གསུམ་པ་མཆོད་པ་དང་བཀུར་སྟི་བགྱིས་པ་སོགས་ཀྱི་ཕན་ཡོན་འཕྲོས་དོན་དང་བཅས་ཁྱད་པར་དུ་བཤད་པ།

གསུམ་པ་མཆོད་པ་དང་བཀུར་སྟི་བགྱིས་པ་སོགས་ཀྱི་ཕན་ཡོན་འཕྲོས་དོན་དང་བཅས་ཁྱད་པར་དུ་བཤད་པ་ལ་བཞི་ལས།

དང་པོ་སྐུ་གཟུགས་དང་མཆོད་རྟེན་སོགས་ལ་མཆོད་པའི་ཕན་ཡོན་སྤྱིིར་བསྟན་པ།

དང་པོ་སྐུ་གཟུགས་དང་མཆོད་རྟེན་སོགས་ལ་མཆོད་པའི་ཕན་ཡོན་སྤྱིིར་བསྟན་པ་ནི། སྤྱིིར་མཆོད་པའི་ངོ་བོ་ནི། བཀུར་བྱའི་གནས་གང་ཞིག་སྒོ་གསུམ་གྱིས་མཆོད་པ་དང་། རྫས་ཀྱི་སྒོ་ནས་མཉེས་པར་བྱེད་པའོ། །ངེས་ཚིག་ནི། པཱུ་ཛ་ཞེས་པའི་སྒྲ་ལས་དྲངས་ན་སྔོན་དུ་བསྐྱེད་པ་དང་། ཡང་དང་ཡང་དུ་དགྱེས་པ་བསྐྱེད་པ་དང་། བཀུར་བའི་དོན་གྱི་གནས་སུ་སྟོབས་པར་བྱེད་པའི་དོན་གྱིས་མཆོད་པ་ཞེས་གྲགས། དབྱེ་ན། བྱང་ཆུབ་སེམས་དཔའི་ས་ལས། སངས་རྒྱས་ཀྱི་སྐུ་གཟུགས་ཉིད་ལ་མཆོད་པ་དང་། མཆོད་རྟེན་ལ་མཆོད་པ་དང་། མངོནསུམ་དང་། མངོན་སུམ་མ་ཡིན་པ་དང་། བདག་གིས་བྱས་པ་དང་། གཞན་ལ་བྱེད་དུ་བཅུག་པ་དང་། རྙེད་བཀུར་དང་། རྒྱ་ཆེན་པོ་དང་། ཀུན་ནས་ཉོན་མོངས་པ་མ་ཡིན་པ་དང་། སྒྲུབ་པའི་མཆོད་པ་སྟེ་བཅུ་དང་། ཆོས་དང་དགེ་འདུན་ལ་ཡང་དེ་དང་འདྲ་བར་ཅི་རིགས་པར་མཆོད་པར་གསུངས་པ་དང་། ཐེག་པ་ཆེན་པོ་མདོ་སྡེེ་རྒྱན་ལས། རབ་དྭངས་སེམས་དང་ལྡན་པ་ཡིས། །ཚོགས་གཉིས་རྫོགས་པར་བྱ་བའི་ཕྱིར། །སངས་རྒྱས་རྣམས་ལ་གོས་སོགས་ཀྱིས། །མངོན་སུམ་མངོན་སུམ་མིན་པར་མཆོད། །སངས་རྒྱས་འབྱུང་བར་དོན་ཡོད་པར། །སྨོན་ལམ་དང་ནི་ལྡན་པ་ཡི། །གསུམ་པོ་དམིགས་པར་མི་བྱེད་པ། །སངས་རྒྱས་མཆོད་པ་རྫོགས་པ་ཡིན། །ཞེས་མཆོད་པ་ལ་འཇུག་པའི་རྒྱུ་སེམས་རབ་ཏུ་དྭངས་པ་དང་མཚུངས་ལྡནདུ་གྱུར་པའི་དད་པ་དང་། ཡོངས་སུ་བསྔོ་བ་རང་གཞན་གྱི་ཚོགས་གཉིས་རྫོགས་པར་བྱ་བའི་འདུན་པ་དང་། རྟེན་རང་གི་མདུན་དུ་མངོན་སུམ་དུ་བཞུགས་པའམ་ཡིད་ཀྱིས་དམིགས་པ་དང་། དངོས་པོ་གོས་དང་རྒྱན་ལ་སོགས་པ་ཡིད་དུ་འོང་བ་དང་། རྒྱུ་སྔོན་གྱི་སྐྱེ་བ་རྣམསསུ་སངས་རྒྱས་འབྱུང་བ་ལ་དོན་ཡོད་པར་གྱུར་ཅིག་ཅེས་སྨོན་ལམ་བཏབ་པ་དང་། ཡེ་ཤེས་མཆོད་བྱ་མཆོད་བྱེད་མཆོད་ཡུལ་ཏེ་འཁོར་གསུམ་པོ་མི་དམིགས་པའི་ཤེས་རབ་ཀྱིས་ཟིན་པ་སྟེ་དྲུག་གིས་མཆོད་པ་རྫོགས་པར་གསུངས་པ་དང་། ངོམས་མི་ཤེས་པ་དང་། རྒྱ་ཆེ་བ་དང་། དགའ་བ་དང་། ཕན་པ་དང་། མ་གོས་པ་དང་། དགེ་བའི་བསམ་པ་སྟེ་དྲུག་སོགས་ཀྱང་གསུངས་ཤིང་། སྤྱོད་འཇུག་རྣམ་བཤད་ལས། རྟེན་དམ་པ་བྱང་ཆུབ་ཐོབ་འདོད་ཀྱི་བསམ་པ། ཆེད་དུ་བྱ་བ་དམ་པ་སེམས་ཅན་ཀྱི་དོན་དུ། དངོས་པོ་དམ་པ་ཡིད་འོང་གི་རྣམ་པ། ཐབས་ལ་མཁས་པ་དམ་པ་འཁོར་གསུམ་ཡོངས་སུ་དག་པ། རྣམ་པར་དག་པ་དམ་པ་མི་མཐུན་ཕྱོགས་ཀྱི་དྲི་མ་དང་བྲལ་བ། ཡོངས་སུ་བསྔོ་བ་དམ་པ་བྱང་ཆུབ་ཆེན་པོར་འདུན་པར་བསྒྱུར་བ་སྟེ་དམ་པ་དྲུག་ཏུ་གསུངས་པ་དང་། གཞན་ཡང་ཞིང་དག་པ། བསམ་པ་དག་པ། དངོས་པོ་དག་པ་སྟེ་གསུམ་དང་། རྒྱུ་བཟང་བ། དངོས་གཙང་བ། བཀོད་ལེགས་པའི་ཚུལ་གྱིས་འབུལ་བར་གསུངས་པ་སོགས་དབྱེ་བསྡུའི་ཁྱད་པར་དུ་མ་ཡོད་དོ། །དེ་ལ་སྤྱིར་རྟེན་གསུམ་བཞེངས་ཤིང་བསྙེན་བཀུར་བ་ནི། དཀོན་མཆོག་ལ་བྱ་བ་བྱེད་པ་ཡིན་པས་བསོད་ནམས་བསམ་གྱིས་མི་ཁྱབ་སྟེ། མདོ་སྡེ་དཀོན་མཆོག་སྤྲིན་ལས། ཇི་ལྟར་ན་བྱངཆུབ་སེམས་དཔའ་མཆོད་པ་དང་། རིམ་གྲོའི་སྦྱིན་པ་ཕུན་སུམ་ཚོགས་པ་ཡིན་ཞེ་ན། བྱང་ཆུབ་སེམས་དཔའ་སངས་རྒྱས་དང་། ཆོས་དང་དགེ་འདུན་ལ་བྱ་བ་དག་བྱེད་པ་དེ། ཇི་ལྟར་ན་སངས་རྒྱས་ལ་བྱ་བ་དག་བྱེད་ཅེ་ན། འདི་ལྟ་སྟེ། དེ་བཞིན་གཤེགས་པའི་མཆོད་རྟེན་དག་དང་། དེ་བཞིན་གཤེགས་པའི་སྐུ་གཟུགས་ལ་སྤོས་སམ་མེ་ཏོག་གམ། བདུག་པའམ། བྱུག་པའམ། སྐྱོང་ནུལ་ལམ། དེ་བཞིན་གཤེགས་པའི་མཆོད་རྟེན་ཞིག་པ་བཅོས་པ་དག་གིས་ཏེ། དེ་ལྟར་ན་སངས་རྒྱས་ལ་བྱ་བ་དག་བྱེད་དོ། །ཇི་ལྟར་ན་ཆོས་ལ་བྱ་བ་དག་བྱེད་ཅེ་ན་དེ་ཆོས་ཉན་ཏོ། །ཀློག་གོ །འཆད་དོ། །ཡི་གེར་འདྲིའོ། །ཁ་ཏོན་བྱེད་དོ། །ཀུན་ཆུབ་པར་བྱེད་དོ། །སེམས་སོ། །ཕྱིན་ཅི་མ་ལོག་པར་སྦྱོར་བས་གོམས་པར་བྱེད་དེ། དེ་ལྟར་ན་ཆོས་ལ་བྱ་བ་དག་བྱེད་དོ། །ཇི་ལྟར་ན་དགེ་འདུན་ལ་བྱ་བ་དག་བྱེད་ཅེ་ན། དེ་ལ་གོས་དང་། བསོད་སྙོམས་དང་། མལ་ཆ་དང་། ན་བའི་རྐྱེན་སྨན་དང་། ཡོ་བྱད་རྣམས་དང་། ཆུང་ངུ་ན་ཆུ་གྲང་མོ་ཁྱོར་བ་གང་ཙམ་ཡང་དགེ་འདུན་ལ་འབུལ་ཏེ། དེ་ལྟར་ན་དགེ་འདུན་ལ་བྱ་བ་དག་བྱེད་དོ། །དེ་ལྟར་ན་བྱང་ཆུབ་སེམས་དཔའ་མཆོད་པ་དང་རིམ་གྲོའི་སྦྱིན་པ་ཕུན་སུམ་ཚོགས་པ་ཡིན་ནོ། །ཞེས་དང་། དད་པའི་སྟོབས་བསྐྱེད་པ་ལ་འཇུག་པ་ཕྱག་རྒྱའི་མདོ་ལས། འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གདྒཱའི་ཀླུང་གི་བྱེད་མ་སྙེད་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི། རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དང་། རང་སངས་རྒྱས་དག་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་བས། རིགས་ཀྱི་བུའམ་རིགས་ཀྱི་བུ་མོ་གཞན་གང་ཞིག་གིས་སངས་རྒྱས་རི་མོར་བྲིས་པའམ། གཟུགས་སུ་བྱས་པ་མཐོང་ན། འདི་དེ་བས་ཆེས་བསོད་ནམས་གྲངས་མེད་པར་སྐྱེད་ན། ཐལ་མོ་སྦྱར་བའམ། མེ་ཏོག་གམ། བདུག་པའམ། སྤོས་སམ། མར་མེ་འབུལ་བ་ལྟ་ཅི་སྨོས་ཏེ་འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །ཞེས་དང་། ཕལ་པོ་ཆེ་ལས། རྒྱལ་བ་དེ་དག་ཐོས་མཐོང་མཆོད་པ་བྱས་པས་ཀྱང་། །ཚད་མེད་པ་ཡི་བསོད་ནམས་ཕུང་པོ་འཕེལ་བར་འགྱུར། །ཉོན་མོངས་འཁོར་བའི་སྡུག་བསྔལ་ཐམས་ཅད་སྤང་འགྱུར་ཞིང་། །འདུས་བྱས་འདི་ནང་བར་མ་དོར་ནི་ཟད་མི་འགྱུར། །ཞེས་དང་། ཁང་བུ་བརྩེགས་པའི་མདོ་ལས། ཀུན་དགའ་བོ་སངས་རྒྱས་དང་ཆོས་དང་དགེ་འདུན་ལ་དགེ་བའི་རྩ་བ་བསྐྱེད་པ་གསུམ་པོ་འདི་ནི་འཁོར་བར་ཟད་པར་མི་འགྱུར་ཞིང་ཡོངས་སུ་གཏུགས་པར་མི་འགྱུར་ལ། ཟད་མི་ཤེས་པའི་མྱ་ངན་ལས་འདས་པ་ཐོབ་པར་འགྱུར་བ་ཡིན་ནོ། །ཞེས་དང་། ངེས་པ་དང་མ་ངེས་པར་འགྲོ་བའི་ཕྱག་རྒྱ་ལ་འཇུག་པའི་མདོ་ལས། འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་ཁ་ཟས་བྱེད་དུ་བཅུག་ལ། སྟོང་གསུམ་གྱིསྟོང་ཆེན་པོ་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་རང་སངས་རྒྱས་རྣམས་ཀྱི་གནས་འཛམ་བུ་ཆུ་བོའི་གསེར་ལས་བྱས་པ། ནོར་བུ་རིན་པོ་ཆེ་གློག་གི་སྒྲོན་མས་སྤྲས་པ། ནོར་བུ་རིན་པོ་ཆེསྣང་བ་ཐམས་ཅད་བརྩེགས་པའི་སྟེགས་བུས་བསྐོར་བ། ནོར་བུ་དང་མུ་ཏིག་དང་རིན་པོ་ཆེའི་ཆུན་པོས་མཛེས་པར་བྱས་པ། གདུགས་དང་རྒྱལ་མཚན་དང་བ་དན་བསྒྲེང་བ་། ནོར་བུ་རིན་པོ་ཆེ་དབང་གི་རྒྱལ་པོའི་དྲྭ་བས་བཀབ་པ། དྲིལ་བུ་གཡེར་ཁའི་བླ་རེ་བྲེས་པ། ཙནྡན་སྦྲུལ་གྱི་སྙིང་པོས་བྱུགས་པ། མེ་ཏོག་མནྡ་ར་བ་དང་། མནྡ་ར་བ་ཆེན་པོ་དང་། མན་ཛུ་ཥ་ཀ་དང་། མན་ཛུ་ཥ་ཀ་ཆེན་པོ་དང་། སྣ་མའི་མེ་ཏོག་དང་། ཀླུ་ཤིང་གི་མེ་ཏོག་དང་། ཏར་ནི་བ་ར་ན་དང་། གོ་ཏར་ནི་དང་། དྲི་མཆོག་དང་། དྷ་ནུ་སྐ་རི་དང་། ལྷའི་སྣ་མའི་མེ་ཏོག་དང་། ཨུཏྤལ་དང་། པདྨ་དང་། ཀུ་མུད་དང་། པདྨ་དཀར་པོ་དང་། མེ་ཏོག་ཆེན་པོ་རྣམས་བཀྲམ་པ་བྱེད་དུ་བཅུག་སྟེ། རང་སངས་རྒྱས་དེ་དག་ལ་ལྷའི་ཟས་རོ་བརྒྱ་དང་ལྡན་པ་བྱིན་ཅིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གདྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི། སངས་རྒྱས་ཞེས་བྱ་བའམ། ཐམས་ཅད་མཁྱེན་པ་ཞེས་བྱ་བའམ། འཇིག་རྟེན་གྱི་མགོན་པོ་ཞེས་བྱ་བའི་སྒྲ་ཐོས་སམ། རི་མོར་བྲིས་པ་མཐོང་ངམ། གཟུགས་སུ་བྱས་པ་མཐོང་ན་འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་པར་འགྱུར་ན། གང་སོར་མོ་བཅུའི་ཐལ་མོ་སྦྱར་བ་ལྟ་ཅི་སྨོས་ཏེ། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །གང་མར་མེའམ། བདུག་པའམ། མེ་ཏོག་གམསྤོས་འབུལ་བ་ལྟ་ཅི་སྨོས་ཏེ། ཐ་ན་དེའི་ཡོན་ཏན་བསྔགས་པ་གཅིག་ཙམ་བརྗོད་ན་ཡང་འདི་ནི་དེ་བས་ཆེས་བསོད་ནམས་མང་དུ་སྐྱེད་དོ། །ལོངས་སྤྱོད་ཆེན་པོ་འགྲུབ་པར་བྱེད་ཅིང་མཐར་གྱིས་ཐམས་ཅད་མཁྱེན་པ་ཉིད་དུ་འགྲོ་བར་འགྱུར་རོ། །འཇམ་དཔལ་དཔེར་ན་ཆུའི་ཐིགས་པ་ཆུང་ངུ་རྒྱ་མཚོ་ཆེན་པོར་སོང་བ་ཡང་སྲེག་པའི་བསྐལ་པའི་མེ་མ་བྱུང་གི་བར་དུ་བར་མ་དོར་ཡོངས་སུ་ཟད་པར་མི་འགྱུར་རོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པ་ཇི་ལྟར་ཆུང་བ་ཡང་ཐམས་ཅད་མཁྱེན་པའི་ཡེ་ཤེས་ཀྱི་མེ་མབྱུང་གི་བར་དུ་བར་མ་དོར་ཡོངས་སུ་ཟད་པའམ་མཐར་ཐུག་པར་མི་འགྱུར་རོ། །འཇམ་དཔལ་དཔེར་ན་ཟླ་བའི་དཀྱིལ་འཁོར་ནི་ཇི་ལྟར་ཆུང་ཡང་འདི་ལྟ་སྟེ། བོངས་དང་ཁྱོན་དང་ཆེ་བས་སྐར་མའི་ཚོགས་ཐམས་ཅད་ཟིལ་གྱིས་མནན་ནས་ལྷང་ངེར་འདུག་ཅིང་ཀུན་ཏུ་ལྷང་ངེར་འདུག་གོ །འཇམ་དཔལ་དེ་བཞིན་དུ་དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པ་ཇི་ལྟར་ཆུང་བ་ཡང་འདི་ལྟ་སྟེ། མཐོ་བ་དང་ཡངས་པ་དང་ཆེ་བས་དགེ་བའི་རྩ་བ་ཐམས་ཅད་ཟིལ་གྱིས་མནན་ནས་ལྷང་ངེར་འདུག་གོ །འཇམ་དཔལ་དེ་ལྟར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །ཞེས་དང་། སངས་རྒྱས་ཀྱི་སྟོབས་བསྐྱེད་པའི་ཆོ་འཕྲུལ་རྣམ་པར་འཕྲུལ་པ་བསྟན་པའི་མདོ་ལས། མཆོད་རྟེན་དང་ནི་རི་མོ་དང་། །སྐུ་གཟུགས་བྱེད་དུ་གཞུག་པ་དང་། །མཆོད་དང་བཀུར་སྟི་བྱ་བའི་ཕྱིར། །གང་དག་མཚན་ནི་དྲན་བྱེད་པ། །བྱང་ཆུབ་ཕྱིར་ནི་གནས་པ་རྣམས། །ཐམས་ཅད་ཐར་པ་ཐོབ་པར་འགྱུར། །ཞེས་དང་། དམ་ཆོས་པད་དཀར་ལས། བདེ་གཤེགས་རིང་བསྲེལ་ལ་ནི་ཅུང་ཟད་དད། །སིལ་སྙན་གཅིག་བརྡུངས་པ་ཡི་སྒྲ་ཕྱུང་ངམ། །མེ་ཏོག་གཅིག་ཙམ་གྱིས་ནི་མཆོད་པ་དང་། །བདེ་གཤེགས་གཟུགས་དག་རྩིག་ངོས་བྲིས་པ་ལ། །འཁྲུགས་བཞིན་པ་ཡི་སེམས་ཀྱིས་མཆོད་ན་ཡང་། །དེ་དག་རིམ་གྱིས་སངས་རྒྱས་བྱེ་བ་མཐོང་། །མཆོད་རྟེན་དག་ལ་གང་གིས་ཐལ་མོ་སྦྱར། །ཡོངས་སུ་ཚང་པའམ་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པ་དང་། །དེ་བཞིན་ལན་ཅིག་ལུས་ཀྱང་བཏུད་པ་དང་། །གང་གིས་རིང་བསྲེལ་གནས་པ་དེ་དག་ལ། །གཡེངས་པའི་སེམས་ཀྱིས་ཕྱག་འཚལ་སངས་རྒྱས་ཤེས། །ཚིག་གཅིག་ལན་འགའ་བརྗོད་པར་བྱས་པ་ཡང་། །དེ་དག་ཀུན་གྱིས་བྱང་ཆུབ་མཆོག་འདི་འཐོབ། །ཅེས་དང་། དཀོན་མཆོག་སྤྲིན་ལས། རིགས་ཀྱི་བུ་ཆོས་བཅུ་དང་ལྡན་ན་བྱང་ཆུབ་སེམས་དཔའ་རྣམས་མངལ་གྱི་དྲི་མས་མ་གོས་པར་སྐྱེའོ། །བཅུ་གང་ཞེ་ན། འདི་ལྟ་སྟེ། དེ་བཞིན་གཤེགས་པའི་གཟུགས་བྱེད་པ་དང་། མཆོད་རྟེན་ཞིག་པ་བཅོས་པ་དང་། དེ་བཞིན་གཤེགས་པའི་མཆོད་རྟེན་དག་ལ་སྤོས་ཀྱི་བྱུག་པ་འབུལ་བ་དང་། དེ་བཞིན་གཤེགས་པའི་སྐུ་གཟུགས་དག་ལ་ཁྲུས་ཀྱི་སྤོས་ཆུ་འབུལ་བ་དང་། དེ་བཞིན་གཤེགས་པའི་མཆོད་རྟེན་དག་ལ་ཕྱག་དར་དང་། སྐྱང་ནུལ་བྱ་བ་འབུལ་བ་དང་། ཕ་མ་དག་ལ་ལུས་ཀྱི་རིམ་གྲོ་བྱེད་པ་དང་། མཁན་པོ་དང་སློབ་དཔོན་ལ་ལུས་ཀྱི་རིམ་གྲོ་བྱེད་པ་དང་། ཚངས་པ་མཚུངས་པར་སྤྱོད་པ་རྣམས་ལ་ལུས་ཀྱི་རིམ་གྲོ་བྱེད་པ་དང་། དེ་ལ་ཟང་ཟིང་མེད་པའི་སེམས་ཀྱིས་ཏེ། ཟང་ཟིང་དང་བཅས་པས་ནི་མ་ཡིན་ལ། དགེ་བའི་རྩ་བ་དེ་ཡང་འདི་ལྟར་དགེ་བའི་རྩ་བ་འདིས་སེམས་ཅན་ཐམས་ཅད་མངལ་གྱི་དྲི་མས་མ་གོས་པར་སྐྱེ་བར་གྱུར་ཅིག་ཅེས་ཡོངས་སུ་བསྔོ་ཞིང་། དེ་ཡང་བསམ་པ་ཐག་པ་ནས་སེམས་པ་སྟེ། རིགས་ཀྱི་བུ་ཆོས་བཅུ་པོ་དེ་དག་དང་ལྡན་ན་བྱང་ཆུབ་སེམས་དཔའ་རྣམས་མངལ་གྱི་དྲི་མས་མ་གོས་པར་སྐྱེའོ། །ཞེས་དང་། མེ་ཏོག་བརྩེགས་པའི་གཟུངས་ལས། གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལོ་གཅིག་གམ་ལོ་བརྒྱའམ་ལོ་སྟོང་ཡང་རུང་སྟེ་བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བ་དང་། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་རྟེན་རྣམས་ལ་མེ་ཏོག་འགའ་འབུལ་ལམ། ཆུ་སྙིམ་པ་གང་འཐོར་རམ། བྱུག་པའི་ཐིག་ལེ་འདྲིའམ། མེ་ཏོག་གི་རྡུལ་ཉལ་ཉིལ་འཕྱག་གམ། བྱུག་པ་འབུལ་ལམ། སྤོས་འབུལ་ལམ། བདུག་སྤོས་འབུལ་ལམ། མར་མེ་འབུལ་ལམ། ཕུལ་ན་དགའ་བའི་སེམས་ཀྱིས་གོམས་པའི་སྟབས་འགའ་བོར་ཏེ་སངས་རྒྱས་བཅོམ་ལྡན་འདས་ལ་ཕྱག་འཚལ་ལོ་ཞེས་སྨྲ་བ་དེ་དག་ནི། སེང་གེ་རྣམ་པར་བརྩེ་བ་བསྐལ་པ་བརྒྱའམ། བསྐལ་པ་སྟོང་དུའམ། བསྐལ་པ་བརྒྱ་ཕྲག་སྟོང་དུ་ཡང་ངན་འགྲོ་ལོག་པར་ལྟུང་བའི་གནསསུ་འགྲོ་བར་འགྱུར་བ་དེ་ནི་གནས་མེད་དོ། །ཞེས་དང་། སྙིང་རྗེ་ཆེན་པོའི་པད་དཀར་ལས། སྟོང་གསུམ་གྱི་སྟོང་ཆེན་པོའི་རྡུལ་ཕྲ་མོ་སྙེད་དེ་ཐམས་ཅད་མིར་གྱུར་ཅིང་དེ་ཐམས་ཅད་ཀྱང་འཕགས་པ་དགྲ་བཅོམ་པ་རང་སངས་རྒྱས་སུ་གྱུར་པ་ལ་གང་ཟག་གཞན་ཞིག་གིས་ཇི་སྲིད་འཁོར་བའི་ཐོག་ཐ་མི་མངོན་པ་དེ་སྲིད་དུ་བདེ་བའི་ཡོ་བྱད་ཐམས་ཅད་ཀྱིས་མཆོད་ཅིང་། དེ་དག་མྱ་ངན་ལས་འདས་པའི་མཆོད་རྟེན་རིན་པོ་ཆེ་སྣ་བདུན་ལས་བྱས་ཏེ་མཆོད་པ་ཐམས་ཅད་ཀྱིས་མཆོད་པའི་བསོད་ནམས་ཀྱིས། དེ་བཞིན་གཤེགས་པ་ལ་ཡོན་འབུལ་བའམ་ཐ་ན་ཐལ་མོ་ལན་གཅིག་སྦྱར་བའི་བསོད་ནམས་ཀྱི་གྲངས་སུ་བགྲང་བའི་ཆར་ཡང་མི་ཉེ་བ་དང་། འཛམ་བུ་གླིང་ཐམས་ཅད་རྫོགས་པའི་སངས་རྒྱས་ཀྱིས་ཡོངས་སུ་གང་བ་ལ་སྟོང་གསུམ་གྱི་འབྱོར་པའི་ཁྱད་པར་ཇི་སྙེད་པས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་མཆོད་པ་བས། དམ་པའི་ཆོས་དཀོན་མཆོག་ལ་བསྟི་སྟང་བྱས་ན་ཕན་ཡོན་ཆེ་བ་དང་། ཐེག་པ་ཆེན་པོའི་ཆོསཚུལ་བཞིན་དུ་ཉན་པ་དང་། མཉན་ནས་ཀྱང་སེ་གོལ་གཏོགས་པའི་ཡུན་ཙམ་དུ་དོན་ཡང་དག་པ་ཇི་ལྟ་བ་བཞིན་དུ་ཤེས་ཤིང་གོམས་པར་བྱས་ན་འཇིག་རྟེན་གྱི་ཁམས་མཐའ་དང་མུ་མེད་པའི་རྡུལ་གྱི་གྲངས་དང་མཉམ་པའི་སངས་རྒྱས་བཅོམ་ལྡན་འདས་རྣམས་ལ་ཇི་སྲིད་འཁོར་བའི་ཐོག་ཐ་སྲིད་དུ་མཆོད་པ་བས་དོན་ཆེ་བར་གསུངས་པ་དང་། བྱེ་བྲག་ཏུ་མདོ་སྡེ་ལས་རྣམ་འབྱེད་ལས། རྟེན་ལ་ཕྱག་འཚལ་བ། ཐལ་མོ་སྦྱར་བ། ཕྱག་དར་བྱེད་པ། གདུགས། དྲིལ་བུ། བ་དན། མེ་ཏོགཕྲེང་བ། མར་མེ། བྱུག་སྤོས། རོལ་མོ་སིལ་སྙན་རྣམས་ཕུལ་བ་ལ་སོ་སོར་ཕན་ཡོན་ཆེན་པོ་བཅུ་རེ་ཡོད་པར་གསུངས་ཤིང་། ན་བཟའ་ཕུལ་བའི་ཕན་ཡོད་བཅུ་གཉིས་འཐོབ་པར་གསུངས་པ་སོགས་མདོ་སྡེ་རིན་པོ་ཆེ་རྣམས་ནས་རྒྱ་ཆེར་གསུངས་པ་ཞིབ་པར་གཞན་དུ་ཤེས་པར་བྱ་ལ། འདིར་ཕྱོགས་ཙམ་མཚོན་ན། ཐོག་མར་དཀོན་མཆོག་གསུམ་ལ་སྐྱབས་སུ་སོང་བའི་ཕན་ཡོན་ནི། ཕག་གི་རྟོགས་བརྗོད་ལས། གང་ཞིག་སངས་རྒྱས་སྐྱབས་འགྲོ་བ། །དེ་དག་ངན་འགྲོར་མི་འགྲོ་སྟེ། །མི་ཡི་ལུས་ཀྱང་སྤངས་ནས་ནི། །ལྷ་ཡི་ལུས་སུ་སྐྱེ་བར་འགྱུར། །ཞེས་དང་། ཉི་མའི་སྙིང་པོའི་མདོ་ལས། སངས་རྒྱས་སྐྱབས་སུ་སེམས་ཅན་གང་འགྲོ་བ། །བདུད་རྣམས་བྱེ་བས་བསད་པར་མི་ནུས་ཤིང་། །ཚུལ་ཁྲིམས་ཉམས་ཤིང་བློ་ནི་འཁྲུགས་ཟིན་ཀྱང་། །དེ་ནི་ངེས་པར་སྐྱེ་བའི་ཕ་རོལ་འགྲོ། །ཞེས་དང་། མདོ་རྒྱལ་མཚན་དམ་པ་ལས། གང་ཞིག་སངས་རྒྱས་ཆོས་དང་ནི། །དགེ་འདུན་དག་ལ་སྐྱབས་འགྲོ་བ། །སྡུག་བསྔལ་སྡུག་བསྔལ་ཀུན་འབྱུང་དང་། །སྡུག་བསྔལ་ཡང་དག་འགགས་པ་དང་། །བདེ་གཞི་མྱ་ངན་འདས་བྱས་ནས། །སྡུག་བསྔལ་ཀུན་ལས་གྲོལ་བར་འགྱུར། །ཞེས་དང་། མྱང་འདས་ལས། གསུམ་ལ་སྐྱབས་སུ་འགྲོ་བ་གང་། །བསོད་ནམས་ཡེ་ཤེས་དམ་པའི་ཚོགས། །འཇིག་རྟེན་རྒྱལ་བའི་ཆོས་འཕེལ་བས། །སངས་རྒྱས་ཉིད་ནི་ཐོབ་པར་འགྱུར། །ཞེས་དང་། དཀོན་བརྩེགས་ལས། མི་གང་གསུམ་ལ་སྐྱབས་འགྲོ་བ། །དེ་ཡི་ཚོགས་ཀྱང་རབ་རྫོགས་ཤིང་། །སངས་རྒྱས་ཉིད་ཀྱང་འགྲུབ་པ་དང་། །ཆོས་དང་དགེ་འདུན་ཐོབ་པར་འགྱུར། །ཞེས་དང་། དྲི་མ་མེད་པའི་མདོ་ལས། སྐྱབས་སུ་སོང་བའི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་བས་ལྷག་པར་འགྱུར། །ཞེས་སོ། །ཐེག་ཆེན་བྱང་ཆུབ་ཏུ་སེམས་བསྐྱེད་པའི་ཕན་ཡོན་ཡང་། རྣམ་སྣང་མངོན་བྱང་ལས། གསང་བའི་བདག་པོ། ཐམས་ཅད་མཁྱེན་པའི་ཡེ་ཤེས་དེ་ནི་སྙིང་རྗེའི་རྩ་བ་ལས་བྱུང་བ་ཡིན། བྱང་ཆུབ་སེམས་ཀྱི་རྒྱུ་ལས་བྱུང་བ་ཡིན། ཐབས་ཀྱིས་མཐར་ཕྱིན་པ་ཡིན་ནོ། །ཞེས་དང་། བྱང་ཆུབ་སེམས་འགྲེལ་ལས། བྱང་ཆུབ་སེམས་ནི་མ་བསྐྱེད་པར། །སངས་རྒྱས་ནམ་ཡང་མི་ཐོབ་ཅིང་། །འཁོར་བར་རང་གཞན་དོན་གྲུབ་པའི། །ཐབས་གཞན་ཡོད་པ་མ་ཡིན་ནོ། །ཞེས་དང་། མདོ་རྒྱན་ལས། བློ་ལྡན་སེམས་མཆོག་བསྐྱེད་མ་ཐག་ཏུ་ཡང་། །མཐའ་ཡས་ཉེས་པ་བྱེད་ལས་སེམས་རབ་སྡོམ། །གཉིས་འཕེལ་བྱེད་པ་རྟག་ཏུ་དགེ་བ་དང་། །བརྩེ་ལྡན་བདེ་དང་སྡུག་བསྔལ་དག་གིས་དགའ། །ཞེས་དང་། འཕགས་པ་བྱམས་པ་འཇུག་པའི་མདོ་ལས། གང་གིས་སྟོང་གསུམ་རིན་ཆེན་གང་བྱས་ལ། །སྟོབས་བཅུ་མངའ་བ་རྣམས་ལ་འབུལ་བྱེད་པ། །དེ་བས་བྱང་ཆུབ་ཏུ་ནི་སྨོན་བྱེད་པ། །བསོད་ནམས་ཞིང་དུ་མང་པོར་འཕེལ་བར་འགྱུར། །གང་གིས་ཞིང་རྣམས་གདྒཱའི་བྱེ་མ་སྙེད། །རིན་ཆེན་གང་བར་བྱས་ཏེ་སྦྱིན་པ་བྱིན། །དེ་བས་བྱང་ཆུབ་ཏུ་ནི་སྨོན་བྱེད་པ། །བསོད་ནམས་ཞིང་དུ་མང་པོར་འཕེལ་བར་འགྱུར། །གང་གིས་བསྐལ་པ་བྱེ་བ་ཁྲག་ཁྲིག་ཏུ། །སེམས་ཅན་ཐམས་ཅད་ལ་ནི་མཆོད་པ་བྱེད། །དེ་བས་བྱང་ཆུབ་ཏུ་ནི་སྨོན་བྱེད་པ། །བསོད་ནམས་ཤིན་ཏུ་མང་པོར་འཕེལ་བར་འགྱུར། །གལ་ཏེ་སེམས་ཅན་ཐམས་ཅད་དགྲ་བཅོམ་གྱུར། །ཡེ་ཤེས་དབང་ཐོབ་གྱུར་པ་དེ་དག་ལ། །བསོད་ནམས་འདོད་པའི་གང་ཟག་ལ་ལ་ཞིག །བསྐལ་པ་ཁྲག་ཁྲིག་བར་དུ་མཆོད་པ་བྱེད། །གང་གིས་སྙིང་རྗེ་བསྐྱེད་ནས་བྱང་ཆུབཏུ། །རྒྱ་ཆེན་སེམས་ནི་བསྐྱེད་པར་བྱར་གྱུར་ཏེ། །སེམས་ཅན་ལ་ལ་གང་གིས་བྱང་ཆུབ་ཏུ། །སེམས་ཀྱི་གཙོ་བོ་བསྐྱེད་པར་བྱས་ནས་ཀྱང་། །གོམ་པ་བདུན་ནི་བོར་བའི་བསོད་ནམས་ནི། །དེ་བས་ཁྱད་པར་འཕགས་པར་འགྱུར་བ་ཡིན། །ཞེས་དང་། དཔས་བྱིན་གྱིས་ཞུས་པ་ལས། གདྒཱའི་བྱེ་མའི་གྲངས་སྙེད་ཀྱི། །སངས་རྒྱས་ཞིང་ཀུན་མི་གང་གིས། །རིན་ཆེན་བདུན་གྱིས་ཡོངས་བཀང་སྟེ། །སངས་རྒྱས་རྣམས་ལ་ཕུལ་བ་བས། །གང་གིས་ཐལ་མོ་སྦྱར་བྱས་ཏེ། །བྱང་ཆུབ་ཏུ་ནི་སེམས་བཏུད་ན། །མཆོད་པ་འདི་ནི་ཁྱད་པར་འཕགས། །འདི་ལ་མཐའ་ནི་མ་མཆིས་སོ། །ཞེས་དང་། ཏིང་འཛིན་རྒྱལ་པོ་ལས། བྱེ་བ་ཁྲག་ཁྲིག་གཏམས་པའི་ཞིང་དག་ན། མཆོད་པ་རྣམས་མང་དཔག་མེད་ཅི་ཡོད་པ། །སྐྱེས་མཆོག་རྣམས་ལ་ཉིན་རེ་རྟག་མཆོད་པས། བྱམས་པའི་སེམས་ཀྱི་གྲངས་དང་ཆར་མི་ཕོད། །ཅེས་དང་། དཀོན་མཆོག་ཏ་ལ་ལས། བྱང་ཆུབ་གཞིར་གྱུར་པ་ནི་རང་བྱུང་སེམས། །ཐོག་མ་ཉིད་དུ་སྐྱེས་པ་གང་ཡིན་པ། །དེ་ཡི་ཡོན་ཏན་བསྔགས་པ་མཐའ་ཡས་ཏེ། །མཚུངས་མེད་རྣམས་ཀྱིས་དེ་དག་བརྗོད་མི་སྤྱོད། །ཅེས་དང་། བློ་གྲོས་རྒྱ་མཚོས་ཞུས་པའི་མདོ་ལས། རྫོགས་པའི་བྱང་ཆུབ་སེམས་དང་ཆོས་འཛིན་དང་། །ཆོས་སྒྲུབ་པ་དང་སྲོག་ཆགས་སྙིང་བརྩེ་བ། །ཆོས་བཞི་འདི་དག་ཡོན་ཏན་མཐའ་ཡས་ཏེ། །འདི་དག་མཐའ་ནི་རྒྱལ་བས་མི་གསུང་ངོ་། །ཞེས་སོ། །རྟེན་གསུམ་ལ་བསྐོར་བ་བྱས་པའི་ཕན་ཡོན་ཡང་འཕགས་པ་སྤྱན་རས་གཟིགས་ཞེས་བྱ་བའི་ཐེག་པ་ཆེན་པོའི་མདོ་ལས། སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་ཏུ་ནི་སེམས་བསྐྱེད་ནས། །འཇིག་རྟེན་མགོན་གྱི་མཆོད་རྟེན་ལ། །སུ་ཞིག་བསྐོར་བ་བྱེད་བ་ནི། །ཚེ་རབས་དག་ནི་ཐམས་ཅད་དུ། །བྱང་ཆུབ་སྤྱད་པ་སྤྱོད་པའི་ཚེ། །དྲན་དང་ལྡན་ཞིང་བློ་གྲོས་ལྡན། །བསོད་ནམས་ལྡན་ཞིང་འཇིགས་མེད་འགྱུར། །མཆོད་རྟེན་བསྐོར་བ་བྱས་ན་ནི། །ཚེ་རབས་དག་ནི་ཐམས་ཅད་དུ། །ལྷ་དང་ཀླུ་དང་གནོད་སྦྱིན་དང་། །སྲིན་པོ་རྣམས་ཀྱིས་མཆོད་པར་འགྱུར། །ངས་ནི་གང་དག་བསྟན་པ་ཡི། །མི་ཁོམ་བརྒྱད་པོ་དེ་དག་སྤོང་། །སངས་རྒྱས་འབྱུང་བ་རབ་མཛེས་པ། །མཉེས་པར་བྱེད་འདི་དལ་བ་གཅིག །མདོག་ལྡན་གཟུགས་ནི་ཕུན་སུམ་ཚོགས། །མཚན་གྱིས་ལེགས་པར་བརྒྱན་པ་དང་། །མཐུ་དང་སྟོབས་དང་ལྡན་པར་འགྱུར། །ལེ་ལོ་ཅན་དུ་དེ་མི་འགྱུར། །དེ་ནི་ཕྱུག་ཅིང་ནོར་ཆེར་འགྱུར། །བསོད་ནམས་ལྡན་ཞིང་རྫི་བ་མེད། །འཇིག་རྟེན་སྒྲོན་མ་མཉེས་བྱས་ནས། །ཡང་དང་ཡང་དུ་བསྟི་སྟང་བྱེད། །བདག་མེད་སྟོང་པའི་ཆོས་ཐོས་ནས། །དེ་ནི་ཆོས་ལ་རྨོངས་མི་འགྱུར། །མྱུར་དུ་དད་པ་འཐོབ་འགྱུར་ཞིང་། །ཆོས་དོན་ཇི་བཞིན་མཁས་པར་འགྱུར། །ཚོང་དཔོན་ཁྱིམ་དང་རྒྱས་པ་དང་། །ཕྱུག་པོ་རྣམས་སུ་སྐྱེ་བར་འགྱུར། །དཔའ་ཞིང་སྦྱིན་པའི་བདག་པོར་འགྱུར། །གཏོང་བ་བཏང་ཞིང་སེར་སྣ་མེད། །འཛམ་བུའི་གླིང་ན་གང་ཡང་རུང་། །ཁྱད་པར་ཅན་གྱི་རིགས་མཛེས་པ། །དེར་ནི་བརྟན་པ་དེ་སྐྱེ་སྟེེ། །དམའ་བ་དག་ནི་རྣམ་པར་སྤངས། །མཆོད་རྟེན་བསྐོར་བ་བྱས་ན་ནི། །སྐྱེ་བ་ཐམས་ཅད་ཀུན་ཏུ་ཡང་། །དབང་ཆེར་གྲགས་པའི་ཁྱིམ་བདག་དང་། །དཔལ་དང་གཟི་བརྗིད་ལྡན་པར་འགྱུར། །བྲམ་ཟེ་སཱ་ལ་ཆེ་འདྲ་དང་། །ཚུལ་ཁྲིམས་ལྡན་ཞིང་མང་ཐོས་དང་། །རྒྱལ་རིགས་སཱ་ལ་ཆེ་འདྲ་དང་། །ཕྱུག་ཅིང་ནོར་ཆེན་ལྡན་པར་འགྱུར། །རིས་བསྐོར་རྒྱ་མཚོ་ཚུན་ཆད་ཀྱི། །ས་ཀུན་ལ་ནི་གང་སྨོན་པ། །གླིང་བཞི་དག་གི་དབང་ཕྱུག་བླ། །རྒྱལ་པོ་ཆོས་དང་ལྡན་པར་འགྱུར། །འཁོར་ལོས་སྒྱུར་བ་རྫུ་འཕྲུལ་ཆེ། །རིན་ཆེན་བདུག་དང་ལྡན་པར་འགྱུར། །རྒྱལ་སྲིད་གནས་ནས་སངས་རྒྱས་ལ། །ཡང་དང་ཡང་དུ་བསྟི་སྟང་བྱེད། །འདི་ནས་ཤི་འཕོས་མཐོ་རིས་སུ། །སོང་ནས་སངས་རྒྱས་བསྟན་ལ་དད། །ལྷུན་པོའི་ཟོམ་གྱི་དབང་ཕྱུག་པོ། །ལྷ་ཡི་དབང་པོ་བརྒྱ་བྱིན་འགྱུར། །ལྷ་དབང་ཤིན་ཏུ་འཐབ་བྲལ་དང་། དེ་བཞིན་དུ་ནི་དགའ་ལྡན་དང་། །ལྷ་དབང་ཤིན་ཏུ་འཕྲུལ་དགའ་དང་། །དབང་སྒྱུར་འཇིགས་པ་མེད་པར་འགྱུར། །མཆོད་རྟེན་བསྐོར་བ་བྱས་ན་ནི། །དེ་ནི་ཚངས་པའི་འཇིག་རྟེན་དུ། །ཚངས་པའི་དབང་ཕྱུག་མཁས་འགྱུར་ཞིང་། །ལྷ་རྣམས་བྱེ་བས་མཆོད་པར་འགྱུར། །འཇིག་རྟེན་མགོན་གྱི་མཆོད་རྟེན་ལ། །མི་གང་སྐོར་བ་བྱེད་པ་ཡི། །བསྔགས་པ་བསྐལ་པ་བྱེ་བ་ཡང་། །བརྗོད་པས་ཟད་པ་བྱ་མི་ནུས། །ཞེས་དང་། མཆོད་རྟེན་བསྐོར་བའི་ཚིགས་བཅད་ལས། མཆོད་རྟེན་བསྐོར་བ་བྱས་པ་ཡིས། །ལྷ་ཀླུ་གནོད་སྤྱིན་དྲི་ཟ་དང་། ལྷ་མིན་མཁའ་ལྡིང་མིའམ་ཅི། །ལྟོ་འཕྱེ་ཆེ་རྣམས་མཆོད་བྱེད་འགྱུར། །དལ་བ་རྙེད་དཀའ་ཐོབ་གྱུར་ནས། །སྐད་ཅིག་ཙམ་གྱི་བར་དུ་ཡང་། །མཆོད་རྟེན་བསྐོར་བ་བྱས་པས་ནི། །མི་ཁོམ་བརྒྱད་རྣམས་སྤོང་བར་འགྱུར། །དྲན་དང་ལྡན་ཞིང་བློ་གྲོས་ལྡན། །ཁ་དོག་ལྡན་ཞིང་མཛངས་པ་དང་། ཐམས་ཅད་དུ་ནི་མཆོད་པར་འགྱུར། །ལྷ་དང་དེ་བཞིན་མི་རྣམས་ཀྱིས། །ཚེ་རིང་བ་ཡང་དེ་ཡིས་ཐོབ། །གྲགས་པ་ཆེན་པོའང་འཐོབ་པར་འགྱུར། །ཞེས་པ་ནས། དྲན་པ་ཉེ་བར་བཞག་པ་བཞི། །སེམས་ཀྱི་ཚད་མེད་བཞི་པོ་དང་། །རྫུ་འཕྲུལ་རྐང་པའི་དབང་ཡང་འཐོབ། །འཕགས་པའི་བདེན་པ་བཞི་པོ་དང་། །དབང་པོ་རྣམས་དང་སྟོབས་རྣམས་དང་། །བྱང་ཆུབ་ཡན་ལག་འབྲས་བུ་འཐོབ། །མངོན་ཤེས་དྲུག་ལྡན་ཟག་པ་མེད། །ཉོན་མོངས་ཐམས་ཅད་སྤངས་པ་ཡིན། །དགྲ་བཅོམ་རྫུ་འཕྲུལ་ཆེན་པོར་འགྱུར། །འདོད་ཆགས་ཞེ་སྡང་སྤངས་པ་དང་། །འཁོར་རྣམས་ཐམས་ཅད་སྤངས་པ་ཡི། །རང་རྒྱལ་བྱང་ཆུབ་འཐོབ་པར་འགྱུར། །འཇིག་རྟེན་དུ་ནི་དེ་བཞིན་གཤེགས། །མཚན་རྣམས་ཀྱིས་ནི་བརྒྱན་པ་དང་། །གསེར་གྱི་སྐུ་མདོག་འཐོབ་པར་འགྱུར། །ལུས་ཀྱི་ལས་ཀྱང་བསྐོར་བ་ཡིན། །ངག་གི་ལས་ཀྱང་བསྐོར་བ་ཡིན། །ཡིད་ཀྱི་ལས་ཀྱང་བསྐོར་བ་ཡིན། །སྨོན་ལམ་བཏབ་པའང་བསྐོར་བ་ཡིན། །འདིར་ནི་བསྐོར་བ་བྱས་པ་ཡིས། །བགྲོད་དཀའི་བདེ་དགུར་དོན་རྣམས་འགྲུབ། །འཇིག་རྟེན་མགོན་པོའི་མཆོད་རྟེན་ལ། །བསྐོར་བ་བྱས་པའི་ཡོན་ཏན་གང་། །དེ་ནི་ཚིག་ཙམ་ཉི་ཚེ་ཡིས། །ལེགས་པར་བསྟན་པའི་མི་ནུས་སོ། །ཞེས་པའི་བར་གྱིས་རྒྱ་ཆེར་བསྟན་པ་བཞིན་ནོ། །ཕྱག་འཚལ་བའི་ཕན་ཡོན་ཡང་། མདོ་སྔ་མ་ལས། བློ་གྲོས་རྣམ་པར་དག་པ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་གང་དག་གིས་དེ་བཞིན་གཤེགས་པའི་མཆོད་རྟེན་མཐོང་ནས་དད་པ་བསྐྱེད་དེ། པུས་མོ་གཉིས་ཀྱི་ལྷ་ང་ས་ལ་བཙུགས་ནས་ཕྱག་འཚལ་ཞིང་ཕྱག་བྱེད་དེ། དེ་བཞིན་གཤེགས་པ་སྐྱེས་བུ་ཆེན་པོའི་མཚནསུམ་ཅུ་གཉིས་ཀྱིས་སྐུ་ལུས་ལེགས་པར་བརྒྱན་པ་དེ་ཅི་འདྲ་བར་བདག་གི་ལུས་ཀྱང་དེ་འདྲ་བར་གྱུར་ཅིག་ཅེས་དེ་ལ་མོས་པ་བསྐྱེད་ན། བློ་གྲོས་རྣམ་པར་དག་པ་བསོད་ནམས་ཀྱི་ཕུང་པོ་དེའི་མཐའ་བརྗོད་པར་མི་ནུས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གནས་པའི་ཕྱིར་རོ། །བསོད་ནམས་ཀྱི་ཕུང་པོ་དེ་ནི་རྒྱལ་པོ་ཉིད་དམ། བརྒྱ་བྱིན་ཉིད་དམ། ཚངས་པ་ཉིད་དམ། རང་སངས་རྒྱས་ཉིད་དམ། ཡང་དག་པར་རྫོགས་པའི་སངས་རྒྱས་ཀྱི་ཐེག་པ་བླ་ན་མེད་པས་ཀྱང་ཟད་པར་བྱ་མི་ནུས་སོ། །ཞེས་དང་། འཇིག་རྟེན་སངས་རྒྱས་ཇི་ལྟར་འགྱུར་ཞེས་མོས་སྐྱེས་དེ། །སངས་རྒྱས་མཆོད་རྟེན་ལ་ནི་པུས་མོ་གཉིས་འཛུགས་དང་། །སུ་ཞིག་བྱང་ཆུབ་གཞོལ་ནས་ཕྱོགས་རྣམས་ཀུན་འགྲོ་བ། །དེ་འགྲོ་ཚེ་ན་འཇིག་རྟེན་གསུམ་པོ་འདུད་པར་བྱེད། །ཅེས་པ་ནས། བཅོམ་ལྡན་མཆོད་རྟེན་དག་ལ་པུས་བཙུགས་ཕྱག་བྱ་བ། །དེ་ལ་འཇིགས་རྟེན་ཀུན་གྱི་རྒྱལ་པོས་རབ་ཏུ་འདུད། །ལྷ་དང་ཀླུ་དང་མི་དང་ལྟོ་འཕྱེ་ཆེན་པོས་འདུད། །བསྐལ་པ་མཐའ་ཡས་རྣམས་སུ་དབུགས་འབྱིན་ཐོབ་པར་འགྱུར། །གང་ཚེ་རྒྱལ་བ་དམ་པ་བྱུང་བར་གྱུར་པའི་ཚེ། །དེ་བཞིན་གཤེགས་པ་རྣམས་དང་ཉེ་བར་འགྱུར་བ་ཐོབ། །འདྲེན་པ་གཞལ་ཡས་རྣམས་ལ་མཆོད་པ་བྱེད་པར་འགྱུར། །འཇིག་རྟེན་སངས་རྒྱས་གྱུར་ཅེས་མོས་པ་བསྐྱེད་ནས་ནི། །བཅོམ་ལྡན་མཆོད་རྟེན་རྣམས་ལ་པུས་བཙུགས་ཕྱག་འཚལ་བ། །བསྐལ་པ་བྱེ་བ་ཁྲག་ཁྲིག་བརྒྱ་བགྲངས་ཟད་འགྱུར་ན། །དེ་ནི་རིང་པོར་མི་ཐོགས་བྱང་ཆུབ་མཚུངས་མེད་འཐོབ། །གང་ཞིག་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལ། །བསྐལ་པ་བྱེ་བ་གཞལ་ཡས་བསྟི་སྟང་བྱེད་པ་བས། །གང་ཞིག་ཕྱི་དུས་མི་བཟད་བསྐལ་པ་འདི་ལ་ནི། །མཆོད་རྟེན་ཕྱག་འཚལ་དེ་ཡི་བསོད་ནམས་ཆེས་མང་ངོ་། །ཞེས་དང་། འཇིག་རྟེན་སངས་རྒྱས་འགྱུར་བྱར་མོས་བསྐྱེད་དེ། །སྟོན་པའི་མཆོད་རྟེན་ཐལསྦྱར་ཕྱག་འཚལ་བ། །འཇིག་རྟེན་དག་ན་བླ་མར་བཀུར་སྟི་བྱ། །དེ་ནི་མཛེས་ཤིང་ལྟ་ན་སྡུག་པར་འགྱུར། །དེ་འདིས་རྒྱལ་སྲིད་ཐོབ་ནས་ལྷ་ཀླུ་མི། །ལྟོ་འཕྱེ་ཆེ་དང་འཇིག་རྟེན་ཐམས་ཅད་འདུད། །སྟོང་གི་འཇིག་རྟེན་ཁམས་ཀུན་རྒྱས་པར་འགྱུར། །དབང་ཕྱུག་ཉིད་དུ་དབང་ཐོབ་རྒྱལ་སྲིད་སྟོན། །དེ་ཡི་ཡུལ་ན་སེམས་ཅན་གང་གནས་པ། །དེ་ཀུན་སངས་རྒྱས་ཡེ་ཤེས་རྫོགས་ལ་འགོད། །དེས་ནི་ངན་སོང་ས་ཡང་རྣམ་པར་སྤོང་། །དེ་དག་རྣམས་ཀྱི་དོན་མཆོག་དམ་པ་བྱེད། །བསོད་ནམས་བློ་གྲོས་དྲན་ལྡན་མཆོད་འོས་འགྱུར། །དབུགས་ཕྱིན་ཐོབ་ནས་འཇིག་རྟེན་ཀུན་ཏུ་རྒྱུ། །དེ་ཡི་གཡོག་འཁོར་ཡིད་འོང་སྒྲ་སྐད་ལྡན། །བསམ་པ་ཇི་བཞིན་དེ་དག་དགའ་བ་བསྐྱེད། །སེམས་ཅན་རྣམས་ལ་མི་ལྷོད་ཞི་ཚིག་སྟོན། །དེ་ལ་སུ་ཡང་དབངཕྱུག་མེད་མི་བྱེད། །སྐྱེ་བོ་ཚོགས་ཆེན་དག་གིས་བལྟ་འོས་འགྱུར། །དེ་ཡི་གཡོག་ཀྱང་སྒྲ་དབྱངས་ཡན་ལག་དག །སངས་རྒྱས་མཆོད་རྟེན་ཐལ་སྦྱར་ཕྱག་འཚལ་བ། །སྦྱིིན་དང་སྙན་པར་སྨྲ་དང་དོན་སྤྱོད་དང་། །དོན་མཐུན་པ་དག་སྐྱེ་བོ་མང་ལ་བྱེད། །སྤྱོས་ཤིང་བརྒྱད་ཀྱང་ཁྲོ་བའི་དངོས་མི་སྐྱེད། །མཐོ་རིས་འཇིག་རྟེན་གནས་ཤིང་ལྷ་དབང་འགྱུར། །མིར་གྱུར་ནའང་མི་ཡི་རྒྱལ་པོར་འོང་། །དེ་ནི་གཞར་ཡང་ཡོངས་སུ་ཉམས་མི་འགྱུར། །དེ་ནི་གཞར་ཡང་ངན་སོང་ཕྱིས་མི་ལྟུང་། །འཇིག་རྟེན་འདིར་དེ་རྟག་ཏུ་འདོད་པ་སྤོང་། །ནོར་ཅན་ནང་ན་ཕྱུག་ཅིང་མཛོད་མང་འགྱུར། །ཞེས་དང་། གསལ་རྒྱལ་གྱི་ཚིགས་སུ་བཅད་པ་ལས། མི་རྣམས་གང་དག་སངས་རྒྱས་མཆོད་རྟེན་ནམ། །སྐུ་གཟུགས་དག་ལ་མགོས་བཏུད་གུས་ཕྱག་འཚལ། །དེ་དག་ལྷ་རྣམས་དང་ནི་མི་རྣམས་ཀྱིས། །ཆེར་ཡང་ཆེ་བར་བཀུར་བའི་གནསསུ་འགྱུར། །ཞེས་སོ། །མཎྜལ་ཕུལ་བའི་ཕན་ཡོན་ཡང་། མཁས་མཆོག་དཔའ་བོས། འཇིག་རྟེན་གསུམ་གྱིས་མཆོད་པ་ཡི། །སངས་རྒྱས་ལ་ནི་གང་ཞིག་འདིར། །མཎྜལ་མེ་ཏོག་བཅས་བྱེད་པ། །འགྲོ་བའི་བདག་པོ་ཚེ་རིང་ཞིང་། །སྣ་ཚོགས་ནད་ཀྱི་འཇིགས་ལས་གྲོལ། །གང་ཡིན་དེ་ཡིས་སྐད་ཅིག་འཐོབ། །བདེ་གཤེགས་མཎྜལ་བྱེད་དེ་དག །ཕ་རོལ་ཕྱིན་དྲུག་འཐོབགྱུར་ཏེ། །ཆུ་དང་ས་བསྲེས་བཏང་སྦྱིན་པ། །གྲོག་མ་སོགས་སེལ་ཚུལ་ཁྲིམས་ཏེ། །བསྲེས་ནས་ཉེད་པ་བཟོད་པ་ཡིན། །འབད་པ་བྱས་པ་བརྩོན་འགྲུས་ཡིན། །སྐད་ཅིག་དེ་ལ་རྩེ་གཅིག་ཏུ། །སེམས་འཛིན་བྱེད་པ་བསམ་གཏན་ཡིན། །ལེགས་པར་གཟོབ་པ་ཤེས་རབ་བོ། །སྣ་ཚོགས་བསོད་ནམས་ཀྱིས་རྒྱས་ལ། །ས་གཞི་བྲིས་པ་འབུལ་བྱེད་པ། །ལྷ་ཡི་བདེ་བ་ཐམས་ཅད་དང་། །ལོངས་སྤྱོད་མཆོག་དང་ལྡན་འགྱུར་ཞིང་། །མིར་སྐྱེས་གསེར་ལས་ལྷག་པ་ཡི། །ཁ་དོག་དང་ལྡན་མཛེས་པ་དང་། །པདྨའི་མདངས་ལྡན་ཡན་ལག་ཚང་། །མིག་ནི་དཀྱུས་རིང་མཛེས་པར་འགྱུར། །ཞེས་སོ། །ཡན་ལག་བདུན་པ་ཕུལ་བའི་ཕན་ཡོན་ཡང་། དཔལ་སྦས་ཀྱིས་ཞུས་པའི་མདོ་ལས། གང་གིས་ཕྱོགས་བཅུའི་སངས་རྒྱས་ལ། །དམིགས་ནས་ཐལ་མོ་སྦྱར་བྱས་ཏེ། །ཕྱག་འཚལ་དེ་བཞིན་མཆོད་བྱེད་དམ། །བསོད་ནམས་དག་ལ་ཡི་རང་ཞིང་། །སྡིག་པ་དག་ཀྱང་འཆགས་པར་བགྱིད། །བསྐུལ་དང་གསོལ་བ་འདེབས་གྱུར་པ། །དེ་ཡི་བསོད་ནམས་ཕུང་པོ་ནི། །ནམ་མཁའ་གང་བར་རྟག་ཏུ་འབྱུང་། །ཞེས་སོ། །མེ་ཏོག་དང་མེ་ཏོག་གི་ཕྲེང་བ་འབུལ་བའི་ཕན་ཡོན་ཡང་། སྤྱན་གཟིགས་ཀྱི་མདོ་ལས། སངས་རྒྱས་དམ་པ་སྦྱིན་གནས་མཚུངས་པ་མེད་གྱུར་པ། །སྤྱོད་པ་དམ་པ་སྤྱད་ནས་ཁྱད་པར་བརྙེས་གྱུར་པ། །མི་ཡི་ཁྱུ་མཆོག་དེ་ལ་འདིར་ནི་མཆོད་བྱས་ན། །རྣམ་པར་སྨིན་པ་དམ་པ་མཚུངས་མེད་རང་བཞིན་འགྱུར། །བྱང་ཆུབ་ཏུ་ནི་སེམས་བསྔོས་ཏེ། །མེ་ཏོག་ཕྲེང་བ་བྱས་ནས་སུ། །མཆོད་རྟེན་དག་ལ་སུས་འབུལ་བ། །དེ་ནི་ནམ་ཡང་ཕོངས་མི་འགྱུར། །མི་ཡི་ནང་ནས་ཤི་འཕོས་ནས། །སུམ་ཅུ་རྩ་གསུམ་འགྲོ་བར་འགྱུར། །དེར་ནི་རིན་ཆེན་སྣ་ཚོགས་ཀྱི། །གཞལ་མེད་ཁང་པ་འཐོབ་པར་འགྱུར། །མཆོད་རྟེན་ཕྲེང་བ་འདིར་ཕུལ་ན། །ཁང་བཟང་དག་དང་ཁང་བརྩེགས་པ། །ལྷ་ཡི་བུ་མོས་བསྟེན་པ་རྣམས། །སུམ་ཅུ་རྩ་གསུམསྤྱོད་པར་འགྱུར། །ཡན་ལག་བརྒྱད་ལྡན་ཆུས་གང་ཞིང་། །གསེར་གྱི་བྱེ་མ་བརྡལ་གྱུར་པ། །བཻཌཱུཪྱ་དང་ཤེལ་དག་གི། །ལྷ་ཡི་རྫིང་བུ་འཐོབ་པར་འགྱུར། །དེ་ནི་ལྷ་ཡི་དགའ་སྤྱད་ནས། །མཁས་པ་ཚེ་ཚད་རྫོགས་པར་འགྱུར། །ལྷ་ཡི་འཇིག་རྟེན་ཤི་འཕོས་ནས། །མི་ནང་ལོངསསྤྱོད་ལྡན་པར་འགྱུར། །དགེ་བའི་རྩ་བ་དེ་ཉིད་ཀྱིས། །མཁས་པ་བག་ཡོད་གྱུར་ནས་ནི། །དེ་བཞིན་གཤེགས་པ་མཉེས་བྱས་ཏེ། །རྐང་གཉིས་མཆོག་ལ་མཆོད་པ་བྱེད། །མཆོད་རྟེན་ཕྲེང་བ་འབུལ་བྱེད་པ། །དེ་ནི་འདོད་ཆགས་མི་འཕྲོག་ཞིང་། །ཞེ་སྡང་གིས་ཀྱང་འཕྲོག་མི་འགྱུར། །དེ་ནི་ནམ་ཡང་རྨོངས་མི་འགྱུར། །རྐང་གཉིས་མཆོག་ལ་མཆོད་བྱས་ན། །དེ་ནི་ཚེ་རབས་ཐམས་ཅད་དུ། །ཆགས་པ་མེད་ཅིང་ཞེ་སྡང་མེད། །བརྐམ་པ་མེད་ཅིང་དབང་པོ་བསྡམས། །མཆོད་རྟེན་ཕྲེང་བ་འབུལ་བྱེད་པ། །ཚེ་རབས་བྱེ་བ་སྟོང་རྣམས་དང་། །ཁྲག་ཁྲིག་དག་ནི་བརྒྱ་བགྲངས་པ། །ཀུན་ཏུ་བཀུར་སྟི་བྱས་པར་འགྱུར། །དེ་ནི་འཁོར་ལོས་སྒྱུར་བར་འགྱུར། །བརྒྱ་བྱིན་ལྷ་ཡི་དབང་ཕྱུག་འགྱུར། །ཚངས་པའི་འཇིག་རྟེན་ཚངས་པར་འགྱུར། །ཞེས་དང་། གང་ཞིག་དགའ་བའི་སེམས་ཀྱིས་མེ་ཏོག་བླང་། །དད་སྐྱེས་འཇིག་རྟེན་མགོན་ལ་ཆར་དུ་གཏོར། །དེ་ནི་མི་ཡི་འཇིག་རྟེན་བསོད་ནམས་ལྡན། །རྒྱལ་སྲིད་གནས་ནས་རྒྱལ་བ་མཆོག་བཀུར་འགྱུར། །མྱ་ངན་བསྐམས་ཤིང་ཐ་བ་དྲིར་ལྡན་ལུས། །ཡན་ལག་ལེགས་གནས་མཚུངས་མེད་འཐོབ་པར་འགྱུར། །སྐྱེ་བོ་མང་པོས་བལྟ་བའི་འོས་ཡིན་ཏེ། །དམྱལ་བ་དགྲ་རྩ་འདོད་པ་སྤོང་བར་འགྱུར། །སྤྱད་པ་རྣམ་པར་སྤྱོད་ཚེ་འདོད་པ་ལ། །ངན་སྐྱུགས་ཁུང་ལྟར་སྨད་པར་ཤེས་པར་འགྱུར། །ཚངས་སྤྱོད་དགེ་བ་ཁྱད་པར་འཕགས་ལ་སྤྱོད། །དགའ་བའི་སེམས་ཀྱིས་རྟག་ཏུ་སྤྱོད་པར་འགྱུར། །བསྐལ་པ་མཐའ་ཡིས་མང་དུ་དེ་ཁ་ནས། །རབ་མཛེས་ཨུཏྤལ་བསུང་ནི་འབྱུང་བར་འགྱུར། །དེ་ཡི་ལུས་ནི་གསེར་གྱི་མདོག་འདྲ་ཞིང་། །ཙནྡན་ལྟ་བུའི་དྲི་ཞིམ་ངད་ཀྱང་འབྱུང་། །སྤྱོད་པ་རྣམ་པར་སྤྱོད་ཚེ་ཁྲོ་བ་དང་། །ཐ་བ་དྲི་སྐྱོན་གཏི་མུག་གནོད་མི་བྱེད། །དམན་པ་མེད་པའི་སེམས་ཀྱིས་དབུགས་ཕྱིན་རྙེད། །བག་ཡོད་ལྷ་ཡི་ནང་ནས་རྒྱལ་པོ་འཐོབ། །གང་ཚེ་རྒྱལ་བ་མྱ་ངན་འདས་པ་ན། །དེ་ནི་གུས་པས་དེ་དག་ཆོས་ཀྱང་འཛིན། །མི་དམན་དགའ་བའི་སེམས་ཀྱིས་སྦྱིན་པ་སྦྱིན། །བཅོམ་ལྡན་མྱ་ངན་འདས་པའི་རིང་བསྲེལ་མཆོད། །རྒྱལ་བ་མཆོག་གི་བསྟན་པ་འཇིག་དུས་ཚེ། །རབ་ཏུ་དཀའ་བསསྟོན་པའི་ཆོས་ཚུལ་འཛིན། །དེས་ནི་ཆོས་མཆོག་མཛད་པ་དེ་སྤྱད་པས། །གནོང་པས་འཆི་བའི་དུས་བྱེད་གཞར་མི་འབྱུང་། །གལ་ཏེ་སེམས་ཅན་ཐམས་ཅད་སངས་རྒྱས་ཤིང་། །ཉོན་མོངས་མེད་པ་གསེར་མདོག་སྟོབས་བཅུར་ལྡན། །དེ་དག་བསྐལ་བྱེ་ཁྲག་ཁྲིག་བརྒྱ་སྟོངདུ། །རྒྱལ་བ་མཆོག་ལ་མཆོད་པའི་བསྔགས་བརྗོད་ནུས། །འཇིག་རྟེན་ཀུན་ཏུ་སྡིག་པའི་ལས་སྤངས་ཏེ། །དགའ་བའི་སེམས་ཀྱིས་མཆོག་གི་ལས་བྱས་ཤིང་། །རླབས་ཆེན་སྤྱོད་ཚེ་དོན་ནི་ལེགས་བྱས་ནས། །འཇིག་རྟེན་མཐུ་ཆེན་རྫོགས་པའི་སངས་རྒྱས་འགྱུར། །ཞེས་དང་། གསལ་རྒྱལ་ལས། སུ་དག་དཀོན་མཆོག་གསུམ་ལ་མེ་ཏོག་དང་། །འབྲས་བུ་གསར་ཐོག་བྱུང་བ་འབུལ་བྱེད་པ། །དེ་དག་འགྲོ་བ་རྣམས་སུ་འཁོར་བ་ན། །རོ་མཆོག་ཀུན་ཐོབ་མི་བརྫི་སྟོབས་དང་ལྡན། །ཕྲེང་བ་མེ་ཏོག་རྒྱ་ཆེན་ཆར་རྣམས་ཀྱིས། །སུ་དག་འདིར་ནི་རྒྱལ་བའི་གཟུགས་ལ་མཆོད། །དེ་དག་ལྷ་དང་མི་ཡི་འཇིག་རྟེན་དུ། །ཆ་བྱད་ཡིད་འོང་སྣ་ཚོགས་ལེགས་པར་བརྒྱན། །ཞེས་སོ། །བདུག་སྤོས་ཕུལ་བའི་ཕན་ཡོན་ཡང་། མདོ་སྔ་མ་ལས། གང་ཞིག་སྤོས་ཆུང་ཡུངས་འབྲུ་ཙམ་བླངས་ཏེ། །བཅོམ་ལྡན་མཆོད་རྟེན་རྣམས་ལ་བདུག་བྱེད་པ། །དེ་ནི་བསོད་ནམས་ལྡན་ཞིང་ཕྱོགས་ཀུན་རྒྱལ། །ནད་མེད་གྱུར་ཅིང་བློ་བརྟན་བག་ཡོད་ལ། །སྤྱད་པ་རྣམ་པར་སྦྱང་ཚེ་མྱ་ངན་འདུལ། །སྐྱེ་བོ་མང་པོ་དགའ་ཞིང་ཡིད་དུ་འོང་། །རྒྱལ་པོ་ཐོབ་ནས་རྒྱལ་བ་མཆོག་བཀུར་འགྱུར། །མཐུ་ཆེན་རབ་མཁས་འཁོར་ལོས་སྒྱུར་འགྱུར་ཏེ། །གསེར་གྱི་མདོག་ལྡན་མཚན་གྱི་གོ་ཆ་ཅན། །འཇིག་རྟེན་ཀུན་ན་ཡིད་འོང་དྲི་ལྡན་འཐོང་། །དེ་ལ་ཡིད་མི་བདེ་དང་སྡུག་བསྔལ་མེད། །སྤྱད་པ་སྤྱོད་ཚེ་ལོངས་སྤྱོད་ཉམས་མི་འགྱུར། །ཕྱུག་ཅིང་ནོར་ལྡན་མཛོད་ནི་རབ་ཏུ་མང་། །མྱ་ངན་མེད་འགྱུར་འཇིག་རྟེན་ཀུན་ཏུ་རྒྱུ། །སྐྱེ་བོ་མང་པོ་ལྷགས་ཏེ་དེ་ལ་འདྲི། །རྒྱལ་བ་མཆོག་གི་བསྟན་པ་ཁྱད་འཕགས་ཆོས། །ཚིག་རབ་བརྗོད་ཅིང་ཐེ་ཚོམ་སེལ་བར་བྱེད། །ཆོས་ཐོས་ཡིད་བདེ་སླར་ཡང་སྨྲ་བར་བྱེད། །སྡིག་པའི་ལས་མེད་བློ་རྒྱ་ཆེ་དང་ལྡན། །རྒྱལ་བས་གསུངས་པའི་ཆོས་མཆོག་ཁྱད་འཕགས་པ། །དགའ་བར་འགྱུར་ལ་རྟག་ཏུ་མཁས་བྱས་ཏེ། །མིག་ཀྱང་སྦྱོང་ཞིང་མུན་པ་སེལ་བར་བྱེད། །འདོད་ཆགས་མི་ཆེ་ཞེ་སྡང་ཆེ་བ་མིན། །དེ་ནི་ཚངས་སྤྱོད་དག་པ་མཆོག་འདི་སྤྱོད། །མི་ཡི་དོན་ནི་དཔག་ཏུ་མེད་པར་བྱེད། །བཅོམ་ལྡན་མཆོད་རྟེན་རྣམས་ལ་སྤོས་བདུགས་ན། །དེ་ལ་གནོད་པར་སེམས་པ་སུ་ཡང་མེད། །དེ་ནི་ནམ་ཡང་ལོངས་སྤྱོད་ཉམས་མི་འགྱུར། །ལྟ་བར་འོས་ཤིང་ནོར་ཆེན་ལྡན་པར་འགྱུར། །བསྐལ་པ་བྱེ་བ་ཁྲག་ཁྲིག་བརྒྱ་རྣམས་སུ། །སེམས་ནི་རྣམ་དག་སྡིག་པ་རྣམ་དག་ཅིང་། ཞི་ཞིང་རབ་ཞི་ཞི་དུལ་ལྡན་གྱུར་ན། །མི་དམན་སེམས་ཀྱིས་བྱང་ཆུབ་མཚུངས་མེད་འཐོབ། །སེམས་ཅན་བྱེ་བ་ཁྲག་ཁྲིག་བརྒྱ་མཐའ་ཡས། །མྱ་ངན་མེད་བདེ་ཞི་བ་མཆོག་བཀོད་ཅིང་། །འཁོར་ལོ་མཚུངས་མེད་འཇིག་རྟེན་ཀུན་བསྐོར་ན། །ཕྱི་ནས་ཉོན་མོངས་རྡུལ་མེད་མྱ་ངན་འདས། །ཞེས་དང་། མདོ་ཕྱི་མ་ལས། སངས་རྒྱས་མཆོད་རྟེན་དག་ལ་དྲི་ཞིམ་ཕུལ། །བདུག་སྤོས་རྒྱ་ཆེན་མང་པོ་ལྡན་སྦྱར་ནང་། །ཨ་ག་རུ་ཡི་བདུག་སྤོས་ཕུལ་བ་ཡིས། །དེ་ཡི་ལུས་ཀུན་སྤོས་ངད་ལྡན་པར་འགྱུར། །ཞེས་སོ། །མར་མེ་ཕུལ་བའི་ཕན་ཡོན་ཡང་། འཕགས་པ་མར་མེ་འབུལ་བའི་མདོ་ལས། དེ་བཞིན་གཤེགས་པའི་རྟེན་ལ་དད་པའི་སེམས་ཀྱིས་མར་མེ་ཆུང་ངུ་ངན་ངོན་ཙམ་མམ། ཐེམ་སྐས་ཀྱི་གཞི་གཅིག་སྣང་བ་ཙམ་མམ། ཡུད་ཙམ་གློག་གི་རྒྱུན་ཙམ་སྣང་བར་བྱས་པའི་བསོད་ནམས་ཀྱི་འབྲས་བུའང་བསམ་གྱིས་མི་ཁྱབ་པས་སངས་རྒྱས་ཉག་གཅིག་མ་གཏོགས་ཉན་ཐོས་དང་རང་སངས་རྒྱས་སོགས་ཀྱིས་ཤེས་པར་མི་ནུས་པ་དང་། མར་མེ་ཕུལ་བས་འཆི་བའི་དུས་ཀྱི་ཚེ་ཁྱད་པར་ཅན་གྱི་སྣང་བ་གསུམ་དང་བཞི་རྣམས་འཐོབ་པར་དང་། སུམ་ཅུ་རྩ་གསུམ་དུ་སྐྱེས་ནས་ལྷའི་བུ་ཡོངས་སུ་དག་པ་ལྔ་དང་ལྡན་པར་འགྱུར་བ་དང་། ནམ་ཡང་ལོག་པར་མི་ལྟུང་ཞིང་མིག་རྣམ་པར་དག་པ་སོགས་ཡོན་ཏན་ཁྱད་པར་ཅན་དུ་མ་འཐོབ་ཅིང་། སངས་རྒྱས་མཐོང་ལ་ཆོས་ཀྱི་སྣང་བ་འཐོབ་པ་དང་། འདུན་པ་བཞི། ཡོངས་སུ་དག་པ་བཞི། ཆོས་ཀྱི་མཆོག་བརྒྱད་ཕྲག་གཉིས། སོ་སོ་ཡང་དག་རིག་པ་བཞི་ལ་སོགས་པ་འཐོབ་ཅིང་། འཇིགས་པ་དང་མྱ་ངན་ཐམས་ཅད་དང་བྲལ་བ་དང་། དེའང་རང་སངས་རྒྱས་ལ་བསྐལ་པའི་བར་ཕུལ་བ་ལས་སངས་རྒྱས་ལ་རྩྭའི་སྒྲོོན་མེ་ཙམ་འབུལ་བ་འབྲསབུ་ཆེ་བ་སོགས་གསུངས་ཤིང་། སྤྱན་གཟིགས་མདོར་ཡང་། སངས་རྒྱས་མཆོད་རྟེན་མར་མེ་གཅིག་ཕུལ་ན། །འདི་ནས་བཟུང་སྟེ་སྲིད་པའི་རྩེ་མོའི་བར། །སངས་རྒྱས་ཞིང་ནི་འཛམ་ཀླུང་གསེར་གྱིས་གང་། །དེ་འདྲའི་དཔལ་དེ་ཟད་པར་བྱ་མི་ནུས། །བདེ་གཤེགས་མཆོད་རྟེན་མར་མེ་ཕུལ་བྱས་ན། །དེ་ཡི་ལུས་ནི་མདོག་ངན་ཡང་མི་འགྱུར། །གཟུགས་མཆོག་སྲ་ཞིང་ལག་པ་གཟུ་བ་འདྲ། །སྣང་བ་ཐོབ་ནས་འཇིག་རྟེན་ཀུན་ཏུ་རྒྱུ། །གལ་ཏེ་རྒྱལ་བ་དམ་པ་བྱོན་གྱུར་ན། །དེ་བཞིན་གཤེགས་པ་རྣམས་དང་ཉེ་བར་འགྱུར། །ཉེ་དུར་འགྱུར་རམ་ཡང་ན་བུར་ཡང་འགྱུར། །དེ་ནི་ཡེ་ཤེས་ཕུང་པོ་མྱུར་དུ་འཐོབ། །གལ་ཏེ་ཁྲག་ཁྲིག་བརྒྱ་སྟོང་སངས་རྒྱས་ཞིང་། །ཡུངས་འབྲུ་དག་གིས་ཕྱུར་བུར་གང་གྱུར་པ། །བགྲང་བ་དང་ནི་གཞལ་ཞིང་བརྗོད་པར་ནུས། །བདེ་གཤེགས་མར་མེ་གཅིག་ཕུལ་དེ་ལྟ་མིན། །སངས་རྒྱས་དམ་པ་མཚུངས་མེད་སྦྱིན་པའི་གནས། །སྤྱོད་པ་མཆོག་སྤྱད་ཁྱད་པར་བརྙེས་གྱུར་པ། །མི་མཆོག་དེ་ལ་མཆོད་པ་འདིར་བྱས་པ། །རྣམ་པར་སྨིན་པ་དམ་པ་གཞལ་ཡས་འགྱུར། །གལ་ཏེ་མི་འཇེད་འཇིག་རྟེན་ཁམས་འདི་ཀུན། །ནོར་བུ་རིན་ཆེན་བཻ་ཌཱུཪྱས་གང་བ། །ཟད་པར་བྱ་ནུས་སངས་རྒྱས་མཆོད་རྟེན་ལ། །མར་མེ་གཅིག་ཕུལ་དཔལ་དེ་ཟད་མི་འགྱུར། །ཀཱར་ཥ་པ་ཎས་མི་འཇེད་འཇིག་རྟེན་ཁམས། །འོག་ནས་སྲིད་པའི་རྩེ་མོའི་བར་གང་བ། །ཟད་པར༴མར་མེ༴སངས་རྒྱས་ཞིང་སྟོང་དེ་དག་ཙནྡན་གྱིས། །འོག་ནས་སྲིད་པའི་རྩེ་མོའི་དཔལ་གང་བ། །ཟད་པར༴མར་མེ༴ཚངས་པའི་འཇིག་རྟེན་ཡོད་པའི་ལྷ་རས་ཀྱི། །གོས་ཀྱིས་སངས་རྒྱས་ཞིང་སྟོང་གང་གྱུར་པ། །ཟད་པར༴མར་མེ༴ཀླུ་དང་ལྷ་མིན་མི་དང་ལྟོ་འཕྱེ་ཆེ། །ལྷ་ཡི་ལྷ་རྫས་ནོར་བུ་རིན་ཆེན་མང་། །ཟད་པར༴མར་མེ༴ལྷ་ཡི་འཇིག་རྟེན་ཡོད་པའི་ལྷ་ཡི་སྤོས། །དེ་དག་མི་མཇེད་འདི་ཀུན་གང་གྱུར་པ། །ཟད་པར་བྱ་ནུས་སངས་རྒྱས་མཆོད་རྟེན་ལ། །མར་མེ་གཅིགཕུལ་དཔལ་དེ་ཟད་མི་འགྱུར། །ཕྱོགས་དང་ཕྱོགས་མཚམས་ཚད་ནི་ཤེས་པར་ནུས། །ནམ་མཁའི་ཁམས་འདིའི་ཚད་ཀྱང་ཤེས་པར་ནུས། །སངས་རྒྱས་མཆོད་རྟེན་མར་མེ་གཅིག་ཕུལ་བའི། །དེ་འདྲའི་དཔལ་དེ་ཟད་པར་བྱ་མི་ནུས། །ཞེས་དང་། གསལ་རྒྱལ་ལས། དཔེ་མེད་མཆོད་རྟེན་མར་མེ་ཕུལ་བ་ཡིས། །ཨུཏྤལ་སྔོན་པོ་ཁ་བྱེ་འདབ་འདྲའི་མིག །གསལ་ཞིང་སྡུག་ལ་མིག་གི་དཀྱུས་རིང་མཛེས། །དྲི་མ་མེད་པ་ལྷ་ཡི་མིག་དང་ལྡན། །སུ་དག་མཆོད་རྟེན་མར་མེ་དངར་བ་ཕུལ། །དེ་དག་མིག་ཏུ་སྡུག་ཅིང་མཛོད་རབ་རྒྱས། །མིག་གི་དཀྱུས་རིང་མཐོན་ཀའི་མདོག་དང་ལྡན། །སྐྱེས་པ་བུད་མེད་དག་གིས་བལྟ་བར་འོས། །མཚན་མོ་ཐུབ་ཆེན་སྤྱན་སྔར་ཐལ་སྦྱར་འཁོད། །འབྱོར་དང་ལྡན་པས་མར་མེའི་སྡོང་བུ་འབུལ། །དེ་དག་སྲིད་པ་གཞན་དུ་འབྲས་བུར་ལྡན། །རིན་ཆེན་རགས་པའི་འོད་ཀྱི་ལུས་ཀྱང་འཐོབ། །རྒྱལ་ལ་ཕུལ་བའི་མར་མེ་འཆི་བ་ན། །དགའ་བའི་སེམས་ཀྱིས་འདིར་ནི་དགའ་བཞིན་དུ། །སྙིང་པོ་སྐུལ་བར་བྱེད་པ་དེ་དག་ནི། །སྤྱན་ལྔ་དག་ཀྱང་ངེས་པར་འཐོབ་པར་འགྱུར། །ཞེས་སོ། །དྲིའི་བྱུག་པ་དང་ཁྲུས་སོགས་ཕུལ་བའི་ཕན་ཡོན་ཡང་། སྔ་མ་ལས། དྲི་ཞིམ་ཡིད་འོངསྤོས་ཀྱི་ཆོ་ག་བཞིན། །སངས་རྒྱས་མཆོད་རྟེན་ལ་ནི་སུས་སྐུད་པ། །དེ་ནི་ཐོབ་རྙེད་འཇིག་རྟེན་ཀུན་ཏུ་རྒྱུ། །དེ་ནི་ས་འདིར་སྙིང་པོ་བླང་བར་འགྱུར། །རྒྱལ་བའི་མཆོད་རྟེན་སྤོས་བྱུགས་ཕུལ་བྱས་ན། །བཅོམ་ལྡན་འདས་ཀྱི་བསྟན་པ་འཇིག་འགྱུར་ཚེ། །འཛམ་བུ་གླིང་དུ་སྐྱེ་བར་མི་འགྱུར་ཞིང་། །དེ་ནི་དེ་ཚེ་མཐོ་རིས་བདག་པོར་འགྱུར། །དྲི་མི་ཞིམ་དང་མི་གཙང་སྨད་པ་རྣམས། །རྟག་ཏུ་སྤོང་ཞིང་ཚུལ་ཁྲིམས་ཕུང་པོར་གནས། །དེ་ནི་རྟག་ཏུ་ཚངས་སྤྱོད་མཆོག་འདིར་སྤྱོད། །འདི་ནས་ཤི་འཕོས་མཐོ་རིས་ལྷ་དབང་འགྱུར། །རིང་པོར་མི་ཐོགས་དོན་སྟོང་རྣམས་ལ་རྟོག །ལྷ་རྣམས་ལ་ནི་རྒྱ་ཆེན་དོན་ཡང་བྱེད། །གང་གི་ཚེ་ན་མི་ཡི་འཇིག་རྟེན་ན། །ཞེ་སྡང་མེད་སེམས་འཇམ་ཞིང་མཉེན་གྱུར་པ། །དེ་ཚེ་དེ་ན་འཛམ་བུའི་གླིང་དུ་གནས། །ཁྱད་འཕགས་ཚིག་ལྡན་སྒྲ་དབྱངས་ཡིད་འོང་འགྱུར། །སྐྱེ་བོ་མང་པོ་ཡིད་འོང་དགའ་ཞིང་བཀུར། །དེ་ཡི་ཁ་བཞིན་རྟག་ཏུ་གསལ་བར་འགྱུར། །དེ་ནི་ངན་སོང་ས་རྣམས་མ་ལུས་སྤོང་། །དེ་བཞིན་གཤེགས་དང་ཉེ་བ་འཐོབ་པར་འགྱུར། །དད་པ་ཐོབ་ཅིང་རྟག་ཏུ་བདེ་ལ་དགའ། །རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན། །རྒྱལ་པོ་སྟོབས་ལྡན་འཁོར་ལོས་སྒྱུར་བར་འགྱུར། །བློན་པོ་ཚོང་དཔོན་ཁྱིམ་བདག་བསོད་ནམས་ལྡན། །ཆོས་རྗེ་འོད་མཛད་སངས་རྒྱས་སུ་ཡང་འགྱུར། །ཞེས་དང་། །ཕྱི་མ་ལས། སུ་དག་སྤོས་མཆོག་སྦྱར་བའི་འབྲུ་མར་གྱིས། །བདེ་བར་གཤེགས་པའི་མཆོད་རྟེན་ཉུག་བྱེད་པ། །དེ་དག་སྤོས་ཀྱིས་མཆོད་ཅིང་ཙནྡན་གྱིས། །ལུས་བྱུགས་ཉི་མའི་འོད་དང་འདྲ་བར་འགྱུར། །མི་རྣམས་གང་དག་ཐུབ་དབང་མཆོད་རྟེན་ལ། །སྤོས་ཆུ་གཙང་ཞིང་དྭངས་པས་ཁྲུས་གསོལ་ན། །དེ་དག་ལུས་ལ་དྲི་མ་མེད་པ་དང་། གདུང་བ་མེད་ཅིང་མདོག་འཇམ་མྱ་ངན་མེད། །ཅེས་སོ། །ཞལ་ཟས་བཟའ་བཏུང་སོགས་ཕུལ་པའི་ཕན་ཡོན་ཡང་། དེ་ཉིད་ལས། སུ་དག་རབ་ཏུ་བྱུང་དང་འཚམ་པ་ཡི། །ཁ་ཟས་བཟང་པོ་དགེ་འདུན་སྦྱིན་བྱེད་པ། །དེ་དག་འཁོར་བའི་དགོན་པར་གནས་པ་ན། །ཁ་ཟས་ཁ་དོག་རོ་ལ་སོགས་ལྡན་འཐོབ། །སུ་དག་རབ་ཏུ་བྱུང་དང་འཚམ་པ་ཡི། །བཏུང་བ་རྒྱ་ཆེན་དགེ་འདུན་སྦྱིན་བྱེད་པ། །དེ་དག་འཁོར་བའི་དགོན་པར་གནས་པ་ན། །བཏུང་བ་ཁ་དོག་རོ་ལ་སོགས་པ་འཐོབ། །ཅེས་དང་། དྲན་པ་ཉེར་བཞག་ལས། གང་ཞིག་འདི་ལ་ཟསསྦྱིན་པ། །ཚེ་དང་མདོག་དང་སྟོབས་ལྡན་ཞིང་། །དཔལ་དང་ལྡན་ཞིང་ནད་སྤངས་དང་། །རྟག་པར་བདེ་དང་ལྡན་པར་འགྱུར། །ཞེས་དང་། ལས་རྣམ་འབྱེད་ལས། ཟས་སྦྱིན་པའི་ཕན་ཡོན་བཅུ་སྟེ། ཚེ་རིང་བ་དང་། མདངས་བཟང་བ་དང་། སྟོབས་དང་ལྡན་པ་དང་དྲན་པར་དང་ལྡན་ཞིང་སྤོབས་པ་དང་ལྡན་པ། བག་ཚ་བ་མེད་པ་འཁོར་གྱི་ནང་དུ་འགྲོ་བ་དང་། འཁོར་མཐུན་པ་དང་། ལྷ་རྣམས་དང་མི་རྣམས་དགའ་བ་དང་། ལོངས་སྤྱོོད་ཆེ་བ་དང་། མཐོ་རིས་སུ་སྐྱེ་བ་དང་། ཡོངས་སུ་མྱ་ངན་ལས་འདས་པ་དང་བཅུར་གསུངས་པ་དང་། ཡང་དེ་ཉིད་ལས། བཏུང་བ་སྦྱིིན་པར་བྱས་ན། དབང་པོ་ཚང་བ་དང་། དཔྲལ་པ་དག་ཅིང་འཛུམ་བཞིན་དུ་འགྱུར་བ་དང་། ཡོན་ཏན་དང་ལྡན་པ་དང་། སེམས་རྒྱུད་མཉེན་པ་དང་། སྐོམ་པར་མི་འགྱུར་བ་དང་། སྐོམ་ན་ཆུ་འབྱུང་བར་འགྱུར་བ་དང་། ཡི་དྭགས་སུ་མི་སྐྱེ་བ་དང་། ལོངས་སྤྱོད་ཆེ་བ་དང་། མཐོ་རིས་སུ་སྐྱེ་བ་དང་། མྱུར་དུ་མྱ་ངན་ལས་འདས་པར་འགྱུར་བ་སྟེ་བཅུར་གསུངས་པས་མཚོན་ནོ། །རོལ་མོའི་བྱེ་བྲག་དང་བསྟོད་དབྱངས་སོགས་ཀྱིས་མཆོད་པའི་ཕན་ཡོན་ཡང་། སྤྱན་གཟིགས་མདོར། རོལ་མོའི་སྒྲ་ཡིས་མི་མཆོག་མཆོད་བྱས་ན། །མྱ་ངན་མེད་ཅིང་དབང་ལྡན་རྒྱལ་པོར་འོང་། །མི་ཡི་འཇིག་རྟེན་ཡིད་འོང་སྒྲ་ལྡན་འགྱུར། །དེ་སྒྲ་ཡན་ལག་ཚང་ཞིང་དག་པར་འོང་། །བཅོམ་ལྡན་མཆོད་རྟེན་རོལ་མོའི་སྒྲ་བྱས་ན། །ཤེས་བཞིན་ལྡན་ཞིང་མིག་ནི་རྣམ་དག་འགྱུར། །རྣ་བ་རྣམ་པར་དག་ཅིང་སེམས་ཀྱང་དགའ། །སྣ་ཡི་དབང་པོ་མཆོག་དང་ལྡན་པར་འགྱུར། །དེ་ཡི་ལྕེ་ནི་རབ་མཛེས་ལྟ་ན་སྡུག །ཐོག་མར་རབ་མཉེན་མཛེས་ཤིང་སྒྲ་ཡིད་འོང་། །དཔེར་ན་ལྷ་ཡི་རིན་ཆེན་བྱེའུ་འདྲ། །སྒྲ་སྐད་ཡན་ལག་བྱེ་བ་དཔག་མེད་འབྱིན། །ནམ་ཡང་སྦྲུལ་དུ་མི་འགྱུར་ལྕེ་མེད་མིན། །ཞར་བ་སྒུར་པོ་ཡ་ཡོ་ཅན་མི་འགྱུར། །ལུས་ནི་ཁྱད་པར་འཕགས་ཤིང་ཤིན་ཏུ་མཛེས། །ལྷའམ་ཀླུའམ་མིའམ་ལྟོ་འཕྱེ་ཆེ། །སུ་ཡང་དེ་ལ་མ་དད་སྐྱེད་མི་འགྱུར། །དབུགས་འབྱིན་ཐོབ་ནས་འཇིག་རྟེནཀུན་ཏུ་རྒྱུ། །དེ་ནི་མ་ནིང་ཟ་མར་གཞར་མི་འགྱུར། །ནམ་ཡང་མཛེ་དང་ཤ་བཀྲ་མི་འབྱུང་ཞིང་། །བསྔགས་པར་འོས་པའི་ལུས་ནི་འཐོབ་པར་འགྱུར། །ལྕེ་རིང་འགྱུར་ཞིང་ལུས་ཀྱང་ཆེ་བར་འགྱུར། །གསེར་གྱི་གཟུགས་ལྟར་ཁ་དོག་འབར་བར་འོང་། །ཏིང་འཛིན་བརྟན་ཞིང་ཤིན་ཏུ་རྟོགས་པར་འགྱུར། །ལྷ་ནང་བདག་པོར་འགྱུར་ཞིང་དབང་ཕྱུག་འགྱུར། །མི་ཡི་འཇིག་རྟེན་སྐྱེས་ན་དགའ་བར་འོང་། །བརྩོན་འགྲུས་ལྡན་ཞིང་བག་ཡོད་འབར་བར་འགྱུར། །བཅོམ་ལྡན་མཆོད་རྟེན་རོལ་མོའི་སྒྲ་བྱས་ན། །དེ་ལ་སུ་ཡང་ཡིད་མི་བདེ་མི་སྐྱེད། །དེ་ལསསུ་ཡང་ཚིག་རྩུབ་སྨྲ་བ་མེད། །ཕྲ་མ་ཐམས་ཅད་སྤངས་ཤིང་ཡང་དག་སྨྲ། །ཞེས་དང་། གསལ་རྒྱལ་ལས། རྒྱལ་བའི་མཆོད་རྟེན་རོལ་མོའི་སྒྲ་ཕུལ་བས། །ཟབ་ཅིང་རིགས་པའི་སྤོབས་པ་ཕུན་སུམ་ཚོགས། །ཡན་ལག་ལྔ་རྫོགས་ཡིད་འོང་ཚིག་དང་ལྡན། །སྒྲ་སྐད་དག་གིས་འཇིག་རྟེན་འགེང་བར་བྱེད། །སུ་དག་རྒྱལ་བའི་གདུང་ལྡན་བསྟོད་བྱེད་པ། །དེ་དག་གླིང་བུའི་སྒྲ་དང་སྒྲ་སྙན་དང་། །སྒྲ་སྙན་ཡིད་དུ་འོང་བ་ཐོབ་པ་དང་། །སོ་སོ་ཡང་དག་རིགས་པའང་འཐོབ་པར་འགྱུར། །ཞེས་དང་། ཚིགས་སུ་བཅད་པ་བཞི་པ་ལས། གང་གིས་ཚིགས་བཅད་འདི་བཞི་ཡིས། །དེ་བཞིན་གཤེགས་པ་བསྟོད་བྱེད་ན། །བསྐལ་པ་བྱེ་བ་སྟོང་དུ་ནི། །དེ་ནི་ངན་འགྲོར་འགྲོ་མི་འགྱུར། །ཞེས་སོ། །རྒྱལ་བའི་རྟེན་གསུམ་སོགས་ལ་ན་བཟའི་རིགས་ཕུལ་བའི་ཕན་ཡོན་ཡང་། སྤྱན་གཟིགས་མདོར། གང་ཞིག་དགའ་བའི་སེམས་ཀྱིས་གོས་ཀྱིས་ནི། །བཅོམ་ལྡན་མཆོད་རྟེན་རྣམས་ལ་མཆོད་བྱས་པ། །དེ་ནི་གོས་མཛེས་བྱེ་བ་སྟོང་རྣམས་དང་། །ཁྲག་ཁྲིག་བརྒྱ་བགྲངས་མཐའ་ཡས་རྟག་ཏུ་རྙེད། །བཅོམ་ལྡན་མཆོད་རྟེན་གོས་ཀྱིས་དཀྲིས་བྱས་ན། །དེ་ནི་བཙས་མ་ཐག་ཏུ་གོས་མཆོག་འཐོབ། །ལྷ་ཡི་ཁྱད་འཕགས་དར་གོས་རབ་བཟང་རྙེད། །བཙས་མ་ཐག་ཏུ་དེ་ལུས་ཤིན་ཏུ་བདེ། །གང་ཞིག་གོས་ཀྱིས་བཅོམ་ལྡན་མཆོད་རྟེན་དང་། །འདྲེན་པ་མཚུངས་མེད་རྣམས་ལ་མཆོད་བྱེད་པ། །དེ་འདིར་མཚུངས་པ་མེད་པའི་ལུས་ཐོབ་སྟེ། །སུམ་ཅུ་རྩ་གཉིས་མཚན་གྱི་མེ་ཏོག་རྒྱས། །ལག་མཐིལ་ནས་ནི་མུ་ཏིག་ཕྲེང་མཛེས་པ། །སྣ་ཚོགས་དག་དང་སེང་གེའི་ཕྲེང་བ་དང་། །གསེར་སྤུང་རབ་མཛེས་བསྐལ་པ་མཐའ་ཡས་འགྱུར། །ལྷའམ་ཀླུའམ་མིའམ་ལྟོ་འཕྱེ་ཆེ། །སུ་ཡང་དེ་ལ་མ་དད་སྐྱེད་མི་འགྱུར། །རྟག་ཏུ་ཚངས་པར་སྤྱོད་པ་མཆོག་འདི་སྤྱོད། །སྟོང་གི་འཇིག་རྟེན་ཁམས་ཀུན་ཟིལ་གནོན་ཏེ། །འཛམ་ཀླུང་གསེར་གྱིས་གསེར་ནི་ཟིལ་མནན་བཞིན། །སྐྱེ་དགུ་དེ་ནི་དཔག་ཏུ་མེད་པ་བྱེད། །གལ་ཏེ་རིན་ཆེན་རབ་མཆོག་སྣ་བདུན་གྱིས། །སྟོང་གི་ཞིང་ཀུན་རབ་ཏུ་བཀང་བ་ཡི། །དེ་འདྲའི་དཔལ་འདི་ཟད་པར་བྱ་ནུས་ཀྱི། །རྒྱལ་བའི་མཆོད་རྟེན་གོས་གཅིག་ཕུལ་བའི་མིན། །ནོར་བུ་རིན་ཆེན་ཟླ་བའི་འོད་རྣམས་ཀྱིས། །བྱེ་བ་ཕྲག་ཁྲིག་བརྒྱ་སྟོང་ཞིང་བཀང་བ། །དེ་འདྲའི་དཔའ་འདི་ཟད་པར་བྱ་ནུས་ཀྱི། །རྒྱལ་བའི་མཆོད་རྟེན་གོས་གཅིག་ཕུལ་བས་མིན། །ཞེས་དང་། གསལ་རྒྱལ་ལས། རྒྱལ་བའི་མཆོད་རྟེན་ལ་ནི་གོས་ཕུལ་བས། །བསོད་ནམས་བྱམས་པའི་ངོ་ཚའི་གོས་གྱོན་ཏེ། །དགའ་ཞིང་ཡོན་ཏན་ཀུན་ལྡན་སེར་སྣ་མེད། །མདོག་ཀྱང་འཇམ་ཞིང་ཁ་དོག་གསེར་འདྲར་འགྱུར། །ཞེས་སོ། །རིང་བསྲེལ་ཅན་གྱི་མཆོད་རྟེན་སོགས་ལ་རིན་པོ་ཆེའི་ཕྲ་རྒྱན་དྲྭ་ཕྱེད་དྲིལ་གཡེར་སོགས་ཕུལ་བའི་ཕན་ཡོན་ཡང་། སྔ་མ་ལས། དགའ་བའི་སེམས་ཀྱིས་མགུ་བའི་ཤུགས་བསྐྱེད་དེ། །བཅོམ་ལྡན་མཆོད་རྟེན་ནོར་བུའི་དྲྭ་བ་འབུལ། །དེ་ནི་རྒྱལ་པོ་མཚན་གྱི་གོ་ཆ་ཅན། །མཐུ་ཆེན་བླ་མ་འཁོར་ལོས་སྒྱུར་བར་འགྱུར། །ལྟ་འོས་མཚན་གྱི་གོ་ཆ་ལྡན་གྱུར་ནས། །གཞལ་མེད་ཁང་ཆེན་རབ་མཛེས་ལྟ་སྡུག་པ། །ཁ་དོག་སྣ་ཚོགས་དཔག་མེད་ལྡན་པ་དང་། །རིན་ཆེན་ཁང་བཟང་ཆེ་འོས་དག་པ་འཐོབ། །རྒྱལ་པོའི་ཕོ་བྲང་ཁྱད་པར་འཕགསགྱུར་པ། །སྐྱེས་པ་བུད་མེད་དག་གིས་གང་བ་དང་། །མཉམ་ཞིང་ལེགས་བྱས་རབ་མཛེས་ལྟ་སྡུག་པ། །དྲྭ་བ་སྣ་ཚོགས་བདེ་བྱེད་བདེ་འཇུག་འཐོབ། །རྒྱལ་མཚན་བ་དན་གསལ་བ་མཛེས་བྱས་ཤིང་། །གདུགས་བྲེས་ཤིན་ཏུ་མཛེས་ལ་ལྟ་སྡུག་དང་། །མུ་ཏིག་དྲྭ་བ་ཕྲེང་བ་དེ་འདྲ་བའི། །རྒྱལ་སྲིད་ཡོན་ཏན་ཁྱད་འཕགས་གཞན་ཡང་འཐོབ། །དེ་ཡི་ཡུལ་ན་གཞན་ནོར་འཇིག་བྱེད་པ། །ཆོམ་རྐུན་གཡོ་ལྡན་གཡོ་ཅན་གནས་མི་འགྱུར། །སེམས་ཅན་རྒྱ་ཆེན་བློ་གྲོས་ལྡན་པ་དང་། །ཕན་བྱེད་བྱམས་སེམས་ལྡན་པ་དེ་ན་གནས། །ཤི་འཕོས་བག་ཡོད་དེ་ནི་ལྷར་འགྲོ་སྟེ། །དཀར་གནག་གང་ཡིན་བདག་ཅག་ཇི་ལྟར་གནས། །འདི་ནས་ཤི་འཕོས་ཇི་ལྟར་མིར་སྐྱེ་ཞེས། །བློ་ལྡན་དེ་ནི་མཐོ་རིས་འདི་གནས་འགྱུར། །སངས་རྒྱས་སྦྱིན་གནསམྱུར་དུ་མཐོང་འགྱུར་ཏེ། །མཐོང་ནས་མཆོད་ཅིང་མཚུངས་མེད་བསྟི་སྟང་བྱེད། །སངས་རྒྱས་མཐོང་ནས་བྱང་ཆུབ་མོས་སྐྱེད་ཅིང་། །རྡུལ་བྲལ་རྣམས་ལ་ཕྱིར་ཞིང་བསྟི་སྟང་བྱེད། །ཡེ་ཤེས་མཐའ་ཡས་མཐུ་དང་རྒྱ་ཆེར་འགྱུར། །ཁྱད་པར་ས་གནས་འཕགས་པའི་སེམས་ཅན་འགྱུར། །ཞེས་དང་། ཕྱི་མ་ལས། སྐྱེ་བོ་སུ་དག་འཇིག་རྟེན་མགོན་པོ་ལ། །རིན་ཆེན་འབར་བ་ཡིད་དང་འཐད་པ་རྣམས། །འབུལ་བ་དེ་དག་རིན་ཆེན་བདུན་པོ་དང་། །བྱང་ཆུབ་ཡན་ལག་རིན་ཆེན་དྲི་མེད་འཐོབ། །རྒྱལ་བའི་མཆོད་རྟེན་དག་ལ་དྲིལ་ཕུལ་བས། །ཚིག་བཙན་གྲགས་པ་ཆེན་པོ་དག་དང་ལྡན། །ཚངས་པའི་སྒྲ་དབྱངས་ཡིད་འོང་སྐྱེ་བ་དྲན། །དེ་དག་གིས་ནི་རྒྱན་རྣམས་སྣ་ཚོགས་འཐོབ། །མཁས་པ་སུ་དག་བདེ་གཤེགས་མཆོད་རྟེན་ལ། །དད་པའི་སེམས་ཀྱིས་ཕྲེང་བ་འདོགས་བྱེད་པ། །གསེར་ཕྲེང་རིན་ཆེན་མང་པོས་ལེགས་སྤྲས་པ། །བསོད་ནམས་ལས་ལྡན་དེ་ཡི་མགོ་ལ་ཐོགས། །སྟོན་པའི་མཆོད་རྟེན་དག་ལ་རྒྱན་འཕྱང་འདོགས། །དེ་དག་དོ་ཤལ་རྒྱན་ཕྲེང་ནོར་བུ་དང་། །གདུ་བུ་དག་དང་དཔུང་རྒྱན་མཆོག་རྣམས་ཀྱིས། །ལུས་བརྒྱན་འཇིག་རྟེན་དག་ཏུ་རྒྱུ་བར་འགྱུར། །ཤིན་ཏུ་དྲི་མེད་ཟླ་བ་ཉ་འདྲ་བའི། །མེ་ལོང་སྡུག་གུ་ཐམས་ཅད་མཁྱེན་ལ་འབུལ། །དེ་དག་ཚེ་རབས་བརྒྱུད་པ་རྣམས་སུ་ཡང་། །ལྷ་མི་རྣམས་ཀྱིས་བལྟ་བར་འོས་པར་འགྱུར། །སུ་ཞིག་བདེ་བར་གཤེགས་པའི་མཆོད་རྟེན་ལ། །མཆོད་པའི་ཁྱད་པར་ཅི་ཡོད་ཅི་འབྱོར་པ། །འཚམ་པར་འབུལ་བྱེད་དེ་དག་དྲི་མེད་ཅིང་། །མྱ་ངན་མེད་པའི་བླ་མེད་བྱང་ཆུབ་འཐོབ། །ཅེས་སོ། །བ་དན་དང་གདུགས་དང་བླ་རེ་སོགས་མཆོད་པའི་ཡོ་བྱད་རིགས་ཕུལ་བའི་ཕན་ཡོན་ཡང་། དེ་ཉིད་ལས། སུ་དག་ལ་ལ་མཆོད་རྟེན་སྐུ་གཟུགས་ལ། །དད་པའི་སེམས་ཀྱིས་བླ་རེ་འབུལ་བྱེད་ན། །དེ་དག་སསྟེང་རྒྱ་མཚོའི་མཐའ་ཀླས་པ། །མ་ལུས་གནོད་མེད་རྒྱལ་གཅིག་དབང་བྱེད་འགྱུར། །བདེ་གཤེགས་མཆོད་རྟེན་དག་ལ་དགའ་བཞིན་དུ། །རྣམ་མང་རྒྱ་ཆེན་གདུགས་ནི་བརྟགས་པ་ཡིས། །ལྷ་མིའི་འཇིག་རྟེན་དག་ན་གདུགས་འདྲ་བར། །ལྷ་དང་མི་ཡི་དབང་པོ་ལྟ་བུར་འགྱུར། །མི་རྣམས་སུ་དག་སྐུ་གདུང་སྙིང་པོ་ཅན། །དྲི་མེད་བསོད་ནམས་འབྱུང་གནས་གྱུར་པ་ལ། །བ་དན་མཛེས་པ་སྣ་ཚོགས་འདོགས་པ་དག །མཐུ་དང་ལྡན་ཞིང་སྲིད་གསུམ་མཆོག་གནས་འགྱུར། །བདེ་གཤེགས་མཆོད་རྟེན་ཅོད་པཎ་བཏགས་པ་ཡིས། །མི་དབང་དཔལ་དང་ལྷ་དབང་དཔལ་ཐོབ་ཅིང་། །བདེ་བའི་མཆོག་ཀྱང་ཉམས་སུ་མྱོང་གྱུར་ནས། །རྣམ་པར་གྲོལ་པའི་ཅོད་པཎ་ཁྱད་པར་འཐོབ། །ཞེས་དང་། སྤྱན་གཟིགས་མདོར། འཇིག་རྟེན་མགོན་པོ་སྐྱོབ་པ་ལ། །དར་གྱི་དབུལ་བ་ཕུལ་བྱས་ནས། །ལྷ་ཡི་དག་དང་མི་རྣམས་ཀྱི། །དོན་རྣམས་ཐམས་ཅད་འགྲུབ་པར་འགྱུར། །དམའ་བའི་རིགས་ནི་རྣམ་སྤངས་ཏེ། །དེར་ནི་དེར་སྐྱེ་འབྱུང་མ་ཡིན། །ཕྱུག་ཅིང་ནོར་ཆེན་ལྡན་པ་དང་། །འཇིག་རྟེན་དབང་ཕྱུག་དེ་འགྱུར་རོ། །དེ་བཞིན་གཤེགས་ལ་མཆོད་བྱས་ན། །གཟུགས་དང་དོན་དང་ལོངས་སྤྱོད་དང་། །ཁ་དོག་དང་ནི་འབྱོར་པ་དང་། །ཀུན་ཏུ་གྲགས་དང་ལྡན་པར་འགྱུར། །དེ་ནི་ཚེ་རབས་དྲན་འགྱུར་ཞིང་། །འདོད་ཆགས་ཀྱིས་ཀྱང་འཕྲོག་མི་འགྱུར། །འདོད་པ་རྣམས་ཀྱི་སྐྱོོན་ཤེས་ཤིང་། །ཚངས་པརསྤྱད་པ་སྤྱོོད་པར་འགྱུར། །གཟུགས་རྣམས་དང་ནི་སྒྲ་དག་དང་། །རོ་རྣམས་ཀྱིས་ཀྱང་མི་ཚུགས་ཤིང་། །སྡིག་པའི་ལས་ནི་བྱེད་མི་འགྱུར། །དེ་ནི་སྤོས་དང་མེ་ཏོག་གིས། །ནམ་ཡང་ཕོངས་པར་མི་འགྱུར་ཞིང་། །དྲན་དང་ཤེས་རབ་ལྡན་པར་འགྱུར། །དེ་བཞིན་གཤེགས་ལ་སུས་མཆོད་པས། །དེ་ཡི་ནོར་གྱི་ཕུང་པོ་ལ། །རྒྱལ་པོ་དང་ནི་ཆོམ་རྐུན་དང་། །མེ་དང་ཆུས་ཀྱང་རེག་མི་འགྱུར། །འཇིག་རྟེན་མགོན་གྱི་མཆོད་རྟེན་ལ། །དར་གྱི་དབུལ་བ་སུས་འབུལ་བ། །དེ་ནི་སྐམ་དང་མྱ་ངན་དང་། །ནད་བུ་ཅན་དུ་གཞར་མི་འགྱུར། །ཚེ་རབས་དག་ནི་ཐམས་ཅད་དུ། །མྱ་ངན་མེད་ཅིང་གནོད་མེད་དང་། །འཁོར་ལོས་སྒྱུར་བ་འབྱོར་ཆེན་འགྱུར། །རྐང་པ་ལག་པ་མཉེན་འགྱུར་ཞིང་། །ཡན་ལག་རྣམ་པར་དག་འགྱུར་ལ། །གཟུགས་དང་ཁ་དོག་ལྡན་པར་འགྱུར། །སྡིག་པའི་ལས་ནི་རྣམ་སྤངས་ཏེ། །བྱང་ཆུབ་སྤྱད་པ་སྤྱོད་པར་བྱེད། །གང་དག་འཇིག་རྟེན་རབ་དཀོན་པ། །རྐང་གཉིས་མཆོག་རྣམས་མཐོང་བར་འགྱུར། །བསྐལ་པ་བྱེ་བསྟོང་རྣམས་དང་། །ཁྲག་ཁྲིག་དག་ནི་བརྒྱ་བགྲངས་པར། །མཆོད་ཅིང་བདེ་ལ་ཤེས་རབ་ལྡན། །བྱང་ཆུབ་དམ་པར་འཚང་ཡང་རྒྱ། །ཞེས་དང་། འཇིག་རྟེན་སངས་རྒྱས་འབྱུང་ཞེས་མོས་སྐྱེད་དེ། །བཅོམ་ལྡན་མཆོད་རྟེན་བ་དན་ཕུལ་བྱས་ན། །དེ་ནི་སྐྱེ་བོ་མང་པོའི་མཆོད་འོས་འགྱུར། །བྱང་ཆུབ་མཆོག་སྤྱད་དམ་པ་ཞི་བ་སྤྱོད། །བཅོམ་ལྡན་མཆོད་རྟེན་བ་དན་ཕུལ་བྱས་ན། །དག་ཅིང་མཆོག་གི་ལུས་ནི་འཐོབ་འགྱུར་ཏེ། །དཔེར་ན་གསེར་ལྟར་ཤིན་ཏུ་དགར་འགྱུར་ཞིང་། །ལྷ་ཡིས་བསྔགས་ལ་མཆོད་ཅིང་བླ་མར་བྱེད། །དེ་ཡི་ལུས་ནི་གསེར་གྱི་མདོག་འདྲར་འགྱུར། །དར་གྱི་གོས་དང་ལྭ་བ་བཟང་རབ་དང་། །དུ་ཀུ་ལ་དང་ཀ་ཤི་ཀ་རྣམས་དང་། །ཤིན་ཏུ་མཛེས་པའི་གོས་ཀྱང་རྙེད་པར་འགྱུར། །མཛམ་བུའི་གླིང་ན་རིགས་མཆོག་དམ་པ་གང་། །ཕྱུག་ཅིང་ཆེ་ཉིད་བདག་དབང་ནོར་མང་དང་། །དེ་དག་ཏུ་ནི་རྟག་ཏུ་དེ་སྐྱེ་སྟེ། །དམན་ཞིང་མཆོག་ཏུ་དབུལ་བ་རྣམ་པར་སྤངས། །དེ་ལ་སེམས་ཅན་སུ་ཡང་ཕྲག་དོག་མེད། །སེམས་ཅན་གནོད་པར་སེམས་པ་གཞར་མི་འབྱུང་། །གཞན་གྱི་སྡིག་པའི་ལས་ལ་དེ་སྨོད་དེ། །རྟག་ཏུ་བག་ཡོད་ཚུལ་ཁྲིམས་རྣམ་དག་འགྱུར། །འཛིན་པ་མེད་ཅིང་སེར་སྣ་མེད་པར་འོང་། །གཏོང་བ་རབ་བཏང་མྱ་ངན་མེད་པ་འཐོབ། །དེ་ནི་སྲོག་ཕྱིར་གཞན་ལ་སྦྱིན་མི་བྱེད། །ཕོངས་པ་མི་བྱེད་རྟག་ཏུ་བག་ཡོད་འགྱུར། །སངས་རྒྱས་སྟོབས་བཅུ་དེད་དཔོན་མཐོང་ནས་ནི། །དགའ་བའི་སེམས་ཀྱིས་གདུགས་དང་བ་དན་དང་། །མར་མེ་རྣམས་ཀྱིས་བཅོམ་ལྡན་འདས་ལ་མཆོད། །བྱང་ཆུབ་སེམས་མཆོག་འདི་ནི་རྟག་པར་སྤྱོོད། །མི་ཡི་འཇིག་རྟེན་བླ་མར་བསྙེན་བཀུར་བྱེད། །ལྷ་རྣམས་ལྷ་ཡི་དག་དང་མི་ཡི་གཙོ། །ཡིད་འོང་སྤོས་མཛེས་ལྟ་ནསྡུག་པ་དང་། །ནོར་བུ་ཤེལ་འདྲ་སྣ་ཚོགས་ལྡན་པ་འཐོབ། །རི་རབ་རྩེ་མོར་ལྷ་ནང་རབ་ཏུ་གསལ། །ལྷ་ཀུན་སློབ་མར་གྱུར་ནས་མངོན་དུ་འདོད། །ཆོས་ཀྱིས་དེ་དག་ཡིད་བདེ་སྐྱེད་པར་བྱེད། །དེ་ལ་དད་མཆོག་གཞའ་གསང་འཐོབ་པར་འགྱུར། །དེ་ནས་ཤི་འཕོས་མི་ཡི་འཇིག་རྟེན་དུ། །རྒྱལ་པོ་དམ་པ་སྟོབས་ལྡན་འཁོར་ལོས་སྒྱུར། །དེ་ལ་སེམས་ཅན་སུ་ཡང་སྡིག་མི་བྱེད། །སྐྱེ་བོ་མང་པོ་དགའ་ཞིང་ཡིད་འོང་འགྱུར། །རྡུལ་བསལ་སེམས་ཅན་མཆོག་ལ་རྒྱལ་མཚན་ཕུལ། །རིང་པོར་མི་ཐོགས་ནོར་ཡང་རྙེད་པར་འགྱུར། །ཤེས་རབ་མཐའ་ཡས་མཛོད་ནི་མང་ལྡན་འོང་། །སེམས་ཆུང་མི་འགྱུར་དམན་པའི་སེམས་མི་འགྱུར། །ལོངས་སྤྱོད་རྙེད་ནས་བགོད་ཅིང་བདག་ཀྱང་སྤྱོད། །དེ་ནི་འཇིགས་མེད་ཡིད་མི་བདེ་བ་མེད། །རྒྱལ་པོ་དགའ་ནས་གྲོང་དང་ཡུལ་འཁོར་བགོད། །དེ་ལ་སེམས་ཅན་སུ་ཡང་སྡིག་མི་སྐྱེད། །གཙོ་བོ་ཁྱད་པར་འཕགས་པ་མཛོད་མང་ཞིང། །ཁྱིམ་བདག་རིན་ཆེན་སྣ་ཚོགས་ལུས་བརྒྱན་འགྱུར། །རྒྱལ་པོའི་བུའམ་དེ་བཞིན་བློན་པོར་འོང་། །རྒྱལ་པོར་གྱུར་ནས་སྟོབས་ལྡན་བརྫི་བ་མེད། །བརྙས་པའི་རིགས་དམའ་ཐམས་ཅད་ཡོངས་སུ་སྤོངས། །ལོངས་སྤྱོད་ཁྱད་འཕགས་རིགས་མཆོག་རྙེད་ནས་ནི། །རྟག་ཏུ་བག་ཡོད་སེམས་ནི་ཞུམ་མི་འགྱུར། །འདོད་པ་རྣམས་ནི་ངན་སྐྱུགསཁུང་ལྟར་སྤོང་། །ཁྱད་འཕགས་གཟུགས་དང་མཚན་རྣམས་རབ་ཏུ་འཐོབ། །ཁྱད་འཕགས་རིགས་དང་དེ་བཞིན་དབང་ཕྱུག་ཉིད། །དེ་ཡི་གཡོག་འཁོར་རྟག་ཏུ་མི་ཕྱེད་འགྱུར། །སྐྱེ་བོ་མང་པོས་མདུན་དུ་བདར་བ་འོང་། །དེ་ནི་གཞན་ལ་གནོད་པའི་སེམས་མི་སྐྱེད། །སེམས་ནི་རབ་དྭངས་རྟག་ཏུ་བག་ཡོད་ལྡན། །དེ་ལ་མེ་དང་དུག་དང་མཚོན་མི་ཚུགས། །སྐྱེ་བོ་ཚོགས་ཆེན་གྱིས་ནི་བལྟ་བར་འགྱུར། །རབ་ཏུ་དགའ་ཞིང་ཐུབ་པའི་ཆོས་ལ་སྤྱོད། །ཤེས་བཞིན་ལྡན་ནས་ཡིད་བདེ་སྐྱེད་པར་བྱེད། །འཛིན་པ་མེད་ཅིང་ཆགས་མེད་སེམས་དང་ལྡན། །ཆགས་མེད་གྱུར་ནས་དེ་ལ་མི་མཐུན་མེད། །དེ་ཡི་ལུས་གཙང་ཀུན་ནས་ཉོན་མོངས་མེད། །རྣམ་དག་སེམས་ལྡན་དེ་ནི་བདེན་པར་སྨྲ། །འཇིགས་པས་ཉེན་པ་རྣམས་ལ་ཡིད་བདེ་སྐྱེད། །སེམས་ཅན་རྣམས་ཀྱི་སྐྱབས་དང་དཔུང་གཉེན་འགྱུར། །དེ་ནི་བདག་གི་དོན་ཆེན་བྱས་ནས་སུ། །གཞན་ཡང་སངས་རྒྱས་ཡེ་ཤེས་རྫོགས་ལ་འགོད། །ཤིང་དབང་ཤིང་མཆོག་དམ་པའི་དྲུང་སོང་ནས། །མཚུངས་མེད་མཆོག་ཞི་བྱང་ཆུབ་འཚང་ཡང་རྒྱ། །ཞེས་དང་། སངས་རྒྱས་དམ་པ་མི་མཆོག་བཞུད་པའི་ཚེ། །འདྲེན་པ་མཚུངས་པ་མེད་ལ་དད་བྱས་ཏེ། །སྟོན་པའི་སྐུ་ལ་ཉི་ཟེར་མི་འབབ་པར། །མེ་ཏོག་མ་ལི་ཀ་གདུགས་བཅོམ་ལྡན་ཕུལ། །དེ་ནི་ལུས་མཛེས་དམ་པ་གུས་བྱས་པས། །ལྷ་དབང་བརྒྱ་བྱིན་དུ་ནི་ལན་འབུམ་གྱུར། །འཇིག་རྟེན་ཀུན་ཏུ་ཚངས་པའི་བདག་པོར་གྱུར། །རྒྱལ་བའི་མཆོད་རྟེན་ལ་ནི་འབུམ་ཕུལ་ནས། །འཁོར་ལོས་སྒྱུར་བའི་རྒྱལ་པོ་སྟོབས་ལྡན་གྱུར། །སྟོང་ཕྲག་བཅུ་ལ་དབང་བར་ང་གྱུར་ཏེ། །ནོར་ཆེན་རབ་ཏུ་མཛོད་མང་ཚོང་དཔོན་གྱུར། །ཁྱིམ་བདག་བློ་ལྡན་བསོད་ནམས་ལྡན་པར་གྱུར། བདེ་གཤེགས་མི་མཆོག་བྱེ་བ་ཉི་ཤུ་དག །ངས་ནི་མཉེས་བྱས་གཟིམས་ཆས་ན་བཟའ་ཡིས། །མི་མཆོག་དག་ལ་བླ་མར་བསྟི་སྟང་བྱས། དེ་དག་གཙུག་ལག་ཁང་ལ་སྤོས་ཀྱིས་བསྐུས། །ང་ཡི་ཁ་དོག་ངན་པ་ཀུན་མེད་གྱུར། །ངས་ནི་ཚད་དང་གྲངས་དང་ངལ་བ་སྤོང་། །སངས་རྒྱས་སྤྱན་སྔར་དམན་མེད་སེམས་གྱུར་ཅིང་། །དེ་དག་མཆོད་པ་དམ་པ་མཆོག་གིས་མཆོད། །རྒྱན་གྱིས་བརྒྱན་པའི་གདུགས་མཛེས་ལྟ་སྡུག་པ། །སུ་ཞིག་བཅོམ་ལྡན་མཆོད་རྟེན་འབུལ་བྱེད་པ། །དེ་འདིར་ལུས་ནི་མཚུངས་པ་མེད་འགྱུར་ཏེ། །སུམ་ཅུ་རྩ་གཉིས་མཚན་གྱི་གོ་ཆར་འགྱུར། །གང་གིས་རྒྱལ་བའི་སྐུ་ནི་རབ་འབར་ཞིང་། །ཁྱད་པར་འཕགས་པའི་གཟུགས་དང་སེམས་འདྲ་དང་། །འཛམ་ཀླུང་གསེར་ལྟར་རབ་མཛེས་ལྟ་ན་སྡུག །མཚན་གྱི་མེ་ཏོག་རྒྱས་པ་མངོན་དུ་གང་། །མངོན་པར་ཤེས་པ་འཐོབ་ཅིང་དབང་ཆེར་གྲགས། །བྱང་ཆུབ་སྤྱོད་མཆོད་དམ་པ་ཞི་བ་སྤྱོད། །དེ་ནི་ནམ་ཡང་ལོངས་སྤྱོད་འགྲིབ་མི་འགྱུར། །ལྷས་ཀྱང་བསྟི་སྟང་བྱ་ཞིང་མཆོད་པར་འོང་། །བརྟན་པ་འདོད་པའི་ལོངས་སྤྱོད་གཞར་མི་དཀའ། །ཚུལ་ཁྲིམས་རྣམ་དག་རབ་མཁས་ཚངས་པར་སྤྱོད། །ཡི་དམ་བཅས་ནས་ནགས་དང་ནགས་འདབས་སོང་། །མངོན་ཤེས་འཐོབ་ཅིང་ཁྱད་པར་འཐོབ་པར་འགྱུར། །བཅོམ་ལྡན་མཆོད་རྟེན་རྣམས་ལ་གདུགས་འབུལ་བ། །ཇི་ལྟ་བུ་ཡང་བྱང་ཆུབ་སེམས་མི་འདོར། །བྱམས་ལ་གནས་ཤིང་མི་དམན་སེམས་སུ་འགྱུར། །དེ་ཡི་ཤེས་པ་ནམ་ཡང་ཉམས་པ་མེད། །ཅེས་སོ། །གཙུག་ལག་ཁང་གི་བཀོད་པ་དང་ཚོན་རྩི་ཞལ་བ་སྐུ་དཀར་སོགས་ཕུལ་བའི་ཕན་ཡོན་ཡང་། དེ་ཉིད་ལས། འཇིག་རྟེན་མགོན་པོ་སྐྱོབ་པ་ལ། །ཕྲེང་བའི་ཁང་པ་བྱས་ན་ནི། །དེ་ནི་གཡོག་འཁོར་མི་ཕྱེད་ཅིང་། །རྒྱལ་པོ་འབྱོར་པ་ཆེན་པོར་འགྱུར། །འཕགས་པ་རྣམས་ཀྱིས་གང་སྤངས་པ། །སྡིག་པའི་ལས་ནི་སྤོང་བར་བྱེད། །རྫོགས་སངས་རྒྱས་ཀྱིས་བཤད་པ་ཡི། །དགེ་བའི་ལས་ལ་བསྟེན་པར་བྱེད། །ལྷ་འམ་འོན་ཏེ་ཀླུ་རྣམས་སམ། །འཇིག་རྟེན་དག་ན་གང་མཁས་པ། །དེ་དག་དགའ་ཞིང་མགུ་བ་དང་། །བསྟི་སྟང་བྱས་ཤིང་བསྔགས་པར་འགྱུར། །བརྟན་པ་དག་ནི་གར་སྐྱེས་པ། །བསོད་ནམས་གཟི་བརྗིད་རབ་ཏུ་བརྗོད། །ཡུལ་འཁོར་དག་དང་གྲོང་ཁྱེར་དང་། །རིགས་དེར་བསྟིསྟང་བྱེད་པར་འགྱུར། །སངས་རྒྱས་གཞན་གྱིས་མི་ཐུབ་པ། །རྐང་གཉིས་མཆོག་ལ་སུས་མཆོད་པ། །དེ་དག་མཐུ་སྟོབས་ཆེ་བ་དང་། །གཡོག་འཁོར་ཆེན་པོས་མཛེས་པར་འགྱུར། །བྱང་ཆུབ་ཏུ་ནི་ཡོངས་བསྔོས་ཏེ། །ཕྲེང་བའི་གཙུག་ལག་ཁང་བྱས་ན། །སངས་རྒྱས་རྣམས་ཀྱིས་གང་བསྔགས་པའི། །འབྱོར་པ་དག་ནི་དེས་འཐོབ་བོ། །དེ་ནི་འཐེང་དང་ཞར་བ་དང་། །དམན་དང་མ་རུངས་མི་འགྱུར་གནས། །གང་དང་གང་དུ་སྐྱེས་པར་ཡང་། །མཚན་རྣམས་ཀྱིས་ནི་བརྒྱན་པར་འགྱུར། །སེམས་ཅན་དབུལ་པོ་རྣམས་མཐོང་ན། །དེ་ནི་ནོར་གྱིས་སྡུད་པར་བྱེད། །དེ་ནི་ནོར་དང་ལྡན་འགྱུར་ཞིང་། །དེ་ནི་བྱང་ཆུབ་སྤྱད་པ་སྤྱོད། །བློ་གྲོས་ཆེན་པོས་ས་འདིཀུན། །ཡོངས་སུ་བཏང་བ་བྱས་ནས་ཀྱང་། །དམན་པའི་སེམས་སུ་མི་འགྱུར་ཞིང་། །དེ་ནི་ནམ་ཡང་ཕོངས་མི་འགྱུར། །ཞེས་དང་། གསལ་རྒྱལ་ལས། ཐུབ་དབང་མཆོད་རྟེན་རྡོ་ཐལ་བྱུགས་པ་ཡིས། །ལྷ་མིའི་འཇིག་རྟེན་འདི་ན་ཚེ་རིང་ཞིང་། །ལུས་སེམས་ནད་དང་མྱ་ངན་བྱེདསྤངས་དེ། །རྟག་ཏུ་སྐྱིད་ཅིང་ནོར་གྱིས་ཕྱུག་པར་འགྱུར། །སུ་དག་བདེ་བར་གཤེགས་པའི་མཆོད་རྟེན་ལ། །ས་དང་ལྕི་བས་ཉུག་པ་དེ་དག་ནི། །ལྷ་དང་མིར་སྐྱེས་ལུས་མདོག་སྡུག་པ་དང་། །རྣམ་དག་རྨ་མེད་བདེ་དང་ལྡན་པར་འགྱུར། །སུ་ཞིག་སངས་རྒྱས་མཆོད་རྟེན་སྐུ་གཟུགས་ཁང་། །ཚོན་རྩི་སྣ་ཚོགས་དག་གིས་མཛེས་བྱེད་པ། །དེ་ནི་བདེ་གཤེགས་མངའ་བའི་ཡོན་ཏན་རྣམས། །སྣ་ཚོགས་ལྡན་པ་ཀུན་གྱིས་བརྩེགས་པར་འགྱུར། །མི་རྣམས་གང་དག་རྩྭ་ཤིང་སོ་ཕག་གིས། །འཇིག་རྟེན་བླ་མའི་སྤྱི་གབ་རིག་པས་བྱེད། །ཡང་ན་གཞན་དག་བྱེད་དུ་འཇུག་ཀྱང་རུང་། །དེ་དག་འགྲོ་བ་རྣམས་ཀྱི་སྐྱབས་འདྲར་འགྱུར། །མི་རྣམས་གང་དག་རྒྱལ་བའི་གཙང་ཁང་བྱེད། །དེ་དག་འགྲོ་བ་རྣམས་སུ་འཁོར་བ་ན། །ལྷ་དབང་གནས་འདྲའི་ཁང་ཁྱིམ་འོད་འབར་བ། །དུས་ཚིགས་ཀུན་ཏུ་བདེ་ལྡན་ཐོབ་པར་འགྱུར། །མཐོ་རིས་ལས་བཟང་འབྲས་བུའི་གནས་རྣམས་སུ། །བསྐལ་པར་དགའ་བྱེད་རྟག་ཏུ་དགའ་བཞིནདུ། །རྩེན་པར་བྱེད་ཅིང་མྱ་ངན་མེད་པ་དང་། །ཐ་མར་ཞི་བའི་གོ་འཕང་འཐོབ་པར་འགྱུར། །གང་དག་འཇའ་ཁུག་འདྲ་བའི་རྟ་བབས་མཛེས། །ཐུབ་པའི་ཆབ་སྒོར་སྦྲེེང་བྱེད་དེ་དག་ནི། །སྲིད་པ་གཞན་དུ་ཁང་ཁྱིམ་སྒོ་དང་བཅས། །རྣམ་པར་བརྒྱན་པ་རྣམས་ནི་འཐོབ་པར་འགྱུར། །མི་རྣམས་གང་དག་སྟོན་པའི་སྐུ་གདུང་ཁང་། །བསྲུང་ཕྱིར་དད་པས་འོབས་དང་སྒོ་འཛུགས་པ། །དེ་དག་ཚེ་རབས་གཞན་དུ་དགྲ་རྣམས་ཀྱིས། །དཔལ་ཡོན་རྣམས་དང་དབྲལ་བར་ཡོངས་མི་ནུས། །མི་རྣམས་སུ་དག་མཆོད་རྟེན་རྙིང་པ་རྣམས། །གཞན་གྱི་ངོར་བྱེད་མ་ཡིན་རང་གི་བློས། །རལ་ཚེམ་བྱེད་པའི་སྐྱེ་བོ་དེ་དག་ནི། །ལུས་བཟང་ཡོན་ཏན་དམ་པས་བརྒྱན་པར་འགྱུར། །སུ་དག་གླང་ཆེན་དྲིལ་སྦྱངས་སྤ་བར་བརྒྱན། །དུལ་བའི་རྟ་དང་སྦྱར་བའི་ཤིང་རྟ་དག །སྟོན་པ་དང་ནི་འཕགས་པའི་ཚོགས་ལ་འབུལ། །དེ་དག་བླ་མེད་ཐེག་ཆེན་འཐོབ་པར་འགྱུར། །ཚུལ་ཁྲིམས་ལྡན་པ་ཕྱོགས་ནས་ལྷགས་པ་ལ། །སུ་དག་དགའ་བཞིན་མལསྟན་སྦྱིན་བྱེད་པའི། །མི་རྣམས་འགྲོ་བ་དག་ཏུ་འཁོར་བ་ན། །གསེར་གྱི་ཁྲི་དང་སྟན་གྱི་མཆོག་རྣམས་འཐོབ། །སུ་དག་འཇིག་རྟེན་བླ་མས་གསུངས་པ་ཡི། །དམ་ཆོས་ཚུལ་བཟང་ཐོས་ནས་ཉམས་སུ་ལེན། །དེ་དག་ཉོན་མོངས་ཆུ་རླབས་རབ་འཇིགས་པའི། །སྲིད་པའི་རྒྱ་མཚོ་མྱུར་དུ་བརྒལ་བར་འགྱུར། །ཞེས་སོ། །གཙུག་ལག་ཁང་དང་རྟེན་ལ་ཕྱག་དར་དང་བྱི་དོར་ཐིགས་ཚག་སོགས་བྱས་པའི་ཕན་ཡོན་ནི། མདོ་སྔ་མ་ལས། བསོད་ནམས་འདོད་པ་སུ་ཞིག་ཕྱག་ཐོགས་ཏེ། །བཅོམ་ལྡན་མཆོད་རྟེན་གུས་པས་འཕྱག་བྱེད་པ། །དེ་ནི་སྨད་ཅིང་མི་གཙང་ལུས་མི་འགྱུར། །བ་སྤུའི་ཁུང་ནས་ཙནྡན་དྲི་ངད་འབྱུང་། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ། །ཡན་ལག་མ་སྨད་ཁྱད་འཕགས་ལུས་འཐོབ་ཅིང་། །མཛེས་ལ་མཚན་གྱི་གོ་ཆར་བྱས་པར་འགྱུར། །ལྷ་ཡི་ཙནྡན་ཁྱད་འཕགས་རབ་མཛེས་པའི། །གཞལ་མེད་ཁང་མཆོག་ཡིད་འོང་དྲི་ལྡན་འཐོབ། །དེ་ནི་དེ་ལ་གཞར་ཡང་སྲེད་མི་སྐྱེད། །ཡིད་འོང་དྲི་ལྡན་མཆོག་ཏུ་ལྟ་སྡུག་པའི། །ལྷ་ཡི་བུ་མོ་བྱེ་བ་སྟོང་འཐོབ་ཅིང་། །དེ་ནི་དེ་ལ་ནམ་ཡང་ཆགས་མི་སྐྱེད། །སྐྱེད་མོས་ཚལ་མཆོག་ཡོད་པའི་རྫིང་བུ་ནི། །ཡན་ལག་བརྒྱད་ལྡན་ཆུ་གཙང་མཛེས་གྱུར་པ། །མེ་ཏོག་ཨུཏྤལ་ལས་ནི་རྒྱས་པ་འཐོབ། །དེ་ཡི་གཡོག་འཁོར་རྟག་ཏུ་མཐུན་འགྱུར་ཞིང་། །མི་དམན་སེམས་ཅན་ལྷ་ཡི་སྒྲ་ཡང་ཐོས། །ལྷ་མོ་རྣམས་ཀྱི་གླུ་དབྱངས་སྙན་སྒྲ་ཐོས། །འཇིག་རྟེན་ཀུན་ཏུ་སྐྱེས་ཚེ་བདག་ཉིད་ཀྱིས། །འདི་ནས་ཤི་འཕོས་ངན་འགྲོར་མི་འགྲོ་ཞིང་། །མི་ཡི་འཇིག་རྟེན་སངས་རྒྱས་མཐོང་བར་ཤེས། །དེ་ནི་ལྷ་ལ་སྙན་པའི་གཏམ་བྱས་ཏེ། །སངས་རྒྱས་ཡེ་ཤེས་རྫོགས་ལ་ལྷ་བཀོད་ནས། །ཤི་བའི་དུས་སུ་འཛམ་བུའི་གླིང་དུ་སྐྱེ། །བཙས་མ་ཐག་ཏུ་བསྐལ་པ་མཐའ་ཡས་དྲན། །སྔོན་གྱི་སངས་རྒྱས་གཙོ་རྣམས་བཀུར་བ་དང་། །དེ་དག་མཚན་དང་ཡོན་ཏན་ཆོས་ཀྱང་དྲན། །འཇིག་རྟེན་སངས་རྒྱས་ཇི་ལྟར་འགྱུར་ཞེས་ཏེ། །མོས་པ་བསྐྱེད་ནས་མཆོད་རྟེན་རྩྭ་སྐྱེས་སེལ། །དེ་ཡི་ཕན་ཡོན་དེ་དག་ངས་བཤད་ཀྱིས། །ཐ་བ་དྲི་སོལ་དད་པའི་སེམས་ཀྱིས་ཉོན། །མཐུ་ཆེན་སྐྱེས་བུ་དམ་པ་ཁྱད་འཕགས་པ། །རྒྱལ་བ་དམ་པ་མ་འོངས་དུས་ན་མཐོང་། །དེ་དག་མཆོད་པ་དམ་པ་མཆོག་གིས་མཆོད། །དེ་ནི་གཞར་ཡང་དད་པ་དམ་པ་འཐོབ། །སངས་རྒྱས་སྟོབས་བཅུ་དེད་དཔོན་དེས་མཐོང་ནས། །འདྲེན་པ་མཚུངས་མེད་དེ་ལ་མཆོད་པ་བྱས། །མཚན་གྱི་གོ་ཆར་བྱས་པའི་སངས་རྒྱས་སུ། །འགྱུར་ཞེས་ཐུགས་དགྱེས་དེ་དག་ལུང་ཡང་སྟོན། །གྲོང་ཁྱེར་ཡངས་པ་ཉམས་དགའ་མཆོག་གནས་ཤིང་། །ང་ནི་ཆོས་སྟོན་གང་གིས་མཐོང་གྱུར་པ། །དེ་དག་ཕྱི་དུས་རབ་ཏུ་འཇིག་པའི་ཚེ། །རྒྱལ་མཆོག་མྱ་ངན་འདས་པའི་ཆོས་འཛིན་འགྱུར། །མཆོད་རྟེན་རྩྭ་སྐྱེས་སེལ་བར་བྱེད་པ་ནི། །རྒྱལ་བ་དམ་པ་མི་ཐུལ་མཐོང་འདོད་པའི། །རྒྱུ་དང་ས་བོན་འགྱུར་བ་འདི་ཡིན་ནོ། །འདོད་དང་དམྱལ་དང་དུད་འགྲོའི་སྐྱེ་གནས་སྤོང་། །ཞེས་དང་། འཇིག་རྟེན་སྒྲོན་མ་མཚུངས་མེད་བསོད་ནམས་ཞིང་། །དེ་ཡི་མཆོད་རྟེན་བ་རྒྱ་སུས་སེལ་བ། །བག་ཡོད་གྱུར་ནས་དེ་ནི་བདུད་རྒྱ་འདྲལ། །དུས་རྣམས་ཀུན་ཏུ་ངན་སོང་ས་ཡང་སྤོང་། །རྟག་ཏུ་སངས་རྒྱསརྡུལ་བྲལ་བསྟི་སྟང་བྱེད། །རྟག་ཏུ་སྟོབས་ལྡན་འཁོར་ལོས་སྒྱུར་བར་འགྱུར། །མི་ཡི་འཇིག་རྟེན་སྐྱེས་ནས་བསོད་ནམས་ལྡན། །རྒྱལ་པོ་ཀུན་གྱིས་མཆོད་པའི་གནས་སུ་འགྱུར། །ལྷ་དང་ལྷ་ཡི་དབང་པོའི་མཆོད་གནས་འགྱུར། །དེ་ནི་མྱུར་དུ་ལྷ་ཡི་ཚེ་ཡང་འཐོབ། །དཔལ་ལྡན་གསེར་གྱི་གཞལ་མེད་ཁང་པ་རྙེད། །ལྷ་ཡི་བདེ་བ་མཚུངས་མེད་དབང་ཕྱུག་ཉིད། །གཟུགས་དང་སྒྲ་དང་དྲི་རབ་རོ་མཆོག་དང་། །རེག་བྱ་དཔལ་ལྡན་ལྷ་ཡི་འབྱོར་པ་འཐོབ། །མཐུ་ཆེན་ལྡན་ཞིང་བལྟ་བའི་འོས་སུ་འགྱུར། །ལྷ་མོ་རྣམས་ལ་འདོད་པའི་སྲེད་མི་སྐྱེད། །བཅོམ་ལྡན་མཆོད་རྟེན་བ་རྒྱ་བསལ་བྱས་ན། །འདི་ནས་ཤི་འཕོས་མི་ཡི་འཇིག་རྟེན་འགྲོ། །ཡན་ལག་ལེགས་གནས་ཁྱད་པར་འགྲོ་བར་འགྱུར། །ནམ་ཡང་བསྟན་བཅོས་མི་ཉུང་མང་པོ་འཐོབ། །དེ་ནི་མི་ཁོམ་བརྒྱད་པོ་ཀུན་སྤོང་ཞིང་། །དེ་ནི་དལ་འགྱུར་དེ་བཞིན་ཁྱད་པར་འཕགས། །དེ་ནི་སངས་རྒྱས་མཚུངས་མེད་མཆོད་པ་བྱེད། །བག་ཡོད་བློ་གྲོས་བརྟན་ལ་དཔའ་བོར་གྱུར། །འདོད་པའི་ཡོན་ཏན་དག་ལ་དགའ་མི་སྐྱེད། །མི་དམན་སེམས་ཀྱིས་མངོན་པར་འབྱུང་བར་འགྱུར། །དེ་ནི་ནམ་ཡང་བྱང་ཆུབ་སེམས་མི་འདོར། །ཚུལ་ཁྲིམས་སྐྱོན་མེད་ཤིན་ཏུ་བསྡམས་པར་འགྱུར། །རྣམ་དག་འདོད་ཆགས་བྲལ་བའི་ཆོས་ཀྱང་འཐོབ། །དེ་ནི་མདོག་ངན་ལུས་རྣམས་ཀུན་ཏུ་སྤོང་། །འཆལ་བའི་ཤེས་རབ་མ་ལུས་རྣམ་པར་སྤོང་། །ཤེས་རབ་རྒྱ་ཆེན་གྱུར་ནས་སྤྱོད་ལ་གནས། །བཅོམ་ལྡན་མཆོད་རྟེན་བ་རྒྱ་བསལ་བྱས་ན། །ཁ་ཟས་གཙང་མ་དག་ཀྱང་རྙེད་འགྱུར་ལ། །ཁྱད་འཕགས་ཁ་དོག་ལྡན་ཞིང་ལྟ་སྡུག་པ། །རེག་དང་ལྡན་ཞིང་རབ་མཛེས་གོས་རྣམས་འཐོབ། །དད་པའི་ཤུགས་ཀྱིས་བཅོམ་ལྡན་མཆོད་རྟེན་ལ། །མེ་ཏོག་སྐམ་པོ་ཉལ་ཉིལ་ཕྱགས་བྱས་ན། །འདོད་པ་སྨད་པ་སྡུག་བསྔལ་བྱེད་པ་སྤོང་། །སྟོབས་བཅུ་མངའ་བའི་དེད་དཔོན་མཉེས་པར་བྱེད། །མཆོད་རྟེན་མེ་ཏོག་རྙིང་པ་སུས་འཕྱག་པ། །དེ་ནི་མཛེས་ཤིང་རྣམ་དག་ལུས་སུ་འགྱུར། །སྐྱེ་བོ་མང་པོས་མཆོད་འོས་བལྟ་འོས་འགྱུར། །དེ་ལ་རྒྱལ་པོ་གནོད་པ་སེམས་མི་འགྱུར། །ངན་སོང་ས་ཡི་ལས་ངན་ཐམས་ཅད་གཅོད། །བྱང་ཆུབ་སེམས་དཔའ་ཚུལ་ཁྲིམས་ཕུང་པོར་གནས། །བག་ཡོད་མྱ་ངན་རྣམས་དང་སྐྱོན་རྣམས་སྤོང་། །ནད་རྣམས་མ་ལུས་དུ་མ་རྣམ་པར་སྤོང་། །བསྐལ་པ་མཐའ་ཡས་རྣམས་སུ་དབུགས་ཕྱིན་འཐོབ། །སྦྱིན་གནས་མཚུངས་མེད་སངས་རྒྱས་འཐོབ་པར་འོང་། །མཚུངས་མེད་ཐོབ་ཅིང་ལྷ་མིས་མཆོད་འོས་འགྱུར། །རྣམ་དག་ལུས་རྒྱས་རྒྱན་གྱིས་བརྒྱན་པར་འགྱུར། །ལྷ་ཡི་མེ་ཏོག་རབ་མཛེས་མན་ད་ར། །མཚུངས་མེད་པ་ཏ་ལ་ཡང་སུས་འབུལ་དང་། །མཆོད་རྟེན་མེ་ཏོག་ཉལ་ཉིལ་སུས་འཕྱག་པ། །དེ་དག་རྣམ་སྨིན་འདྲ་སྟེ་མཆོག་ཏུ་འགྱུར། །དེ་ལུསདུག་གིས་མི་ཚུགས་མཚོན་མི་ཚུགས། །མེ་འབར་འོད་འཕྲོ་ཕུང་པོ་ཆེས་མི་ཚུགས། །ནོར་གྱི་ཕུང་པོ་རྐུན་པོས་བརྐུ་མི་འགྱུར། །མགུ་ཞིང་རབ་ཏུ་དགའ་བའི་ཤུགས་སྐྱེད་དེ། །བཅོམ་ལྡན་མཆོད་རྟེན་མེ་ཏོག་སྐམ་འཕྱག་ན། །དེ་ཡི་བསོད་ནམས་བཟུང་བར་གང་གྱུར་པ། །གྲངས་སམ་ཆ་ཡང་བརྗོད་པར་སླ་མ་ཡིན། །སུམ་ཅུ་རྩ་གཉིས་མཚན་གྱི་གོ་ཆར་འགྱུར། །མི་ཡི་འཇིག་རྟེན་ན་ནི་རྟག་ཏུ་དགའ། །མཐུ་དང་ལྡན་ཞིང་ཡིད་འོང་སྒྲ་སྐད་འབྱུང་། །མཆོད་རྟེན་མེ་ཏོག་རྙིང་པ་སུས་འཕྱག་པ། །ཆོས་མཆོག་རབ་མཛེས་ཡང་དག་སྦྱོར་བྱེད་ཅིང་། །དེ་ལུས་རྣམ་པར་དག་ལ་ཆེན་པོར་འོང་། །རིང་པོར་མི་ཐོགས་འཇིག་རྟེན་སངས་རྒྱས་འགྱུར། །ཞེས་དང་། མདོ་ཕྱི་མ་ལས། ཐུབ་དབང་མཆོད་རྟེན་བྱི་དོར་བྱས་པ་ཡིས། །ཤིན་ཏུ་ལྟ་ན་སྡུག་ཅིང་རབ་ཏུ་མཛེས། །བྱད་བཞིན་བཟང་ཞིང་པདྨོའི་མདོག་དང་ལྡན། །སྲིད་པའི་སྐྱོན་རྣམས་དང་ཡང་འབྲལ་བར་འགྱུར། །སུ་དག་དཔྱིད་ཀའི་དུས་ན་གཙང་མའི་ཆུས། །མཆོད་རྟེན་ཉེ་སྐོར་རྡུལ་རྣམས་ཞི་བྱེད་པ། །དེ་དག་བུད་མེད་རྣམས་ནི་དགའ་བཞིན་དུ། །རྡུལ་གཡབ་གསེར་གྱི་ཡུ་བ་ཅན་གྱིས་གཡོབ། །དཀོན་མཆོག་གསུམ་ཕྱིར་མི་རྣམས་གང་དག་གིས། །འཕགས་པ་དགྱེས་པའི་དཀྱིལ་འཁོར་བྱས་པས་ནི། །རྐང་ལག་སོར་མོ་དྲྭ་བར་འབྲེལ་བ་དང་། །ཡན་ལག་ཐམས་ཅད་ཀྱང་ནི་སྐྱོན་མེད་འགྱུར། །རྒྱལ་བའི་མཆོད་རྟེན་མེ་ཏོག་རྙིང་བསལ་བས། །འདོད་ཆགས་ཆགས་མེད་ཞེ་སྡང་སྡང་མི་འགྱུར། །གཏི་མུག་རྨོངས་མེད་ལྟ་ངན་ཆགས་མི་འགྱུར། །མི་རྣམས་དགའ་ཞིང་རབ་ཏུ་སྐྱིད་པར་འགྱུར། །ཞེས་དང་། དགེ་རྩ་ཡོངས་འཛིན་མདོར། དེ་བཞིན་གཤེགས་པའི་མཆོད་རྟེན་མཆོད་པ། ཕྱིར་བཅོས་པ་དང་། བྱི་དོར་བགྱིས་པས། གཟུགས་དང་། དལ་བ་དང། ཡང་དག་པར་བླང་བ་དང་། དེ་བཞིན་གཤེགས་པར་བལྟ་བའི་སྨོན་ལམ་གྱི་མཆོག་རྣམ་པར་དག་པ་བཞི་རྗེས་སུ་ཐོབ་པར་གསུངས་པ་དང་། འདུལ་བ་ལུང་ལས། ཕྱག་དར་བྱས་པ་ལ་ཕན་ཡོན་ལྔ་འཐོབ་སྟེ། རང་གི་སེམས་དྭངས་པར་འགྱུར་བ་དང་། གཞན་གྱི་སེམས་མོས་པར་འགྱུར་བ་དང་། ལྷ་རྣམས་ཡིད་དགའ་བར་འགྱུར་བ་དང་། མཛེས་པར་འགྱུར་བའི་དགེ་བའི་རྩ་བ་སོག་པར་འགྱུར་རོ། །ལུས་ཞིག་ནས་ཀྱང་བདེ་འགྲོ་མཐོ་རིས་ཀྱི་ནང་དུ་སྐྱེ་བར་འགྱུར་རོ། །ཞེས་གསུངས་སོ། །མདོར་ན་སྤྱན་གཟིགས་མདོར། བློ་གྲོས་རྣམ་པར་དག་པ་དེ་ལྟར་དེ་བཞིན་གཤེགས་པ་ཡོངས་སུ་དག་པ་ལ་སུ་ཞིག་མེ་ཏོག་དང་། ཕྲེང་བ་དང་། སྤོས་དང་། གདུགས་དང་། རྒྱལ་མཚན་དང་། བ་དན་དང་། རོལ་མོའི་སྒྲ་དང་། བྱུགས་པ་རྣམས་ཀྱིས་བསྟི་སྟང་བྱེད་པ་དེའི་བསོད་ནམས་ཀྱི་ཕུང་པོའི་མཐའ་རྟོགས་པར་མི་ནུས་ཏེ། དེའི་མཐའ་ནི་ཐེག་པ་གསུམ་པོ་ལས་ཐེག་པ་གང་ཡང་རུང་བས་མྱ་ངན་ལས་འདས་པའི་མཐར་ཐུག་པ་མ་གཏོགས་པར་བསོད་ནམས་ཀྱི་ཕུང་པོ་ཕྱི་མའི་མཐར་ཡང་ཟད་པར་མི་ནུས་སོ། །དེ་ཅིའི་ཕྱིར་ཞེ་ན། བློ་གྲོས་རྣམ་པར་དག་པ་ཇི་ལྟར་དེ་བཞིན་གཤེགས་པ་སངས་རྒྱས་ཀྱི་ཆོས་ཐམས་ཅད་ཀྱིས་ཚད་མེད་པ་དེ་བཞིན་དུ་དེ་བཞིན་གཤེགས་པ་ལ་ཡོན་ཕུལ་བའང་ཚད་མེད་དོ། །མཐའ་ཡས་སོ། །བསམ་གྱིས་མི་ཁྱབ་བོ། །མཚུངས་པ་མེད་དོ། །དཔག་ཏུ་མེད་དོ། །གྲངས་མེད་དོ། །དཔག་གིས་མི་ལང་ངོ། །བརྗོད་དུ་མེད་དོ། །བློ་གྲོས་རྣམ་པར་དག་པ་སུ་ཞིག་དེ་བཞིན་གཤེགས་པ་ད་ལྟར་བཞུགས་ཏེ་འཚོ་ཞིང་གཞེས་པ་ལ་བསྟི་སྟང་བྱེད་པ་དང་། བླ་མར་བྱེད་པ་དང་། རི་མོར་བྱེད་པ་དང་། མཆོད་པ་དང་། རྗེད་པ་དང་། ཕྱི་མའི་ཚེ་ཕྱི་མའི་དུས་ལྔ་བརྒྱ་ཐ་མ་ལ་སུ་ཞིག་དེ་བཞིན་གཤེགས་པ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་ལ་བསྟི་སྟང་བྱེད་པ་དང་། བླ་མར་བྱེད་པ་དང་། རི་མོར་བྱེད་པ་དང་། མཆོད་པ་དང་། རྗེད་པར་དང་། ཡང་དག་པའི་སེམས་ཉེ་བར་བཞག་སྟེ་བྱང་ཆུབ་ཏུ་གཞོལ་བའི་སེམས་བསྐྱེད་པས་ཕྱག་འཚལ་བ་དང་། ཕྱག་བྱེད་པ་དང་། བསྟི་སྟང་བྱེད་པ་དང་། བླ་མར་བྱེད་པ་དང་། རི་མོར་བྱེད་པ། མཆོད་པ་དང་། རྗེད་པ་དང་། གསོལ་བ་དང་། བསྔགས་པ་དང་། སྐོར་བ་བྱེད་པ་དེས་ཕན་ཡོན་ལྔ་ཡོངས་སུ་གཟུང་བར་འགྱུར་ཏེ། ལྔ་གང་ཞེ་ན། དྲན་པ་དང་ལྡན་པར་འགྱུར་བ་དང་། རྟོགས་པ་དང་ལྡན་པར་འགྱུར་བ་དང་། ངོ་ཚ་ཤེས་ཤིང་ཁྲེལ་ཡོད་པ་དང་ལྡན་པར་འགྱུར་བ་དང་། མྱུར་དུ་སངས་རྒྱས་བཅོམ་ལྡན་འདས་མཐོང་བར་འགྱུར་བ་དང་། མཐོང་ནས་ཀྱང་དད་པ་སྐྱེད་པར་འགྱུར་བ་སྟེ་ཕན་ཡོན་ལྔ་པོ་དེ་དག་ཡོངསསུ་གཟུང་བར་འགྱུར་རོ། །དེ་ཆོས་བཞི་དང་ལྡན་པར་འགྱུར་ཏེ། བཞི་གང་ཞེ་ན། དེ་བཞིན་གཤེགས་པའི་བསྟན་པ་འཛིན་པ་དང་། དེ་ཡང་ཇི་སྐད་བསྟན་པ་བཞིན་བསྒྲུབ་པ་དང་། བསྒྲུབས་ནས་ཀྱང་སངས་རྒྱས་བཅོམ་ལྡན་འདས་རྣམས་ཉེ་བར་འགྱུར་བ་དང་། མྱུར་དུ་སངས་རྒྱས་ཀྱི་ཞིང་ཡོངས་སུ་དག་པར་འགྱུར་བ་སྟེ་ཆོས་བཞི་པོ་དེ་དག་གོ །བློ་གྲོས་རྣམ་པར་དག་པ་བྱང་ཆུབ་སེམས་དཔའ་ཆོས་བཞི་དང་ལྡན་ན་བདུད་དམ་བདུད་ཀྱི་རིས་ཀྱི་ལྷའིབུ་རྣམས་ཀྱིས་མི་བརྫི་བར་འགྱུར་ཏེ། བཞི་གང་ཞེ་ན། རིགས་མཐོ་ཞིང་རིགས་ཆེ་བ་དང་། བཙས་མ་ཐག་ཏུ་སངས་རྒྱས་བཅོམ་ལྡན་འདས་རྣམས་ཡིད་ལ་བྱེད་པ་དང་། ཕྱི་མའི་དུས་དམ་པའི་ཆོས་འཛིན་པ་དང་། རྟག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྗོགས་པའི་སངས་རྒྱས་རྣམས་ཀྱིས་བྱིན་གྱིས་བརླབ་པར་འགྱུར་བ་སྟེ། བློ་གྲོས་རྣམ་པར་དག་པ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་བདུད་དམ་བདུད་ཀྱི་རིས་ཀྱི་ལྷའི་བུ་རྣམས་ཀྱིས་མི་བརྫི་བར་འགྱུར་རོ། །ཞེས་དང་། འཕགས་པ་བདུད་རྩི་བརྗོད་པ་ཞེས་བྱ་བའི་ཐེག་པ་ཆེན་པོའི་མདོ་ལས། བྱམས་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ལྔ་དང་ལྡན་ན། བདུད་ཀྱི་རིས་ཐམས་ཅད་ཀྱིས་བགེགས་བྱ་བར་མི་འགྱུར་བ་དང་། བདུད་ཀྱི་འཁོར་ཐམས་ཅད་ཀྱིས་འདའ་བར་བྱ་བ་མ་ཡིན་པ་དང་། སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་ཚེ་རིང་དུ་སྐྱོང་བར་བྱེད་པ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །ལྔ་པོ་དག་གང་ཞེ་ན། འདི་ལྟ་སྟེ། རྒྱུན་མི་འཆད་པར་ཆོས་སྦྱིན་པ་དང་། རྒྱུན་མི་འཆད་པར་སེམས་ཅན་ཐམས་ཅད་ལ་མི་འཇིགས་པ་སྦྱིན་པ་དང་། རྒྱུན་མི་འཆད་པར་བྱམས་པ་ཆེན་པོ་དང་སྙིང་རྗེ་ཆེན་པོ་དང་དགའ་བ་ཆེན་པོ་དང་བཏང་སྙོམས་ཆེན་པོ་བསྒོམ་པ་དང་། རྒྱུན་མི་འཆད་པར་མཆོད་རྟེན་རྙིང་པ་གསོས་པ་དང་། རྒྱུན་མི་འཆད་པར་སེམས་ཅན་ཐམས་ཅད་བྱང་ཆུབ་ཀྱི་སེམས་ལ་མོས་པར་བྱས་པ་སྟེ། བྱམས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ལྔ་པོ་དེ་དག་དང་ལྡན་ན་བདུད་ཀྱི་རིས་ཐམས་ཅད་ཀྱི་བགེགས་བྱ་བར་མི་འགྱུར་བ་དང་། བདུད་ཀྱི་འཁོར་ཐམས་ཅད་ཀྱིས་འདའ་བར་བྱ་བ་མ་ཡིན་པ་དང་། སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་ཚེ་རིང་དུ་སྐྱོང་བར་བྱེད་པ་དང་། མྱུར་དུ་བླ་ན་མེད་པ་ཡང་དག་པ་རྫོགས་པའི་བྱང་ཆུབ་ཏུ་མངོན་པར་རྗོགས་པར་འཚང་རྒྱ་བར་འགྱུར་རོ། །ཞེས་གསུངས་པ་སོགས་ཀྱིས་མཚོན་ཏེ་ཤེས་པར་བྱ་ལ། སྐབས་འདི་དག་ཏུ་གསུངས་པའི་མཆོད་རྟེན་ནི། བདེ་བར་གཤེགས་པའི་རིང་བསྲེལ་གྱི་སྙིང་པོ་ཅན་གཙོ་བོར་གྱུར་པསྟེ། དཀོན་མཆོག་གསུམ་གྱི་རྟེན་སྤྱི་ལའང་འཇུག་པ་ཡིན་ནོ། །ཁྱད་པར་ཨོ་རྒྱན་དུས་གསུམ་མཁྱེན་པའི་ཞལ་སྔ་ནས་ཀྱང་། གུ་རུ་ཉིད་ཀྱི་སྐུ་ཚབ་གཙོ་བོར་གྱུར་པའི་རྟེན་གསུམ་ལ། སྨན་ལྔ་ཕུལ་ན་འདུ་བའི་ནད་ལས་གྲོལ། ན་བཟའ་ཕུལ་ན་ཡེ་ཤེས་ཀྱི་སྤྱན་དང་ལྡན། གདནཕུལ་ན་རེག་འཇམ་མཛེས་པའི་གདན་ཐོབ། མར་མེ་ཕུལ་ན་བློ་དང་རིག་པ་གསལ། རིན་པོ་ཆེའི་རིགས་ཕུལ་ན་དབུལ་ཕོངས་བྲལ། སྤོས་ལྔ་ཕུལ་ན་ཀུན་གྱིས་ཡིད་དུ་འོང་། སྙིང་པོ་ལྔ་ཕུལ་ན་བདེ་བའི་མཆོག་ཐོབ། དྲི་བཟང་ཕུལ་ན་གནས་གཙང་དྲི་མ་མེད་པ་ཐོབ། འབྲུ་བཅུད་ཕུལ་ན་བདུད་རྩིའི་རྒྱ་མཚོར་སྤྱོད། མེ་ཏོག་ཕུལ་ན་ཉོན་མོངས་ལྔ་ཞི་ཞིང་སྒྲིབ་པ་བྱང་། དཀར་གསུམ་ཕུལ་ན་བདུད་རྩིའི་འདོད་འཇོའི་བ་ལ་ལོངས་སྤྱོད། མངར་གསུམ་ཕུལ་ན་བདུད་རྩི་ཁ་ཟས་ཞིམ་དགུ་ཐོབ། སྤྱན་གཟིགས་ཕུལ་ན་བསོད་ནམས་དང་ལོངསསྤྱོད་འཕེལ། འབྲུ་ལྔ་ཕུལ་ན་མ་རྨོས་ལོ་ཏོག་ལ་ལོངས་སྤྱོད། འཕན་གདུགས་ཕུལ་ན་ཆོས་ཀྱི་བཤད་པ་བླ་ན་མེད་པ་ཐོབ། དར་དཔྱངས་ཕུལ་ན་ལྷ་ཡི་ན་བཟའ་ཐོབ། སིལ་སྙན་ཕུལ་ན་དབྱངས་སྙན་ཞིང་ངག་བདེ། རོལ་མོ་ཕུལ་ན་སྟོབས་ཆེ་ཞིང་གཟུགས་བཟང་། གསེར་དངུལ་གཡུ་ལྕགས་དུང་ཟངས་སྣག་ཚ་རྣམས་ཕུལ་ན་རྒྱལ་སྲིད་བདུན་ཐོབ་ཅིང་ལོངས་སྤྱོད་རྫོགས་པའི་ཞིང་ཁམས་མཐོང་། སྤྱན་ལ་སྤྱན་དབྱེ་བྱས་ན་ཡེ་ཤེས་ཀྱི་སྤྱན་དང་ལྡན། སྙན་ལ་སྙན་ཤལ་དང་དར་དཔྱངས་ཕུལ་ན་ལྷའི་སྙན་དང་ལྡན། ཤངས་ལ་དྲི་ཞིམ་མཆོད་ན་དྲི་བསུང་ངད་ལྡན་གྱི་གནས་ཐོབ། ཚེམས་ལ་དཀར་མདངས་བཏོན་ན་དུག་གསུམ་རྩད་ནས་གཅོད། ལྗགས་ལ་རོ་མཆོག་ཕུལ་ན་འགྲོ་ཀུན་འཁོར་བ་ལས་སྒྲོོལ་བའི་ཆོས་འཆད་པའི་ལྗགས་དང་ལྡན། བཞུགས་ཁང་གི་གཞལ་ཡས་ཁང་ཕུལ་ན་ལྷའི་ཕོ་བྲང་ནང་དུ་སྐྱེ། བཞུགས་ཁང་གི་ལས་དཔོན་བྱས་ན་ཆོས་ཀྱི་འཁོར་ལོས་སྒྱུར་བ་ཐོབ། རྟེན་གསུམ་གྱི་བཟོ་གནས་བྱས་ན་རིག་པའི་གནས་ལྔ་ལ་མཁས། རྟེན་གྱི་རྒྱུ་འདམ་རྫབ་སྦྱར་ན་བསོད་ནམས་གོང་ནས་གོང་དུ་འཕེལ། རྡུལ་ཕྱིས་ན་གཟུགས་བཟང་བ་དང་ཆོས་གོས་ལེགས་པ་དང་ཁ་དོག་མཛེས་པ་ཐོབ། སྐུ་ཁྲུས་གསོལ་ན་དྲི་མ་མེད་ཅིང་ཡིད་དུ་འོང་བའི་ཁ་དོག་དང་ལྡན། མཆོད་གཡོག་བྱས་ན་རྫུ་འཕྲུལ་གྱི་རྐང་པ་ཐོབ། ཕྱག་དང་བསྐོར་བ་བྱས་ན་འཁོར་བའི་སྡུག་བསྔལ་ཐམས་ཅད་ཞི་ནས་མྱ་ངན་འདས་པའི་བདེ་བ་ཐོབ། བསྐྱེད་རྫོགས་དང་ལྡན་པས་རབ་གནས་བྱས་ན་ཡུལ་དེར་དམག་འཁྲུགས་དང་མུ་གེ་ནད་ཡམས་ལ་སོགས་ཞི། རྟེན་ལ་རྟེན་བཤད་བྱས་ན་སེམས་བསྐྱེད་དང་ཏིང་ངེ་འཛིན་ལ་གནས། གཞན་ལ་ཕྱག་མཆོད་བསྐོར་བ་སོགས་བྱེད་པར་བསྐུར་མ་བཏབ་ན་འབྲེལ་ཚད་དོན་དང་ལྡན་ཞིང་འགྲོ་བ་མང་པོའི་ལས་སྒྲིབ་དགགཞན་ཡང་རྟེན་གྱི་སྤྱན་སྔར་ལེགས་པའི་སྨོན་ལམ་གང་བཏབ་འགྲུབ་པ་དང་། ཇི་ལྟར་འདོད་པའི་དོན་ལ་གསོལ་བ་གང་བཏབ་ཡིད་བཞིན་དུ་སྩོལ་བ་སོགས་ཕན་ཡོན་རྒྱ་ཆེར་པདྨ་བཀའ་ཡི་ཐང་ཡིག་སོགས་ལས་གསུངས་སོ། །མདོར་ན་ས་སྙིང་འཁོར་ལོ་བཅུ་པའི་མདོ་ལས། ཁམས་གསུམ་དག་ན་བདེ་ཞིང་སྐྱིད་པ། །ཐམས་ཅད་དཀོན་མཆོག་མཆོད་ལསབྱུང་བ། །དེས་ན་བདེ་ཞིང་སྐྱིད་པར་འདོད་པས། །དཀོན་མཆོག་གསུམ་པོ་མཆོད་ལ་བརྩོན་བྱ། །ཞེས་དང་། འཕགས་པ་སྤྱན་རས་གཟིགས་ཀྱི་མདོ་ལས། སངས་རྒྱས་བྱང་ཆུབ་མཚུངས་མེད་མཆོག་ཐོབ་ནས། །སྟོབས་བཅུ་ལྡན་ཞིང་གཡོ་བ་མེད་གྱུར་ལ། །བྱང་ཆུབ་སངས་རྒྱས་སྡུག་བསྔལ་སྐྱེ་འགྲོ་ལ། །འཇིག་རྟེན་ཀུན་ཏུ་མཚུངས་མེད་སངས་རྒྱས་ཤོག །དེ་ཡི་སྨོན་ལམ་འདི་འདྲ་འདི་དང་ནིི། །སངས་རྒྱས་ཡེ་ཤེས་དེ་སེམས་དགའ་མཁྱེན་ནས། །སྟོབས་བཅུ་འཛུམ་མཛད་འཇིག་རྟེན་ཐམས་ཅད་དུ། །མཚུངས་མེད་སངས་རྒྱས་འགྱུར་ཞེས་ལུངསྟོན་ནོ། །སྐྱེས་བུ་དམ་པ་མཆོག་གི་གསུང་ཐོས་ནས། །བདེ་གཤེགས་མཆོག་གསུམ་གཞནདུ་མི་འགྱུར་ཏེ། །བདག་ནི་རྒྱལ་བ་མཆོག་གྱུར་དོགས་མེད་ཅེས། །དགའ་བཞིན་མགུ་ནས་བར་སྣང་ཀུན་ཏུ་རྒྱུ། །འཇིག་རྟེན་ལྷ་ཡི་ལྷར་གྱུར་སངས་རྒྱས་སུ། །ཁྱད་འཕགས་མཚུངས་མེད་སྦྱིན་གནས་འགྱུར་བ་དང་། །དེ་སེམས་སྤྱོད་དང་དགའ་བར་གནས་མཁྱེན་ནས། །དེ་ལ་སྟོབས་བཅུ་མངའ་བས་བཞེས་པར་འགྱུར། །བདེ་གཤེགས་མཆོག་གིས་གོས་ནི་བཞེས་རིག་ནས། །དེ་ནི་ཤུགས་སྐྱེས་རབ་དགའ་སེམས་མགུ་སྟེ། །མཚུངས་མེད་འཇིག་རྟེན་མགོན་ལ་བལྟས་ནས་ནི། །འཇིག་རྟེན་སངས་རྒྱས་བདག་འགྱུར་མོས་པར་བསྐྱེད། །སྐྱེ་ཤི་ཕ་རོལ་སེམས་ཅན་བསྒྲལ་བར་བྱ། །གྲོལ་ནས་སྐྱེ་བོ་མང་པོ་འདུས་བྱས་དགྲོལ། །འཇིག་རྟེནཀུན་ན་ལོང་བའི་མིག་བདག་འགྱུར། །སྣང་བ་ཐོབ་ནས་མུན་པ་རབ་རིབ་བསལ། །དེ་ལྟས་ཕན་ཡོན་ཆེན་པོ་འདི་ཐོས་ནས། །མེ་ཏོག་ཕྲེང་བ་རྒྱལ་མཚན་གོས་མཆོག་དང་། །རོལ་མོའིསྒྲ་དང་གདུགས་དང་བྱུག་བདུག་གིས། །མགོན་པོ་མཆོད་ལ་སངས་རྒྱས་འགྱུར་བར་གྱིས། །ཞེས་སངས་རྒྱས་རང་ཉིད་ཀྱིས་རྗེས་སུ་འདོམས་པར་མཛད་པ་བཞིན་ནོ། །འོ་ན་སངས་རྒྱས་དངོས་སུ་བཞུགས་དང་། ད་ལྟར་རྟེན་ལ་མཆོད་པ་གཉིས་ལ་ཁྱད་པར་ཡོད་དམ་ཞེ་ན། དེ་ནིཅུང་ཟད་ཀྱང་མེད་དེ་མདོ་ལས། དྲང་སྲོང་ཆེན་པོ་གང་ལ་ལ་ཞིག་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དང་། ད་ལྟར་བཞུགས་པ་ལ་མཆོད་པ་བྱེད་པ་རྣམ་པར་སྨིན་པ་ནི་མཚུངས་ཞིང་འདྲའོ་ཞེས་ང་འཆད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་གཟུགས་ཆོས་ཀྱི་སྐུས་རབ་ཏུ་ཕྱེ་བ་ཡིན་གྱི། ཆོས་གཟུགས་ཀྱི་སྐུས་རབ་ཏུ་ཕྱེ་བ་མ་ཡིན་པའི་ཕྱིར་རོ། །གང་ལ་ལ་ཞིག་ང་འདུག་པའམ། ཡོངས་སུ་མྱ་ངན་ལས་འདས་པ་ལ་མཆོད་ན་སེམས་མཚུངས་པའི་ཕྱིར་འདི་གཉིས་ལ་བསོད་ནམས་ཀྱི་ཁྱད་པར་ཅུང་ཟད་ཀྱང་མེད་དོ། །ཞེས་དང་། ད་ལྟ་ང་ལ་མཆོད་པ་དང་། །མ་འོངས་སྐུ་གཟུགས་མཆོད་པ་གཉིས། །བསོད་ནམས་མཉམ་ཞིང་རྣམ་སྨིན་མཉམ། །འདི་གཉིས་ཐ་དད་ཅུང་ཟད་མེད། །ཅེས་དང་། རྒྱལ་བ་མྱ་ངན་འདས་པ་དང་། །གང་དག་ད་ལྟ་བཞུགས་པ་ལ། །གང་ཞིག་དད་པས་གུས་མཆོད་པ། །སེམས་དགེ་བ་ནི་མཚུངས་པའི་ཕྱིར། །བསོད་ནམས་ཕུང་པོ་མཉམ་པར་ཐོབ། །ཅེས་གསུངས་ཤིང་། རྟེན་དེ་ཡང་སྔོན་གྱི་འཕགས་ཆེན་རྣམས་ཀྱིས་བཞེངས་པའི་ཆོས་འཁོར་རྣམ་གསུམ་གྱི་རྟེན་སོགས་དང་། ད་ལྟ་རང་རང་གིས་གསར་དུ་བཞེངས་པ་གཉིས་ལ་ཁྱད་པར་ཡོད་དམ་ཞེ་ན། དེ་ཡང་མེད་དེ། བྱེད་པ་པོ་ལ་ཁྱད་པར་ཡོད་ཀྱང་། སངས་རྒྱས་ཀྱི་ཐུགས་རྗེ་ལ་སྔོན་དང་ད་ལྟར་གྱི་ཁྱད་པར་མེད་པས། བྱ་བའི་ཡུལ་ལ་ཐུགས་རྗེ་དང་བྱིན་རླབས་མཉམ་པར་འཇུག་སྟེ། པད་དཀར་ལས། གང་དུ་མོས་པས་སྤྱན་དྲངས་པ་དེར་དེ་བཞིན་གཤེགས་པ་རིན་ཆེན་མང་བྱོན་པར་འགྱུར་རོ། །ཞེས་དང་། གསང་བ་རྒྱ་མཚོ་ལས། ཏིང་འཛིན་རོལ་མོ་བསམ་ཡས་དང་། །སྔགས་དང་ཕྱག་རྒྱས་དགུག་བྱས་ན། །རྒྱལ་བའི་དཀྱིལ་འཁོར་རབ་འབྱམསཀུན། །གཤེགས་ནས་བྱིན་གྱིས་རློབ་པར་འགྱུར། །ཞེས་གསུངས་པའི་ཕྱིར། བསོད་ནམས་ཀྱི་ཞིང་དུ་མཉམ་པར་གྲུབ་པ་ཡིན་ཞེས་ཀུན་མཁྱེན་ཆོས་རྗེས་གསུངས་སོ། །གལ་ཏེ་ཉེ་སྐོར་སོགས་སུ་རྟེན་མེད་ན་ཇི་ལྟར་བྱ་སྙམ་ན། ཡིད་དད་མོས་རྩེ་གཅིག་པས་མདུན་ན་མངོནསུམ་དུ་བཞུགས་པར་མོས་ལ་ཕྱག་མཆོད་བྱས་ནའང་སྔ་མ་དང་མཉམ་པར་བྱིན་རླབས་འཇུགསྟེ། ཡུམ་བར་མ་ལས། གང་ལ་ལ་ཞིག་གིས་དེ་བཞིན་གཤེགས་པ་ཡིད་ལ་བྱས་ཏེ། སངས་རྒྱས་ལ་ཕྱག་འཚལ་ལོ། ཞེས་བརྗོད་ན་ཡང་། དེའི་མདུན་ན་དེ་བཞིན་གཤེགས་པ་བཞུགས་སོ། །ཞེས་དང་། འཇམ་དཔལ་ཞིང་གི་ཡོན་ཏན་བསྟན་པ་ལས། ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། །གང་གི་སྨོན་ལམ་ཅི་བཏབ་པ། །དེ་འདྲའི་འབྲས་བུ་འཐོབ་པར་འགྱུར། །གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་དེ་བཞུགས་ཏེ། །རྟག་པར་བྱིན་གྱིས་རློབ་བྱེད་ཅིང་། །ཉེས་པ་ཀུན་ལས་རྣམ་པར་གྲོལ། །ཞེས་དང་། ཏིང་འཛིན་རྒྱལ་པོ་ལས། འཆག་དང་འདུག་དང་འགྲེང་དང་ཉལ་བ་ན། །མི་གང་ཐུབ་པའི་ཟླ་བ་དྲན་བྱེད་པ། །དེ་ཡི་མདུན་ན་རྟག་ཏུ་སྟོན་པ་བཞུགས། །དེ་ནི་རྒྱ་ཆེན་མྱ་ངན་འདའ་བར་འགྱུར། །ཞེས་གསུངས། མདོར་ན་ཆོ་འཕྲུལ་རྣམ་པར་བསྟན་པ་ལས། གང་ཞིག་དེ་བཞིན་གཤེགས་པ་ལ་མངོན་སུམ་དུ། མེ་ཏོག་དང་། སྤོས་དང་། དྲི་དང་། ཕྲེང་བ་དང་། བྱུག་པ་དང་། ན་བཟའ་དང་། རྒྱན་སོགས་ཀྱིས་མཆོད་པ་ལྟ་སྨོས་ཀྱང་ཅི་དགོས། ལྷའི་བུ་དགགང་སེམས་ཅན་ལ་ལས་སངས་རྒྱས་བཅོམ་ལྡན་འདས་མྱ་ངན་ལས་འདས་ནས་ལོ་སྟོང་ངམ་བསྐལ་པ་བྱེ་བ་ལོན་ཡང་། སངས་རྒྱས་ལ་ཕྱག་འཚལ་ལོ་ཞེས་མཚན་ནས་ལན་བདུན་བརྗོད་ནས་ནམ་མཁའ་ལ་མེ་ཏོག་གཏོར་ན་དེ་དག་ཐམས་ཅད་སྡུག་བསྔལ་གྱི་མཐར་འགྱུར་རོ། །ཞེས་གསུངས་པས། བསླུ་མེད་རྡོ་རྗེའི་བདེན་གསུངས་ལ་ཡིད་ཆེས་པར་བྱའོ། །སྨྲས་པ། ལྷ་ལ་ལྷ་ཡི་དཔག་བསམ་མནྡ་ར། །ཀླུ་ལ་ཀླུ་ཡི་ནོར་བུ་མཐོན་ཀའི་དཔལ། །མི་ལ་མི་མཆོག་རྒྱལ་བའི་རྟེན་གསུམ་ཕུལ། །རེ་བའི་འབྲས་བུ་སྩོལ་ལ་མཚུངས་པ་ཉིད། །དེང་དུས་རྙོག་མ་ལྔ་ཡིས་བསླད་པའི་འགྲོ། །ཕོངས་པ་བརྒྱ་ཡིས་ནོན་ལ་སྐྱོབ་པ་མཆོག །སྣ་ཚོགས་སྤྲུལ་སྐུར་ཤར་བ་འདི་ཁོ་ན། །དེ་སླད་སེམས་ཤེས་སུ་ཞིག་གུས་མི་བྱེད། །འདི་ན་རང་བཞིན་འགྲོགས་དཀའ་སྦྲུལ་ལྕེ་ཅན། །ཉམ་ཆུང་ཏིལ་མར་འཐུང་དགའ་མི་བསྲུན་ཕལ། །རང་གསོད་སྤུ་གྲི་བཞིན་དུ་བསྙེན་བྱེད་ན། །གཏན་དུ་ཕན་པ་སྦྱིན་གང་ཅིས་མི་མཆོད། །ཞིང་རབ་མཆོག་ལ་དད་པའི་སྙིམ་པ་ཡིས། །རྡུལ་ཙམ་འཐོར་ཡང་རྒྱ་མཚོའི་གོས་ཅན་ཁྱོན། །སྐུ་གདུང་གིས་བརྒྱན་མཐོ་རིས་གྲོང་ཁྱེར་མཆོག །མངོན་མཛེས་འཕགས་པའི་ཡོན་གྱིས་འབྱོར་ཞེས་གྲགས། །ལྷར་བཅས་སྐྱེ་དགུའི་གཙུག་ནོར་འོད་རིས་ཀྱིས། །རྐང་རྟེན་མཛེས་བྱས་མི་དབང་དཔལ་དེ་ཡང་། །དད་པའི་ཞིང་སར་སྲན་འབྲུ་དྲུག་བཏབ་པའི། །འབྲས་བུ་ལགས་པར་ཐུབ་པ་མཆོག་གིས་གསུངས། །ཇི་ལྟར་གདྒཱ་རྒྱ་མཚོར་སྙོགས་པ་བཞིན། །གང་དང་སུ་འབྲེལ་བྱང་ཆེན་ལས་མི་ལྡོག །དེ་སླད་ཐར་པ་ཆ་མཐུན་དགེ་བ་ཞེས། །དམ་པས་རབ་བསྔགས་ཐུགས་བསྐྱེད་བཙན་པོའི་མཐུ། །དེ་སླད་སྲིད་དང་ཞི་བའི་ཕུན་ཚོགས་དཔལ། །སྦྱིིན་གྱིས་འདི་ན་ལེན་པོ་སུ་ཡོད་ཅེས། །མངོན་སུམ་མདུན་ན་གནས་ཀྱང་མི་རྩོལ་ཕལ། །ཀྱི་ཧུད་གདོན་གྱིས་མྱོས་སམ་ཅི་ཞིག་ཉེས། །དེས་ན་བདག་ཕན་འདོད་པ་འགའ་མཆིས་ན། །ཡིད་ཀྱི་ཤིང་རྟ་འགེངས་ཐབས་འདི་མིན་སུ། །དེ་ཕྱིར་རིངས་པར་བརྩོན་པའི་དཔུང་བསྐྱེད་ལ། །ཞབས་ཏོག་སྲི་ཞུས་དལ་རྟེན་དོན་ཡོད་མཛོད། །

གཉིས་པ་གསུང་རབ་དམ་པའི་ཆོས་ལ་བཀུར་སྟི་སོགས་བགྱིས་པའི་ཕན་ཡོན་བྱེ་བྲགཏུ་བཤད་པ།

གཉིས་པ་གསུང་རབ་དམ་པའི་ཆོས་ལ་བཀུར་སྟི་སོགས་བགྱིས་པའི་ཕན་ཡོན་བྱེ་བྲགཏུ་བཤད་པ་ལ། སྤྱི་དང་། བྱེ་བྲག་གཉིས་ལས། དང་པོ་ནི། ཁྱད་པར་དུའང་གསུང་རབ་དམ་པའི་ཆོས་ལ་བསྙེན་བཀུར་བགྱིས་ན་བསོད་ནམས་ཚད་མེད་པ་འབྱུང་སྟེ། སྤྱིར་དམ་པའི་ཆོས་གླེགས་བམ་དང་དེ་འཛིན་པ་པོ་བཞུགས་པའི་ས་ཕྱོགས་དེར་ཡང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་དགོངས་ཤིང་བྱིན་གྱིས་བརླབ་པར་འགྱུར་བ་དང་། ལྷ་དང་གནོད་སྦྱིན་ལ་སོགས་པ་ཆོས་སྐྱོང་བའི་སྲུང་མ་མཐུ་བོ་ཆེ་རྣམས་ཀྱིས་རྟག་ཏུ་མི་གཡེལ་བར་སྲུང་ཞིང་འཇིགས་པ་དང་གནོད་པ་ལས་སྐྱོབ་པར་དམ་བཅས་པ་ཡིན་པས་ཆོས་འཛིན་པ་པོ་དང་། ཆོས་ལ་བཀུར་སྟི་ཚད་ལྡན་ཡོད་ན་གནས་སྐབས་ཀྱི་རྐྱེན་སེལ་ལ་ཡང་སྲུང་བཟློག་གསོལ་མཆོད་བརྒྱ་སྟོང་མང་པོས་དོ་ཟླ་མིན་ཏེ། ཕྱོགས་ཙམ་མཚོན་ན། བྱང་ཆུབ་སེམས་དཔའ་བྱམས་པས་འདི་ལྟར་དམ་བཅས་སོ། །བཅོམ་ལྡན་འདས་སླད་མའི་ཚེ་སླད་མའི་དུས་ལྔ་བརྒྱ་པ་ཐ་མ་ལ་དམ་པའི་ཆོས་འཇིག་པའི་དུས་ལ་བབ་ཅིང་། སངས་རྒྱས་ཀྱི་བྱང་ཆུབ་འཇིག་པར་འགྱུར་བ་འཇིག་པ་ཆེན་པོས་འཇིག་པའི་དུས་ན་བདག་གིས་ཆོས་ཀྱི་རྣམ་གྲངས་འདི་སྐྱེས་བུ་དམ་པ་དེ་དག་ལ་རབ་ཏུ་བསྟན་པར་འགྱིའོ། །དེ་དག་ལ་གཟི་བྱིན་བསྩལ་བར་བགྱིའོ། །ཡུལ་གང་ན་མདོ་སྡེ་འཛིན་པ་དེ་ལྟ་བུ་དག་གནས་པའི་ཡུལ་དེར་བདག་གིས་དུས་མ་ལགས་བའི་སེར་བ་དང་། དགུན་ཆར་དང་། མུ་གེ་དང་། བྲོ་ནད་ཡ་ང་བ་དང་། མི་ངས་དང་། ཡམས་ཀྱི་ནད་དང་། གནོད་པ་དང་། འཁྲུགས་པ་ཐམས་ཅད་རབ་ཏུ་ཞི་བར་བགྱིའོ། །ཡུལ་གང་ན་ཆོས་ཀྱི་རྣམ་གྲངས་འདི་འཆང་བ་དང་། གླེགས་བམདུ་བགྱིས་པའམ། རྒྱལ་མཚན་གྱི་རྩེ་མོར་བཏགས་ལ་མཆོད་པ་བགྱིད་པའི་ཡུལ་དེར་བདག་གིས་བྱིན་གྱིས་བརླབས་ཀྱིས་ཕ་རོལ་གྱི་དམག་ཚོགས་ཐམས་ཅད་དང་། ཆོམ་རྐུན་དང་། སྲིན་པོ་དང་། མཁའ་འགྲོ་མའི་ཡ་ང་བ་ཐམས་ཅད་རབ་ཏུ་ཞི་བར་འགྱུར་རོ། །གང་དག་ན་ཆོས་སྨྲ་བ་འདི་ལྟ་བུ་དག་དང་། མདོ་སྡེ་འདི་འཆད་པའི་ཡུལ་དེར་བདག་གིས་ལོ་ཏོག་དང་། ནོར་དང་། འབྲུ་དང་། མེ་ཏོག་དང་། ལོ་མ་དང་། འབྲས་བུ་ཐམས་ཅད་ཕུན་སུམ་ཚོགས་པ་དང་། བདེ་བ་ཐམས་ཅད་འབྱུང་བར་བྱིན་གྱིས་བརླབ་པར་བགྱིའོ། །ཞེས་དང་། གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། བཙུན་པ་བཅོམ་ལྡན་འདས་ནམ་མིའི་རྒྱལ་པོས་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་འདི་མཉན་དེ་ཐོས་ནས། མདོ་སྡེའི་དབང་པོ་འདི་འཛིན་པའི་དགེ་སློང་དེ་དག་ཕྱིར་རྒོལ་བ་ཐམས་ཅད་ལ་ཀུན་ཏུ་སྲུང་བར་བགྱིད། ཡོངས་སུ་སྐྱོབ་པ་དང་། ཡོངས་སུ་འཛིན་པ་དང་། ཡོངས་སུ་སྐྱོང་བར་བགྱིད་ན། བཙུན་པ་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞིས། མིའི་རྒྱལ་པོ་དེའི་ཡུལ་ཐམས་ཅད་ནི་གནས་པའི་སེམས་ཅན་རྣམས་ཀུན་ཏུ་བསྲུང་བར་བགྱིད། ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་བདེ་ལེགས་སུ་འགྱུར་བར་བགྱིའོ། །ཞེས་དང་། སྡུད་པ་ལས། ཤེས་རབ་ཕ་རོལ་ཕྱིན་པ་གང་ལ་མགོན་སྤྱོད་པ། །འདི་དག་གང་ཞིག་གུས་བྱས་འཛིན་དང་ཆུབ་བྱེད་པ། །དེ་ལ་དུག་དང་མཚོན་དང་མེ་དང་ཆུས་མི་ཚུགས། །བདུད་དང་བདུད་ཀྱི་ཕྱོགས་ཀྱིས་གླགས་ཀྱང་རྙེད་མི་འགྱུར། །ཞེས་གསུངས། གཞན་ཡང་ཡུམ་གྱི་འགྲེལ་པར། གཙོ་བོར་ཆོས་སྐུའི་དེ་བཞིན་གཤེགས་པ་ཉིད་ཤེས་རབ་ཀྱི་ཕ་རོལ་དུ་ཕྱིན་པ་ཉིད་ཡིན་ནོ། །དེ་བས་ན་དེ་སྟོན་པར་བྱེད་པའི་རྒྱལ་བའི་ཡུམ་ལ་མཆོད་ན་ཐམས་ཅད་མཁྱེན་པའི་ཡེ་ཤེས་ཀྱི་ཆོས་ཀྱི་སྐུ་ལ་མཆོད་པའི་ཕྱིར་བསོད་ནམས་མང་དུ་སྐྱེ་བ་ཡིན་ནོ། །ཞེས་དང་། སྡུད་པ་ཚིགས་སུ་བཅད་པ་ལས། རྒྱལ་བས་བརྒྱ་བྱིན་དྲི་བ་ཡོངས་དྲིས་ལན་གསོལ་བ། །གལ་ཏེ་གདྒཱའི་བྱེ་སྙེད་སངས་རྒྱས་ཞིང་གྱུར་པ། །དེ་ཀུན་རྒྱལ་བའི་རིང་བསྲེལ་ཕྱུར་བུར་གཏམས་གྱུར་ཀྱང་། །བདག་ནི་ཤེས་རབ་ཕ་རོལ་ཕྱིན་པ་འདི་ཉིད་ལེན། །ཅི་སླད་ཅེ་ན་སྐུ་གདུང་མི་གུས་བདག་མ་ལགས། །འོན་ཀྱང་ཤེས་རབ་ཡོངས་སུ་བསྒོས་པས་མཆོད་པར་བགྱིད། །དཔེར་ན་རྒྱལ་པོ་བརྟེན་མི་རིམ་གྲོ་ཐོབ་པ་ལྟར། །སངས་རྒྱས་རིང་བསྲེལ་ཤེས་རབ་ཕ་རོལ་ཕྱིན་ལ་བརྟེན། །ནོར་བུ་རིན་ཆེན་ཡོན་ཏན་ཀུན་ལྡན་རིན་ཐང་མེད། །གབ་ཚེ་གང་དུ་སྩལ་པ་དེ་ནི་ཕྱག་བགྱི་འོས། །དེ་ཕྱུང་གྱུར་ཀྱང་གབ་ཚེ་ལ་ནི་དགའ་བར་བགྱིད། །ཡོན་ཏན་དེ་དག་ནོར་བུ་རིན་ཆེན་དེ་ཡིས་ལགས། །དེ་བཞིན་ཤེས་རབ་ཕ་རོལ་ཕྱིན་མཆོག་ཡོན་ཏན་གྱིས། །རྒྱལ་བ་མྱ་ངན་འདས་ཀྱང་རིང་བསྲེལ་མཆོད་པ་བརྙེས། །དེ་ལྟའི་གང་ཞིག་རྒྱལ་བའི་ཡོན་ཏན་འཛིན་འཚལ་དེས། །ཤེས་རབ་ཕ་རོལ་ཕྱིན་བླང་འདི་ནི་ཐར་པ་ལགས། །ཞེས་དང་། སངས་རྒྱས་ཕལ་པོ་ཆེའི་བཟང་པོ་དཔལ་གྱི་ལེའུ་ལས། རྣམ་ཐར་དམ་པ་འདི་དག་སུས་ཐོས་ནས། །ཡིད་ཆེས་འཛིན་ཅིང་རྗེས་སུ་སྒྲོགས་བྱེད་པ། །དེ་དག་ངོ་མཚར་རྨད་བྱུང་ཆོས་ལྡན་ཏེ། །དེ་དག་དགའ་བྱེད་མི་ཡི་འཇིག་རྟེན་ན། །འདི་འདྲའི་ཆོས་དེར་གང་དག་དད་གྱུར་པ། །སེམས་ཅན་སོ་སོ་སྐྱེ་བོའི་ཚོགས་ན་དཀོན། །གང་དག་དགེ་བསགས་བསོད་ནམས་བྱས་གྱུར་པ། །དེ་དག་རྒྱུ་ཡི་སྟོབས་ཀྱིས་འདི་ལ་དད། །གང་དག་ཉན་ཐོས་ཐེག་པའང་ཡིད་ཆེས་པའི། །མི་དག་མི་ཡི་འཇིག་རྟེན་རྣམས་ན་ཉུང་། །དེ་བས་རྐྱེན་གྱི་ཐེག་པར་རབ་ཏུ་ཉུང་། །ཐེག་པ་ཆེན་པོར་དེ་དག་དེ་བས་ཉུང་། །ཐེག་པ་ཆེ་ལ་ཞུགས་པ་དེ་དཀོན་ཏེ། །གང་དག་ཆོས་འདིར་དད་པའང་རབ་དཀོན་ན། །འཇུག་ཅིང་འཛིན་པ་སྨོས་ཀྱང་ཅི་དགོས་ཏེ། །གང་དག་དེ་བཞིན་སྒྲུབ་པ་སྨོས་ཅི་དགོས། །གང་དགསྟོང་གསུམ་རི་དང་རྒྱ་མཚོར་བཅས། །ཕྱི་མའི་བསྐལ་པར་མགོ་བོས་འདེགས་བྱེད་ཀྱང་། །ཆོས་འདིར་དད་པའི་བྱ་དཀའ་ཅི་འདྲ་བ། །དེ་འདྲ་དེ་ནི་དེ་ལ་ཡོད་མ་ཡིན། །ལ་ལས་སྟོང་གསུམ་རྡུལ་སྙེད་སེམས་ཅན་ལ། །བདེ་བ་ཀུན་གྱིས་བསྐལ་པར་བསྙེན་བཀུར་ཀྱང་། །ཆོས་འདིར་དད་པའི་བསོད་ནམས་ཅི་འདྲ་བ། །བསོད་ནམས་ཁྱད་པར་དེ་འདྲ་དེ་ལ་མེད། །ལ་ལས་ཞིང་བཅུ་རི་དང་རྒྱ་མཚོར་བཅས། །ལག་པའི་མཐིལ་དུ་བསྐལ་པར་མཁར་འཛིན་ཀྱང་། །ཆོས་འདིར་དད་པའི་བྱ་དཀའ་ཅི་འདྲ་བ། །དེ་འདྲ་དེ་ནི་དེ་ལ་ཡོད་མ་ཡིན། །ལ་ལས་ཞིང་བཅུའི་རྡུལ་སྙེད་སེམས་ཅན་ལ། །དགེ་བ་ཀུན་གྱིས་བསྐལ་པར་བསྙེན་བཀུར་ཀྱང་། །ཆོས་འདིར་དད་པའི་བསོད་ནམས་ཅི་འདྲ་བ། །བསོད་ནམས་ཁྱད་པར་དེ་འདྲ་དེ་ལ་མེད། །ལ་ལས་ཞིང་བཅུའི་རྡུལ་སྙེད་སངས་རྒྱས་རྣམས། །བདེ་བ་ཀུན་གྱིས་བསྐལ་པར་བསྙེན་བཀུར་བས། །གང་གིས་ཆོས་ཀྱི་ལེའུ་འདི་བཟུང་བྱས་པ། །བསོད་ནམས་འདི་ནི་དེ་བས་ཁྱད་པར་འཕགས། །ཞེས་དང་། སངས་རྒྱས་ཀྱི་ཞིང་གི་བཀོད་པ་ཀུན་ཏུ་སྟོན་པའི་མདོ་ལས། སངས་རྒྱས་ཆོས་དང་དགེ་འདུན་དཀོན་མཆོག་ལ། །གང་གིས་ཁམས་གསུམ་སྦྱིན་པ་བྱིན་པ་བས། །མདོ་སྡེ་འདི་ལ་མཆོད་པ་བྱས་ན་ནི། །སྦྱིན་པ་དེ་ཡི་དཔེར་ཡང་མི་ཕོད་དོ། །གང་གིས་སངས་རྒྱས་ལ་ནི་དད་བྱས་ཏེ། །ཚད་མེད་གཙུག་ལག་ཁང་ནི་བརྩེགས་པ་བས། །གང་ཞིག་མདོ་འདི་འཛིན་པ་གང་ཡིན་པ། །དེ་ནི་དེ་བས་བསོད་ནམས་མང་པོར་འགྱུར། །གང་ཞིག་མེ་ཏོག་གཅིག་ཙམ་འཐོར་བྱེད་ཅིང་། །གོས་དང་ཕྲེང་བ་བྱུགས་པ་དེ་བཞིན་ཏེ། །ཏིང་འཛིན་འདི་ལ་བསྙེན་བཀུར་བྱེད་གྱུར་ན། །བསོད་ནམས་མཆོག་ཚད་སྔ་མ་དེ་མི་འགྱུར། །ཞེས་སོགས་རྒྱ་ཆེར་གསུངས་པས་མཚོན་ནོ། །གཉིས་པ་བྱེ་བྲག་ཏུ་ལུང་གི་ཆོས་ལ་ཐོས་བསམ་བྱས་པའི་ཕན་ཡོན་ནི། བྱང་ཆུབ་སེམས་དཔའི་སྡེ་སྣོད་ལས། ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་ལས་ལྡོག་པར་འགྱུར། །ཐོས་པས་དོན་མེད་སྤོང་བར་འགྱུར། །ཐོས་པས་མྱ་ངན་འདས་པ་ཐོབ། །ཅེས་ཕྱི་ནང་གི་གྲུབ་མཐའ་ཤེས་པས་བླང་དོར་གྱི་དམིགས་ཕྱེད། ཚུལ་ཁྲིམས་ཀྱི་བསླབ་པ་ཐོས་པས་ཉེས་སྤྱོད་ལས་བཟློགསེམས་ཀྱི་བསླབ་པ་ཐོས་པས་དོན་མེད་པའི་གཡེང་བ་སྤང་། ཤེས་རབ་ཀྱི་བསླབ་པ་ཐོས་པས་ཟག་ཟད་ཀྱི་མྱང་འདས་ཐོབ་པར་བྱེད་པ་སྟེ་བཞིར་གསུངས་པ་དང་། ལུང་རྣམ་འབྱེད་ལས། མང་དུ་ཐོས་པ་ལས་ཕན་ཡོན་ལྔ་ཡོད་དེ། ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་བར་འབྱུང་བ་ལ་མཁས་པ་དང་། དེའི་གདམས་ངག་དང་རྗེས་སུ་བསྟན་པ་གཞན་ལ་རག་མ་ལས་པ་ཡིན་ནོ། །ཞེས་དང་། སྐྱེས་རབས་ལས། ཐོས་པ་གཏི་མུག་མུན་སེལ་སྒྲོན་མེ་ཡིན། །རྐུན་པོ་སོགས་ཀྱིས་མི་འཁྱེར་ནོར་གྱི་མཆོག །ཀུན་ཏུ་རྨོངས་པའི་དགྲ་འཇོམས་མཚོན་ཆ་ཡིན། །ཐབས་ཚུལ་མན་ངག་སྟོན་པའི་གྲོགས་ཀྱི་མཆོག །ཕོངས་པར་གྱུར་ཀྱང་མི་འགྱུར་མཛའ་བོ་ཡིན། །གནོད་པ་མེད་པའི་མྱ་ངན་ནད་ཀྱི་སྨན། །ཉེས་པ་ཆེན་པོའི་དགྲ་འཇོམས་དཔུང་གི་མཆོག །གྲགས་དང་དཔལ་དང་གཏེར་གྱི་མཆོག་ཀྱང་ཡིན། །ཡ་རབས་རྣམས་དང་ཕྲད་ན་སྐྱེས་ཀྱི་མཆོག །ཚོགས་ཀྱི་ནང་དུ་མཁས་པ་དགའ་བར་འགྱུར། །ཕས་ཀྱི་རྒོལ་བར་ཉི་མའི་འོད་དང་འདྲ། །འགྲན་པ་རྣམས་ཀྱི་གྲགས་དང་དྲེགས་པ་སེལ། །ཞེས་པ་ནས། དུལ་ཞིང་རབ་ཏུ་གསལ་བའི་སྤོབས་པ་སྐྱེ། །གྲགས་པ་ཆེན་པོ་འཕྲལ་དུ་འབྱུང་བར་བྱེད། །སྨྲ་ལྕེ་བདེ་འགྱུར་ཁྱད་པར་ཅན་གྱི་རྒྱུ། །ཐོས་པའི་དཔལ་གོམས་དོན་གསལ་རྟོགས་པར་འགྱུར། །ཐོས་དང་ལྡན་ན་འགལ་བ་མེད་པ་ཡིན། །སྡེ་གསུམ་ལམ་ལ་རབ་ཏུ་གནས་པར་འགྱུར། །ཞེས་གསུངས། དེས་ན་བློ་གྲོས་དང་ལྡན་པ་རྣམས་ཀྱིས་མང་དུ་ཐོས་པ་འཚོལ་བ་སོགས་ཀྱི་སྒོ་ནས་རང་རྒྱུད་ཡོན་ཏན་གྱིས་འབྱོར་པའི་ཐབས་ལ་འབད་པར་བྱ་སྟེ། །དེ་ཉིད་ལས། ཡོན་ཏན་ཡོད་ན་རྒྱལ་པོའི་གོ་འཕང་དང་། །སྐྱེ་དགུ་མངོན་པར་འདུ་བའང་ཐོབ་པར་འགྱུར། །ལྷ་དབང་དཔལ་ཡང་ཡོན་ཏན་ལ་ལྟོས་ཏེ། །ཡོན་ཏན་ཡོད་ན་ཕ་རོལ་མགུ་བར་འགྱུར། །གྲགས་པ་རྣམས་ཀྱང་ཡོན་ཏན་ཉིད་ལས་འཕྲོ། །བདག་ཉིད་ཆེ་བའང་ཡོན་ཏན་ལྡན་ལས་འབྱུང་། །ཟླ་འོད་ལས་ཀྱང་གསལ་བའི་ཡོན་ཏན་གྱིས། །དགྲ་བོ་མི་ཟད་དྲེགས་ཤིང་སྡང་བ་དང་། །འཁོན་རྙིང་ཡོད་ཅིང་ཕྲག་དོག་ཆེ་བ་ཡང་། །ཡིད་ནི་རབ་ཏུ་དྭངས་ཤིང་མགུ་བྱེད་དོ། །ཞེས་གསུངས། ཁྱད་པར་ཉན་པའི་ཕན་ཡོན། གཎྜིའི་མདོ་ལས། དམ་ཆོས་བཤད་པའི་དུས་བསྟན་ཕྱིར། །རྔའམ་གཎྜིའི་བརྡུངས་པའི་སྒྲ། །ཐོས་པས་བྱང་ཆུབ་འཐོབ་འགྱུར་ན། །ཉན་ཕྱིར་ལྷགས་པ་སྨོས་ཅི་དགོས། །ཞེས་དང་། སློབ་དཔོན་དབྱིག་གཉེན་གྱིས། དད་པས་ཉན་པ་གང་གིས་ནི། །མཐོ་རིས་དགའ་བའི་བསོད་ནམས་དང་། །གང་གིས་མྱ་ངན་འདའ་ཐོབ་པའི། །ཤེས་རབ་ས་བོན་བརྟས་པར་འགྱུར། །ཞེས་དང་། མ་ཐོས་པ་ཐོས་པར་འགྱུར་བ་དང་། ཐོས་པ་ཡོངས་སུ་བྱང་བར་འགྱུར་བ་དང་། སོམ་ཉི་སྤོང་བ་དང་། ལྟ་བ་དྲང་པོར་བྱེད་པ་དང་། ཤེས་རབ་ཀྱིས་ཚིག་དང་དོན་ཟབ་མོ་རྟོགས་པར་འགྱུར་བ་སོགས་ཕན་ཡོན་ལྔ་ཚན་གསུམ་དཔེ་དང་བཅས་པ་བསྟན་པས་མཚོན་ཤིན་ཏུ་མང་ངོ་། །བཤད་པའི་ཕན་ཡོན་ཀྱང་མདོ་ལས། གང་ལ་ཕན་ཕྱིར་ང་ཡི་ཆོས། །ཚུལ་བཞིན་བསྟན་པས་མཆོད་འགྱུར་ཏེ། །མེ་ཏོག་བྱུགས་པ་མར་མེ་ཡིས། །རྒྱལ་བ་ཡང་དག་མཆོད་མ་ཡིན། །ཞེས་སོགས་བླ་ན་མེད་པའི་མཆོད་པར་འགྱུར་བ་དང་། གསེར་འོད་ལས། སྦྱིན་པ་རྣམས་ཀྱི་ནང་ནས་འདི་ལྟ་སྟེ། །ཆོས་ཀྱི་སྦྱིན་པ་མཆོག་ཅེས་ངས་བཤད་དོ། །ཞེས་དང་། བྱམས་པ་སེངྒེ་སྒྲའི་མདོ་ལས། གང་གིས་གངྒཱའི་བྱེ་སྙེད་སངས་རྒྱས་ཞིང་། །རིན་ཆེན་བདུན་གྱིས་ཡོངས་སུ་བཀང་བྱས་ནས། །རབ་དགའི་སེམས་ཀྱིས་རྒྱལ་ལ་འབུལ་བ་དང་། །གང་གིས་སེམས་ཅན་གཅིག་ལ་ཚིགས་བཅད་བྱིན། །རིན་ཆེན་སྦྱིན་པ་ཤིན་ཏུ་རྒྱ་ཆེན་དེས། །ཚིགས་བཅད་སྦྱིན་པ་སྙིང་རྗེེས་སྒྲུབ་དེ་ལ། །ཆར་ཡང་མི་ཕོད་གྲངས་སུའང་མ་ཡིན་ན། །གཉིས་དང་གསུམ་ལ་བསམ་དུ་ག་ལ་ཡོད། །ཅེས་དང་། སྟོང་ཆེན་འཇིག་རྟེན་ཁམས་ནི་གསེར་དག་གིས། །བཀང་སྟེ་གང་ལ་སྦྱིན་པར་བྱེད་པ་ནི། །ཚིགས་བཞིའི་ཚིགས་སུ་བཅད་པ་གཅིག་བརྗོད་པས། །ཇི་ལྟར་ཕན་འདོགས་དེ་ལྟར་འགྱུར་མ་ཡིན། །ཕན་འདོགས་བྱེད་པར་འདོད་པ་གང་ཞིག་གིས། །འཇིག་རྟེན་གསུམ་ན་སེམས་ཅན་ཐམས་ཅད་ཀྱིས། །བདེ་བ་གང་དག་ཡོད་པ་དེ་དག་ཀུན། །སེམས་ཅན་གཅིག་ལ་སྦྱིན་པ་བྱས་པ་བས། །གང་གིས་དེ་ལ་སངས་རྒྱས་ལུགས་ཀྱི་ནི། །ཚིགས་བཞིའི་ཚིགས་སུ་བཅད་པ་གཅིག་བསྒྲགས་ན། །དེ་ནི་ཤིན་ཏུ་ཕན་འདོགས་མཆོག་ཡིན་ཏེ། །དེས་ནི་སྡུག་བསྔལ་དག་ལས་གྲོལ་བར་འགྱུར། །ཞེས་ཟང་ཟིང་གི་སྦྱིན་པ་ལས་མཆོག་ཏུ་གྱུར་ཅིང་ཕན་འདོགས་ཀྱི་མཆོག་ཡིན་པ་དང་། སེངྒེསཞུས་པ་ལས། ཆོས་ཀྱི་སྦྱིན་པ་སྐྱེ་བ་དྲན། །ཞེས་དང་། རྒྱ་མཚོས་ཞུས་པ་ལས། ཆོས་ཀྱི་སྦྱིིན་པས་ནི་ཟག་པ་ཟད་པ་མངོན་པར་ཤེས་པ་རྣམ་པར་དག་པར་འགྱུར་རོ། །ཞེས་དང་གཟུངས་དང་མངོན་ཤེས་ཐོབ་པའི་རྒྱུར་འགྱུར་བ་དང་། ལྷག་བསམ་བསྐུལ་བའི་མདོ་ལས། བྱམས་པ། གང་རྙེད་པ་དང་བཀུར་སྟི་མི་འདོད་པར་ཆོས་ཀྱི་སྦྱིན་པ་བྱིན་ན། ཆོས་ཀྱི་སྦྱིན་པ་ཟང་ཟིང་མེད་པའི་ཕན་ཡོན་ཉི་ཤུ་སྟེ། ཉི་ཤུ་གང་ཞེ་ན། འདི་ལྟ་སྟེ། དྲན་པ་དང་ལྡན་པ་ཡིན། བློ་དང་ལྡན་པ་ཡིན། བློ་གྲོས་དང་ལྡན་པ་ཡིན། མོས་པ་དང་ལྡན་པ་ཡིན་ནོ། །ཤེས་རབ་དང་ལྡན་པ་ཡིན། འཇིག་རྟེན་ལས་འདས་པའི་ཤེས་རབ་རྗེས་སུ་རྟོགས་པར་འགྱུར་བ་ཡིན། འདོད་ཆགས་ཆུང་བ་ཡིན། ཞེ་སྡང་ཆུང་བ་ཡིན། གཏི་མུག་ཆུང་བ་ཡིན། བདུད་ཀྱིས་དེ་ལ་གླགས་མི་རྙེད་པ་ཡིན། སངས་རྒྱས་བཅོམ་ལྡན་འདས་རྣམས་ཀྱིས་དེ་ལ་དགོངས་པ་ཡིན། མི་མ་ཡིན་པ་རྣམས་ཀྱིས་དེ་ལ་བསྲུང་བ་ཡིན། ལྷ་རྣམས་ཀྱིས་དེའི་ལུས་ལ་མདངས་འཇུག་པ་ཡིན། མི་མཛའ་བ་རྣམས་ཀྱིས་དེ་ལ་གླགས་མི་རྙེད་པ་ཡིན། དེ་མཛའ་བོ་རྣམས་དང་མི་ཕྱེད་པ་ཡིན། ཚིག་གཟུང་བར་འོས་པ་ཡིན། མི་འཇིགས་པ་ཐོབ་པ་ཡིན། ཡིད་བདེ་བ་མང་བ་ཡིན། མཁས་པས་བསྔགས་པ་ཡིན། དེ་ཆོས་ཀྱི་སྦྱིིན་པ་དེ་རྗེས་སུ་དྲན་པར་འགྱུར་བ་ཡིན་ཏེ། བྱམས་པ། ཕན་ཡོན་ཉི་ཤུ་པོ་དེ་དག་གོ །ཞེས་དང་། བསླབ་བཏུས་ལས། ཆོས་ཀྱི་སྦྱིིན་པ་ཟང་ཟིང་མེད། །བསོད་ནམས་འཕེལ་བའི་རྒྱུ་ཡིན་ནོ། །ཞེས་གསུངས་པས་མཚོན་བསོད་ནམས་འཕེལ་བས་བྱང་ཆུབ་འཐོབ་པར་འགྱུར་བའོ། །ཉན་བཤད་གཉིས་ཀས་ཀྱང་ཐེག་པ་གསུམ་གྱི་ཁམས་བརྟས་པ་དང་། མཁས་པར་འགྱུར་བས་ཀུན་གྱིས་བཀུར་བ་དང་། བསྟན་པ་བཟུང་བས་བྱང་ཆུབ་འཐོབ་པར་འགྱུར་བ་སྟེ་དེའི་ཚུལ་སྔར་ཡང་བསྟན་མོད་འོག་ཏུ་ཡངསྟོན་པར་འགྱུར་རོ། །དེ་ལས་ཁྱད་པར་དུ་ཐེག་པ་ཆེན་པོའི་ཆོས་ཉན་བཤད་བྱས་ན་ཕན་ཡོན་ཆེ་སྟེ། གཞི་དུས་སུ་ཐེག་དམན་གྱི་དགེ་བ་ཟིལ་གྱིས་གནོན་པ་ཡང་། ཡུམ་ལས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་དེ་དག་ཐམས་ཅད་ཉིད་དགྲ་བཅོམ་པ་འཐོབ་པར་འགྱུར་ལ། དགྲ་བཅོམ་པ་དེ་དག་གིས་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང་། ཚུལ་ཁྲིམས་ལས་བྱུང་བའི་བསོད་ནམས་བྱ་བའི་དངོས་པོ་དང་། བསྒོམ་པ་ལས་བྱུང་བའི་བསོད་ནམས་བྱ་བའི་དངོས་པོ་གང་ཡིན་པ་དེ་ལ། ཀུན་དགའ་བོ་འདི་ཇི་སྙམ་དུ་སེམས། བསོད་ནམས་ཀྱི་ཕུང་པོ་དེ་མང་བ་ཡིན་ནམ། གསོལ་བ་བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་སོ། །བཀའ་སྩལ་པ། ཀུན་དགའ་བོ། དེ་བས་ཀྱང་སུ་ཞིག་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་དུ་ཕྱིན་པ་དང་ལྡན་པའི་ཆོས་ཐ་ན་ཉིན་གཅིག་བཏོན་ན། དེའི་བསོད་ནམས་ཀྱི་ཕུང་པོ་ཆེས་མང་དུ་སྐྱེའོ། །ཞེས་པ་ནས། ཀུན་དགའ་བོ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་ཆོས་ཀྱི་སྦྱིན་པ་སྟེ། ཉན་ཐོས་ཀྱི་ཐེག་པ་ཐམས་ཅད་དང་། རང་སངས་རྒྱས་ཀྱི་ཐེག་པའི་གང་ཟག་ཐམས་ཅད་ཀྱི་དགེ་བའི་རྩ་བ་ཐམས་ཅད་ཟིལ་གྱིས་གནོན་པའོ། །ཞེས་གསུངས། ལམ་དུས་སུ་སྒྲིབ་པ་མ་ལུས་པ་སྤངས་ནས་བསོད་ནམས་གཞན་ལས་ལྷག་པའང་། རྒྱུད་བླ་མ་ལས། གང་ཕྱིར་སྦྱིན་པས་ལོངས་སྤྱོད་དག་ནི་སྒྲུབ་བྱེད་ལ། །ཁྲིམས་ཀྱིས་མཐོ་རིས་སྒོམ་པས་ཉོན་མོངས་སྤོང་བྱེད་ལ། །ཤེས་རབ་ཉོན་མོངས་ཤེས་བྱཀུན་སྤོང་དེ་ཡི་ཕྱིར། །འདི་མཆོག་དེ་ཉིད་དེ་ཡི་རྒྱུ་ནི་འདི་ཐོས་ཡིན། །ཞེས་གསུངས། འབྲསདུས་སུ་རྣམ་པ་ཐམས་ཅད་འཁྱེན་པ་མངོན་དུ་འགྱུར་བའང་། མདོ་སྡེ་རྒྱན་ལས། གང་ཞིག་ཚིག་གི་དོན་བསྒོམས་ནས། །ཚིགས་བཅད་གཉིས་འཛིན་རབ་སྦྱོར་བ། །སེམས་ཅན་བློ་ལྡན་མཆོག་དེ་ཡིས། །ཡོན་ཏན་རྣམ་བཅུ་འཐོབ་འགྱུར་ཏེ། །ཁམས་ནི་ཟད་པར་བརྟས་པ་དང་། འཆི་བའི་ཚེ་ན་རབ་དགའ་ཐོབ། །ཇི་ལྟར་འདོད་པར་སྐྱེ་བ་དང་། །ཀུན་ཏུ་ཚེ་རབས་དྲན་པ་དང་། །སངས་རྒྱས་རྣམས་དང་ཕྲད་པ་དང་། །དེ་ལ་ཐེག་མཆོག་ཐོས་པ་དང་། །མོས་པ་བློ་དང་ལྡན་པ་དང་། །སྒོ་གཉིས་བྱང་ཆུབ་མྱུར་ཐོབ་བོ། །ཞེས་གསུངས། དེ་ལས་ཀྱང་རྡོ་རྗེ་ཐེག་པ་སྤྱི་དང་ཁྱད་པར་སྔགས་བླ་མེད་ཀྱི་ཆོས་རྣམས་ལ་ཉན་བཤད་བསྒོམས་གསུམ་བྱས་ན་སྔ་མ་ལས་ཕན་ཡོན་འགྱུར་ཁྱད་ཆེ་སྟེ། རྡོ་རྗེ་ཐེག་པ་ནི་སངས་རྒྱས་ལས་ཀྱང་འགྱུར་བར་དཀོན་ཅིང་བདག་ཅག་གི་སྟོན་པ་འདིས་རྩོད་ལྡན་གྱི་འགྲོ་བ་མ་དུལ་བ་རྣམས་འདུལ་བའིཐུགས་བསྐྱེད་ཁྱད་པར་དུ་འཕགས་པའི་སྟོབས་ཀྱིས་བསྟན་པ་འདི་ལ་བྱོན་པ་མ་གཏོགས། དུས་གསུམ་སངས་རྒྱས་ཀྱི་བསྟན་པ་ལ་མ་བྱུང་མི་འབྱུང་འབྱུང་བར་མི་འགྱུར་བར་གསུངས་པས་ན་རྒྱུད་སྡེ་ཟབ་མོ་རྣམས་འབྲི་འཆང་ཀློག་ཅིང་དོན་སྒོམ་པར་བྱེད་པ་རྣམས་བྱང་ཆུབ་རྡོ་རྗེ་ཉིད་དུ་བལྟ་བར་བྱ་བ་སོགས་རྒྱུད་སྡེ་རྣམས་ནས་རྒྱ་ཆེར་གསུངས་པ་ཕྱོགས་ཙམ་མཚོན་ན། རྣམ་སྣང་མངོན་བྱང་ལས། འཇིག་རྟེན་དུ་ནི་ཀུན་མཁྱེན་དག །ཨུ་དུམྦཱ་རིའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའིཚུལ་འཆང་བ། །དེ་བས་ཀྱང་ནི་དཀོན་པ་སྟེ། །གང་གིས་ཉམས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་བྱས་པ་གང་། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །ཞེས་དང་། རྡོ་རྗེ་རྩེ་མོ་ལས། སྔགས་རྣམས་ཀུན་གྱི་མཚན་ཉིད་ནི། །སངས་རྒྱས་ཀུན་གྱི་ཐུགས་ཡིན་ཏེ། །ཆོས་ཀྱི་སྙིང་པོ་སྒྲུབ་བྱེད་པས། །ཆོས་ཀྱི་དབྱིངས་དང་ཡང་དག་ལྡན། །ཞེས་དང་། སྒྱུ་འཕྲུལ་རྩ་བའི་རྒྱུད་ལས། འདུལ་བ་མདོ་སྡེ་ཆོས་མངོན་དང་། །དམ་ཚིག་སྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་ཀུན་ཏུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །རང་བཞིན་གསང་བའི་སྙིང་པོ་འདི། །སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་གཏན་ལ་ངེས་པར་འབེབས། །ཞེས་དང་། ཡེ་ཤེས་གྲུབ་པ་ལས། སྟོན་པའི་གསང་ནི་རྒྱ་མཚོ་ཀུན། །བསྡུས་ཏེ་སྙིང་པོའི་བཅུད་ཕྱུང་བ། །གསང་ཆེན་ངེས་པ་འདི་ཡིན་ཏེ། །འདི་མ་སྣང་བར་གྲོལ་བ་མེད། །ཅེས་དང་། དགོངས་པ་ལུང་སྟོན་ལས། ཤིན་ཏུ་གྲངས་མེད་བསྐལ་པ་རུ། །སངས་རྒྱས་རྣམས་ཀྱིས་གང་མཁྱེན་པ། །སྔགས་པ་རྣམས་ཀྱིས་དུས་གཅིག་ཏུ། །ཚེ་གཅིག་རྫོགས་པའི་བྱང་ཆུབ་ཐོབ། །ཅེས་གསུངས། བྱེ་བྲག་གཙོ་བོར་རྒྱུད་ཉན་པ་པོས་ཐོབ་པའི་ཕན་ཡོན་ནི། གསང་སྙིང་ལས། གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །ཉེ་བའི་སྲས་སུ་དགོངས་པར་འགྱུར། །ཞེས་དང་། ཀུན་འདུས་རིག་པའི་མདོ་ལས། གསང་སྔགས་ཀྱི་ལྷའི་མཚན་རྣ་བར་ཐོས་པ་ཙམ་གྱིས་བསྐལ་པ་དགུ་བཅུ་རྩ་གསུམ་དུ་བསགས་པའི་སྒྲིབ་པ་ཐམས་ཅད་ཟད་པར་བྱེད་དོ། །ཞེས་གསུངས། རྒྱུད་འཆད་པ་པོས་ཐོབ་པའི་ཕན་ཡོན་ཡང་། སྒྱུ་འཕྲུལ་ལས། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ནི་ང་ཡིན་དབང་ཡང་རྫོགས། །ཞེས་གོང་དུ་དྲངས་པ་དང་། དེ་ནི་ངེས་པར་ལུང་བསྟན་ཏེ། །སྲས་ནི་ཐུགས་ལས་སྐྱེས་པ་ཡིན། །ས་རབ་རིག་པ་འཛིན་ལ་གནས། །ཞེས་གསུངས། གཉིས་ཀས་མཉམ་པོར་ཐོབ་བའི་ཕན་ཡོན་ཡང་། དེ་ལས། རྒྱལ་བའི་རིག་པ་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡི། །སྲས་དང་སྤུན་དགོངས་བྱིན་གྱིས་རློབ། །ཅེས་དང་། སྒྱུ་འཕྲུལ་བཤད་རྒྱུད་རྒྱ་མཚོ་ལས། སྒྱུ་འཕྲུལ་རྒྱ་མཚོའི་རྒྱུད་ཆེན་འདི། །མོས་དང་མཐོང་དང་བྲིས་པ་དང་། །བཀླགས་པ་ཙམ་གྱིས་འགྲུབ་འགྱུར་ན། །རྟོགས་དང་གོམས་པའི་སྦྱོར་བ་ཡིས། །འབྲས་བུ་ཐོབ་པ་སྨོས་ཅི་དགོས། །ཞེས་དང་། ཧེ་རུ་ཀ་གལ་པོ་ལས། སྐུ་དང་གསུང་ཐུགས་རྡོ་རྗེ་ཡི། །རྣལ་འབྱོར་འདིར་གྱུར་ཕྱིན་ཆད་ནི། །ཀློག་གམ་ཡང་ན་སེམས་ཀྱང་རུང་། །དེ་ཡང་རྡོ་རྗེ་འཛིན་འདྲར་འགྱུར། །ཞེས་གསུངས། ཚུལ་བཞིན་ཉམས་སུ་བླངས་པས་བཙོན་འགྲུས་རབ་ཚེ་འདིར་གྲོལ་བར་བྱེད་པའི་ཕན་ཡོན་ཡང་། སམ་བུ་ཊི་ལས། བསྐལ་པ་བྱེ་བ་དུ་མ་རུ། །བསྒྲུབ་པར་དཀའ་བའི་སངས་རྒྱས་ཀྱང་། །ཚེ་འདི་ཉིད་ལ་སྟེར་བས་ན། །འབྲས་བུའི་ཐེག་པ་ཞེས་བྱའོ། །ཞེས་དང་། སངས་རྒྱས་མཉམ་སྦྱོར་ལས། བསྐལ་པ་བྱེ་བ་གྲངས་མེད་ཀྱིས། །སངས་རྒྱསཀུན་དངོས་མི་ཐོབ་པ། །གསང་སྔགས་ཚེ་འདིའི་ཆོ་ག་ཡིས། །ཚེ་འདི་ཉིད་ལ་འཐོབ་པར་འགྱུར། །ཞེས་དང་། རྡོ་རྗེ་གསང་བའི་རྒྱུད་ལས། ཤིན་ཏུ་བརྩོན་པས་གང་སྒྲུབ་པ། །ཚེ་འདི་ཉིད་ལ་སངས་རྒྱས་ཏེ། །གདུལ་བྱའི་ཞིང་དུ་མཛད་པ་སྟོན། །གྲངས་མེད་རྡོ་རྗེ་འཆང་རྣམས་ཀྱི། །ཟབ་མོའི་ཉེ་ལམ་མཐར་ཐུག་པའོ། །ཞེས་དང་། ཐུན་མོང་མ་ཡིན་པ་གསང་བ་སྒྲ་རྒྱུད་ལས། དངོས་གྲུབ་མཆོག་རྣམས་མཐར་ཐུག་པ། །འབད་ཅིང་རྩོལ་བས་མ་ཡིན་པར། །གང་དང་སུ་འཕྲད་གྲོལ་བར་ངེས། །དེས་ན་རྫོགས་ཆེན་བྱ་བ་བྲལ། །གཞན་འབད་པ་ལས་འབྱུང་བ་མིན། །ཆོས་ཉིད་མངོན་སུམ་ཁྱད་པར་གྱིས། །དབང་པོ་རྣོ་དང་རྟུལ་མེད་པས། །སེམས་ཅན་ཐམས་ཅད་སངས་རྒྱས་ལས། །གཞན་དུ་གནས་པ་མ་ཡིན་ནོ། །ཞེས་དང་། རྒྱུད་ཉི་ཟླ་ཁ་སྦྱོར་ལས། ང་ཡི་རྒྱུད་འདི་སུས་བཟུང་བ། །འཇིག་རྟེན་ཕན་པའི་འབྲསབུ་དང་། །ངེས་པར་སྣང་བའི་ས་ཐོབ་སྟེ། །སྐུ་གསུམ་ལ་ཡང་ལོངས་སྤྱོད་དོ། །འདི་ཉིད་བཅངས་པ་ཙམ་གྱིས་ནི། །མ་བསྒོམས་བསམ་གཏན་འབབ་པ་དང་། །མ་བསླབས་ཆོས་རྣམས་ཤེས་པ་དང་། །མ་བསྟན་གདམས་ངག་ཉིད་གོམས་དང་། །མ་བཤད་རྒྱུད་རྣམས་རང་ཤེས་དང་། །མ་བསྐྱེད་ལྷ་ཡང་མངོན་དུ་སྣང་། །དེ་ཡི་ཕྱིར་ན་རྒྱུད་འདི་དག །རྣལ་འབྱོར་གང་ཞིག་སྐལ་ཆེ་བས། །འདི་ཉིད་བཅངས་པས་དངོས་གྲུབ་འཐོབ། །སངས་རྒྱས་མཛད་སྤྱོད་དང་དུ་ལོང་། །ངན་སོང་གནས་གསུམ་དོང་སྤྲུགས་ཏེ། །བདེ་བ་ཆེན་པོའི་ལམ་དུ་འཛུད། །རང་སྣང་གོམས་པའི་གདེང་ཐོབ་ནས། །དབྱིངས་སུ་འཕོ་བའི་འཇིགས་མེད་རྙེད། །ཅེས་གསུངས། བརྩོན་པ་འབྲིང་བར་དོར་གྲོལ་བའི་ཕན་ཡོན་ཡང་། རྡོ་རྗེ་གདན་བཞི་ལས། བུ་ག་དགུ་ཡི་སྟེང་ཕྱོགས་ནས། །འཕྲལ་དུ་ཡིད་ཀྱིས་འཕོ་བྱེད་ན། །ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་པོ་བྱེད་པ་དང་། །ཆོམ་རྐུན་ལས་ཀྱིས་ལོངས་སྤྱོད་པ། །འདི་ཡི་ལམ་གྱིས་གྲོལ་འགྱུར་ཏེ། །སྡིག་པས་གོས་པར་མི་འགྱུར་རོ། །ཞེས་དང་། འཇམ་དཔལ་ཞལ་ལུང་ལས། གཟུགས་ཅན་ཕུང་པོར་རགས་ལུས་སུ། །ཚེ་འདི་ཉིད་ལ་མ་གྲུབ་ཀྱང་། །ཡིད་ནི་རྡོ་རྗེའི་སྐུ་གྲུབ་ནས། །བར་དོར་ཡང་དག་འགྲུབ་པར་འགྱུར། །ཞེས་དང་། སྒྱུ་འཕྲུལ་ལམ་རིམ་ལས། བརྩོན་པ་འབྲིང་གི་རྣལ་འབྱོར་པ། །རྣམ་སྨིན་འབྱུང་བའི་ལྷག་མ་བཞག །རྡོ་རྗེ་འཆང་སར་རིག་པས་འགྲོ། །རྣམ་པར་སྨིན་ཞེས་དེ་ལ་བརྗོད། །ཅེས་དང་། ཡེ་ཤེས་ཐིག་ལེ་ལས། ཡང་ན་ལུས་འདི་སྤངས་མ་ཐག །བླ་ན་མེད་པའི་ཡེ་ཤེས་སྐུ། །བརྩོན་པ་མི་ལྡན་པས་ཀྱང་འགྲུབ། །བརྩོན་འགྲུས་ལྡན་རྣམས་སྨོས་ཅི་དགོས། །ཞེས་གསུངས། དབང་པོ་དང་བརྩོན་འགྲུས་ཐ་མ་སྐྱེ་བ་བརྒྱུད་ནས་གྲོལ་བའི་ཕན་ཡོན་གྱི་ཁྱད་པར་ཡང་། སངས་རྒྱས་ཐོད་པའི་རྒྱུད་ལས། དེ་ཕྱིར་རྣལ་འབྱོར་བློ་ལྡན་གྱིས། །ཤིན་ཏུ་སྦྱོར་བའི་སེམས་ཀྱིས་ནི། །སྐྱེ་འདིར་དངོས་གྲུབ་མ་ཐོབ་ཀྱང་། །སྐྱེ་གཞན་སྲིད་པར་དངོས་གྲུབ་ཐོབ། །ཅེས་ཐ་མའི་རབ་སྐྱེ་བ་ཕྱི་མ་ཁོ་ནས་དང་། གསང་བ་མཛོད་ལས། དབང་བསྐུར་ཡང་དག་སྦྱིིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡིས་སྐྱེ་བ་བདུན་ལ་ནི། །མ་བསྒོམས་ཀྱང་ནི་འགྲུབ་པར་འགྱུར། །ཞེས་ཐ་མའི་འབྲིང་དབང་ཐོབ་དམ་ཚིག་མ་ཉམས་ན་སྐྱེ་བ་བདུན་ནས་དང་། རྡོ་རྗེ་རྩེ་མོ་ལས། ཕ་རོལ་ཕྱིན་པའི་ཐེག་པ་ནི། །བསྐལ་པ་གྲངས་མེད་མི་འཐོབ་པ། །གལ་ཏེ་རྣལ་འབྱོར་པ་དེ་བརྩོན། །ཚེ་འདི་ཉིད་ལ་མྱ་ངན་འདའ། །ཡང་ན་མཐོང་བ་ཙམ་གྱིས་ནི། །སྐྱེ་བ་བཅུ་དྲུག་མྱ་ངན་འདའ། །སོ་སོའི་སྐྱེ་བོ་སངས་རྒྱས་ཉིད། །འགྲུབ་པར་འགྱུར་གྱིས་གཞན་དུ་མིན། །ཞེས་ཐ་མའི་ཐ་མ་དཀྱིལ་འཁོར་དུ་ཞུགས་པ་ཙམ་གྱིས་ཀྱང་སྐྱེ་བ་བཅུ་དྲུག་གིས་གྲོལ་བར་གསུངས་སོ། །བྱེ་བྲག་ཏུ་དཀྱིལ་འཁོར་གྱི་ཞལ་མཐོང་བ་ཙམ་གྱིས་ཀྱང་། མཉམ་སྦྱོར་ལས། རྡོ་རྗེ་སེམས་དཔའ་ལ་སོགས་པའི། །འཁོར་ལོ་སྔོན་དུ་མཐོང་བ་ཡིས། །བསོད་ནམས་བརྟག་པ་གང་ཡིན་པ། །ཕྱིས་བྱས་པའང་དེ་བཞིན་ནོ། །ཞེས་དང་། སྒྱུ་མ་ཆེན་པོ་ལས། མཐོང་བ་དང་ནི་ཞུགས་པ་ཡིས། །དེ་ཀུན་སྡིག་ལས་རྣམས་པར་གྲོལ། །ཞེས་གསུངས། ལམ་གྱི་རྩ་བ་དབང་བསྐུར་ལེགས་པར་ཐོབ་པའི་ཕན་ཡོན་ཡང་། རྔམ་གློག་ལས། གསང་བ་མཆོག་གི་དཀྱིལ་འཁོར་དུ། །འཇུག་དང་དངོས་གྲུབ་གསོལ་བ་དང་། །དབང་བསྐུར་བ་ཡི་ལས་རྣམས་བྱ། །དེས་ནི་ཚེ་འདི་ཉིད་ལ་ཡང་། །སངས་རྒྱས་ཉིད་ཀྱང་འཐོབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །ཞེས་དང་། ཧེ་རུ་ཀ་མངོན་འགྱུར་ལས། དཀྱིལ་འཁོར་བདག་པོ་མཐོང་ནས་ནི། །ཅུང་ཟད་དེ་ནི་མི་འགྲུབ་མེད། །སྡིག་པ་ཀུན་ལས་རྣམ་པར་གྲོལ། །དངོས་གྲུབ་མྱུར་དུ་འཐོབ་པར་འགྱུར། །ཞེས་དང་། རྡོ་རྗེ་སེམས་དཔའ་སྙིང་གི་མེ་ལོང་ལས། དབང་རྫོགས་སྐུ་གསུམལྷུན་གྱིས་གྲུབ། །ཅེས་དང་། གསང་སྙིང་ལས། དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་གསུངས་། དབང་སྲོག་དམ་ཚིག་བསྲུང་བའི་ཕན་ཡོན་ཡང་། དམ་ཚིག་མཆོག་གི་རྒྱུད་ལས། འདི་ལས་འགལ་བར་མ་བྱས་ན། །རྡོ་རྗེ་འཛིན་པ་རྫོགས་སངས་རྒྱས། །ཚེ་འདི་ཉིད་ལ་ཐོབ་པར་ངེས། །ཞེས་དང་། རྡོ་རྗེ་སྙིང་པོ་སྲ་བ་འབྱུང་གནས་ཀྱི་རྒྱུད་ལས། དམ་ཚིག་སྡོམ་པ་རྣམ་བཤད་པ། །ཀུན་ཀྱང་རང་གི་སེམས་ལས་སོ། །དེ་ཡི་འཕེན་པ་བླ་མས་ཤེས། །དེ་ཕྱིིར་སེམས་ལ་འདྲིས་པའི་མིས། །སངས་རྒྱས་ཞིང་ཁམས་མཐོང་བ་དང་། །སྐུ་གསུམ་ཚད་དུ་འབྱོང་བ་དང་། །སངས་རྒྱས་ཡོན་ཏན་མངོན་པར་འགྲུབ། །བླ་མ་རྟག་ཏུ་བསྟེན་པའི་མིས། །མཁའ་འགྲོའི་གཟུགས་རྣམས་མཐོང་བ་དང་། །དེ་ཡི་བྱིན་རླབས་འཇུག་པ་དང་། །དུས་གསུམ་ལུང་ཡང་སྟོན་པ་དང་། །སྐྱེ་ཤི་གཉིས་ལ་དབང་འཐོབ་འགྱུར། །གྲོགས་ལ་བརྩེ་གདུང་ལྡན་པའི་མིས། །འགྲོ་བ་ཐམས་ཅད་འདུལ་བ་དང་། །ཀུན་གྱིས་སྙན་པར་གྲགས་པ་དང་། །གཟུགས་ཅན་ཀུན་ཀྱང་བྱམས་པ་དང་། །མཁའ་འགྲོ་མ་རྣམས་འདུ་བ་དང་། །མ་བསྒྲུབས་དངོས་གྲུབ་འབྱུང་བ་དང་། །ངག་ལ་ནུས་པ་འབར་བ་དང་། །དེ་བཞིན་མཆོག་དང་ཐུན་མོང་གི། །དངོས་གྲུབ་ཐམས་ཅད་འགྲུབ་པར་འགྱུར། །རྟག་ཏུ་དགོན་པར་གནས་པའི་མིས། །རླུང་སེམས་ཚད་རྣམས་ཟིན་པ་དང་། །སྣང་བ་གྲོགས་སུ་འཆར་བ་དང་། རང་གི་སེམས་ལ་དབང་ཐོབ་འགྱུར། །བླ་མ་བསྙེན་བཀུར་བྱས་པའི་མིས། །འགྲོ་བའི་གཙོ་བོར་འགྱུར་བ་དང་། །ཀུན་གྱིས་མཐོང་ན་དགའ་བ་དང་། །ཡེ་ཤེས་མངོན་སུམ་འབྱོངས་པ་དང་། །སངས་རྒྱས་རྣམས་ཀྱིས་བྱིན་བརླབ་འགྱུར། །རྟག་ཏུ་གཏོར་མའི་ལས་བྱེད་པ། །བསོད་ནམས་ཚོགས་ནི་རྫོགས་པ་དང་། །བར་ཆད་མེད་ཅིང་ལས་རྣམས་འགྲུབ། །འདོད་པ་ཕུན་སུམ་ཚོགས་པ་དང་། །མཁའ་འགྲོ་བྲན་བཞིན་འཁོལ་བར་འགྱུར། །ཞེས་དང་། བཀོད་པ་ཆེན་པོ་ལས། རྣལ་འབྱོར་དམ་ཚིག་ལྡན་པ་ཡིས། །དངོས་གྲུབ་ཡ་མཚན་ཆེན་པོ་འགྲུབ། །ཕྲིན་ལས་བཞི་པོ་ཐོགས་མེད་ཅིང་། །རྟོགས་པ་མཆོག་ནི་གོང་དུ་འཕེལ། །ཞེས་དང་། སྒྱུ་འཕྲུལ་ལས། བདེ་གཤེགས་ཉིད་ཀྱི་ཡུལ་བཞུགས་པ། །འཇིགས་མེད་ཀུན་ཏུ་བཟང་པོར་སྦྱོར། །ཞེས་གསུངས། དབང་ཐོབ་དམ་ཚིག་ལ་གནས་ཤིང་བསྐྱེད་རྫོགས་ཀྱི་གནད་དང་ལྡན་པས་བསྙེན་སྒྲུབ་སྤྱི་དང་ཁྱད་པར་ཚོགས་སྒྲུབ་བགྱིས་པའི་ཕན་ཡོན་ཡང་། གསང་འདུས་ལས། དད་བརྩོན་དྲག་པོས་སྒྲུབ་གྱུར་ན། །མཚམས་མེད་ལྔ་པོ་སྤྱོད་པས་ཀྱང་། །དངོས་གྲུབ་ཐོབ་པ་གསང་སྔགས་ཁྱད། །དད་ལྡན་རྣམས་ལ་སྨོས་ཅི་དགོས། །ཞེས་དང་། ཞག་བདུན་དང་ནི་ཟླ་ཕྱེད་དང་། །ཟླ་གཅིག་ཟླ་བ་ཕྱེད་དང་གཉིས། །རྡོ་རྗེའི་དམ་ཚིག་སྒྲུབ་ན་སྟེ། །དངོས་གྲུབ་མྱུར་དུ་འཐོབ་འགྱུར་རོ། །ཞེས་དང། གསང་སྙིང་ལས། ཆོ་ག་ལྔ་རྣམས་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པ། །མ་ཉམས་འཇུག་ལ་རབ་བརྩོན་ན། །ཞག་ནིསུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་སྒྱུར་རིགས་ཀྱི་དམ་པ་འགྲུབ། །ཅེས་དང་། ལམ་རིམ་ཡེ་ཤེས་སྙིང་པོ་ལས། དེ་ལྟར་ཟླ་དྲུག་བཅུ་གཉིས་བཅོ་བརྒྱད་ནས༔ ཕྱི་ནང་བསྐྱེད་རྫོགས་སེམས་ལ་དབང་ཐོབ་པས༔ རླུང་རིག་ལས་རུང་འོད་གསལ་མངོན་དུ་འགྱུར༔ རྣམ་སྨིན་ལུས་ལ་སེམས་ཉིད་ལྷ་སྐུར་སྨིན༔ ཟག་པ་གསུམ་ཟད་ཚེ་ལ་དབང་བ་ཐོབ༔ རིགས་ལྔའི་གདུང་འཛིན་ཕྱག་རྒྱ་ཆེན་པོའི་སྐུས༔ རྒྱལ་ཚབ་ཆེན་པོའི་ས་ལ་ལྷུན་གྱིས་གྲུབ༔ ཅེས་ཤེར་བརྩོན་རབ་ཟླ་དྲུགའབྲིང་ལོ་གཅིགཐ་མ་ལོ་གཅིག་དང་ཟླ་བ་གཉིས། ཡང་ཐ་ལོ་གཅིག་དང་ཟླ་བ་བཞི་ནས་རིག་འཛིན་གྱི་གོ་འཕང་བགྲོད་པར་གསུངས་པ་དང་། གཞན་ཡང་རྒྱུད་ལས། ཚོགས་ཀྱི་དཀྱིལ་འཁོར་ཆེན་པོ་འདིའི། །མིང་ཙམ་འཛིན་པར་བྱེད་པ་ཡང་། །གཙུག་གི་ནོར་བུ་འོད་འབར་ལྟར། །གཡོ་སྒྱུ་མེད་ཅིང་གུས་ལྡན་པའི། །སེམས་ཀྱིས་བླངས་ནས་སྤྱི་བོ་ཡིས། །གཙུག་ཏུ་བཞག་སྟེ་བཀུར་བར་བགྱི། །དེ་ཡི་དགོས་པ་ཅི་ཡང་རུང་། །མ་ལུས་རྫོགས་པར་བདག་ཅག་སྒྲུབ། །ཅེས་ལྷ་ཆེན་པོ་སོགས་འཇིག་རྟེན་གྱི་གཙོ་བོ་རྣམས་ཀྱིས་བྲོ་བོར་བ་དང་། ཨོ་རྒྱན་ཆེན་པོས་ཀྱང་། སྒྲུབ་ཆེན་འདི་ཡི་མིང་ཙམ་སུ་གང་འཛིན༔ ཨོ་རྒྱན་ང་དང་སྙིང་ཁྲག་གཅིག་ཏུ་འདྲེས༔ ཞེས་དང་མདོར་ན་ཨོ་རྒྱན་ངས་བསྟན་ཆོས་རྣམས་ལ༔ གཞུང་བཞིན་སུ་དང་སུ་ཡིས་སྐྱོབ་པ་ཀུན༔ ཐམས་ཅད་ང་ཡི་སྤྲུལ་པ་ཡིན་པར་ངེས༔ མ་འོངས་ཀུན་གྱིས་ཡིད་གཉིས་ཐེ་ཚོམ་སྤོངས༔ གུས་པས་བཀུར་སྟི་ཕུ་དུད་འབྲེལ་བ་ཞོག༔ ཅེས་དང་། མཚོ་རྒྱལ་གྱིས། མ་འོངས་པདྨའི་ཆོས་ལ་མོས་པ་ཀུན༔ དེང་སང་གུ་རུའི་ཞལ་མཐོང་སྨོན་ལམ་བཏབ༔ ཐམས་ཅད་ལས་ཅན་ཡིན་པས་དགའ་བ་བསྒོམ༔ ཁོ་མོའི་ཚིག་འདི་རིན་ཆེན་གསེར་བས་དཀོན༔ ཞེས་གསུངས། བསྐྱེད་རྫོགས་ཀྱི་གདེང་དང་ལྡན་པས་སྤྲོས་བཅས་ཀྱི་ཡན་ལག་སྔགས་དང་ཕྱག་རྒྱའི་ཡོ་བྱད་ལ་སྤྱད་ན། རྒྱུད་ལས། དོན་གྲུབ་དངོས་གྲུབ་ཐོབ་པ་ནི། །སྔགས་ཀྱི་བཟླས་པས་འགྲུབ་པ་ཡིན། །ཞེས་དང་། རིན་ཆེན་ཕྲེང་བ་ལས། ལན་གཅིག་ཙམ་ཡང་སྔགས་བརྗོད་ན༔ འདས་དང་འབྱུང་དང་འབྱུང་གང་ཡིན༔ གང་གིས་ལྕེ་ལ་སྨྲ་གྱུར་བ༔ དེ་དག་བདེན་པ་ཐོབ་པར་འགྱུར༔ ཞེས་དང་། གསལ་བཀྲ་ལས། རང་གི་སྒོ་གསུམ་ཡི་དམ་གྱི། །སྐུ་གསུང་ཐུགས་སུ་མངོན་སྦྱང་ལ། །རྟག་ཏུ་བཟླས་པ་བྱེད་པ་ནི། །བྱང་ཆུབ་གཟུངས་ལ་ཞུགས་པ་ཡིན། །ཞེས་དང་། གསང་སྙིང་ལས། སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོ་འབྱུང་། །ཞེས་གསུངས་པས་མཚོན་གསང་རྒྱུད་རྣམས་ནས་རྒྱ་ཆེར་གསུངས་པ་བཞིན་གསང་སྔགས་ཡིག་འབྲུ་གཅིག་ཙམ་བཟླས་པའི་ཕན་ཡོན་ཡང་ཚད་གཟུང་བར་མི་ནུས་སོ། །དེ་བཞིན་དུ་ལྷ་ཡི་སྟངས་སྟབས་སོགས་བྲོ་གར་འདུ་འཕྲོའི་ཡོ་བྱད་ལ་སྤྱད་ན། གསང་སྙིང་ལས། སྒྱུ་འཕྲུལ་དྲྭ་བ་མངོན་རྫོགས་པའི། །དཀྱིལ་འཁོར་བརྟན་པའི་ཏིང་ངེ་འཛིན། །བྲོ་གར་འདུ་འཕྲོའི་ཕྱག་རྒྱ་ཡིས། །འཛུལ་ལམ་ནམ་མཁའ་འགྲོ་བར་འགྱུར། །ཞེས་གནས་སྐབས་སུ་ལུས་ཀྱི་རྫུ་འཕྲུལ་སྣ་ཚོགས་སྟོན་ནུས་ཤིང་མཐར་ཐུག་སངས་རྒྱས་དོན་ཡོད་གྲུབ་པ་འགྲུབ་པར་གསུངས་པ་དང་། དབྱངས་རོལ་སོགས་གླུ་ཚིག་སྒྲ་ཡི་ཡོ་བྱད་ལ་བརྩོན་ན། གླུ་ཚིག་སྒྲ་ཡི་ཡོ་བྱད་ཀྱིས། །ཆོས་ཀྱི་དངོས་གྲུབ་འཐོབ་པར་འགྱུར། །ཞེས་གནས་སྐབས་སུ་གདུལ་བྱའི་བློ་དང་འཚམ་པར་ཆོས་སྟོན་ནུས་ཤིང་མཐརཐུག་གསུང་སྣང་མཐའ་འགྲུབ་པར་གསུང་པ་དང་། དེ་གཉིས་ཐུན་མོང་དུ། ཁྲག་འཐུང་ཆེན་པོ་ལ་སོགས་པའི། །བྲོོ་གར་གླུ་ཚིག་ཆེན་པོས་ནི། །ཐམས་ཅད་ཐམས་ཅད་ཅི་འདོད་པར། །ཐམས་ཅད་ཐམས་ཅད་བྱེད་པར་འགྱུར། །ཞེས་སོགས་རྒྱ་ཆེར་གསུངས་སོ། །ཞི་བ་དང་ཁྲོ་བོའི་ཆས་སོགས་རྒྱན་དང་བགོ་བའི་ཡོ་བྱད་ལ་སྤྱད་ན། རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །ཅེས་ལུས་གཟི་བྱིན་འབར་ཞིང་ཕ་རོལ་གྱི་དཔུང་གིས་མི་བརྫི་བ་དང་རྣམ་སྣང་འགྲུབ་པར་གསུངས་པ་དང་། ཆེ་མཆོག་འདུས་པ་རྩ་བའི་རྒྱུད་ལས་ཀྱང་། མ་འོངས་དུས་ན་སྐྱེས་བུ་དག །དུས་གསུམ་སངས་རྒྱས་ཀུན་ངོ་བོ། །སྐུ་གསུམ་ཕྲིན་ལས་ཆེ་བའི་མཆོག །ཀུན་ཏུ་བཟང་པོ་ཀུན་གྱི་བདག །ཧེ་རུ་ཀ་ཡིཚུལ་འཆང་བ། །བརྟུལ་ཞུགས་བཟང་པོ་དེ་ལ་ནི། །མ་རིག་ལོག་པར་ལྟ་བའི་ཚོགས། །བདུད་བཞིའི་ཕྱོགས་སུ་གཏོགས་རྣམས་ཀྱིས། །འཚེ་ཞིང་བར་དུ་གཅོད་པ་ཡང་། །གདུག་ཅིང་འདའ་བར་ནུས་མ་ཡིན། །ཞེས་གསུངས། ཤ་ལྔ་བདུད་རྩི་ལྔ་སོགས་བཟའ་བཏུང་གི་ཡོ་བྱད་ལ་སྦྱར་ན། གསང་སྙིང་ལས། བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཅེས་ལུས་མདངས་དང་ལྡན་ཞིང་། ཟས་བདུད་རྩིའི་བཅུད་དང་ལྡན་པས་འཛད་པ་མེད་པ་དང་། རིན་འབྱུང་འགྲུབ་པར་གསུངས། བརྟུལ་ཞུགས་ཀྱི་ནུས་པ་ཁྱད་པར་བ་དང་ལྡན་པས་ཨཱ་ལི་ཀཱ་ལིའི་ཡོ་བྱད་ལ་སྤྱད་ན། ཨཱ་ལི་ཀཱ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །ཞེས་མཆོག་ཐུན་གྱི་དངོས་གྲུབ་ཐམས་ཅད་ཐོབ་པར་གསུངས་པ་དང་། ཚོགས་ཀྱི་མཆོད་པ་སོགས་ཕུལ་བའི་ཕན་ཡོན་ཀྱང་། རྡོ་རྗེ་དྲྭ་བ་ལས། བསོད་ནམས་ནང་ནས་ཚོགས་འཁོར་མཆོག །ཚེ་འདིར་བསམ་པ་ཀུན་འགྲུབ་ཅིང་། །བགེགས་དང་བར་ཆད་ཞི་བ་དང་། །ཕྱི་མ་རིག་འཛིན་རྒྱལ་བའི་ཞིང་། །ཀུན་ཏུ་བཟང་པོ་འཐོབ་པར་འགྱུར། །ཞེས་གསུངས། མདོར་ན་ལམ་རིམ་ཡེ་ཤེས་སྙིང་པོ་ལས། མདོར་ན་རིམ་པས་སྨིན་ཅིང་དམ་ཚིག་ལྡན༔ ལྟ་བས་རྒྱུད་སྦྱངས་ཏིང་འཛིན་རྩེ་གཅིག་བརྟན༔ དཀྱིལ་འཁོར་ལེགས་བཀོད་སྒྲུབ་པའི་རྣལ་འབྱོར་པས༔ སྔགས་དང་ཕྱག་རྒྱ་མཆོད་པའི་དཔུང་བསྐྱེད་དེ༔ སྤྱོད་པས་མཚམས་སྦྱར་དངོས་གྲུབ་མཐུ་ཐོབ་ནས༔ མཆོག་དང་ཐུན་མོང་ཕྲིན་ལས་འབད་མེད་འགྲུབ༔ ཅེས་དང་༔ རྒྱུད་ལས། ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་གསུངས་པ་བཞིན་ནོ། །ཁྱད་པར་རྩོདདུས་ཀྱི་འགྲོ་བ་སྙིགས་མའི་མཐའ་ལ་ཐུགས་པས་ཚེ་ཐུང་ཞིང་རྐྱེན་མང་བ་དང་ཉོན་མོངས་པ་ཤུགས་དྲག་པས་རྩོལ་བཅས་ཀྱི་ལམ་གྱིས་གདུལ་བའི་སྣོད་དུ་མ་གྱུར་པ་རྣམས་ལ་ལྷག་པར་དགོངས་ནས། སྒོམ་མི་དགོས་པར་གྲོལ་བའི་གདམས་ཟབ་མཐའ་ཡས་པ་ཞིག་སྟོན་པ་ཀུན་ཏུ་བཟང་པོའི་ཐུགས་ལས་རང་ཤར་བའི་ཚུལ་གྱིས་སྣང་བར་མཛད་པ་སྟེ། དེའངཐུན་མོང་བ། སོར་འབྲང་མའི་འཁོར་ལོ་དང་ཇོ་བོའི་གྲོང་ཁྱེར་སྒྲོལ་འཁོར་སོགས་བཏགས་གྲོལ། བྲིས་སྐུ་མཐོང་བ་དོན་ལྡན་སོགས་བྲིས་སྐུའི་ཆོ་ག་རབ་འབྱམས་དང་དྲི་མེད་དང་ཇོ་བོའི་དབུ་ཞྭའི་མཆོད་རྟེན་མི་འཁྲུགས་པའི་གཟུངས་རྣམས་ཀྱི་མཐོང་གྲོལ། གཟུངས་སྔགས་ཟབ་མོ་དུ་མའི་སྒྲ་ཐོས་པ་དང་པདྨ་གཙུག་ཏོར་གྱི་སྔགས་དུང་ལ་བཟླས་པའི་ཐོས་གྲོལ། དེ་ཉིད་ཀྱི་བདུག་སྤོས་ཚོར་གྲོལ། བདུད་རྩི་རིལ་བུ་དང་གཟུངས་སྒྲུབ་ཀྱི་བུམ་ཆུའི་མྱོང་གྲོལ། བྱེ་མ་ལ་གཟུངས་བཟླས་པ་དང་། ཞལ་བཅུ་གཅིག་པའི་སྔགས་བཟླས་པ་པོའི་རྫི་ཕྱོགས་ཕོག་པའང་སྡིག་པ་ལས་གྲོལ་བར་གསུངས་པའི་རེག་གྲོལ་སོགས་སྔགས་གསར་མའི་གཞུང་ལས་ཀྱང་ཆ་མཐུན་ཅི་རིགས་པར་འབྱུང་བ་དང་། ཁྱད་པར་སྔ་འགྱུར་གྱི་རྒྱུད་གཞུང་རྣམས་ལས་ཐུན་མོང་མ་ཡིན་པ། མཐོང་གྲོལ་འཁོར་ལོ་དང་འོད་གསལ་ངོ་སྤྲོད། བཏགས་གྲོལ་གླེགས་བམ་དང་ཙཀྲ། མྱོང་གྲོལ་སྐྱེ་བདུན་གྱི་དམ་རྫས། ཐོས་གྲོལ་བར་དོ་དྲུག་གི་ངོ་སྤྲོད། ཚོར་གྲོལ་བདུག་སྤོས་ལ་འདེབས་པའི་སྔགས། རེག་གྲོལ་པདྨ་ཅན་གྱི་མྱུར་ལམ་སོགས་མཐའ་ཡས་པར་བྱོན་པ་རྣམས་ནི་ངོ་མཚར་རྨད་དུ་བྱུང་བའི་སངས་རྒྱས་ཀྱི་ཕྲིན་ལས་རླབས་པོ་ཆེ་སྟེ། དམན་པ་དུད་འགྲོ་ཡན་ཆོད་ཀྱི་རྒྱུད་ལ་ཐར་པའི་ས་བོན་འཇོག་ཅིང་། གང་ཟག་གི་རྒྱུད་ཚོད་དང་བསྟུན་ནས་དབང་པོ་རབ་འབྲིང་སོགས་སྐུ་གསུམ་གྱི་ཞིང་ཁམས་སོ་སོར་གྲོལ་བ་དང་། ཡང་ཐའང་ངན་འགྲོའི་སྐྱེ་སྒོ་ལས་ཐར་ཞིང་བྱང་ཆུབ་ཀྱི་མྱུ་གུ་གསོས་ཐེབས་པས་རིམ་གྱིས་གྲོལ་བར་མཛད་པ་ནི་རྒྱལ་བ་རྡོ་རྗེ་འཆང་གི་གསུངས་ལ་ནམ་ཡང་བསླུ་བ་མི་སྲིད་པས་ཡིད་ཆེས་ཀྱི་དད་པ་བརྟན་པོས་ལག་ལེན་དུ་ཅི་ཐེབས་ལ་བརྩོན་པ་གལ་ཆེ་ཞིང་། དེ་དག་སོ་སོའི་ཕན་ཡོན་རང་གཞུང་ལས་བསྟན་པ་བཞིན་ཞིབ་པར་འགོད་རིགས་ཀྱང་ཧ་ཅང་རྒྱ་ཆེ་བའི་ཕྱིར་འདིར་ཡི་གེས་འཇིགས་ལ་དོགས་སེལ་དང་རྩོད་སྤོང་སོགས་ཞིབ་པར་མཁས་མཆོག་སོག་བཟློག་པའི་གསུང་སོགས་ལས་ཤེས་པར་བྱ་བ་གལ་ཆེའོ། །དེ་ལས་གལ་ཆེ་བ་བཏགས་གྲོལ་དང་མྱོང་གྲོལ་གྱི་ཕན་ཡོན་ཅུང་ཟད་སྨོས་ན། བཏགས་གྲོལ་ཐུན་མོང་བ། སོ་སོར་འབྲང་མ་ལས། བྲམ་ཟེ་ཆེན་པོ་གང་ལ་ལ་ཞིག་གིས་རིག་པའི་རྒྱལ་མོ་སོ་སོར་འབྲང་མ་ཆེན་པོ་འདི་ཆོ་ག་བཞིན་དུ་བྲིས་ཏེ། ལག་པའམ་མགུལ་དུ་བཏགས་ན། དེ་དེ་བཞིན་གཤེགས་པ་རྣམས་ཀྱི་བྱིན་གྱིས་བརླབས་པར་རིག་པར་བྱའོ། །དེ་དེ་བཞིན་གཤེགས་པ་ཐམས་ཅད་ཀྱི་སྐུར་རིག་པར་བྱའོ། །དེ་དེ་བཞིན་གཤེགས་པ་ཐམས་ཅད་ཀྱི་རིང་བསྲེལ་གྱི་སྙིང་པོ་ཅན་དུ་རིག་པར་བྱའོ། །དེ་དེ་བཞིན་གཤེགས་པ་ཐམས་ཅད་ཀྱི་སྤྱན་ཡིན་པར་རིག་པར་བྱའོ། །དེ་རྡོ་རྗེ་ཆེན་པོའི་ལུས་སུ་རིག་པར་བྱའོ། །དེ་འབར་བ་འོད་འཕྲོ་བའི་ལུས་དང་ལྡན་པར་རིག་པར་བྱའོ། །དེ་མི་ཤིགས་པའི་གོ་ཆ་ཅན་དུ་རིག་པར་བྱའོ། །དེ་དགྲ་ཐམས་ཅད་རབ་ཏུ་འཇོམས་པར་རིག་པར་བྱའོ། །སྒྲིབ་པ་ཐམས་ཅད་རབ་ཏུ་འཇོམས་པར་རིག་པར་བྱའོ། །དེ་སེམས་ཅན་དམྱལ་བའི་འགྲོ་བ་པ་རྣམ་པར་སྦྱོང་བར་རིག་པར་བྱའོ། །ཞེས་སོགས་བཏགས་པས་གྲོལ་བའི་ཚུལ་དང་ཇི་ལྟར་གྲོལ་བའི་ལོ་རྒྱུས་བཅས་རྒྱས་པར་གསུངས་པ་དང་། དེར་མ་ཟད་པདྨོཥྞིཥའི་གཟུངས་ཀྱི་འོག་ཏུ་ལན་གཅིག་འཛུལ་བས་ཚེ་རབས་འབུམ་དུ་བསགས་པའི་ལས་སྒྲིབ་འབྱང་བར་གསུངས་པ་དང་། གཙུག་ཏོར་རྣམ་རྒྱལ་གྱི་གཟུངས་བྲིས་ཏེ་རྒྱལ་མཚན་གྱི་རྩེར་བཏགས་ན་དེ་མཐོང་བའམ། དེ་དང་ཉེ་བར་གྱུར་ཏམ། ཐ་ན་དེའི་གྲིབ་མ་ཕོག་པའམ། དེའི་རྡུལ་རླུང་གིས་ཁྱེར་བ་ཕོག་ནའང་། ངན་སོང་གསུམ་དང་ལྷ་མ་ཡིན་གྱི་རིགས་སུ་མི་སྐྱེ་ཞིང་། དེ་བཞིན་གཤེགས་པ་རྣམས་ཀྱིས་ལུང་སྟོན་ཅིང་བྱང་ཆུབ་ལས་ཕྱིར་མི་ལྡོག་པར་གསུངས་པ་དང་། ཇོ་བོ་རྗེའི་ལུགས་གྲོང་ཁྱེར་སྒྲོལ་འཁོར་ཞེས་དེ་ཉིད་གྲོང་ཁྱེར་གཅིག་ལ་ཡོད་ན་དེར་གནས་པའི་འགྲོ་བ་ཐམས་ཅད་འཁོར་བ་ལས་བསྒྲལ་ནས་ཐར་པ་ཐོབ་པར་གསུངས་པ་སོགས་ཅི་རིགས་པར་འབྱུང་བ་ནི་མིང་གི་ཁྱད་པར་ཙམ་ལས་དོན་དུ་བཏགས་གྲོལ་ལས་མ་འདས་ཤིང་། ལྷག་པར་ཐུན་མོང་མ་ཡིན་པ་བཏགས་གྲོལ་སྙིང་པོའི་རྒྱུད་ལས། ཨེ་མ་འདི་ནི་ཁྱད་པར་འཕགས། །དབང་པོ་རྣམ་ལྔ་འོན་གྱུར་ཅིང་། །རྒན་གཞོན་ཕོ་མོ་དགེ་སྡིག་མེད། །བག་ཆགས་བཟང་ངན་མེད་པ་རུ། །འདི་ཉིད་བཅངས་པས་འཚང་རྒྱའོ། །ཐ་མ་དབུགས་ལ་སླེབས་ཀྱང་གྲོལ། །སངས་རྒྱས་གདུང་འཛིན་སྲས་གཅིག་ཡིན། །ཞེས་དང་། རྡོ་རྗེ་འཆང་གིསདུས་གནད་ངེས་པ་ལས། འདི་ཉིད་བཅངས་པ་ཙམ་གྱིས་ཀྱང་། །སངས་རྒྱས་ཉིད་དུ་འགྱུར་བ་ལ། །ཐེ་ཚོམ་བྱ་བར་ཅི་ཞིག་དགོས། །གལ་ཏེ་བྱོལ་སོང་མགུལ་དུ་འདི། །བཏགས་པ་ཙམ་གྱིས་དེ་གྲོལ་ན། །འགྲོ་བ་མི་རྣམས་སྨོས་ཅི་དགོས། །ཨེ་མ་རང་བྱུང་ཡི་གེ་འདིས། །སེམས་ཅན་རྣམས་ཀྱི་དོན་བྱེད་ན། །ཚེ་འདས་དེ་ཡི་སྤྱི་བོའམ། །མགུལ་དུ་འདི་བཏགས་བསྲེགས་ན་ནི། །འདི་ཉིད་གྲོལ་བར་སྨོས་ཅི་འཚལ། །མཚམས་མེད་ལྔ་པོ་སྤྱད་པ་ཡང་། །ཉན་ཐོས་རྣམས་དང་སྐལ་བ་མཉམ། །ལུང་དུ་མ་བསྟན་སྐྱེ་བོ་རྣམས། །བྱང་ཆུབ་སེམས་དཔའི་ས་དང་མཉམ། །ཡིད་དཔྱོད་འཛིན་པའི་གྲུབ་མཐའ་ཡང་། །རྡོ་རྗེ་འཆང་དང་མཉམ་པར་ངེས། །འདི་ཉིད་བཅངས་པའི་སྐྱེས་བུ་དེ། །གང་ན་འདུག་པའི་ཡུལ་ཕྱོགས་ཙམ། །ངན་སོང་དག་ནས་གྲོལ་བར་འགྱུར། །མཆོག་དང་ཐུན་མོང་དངོས་གྲུབ་ཐོབ། །རིག་པ་དངོས་ཀྱི་རྟགས་ཡོད་པའི། །སྐལ་ལྡན་དེ་ལ་བསྲེག་མི་དགོས། །འཆི་ཁར་འཕྲོད་པས་འགྱུར་བ་ཡིན། །ཞེས་གསུངས་པས་མཚོན་རྫོགས་ཆེན་གྱི་རྒྱུད་གཞུང་བཀའ་གཏེར་རྣམས་ནས་གསུངས་པའི་ལུང་མཐའ་ཡས་སོ། །མྱོང་གྲོལ་སྐྱེ་བདུན་རིལ་བུ་ནི། བརྟག་གཉིས་ལས། དེ་ཡི་གྲིབ་མ་བདུན་དུ་འགྱུར། །མཐོང་ནས་རྣལ་འབྱོར་པ་ཡིས་མཚོན། །དེ་ནི་ཟོས་པ་ཙམ་གྱིས་ནི། །སྐད་ཅིག་ཉིད་དུ་མཁའསྤྱོད་འགྱུར། །ཞེས་དང་། སྡོམ་འབྱུང་ལས། དེ་བླངས་ལ་དཔའ་ཧེ་རུ་ཀའི་སྔགས་བརྒྱ་རྩ་བརྒྱད་བཟླས་ནས་ཐིག་ལེ་བྱས་ན་སྟེང་དུ་ལྡིང་བར་འགྱུར་ཞིང་དཔག་ཚད་བྱེ་བར་འགྲོ་བར་འགྱུར་རོ། །དེ་ཟོས་པ་ཙམ་གྱིས་དུས་གསུམ་གྱི་ཡེ་ཤེས་ཅན་དུ་འགྱུར་རོ། །ཞེས་སོགས་ཞིབ་པར་བདེ་མཆོགངེས་བརྗོད་བླ་མ། མཁའ་འགྲོ་རྒྱ་མཚོ། ཧེ་རུ་ཀ་མངོན་འབྱུང་། སམྦུ་ཊི། ཕྱག་ཆེན་ཐིག་ལེ། སྒྱུ་འཕྲུལ་ཆེན་མོ་སོགས་ལས་ཀྱང་བསྟན་ཅིང་། བརྟག་གཉིས་སྟོང་ཐུན་ལས། རྒྱལ་པོ་གྲགས་པ་མཐའ་ཡས་མངའ་འབངས་དང་བཅས་པ་སྐྱེ་བདུན་གྱི་ཤ་ཟོས་པས་མཁའ་སྤྱོད་དུ་སོང་སྟེ་གྲོང་ཁྱེར་སྟོང་པར་བཤད་པ་སོགས་ཡིད་ཆེས་ཀྱི་ལོ་རྒྱུས་མང་ཞིང་། ཁྱད་པར་སྤྱན་རས་གཟིགས་དོན་ཡོད་ཞགས་པའི་རྒྱུད་ལས། རིལ་བུ་ཟོས་པ་ཙམ་གྱིས་ནི། །ནད་རྣམས་ཐམས་ཅད་རྣམ་པར་འཇིག །གང་གིས་རིལ་བུ་དེ་ལ་བརྟེན། །རིལ་བུ་ཐིག་ལེ་རྟག་བྱེད་པ། །དེ་བཞིན་གཤེགས་ཀུན་དགོངས་པར་མཛད། །འཕགས་པ་སྤྱན་རས་གཟིགས་ཀྱི་དབང་། །དེ་ཉིད་རིགས་ལ་རྟག་ཏུ་ནི། །མཆོག་སྦྱིན་དུས་ཀུན་གཟིགས་པར་མཛད། །བསོད་ནམས་ཕུང་པོ་སྟོང་དག་ནི། །ཉི་མ་རེ་རེར་སོག་པར་བྱེད། །འཇིག་རྟེན་པ་ལ་བདེ་སྤྱད་ཅིང་། །འཇིག་རྟེན་ཕ་རོལ་ཤིན་ཏུ་བདེ། །ཚེ་བརྗེ་བ་ནི་འཕོས་ནས་སུ། །བདེ་བ་ཅན་དུ་མོད་ལ་འགྲོ། །གང་དང་གང་དུ་སྐྱེ་བ་དེར། །ཚེ་རབས་རྟག་ཏུ་ཚེ་རབས་དྲན། །ལག་ན་རྡོ་རྗེ་གནོད་སྦྱིན་ཆེ། །གནོད་སྦྱིན་བྱེ་བས་ཡོངས་བསྐོར་ཞིང་། །གཡེལ་བ་མེད་པར་ཉིན་མཚན་དུ། །དུས་ཀུན་དུ་ནི་སྲུང་བར་བྱེད། །ཅེས་དང་། རིལ་བུ་སུ་ལ་ཡོད་པ་ནི། །ཕྱིར་མི་ལྡོག་པར་ལུང་བསྟན་ཅིང་། །མགོན་པོ་ས་བཅུ་དག་ལ་གནས། །རྟག་ཏུ་མཆོད་རྟེན་གྱུར་པ་སྟེ། །སྐུ་གདུང་སྙིང་པོའི་བདག་ཉིད་ཅན། །རྟག་ཏུ་སངས་རྒྱས་བདག་ཉིད་འགྱུར། །ཞེས་དང་། རིལ་བུ་མཐོང་བ་ཙམ་གྱིས་ནི། །སྡུག་བསྔལ་ཀུན་ལས་རབ་ཏུ་གྲོལ། །སྡིག་པ་ཐམས་ཅད་རྣམ་པར་གཅོད། །སྒྲིབ་པ་ཐམས་ཅད་རྣམ་པར་དག །དེ་ནི་ངན་འགྲོར་འགྲོ་མི་འགྱུར། །ཕྱིར་ཞིང་གནས་མཆོག་ཞི་བ་ཐོབ། །ཅེས་གསུངས་པ་དང་། ཐུགས་ཆེན་གསང་འདུས་རྒྱུད་ལས། རིལ་བུ་སུ་ཡི་ལྟོར་སོང་བ༔ ཚེ་རབས་གང་དང་གར་སྐྱེས་ཀྱང༔ སྤྱན་རས་གཟིགས་དང་འབྲལ་མི་སྲིད༔ བདག་བས་གཞན་གཅེས་འགྲོ་དོན་སྤྱོད༔ ཅེས་དང་། ཨོ་རྒྱན་ཆེན་པོས། བདག་འདྲ་འཆི་མེད་རིག་འཛིན་པད་འབྱུང་ནི༔ སྐྱེ་འགྲོ་སེམས་ཅན་རྣམས་ཀྱི་དོན་ལས་མེད༔ གང་ལ་གང་འདུལ་སྤྲུལ་བསྒྱུར་ཐབས་མཆོག་གི༔ ཚོར་གྲོལ་མཐོང་གྲོལ་རེག་གྲོལ་མྱོང་གྲོལ་སོགས༔ འདུས་བྱས་འགྲོ་བ་འདུལ་བའི་བློ་འཚམས་སུ༔ མ་བསྒོམས་སངས་རྒྱས་ཐབས་མཆོག་དཔག་མེད་སྟོན༔ བྲམ་ཟེའི་འཕེལ་གདུང་རིལ་བུའི་རྒྱུ་མཆོག་ནི༔ བྲམ་ཟེ་ཆེན་པོ་པྲ་བྷ་ཧ་སྟི་དང༔ བྲམ་ཟེ་དུང་རྣ་ཅན་དང་པདྨ་དཀར༔ རིག་འཛིན་ཆེན་པོ་བརྒྱད་ཀྱི་འཕེལ་གདུང་དང༔ མནྡ་རས་རྙེད་དྲི་མེད་སྐུ་ཤ་རྣམས༔ གཅིག་བསྡུས་འཕེལ་གདུང་མྱོང་གྲོལ་རིལ་བུ་འདི༔ རེག་མྱོང་ལྡན་པས་ཚེ་གཅིག་སངས་རྒྱས་འགྲུབ༔ ཞེས་དང་། ཚེ་གཅིག་སངས་རྒྱས་འགྲུབ་པའི་མྱོང་གྲོལ་འདི༔ ལུས་ལ་བཅངས་ན་ནད་མཚོན་འཇིགས་བརྒྱད་ཁོག༔ རྩ་གསུམ་རྒྱ་མཚོའི་ལྷ་ཚོགས་སྤྲིན་བཞིན་འདུ༔ མ་སྲིང་མཁའ་འགྲོའི་ཚོགས་རྣམས་གྲིབ་བཞིན་འགྲོགས༔ དམ་ཅན་རྒྱ་མཚོའི་ཚོགས་རྣམས་བྲན་ལྟར་ཁོལ༔ ནག་ཕྱོགས་ལྷ་སྲིན་གདུག་པའི་རྩུབ་འགྱུར་ཞི༔ འཕོ་ལྟུང་ཉམས་པའི་ལས་སྒྲིབ་ཐམས་ཅད་དག༔ མྱོང་བ་ཙམ་གྱིས་ཚེ་གཅིག་སངས་རྒྱས་འགྲུབ༔ ཐ་ན་ཁྱི་ཕག་ལྟ་བུ་ཡིན་མོད་ཀྱང༔ སྲོ་མ་ཙམ་ཞིག་ཁ་ལ་སོང་གྱུར་ན༔ དལ་འབྱོར་ཆོས་ལྡན་མི་ལུས་ཐོབ་ནས་ནི༔ ཚེ་གཅིག་ཀུན་མཁྱེན་འབྲས་བུ་རྙེད་པར་ངེས༔ ཟག་མེད་དམ་རྫས་ཁྱད་འཕགས་མྱོང་གྲོལ་འདི༔ ཆུ་ལ་འཐོར་བས་ཆུ་གནས་སེམས་ཅད་ཀུན༔ ལས་སྒྲིབ་དག་ནས་སངས་རྒྱས་ཐོབ་པར་ངེས༔ མེ་ལ་བསྲེགས་ན་དུད་པ་ཕོག་ཚད་ཀུན༔ གཟུགས་ཅན་མི་དང་གཟུགས་མེད་ཡིན་ཡང་རུང༔ ཚེ་གཅིག་སངས་རྒྱས་འགྲུབ་པར་ཐེ་ཚོམ་མེད༔ ཚོང་འདུས་ས་མདོ་རི་རྩེར་སྦས་གྱུར་ན༔ དེར་ཕྱིན་རླུང་གི་ཟེར་མ་ཕོག་ཚད་ཀུན༔ མངོན་པར་བྱང་ཆུབ་སངས་རྒྱས་ཐོབ་པར་ངེས༔ ས་གནས་གསོ་དང་སྐུ་གསུང་ཐུགས་རྟེན་བཞེངས༔ ནང་གཞུགས་འཇུག་པ་མི་མིན་གདོན་བགེགས་འཇོམས༔ རྟེན་དེ་མཇལ་བས་བྱང་ཆུབ་སངས་རྒྱས་རེག༔ མི་མཐུན་འཇིགས་པ་བརྒྱད་ལས་སྐྱོབ་པར་ངེས༔ ཞེས་དང་། ཤིག་གི་སྙིང་ཙམ་སུ་ཡི་ལྟོར་སོང་བ༔ རྨང་པོའི་ལྟོར་སོང་བུ་ཡི་དངོས་གྲུབ་ཐོབ༔ དབུལ་པོའི་ལྟོར་སོང་ནོར་གྱི་དངོས་གྲུབ་ཐོབ༔ འཆི་ཉེའི་ལྟོར་སོང་ཚེ་ཡི་དངོས་གྲུབ་ཐོབ༔ དད་ཅན་ལྟོར་སོང་ཆོས་ཀྱི་དངོས་གྲུབ་ཐོབ༔ ནད་པའི་ལྟོར་སོང་ཉོན་མོངས་ཟུག་རྔུ་ཞི༔ དེ་སོགས་ཡོན་ཏན་བསམ་གྱིས་མི་ཁྱབ་ཀྱང༔ ལོག་ལྟ་ཅན་གྱིས་ཡོན་ཏན་སྐྱོན་དུ་མཐོང༔ དེ་ཡང་འབྲེལ་བ་སྣ་རེ་ཐོགས་པ་ཡིས༔ སྒྲིབ་གཉིས་དག་ཅིང་ཆོས་ཀྱིས་ལས་དང་ལྡན༔ དེ་ཕྱིར་སྐྱེ་བདུན་རིལ་བུ་འདི་དག་ནི༔ མཐོང་ཐོས་དྲན་རེག་དོན་དང་ལྡན་པར་བྱེད༔ ཅེས་དང་། དྲི་མ་མེད་པའི་ཏིལ་ཙམ་ཞིག་གིས་ཀྱང༔ ངན་སོང་འགྲོ་ངེས་ཞིག་ཀྱང་མཐོ་རིས་སྐྱེ༔ དཀར་པོ་དགེ་བའི་ལས་ཀྱི་ས་བོན་ཐེབས༔ དྲང་སྲོང་གཟའ་ཡི་ནད་དང་གདོན་བགེགས་དང༔ འདྲེ་ཡི་གཙེས་པ་རྣམས་ཀྱང་སྒྲིབ་པར་འགྱུར༔ མཚམས་མེད་ལྔ་བྱས་ལས་ཀྱང་བྱང་བར་འགྱུར༔ ལས་ཀྱི་དབང་གིས་དུད་འགྲོར་སྐྱེ་གྱུར་ཀྱང༔ ཡུལ་བཟང་བདག་བྱམས་བརྡུང་བརྩོག་མེད་པར་འགྱུར༔ མདོར་ན་རྒྱལ་བ་སྲས་བཅས་བྱིན་རླབས་འདི༔ བསོད་ནམས་ཆུང་བའི་དུད་འགྲོ་ཡིན་ཡང་རུང༔ མི་ཚེ་སྡིག་བསྒྲིལ་བཤན་པ་ཡིན་ཡང་རུང༔ སྐྱེ་བ་དམན་པའི་བུད་མེད་ཡིན་ཡང་རུང༔ ལས་ཀྱི་འཕྲོ་མེད་མི་ལུས་ཡིན་ཡང་རུང༔ ཆུ་ལ་གནས་པའི་ཉ་སྲམ་ཡིན་ཡང་རུང༔ མཁའ་ལ་གནས་པའི་འདབ་ཆགས་ཡིན་ཡང་རུང༔ སྡིག་སྒྲིབ་དག་ཅིང་མི་ལུས་གཙང་མ་ཐོབ༔ དུག་གསུམ་ནད་སེལ་བདུད་རྩི་སྨན་གྱི་མཆོག༔ སྙིགས་མའི་འགྲོ་རྣམས་མྱོང་གྲོལ་རྫས་ཀྱིས་གྲོལ༔ ཅེས་དང་། ཡང་གཏེར་རྒྱལ་རྒྱམ་རིལ་སྒྲུབ་སྐབས་ལས་ཀྱང་། སྐྱེ་བདུན་རྫས་ཀྱི་རིལ་བུ་གང༔ མྱོང་བསཐུགས་རྗེའི་བྱིན་རླབས་ཞུགས༔ ཐ་མའི་ལུས་ལ་ཡེ་ཤེས་རྙེད༔ སྤྱན་རས་གཟིགས་དང་སྐལ་བ་མཉམ༔ མཚམས་མེད་ལྔ་ཡི་སྡིག་ཀྱང་བྱང༔ ངན་སོང་འཁོར་བ་དོང་སྤྲུགས་ནས༔ སྐྱེ་བ་གཞན་གྱིས་མ་ཆོད་པར༔ བདེ་བ་ཅན་དུ་བྱང་ཆུབ་ཐོབ༔ གང་ཞིག་རིལ་བུ་མཐོང་བའམ༔ རིལ་བུ་ཐིག་ལེ་བྱེད་པ་དང༔ འཆང་དང་ཐོས་དང་དྲན་པས་ཀྱང༔ བྱང་ཆུབ་ས་བོན་ཐེབས་པར་འགྱུར༔ ཞེས་སོགས་ཐུགས་ཆེན་རིལ་སྒྲུབ་རྣམས་ཀྱི་གཏེར་གཞུང་སོགས་ལས་ཕན་ཡོན་མཐའ་ཡས་པར་གསུངས་སོ། །མྱོང་གྲོལ་བདུད་རྩི་སྨན་སྒྲུབ་ཀྱི་ཕན་ཡོན་ཡང་། བདུད་རྩི་བམ་བརྒྱད་ལས། བདུད་རྩིའི་ཆོས་ཀྱི་དོན་འདི་ནི་དཔེར་ན་མེ་དང་འདྲ་སྟེ། ཆུང་སྟེ་རྡུལ་ཙམ་ནས་ཆེ་སྟེ་སྲིད་པའི་རི་བོ་ཡང་བསྲེག་གོ །དེ་བཞིན་དུ་ཆོས་བདུད་རྩི་ཆེན་པོ་འདིས་ཀྱང་སེམས་ཅན་གྱི་ཉོན་མོངས་པའི་རྟོག་པ་ཕྲ་མོ་དང་། དུག་ལྔའི་རྡུལ་དཔྱིས་ཕྱུང་སྟེ་རིགས་ལྔ་ཡེ་ཤེས་ལྔར་འཚང་རྒྱ་བར་བྱེད་དོ། །ཞེས་དང་། འཇམ་དཔལ་བསྐལ་པ་སྟོང་གི་བར་དུ་སེམས་ཅན་གྱི་དོན་བྱས་པ་བས་བདུད་རྩི་ཆེན་པོ་འདིས་ལན་གཅིག་སེམས་ཅན་གྱི་དོན་བྱས་པ་བསོད་ནམས་ཆེ་སྟེ། སེམས་ཅན་ཐམས་ཅད་དམྱལ་ཁམས་བཅོ་བརྒྱད་ཀྱི་ནང་ནས་ཐར་པའི་ལམ་དུ་འདྲེན་པ་ཡིན་ནོ། །ཞེས་གསུངས་པ་དང་། ཨོ་རྒྱན་ཆེན་པོས་ཀྱང་། བདེ་གཤེགས་མ་ལུས་མཆོད་པའི་རྫས། །བླ་མ་ཡི་དམ་སྡུད་པའི་རྩི། །མཁའ་འགྲོ་ཀུན་གྱི་སྙིང་ཁྲག་ཡིན། །ཟོས་པས་ཡོན་ཏན་བརྗོད་མི་ལང། །སངས་རྒྱས་སྐུ་ལྔའི་ཡོན་ཏན་འཐོབ། །ཕྱི་ལྟར་ལུས་ཀྱི་ནད་གདོན་འཇོམས། །ནང་དུ་ཉོན་མོངས་དུག་ལྔ་འདག །དམ་ཚིག་ཉམས་ཆག་ཐམས་ཅད་བསྐང་། །གསང་བ་རང་བྱུང་ཡེ་ཤེས་རྟོགས། །ཉན་ཐོས་རང་སངས་རྒྱས་རྣམས་ཀྱིས། །ཟོས་ན་ས་བཅུ་ཐོབ་ནས་ཀྱང་། །ཐེག་ཆེན་བྱང་ཆུབ་སེམས་དཔར་འགྱུར། །བླ་མ་མཆོད་ན་བྱིན་རླབས་འཇུག །ཡི་དམ་མཆོད་ན་དངོས་གྲུབ་སྟེར། །བདེ་གཤེགས་མཆོད་ན་ཐུགས་རྗེ་འབྱུང་། །མཁའ་འགྲོ་མཆོད་ན་ལུང་ཡང་སྟོན། །རྣལ་འབྱོར་པའམ་སུས་ཟོས་ཀྱང་། །ཕྱི་ཡི་ནད་གདོནསྡིག་སྒྲིབ་བྱང་། །ནང་གི་བསྐྱེད་རིམ་ཏིང་འཛིན་གསལ། །གསང་བ་རང་རིག་ཆོས་སྐུར་རྟོགས། །ཉན་ཐོས་རང་སངས་རྒྱས་རྣམས་ཀྱིས། །ཉམས་དང་ལྷག་ཆད་མ་ལུས་སྐོང་། །འཆང་བས་དུས་མིན་འཆི་བ་བཟློག །གདུག་པའི་དུག་ཀྱང་འཇིལ་བར་ནུས། །བྱུག་པས་ནད་གདོན་མ་ལུས་སེལ། །བསྲེགས་ན་ནད་གདོན་ཐམས་ཅད་སྐྲོད། །འདི་ཉིད་བསྒྲུབས་པའི་གནས་དེ་ཡང་། །དུར་ཁྲོད་བསིལ་བའི་ཚལ་དང་མཚུངས། །དཔའ་བོ་མཁའ་འགྲོ་ཐམས་ཅད་འདུ། །ས་ཕྱོགས་བྱིན་དང་ལྡན་པར་འགྱུར། །ཆར་ཆུ་འབེབས་ཤིང་ལོ་ཕྱུགས་ལེགས། །གང་བསྒྲུབ་ས་ཡི་གནས་དེ་ན། །སུ་བསྡད་མི་རྣམས་ཏིང་འཛིན་འཆར། །ནམ་ཞིག་ཚེ་ཡི་དུས་བྱས་ནས། །ཕོ་མོ་བཟང་ངན་མེད་པ་རུ། །རིག་པ་འཛིན་པའི་ས་ལ་གནས། །དེ་ཕྱིར་མཆོག་གི་དམ་རྫས་སོ། །ཞེས་དང་། ཁྲག་འཐུང་འདུས་པ་རྩ་བའི་རྒྱུད་ལས་ཀྱང་། སྐད་ཅིག་ཐུག་འཕྲད་བསྟེན་པ་ཡིས༔ ཚེ་རིང་ནད་མེད་བདེ་བ་དང༔ ལང་ཚོ་ཁ་དོག་སྟོབས་དང་གཟི༔ འཕེལ་ཞིང་དབང་པོ་རིག་པ་གསལ༔ མཁའ་ལ་འགྲོ་ཞིང་ཕ་རོལ་གྱི༔ ནུས་སྟོབས་གནོད་པས་མི་ཚུགས་ཤིང༔ ཀུན་གྱི་བཀུར་སྟིའི་འོས་སུ་མཐོང༔ ཁམས་ཀྱི་ཟས་དང་མ་འདྲེས་ཤིང༔ གོས་མེད་མཁའ་ལ་གཅེར་བུར་སྤྱོད༔ སྔོན་གྱི་རྒྱལ་བ་ཆེ་རྣམས་ཀྱི༔ རིག་པ་འཛིན་པའི་གྲལ་འཐོབ་འགྱུར༔ དེ་ཉིད་མ་རེག་བར་དུ་ཡང༔ ནད་དང་མུ་གེས་མི་ཚུགས་ཤིང༔ བར་གྱི་བསྐལ་པའི་འཇིགས་ལས་ཐར༔ གཞན་ལ་ཕན་པ་སྒྲུབ་པ་སོགས༔ ཡོན་ཏན་ཆེན་པོ་དཔག་མེད་ཐོབ༔ ཅེས་དང་། སྒྱུ་འཕྲུལ་ལས། རྡོ་རྗེ་ལྕེ་ཡི་དམ་ཚིག་ནི། །རྡོ་རྗེ་ཅན་གྱི་ཧཱུྃ་བསྒོམ་སྟེ། །མཐེབ་སྲིན་ཐབས་ཤེས་ཕྱག་རྒྱ་ཡིས། །མྱ་ངན་རྡོ་རྗེའི་ཐུགས་འཐོབ་འགྱུར། །ཞེས་སོགས་རྒྱུད་གཞུང་རྣམས་ལས་རྒྱ་ཆེར་གསུངས་པ་ཡིན་ནོ། །སྨྲས་པ། གཞི་རྒྱུད་གདོད་ནས་དག་པའི་བཻཌཱུཪྱ། །ཐབས་རྒྱུད་སྨིན་གྲོལ་ལམ་གྱིས་ཡོངས་སྦྱངས་པས། །འབྲས་རྒྱུད་སྐུ་བཞིའི་འདོད་པ་འཇོ་བའི་དབྱིག །ཤེར་བརྩོན་རྒྱལ་མཚན་རྩེ་མོར་ཅིས་མི་བསྙེན། །དུས་གསུམ་གཤེགས་པའི་སྟོབས་བཅུ་མངའ་བ་རྣམས། །ལམ་འདིར་མ་བརྟེན་འགའ་ཡང་ཡོན་མིན་ཞེས། །དྲུག་པ་རྡོ་རྗེ་འཆང་དེས་ལན་སྟོང་དུ། །ཡང་ཡང་བསྔགས་པའི་ཚུལ་ལ་སུ་མི་རངས། །སྟོང་ཁམས་ནོར་བུའི་གྲམ་བུ་བརྡལ་བས་ཀྱང་། །མཚོན་མིན་གྲོལ་བ་དྲུག་ལྡན་འདོད་དགུའི་གཏེར། །ཀུན་བཟང་པདྨས་རྗེས་འཇུག་སྐལ་བར་གནང་། །དམན་ལམ་སེར་བུའི་རིལ་བུ་ཅི་ཕྱིར་གཉེར། །སྣང་གྲགས་རྟོག་ཚོག་དཀྱིལ་འཁོར་གསུམ་གྱི་ངང་། །འདོད་ཡོན་མ་སྤངས་ཡེ་ཤེས་རོལ་པའི་རྒྱན། །ཡེ་ནས་དག་མཉམ་ཆོས་སྐུའི་རོལ་པ་ལ། །མ་དག་འཁྲུལ་མཚན་རྡུལ་ཙམ་བསལ་བྱ་ཅི། །དེ་ཚུལ་ཤེས་པའི་སྐལ་བཟང་འགའ་ཡོད་ན། །ཐ་སྙད་ཚིག་ཆུའི་རོལ་ལ་མི་ཞེན་པར། །ཟབ་གསང་མན་ངག་འཆི་མེད་བདུད་རྩིའི་བཅུད། །སྙིང་གི་བུམ་པར་ཅི་དགར་བསྟེན་པར་འོས། །འདི་ན་མི་རྟག་སྲིན་མོས་མ་ཟོས་པའི། །འདུས་བྱས་དངོས་དེ་སྔོན་ཆད་མ་འཚལ་ན། །སོས་དལ་བག་སྐྱོང་སྤྱོད་པའི་སེམས་ཁྱོད་ལ། །མི་འཇིགསསྦྱིན་པོ་དེ་ནི་སུ་ཞིག་ཡིན། །ཚེ་འདིའི་བདེ་སྡུག་རྨི་ལམ་ཡད་ཡུད་ཙམ། །འཇིག་རྟེན་ཕྱི་མ་འདི་ཞེས་ཚད་བཟུང་ཅི། །ད་རེས་རྟེན་འདིར་སྲིད་མཚོ་མ་བརྒལ་ན། །སྡུག་བསྔལ་རྦ་ལས་ནམ་ཞིག་ཐར་པར་འགྱུར། །དེ་ཕྱིར་ད་ལྟ་རང་དབང་འབྱོར་དུས་འདིར། །འདིར་སྣང་ཆོས་བརྒྱད་ཞགས་པས་འཆིང་མིན་གང་། །གང་དུ་སྲས་བཅས་རྒྱལ་རྣམས་བགྲོད་གཅིག་ལ། །ལམ་མཆོག་འདིར་ཞུགས་ཐར་གླིང་བསྙེགས་པར་རིགས། །སྐལ་བཟང་སྐལ་བཟང་དོན་མཐུན་སྐྱེ་བོ་རྣམས། །ཡང་ཟབ་ཡང་ཟབ་སྙིང་པོའི་བསྟན་མཇལ་ཚེ། །མྱུར་བར་མྱུར་བར་བརྩོན་པའི་དཔུང་བསྐྱེད་ལ། །རང་བྱུང་རང་བྱུང་རྒྱལ་བའི་སྐུ་འགྲུབ་མཛོད། །དེ་ལྟར་ཐུན་མིན་རྡོ་རྗེ་ཐེག་པའི་ཁྱད་ཆོས་ཅུང་ཟད་སྨོས་ནས། ཐུན་མོང་དུ་རྟོགས་པའི་ཆོས་ལ་བསྒྲུབས་པ་བྱས་པའི་ཕན་ཡོན་ཡང་། ཏིང་འཛིན་རྒྱལ་པོ་ལས། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ནང་དུ་ཡང་དག་འཇོག་པ་ལ་བརྩོན་པའི་ཕན་ཡོན་ནི་བཅུ་སྟེ། སེམས་རྙོག་པ་མེད་པ་དང་། བག་ཡོད་པར་གནས་པ་དང་། སངས་རྒྱས་རྗེསསུ་དྲན་པ་དང་། སྤྱོད་པ་ལ་དད་པ་དང་། ཡེ་ཤེས་ལ་ནེམ་ནུར་མེད་པ་དང་། སངས་རྒྱས་ལ་བྱས་པ་གཟོ་བ་དང་། ཆོས་མི་སྤོང་བ་དང་། ཤིན་ཏུ་བསྡམས་པར་གནས་པ་དང་། དུལ་བའི་རྗེས་སུ་འཐོབ་པ་དང་། སོ་སོ་ཡང་དག་པར་རིག་པ་བཞི་མངོན་དུ་བྱེད་པ་སྟེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ནང་དུ་ཡང་དག་འཇོག་པ་ལ་བརྩོན་པའི་ཕན་ཡོན་ནོ། །ཞེས་པ་ནས། བྱང་ཆུབ་སེམས་དཔའ་དེ་ནི་ཤི་འཕོས་ནས། །བདེ་བ་ཅན་གྱི་འཇིག་རྟེན་ཁམས་སུ་འགྲོ། །ཚེ་དཔག་མེད་ལས་ཆོས་བཟང་མཆོག་ཐོས་ནས། །སྐྱེ་བ་མེད་པའི་ཆོས་ལ་བཟོད་པ་འཐོབ། །ཅེས་པའི་བར་གྱིས་བསྟན་པ་དང་། ཁྱད་པར་སྦྱིན་སོགས་ལས་མཆོག་ཏུ་གྱུར་པའི་ཕན་ཡོན་ཡང་། མདོ་ལས། འཇམ་དཔལ། བྱང་ཆུབ་སེམས་དཔའ་གང་ལ་ལས་ལྷ་ཡི་ལོ་སྟོང་དུ་དཀོན་མཆོག་ལ་ཅི་དགོས་པ་བྱིན་པ་བས། བྱང་ཆུབ་སེམས་དཔའ་གཞན་ཞིག་གིས་ཐ་ན་སེ་གོལ་གཏོགས་པ་སྲིད་དུ། འདུ་བྱེད་ཐམས་ཅད་མི་རྟག་པའོ། །འདུ་བྱེད་ཐམས་ཅད་ནི་སྡུག་བསྔལ་བའོ། །འདུ་བྱེད་ཐམས་ཅད་ནི་སྟོང་པའོ། །འདུ་བྱེད་ཐམས་ཅད་ནི་བདག་མེད་པའོ། །སྙམ་དུ་དཔྱོད་ན་དེ་དེ་བས་བསོད་ནམས་གྲངས་མེད་བསྐྱེད་པར་བྱེད་དོ། །ཞེས་དང་། བྱམས་པ་སེངྒེའི་སྒྲ་ལས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་མཆོད་པའི་ཡོ་བྱད་ཐམས་ཅད་ཀྱིས་བཀང་སྟེ། དེ་བཞིན་གཤེག་པ་ལ་ལོ་འབུམ་གྱི་བར་དུ་ཉིན་ལན་གསུམ་མཚན་ལན་གསུམ་དུ་ཕུལ་བ་བས་ནི། གང་གིས་བྱང་ཆུབ་དོན་དུ་གཉེར་ཞིང་ཚུལ་ཁྲིམས་ཀྱི་ཕུང་པོ་ལ་གནས་པ་དེས། མཁན་པོ་ལས་ལུང་མནོས་ཏེ། ཁ་ཏོན་དུ་བྱེད་ཅིང་ཐ་ན་ཚིགས་བཞི་པའི་དོན་ཡིད་ལ་བྱེད་པ་དང་། འདུ་འཛི་ལ་སྐྲག་ནས་དགོན་པར་གོམ་པ་བདུན་བོར་བ་བསོད་ནམས་ཆེ་བར་གསུངས་པ་དང་། གཞན་ཡང་རྒྱལ་པོ་མུ་ཁྱུད་འཛིན་གྱིས་དེ་བཞིན་གཤེགས་པ་མེ་ཏོག་སྣ་ཚོགས་ལ་ལོ་བརྒྱད་ཁྲི་བཞི་སྟོང་དུ་ཡོ་བྱད་ཐམས་ཅད་ཀྱིས་མཆོད་པ་བས། གང་དགོན་པར་གནས་ཏེ་ཆོས་ཐམས་ཅད་མ་སྐྱེས་པའོ་ཞེས་ཐ་ན་སེ་གོལ་གཏོགས་པ་ཙམ་དུ་བསྒོམ་ན། སྔ་མ་དེསསྟོང་ནས་བྱེ་བ་ཁྲག་ཁྲིག་འབུམ་གྱི་བར་གྱི་ཆ་དང་གྲངས་ནས་རྒྱུའི་བར་དུ་ཉེ་བར་མི་འགྲོ་བར་གསུངས་པ་དང་། རྟོགས་པ་རྒྱས་པའི་མདོ་ལས། ཐང་གཅིག་བསམ་གཏན་ཐུན་ཞུགས་ན། །ཁམས་གསུམ་གང་བའི་མི་རྣམས་ལ། །སྲོག་སྦྱིན་བས་ནི་འདི་དོན་ཆེ། །ཞེས་གསུངས། ཉན་པ་སོགས་ལས་ཁྱད་པར་དུ་གྱུར་པའང་། དེ་ཁོ་ན་ཉིད་བསྟན་བའི་མདོ་ལས། ཤཱ་རིའིབུ། གང་གིས་བསྐལ་པ་གཅིག་གི་བར་དུ་ཉན་པ་བས། །གང་གིས་སེ་གོལ་གཏོགས་པ་ཙམ་གཅིག་དུ་དེ་ཁོ་ན་ཉིད་ཀྱི་ཏིང་ངེ་འཛིན་བསྒོམ་ན་བསོད་ནམས་མང་དུ་འཕེལ་ལོ། །ཤཱ་རིའི་བུ་དེ་ལྟ་བས་ན། དེ་ཁོ་ན་ཉིད་ཀྱི་ཏིང་ངེ་འཛིན་འདི་གཞན་ལ་ནན་གྱིས་གདམས་པར་བྱའོ། །ཞེས་དང་། གཙུག་ཏོར་ཆེན་པོའི་མདོ་ལས། བསྐལ་པ་མང་པོར་ཐོས་པ་དང་བསམ་པ་བས་ནི་ཉིན་གཅིག་ཆོས་ཉིད་ཀྱི་དོན་བསྒོམས་ན་བསོད་ནམས་ཆེའོ། །དེ་ཅིའི་ཕྱིར་ཞེ་ན། དེས་སྐྱེ་འཆིའི་ལམ་དང་རིང་དུ་བྱེད་པའི་ཕྱིར་རོ། །ཞེས་གསུངས། དེ་ཁོ་ན་ཉིད་བསྒོམས་པས་སྒྲིབ་པའི་ཚོགས་ཀྱི་གཉེན་པོ་བྱེད་པའང་། མདོ་ལས། སྐྱེ་བ་པོ་ཡི་ལྷག་མཐོང་དང་། །ཞི་གནས་གོམས་པར་བྱས་ནས་ནི། །གནས་ངན་ལེན་གྱི་འཆིང་བ་དང་། །མཚན་མའི་འཆིང་ལས་རྣམ་གྲོལ་འགྱུར། །ཞེས་དང་། དཀོན་བརྩེགས་ལས། མུན་ཁང་དུ་སྒྲོན་མེ་བཏེགས་པའི་དཔེ་སྔོན་དུ་བཏང་ནས། འོད་སྲུང་དེ་བཞིན་དུ་ལས་དང་ཉོན་མོངས་པར་གྱུར་པ་ལོ་འབུམ་དུ་བསགས་པ་ཡང་ཚུལ་བཞིན་དུ་ཡིད་ལ་བྱེད་པ་སོ་སོར་རྟོག་པ་གཅིག་གིས་མེད་པར་འགྱུར་རོ། །ཞེས་དང་། འོད་སྲུང་ཚུལ་བཞིན་ཡིད་ལ་བྱེད་པ་སོ་སོར་རྟོག་པ་གཅིག་གིས་བསྐལ་པ་འབུམ་དུ་བསགས་པའི་ལས་དང་ཉོན་མོངས་པ་རྣམ་པར་བྱང་བར་འགྱུར་རོ། །ཞེས་དང་། དགོངས་འགྲེལ་ལས། བསམ་གཏན་གྱིས་ཉོན་མོངས་པ་རྣམ་པར་འཇིལ་ལོ། །ཤེས་རབ་ཀྱིས་བག་ལ་ཉལ་རབ་ཏུ་སྤང་ངོ་། །ཞེས་གསུངས། འདོད་ཡོན་ལ་ཞེན་པ་བཟློག་ཅིང་མངོན་ཤེས་དང་ཏིང་འཛིན་འཆར་བའང་། སྡུད་པ་ལས། བསམ་གཏན་གྱིས་ནི་འདོད་པའི་ཡོན་ཏན་སྨད་པ་འདོར། །རིགས་དང་མངོན་པར་ཤེས་དང་ཏིང་འཛིན་མངོན་པར་འགྲུབ། ཅེས་གསུངས། ཐེ་ཚོམ་གྱི་གནས་རྣམས་གཅོད་པའང་། ས་སྙིང་འཁོར་ལོ་བཅུ་པའི་མདོ་ལས། ཏིང་འཛིན་བསྒོམས་པས་ཐེ་ཚོམ་གཅོད་འགྱུར་གྱི། །དེ་མ་རྟོགས་པར་གཞན་གྱིས་ནུས་མ་ཡིན། །དེ་བས་ཏིང་འཛིན་སྒོམ་པ་མཆོག་ཡིན་གྱི། །མཁས་པ་དག་གིས་དེ་ལ་ནན་ཏན་བྱ། །ཞེས་གསུངས། སྙིང་རྗེ་ཆེན་པོ་སྐྱེ་ཞིང་ཡང་དག་པའི་དོན་མཐོང་བས་མྱ་ངན་ལས་འདས་པའི་འབྲས་བུ་མངོན་དུ་བྱེད་པའང་། ཆོས་ཡང་དག་པར་སྡུད་པ་ལས། ཡིད་མཉམ་པར་བཞག་པས་ཡང་དག་པ་ཇི་ལྟ་བ་བཞིན་མཐོང་བར་འགྱུར་རོ། །ཡང་དག་པ་ཇི་ལྟ་བ་བཞིན་མཐོང་བས་བྱང་ཆུབ་སེམས་དཔའ་སེམས་ཅན་རྣམས་ལ་སྙིང་རྗེ་ཆེན་པོ་འཇུག་གོ །ཞེས་དང་། ཏིང་རྒྱལ་ལས། གལ་ཏེ་ཆོས་ལ་བདག་མེད་སོ་སོར་རྟོག །སོ་སོར་དེར་བརྟག་གལ་ཏེ་བསྒོམ་པ་ནི། །དེ་ཉིད་མྱ་ངན་འདས་ཐོབ་འབྲས་བུའི་རྒྱུ། །རྒྱུ་གཞན་གང་གིས་དེ་ནི་ཞིར་མི་འགྱུར། །ཞེས་གསུངས། གདུལ་བྱ་རྣམས་ཡོངས་སུ་སྨིན་པར་ནུས་པའི་ཁྱད་པར་ཡང་། མདོ་རྒྱན་ལས། བསམ་གཏན་གྱིས་ཀྱང་སྐྱེ་བོ་ཐམས་ཅད་བྱང་ཆུབ་གསུམ་ལ་འགོད། །ཅེས་དང་། ཤེར་མདོ་ལས། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་ཅིང་ཏིང་ངེ་འཛིན་གསུམ་ལ་གནས་ཤིང་སེམས་ཅན་རྣམས་ཡོངས་སུ་སྨིན་པར་བྱེད་དོ། །ཞེས་གསུང་། གཞན་ཡང་དཀོན་བརྩེགས་ལས། སྔོན་གྱི་སངས་རྒྱས་འཇིག་རྟེན་མགོན། །གང་དུ་མྱ་ངན་འདས་གྱུར་པ། །ཀུན་གྱི་དགོན་པ་རབ་དགོན་དུ། །བླ་མེད་བྱང་ཆུབ་བརྙེས་པར་གྱུར། །མྱུར་དུ་དགོན་པར་གནས་བྱེད་ན། །འདོད་པའི་སྲེད་པསྤོང་འགྱུར་ཞིང་། །ཉེས་པ་ཇི་བཞིན་རྣམ་རིག་ནས། །དེ་དག་ལས་ནི་སེམས་རྟོག་འགྱུར། །ཁྱིམ་ནི་མྱུར་དུ་སྤངས་ནས་སུ། །དགོན་པ་ལ་ནི་གནས་འགྱུར་བ། །མཁས་པ་ཡང་དག་མཐོང་བ་རྣམས། །སངས་རྒྱས་རྣམས་ཀྱི་རྗེས་སུ་སློབ། །གང་དག་བྱང་ཆུབ་ཕྱིར་བརྩོན་པ། །དེ་དག་དབེན་པ་བརྟེན་བྱེད་ཅིང་། །དེ་དག་དགོན་པར་དགའ་འགྱུར་གྱི། །དེ་དག་ཁྱིམ་ལ་དགའ་མི་འགྱུར། །དེ་དག་སངས་རྒྱས་རྣམ་དག་གི། །སྤྱོད་ཡུལ་རྣམས་དང་སྤྱོད་པ་སྟེ། །གང་ཞིག་མལ་འདི་འཇུག་འབྱུང་བ། །དེ་དག་བྱང་ཆུབ་རྙེད་དཀའ་མིན། །ཞེས་དང་། ཟླ་བ་སྒྲོན་མའི་མདོ་ལས། འདོད་{པ་ཞུ་མཆན།} དག་ནི་རབ་ཏུ་བརྟེན་བྱེད་ཅིང་། །བུ་དང་ཆུང་མ་དག་ལ་སྲེད་བསྐྱེད་ཅིང་། །སྨད་པར་བྱ་བའི་ཁྱིམ་ལ་བརྟེན་པ་སྟེ། །བླ་མེད་བྱང་ཆུབ་དམ་པ་གཞར་མི་འཐོབ། །གང་དག་འདོད་པ་ལྕི་སྐམ་མེ་བཞིན་སྤོངས། །བུ་དང་ཆུང་མ་དག་ལ་སྲེད་སྤངས་ནས། །ཁྱིམ་གྱིས་སྐྲག་ནས་ཁྱིམ་ནས་མངོན་བྱུང་བ། །དེ་དག་བྱང་ཆུབ་མཆོག་འདི་རྙེད་མི་དཀའ། །གང་དག་ཁྱིམ་ན་གནས་པའི་བྱེད་བཞིན་དུ། །བྱང་ཆུབ་དམ་པ་མཆོག་འདི་ཐོབ་པ་ཡི། །སངས་རྒྱས་གང་ཡང་སྔོན་ཆད་མ་བྱུང་སྟེ། །མ་འོངས་པར་ཡང་མི་འབྱུང་གནས་པ་མེད། །རྒྱལ་སྲིད་མཆིལ་མའི་ཐལ་བ་བཞིན་སྤངས་ནས། །དབེན་པར་འདོད་དེ་དགོན་པར་གནས་བྱེད་པ། །ཉོན་མོངས་སྤངས་ཏེ་བདུད་ཀྱི་དཔུང་བཅོམ་ནས། །བྱང་ཆུབ་རྡུལ་མེད་འདུས་མ་བྱས་འཚང་རྒྱས། །གང་ཞིག་བྱང་ཆུབ་རབ་ཏུ་འདོད་བྱེད་ཅིང་། །འདུས་བྱས་ངན་པས་ཡིད་ཕྱུང་སེམས་ཅན་གྱིས། །མངོན་པར་ཕྱོགས་ཏེ་དགོན་པར་གོམ་བདུན་བོར། །འདི་ནི་དེ་བས་བསོད་ནམས་ཁྱད་པར་འཕགས། །གང་དག་དགའ་དང་མི་དགའ་ཅུང་ཟད་མེད། །དེ་དག་མི་ཡི་འཇིག་རྟེན་རྟག་རབ་བདེ། །གང་དག་གནས་དང་རི་སུལ་དགའ་བ་ནི། །དགེ་སྦྱོང་ཉིད་ཀྱི་རང་བདེ་མྱོང་བར་འགྱུར། །གང་དག་བདག་གིར་བྱེད་པ་ཅི་ཡང་མེད། །གང་དག་ཡོངས་འཛིན་རྣམ་པ་ཀུན་ཏུ་མེད། །བསེ་རུ་ལྟ་བུར་འཇིག་རྟེན་འདིར་གནས་པ། །དེ་དག་ནམ་མཁའ་ལ་ནི་རླུང་ལྟར་འགྲོ། གང་དག་འཇིག་རྟེན་ལ་ནི་ཡིད་མི་ཆགས། །དེ་དག་མི་ཡི་འཇིག་རྟེན་རབ་ཏུ་བདེ། །དགའ་དང་མི་དགའ་ལ་ནི་ཆགས་མེད་པ། །དེ་དག་འདི་ན་རྟག་ཏུ་སེམས་རླུང་འདྲ། །གང་དག་སྡུག་བསྔལ་མཛའ་དང་བྲལ་བ་དང་། །གང་དག་སྡུག་བསྔལ་གནས་པ་མི་དགའ་བ། །མཐའ་དེ་གཉིས་ཀ་རབ་ཏུ་སྤངས་ནས་སུ། །མི་གང་ཆོས་ལ་དགའ་བ་དེ་དག་བདེ། །ཞེས་དང་། ཉེས་པའི་ཚོགས་མང་ཐམས་ཅད་སྤངས་ནས་སུ། །རྣལ་འབྱོར་ཅན་ནི་རྟག་ཏུ་བྱེད་པ་ཉུང་། །རྣལ་འབྱོར་དག་བརྩོན་ནམ་ཡང་རྩོད་པ་མེད། །དགོན་པར་གནས་པ་དེ་ཡི་ཕན་ཡོན་ནི། །དེ་ནི་རྟག་ཏུ་འདུས་བྱས་ཡིད་འབྱུང་འགྱུར། །དེ་ནི་འཇིག་རྟེན་ཅི་ལའང་འདོད་པ་མེད། །ཟག་པ་དག་ནི་རྣམ་པར་འཕེལ་མི་འགྱུར། །ནགས་ན་གནས་པ་དེ་ཡི་ཕན་ཡོན་ནི། །དེ་ནི་ནམ་ཡང་རྩོད་པར་མི་འགྱུར་ཏེ། །རྟག་ཏུ་ཞི་ཞིང་དགའ་ལ་དབེན་པར་འགྱུར། །ལུས་དང་ངག་དང་ཡིད་ནི་རབ་བསྡམས་པ། །དགོན་པར་གནས་པ་འདི་ལ་ཡོན་ཏན་མང་། །དེ་ནི་ཐར་པའི་རྗེས་སུ་མཐུན་པ་ཡིན། །དེ་ནི་རྣམ་གྲོལ་ཞི་བ་མྱུར་རྟོགས་བྱེད། །ནགས་ན་གནས་ཤིང་རྣམ་གྲོལ་རྟེན་བྱེད་ན། །དགོན་གནས་དེ་ལ་ཡོན་ཏན་འདིཀུན་འབྱུང་། །ཞེས་དང་། གྲོང་དང་གྲོང་ཁྱེར་དག་ལ་དགའ་སྤངས་ལ། །རྟག་ཏུ་དབེན་ཞིང་ནགས་ཁྲོད་བརྟེན་པར་གྱིས། །བསེ་རུ་ལྟ་བུར་རྟག་ཏུ་གཉིས་མེད་བྱོས། །རིང་པོར་མི་ཐོགས་ཏིང་འཛིན་མཆོག་འདི་ཐོབ། །ཅེས་དང་། འཇམ་དཔལ་གྱི་ཞིང་བཀོད་པ་ལས་ཀྱང་བྱང་ཆུབ་སེམས་དཔའ་ཁྱིམ་པས་གངྒཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པ་འཁོར་དང་བཅས་པ་ལ། དེ་སྙེད་ཀྱི་བསྐལ་པར་བདེ་བའི་ཡོ་བྱད་ཐམས་ཅད་ཀྱིས་བསྟི་སྟང་དུ་བྱས་པ་བས། བྱང་ཆུབ་སེམས་དཔའ་རབ་ཏུ་བྱུང་ནས་སམ། བྱུང་བར་འདོད་པར་དགོན་པར་ཕྱོགས་ཏེ་གོམ་པ་བདུན་བོར་བ་བསོད་ནམས་ཆེ་བར་གསུངས་པས་མཚོན་ཞིབ་པར་ཡུལ་འཁོར་སྐྱོང་གིས་ཞུས་པའི་མདོ་དང་། ཁྱིམ་བདག་དྲག་ཤུལ་ཅན་གྱིས་ཞུས་པའི་མདོ་དང་། འཕགས་པ་དཀོན་མཆོག་སྤྲིན་དང་། རིན་ཆེན་ཕུང་པོའི་མདོ་སོགས་ནས་དབེན་པའི་ཡོན་ཏན་དང་ཇི་ལྟར་བསྟེན་པའི་ཚུལ་རྒྱ་ཆེར་འབྱུང་བ་དང་། རྣམ་པར་མི་རྟོག་པ་བསྒོམ་པའི་ནང་དུ་འདུས་བྱས་ཀྱི་དགེ་བ་དང་། འདུས་མ་བྱས་ཀྱི་ཆོས་ཀུན་འདུ་བའི་ཚུལ་མདོ་སྡེ་རིན་ཆེན་རྣམས་ནས་རྒྱ་ཆེར་གསུངས་པའི་དོན་སློབ་དཔོན་མཁས་པ་ཆེན་པོ་བི་མ་ལ་མི་ཏྲས་མཛད་པའི་སྒོམ་རིམ་སོགས་ལས་ཤེས་པར་བྱའོ། །དེར་མ་ཟད་ཏིང་ངེ་འཛིན་སྒོམ་མི་ནུས་པ་དག་གིས་ཀྱང་གཞན་སྒོམ་པ་སོགས་ལ་རྗེས་སུ་ཡི་རང་བར་བྱས་ནའང་ཕན་ཡོན་ཚད་མེད་པར་འབྱུང་སྟེ། སྐལ་བཟང་ལས། སྔོན་བྱུང་བ་འདས་པའི་དུས། དེ་བཞིན་གཤེགས་པ་བརྩོན་འགྲུས་མཐའ་ཡས་ཞེས་བྱ་བ་འཁོར་ཐེར་འབུམ་སྙེད་དང་བཅས་པ་ཞིག་བྱུང་བར་གྱུར་ཏེ། ཏིང་ངེ་འཛིན་འདི་སྟོན་ཏོ། །དེ་ཏིང་ངེ་འཛིན་དེ་སྟོན་པ་ན། དེ་ཚེ་རྒྱལ་པོ་བསོད་ནམས་མེ་ཏོག་ཅེས་བྱ་བ་ཞིག་བྱུང་བས་ཐོས་ནས། དེས་བཙུན་མོ་སྟོང་དང་སྲས་སྟོང་ལ་སྨྲས་པ། ཏིང་ངེ་འཛིན་ཟད་པར་སྣང་བ་འདིའི་དོན་མི་ཤེས་སོ། །མ་ཤེས་པས་རྟོགས་པར་བྱར་ཡང་མི་ནུས་སོ། །དེ་ལྟ་ཡིན་ཀྱང་དེ་བཞིན་གཤེགས་པས་ལེགས་པར་གསུངས་པ་ལ་བདག་ཅག་གིས་རྗེས་སུ་ཡི་རང་བར་ནི་བྱའོ། །བཅོམ་ལྡན་འདས་ཀྱིས་ལེགས་པར་གསུངས་ཤིང་བཤད་པའི་ཏིང་ངེ་འཛིན་འདི་ལ་རྗེས་སུ་ཡི་རང་བ་བྱས་པས། དེ་དག་རྗེས་སུ་ཡི་རང་བའི་མོད་ལ་བསྐལ་བ་བརྒྱད་ཁྲིར་འཁོར་བ་ཕྱིར་བསྙིལ་ནས་དེ་ལས་ཁ་ཕྱིིར་ཕྱོགས་པར་གྱུར་ཏོ། །ཁྱིམ་ཅན་ཞེས་བྱ་བའི་གཟུངས་ཐོབ་པར་གྱུར་ཏོ། །དགེ་བའི་རྩ་བ་དེས་ནི་སངས་རྒྱས་སུམ་འབུམ་དག་མཉེས་པར་གྱུར་ཏོ། །ཐམས་ཅད་དུ་ཡང་ཏིང་ངེ་འཛིན་འདི་ཐོབ་པར་གྱུར་ཏོ། །ལོག་པར་ལྟུང་བ་དང་། མི་ཁོམ་པ་དག་ཏུ་ནམ་ཡང་ལྟུང་བར་མ་གྱུར་ཏོ། །རྒྱུ་དེ་ཁོ་ནས་མངོན་པར་རྫོགས་པར་སངས་རྒྱས་པར་གྱུར་ཏོ། །ཞེས་གསུངས། མདོར་ན་དོན་དམ་རིག་པ་ལས། གང་ཞིག་བླ་མའི་མན་ངག་བདུད་རྩིའི་ཆུ། །གདུང་སེལ་བསིལ་ལྡན་ངོམས་པར་མི་འཐུང་བར། །དེ་ནི་བསྟན་བཅོས་དོན་མང་མྱ་ངན་གྱི། །ཐང་ལ་སྐོམ་པས་གདུང་སྟེ་ཤི་བར་ཟད། །ཅེས་དང་། དཔལ་ལྡན་ཨ་ཏི་ཤས། ཚེ་ནི་ཡུན་ཐུང་ཤེས་བྱའི་རྣམ་པ་མང་། །ཚེ་ཡི་ཚད་ཀྱང་ཇི་ཙམ་མི་ཤེས་པར། །ངང་པས་ཆུ་ལས་འོ་མ་ལེན་པ་བཞིན། །རང་གི་འདོད་པ་དང་དུ་བླང་བར་བྱ། །འཇིག་རྟེན་སྤྱོད་པ་དག་ལ་ཕར་བལྟས་པས། །བྱས་པ་ཐམས་ཅད་དོན་མེད་སྡུག་བསྔལ་རྒྱུ། །ཅི་ལ་བསམ་ཡང་སྙིང་པོ་མི་གདའ་བས། །རང་གི་སེམས་ལ་བལྟ་བར་གོམས་པར་གྱིས། །ཞེས་ཐུགས་བརྩེ་བས་འདོམས་པར་མཛད་པ་བཞིན་གཙོ་བོར་དབེན་པ་བརྟེན་ཞིང་སྒོམ་སྒྲུབ་ལ་བརྩོན་པ་གལ་ཆེ་བར་མངོན་ནོ། །ཐོས་བསམ་སྒོམ་གསུམ་སྤེལ་མར་བྱས་པའི་ཕན་ཡོན་ཡང་། རྒྱན་ལས། འདི་ན་དང་པོ་ཐོས་ལ་བརྟེན་ནས་ཚུལ་བཞིན་ཡིད་ལ་བྱེད་པ་འབྱུང་། །ཚུལ་བཞིན་ཡིད་ལ་བྱས་པ་ལས་ཀྱང་ཡང་དག་དོན་ཡུལ་ཡེ་ཤེས་འབྱུང་། །དེ་ལས་ཆོས་ཐོབ་དེ་ཡང་དེ་ལས་བློ་གྲོས་རབ་ཏུསྐྱེ། །གང་ཚེ་དེ་ནི་སོ་སོ་རང་རིག་མེད་ན་ཇི་ལྟར་ངེས། །ཞེས་དང་། དེ་ལྟས་རྣལ་འབྱོར་ཅན་གྱི་སྒོམ་པ་གང་ཡིན་དེ་ནི་དོན་མེད་མིན། །དེ་ལྟར་བདེ་བར་གཤེགས་ཀྱིས་བསྟན་པ་དེ་ཡང་དོན་མེད་མིན། །གལ་ཏེ་ཐོས་པ་ཙམ་གྱིས་དོན་མཐོང་འགྱུར་ན་སྒོམ་པ་དོན་མེད་འགྱུར། །གལ་ཏེ་མ་ཐོས་པར་ཡང་སྒོམ་འཇུག་འགྱུར་ན་བསྟན་པ་དོན་མེད་འགྱུར། །ཞེས་དང་། འཕགས་པ་ཀླུ་སྒྲུབ་ཀྱིས། ཤེས་རབ་རྒྱས་བྱེད་པ་ནི་ཐོས་པ་སྟེ། །དེ་དང་བསམ་པ་གཉིས་ནི་ཡོད་གྱུར་ན། །དེ་ལས་སྒོམ་པ་ལ་ནི་རབ་ཏུ་སྦྱོར། །དེས་ནི་དངོས་གྲུབ་བླ་ན་མེད་པ་འབྱུང་། །ཞེས་གསུངས། མདོར་ན་ཐོས་པས་སེམས་ལ་བག་ཆགས་འཇོག་བསམ་པས་དོན་རྟོགས་པར་བྱེད། སྒོམ་པས་ཞི་གནས་ཀྱིས་ཉོན་མོངས་པ་ཞི་བ་དང་། ལྷག་མཐོང་གིས་ཆོས་ཉིད་རབ་ཏུ་རྟོགས་པར་བྱེད་པའི་སྒོ་ནས་རྣམ་པར་གྲོལ་བར་བྱེད་པ་སྟེ། དེ་དག་གི་གོ་རིམ་ཡང་། མཛོད་ལས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུསྦྱོར། །ཞེས་གསུངས་པའི་ཚུལ་བཞིན་ཤེས་པར་བྱའོ། །ཀ་ཡེ་དོན་མཐུན་དགེ་བའི་གྲོགས་པོ་དག །ཁ་གསག་གཡོ་སྒྱུས་རང་མགོ་མ་བསྐོར་བར། །ག་ནས་བསམས་ཀྱང་ཕུང་ཀྲོལཀུན་གྱི་གཞི། །ང་བདག་གཟུང་འཛིན་མགོ་བོ་ཆོམས་པར་མཛོད། །ཅ་ཅོའི་འཁྲུལ་གཏམ་ཆགས་སྡང་འཕེལ་བའི་རྒྱུ། །ཆ་ལུགས་འཆོལ་སྤྱོད་རང་རྒྱུད་རེངས་པའི་རྐྱེན། །ཇ་སོགས་ནོར་ལ་སྲེད་པ་མ་ཆེ་བར། །ཉ་རྒྱས་ཟླ་ལྟའི་ཚུལ་ཁྲིམས་ཉམས་མེད་སྲུངས། །ཏ་ཐཱ་ག་ཏས་ལེགས་གསུངས་དམ་པའི་ཆོས། །ཐ་དག་ངེས་དོན་ཀློང་དུ་རོ་གཅིག་པས། །ད་ནས་དག་སྣང་མིག་བཟང་བསྐྱེད་རེ་རན། །ན་མར་ཐོས་བསམ་སྒོམ་ལ་བརྩོན་པར་མཛོད། །པ་སངས་ལྟར་དཀར་ལྷག་པའི་བསམ་པ་ཡིས། །ཕ་རོལ་ཕྱིིན་ལམ་སྤྱོད་པ་རྒྱ་མཚོར་གཞོལ། བ་ལང་ལྟ་བུར་རྨོངས་པའི་འགྲོ་བ་རྣམས། །མ་ལུས་སྒྲོལ་བའི་དམ་བཅའི་གོ་བགོས་ཤིག །ཙཱ་གངས་ལ་སོགས་དབེན་པའི་ནགས་ཁྲོད་དུ། །ཚ་གྲང་དཀའ་སྤྱད་བཟོད་པའི་ཁུར་ཁྱེར་ནས། །ཛ་ལང་གདུག་པའི་རང་རྒྱུད་འདུལ་སླད་དུ། །ཝ་ཆུའི་རྒྱུན་བཞིན་དྲན་དང་ཤེས་བཞིན་བརྟེན། །ཞྭ་ལྟར་བླ་མ་སྤྱིི་བོའི་གཙུག་ཁུར་ཞིང་། །ཟ་གོས་གནས་མལ་གང་བྱུང་དེས་ཆོག་དང་། །འ་འུར་ཆོས་བརྒྱད་འཆིང་བའི་རྒྱ་ཁྲོལ་ལ། །ཡ་མཚན་དོན་བརྒྱུད་རྒྱལ་ས་ཟིན་པར་མཛོད། །ར་བ་བརྒལ་དཀའ་སྲིད་པའི་གྲོང་ཁྱེར་འདི། །ལ་ལ་ཙམ་མིན་སྡུག་བསྔལ་གསུམ་གྱི་སྣོད། །ཤ་བཙོན་དོང་ནས་ཐར་འདྲའི་ངེས་འབྱུང་བློས། །ས་ར་ཧ་པའི་རྣམ་ཐར་སྐྱོངས་བར་མཛོད། །ཧ་ཅང་བྱ་བྱེད་མང་ན་འཆལ་བའི་རྒྱུ། །ཨ་ཏི་ཁྲེགས་ཆོད་དགོངས་པའི་གསང་མཛོད་ཆེ། །བྱར་མེད་ལྷུན་རྫོགས་ཀུན་བཟང་དགོངས་ཀློང་དུ། །གདོད་མའི་ས་ལ་བཙན་ས་ཟིན་པར་མཛོད། །

གསུམ་པ་དགེ་འདུན་ལ་བསྙེན་བཀུར་ཕུལ་བའི་ཕན་ཡོན་བསྟན་པ།

