྐྱེད་ལ། ཧཱུཾ། ང་ཉང་གཏེར་གཡུལ་བཟློག་གི་གཞུང་། ནི་ཆེ་མཆོག་ཧེ་རུ་ཀཿ ང་ནི་པདྨ་དབང་ཆེན་ཡིན༔ སྐུ་ནི་རི་རབ་བས་ཀྱང་ཆེ༔ གསུང་གིས་ཧཱུཾ་སྒྲ་འབྲུག་ལྟར་སྒྲོག༔ ཤངས་ནས་བསྐལ་པའི་འཐོར་རླུང་འཚུབ༔ མིག་ནས་མེ་ཡི་ཕུང་པོ་འབར༔ སྨིན་མ་ཁྲོ་གཉེར་རྦ་རླབས་འཁྲུག༔ རལ་པ་ཁམ་ནག་སྲིད་རྩེར་འབར༔ ཕྱག་མཚན་མཚོན་ཆ་སྐར་ལྟར་འཁྲུག༔ དུས་གསུམ་བཞུགས་པའི་སངས་རྒྱས་ང་༔ ཁྲོ་རྒྱལ་ཐམས་ཅད་སྐུ་ལ་རྫོགས༔ གཟི་བརྗིད་ཕྱོགས་བཅུར་མེ་ལྟར་འབར༔ བསྐལ་པའི་མེ་ཡི་ཀློང་དཀྱིལ་ན༔ དྲེགས་པ་མ་ལུས་ལས་ལ་འཁོལ༔ ཁམས་གསུམ་སྲིད་གསུམ་དབང་དུ་སྡུད༔ འཇིག་རྟེན་ཁམས་ཀུན་གཡོ་འགུལ་བྱེད༔ དམ་ལས་འདའ་བའི་སྙིང་ཁྲག་འཐུང་༔ བདུད་དང་ལོག་འདྲེན་ཞབས་ཀྱིས་གནོན༔ དམ་ཉམས་མ་ལུས་སྲོག་ནས་གཟིར༔ དབང་གི་རྒྱལ་པོ་ལས་འཆོལ་གྱིས༔ ང་ཡི་བཀའ་ལས་གང་འདའ་བ༔ ལུས་སེམས་རྡུལ་དུ་རླག་པ་བྱེད༔ དེ་བས་དམ་ཅན་མ་(༡༧བ)
ལུས་པ༔ གོང་གོང་ཆུམ་ཆུམ་དམ་ལ་འདུ༔ ཨཱོཾ་ཨཱཿཧཱུཾ་སྭཱ་ཧཱ། བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཡ་མཱནྟག་པདྨ་ཀྲོ་དྷཱི་ཤྭ་རི་བཛྲ་ཀཱི་ལི་ཀཱི་ལཱ་ཡ་ཙཎྜ་མ་ཧཱ་རོ་ཁ་ཎ། ཀཱ་ལ་རཱུ་པ། བཛྲ་ཡཀྵ་ཀྲོ་དྷ་པདྨ་བནྡྷ་མུ་ཀ་ཨཱ་ཀཪྴ་ཡ། ཨཱ་ཀཪྴ་ཡ། བནྡྷ་ཡ་བནྡྷ་ཡ། ཏོ་ཤ་ཡཱ་ཏོ་ཤ་ཡཱ། མོ་ཧ་ཡཱ་མོ་ཧ་ཡཱ། ཤྲཱི་མ་ཧཱ་ཀཱ་ལ་སརྦ་རཱུ་པ་བཛྲ་སརྦ་དུཥྚི་སརྦ་ཌཱ་ཀི་ནཱི་ཧྲི་ད་ཡ། ཧ་ཧ་ཧི་ཧི། ཨེ་ཨ་ར་ལི་ཧཱུཾ་ཛཿ ཞེས་བརྒྱ་རྩ་བརྒྱད་བཟླས་ལ་དབང་དུ་བསྡུའོ། །དགུ་པ་བསྙེན་ཅིང་བསྒྲུབ་པ་ལ། མ་ཡེངས་པར་སྲོག་གི་སྙིང་པོ་ནས་འབོད་པ་ནི། བཛྲ་ཨ་ར་ལི་ཛཿ བཛྲ་ཨ་ར་ལི་ཧཱུཾ༔ བཛྲ་ཏི་ཏི་དྷེ༔ བཛྲ་བྷ་ར་དྷེ༔ བཛྲ་ས་བྱ་ཧཱུཾ༔ བཛྲ་ཏི་ཏི་ཧཱུཾ༔ བཛྲ་མ་ཏི་ཧཱུཾ༔ བཛྲ་ཏིང་བ་ཧཱུཾ༔ བཛྲ་ཁ་ར་ལི་ཧཱུཾ༔ བཛྲ་པིང་པོ་ཧཱུཾ༔ བཛྲ་ས་ག་ཤ་ཕྱིར༔ བཛྲ་དུ་ཕྱིར་ས་ར་ན་ཕཊ༔ མ་དུང་བྷྱོ༔ མ་དུང་བྷྱོ༔ ཧཱུཾ་ཧཱུཾ་ཛ་ཛཿ ཞེས་བཟླ་ཞིང་དམིགས་པ་དང་ཞི་རྒྱས་དབང་དྲག་གི་ཁ་སྐྱུར་སོགས་ཞལ་ལས་ཤེས་སོ། །བཅུ་པ་མདོས་གླུད་ཀྱི་རབས་དང་། ཡས་ཀྱི་ཆོས་དྲང་འདོན་པ་ནི་ཟུར་དུ་ཤེས་པར་བྱའོ། །བཅུ་གཅིག་པ་མདོས་བསྔོ་ཞིང་འཕྲིན་ལས་འཆོལ་བ་ནི། བྷྱོ། གནམ་བྱང་གཏེར་སྒོས་མདོས་གྱི་བར་སྣང་ལྷ་མོ་བསྟན་མ་ནི༔ ནམ་མཁའི་དབྱིངས་ན་བཞུགས་པ་ཡི༔ གནམ་གྱི་བུ་མོ་འཕྲུལ་མོ་ཆེ༔ གོས་སུ་མུན་པ་ནག་པོ་གྱོན༔ དགུ་ཚིགས་མཛེས་པའི་ཐོད་ལྡེམ་ཅན༔ བྲན་གཡོག་མང་པོའི་འཁོར་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོས་གླུད་བཞེས་ཤིག༔ བྷྱོ། གངས་ཀྱི་རོ་ཤགས་ལ་རོ་སྨན་གཅིག་མ༔ ན་བཟའ་སྤྲིན་དཀར་མཛེས་པ་ལ༔ (༡༨ན)
གཟའ་སྐར་མཛེས་པའི་ཐོད་ལྡེམ་ཅན༔ ཁུ་འཕང་འོད་འཕྲོ་འབར་བས་བརྒྱན༔ བྲན་གཡོག་མང་པོའི་འཁོར་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོས་གླུད་བཞེས་ཤིག༔ བྷྱོ། བར་སྣང་ཁམས་ཀྱི་གློག་མ་སྤྲིན༔ སྐུ་ལ་ན་བཟའ་ལྗང་སྔོན་གསོལ༔ གཟའ་སྐར་མང་པོའི་འཁོར་དང་བཅས༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོ་གླུད་བཞེས་ཤིག༔ བྷྱོ། མཁའ་ལ་རྒྱུ་བའི་ཐོགས་མེད་མ༔ རླུང་དང་སྤྲིན་གྱི་བདག་མོ་སྟེ༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོས་གླུད་བཞེས་ཤིག༔ དེ་ནས་རྔདྲག་ཏུ་བརྡུངས་ལ་འཕྲིན་ལས་འཆོལ་བ་ནི་འདི་སྐད་དོ༔ བྷྱོ། གནོད་སྦྱིན་བུ་མོ་སྒོ་བཞི་ལ༔ གནས་པ་འདི་རྣམས་ལས་འཆོལ་ལོ༔ བྷྱོ། ཤར་གྱི་དཀར་མོ་སྤྲིན་གཅིག་མ༔ ན་བཟའ་བྱ་རྒོད་ཐུལ་བ་གསོལ༔ དུང་གི་ཐོད་ལྡེམ་ཐོར་ཚུགས་ཅན༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་(༡༨བ)
བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོ་གླུད་བཞེས་ཤིག༔ བྷྱོ། ལྷོ་ཕྱོགས་ནག་མོ་མཆེ་བ་ཅན༔ ན་བཟའ་ཞིང་ལྤགས་རློན་པ་གསོལ༔ གསེར་གྱི་ཐོད་ལྡེམ་ཐོར་ཚུགས་ཅན༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོ་གླུད་བཞེས་ཤིག༔ བྷྱོ། ནུབ་ཕྱོགས་དམར་མོ་དབང་སྡུད་མ༔ ན་བཟའ་ཆུ་སྲིན་གཡང་གཞི་གསོལ༔ བྱུ་རུའི་ཐོད་ལྡེམ་ཐོར་ཚུགས་ཅན༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལརྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོས་གླུད་བཞེས་ཤིག༔ བྷྱོ། བྱང་གི་སེར་མོ་ལས་མཁན་མ༔ ན་བཟའ་གཙོད་དང་སྐྱིན་དམར་གསོལ༔ ལྕགས་ཀྱི་ཐོད་ལྡེམ་ཐོར་ཚུགས་ཅན༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོས་གླུད་བཞེས་ཤིག༔ བྷྱོ། གངས་ཀྱི་ཡུམ་ཆེན་གཡུ་བུན་མ༔ གསང་མཚན་(༡༩ན)
རྡོ་རྗེ་འོད་འབར་མ༔ ན་བཟའ་སྤྲིན་དཀར་ལུས་ལ་གྱོན༔ མཆོང་གི་གོ་ཅོག་དབུ་ལ་གྱོན༔ འཁོར་ནི་ནག་རྒྱལ་བཙུན་མོས་བསྐོར༔ ཆིབས་སུ་རླུང་ནག་འཚུབ་མ་བཅིབས༔ དགྲ་ལྷའི་རྒྱལ་མོར་བཞུགས་པ་ཡི༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོ་གླུད་བཞེས་ཤིག༔ བྷྱོ། ལྷོ་ཡི་སྐྱིན་མཐིང་གཡའ་མ་སྐྱོང་༔ གསང་མཚན་རྡོ་རྗེ་ཀུན་གྲགས་མ༔ ན་བཟའ་སྤྲིན་དཀར་མཛེས་པ་གསོལ༔ ཤེལ་གྱི་ཐོད་ལྡེམ་ཐོར་ཚུགས་ཅན༔ ཆིབས་སུ་རྐྱང་བུ་ཁ་དཀར་བཅིབས༔ འཁོར་ནི་ཀླན་བཟའ་མང་པོས་བསྐོར༔ ལྷོག་པའི་ནད་དང་སེར་བའི་བདག༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོ་གླུད་བཞེས་ཤིག༔ བྷྱོ། ཁ་རག་ཁྱུང་བཙུན་རྡོ་རྗེ་དཔལ་གྱི་ཡུམ༔ གསང་མཚན་རྡོ་རྗེ་ཁྱུང་མདོག་དཔལ་གྱི་ཡུམ༔ ན་བཟའ་འཇའ་ཚོན་སྣ་ལྔ་ལུས་ལས་གྱོན༔ བྲག་ནག་སྤུངས་པའི་ཐོད་ལྡེམ་ཅན༔ ཆིབས་སུ་ངང་དཀར་ཞུར་པོ་བཅིབས༔ འཁོར་ནི་སྲིན་མོ་སྟོང་གིས་བསྐོར༔ བྲན་གཡོག་མང་པོའི་(༡༩བ)
འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོ་གླུད་བཞེས་ཤིག༔ བྷྱོ། མོ་བཙུན་ཁུག་ཆོས་གཡར་མོ་བསིལ༔ གསང་མཚན་རྡོ་རྗེ་གཡར་མོ་རྒྱལ༔ ན་བཟའ་ཅི་ཡང་མ་ངེས་ཏེ༔ མུ་ཏིག་དཀར་པོའི་ཐོད་ལྡེམ་ཅན༔ འཁོར་ནི་ཤ་ཟ་འབུམ་གྱིས་བསྐོར༔ ཆིབས་སུ་སྨན་ཤ་ཡུ་མོ་བཅིབས༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོ་གླུད་བཞེས་ཤིག༔ བྷྱོ། ཀོང་བཙུན་དེ་མོ་རྡོ་རྗེ་བོད་ཁམས་སྐྱོང་༔ གསང་མཚན་རྡོ་རྗེ་གཉིས་མེད་འོད་འབར་མ༔ ན་བཟའ་སྨུག་ནག་བཏིབས་པ་ལ༔ འཇིགས་སུ་རུང་པའི་མེ་སྟག་འཕྲོ༔ གསེར་གྱི་ཐོད་ལྡེམ་ཐོར་ཚུགས་ཅན༔ ཆིབས་སུ་སྤྲིན་དཀར་ངང་པ་བཅིབས༔ འཁོར་ནི་མ་བདུད་མང་པོས་བསྐོར༔ ལོ་གཤེད་བཙའ་དང་མུ་གེའི་བདག༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོས་གླུད་བཞེས་(༢༠ན)
ཤིག༔ བྷྱོ། ཏིང་ཏིང་གངས་ཀྱི་དཀར་མོ་ཤག༔ གསང་མཚན་རྡོ་རྗེ་ཀུན་གྲགས་མ༔ ན་བཟའ་བྱ་རྒོད་ཐུལ་བ་གསོལ༔ ནག་མོ་མིག་གཅིག་དུང་གི་ཐོར་ཚུགས་ཅན༔ ལྕགས་ཀྱི་ལན་ཕྲན་མཆེ་བ་ཅན༔ འཁོར་དུ་ཆུ་སྨན་འབུམ་གྱིས་བསྐོར༔ ས་བདག་རིམས་ཀྱི་བདག་མོ་སྟེ༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོ་གླུད་བཞེས་ཤིག༔ བྷྱོ། ལེགས་སྦྱོར་ཡི་གེའི་གསེར་ཐང་མོ༔ གསང་མཚན་རྡོ་རྗེ་ཀུན་ཏུ་བཟང་༔ ན་བཟའ་གསེར་གྱི་མདོ་ལོ་རིས༔ རིན་ཆེན་བརྩེགས་པའི་ཐོད་ལྡེམ་ཅན༔ ཆིབས་སུ་ལྷ་འབྲི་དཀར་མོ་བཅིབས༔ འཁོར་ནི་གངས་སྨན་འབུམ་གྱིས་བསྐོར༔ བཀའ་ཡི་གངས་སྨན་བཟང་མོའི་ཡུམ༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོ་གླུད་བཞེས་ཤིག༔ བྷྱོ། གཡུ་ཡི་དྲེལ་རྟ་ཟུ་ལེ་མོ༔ གསང་མཚན་རྡོ་རྗེ་ཡེ་ཤེས་མཆོག༔ ན་བཟའ་གཅོད་ཀྱི་ཐུལ་བ་གསོལ༔ གཡུ་ཡི་དྲིལ་བུ་སིལ་ལི་མ༔ ཆིབས་སུ་གཙོད་པོ་ཁ་དཀར་བཅིབས༔ འཁོར་(༢༠བ)
དུ་བྱང་སྨན་འབུམ་གྱིས་བསྐོར༔ དབྱར་བཞིན་མི་སྲུན་ལྕགས་རལ་མ༔ དགུན་བཞིན་མི་སྲུན་རླུང་ནག་འཚུབ་མའི་བདག༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོས་གླུད་བཞེས་ཤིག༔ བྷྱོ། བྱང་གི་འབྲོག་ཆེན་གཡའ་མོ་སྐྱོང་༔ གསང་མཚན་རྡོ་རྗེ་དྲིལ་བུ་མ༔ ན་བཟའ་གཡག་ལྤགས་རློན་པ་གསོལ༔ ལྕགས་ཀྱི་ཐོད་ལྡེམ་ཐོར་ཚུགས་ཅན༔ ཆིབས་སུ་འབྲོང་པོ་ཁ་དཀར་བཅིབས༔ འཁོར་དུ་བྱང་གི་འབྲོག་མཚན་མང་པོས་བསྐོར༔ མི་ལ་གནོད་ཅིང་སྡིག་བྱེད་མ༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོས་གླུད་བཞེས་ཤིག༔ བྷྱོ། ནམ་མཁའི་རྒྱལ་མོ་ཁོང་ཏིང་ཤག༔ གསང་མཚན་རྡོ་རྗེ་དཔལ་འབར་ཤག༔ ན་བཟའ་བྱ་རྒོད་ཐུལ་པ་གསོལ༔ རིན་ཆེན་མཛེས་པའི་ཐོད་ལྡེམ་ཅན༔ ཆིབས་སུ་སྨན་ཤ་ཡུ་མོ་བཅིབས༔ གཡུ་ཡི་དངུལ་ཆུ་ཡ་ལ་ལ༔ སེར་བ་ཁུ་འཕང་ཐག་གི་བདག༔ འཁོར་དུ་གནམ་སྨན་སྟོང་གིས་བསྐོར༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་(༢༡ན)
ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོས་གླུད་བཞེས་ཤིག༔ བྷྱོ། གངས་ཀྱི་རམ་ཤག་ལ་རོ་སྨན་གཅིག་མ༔ གསང་མཚན་རྡོ་རྗེ་རྩལ་མ་ཀུན་གྲགས་མ༔ ན་བཟའ་བྱ་རྒོད་ཐུལ་བ་གསོལ༔ མཐའ་མ་ཆུ་བདུད་མང་པོའི་འཁོར་གྱིས་བསྐོར༔ བྲན་གཡོག་མང་པོའི་འཁོར་དང་བཅས༔ སིལ་སྙན་མང་པོའི་སྒྲ་དང་བཅས༔ ལྷབ་ལྷུབ་མང་པོའི་རྒྱན་དང་བཅས༔ ཟང་ཟིང་མང་པོའི་གླུད་དང་བཅས༔ དྲེལ་རྟ་མང་པོའི་ཁལ་དང་བཅས༔ མདོས་བདག་ཆེན་མོས་མདོས་ལོང་ལ༔ གླུད་བདག་ཆེན་མོ་གླུད་བཞེས་ཤིག༔ དེ་ཕྱིར་གནས་འདིར་མ་སྡོད་པར༔ བྷྱོ་བྷྱོ་དམ་ཉམས་དགྲ་ལ་བྷྱོ༔ ཟློག་ཟློག་དམ་ཉམས་དགྲ་ལ་ཟློག༔ ཟློག་སྒྱུར་བཅོལ་བའི་འཕྲིན་ལས་མཛོད༔ ཀྱེ། ཡུལ་ཉང་གཏེར་གཡུལ་ཟློག །ནི་ལྷོ་ཁ་མོན་ཁ་ན༔ གླན་ཐང་མ་མོ་བཙུན་གྱི་ལྕམ་མོ་ནི༔ གདུང་རུས་བཙུན་ཏེ་གླན་བཟའ་མོ༔ ལྷོ་ཡི་སྐྱི་མཐིང་གཡའ་མ་སྐྱོང་༔ གཡག་ལྤགས་རློན་པའི་སློག་པ་ལ༔ ཁྱུང་གཤོག་སྟོང་གི་ཤམ་ཐབས་ཅན༔ ཕྱག་ན་ཟངས་ཀྱི་ཕུར་པ་བསྣམས༔ ཆིབས་སུ་དྲེལ་རྟ་རྐང་གསུམ་བཅིབས༔ སྔོན་མོ་མ་བདུན་འཁོར་དང་བཅས༔ ཁྱོད་ཀྱི་ཐུགས་དམ་དུས་ལ་བབ༔ མཐུན་རྫས་མདོས་གླུད་འདི་ལོང་ལ༔ བསྟན་པ་འཇིག་པའི་དམ་ཉམས་རྩད་ནས་ཆོད༔ ཧཱུཾ་བཛྲ་ཧཱུཾ་བཛྲ་ལི་ལི་མ་ཧཱུཾ་བྷྱོ༔ བྷྱོ། ཡུལ་(༢༡བ)
ནི་གསང་འཕྱོ་ལ་གནས་ན༔ གངས་ཀྱི་ཡུམ་ཆེན་གཡུ་བུན་མ༔ གདུང་རུས་གཉེན་ཏེ་ཤ་བཟའ་མོ༔ དགྲ་ལྷའི་རྒྱལ་མོ་ལྕམ་གཅིག་མ༔ སེང་གེ་དཀར་པོའི་གཡང་གཞི་གྱོན༔ ཆིབས་སུ་སེང་གེ་དཀར་པོ་བཅིབས༔ ཕྱག་ན་རྡོ་རྗེ་རྩེ་ལྔ་བསྣམས༔ དཀར་མོ་མ་བདུན་འཁོར་དང་བཅས༔ ཁྱོད་ཀྱི་ཐུགས་དམ་དུས་ལ་བབ༔ མཐུན་རྫས་མདོས་གླུད་འདི་ལོང་ལ༔ བསྟན་པ་འཇིག་པའི་དམ་ཉམས་རྩད་ནས་ཆོད༔ ཧཱུཾ་ལཾ་འགྲེང་བཛྲ་ཏིབ་ཏིབ་ཏིང་ཏིང་བཛྲ་ཨཱོཾཿ བྷྱོ། ཡུལ་ནི་ཁ་རག་ཡུལ་དྲུག་ན༔ འདར་བུ་སྟོང་ཐང་རྗེ་ཡི་ལྕམ༔ གདུང་རུས་བཙུན་ཏེ་ཁྱུང་མོ་བཟའ༔ ཁ་རག་ཁྱུང་བཙུན་དཔལ་གྱི་ཡུམ༔ ན་བཟའ་མི་ལྤགས་རློན་པ་གྱོན༔ མི་སྙིང་ཁུག་པའི་ཤམ་ཐབས་ཅན༔ ཆིབས་སུ་བྱ་རྒྱལ་ཁྱུང་ཆེན་བཅིབས༔ ཕྱག་ན་དུག་མདའ་ལྟོང་ནག་བསྣམས༔ སེར་མོ་མ་བདུན་འཁོར་དང་བཅས༔ ཁྱོད་ཀྱི་ཐུགས་དམ་དུས་ལ་བབ༔ མཐུན་རྫས་མདོས་གླུད་འདི་ལོང་ལ༔ བསྟན་པ་འཇིག་པའི་དམ་ཉམས་རྩད་ནས་ཆོད༔ ཧཱུཾ་བྷྱོ་རི་ལི་ལི་ཧཱུཾ་བྷྱོ་ཛ་ཛ་དགྲ་ལ་བྷྱོ༔ བྷྱོ། ཡུལ་ནི་དབྱར་ཡུམ་ཆར་སྟོད་ན༔ དབྱར་ཐང་གཙུག་གི་ལྕམ་མོ་ནི༔ གདུང་རུས་གཉན་ཏེ་དབྱར་བཟའ་མོ༔ མོ་བཙུན་ཨུག་ཆོས་དབྱར་མོ་བསིལ༔ སྦྲུལ་ནག་གཏམས་པའི་གཡང་གཞི་གསོལ༔ ཆིབས་སུ་རྣ་བུ་ཤད་ལ་བཅིབས༔ ཕྱག་ན་སེང་ལྡེང་ཕུར་བ་བསྣམས༔ དམར་ནག་མ་བདུན་འཁོར་དང་བཅས༔ ཁྱོད་ཀྱི་ཐུགས་དམ་དུས་ལ་བབ༔ མཐུན་རྫས་མདོས་གླུད་འདི་(༢༢ན)
ལོང་ལ༔ བསྟན་པ་འཇིག་པའི་དམ་ཉམས་རྩད་ནས་ཆོད༔ ཧཱུཾ་མ་མ་ཧཱུཾ། བཛྲ་བཾ་མ་ཧཱ་ཧཱ་དགྲ་ལ་བྷྱོ༔ བྷྱོ། ཀོང་ཡུལ་དེ་ནི་བྲེ་སྣ་རུ༔ ཀོང་ལྷ་དཀར་པོའི་ལྕམ་མོ་ནི༔ གདུང་རུས་གཉན་ཏེ་ཀོང་བཟའ་མོ༔ ཀོང་བཙུན་དེ་མོ་བོད་ཁམས་སྐྱོང་༔ སེང་ལྤགས་སྟོང་གི་སློག་པ་གསོལ༔ སྦྲུལ་ནག་གཏམས་པའི་ཤམ་ཐབས་ཅན༔ ཆིབས་སུ་ཀོང་རྟ་དཀར་པོ་བཅིབས༔ ཕྱག་ན་ཁྲག་གི་བུམ་པ་བསྣམས༔ ནག་མོ་མ་བདུན་འཁོར་དང་བཅས༔ ཁྱོད་ཀྱི་ཐུགས་དམ་དུས་ལ་བབ༔ མཐུན་རྫས་མདོས་གླུད་འདི་ལོང་ལ༔ བསྟན་པ་འཇིག་པའི་དམ་ཉམས་རྩད་ནས་ཆོད༔ ཧཱུཾ་ཁཾ་ཆད་ཆད་མ་ཧྲི་བྷྱོ་ཛཿ དགྲ་ལ་བྷྱོ༔ བྷྱོ། ཡུལ་ནི་ཤེ་ཡུལ་ཤེ་སྟོད་ན༔ གངས་དཀར་རྫོང་གི་ཁ་ཤེད་ན༔ དུང་རུ་དཀར་པོའི་ལྕམ་མོ་ནི༔ གདུང་རུས་གཉན་ཏེ་ཤེ་བཟའ་མོ༔ ཤ་མེད་གངས་དཀར་སྨན་གཅིག་མ༔ དུང་གི་ཁུ་འཕང་སྐུ་ལ་གསོལ༔ གཡུ་ཡི་སྐ་རགས་ཐམས་སེ་ཐམ༔ ཆིབས་སུ་དུང་ཤ་དཀར་པོ་བཅིབས༔ ཕྱག་ན་ཁྲག་གི་རྐྱལ་པ་བསྣམས༔ གངས་སྨན་འབུམ་གྱི་འཁོར་དང་བཅས༔ ཁྱོད་ཀྱི་ཐུགས་དམ་དུས་ལ་བབ༔ མཐུན་རྫས་མདོས་གླུད་འདི་ལོང་ལ༔ བསྟན་པ་འཇིག་པའི་དམ་ཉམས་རྩད་ནས་ཆོད༔ ཧཱུཾ་བཛྲ་ཛ་ལ་དཾ་ཧཱུཾ་ཏིང་བྷྱོ་ཛ་དགྲ་ལ་བྷྱོ༔ བྷྱོ། ཡུལ་ནི་བྱང་འབྲོག་སྣ་བརྒྱད་ན༔ འབྲོང་རྗེ་ཐང་ལྷའི་ལྕམ་མོ་ནི༔ གདུང་རུས་གཉན་ཏེ་འབྲོང་བཟའ་མོ༔ བྱང་གི་འབྲོོག་སྲིན་འཁོར་འདུལ་མ༔ གླང་ནག་སྟོང་(༢༢བ)
