གསུམ་པ་ཐ་མར་དགེ་བ་མཇུག་གི་དོན་ལ་ཚུལ་འདི་ལྟ་འབྲི་བའི་དགོས་པ།
ད་ནི་གསུམ་པ་ཐ་མར་དགེ་བ་མཇུག་གི་དོན་ལ་ཚུལ་འདི་ལྟ་འབྲི་བའི་དགོས་པ་ནི། སྤྱིར། མ་བརྒལ་བས་ནི་བསྒྲལ་མི་ནུས། །མ་གྲོལ་བས་ནི་སྒྲོལ་མི་ནུས། །ལོང་བས་ལམ་ཡང་སྟོན་མི་ནུས། །ཞེས་པ་ལྟར་བདག་ལྟ་བུའི་མང་དུ་མ་ཐོས་ཤིང་མི་མཁས་ལ། རང་རྒྱུད་ཉོན་མོངས་པའི་འཆིང་བ་བརྒྱ་ཕྲག་གིས་བཅིངས་ཏེ་འདིར་སྣང་ཆོས་བརྒྱད་དང་། མི་ཚེ་དཀོར་ནག་ལ་ཟད་པ་ཤིང་གི་རང་འཐག་དང་ཁྲོན་པའི་ལག་འགྲོ་ལྟ་བུའི་ངང་ཚུལ་ཅན་གྱིས་གཞེན་བསྐུལ་འདེབས་པ་ནི་སྙིགས་མའི་རང་མཚང་དང་རང་གཞན་ཁྲེལ་བའི་རྒྱུ་ལས་མ་འདས་ཤིང་། བྱེ་བྲག་ཏུའང་། ཀླུའི་རྒྱལ་པོ་རྔ་སྒྲའི་ཚིགས་བཅད་ལས། དང་བ་རྙེད་པ་དཀའ་བ་སྟེ། །རྒུད་པ་མང་བ་ཡིན་པའི་ཕྱིར། །སེམས་ཅན་དམ་པར་གྱུར་པའི་ཚེ། །ཁ་རོག་འདུག་ན་བདེ་བ་འཐོབ། །གལ་ཏེ་ནོར་མེད་ཕྱོགས་ཉུང་ངམ། །མཛའ་བཤེས་ཕྱོགས་ཀྱིསྟོབས་ཆུང་ངམ། །དགྲ་བོ་ཕྱོགས་ཀྱི་སྟོབས་ལྡན་ཚེ། །ཁ་རོག་འདུག་ན་བདེ་བ་འཐོབ། །མི་རྣམས་ཆོས་མིན་བྱེད་པ་དང་། །འདོད་པའི་ལོངས་སྤྱོད་མངོན་དགའ་ཞིང་། །དད་ཆུང་ངོ་ཚ་མེད་པའི་ཚེ། །ཁ་རོག་འདུག་ན་བདེ་བ་འཐོབ། །མི་རྣམས་ཁྲོ་བར་བྱེད་པ་དང་། །གནོད་སེམས་མང་པོར་གྱུར་པ་དང་། །གཞན་ལའང་གདུག་པའི་ཚུལ་ལྡན་ཚེ། །ཁ་རོག་འདུག་ན་བདེ་བ་འཐོབ། །མི་རྣམས་དད་པ་མེད་པ་དང་། །ཁྭ་བཞིན་མུ་ཅོར་སྨྲ་བ་དང་། །སྒྱུ་དང་གཡོ་དག་བྱེད་པའི་ཚེ། །ཁ་རོག་འདུག་ན་བདེ་བ་འཐོབ། །མི་རྣམས་ཚུལ་ཁྲིམས་འཆལ་བ་དང་། །གཏུམ་ཞིང་གཟུ་ལུམ་བྱེད་པ་དང་། །བདེན་པའི་ཆོས་དང་མི་ལྡན་ཚེ། །ཁ་རོག་འདུག་ན་བདེ་བ་འཐོབ། །མི་རྣམས་ངང་ཚུལ་ངན་པ་དང་། །ལོག་པའི་ལྟ་བས་བཅོམ་པ་དང་། །གཏུམ་ཞིང་སྡང་བར་གྱུར་པའི་ཚེ། །ཁ་རོག་འདུག་ན་བདེ་བ་འཐོབ། །ངོ་ཚ་མེད་ཅིང་བརྫུན་དུ་སྨྲ། །དོན་མེད་ཕྲ་མ་ཚིག་རྩུབ་དང་། །དབྱེན་དང་འཁྱལ་བ་སྨྲ་བའི་ཚེ། །ཁ་རོག་འདུག་ན་བདེ་བ་འཐོབ། །ཡ་རབས་ཚུལ་མེད་ཤིན་ཏུ་ཁེངས། །ང་རྒྱལ་གྱིས་ནི་འགྱིང་བ་དང་། །ཕྲག་དོག་བརྐམ་དང་ཚུལ་ཉམས་ཚེ། །ཁ་རོག་འདུག་ན་བདེ་བ་འཐོབ། །ཅེས་གསུངས་པ་ཐོག་ཏུ་བབས་པས་སྨྲ་བའི་དུས་ཀྱང་མིན་པར་ཤེས་མོད། འོན་ཀྱང་ཆེད་དུ་བརྗོད་པའི་ཚོམ་ལས། ཉེས་པར་སྤྱད་པ་བྱས་པས་གདུང་འགྱུར་ཞིང་། །ངན་འགྲོར་སོང་བའི་འོག་ཏུ་གདུང་བར་འགྱུར། །ལེགས་པར་སྤྱད་པ་བྱས་པས་དགའ་འགྱུར་ཞིང་། །བདེ་འགྲོར་སོང་བའི་འོག་ཏུའང་དགའ་བར་འགྱུར། །ཕྱིས་ནས་གདུང་འགྱུར་དེ་བྱེད་པས། །གཉིས་ན་ཉེས་བྱས་མ་བྱས་སླ། །གདུང་བར་མི་འགྱུར་དེ་བྱ་སྟེ། །ལེགས་པར་སྤྱད་པ་བྱས་ན་རུང་། །མཁས་དང་བྱིས་པ་འདྲེས་པ་ལས། །མ་སྨྲས་ཤེས་པར་མི་འགྱུར་བས། །ཞི་བའི་གོ་འཕང་སྨྲོས་ཤིག་དང་། །སྨྲས་པ་ཡིས་ནི་ཤེས་པར་འགྱུར། །ལེགས་བཤད་དྲང་སྲོང་རྒྱལ་མཚན་ཏེ། །དྲང་སྲོང་རྒྱལ་མཚན་ཆོས་ཡིན་པས། །ཆོས་ནི་བཤད་པས་གསལ་བྱ་ཞིང་། །དྲང་སྲོང་རྒྱལ་མཚན་བསྒྲེང་བར་གྱིས། །མ་སྨྲས་ན་ཡང་སྨོད་བྱེད་ཅིང་། །མང་དུ་སྨྲས་ན་སྨོད་པར་བྱེད། །དལ་བུས་སྨྲས་ཀྱང་སྨོད་བྱེད་དེ། །འཇིག་རྟེན་ན་ནི་མི་སྨད་མེད། །གཅིག་ཏུ་སྨད་པར་བྱ་བ་དང་། །གཅིག་ཏུ་བསྟོད་པར་བྱ་བའི་མི། །དེ་ལྟར་ཡོད་པ་མ་ཡིན་ཏེ། །བྱུང་བར་མ་གྱུར་འབྱུང་མི་འགྱུར། །ཞེས་སོགས་གསུངས་པའི་ཚུལ་ལ་བསམས་ཏེ། རྨད་བྱུང་བྱང་ཆུབ་སེམས་ཀྱིས་ཐུགས་རྒྱུད་ཡོངས་སུ་གཏམས་པས་གཞན་ཕན་གྱི་སྒོ་འཕར་བརྒྱ་ཕྲག་ལ་འཇུག་པའི་དགེ་བའི་བཤེས་གཉེན་འཕགས་པའི་མཚན་ཅན་རིན་པོ་ཆེ་དང་། དད་དང་སྙིང་རྗེ་སོགས་ཐེག་པ་ཆེན་པོའི་རིགས་ཁམས་ཡོངས་སུ་བརྟས་ཤིང་། རྡོ་རྗེ་སློབ་དཔོན་ལ་ཁོང་གི་སྙིང་དང་དཔྲལ་བའི་མིག་ལྟར་བཀུར་བའི་ཚེ་བློས་བཏང་གི་སྤང་བ་པ་རང་སློབ་སྒྲུབ་བླ་ཆོས་ཉིད་རྒྱ་མཚོ་ཟུང་གིས་དངོས་བརྒྱུད་ནས་ནན་གྱིས་བསྐུལ་མ་མཛད་པའི་ཐུགས་ཀྱི་དགོངས་པ་བསྐང་བའི་སླད་དང་། སྙིང་རྗེ་པད་དཀར་ལས་ཀྱང་། ཀུན་དགའ་བོ་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པ་ཡང་དག་པ་རྫོགས་པའི་བྱང་ཆུབ་འདི་ནི་གནས་གསུམ་གྱིས་མེད་པར་འགྱུར་རོ། །གསུམ་གང་ཞེ་ན། མ་དད་པ་དང་། མི་སྒྲུབ་པ་དང་། མི་སྟོན་པའོ། །ཞེས་གསུངས་པའི་ཉེས་པའང་འགོག་པའི་ཆེད་དང་། དཀོན་བརྩེགས་ལས། དགེ་བ་དང་ནི་སྡིག་པའི་ཆོས། །མ་ཐོས་པས་ནི་ཤེས་མི་འགྱུར། །ཐོས་ནས་ཆོས་རྣམས་རྣམ་པར་ཤེས། །ཐོས་ནས་སྡིག་པ་བརྟེན་མི་བྱེད། །ཐོས་ནས་སྡིག་པ་སྤོང་བར་བྱེད། །ཐོས་ནས་མྱ་ངན་འདས་པ་ཐོབ། །ཐོས་ནས་ཤེས་རབ་འཕེལ་བར་འགྱུར། །ཤེས་རབ་ཀྱིས་ནི་དོན་རྣམས་དཔྱོད། །དོན་ཐོབ་ནས་ནི་བདེ་བ་ཐོབ། །དེ་ཐོབ་ནས་ནི་ཡིད་གཞུངས་ཏེ། །ཚེ་འདི་ལ་ནི་མྱ་ངན་འདའ། །ཞེས་གསུངས་པ་ལྟར་རང་དང་སྐལ་མཉམ་གྱི་རྨོངས་པ་དག་གིས་མཐོང་ན་དེ་དག་ལ་ཅུང་ཟད་རེ་ཕན་པའང་སྲིད་སྙམ་སྟེ། སེམས་དགེ་བ་ལ་ཉེས་པ་མེད། །ཅེས་པའི་ཚུལ་གྱིས། མ་བཅས་པ་ནི་མི་བཅའ། བཅས་པ་ནི་མི་གཞིག་ཅེས་ཆེད་དུ་བསྔགས་པ་ལྟར། བདེ་བར་གཤེགས་པའི་བཀའ་ལུང་ཉུང་ཤས་ཤིག་བསྡུ་བར་བྱས་པ་སྟེ། དེ་ཡང་གཞུང་དམ་པར། དོན་གྱི་དབང་དང་མི་འགལ་བའི་དོན་ཉི་ཚེ་བཏུས་ཏེ། གཏམ་དུ་ཡང་བརྗོད་ན་མདོ་སྡེའི་མཐའ་མ་རུངས་པར་མི་འགྱུར་བར་རྗེས་སུ་གནང་བ་བཞིན། གོ་བདེ་བ་དང་ཚིག་ཚོགས་ཉུང་བ་གཙོ་བོར་བཏོན་ནས་ལུང་སྦྱོར་ཁ་ཅིག་ཚིག་སྣ་ཅུང་ཟད་བསྟུངས་ཤིང་དོན་གྱི་གནད་ཚང་བར་བགྱིས་ཁུལ་ལགས་ཏེ། རྒྱན