གསུམ་པ་དགེ་འདུན་ལ་བསྙེན་བཀུར་ཕུལ་བའི་ཕན་ཡོན་བསྟན་པ་ནི། སྤྱིརཕུལ་བ་དང་ལོངས་སུ་སྤྱོད་པ་གཉིས་ཀྱིས་འགྲོ་བའི་རྫས་ལས་གྱུར་པའི་བསོད་ནམས་འཕེལ་བའི་ཕྱིར་ཞིང་ཐམས་ཅད་ཀྱི་ནང་ནས་དགེ་འདུན་དཀོན་མཆོག་བཟང་བར་གསུངས་ཏེ། སྟོང་ཆེན་མོ་རབ་ཏུ་འཇོམས་པའི་མདོ་ལས། ཞིང་རབ་གཤིན་ལ་ས་བོན་བཏབ་པ་ལས། །དགེ་འདུན་དཀོན་མཆོག་རིན་ཆེན་མཆོག་ཏུ་གསུངས། །ཞེས་དང་། ས་སྙིང་འཁོར་ལོ་བཅུ་པའི་མདོ་ལས། ལྷ་མིའི་ལོངས་སྤྱོད་ལྡན་པ་ཐམས་ཅད་ཀྱང་། །རབ་ཏུ་བྱུང་བ་དག་ལས་ཐོབ་པའི་ཕྱིར། །ཆོས་གོས་གྱོན་པ་འདི་ལ་མཆོད་པས་ན། །བདེ་བ་ཚད་མེད་པར་ཡང་འབྱུང་བར་འགྱུར། །ཞེས་དང་། རྗེས་དྲན་གྱི་མདོ་ལས། བསོད་ནམས་ཀྱི་དཔལ་གྱི་ཞིང་། ཡོན་ཡོངས་སུ་སྦྱོང་བ་ཆེན་པོ། སྦྱིན་པའི་གནས་སུ་གྱུར་པ་ཀུན་ཏུའང་སྦྱིིན་པའི་གནས་སུ་གྱུར་པ་ཆེན་པོའོ། །ཞེས་དང་། དེའི་འགྲེལ་པར། གང་ཞིག་ཟླ་བ་རེ་རེ་ལ། །མཆོདསྦྱིན་བརྒྱ་སྟོང་མཉམ་བྱས་པས། །དགེ་འདུན་རྣམས་ལ་དད་བྱས་པ། །དེ་ཡི་བཅུ་དྲུག་{པ་ལྷག}ཆར་མི་ཕོད། །ཅེས་སློབ་དཔོན་ཐོགས་མེད་ཀྱིས་ལུང་དྲངས་པ་དང་། བྱ་རྒྱུད་ལེགས་གྲུབ་ལས། ཞིང་གི་དམ་པ་ཡོན་ཏན་ཞིང་། །དགེ་འདུན་ལ་ཡང་ཕྱག་འཚལ་ལོ། །ཞེས་གསུངས། བྱེ་བྲག་ཏུ་བྱང་ཆུབ་སེམས་དཔའི་དགེ་འདུན་ནི། སྤྱན་གཟིགས་ཀྱི་མདོ་ལས། གང་དག་བྱངཆུབ་མངོན་ཞུགས་པ། །འཇིག་རྟེན་ཀུན་ན་དེ་རིན་ཆེན། །དེ་དག་འབྱུང་བ་ཤིན་ཏུ་དཀོན། །དམན་པ་མེད་པའི་སྦྱིན་གནས་འགྱུར། །ས་འདི་དག་ནི་རིམ་གྱིས་སུ། །བགྲང་བར་བྱ་ཞིང་དཔག་པར་ནུས། །དེ་དག་རྣམས་ཀྱི་ཡོན་ཏན་མཐའ། །ཚིག་གི་བསྟན་པར་མི་ནུས་སོ། །སེམས་ཅན་དག་ནི་ཐམས་ཅད་ཀྱི། །དུས་གསུམ་སེམས་ནི་ཤེས་པར་ནུས། །དེ་དག་རྣམས་ཀྱི་ཡོན་ཏན་མཐའ། །ཚིག་གིས་བསྟན་པར་མི་ནུས་སོ། །ཞེས་པ་ནས། རྫོགས་སངས་རྒྱས་ཀྱི་སྲས་རྣམས་ལ། །གང་ཞིག་ཆོས་ཀྱིས་སྲུང་བྱེད་པ། །དེས་ནི་ངན་འགྲོ་ཀུན་སྤངས་སྟེ། །མྱུར་དུ་བཟང་འགྲོར་འགྲོ་བར་འགྱུར། །ཕྱུག་ཅིང་ནོར་ཆེན་ལྡན་པ་དང་། །སྟོབས་དང་ལྡན་ཞིང་འཇིགས་པ་མེད། །དྲན་དང་ལྡན་ཞིང་ཤེས་རབ་ལྡན། །བདེ་ཞིང་ངོ་ཚ་ཁྲེལ་ལྟས་ལྡན། །གང་དུ་འཇིག་རྟེན་རྣམས་ཀྱི་སྒྲོོན། །ཡོངས་སུ་མྱ་ངན་འདས་གྱུར་པ། །སངས་རྒྱས་མཆོད་རྟེན་མཐོང་ནས་ནི། །ཡང་དང་ཡང་དུ་བསྟི་སྟང་བྱེད། །རྫོགས་སངས་རྒྱས་ཀྱིས་གསུངས་པ་ཡི། །འདི་འདྲའི་ཆོས་ནི་ཐོས་གྱུར་ནས། །སངས་རྒྱས་སྲས་པོ་རྣམས་ལ་ནི། །སུ་ཞིག་ཕྱི་ཕྱིར་དད་མི་བྱེད། །ཅེས་པའི་བར་གྱིས་རྒྱ་ཆེར་གསུངས་པ་དང་། སྙིང་རྗེ་པད་དཀར་ལས། གང་ལ་ཆོས་སྨྲ་བ་ལ་སྤོས་ཀྱིས་མཆོད་པ་བྱེད་ན་དེ་ཡང་རིང་པོར་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྤོས་འཐོབ་བོ། །ཆོས་སྨྲ་བ་ལ་མེ་ཏོག་གིས་མཆོད་པ་བྱེད་ན་བླ་ན་མེད་པའི་ཡེ་ཤེས་ཀྱི་མེ་ཏོག་དག་འཐོབ་པར་འགྱུར་རོ། །ཆོས་སྨྲ་བ་ལ་འབྲས་ཆན་དང། བཟའ་བ་དང་། བཏུང་བ་དག་བྱིན་ན་དེ་བཞིན་གཤེགས་པའི་ཟས་བླ་ན་མེད་པ་འཐོབ་པར་འགྱུར་རོ། །བྱང་ཆུབ་སེམས་དཔའ་ཆོས་སྨྲ་བ་ལ་གོས་ཀྱིས་བཀབ་ན་དེ་བཞིན་གཤེགས་པའི་སྐུ་མདོག་བླ་ན་མེད་པ་འཐོབ་བོ། །གང་ཞིག་ཆོས་སྨྲ་བ་ལ་རིན་པོ་ཆེ་དག་གིས་འགེབས་པར་བྱེད་ན་རིང་པོར་མི་ཐོགས་པར་བྱང་ཆུབ་ཀྱི་ཕྱོགས་སུམ་ཅུ་རྩ་བདུན་གྱི་ཆོས་རིན་པོ་ཆེ་རྣམས་འཐོབ་སྟེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐམས་ཅད་མཁྱེན་པ་ཉིད་ཀྱི་གཟུངས་ཀྱི་སྒོ་ལ་འཇུག་པ་དེ་ནི་དེ་ལྟར་དོན་ཆེ་བ་ཡིན་ནོ། །ཞེས་དང་། ངེས་པ་དང་མ་ངེས་པ་ལ་འཇུག་པ་ཕྱག་རྒྱའི་མདོ་ལས། འཇམ་དཔལ། ཡོངས་སུ་བརྟག་པ་ཉེ་བར་བཟུང་སྟེ་ཕྱོགས་བཅུའི་འཇིག་རྟེན་ཀྱི་ཁམས་ཀྱི་སེམས་ཅན་ཐམས་ཅད་ཀྱི་མིག་བཏོན་པར་གྱུར་པ་ལ། བྱམས་པའི་སེམས་དང་ལྡན་པ་འགའ་ཞིག་གིས་དེ་དག་ཐམས་ཅད་ཀྱི་མིག་བསྐྱེད་པར་བྱས་པ་བས། གང་ལ་ལ་ཞིག་གིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ལ་སེམས་དྭངས་པས་ལྟ་ན། འདི་ནི་དེ་བས་བསོད་ནམས་ཆེས་ལྷག་པར་སྐྱེའོ། །ཞེས་དང་། སྤྱོོད་འཇུག་ལས། འོན་ཏེ་གང་ཞིག་ཡིད་རབ་དྭངས་བྱེད་ན། །དེ་ཡི་འབྲས་བུ་དེ་བས་ལྷག་པར་འཕེལ། །རྒྱལ་སྲས་རྣམས་ལ་དོ་གལ་ཆེན་པོས་ཀྱང་། །སྡིག་པ་མི་འབྱུང་དགེ་བ་ངང་གིས་འཕེལ། །གང་ལ་སེམས་ཀྱི་དམ་པ་རིན་ཆེན་དེ། །སྐྱེས་པ་དེ་ཡི་སྐུ་ལ་ཕྱག་འཚལ་ཞིང་། །གང་ལ་གནོད་པ་བྱས་ཀྱང་བདེར་འབྲེལ་བ། །བདེ་བའི་འབྱུང་གནས་དེ་ལ་སྐྱབས་སུ་མཆི། །ཞེས་གསུངས། དེའང་ཀློག་པའི་སྡེ་ལས་སྤོང་བ་པ་ཁྱད་པར་དུ་མས་འཕགས་ཏེ། ཏིང་འཛིན་ཚོགས་དམ་པ་ལས། བསམ་གཏན་ཏིང་ངེ་འཛིན་{པ་ལྷག}བསྒོམས་པས་དགེ་སྦྱོང་གི་འབྲས་བུ་བཞི་མ་ཐོབ་ཀྱང་། མང་དུ་ཐོས་པ་བས་ཁྲི་ཕྲག་སྟོང་གིས་འཕགས་སོ། །ཞེས་གསུངས། དེ་ལས་ཀྱང་མདོ་འདུལ་དང་རྒྱུད་སྡེ་འོག་མའི་ཏིང་འཛིན་སྒོམ་པ་པོ་ལས། སྔགས་བླ་མེད་སྤྱི་དང་ཁྱད་པར་གསང་ཆེན་འོད་གསལ་རྡོ་རྗེ་རྩེ་མོའི་རྣལ་འབྱོར་པ་ལ་ཡོན་ཕུལ་ན་བསོད་ནམས་ཆེ་བར་གསུངས་ཏེ། རྒྱུད་ཀྱི་རྒྱལ་པོ་ཡེ་ཤེས་རྔམ་གློག་ལས། རིགས་ཀྱི་བུ་གང་ཟག་ལ་ལ་ཞིག་གིས་བསྐལ་པ་གདྒཱའི་ཀླུང་གི་བྱེ་མ་སྙེད་དུ་སོ་སོའི་སྐྱེ་བོའམ། ཉན་ཐོས་སམ། རང་སངས་རྒྱས་སམ། བྱང་ཆུབ་སེམས་དཔའ་སངས་རྒྱས་ཀྱི་ཞིང་ཡོངས་སུ་གང་བ་སྙེད་ལ་མེ་ཏོག་དང་། ཕྲེང་བ་དང་། བྱུག་སྤོས་དང་། བླ་བྲེ་དང་རྒྱལ་མཚན་དང་། བ་དན་དང་། ལྷབ་ལྷུབ་དང་། རོལ་མོའི་ཁྱད་པར་མང་པོ་ལ་སོགས་པས་སངས་རྒྱས་ཀྱི་ཞིང་ཡོང་སུ་གང་བར་བྱས་ཏེ་ཕུལ་བ་བས། ཐ་ན་གསང་བའི་ཐེག་པ་ལ་གནས་པའི་རྣལ་འབྱོར་པ་གཅིག་ཙམ་ལའང་གཡོ་སྒྱུ་དང་། གསོག་འཇོག་སྤངས་པའི་སྒོ་ནས་འདོད་པའི་ཡོན་ཏན་གྱི་ཚོགས་སྐད་ཅིག་ཙམ་བཏེགས་ཤིང་ལོངས་སྤྱད་པའི་བསོད་ནམས་ཁྱད་པར་དུ་འཕགས་ཏེ་འབུམ་གྱི་ཆར་ཡང་མི་ཕོད་དོ། །དེ་ཅིའི་ཕྱིར་ཞེ་ན། སོ་སོའི་སྐྱེ་བོའམ། ཉན་ཐོས་སམ། རང་སངས་རྒྱས་སམ། བྱང་ཆུབ་སེམས་དཔའི་བསོད་ནམས་དང་ཡེ་ཤེས་ཀྱི་ཕུང་པོ་དེ་དག་བས་གསང་བའི་ཐེག་པ་ལ་གནས་པ་གཅིག་གི་བ་སྤུའི་ཆ་གཅིག་གི་བསོད་ནམས་དང་ཡེ་ཤེས་ཀྱི་ཕུང་པོ་ཁྱད་པར་དུ་འཕགས་ཏེ་འབུམ་གྱི་ཆར་ཡང་མི་ཕོད་དོ། །དེ་བཞིན་དུ་གང་ཟག་ལ་ལ་ཞིག་གིས་མེ་ཏོག་ལ་སོགས་པས་སངས་རྒྱས་ཀྱི་ཞིང་ཡོངསསུ་གང་བ་ཕུལ་བའི་བསོད་ནམས་དང་ཡེ་ཤེས་ཀྱི་ཕུང་པོ་གང་ཡིན་པ་དེ་བས་འདོད་པའི་ཡོན་ཏན་གྱི་ཚོགས་ཆེན་པོ་གཅིག་གི་རྡུལ་ཕྲ་རབ་ཀྱི་ཆ་ཙམ་གྱི་བསོད་ནམས་དང་ཡེ་ཤེས་ཀྱི་ཕུང་པོ་ཁྱད་པར་དུ་འཕགས་ཏེ་འབུམ་གྱི་ཆར་ཡང་མི་ཕོད་དོ། །རིགས་ཀྱི་བུ་དེ་བས་ན་དད་པ་ཅན་གྱི་སྐྱེ་བོ་གསང་བའི་ཐེག་པ་ཉིད་དང་། གསང་བའི་ཐེག་པ་ལ་གནས་པའི་བླ་མ་འཁོར་དང་བཅས་པ་ལ་དད་པའི་སེམས་ཀྱིས་གཡོ་སྒྱུ་དང་། གསོག་འཇོག་སྤངས་པའི་ཚོགས་གསོག་པ་དེའི་བསོད་ནམས་དང་ཡེ་ཤེས་ཀྱི་ཕུང་པོ་ནི་ཚད་མེད་དེ། ཐམས་ཅད་མཁྱེན་པ་སངས་རྒྱས་རྣམས་ཀྱིས་ཀྱང་བགྲང་བར་མི་ནུས་སོ། །ཞེས་སོགས་གསང་རྒྱུདཀུན་ནས་མཐའ་ཡས་པ་འབྱུང་བ་དང་། དེར་མ་ཟད་རྒྱུད་ཀྱི་ཚིག་དོན་ཉམས་སུ་ལེན་པའི་རྣལ་འབྱོར་པ་དེའི་ཞལ་མཇལ་བ་གསུང་ཐོས་པ། ཕྱག་དང་ཞབས་ཀྱི་དབང་ཐོབ་པས་མཚོན། ལུས་ཀྱི་ཆ་ཤས་ལ་རེག་པ་ཙམ་གྱིས་ཀྱང་སྔོན་བསགས་ཀྱི་སྡིག་པ་ཐམས་ཅད་སྐད་ཅིག་ལ་བྱང་ཞིང་རིང་པོར་མི་ཐོགས་པར་ཧེ་རུ་ཀའི་གོ་འཕང་ཐོབ་པར་འགྱུར་བའི་ཚུལ། བདེ་མཆོག་རྩ་རྒྱུད་ལས། མཐོང་བ་དང་ནི་རེག་པ་དང་། །ཐོས་པ་དང་ནི་དྲན་པ་ཡིས། །སྡིག་པ་ཀུན་ལས་གྲོལ་འགྱུར་བ། །དེ་ལྟ་ཉིད་དུ་ཐེ་ཚོམ་མེད། །ཅེས་དང་། ཧེ་རུ་ཀ་དཔལ་ཡེ་ཤེས་ཆེ། །རྣམ་པར་དག་པའི་མཚན་ཉིད་ཀུན། །སྒྲུབ་པ་པོ་ཡི་བདེ་བའི་ཆུ། །གཉིས་མེད་གཉིསསུ་མེད་པ་ཉིད། །གཉིས་མེད་སྦྱོར་བ་ཡིས་རེག་པ། །དག་བྱེད་སྡིག་པ་འཇོམས་བྱེད་པ། །རེག་པ་དང་ནི་སྨྲས་པས་ཀྱང་། །སྡིག་པ་ཀུན་ལས་གྲོལ་བར་འགྱུར། །སྡིག་པ་ཐམས་ཅད་རྣམ་གྲོལ་ཞིང་། །ལུས་དག་པ་ལས་སྐྱོན་མེད་པ། །མི་མཆོག་ཀུན་ནས་སྦྱང་བྱེད་པ། །སྡིག་པ་ཐམས་ཅད་རྣམ་དག་པའི། །དེ་བཞིན་གཤེགས་པའི་ས་ཐོབ་འགྱུར། །སྡིག་པ་ཐམས་ཅད་རྣམ་དག་པ། །དེ་བཞིན་གཤེགས་པའི་རིགས་སྐྱེ་ཞིང་། །ཆོས་དང་ལྡན་པའི་རྒྱལ་པོར་འགྱུར། །ཅེས་སོ། །དེའི་རྒྱུ་མཚན་ཡང་རྒྱུད་དོན་ཉམས་སུ་ལེན་པའི་རྣལ་འབྱོར་པ་ལ་དཔལ་ཧེ་རུ་ཀས་རྟག་ཏུ་བྱིན་གྱིས་རློབ་པར་མཛད་ཅིང་། དེའི་སྙིང་གར་ཧེ་རུ་ཀ་དང་རྡོ་རྗེ་ཕག་མོ་ལ་སོགས་པའི་དཔའ་བོ་རྣལ་འབྱོར་མ་ཐམས་ཅད་མངོན་དུ་བཞུགས་ནས་དེ་དང་ལྷན་ཅིག་པར་དགྱེས་ཤིང་བརྩེ་བའི་སྒོ་ནས་རྗེས་སུ་ཆགས་པར་མཛད་པའི་ཕྱིར། །རྣལ་འབྱོར་པ་དེ་དངདུས་མཉམ་དུ་སྐྱེས་ནས་མཐོང་ཐོས་དྲན་རེག་གི་འབྲེལ་བ་ཐོབ་པའི་སྲོག་ཆགས་རྣམས་ཀྱང་བསོད་ནམས་རྒྱ་ཆེན་པོ་བསགས་པར་གསུངས་ཏེ། དེ་ཉིད་ལས། རྟག་པ་ཉིད་དུ་དཔལ་ཆེན་དང་། །རོལ་པར་ལྡན་པར་ཐེ་ཚོམ་མེད། །དེ་མི་ཐུགས་ཀར་གནས་ཕག་མོ། །ང་དང་དཔའ་བོ་རྣལ་འབྱོར་མ། །ཕོ་ཉ་རྣམས་དང་ལྷན་ཅིག་གནས། །དེ་དག་གང་ཞིག་ལེགས་སྐྱེས་པའི། །སྲོག་ཆགས་བསོད་ནམས་མཐོང་བ་ཡིན། །ཞེས་གསུངས། ཁྱད་པར་ཐེག་ཆེན་ལམ་གྱི་རྟེན་འབྲེལ་མཐའ་དག་དགེ་བའི་བཤེས་གཉེན་ལ་བརྟེན་ནས་སྒྲིག་དགོས་པའི་ཕྱིར། མདོ་རྒྱུད་ཀུན་ནས་རང་གི་རྩ་བའི་བླ་མ་ནི་སངས་རྒྱས་དངོས་སུ་བལྟ་བར་གསུངས་ཏེ། ལག་ན་རྡོ་རྗེ་དབང་བསྐུར་བའི་རྒྱུད་ལས། གསང་བའི་བདག་པོ་སློབ་དཔོན་ལ་སློབ་མས་ཇི་ལྟར་བལྟ་བར་བྱ་ཞེ་ན་སངས་རྒྱས་བཅོམ་ལྡན་འདས་ལ་ཇི་ལྟ་བ་དེ་བཞིན་ནོ། །དེ་ཡིས་སེམས་ནི་དེ་ལྟ་ན། །རྟག་ཏུ་དགེ་བ་སྐྱེ་བར་འགྱུར། །དེ་ནི་འཇིག་རྟེན་ཐམས་ཅད་ལ། །ཕན་པར་བྱེད་པའི་སངས་རྒྱས་འགྱུར། །ཞེས་དང་། རྡེ་རྗེ་མེ་ལོང་ལས། རྡོ་རྗེ་སེམས་དཔའ་དཀྱིལ་འཁོར་གཙོ། །བླ་མ་སངས་རྒྱས་ཀུན་དང་མཉམ། །ཞེས་གསུངས། དེའི་རྒྱུ་མཚན་སྤྱིར་དགེ་བའི་བཤེས་གཉེན་གྱི་ཡོན་ཏན་བསམ་གྱིས་མི་ཁྱབ་པའི་ཚུལ་སྡོང་པོ་བརྒྱན་པ་སོགས་ནས་བཀའ་བསྩལ་པའི་དོན་ཀུན་མཁྱེན་བླ་མས་སེམས་ཉིད་ངལ་གསོར་གསུངས་པ། གང་གི་ཡོན་ཏན་ཤིན་ཏུ་མཐའ་ལས་ཏེ། །འགྲོ་བའི་གཉེན་གྱུར་ཕྱོགས་ཙམ་རབ་བསྔགས་ན། །སྲིད་མཚོ་སྒྲོལ་བའི་གྲུ་ཆེན་མཉན་པ་སྟེ། །ལམ་ཞུགས་རྣམས་ཀྱི་དེད་དཔོན་བླ་ན་མེད། །རྒུད་པ་སེལ་བས་ཡིད་བཞིན་ནོར་བུ་སྟེ། །ལས་དང་ཉོན་མོངས་མེ་སེལ་བདུད་རྩིའི་ཆུ། །ཆོས་ཆར་བསིལ་བས་ཆར་སྤྲིན་བཟང་པོ་སྟེ། །འགྲོ་ཀུན་དགའ་སྐྱེད་ལྷ་ཡི་རྔ་བོ་ཆེ། །དུག་གསུམ་ནད་སེལ་སྨན་པའི་རྒྱལ་པོ་སྟེ། །མ་རིག་མུན་སེལ་སྒྲོན་མ་འོད་པོ་ཆེ། །སྐྱེ་དགུ་བདེ་འབྱུང་དཔག་བསམ་ཤིང་ཆེན་ཏེ། །འདོད་དགུ་ལྷུན་གྲུབ་རིན་ཆེན་བུམ་པ་བཟང་། །བྱམས་ཆེན་ཉི་མ་འོད་ཟེར་དཔག་མེད་དེ། །གདུང་སེལ་ཟླ་བ་ཕན་བདེའི་འོད་དཀར་ཅན། །དགོངས་ཀློང་ཡངས་པས་དྲི་མེད་མཁའ་འདྲ་ལ། །ཏིང་འཛིན་འོད་གསལ་གཟའ་སྐར་ལྷུན་གྲུབ་འདྲ། །མཁྱེན་བརྩེའི་རང་བཞིན་དཔག་མེད་མཚོ་འདྲ་ཞིང་། །ཐུགས་རྗེའི་རླབས་ཆེན་གཡོ་བས་ཆུ་ཀླུང་འདྲ། །རྣམ་གཡེང་མི་བསྐྱོད་གངས་རིའི་དཔལ་འདྲ་ཞིང་། །མཆོག་ཏུ་མི་གཡོ་རི་རྒྱལ་ལྷུན་པོ་འདྲ། །སྲིད་གནས་མི་གོས་འདམ་སྐྱེས་པད་འདྲ་ཞིང་། །ཀུན་ལ་ཐུགས་སྙོམས་བྱམས་སྡུག་ཕ་མ་འདྲ། །ཡོན་ཏན་མཐའ་ཡས་རིན་ཆེན་གཏེར་འདྲ་ཞིང་། །འཇིག་རྟེན་འདྲེན་པས་རྒྱལ་བའི་དབང་པོ་འདྲ། །དེ་འདྲའི་བླ་མ་དཔལ་ལྡན་ཆོས་ཀྱི་རྗེ། །གང་ན་བཞུགས་རྣམས་སངས་རྒྱས་ཀུན་དང་མཉམ། །མཐོང་ཐོས་དྲན་རེག་འཁོར་བ་ཕྱིར་བསྙིལ་ཅིང་། །རླབས་ཆེན་ཕྲིན་ལས་ཁུར་ཆེན་དཔག་ཏུ་མེད། །ས་ཆེན་འགྲོ་བ་ཀུན་གྱི་རྟེན་བཞིན་ནོ། །ཞེས་གསུངས་པས་མཚོན་ཏེ། ཞིབ་པར་ཕལ་པོ་ཆེ་ལས། དགེ་བའི་བཤེགས་གཉེན་གྱི་ཡོན་ཏན་དང་བསྔགས་པ་བརྗོད་པ་ནི། རྒྱས་པར་བསྐལ་པར་བརྗོད་ཀྱང་ཟད་མི་ཤེས་པ་དང་ལྡན་པ་དེའི་ཕྱིར་རྟགཏུ་དགེ་བའི་བཤེས་གཉེན་ལ་བསྟེན་པར་བྱའོ། །ཞེས་གསུངས་པ་བཞིན་ཤེས་པར་བྱའོ། །དགོས་སུ་རང་ཉིད་ལ་བཀའ་དྲིན་ཆེ་བའི་ཚུལ་ཡང་། དེ་ཉིད་ལས་གཞོན་ནུ་ནོར་བཟང་། དགེ་བའི་བཤེས་གཉེན་རྣམས་ནི། བདག་ངན་སོང་ལས་སྐྱོབ་པའོ། །ཆོས་མཉམ་པ་ཉིད་རྟོགས་པར་བྱེད་པའོ། །ལམ་བདེ་བ་དང་མི་བདེ་བ་སྟོན་པའོ། །ཀུན་ཏུ་བཟང་པོའི་སྤྱོད་པས་འདོམས་པའོ། །ཐམས་ཅད་མཁྱེན་པའི་གྲོང་ཁྱེར་གྱི་ལམ་སྟོན་པའོ། །ཐམས་ཅད་མཁྱེན་པའི་གནས་སུ་སྐྱེལ་བའོ། །ཆོས་ཀྱི་དབྱིངས་ཀྱི་རྒྱ་མཚོར་འཇུག་པའོ། །དུས་གསུམ་གྱི་ཤེས་བྱའི་རྒྱ་མཚོའི་སྟོན་པའོ། །འཕགས་པའི་ཚོགས་ཀྱི་དཀྱིལ་འཁོར་སྟོན་པའོ། །དགེ་བའི་བཤེས་གཉེན་ནི་བདག་གི་དཀར་པོའི་ཆོས་ཐམས་ཅད་འཕེལ་བར་བྱེད་པའོ། །ཞེས་དང་། འདི་ནི་བདག་གི་དགེ་བཤེས་ཆོས་སྨྲ་བ། །ཆོས་ཀུན་ཡོན་ཏན་ཡོངས་སུ་སྟོན་བྱེད་དེ། །བྱང་ཆུབ་སེམས་དཔའི་སྤྱོད་ལམ་ཡོངས་སྟོན་པ། །ཡིན་ཞེས་སེམས་གཅིག་བསམས་ནས་འདིར་འོངས་སོ། །འདི་དགེ་བསྐྱེད་པས་བདག་གི་མ་ལྟ་བུ། །ཡོན་ཏན་འོ་མ་སྡུད་པའི་མ་མ་འདྲ། །བྱང་ཆུབ་ཡན་ལག་ཡོངས་སུ་སྦྱོང་བ་ཡིན། །དགེ་བཤེས་འདི་དག་གནོད་པ་རྣམ་པར་བཟློག །རྒ་ཤི་ཐར་བྱེད་སྨན་པ་ལྟ་བུ་སྟེ། །བདུད་རྩིའི་ཆར་འབེབས་ལྷ་དབང་བརྒྱ་བྱིན་འདྲ། །ཉ་ཟླ་ལྟ་བུར་དཀར་པོའི་ཆོས་ཀྱིས་རྒྱས། །ཞི་བའི་ཕྱོགས་སྟོན་ཉི་མ་གསར་པ་འདྲ། །དགྲ་དང་གྲོགས་ལ་རི་བོ་འདྲ་བ་སྟེ། །རྒྱ་མཚོ་བཞིན་དུ་མི་འཁྲུགས་སེམས་དང་ལྡན་། །ཡོངས་སུ་སྐྱོང་དང་མཉན་པ་འདྲ་བ་ཞེས། །དེ་འདྲའི་སེམས་ཀྱིས་ནོར་བཟང་འདིར་འོངས་སོ། །བྱང་ཆུབ་སེམས་དཔའ་གང་གི་བློ་བསྐྱེད་པ། །སངས་རྒྱས་སྲས་པོ་བྱང་ཆུབ་སྐྱེད་བྱེད་པ། །འདི་དག་བདག་བཤེས་སངས་རྒྱས་བསྔགས་པ་ཞེས། །དེ་ལྟར་དགེ་བའི་སེམས་ཀྱིས་འདིར་འོངས་སོ། །འཇིག་རྟེན་སྐྱོབ་པ་དཔའ་བོ་ལྟ་བུ་སྟེ། །དེད་དཔོན་མགོན་དང་སྐྱབས་སུ་གྱུར་པ་ཡིན། །འདི་དག་བདག་ལ་བདེ་སྟོབས་མིག་ཡིན་ཞེས། །དེ་འདྲའི་སེམས་ཀྱིས་དགེ་བཤེས་བསྙེན་བཀུར་བྱེད། །ཅེས་གསུངས། དེའི་ཕྱིར་སངས་རྒྱས་ལས་ཀྱང་ལྷག་པར་བཟུང་དགོས་ཏེ། ནམ་མཁའ་དྲི་མ་མེད་པའི་མདོ་ལས། ཀུན་དགའ་བོ་དེ་བཞིན་གཤེགས་པ་ནི་སེམས་ཅན་ཐམས་ཅད་ལ་སྣང་བ་མ་ཡིན་གྱི་དགེ་བའི་བཤེས་གཉེན་ནི་ཡོངས་སུ་སྣང་བས་ཆོསསྟོན་ཅིང་། ཐར་པའི་ས་བོན་འདེབས་པའི་ཕྱིར། དེ་བཞིན་གཤེགས་པ་རྣམས་ལས་དགེ་བའི་བཤེས་གཉེན་ལྷག་པར་ཡང་ཟུངས་ཤིགཅེས་སྔར་ཡང་དྲངས་ཟིན་པ་དང་། དགོངས་འདུས་ལས། དོན་དང་ལྡན་པའི་མཁས་པ་ལ། །དུས་གསུམ་དུས་ནི་ཐམས་ཅད་དུ། །ཕྱོགས་བཅུའི་ཞིང་ན་བཞུགས་པ་ཡི། །བདེ་གཤེགས་རྒྱལ་བ་ཀུན་བྱོན་ནས། །བསྔགས་དང་འདུན་པས་ཕྱག་མཛད་དོ། །ཞེས་དང་། གསང་འདུས་ལས། ཁམས་རྣམས་དང་ནི་ཕྲིན་ལས་དག །རང་བཞིན་མཉམ་པ་ཉིད་ཀྱི་ཕྱིར། །བླ་མ་སངས་རྒྱས་ཀུན་དང་མཉམ། །འགྲོ་བ་གང་ལ་ལམསྟོན་ཕྱིར། །སངས་རྒྱས་ཉིད་ལས་མཆོག་ཏུ་འཕགས། །ཞེས་གསུངས། སྦྱོར་བས་ཇི་ལྟར་བསྟེན་པའི་ཚུལ་ཡང་། སྡོང་པོ་བཀོད་པ་ལས། ཁུར་ཐམས་ཅད་ཁུར་བས་མི་སྐྱོ་བ་ས་ལྟ་བུའི་སེམས་དང་། བསམ་པ་མི་ཕྱེད་པ་རྡོ་རྗེ་ལྟ་བུའི་སེམས་དང་། སྡུག་བསྔལ་ཐམས་ཅད་ཀྱིས་མི་བསྒུལ་བའི་ཕྱིར་འཁོར་ཡུགལས་ཐམས་ཅད་ཉམས་སུ་བླང་བ་ལ་མི་སྨོད་པས་བྲན། ང་རྒྱལ་དང་ཆེ་བའི་ང་རྒྱལ་སྤོང་བས་ཕྱག་དར་བ། ཁུར་ལྕི་བ་བཀུར་བས་ཐེག་པ། མི་ཁྲོབས་ཁྱི། འགྲོ་ཞིང་འོང་བ་ལ་མི་སྐྱོ་བས་གྲུ། དགེ་བའི་བཤེས་གཉེན་གྱི་ངོར་བལྟ་བས་བུ་མཛངས་པ་ལྟ་བུའི་སེམས་ཀྱིས་དགེ་བའི་བཤེས་གཉེན་ལ་བསྙེན་བཀུར་བྱའོ། །ཞེས་དང་། རིམ་ལྔ་ལས། དེ་ཉིད་མི་ཟད་འདོད་པ་ཡིས། །ཤིན་ཏུ་དགའ་བ་གང་དང་གང་། །ཤིན་ཏུ་ཁྱད་པར་ཅན་དེ་དེ། །དེ་དང་དེ་ནི་བླ་མར་བྱིན། །སློན་དཔོན་གྱིས་ནི་སྡིག་པ་འཕྲོག །སློབ་དཔོན་གྱིས་ནི་འཇིགས་པ་སེལ། །སློབ་དཔོན་གྱིས་ནི་སྡུག་བསྔལ་གྱི། །རྒྱ་མཚོའི་འཇིང་ལས་ཕ་རོལ་སྒྲོལ། །ཞེས་དང་། རྡོ་རྗེ་སྙིང་པོ་རྒྱན་གྱི་རྒྱུད་ལས། བློ་ལྡན་རྡོ་རྗེའི་སློབ་མ་ཡིས། །ཅི་སྟེ་བདེ་བ་ཀུན་འདོད་ན། །དད་མོས་སེམས་ཀྱིས་འབུལ་བར་བྱ། །ཡིད་ལ་གང་བསམ་མ་ཕུལ་ལམ། །ཁས་བླངས་དེ་ནི་མ་ཕུལ་ན། །མི་དག་དམྱལ་བ་རྣམ་གཉིས་སུ། །ངེས་པར་སྐྱེ་སྟེ་བརླག་པར་འགྱུར། །ཞེས་དང་། དཔལ་ཡང་དག་པར་སྦྱོར་བའི་རྒྱུད་ལས། གང་དང་གང་གིས་སྡུག་པའི་རྫས། །རེ་བ་མེད་པའི་སེམས་ཀྱིས་ནི། །དེ་དང་དེ་ནི་བླ་མར་དབུལ། །ཞེས་སོགས་གསུངས་པའི་ཚུལ་གྱིས་མཉེས་པ་གསུམ་གྱི་སྒོ་ནས་ལེགས་པར་བསྟེན་པ་སྟེ། མདོ་རྒྱན་ལས། བཀུར་སྟི་རྙེད་པ་དག་དང་རིམ་གྲོ་དང་། །བསྒྲུབ་པའི་སྒོ་ནས་བཤེས་གཉེན་བསྟེན་པར་བྱ། །ཞེས་པ་ལྟར་ཡིན་ལ། དེའི་ནང་ནས་ཀྱང་གཙོ་བོ་ནི་བཀའ་བཞིན་སྒྲུབ་པར་བྱེད་པ་ཉིད་ཡིན་ཏེ། དེ་ཉིད་ལས། དེ་ཆོས་བགོ་སྐལ་ལ་སྤྱོད་ཡོན་ཏན་ལྡན། །བཤེས་གཉེན་རབ་ཏུ་བསྟེན་བྱེད་ཟང་ཟིང་མིིན། །ཞེས་དང་། སྐྱེས་རབས་ལས། ཕན་པའི་ལན་དུ་མཆོད་པ་བྱ་བ་ནི། །བསྒོ་བའི་ཚིག་བཞིན་ཉམས་སུ་ལེན་པ་ཡིན། །ཞེས་གསུངས་ཤིང་། མདོར་ན་བླ་མ་ལྔ་བཅུ་པར། འདིར་མང་སྨོས་པ་ཅི་ཞིག་དགོས། །བླ་མ་དགྱེས་བྱེད་གང་ཡིན་བྱ། །མི་མཉེས་བྱེད་ཀུན་སྤང་བ་ན། །དེ་དང་དེ་ལ་འབད་དེ་བརྟག །དངོས་གྲུབ་སློབ་དཔོན་རྗེས་འབྲང་ཞེས། །རྡོ་རྗེ་འཛིན་པ་ཉིད་གསུངས་པར། །ཤེས་ནས་དངོས་པོ་ཐམས་ཅད་ཀྱིས། །བླ་མ་ཡོངས་སུ་མཉེས་པར་བྱ། །ཞེས་འབྱུང་བ་བཞིན་ནོ། །གལ་ཏེ་མ་དད་ལོག་ལྟ་དང་བཀའ་འགལ་ཐུགས་དཀྲུགས་སོགས་ཤོར་ན་ཉེས་པ་བསམ་གྱིས་མི་ཁྱབ་སྟེ། བླ་མའི་ཡོན་ཏན་བཟུང་བའི་རྒྱུད་ལས། བླ་མ་ལ་ཁྲོས་སྐད་ཅིག་གྲངས། །བསྐལ་པར་བསགས་པའི་དགེ་བཅོམ་ནས། །དེ་སྙེད་བསྐལ་པར་དམྱལ་སོགས་ཀྱི། །སྡུག་བསྔལ་འཚོར་བ་དྲག་པོ་བསྐྱེད། །ཅེས་དང་། སློབ་དཔོན་སྨད་པར་མི་བྱ་སྟེ། །འདི་ནི་སངས་རྒྱས་ཀུན་དང་འདྲ། །སངས་རྒྱས་ཀུན་མཚུངས་བླ་མ་ཡི། །སློབ་དཔོན་ལ་ནི་གང་སྨོད་པ། །དེས་ནི་སངས་རྒྱསཀུན་སྨོད་པས། །རྟག་ཏུ་སྡུག་བསྔལ་འཐོབ་འགྱུར་ཏེ། །རིམ་དང་དུག་དང་དབྱིག་དུག་དང་། །མཁའ་འགྲོ་རྣམས་ཀྱིས་འཚེ་བ་དང་། །གདོན་དང་ལོག་འདྲེན་གཏུམ་པོ་ཡིས། །བསད་ནས་སེམས་ཅན་དམྱལ་བར་ལྟུང་། །ཞེས་སོ། །དེ་ཡང་དབང་དང་མན་ངག་གི་རིམ་པས་སྔ་མ་སྔ་མ་ལས་ཕྱི་མ་ཕྱི་མ་ལྕི་བར་གསུངས་ཏེ། བུམ་པ་གསང་བ་ཤེས་རབ་དང་། །བཞི་པའི་རིམ་པ་ཤེས་པར་བྱ། །ཞེས་གསུངས་པས་མདོ་ཕྱོགས་ལས་སྔགས་དང་། རྒྱུད་སྡེ་འོག་མ་ལས་གོང་མ། དེ་ལས་ཀྱང་དབང་བཞི་པ་དང་ཕྱག་རྫོགས་ཀྱི་གདམས་པ་ཞུས་པ་རྣམས་ཆེས་གཉན་ཞིང་ལྕི་བ་ཡིན། དེའི་ཕྱིར་ལག་ན་རྡོ་རྗེ་དབང་བསྐུར་བའི་རྒྱུད་ལས། བཅོམ་ལྡན་འདས་གང་དག་སློབ་དཔོན་ལ་བརྙས་པར་བགྱིད་པ་དེ་དག་གི་རྣམ་པར་སྨིན་པ་ཇི་ལྟབུ་ལགས། བཅོམ་ལྡན་འདས་ཀྱིས་བཀའ་བསྩལ་པ། ལག་ན་རྡོ་རྗེ། ལྷ་དང་བཅས་པའི་འཇིག་རྟེན་སྐྲག་པར་འགྱུར་གྱིས་དེ་སྐད་མ་སྨྲ་ཞིགགསང་བའི་བདག་པོ། འོན་ཀྱང་ཅུང་ཟད་ཅིག་བརྗོད་པར་བྱ་ཡི། དཔའ་བོས་བསྒྲིམས་ཏེ་དེ་ཉོན་ཅིག །མཚམས་མེད་ལ་སོགས་མི་བཟད་པ། །དམྱལ་བ་གང་དག་ངས་བཤད་པ། །དེ་རྣམས་ཀྱི་ནི་གནས་སུ་བརྗོད། །དེ་ནའང་བསྐལ་པ་མཐའ་ཡས་སོ། །དེ་ལྟ་བས་ན་རྣམ་ཀུན་ཏུ། །དེ་ལ་ནམ་ཡང་བརྙས་མི་བྱ། །ཞེས་དང་། འཇམ་དཔལ་ཞལ་ལུང་ལས། མ་འོངས་རྡོ་རྗེ་འཆང་བ་སྟེ། །དེ་ལ་བརྙས་བྱེད་སེམས་ཅན་གང་། །དེ་ཡིས་ང་ལ་བརྙས་བྱེད་པས། །ངས་ནི་དེ་ཀུན་དུས་སུ་སྤོང་། །ཞེས་དང་། བླ་མ་ལྔ་བཅུ་པ་ལས། སློབ་དཔོན་ལ་ནི་སྨོད་པ་དེ། །ཡམས་དང་མཛེ་དང་ནད་རྣམས་དང་། །གདོན་དང་རིམ་དང་དུག་རྣམས་ཀྱིས། །རྨོངས་ཆེན་དེ་ནི་འཆི་བར་འགྱུར། །རྒྱལ་པོ་མེད་དང་སྦྲུལ་གདུག་དང་། །ཆུ་དང་མཁའ་འགྲོ་རྐུན་པོ་དང་། །གདོན་དང་ལོག་འདྲེན་རྣམས་ཀྱིས་ཀྱང་། །བསད་ནས་སེམས་ཅན་དམྱལ་བར་འགྲོ། །ནམ་ཡང་སློབ་དཔོན་དག་གིས་ནི། །ཀུན་ཏུ་སེམས་དཀྲུགས་མི་བྱ་སྟེ། །གལ་ཏེ་རྨོངས་པས་བྱས་གྱུར་ན། །དམྱལ་བར་ངེས་པར་འཚེད་པར་འགྱུར། །མནར་མེད་ལ་སོགས་འཇིགས་རུང་བའི། །དམྱལ་བར་བསྟན་པ་གང་ཡིན་པ། །སློབ་དཔོན་ལ་ནི་སྨོད་པ་རྣམས། །དེར་ནི་གནས་པར་ཡང་དག་བཤད། །ཅེས་གསུངས། དེ་ལས་གཞན་དུའང་། ཚིགས་བཅད་གཅིག་ཙམ་མཉན་པ་ལ། །གང་གིས་བླ་མར་མི་འཛིན་པ། །ཁྱིི་ཡི་སྐྱེ་བ་བརྒྱར་སྐྱེས་ནས། །སྨེ་ཤ་ཅན་དུ་སྐྱེ་བར་འགྱུར། །ཞེས་གསུངས། ཚུལ་བཞིན་བསྟེན་པའི་ཕན་ཡོན་ཡང་། སྡོང་པོ་བཀོད་པ་ལས། རིགས་ཀྱི་བུ་དགེ་བའི་བཤེས་གཉེན་གྱིས་ཟིན་པའི་བྱང་ཆུབ་སེམས་དཔའ་རྣམས་ནི་ངན་འགྲོར་མི་ལྟུང་ངོ་། །དགེ་བའི་བཤེས་གཉེན་གྱིས་བསམ་པའི་བྱང་ཆུབ་སེམས་དཔའ་རྣམས་ནི་བྱང་ཆུབ་སེམས་དཔའི་བསླབ་བྱ་དང་འགལ་བར་མི་བྱེད་དོ། །དགེ་བའི་བཤེས་གཉེན་གྱིས་བསྐྱབས་པའི་བྱང་ཆུབ་སེམས་དཔའ་རྣམས་ནི་འཇིག་རྟེན་ལས་མངོན་པར་འཕགས་པ་ཡིན་ནོ། །དགེ་བའི་བཤེས་གཉེན་ལ་བསྙེན་བཀུར་བྱེད་པའི་བྱང་ཆུབ་སེམས་དཔའ་རྣམས་ནི་སྤྱོད་པ་ཐམས་ཅད་ལ་མི་བརྗེད་པར་སྤྱོད་པ་ཡིན་ནོ། །དགེ་བའི་བཤེས་གཉེན་གྱིས་ཡོངས་སུ་བཟུང་བའི་བྱང་ཆུབ་སེམས་དཔའ་རྣམས་ནི་ལས་དང་ཉོན་མོངས་པ་རྣམས་ཀྱིས་ཐུབ་པར་དཀའ་བ་ཡིན་ནོ། །ཞེས་དང་། རིགས་ཀྱི་བུ་དགེ་བའི་བཤེས་གཉེན་གྱིས་རྗེས་སུ་བསྟན་པ་ལ་ཞུགས་པའི་བྱང་ཆུབ་སེམས་དཔའ་ལ་སངས་རྒྱས་བཅོམ་ལྡན་འདས་ཐུགས་མཉེས་པར་འགྱུར་རོ། །དགེ་བའི་བཤེས་གཉེན་གྱི་ཚིག་དང་མི་འགལ་བར་གནས་པའི་བྱང་ཆུབ་སེམས་དཔའ་ལ་ཐམས་ཅད་མཁྱེན་པ་ཉེ་བར་འགྱུར་རོ། །དགེ་བའི་བཤེས་གཉེན་གྱི་ཚིག་ལ་ཐེ་ཚོམ་མེད་པ་ལ་དགེ་བའི་བཤེས་གཉེན་རྣམས་ཉེ་བར་འགྱུར་རོ། །དགེ་བའི་བཤེས་གཉེན་ཡིད་ལ་བྱེད་པ་དང་མ་བྲལ་བ་ལ་དོན་ཐམས་ཅད་མངོན་དུ་འབྱུང་ངོ་། །ཞེས་དང་། གསང་བ་བསམ་གྱིས་མི་ཁྱབ་པའི་མདོ་ལས། །བྱང་ཆུབ་སེམས་དཔས་བླ་མ་ལ་བརྟེན་ཏེ་ཡོན་ཏན་གྱི་ཚོགས་ཐམས་ཅད་རྫོགས་པར་བྱའོ། །ཞེས་དང་། སྐྱེས་རབས་ལས། དམ་པ་རྣམས་ནིསུས་ཀྱང་མི་བསྲིང་སྟེ། དུལ་བའི་ཚུལ་གྱིས་བཤེས་གཉེན་བསྟེན་པར་བྱ། །དེ་དང་ཉེ་ན་དེ་ཡི་ཡོན་ཏན་རྡུལ། །ཆེད་དུ་མ་བགོས་པར་ཡང་གོས་པར་འགྱུར། །ཞེས་དང་། ཀུན་ཏུ་ཁ་སྦྱོར་གྱི་རྒྱུད་ལས། ཡེ་ཤེས་ཀུན་སེམས་ཞེས་བྱ་བའི། །རྒྱལ་བ་ཀུན་གྱི་སློབ་དཔོན་མཆོག །དངོས་གྲུབ་སྣ་ཚོགས་སྟེར་བས་ན། །བློ་དང་ལྡན་པས་རྟག་མཆོད་བྱ། །གང་ཕྱིར་ཕྱོགས་བཅུའི་སངས་རྒྱས་དང་། །བྱང་ཆུབ་སེམས་མཆོད་བསོད་ནམས་ལས། །བླ་མའི་བ་སྤུའི་ཁུང་གཅིག་མཆོག །དེ་ཕྱིར་སློབ་དཔོན་མཆོད་བྱེད་པ། །སངས་རྒྱས་བྱང་ཆུབ་སེམས་དཔས་གཟིགས། །ཞེས་དང་། འཇམ་དཔལ་ཞལ་ལུང་ལས། འདི་ཡིས་དོན་ལྡན་འགའ་ཞིག་ལ། །ང་ནི་དེ་ཡི་ལུས་གནས་ཏེ། །སྒྲུབ་པོ་གཞན་ལས་མཆོད་པ་ལེན། །དེ་མཉེས་དེ་ཡི་རང་གི་རྒྱུད། །ལས་ཀྱི་སྒྲིབ་པ་དག་བྱེད་དོ། །ཞེས་དང་། དགོངས་འདུས་ལས། དེས་ན་སངས་རྒྱས་སྟོང་ཕྲག་ལ། །བསྐལ་པ་སྟོང་དུ་མཆོད་བྱས་པ། །བླ་མའི་བ་སྤུའི་ཁུང་རེ་ལ། །ཙནྡན་ཐིགས་པ་གཅིག་བྱུག་པའི། །སྟོང་ཕྲག་ཆར་ཡང་ཕོད་པ་མིན། །ཞེས་དང་། གསང་འདུས་ལས། དུས་གསུམས་སངས་རྒྱས་ཀུན་མཆོད་པས། །བླ་མའི་བ་སྤུ་ཉག་རེ་ལ། །མར་གྱི་ཐིགས་པ་གཅིག་བྱུགས་ན། །དེ་ཡི་བསོད་ནམས་ཁྱད་པར་འཕགས། །ཞེས་དང་། ཡེ་ཤེས་རྒྱ་མཚོའི་རྒྱུད་ལས། གལ་ཏེ་ཙནྡན་ག་བུར་རམ། །དྲི་ཡིས་བླ་མ་མཉེས་བྱས་ན། །བསྐལ་པ་སྟོང་ཕྲག་དུ་མར་ནི། །སངས་རྒྱས་ཞིང་ཁམས་འབུམ་ཕྲག་ལ། །མཆོད་ལས་བསོད་ནམས་ཁྱད་པར་འཕགས། །སངས་རྒྱས་བྱང་ཆུབ་སེམས་དཔའ་ཡི། །གཟུགས་སྐུ་སྟོང་ཕྲག་གཞལ་མེད་ལ། །རིན་ཆེན་ལྔ་ཡིས་སྤྲས་པ་བས། །བླ་མའི་སྐྲ་འམ་བ་སྤུ་ཞིག །རིན་ཆེན་ལྔ་ཡིས་བརྒྱན་པ་ན། །འདི་ནི་བསོད་ནམས་ཕ་མཐའ་ཡས། །ཇི་ལྟར་དགེ་སློང་ཁྲིམས་ལྡན་པ། །འབུམ་ཕྲག་དྲུག་ཅུ་རྩ་གཉིས་ལ། །སྟོན་མོ་ལན་བདུན་བཅུག་པ་བས། །བླ་མའི་ཞལ་དུ་འབྲས་ཆེན་འབྲུ། །རྡོོག་མ་བདུན་དྲངས་བསོད་ནམས་ལ། །བརྒྱ་སྟོང་ཁྲི་འབུམ་ཆར་མི་ཕོད། །ཅེས་དང་། གང་གིས་བླ་མའི་བྱ་བ་ལ། །མཁས་པའི་སྐལ་ལྡན་གང་ཡིན་དེས། །དུས་གསུམ་སངས་རྒྱས་ཐམས་ཅད་ལ། །བསྐལ་པ་བྱེ་བ་དྲུག་འབུམ་དུ། །ཕྱག་བྱས་པས་ནི་འདི་དོན་ཆེ། །བླ་མས་བསྒོ་བ་བཞིན་བསྒྲུབས་ན། །འདོད་པ་ཐམས་ཅད་འགྲུབ་པ་དང་། །བསོད་ནམས་དཔག་ཏུ་མེད་པ་ཐོབ། །རང་གི་རྫས་དང་ཡོ་བྱད་ཀྱིས། །བླ་མ་མཉེས་པར་སུས་བྱས་པ། །འདི་ནི་ཁམས་གསུམ་འཁོར་བ་ལས། །སྤྲུལ་སྐུའི་ཞིང་དུ་དབུགས་ཕྱུང་སྟེ། །མྱ་ངན་འདས་པའི་སར་གཤེགས་སོ། །ཞེས་གསུངས། དེ་ཡང་དུས་གཞན་དུ་མཆོད་པ་བས། དབང་ཁྲིད་ལ་སོགས་པའི་དུས་སུ་མཆོད་པ། བསོད་ནམས་ཆེ་སྟེ། དབང་རྣམ་པར་ཕྱེ་བ་ལས། གལ་ཏེ་དབང་བསྐུར་དུས་མིན་པར། །རང་གི་བླ་མ་མཆོད་པ་ནི། །བརྒྱ་སྟོང་བྱེ་བ་གྲངས་མེད་པས། །དབང་གི་དུས་གཅིག་བྱས་པ་ཡི། །བསོད་ནམས་ཚད་མེད་དཔག་ཏུ་མེད། །ཅེས་སོ། །རྣལ་འབྱོར་བསྒོམ་པའི་ཕན་ཡོན་ཡང་། འཁོར་ལོ་ཆུབ་པ་རོལ་བའི་རྒྱུད་ལས། གང་གིས་བསྐལ་པ་བྱེ་བ་རུ། །ལྷ་ཡི་སྐུ་ནི་བསྒོམ་པ་བས། །མགོན་པོ་ཀུན་གྱི་དབང་ཕྱུག་ཆེ། །བླ་མ་དྲན་པ་མཆོག་ཏུ་བཤད། །ཅེས་དང་། ཀུན་ཏུ་བཟང་པོ་ཆེ་བ་རང་ལ་གནས་པའིརྒྱུད་ལས། རྫོགས་པ་ཆེན་པོ་ཨ་ཏི་ལས། །བྱུང་བའི་བླ་མ་དྲིན་ལྡན་ཉིད། །སྙིང་གི་དཀྱིལ་ལམ་ལག་པའི་མཐིལ། །སྤྱི་བོའི་གཙུག་ཏུ་སུས་བསྒོམས་པ། །སངས་རྒྱས་སྟོང་གི་ཡོན་ཏན་ཡང་། །གང་ཟག་དེ་ཡིས་འཛིན་པར་འགྱུར། །ཞེས་དང་། ཡིད་བཞིན་མཆོག་གི་རྒྱུད་ལས། གང་གིས་བླ་མ་ལྷག་པའི་ལྷ། །སྦྱིི་བོའི་གཙུག་ཏུ་བསྒོམས་པ་ཡིས། །སངས་རྒྱས་དཀྱིལ་འཁོརསྟོང་ཕྲག་ཉིད། །ལག་མཐིལ་བཞག་ནས་སྟོང་གསུམ་བསྐོར། །སྙིང་གར་ལན་སྟོང་བསྟིམས་བྱས་པས། །བརྒྱ་སྟོང་རྒྱུད་དང་ཆར་མི་ཕོད། །དེས་ན་རྟག་ཏུ་དྲན་པ་ཡིས། །སྤྱིི་གཙུག་འཁོར་ལོའི་རྒྱུན་ཉིད་དུ། །དཔལ་ལྡན་བླ་མ་བསམ་པར་བྱ། །ཞེས་གསུངས། མདོར་ན་དགོངས་འདུས་ལས། བསྐལ་པ་སྟོང་གི་སངས་རྒྱས་བས། །བླ་མ་གཉན་པར་ཤེས་པར་བྱ། །ཅི་ཕྱིར་བསྐལ་པའི་སངས་རྒྱས་རྣམས། །བླ་མ་དག་ལ་བརྟེན་ནས་འབྱུང་། །ཞེས་དང་། ཆོས་ཀུན་མི་ཤེས་མ་རྟོགས་ཀྱང་། །མཚན་ཉིད་བཟང་ལྡན་བླ་མ་ལ། །བཀུར་ནས་རིམ་གྲོ་ཆེར་བྱས་པས། །འཁོར་བའི་རྒྱ་མཚོ་བརྒལ་བར་འགྱུར། །དཔེར་ན་ཞིང་ས་གཤིན་པོ་ལ། །ས་བོན་བཏབ་ནས་འཕེལ་རྒྱས་བཞིན། །ཞེས་གསུངས་པ་བཞིན་ནོ། །དཔག་མེད་ཡོན་ཏན་གསེརསྦྱངས་སྙིང་པོའི་ཁམས། །ཕན་བདེའི་ཕྲིན་ལས་རྩིབས་སྟོང་རྣམ་བཀྲ་ཞིང་། །གང་དང་སུ་འབྲེལ་ཐེག་མཆོག་ལམ་སྣ་འདྲེན། །འཁོར་ལོ་རིན་ཆེན་དགེ་བའི་བཤེས་གཉེན་ལགས། །ཕུལ་བྱུང་མཁྱེན་རབ་འབུམ་ཕྲག་སྣང་བའི་གཟིས། །ས་གསུམ་ཉེས་པའི་མུན་ཚོགས་སེལ་ནུས་ཤིང་། །བརྩེ་ཆེན་ཐུགས་རྗེས་འདོད་དགུའི་ཆར་འབེབས་པའི། །ནོར་བུ་རིན་ཆེན་དགེ་བའི་བཤེས་གཉེན་ལགས། །མཁས་པའི་རྣམ་དཔྱོད་ལང་ཚོའི་ཁུར་གྱིས་དུད། །བཙུན་པའི་ཡོན་ཏན་རིན་ཆེན་རྒྱན་ཆས་སྒེག །བཟང་པོའི་ཕྲིན་ལས་རེག་ན་བདེ་བ་སྟེར། །བཙུན་མོ་རིན་ཆེན་དགེ་བའི་བཤེས་གཉེན་ལགས། །འཆད་པས་ལུང་གི་ཆོས་གཏེར་བྱེ་བ་འབྱེད། །རྩོད་པས་ཕས་རྒོལ་དཔུང་གི་དྲེགས་པ་བཅོམ། །རྩོམ་པས་ལེགས་བཤད་ནོར་བུའི་གྲམ་བུར་བརྡལ། །བློན་པོ་རིན་ཆེན་དགེ་བའི་བཤེས་གཉེན་ལགས། །སྤང་བ་བསམ་གཏན་དོན་བརྒྱུད་ཤ་ཚུགས་བརླིང་། །ཀློག་པ་ཐོས་བསམ་གསེར་གྱི་དྲྭ་བས་མཛེས། །བྱ་བ་ལས་ཀྱིས་གཞན་ཕན་ཐེག་པ་ཆེ། །གླང་པོ་རིན་ཆེན་དགེ་བའི་བཤེས་གཉེན་ལགས། །ཆོས་དང་ཆོས་མིན་རྣམ་འབྱེད་སྤྱན་ཟུང་བཀྲ། །གཟུངས་དང་ཏིང་འཛིན་རྫུ་འཕྲུལ་རྐང་པས་མཛེས། །ཟབ་མྱུར་སྤོབས་པས་གླིང་བཞི་ཡུད་ཀྱིས་བསྐོར། །རྟ་མཆོག་རིན་ཆེན་དགེ་བའི་བཤེས་གཉེན་ལགས། །ཟབ་གསང་མན་ངག་གདམས་པའི་མཚོན་རྣོན་གྱིས། །འཁྲུལ་རྟོགས་གཟུང་འཛིན་སྲིད་རྩེའི་མགོ་བོ་གཅོད། །འཁོར་བའི་གཡུལ་ངོ་སྐད་ཅིག་བཟློག་ནུས་པའི། །དམག་དཔོན་རིན་ཆེན་དགེ་བའི་བཤེས་གཉེན་ལགས། །འཕགས་ནོར་རིན་ཆེན་བདུན་གྱིས་མདུན་བརྡར་ནས། །ཐུབ་བསྟན་གླིང་བཞིའི་ཁྱོན་ལ་དབང་བསྒྱུར་ཞིང་། །ཚེ་གཅིག་གདོད་མའི་རྒྱལ་ཐབས་སྦྱིན་མཛད་པའི། །འཁོར་ལོས་སྒྱུར་མཆོག་དགེ་བའི་བཤེས་གཉེན་ལགས། །རྒྱལ་དང་དེ་སྲས་འཕགས་པའི་ཚོགས་རྣམས་ཀྱིས། །ཡོན་ཏན་ཁྱད་འཕགས་ཇི་སྙེད་གང་གསུངས་པ། །དེ་ཀུན་དགེ་བའི་བཤེས་གཉེན་བསྟེན་ལས་བྱུང་། །དེ་སླད་བྱང་ཆུབ་བར་དུ་བསྟེན་པར་མཛོད། །མདོར་ན་ཆེད་དུ་བརྗོད་པའི་ཚོམ་ལས། ཟླ་བ་རེ་རེར་མཆོད་སྦྱིན་སྟོང་། །ལོ་བརྒྱར་བྱེད་པ་གང་ཡིན་དེས། །སངས་རྒྱས་ལ་ནི་དད་པ་ཡི། །བཅུ་དྲུག་ཆར་ཡང་མི་ཕོད་དོ། །ཞེས་ཆོས་དང་དགེ་འདུན་སོགས་ལའང་སྦྱར་ཏེ་གསུངས་པ་དང་། དད་པའི་སྟོབས་བསྐྱེད་པ་ལས། རྒྱལ་བ་ཡི་ནི་རྟེན་གསུམ་ལ། །དད་པས་ཐལ་མོ་སྦྱར་ན་ཡང་། །ངན་འགྲོ་ལོག་པར་མི་ལྟུང་ཤིང་། །ལྷ་དང་མི་ཡི་དཔལ་ཐོབ་ནས། །རྫོགས་པའི་སངས་རྒྱས་འཐོབ་པར་འགྱུར། །ཞེས་དང་། སྙིང་རྗེ་པདྨ་དཀར་པོ་ལས། དེ་ལྟར་སངས་རྒྱས་བསམ་མི་ཁྱབ། །སངས་རྒྱས་ཆོས་ཀྱང་བསམ་མི་ཁྱབ། །བསམ་མི་ཁྱབ་ལ་དད་བྱས་ན། །དེ་ཡི་རྣམ་སྨིན་བསམ་མི་ཁྱབ། །འདུ་ཤེས་ཡོད་དང་མེད་པ་ཡི། །སེམས་ཅན་ཐམས་ཅད་ཇི་སྙེད་པ། །བསྐལ་པ་བྱེ་བ་བརྒྱ་མང་དུ། །ཀུན་གྱིས་མཆོད་པ་བྱས་པ་དང་། །རང་སངས་རྒྱས་པ་གང་དག་དང་། །ཟག་པ་མེད་པའི་དགྲ་བཅོམ་པ། །བསྐལ་པ་བྱེ་བ་བསམ་ཡས་པར། །དེ་དག་ཐམས་ཅད་མཆོད་པ་བས། །རྫོགས་པའི་སངས་རྒྱས་བཞུགས་པའམ། །ཡོངས་སུ་མྱ་ངན་འདས་པ་ལ། །གང་གིས་ཐལ་སྦྱར་གཅིག་བྱས་པ། །བསོད་ནམས་འདི་ནི་ཁྱད་པར་འཕགས། །སངས་རྒྱསཚུལ་ཁྲིམས་མ་ཞིག་ཅིང་། །ཏིང་ངེ་འཛིན་ལ་དབང་དུ་གྱུར། །ཆོས་རྣམས་ཀུན་ལ་ཐེ་ཚོམ་མེད། །སངས་རྒྱས་སྤྱན་གྱིས་མཁྱེན་པ་ཡིན། །ཞེས་དང་། དཀོན་མཆོག་བརྩེགས་པ་ལས། འཇིག་རྟེན་འདི་ན་བདེ་ཞིང་སྐྱིད་པ་ཀུན། །དེ་ཀུན་དཀོན་མཆོག་མཆོད་ལས་བྱུང་བས་ན། །རྟག་ཏུ་དཀོན་མཆོག་མཆོད་ལ་བརྩོན་པར་བྱ། །ཞེས་དང་། འཕགས་པ་བྱམས་པ་འཇུག་པ་ལས། མི་ལུས་འཐོབ་པ་རྙེད་པར་དཀའ། །སངས་རྒྱས་འབྱུང་བའང་རྙེད་པར་དཀའ། །སངས་རྒྱས་དད་པ་རྙེད་པར་དཀའ། །བྱང་ཆུབ་སེམས་ཀྱང་རྙེད་པར་དཀའ། །གནས་སྐབས་བཞི་པོ་འདི་དག་ནི། །བསྐལ་པ་བྱེ་བར་རྙེད་དཀའ་སྟེ། །དེ་ཕྱིར་ཐོབ་ནས་མ་སྤངས་ཤིག །མཐུ་རྩལ་དག་ཀྱང་ཆུད་མ་གཟན། །མི་ལུས་ཐོབ་པ་རྙེད་པ་དང་། །སངས་རྒྱས་འབྱུང་བ་རྙེད་པ་དང་། །བྱང་ཆུབ་སེམས་ནི་བསྐྱེད་ནས་ཀྱང་། །རྟག་ཏུ་བག་ནི་ཡོད་པར་གྱིས། །དྲང་སྲོང་ཆེན་པོ་དེ་དག་ནི། །བག་ཡོད་པས་ནི་བྱང་ཆུབ་བརྙེས། །སངས་རྒྱས་ཆོས་རྣམས་ཐམས་ཅད་ཀྱི། །རྩ་བའི་སྒོ་དང་ཚུལ་གྱི་ལམ། །བག་ཡོད་པ་དང་བརྩོན་འགྲུས་ཡིན། །མཁས་པ་རྣམས་ཀྱང་འདི་ལ་སློབ། །ཅེས་གསུངས་པ་ལྟར་བདག་ལེགས་སུ་འདོད་པ་རྣམས་ཀྱིས་བག་ཡོད་དང་བརྩོན་འགྲུས་ལྡན་པས་རྟག་པར་དཀོན་མཆོག་མཆོད་པ་ལ་བརྩོན་པར་བྱའོ། །དལ་འབྱོར་རྟེན་ཐོབ་དགེ་བའི་བཤེས་ཀྱིས་ཟིན། །དཀོན་མཆོག་གསུམ་ལ་དད་པའི་དཔལ་རྙེད་པ། །འདི་འདྲ་བསྐལ་པ་དུ་མར་རྙེད་དཀའ་བས། །གྲོགས་དག་རྟག་པར་བརྩོན་པའི་དཔུང་བསྐྱེད་འཚལ། །

བཞི་པ་འཕྲོས་དོན་གྱི་ཁྱད་པར་འགའ་ཞིག་བརྗོད་པ།