གི་སློག་པ་ལ༔ ཁྱུང་གཤོག་སྟོང་གི་གཤོག་པ་ཅན༔ ཆིབས་སུ་གསེར་ཤ་ཡུ་མོ་བཅིབས༔ ཕྱག་ན་ལྕགས་ཀྱི་ཕུར་པ་བསྣམས༔ ས་བདག་མ་བདུན་འཁོར་གྱིས་བསྐོར༔ ཁྱོད་ཀྱི་ཐུགས་དམ་དུས་ལ་བབ༔ མཐུན་རྫས་མདོས་གླུད་འདི་ལོང་ལ༔ བསྟན་པ་འཇིག་པའི་དམ་ཉམས་རྩད་ནས་ཆོད༔ ཧཱུཾ་བཛྲ་ཏི་བ་ཤེལ་ཧཱུཾ་སྲིང་ཧེ་ཧེ་ཧ་ཧཱུཾ་བྷྱོ་ཛཿ དགྲ་བོའི་སྲོག་ལ་བྷྱོ༔ བྷྱོ། ཡུལ་ནི་རྨ་ཡུལ་ཐང་བརྒྱད་ན༔ རྨ་ཆེན་སྤོམ་རའི་ལྕམ་གཅིག་མ༔ གདུང་རུས་གཉན་ཏེ་རྨ་ཆེན་བཟའ༔ བྱང་གི་སྨན་ཏིང་ཏིང་མོ་བཙུན༔ གཡག་ལྤགས་སྟོང་གི་སློག་པ་ལ༔ ཁྱུང་གཤོག་སྟོང་གི་གཤོག་པ་ཅན༔ ཆིབས་སུ་འབྲོང་བུ་རྭ་དགུ་བཅིབས༔ ཕྱག་ན་མཆོང་གི་ཕུར་པ་བསྣམས༔ ཉི་འོད་མ་བདུན་འཁོར་གྱིས་བསྐོར༔ ཁྱོད་ཀྱི་ཐུགས་དམ་དུས་ལ་བབ༔ མཐུན་རྫས་མདོས་གླུད་འདི་ལོང་ལ༔ བསྟན་པ་འཇིག་པའི་དམ་ཉམས་རྩད་ནས་ཆོད༔ ཧཱུཾ་བྷྱོ་བཛྲ་ཀཱི་ལི་ཀཱི་ལ་ཧཱུཾ་ཛ་དགྲ་ལ་བྷྱོ༔ བྷྱོ། ཡུལ་ནི་ཡར་ཀླུངས་ཡ་ཕུག་ན༔ ཡར་ལྷ་ཤམ་པོའི་ལྕམ་མོ་ནི༔ གདུང་རུས་གཉན་ཏེ་ཤེའུ་བཟའ་མོ༔ གཡུ་ཡི་དྲིལ་བུ་སིལ་ལི་མ༔ སྐུ་ལ་སྤྱང་ཀིའི་སློག་པ་གྱོན༔ མི་རྩིབ་བརྒྱུས་པའི་ཤམ་ཐབས་ཅན༔ ཆིབས་སུ་གཡུ་ཡི་སེང་མོ་བཅིབས༔ ཕྱག་ན་གཡུ་ཡི་དྲིལ་བུ་བསྣམས༔ སྔོན་མོ་མ་བདུན་འཁོར་དང་བཅས༔ ཁྱོད་ཀྱི་ཐུགས་དམ་དུས་ལ་བབ༔ མཐུན་རྫས་མདོས་གླུད་འདི་ལོང་ལ༔ བསྟན་པ་འཇིག་པའི་དམ་ཉམས་རྩད་ནས་ཆོད༔ ཧཱུཾ་ཤེལ་(༢༣ན)
ཁ་ས་པྲ་སི་ཧ་ར་ཧཱུཾ་བྷྱོ་ཛ་དགྲ་བོའི་སྲོག་ལ་བྷྱོ༔ བྷྱོ། ཡུལ་ནི་རྟ་ཡུལ་སྤང་བཀྲ་ན༔ རྟ་ཀ་ཤར་གྱི་ལྕམ་མོ་ནི༔ གདུང་རུས་གཉན་ཏེ་རྟ་བཟའ་མོ༔ དཀར་མོ་མིག་གཅིག་མཆེ་བ་ཅན༔ རྟ་ལ་བཙན་པོ་སྨན་གཅིག་མ༔ མི་མགོ་བརྩེགས་པའི་ཐུལ་པ་གསོལ༔ ཆིབས་སུ་ཕག་རྒོད་ནག་པོ་བཅིབས༔ ཕྱག་ན་ཞིང་གི་དབྱུག་པ་བསྣམས༔ དཀར་མོ་མ་བདུན་འཁོར་དང་བཅས༔ ཁྱོད་ཀྱི་ཐུགས་དམ་དུས་ལ་བབ༔ མཐུན་རྫས་མདོས་གླུད་འདི་ལོང་ལ༔ བསྟན་པ་འཇིག་པའི་དམ་ཉམས་རྩད་ནས་ཆོད༔ ཧཱུཾ་དྲུཾ་དྲུཾ་དྲུཾ་ཧཱུཾ་བྷྱོ་ཛ་ཛ་དགྲ་བོའི་སྲོག་ལ་བྷྱོ༔ བྷྱོ། ཡུལ་ནི་ལ་ཡུལ་ལ་སྟོད་ན༔ གནོད་སྦྱིན་སྙིང་འཕྲོག་ལྕམ་མོ་ནི༔ གདུང་རུས་གཉན་ཏེ་ལ་བཟའ་མོ༔ བཙན་ལ་ལ་རོག་སྨན་གཅིག་མ༔ གུ་ལེ་དཀར་པོའི་སྟོད་གཡོགས་ལ༔ སྟག་ལྤགས་སྟོང་གི་ཤམ་ཐབས་ཅན༔ ཆིབས་སུ་དྲེལ་ནག་ཁ་སེར་བཅིབས༔ ལག་ན་བ་སོའི་ཕུར་བུ་བསྣམས༔ དམར་མོ་མ་བདུན་འཁོར་དང་བཅས༔ ཁྱོད་ཀྱི་ཐུགས་དམ་དུས་ལ་བབ༔ མཐུན་རྫས་མདོས་གླུད་འདི་ལོང་ལ༔ བསྟན་པ་འཇིག་པའི་དམ་ཉམས་རྩད་ནས་ཆོད༔ ཧཱུཾ་ཉུར་ཧུ་མ་བྷྱོ་ཛ་ཛ་དགྲ་ལ་བྷྱོ༔ བྷྱོ། ཡུལ་ནི་བྱང་ཡུལ་བྱང་སྟོད་ན༔ སྐྱི་མཐིང་གངས་ཀྱི་ལ་ར་སྨན༔ སྦྲུལ་ནག་སྟོང་གི་ཐུལ་བ་ལ༔ གཡག་ལྤགས་སྟོང་གི་ཤམ་ཐབས་ཅན༔ ཕྱག་ན་བྱ་རྒོད་ཕུར་བུ་བསྣམས༔ ཆིབས་སུ་གཡུ་འབྲུག་སྔོན་མོ་བཅིབས༔ བཀའ་ཉན་མ་བདུན་འཁོར་དང་བཅས༔ ཁྱོད་ཀྱི་(༢༣བ)
ཐུགས་དམ་དུས་ལ་བབ༔ མཐུན་རྫས་མདོས་གླུད་འདི་ལོང་ལ༔ བསྟན་པ་འཇིག་པའི་དམ་ཉམས་རྩད་ནས་ཆོད༔ ཧཱུཾ་ཨོ་ཚོལ་ཨ་ལི་མ་ཧྲི་ཀི་ལི་མ་བྷྱོ་ཧཱུཾ་ཛ༔་དགྲ་ལ་བྷྱོ༔ བྷྱོ། བོད་ཁམས་སྐྱོང་བའི་མཐུ་རྩལ་ཅན༔ བསྟན་མ་བཅུ་གཉིས་འཁོར་དང་བཅས༔ སྔོན་གྱི་སློབ་དཔོན་བཀའ་བཞིན་དུ༔ དམ་ཚིག་གཉན་ལས་མ་འདའ་བར༔ འབྲང་རྒྱས་མཚལ་གྱི་ཐིག་བྲན་ཅན༔ གཙང་མའི་བལ་དེ་ཤུབ་བེས་བརྒྱན༔ དབུས་སུ་མ་མོའི་སྐུ་རྟེན་བཞུགས༔ མདའ་ཁྲ་གཡས་ལ་འཕང་ཁྲ་གཡོན༔ ངར་གླུད་མཚོ་ཡུངས་བརྒྱན་པ་མདུན༔ ནམ་མཁའ་རྒྱང་བུ་ཕྲག་པར་བཙུགས༔ ཁྲམ་བམ་ནག་པོ་ལག་ཏུ་བསྐུར༔ ལེམ་བུ་ངར་བྱ་ལ་སོགས་པ༔ མཐུན་པའི་མདོས་གླུད་འདི་བཞེས་ལ༔ ནད་དང་རིམས་ཀྱི་དལ་ཁ་རྣམས༔ བསྟན་པ་འཇིག་པའི་དགྲ་ལ་སྒྱུར༔ ཆགས་ཆེ་ཉམ་ང་མ་ལུས་པ༔ བསྟན་པ་འཇིག་པའི་དགྲ་ལ་སྒྱུར༔ ཁྲམ་ཁ་ཤོད་ཁ་དགྲ་ལ་ཕོབ༔ བསྟན་པ་བཤིག་པའི་དགྲ་བོ་ལ༔ ནག་མོ་ཚོགས་ཀྱི་ཁྲམ་སྣ་ཐོད༔ མ་མ་ནག་མོ་དུན་ཏིང་མ༔ ས་མ་ཡ་སརྦ་དགྲ་ལ་བྷྱོ་བྷྱོ༔ བྷྱོ། ཤེལ་གསར་སྒྲིགས། དཀར་དབང་སྔོན་པདྨ་རཱ་ཀ་དང་༔ གསེར་སྦྱངས་ལས་གྲུབ་རི་རབ་རྩེར༔ རིན་ཆེན་ཁང་བཟང་བཅུ་གཉིས་ལྕོག༔ རྒྱ་ཕུབས་ནོར་བུའི་ཏོག་གིས་མཛེས། །དྲ་བ་དྲ་ཕྱེད་དྲིལ་སྒྲ་འཁྲོལ། །དར་དབྱངས་ནོར་བུའི་རྒྱན་གྱིས་སྤྲས། །སྲོག་ཤིང་དཔག་བསམ་ལྗོན་རྩེར་གདུགས། །ལོགས་ལ་གསལ་བྱེད་ཉི་ཟླ་བསྐོར། །རྩ་བར་གསེར་རི་རོལ་མཚོ་བདུན། །(༢༤ན)
གླིང་བཞི་གླིང་ཕྲན་ལྕགས་རིས་བསྐོར། །ལྷ་མིའི་དཔལ་འབྱོར་ཕུན་ཚོགས་ལྡན། །ཡིད་འཕྲོག་རྔམ་བརྗིད་གནས་ཀྱི་རྟེན། །རྣམ་བཀྲ་ནམ་མཁའ་སྒྲོ་ཕོད་ཅན། །རྒྱང་བུ་སྤེལ་ལེགས་ཕྲེང་བར་བསྒྲིགས། །ཡུལ་མཁར་ཕོ་གདོང་མོ་གདོང་དང་། །ལྷ་བདུད་མ་མོ་ཀླུ་དང་བཙན། །གཤིན་རྗེ་རྒྱལ་པོ་གཟའ་རྒོད་བྱད། །རྦོད་གཏོང་མ་མོའི་ཁྲག་ཟོར་སོགས། །གནོད་བྱེད་མ་ལུས་བཟློག་པའི་ཁྲམ། །མདའ་ཁྲ་འཕང་ཁྲ་ཐབས་ཤེས་ཚུལ། །རྣམ་པར་ཤེས་པ་ཚེ་སྲོག་དབུགས། །ཕུང་ཁམས་སྐྱེ་མཆེད་དབང་པོ་ལྔ། །ཚང་བའི་ངར་གླུད་རྒྱན་གོས་ཅན། །འབྱོར་ལྡན་ཡིད་འོང་འབུམ་ཕྲག་སྤེལ། །ཆུ་གཉིས་ཉེར་སྤྱོད་འདོད་ཡོན་ལྔ། །བཀྲ་ཤིས་རྟགས་བརྒྱད་རྒྱལ་སྲིད་བདུན། །བཙོ་མ་གསེར་གྱི་པྲོག་ཞུ་ལ། །ལྷ་དང་མི་ཡི་རིན་པོ་ཆེ། །ཡིད་འཕྲོག་སྣ་ཚོགས་ཕྲ་ཡིས་སྤུད། །གསེར་གཡུ་མུ་ཏིག་སྤེལ་བའི་ཐོད། །ཐོད་མཛེས་གསེར་ལ་གཡུ་ཡིས་སྤྲས། །བྲག་ནག་སྤུངས་པའི་ཐོད་བཅིངས་རྔམ། །རྣ་རྒྱན་གདུ་བུ་མགུལ་པ་བརྒྱན། །སེ་རལ་ཁ་དང་དར་ཟབ་ཀྱི། །དཀར་སེར་དམར་ལྗང་ནག་སྨུག་བེར། །སྦྲུལ་ནག་སྟོང་སྦྲེལ་གཡང་གཞི་དང་། །གཡག་ལྤགས་རློན་པའི་ཤམ་ཐབས་ཅན། །འཇའ་ཚོན་རྣམ་པ་བཀྲ་བའི་གོས། །ཤམ་ཐབས་ཁྱུང་གཤོག་ལས་གྲུབ་པ། །ཆུ་འཛིན་དཀར་པོའི་ཐུལ་པ་དང་། །སེང་ལྤགས་གངས་དཀར་སྤུངས་པའི་གོས། །གླང་ནག་སྟོང་གི་སློག་པ་དང་། །ན་བཟའ་གཡུ་ཡི་མཐའ་འཇག་ཅན། །དུང་གི་ཁུ་འཕང་ན་བཟའ་ལ། །(༢༤བ)
མཛེས་བྱེད་གཡུ་ཡིས་སྐ་རགས་སྤྲས། །དར་དཀར་གཡུ་ཡི་མཐའ་ཅན་གོས། །རྨ་བྱའི་ཐོད་དང་ཞིང་ལྤགས་ཀྱི། །སློག་པ་མི་སྙིང་ཤམ་ཐབས་དང་། །རྨ་བྱའི་སྒྲོ་ཐུལ་རབ་ཏུ་བཀྲ། །མི་མགོ་བརྩེགས་པའི་ཐུལ་པ་ཀླུབས། །ཙེ་བེར་མུ་མེད་མཐའ་འཇག་ཅན། །བྱ་རྒོད་ཐུལ་པ་སྦྲུལ་ཤམ་དང་། །སྨུག་ནག་ཟབ་གོས་མེ་སྟག་འཕྲོ། །གྱི་ལིང་དཀར་པོའི་པགས་པའི་གོས། །སྤྲིན་ནག་སྤུངས་པའི་ཐུལ་བ་དང་། །སྟག་ཤམ་སྤྱང་སློག་མིའི་རྩིབ་མ། །སྲད་བུར་བརྒྱུས་པའི་ཤམ་ཐབས་ཚོགས། །བྱ་རྒོད་རྐང་དང་ཟངས་ལྕགས་མཆོད། །བསེ་དང་སེང་ལྡེང་ཕུར་པའི་མཚོན། །ཆུ་སྲིན་རྒྱལ་མཚན་མེ་ལོང་དང་། ཁྲམ་ཤིང་ཤང་ལང་རྡོ་རྗེའི་ཞགས། །ཐོད་ཁྲག་རྡོ་རྗེ་ཚེའི་བུམ་པ། །བེ་ཅོན་རུ་མཚོན་རྩེ་ལྔ་པ། །རལ་གྲི་ཁྲག་རྒྱལ་ཟོར་བ་མདའ། །ཅང་ཏེའུ་ཞིང་དབྱུག་དུག་སྦྲུལ་ཞགས། །པར་བུ་གཞོང་པ་མདའ་དར་སྙིང་། །རིན་ཆེན་སྒྲོམ་བུ་ལྷབ་ལྷུབ་དར། །འབྲང་རྒྱས་ཏིང་ཤག་གཡུའི་དྲིལ་བུ། ༡༩།རིན་ཆེན་པདྨ་འདབ་སྟོང་འཛུམ། །གཡུ་འབྲུག་ཤ་བ་ཆུ་གླང་རྟ། །རྐྱང་སེར་བོང་བུ་འབྲོང་གཡག་འབྲོ། །རྔ་མོ་དྲེའུ་རླུང་ནག་འཚུབ། །སྟག་ཁྱུང་གྱེར་ལིང་འོལ་བ་དོམ། །ཤ་བ་རྭ་བཅུ་མི་དྲེད་རྔམས། །འཕར་བ་རླུང་གིས་བསྐྱོད་པའི་སྤྲིན། །རུས་སྦལ་མགོ་དགུ་བཙོད་མཛོ་རྟོལ། །བགྲང་ཡས་བཞོན་པ་བསམ་མི་ཁྱབ། །འདོད་འཇོའི་བ་དང་ར་ལུག་ཁྱི། །ཅེ་སྤྱང་གསའ་གཟིག་ཁྲུང་ཁྲུང་དཀར། །བྱ་རོག་རྒོད་གླག་བསེ་བྱ་ཁྲ། །གོ་བོ་ངང་པ་གླ་བ་དང་། །དགོ་བ་རྣ་བ་རྒྱ་ལ་སོགས། །(༢༥ན)
