འཇམ་དཔལ་ཀུན་འབྱུང་ནོར་བུའི་ལས་ཚོགས་ལ་བརྟེན་པའི་བཀྲ་ཤིས་སྤེལ་བའི་ཆོ་ག་བཀྲ་ཤིས་བདུད་རྩིའི་གཏེར་བུམ།
༄༅། །ཡུཀྟདྭམཎིནིཏཱནསྱབཡོདྷཱརམཧཱནཱམ་ཡུཀྟསཱངྷཀཀྲྀཡཱཔྲགྲཧབིཤྭསྱབརྒྒབིཧརཏིསྨ།
༄༅། །འཇམ་དཔལ་ཀུན་འབྱུང་ནོར་བུའི་ལས་ཚོགས་ལ་བརྟེན་པའི་བཀྲ་ཤིས་སྤེལ་བའི་ཆོ་ག་བཀྲ་ཤིས་བདུད་རྩིའི་གཏེར་བུམ་ཞེས་བྱ་བ་བཞུགས་སོ། །
ༀ་མངྒལ་སྭསྟི་བི་ཛ་ཡནྟུ། བཀྲ་ཤིས་ཀུན་གྱི་བཀྲ་ཤིས་པ། །གྲགས་པའི་བཀྲ་ཤིས་སྙན་གྲགས་དགེ། །བླ་མ་རྒྱལ་བ་སྲས་བཅས་ལ། །བཏུད་ནས་བཀྲ་ཤིས་ཆོ་ག་སྤེལ། །འདིར་འཇམ་དཔལ་ཀུན་འབྱུང་ནོར་བུའི་ལས་ཚོགས་ལ་བརྟེན་ནས་བཀྲ་ཤིས་སྤེལ་བའི་ཆོ་ག་ཀུན་མཁྱེན་བླ་མ་འཇམ་དཔལ་དགྱེས་པའི་མན་ངག་གི་སྣང་བ་ལ་བརྟེན་ནས་འགོད་པ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། དུས་རྒྱུན་དུའམ་བྱེ་བྲག་ལས་གང་ཞིག་རྩོམ་པའི་ཐོག་མར་གཟའ་སྐར་འཕྲོད་སྦྱོར་སོགས་ཤིན་ཏུ་དགེ་བའི་སྔ་ཆར་ཁྲུས་དང་གཙང་སྦྲ་ལ་གནས་པའི་ཀུན་སྤྱོད་ཀྱིས། གནས་ཁང་ཕྱག་དར་དང་རྒྱན་གྱིས་བརྒྱན། གོང་དུ་གཞུང་མཐུན་བྲིས་སྐུ་སོགས་དཀོན་མཆོག་གསུམ་གྱི་རྟེན་བཤམས་པའི་སྤྱན་སྔར་ཅི་འབྱོར་པའི་མཆོད་པ་རྒྱས་པར་བཤམས། གསོལ་བ་འདེབས་པ་པོ་ཚུལ་ཁྲིམས་རྣམ་པར་དག་པའི་དགེ་སློང་བཞི་སྡེ་སོགས་ཡོད་ན་རབ། མིན་ཀྱང་རང་གཅིག་པུས་ཀྱང་རུང་སྟེ། གང་ལྟར་ཡང་། དད་པ་དང་ངེས་འབྱུང་དང་བྱང་ཆུབ་སེམས་ཀྱིས་ཀུན་ནས་བསླངས་ཏེ་སྟན་བདེ་བ་ལ་འཁོད་ནས། ཐོག་མར་སྐྱབས་སུ་འགྲོ་བ་ནི། སྐྱབས་ཡུལ་གསལ་གདབ་ལ། ན་མོ། སྐྱབས་ཀྱི་དམ་པ་སྐྱབས་སུ་འོས། །འཇིག་རྟེན་དགྲ་སྟེ་རབ་ཀྱི་མཆོག །འཇིགས་པ་མ་ལུས་སེལ་བ་པོ། །སྐྱབས་གནས་རྣམས་ལ་སྐྱབས་སུ་མཆི། །ལན་གསུམ། སེམས་བསྐྱེད་པ་ནི། མི་ཤེས་འདམ་དུ་བྱིང་བ་ཡི། །སེམས་ཅན་ཀུན་ལ་སྨན་པ་དང་། །བླ་མེད་འབྲས་བུ་ཐོབ་བྱའི་ཕྱིར། །རྫོགས་པའི་བྱང་ཆུབ་སེམས་བསྐྱེད་དོ། །ལན་གསུམ། སེམས་ཅན་བདེ་དང་ལྡན་གྱུར་ཅིག །སོགས་ཀྱིས་ཚད་མེད་བཞི་བསྒོམས་རྗེས་སྐྱབས་ཡུལ་རང་ལ་བསྡུ། དེ་ནས་གནས་ཡོ་བྱིན་གྱིས་བརླབ་པ་ནི། མཆོག་གསུམ་ཚོགས་གཉིས་ཆོས་དབྱིངས་བདེན་སྟོབས་ཀྱིས། །སྣོད་བཅུད་དག་པའི་ཞིང་གི་འབྱོར་པའི་དབུས། །རིན་ཆེན་ཁང་བཟང་བཀོད་མཛེས་གདན་ཁྲི་དང་། །ཕུལ་བྱུང་མཆོད་པའི་སྤྲིན་གྱིས་མཛེས་གྱུར་ཅིག །ཅེས་བདེན་སྟོབས་བརྗོད་ཅིང་། ན་མོ་རཏྣ་ཏྲཡཱ་ཡ། ༀ་ན་མོ་བྷ་ག་ཝ་ཏེ་བཛྲ་སཱ་ར་པྲ་མརྡྷནེ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ༀ་བཛྲེ་བཛྲེ་མ་ཧཱ་བཛྲེ། མ་ཧཱ་ཏེ་ཛོ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་ངྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎ་བཛྲེ་སརྦ་ཀརྨ་ཨཱ་བ་ར་ཎ་བི་ཤྭ་ངྷ་ན་བཛྲེ་སྭཱ་ཧཱ། ཞེས་མཆོད་པའི་སྤྲིན་གཟུངས་དང་། སྤྲོ་ན་རྟེན་སྙིང་སོགས་ཀྱང་བཟླའོ། །གཉིས་པ་དངོས་གཞི་ལས། ཐོག་མར་ཚོགས་ཞིང་སྤྱན་འདྲེན་པ་ལ། སྤོས་བཏུལ་ཞིང་ཐལ་མོ་སྦྱར་བས་བཏུད་དེ། གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་དེ་བཞུགས་ཏེ། །རྟག་པར་བྱིན་གྱིས་རློབ་བྱེད་ཅིང་། །ཉེས་པ་ཀུན་ལས་རྣམ་པར་གྲོལ། །ཁྱབ་བདག་དམ་ཤེས་དམ་ཚིག་ལྡན། །དུས་ཤེས་སེམས་ཅན་དབང་པོ་ཤེས། །རྣམ་གྲོལ་གསུམ་ལ་མཁས་པ་པོ། །ཡོན་ཏན་ལྡན་ཞིང་ཡོན་ཏན་ཤེས། །ཆོས་ཤེས་བཀྲ་ཤིས་བཀྲ་ཤིས་འབྱུང་། །བཀྲ་ཤིས་ཀུན་གྱི་བཀྲ་ཤིས་དཔལ། །གྲགས་པའི་བཀྲ་ཤིས་སྙན་གྲགས་དགེ། །དབུགས་འབྱིན་ཆེན་པོ་དགའ་དོན་དཔལ། །དགའ་ཆེན་རོལ་མོ་ཆེན་པོ་པ། །བླ་མ་རྒྱལ་བ་སྲས་བཅས་རྣམས། །བདག་ལ་དགོངས་པར་མཛད་དུ་གསོལ། །ཞེས་དགོངས་གསོལ་དང་། སྤྲོ་ན་ཚིག་བདུན་གསོལ་འདེབས་ལན་བདུན་སྔོན་དུ་འགྲོ་བས། མཚན་ཙམ་ཐོས་པས་བཀྲ་ཤིས་དཔལ་འཕེལ་བའི། །རྒྱལ་དང་དེ་སྲས་སེམས་དཔའ་སེམས་མའི་ཚོགས། །འཇིག་རྟེན་སྐྱོང་བ་སྡེ་དང་བཅས་པ་རྣམས། །ཐུགས་རྗེ་ཐུགས་དམ་དབང་གིས་འདིར་གཤེགས་ཤིག །གཙང་སྦྱར་མཆོད་ཡོན་དག་བྱེད་ཁྲུས་ཀྱི་ཆབ། །རྣམ་བཀྲའི་རྒྱན་ཆས་ཡིད་འོང་གདན་ཁྲིར་བཅས། །གུས་པས་འབུལ་ལོ་ཅི་བདེར་བཞེས་ནས་ཀྱང་། །བརྟན་པར་བཞུགས་ལ་བཀྲ་ཤིས་འཕེལ་བར་མཛོད། །ཅེས་བརྗོད་པས། ཕྱོགས་བཅུའི་ཞིང་རབ་འབྱམས་ནས་བླ་མ་རྒྱལ་བ་སྲས་དང་བཅས་པ་ཐམས་ཅད་དང་རྔ་ཡབ་གླིང་ནས་ཨོ་རྒྱན་རིན་པོ་ཆེ་འཁོར་དཔའ་བོ་མཁའ་འགྲོའི་ཚོགས་དང་བཅས་པ་སྤྱན་དྲངས་ནས་མདུན་གྱི་ནམ་མཁར་ཁྱབ་བདག་འཇམ་པའི་རྡོ་རྗེའི་རྣམ་པར་བཞུགས་པར་མོས་ལ། ༀཿསྣང་སྲིད་རྣམ་དག་ཆོས་དབྱིངས་གཞལ་ཡས་སུ། །རང་བྱུང་ཡེ་ཤེས་འཇམ་དཔལ་གཞོན་ནུའི་སྐུ། །ཡིད་འོང་ཉི་མ་འཆར་ཀའི་ལང་ཚོ་ཅན། །དང་པོའི་ཕྱག་གཉིས་རལ་གྲི་ཨུཏྤ་ལ། །ཐ་མའི་ཕྱག་གཉིས་ནོར་བུ་བུམ་བཟང་བསྣམས། །དར་དང་རིན་ཆེན་རྒྱན་རྫོགས་སྐྱིལ་ཀྲུང་གིས། །རབ་མཛེས་པདྨ་ཟླ་བའི་གདན་སྟེང་ན། །དཔག་བསམ་ཤིང་ལ་སྐུ་རྒྱབ་བརྟེན་ནས་བཞུགས། །བཀྲ་ཤིས་ལྷ་མོ་བརྒྱད་ལ་སོགས་པ་ཡིས། །རབ་འབྱམས་མཆོད་པའི་སྤྲིན་གྱིས་མཁའ་དབྱིངས་འགེངས། །དྲན་པ་ཙམ་གྱིས་ཕུན་ཚོགས་དཔལ་ཡོན་ཀུན། །ཡིད་བཞིན་ལེགས་པར་སྩོལ་བའི་བདག་ཉིད་ལ། །མ་ལུས་ཕྱོགས་དུས་ཞིང་གི་རྒྱལ་བ་དང་། །རྒྱལ་བ་སྲས་བཅས་ཏིལ་གང་ལྟར་བཞུགས་པས། །མེ་ཏོག་ཆར་འབེབས་ཤིས་པའི་གླུ་དབྱངས་སྒྲོགས། །ཡེ་ཤེས་འོད་ཟེར་སྣང་བས་མཁའ་ཁྱབ་གསལ། །ཞེས་མོས། སྐབས་འདིར་ཞི་སོགས་ལས་བྱེ་བྲག་པ་གཙོ་བོར་བྱེད་ན་དེ་བཞིན་མངོན་རྟོགས་ཁ་བསྒྱུར། གང་ལྟར་ཡང་། དེ་ནས་ཕྱག་མཆོད་སོགས་ཚོགས་གསོག་ཡན་ལག་བདུན་པ་དངོས་འབུལ་བ་ནི། ༀ༔ སྣང་སྲིད་རྣམ་དག་རང་བཞིན་ལྷུན་གྲུབ་པའི། །བཀྲ་ཤིས་ཕྱོགས་བཅུའི་ཞིང་ན་བཞུགས་པ་ཡི། །སངས་རྒྱས་ཆོས་དང་དགེ་འདུན་འཕགས་པའི་ཚོགས། །ཀུན་ལ་ཕྱག་འཚལ་མཆོད་འབུལ་སྐྱབས་སུ་མཆི། །བཀུར་སྟི་རིམ་གྲོ་ཕུན་ཚོགས་བྱ་བའི་འོས། །མཆོག་ཏུ་དགའ་བ་གྲགས་པའི་བདག་ཉིད་ཆེ། །མཆོག་ལྡན་མཆོག་སྦྱིན་ཀུན་གྱི་གཙོ་བོ་མཆོག །པདྨ་འཇམ་པའི་རྡོ་རྗེར་ཕྱག་འཚལ་ལོ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །ཐབས་མཁསཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་བཅོམ་པ། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །ཤཱཀྱའི་རྒྱལ་པོ་ཁྱེད་ལ་ཕྱག་འཚལ་ལོ། །ཕྱོགས་བཅུའི་འགལ་རྐྱེན་ཐམས་ཅད་ཞི་བ་དང་། །ཕྱོགས་བཅུའི་མཐུན་རྐྱེན་ཐམས་ཅད་སྒྲུབ་པའི་ཕྱིར། །ཕྱོགས་བཅུའི་རྣམ་པར་དག་པའི་ཞིང་བཞུགས་པའི། །ཕྱོགས་བཅུའི་སངས་རྒྱས་རྣམས་ལ་ཕྱག་འཚལ་ལོ། །སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ། །འཁོར་བ་འཇིག་དང་གསེར་ཐུབ་འོད་སྲུང་དང་། །ཤཱཀྱ་ཐུབ་པ་གཽ་ཏཾ་ལྷ་ཡི་ལྷ། །སངས་རྒྱས་དཔའ་བོ་བདུན་ལ་ཕྱག་འཚལ་ལོ། །མཚན་ལེགས་རིན་ཆེན་གསེར་བཟང་མྱ་ངན་མེད། །ཆོས་བསྒྲགས་མངོན་མཁྱེེན་སྨན་བླ་ཤཱཀྱ་ཐུབ། །རྒྱ་ཆེན་སྨོན་ལམ་ཡོངས་སུ་རྫོགས་མཛད་པའི། །བདེ་བར་གཤེགས་པ་བརྒྱད་ལ་ཕྱག་འཚལ་ལོ། །མར་མེ་མཛད་སོགས་རྒྱལ་བ་འདས་པ་དང་། །བྱང་ཆུབ་ཆེན་པོ་ད་ལྟར་བཞུགས་པ་དང་། །བྱམས་པ་ལ་སོགས་སླད་ནས་འབྱོན་པ་ཡི། །དུས་གསུམ་སངས་རྒྱས་རྣམས་ལ་ཕྱག་འཚལ་ལོ། །མཐུན་པའི་དགེ་ཚོགས་སྨོན་ལམ་རྨད་བྱུང་ཞིང་། །སྤྱད་པ་སྤྱོད་ཚེ་ན་ཡང་མཆེད་གྱུར་ལ། །སྐལ་བཟང་གཅིག་ལ་མཛད་པ་མཐར་ཕྱིན་པའི། །རྫོགས་པའི་སངས་རྒྱས་སྟོང་ལ་ཕྱག་འཚལ་ལོ། །སྒྲོན་མེའི་རྒྱལ་པོ་རྩལ་བརྟན་དོན་གྲུབ་དགོངས། །བྱམས་པའི་རྒྱན་དཔལ་དགེ་གྲགས་དཔལ་དམ་པ། །ཀུན་ལ་དགོངས་པ་རྒྱ་ཆེར་གྲགས་པ་ཅན། །ལྷུན་པོ་ལྟར་འཕགས་རྩལ་གྲགས་དཔལ་དང་ནི། །སེམས་ཅན་ཐམས་ཅད་ལ་དགོངས་གྲགས་པའི་དཔལ། །ཡིད་ཚིམ་མཛད་པ་རྩལ་རབ་གྲགས་དཔལ་ཏེ། །མཚན་ཙམ་ཐོས་པས་བཀྲ་ཤིས་དཔལ་འཕེལ་བ། །བདེ་བར་གཤེགས་པ་བརྒྱད་ལ་ཕྱག་འཚལ་ལོ། །འཇམ་དཔལ་གཞོན་ནུ་དཔལ་ལྡན་རྡོ་རྗེ་འཛིན། །སྤྱན་རས་གཟིགས་དབང་མགོན་པོ་བྱམས་པའི་དཔལ། །ས་ཡི་སྙིང་པོ་སྒྲིབ་པ་རྣམ་པར་སེལ། །ནམ་མཁའི་སྙིང་པོ་འཕགས་མཆོག་ཀུན་ཏུ་བཟང་། །ཨུཏྤལ་རྡོ་རྗེ་པད་དཀར་ཀླུ་ཤིང་དང་། །ནོརབུ་ཟླ་བ་རལ་གྲི་ཉི་མ་ཡི། །ཕྱག་མཚན་ལེགས་བསྣམས་བཀྲ་ཤིས་དཔལ་གྱི་མཆོག །བྱང་ཆུབ་སེམས་དཔའ་བརྒྱད་ལ་ཕྱག་འཚལ་ལོ། །རིན་ཆེན་གདུགས་མཆོག་བཀྲ་ཤིས་གསེར་གྱི་ཉ། །འདོད་འབྱུང་བུམ་བཟང་ཡིད་འོང་ཀ་མ་ལ། །སྙན་གྲགས་དུང་དང་ཕུན་ཚོགས་དཔལ་བེའུ། །མི་ནུབ་རྒྱལ་མཚན་དབང་བསྒྱུར་འཁོར་ལོ་སྟེ། །རིན་ཆེན་རྟགས་མཆོག་བརྒྱད་ཀྱི་ཕྱག་མཚན་ཅན། །ཕྱོགས་དུས་རྒྱལ་བ་མཆོད་ཅིང་དགྱེས་བསྐྱེད་མ། །སྒེག་སོགས་ངོ་བོ་དྲན་པས་དཔལ་སྤེལ་བའི། །བཀྲ་ཤིས་ལྷ་མོ་བརྒྱད་ལ་ཕྱག་འཚལ་ལོ། །ཀུན་འབྱུང་མུན་པའི་ས་བོན་མཐར་མཛད་ཅིང་། །སྡུག་བསྔལ་ཟུག་རྔུའི་རྩ་བ་དྲུང་ནས་འབྱིན། །རྒྱལ་ཡུམ་ཤེས་རབ་ཕ་རོལ་ཕྱིན་ལ་སོགས། །ཐེག་གསུམ་དམ་པའི་ཆོས་ལ་ཕྱག་འཚལ་ལོ། །ཐུབ་པ་མཆོག་གིས་ཐེག་མཆོག་སེང་གེའི་དབྱངས། །སྒྲོགས་ཚེ་ལྷར་བཅས་གདུལ་བྱའི་འཁོར་དབུས་སུ། །བསྟན་མཆོག་འཛིན་དང་སྐྱོང་བར་ཞལ་བཞེས་པའི། །རྒྱལ་སྲས་སེམས་དཔའ་རྣམས་ལ་ཕྱག་འཚལ་ལོ། །ཐུབ་པས་བཀའ་བསྒོས་བསྟན་པའི་རྒྱལ་མཚན་འཛིན། །ཡན་ལག་འབྱུང་དང་མ་ཕམ་ནགས་ན་གནས། །དུས་ལྡན་རྡོ་རྗེ་མོ་བུ་བཟང་པོ་དང་། །གསེར་བེའུ་བྷ་ར་དྷཱ་ཛ་གསེར་ཅན་མཆོག །འཕགས་པ་བ་ཀུ་ལ་དང་སྒྲ་གཅན་འཛིན། །ལམ་བསྟན་བྷ་ར་དྷཱ་ཛ་བསོད་སྙོམས་ལེན། །ལམ་བསྟན་ཀླུ་སྡེ་སྦེད་བྱེད་མི་ཕྱེད་པ། །བསྟན་པ་སྲུང་ཞིང་བཀྲ་ཤིས་སྤེལ་མཛད་པའི། །དགྲ་བཅོམ་གནས་བརྟན་རྣམས་ལ་ཕྱག་འཚལ་ལོ། །ཚངས་པ་ཆེན་པོ་བདེ་འབྱུང་སྲེད་མེད་བུ། །མིག་སྟོང་ལྡན་དང་རྒྱལ་པོ་ཡུལ་འཁོར་སྲུང་། །འཕགས་སྐྱེས་པོ་དང་ཀླུ་དབང་མིག་མི་བཟང་། །རྣམ་ཐོས་སྲས་ཏེ་ལྷ་རྫས་འཁོར་ལོ་དང་། །ཏྲི་ཤུ་ལ་དང་མདུང་ཐུང་རྡོ་རྗེ་ཅན། །པི་ཝཾ་རལ་གྲི་མཆོད་རྟེན་རྒྱལ་མཚན་འཛིན། །ས་གསུམ་གནསསུ་དགེ་ལེགས་བཀྲ་ཤིས་སྤེལ། །འཇིག་རྟེན་སྐྱོང་བ་བརྒྱད་ལ་ཕྱག་འཚལ་ལོ། །གཞན་ཡང་བཅོམ་ལྡན་འདས་ཀྱི་སྤྱན་སྔ་རུ། །དཀར་ཕྱོགས་སྐྱོང་ཞིང་བཀྲ་ཤིས་སྤེལ་བྱེད་པར། །ཞལ་བཞེས་གཟའ་ཀླུ་རྒྱུ་སྐར་ཚེས་ལྷ་སོགས། །ཕྱོགས་བཅུར་བཞུགས་པ་ཀུན་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡི་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །ཞེས་དང་། སྐབས་འདིར་སྤྲོ་ན་འཇམ་མགོན་བླ་མ་རིན་པོ་ཆེའི་གསུང་མཆོད་ཕྲེང་རྒྱས་བསྡུས་གང་རིགས་སྦྱར། དཀྱུས་ཙམ་དུ། དངོས་སུ་བཤམས་དང་ཡིད་ཀྱིས་རྣམ་སྤྲུལ་པའི། །དྲི་མེད་ཡིད་འོང་ལྷ་རྫས་བཀོད་པའི་ཆར། །མེ་ཏོག་བདུགསྤོས་སྣང་གསལ་དྲི་ཡི་མཆོག །ཞལ་ཟས་རོལ་མོ་རྣམ་ལྔའི་འདོད་ཡོན་རྫས། །བཀྲ་ཤིས་རྫས་རྟགས་རྒྱལ་སྲིད་རིན་ཆེན་བདུན། །ཉེ་བའི་རིན་ཆེན་བདུན་དང་གླུ་གར་མ། །མཛེསསྡུག་བཀོད་པའི་རོལ་མོ་མཐའ་ཡས་པ། །འབུལ་ལོ་བཞེས་ནས་བཀྲ་ཤིས་འཕེལ་བར་མཛོད། །ས་གཞི་སྤོས་ཆུ་ནས་སྤྱོད་པར་ཤོགཁྱད་པར་བདག་ལུས་ལོངས་སྤྱོད་དགེ་རྩར་ཅས། །རང་རང་ཡིད་ལ་གང་བསམ་འདོད་རྒུའི་སྤྲིན། །སྲིད་ཞིའི་འབྱོར་ཚོགས་མ་ཚང་མེད་པའི་ཆར། །མི་ཕྱེད་རོ་མཉམ་རྡོ་རྗེའི་དམ་ཚིག་རྫས། །ཀུན་བཟང་སྨོན་ལམ་སྟོབས་བཞིན་སྤྲུལ་ཏེ་འབུལ། །ཁྱབ་བདག་བདག་ལ་སྨན་པ་དང་། །བདག་དོན་བདག་ལ་ཐུགས་བརྩེའི་ཕྱིར། །ཇི་སྙེད་མཆོད་པ་འདི་བཞེས་ལ། །དོན་རྣམས་ཕུན་སུམ་ཚོགས་པར་མཛོད། །ༀ་བཛྲ་ངྷརྨ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ་པྲ་ཙ་ལེ། ཛྙཱ་ན་པ་ར་མི་ཏ་ནཱ་ད་སྭ་བྷ་ཝ། བཛྲ་ངྷརྨ་ཧྲྀ་ད་ཡ་སནྟོ་ཥ་ནི་ཧཱུྃ་ཧཱུྃ་ཧཱུྃ། ཧོ་ཧོ་ཧོ་ཨ་ཁཾ་སྭཱ་ཧཱ། ཞེས་པ་ཙམ་མམ་རང་གི་ཡིད་ལ་གང་འདོད་ཀྱི་དངོས་པོས་མཆོད་ནས། བདག་གཞན་ཐོག་མེད་དུས་ནས་ད་ལྟའི་བར། །མི་ཤེས་ཉོན་མོངསསྒྲིབ་པའི་ཚོགས་ཀུན་བཤགས། །བསོད་ནམས་ཀུན་ལ་དགའ་བས་ཡི་རངས་ཤིང་། །ཆོས་འཁོར་སྐོར་བཞིན་རྟག་པར་བཞུགས་གསོལ་འདེབས། །འདིས་མཚོན་དུས་གསུམ་བསགས་པའི་དགེ་ཚོགས་རྣམས། །བྱང་ཆུབ་ཆེན་པོར་ཡོངས་སུ་བསྔོ་བགྱིད་ཅིང་། །རྒྱལ་བ་སྲས་བཅས་དགྱེས་པའི་བརྟུལ་ཞུགས་མཆོག །སྲོག་གི་ཕྱིར་ཡང་མི་གཏོང་བཟུང་བར་བགྱི། །མགོན་པོ་ཡེ་ཤེས་སྒྲིབ་པ་མི་མངའ་བས། །བདག་གི་ལྷག་པའི་བསམ་པ་ཁྱེད་ཀྱིས་མཁྱེན། །ཐུགས་དམ་མ་བསྙེལ་དགོངས་པའི་རྩལ་བསྐྱེད་ལ། །ཇི་ལྟར་གསོལ་འདེབས་འབྲས་བུ་མཆིས་པར་མཛོད། །བདག་ཅག་དེང་འདིར་བྱ་བ་རྩོམ་པ་ལ། །བགེགས་དང་ཉེ་བར་འཚེ་བ་ཀུན་ཞི་ཞིང་། །འདོད་དོན་དཔལ་འཕེལ་བསམ་དོན་ཡིད་བཞིན་འགྲུབ། །བཀྲ་ཤིས་བདེ་ལེགས་ཕུན་སུམ་ཚོགས་པར་མཛོད། །ཅེས་ལན་གསུམ་གྱིས་ཡན་ལག་བདུན་པ་འབུལ། སྐབས་འདིར་སྤྲོ་ཞིང་ནུས་ན་བཀྲ་ཤིས་པའི་གསོ་སྦྱོང་ལེན། དཀྱུས་སུ་འགལ་རྐྱེན་སྦྱོང་ཕྱིར་སྡོམ་པ་གསུམ་གྱི་ཉེས་ལྟུང་བཤགས་པ་ནི། གྲུབ་ཐོབ་ཐུག་ཐིག་གི་ཆོས་སྡེ་ལས་བྱུང་བ་འདི་ལྟར། ལུས་ཀྱི་ཉམས་ཆག་{ཆགས་འདིའི་རིགས་འདི་ལྟར་ཞུས།} བསྐང་བའི་ཕྱིར༔ གདུང་བའི་ཤུགས་བསྐྱེད་བརྐྱང་ཕྱག་འཚལ༔ ཧོཿདགོངས་ཀློང་དབྱེར་མེད་བརྡའ་ཡིས་མཚོན༔ སྙན་བརྒྱུད་བདུད་རྩིས་སྐལ་ལྡན་སྐྱོང༔ བྱིན་རླབས་ཐུགས་རྗེའི་བདག་ཉིད་ཆེ༔ རྩ་བརྒྱུད་བླ་མ་ལ་ཕྱག་འཚལ༔ ཆོས་སྐུའི་ངང་ལས་ལོངས་སྤྱོད་རྫོགས༔ སྤྲུལ་པའི་སྒྱུ་འཕྲུལ་ཅིར་ཡང་སྟོན༔ དངོས་གྲུབ་རྣམ་གཉིས་ཆར་བཞིན་འབེབས༔ ཡིད་དམ་ཞི་ཁྲོ་ལ་ཕྱག་འཚལ༔ ལྷན་སྐྱེས་ངང་ལས་མ་གཡོས་བཞིན༔ ཞིང་སྔགས་ཌཱ་ཀིའི་སྤྲིན་ཕུང་འཕྲོ༔ མཆོགཐུན་ཕྲིན་ལས་གློག་ལྟར་འཁྱུགས༔ གནས་གསུམ་མཁའ་འགྲོ་ལ་ཕྱག་འཚལ༔ རིག་འཛིན་བླ་མའི་བཀའ་བཞིན་དུ༔ རྣལ་འབྱོར་སྒྲུབ་མཆོག་བུ་བཞིན་སྐྱོང༔ ལེགས་ཉེས་སྟངས་འཛིན་བར་ཆད་སེལ༔ ཆོས་སྲུང་གཏེར་བདག་ལ་ཕྱག་འཚལ༔ ཕྱག་བྱར་འོས་པ་ཐམས་ཅད་ལ༔ སྒོ་གསུམ་གུས་པས་དད་ཕྱག་འཚལ༔ ཉམས་ཆག་སྡིག་སྒྲིབ་ཞི་བ་དང༔ ཡེ་ཤེས་རྒྱས་པར་བྱིན་གྱིས་རློབས༔ ༀ་གུ་རུ་སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་པྲ་ཎ་མེ་ཎ་བནྡ་ནཾ་ཀ་རོ་མི༔ ངག་གི་ཉམས་ཆག་བསྐང་བའི་ཕྱིརཿརྡོ་རྗེ་སེམས་དཔའི་བསྒོམ་བཟླས་བྱཿཨཱཿབདག་གི་སྤྱི་བོར་པད་ཟླའི་སྟེང༔ བླ་མ་རྡོར་སེམས་ཧེ་རུ་ཀ༔ ཡབ་ཡུམ་ཐུགས་ཀའི་སྔགས་ཕྲེང་དང༔ སྐུ་ལས་བྱང་སེམས་བདུད་རྩིའི་རྒྱུན༔ སྦྱོར་མཚམས་ནས་བྱུང་ཚང་བུག་ཞུགས༔ ལུས་གང་སྡིག་སྒྲིབ་ཉེས་ལྟུང་རྒྱུ༔ འབྲས་བུ་ནད་གདོན་སྡུག་བསྔལ་ཀུན༔ དག་ཅིང་དྲི་མ་མེད་པར་བསམ༔ སྟོབས་བཞིའི་གནད་དང་ལྡན་པ་ཡིས༔ ཡི་གེ་བརྒྱ་པ་ཛབ་ཏུ་བཟླ༔ མཐར་ནི་གདུང་བས་སྨྲེ་བཤགས་བྱ༔ ༀ༔ བླ་མ་དཔལ་ལྡན་རྡོ་རྗེ་སེམས༔ བདག་ལ་རེ་ས་ཁྱེད་ལས་མེད༔ ཐུགས་རྗེའི་སྤྱན་གྱིས་གཟིགས་མཛོད་ལ༔ ཉམས་ཆག་སྡིག་ལྟུང་སྦྱོང་མཛད་གསོལ༔ བདག་ཅག་ཉོན་མོངས་གཞན་དབང་དང༔ མི་ཤེས་བག་མེད་མ་གུས་པས༔ རང་བཞིན་ཁ་ན་མ་ཐོ་དང༔ བཅས་པའི་བསླབ་ལས་འགལ་བ་གང༔ དག་ཅིང་ཚངས་པར་སྩལ་དུ་གསོལ༔ སོ་སོར་ཐར་པ་རིགས་བརྒྱད་དང་། །བྱང་ཆུབ་སེམས་དཔའི་བསླབ་ཁྲིམས་ལས། །འགལ་བའི་ནོངས་པ་ཅི་མཆིས་པ། །སྙིང་ནས་འགྱོད་པས་བཤགས་ཤིང་སྡོམ། །འདིའི་ཚིགས་བཅད་གཅིག་འདི་གསར་དུ་བསྣན་པའོ། །མཆན། ཁྱད་པར་རྡོ་རྗེ་ཐེག་པ་ཡི༔ རྩ་བ་སྐུ་གསུང་ཐུགས་མཆོག་དང༔ ཡན་ལག་དམ་ཚིག་ཉི་ཤུ་ལྔ༔ མེད་ཕྱལ་ལྷུན་གྲུབ་གཅིག་པུ་སོགས༔ རང་བཞིན་ལྟ་བའི་དམ་ཚིག་ལས༔ ཉམས་འགལ་རལ་བར་གྱུར་པ་ཀུན༔ སྙིང་ནས་འགྱོད་པས་མཐོལ་བཤགས་ན༔ སྒྲིབ་མེད་ཚངས་པའི་དངོས་གྲུབ་སྩོལ༔ ཉིད་དང་དབྱེར་མེད་བྱིན་རློབས་ཤིག༔ སྙིང་ནས་གདུང་བས་གསོལ་བཏབ་པས༔ བླ་མ་རྡོ་རྗེ་སེམས་དཔའ་ཡིས༔ སྡིག་ལྟུང་དག་པའི་གནང་བ་སྩལ༔ དགྱེས་པས་འོད་ཞུ་རང་ལ་ཐིམ༔ ཡིད་གྱི་ཉམས་ཆག་བསྐང་བའི་ཕྱིར༔ རང་ཡང་ཀུན་གཞི་མ་བཅོས་པའི༔ ངང་ལ་ཡིད་ནི་འཛིན་པ་བྲལ༔ རྣམ་དག་སྤྲོས་བྲལ་ཆོས་ཀྱི་སྐུ༔ ཆོས་ཀྱི་སྐུ་ལ་གཉིས་སུ་མེད༔ ཡེ་བསྲུང་ཐིག་ལེ་ཉག་གཅིག་ངང༔ སྤང་བླང་ལས་འདས་ཕྱལ་བ་ཆེ༔ རང་ཤར་རང་གྲོལ་ལྷུན་གྱིས་གྲུབ༔ ཉམས་ཆག་རྟོག་སྒྲིབ་དབྱིངས་སུ་གྲོལ༔ མ་བཅོས་རྫོགས་པ་ཆེན་པོའོ༔ ཨ་ཨ་ཨཱ༔ ཞེས་བརྗོད་གཉུག་མ་ཁྱབ་གདལ་ངང༔ སྤྲོ་བསྡུ་བྲལ་བར་མཉམ་པར་བཞག༔ དེ་ནི་བཤགས་པའི་ལས་རིམ་མོ༔ ཞེས་སོ། །མཐུན་རྐྱེན་སྒྲུབ་པའི་རྒྱུའི་གཙོ་བོ་བྱང་ཆུབ་སེམས་སྡོམ་ལེན་པ་ནི། དགོངས་གསོལ་བརྗོད་པ་སྔོན་དུ་འགྲོ་བས། བྱང་ཆུབ་སྙིང་པོར་མཆིས་ཀྱི་བར། །སོགས་ལན་གསུམ་གྱིས་སེམས་བསྐྱེད་ཀྱི་རྟེན་དུ་སྐྱབས་འགྲོ་དང་། ཇི་ལྟར་སྔོན་གྱི་བདེ་གཤེགས་ཀྱིས། །སོགས་ལན་གསུམ་གྱིས་དངོས་གཞི་སྨོན་འཇུག་སྟབས་གཅིག་ཏུ་ལེན། དེང་དུས་བདག་ཚེ་འབྲས་བུ་ཡོད། །སོགས་ཀྱིས་མཇུག་རང་གཞན་དགའ་བ་བསྒོམ་ཞིང་སྨོན་ལམ་གདབ་པ་སོགསསྤྱི་ལྟར་རོ། །དངོས་གཞི་གསོལ་བ་གདབ་པ་ནི། སྤྲོ་ན་རྫོགས་ཆེན་སྟོན་པ་བཅུ་གཉིས་ཀྱི་གསོལ་འདེབས་སོགས་དང་། བསམ་ལྷུན་ཀྱང་འདོན། གང་ལྟར་ཡང་དད་མོས་རྩེ་གཅིག་པས། ཕྱོགས་དུས་རྒྱལ་བ་ཀུན་གྱི་ཡེ་ཤེས་སྐུ། །དཔལ་ལྡན་རྫོགས་པའི་སངས་རྒྱས་པདྨ་སྐྱེས། །འཇམ་དཔལ་ཡིད་བཞིན་ནོར་བུར་གསོལ་བ་འདེབས། །བཀྲ་ཤིས་དོན་ཀུན་འགྲུབ་པར་བྱིན་གྱིས་རློབས། །ཞེས་ཅི་ནུས་སུ་གསོལ་བ་གདབ། ཨེ་མ་ཧོ། རང་བྱུང་ཐུགས་རྗེའི་བདག་ཉིད་བཅོམ་ལྡན་འདས། །མཁྱེན་བརྩེ་ནུས་པ་མཚུངས་མེད་རྡོ་རྗེའི་སྐུ། །མ་ལུས་འགྲོ་བའི་གཏན་གྱི་མགོན་གྱུར་པ། །སྐྱབས་མཆོག་དམ་པ་བདག་ལ་དགོངས་སུ་གསོལ། །ཁྱོད་ནི་རང་བྱུང་ཡེ་ཤེས་བདེ་བ་ཆེ། །མ་ལུས་འགྲོ་ཀུན་ཁྱོད་ཀྱི་ངང་གྱུར་ཀྱང་། །མི་ཤེས་རྒུད་པས་མནར་བ་བདག་ཅག་ལ། །དེང་ནས་རྟག་པ་དམ་པའི་མཆོག་སྩོལ་ཅིག །བཀྲ་ཤིས་ཀུན་གྱི་བཀྲ་ཤིས་བླ་མེད་པ། །གྲགས་པའི་བཀྲ་ཤིས་སྙན་གྲགས་དགེ་མཚན་ལྡན། །དབུགས་འབྱིན་ཆེན་པོ་དགའ་སྟོན་རྒྱ་ཆེ་བ། །དགའ་ཆེན་རོལ་མོ་ཆེན་པོས་དབུགས་དབྱུང་སྩོལ། །འཇམ་དཔལ་དཔལ་དང་ལྡན་པའི་མཆོག་གྱུར་པ། །མཆོག་སྦྱིན་རྡོ་རྗེས་བདག་ལ་མཆོག་སྩོལ་ཅིག །དེ་བཞིན་བཤེགས་པཀུན་གྱི་ཡེ་ཤེས་སྐུའི། །ཡེ་ཤེས་རྡོ་རྗེའི་དབང་བསྐུར་བདག་ལ་སྩོལ། །འདོད་འབྱུང་དེ་བཞིན་ནོར་བུ་ཆེན་པོ་འཆང་། །དཔག་བསམ་ཤིང་ཆེན་རྒྱས་པ་འགྲོ་ཀུན་གསོས། །ཁྱབ་བདག་རིན་ཆེན་ཀུན་མཆོག་དབུལ་བ་སེལ། །བུམ་བཟང་ཆེ་མཆོག་བདག་ལ་དཔལ་གྱུར་ཅིག །དེང་ནས་བླ་མེད་བྱང་ཆུབ་མ་ཐོབ་པའི། །ཚེ་རབས་ཀུན་ཏུ་ཁྱོད་ཀྱིས་རྗེས་བཟུང་སྟེ། །མི་མཐུནརྒུད་པ་ཐམས་ཅད་རྒྱུན་ཆད་ནས། །དཔལ་དང་སྐལ་བཟང་བཀྲ་ཤིས་བདེ་ལེགས་མཛོད། །ཅེས་ལན་གསུམ་གྱིས་འདོད་དོན་གསོལ། སྐབས་འདིར་གྲངས་བསགས་པར་འདོད་ན། འཛོམས་ན་མཆོད་པ་གསར་དུ་བཤམས། མ་འཛོམས་ན་ཁ་གསོས་ཏེ་མཆོད་པའི་སྤྲིན་གཟུངས་ཀྱིས་བརླབས། ༀ། སྣང་སྲིད་རྣམ་དག་སོགས་ནས། ཕུན་སུམ་ཚོགས་པར་མཛོད། བར་ཡན་ལག་བདུན་པ་དང། གསོལ་འདེབས། ཕྱོགས་དུས་རྒྱལ་བ་སོགས་གོང་གསལ་ལྟར་རམ། ཡང་ན། ཕྱོགས་བཅུ་དུས་བཞིའི་བདེ་གཤེགས་སྲས་བཅས་ཀྱི། །ཡེ་ཤེས་སྐུ་ཅན་གཉིས་མེད་མཉམ་པ་ཉིད། །འཇམ་དཔལ་ཡེ་ཤེས་སེམས་དཔར་གསོལ་བ་འདེབས། །ཉམས་རྟོགས་ཡེ་ཤེས་འཕེལ་བར་བྱིན་གྱིས་རློབས། །འདི་གཉིས་རང་གང་མོས་ལ། སྤྲོ་ན་ཚིག་ཕྱི་མ་གཉིས་ཀྱི་གནས་སུ། འཇམ་དཔལ་རྡོ་རྗེ་རྣོན་པོར་དང་། སྡུག་བསྔལ་ཉོན་མོངས་ཞི་བར་ལྟ་བུ་རང་གང་འདོད་ཀྱི་ལས་བྱེ་བྲག་པའི་ཁ་བསྒྱུར་བཅས་གསོལ་གདབ་མཐར། ཨེ་མ་ཧོཿརང་བྱུང་སོགས་ནས། བཀྲ་ཤིས་བདེ་ལེགས་མཛོད། །བར་བརྗོད་ཅིང་ཚུལ་དེས་གྲངས་བསགས། གང་ལྟར་ཡང་། མཐར། གདོད་མའི་མགོན་པོ་འཇམ་དཔལ་ཡེ་ཤེས་སྐུ། །སྣང་སྲིད་རྣམ་དག་ཆོས་སྐུའི་དཀྱིལ་འཁོར་ལ། །དབྱེར་མེད་མཉམ་ཉིད་ཆེན་པོར་གསོལ་བ་འདེབས། །འཇིགས་མེད་བདེ་ཆེན་ཐོབ་པར་བྱིན་གྱིས་རློབས། །ཞེས་དང། སྣང་སྲིད་རྣམ་དག་བདེ་བ་ཆེན་པོའི་ཞིང་། །མི་ཤིས་མཚན་མ་འགའ་ཡང་མ་དམིགས་པའི། །བདེན་པ་དེ་ཡིས་བདག་ཅག་དུསཀུན་ཏུ། །བཀྲ་ཤིས་བདེ་ལེགས་ཆེན་པོས་ཁྱབ་པར་མཛོད། །ཉིན་པར་བཀྲ་ཤིས་བགེགས་ཞི་བསམ་དོན་འགྲུབ། །མཚན་མོར་བཀྲ་ཤིས་རྨི་ལམ་བཟང་དགུ་མཐོང་། །དུས་ཀུན་བཀྲ་ཤིས་སྙན་གྲགས་རླུང་རྟ་སྤེལ། །རྣམ་ཀུན་བཀྲ་ཤིས་བདེ་ལེགས་ཆོས་འཕེལ་མཛོད། །རིང་འཚོའི་བཀྲ་ཤིས་འཆི་མེད་བཅུད་ལེན་གྲུབ། །ནད་མེད་བཀྲ་ཤིས་བདེ་བའི་ལང་ཚོ་རྒྱས། །དཔལ་འབྱོར་བཀྲ་ཤིས་འདོད་དགུ་ཆར་དུ་བསྙིལ། །མངོན་མཐོའི་བཀྲ་ཤིས་ཡོན་ཏན་བདུན་ལྡན་མཛོད། །ལྷ་ཡི་བཀྲ་ཤིས་ངོ་མཚར་འབྲུག་སྒྲ་སྒྲོགས། །ཀླུ་ཡི་བཀྲ་ཤིས་དཔལ་འབྱོར་མཚོ་ལྟར་བསྐྱིལ། །མི་ཡི་བཀྲ་ཤིས་དཀར་ཆོས་རྣམ་པར་འཕེལ། །ཀུན་ཀྱང་བཀྲ་ཤིས་ཆོས་སྲིད་བརྟན་པར་མཛོད། །རྟེན་གྱི་བཀྲ་ཤིས་འཁོར་ལོ་བཞི་ཡིས་འབྱོར། །གྲོགས་ཀྱིབཀྲ་ཤིས་དགེ་བའི་བཤེས་ཀྱིས་ཟིན། །རྒྱུ་ཡི་བཀྲ་ཤིས་དཀར་པོའི་རིགས་མཆོག་སད། །ནོར་མཆོག་བཀྲ་ཤིས་འཕགས་ནོར་བདུན་ལྡན་མཛོད། །བླ་མའི་བཀྲ་ཤིས་བྱིན་རླབས་སྤྲིན་ཆེན་འཁྲིགས། །ཡི་དམ་བཀྲ་ཤིས་གྲུབ་གཉིས་ཆར་དུ་བསྙིལ། །མཁའ་འགྲོའི་བཀྲ་ཤིས་ཕྲིན་ལས་རྩི་སྨན་རྒྱས། །རྩ་གསུམ་བཀྲ་ཤིས་དོན་གཉིས་མྱུར་འགྲུབ་མཛོད། །སངས་རྒྱས་བཀྲ་ཤིས་སྤངས་རྟོགས་མཐའ་རུ་ཕྱིན། །དམ་ཆོས་བཀྲ་ཤིས་བདེན་གཉིས་འདོད་པ་འཇོ། །དགེ་འདུན་བཀྲ་ཤིས་རིག་གྲོལ་སྤོབས་པ་དགེ། །མཆོག་གསུམ་བཀྲ་ཤིས་སྲིད་པའི་གདུང་སེལ་མཛོད། །རིགས་ཁམས་བཀྲ་ཤིས་ཆོས་གཟུགས་ཟག་མེད་གཏེར། །བྱང་ཆུབ་བཀྲ་ཤིསསྒྲིབ་བྲལ་མངོན་དུ་གྱུར། །ཡོན་ཏན་བཀྲ་ཤིས་བྲལ་སྨིན་འབྱོར་པས་མཛེས། །ཕྲིན་ལས་བཀྲ་ཤིས་རྩོལ་མེད་ལྷུན་གྲུབ་མཛོད། །གཞི་རྒྱུད་བཀྲ་ཤིས་སྒྲིབ་བྲལ་གཉུག་མའི་སེམས། །ལམ་རྒྱུད་བཀྲ་ཤིས་རིམ་གཉིས་མཐའ་རུ་ཕྱིན། །འབྲས་རྒྱུད་བཀྲ་ཤིས་དཀོར་བདུན་རང་དབང་བསྒྱུར། །རྒྱུད་གསུམ་བཀྲ་ཤིས་ཚེ་འདིར་མངོན་གྱུར་མཛོད། །ཆོས་སྐུའི་བཀྲ་ཤིས་ཟབ་ཞི་སྤྲོས་ལས་འདས། །ལོངས་སྐུའི་བཀྲ་ཤིས་འོད་གསལ་འཕོ་འགྱུར་བྲལ། །སྤྲུལ་སྐུའི་བཀྲ་ཤིས་གདུལ་བཞིའི་ཕྲིན་ལས་རྒྱས། །དབྱེར་མེད་བཀྲ་ཤིས་རྡོ་རྗེའི་སྐུ་འགྲུབ་མཛོད། །སྐུ་ཡི་བཀྲ་ཤིས་མཚན་དཔེ་མཐོང་བས་གྲོལ། །གསུང་གི་བཀྲ་ཤིས་ཅི་སྨྲས་གཞན་དོན་འགྱུར། །ཐུགས་ཀྱི་བཀྲ་ཤིས་མཁྱེན་བརྩེས་ཡོངས་ལ་ཁྱབ། །གསུང་གསུམ་བཀྲ་ཤིས་སྒོ་གསུམ་ལ་སྨིན་མཛོད། །བླ་མའི་བཀྲ་ཤིས་སྨིན་གྲོལ་གདམས་ཟབ་འཇོ། །སློབ་མའི་བཀྲ་ཤིས་དད་དམ་རྣམ་པར་དག །བླ་སློབ་བཀྲ་ཤིས་བཤད་སྒྲུབ་ཕྱོགས་སུ་མཐུན། །རྒྱལ་བསྟན་བཀྲ་ཤིས་སྲིད་མཐར་འཕེལ་རྒྱས་མཛོད། །རི་ཀུན་བཀྲ་ཤིས་བསམ་གཏན་སྡེ་ཡིས་འབྱོར། །ཀླུང་ཀུན་བཀྲ་ཤིས་ཀློག་པའི་གྲྭ་ཡིས་ཕྱུག །ཡུལ་ཀུན་བཀྲ་ཤིས་དགེ་བཅུའི་སྣང་བས་ཁྱབ། །དུས་ཀུན་བཀྲ་ཤིས་མི་ནུབ་བརྟན་པར་མཛོད། །སོ་ཐར་བཀྲ་ཤིས་ངེས་འབྱུང་ཞིང་ས་གཤིན། །བྱང་སེམས་བཀྲ་ཤིས་གཞན་ཕན་མྱུ་གུ་འཁྲུངས། །གསང་སྔགས་བཀྲ་ཤིས་དག་མཉམ་ཆེན་པོར་སྨིན། །སྡོམ་གསུམ་བཀྲ་ཤིས་འཆལ་ཚུལ་དྲི་བྲལ་མཛོད། །ཐོས་པའི་བཀྲ་ཤིས་མི་བརྗེད་གཟུངས་ཀྱིས་འཛིན། །བསམ་པའི་བཀྲ་ཤིས་རྟོན་པ་བཞི་དང་ལྡན། །སྒོམ་པའི་བཀྲ་ཤིས་ཉམས་རྟོགས་ཀློང་ནས་རྡོལ། །མཐར་ཕྱིན་བཀྲ་ཤིས་ཆོས་སྤྲིན་ལ་གནས་མཛོད། །འཆད་པའི་བཀྲ་ཤིས་ངེས་དོན་གཞུང་བརྒྱ་འགྲོལ། །རྩོད་པའི་བཀྲ་ཤིས་ལུང་རིགས་འབྲུག་སྟོང་ལྡིར། །རྩོམ་པའི་བཀྲ་ཤིས་ལེགས་བཤད་འཛད་པ་མེད། །ཀུན་ཀྱང་བཀྲ་ཤིས་ཟབ་དོན་སྣང་བར་མཛོད། །མཁས་པའི་བཀྲ་ཤིས་ཡོན་ཏན་ནོར་བུས་འབྱོར། །བཙུན་པའི་བཀྲ་ཤིས་བསླབ་གསུམ་རྒྱལ་མཚན་བརྟན། །བཟང་པོའི་བཀྲ་ཤིས་ཕན་བདེའི་འདོད་པ་འཇོ། །མཁས་ཚུལ་བཀྲ་ཤིས་གཞན་ཕན་མཁའ་ཁྱབ་མཛོད། །བཤད་པའི་བཀྲ་ཤིས་ལུང་གི་དར་དཔྱངས་གཡོ། །སྒྲུབ་པའི་བཀྲ་ཤིས་རྟོགས་པའི་རི་མོ་བཀྲ། །ལེགས་མཛད་བཀྲ་ཤིས་སྙན་གྲགས་ཕྱོགས་ཀུན་ཁྱབ། །གང་རྩོམ་བཀྲ་ཤིས་བསྟན་འགྲོར་སྨན་པར་མཛོད། །མཁྱེན་པའི་བཀྲ་ཤིས་ཤེས་བྱའི་དེ་ཉིད་རྟོགས། །བརྩེ་བའི་བཀྲ་ཤིས་འགྲོ་ཁམས་བུ་བཞིནསྐྱོང། །ནུས་མཐུས་བཀྲ་ཤིས་བདུད་བཞིའི་གཡུལ་ལས་རྒྱལ། །དོན་གཉིས་བཀྲ་ཤིས་ཉི་ལྟར་གསལ་བར་མཛོད། །མཆོད་གནས་བཀྲ་ཤིས་བསྡུ་བཞིའི་ཕྲིན་ལས་རྒྱས། །ཡོན་བདག་བཀྲ་ཤིས་སྡེ་བཞིའི་མངའ་ཐང་དར། །ཡོན་མཆོད་བཀྲ་ཤིས་རྣམ་དཀར་ཕྱོགས་སུ་གཅིག །ཀུན་ཀྱང་བཀྲ་ཤིས་བདེ་སྐྱིད་ཆོས་འཕེལ་མཛོད། །རྗེ་ཡི་བཀྲ་ཤིས་འབངས་འཁོར་བྱམས་པའི་སྐྱོང་། །འབངས་ཀྱི་བཀྲ་ཤིས་རྗེ་ཡི་བཀའ་ལུང་སྒྲུབ། །རྗེ་བློན་བཀྲ་ཤིས་ཡང་དག་ལྟ་བས་འཚོ། །རྒྱལ་ཁམས་བཀྲ་ཤིས་འཐབ་རྩོད་རྒྱུན་ཆད་མཛོད། །སྣོད་ཀྱི་བཀྲ་ཤིས་རྩི་སྨན་འབྲུ་བཅུད་སྨིན། །བཅུད་ཀྱི་བཀྲ་ཤིས་ཚེ་དཔལ་འབྱོར་ཚོགས་རྒྱས། །སྣོད་བཅུད་བཀྲ་ཤིས་རྫོགས་ལྡན་མགྲོན་དུ་འགུགས། །ཐར་གྲོལ་བཀྲ་ཤིས་རྟེན་འབྱུང་དགེ་བར་མཛོད། །ཞི་བའི་བཀྲ་ཤིས་ཉེས་བརྒྱའི་དྲི་མ་འཁྲུད། །རྒྱས་པའི་བཀྲ་ཤིས་འབྱོར་དྲུག་མཚོ་ལྟར་བསྐྱིལ། །དབང་མཛད་བཀྲ་ཤིས་བརྟན་གཡོའི་དཔལ་ཀུན་འཆིང་། །དྲག་པོའི་བཀྲ་ཤིས་མི་མཐུན་ཚར་གཅོད་མཛོད། །སྲུང་བའི་བཀྲ་ཤིས་རྡོ་རྗེའི་གུར་ཁང་བརྟན། །བཟློག་བསད་བཀྲ་ཤིས་བྱད་མ་རང་གཤེད་འབེབས། །ཤུགས་སྒྲོལ་བཀྲ་ཤིས་ཉམས་པ་རྩད་ནས་ཆོད། །བདག་ཅག་བཀྲ་ཤིས་ཕྱོགས་ལས་རྣམ་རྒྱལ་མཛོད། །དོན་བརྒྱུད་བཀྲ་ཤིས་དགོངས་བརྒྱུད་བུ་ལ་འཕོས། །ས་ལམ་བཀྲ་ཤིས་ཡོན་ཏན་གོང་དུ་འཕེལ། །རྣམ་ཀུན་བཀྲ་ཤིས་གཟུངས་སྤྲིན་སྙིང་པོས་བརྒྱན། །མཐར་ཐུག་བཀྲ་ཤིས་ཡེ་ཤེས་སྐུ་འགྲུབ་མཛོད། །ཅེས་འདོད་པའི་དོན་ལ་གསོལ་བ་རྩེ་གཅིག་ཏུ་གདབ་བོ། །དེ་ནས་ནམ་མཁར་བཞུགས་པའི་དེ་བཞིན་གཤེགས་པ་ཡབ་རྣམས་ཀྱིས་དབང་བསྐུར་པའི་དགོངས་པ་མཛད། ཡུམ་རྣམས་ཀྱིས་བུམ་པའི་ཆུས་སྤྱི་བོ་ནས་དབང་བསྐུར། སེམས་དཔའ་རྣམས་ཀྱིས་བཀྲ་ཤིས་པའི་མེ་ཏོག་འཐོར། སེམས་མ་རྣམས་ཀྱིས་རྡོ་རྗེའི་གླུ་ལེན། ཁྲོ་བོའི་ཚོགས་ཀྱིས་བགེགས་བསྐྲད། འཇིག་རྟེན་སྐྱོང་བ་རྣམས་ཀྱིས་མཆོད་ཅིང་བསྟོད་ནས་ཤིན་ཏུ་ཡང་བཀྲ་ཤིས་པར་མཛད་པར་མོས་ལ། སྤྲོ་ན་བླ་མ་དགོངས་འདུས་ལས་འབྱུང་བའི་སྨོན་ལམ་བཀྲ་ཤིས་ཀྱི་སྒྲོན་མེ་དང་། མདོ་ལས་འབྱུང་བའི་གང་སེར་མ་དང་། བྱ་རྒྱུད་ལེགས་སྒྲུབ་སོགས་ལས་འབྱུང་བས་མཚོན་མདོ་དང་རྒྱུད་ནས་གསུངས་པའི་བཀྲ་ཤིས་ཀྱི་ཚིག་ཅི་རིགས་པ་བརྗོད་ཅིང། དཀྱུས་ཙམ་དུ། ཕུན་སུམ་ཚོགས་པའམ། ཆེ་བའི་ཆེ་མཆོག་སོགས་ཞལ་ནས་གསུངས་པའི་དཀོན་མཆོག་གསུམ་གྱི་བཀྲ་ཤིས་ཚིགས་བཅད་གང་རུང་སྔོན་དུ་འགྲོ་བས། བཀྲ་ཤིས་མཆོག་གྲུབ་འདི་ཉིདབརྗོད་པར་བྱ་སྟེ། ༀ། དབུས་ཀྱི་ཕྱོགས་ནས་བཀྲ་ཤིས་ལྷ་ཡི་མཆོག་གྱུར་པ། །དཔལ་ལྡན་རྣམ་པར་སྣང་མཛད་ཡེ་ཤེས་གངས་ཆེན་མཚོ། །རྟག་ཏུ་ཏིང་འཛིན་མི་གཡོ་ཕྱག་ན་འཁོར་ལོ་བསྣམས། །དེས་ནི་དེང་འདིར་ཁྱོད་ལ་བཀྲ་ཤིས་མཆོག་གྱུར་ཅིག །ཧཱུྃཿཤར་གྱི་ཕྱོགས་ནས་བཀྲ་ཤིས་ལྷ་ཡི་མཆོག་གྱུར་པ། །བཅོམ་ལྡན་རྡོ་རྗེ་སེམས་དཔའ་རྡོ་རྗེ་བདེ་བའི་མཆོག །བདུད་བཞི་རབ་ཏུ་འཇོམས་མཛད་ཕྱག་ན་རྡོ་རྗེ་བསྣམས། །དེས་ནི་དེང་འདིར་ཁྱོད་ལ་བཀྲ་ཤིས་མཆོག་གྱུར་ཅིག །སྭཱཿལྷོ་ཡི་ཕྱོགས་ནས་བཀྲ་ཤིས་ལྷ་ཡི་མཆོག་གྱུར་པ། །རྒྱལ་བ་རིན་ཆེན་འབྱུང་ལྡན་དགོས་འདོད་ཀུན་གྱི་གནས། །ཡིད་བཞིན་རེ་བ་སྐོང་བས་ཕྱག་ན་རིན་ཆེན་བསྣམས། །དེས་ནི་དེང་འདིར་ཁྱོད་ལ་བཀྲ་ཤིས་མཆོག་གྱུར་ཅིག །ཨཱཿནུབ་ཀྱི་ཕྱོགས་ནས་བཀྲ་ཤིས་ལྷ་ཡི་མཆོག་གྱུར་པ། །བདེ་གཤེགས་སྣང་བ་མཐའ་ཡས་བདེ་བ་ཆེན་པོའི་སྐུ། །ཀུན་ནས་མཆོག་ཏུ་ཡིད་འོང་ཕྱག་ན་པདྨ་བསྣམས། །དེས་ནི་དེང་འདིར་ཁྱོད་ལ་བཀྲ་ཤིས་མཆོག་གྱུར་ཅིག །ཧཱཿབྱང་གི་ཕྱོགས་ནས་བཀྲ་ཤིས་ལྷ་ཡི་མཆོགགྱུར་པ། །སངས་རྒྱས་དོན་ཡོད་གྲུབ་པ་ཕྲིན་ལས་ལྷུན་གྲུབ་དཔལ། །ཐོགས་མེད་བྱ་བ་གྲུབ་མཛད་ཕྱག་ན་རལ་གྲི་བསྣམས། །དེས་ནི་དེང་འདིར་ཁྱོད་ལ་བཀྲ་ཤིས་མཆོག་གྱུར་ཅིག །ཕྱག་ན་ཨུཏྤལ་བསྣམས་པ་ཡིད་འོང་དོན་གྲུབ་པ། །གཞོན་ནུའི་སྐུ་སྟེ་ཉེས་པའི་དྲི་མ་ཐམས་ཅད་སྤངས། །འཇིག་རྟེན་ཀུན་ན་དཔལ་གྱུར་ཐམས་ཅད་ཀུན་གྱི་དཔལ། །འཇམ་དཔལ་གཞོན་ནུས་ཁྱོད་ལ་བཀྲ་ཤིས་མཛད་གྱུར་ཅིག །ཕྱག་ན་པདྨ་བསྣམས་པ་ས་གསུམ་མགོན་གཅིག་པུ། །འཇིགས་དང་སྡུག་བསྔལ་ཀུན་སེལ་ཀུན་ཏུ་བདེ་མཛད་ཅིང་། །སྙིང་རྗེའི་ཐུགས་ལྡན་པདྨ་རྒྱས་པའི་སྤྱན་མངའ་བ། །སྤྱན་རས་གཟིགས་ཀྱིས་ཁྱོད་ལ་བཀྲ་ཤིས་མཛད་གྱུར་ཅིག །ཕྱག་ན་རྡོ་རྗེ་བསྣམས་པ་བགེགས་ཀུན་མཐར་བྱེད་ཅིང་། །འབར་བའི་མེ་ལྕེ་ཅན་ཏེ་བདུད་ཀྱི་ལུས་ཀུན་སྲེག །འཇིག་རྟེན་གསུམ་ལས་རྣམ་རྒྱལ་སྲིད་པ་ཡོངས་ཀྱི་མགོན། །རྡོ་རྗེ་འཛིན་པས་ཁྱོད་ལ་བཀྲ་ཤིས་མཛད་གྱུར་ཅིག །ཕྱག་ན་ཀླུ་ཤིང་བསྣམས་པས་བྱམས་པའི་སྤྲིན་ཆེན་གྱིས། །མཁའ་དབྱིངས་ཀུན་ཁྱབ་དམ་ཆོས་ཆར་ཆེན་རྟག་ཏུ་འབེབས། །བདེ་པའི་ལོ་ཏོག་སྨིན་པས་ས་གསུམ་རབ་དགའ་བ། །བྱམས་པ་མགོན་པོས་ཁྱེད་ལ་བཀྲ་ཤིས་མཛད་གྱུར་ཅིག །ཕྱག་ན་རལ་གྲི་བསྣམས་པ་ནམ་མཁའ་ལྟ་བུའི་སྐུ། །ནམ་མཁའི་དབྱིངསཀུན་དྲི་ཞིམ་འོད་ཟེར་དྲྭ་བས་ཁྱབ། །སྡིག་ལྟུང་མུན་པ་ཀུན་འཇོམས་ཕན་བདེའི་སྣང་བ་འགྱེད། །ནམ་མཁའི་སྙིང་པོས་ཁྱོད་ལ་བཀྲ་ཤིས་མཛད་གྱུར་ཅིག །ཕྱག་ན་ནོར་བུ་བསྣམས་པ་སྲིད་ཞིའི་དཔལ་གྱུར་སྐུ། །ཕུན་ཚོགས་བདེ་བའི་འབྱུང་གནས་ཡོན་ཏན་ཀུན་གྱི་ས། །མལུས་འདོད་པ་ཐམས་ཅད་ཡིད་བཞིན་སྩོལ་མཛད་པ། །ས་ཡི་སྙིང་པོས་ཁྱོད་ལ་བཀྲ་ཤིས་མཛད་གྱུར་ཅིག །ཕྱག་ན་ཟླ་བ་བསྣམས་པ་ཉོན་མོངས་གདུང་སེལ་ཞིང་། །སྲིད་པའི་རབ་རིབ་ཀུན་འཇོམས་སྒྲིབ་པའི་དྲི་མ་སེལ། །ཡེ་ཤེས་སྣང་བ་རབ་སྦྱིན་ཆོས་ཀྱི་ཆར་འབེབས་པ། །སྒྲིབ་ཀུན་སེལ་བས་ཁྱོད་ལ་བཀྲ་ཤིས་མཛད་གྱུར་ཅིག །ཕྱག་ན་ཉི་མ་བསྣམས་པ་མཁའ་ལྟར་ཁྱབ་པའི་སྐུ། །ཡེ་ཤེས་སྣང་བའི་འོད་ཟེར་ཆོས་དབྱིངས་རྒྱས་པར་འགེངས། །སངས་རྒྱས་ཆོས་དང་འཕགས་པའི་རྒྱལ་མཚན་མཆོག་གྱུར་པ། །ཀུན་ཏུ་བཟང་པོས་ཁྱོད་ལ་བཀྲ་ཤིས་མཛད་གྱུར་ཅིག །མ་ལུས་ཆོས་ཀུན་ཆོས་ཀྱི་དབྱིངས་ཉིད་དེ། །ཆོས་དབྱིངས་ཇི་བཞིན་རྒྱལ་བའི་ཡེ་ཤེས་སྐུ། །ཀུན་ཀྱང་ཁྱོད་ལ་དགེ་ལེགས་ཆེན་པོ་ཡི། །དབང་བསྐུར་དགོངས་པས་བཀྲ་ཤིས་མཛད་གྱུར་ཅིག །རིགས་ཀྱི་འཁོར་ལོས་སྒྱུར་བ་ཆེན་མོ་ནི། །སྤྱན་ལ་སོགས་པས་རིན་ཆེན་བུམ་པ་ནས། །བདུད་རྩིའི་ཆུ་རྒྱུན་གཙུག་ཏུ་འབེབས་པ་ཡིས། །ཁྱོད་ལ་དེ་རིང་བཀྲ་ཤིས་མཆོག་གྱུར་ཅིག །རྒྱལ་བའི་སྲས་པོ་ཕྱོགས་རྣམས་རབ་གྲགས་པ། །འཇིགས་མེད་ཞི་བའི་ཐུགས་ལྡན་དེ་དག་གིས། །སྣ་ཚོགས་མེ་ཏོག་སྤྲིན་གྱི་ཆར་འབེབས་པས། །ཁྱོད་ལ་བཀྲ་ཤིས་དམ་པ་མཆོག་གྱུར་ཅིག །རིགས་ཀྱི་སེམས་མ་མཆོག་ཏུ་ཡིད་འོང་བ། །བཀྲ་ཤིས་ལྷ་མོའི་ཚོགས་ཀྱིས་དགའ་བའི་གླུ། །འཇིག་རྟེན་ཀུན་ཏུ་ཁྱབ་པར་བསྒྲགས་པ་ཡིས། །དེང་ཁྱོད་ཕུན་སུམ་ཚོགས་པའི་བཀྲ་ཤིས་ཤོག །དུས་མཐའི་མེ་ལྟར་རབ་འབར་ཁྲོ་བོའི་ཚོགས། །འཇིགས་པའི་ང་རོ་དང་བཅས་གར་བྱེད་ཅིང་། །འབར་བའི་ལྟ་བས་བགེགས་རྣམས་མཐར་བྱེད་པས། །དེང་འདིར་ཁྱོད་ལ་བཀྲ་ཤིས་མཆོག་གྱུར་ཅིག །རིགས་ཀྱི་བཀའ་ཉན་འཇིག་རྟེན་སྐྱོང་བའི་ཚོགས། །ཕྱོགས་བཅུ་ཀུན་ནས་སྤྲིན་བཞིན་གཏིབས་བྱས་ཏེ། །བཀྲ་ཤིས་མཆོད་པའི་ཡོ་བྱད་སྣ་ཚོགས་ཀྱིས། །དེང་འདིར་ཁྱོད་ལ་བཀྲ་ཤིས་སྤེལ་གྱུར་ཅིག །ཡིད་ལ་ཇི་ལྟར་བསམ་པའི་དོན་གྲུབ་ཅིང་། །སྲིད་ཞིའི་དཔལ་ཡོན་ཀུན་ནས་ཕུན་སུམ་ཚོགས། །དཔལ་ལྡན་རྒྱལ་བའི་འབྱོར་པ་རྨད་བྱུང་དེས། །ཁྱེད་ལ་རྟག་ཏུ་བཀྲ་ཤིས་མཆོག་གྱུར་ཅིག །འགྲོ་དང་བྱ་བ་རྩོམ་སོགས་ལ། །ཐོག་མར་དྲན་ན་དོན་གྲུབ་ཅིང་། །དུས་སུ་ཡིད་ལ་བྱས་པ་ཡིས། །དཔལ་ནི་ཕུན་སུམ་ཚོགས་པ་ཐོབ། །ཅེས་སོ། །གཞན་ཡང་རྗེ་འདི་ཉིད་ཀྱི་གསུངས་བཀྲ་ཤིས་དོན་ཀུན་གྲུབ་པའི་དབྱངས་སྙན་སོགས་དང་། དམ་པ་སྔ་མ་རྣམས་ཀྱི་གསུངས་བཀྲ་ཤིས་ཅི་རིགས་པ་དང་། སྤྲོ་ན་ཁོ་བོས་བྱས་བའི་གནས་བཅུའི་བཀྲ་ཤིས་སོགས་ཀྱང་བརྗོད་མཐར་རྟེན་འབྲེལ་སྙིང་པོ་བཟླས་ཏེ་མེ་ཏོག་གི་ཆར་བསྙིལ་ཞིང་སྤོས་རོལ་སོགས་ཀྱང་བྱའོ། །གསུམ་པ་རྗེས་གཏང་རག་འབུལ་བ་ནི། མཆོད་པ་རྣམས་ཁ་གསོས་ཏེ། ལྷ་དང་ཀླུ་དང་གནོད་སྦྱིན་མི་རྣམས་དང་། །ཕྱོགས་བཅུའི་བྱང་ཆུབ་སེམས་དཔའི་མཆོད་པ་རྣམས། །ཡོན་ཏན་ཆེན་པོ་འཇིག་རྟེན་གཙོ་ལ་འབུལ། །མཆོག་གི་མཆོད་པ་དམ་པ་བཞེས་སུ་གསོལ། །མཆོད་གཟུངས་བཟླ། བཀྲ་ཤིས་ཀུན་གྱི་བཀྲ་ཤིས་དཔལ་གྱུར་པ། །གྲགས་པའི་བཀྲ་ཤིས་སྙན་གྲགས་ཆེན་པོ་དགེ། །དབུགས་འབྱིན་ཆེན་པོ་རྒྱལ་བ་སྲས་བཅས་ལ། །གུས་པས་བསྟོད་དོ་འདོད་དགུའི་དངོས་གྲུབ་སྩོལ། །བདག་གཞན་སྐྱེ་ཀུན་དགེ་བའི་བཤེས་ཀྱིས་ཟིན། །ཚུལ་གནས་ཐོས་བསམ་སྒོམ་པའི་ཡོན་ཏན་རྫོགས། །རྨད་བྱུང་བྱང་ཆུབ་སེམས་ཀྱི་རྟེན་འབྲེལ་གྱིས། །བསྟན་འགྲོའི་དོན་ཆེན་འགྲུབ་པར་མཛད་དུ་གསོལ། །ཚུལ་ཁྲིམས་དག་པས་ལྷར་བཅས་སྐྱེ་བོས་བཀུར། །བྱང་ཆུབ་སེམས་ཀྱིས་གཞན་སྣང་དབང་དུ་བསྒྱུར། །མཉམ་ཉིད་ལྟ་བས་གཉིས་འཛིན་འཁྲུལ་པ་ཞིག །སྤོབས་པའི་གཏེར་བརྒྱད་གྲོལ་བར་མཛད་དུ་གསོལ། །གང་ཞིག་ཚིག་དང་དོན་གྱི་གནས་རྣམས་ཀུན། །ནམ་ཡང་བརྗེད་པ་མེད་པ་ཉིད་གྱུར་ཕྱིར། །དྲན་པའི་གཏེར་དང་ལྡན་པ་དེ་ཡིས་ནི། །བསྙེལ་བས་མི་འཇིགས་བློ་མཆོག་གྲུབ་པར་མཛོད། །རང་དང་སྤྱི་ཡི་མཚན་ཉིད་ཀྱིས་བསྡུས་པའི། །ཆོས་ཀུན་མ་ནོར་རྣམ་པར་འབྱེད་པ་ཡི། །མི་འཕྲོག་བློ་གྲོས་གཏེར་དང་ལྡན་གྱུར་པས། །རྨོངས་པས་མི་འཇིགས་བློ་མཆོག་གྲུབ་པར་མཛོད། །དེའི་མཐུས་རྒྱལ་བའི་མདོ་སྡེ་ཐམས་ཅད་ཀྱི། །དོན་གྱི་རྣམ་པ་ལེགས་པར་ཁོང་ཆུད་པ། །རྟོགས་པའི་གཏེར་དང་ལྡན་པར་གྱུར་པ་ཡིས། །འཁྲུལ་པས་མི་འཇིགས་བློ་མཆོག་གྲུབ་པར་མཛོད། །དྲན་དང་བློ་གྲོས་རྟོགས་པ་དེ་ཡི་མཐུས། །ཐོས་པ་ཀུན་འཛིན་ཆུད་མི་ཟ་བ་ཡི། །མི་བརྗེད་གཟུངས་ཀྱི་གཏེར་དང་ལྡན་གྱུར་ནས། །བསྐྱུད་པས་མི་འཇིགས་བློ་མཆོགགྲུབ་པར་མཛོད། །གཟུངས་རྟོགས་བློ་གྲོས་མཐུ་ལས་ལེགས་བཤད་ཀྱིས། །སེམས་ཅན་ཐམས་ཅད་ཀུན་ནས་ཚིམ་བྱེད་པ། །མི་འཇིགས་སྤོབས་པའི་གཏེར་དང་ལྡན་པ་ཡིས། །ཞུམ་པའི་འཇིགས་བྲལ་བློ་མཆོག་གྲུབ་པར་མཛོད། །གཟུངས་སྤོབས་བློ་ཡིས་ཚུལ་བཞིན་སྨྲ་བ་དང་། །ཆོས་མིན་ཚར་གཅོད་དམ་ཆོས་ཡོངས་སྲུང་བས། །ཟབ་རྒྱས་ཆོས་ཀྱི་གཏེར་དང་ལྡན་པ་ཡིས། །ལམ་ངན་འཇིགས་བྲལ་བློ་མཆོག་གྲུབ་པར་མཛོད། །ཚུལ་དེས་མཚུངས་མེད་དཀོན་མཆོག་རྣམ་གསུམ་གྱི། །རིགས་རྒྱུད་ཡོངས་སུ་མི་གཅོད་པ་ཡི་སྒོ། །བྱང་ཆུབ་སེམས་ཀྱི་གཏེར་དང་ལྡན་པ་ཡིས། །ལམ་དམན་འཇིགས་བྲལ་བློ་མཆོག་གྲུབ་པར་མཛོད། །ཡོན་ཏན་བདུན་ལྡན་སྐྱེས་བུས་གནས་ལུགས་དོན། །སྐྱེ་མེད་ཆོས་ལ་བཟོད་པ་མཆོག་ཐོབ་པའི། །ཟབ་མོ་སྒྲུབ་པའི་གཏེར་དང་ལྡན་པ་ཡིས། །ཉམས་པས་འཇིགས་བྲལ་བློ་མཆོག་གྲུབ་པར་མཛོད། །འདི་ལྟར་རིག་སྟོང་དབྱིངས་ནས་གཏེར་ཆེན་བརྒྱད། །སྦས་པའི་སྒོ་འབྱེད་སྔགས་ཀྱི་ཐབས་མཆོག་ལ། །མཁས་པར་གྱུར་ནས་འཇམ་དཔལ་དཔའ་བོ་ཡིས། །འབྲལ་མེད་རྗེས་སུ་འཛིན་པའི་རྒྱུར་གྱུར་ཅིག །འཇམ་མགོན་སྲས་བཅས་རྒྱལ་བའི་ཐུགས་བསྐྱེད་དང་། །མཛད་པ་སྨོན་ལམ་མཁྱེན་བརྩེ་ནུས་པའི་ཚུལ། །བླ་མེད་ཡེ་ཤེས་སྒྱུ་འཕྲུལ་ཇི་འདྲ་བ། །དེ་འདྲ་ཁོ་ནར་བདག་སོགས་འགྱུར་བར་ཤོག །གཞན་ཡང་རིས་མེད་བསྟན་འཛིན་སྐྱེས་བུ་རྣམས། །བསྐལ་བརྒྱར་ཞབས་བརྟན་ཆོས་འཁོར་སྐོར་བ་དང་། །བཤད་སྒྲུབ་བསྟན་པ་ཕྱོགས་བཅུར་རྒྱས་པ་ཡིས། །ས་གསུམ་དགེ་ལེགས་འཕེལ་བར་བྱིན་གྱིས་རློབས། །བཀྲ་ཤིས་སྲིད་དང་ཞི་བའི་ཡོན་ཏན་གྱི། །དགེ་མཚན་སྣང་བ་ནུབ་པ་མེད་པའི་ཕུལ། །ཕུན་ཚོགས་འཆི་མེད་གྲུབ་པའི་ངོ་མཚར་དང་། །ལྷན་ཅིག་ཕན་བདེའི་འབྱོར་པ་རྒྱས་གྱུར་ཅིག །ཁྱེད་རྣམས་མཆོད་བསྟོད་གསོལ་བ་བཏབ་པའི་མཐུས། །བདག་སོགས་གང་དུ་གནས་པའི་ས་ཕྱོགས་དེར། །ནད་གདོན་དབུལ་ཕོངས་འཐབ་རྩོད་ཞི་བ་དང་། །ཆོས་དང་བཀྲ་ཤིས་འཕེལ་བར་མཛད་དུ་གསོལ། །བསླབ་པ་གསུམ་ལྡན་ངུར་སྨྲིག་འཆང་བ་ཡི། །འདུས་པའི་ཚོགས་ཀྱིས་གནས་འདི་ཡོངས་གང་ཞིང་། །རྟག་ཏུ་བཤད་སྒྲུབ་བྱ་བས་སྲིད་མཐའི་བར། །ཐུབ་བསྟན་ཕྱོགས་བཅུར་རྒྱས་པའི་བཀྲ་ཤིས་ཤོག །གནས་འདིར་ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ཡང་བདེ་ལེགས་ཤིང་། །ཉིན་མཚན་རྟག་ཏུ་བདེ་ལེགས་པ། །དཀོན་མཆོག་གསུམ་གྱི་བཀྲ་ཤིས་ཤོག །ཅེས་འདོད་པའི་དོན་ལ་རྩེ་གཅིག་ཏུ་གསོལ་བ་གདབ། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །ཉེས་པ་བགྱིས་དང་བགྱིདསྩལ་བ། །དེ་ཀུན་མགོན་པོས་བཟོད་པར་མཛོད། །ཅེས་ནོངས་པ་བཤགས། རྟེན་ཡོད་ན་རྟེན་བཞུགས་སོགས་སྤྱི་ལྟར་རམ། ཡང་ན། འཁོར་རྣམས་འོད་ཞུ་རིམ་གྱིས་གཙོ་ལ་ཐིམ། །གཙོ་བོའི་སྐུ་ལས་བདུད་རྩིའི་ཆར་རྒྱུན་བབ། །སྤྱི་བོ་ནས་ཞུགས་ལུས་གང་སྒྲིབ་ཀུན་ཞི། །བྱིན་རླབས་དབང་བསྐུར་རྡོ་རྗེའི་ཡེ་ཤེས་བསྐྱེད། །མཐར་ནི་འོད་ཞུ་རང་ཐིམ་གཉིས་མེད་ངང་། །འཇམ་དཔལ་ཡེ་ཤེས་སེམས་དཔའི་སྐུར་གྱུར་ནས། །སྣང་སྲིད་བདེ་ཆེན་མཉམ་ཉིད་བྱང་ཆུབ་སེམས། །མ་བཅོས་བློ་འདས་རྫོགས་པ་ཆེན་པོའོ། །ཞེས་མོས་ལ་མཉམ་པར་བཞག་ཅིང་། གཟུངས་སྔགས་ཨ་ར་པ་ཙ་དང་། ༀ་མཉྫུ་ཤྲཱི་བ་ར་ད་བཛྲ་མཾ་སྭཱ་ཧཱཿཞེས་ཅུང་ཟད་བཟླ་ཞིང་སྤྲོ་ན་འཇམ་དཔལ་སྒྱུ་འཕྲུལ་དྲྭ་བའི་རྒྱུད་རྒྱས་བསྡུས་དག་ཀྱང་བཀླག་པར་བྱའོ། །གང་ལྟར་ཡང་མཐར། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང་། །བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་ཐོབ་པར་ཤོག །ཞེས་དང་། འཕགས་པ་སྒོ་དྲུག་པའི་དོན་བསྡུས་ཀུན་མཁྱེན་བླ་མའི་གསུངས་འདི་ཉིད་སྨོན་ལམ་དུ་གདབ་པར་བྱ་སྟེ། ཀུན་མཁྱེན་སྟོན་པ་ཕྱོགས་བཅུར་གང་བཞུགས་དང་། །རྒྱལ་བའི་སྲས་པོ་ཡོན་ཏན་རྨད་བྱུང་བ། །མ་ལུས་ཀུན་ལ་གུས་པས་ཕྱག་འཚལ་ཏེ། །སྨོན་ལམ་འདི་བརྗོད་འགྲུབ་པར་བྱིན་གྱིས་རློབས། །འཁོར་བར་འཁོར་ཚེ་སྐྱེ་གནས་ཐམས་ཅདདུ། །བདག་གིས་སྡུག་བསྔལ་གང་དང་ཅི་མྱོང་བ། །སེམས་ཅན་ཀུན་དང་འདྲ་བར་ཤེས་གྱུར་ནས། །རང་གཞན་སྡུག་བསྔལ་ཞི་བའི་རྒྱུར་གྱུར་ཅིག །བདག་གིས་འཇིག་རྟེན་བདེ་བ་ཅི་མྱོང་ཡང་། །རང་དོན་ཁོ་ནར་ཆགས་པའི་བློ་སྤངས་ནས། །སེམས་ཅན་ཀུན་དང་ཐུན་མོང་ཉིད་བྱས་ཏེ། །སྲིད་འབྱོར་ལམ་གྱི་གྲོགས་སུ་འགྱུར་བར་ཤོག །བདག་གིས་སྡིག་པ་མི་དགེའི་ལས་གང་དག །ཅི་བགྱིས་དེ་ཀུན་གནོང་འགྱོད་དྲག་པོ་ཡིས། །སོ་སོར་བཤགས་པ་བླ་མེད་ཀྱིས་བཤགས་པས། །སྡིག་པའི་རྣམ་སྨིན་ཅུང་ཟད་མི་མྱོང་ཤོག །བདག་གིས་ཡང་དག་ལམ་གྱི་མི་མཐུན་ཕྱོགས། །བདུད་ཀྱི་ལས་གང་ཅི་དང་ཅི་བྱས་པས། །དེ་ཀུན་ཡོངསསུ་ཤེས་པ་བླ་མེད་ཀྱིས། །ཤེས་ཤིང་མ་སྤངས་ཅུང་ཟད་མེད་པར་ཤོག །བདག་གི་ཕ་རོལ་ཕྱིན་དང་ལྡན་པ་ཡི། །དགེ་རྩ་འཇིག་རྟེན་པའམ་འཇིག་རྟེན་འདས། །གང་ཅི་བསགས་པ་དེ་དག་ཐམས་ཅད་ཀུན། །བླ་མེད་ཡེ་ཤེས་འབྲས་བུར་སྨིན་གྱུར་ཅིག །བདག་གི་རྣམ་པར་གྲོལ་བ་གང་ལགས་པ། །དེ་ཡིས་སེམས་ཅན་ཐམས་ཅད་ཐར་བགྱིས་ཏེ། །བདག་ནི་འཁོར་བ་དང་ནི་མྱང་འདས་ལ། །མི་ནུས་སེམས་ཅན་དོན་ཀུན་བྱེད་གྱུར་ཅིག །ཅེས་དང་། གཞན་ཡང་སྔ་འགྱུར་བསྟན་པ་རྒྱས་པའི་སྨོན་ལམ་དང་འཕགས་པ་བཟང་པོ་སྤྱོད་པའི་སྨོན་ལམ་སོགས་ཐེག་པ་ཆེན་པོའི་ལམ་དང་འབྲེལ་བའི་སྨོན་ལམ་ཇི་ལྟར་རིགས་པས་མཐའ་བརྒྱན་པར་བྱའོ། །འདི་ལྟར་བགྱིས་པའི་ཁུངས་ནི། ཀུན་མཁྱེན་བླ་མ་འཇམ་དཔལ་དགྱེས་པའི་རྡོ་རྗེའི་གསུང་བཀྲ་ཤིས་ཆོ་ག་དཔལ་གྱི་བེའུ་དང་། བཀྲ་ཤིས་བརྒྱད་པའི་ཚིགས་སུ་བཅད་པ་གཉིས་རྩ་བར་བཟུང་། ཀུན་འབྱུང་ནོར་བུའི་ལས་ཚོགས་སོགས་ཀྱི་མན་ངག་གི་སྙིང་པོ་བསྡུས་ནས་ཁ་བསྐང་ཞིང་རང་ཚིག་ཅི་རིགས་པས་ཀྱང་བརྒྱན་ཏེ་བྲིས་པ་ཡིན་ལ། དེ་ལྟར་བརྩོན་པའི་ཕན་ཡོན་ཀྱང་། གཞུང་དེ་ཉིད་ལས། ལྡང་ཚེ་བརྗོད་ན་དེ་ཉིད་དོན་ཀུན་འགྲུབ། །ཉལ་ཚེ་བརྗོད་ན་རྨི་ལམ་བཟང་པོ་མཐོང་། །གཡུལ་དུ་འཇུག་ཚེ་བརྗོད་ན་ཕྱོགས་ལས་རྒྱལ། །བྱ་བ་རྩོམ་དུས་བརྗོད་ན་འདོད་དོན་འཕེལ། །རྒྱུན་དུ་བརྗོད་ན་ཚེ་དཔལ་གྲགས་འབྱོར་ཤིང་། །བདེ་ལེགས་ཕུན་ཚོགས་བསམ་དོན་ཡིད་བཞིན་འགྲུབ། །སྡིག་སྒྲིབ་ཀུན་བྱང་མངོན་མཐོ་ངེས་ལེགས་ཀྱིས། །དོན་ཀུན་གྲུབ་པར་རྒྱལ་བ་མཆོག་གིས་གསུངས། །ཞེས་གསུངས་ཤིང་། གཞན་ཡང་སྤྲོ་ན་འདི་ཉིད་ལ་དམིགས་པ་དང་གསོལ་འདེབས་ཀྱི་ཁ་བསྒྱུར་མན་ངག་བཞིན་བྱས་པས་ཞི་རྒྱས་དབང་དྲག་མཆོག་གི་དོན་ཐམས་ཅད་འགྲུབ་པར་འགྱུར་བས་ཡིད་བཞིན་ནོར་བུ་རིན་པོ་ཆེ་འབུམ་གྱིས་ཀྱང་མཚོནདུ་མེད་པ་འདི་སྔ་འགྱུར་པ་རྣམས་ལ་དཔལ་དུ་གནས་པ་ཡིན་ཏེ། འཇམ་དཔལ་ཀུན་འབྱུང་ནོར་བུའི་ལས་ཚོགས་ལས། བླ་མ་ཡི་དམ་དབྱེར་མེད་ངོ་བོ་ལ། །རྡོ་རྗེ་རྣོན་པོའམ་ཡེ་ཤེས་སེམས་དཔའ་སོགས། །གང་མོས་མཚན་སྦྱར་བདག་རྒྱུད་བྱིན་རློབ་པའི། །གསོལ་བ་རྩེ་གཅིག་བཏབ་ན་བྱིན་རླབས་འབེབས། །ཞི་སོགས་འདི་ཡི་ཚུལ་གྱིས་གང་འདོད་པའི། །དམིགས་འདོན་ཁ་བསྒྱུར་སྒྱུ་འཕྲུལ་དྲྭ་བའི་གར། །འདོད་པའི་འབྲས་བུ་ཡིད་བཞིན་རྗེས་སུ་འཇོ། །བརྒྱ་ཕྲག་རེས་ཀྱང་དངོས་ཉམས་རྨི་རྟགས་མཐོང་། །མྱུར་ལ་འདོད་པའི་འབྲས་བུ་ལག་ཏུ་སྨིན། །ཐེ་ཚོམ་མ་བྱེད་བདེན་རྫུན་རང་ཉམས་བསྡོར། །ཡིད་ཆེས་ངེས་སྐྱེ་ཐ་ཚིག་འདི་ལ་སོམས། །ཞེས་དང་། དུས་མཐར་པདྨ་འཇམ་པའི་རྡོ་རྗེ་ལ། །མོས་པའི་སྐལ་ལྡན་འགའ་ལ་ཕན་སྲིད་དགེ། །ཞེས་རྗེས་སུ་གདམས་པར་མཛད་པ་ཡིན་ནོ། །གང་མཚན་ནོར་བུའི་དོ་ཤལ་རྣ་ལུང་དུ། །དཔྱངས་བའི་མོད་ན་དོན་གཉིས་འདོད་པ་ཀུན། །ཡིད་བཞིན་འཇོ་བའི་ངོ་མཚར་ཤིས་པའི་དབྱངས། །ས་གསུམ་ཁྱབ་མཛད་བདེ་གཤེགས་སྲས་འཁོར་བཅས། །དྭངས་པའི་ཡིད་ལ་ཡུད་ཙམ་ཤར་བས་ཀྱང་། །འཇིགས་དང་སྡུག་བསྔལ་མཐའ་དག་གཞིལ་བྱེད་ན། །ཚུལ་བཞིན་མཆོད་ཅིང་གསོལ་བ་འདེབས་བྱེད་པ། །དེ་ལ་ནམ་ཡང་རྒུད་པའི་གནས་སྐབས་ཅི། །དོན་གཉིས་འདོད་པ་འཇོ་བའི་ཡིད་བཞིན་གཏེར། །ས་གསུམ་དགེ་མཚན་སྡུད་པའི་རིགས་སྔགས་འཕྲུལ། །བཀྲ་ཤིས་འཛད་མེད་སྐྱེ་ལྔའི་སྒྲ་དབྱངས་མཆོག །སྐལ་བཟང་རྣམས་ཀྱི་དགའ་སྟོན་འདི་མཚུངས་སུ། །འདི་ནི་བསླུ་མེད་རྒྱལ་གསུང་སྙིང་པོའི་བཅུད། །ཀུན་མཁྱེན་བླ་མའི་མན་ངག་བདུད་རྩིའི་གཏེར། །རང་གཞན་དོན་གཉིས་འགྲུབ་པའི་བཅུད་ལེན་སྨན། །མཆོག་རྣམས་དགྱེས་བསྐྱེད་ཀུན་བཟང་སྤྲིན་ཡང་ཡིན། །དེ་ཕྱིར་སྐལ་བཟང་བློ་ལྡན་དོན་མཐུན་རྣམས། །ཚུལ་འདིར་བརྩོན་དང་འདི་ཕྱིར་དགེ་བའི་དཔལ། །མ་ལུས་ལག་སྟེར་ཡིད་བཞིན་ནོར་ལས་ལྷག །མཐར་ཐུག་སྐུ་གཉིས་འབྱོར་པས་མངོན་མཛེས་འགྱུར། །འདིར་འབད་དགེ་བ་ཟླ་ལྟར་རབ་དཀར་བ། །ཡོངས་བསྔོ་སྲས་བཅས་རྒྱལ་པའི་རྗེས་སློབ་མཐུས། །ཐུབ་བསྟན་ཆུ་གཏེར་རྒྱས་པའི་རླབས་ཕྲེང་རྩེར། །དོན་གཉིས་ཀུ་མུད་བཞད་པའི་མཛེས་གྱུར་ཅིག །ཅེས་པའང་རང་གམ་ན་གནས་པའི་མཆོག་སྤྲུལ་རིན་པོ་ཆེ་རྟག་པར་གཞན་ཕན་ལ་ཐུགས་རྒྱུད་ཡོངས་སུ་འབྱོངས་པའི་རྒྱལ་བའི་སྲས་པོ་པདྨ་དྲི་མེད་ལེགས་པའི་བློ་གྲོས་དཔོན་སློབ་ནས་རང་རྩོམ་སྐོར་སྤརདུ་སྒྲུབ་བཞེད་གནང་བའི་ཐོག་མར་རྟེན་འབྱུང་དགེ་བའི་སླད་དུ་གསུང་བསྐུལ་གནང་བ་བཞིན། རྒྱལ་བའི་སྲས་ཀྱི་མིང་གིས་བསྙད་པའི་བྱ་བྲལ་བ་རྒན་པོ་འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་ཀྱིས་བདེ་མཆོག་བཀྲ་ཤིས་དགེ་འཕེལ་གྱི་དབེན་སྤྱིལ་དུ། ཆུ་ཁྱི་ཧོར་ཟླ་དང་པོའི་འཕེལ་ཕྱོགས་ཀྱི་དགའ་བ་དང་པོའི་ཚེས་ལ་གྲུབ་པར་བགྱིས་པ་དགེ་ལེགས་ཀྱི་སྣང་བ་ཆེན་པོས་ཕྱོགས་ཀུན་ཏུ་ཁྱབ་པའི་རྒྱུར་གྱུར་ཅིག། །།