བཞི་པ་འཕྲོས་དོན་གྱི་ཁྱད་པར་འགའ་ཞིག་བརྗོད་པ་ནི། ད་ལྟའི་རྣམ་འདྲེན་བཞི་པའི་བསྟན་པ་འདི་ལ་བསླབ་གཞི་བླང་བ་དང་དཀོན་{མཆོག་ཞུ་མཆན།} མཆོད་པ་སོགས་མཆོག་གསུམ་ལ་བཟང་པོས་འབྲེལ་བ་རྣམས་མ་འོངས་རྒྱལ་བ་བྱམས་པ་འཇིག་རྟེན་དུ་བྱོན་པའི་ཚེ་འཁོར་གྱི་འདུས་བར་གྱུར་ཏེ་སྲིད་པ་ལས་མངོན་པར་འདའ་བར་གསུངས་ཏེ། བྱམས་པ་ལུང་བསྟན་པའི་མདོ་ལས། གདུགས་དང་རྒྱལ་མཚན་བ་དན་དང་། །དྲི་དང་ཕྲེང་བ་བྱུག་པ་ཡིས། །ཤཱཀྱཐུབ་པ་མཆོད་བྱས་པས། །ང་ཡི་བསྟན་ལ་ལྷགས་པ་ཡིན། །གུར་གུམ་ཆུ་ཡིས་གཏོར་བ་དང་། །ཙནྡན་གྱི་ནི་བྱུག་པ་ཡིས། །ཤཱཀྱ་ཐུབ་ལ་མཆོད་པ་ནི། །ཕུལ་བས་ང་ཡི་བསྟན་ལ་ལྷགས། །རྟག་ཏུ་སངས་རྒྱས་ཆོས་དང་ནི། །དགེ་འདུན་ལ་ཡང་སྐྱབས་སོང་ཞིང་། །དགེ་བའི་ལས་ཀྱང་བྱས་པ་ནི། །ང་ཡི་བསྟན་ལ་ལྷགས་པ་ཡིན། །ཤཱཀྱ་སེང་གེའི་བསྟན་པ་ལ། །བསླབ་གཞི་ཡང་དག་བླངས་ནས་སུ། །ཇི་ལྟར་གསུངས་བཞིན་བསྒྲུབས་པ་ནི། །ང་ཡི་བསྟན་ལ་ལྷགས་པ་ཡིན། །དགེ་འདུན་ལ་ཡང་ཆོས་གོས་དང་། །ཞལ་ཟས་དང་ནི་བཏུང་བ་དང་། །སྙུན་གསོལ་སྣ་ཚོགས་སྦྱིན་པ་རྣམས། །ཕུལ་བས་ང་ཡི་བསྟན་ལ་ལྷགས། །ཟླ་ཕྱེད་ཀྱི་ནི་བཅུ་བཞི་དང་། །བཅོ་ལྔ་དེ་བཞིན་ཚེས་བརྒྱད་དང་། །ཆོ་འཕྲུལ་གྱི་ནི་ཟླ་ཕྱེད་ལ། །ཡན་ལག་བརྒྱད་པ་ལེགས་གནས་པའི། །བསྙེན་གནས་གསོ་སྦྱོོང་བྱས་པས་ནི། །ང་ཡི་བསྟན་ལ་ལྷགས་སོ་གསུངས། །ཞེས་དང་། བྱམས་པ་དགའ་ལྡན་གནམ་དུ་སྐྱེ་བ་བླང་བའི་མདོ་ལས། དེ་བཞིན་གཤེགས་པ་མྱ་ངན་ལས་འདས་ནས། ངའི་འཁོར་ཉེ་གནས་ལས་གང་ལ་ལ་ཞིགབརྩོན་འགྲུས་སུ་བསོད་ནམས་བསགས་པ། སྡོམ་པ་མ་ཞིག་ཅིང་མཆོད་རྟེན་ལ་ཕྱག་དར་དང་། མཎྜལ་བྱེད་པ་དང་། སྤོས་དྲི་ཞིམ་པ་དང་། མེ་ཏོག་གིས་མཆོད་པ་དང་། རྣམ་པར་ཐར་པ་གསུམ་ལ་སྤྱོད་ཅིང་ཟབ་ཅིང་དྲང་བའི་ཆོས་ལ་སྤྱོད་པ་དང་། མདོ་སྡེ་ཀློག་ཅིང་སེམས་རྩེ་གཅིག་ཏུ་རྒྱུན་མི་ཆད་པར་ཡིད་ལ་ཟློས་པ་དང་། མངོན་པར་ཤེས་པ་དྲུག་ཐོབ་པར་བྱེད་པ་དང་། དེ་བཞིན་གཤེགས་པའི་སྐུ་གཟུགས་བྱེད་པ་དང་། བྱམས་པའི་མཚན་བརྗོད་པ་དེ་ལྟ་བུ་ལ་སོགས་པའི་མི་རྣམས་དེ་དག་ནི་སྐད་ཅིག་ཙམ་དུ་ཁྲིམས་བརྒྱད་མནོས་ནས། སྡིག་པ་ཐམས་ཅད་བྱང་བར་བྱེད་ཅིང་། སྨོན་ལམ་བཏབ་ནས། ཚེའི་དུས་བྱས་པའི་འོག་ཏུ། དཔེར་ན་སྐྱེས་བུ་སྟོབས་དང་ལྡན་པ་ལག་པ་བརྐྱང་བ་ཙམ་དུ་དགའ་ལྡན་དུསྐྱེས་ནས་པདྨའི་སྟེང་དུ་སྐྱིལ་མོ་ཀྲུང་གིས་འདུག་ནས། འཕགས་པ་བྱམས་པ་མགོན་པོའི་ཞལ་མཐོང་ཞིང་ཆོས་ཐོས་པ་དང་། མ་འོངས་པའི་དུས་སུ་ཀླུའི་སྡོང་པོ་བྱང་ཆུབ་ཀྱི་ཤིང་དྲུངདུ་བླ་ན་མེད་པའི་བྱང་ཆུབ་ཀྱི་ལམ་དུ་སེམས་བསྐྱེད་པ་ཡང་འཐོབ་པར་འགྱུར་རོ། །ཞེས་གསུངས་པ་དང་། དེར་མ་ཟད་སྙིང་རྗེ་པད་དཀར་ལས། འདི་ལྟ་སྟེ། ངའི་ཕྱིར་མཆོད་རྟེན་བྱས་པ་ལ་བསྟི་སྟང་བྱེད་པ་ལྟ་ཞོགགང་སངས་རྒྱས་ལ་དམིགས་ནས་ཐ་ན་མེ་ཏོག་གཅིག་ནམ་མཁའ་ལ་འཐོར་ན། དགེ་བ་དེ་ཡི་འབྲས་བུས་མྱ་ངན་ལས་འདས་པར་ང་སྨྲའོ། །ཞེས་དང་། སེམས་ཅན་མྱ་ངན་ལས་འདའ་བའི་སྐལ་བ་མེད་པ་ཞིག་གིས་ཀྱང་སངས་རྒྱས་ལ་དམིགས་ཏེ་མེ་ཏོག་གཅིག་ནམ་མཁའ་ལ་འདོར་བ་དང་། ཐ་ན་དུད་འགྲོ་ཞིག་གིས་ཀྱང་སངས་རྒྱས་ལ་དམིགས་པའི་དྲན་པ་རྙེད་ན་དེ་ཡང་བྱང་ཆུབ་ཀྱི་རྒྱུར་འགྱུར་བ་དང་ཡང་གང་ལ་ལ་ང་རྗེས་སུ་དྲན་ནས་ཆོས་ཀྱི་ཤུགས་ཀྱིས་མཆི་མ་ཕྱུང་བའམ། སྤུ་ཟིང་ཞེས་བྱེད་པའམ། ཤུགས་རིང་འབྱིན་པ་དེ་དག་ནི་ནམ་ཡང་དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་ལོག་པར་ལྟུང་བ་ཐམས་ཅད་དུ་མི་འགྲོའོ། །ཞེས་དང་། མཐའ་འཁོབ་ཀླ་ཀློ་སོགས་དད་པ་མེད་པའི་མི་རྣམས་ཀྱིས་ཀྱང་རྒྱལ་བའི་སྐུ་དང་མཆོད་རྟེན་མཐོང་ནས་སེམསཅུང་ཟད་ཙམ་དགའ་བའང་མཐར་བྱང་ཆུབ་ཏུ་འགྲོ་བར་གསུངས་པ་དང་། ཡང་ཕྱི་མའི་དུས་དམ་ཆོས་ཟད་པར་འགྱུར་བ་ན། གང་དག་ངའི་བསྟན་པ་ལ་རབ་ཏུ་བྱུང་ནས་བུའི་ལག་པ་ནས་བཟུང་སྟེ་ཆང་སྐྱོགས་གང་གི་ཕྱིར་ཆང་མའི་ཁྱིམ་ནས་ཆང་མའི་ཁྱིམ་དུ་འཁྱམས་ལ། ངའི་ཆོས་ཀྱི་རྗེས་སུ་སློབ་པ་དེ་ཐམས་ཅད་ཀྱང་བསྐལ་པ་བཟང་པོ་འདི་ལ་མྱ་ངན་ལས་འདས་པར་འགྱུར་རོ། །ཞེས་དང་། ས་སྙིང་འཁོར་ལོ་བཅུ་པའི་མདོ་ལས། ཙམ་པ་ཀ་ཡི་མེ་ཏོག་རྙིང་གྱུར་ཀྱང་། །མེ་ཏོག་ཕལ་བ་གཞན་ལས་ཤིན་ཏུ་ལྷག །དགེ་སློང་ཚུལ་ཁྲིམས་ཉམས་ཤིང་སྡིག་སྤྱོད་ཀྱང་། །མུ་སྟེགས་ཅན་དག་ཐམས་ཅད་ཀུན་པས་མཆོག །ཅེས་གསུངས་པ་ལྟར། རྒྱལ་བ་ཉིད་ཀྱི་སྔོན་གྱི་སྨོན་ལམ་གྱི་མཐུ་བསམ་གྱིས་མི་ཁྱབ་པས་འབྲེལ་ཚད་དོན་ལྡན་གྱི་ཚུལ་དེ་ལྟར་ལགས་ན། གང་བསྟན་པ་ལ་ཞུགས་ནས་གཞི་ཚུལ་ཁྲིམས་རྣམ་པར་དག་པ་མིག་གི་འབྲས་བུ་བཞིན་དུ་བསྲུང་བ་དང་། ཐོས་བསམ་སྒོམ་གསུམ་དང་དཀོན་མཆོག་མཆོད་པ་སོགས་བསྟན་ལ་ཞབས་ཏོག་སྲི་ཞུ་རང་ནུས་ཅི་ཡོད་ཀྱིས་བརྩོན་པ་ཅི་ནས་ཀྱང་གལ་ཆེ་ཞིང་། དེ་ལྟ་བུ་མི་ནུས་བའི་རྟེན་ཁྱིམ་པ་ལྟ་བུའི་རིགས་ཅན་ཡིན་ཡང་། འཕགས་པ་དགའ་བ་ཅན་གྱི་མདོ་ལས། སྲོག་གཅོད་རྡེག་དང་འཆིང་བ་རྣམས་སྤངས་ཏེ། །སེམས་ཅན་དག་ལ་ཕན་ཞིང་སྙིང་བརྩེ་བ། །བདག་གི་ཚེ་སྐྱབས་དགའ་བ་ཇི་ལྟ་བར། །དེ་བཞིན་གཞན་རྣམས་ཀྱི་ནི་སྲོག་ཀྱང་བསྲུང་། །སྡུག་བསྔལ་མང་པོས་བསགས་པ་གཞན་གྱི་ནོར། །མ་བྱིན་དེ་ལ་ཡིད་ཀྱང་བསམ་མི་བྱ། །འཇིག་རྟེན་གྱིས་མཐོང་དགའ་དང་བྲལ་འགྱུར་ཞིང་། །གཞན་ཡང་དེ་བཞིན་ཕན་པར་གནས་པར་གྱིས། །གཞན་གྱི་བུད་མེད་རྒྱན་གྱིས་བརྒྱན་པ་དག །མེ་ལྕེ་འབར་བ་བཞིན་དུ་ཡོངས་སྤོངས་ལ། །རང་གི་ཆུང་མ་རྙེད་པས་ཆོག་པར་བྱོས། །འདོད་རྒྱུ་དུག་དང་འདྲ་བ་མ་སྤྱོད་ཅིག །རང་གི་དོན་དང་གཞན་གྱི་དོན་ཆེད་དུ། །སུས་ཀྱང་ཤེས་བཞིན་བརྫུན་ངག་མ་སྨྲ་བར། །གཞན་ལ་མི་གནོད་གཞན་ལ་མི་གདུང་བར། །བརྟགསཏེ་འཇམ་པོའི་ཚིག་གིས་སྨྲ་བར་གྱིས། །ཆང་འཐུང་བ་ལ་མངོན་པར་དགའ་བའི་མི། །བདག་ལ་ཕན་དང་གཞན་ལ་བདེ་མི་ནུས། །རྨོངས་དང་མདོག་ངན་བྱེད་པ་ཆང་ཡིན་ཏེ། །ཇི་ལྟར་ཧ་ལའི་དུག་བཞིན་དེ་མི་བཏུང་། །སྲོག་ཆགས་མི་གསོད་གཞན་གྱི་ནོར་མི་འཕྲོག །བརྫུནདུ་མི་སྨྲ་ཆང་ཡང་མི་བཏུང་ཞིང་། །གཞན་གྱི་ཆུང་མ་ཡིད་ལའང་མི་འདོད་པ། །མཐོ་རིས་གང་འདོད་ཁྱིམ་དུ་འཇུག་པ་བཞིན། །གོས་དཀར་གྱོན་པ་ཁྱིམ་པ་རྣམས་ཀྱིས་ནི། །ཁྱིམ་གནས་རྣམས་ཀྱི་བསླབ་པ་འདི་ཡིན་ཏེ། །རྒྱལ་བས་དེ་དག་རབ་ཏུ་བྱུང་རྣམས་ཀྱི། །བསླབ་གཞིའི་ཆོས་ནི་རབ་ཏུ་བསྟན་པ་ཡིན། །ཞེས་གསུངས་པ་ལྟར་གྱི་བསླབ་གཞི་ལྔ་པོ་གཏན་དུ་བླང་བའམ། མི་ནུས་ན་དུས་ཆེན་བཞིའམ། ཟླ་བ་བྱུང་ངོ་ཅོག་གི་ཉ་སྟོང་བརྒྱད་གསུམ་ལྟབུའི་དུས་ཆེན་གང་རུང་ལ། དུས་ཁྲིམས་བསྙེན་གནས་ཡན་ལག་བརྒྱད་པ་ཉིན་ཞག་གཅིག་ཙམ་དུ་བསྲུང་བའང་དོན་ཆེན་པོ་དང་ལྡན་པ་ཡིན་ཏེ། གནས་འཇོག་གི་མདོ་ལས། འདི་ལྟ་སྟེ་དཔེར་ན་འཛམ་བུའི་གླིང་ན་དགྲ་བཅོམ་པ། སེམས་ཤིན་ཏུ་རྣམ་པར་གྲོལ་བར་འགྱུར་བས་གང་བ་དེ་དག་ལ། གང་ལ་ལ་ཞིག་གིས་ཇི་སྲིད་འཚོའི་བར་དུ། ཨངྒ་དང་། ཀཱ་ཤི་ལ་སོགས་པའི་ཡུལ་ཆེན་པོ་དྲུག་ཅུ་པོ་རྣམས། རྡོ་རྗེ་དང་། ནོར་བུ་བཻཌཱུཪྱ་སོགས་རིན་པོ་ཆེའི་རིགས་རྣམ་པ་ཐམས་ཅད་ཀྱིས་བཀང་ནས། བརྩོན་འགྲུས་ཀྱི་སྟོབས་བསྐྱེད་ཅིང་འབུལ་བ་དང་། གཞན་ཡང་ཆོས་གོས་དང་ན་བའི་གསོས་སྨན་སོགས་ཡོ་བྱད་རྣམ་པར་སྣ་ཚོགས་ཀྱིས་བསྙེན་བཀུར་བྱས་པ་བས། གང་བསྙེན་གནས་ལན་གཅིག་ལ་གནས་ན། སྔ་མ་དེས་བསྙེན་གནས་ལས་གྱུར་པའི་བསོད་ནམས་བརྒྱ་ཡི་ཆ་དང་། སྟོང་གི་ཆ་དང་། དཔེ་དང་རྒྱུར་ཡང་མི་བཟོད་པ་དང་། རྒྱ་མཚོ་ཆེན་པོ་དང་། གངྒཱ་ལ་སོགས་ཆུ་ཀླུང་ཆེན་པོ་ལྔ་ཡི་གྲངས་བུམ་པས་བཟུང་བར་ནུས་ཀྱི་བསྙེན་གནས་ཀྱི་ཕན་ཡོན་ནི་ཚད་གཟུང་མི་ནུས་པ་དང་། བསྙེན་གནས་གཙང་མ་ལན་གཅིག་གིས་རྒྱལ་ཆེན་རིགས་བཞིའི་ལྷ། ལན་གཉིས་ཀྱིས་སུམ་ཅུ་རྩ་གསུམ། གསུམ་གྱིས་འཐབ་བྲལ། བཞིས་དགའ་ལྡན། ལྔས་འཕྲུལ་དགའ། ལན་དྲུག་གིས་གཞན་འཕྲུལ་དབང་བྱེད་ཀྱི་ལྷ་རྣམས་སུ་སྐྱེ་བར་གསུངས་པ་དང་། གདགས་པའི་མདོར། བསྙེན་གནས་ལན་གཅིག་གིས་བརྒྱ་བྱིན་དུ་སྐྱེ་བ་དང་། བྱང་ཆུབ་སེམས་དཔའི་སྡེ་སྣོད་སོགས་མདོ་སྡེ་མང་པོར་སྐྱེ་བ་ཀུན་ཏུ་ངན་འགྲོ་ལོག་པར་མི་ལྟུང་། སངས་རྒྱས་འབྱུང་བ་དང་འཕྲད། ཚུལ་ཁྲིམས་རྣམ་པར་དགདེའི་ཕྱིར་སྨོན་ལམ་གང་བཏབ་འགྲུབ་པ་སོགས་གསུངས་པ་དང་། ལྷས་ཞུས་པའི་མདོ་དང་རྟོགས་བརྗོད་གཉིས་ཀར། བཅུ་བཞི་དང་ནི་བཅོ་ལྔ་དང་། །ཚེས་བརྒྱད་དང་ནི་གནམ་སྟོང་ལ། །བསྙེན་གནས་ཡན་ལག་བརྒྱད་པ་བསྲུང་། །ང་ཉིད་ཅི་འདྲ་དེ་འདྲར་འགྱུར། །ཞེས་དབང་པོ་བརྒྱ་བྱིན། ཤཱརིའི་བུ། བཅོམ་ལྡན་འདས་གསུམ་གྱིས་རིམ་པར་གསུངས་པས། ལྷ་དབང་། དགྲ་བཅོམ། སངས་རྒྱས་ཀྱི་གོ་འཕང་རྣམས་ཐོབ་པར་བསྟན་པ་དང་། ཀུན་ཏུ་རྒྱུ་སེན་རིང་གིས་ཞུས་པའི་མདོ་ལས། སྲོག་གཅོད་སྤངས་པས་རྡོ་རྗེ་སྐུ་ཐོབ་སོགས་སོ་སོར་ཕན་ཡོན་རྒྱས་པར་གསུངས་པ་དང་། གནས་སྐབས་ཀྱི་འབྲས་བུའང་ཁང་བུ་བརྩེགས་པའི་མདོར། ནད་མཚོན་མུ་གེའི་བསྐལ་པ་ངན་པ་གསུམ་ལས་ཐར་པར་འགྱུར་བར་གསུངས་པས་མཚོན་ཕན་ཡོན་མཐའ་ཡས་ལ། དེ་ཉིད་ཐེག་ཆེན་གསོ་སྦྱོང་དང་འབྲེལ་བའམ། ལྷག་པར་སྨྱུང་གནས་ཀྱི་ཆོ་ག་དང་འབྲེལ་ན་ཕན་ཡོན་ཚད་མེད་དེ། འཕགས་པ་སྤྱན་རས་གཟིགས་དབང་ཕྱུག་ཉིད་སྙིགས་དུས་ཀྱི་གདུལ་བྱ་སྤྱི་དང་། ཁྱད་པར་བོད་ཁ་བ་ཅན་འདུལ་བའི་ལྷ་མཆོག་གཅིག་པུར་གྱུར་པས་བཀའ་དྲིན་བསམ་གྱིས་མི་ཁྱབ་ལ། སྤྱན་རས་གཟིགས་ཀྱི་མདོ་རྒྱུད་ཉེར་གཅིག་ཏུ་གྲགས་པ་སོགས་ལས། འཕགས་པ་འདིའི་མཚན་ཐོས་པ་ཙམ་གྱི་ཕན་ཡོན་ཡང་དཔག་ཏུ་མེད་པ་གསུངས་པ་ཐམས་ཅད་འདིར་སྨོས་ཀྱིས་མི་ལང་ལ། མདོར་སྡེ་ཟ་མ་ཏོག་བཀོད་པ་ལས། རིགས་ཀྱི་བུ་གང་ང་འདྲ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་སུ་གྱུར་ལ། དེ་དག་ཀྱང་གནས་གཅིག་ཏུ་བཞག་ཅིང་ན་བཟའ་དང་། བཤོས་དང་། མལ་སྟན་དང་། ན་བའི་གསོས་སྨན་དང་ཡོ་བྱད་རྣམས་ཀྱིས་བསྐལ་པར་མཆོད་ཀྱང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཕུང་པོ་བགྲང་མི་ནུས་ན། རིགས་ཀྱི་བུ་གང་ང་གཅིག་པུ་འཇིག་རྟེན་གྱི་ཁམས་འདི་ན་གནས་པས་ལྟ་ཅི་སྨོས། གང་འཇིག་རྟེན་ན་སྤྱན་རས་གཟིགས་ཀྱི་དབང་པོའི་མིང་དྲན་པ་དེ་དག་ནི་བདེ་བ་དང་ལྡན་པ་ཡིན་ནོ། །དེ་དག་ནི་རྒ་བ་དང་། ན་བ་དང་། འཆི་བ་དང་། སྡུག་བསྔལ་བ་ལས་ཡོངསསུ་ཐར་པ་ཡིན་ནོ། །དེ་དག་འཁོར་བའི་ཐ་མ་གཞན་མེད་པས་སྡུག་བསྔལ་ལས་ཐར་པར་འགྱུར་རོ། །དེ་དག་ནི་གོས་དཀར་པོ་དང་སྐྱ་བོ་བགོས་བཞིན་དུ་བྱ་ངང་པའི་རྒྱལ་པོ་མགྱོགས་པ་དང་རླུང་གི་ཤུགས་འོང་བ་བཞིན་དུ་བདེ་བ་ཅན་གྱི་ཁམས་སུ་དེ་བཞིན་གཤེགས་པ་སྣང་བ་མཐའ་ཡས་ལས་ཆོས་མངོན་དུ་ཉན་པའི་ཕྱིར་འགྲོའོ། །ཐོས་ནས་ཀྱང་དེ་དག་གི་ལུས་ལ་འཁོར་བའི་སྡུག་བསྔལ་མི་འབྱུང། འདོད་ཆགས་དང་། ཞེ་སྡང་དང་། གཏི་མུག་མི་འབྱུང་། རྒ་བ་དང། ཤི་བར་མི་འགྱུར། དེ་དག་གི་ལུས་ལ་བཀྲེས་པར་མི་འགྱུར། མངལ་ན་གནས་པའི་སྡུག་བསྔལ་བ་ཤེས་པར་མི་འགྱུར་ཏེ། ཆོས་ཀྱི་རོས་བསྐྱངས་ནས་དེ་ཉིད་དུ་པདྨའི་ནང་དུ་སྐྱེ་བར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡི་དམ་བརྟན་པོ་ཡོངས་སུ་རྫོགས་པ་དང་། སེམས་ཅན་ཐམས་ཅད་ཐར་པ་ལ་བཞག་གི་བར་དུ་འཇིག་རྟེན་གྱི་ཁམས་དེ་ན་རྟག་ཏུ་འཛིན་ཅིང་གནས་སོ། །ཞེས་སོགས་རྒྱ་ཆེར་གསུངས་པས་མཚོན་ཆེ་བའི་ཡོན་ཏན། མཛད་པའི་ཕྲིན་ལས། སྐྱོབ་པའི་ནུས་མཐུ་བསམ་གྱིས་མི་ཁྱབ་པའི་འཕགས་པ་དེ་ཉིད་ཀྱིས་ཐོག་མར་ཐུགས་བསྐྱེད་དམ་བཅའི་ཁྱད་པར་གྱིས་འབྲེལ་བ་བཞག་ན་མི་བསླུ་བའི་ཚུལ་ཕྱག་སྟོང་སྤྱན་སྟོང་གི་གཟུངས་སོགས་ལས་གསུངས་པ་དང་། སངས་རྒྱས་གཞན་ལས་ཀྱང་ཐུགས་རྗེ་ཆེ་བའི་ཚུལ་ཞལ་བཅུ་གཅིག་པའི་གཟུངས་དང་། རྒྱུད་པདྨ་དྲྭ་བ། མདོ་སྡེ་པད་དཀར་སོགས་ལས་གསུངས་པ་དང་། མདོ་སྔགས་གཉིས་ལས་སྔགས་ཀྱི་དཀྱིལ་འཁོར་འདི་ལྟ་བུར་ཞུགས་ནས་སྒྲུབ་པ་ཉིད་དངོས་གྲུབ་ཆེས་མྱུར་བས་འཕགས་པའི་ཚུལ་པདྨ་དྲྭ་བ་ལ་སོགས་པའི་རྒྱུད་སྡེ་མཐའ་ཡས་པ་ནས་གསུངས་པ་དང་། གཟུངས་རིང་ཐུང་བཟླས་པའི་ཕན་ཡོན་རྒྱུད་པད་དྲྭ་དང་ཞལ་བཅུ་གཅིག་པའི་གཟུངས་དང་། པདྨ་ཅོད་པན་སོགས་ལས་གསུངས་པ་དང་། ཡིག་དྲུག་བཟླས་པའི་ཕན་ཡོན་ཟ་མ་ཏོག་བཀོད་པ་སོགས་མདོ་རྒྱུད་དུ་མ་ནས་རྒྱ་ཆེར་གསུངས་པ་དང་། བླ་མ་རྣམས་ཀྱིས་མན་ངག་གི་ཚུལ་དུ་ཁ་བསྐང་བའི་གཟུངས་རྣམས་ཀྱི་ཕན་ཡོན་ཡིད་བཞིན་ནོར་བུ་འཁོར་ལོས་སྒྱུར་བའི་གཟུངས་སོགས་རང་རང་གི་གཞུང་དང་མདོ་བཏུས་སོགས་ལས་གསུངས་པ་དང་། ཆོ་ག་ཚུལ་བཞིན་དུ་བྱས་པའི་ཕན་ཡོན་པདྨ་དྲྭ་བ་དང་། ཆོ་ག་ཞིབ་མོ་དང་ཐོགས་པ་མི་མངའ་བའི་གཟུངས་སོགས་ལས་གསུངས་པ་དང་། བསྐྱེད་རྫོགས་བསྒོམས་པའི་ཕན་ཡོན་ཏིང་འཛིན་རྒྱལ་པོ་དང་། དེ་ཁོ་ན་ཉིད་བསྟན་པའི་མདོ་དང་། རྟོག་པ་ཆེན་མོ་དང་། དུས་འཁོར་རྩ་རྒྱུད་སོགས་ལས་གསུངས་པས་མཚོན་ཞིབ་པར་འདིར་ཡི་གེའི་ལམདུ་འདྲེན་མ་ནུས་པས་སྨྱུང་གནས་ཀྱི་ཕན་ཡོན་སྐལ་ལྡན་ངལ་གསོ་སོགས་དམ་པ་སྔ་མ་རྣམས་ཀྱི་གསུང་ལས་རྟོགས་པར་བྱ་ལ། འདིར་མདོར་བསྡུས་པ་རྒྱུ་སྡེའི་དགོངས་པ་བསྡུས་པའིསྨྱུང་གནས་ཕན་ཡོན་ཆེན་མོ་ལས། རིགས་ཀྱི་བུའམ། རིགས་ཀྱི་བུ་མོ་གང་གིས་སྨྱུང་བར་གནས་པ་ཚར་གཅིག་བྱས་ན་བསྐལ་པ་བཞི་ཁྲིའི་སྡིག་པ་དག་ཅིང་ལྷ་མིའི་མཆོག་དམ་པ་འཐོབ་པར་འགྱུར་རོ། །སྨྱུང་བར་གནས་པ་ལན་བརྒྱད་བྱས་ན་རྒྱུན་དུ་ཞུགས་པ་དང་ཆ་མཐུན་ཞིང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །ཉེར་ལྔ་བྱས་ན་ལན་གཅིག་ཕྱིར་འོང་བ་དང་ཆ་མཐུན་ཞིང་བསྐལ་པ་བརྒྱད་ཁྲིའི་སྡིག་པ་དག་པར་འགྱུར་རོ། །ལན་ལྔ་བཅུ་བྱས་ན་ཕྱིར་མི་འོང་བ་དང་ཆ་མཐུན་ཞིང་བསྐལ་པ་ཁྲི་ཕྲག་བརྒྱད་ཀྱི་སྡིག་པ་དག་པར་འགྱུར་རོ། །སྨྱུང་གནས་ཚར་བརྒྱ་རྩ་བརྒྱད་བྱས་ན་དགྲ་བཅོམ་པ་དང་མཚུངས་ཤིང་བསྐལ་པ་བྱེ་བ་ཕྲག་བརྒྱའི་སྡིག་པ་དང་སྒྲིབ་པ་ཐམས་ཅད་དག་པར་འགྱུར་རོ། །ངེས་པར་འཇིག་རྟེན་གྱི་ཁམས་བདེ་བ་ཅན་དུ་སངས་རྒྱས་ཚེ་དཔག་མེད་ཀྱི་ཞབས་དྲུང་དུ་སྐྱེ་བར་འགྱུར་རོ། །ཞེས་དང་། གཞན་ཡང་ལུས་སྨྱུང་བར་གནས་པས་སྲོག་བཅད་པ་སོགས་ལུས་ཀྱི་སྒོ་ནས་བསགས་པའི་སྡིག་པ་དགཡི་དྭགས་སུ་མི་སྐྱེ། ནད་གདོན་ཞི། གནས་སྐབས་གཟུགས་བཟང་གཟི་བརྗིད་ཆེ། མཐར་ཐུགས་མཚན་དཔེའི་སྐུ་ཐོབ། ངག་སྨྲ་བ་བཅད་པས་རྫུན་སོགས་ངག་སྒྲིབ་དགབྱོལ་སོང་དུ་མི་སྐྱེ། ནུས་པ་ཆེ། གནས་སྐབས་སུ་ཁ་ན་མ་ཐོ་བ་དང་ངག་འཁྱལ་མི་འབྱུང་ཞིང་ངག་ཚངས་དབྱངས་དང་ལྡན། མཐར་ཐུག་གསུང་དབྱངས་ཡན་ལག་དྲུག་ཅུ་ཐོབ། ཡིད་ཏིང་ངེ་འཛིན་ལས་མ་ཡེངས་པས་བརྣབ་སེམས་སོགས་ཡིད་ཀྱི་སྡིག་སྒྲིབ་དགདམྱལ་བར་མི་སྐྱེ། ཉམས་རྟོགས་འཆར། གནས་སྐབས་སུ་བློ་རྣོ་ཞིང་ཡིད་གཞུངས། ཆོས་ཀྱི་དོན་གོ །མཐར་ཐུག་ཡེ་ཤེས་ལྔ་ཐོབ། སྨྱུང་བར་གནས་པའི་ཚེ་རང་ལུས་ཚ་གྲང་ནད་ཀྱིས་ཉེན་ན་དམྱལ་བར་སྐྱེ་བའི་ལས་བྱང་། བཀྲེས་སྐོམ་ངལ་དུབ་ཀྱིས་ཐང་ཆད་ན་ཡིདྭགས་ཀྱི་སྐྱེ་སྒོ་ཆོད། གཉིད་རྨུགས་བྱིངས་འཐིབས་དྲན་པ་མི་གསལ་བའི་ཚེ་བློ་གསེང་བསྟོད་པས་བྱོལ་སོང་དུ་མི་སྐྱེ། ཡང་སྐྱེས་པ་རྣམས་ཀྱིས་འདིའི་སྨྱུང་གནས་ལན་གཅིག་བྱས་པས་བདེ་བ་ཅན་{དུ་ཞུ་མཆན།} སྐྱེ། བུད་མེད་རྣམས་ཀྱིས་ལན་གཅིག་བྱས་པས་འཁོར་བ་ལ་རྒྱབ་ཀྱིས་ཕྱོགས་ཏེ་ས་དང་པོའི་ཡོན་ཏན་ཐོབ། སྨྱུང་གནས་སྔོན་འགྲོ་གདན་གཅིག་གི་ཉིན་མི་གཅིག་ལ་འཚོ་བ་དྲངས་ན་ས་བརྒྱད་པའི་བྱང་སེམས་ལ་འཚོ་བ་དྲངས་པ་དང་བསོད་ནམས་མཉམ་ཞིང་། སྨྱུང་གནས་ཚར་བའི་ཕྱིར་ནང་མི་གཅིག་ལ་འཚོ་བ་དྲངས་ཀྱང་རང་སངས་རྒྱས་ལྔ་བརྒྱ་ལ་དྲངས་པ་དང་འདྲ། གསོ་སྦྱོང་བླངས་པ་ཙམ་ལ་དྲངས་ན་དགྲ་བཅོམ་པ་ལ་དྲངས་པའི་ཕན་ཡོན་ཐོབ་པ་དང་། སྦྱིན་བདག་དེ་ངན་སོང་གསུམ་དང་། ནད་མཚོན་མུ་གེའི་བསྐལ་པར་ནམ་ཡང་མི་སྐྱེ་ཞིང་། ཚེ་རབས་ཐམས་ཅད་དུ་བདེ་སྐྱིད་ཕུན་སུམ་ཚོགས། བྱང་ཆུབ་ཀྱི་སེམས་རྒྱུད་ལ་འཁྲུངས་པ་སོགས་ཕན་ཡོན་མང་པོ་འབྱུང་བར་བྱང་སེམས་ཟླ་རྒྱལ་གྱིས་གསུངས་སོ། །དེར་མ་ཟད་སངས་རྒྱས་རེ་རེའི་མཚན་དང་། གཟུངས་སྔགས་རེ་རེའི་ཕན་ཡོན་ཡང་བསམ་གྱིས་མི་ཁྱབ་སྟེ། སངས་རྒྱས་ཤཱཀྱ་ཐུབ་པའི་མཚན་ཐོས་ན་བསྐལ་ཆེན་བརྒྱད་ཁྲིའི་སྡིག་པ་བྱང་བ་དང་། སྔགས་མུ་ནེ་ལན་གཅིག་བཟླས་ན་བསྐལ་པ་བྱེ་བ་བརྒྱ་ཕྲག་བརྒྱད་ཁྲིའི་བར་དུ་བྱས་པའི་སྡིག་པ་དག་པར་གསུངས་པས་མཚོན་ཞིབ་པར་ཀུན་གཟིགས་འཇམ་པའི་རྡོ་རྗེའི་ཞལ་སྔ་ནས་བསྩལ་པའི་མཚན་འབུམ་དང་གཟུངས་འབུམ་སོགས་ལས་ཤེས་པར་བྱའོ། །སྤྱིར་ཡང་ཟུང་གི་མདོ་ལས། གང་དག་ང་ཡི་བསྟན་པ་ལ། །སྦྱིན་པ་སྐྲ་ཙམ་བྱིན་པ་ནི། །བསྐལ་པ་སྟོང་ཕྲག་བརྒྱད་བཅུ་རུ། །ལོངས་སྤྱོད་ཆེ་ཞིང་ནོར་ཡང་མང་། །ཞེས་སོགས་སྦྱིན་པའི་ཕན་ཡོན་རྒྱ་ཆེར་འབྱུང་མོད། དེ་ལས་བསྟན་པ་ནུབ་ཀ་དེང་སང་ལྟ་བུར་བསླབ་པ་སྣེ་གཅིག་ཙམ་བསྲུང་བའམ། སེམས་ཀྱི་ཉོན་མོངས་ཅུང་ཟད་རེ་བཅོམ་ནུས་ན་ཕན་ཡོན་ཆེ་སྟེ། ཏིང་འཛིན་རྒྱལ་པོ་ལས། བསྐལ་པ་བྱེ་བ་གདྒཱའི་བྱེ་སྙེད་དུ། །དད་པའི་སེམས་ཀྱིས་ཟས་དང་སྐོམ་རྣམས་དང་། །གདུགས་དང་བ་དན་མར་མེའི་ཕྲེང་བ་ཡིས། །སངས་རྒྱས་བྱེ་བ་ཁྲག་ཁྲིག་རིམ་གྲོ་བྱས། །གང་གིས་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་འགགས་པར་གྱུར་པའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །དེ་ནི་དེ་ལས་བསོད་ནམས་ཁྱད་པར་འཕགས། །ཞེས་དང་། རིན་ཆེན་ཕྲེང་བ་ལས། རྗེ་ཚོད་སུམ་བརྒྱའི་ཁ་བཟས་ཀྱིས། །ཉིན་རེ་དུས་གསུམ་བྱིན་པ་བས། །བྱམས་པ་སྐད་ཅིག་བསྒོམ་པ་མཆོག །ཅེས་གསུངས། དེར་མ་ཟད་སྦྱིན་པ་ནས་ཤེས་རབ་ཀྱི་བར་གྱི་ཕར་ཕྱིན་དྲུག་པོ་དེའང་། སྦྱིན་པས་ལུས་ལོངས་སྤྱོད་ལ་མི་ལྟ་ན་ཚུལ་ཁྲིམས་ལེན་པ་དང་། དགེསྦྱོང་གི་ཆོས་བཞི་དང་ལྡན་པས་བཟོད་པ་འབྱུང་བ་སོགས་སྔ་མ་སྔ་མ་རྣམས་རྒྱུ་དང་། ཕྱི་མ་ཕྱི་མ་རྣམས་འབྲས་བུ་ཡིན་པའི་ཕྱིར་དང་། ཚུལ་ཁྲིམས་ཀྱི་གཏམ་ལས། རྒྱ་མཚོ་དང་ནི་གླང་རྗེས་ཀྱི། །ཁྱད་པར་དག་ནི་གང་ཡིན་པ། །སྦྱིིན་པ་དང་ནི་ཚུལ་ཁྲིམས་ཀྱི། །ཁྱད་པར་དག་ནི་དེ་ཡིན་ནོ། །གང་ཞིག་དད་པའི་སེམས་ཀྱིས་ནི། །ལོ་བརྒྱར་སྦྱིིན་པ་བྱིན་པ་བས། །གང་ཞིག་ཉིན་གཅིག་ཚུལ་ཁྲིམས་ནི། །བསྲུང་བ་དེ་ལས་ཁྱད་པར་འཕགས། །ཞེས་དང་། སྤྱོད་འཇུག་ལས། ཞེ་སྡང་ལྟ་བུའི་སྡིག་པ་མེད། །བཟོད་པ་ལྟ་བུའི་དཀའ་ཐུབ་མེད། །དེ་བས་བཟོད་ལ་ནན་ཏན་དུ། །སྣ་ཚོགས་ཚུལ་གྱིས་བསྒོམ་པར་བྱ། །ཞེས་གསུངས་པ་སོགས་ཀྱིས་མཚོན་སྔ་མ་རྣམས་དམན་ཞིང་ཕྱི་མ་རྣམས་མཆོག་ཡིན་པའི་ཕྱིར་དང་། སྦྱིན་པ་ཤན་པ་རྣམས་དང་ནི། །རིགས་ནང་དག་ཀྱང་སྦྱིན་པར་བྱེད། །གང་ཡང་རུང་བས་ཚུལ་ཁྲིམས་ནི། །ཡོངསསུ་བསྲུང་བར་མི་ནུས་སོ། །ཞེས་སོགས་གསུངས་པ་བཞིན་སྔ་མ་རྣམས་རགས་པའམ་སྒྲུབ་སླ་བ་དང་། ཕྱི་མ་རྣམས་ཕྲ་བའམ་སྒྲུབ་དཀའ་བར་དགོངས་ནས་གོ་རིམ་ཀྱང་དེ་ལྟར་དུ་མཛད་དེ། མདོ་རྒྱན་ལས། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང་། །རགས་པ་དང་ནི་ཕྲ་བའི་ཕྱིར། །དེ་དག་རིམ་བཞིན་བསྟན་པ་ཡིན། །ཞེས་གསུངས། མདོར་ན། རྒྱལ་སྲས་ཞི་བ་ལྷས། སྦྱིན་པའི་ཕ་རོལ་ཕྱིན་ལ་སོགས། །གོང་ནས་གོང་དུ་ཁྱད་ཞུགསསྤྱད། །ཆུང་ངུའི་ཕྱིར་དུ་ཆེ་མི་བཏང་། །གཙོ་ཆེར་གཞན་གྱི་དོན་བསམ་མོ། །ཞེས་གསུངས་པ་ལྟར་གོང་མ་གོང་མ་རྣམས་དང་གཙོ་བོར་གཞན་དོན་དུ་གང་འགྱུར་བ་དེ་སྤྱད་པར་བྱ་ཞིང་། ཕར་ཕྱིན་དྲུག་པོ་དེའང་ངོ་བོ་ཁྱད་ཆོས་བཞི་ལྡན་ཏེ། འགའ་ཟླར་རང་རང་གི་མི་མཐུན་པའི་ཕྱོགས་རྣམས་དང་བྲལ་བ། གྲོགས་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པ། བྱེད་ལས་གཞན་གྱི་རེ་བ་རྫོགས་པར་བྱེད་ནུས་པ། ཐབས་དེས་གདུལ་བྱའི་རྒྱུད་བྱང་ཆུབ་གསུམ་གང་རུང་དུ་སྨིན་པར་བྱེད་པ་ཡིན་ཏེ། རྒྱན་ལས། སྦྱིན་པས་མི་མཐུན་ཕྱོགས་ཉམས་དང་། །རྣམ་པར་མི་རྟོག་ཡེ་ཤེས་ལྡན། །འདོད་པ་ཐམས་ཅད་ཡོངས་རྫོགས་བྱེད། །སེམས་ཅན་རྣམས་སྨིན་བྱེད་རྣམ་གསུམ། །ཞེས་གསུངས། ངེས་ཚིག་ནི། སྲིད་ཞིའི་དགེ་བ་ཐམས་ཅད་ལས་ཕུལ་དུ་བྱུང་བར་སོང་བས་ན་ཕ་རོལ་དུ་ཕྱིན་པ་ཞེས་བྱ། བྱེ་བྲག་དབུལ་བར་འདོར་བར་བྱེད་པ་སོགས་ཀྱིས་ཏེ། དབུལ་བ་འདོར་བར་བྱེད་པ་དང་། བསིལ་བ་ཐོབ་དང་ཁྲོ་བཟོད་དང་། མཆོག་སྦྱོར་བ་དང་ཡིད་འཛིན་དང་། དོན་དམ་ཤེས་པའི་ཕྱིར་བཤད་དོ། །ཞེས་གསུངས། དབྱེ་ན་གོ་སྒྲུབ་ཀྱི་སྐབས་ལྟར་རེ་རེའང་དྲུག་རེར་དབྱེ་བས་སོ་དྲུག་གམ། ཡང་ན། སྦྱིིན་པ་ལ། ཟང་ཟིང་། ཆོས། མི་འཇིགས་པ་སྐྱབས་ཏེ་གསུམ་ཚུལ་ཁྲིམས་ལ་སྡོམ་སྡུད་དོན་བྱེད་གསུམ། བཟོད་པ་ལ། གནོད་བྱེད། སྡུག་བསྔལ། ངེས་སེམས་ཀྱི་བཟོད་པ་སྟེ་གསུམ། བརྩོན་འགྲུས་ལ། གོ་ཆ། སྦྱོར་བ། ཆོག་པར་མི་འཛིན་པ་སྟེ་གསུམ། བསམ་གཏན་ལ། བྱིས་པ་ཉེར་སྤྱོད། དོན་རབ་འབྱེད་པ། དེ་བཞིན་གཤེགས་དགེ་གསུམ། ཤེས་རབ་ལ་ཐོས་བསམ་སྒོམ་གསུམ་སོགས་སུ་དབྱེ་བས་བཅོ་བརྒྱད་དོ། །བསྡུ་ན་རྒྱུ་དང་ངོ་བོ་དང་ཁྱད་པར་གྱི་སྒོ་ནས་སྔ་མ་གསུམ་ཚུལ་ཁྲིམས་དང་། ཕྱི་མ་གཉིས་རེ་རེ། བརྩོན་འགྲུས་ཀུན་གྱི་གྲོགས་སུ་འགྲོ་བས་བསླབ་པ་གསུམ་དུ་འདུ་སྟེ། བསླབ་གསུམ་དབང་དུ་མཛད་ནས་ནི། །རྒྱལ་བས་ཕ་རོལ་ཕྱིན་པ་དྲུག །ཡང་དག་བཤད་དེ་དང་པོ་གསུམ། །ཐ་མ་གཉིས་ཀྱི་རྣམ་པ་གཉིས། །གཅིག་ནི་གསུམ་ཆར་ལ་ཡང་གཏོགས། །ཞེས་གསུངས་ཤིང་། དེ་ཡང་བསྡུ་ན་བསོད་ནམས་དང་ཡེ་ཤེས་ཀྱི་ཚོགས་གཉིས་སུ་འདུའོ། །སྒྲུབ་ཚུལ་ཡང་། ལན་དང་རྣམ་སྨིན་ལ་མི་རེ་བའི་སྒོ་ནས་སྦྱིན་པ་གཏོང་། ཡང་སྲིད་བདེ་འགྲོ་ལ་རེ་སྨོན་དང་བྲལ་བའི་ཚུལ་ཁྲིམས་བསྲུང་། སེམས་ཅན་ཐམས་ཅད་ལ་ཞེ་འགྲས་པ་མེད་པའི་བཟོད་པ་བསྒོམ། རང་གཞན་གྱི་དགེ་ཆོས་མཐའ་དག་སྡུད་པ་ལ་ངང་གིས་སྤྲོ་བའི་བརྩོན་འགྲུས་བརྩམ། བསམ་གཟུགས་ཀྱི་སྙོམས་འཇུག་ལས་འདས་པའི་བསམ་གཏན་ལ་མཉམ་པར་འཇོགསྙིང་རྗེའི་ཐབས་དང་མ་བྲལ་བའི་ཤེས་རབ་སྒྲུབ་པར་བྱེད་པ་སྟེ། རེ་བ་མེད་པའི་སྦྱིིན་པ་དང་། །ཡང་སྲིད་མི་འདོད་ཚུལ་ཁྲིམས་དང་། །ཐམས་ཅད་ལ་ནི་བཟོད་པ་དང་། །ཡོན་ཏན་ཀུན་སྡུད་བརྩོན་འགྲུས་དང་། དེ་བཞིན་བསམ་གཏན་གཟུགས་མེད་མིན། །ཤེས་རབས་ཐབས་དང་ལྡན་པ་ཡིས། །ཕ་རོལ་ཕྱིན་པ་དྲུག་པོ་ལ། །བརྟན་པ་རྣམས་ཀྱི་ཡང་དག་སྦྱོར། །ཞེས་གསུངས། དེ་ཐམས་ཅད་ཀྱང་མི་མཐུན་ཕྱོགས་ཆགས་བདུན་གྱི་དྲི་མས་མ་གོས་ཤིང་། མཐུན་ཕྱོགས་དམ་པ་དྲུག་གམ་བཅུ་གཉིས་དང་ལྡན་པས་ཉམས་སུ་བླང་དགོས་ཏེ། ཆགས་བདུན་ནི། སེརསྣ་འཆལ་ཚུལ་ཁོང་ཁྲོ་སོགས་རང་རང་གི་མི་མཐུན་ཕྱོགས་རྣམས་དང་། ཕྱི་བཤོལ་དང་། ཅུང་ཟད་ཙམ་གྱིས་ཆོག་པར་འཛིན་པ་དང་། ཚེ་འདིའི་ལན་ལ་རེ་བ་དང་། ཕྱི་མའི་རྣམ་སྨིན་ལ་རེ་བ་དང་། མི་མཐུན་ཕྱོགས་ཀྱི་ས་བོན་བག་ལ་ཉལ་དང་། དམན་ལམ་ཡིད་བྱེད་དམ་འཁོར་གསུམ་དུ་རྟོག་པའི་རྣམ་གཡེང་རྣམས་ལ་ཆགས་པ་ཡིན་པས་དེ་དག་གིས་མ་གོས་པ་བྱ་དགོས་ཏེ། བྱང་ཆུབ་སེམས་དཔའི་སྦྱིན་པ་ནི། །མ་ཆགས་མི་ཆགས་ཆགས་པ་མེད། །ཆགས་པ་ཉིད་ཀྱང་མ་ཡིན་ལ། །མ་ཆགས་མི་ཆགས་ཆགས་པ་མེད། །ཅེས་གསུངས། མཐུན་ཕྱོགས་དམ་པ་དྲུག་ནི། རྟེན་དམ་པ་བྱང་ཆུབ་ཀྱི་སེམས་དང་ལྡན་པ། དངོས་པོ་དམ་པ་སྦྱིན་སོགས་ཕྱོགས་རེ་ཙམ་མ་ཡིན་པར་གཞིའམ་དངོས་པོ་ཐམས་ཅད་ལ་འཇུག་པ། ཆེད་དུ་བྱ་བ་དམ་པ་སེམས་ཅན་ཐམས་ཅད་ཀྱི་དོན་དུ་སྦྱོར་བ། ཐབས་དམ་པ་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པ། བསྔོ་བ་དམ་པ་བླ་ན་མེད་པའི་བྱང་ཆུབ་ཏུ་འདུན་པ་བསྒྱུར་བ། རྣམ་པར་དག་པ་དམ་པ་སྒྲིབ་གཉིས་ཀྱི་དངོས་གཉེན་དུ་སྤྱོད་པ་སྟེ་དྲུག་གོ །བཅུ་གཉིས་ནི། དབུས་མཐའ་ལས། རྒྱ་ཆེ་བ་དང་ཡུན་རིང་དང་། །ཆེད་དུ་བྱ་དང་མི་ཟད་དང་། །རྒྱུན་མི་འཆད་དང་ཚེགས་མེད་དང་། །དབང་འབྱོར་བ་དང་ཡོངས་བཟུང་དང་། །རྩོམ་དང་ཐོབ་དང་རྒྱུ་མཐུན་དང་། །འགྲུབ་པ་དམ་པར་ཡོད་པ་ཡིན། །ཞེས་གསུངས་པས། རྒྱ་ཆེ་བ་དམ་པ་འཇིག་རྟེན་གྱི་ཕུན་སུམ་ཚོགས་པ་ཐམས་ཅད་བས་མཆོག་ཏུ་གྱུར་བའི་བྱང་ཆུབ་ཆེན་པོ་འདོད་པ། ཡུན་རིང་བ་དམ་པ་བསྐལ་པ་གྲངས་མེད་གསུམ་སོགས་སུ་བསྒོམ་པ། ཆེད་དུ་བྱ་བ་དམ་པ་སེམས་ཅན་ཐམས་ཅད་ཀྱི་དོན་བྱེད་པའི་ཆེད་དུ། ཟད་མི་ཤེས་པ་དམ་པ་བྱང་ཆུབ་ཆེན་པོར་ཡོངས་སུ་བསྔོས་པས་གཏན་དུ་ཟད་མི་ཤེས་པ། རྒྱུན་མི་འཆད་པ་དམ་པ་བདག་གཞན་མཉམ་ཉིད་དུ་མོས་པས་སེམས་ཅན་ཐམས་ཅད་ཀྱི་ཕྱིན་དྲུག་རྫོགས་པ། ཚེགས་མེད་པ་དམ་པ་གཞན་གྱི་སྦྱིིན་སོགས་ལ་རྗེས་སུ་ཡི་རང་བ་ཙམ་གྱིས་ཕར་ཕྱིན་རྫོགས་པར་བྱེད་པ། དབང་འབྱོར་པ་དམ་པ་ནམ་མཁའ་འཛོད་ཀྱི་ཏིང་ངེ་འཛིན་སོགས་ཐོབ་ནས་སྦྱིན་སོགས་རྫོགས་པར་བྱེད་པ་ལ་དབང་འབྱོར་པ། ཡོངས་སུ་བཟུང་བ་དམ་པ་རྣམ་པར་མི་རྟོག་པའི་ཡེ་ཤེས་ཀྱིས་བཟུང་བ། རྩོམ་པ་དམ་པ་མོས་སྤྱོད་ཀྱི་ས་ལ་བཟོད་པ་ཆེན་པོར་གྱུར་པ། ཐོབ་པ་དམ་པ་ས་དང་པོ། རྒྱུ་མཐུན་དམ་པ་ས་གཉིས་པ་ནས་དགུ་པའི་བར། འགྲུབ་པ་དམ་པ་ས་བཅུ་པ་དང་དེ་བཞིན་གཤེགས་བའི་ས་ལ་བྱང་ཆུབ་སེམས་དཔའི་ས་མཐར་ཐུག་པ་དང་སངས་རྒྱས་ཀྱི་ས་འགྲུབ་པ་སྟེ་བཅུ་གཉིས་པོ་དེ་དང་ལྡན་པ་ནི་ཐེག་དམན་སོགས་ལས་ཁྱད་པར་དུ་གྱུར་པའི་ཐེག་ཆེན་ལམ་གྱི་ཕར་ཕྱིན་མཚན་ཉིད་པ་སྟེ། བཤད་སྦྱར་ལས། བསེ་རུ་ལྟ་བུ་རྣམས་ལ་ནི། །ཕ་རོལ་ཕྱིན་དྲུག་མིང་ཡང་མེད། །བཅོམ་ལྡན་ཉག་གཅིག་ཕ་རོལ་ཕྱིན། །དྲུག་གི་སྤྱི་ལ་བཞུགས་པ་ལགས། །ཞེས་གསུངས། ཕན་ཡོན་གྱིི་ཁྱད་པར་ཡང་། རྒྱ་ཆེ་བ་དང་ཟང་ཟིང་མེད་པ་སོགས་ཀྱི་ཡོན་ཏན་སྔར་བཤད་པ་བཞི་དང་། མི་ཕོངས་པ་དང་རྣམ་པར་མི་འཚེ་དང་། །རྣམ་འཚེ་བཟོད་དང་བྱ་བས་མི་སྐྱོ་དང་། །དགའ་བྱེད་ལེགས་པར་བརྗོད་པ་དེ་ཡི་ཕྱིར། །གཞན་གྱི་དོན་ཉིད་རང་གི་དོན་ཡིན་ནོ། །ཞེས་དངོས་སུ་གཞན་དོན་བྱས་པའི་ཞལ་ལ་རང་དོན་འགྲུབ་པའི་ཁྱད་པར་མདོ་རྒྱན་ལས་གསུངས་པ་དང་། རིན་ཆེན་ཕྲེང་བ་ལས། སྦྱིན་པས་ལོངས་སྤྱོད་ཁྲིམས་ཀྱིས་བདེ། །བཟོད་པས་གཟུགས་བཟང་བརྩོན་པས་བརྗིད། །བསམ་གཏན་གྱིས་ཞི་བློ་ཡིས་གྲོལ། །སྙིང་བརྩེ་བས་ནི་དོན་ཀུན་འགྲུབ། །ཅེས་གནས་སྐབས་སོ་སོའི་རྒྱུ་མཐུན་གྱི་འབྲས་བུ་ཕན་ཡོན་བསྟན་པ་དང་། སངས་རྒྱས་རྣམས་ཀྱི་གཟུགས་ཀྱི་སྐུ། །བསོད་ནམས་ཚོགས་ལས་ཡང་དག་འཁྲུངས། །ཆོས་ཀྱི་སྐུ་དེ་མདོར་བསྡུས་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་བསོད་ནམས་ཀྱི་ཚོགས་མཐར་ཕྱིན་པ་ལས་སྨིན་འབྲས་གཟུགས་ཀྱི་སྐུ་དང་། ཡེ་ཤེས་ཀྱི་ཚོགས་མཐར་ཕྱིན་པ་ལས་བྲལ་འབྲས་ཆོས་ཀྱི་སྐུ་མངོན་སུམ་དུ་བྱེད་པར་གསུངས་པས་མཐར་ཐུག་གི་ཕན་ཡོན་བསྟན་པས་མཚོན་མཐའ་ཡས་མོད། འདི་དག་གི་རྣམ་བཞག་རྒྱས་པ་ནི་མདོ་སྡེ་རིན་པོ་ཆེ་རྣམས་དང་། རྒྱན་དང་ཐེག་བསྡུས་སོགས་དགོངས་འགྲེལ་བསྟན་བཅོས་རྣམས་ལས་ཤེས་པར་བྱ་བ་ལས་འདིར་མ་སྤྲོས་སོ། །མདོར་ན། བྱང་ཆུབ་སེམས་འགྲེལ་ལས། གཞན་དོན་ལས་ལ་མཐུ་མེད་ཀྱང་། །དེ་ཡི་བསམ་པ་རྟག་ཏུ་བྱ། །གང་ལ་བསམ་པ་དེ་ཡོད་པ། །དེ་ནི་དེ་ལ་དོན་གྱིས་ཞུགས། །ཞེས་གསུངས་པ་ལྟར་རྟག་ཏུ་གཞན་ཕན་གྱི་བསམ་པ་མི་འདོར་བ་དང་། རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ་ཁྱོད་ནི་འདི་ལྟར་བྱ་བ་མང་བ། བྱེད་པ་མང་བ་སྟེ་ཐམས་ཅད་ཀྱིས་ཐམས་ཅད་དུ་སྦྱིན་པ་ནས་ཤེས་རབ་ཀྱི་ཕ་རོལ་དུ་ཕྱིན་པའི་བར་ལ་བསླབ་པར་མི་ནུས་ཀྱི། དེ་བས་རྒྱལ་པོ་ཆེན་པོ་ཁྱོད། ཡང་དག་པར་རྫོགས་པའི་བྱང་ཆུབ་ཏུ་འདུན་པ་དང་། དད་པ་དང་། དོན་དུ་གཉེར་བའི་སྨོན་པ་གསུམ་འགྲོ་ཡང་རུང་། འདུག་ཀྱང་རུང་། ཉལ་ཡངརུང་། སད་ཀྱང་རུང་ཟ་ཡང་རུང་བཏུང་ཡང་རུང་། རྟག་པར་རྒྱུན་དུ་དྲན་པས་ཡིད་ལ་བཟུངསྟེ་སྒོམས་ཤིགགཞན་གྱི་དགེ་བ་ལ་རྗེས་སུ་ཡི་རང་བར་གྱིས་ཤིགརྗེས་སུ་ཡི་རང་ནས་ཀྱང་། སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་ཐམས་ཅད་ལ་ཕུལ་ཅིགཕུལ་ནས་སེམས་ཅན་ཐམས་ཅད་དང་ཐུན་མོང་དུ་གྱིས་ཤིགདེ་ནས་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ཡོངས་སུ་རྫོགས་པར་འགྱུར་བར་ཉིན་གཅིག་བཞིན་དུ་བླ་ན་མེད་པའི་བྱང་ཆུབ་ཏུ་བསྔོས་ཤིགརྒྱལ་པོ་ཆེན་པོ་དེ་ལྟར་ན་རྒྱལ་སྲིད་ཀྱང་བྱེད་ལ། རྒྱལ་པོའི་བྱ་བའང་ཉམས་པར་མི་འགྱུར་ལ། བྱང་ཆུབ་ཀྱི་ཚོགས་ཀྱང་ཡོངས་སུ་རྫོགས་པར་འགྱུར་རོ། །ཞེས་ལས་དང་པོ་པ་ལ་བསླབ་བྱ་རྣམས་བསྡུས་ཏེ་བཀའ་སྩལ་པས་མཚོན་མདོ་སོགས་ནས་ཇི་སྐད་གསུངས་པ་བཞིན་ཕར་ཕྱིན་དྲུག་གམ་བསླབ་པ་གསུམ་མམ་ཚོགས་གཉིས་ཀྱིས་བསྡུས་པའི་རྒྱལ་བའི་སྲས་ཀྱི་སྤྱོོད་པ་རྒྱ་མཚོ་ལྟ་བུ་ལ་རང་ནུས་གང་ཡོད་ཀྱིས་འབད་པས་བསླབ་པར་བྱ་བ་ནི་སྒྲུབ་པ་བླ་ན་མེད་པའི་མཆོད་པ་ཡིན་ཏེ། སྒོ་མཐའ་ཡས་པ་རྣམས་པར་སྦྱང་བའི་མདོ་ལས། ཚངས་པ་གསུམ་པོ་འདི་ནི་དེ་བཞིན་གཤེགས་པ་ལ་མཆོད་པ་དང་། རིམ་གྲོ་བླ་ན་མེད་པའོ། །བསོད་ནམས་ཚད་མེད་པ་འབྱུང་བའོ། །གསུམ་གང་ཞེ་ན། གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང་། དེ་བཞིན་གཤེགས་པ་རྣམས་ཀྱི་དམ་པའི་ཆོས་འཛིན་པ་དང་། གང་ཇི་ལྟར་ཐོས་པ་རྣམས་དེ་བཞིན་དུ་བསྒྲུབ་པ་སྟེ། ཚངས་པ་གསུམ་པོ་དེ་དག་ནི་དེ་བཞིན་གཤེགས་པ་ལ་མཆོད་པ་དང་། རིམ་གྲོ་བླ་ན་མེད་པའོ། །ཚངས་པ་གལ་ཏེ་དེ་བཞིན་གཤེགས་པ་སྐུ་ཚེའི་ཚད་བསྐལ་པར་བཞུགས་པས་མཆོད་པའི་དངོས་པོ་གསུམ་པོ་འདི་དག་གི་བསོད་ནམས་ཀྱི་རྣམ་པར་སྨིན་པ་བསྐལ་པའི་བར་དུ་བསྟན་ཀྱང་རྫོགས་པར་མི་འགྱུར་རོ། །ཞེས་གསུངས་པ་བཞིན་ཤེས་བར་བྱའོ། །གཞན་ཡང་རིན་པོ་ཆེ་ཕུང་པོའི་མདོར། སྟོང་གསུམ་གྱི་སེམས་ཅན་ཐམས་ཅད་འཁོར་ལོས་སྒྱུར་རྒྱལ་ཤ་སྟག་ཏུ་གྱུར་ནས། དེ་རེ་རེས་ཀྱང་རྒྱ་མཚོའི་མར་ཁུ། རི་རབ་ཀྱི་སྡོང་བུ་བྱས་ནས་དེ་བཞིན་གཤེགས་པའི་མཆོད་རྟེན་ལ་མར་མེ་ཕུལ་བ་བས། ཁྱིམ་ནས་རབཏུ་བྱུང་བའི་སྡོམ་ལྡན་ཞིག་གིས་ཡུངས་འབྲུ་ཙམ་གྱིས་བསྐུས་པའི་མར་མེའི་སྡོང་བུ་ཕུལ་ན་བསོད་ནམས་ཆེ་བ་དང་། འཁོར་ལོས་སྒྱུར་བ་དེ་དག་རེ་རེས་འཛམ་བུའི་གླིང་ཐམས་ཅད་མེ་ཏོག་གིས་བཀང་སྟེ་ཕུལ་བ་བས། རབ་ཏུ་བྱུང་བས་མེ་ཏོག་གཅིག་ཕུལ་ན་བསོད་ནམས་དེ་ལ། བསོད་ནམས་སྔ་མ་དེས་རྒྱ་ཡི་ཆ་དང་སྟོང་གི་ཆར་ཡང་ཉེ་བར་མི་འགྲོ་བ་ནས་རྒྱའི་བར་དུ་ཡང་མི་བཟོད་པར་གསུངས་པ་དང་། གསལ་རྒྱལ་གྱི་མདོ་ལས། མི་རྣམས་གང་དག་དགེ་བའི་སེམས་ལྡན་པས། །རྒྱལ་བའི་མཆོད་རྟེན་གཞན་གྱིས་བྱས་པ་ལ། །རྗེས་སུ་ཡི་རང་དོན་དེ་མ་བྱས་ཀྱང་། །མདོར་ན་དེ་དག་གིས་ཀྱང་བྱས་པར་འགྱུར། །ཞེས་རང་གིས་དངོས་སུ་བྱས་པ་མེད་ཀྱང་གཞན་གྱིས་བྱས་པ་ལ་རྗེས་སུ་ཡི་རང་བར་བྱས་ན་དེའི་ཕན་ཡོན་མཉམ་དུ་ཐོབ་པར་གསུངས་སོ། །གཞན་ཡང་ཤེས་པར་བྱ་བ། ལྷ་ཁང་དང་མཆོད་རྟེན་གྱི་ཡོ་བྱད་ཇི་ཙམ་དུ་ཆེ་ཡང་དགེ་སློང་རང་གི་མས་ཏིལ་ཙམ་སྤྱད་པ་ལྟ་ཅི་སྨོས་ཏེ། དགེ་འདུན་ལ་ཡང་ཕྲ་མོ་ཙམ་བསྔོ་མི་རུང་བ་དང་། ཞིག་རལ་དུ་གྱུར་ན་དགེ་སློང་གི་རྙེད་པ་ལས་ཕྲིས་ཏེ་གསོ་བར་བྱ་བ་དང་། དགེ་སློང་གི་ཞལ་ཏ་པས་དགེ་སློང་གི་དཀོར་རྫས་སྦས་ན་ཉི་ཚེ་བའི་སེམས་ཅན་དམྱལ་བ་ཕུར་བུ་མང་པོ་ཞེས་བྱ་བར་སྐྱེས་ནས་སྡུག་བསྔལ་ཆེན་པོར་མྱོང་བར་འགྱུར་བ་སོགས་ཞལ་ཏ་བའི་བླང་དོར་ཞིབ་པར་དཀོན་བརྩེགས་ལེའུ་ཞེ་བཞི་པའི་བྱེ་བྲག་རིན་ཆེན་ཕུང་པོའི་མདོར་གསུངས་པས་ཞིབ་པར་དེར་བལྟ་བར་བྱ་བ་དང་། རྒྱ་མཚོསཞུས་པའི་མདོ་ལས། སྤུ་གྲི་རྣོན་པོ་དག་གིས་སུ། རང་གི་ཡན་ལག་གཏུབ་པ་སླའི། །བསྔོས་ཟིན་པ་ཡི་དངོས་པོ་ནི། །ཁྱིམ་པ་རྣམས་ལ་སྦྱིན་མི་བྱ། །མེ་ལྕེ་འབར་བ་ལྟ་བུ་ཡི། །ལྕགས་ཀྱི་ཐུ་ལུམ་ཟོས་སླ་ཡི། །དགེ་འདུན་དག་ལས་གལ་ཏེ་ནི། །དགེ་འདུན་གྱིས་ནི་ལོངས་མི་སྤྱད། །ལྷུན་པོ་དང་ནི་འདྲ་བའི་མེ། །བླངས་པར་བྱས་ཏེ་ཟོས་ཀྱང་སླའི། །ཁྱིམ་པར་གྱུར་པས་དགེ་འདུན་གྱི། །ལོངས་སྤྱད་པར་ནི་མི་བྱའོ། །ཐམས་ཅད་དབྱུང་བར་བྱས་པ་དང་། །གསལ་ཤིངསྟེང་དུ་བཏེགས་པ་སླའི། །ཁྱིམ་པར་གྱུར་པས་དགེ་འདུན་གྱི། །ལོངས་སྤྱད་པར་ནི་མི་བྱའོ། །མེ་མདག་གིས་ནི་གང་བ་ཡིས། །གནས་ཁང་དེར་ནི་ཞུགས་པ་སླའི། །ཁྱིམ་པས་དགེ་འདུན་གནས་ཁང་དུ། །མཚན་མོ་གནས་པར་མི་བྱའོ། །མེ་ལྕེ་འབར་བ་ལྟ་བུ་ཡི། །ལྕགས་ཀྱི་ཐུ་ལུམ་བླང་བ་སླའི། །རབ་བྱུང་དང་ནི་ཁྱིམ་པ་ཡི། །དབྱིག་ནི་བླང་བར་མི་བྱའོ། །འཁོར་ལོ་རྣོན་པོས་བདག་གི་ལུས། །ཀུན་ཏུ་བཏུབ་པར་བྱས་པ་སླའི། །ལེགས་པར་གསུངས་པའི་ཆོས་རྣམས་ལ། །རྒྱགས་དང་གཤེ་བ་བསྐྱེད་མི་བྱ། །ལེགས་པར་གསུངས་པའི་ཆོས་ཅན་གྱི། །མིག་ནི་རང་གིས་ཕྱུང་བ་སླའི། །སེམས་ཅན་དུ་ནི་བགྲང་བ་ལ། །ཁྲོས་པས་སྐྱེ་དགུ་མི་མངག་གོ །ལེགས་པར་གསུངས་པའི་ཆོས་ཅན་གྱི། །མེ་ཡི་གོས་ནི་གྱོན་པ་སླའི། །ཚུལ་འཆོས་པ་དང་མཐུ་ཡིས་སུ། །ཁྱིམ་པ་ལས་ནི་གོས་མི་བླང་། །མེ་འདྲ་བར་ནི་བསྐོལ་བ་ཡི། །རྩུབ་འགྱུར་ཆུ་ནི་འཐུང་བ་སླའི། །རབ་ཏུ་བྱུང་བས་གཡོ་སྒྱུ་ཡིས། །བཟའ་བཏུང་བླང་བར་མི་བྱའོ། །ཞེས་སོགས་གསུངས་པ་དང་། ལྷ་ཁང་ལ་བརྙས་བཅོས་སོགས་བྱས་ན་མཚམས་མེད་ལྔའི་སྡིག་པ་དང་འདྲ་བའི་ཉེས་པ་འབྱུང་། ཐ་ན་གཙུག་ལག་ཁང་གི་ཕྱགས་མས་རང་གི་ཁྱིམ་ཕྱགས་ན་ཕྱགས་མ་ལྟ་བུའི་དམྱལ་བར་སྐྱེ་བ་དང་རྩིག་པ་དང་ཀ་བ་ལ་སྣབས་སོགས་བགོས་ན་ཀ་བ་དང་རྩིག་པ་ལྟ་བུའི་དམྱལ་བར་སྐྱེ་བར་འགྱུར་ཞེས་འདུལ་བ་ལུང་ལས་གསུངས་ཤིང་། ཁྱད་པར་ལྷ་ཁང་གི་རྫས་དང་མཆོད་ཐེབས་རྟེན་བཞག་སོགས་ལ་ལོངས་སྤྱད་ན་ཉེས་པ་མཚམས་མེད་དང་འདྲ། དཀོན་མཆོག་གི་དཀོར་འཕྲོག་པས་བྱང་ཆུབ་སེམས་དཔའི་རྩ་ལྟུང་འབྱུང་། ཤི་མ་ཐག་ཏུ་ཁྲོ་ཆུ་ཁོལ་མ་འཐུང་བའི་དམྱལ་བར་སྐྱེ་ཞིང་། དེ་ནས་ཀྱང་ཡི་དྭགས་ཀྱི་ལུས་སྟོང་ཕྲག་ལ་སོགས་པ་ལེན་པར་གསུངས་པ་དང་། ཐ་ན་ལྷ་ཁང་དུ་སྔ་དྲོ་འབུལ་རྒྱུའི་མཆོད་རྫས་ཕྱི་དྲོ་འབུལ་བ་དང་། དབྱར་ཕུལ་ཅིག་ཟེར་བའི་མཆོད་རྫས་སྟོན་འབུལ་བ་དང་། ད་ལྟ་ཕུལ་ཅིག་ཟེར་བའི་མཆོད་རྫས་དུས་མཆོད་ལ་སོགས་པའི་བར་དུ་འཇོག་པའི་བསྔོས་བསྒྱུར་བྱས་ཚེ་ཕྱི་མ་རྐེད་པ་ཆད་པའི་ཆ་རྒྱུས་པ་ཕྲ་མོས་སྦྲེལ་ནས་སྡུག་བསྔལ་མྱོང་བའི་ཉི་ཚེ་བའི་དམྱལ་བར་སྐྱེ་བར་འདུལ་བ་ནས་གསུངས་པ་དང་། ཡང་ས་གའི་ལྷས། མི་སློབ་པ་ནི་བདག་པོར་སྤྱོོད། །ཅེས་བསོད་ནམས་ཀྱི་ཞིང་མཆོག་ཏུ་གྱུར་པ་དང་། སློབ་པ་བྱིན་པ་སྤྱོད་པ་སྟེ། །ཞེས་ཡོན་སྦྱོང་ནུས་པས་ལོངས་སྤྱད་རུང་བ་དང་། བསམ་གཏན་ཀློག་དང་ལྡན་པ་ནི། །རྗེས་གནང་སྤྱོད་པས་ཉེས་པ་མེད། །ཅེས་སོ་སྐྱེ་ཡིན་ཀྱང་ཁྲིམས་དག་སྤང་ཀློག་ལ་བརྩོན་པ་ལ་ནི་རྗེས་སུ་གནང་བས་ཉེས་པ་མེད་ལ། ལྷག་མ་ལེ་ལོས་བཅོམ་པ་ཡིན། །བདག་ཉིད་ལ་ནི་བུ་ལོན་སྤྱོད། །ཅེས་ཁྲིམས་དག་ཀྱང་རྒྱུད་ལེ་ལོས་ཁྱེར་བས་ཐོས་སྒོམ་མི་ནུས་པ་དག་གིས་དབུལ་པོའི་བུ་ལོན་ལྟར་སྐྱེ་བ་ཕྱི་མར་འཇལ་དགོས་ལ། ཁྲིམས་འཆལ་རྣམས་ལ་ནམ་དུ་ཡང་། །གཙུག་ལག་ཁང་སོགས་ཉེར་སྤྱོད་བཀག །ཅེས་ཁྲིམས་འཆལ་གྱིས་ནི་དད་གཤིན་གྱི་དཀོར་རྫས་ཁབ་ཙམ་ཡང་མི་དབང་ཞིང་སྤྱད་ན་ངན་སོང་གི་སྡུག་བསྔལ་ཆེན་པོ་མྱོང་སྟེ། སངས་རྒྱས་མཛོད་ཀྱི་མདོ་ལས། ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་བསྐལ་པ་བརྒྱ་སྟོང་ཁྲི་འབུམ་གྱི་བར་དུ་རང་གི་ཤ་བཅད་གཏུབས་ཏེ་སྦྱིན་བདག་ལ་འཇལ་ལོ། །ཕྱུགས་སུ་སྐྱེས་ན་ཡང་ཁུར་ལྕི་བ་ཁྱེར་བ་འོང་ངོ་། སྐྲ་ཉག་མ་འབུམ་དུ་བགོས་པའི་ཆ་ཙམ་ཡང་བཞུ་བར་མི་ནུས་ན་གོས་དང་ཟས་དང་མལ་ཆ་དང་སྨན་ལ་སོགས་པ་ལྟ་ཅི་སྨོས། ཞེས་དང་། ཤཱ་རིའི་བུ་རོས་གང་བའི་ས་དེ་ན་ངའི་ཆོ་ག་བཞིནདུ་སྤྱོད་པ་ནི་ཕོད་ཀྱི་ཚུལ་ཁྲིམས་ཞིག་པའི་དགེ་སློང་དང་ལྷན་ཅིག་ཏུ་འདུག་པ་ནི་མི་ཕོད་དོ། །དེ་ཅིའི་ཕྱིར་ཞེ་ན། ཚུལ་ཁྲིམས་ཞིག་པའི་དགེ་སློང་གི་ལག་གིས་བླང་བའི་རྫས་སོ་ཅོག་ཚུལ་ཁྲིམས་འཛིན་པའི་ངན་དུག་པར་འགྱུར་རོ། །ཞེས་གསུངས་པ་སོགས་ཀྱང་རང་གཞན་ཀུན་གྱིས་དྲན་པར་བྱས་ཏེ་སྡོམ་པ་སོགས་ལ་ནན་ཏན་མ་བྱས་ན་སྙིགས་མའི་དུས་མཐའ་འདིར་བཙུན་པ་རྣམས་ཚུལ་ཁྲིམས་འཆལ་བས་ངན་འགྲོ་དང་། ཁྱིམ་པ་རྣམས་དང་བའི་སེམས་ཀྱིས་ལྷར་སྐྱེ་བ་སོགས་སྙིང་རྗེ་པད་དཀར་ལས་རྒྱས་པར་གསུངས་ཏེ། ཀུན་དགའ་བོ། དེ་ན་ཁྱིམ་པ་གང་དག་འཆི་བའི་དུས་བྱེད་པ་དེ་དག་འཆི་བའི་དུས་བྱས་མ་ཐགཏུ་ཕལ་ཆེར་དགའ་ལྡན་གྱི་ལྷའི་རིས་སུ་སྐྱེ་བར་འགྱུར་རོ། །རབ་ཏུ་བྱུང་བ་གང་དག་འཆི་བའི་དུས་བྱེད་པ་དེ་དག་ནི་ཕལ་ཆེར་ལོག་པར་ལྟུང་བར་འགྱུར་རོ། །དེ་ཅིའི་ཕྱིར་ཞེ་ན། དེ་དག་ཡོ་བྱད་བསྙུང་བ་ལ་མི་གནས་ཤིང་སྡོམ་པ་ལ་མི་གནས་པའི་ཕྱིར་རོ། །ཞེས་གསུངས། འོ་ན་གོང་གི་ལུང་དོན་དང་མི་འགལ་ལམ་སྙམ་ན་མི་འགལ་ཏེ། གོང་དུ་གསུངས་པ་ནི་བདག་རྐྱེན་སངས་རྒྱས་ཉིད་ཀྱི་སྔོན་གྱི་སྨོན་ལམ་གྱི་ཁྱད་པར་གྱིས་འཁོར་བ་མཐའ་ཅནདུ་གསུངས་པ་ཡིན་ལ། འདིར་ནི་གང་ཟག་རང་རང་གི་ཉེས་པར་སྤྱོད་པའི་འབྲས་བུ་བསྟན་པ་ཡིན་པའི་ཕྱིར་རོ། །དེས་ན་སྨོས་མ་ཐག་པའི་ལུང་དོན་ལ་སྐྱི་ཟ་བས་འདུན་པ་དང་། བརྩོན་འགྲུས་དང་། བག་ཡོད་པ་སྟེ་གནས་གསུམ་ལ་ཐུན་ཚོད་རེ་ཡང་སློབ་པ་ནི་ཅི་ནས་ཀྱང་གལ་ཆེ་བ་འཕྲོས་དོན་དུ་སྨོས་པ་སྟེ། མདོར་ན་རྒྱལ་པོ་བསོད་ནམས་སྟོབས་ཀྱི་རྟོགས་པ་བརྗོད་པ་ལས། བསོད་ནམས་དག་གིས་བྱད་གཟུགས་འཐོབ། །བསོད་ནམས་ཀྱིས་ནི་ཚུལ་ཁྲིམས་ལྡན། །བསོད་ནམས་དག་གིས་དཔའ་འཐོབ་ཅིང་། །དེ་བཞིན་ལོངས་སྤྱོད་ཅན་དུ་འགྱུར། །བསོད་ནམས་དག་གིས་ཤེར་རབ་འཐོབ། །སྙན་དངགས་སྦྱོར་མཆོག་བསོད་ནམས་ཀྱིས། །བསོད་ནམས་དག་གིས་ཡིད་གཞུངས་འཐོབ། །བསོད་ནམས་དག་གིས་བཟང་འགྲོ་འཐོབ། །བསོད་ནམས་ཀྱིས་ནི་རིགས་འཐོར་སྐྱེ། །བསོད་ནམས་ཀྱིས་ནི་སྐྱེ་བ་དྲན། །བསོད་ནམས་དག་གིས་གྲགས་པ་འཐོབ། །བསོད་ནམས་དག་གིས་མཁས་པས་མཆོད། །བསོད་ནམས་དག་གིས་སྟོབས་འཐོབ་ཅིང་། །དམ་པར་འཕྲད་པ་བསོད་ནམས་ཀྱིས། །བསོད་ནམས་དག་གིས་དོན་ཀུན་འཐོབ། །འདིར་ནི་ཡོན་གནས་སུ་ཡང་རུང་། །ཅི་སྟེ་ཞིང་ལས་ཚོང་ཡང་རུང་། །མི་ནི་སྐྱིད་འདོད་ཕྱིར་བྱེད་ན། །ཅུང་ཟད་བྱས་པས་བསོད་ནམས་ཀྱིས། །ལོངས་སྤྱོད་རྒྱ་ཆེན་ཚོགས་ཀྱང་འཐོབ། །བསོད་ནམས་བྱེད་རྣམས་བསོད་ནམས་ཀྱིས། །བསམ་པ་ཙམ་གྱིས་ནམ་མཁའ་ལས། །གོས་དང་ཟས་སྐོམ་རིན་ཆེན་རྣམས། །ཐམས་ཅད་བདེ་བར་འཐོབ་བར་འགྱུར། །ཡིད་འོང་ཁྱིམ་རྣམས་བསོད་ནམས་ཀྱིས། །བསོད་ནམས་དག་གིས་བུད་མེད་མཆོག །བསོད་ནམས་ཆེན་པོས་ནོར་དང་འབྲུ། །དེ་ཡི་འདོད་དགུ་འབྱུང་བར་འགྱུར། །བསོད་ནམས་དག་གིས་འགྲོ་བ་ན། །ས་ནི་སྡོང་དུམ་ཚེར་མ་མེད། །བསོད་ནམས་ཇི་ལྟར་ལྡན་པ་བཞིན། །མཉམ་གནས་ཡང་ན་གོས་ཀྱང་བཏིང་། །ཇི་ལྟར་རེག་པ་ཙམ་གྱིས་ན། །ནད་པ་དག་ནི་སོས་འགྱུར་བཞིན། །བསོད་ནམས་དག་གིས་རེག་གྱུར་ན། །ཟས་སྐོམ་དེ་བཞིན་གཉིས་ཀ་དང་། །གོས་དང་རིན་ཆེན་འབྲུ་དག་ཀྱང་། །རྟག་ཏུ་ཟད་པར་མི་འགྱུར་རོ། །ལྷ་ཀླུ་ལྷ་མིན་གནོད་སྦྱིན་དང་། །ཡི་དྭགས་ལྟོ་འཕྱེ་མི་རྣམས་ཀྱང་། །བསོད་ནམས་བདག་ཉིད་ཆེ་བའི་ཕྱིར། །དུག་དང་གནོད་པ་རྣམས་ལས་སྲུང་། །བསོད་ནམས་དག་གིས་བསྙེན་བཀུར་འཐོབ། །སྐྱེ་བོ་མང་དགའ་བསོད་ནམས་ཀྱིས། །བསོད་ནམས་དག་གིས་གྲགས་ལྡན་འགྱུར། །བསོད་ནམས་དག་གིས་བསྐལ་བཟང་འཐོབ། །བསོད་ནམས་དག་གིས་ཚིག་ཀྱང་བཙན། །བསོད་ནམས་དག་གིས་སྡུག་གུར་འགྱུར། །ཚངས་པའི་དབྱངས་འཐོབ་བསོད་ནམས་ཀྱིས། །བསོད་ནམས་ཀྱིས་ནི་ལས་མདོག་སྡུག །བསོད་ནམས་དག་གིས་ཚིག་ཀྱང་བཟང་། །དྲན་ལྡན་མཛའ་ལྡན་གཙོ་བོར་འགྱུར། །དེ་དང་དེར་ནི་མཁས་པར་འོང་། །མི་ཕྱེད་པ་ཡི་འཁོར་དང་ལྡན། །བསོད་ནམས་ཅན་ནི་ནད་མེད་ཅིང་། །སྨོན་པའི་གནས་གྱུར་བསོད་ནམས་ཀྱིས། །བསོད་ནམས་རྙེད་ལྡན་གཟི་བྱིན་ཡོད། །བསོད་ནམས་དག་གིས་རྒྱལ་སྲིད་འཐོབ། །འགྲན་ཟླ་མེད་ཅིང་གནོད་པ་མེད། །ལོངས་སྤྱོོད་མི་ཉམས་བསོད་ནམས་ཀྱིས། །བསོད་ནམས་དག་གིས་གཏེར་ཡང་རྙེད། །འཁོར་ལོས་སྒྱུར་འགྱུར་བསོད་ནམས་ཀྱིས། །རིན་ཆེན་བདུན་ནི་མདུན་དུ་འགྲོ། །ནམ་མཁའི་བར་ནས་ཀུན་ཏུ་རྒྱུ། །ཉི་ཟླ་དང་ཡང་གཟི་བྱིན་མཉམ། །ཟླ་བ་ཉིད་འཐོབ་བསོད་ནམས་ཀྱིས། །བསོད་ནམས་ཀྱིས་འཐོབ་ཉི་མ་ཉིད། །ཚངས་པ་ཉིད་འཐོབ་བསོད་ནམས་ཀྱིས། །བསོད་ནམས་ཀྱིས་འཐོབ་བརྒྱ་བྱིན་ཉིད། །གཞལ་མེད་ཁང་ན་རྒྱུ་བ་ཡི། །བསོད་ནམས་ཀྱིས་ནི་ལྷར་ཡང་འགྱུར། །བསོད་ནམས་དེ་བཞིན་ལྷ་ཡི་བུ། །ལྷ་མིན་དབང་པོ་སྟོབས་པོ་ཆེ། །བསོད་ནམས་དག་གིས་ངན་འགྲོ་སྤོང་། །བསོད་ནམས་ཀྱིས་ནི་བདེ་འགྲོར་འགྲོ། །ཤིན་ཏུ་ཡིད་འོང་རབ་དཀོན་པའི། །མེ་ཏོག་བསོད་ནམས་དག་གིས་རྙེད། །བསོད་ནམས་དག་གིས་གྲུབ་པ་འཐོབ། །འགྲོ་བ་སྣང་བྱེད་བསོད་ནམས་ཀྱིས། །ལྷ་དང་ལྷ་མིན་མི་རྣམས་ཀྱིས། །ཡང་དག་མཆོག་གྱུར་བསོད་ནམས་ཀྱིས། །ཞེས་དང་། བསོད་ནམས་དག་གིས་གྲགས་པ་འཐོབ། །བསོད་ནམས་ཀྱིས་ནི་མང་ཐོས་འགྱུར། །རྒྱ་ཆེ་ཡིད་འོང་བསོད་ནམས་ཀྱིས། །བསོད་ནམས་དག་གིས་ཐོས་པ་འཛིན། །ནད་མེད་འཆི་བ་བསོད་ནམས་ཀྱིས། །བསོད་ནམས་ཀྱིས་ནི་འཆི་བདག་བཅོམ། །འཆི་བདག་མཆོག་ཏུ་འཇིགས་པ་ཡིས། །བསོད་ནམས་དག་གིས་འཇིགས་མི་འགྱུར། །ཞེས་སོགས་རྒྱ་ཆེར་གསུངས་པ་བཞིན་བདག་ལེགས་སུ་འདོད་པའི་སྐྱེ་བོ་རྣམས་བསོད་ནམས་ཀྱི་གནས་ལ་འདུན་པར་རིགས་སོ། །ཨེ་མ་འགྲོ་མང་བསོད་ནམས་གསོག་པའི་ཞིང་། །སྲས་བཅས་རྒྱལ་བའི་རྟེན་གསུམ་ངོ་མཚར་ཅན། །མཐོང་ཐོས་དྲན་རེག་སྒྲོལ་བའི་ཕྲིན་ལས་ཕུལ། །གཟུགས་སུ་གྲུབ་ན་སྟོང་གསུམ་སྣོད་རུང་ཅི། །གང་དག་འཁྲུག་བཞིན་པའམ་ཆགས་སེམས་ཀྱིས། །བལྟས་ཀྱང་རྣམ་བྱང་ས་བོན་ཐེབས་གསུངས་ན། །དྭངས་པའི་བློ་ཡིས་མཇལ་རྣམས་སྨོས་ཅི་དགོས། །དེ་སླད་རྒྱལ་བའི་རྟེན་གསུམ་མཐོང་གྲོལ་ལགས། །དཀོན་མཆོག་མཚན་དང་ཆོས་སྟོན་གཎྜིའིསྒྲ། །གང་དུ་མཆོད་རྟེན་བཞེངས་པའི་གཏམ་ཐོས་ཀྱང་། །དེ་དག་སྲིད་པ་ཧྲུལ་པོར་གཏོང་ཞེས་གསུངས། །དེ་སླད་རྒྱལ་བའི་རྟེན་གསུམ་ཐོས་གྲོལ་ལགས། །གང་དག་དཀོན་མཆོག་རྟེན་དང་སྤོང་ཁང་སོགས། །རྨི་ལམ་རྨིས་སམ་ཡིད་ལ་དྲན་ཙམ་ཡང་། །དེ་དག་ངན་འགྲོའི་འཆིང་ཐག་གཅོད་ཅེས་གསུངས། །དེ་སླད་རྒྱལ་བའི་རྟེན་གསུམ་དྲན་གྲོལ་ལགས། །ངན་འགྲོ་ལོག་པར་ལྟུང་བ་ཕལ་དག་ཀྱང་། །མཆོད་རྟེན་སེར་ཁར་རེག་དང་དེ་ཡི་རྡུལ། །རླུང་གིས་ཁྱེར་བས་བཏབ་ཀྱང་སྲིད་མཐར་བྱེད། །དེ་སླད་རྒྱལ་བའི་རྟེན་གསུམ་རེག་གྲོལ་ལགས། །དཀོན་མཆོག་ཡོངས་རྫོགས་རྒྱལ་བའི་གསང་གསུམ་རྟེན། །དད་པ་ཅན་ལ་བསོད་ནམས་སྐལ་བར་སྣང་། །མཚན་དཔེ་ཉི་མ་འཆར་ཀའི་ལང་ཚོ་ཅན། །ཐུབ་དབང་དངོས་སུ་འཇལ་དང་ཁྱད་ཅི་ཡོད། །དེ་ཕྱིར་སྙིང་པོ་མེད་པ་སྒྱུ་མའི་ལུས། །དོན་ཆེན་རིན་ཐང་བྲལ་བ་རྒྱལ་བའི་སྐུར། །སྒྱུར་བྱེད་ཚོགས་གཉིས་ཟུང་འབྲེལ་གསེར་འགྱུར་རྩི། །སོག་པར་བྱེད་པའི་བརྩོན་པ་མི་ལྷོད་འཚལ། །ཞེས་པ་ནི་བར་སྐབས་ཀྱི་ཚིགས་སུ་བཅད་པ་སྟེ་ས་ཁོངས་གསུམ་པ་སྨོས་ཟིན་ཏོ། །། །

བཞི་པ་ལས་བྱས་པ་རྣམས་དོན་ཡོད་པར་བྱ་བའི་ཕྱིར་དགེ་རྩ་གང་བགྱིས་བྱང་ཆུབ་ཆེན་པོར་ཇི་ལྟར་བསྔོ་བར་བྱ་བའི་ཚུལ་དག་བདེ་ཚིག་སྨོན་ལམ་གྱིས་མཐའ་བརྒྱན་པ།

བཞི་པ་ལས་བྱས་པ་རྣམས་དོན་ཡོད་པར་བྱ་བའི་ཕྱིར་དགེ་རྩ་གང་བགྱིས་བྱང་ཆུབ་ཆེན་པོར་ཇི་ལྟར་བསྔོ་བར་བྱ་བའི་ཚུལ་དག་བདེ་ཚིག་སྨོན་ལམ་གྱིས་མཐའ་བརྒྱན་པ་ནི། དེ་ལྟར་བསྒྲུབས་པའི་དགེ་བའི་རྩ་བ་དེ་ཡང་རྫོགས་པའི་བྱང་ཆུབ་ཏུ་ཡོངས་སུ་བསྔོ་མ་ཤེས་ན། ཡུལ་ཁྱད་པར་ཅན་ལ་ཁོང་ཁྲོ་དྲག་པོ་སྐྱེས་པ་དང་། མེད་པར་ལྟ་བ་ལ་སོགས་པ་དགེ་རྩ་འཛད་པའི་རྒྱུ་འགའ་ཞིག་བྱུང་ན་འཛད་པར་འགྱུར་ཏེ། སྤྱོད་འཇུག་ལས། བསྐལ་པསྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང་། །ཁོང་ཁྲོ་གཅིག་གིས་འཇོམས་པར་བྱེད། །ཅེས་དང་། མདོ་ལས་རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་པ་རྣམས་ཀྱི་སྦྱིན་པ་ཟད་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། ཡོངས་སུ་མ་བསྔོས་པ་དང་། ཐབས་མི་མཁས་པ་དང་། དམའ་བར་སྐྱེ་བར་འདོད་པ་དང་། སྡིག་པའི་གྲོགས་པོ་ལ་བསྟེན་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་བོ་དེ་དག་དང་ལྡན་པ་རྣམས་ཀྱི་སྦྱིིན་པ་ནི་ཡོངས་སུ་ཟད་པར་འགྱུར་རོ། །ཞེས་དང་། མ་བསྔོས་པ་དང་ལོག་པར་བསྔོས། །གཞན་ལ་བསྒྲག་དང་འགྱོད་པ་སྐྱེས། །དགེ་རྩ་འཛད་པའི་རྒྱུ་བཞི་ཡིན། །ཞེས་གསུངས། རྒྱུ་མཚན་དེའི་ཕྱིར། ཕལ་ཆེར་དོན་མེད་དོན་ཡོད་དང་། །རྣམ་ཀུན་དོན་ཡོད་ཤེས་པར་བྱ། །ཞེས་གསུངས་པས། མོས་སྤྱོད་ཀྱི་དགེ་བ་ཕལ་ཆེར་དོན་མེད་དུ་འགྲོ། ས་དང་པོ་ནས་བདུན་པའི་བར་ལ་བྱས་པའི་དགེ་བ་རྣམས་ཕལ་ཆེར་དོན་ཡོད་དུ་འགྲོ། ས་བརྒྱད་པ་ནས་སངས་རྒྱས་ཀྱི་སའི་བར་བྱས་པའི་དགེ་བ་ཐམས་ཅད་རྣམ་ཀུན་དོན་ཡོད་དུ་འགྲོ་ཞིང་། སངས་རྒྱས་ཀྱི་སར་ནི་དབུགས་ཕྱི་ནང་གི་རྒྱུ་བ་ཙམ་ཡང་གཞན་དོན་འབའ་ཞིག་ཏུ་འགྱུར་བའི་ཕྱིར་དོན་མེད་སྐད་ཅིག་ཀྱང་མི་འབྱུང་སྟེ་དབུ་མ་བཞི་བརྒྱ་པར། བཅོམ་ལྡན་ཁྱོད་ཀྱི་གཡོ་བ་ལ། །རྒྱུ་མེད་འགའ་ཡང་ཡོད་མིན་ཏེ། །དབུགས་ཀྱང་སེམས་ཅན་ཐམས་ཅད་ལ། །ཕན་སླད་ཁོ་ནར་ཡང་དག་འབྱུང་། །ཞེས་གསུངས། དེའི་ཕྱིར་མོས་སྤྱོད་ཀྱི་དགེ་བ་རྣམས་དོན་ཡོད་པར་བྱ་བའི་ཕྱིར་ཡོངས་སུ་བསྔོ་དགོས། བྱང་ཆུབ་ཏུ་བསྔོས་པའི་དགེ་བ་ནི་ནམ་ཡང་མི་འཛད་ཅིང་གོང་ནས་གོང་དུ་འཕེལ་བར་འགྱུར་ཏེ། བློ་གྲོས་རྒྱ་མཚོས་ཞུས་པའི་མདོ་ལས། བློ་གྲོས་རྒྱ་མཚོ། འདི་ལྟ་སྟེ། དཔེར་ན་མཆིལ་མའི་ཐལ་བ་ཞིག་བྱེ་མའི་སྟེང་དུ་བོར་ན་མྱུར་དུ་བསྐམ་པར་འགྱུར་རོ། །དེ་ཉིད་རྒྱ་མཚོ་ཆེན་པོར་བོར་ན་ནི་ཇི་སྲིད་རྒྱ་མཚོ་ཆེན་པོ་ཟད་ཅིང་བསྐམ་པར་འགྱུར་བ་དེ་སྲིད་ཀྱི་བར་དུ། མཆིལ་མའི་ཐལ་བ་དེ་ཡང་མི་བསྐམ་མོ། །བློ་གྲོས་རྒྱ་མཚོ། དེ་བཞིན་དུ་དགེ་བའི་རྩ་བ་བསྒྲུབས་པ་དེ་ཡང་། འགྱོད་པ་དང་། ཕངས་པ་དང་། དམན་པ་དང་ལོག་པར་བསྔོས་ན་ནི་འཛད་ལ། གང་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱི་རྒྱ་མཚོ་ཆེན་པོར་བསྔོས་ན་མི་འཛད་ཅིང་གོང་དུ་འཕེལ་ལོ། །ཞེས་གསུངས། དེས་ན་བསམ་སྦྱོར་རྣམ་པར་དག་པས་དགེ་བ་གང་ཡང་། རང་གིས་བགྱིས་པ་དང་། གཞན་ལ་བགྱིད་དུ་སྩལ་པའམ་གཞན་གྱིས་བགྱིས་པ་ལའང་རུང་སྟེ་རྗེས་སུ་ཡི་རང་བར་བྱས་ནས་རྫོགས་པའི་བྱང་ཆུབ་ཏུ་བསྔོ་བ་འདི་གལ་ཤིནཏུ་ཆེ་སྟེ། ཚུལ་འདི་ནི་ཕྱི་རོལ་མུ་སྟེགས་བྱེད་སོགས་ལ་མ་གྲགས་པས་ནང་པ་སངས་རྒྱས་པ་ཁོ་ནའི་ཁྱད་ཆོས་ཡིན་ཏེ། སློབ་དཔོན་མཐོ་བཙུན་གྲུབ་རྗེས། བསོད་ནམས་བྱས་པའི་དངོས་པོ་ནི། །སེམས་ཅན་རྣམས་ལ་ཡོངས་བསྔོ་བ། །བཅོམ་ལྡན་ཁྱོད་ཀྱིས་གང་གསུངས་པ། །དེ་གཞན་བསྟན་བཅོས་ལས་མ་བཤད། །ཅེས་གསུངས། དེར་མ་ཟད་བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པའི་སྒོ་རྨད་དུ་བྱུང་བའང་ཡིན་ཏེ། གསང་ཆེན་ཐབས་ལ་མཁས་པའི་མདོ་ལས། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི། གང་གི་ཚེ་དུད་འགྲོའི་སྐྱེ་གནས་སུ་གྱུར་པ་ལ་ཟན་ཁམ་གཅིག་ཙམ་ཡང་སྦྱིན་པར་བྱེད་ན། དེ་ཡང་ཐམས་ཅད་མཁྱེན་པ་ཉིད་དང་ལྡན་པའི་སེམས་ཀྱིསསྦྱིན་པར་བྱེད་ཅིང་། དགེ་བའི་རྩ་བ་དེ་ཡང་སེམས་ཅན་ཐམས་ཅད་སངས་རྒྱས་ཀྱི་ཆོས་ཡོངས་སུ་རྫོགས་པར་བྱ་བར་ཡོངས་སུ་བསྔོ་བའི་ཕྱིར་རོ། །དེ་རྒྱུ་གཉིས་ཀྱིས་ནི་སེམས་ཅན་ཐམས་ཅད་ལ་ཡོངས་སུ་བསྔོ་བར་བྱེད་དེ། གཉིས་གང་ཞེ་ན། ཐམས་ཅད་མཁྱེན་པ་ཉིད་ཀྱི་སེམས་དང་། ཡོངས་སུ་བསྔོ་བ་ལ་མཁས་པ་ཉིད་ཀྱིས་ཏེ། རིགས་ཀྱི་བུ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི། གཞན་གྱི་དགེ་བའི་རྩ་བ་མངོན་པར་འདུས་བྱས་པ་ལ་རྗེས་སུ་ཡི་རང་བར་བྱེད་ཅིང་རྗེས་སུ་ཡི་རང་ནས་ཀྱང་སེམས་ཅན་ལ་ཡོངས་སུ་བསྔོ་ཞིང་བཏང་སྟེ་ཡོངས་སུ་བསྔོ་བར་བྱེད་དོ། །དེ་ཐམས་ཅད་མཁྱེན་པ་ཉིད་དུ་བསྔོས་པའི་དགེ་བའི་རྩ་བ་དེས། བྱང་ཆུབ་ཀྱི་སེམས་དང་བྲལ་བའིསྦྱིན་པ་པོ་དང་། སྦྱིན་བདག་གང་དག་ཡིན་པ་དེ་དག་ཀྱང་ཟིལ་གྱིས་གནོན་པར་བྱེད་ལ། ལེན་པ་པོ་གང་དག་ཡིན་པ་དེ་དག་ཀྱང་ཟིལ་གྱིས་གནོན་པར་བྱེད་དེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ཡིན་ནོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི། ཕྱོགས་བཅུ་དག་ན་མེ་ཏོག་གི་ཤིང་ལྗོན་པ་དང་། སྤོས་ཀྱི་ཤིང་ལྗོན་པ་དང་། མེ་ཏོག་དང་། མེ་ཏོག་གི་ཕྲེང་བ་དང་། སྤོས་དང་། ཕྱེ་མ་དང་། བྱུག་པ་བདག་གིར་མ་བྱས་ཤིང་ཡོངས་སུ་མ་བཟུང་བ་གང་ཇི་སྙེད་པ་དེ་དག་ཐམས་ཅད་བསམ་པས་ཡོངས་སུ་བཟུང་ཞིང་ཡོངས་སུ་བསྡུས་ནས་སངས་རྒྱས་ཐམས་ཅད་ལ་འབུལ་བར་བྱེད་ཅིང་། དགེ་བའི་རྩ་བ་དེ་ཡང་སེམས་ཅན་ཐམས་ཅད་ལ་གཏོང་བར་བྱེད་དེ། ཡོངས་སུ་བཏང་ནས་ཀྱང་ཐམས་ཅད་མཁྱེན་པ་ཉིད་དུ་སྔོ་བར་བྱེད་དོ། །ཕྱོགས་བཅུ་དག་ན་མེ་ཏོག་གི་ཤིང་ལྗོན་པ་དང་། མེ་ཏོག་དང་། མེ་ཏོག་གི་ཕྲེང་བ་དང་། སྤོས་དང་། ཕྱེ་མ་དང་། བྱུག་པ་བདག་གི་དང་བཅས་ཤིང་ཡོངས་སུ་བཟུང་བ་དང་བཅས་པ་གང་ཇི་སྙེད་པ་དེ་དག་ཐམས་ཅད་ཀྱི་དྲི་རླུང་གིས་བཏབ་པའི་ངད་དེ་དག་ཐམས་ཅད་ཀྱང་། བྱང་ཆུབ་སེམས་དཔའ་ཐབས་ལ་མཁས་པས་སངས་རྒྱས་ཐམས་ཅད་ལ་འབུལ་བར་བྱེད་ཅིང་། དགེ་བའི་རྩ་བ་དེ་ཡང་། བདག་དང་སེམས་ཅན་ཐམས་ཅད་ཀྱིས་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །དེ་ཐམས་ཅད་མཁྱེན་པ་ཉིད་དུ་བསྔོས་པའི་དགེ་བའི་རྩ་བ་དེས། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དཔག་ཏུ་མེད་པ་ཐོབ་པར་འགྱུར་ཏེ། རིགས་ཀྱི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ཡིན་ནོ། །ཞེས་གསུངས། ཡང་དག་པའི་སྒྲུབ་པ་མི་ཟད་པའང་ཡིན་ཏེ། བློ་གྲོས་མི་ཟད་པའི་མདོ་ལས། གང་ཇི་ལྟར་དགེ་བའི་སེམས་སྐྱེས་ཤིང་བྱུང་བ་བྱང་ཆུབ་ཀྱི་ཕྱིར་ཡོངས་སུ་བསྔོ་བར་བྱེད་པ་འདི་ནི་བྱང་ཆུབ་སེམས་དཔའི་སྒྲུབ་པ་མི་ཟད་པ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་ཏུ་ཡོངས་སུ་བསྔོས་པའི་ཕྱིར་ཏེ། བྱང་ཆུབ་ཏུ་བསྔོས་པའི་དགེ་བའི་རྩ་བ་ནི་བྱང་ཆུབ་སྙིང་པོ་ལ་འདུག་གི་བར་དུ་བར་མ་དོར་ཡོངསསུ་ཟད་པའམ་གཏུག་པར་འགྱུར་བ་གང་ཡང་མེད་དོ། །བཙུན་པ་ཤཱ་ཱར་དྭ་ཏིའི་བུ་འདི་ལྟ་སྟེ། དཔེར་ན་ཆུའི་ཐིགས་པ་རྒྱ་མཚོ་ཆེན་པོར་ལྟུང་བ་ནི་བསྐལ་པའི་མེས་མ་བསྲེགས་ཀྱི་བར་དུ་བར་མ་དོར་ཡོངས་སུ་ཟད་པའམ་གཏུག་པར་མི་འགྱུར་རོ། །དེ་བཞིན་དུ་བྱང་ཆུབ་ཏུ་བསྔོས་པའི་དགེ་བའི་རྩ་བ་ཡང་། བྱང་ཆུབ་སྙིང་པོ་ལ་འདུག་གི་བར་དུ་བར་མ་དོར་ཡོངས་སུ་ཟད་པའམ་གཏུག་པར་འགྱུར་བ་གང་ཡང་མེད་དོ། །ཡང་དག་པར་འགྲུབ་པ་ཞེས་བྱ་བ་ནི་གང་འདི་ཡང་དག་པར་བསྒྲུབ་པ་སྟེ། ཡང་དག་པར་ཞུགས་པ་ནི་དགེ་བའི་རྩ་བ་ཡང་དག་པར་བསྒྲུབ་པ་སེམས་ཅན་ཐམས་ཅད་བསྐྱབ་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། སེམས་ཅན་ཐམས་ཅད་དགེ་བའི་རྩ་བ་ལ་གཟུད་པའི་ཕྱིར། དགེ་བའི་རྩ་བ་དེ་དག་ཡོངས་སུ་སྔོ་བར་བྱེད་དེ། ཐམས་ཅད་མཁྱེན་པའི་ཡེ་ཤེས་མངོན་པར་སྒྲུབ་པའི་ཕྱིར་དགེ་བའི་རྩ་བ་དེ་དག་ཡོངས་སུ་བསྔོའོ། །སེམས་ཅན་ཐམས་ཅད་ཉེ་བར་འཚེ་བའི་ཕྱིར་དགེ་བའི་རྩ་བ་དེ་དག་ཡོངས་སུ་བསྔོའོ། །སེམས་ཅན་ཐམས་ཅད་མྱ་ངན་ལས་བཟླ་བ་དང་། ཐམས་ཅད་མཁྱེན་པའི་ཡེ་ཤེས་ལ་རབ་ཏུ་འགོད་པའི་ཕྱིར་དགེ་བའི་རྩ་བ་དེ་དག་ཡོངས་སུ་བསྔོ་བ་སྟེ། དེ་ནི་བྱང་ཆུབ་སེམས་དཔའི་ཡང་དག་པའི་སྒྲུབ་པ་མི་ཟད་པའོ། །ཞེས་དང་། བློ་གྲོས་རྒྱ་མཚོའི་མདོ་ལུང་ཚིགས་བཅད་དུ་སྡེབ་པ། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་ཟད་བར་དུ་དེ་མི་ཟད། དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་ཟད། །ཅེས་གསུངས། བགྲོད་པ་གཅིག་པའི་ལམ་ཡང་ཡིན་ཏེ། ནམ་མཁའ་མཛོད་ཀྱི་མདོ་ལས། ཐ་དད་ཕྱོགས་ནས་ཆུ་ཀླུང་མང་པོ་དག །རྒྱ་མཚོ་ཆེན་པོ་རོ་གཅིག་འགྱུར་བ་ལྟར། །ཐ་དད་ཕྱོགས་ནས་དགེ་བ་གང་བྱས་པ། །བྱང་ཆུབ་བསྔོས་པ་རྣམས་ཀྱང་རོ་གཅིག་འགྱུར། །ཞེས་གསུངས། འདིས་འཇིག་རྟེན་དང་འཇིག་རྟེན་ལས་འདས་པའི་དགེ་བའི་རྩ་བ་ཐམས་ཅད་ཟིལ་གྱིས་གནོན་ནུས་པར་ཡང་། འཕགས་པ་བྱམས་པ་འཇུག་པའི་མདོ་ལས། ཤེས་རབ་བཟང་པོ་མཁས་པར་གྱིས། །བྱང་ཆུབ་མཆོག་ལ་འཇུག་པར་གྱིས། །མྱ་ངན་འདས་པ་འདོད་པའི་ཕྱིར། །སངས་རྒྱས་དེ་བཞིན་གཤེགས་རྣམས་ལ། །གང་གིས་སྟོང་གསུམ་ཐམས་ཅད་ཀྱང་། །རིན་ཆེན་བཀངསྟེ་ཕུལ་བ་བས། །གང་གིས་ཐལ་མོ་སྦྱར་བྱས་ནས། །སེམས་ཀྱིས་བྱང་ཆུབ་བསྔོ་བྱས་ལ། །ཚིག་ཏུ་བརྗོད་པར་མ་བྱས་ཀྱང་། །དེ་ནི་དེ་བས་ཤིན་ཏུ་ཆེ། །གང་གིས་སེམས་ཅན་ཐམས་ཅད་ལ། །བསྐལ་པ་བྱེ་བ་བརྗོད་མེད་དུ། །སེམས་ཀྱིས་ཀུན་ནས་བསྙེན་བྱས་ཀྱང་། །དེ་ཡི་བཅུ་དྲུག་ཆར་མི་ཕོད། །ཅེས་དང་། སྡུད་པ་ཚིགས་སུ་བཅད་པ་ལས། སྲིད་པ་གསུམ་ན་སེམས་ཅན་ཇི་སྙེད་མ་ལུས་པ། །ཡོངས་སུ་བརྟག་པ་བཟུང་སྟེ་དེ་དག་ཐམས་ཅད་ཀྱིས། །འཇིག་རྟེན་མཁྱེན་པ་སངས་རྒྱས་དགྲ་བཅོམ་རང་རྒྱལ་ལ། །བསྐལ་པ་མཐའ་ཡས་སྦྱིན་བྱེད་ཉན་ཐོས་ལེགས་འཚོལ་ན། །བྱང་ཆུབ་སེམས་དཔའ་མཁས་པ་ཐབས་མཁས་གང་ཞིག་གིས། །དེ་དག་བསོད་ནམས་བྱ་བའི་དངོས་ལ་ཡི་རང་ནས། །སེམས་ཅན་དོན་དུ་བྱང་ཆུབ་མཆོག་རབ་ཡོངས་བསྔོ་ན། །ཡོངས་སུ་བསྔོ་བས་འགྲོ་བ་ཐམས་ཅད་ཟིལ་གྱིས་གནོན། །ཞེས་གསུངས། དེ་ལྟ་བུའི་བསྔོ་བ་དངོས་དེ་ལའང་མཁས་པ་གཞན་དགཞིང་། དངོས་པོ། བསམ་པ། ཐབས། ཤེས་རབ། བསྔོ་བ་སྟེ་དྲུག་ཏུ་དབྱེ་བ་དང་། བསྔོ་བྱ། བསྔོ་ཡུལ། བསྔོ་ཐབས་ཏེ་གསུམ་དུ་སྡུད་པ་སོགས་དབྱེ་བསྡུ་མི་འདྲ་བ་མང་ཡང་། རང་ལུགས་ཀུན་མཁྱེན་ཆེན་པོ་དྲི་མེད་འོད་ཟེར་དང་། ཀུན་མཁྱེན་སྨིན་གླིང་པ་ཡབ་སྲས་རྣམས། བསྔོ་རྒྱུ། བསྔོ་བ། ཆེད་དུ་བྱ་བ། ཚུལ་ལམ་རྣམ་པ། བསྔོ་བ་རང་གི་ངོ་བོ་དང་ལྔར་བཞེད་དེ། བསྔོ་རྒྱུ་ནི། དགེ་བའི་རྩ་བ་སྟེ། དེ་ཡང་ཀུ་སཱ་ལ་མཱུ་ལ་ཞེས་པའི་སྒྲ་ལས་དྲངས་ན། ཀུ་སཱ་ལ་ནི་དགེ་བ་ཞེས་བྱ་སྟེ། རྣམ་སྨིན་བདེ་བ་བསྐྱེད་པར་བྱེད་པས་སོ། །མཱུ་ལ་ནི་རྩ་བ་ཞེས་བྱ་བ་སྟེ། བདེ་བའི་རྒྱུ་བྱེད་པའི་ཕྱིར་ཏེ། ལོ་ཐོག་གི་རྒྱུ་ས་བོན་འདེབས་པ་བཞིན་ནོ། །དབྱེ་ན་བདག་གིས་བྱས་པ། གཞན་གྱིས་བྱས་པ། གཉིས་ཀས་བྱས་པའི་དགེ་བ་སྟེ་གང་ཟག་གིས་ཕྱེ་བ་གསུམ། སྔར་བསྒྲུབས་པ། ད་ལྟ་བྱེད་བཞིན་པ། སླད་ནས་བྱེད་འགྱུར་གྱི་དགེ་བ་སྟེ་དུས་ཀྱིས་ཕྱེ་བ་གསུམ། ལུས་དང་ངག་དང་ཡིད་ཀྱིས་བྱས་པ་སྟེ། བསྒྲུབ་ཚུལ་གྱིས་ཕྱེ་བ་གསུམ། སྦྱིན་པ། ཚུལ་ཁྲིམས། བསྒོམ་པ་ལས་བྱུང་བ་སྟེ་བསོད་ནམས་བྱ་བའི་དངོས་པོས་ཕྱེ་བ་གསུམ། འཇིག་རྟེན་པ་དང་། ཐར་པ་དང་། ཐམས་ཅད་མཁྱེན་པ་དང་མཐུན་པའི་དགེ་བ་སྟེ་རྣམ་པར་སྨིན་པས་ཕྱེ་བ་གསུམ་བཅས་བཅོ་ལྔ་དང་། གཞན་ཡང་དམ་པའི་ཆོས་མངོན་པར། ངོ་བོ་ཉིད་དང། མཚུངས་ལྡན་དང་། རྗེས་འབྲེལ་དང་། སློང་བའི་དང་། དོན་དམ་པའི་དགེ་བ་སོགས་གསུངས་པས་མཚོན་མང་ཡང་། བསྡུ་ན། ཞིང་བསམ་དངོས་པོ་དག་པ་གསུམ་ཚང་བའི་སྒོ་ནས་བསྒྲུབས་པའི་དགེ་བའི་རྩ་བ་གང་ཡིན་པ་དེ་ཉིད་ཀྱིས་མཚོན་ནས་རང་གཞན་གྱིས་དུས་གསུམ་དུ་བསགས་པའི་བསོད་ནམས་དང་ཡེ་ཤེས་ཀྱི་ཚོགས་ཀྱིས་བསྡུས་པའི་དགེ་བའི་རྩ་བ་ཐམས་ཅད་དེ། ཕལ་པོ་ཆེ་ལས། འགྲོཀུན་དགེ་བ་ཇི་སྙེད་ཡོད་པ་དང་། །བྱས་དང་བྱེད་འགྱུར་དེ་བཞིན་བྱེད་པ་དང་། །བཟང་པོ་ཇི་བཞིན་དེ་འདྲའི་ས་དག་ལ། །ཀུན་ཀྱང་ཀུན་ནས་བཟང་པོར་རེག་གྱུར་ཅིག །ཅེས་གསུངས། བསྔོ་བ་ནི། ཆགས་སྡང་གི་བློས་དགྲ་ཐུབ་པ་དང་ཆགས་ཡུལ་ཐོབ་པ་སོགས་ཚེ་འདི་དོན་དུ་བསྔོ་བ་ནི་ལོག་པའི་བསྔོ་བ་དང་། ཕྱི་མར་ལྷ་མིའི་བདེ་འབྲས་ཙམ་ཐོབ་པའི་ཆེདདུ་བསྔོ་བའང་དམན་པའི་བསྔོ་བ་ཡིན་པས། དེ་དག་གང་དུའང་དམིགས་ནས་བསྔོ་བར་མི་བྱ་སྟེ། མངོན་རྟོགས་རྒྱན་ལས། ཁམས་གསུམ་གཏོགས་པ་མ་ཡིན་དང་། །ཞེས་གསུངས་ཤིང་། སློབ་དཔོན་རྟ་དབྱངས་ཀྱིས་ཀྱང་། དགེ་བའི་རྩ་བ་བསྒྲུབ་པ་དེ་དག་ཀྱང་། །གྲགས་དང་སྙན་དང་ལྷ་མིའི་བདེ་འབྲས་དང་། །རེ་བཅས་འཁོར་བའི་སེམས་པ་རྣམས་ཕྲལ་ཏེ། །འཇིག་རྟེན་འདས་པ་ཉིད་ཀྱི་རྒྱུར་བསྔོའོ། །ཞེས་གསུངས་པས་འཇིག་རྟེན་ལས་འདས་པའི་མྱང་འདས་གསུམ་ཡིན་ཞིང་། དེ་ལས་ཉན་རང་གཉིས་ཀྱི་མྱང་འདས་ཀྱང་ཐེག་ཆེན་མྱང་འདས་ལ་ལྟོས་ན་དམན་པའི་མྱང་འདས་ཡིན་པའི་ཕྱིར་དེར་ཡང་བསྔོ་བར་མི་བྱ་སྟེ། ཡུམ་བར་མ་ལས། རབ་འབྱོར་དགེ་བའི་རྩ་བ་འདི་ནི་སངས་རྒྱས་ཀྱི་ས་ཁོ་ནར་བསྔོ་བར་བྱ་ཡི། ཉན་ཐོས་དང་རང་སངས་རྒྱས་དང་། དེ་ལས་གཞན་གྱི་སར་ཡང་བསྔོ་བར་མི་བྱ་སྟེ། ཞེས་གསུངས། དེས་ན་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་ས་ཁོ་ནར་བསྔོ་བར་བྱ་སྟེ། བཟང་སྤྱོད་ལས། ཐམས་ཅད་དག་གིས་བྱང་ཆུབ་ཕྱིར་བསྔོའོ། །ཞེས་དང་། ཡོངས་སུ་བསྔོ་བའི་མདོ་ལས། དགེ་བའི་རྩ་བ་འདི་དག་ཀྱང་། །སངས་རྒྱས་ཉིད་ཀྱིས་སར་བསྔོའོ། །ཞེས་གསུངས། ཆེད་དུ་བྱ་བ་ནི། རང་གཅིག་པུའམ། རང་ཉིད་ཀྱི་ཉེ་འབྲེལ་འགའ་ཞིག་གི་ཆེད་དུ་བསྔོས་ན། དགེ་བའི་ཡོ་ལང་ཆེན་པོ་ཞིག་བསགས་ཟིན་ཀྱང་དོན་ཆུང་ངུར་བཏང་བས་ཆུད་ཟོས་པར་འགྱུར་ཏེ། ཡུམ་ལས། དེ་ཡང་སེམས་ཅན་ཐམས་ཅད་ཀྱི་ཕྱིར་བསྔོ་ཡི། རང་གི་ཡོངས་སུ་ཐོབ་པ་ཙམ་གྱི་དོན་དུ་ནི་མ་ཡིན་ཏེ། ཉན་ཐོས་དང་རང་སངས་རྒྱས་ཀྱི་སར་ལྟུང་བར་འགྱུར་བའི་ཕྱིར་རོ། །ཞེས་གསུངས་པས། ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ལ་བརྩེ་བ་ཆེན་པོ་བསྐྱེད་ནས། དེ་ཐམས་ཅད་ཀྱིས་བླ་ན་མེད་པའི་བྱང་ཆུབ་འཐོབ་པའི་ཕྱིར་བསྔོ་བར་བྱ་སྟེ། །སྤྱོད་འཇུག་ལས། ལུས་དང་དེ་བཞིན་ལོངས་སྤྱོོད་དང་། །དུས་གསུམ་དགེ་བའི་དངོས་པོ་རྣམས། །སེམས་ཅན་ཀུན་ཀྱི་དོན་གྱི་ཕྱིར། །ཕངས་པ་མེད་པར་བཏང་བར་བྱ། །ཞེས་དང་། དངོས་སམ་ཡང་ན་བརྒྱུད་ཀྱང་རུང་། །སེམས་ཅན་དོན་ལས་གཞན་མི་སྤྱད། །སེམས་ཅན་ཁོ་ནའི་དོན་གྱི་ཕྱིར། །ཐམས་ཅད་བྱང་ཆུབ་ཕྱིར་བསྔོའོ། །ཞེས་གསུངས། དེ་ལྟར་བསྔོས་ན་ནི། དགེ་བ་ཆུང་ངུ་ཞིག་ཀྱང་ཆེས་ཆེར་འཕེལ་བས་བསོད་ནམས་ཀྱི་ཚད་དཔག་ཏུ་མེད་པ་འབྱུང་སྟེ། རིན་ཆེན་ཕྲེང་བ་ལས། སེམས་ཅན་ཁམས་ནི་ཚད་མེད་པར། །ཕན་འདོད་དེ་ནི་དེ་འདྲའོ། །ཞེས་གསུངས་པ་བཞིན། སེམས་ཅན་ཚད་མེད་པ་ལ་དམིགས་པའི་བསོད་ནམས་ཀྱང་དེ་སྙེད་འབྱུང་བའི་ཕྱིར་རོ། །དེ་ལྟར་ཐབས་ཤེས་ཁྱད་པར་ཅན་གྱིས་ཟིན་པས་བསྔོས་ན་བཟང་པོ་བཞི་ལྡན་གྱི་བསྔོ་བར་ཡང་འགྱུར་ཏེ། མདོ་རྒྱན་ལས། དམིགས་པ་བཟང་དང་སྟོན་པ་བཟང་། །ཐབས་བཟང་བ་དང་ངེས་འབྱུང་དང་། སྦྱོར་བ་བཟང་པོའི་བདག་ཉིད་ཀྱི། །ཡང་དག་སྨོན་ལམ་ཡིན་པར་བཤད། །ཅེས་གསུངས། ཚུལ་ལམ་རྣམ་པ་ནི། དོན་དམ་པར་ཆོས་ཐམས་ཅད་རང་བཞིན་མེད་པས་བསོད་ནམས་ཀྱང་འཁོར་གསུམ་ཡོངས་སུ་དག་པའི་ཚུལ་གྱིས་དམིགས་སུ་མེད་ལ། ཐ་སྙད་ཀུན་རྫོབ་ཏུ་གང་གིས་བྱེད་པ་པོ་དང་། གང་ལ་བྱ་བའི་ཡུལ་དང་། ཇི་ལྟར་བྱ་བའི་དགེ་བ་ཐམས་ཅད་རྨི་ལམ་སྒྱུ་མ་ལྟ་བུར་སྣང་ལ་རང་བཞིན་མེད་པའི་ཚུལ་གྱིས་བསྔོ་སྟེ། ཡུམ་བར་མ་ལས། རབ་འབྱོར། ཆོས་ཐམས་ཅད་རྨི་ལམ་ལྟ་བུ་སྒྱུ་མ་ལྟ་བུ་དགེ་བའང་རྨི་ལམ་དང་སྒྱུ་མ་ལྟ་བུའི་ཚུལ་གྱིས་ཡོངས་སུ་བསྔོ་བར་བྱ་སྟེ། ཞེས་དང་། སྒྱུ་མ་མཁན་བཟང་པོས་ཞུས་པའི་མདོ་ལས། གང་གིས་སྦྱིན་པ་གང་ལ་བཏང་། །སྦྱིན་པ་ཇི་ལྟར་མི་དམིགས་པ། །སྦྱིན་པ་མཉམ་པ་དེ་ཉིད་ཀྱིས། །བཟང་པོ་ལ་ནི་ཡོངས་རྫོགས་ཤོགས། །ཅེས་གསུངས་ཤིང་། དེ་བཞིན་དུ། ཏིང་འཛིན་རྒྱལ་པོ་ལས། ཇི་ལྟར་མཚན་མོ་ཆུ་ཡི་ཟླ་བ་དག །དྭངས་ཤིང་རྙོག་པ་མེད་པའི་མཚོར་སྣང་ཡང། །ཆུ་ཟླ་སྟོང་པ་གསོབ་སྟེ་སྙིང་པོ་མེད། །ཆོས་རྣམས་ཐམས་ཅད་དེ་ལྟར་ཤེས་པར་གྱིས། །ཇི་ལྟར་ཆུ་ཤིང་རློན་པའི་སྡོང་པོ་ལ། །སྙིང་པོ་འདོད་ཕྱིར་དེ་དག་གཤགས་གྱུར་ཀྱང་། །ནང་དང་ཕྱི་རོལ་ཀུན་ན་སྙིང་པོ་མེད། །ཆོས་རྣམས་ཐམས་ཅད་དེ་ལྟར་ཤེས་པར་གྱིས། །ཞེས་དང་། ལྗོན་པས་ཞུས་པའི་མདོ་ལས་ཀྱང་། མེ་ལོང་དཀྱིལ་འཁོར་ཡང་དག་ལ། །ཇི་ལྟར་རང་བཞིན་མེད་པ་ཡི། །བཞིན་གྱི་དཀྱིལ་འཁོར་སྣང་བ་ལྟར། །ལྗོན་པ་ཆོས་རྣམས་ཤེས་པར་གྱིས། །ཞེས་གསུངས། གང་དམིགས་པའམ་ཞེན་པས་དགེ་རྩ་བདེན་བདེན་པོར་ཤེས་པ་ནི་མི་བཟང་སྟེ། ཡུམ་ལས། རབ་འབྱོར། དམིགས་པ་དང་བཅས་པའི་འདུ་ཤེས་ཅན་རྣམས་ལ་རྗེས་སུ་མཐུན་པའི་བཟོད་པ་ཡང་དཀའ་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལྟ་སྨོས་ཀྱང་ཅི་དགོས། ཞེས་དང་། སྡུད་པ་ལས། ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། །ཞེས་དང་། ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །འོན་ཏེ་མཚན་མ་ཡོད་ན་བྱང་ཆུབ་བསྔོ་མ་ཡིན། །ཞེས་གསུངས་པས་དམིགས་པ་དང་ཞེན་པ་མེད་པའི་ཚུལ་གྱིས་བསྔོ་སྟེ། མངོན་རྟོགས་རྒྱན་ལས། དེ་ནི་དམིགས་མེད་རྣམས་པ་ཅན། །ཕྱིན་ཅི་མ་ལོག་མཚན་ཉིད་དོ། །ཞེས་གསུངས། དེ་ལྟ་བུའི་འཁོར་གསུམ་ཡོངས་སུ་དག་པའི་བསྔོ་བ་མཚན་ཉིད་པ་ནི། ས་དང་པོ་ནས་བརྩམས་ཏེ་འཕགས་པ་རྣམས་ཁོ་ན་ལ་ཡོད་ཀྱིས། མོས་སྤྱོད་ཀྱི་ལམ་པས་དེ་ཉིད་སྒྲ་ཇི་བཞིན་པར་ལམ་དུ་སློང་དཀའ་ནའང་། རྗེ་བཙུན་འཇམ་དཔལ་དབྱངས་དང་། ཀུན་ཏུ་བཟང་པོ་ལ་སོགས་པའི་རྒྱལ་བ་སྲས་དང་བཅས་པ་རྣམས་ཀྱིས། ཇི་ལྟར་བསྔོ་བར་མཛད་པ་དེ་བཞིན་དུ་བདག་གིས་དགེ་བའི་རྩ་བ་འདི་ཡང་ཡོངས་སུ་བསྔོ་བར་བགྱིའོ་སྙམ་པའི་འདུན་པ་དྲག་པོ་རྩེ་གཅིག་ཏུ་བསྐྱེད་ན་རྗེས་མཐུན་པར་འགྱུར་པར་གསུངས་སོ། །བསྔོ་བ་རང་གི་ངོ་བོ་ནི། དགེ་རྩ་བྱང་ཆུབ་ཏུ་འདུན་པ་སྒྱུར་བའི་བློ་དང་། ཚིག་ཁྱད་པར་ཅན་གྱི་མཐུ་བསྡོམས་པ་སྟེ། འཇམ་དཔལ་ཞིང་གི་ཡོན་ཏན་བཀོད་པ་ལས། ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་ནི་དེ་བཞིན་ཉིད་དུ་འགྲུབ། །ཅེས་གསུངས། འོ་ན་བསྔོ་བ་དང་སྨོན་ལམ་གྱི་ཁྱད་པར་གང་ཞེ་ན། མཁས་པ་ཕལ་ཆེར། དེ་གཉིས་དོན་གཅིག་མིང་གི་རྣམ་གྲངས་སུ་བཞེད་པའང་སྣང་མོད། རང་ལུགས་ཀུན་མཁྱེན་ཆོས་ཀྱི་རྒྱལ་པོས་ནི། རྒྱུ་དགེ་རྩ་སྔོན་དུ་སོང་ནས་ཚིག་དང་སྨོན་པས་བསྡོམས་པ་ནི་བསྔོ་བ་ཡིན་ལ། རྒྱུ་དགེ་རྩ་སྔོན་དུ་མ་སོང་བར་སྨོན་པ་ནི་སྨོན་ལམ་དུ་བཞེད་དོ། །ངེས་ཚིག་ནི། པ་རི་ཎ་ཏ་ཞེས་པའི་སྒྲ་ལས་ཡོངས་སུ་བསྒྱུར་བའམ་སྤེལ་བ་ལ་འཇུག་པས་དམན་པ་མཆོག་ཏུ་བསྒྱུར་བ་དང་། ཉུང་ངུ་མང་པོར་སྤེལ་བའི་དོན་གྱི་བསྔོ་བ་ཞེས་བྱ། དེ་ཡང་བསྔོ་བ་བྱེད་པ་པོ་ནི། བྱང་སར་ཚུལ་ཁྲིམས་རྣམ་དག་གི་ཕན་ཡོན་འཆད་པའི་སྐབས་སུ། ཇི་ལྟར་སྨོན་པ་དེ་བཞིན་འགྲུབ་པ་དང་། །ཞེས་དང་། འཇམ་དཔལ་ཞིང་གི་བཀོད་པ་ལས། ཚུལ་ཁྲིམས་ལྡན་པས་སྨོན་པ་འགྲུབ། །ཅེས་ཚུལ་ཁྲིམས་རྣམ་པར་དག་པའི་གང་ཟག་གིས་བསྔོས་ན་ཇི་ལྟར་སྨོན་པ་བཞིན་འགྲུབ་པར་གསུངས་པས། ཁྲིམས་ལྡན་གྱི་དགེ་སློང་བཞི་སྡེ་ལ་སོགས་པ་གང་ཡང་རུང་བས། བསྔོ་བ་འགྲུབ་པའི་དཔང་པོ་ནི། རིང་བསྲེལ་ཅན་གྱི་མཆོད་རྟེན་དྲུང་། བདེ་བར་གཤེགས་པའི་བསྔགས་པས་འགྲུབ། །ཅེས་གསུངས་པས་རྟེན་ཁྱད་པར་དུ་འཕགས་པའི་དྲུང་ངམ། མ་འཛོམས་ན། སྤྱོད་འཇུག་ལས། སངས་རྒྱས་བྱང་ཆུབ་སེམས་དཔའ་དག །ཀུན་ཏུ་ཐོགས་མེད་གཟིགས་པར་ལྡན། །དེ་དག་ཀུན་གྱི་སྤྱན་སྔ་ན། །རྟག་པར་བདག་ནི་གནས་སོ་ཞེས། །ཞེས་གསུངས་པ་ལྟར། དགོངས་གསོལ་བརྗོད་པའི་ཚེ། རྫོགས་པའི་སངས་རྒྱས་བཅོམ་ལྡན་འདས་རྣམས་དང་། ས་ཆེན་པོ་ལ་རབ་ཏུ་བཞུགས་པའི་བྱང་ཆུབ་སེམས་དཔའི་ཚོགས་དང་བཅས་རྒྱལ་བའི་དཀྱིལ་འཁོར་ཚད་མེད་པ་ཆོས་ཀྱི་དབྱིངས་ཀྱི་མཐའ་གཏུགས་པའི་ཞིང་ཁམས་རྒྱ་མཚོ་རྒྱས་པར་བཀང་སྟེ་བཞུགས་པར་མོས་པ་དེ་དག་གི་དྲུང་དུ་བདག་ཉིདསྣང་བར་བྱས་ཏེ། བླ་མ་དཀོན་མཆོག་ལ་དང་བའི་དད་པ། སེམས་ཅན་ཐམས་ཅད་ལ་དམིགས་པའི་སྙིང་རྗེའི་ཤུགས་ཆེན་པོ། དགེ་བའི་རྩ་བ་ཐམས་ཅད་བླ་ན་མེད་པའི་བྱང་ཆུབཏུ་བསྔོ་བའི་འདུན་པ་དྲག་པོ་སྟེ་འདུ་ཤེས་གསུམ་དང་མ་བྲལ་བའི་ལྷག་བསམ་རྩེ་གཅིག་པའི་སྒོ་ནས་དམ་པ་སྔ་མ་རྣམས་ཀྱིས་མཛད་པའི་བསྔོ་བའི་ཚིག་ཅི་རིགས་པ་དང་། ཁྱད་པར་འཕགས་པ་བཟང་པོ་སྤྱོད་པའི་སྨོན་ལམ་ཉིད་གདོན་པར་བྱ་སྟེ། དེའི་ཕན་ཡོན་གྱི་ཁྱད་པར་ཡང་། རང་གཞུང་ལས། གང་ཡང་ཕྱོགས་བཅུའི་ཞིང་རྣམས་མཐའ་ཡས་པ། །རིན་ཆེན་བརྒྱན་ཏེ་རྒྱལ་བ་རྣམས་ལ་ཕུལ། །ལྷ་དང་མི་ཡི་བདེ་བའི་མཆོག་རྣམས་ཀྱང་། །ཞིང་གི་རྡུལ་སྙེད་བསྐལ་པར་ཕུལ་བ་བས། །གང་གིས་བསྔོ་བའི་རྒྱལ་པོ་འདི་ཐོས་ནས། །བྱང་ཆུབ་མཆོག་གི་རྗེས་སུ་རབ་མོས་ཤིང་། །ལན་གཅིག་ཙམ་ཡང་དད་པ་བསྐྱེད་པ་ན། །བསོད་ནམས་དམ་པའི་མཆོག་ཏུ་འདི་འགྱུར་རོ། །ཞེས་པ་ནས། བྱང་ཆུབ་མཆོག་ལ་སོམ་ཉི་མ་བྱེད་ཅིག །ཞེས་པའི་བར་གྱིས་རྒྱ་ཆེར་བསྔགས་པ་བཞིན་ཤེས་པར་བྱའོ། །ཞར་བྱུང་དུ་དེང་སང་གི་དུས་ཀྱི་འགྱུར་བ་མི་བཟད་པ་ལ་བསམ་སྟེ་བདེན་ཚིག་སྨོན་ལམ་དུ་གསོལ་བ། སྙིང་རྗེའི་སྤྱན་གྱིས་རྟག་པར་འགྲོ་ལ་གཟིགས། །བྱམས་པའི་གོ་ཆས་བདུད་རིས་འཚེ་བ་སྐྱོབ། །འགྲོ་བའི་བླ་མ་ཐུབ་དབང་སྲས་དང་བཅས། །དེང་འདིར་བདེན་ཚིག་འགྲུབ་པའི་དཔང་པོ་མཛོད། །མགོན་ཁྱོད་སློབ་པ་ལམ་དུ་ཞུགས་པའི་སྐབས། །སྲོག་ཆགས་གྲོག་སྦུར་ཙམ་ལའང་གནོད་མ་བསྐྱལ། །ལན་གྲངས་དུ་མར་ཉིད་ཀྱི་སྐུ་སྲོག་གིས། །འགྲོ་མང་སྲོག་གི་ཉེན་ལས་སྐྱབས་ལགས་ན། །བདེན་པ་དེ་ཡིས་སྐལ་ངན་དུས་ཀྱི་ཁུག །མི་བསྲུན་མཐའ་དམག་དུས་འཁྲུགས་དཔུང་ལ་སོགས། །མཚོན་གྱི་ཆད་པས་ཡིད་མི་བདེ་གྱུར་པ། །གངས་ལྗོངས་མཐའ་དབུས་ཀུན་ཏུ་ཞི་གྱུར་ཅིག །བཀྲེན་ལ་རྟ་གླང་དེ་བཞིན་རྒྱལ་སྲིད་གཉེན། །དབུ་དང་ཡན་ལག་སྦྱིན་པས་ཚིམ་མཛད་ན། །བདེན་པ་དེ་ཡིས་སྐལ་ངནདུས་འཁྲུགས་རྐྱེན། །ཉམ་ཐག་མུ་གེའི་འཇིགས་པ་མི་འབྱུང་ཤོག །འགྲོ་ལ་བརྡེག་སྤངས་ནད་ཀྱིས་ཉེན་པ་ལ། །སྨན་དང་ནད་གཡོག་སྲོག་གི་སྦྱིན་བསྩལ་ན། །བདེན་པ་དེ་ཡིས་མཐའ་དམག་དུས་འཁྲུགས་རྐྱེན། །ཉམ་ཐག་ནད་ཀྱི་འཇིགས་པ་མི་འབྱུང་ཤོག །དམ་ཆོས་ཚིག་བཞི་རེའི་ཕྱིར་རྒྱལ་སྲིད་ལུས། །ཡོངས་གཏོང་འཚོལ་དང་བསྲུང་ལ་བརྩོན་གྱུར་ན། །བདེན་པ་དེ་ཡིས་མཐའ་དམག་དུས་འཁྲུགས་རྐྱེན། །རྒྱལ་བསྟན་རིན་ཆེན་ཉམས་པར་མ་གྱུར་ཅིག །གྲངས་མེད་གསུམ་དུ་ཚོགས་གཉིས་གོམས་པའི་མཐུས། །བྱང་ཆུབ་ཤིངདྲུང་བདུད་བཅོམ་སངས་རྒྱས་ན། །བདེན་པ་དེ་ཡིས་མཐའ་དམག་དུས་འཁྲུགས་སོགས། །མི་བསྲུན་བདུད་ཀྱི་སྟོབས་རྣམས་ཉམས་གྱུར་ཅིག །རིགས་ཅན་གསུམ་གྱི་འགྲོ་ལ་ཁམས་དབང་བཞིན། །ཟབ་རྒྱས་བདུད་རྩིའི་སྒོ་འཕར་ཕྱེས་ལགས་ན། །བདེན་པ་དེ་ཡིས་མཐའ་དམག་དུས་འཁྲུགས་རྐྱེན། །འགྲོ་རྣམས་བསམ་སྤྱོད་ལོག་པར་མ་གྱུར་ཅིག །མི་དང་མི་མིན་འཕགས་པའི་ཚོགས་རྣམས་ལ། །བསྟན་པའི་གཉེར་ཁ་གཏད་ཅིང་སྐྱོང་ལགས་ན། །བདེན་པ་དེ་ཡིས་མཐའ་དམག་དུས་འཁྲུགས་རྐྱེན། །དགེ་འདུན་བཀུར་སྟི་ཉམས་པར་མ་གྱུར་ཅིག །མདོར་ན་དོན་གཉིས་མཐར་ཕྱིན་སངས་རྒྱས་ནས། །འགྲོ་ལ་ཕན་བདེའི་ལམ་བཟང་སྣང་མཛད་ན། །བདེན་པ་དེ་ཡིས་མཐའ་དམག་དུས་འཁྲུགས་ཞི། །རྫོགས་ལྡན་དུས་བཞིན་སྣོད་བཅུད་འབྱོར་གྱུར་ཅིག །སྲིད་མཐའི་བར་དུ་ཐུབ་བསྟན་ནོར་བུའི་སྒྲོམ། །འགྲོ་བསོད་རྒྱལ་མཚན་རྩེ་ནས་གཡོ་མིན་པར། །གནས་སྐབས་མཐར་ཐུག་ཕན་བདེའི་ཆར་རྒྱུན་གྱིས། །ཐར་གྲོལ་ཡོན་ཏན་འབྱོར་དགུས་ཕྱུག་གྱུར་ཅིག །དེ་ལྟར་གཡོ་ཟོལ་མེད་པའི་ལྷག་བསམ་གྱིས། །བདེན་ཚིག་སྨོན་ལམ་གསོལ་བའི་འབྲས་བཟང་ཕུལ། །དུས་ལས་ཡོལ་མིན་རྟེན་འབྱུང་ཟབ་མོའི་ཚུལ། །གེགས་མེད་མངོན་སུམ་སྣང་བར་མཛད་དུ་གསོལ། །ཞེས་ལྷག་པའི་བསམ་པ་རྩེ་གཅིག་པས་གང་ཤར་གསོལ་བ་བཏབ་པ་སྟེ་ས་ཁོངས་བཞི་པ་གཞུང་དོན་ལེགས་པར་སྨོས་ཟིན་ཏོ། །། །