ཐུབ་དབང་གནས་བརྟན་བཅུ་དྲུག་གི་ཐུགས་དམ་གནད་ནས་བསྐུལ་བའི་གསོལ་འདེབས་ཕྱག་མཆོད་དང་འབྲེལ་བ་ཚོགས་གཉིས་རྒྱས་པའི་སྤྲིན་ཆེན།
༄༅། །ཐུབ་དབང་གནས་བརྟན་བཅུ་དྲུག་གི་ཐུགས་དམ་གནད་ནས་བསྐུལ་བའི་གསོལ་འདེབས་ཕྱག་མཆོད་དང་འབྲེལ་བ་ཚོགས་གཉིས་རྒྱས་པའི་སྤྲིན་ཆེན་ཞེས་བྱ་བ་བཞུགས་སོ། །ༀ་སྭསྟི་སིདྡྷི། དད་པའི་ཡིད་མཁར་ཕུན་ཚོགས་མཆོད་སྤྲིན་དབུས། །རིན་ཆེན་གཞལ་མེད་སེང་ཁྲི་པད་ཟླའི་སྟེང་། །རྩ་བའི་བླ་མ་ཐུབ་དབང་སྲས་འཁོར་བཅས། །ཐུགས་དམ་རྗེས་དགོངས་འདིར་གཤེགས་བརྟན་པར་བཞུགས། །སྔོན་ཚེ་དབང་པོའི་ཏོག་སོགས་བསྒྲང་ཡས་པའི། །འཇིག་རྟེན་སྒྲོན་མ་ཆེན་པོ་རྟག་བཀོད་ཀྱང་། །ཐུགས་རྗེས་རྩོད་དུས་ཡོངས་བཟུང་པད་དཀར་ལྟར། །ཆེར་བསྔགས་ཤཱཀྱའི་ཏོག་ལ་མགོས་ཕྱག་འཚལ། །གཞོན་ནུ་དོན་གྲུབ་སྐུ་ལས་འཁྲུངས་པའི་སྲས། །མཐོང་བ་ཙམ་གྱིས་ཆོས་ཀུན་དེ་ཉིད་རྟོགས། །རྒྱལ་བས་བྱིན་རླབས་རིན་ཆེན་སྲོག་ཞུ་བསྣམས། །འཕགས་པ་སྒྲ་གཅན་འཛིན་ལ་མགོས་ཕྱག་འཚལ། །མཉན་ཡོད་བྲམ་ཟེ་ཆེན་པོའི་རིགས་སུ་འཁྲུངས། །གང་དུ་མཉམ་པར་བཞག་པའི་ས་ཕྱོགས་དེའི། །འགྲོ་ཚོགས་དུག་གསུམ་ལ་སོགས་མེ་ཚོགས་གཞིལ། །འཕགས་པ་ལམ་འཕྲན་བརྟན་ལ་མགོས་ཕྱག་འཚལ། །ཆེས་ཆེར་མཐོ་བ་བྷ་ར་དྷཱ་ཛའི་རིགས། །ཁོམ་མིན་གནས་ངན་བཟློག་པའི་གླེགས་བམ་དང་། །འཕགས་ནོར་འདོད་པ་འཇོ་བའི་ལྷུང་བཟེད་འཛིན། །འཕགས་པ་བསོད་སྙོམས་ལེན་ལ་མགོས༴མཉན་ཡོད་བྲམ་ཟེའི་རིགས་འཁྲུངས་གཟུངས་སྤོབས་དང་། །བློ་གྲོས་མཆོག་སྦྱིན་གླེགས་བམ་གཡས་ན་སྦ། །སངས་རྒྱས་མཐོང་དང་འབྲལ་མིན་ཆོས་འཆད་མཛད། །འཕགས་པ་ལམ་བརྟན་ཆེན་པོར་མགོས༴བྱང་ཕྱོགས་གསེག་མ་ཅན་འཁྲུངས་རྒྱལ་པོའི་རིགས། །བུམ་བཟང་འདོད་པ་ཀུན་འཇོ་སྒྲིབ་ཀུན་འཁྲུད། །མཁར་གསིལ་སྒྲ་ཡིས་ནད་སྡུག་ཉོན་མོངས་སེལ། །འཕགས་པ་ཀླུ་ཡི་སྡེ་ལ་མགོས༴ཝཱ་ཱརཱ་ཎ་སཱིར་ཁྱིམ་བདག་གཙོ་བོའི་རིགས། །ཤེས་བྱ་ཀུན་རྟོགས་ཉོན་མོངས་གདུང་བ་ཞི། །ཆོས་ཀྱི་རྒྱལ་པོར་དབང་བསྒྱུར་གླེགས་བམ་འཛིན། །འཕགས་པའི་གནས་བརྟན་སྦེད་བྱེད་ལ༴བྲམ་ཟེའི་རིགས་འཁྲུངས་སྙིང་རྗེར་གནས་པའི་མཆོག །བསླབ་གསུམ་རྣམ་དག་སྒྲིབ་ཚོགསདྲུང་ནས་འབྱིན། །བཀྲ་ཤིས་དཔལ་སྐྱེད་བྱང་ཆེན་མཆོད་རྟེན་འཛིན། །འཕགས་པ་མིི་ཕྱེད་པ་ལ༴རྒྱལ་པོའི་ཁབ་ཏུ་ཁྱིམ་བདག་ལྷ་དཔལ་འཛིན། །སྤོས་ཕོར་ཚུལ་ཁྲིམས་བསུང་ཞིམ་འགྲོ་ཡིད་འཕྲོག །རྔ་ཡབ་འགྲོ་རྒྱུད་ཀུན་འབྱུང་ཕྲ་རྒྱས་འཕྱག །འཕགས་པ་ཡན་ལག་འབྱུང་ལ༴མཉན་དུ་ཡོད་པར་ཁྱིམ་བདག་རིགས་སུ་འཁྲུངས། །ཚུལ་ཁྲིམས་དག་ཅིང་སྙན་གྲགས་ཕྱོགས་བཅུར་སྒྲོག །ཏིང་འཛིན་སྒོ་འབྱེད་མཉམ་བཞག་ཕྱག་རྒྱ་ཅན། །འཕགས་པ་མ་ཕམ་པ་ལ༴ཀོ་ས་ལ་རུ་བྲམ་ཟེའི་རིགས་སུ་འཁྲུངས། །སྡིགས་མཛུབ་འབྱུང་བཞིའི་འཇིགས་འཕྲོག་གནོད་གདུག་བསྐྲོད། །རྔ་ཡབ་བདག་གཉིས་འགོག་ཅིང་བདེན་གཉིས་སྟོན། །འཕགས་པ་ནགས་ན་གནས་ལ༴བྲམ་ཟེའི་རིགས་སུ་མཉན་དུ་ཡོད་པར་འཁྲུངས། །བྱང་སེམས་ངེས་གནས་བྲལ་སྨིན་ཡོན་ཏན་འབྱུང་། །ཐེག་ཆེན་འཁོར་འདུ་གསེར་གྱི་རྣ་ཀོར་བསྣམས། །འཕགས་པའི་གནས་བརྟན་དུས་ལྡན་ལ༴རྒྱལ་པོ་འཆར་བྱེད་བཙུན་མོ་མཆོག་ལས་འཁྲུངས། །སྡིགས་མཛུབ་མཐོང་ཐོས་དྲན་རེག་བྱང་གྲོལ་འགོད། །རྔ་ཡབ་མཚན་དཔེའི་གཟུགས་དབང་ཡེ་ཤེས་སྦྱིན། །འཕགས་པ་རྡོ་རྗེ་མོའི་བུ་ལ༴གྲོང་ཁྱེར་སེར་སྐྱར་ཤཱཀྱ་རབ་བཟང་སྲས། །ཆོས་འཆད་སྟོང་དང་སྙིང་རྗེའི་དོན་ཟབ་འདོམས། །མཉམ་པར་བཞག་པས་ཀུན་མཁྱེན་ཡེ་ཤེས་སྦྱིན། །འཕགས་པའི་གནས་བརྟན་བཟང་པོ་ལ༴མ་ག་ངྷ་རུ་ཁྱིམ་བདག་རིགས་སུ་འཁྲུངས། །མི་བརྗེད་གཟུངས་བློས་སངས་རྒྱས་ཆོས་ཀུན་འཛིན། །སྤོབས་པ་མཆོག་སྦྱིན་རིན་ཆེན་ཞགས་པ་བསྣམས། །འཕགས་པ་གསེར་བེའུ་ལ་མགོས༴ཡུལ་དབུས་མདུན་ན་འདོན་གྱི་རིགས་སུ་འཁྲུངས། །ངན་འགྲོའི་སྒོ་གཅོད་དཀར་ཆོས་ཡོན་ཏན་སྤེལ། །ཡེ་ཤེས་རྒྱས་བྱེད་མཉམ་བཞག་ཕྱག་རྒྱ་མཛད། །འཕགས་པའི་གནས་བརྟན་གསེར་ཅན་ལ༴མཉན་ཡོད་བྲམ་ཟེའི་རིགས་འཁྲུངས་བྲོ་མི་འཚལ། །ཕ་རོལ་ཕྱིན་རྫོགས་དེ་ཉིད་མྱུར་རྟོགས་ཤིང་། །འདོད་པ་ཀུན་འབྱུང་ནེའུ་ལེ་ཕྱག་ན་བསྣམས། །འཕགས་པ་བ་ཀུ་ལ་ལ་མགོས༴པྲི་ཡངྐུ་སོགས་ལྷ་མིའི་འཇིག་རྟེན་ན། །མྱ་ངན་མི་འདའ་ད་ལྟ་མངོན་སུམ་བཞུགས། །དུ་མའི་འཁོར་བཅས་སྟོན་པའི་བཀའ་ལུང་སྒྲུབ། །དགྲ་བཅོམ་བསྟན་སྐྱོང་ཚོགས་ལ་མགོས༴འཕགས་པའི་དགེ་བསྙེན་ཆེན་པོ་དྷརྨ་ཏཱ། །སྣང་བ་མཐའ་ཡས་མདུན་གྱི་མཁའ་ནས་གཟིགས། །རྔ་ཡབ་བུམ་པས་འཕགས་ལ་སྲི་ཞུ་སྒྲུབ། །དགེ་བསྙེན་ཚོགས་ལའང་གུས་པས་བདག་ཕྱག་འཚལ། །གཞན་ཡང་སྟོན་པའི་ཞམ་རིིམ་མཆོག་ཟུང་སོགས། །རྣམ་བཞིའི་འཁོར་དང་ལུང་རྟོགས་དམ་པའི་ཆོས། །རྒྱལ་ཆེན་བཞི་སོགས་དཀར་ཕྱོགས་སྐྱོང་བའི་རིགས། །ཕྱག་འོས་ཀུན་ལ་གུས་པས་ཕྱག་འཚལ་ལོ། །འཇིག་རྟེན་འཇིག་རྟེན་འདས་པའི་དགེ་མཚན་གྱི། །ཁྱད་པར་དུ་མས་བསྐྲུན་པའི་མཆོད་པའི་སྤྲིན། །ཆོས་ཀྱི་དབྱིངས་ཀུན་རྒྱས་པར་འགེངས་བྱས་ནས། །ཉིན་རེ་བཞིན་ཡང་སྲས་བཅས་རྒྱལ་ལ་འབུལ། །ཐོག་མེད་དུས་ནས་བདག་རྟོག་ཕྲ་རྒྱས་དཔུང་། །ལྷན་ཅིག་ཚོགས་པས་ནོངས་པའི་བཞིན་རས་ཆེ། །འགྱོད་ཚངས་ཁྲུས་ཀྱི་ཆོ་གས་བགྲུང་བྱེད་ན། །སླན་ཆད་མཛའ་བ་མིན་པའི་དཔལ་ཡོན་སྩོལ། །ཡི་རང་ནོར་བུའི་ཞགས་པ་གཅིག་ཉིད་ཀྱིས། །སྲིད་ཞིའི་དཔལ་ཡོན་ཟད་པ་མེད་པའི་སྒོ། །དབང་དུ་བྱེད་འདི་རྒྱལ་བའི་ཐབས་མཁས་ཕུལ། །ཐར་པ་འདོད་པ་སུ་ཞིག་བརྟེན་མི་བྱེད། །རྒྱལ་བའི་ཕྲིན་ལས་ཟད་པ་མི་མངའ་ཡང་། །ལས་ཀྱིས་བསྐལ་པའི་འགྲོ་ལ་འཕེལ་འགྲིབ་སྣང་། །དེ་སླད་དམན་ལ་བརྩེ་བས་ལྷག་པར་དགོངས། །མི་འཇིག་གཟུགས་སྐུ་རྡོ་རྗེ་ལྟར་བརྟན་མཛོད། །འགྲོ་བའི་ཁམས་ནི་དཔག་གིས་མི་ལང་བས། །དེ་སྙེད་རྟོག་འདུལ་ཐེག་སྒོ་བསམ་ཡས་ཀྱིས། །བློ་མིག་དག་པའི་ཉི་མ་གསར་བསྐྲུན་པས། །ཆོས་དབྱིངས་མཁའ་ལ་རབ་རིབ་ཀུན་སངས་མཛོད། །འཁོར་གསུམ་རྟོག་པའི་སྒྲ་གཅན་ལས་གྲོལ་བའི། །ལེགས་བྱས་ཟླ་བ་རྒྱས་པའི་དཀྱིལ་འཁོར་ཆེ། །བློ་ཆེན་ཀུན་ཏུ་བཟང་པོའི་མཁྱེན་པའི་མཁར། །ཡོངས་བསྔོ་རྒྱལ་བ་དགྱེས་པའི་འབབ་སྟེགས་ཤོག །ཨེ་མ་སྤངས་རྟོགས་མཐར་ཕྱིན་སངས་རྒྱས་ཀྱང་། །དགོས་པའི་དབང་གི་ཉན་ཐོས་ཚུལ་བཟུང་ནས། །སྟོན་པའི་བཀའ་སྒྲུབ་བསྟན་པ་སྐྱོང་མཛད་པའི་། །གནས་བརྟན་ཆེན་པོ་མཆོག་རྣམས་དགོངས་སུ་གསོལ། །དེང་དུས་རྙོག་མ་ལྔ་ཡིས་རྙོགས་པའི་ཆབ། །སྤྱན་རས་བཙའ་བའི་མཆོད་ཡོན་མི་མཛེས་ཀྱང་། །སྙིང་རྗེའི་བདག་ཉིད་མཆོག་ཏུ་དགོངས་པར་རིགས། །ཐུགས་བསྐྱེད་སྨོན་པའི་དུས་ཀྱང་དེང་ལགས་སོ། །ཐུགས་རྗེ་ཅན་དེས་གང་ལ་བཅོལ་བའི་ནོར། །བསྐལ་པ་བྱེ་བར་འཐོབ་དཀའི་དངོས་དེ་ཡང་། །རྨོངས་པའི་སྐྱེ་བོས་རྡུལ་ཁྲོད་འདོར་དུ་ཆ། །བདག་བཟང་ཡོད་ན་ད་ནི་གཟིགས་རེ་རན། །ངོ་ཚ་མི་ཤེས་བ་གླང་མི་ཐོད་ཁྱུ། །འདོད་ཡོན་ཚྭ་ཆུ་འཐུང་ལ་མཚར་དུ་བརྩི། །བསགས་པ་ཅན་གྱི་ཕ་ཡིས་སྒྲུབ་པའི་གཏེར། །གར་སོང་མི་རྟོག་ཀྱི་ཧུད་དུས་འདིར་གཟིགས། །རྒུད་པས་ཉམ་ཆུང་ཕྱག་གིས་མི་འདྲེན་ན། །དར་བའི་དཔལ་ལ་སྐྱོར་ཡང་ཅི་ཞིག་དགོས། །ཁྱེད་ལ་གཏད་པའི་དོན་ཀྱང་དེ་ལགས་ན། །ཞལ་འཆེས་རྫུན་དུ་མ་གཏོང་མགོན་པོ་ཀྱེ། །ཕན་བདེའི་འོད་ཟེར་སྟོང་གི་དྲྭ་བ་ཅན། །ཉེས་པའི་མུན་པ་སེལ་ལ་ཟླ་བྲལ་བ། །ཀུན་མཁྱེན་བསྟན་པའི་ཉི་མ་གསར་པའི་གཟི། །འགྲོ་བསོད་མཁའ་ལ་བརྟན་པར་མཛད་དུ་གསོལ། །ཐུགས་ལ་བརྣག་པ་རྒྱལ་བསྟན་འབའ་ཞིག་གཉེར། །མཛད་པ་ཐམས་ཅད་གཞན་ལ་ཕན་པའི་སྒོ། །འབྲེལ་ཚད་དོན་ལྡན་བསྡུ་བཞིའི་ཕྲིན་ལས་ཅན། །ཞབས་པད་ཡུན་རིང་བརྟན་པར་མཛད་དུ་གསོལ། །ངེས་འབྱུང་གཞི་ལ་དད་པའི་མྱུ་གུ་འཁྲུངས། །བསླབ་གསུམ་མེ་ཏོག་གཞན་ཕན་བདུད་རྩིའི་ཕྱུག །བཤདསྒྲུབ་དྲི་བསུང་རྐང་དྲུག་དགའ་བའི་གསོས། །འདུ་ཚོགས་དབྱར་མཚོ་བཞིན་འཕེལ་མཛདདུ་གསོལ། །རྟག་པར་དགེ་འདུན་ལྟ་སྤྱོད་དོན་མཐུན་ཞིང་། །རི་ཀླུང་མེད་པར་སྤང་ཀློག་སྡེ་ཡིས་འབྱོར། །ཐོས་བསམ་སྒོམ་པའི་ཡོན་ཏན་ཟ་མ་ཏོག །ཡུད་ཙམ་རེས་ཀྱང་འགེང་བར་མཛད་དུ་གསོལ། །སྐྱེ་དགུ་ལས་འབྲས་ཡིད་ཆེས་བསྟན་ལ་གུས། །ཡངས་པའི་ཁྱོན་ཀུན་དཀོན་མཆོག་རྟེན་གྱིས་བརྒྱན། །མཆོད་པའི་སྤྲིན་ཆེན་ནམ་མཁའི་མཛོད་ཀྱི་སྒོ། །ཕྱི་མའི་མུ་མཐར་གནས་པར་མཛད་དུ་གསོལ། །ལྷ་ཀླུ་དགའ་བས་དུས་སུ་ཆར་འབེབས་ཤིང་། །ས་གཞི་སྐྱོང་རྣམས་ཆོས་ལ་རྟག་ཏུ་གནས། །འབྱོར་ལྡན་སྐྱེ་བོའི་ཚོགས་ཀྱིས་ཕྱོགས་ཀུན་ཁྱབ། །བདེ་སྐྱིད་ཡུན་དུ་བརྟན་པར་མཛད་དུ་གསོལ། །མཐའ་མི་གདུག་པའི་རྒྱུ་འགྲུལ་ངང་གིས་ཆད། །ནག་ཕྱོགས་ཀླ་ཀློའི་འཇུག་པ་མིང་མི་གྲགས། །ནད་མུག་མཚོན་འཁྲུགས་འབྱུང་བཞིའི་གཡོ་འཕྲུལ་ཞི། །འགྲོ་ཀུན་བདེ་དགའ་འཕེལ་བར་མཛད་དུ་གསོལ། །བཅུད་ཀྱི་སྤྱོད་པས་སྣོད་ལ་དཔལ་སྐྱེད་ཅིང་། །བརྟན་གཡོའི་དྭངས་བཅུད་སྐྱེ་དགུའི་ངལ་འཚོར་སྨིན། །ཕན་ཚུན་རྟེན་འབྲེལ་རྒྱུ་རྐྱེན་གཅིག་ཏུ་འཚོགས། །རྫོགས་ལྡན་དགའ་སྟོན་རྒྱས་པར་མཛདདུ་གསོལ། །རྩེ་གཅིག་གསོལ་བ་འདེབས་པའི་སྐལ་བཟང་རྣམས། །གནས་སྐབས་མི་མཐུན་ཉེས་བརྒྱའི་འཇིགས་ཀུན་ཞི། །མཐུན་རྐྱེན་ཚེ་བསོད་དཔལ་འབྱོར་ལེགས་ཚོགས་རྒྱས། །གཟུངས་སྤོབས་བློ་གྲོས་འཕེལ་བར་མཛད་དུ་གསོལ། །ཚུལ་ཁྲིམས་དག་པས་ལྷར་བཅས་སྐྱེ་དགུས་བཀུར། །རང་འདོད་ཟད་པས་གཞན་ཕན་སྒོ་བརྒྱ་འབྱེད། །སྨོན་ལམ་དག་པས་འབྲེལ་ཚད་ཕྱིར་མི་ལྡོག །དོན་གཉིས་བསམ་ཀུན་འགྲུབ་པར་མཛད་དུ་གསོལ། །བཀྲ་ཤིས་ཉི་མ་སྲིད་ཞིའི་མཆོད་སྡོང་མཆོག །སྲས་བཅས་རྒྱལ་པའི་ཐུགས་རྗེའི་བདེན་བྱིན་གྱིས། །ཇི་ལྟར་གསོལ་ཞིང་སྨོན་པའི་དོན་འབྲས་ཀུན། །གེགས་མེད་མྱུར་དུ་འགྲུབ་པར་མཛད་དུ་གསོལ། །ཅེས་ཐུབ་དབང་གནས་བརྟན་བཅུ་དྲུག་གི་ཐུགས་དམ་གནད་ནས་བསྐུལ་བའི་གསོལ་འདེབས་ཕྱག་མཆོད་དང་འབྲེལ་བ་འདི་ཡང་། །རྫོགས་པའི་སངས་རྒྱས་བློ་གྲོས་མཐའ་ཡས་ཀྱི་ཞབས་ཀྱི་ཆུ་སྐྱེས་སྤྱི་བོས་ལེན་པའི་ཤཱཀྱའི་བཙུན་པ་གཞན་ཕན་ཆོས་ཀྱི་བློ་གྲོས་ཀྱིས་མེ་རྟ་ཆོ་འཕྲུལ་ཟླ་བའི་ཚེས་བཅུ་གཅིག་ཉིན་བདེ་ཆེན་པདྨ་འོད་གླིང་དུ་ལྷག་བསམ་རྩེ་གཅིག་པས་བྲིས་ཤིང་གསོལ་བ་བཏབ་པ་སིདྡྷི་རསྟུ། །། །