གནམ་ལ་འཕུར་དགུ་ས་འོག་ཏུ། །འཛུལ་དགུའི་རི་དྭགས་འཕྱོ་དགུའི་ཚོགས། །རྡོ་རྗེའི་གོ་ཁྲབ་བཙན་པོའི་རྨོག །ཞོལ་བཏགས་རྔ་གཅུས་འཇའ་རིས་ཅན། །ཕུབ་དང་ལྕགས་གཞིབས་རང་སྲུང་གོ །གྲི་གུག་རལ་གྲི་དགྲ་སྟ་མདུང་། །སྒྱོགས་དང་དཔག་ཆེན་མདའ་བོ་ཆེ། །ཕ་རོལ་འཇོམས་པ་རྡོ་རྗེའི་མཚོན། །བདུད་རྩི་སྨན་དང་རཀྟའི་མཚོ། །རྟག་གཏོར་རྒྱུན་གཏོར་བསྐང་གཏོར་སྤུངས། །འབྲང་རྒྱས་བཤོས་བུ་ཏིང་ལོ་སྦར། །སྨན་ལེ་ཁྲག་སྣའི་དབུས་སྐྱུ་དང་། ཁྲག་ཀོང་ངར་མི་མཛེས་སྡུག་བརྗིད། །སེང་གེ་མི་དང་བ་ལང་དཀར། །སྟག་མོ་པུ་ཤུད་རྨ་བྱ་ཁྱུང་། །འཇོལ་མོ་བྱ་རྒོད་ཅེ་སྤྱང་དེད། །འཕར་བ་སྦྲུལ་ལ་སོགས་པ་ཡི། །ཤ་སྣ་མི་གཅིག་སྟོང་ཕྲག་བཤམས། །མི་རྟ་བ་ལང་ལ་སོགས་པའི། །སྙིང་སྣ་འབུམ་ཕྲག་གཅལ་དུ་བཀྲམ། །བརྒྱ་ཕྲག་ཤིང་ཏོག་རོ་བདའི་ཟས། །བྲུམ་ཐུད་ཕྱེ་མར་ཁུར་བ་ཚ། །གྲོ་ནས་སྲན་འབྲས་སོ་བ་ཁྲེ། །འབྲུ་སྣ་ཀ་ར་བུ་རམ་སྦྲང་། །སྣ་ཚོགས་ཟས་སྣའི་བྱེ་བྲག་ཚོགས། །ཇ་ཆང་ཞོ་ཆུ་རྣམ་གྲངས་སྟོང་། །འོ་ཆོལ་གསེར་སྐྱེམས་བཏུང་བ་བསྐྱིལ། །བཻ་ཌཱུ་དམར་གད་དབང་སྔོན་ཤེལ། །པད་རཱཀ་གཟི་གཡུ་མུ་ཏིག་མཆོང་། །བྱུ་རུ་ནལ་གསེར་དངུལ་ཟངས་ལྕགས། །སྣ་ཚོགས་ལྷ་མིའི་རིན་པོ་ཆེ། ཁ་དོག་རྣམ་མང་ཟབ་གོས་དང་། །རས་སྣམ་སྟག་གཟིག་ལ་སོགས་པའི། །མཐའ་ཡས་སྲོག་ཆགས་པགས་པ་དང་། །བཙོད་དང་ཞུན་མཁན་རམས་སྐག་མཚལ། །བཟང་དྲུག་ཙན་དན་ཨ་ག་རུ། །ག་པུར་སྤོས་(༢༥བ)
སོགས་སྨན་སྣ་སྟོང་། །རྫ་རྔ་ཟོམ་རྔ་རྔ་བོ་ཆེ། །རྐང་གླིང་དུང་ཆེན་རྒྱ་གླིང་དང་། །སྒྲ་སྙན་སིལ་སྙན་པི་ཝང་གླུ། །གཡབ་དར་རྒྱལ་མཚན་འཕན་གདུགས་བསྒྲེང་། །ཐུགས་དམ་སྐོང་བྱེད་མཐུན་པའི་རྫས། ༣༡ ། དངོས་བཤམས་ཡིད་སྤྲུལ་མཆོད་པའི་ཚོགས། །དཔལ་ལྡན་རེ་མ་ཏཱི་ལ་འབུལ། །བདུད་མོ་མཆེད་བཞིའི་ཚོགས་ལ་འབུལ། །གནོད་སྦྱིན་མཆེད་བཞིའི་ཚོགས་ལ་འབུལ། །སྨན་མོ་མཆེད་བཞིའི་ཚོགས་ལ་འབུལ། །མདོས་བདག་ཆེན་མོས་མདོས་བཞེས་ཤིག །གླུད་བདག་ཆེན་མོས་གླུད་བཞེས་ཤིག །དགྱེས་པ་ཆེན་པོས་འཕྲིན་ལས་བཞིའི། །བསམ་པའི་དོན་ཀུན་ལྷུན་གྲུབ་མཛོད། དམ་བསྒྲག་ཅིང་བཟློག་སྒྱུར་འཕྲིན་ལས་འཆོལ་བ་ནི། བྷྱོ། གསར་སྒྲིགས། སློབ་དཔོན་པདྨ་ཐོད་ཕྲེང་གིས། །བསྟན་མ་བཅུ་གཉིས་ཁྱེད་རྣམས་ཀྱི། །སྲོག་གི་སྙིང་པོ་ཉེར་བླངས་ནས། །དབང་བསྐུར་དམ་ལ་བཏགས་མིན་ནམ། །བྱང་གི་གནམ་མཚོ་ཕྱུག་མོ་རུ། །ཏིང་ཏིང་གངས་ཀྱི་དཀར་མོ་ཤག །བདག་ཉིད་ཆེན་མོ་ཁྱོད་མཚན་དུ། །རྡོ་རྗེ་ཀུན་གྲགས་མ་རུ་བཏགས། །མོན་ཡུལ་ཇོ་མོ་ལྷ་རི་རུ། །རྡོ་རྗེ་གཡུ་སྒྲོན་གངས་སྨན་དཀར། །སྐྱིན་མཐིང་ཁྱོད་ཀྱི་གསང་བའི་མཚན། །རྡོ་རྗེ་གཡའ་མ་སྐྱོང་ཞེས་བཏགས། །བྲིན་གྱི་ལ་ཕྱི་ཆུ་དབར་དུ། །དཔལ་ལྡན་བཀྲ་ཤིས་ཚེ་རིང་མ། །གསེར་ཐང་མོ་ཁྱོད་གསང་མཚན་དུ། །རྡོ་རྗེ་ཀུན་ཏུ་བཟང་མོར་བཏགས། །ཡར་འབྲོག་གཡུ་མཚོ་ཕྱུག་མོ་རུ། །འབྲོག་ཆེན་ལྷ་ལྕམ་རྡོར་དྲིལ་མ། །གཡའ་མོ་སྐྱོང་ཁྱོད་གསང་མཚན་ལ། །འཁོར་(༢༦ན)
འདས་རྡོ་རྗེ་བགེགས་གཙོར་བཏགས། །ལྷ་ཕུ་གངས་རི་དཀར་པོ་རུ། །གངས་ཀྱི་ཡུམ་ཆེན་འོད་འབར་མ། །ཤ་མེད་ཁྱོད་ཀྱི་གསང་བའི་མཚན། །རྡོ་རྗེ་གཡུ་བུན་མ་རུ་བཏགས། །ཏུ་མཚམས་ཇོ་མོ་བར་ག་རུ། །སྟོང་ཐད་རྗེ་ལྕམ་ཁྱུང་བཟའ་མོ། ཁྱུང་བཙུན་ཁྱོད་ཀྱི་གསང་བའི་མཚན། །རྡོ་རྗེ་དཔལ་གྱི་ཡུམ་དུ་བཏགས། །བྱང་སྟོད་དམར་གྱི་མཚོ་འགྲམ་དུ། །བཙན་མོ་རྡོ་རྗེ་ཡེ་ཤེས་མཆོག །ཁོང་ཏིང་ཤག་ཁྱོད་གསང་བའི་མཚན། །མཁའ་ལྡིང་རྡོ་རྗེ་ཀླུ་མོར་བཏགས། ཁམས་ཀྱི་རྨ་ཆེན་སྤོམ་རའི་མགུལ། །བྱང་གི་ཏིང་ཏིང་ཏིང་མོ་བཙུན། །སེར་མོ་ལས་མཁན་གསང་མཚན་དུ། །རྡོ་རྗེ་དྲག་མོ་རྒྱལ་ཞེས་བཏགས། །ཤར་ཕྱོགས་ཀོང་ཡུལ་བྲེ་སྣ་རུ། །ཀོང་བཙུན་དེ་མོ་འོད་འབར་མ། །ཀོང་བཟའ་མོ་ཁྱོད་གསང་བའི་མཚན། །རྡོ་རྗེ་བོད་ཁམས་སྐྱོང་དུ་བཏགས། །ཨེ་གཉལ་ལོ་རོའི་གནས་མཆོག་ཏུ། །གངས་ཀྱི་རམ་ཤག་ལ་རོ་སྨན། །རྩལ་མོ་གྲགས་ཁྱོད་གསང་མཚན་དུ། །རྡོ་རྗེ་སྨན་གཅིག་མ་རུ་བཏགས། །གཙང་གི་ཇོ་མོ་ནགས་རྒྱལ་དུ། །སྨན་བཙུན་ཁུག་ཆོས་གཡར་མོ་རྒྱལ། །གཡར་གཟའ་མོ་ཁྱོད་གསང་བའི་མཚན། །རྡོ་རྗེ་གཡར་མོ་བསིལ་དུ་བཏགས། །པུད་ཀྱི་ཇོ་མོ་གཡུ་རི་ལ། །རྡོ་རྗེ་ཡེ་ཤེས་གཡུ་དྲིལ་མ། །ཤེ་བཟའ་མོ་ཁྱོད་གསང་མཚན་དུ། །རྡོ་རྗེ་གཟུགས་ལེགས་མ་ཞེས་བཏགས། །གཞན་ཡང་གླང་ཆེན་དཔལ་སེང་དང་། །གནུབས་ཆེན་སངས་རྒྱས་ཡེ་ཤེས་སོགས། །གྲུབ་བརྙེས་རིག་སྔགས་འཆང་མང་པོས། །བཀའ་དང་དམ་ལ་བཏགས་མིན་ནམ། ཁྱད་པར་ཉང་རལ་ཡབ་(༢༦བ)
