ཁྲ་བྲག་གཏེར་བྱོན་མའི་དྲེགས་འདུལ་བསྙེན་ཐབས་རྡོ་རྗེ་འབར་བའི་གཟི་བྱིན།

ཁྲ་བྲག་གཏེར་བྱོན་མའི་དྲེགས་འདུལ་བསྙེན་ཐབས་རྡོ་རྗེ་འབར་བའི་གཟི་བྱིན་བཞུགས་སོ། །

དྲེགས་འདུལ་ཧེ་རུ་ཀ་དཔལ་པདྨ་འབྱུང་། །དབྱེར་མེད་ཟུར་ཆེན་ཆོས་དབྱིངས་རང་གྲོལ་ཞབས། །དེང་ནས་ཀུན་བཟང་རང་རིག་རང་ངོ་རུ། །འཕྲོད་མིན་དེ་སྲིད་སྙིང་དབུས་པད་མཚོར་བཞུགས། །དེ་ཡང་དགས་ལུང་ཁྲ་མོ་བྲག་ནས་པདྨ་ལས་འབྲེལ་རྩལ་གྱིས་སྤྱན་དྲངས་པའི་ གསང་བདག་རྡོ་རྗེ་གཏུམ་པོ་དྲེགས་འདུལ་གྱི་སྐོར་ཉེ་བར་བསྙེན་པ་ལ་སྤྱིར་ཕྱག་རྡོར ་དྲེགས་འདུལ་འདི་ལ་ཕྱི་ནང་གསང་གསུམ་གྱི་སྒྲུབ་པ་ལས། སེར་བ་འབེབས་པ་ནས་རྡོ་རྗེའི་ཕྱག་མཚན་གྱི་ལས་མཐའི་བར་ཕྱི་སྒྲུབ་ཀྱི་ལས་ཚོགས། བུམ་སྒྲུབ་ནས་སྡེ་བརྒྱད་གནད་འཁོར་གྱི་བར་ནང་སྒྲུབ་ཀྱི་ལས་ཚོགས། ལས་བཞིའི་སྦྱིན་སྲེག་གསང་སྒྲུབ་ཀྱི་ལས་ཚོགས་ཡིན། གཞན་ཡང་སྐུ་གསུང་ཐུགས་ཀྱི་སྒྲུབ་པ་གསུམ་དུ་བཤད་པའི་སེང་ཕུར་ཉེར་གཅིག་ནས་ཀླུའི་གདོན་འགྲོལ་པའི་བར་སྐུ་སྒྲུབ་ཀྱི་ལས་ཚོགས། ཀླུ་བསད་པ་ནས་ངག་མནན་པའི་བར་གསུང་སྒྲུབ་ཀྱི་ལས་ཚོགས། གསང་བ་ཐུགས་ཀྱི་ཕུར་གཅིག་ནས་ཚོགས་ལས་ཀྱི་བར་ཐུགས་སྒྲུབ་ཀྱི་ལས་ཚོགས། ཡོན་ཏན་དང་འཕྲིན་ལས་ཀྱི་སྒྲུབ་པ་ལ་ལས་ཚོགས་ཟུར་དུ་མེད། སྒྲུབ་པའི་ཁོག་འབུགས་དང་དབང་ཆོག་སོགས་ཀུན་གྱི་ཁ་སྐོང་དུ་(༢ན)

བཤད་ནའང་། དེང་སང་དབང་ཡང་གཏུམ་པོ་ཐུགས་ཀྱི་སྒྲུབ་པའི་ལས་བྱང་གི་གཞུང་བསྲངས་ནས་མཛད་པ་ཡིན་ཅིང་། ཟུར་ཆེན་ཐམས་ཅད་མཁྱེན་པ་ཆོས་དབྱིངས་རང་གྲོལ་གྱི་གསུང་ལས། ཕྱི་ནང་གསང་གསུམ་གྱི་བསྙེན་སྒྲུབ་གང་བྱེད་ཀྱང་གཏུམ་པོ་ཐུགས་ཀྱི་སྒྲུབ་པའི་ལས་བྱང་གིས་ཁོག་ཕུག །ལྷ་རྣམས་སྒྲུབ་ཐབས་སོ་སོའི་གཞུང་བཞིན་བསྒོམ་དགོས་ཚུལ་ཐོས་པས། དཔེར་ན་ཕྱི་སྒྲུབ་ལྟ་བུ་ལ་ལས་བྱང་གི་ཁོག་གཏུམ་པོ་ཐུགས་སྒྲུབ་ཇི་ལྟ་བ་ལ། གཞལ་ཡས་ཁང་གི་ནང་དུ་ལྷ་ཕྱི་སྒྲུབ་རང་ནས་གང་བཤད་མ་གཏོགས་ཁྲོ་བོ་བཅུ་སོགས་བསྐྱེད་མི་དགོས། དེ་ཡང་མཚམས་ཀྱི་སྔོན་དུ་སྒྲུབ་ཁོག་ནས་བཤད་པའི་རྒྱལ་ཆེན་མཐོ་འཛུགས་ནས་བཟུང་དཀྱིལ་འཁོར་རྒྱན་འགོད་ཀྱི་བར་གཏེར་གཞུང་འདི་གའི་དགོངས་པ་སོར་གནས་ལ་ཅུང་ཟད་མི་བདེ་བའི་ལྷན་ཐབས་དགོས་པ་བྱུང་ན་བྱང་གཏེར་སོགས་ནས་ཁ་བསྐང་ཆོག །དཀྱིལ་འཁོར་འདི་བ་ཕྱི་སྒྲུབ་གཏེར་གཞུང་ན་དབུས་གྲུ་གསུམ་ཐུར་དུ་བརྐོ་བ་སོགས་བཤད་འདུག་ཀྱང་། རྡུལ་ཚོན་ནམ་རས་བྲིས་ལྟ་བུས་འཐུས། གཏོར་མ་ནི་དཔལ་གཏོར་སྙིང་གཟུགས་མ་པདྨ་འདབ་མ་བཞི་བ་ཅན། བཀའ་བརྒྱད་སོགས་(༢བ)

དང་བཟོ་དབྱིབས་ལམ་ཙམ་མཐུན་པར་རྒྱན་སྤྲོས་གང་ལེགས་བྱས་པ་དཀྱིལ་འཁོར་གྱི་སྟེང་དུ་མཉྫིའི་ཁར་བཞག །དེ་ལ་ཙཀླི་བཙུགས་གཏོར་གདུགས་མཐིང་ག་ཅན། སྨན་རཀ་མཆོད་པ་ཚོགས་ཆས་གཏེར་སྲུང་ལྡང་ལྷའི་གཏོར་མ་སོགས་ཉེ་བར་མཁོ་བའི་ཡོ་བྱད་རྣམས་ཚོགས་པར་བྱས། སྲོད་ཐུན་ལ་ལས་བྱང་གི་གཞུང་བསྲང་ཚོགས་ཀྱི་བར་གཏོང་བ་ཕུར་པ་སོགས་རྙིང་མ་སྤྱི་དང་འདྲ། དཀྱིལ་འཁོར་སྟེང་གི་སྒྲུབ་གཏོར་དེ་དང་པོར་མཆོད་རྫས་སུ་ཤེས་པར་བྱས་ནས་ལས་བྱང་གི་མཆོད་གཏོར་བྱས། ཚོགས་ལ་ཟིན་ནས་གཏོར་མ་སྐད་ཅིག་གི་ལྷར་བསྐྱེད། ཚོགས་སྤྱན་དྲངས་པ་དེ་ལ་བསྟིམ་ནས་ཚོགས་མཆོད་འབུལ་བ་རྙིང་མ་དཀྱུས་དང་འདྲ། བསྙེན་པའི་སྐབས་བདག་ལྷར་བསྐྱེད་པ་དང་གཏོར་མ་ལྷར་བསྐྱེད་པ་གཉིས་ཞལ་སྤྲོད་ཀྱི་ཚུལ་དུ་དམིགས་པའི་འཕྲོ་འདུ་སོགས་གཞུང་ན་གསལ་བ་བཞིན་བྱེད་བསྙེན་པ་མ་ཐེམས་བར་གྱི་ཐུན་གཞན་རྣམས་ལ་ལས་བྱང་མ་བཏང་བར་མངོན་རྟོགས་དང་མཆོད་པ་བསྡུས་པ་ཙམ་གྱིས་ཆོག །ཡང་ཐུན་རེ་ཙམ་ལ་ལས་བྱང་གཏོང་བར་ཤར་ན་ལས་བྱང་གི་དུས་གཏོར་མ་མཆོད་རྫས་སུ་བསྒྱུར། བསྙེན་པའི་དུས་ལྷར་བསྒྱུར་བ་སོགས་རྫོགས་ཆེན་པ་རིག་པའི་རང་རྩལ་དུ་སྐད་ཅིག་སྐད་ཅིག་ལ་འཕྲུལ་ཤེས་པ་འདི་མེད་ན་གསར་མ་བའི་རྟག་བརྟན་ཐེར་ཟུག་འདྲ་བ་དེ་ལ་ཐ་མལ་གྱི་ཞགས་ཤིག་ཡོད། བསྙེན་པའི་གྲངས་ནི་འབུམ་ཚོ་གསུམ་དང་ཉེར་གཅིག །དེ་ནས་ཚོགས་མཆོད་སོགས་བཏང་། ལྷ་དྲེགས་འདུལ་ངོ་བོ་གཅིག་པུ་དེ་ན་ཡིན་པས་མདུན་གྱི་དཀྱིལ་འཁོར་བསྡུ་བ་སོགས་མི་དགོས།གཏོར་མའི་ཙཀླི་ནང་སྒྲུབ་ཀྱི་མངོན་རྟོགས་དང་མཐུན་པར་བཙུགས། ནང་སྒྲུབ་ཀྱི་མངོན་རྟོགས་དང་སྦྱར་ཏེ་ལས་བྱང་གི་གཞུང་(༣ན)

བསྲང་། ཚོགས་མཆོད་འབུལ་བ་ཡན་ཕྱི་སྒྲུབ་དང་འདྲ། བསྙེན་པའི་དུས་གཏོར་མ་ལྷར་བསྐྱེད་པའི་བདག་མདུན་གྱི་གསལ་ཁ་འདི་ལ་མེད་པས་གཞུང་བཞིན་བྱེད། བསྙེན་ཚད་འབུམ་ཕྲག་གཅིག །དེ་ནས་ཡང་གོང་བཞིན་ཚོགས་མཆོད་སོགས་ཕུལ། ཙཀླི་བརྗེས། གསང་སྒྲུབ་ཀྱི་མངོན་རྟོགས་དང་སྦྱར་ཏེ་ལས་བྱང་གི་གཞུང་བསྲང་ཚོགས་མཆོད་ཀྱི་བར་བཏང་། འདི་ལ་ཡང་བདག་མདུན་སོ་སོར་མེད་པས་གཞུང་བཞིན་བསྙེན་པ་བྱེད། བསྙེན་ཚད་འབུམ་ཚོ་གསུམ་དང་ཉེར་གཅིག །དེ་ནས་གསང་སྒྲུབ་ཀྱི་མཇུག་ནས་བཤད་པའི་གནས་ལྔར་ཨོ་རྒྱན་ཡབ་ཡུམ་མཁའ་འགྲོ་བཞི་སོགས་ལྷ་ལྔ་གསལ་བཏབ། བསྙེན་སྔགས་གཤམ་དུ་ཧ་རི་ནི་ས་དང་ལས་བཞི་སོ་སོའི་སྔགས་གང་རུང་རེ་བཏགས་ནས། དཔེར་ན་མགྲིན་པའི་རྡོ་རྗེ་མཁའ་འགྲོ་དཀར་མོའི་ཐུགས་ཀ་ནས་འོད་ཟེར་སྤྲོ་བསྡུ་སོགས་ཀྱིས་མཚོན་ཏེ། རྒྱས་པ་སོགས་ལས་གཞན་རྣམས་ལའང་ལྷ་དང་སྔགས་ཀྱི་རིགས་འགྲེ ། ལས་བཞི་རེ་རེ་ལ་ཞག་རེ་རེ་ཙམ་གྱིས་ཆོག །དེ་ལས་མང་བ་ཕུན་སུམ་ཚོགས་པའི་ཡན་ལག་ཡིན། དེ་ཡང་ཕྱི་སྒྲུབ་ཀྱི་བསྙེན་པ་གཞུང་བཞིན་ཉམས་སུ་བླངས་པ་བསྙེན་པ། ནང་སྒྲུབ་ཀྱི་བསྙེན་པ་གཞུང་བཞིན་ཉམས་སུ་བླངས་པ་སྒྲུབ་པ། གསང་སྒྲུབ་ཀྱི་བསྙེན་པ་གཞུང་བཞིན་ཉམས་སུ་བླངས་པ་སྒྲུབ་པ་ཆེན་པོ། མཁའ་འགྲོ་རིགས་བཞི་ལ་བརྟེན་པ་ལས་སྦྱོར་གྱི་དང་པོ། དེ་ནས་ལས་བྱང་གི་གཞུང་བསྲང་དངོས་གྲུབ་བླང་བ་སོགས་རྙིང་མ་སྤྱི་ལྟར་བྱེད། མཇུག་ཏུ་གསང་སྒྲུབ་ལས་ཚོགས་ནས་བཤད་པའི་ལས་བཞིའི་སྦྱིན་སྲེག་བྱ། རྒྱལ་ཆེན་གྱི་མཐོ་འགྲོལ་བ་སོགས་སྤྱི་དང་མཐུན་པར་བྱས་ནས་སྐུ་མཚམས་འགྲོལ་ལོ། །(༣བ)

སྲིད་གསུམ་སྡེ་བརྒྱད་དྲེགས་པ་མ་ལུས་པ། །འདུལ་མཛད་གསང་བདག་རྡོ་རྗེ་གཏུམ་པོ་ཞེས། །མཚན་སྙན་དབྱར་གྱི་རྔ་སངས་ཐོས་པས་ཀྱང་། །བློ་གསལ་རྨ་བྱའི་སྙིང་ལ་དགའ་སྟོན་སྤེལ། །རྒྱལ་དབང་པདྨའི་ཟབ་གཏེར་རྒྱ་མཚོ་ལས། །ཤར་གཏེར་རིན་ཆེན་འབྲས་བུའི་བཅུད་སྨིན་པ། །མངའ་བདག་སྲས་མོ་རིན་ཆེན་ཚུལ་རྡོར་གྱིས། །ཟབ་ཆོས་རོ་བརྒྱ་མྱང་འདི་སྐལ་བཟང་དཔྱིད། །དེ་འདྲ་བྱང་བདག་རིགས་འཛིན་སྤྲུལ་པའི་གར། །སྔ་འགྱུར་བསྟན་པའི་སྲོག་ཤིང་དམ་པ་ཡི། །གསུང་གིས་ཉེ་བར་བསྐུལ་བའི་བྱེད་པོའི་མཐུས། །ཟ་ཧོར་བནྡེས་ཡི་གེའི་རིས་སུ་བྲིས། །ཟུར་ཆེན་རྡོ་རྗེ་འཆང་དེའི་བཀའ་དྲིན་གྱིས། །ཆོས་འདི་ཐོས་དང་གཏེར་གཞུང་དགོངས་དོན་ལྟར། །བཀོད་ལས་རྒྱུན་མེད་མགོ་སྐོར་བློས་བྱས་ཀྱི། ཁུངས་བྲལ་དཔེ་ཧྲུལ་རྣམས་དང་འདི་མི་འདྲ། །དགེ་འདིས་ཡིད་སྲུབས་སྡེ་དང་བཅས་པའི་དཔུང་། །རྣམ་པར་བཅོམས་པའི་རྒྱལ་རྔ་རབ་བརྡུངས་ནས། །རབ་དཀར་ཆོས་ཀྱི་བ་དན་འཆར་བ་ལ། །པདྨ་ཐོད་འཕྲེང་རྩལ་དང་བདག་མཚུངས་ཤོག །སརྦ་མངྒ་ལཾ།།