སྲས་དང་། །ཆོས་དབང་ཐུགས་སྲས་པད་མ་དབང་། །དམར་ཞབས་རས་ཆེན་གྲགས་རྒྱན་པ། །བཀྲ་ཤིས་མཚན་ཅན་ཤེས་རབ་འོད། །ཆོས་བློ་དབང་ཕྱུག་བློ་གྲོས་དང་། །བསོད་སེང་འཇམ་དབྱངས་བློ་གྲོས་ཞབས། །དམ་པ་ཆོས་ཚུལ་ནམ་མཁའ་དཔལ། །འཇམ་དབྱངས་རྒྱལ་མཚན་པདྨ་དབང་། །ལེགས་ལྡན་རྡོ་རྗེ་མཁྱེན་བརྩེའི་ཞབས། །དབང་རབ་མགོན་པོ་བསོད་ནམས་མཆོག །ཁྱབ་བདག་ཆོས་དབྱིངས་རང་གྲོལ་སོགས། །རྩ་བརྒྱུད་བླ་མས་བདག་ཅག་གི །གྲོགས་པོར་གཏད་དོ་གཞུང་མ་ངན། །མཛའ་བོར་གཏད་དོ་ཁྲེལ་མ་བོར། །བྲན་དུ་གཏད་དོ་རྐང་མ་ངན། །མཐུ་རྩལ་མ་ཞན་འཕྲིན་ལས་སྒྲུབས། ཁྱོད་ལ་འཕྲིན་ལས་གཏད་པ་ནི། །བསྟན་དང་བསྟན་འཛིན་སྡེ་རྣམས་སྤེལ། །ས་སྤྱོད་རྒྱལ་པོའི་མངའ་ཐང་རྒྱས། །བོད་ཁམས་རུ་བཞིའི་རྒྱལ་ཁམས་ཀྱི། །མི་ནོར་ཕྱུགས་གསུམ་བསྲུང་ཞིང་སྐྱོབས། །བདག་ཅག་དམིགས་བྱར་བཅས་པའི་ཚེ། །ཟད་ཀྱང་ལོ་བརྒྱའི་བར་དུ་སྲིངས། །ཆོས་སྲིད་དཔལ་འབྱོར་ལེགས་ཚོགས་རྣམས། །ཡར་ངོའི་ཟླ་ལྟར་འཕེལ་བར་མཛོད། །རིགས་འཛིན་བདག་ཅག་ཡོན་མཆོད་རྣམས། །སྣང་སྲིད་ལྷ་སྲིད་སྡེ་བརྒྱད་ཀྱིས། །བྱད་དུ་བཅུག་ན་བྱད་ཐག་ཆོད། ཁྲམ་ལ་བབས་ན་ཁྲམ་ཁ་ཕྱིས། །ཤོ་ལ་བཀོད་ན་ཤོ་རྡོ་སྤོས། །ནད་ལ་བབས་ན་ནད་ཁ་སྒྱུར། །ཟློག་སྒྱུར་འཕྲིན་ལས་གཉན་པོ་མཛོད། །གཞན་ཡང་བར་དུ་གཅོད་བྱེད་པའི། །ནད་རིགས་བཞི་བརྒྱ་རྩ་བཞི་དང་། །སྟོང་ཕྲག་བརྒྱད་ཅུའི་བགེགས་ཀྱི་ཚོགས། །སུམ་བརྒྱ་དྲུག་ཅུའི་(༢༧ན)
ཡེ་འདྲོག་གདོན། །བྱིས་པའི་གདོན་ཆེན་བཅོ་ལྔ་དང་། །དུས་མིན་འཆི་བ་རྣམ་པ་བརྒྱད། །ལྟས་ངན་བརྒྱད་ཅུ་རྩ་གཅིག་རྣམས། །ཟློག་སྒྱུར་འཕྲིན་ལས་གཉན་པོ་མཛོད། །འབྲུམ་ནག་འབུམ་ཡང་ལྷོག་པ་དང་། །སྐྲངས་པ་བལ་ལྡག་གཡན་པའི་ནད། །མཛེ་ཤུ་ཕོལ་མིག་སྐྱ་རྦབ་རླུང་། །གློ་གཟེར་ཤ་ཡ་མིག་སེར་དང་། །རྒྱ་ནད་ཤ་སེར་ཁྲག་གི་ནད། །གཟེར་ཐབ་ལེ་བརྒན་རྒྱུ་གཟེར་དང་། ཁྲག་སྐྱུག་མཁལ་ནད་ལ་སོགས་པ། །ཟློག་སྒྱུར་འཕྲིན་ལས་གཉན་པོ་མཛོད། །བལ་ནད་སྨྱོ་འབོག་གློ་རྡོལ་དང་། །གཡུལ་འཁྲུག་འཐབ་རྩོད་མི་ཁ་ཟ། །དུག་སྦྱོར་བསམ་ངན་གྲོས་ངན་བཤམས། །རྨིས་ལྟས་ཉམས་དང་མཚན་མ་ངན། །ཀེག་སྲི་ངན་པ་ལངས་པ་དང་། །ཆགས་ཆེ་ཉམ་ང་ལ་སོགས་པའི། །བར་གཅོད་མི་མཐུན་ཕྱོགས་རྣམས་ཀུན། །ཟློག་སྒྱུར་འཕྲིན་ལས་གཉན་པོ་མཛོད། །བསྟན་སྐྱོང་འཁོར་བཅས་མཐུ་རྩལ་སྐྱེད། །ནད་གདོན་བར་གཅོད་དགྲ་བགེགས་ཀུན། །བྷྱོ་བྷྱོ་སྡང་བའི་དགྲ་ལ་བྷྱོ། །བྷྱོ་བྷྱོ་གནོད་པའི་བགེགས་ལ་བྷྱོ། །བཅུ་གཉིས་པ་གླུད་ལས་རྣམས་བྱིན་གྱིས་བརླབས་ནས་གཏོང་བ། བཅུ་གསུམ་མདོས་གླུད་བསྒྱུར་ཞིང་ཁྲོམ་སྣ་བསྒྱུར་བ། བཅུ་བཞི་བ་སྒོ་དབྱེ་ཞིང་མདོས་གླུད་ཀྱི་ལམ་བསྟན་པ། བཅོ་ལྔ་པ་གསེར་སྐྱེམས་གཏོང་བ། བཅུ་དྲུག་པ་མཇུག་ཟོར་གྱི་གཅད་པ། བཅུ་བདུན་པ་ལས་གཞི་སྒྲུབ་པ་རྣམས་རཀྴའི་གཏེར་བྱོན་བཞིན་བྱ། དེ་ནས་མདོས་རྣམས་ཕྱིར་བཏེག །གཏོར་མར་སླེབ་པ་དང་གསེར་སྐྱེམས་ཕུལ། བྷྱོ། བསྟན་གསར་སྒྲིགས། མ་བཅུ་གཉིས་མཐུ་རྩལ་སྐྱེད། །མདོས་ཡས་འདི་ཡི་སྣ་དྲོངས་ལ། །བདག་ཅག་ཡོན་མཆོད་འཁོར་བཅས་ལ། །གནོད་ཅིང་འཚེ་བའི་དགྲ་དང་བགེགས། །ནད་གདོན་ཆགས་(༢༧བ)
ཆེ་ཉམ་ང་དང་། །བྱད་ཕུར་གཏད་ཟོར་སྐེག་སྲི་ངན། །དམར་བཤལ་རྒྱུ་ཚད་གག་ལྷོག་གཟེར། །འབྲུམ་པ་བེ་གེ་པར་པ་ཏ། །ཉྭ་ལོག་འཁྲུ་སྐྱུག་ལ་སོགས་པའི། །མི་ཕྱུགས་ནད་རིགས་མ་ལུས་པ། །དགྲ་དང་བགེགས་ཀྱི་སྟེང་དུ་སྒྱུར། །ཟློག་སྒྱུར་བཅོལ་བའི་འཕྲིན་ལས་མཛོད། །ཅེས་བཟློག་པ་བྱ་ཞིང་། རོལ་མོ་བརྡུང་། མཚོན་ཆ་བརྡབ། ཞིང་ལྤགས་བརྡུལ་། སྦྱོར་གདབ། མེ་ཆུའི་རྒྱས་འདེབས་བྱ་ཞིང་ཕྱི་མིག་མི་ལྟ་བར་ནང་དུ་ལོག །ཧོཿ འདི་གསར་སྒྲིགས། ལྟར་དངོས་བཤམས་ཡིད་སྤྲུལ་མཆོད་པའི་སྤྲིན། །མི་མཛད་ནམ་མཁའ་མཛོད་དུ་བྱིན་བརླབས་ནས། །ཡར་ལ་མཆོད་ཅིང་མར་ལ་བྱིན་པའི་མཐུས། །བསྟན་སྲུང་འཁོར་བཅས་ཐུགས་དམ་སྐོངས་གྱུར་ཅིག །སྐུ་གསུང་ཐུགས་རྣམས་མཉེས་ཤིང་རབ་ཚིམ་པས། །སྒྲིབ་གཉིས་བར་གཅོད་ཀུན་ཞི་ཚེ་དཔལ་རྒྱས། ཁམས་གསུམ་དབང་འདུས་དགྲ་བགེགས་རྡུལ་དུ་རློག །འཕྲིན་ལས་རྣམ་བཞི་ལྷུན་གྱིས་གྲུབ་པར་ཤོག །ཅེས་སྨོན་ལམ་གདབ། ཚེ་འགུགས་ཤིང་བཀྲ་ཤིས་བརྗོད་པ་སོགས་མཇུག་སྤྱི་ལྟར་བྱའོ། །འདི་ནི་ནད་རིམས་བཟློག་པ་སོགས་བཟློག་མདོས་གཙོ་བོར་བྱས་པ་ཡིན་གྱི་བསྐང་མདོས་བྱེད་ན་དེ་གའི་ཁ་བསྒྱུར་དང་། མདོས་རྣམས་ཡང་ཐོག་ཏུ་མདོས་གླུད་སོ་སོར་གཏོང་བ། རྟེན་མདོས་སུ་བྱེད་ན་དེ་གའི་ཕྱག་ལེན་ཕྲ་ཞིབ་རྣམས་མཚན་ཉིད་དང་ལྡན་པའི་རྡོ་རྗེ་སློབ་དཔོན་ཡུན་དུ་བསྟེན་ཏེ་གསང་ཆེན་རྙིང་མའི་རིང་ལུགས་འཁྲུལ་པ་མེད་པ་ཁོང་དུ་ཆུད་པར་བྱས་ནས་ཉམས་སུ་བསྟར་བར་བྱའོ། །སྨྲས་པ། ཨ་ཧོ་དཔག་བསམ་ཡོངས་འདུའི་ལྗོན་པ་ལས། །འདོད་པའི་རེ་བ་ཡོངས་སུ་བསྐོང་བ་བཞིན། །བོད་སྐྱོང་བསྟན་(༢༨ན)
མ་མཉེས་བྱེད་ཆོ་ག་ཡིས། །རྣམ་བཞིའི་འཕྲིན་ལས་ལྷུན་གྱིས་ཅིས་མི་འགྲུབ། །རྒྱ་བོད་མཁས་གྲུབ་མ་དྲོས་ཀླུང་ཆེན་ལས། །མདོས་གཏོར་མཆོད་པའི་འཕྲིན་ལས་གདྒཱའི་རྒྱུན། །བློ་ལྡན་ཁྱབ་འཇུག་དགའ་བའི་ཞབས་བསིལ་དུ། །སྦྲེང་ཡང་སྐམ་ངན་བྲག་རྩེར་ག་ལ་འབབ། ཁྱད་པར་ཨྱོན་མཁན་པོ་པདྨ་ཞེས། །འཛམ་གླིང་ཆེ་བའི་རིག་སྔགས་འཆང་བ་དེའི། །ཐུགས་བཅུད་བཀའ་གཏེར་འཕྲིན་ལས་གྲངས་མང་ཡང་། །ཚད་ལྡན་ཤེས་པའི་སྔགས་འཆང་ཉིན་སྐར་ཙམ། །སྐྱེ་མང་རྒྱུད་དང་རིགས་རུས་སྟོབས་འབྱོར་ཁྲིས། །བསྙེམས་པའི་སྔ་འགྱུར་བན་སྔགས་ཕལ་མོ་ཆེ། །མི་སྨྲའི་གཉིད་ལ་གཡུར་ན་ཐ་སྙད་དང་། །རྟོག་གེའི་ཚིག་བཤད་མཁན་གྱི་སྤྱོད་ཡུལ་མིན། །དེ་ཕྱིར་རིགས་ཀུན་ཁྱབ་བདག་མེས་རྣམས་ཀྱིས། །ཟབ་དོན་གདམས་པའི་རིན་ཆེན་ཐོད་བཅིངས་མཐུས། །སྒྲུབ་ཕྲིན་གླིང་བཞི་ཡོངས་ལ་དབང་སྒྱུར་བའི། །རིག་སྔགས་འཆང་བའི་མང་བཀུར་རྒྱལ་སར་སོན། །མ་རིག་འཁྲུལ་པའི་ས་གཞིར་ཉེས་བརྒྱའི་ཤིང་། །རྩ་བ་སྦོམ་པོར་སྐྱེད་དུ་ཡོངས་བསྲིངས་པ། །འཕྲིན་ལས་རྣོན་པོའི་མཚོན་གྱིས་དྲུངས་ཕྱུང་སྟེ། །རང་རིག་ཀུན་བཟང་ཡེ་གྲོལ་མངོན་འགྱུར་ཤོག །དེའང་དཔལ་ཨྱོན་ཆེན་པོའི་ཞལ་ལུང་ལས། ཉེ་བར་འོངས་པའི་ལུང་བསྟན་མང་པོར་བོད་འབངས་ཀྱི་བདེ་ཐབས་སུ་བསྟན་མའི་སྒོས་མདོས་གལ་ཆེ་བར་གསུངས་ཀྱང་དེང་སང་ཧ་ཅང་གི་གྲགས་མི་ཆེ་ཞིང་། ལྷ་བྲག་གཏེར་བྱོན་གྱི་སྒོས་མདོས་སྙིང་པོ་ཙམ་ལས་སྦྱོར་དངོས་རྗེས་གསུམ་མཐའ་དག་མི་གསལ་བ་འདུག་པར་ལུང་བསྟན་དུས་བབ་ཀྱི་རྩོད་བྲལ་གཏེར་སྟོན་(༢༨བ)
སྤྲུལ་པའི་སྐུ་འགྲོ་འདུལ་གཏེར་བདག་གླིང་པས་འདི་སྐོར་ལ་ཆོག་སྒྲིགས་བཀླགས་ཆོག་མ་ལྟ་བུ་བྱུང་ན་ལེགས་པ་ཡོད་འདུག་ཅེས་གསུང་གླེང་གནང་བ་དང་རང་ཉིད་ཀྱང་འདྲི་བའི་མདུན་པ་ཡོད་པའི་སྟེང་ཞང་སྣ་དམ་པ་རྡོ་རྗེ་བདུད་འཇོམས་ཀྱི་སྤྲུལ་པའི་སྐུ་མཆོག་བྱང་པ་རིགས་འཛིན་ཆེན་པོའི་ཡང་སྲིད་བློ་བཟང་པདྨ་འཕྲིན་ལས་ཐེག་མཆོག་དབང་གི་རྒྱལ་པོ་ཡོངས་འདུའི་སྡེའི་གསུང་གིས་ཀྱང་བསྐུལ་བ་ལ་བརྟེན་ནས། ཀུན་ཚང་བ་རྒྱས་པ། སེར་བཞག་པ་འབྲིང་པོ། སེར་ཚོས་གཉི་ག་བཞག་པ་བསྡུས་པ་ལོང་སྐབས་དང་སྦྱར་ཆོག་པའི་བོད་སྐྱོང་བསྟན་མ་བཅུ་གཉིས་ཀྱི་མདོས་ཀྱི་འཕྲིན་ལས་དཔྱིད་ཀྱི་རྒྱལ་མོའི་གླུ་དབྱངས་འདི་ནི། ལྷ་བྲག་གཏེར་བྱོན་ལ་གཞི་བྱས། གཏེར་ཁ་གོང་འོག་དང་རཀྴའི་གཏེར་མ་སོགས་ནས་ལེགས་ཆ་བསྡུས། ཅུང་ཟད་ཁ་འགེང་དགོས་པ་རྣམས་ཚིག་སྦྱོར་གསར་དུ་བསྒྲིགས་ཏེ། ཁྱབ་བདག་རྡོ་རྗེ་སེམས་དཔའི་ངོ་བོ་ཟུར་ཆེན་ཆོས་དབྱིངས་རང་གྲོལ་གྱི་བཀའ་དྲིན་ལ་བརྟེན་ནས་ཕྱོགས་འདིར་བློ་གྲོས་ཀྱི་སྣང་བ་དཀར་བའི་ཟ་ཧོར་གྱི་རིགས་ལས་སྔགས་སྨྱོན་གང་ཤར་རང་གྲོལ་གྱིས་ཐུན་མོང་ཞེས་པ་ལྕགས་ཁྱི་ཧོར་ཟླ་དགུ་པའི་དམར་ཆའི་མ་དང་མཁའ་འགྲོ་འདུ་བའི་ཚེས་དགེ་བར་ཕོ་བྲང་ཆེན་པོ་པོ་ཏ་ལར་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ།། །།སརྦ་མངྒ་ལཾ།