་སྟུག་པོ་བཀོད་པ་ལས། ཡིད་ཆེས་ལུང་དང་མི་ལྡན་པར། །ཆོས་རྣམས་སྟོན་པར་བྱེད་པ་ནི། །མཚན་ཉིད་རྣམ་པར་རྟོག་པ་ཡིས། །བདག་ཀྱང་ཆུད་གསོན་གཞན་ཆུད་གསོན། །ཞེས་གསུངས་པས་སྤྱིར་ཡང་ལུང་ཚད་མ་ཉིད་གལ་ཆེ་ཞིང་། ཁྱད་པར་དུའང་གཞལ་བྱ་ཤིན་ཏུ་ལྐོག་གྱུར་གྱི་གནས་རྣམས་ཡིད་ཆེས་ཀྱི་ལུང་གི་སྒྲོན་མ་ལ་བརྟེན་ནས་རྗེས་སུ་དཔོག་དགོས་པའི་ཕྱིར་ཏེ། ཇི་སྐད་དུ། ལུང་ནི་ཡིད་ཆེས་ཚིག་ཡིན་ཏེ། །ཉེས་པ་ཟད་པས་རྫུན་གྱི་ཚིག །སྨྲ་བར་མི་འགྱུར་རྒྱུ་མེད་ཕྱིར། །ཉེས་ཟད་ལུང་དུ་ཤེས་པར་བྱ། །ཞེས་དང་། ཏིང་འཛིན་རྒྱལ་པོ་ལས། ཟླ་བ་སྐར་མ་བཅས་པ་གནས་ལྷུང་ཞིང་། །རི་དང་གྲོང་དུ་བཅས་པའི་ས་ཞིག་ལ། །ནམ་མཁའི་ཁམས་ནི་རྣམ་པར་གཞན་འགྱུར་ཀྱང་། །ཁྱོད་ཀྱིས་མི་བདེན་པ་ཡི་ཚིག་མི་གསུངས། །ཞེས་དང་། དྲན་པ་ཉེར་བཞག་ལས། མེ་ནི་གྲང་བར་འགྱུར་ཡང་སྲིད། །རླུང་ནི་ཞགས་པས་ཟིན་ཡང་སྲིད། །ཉི་ཟླ་ཐང་ལ་རྒྱུ་ཡང་སྲིད། །ལས་ཀྱི་རྣམ་སྨིན་བསླུ་མི་སྲིད། །ཅེས་གསུངས་པ་བཞིན་ཏེ། མདོར་ན་འཕགས་པ་སྤྱན་རས་གཟིགས་ཀྱི་མདོ་ལས། བཅོམ་ལྡན་འདས་ལ་དད་པའི་སེམས་བསྐྱེད་ན། །འདི་འདྲའི་དཔལ་འདི་ཕྱིར་ཞིང་མྱོང་བར་འགྱུར། །ང་ཡི་བྱ་བ་འདི་ནི་བརྗོད་པར་བྱ། །ངས་བརྗོད་འདི་ལ་ཐེ་ཚོམ་མ་བསྐྱེད་ཅིག །སངས་རྒྱས་བཀའ་སྤངས་མནར་མེད་འགྲོ་འགྱུར་ཞིང་། །ཕྱིན་ཆད་སྡུག་བསྔལ་ཉོན་མོངས་གྱུར་ཏ་རེ། །ཞེས་དང་། མདོ་སྡེ་བསྐལ་པ་བཟང་པོ་ལས། ནམ་མཁའ་དག་ནི་ཚད་དག་བཟུང་བ་དང་། །རྒྱ་མཚོ་ཆེན་པོ་མཐར་གྱིས་བགྲང་ནུས་ཀྱི། །སངས་རྒྱས་དག་ལ་དད་པའི་ཤས་ཙམ་གྱི། །བསོད་ནམས་ཚད་བཟུང་བར་ནི་ནུས་པར་དཀའ། །ཇི་སྲིད་མྱ་ངན་འདས་བདེ་མ་རེག་པར། །དེ་སྲིད་མི་ཁོམ་སྡུག་བསྔལ་མྱོང་མི་འགྱུར། །དེ་བས་རྒྱལ་བ་བསོད་ནམས་ཞིང་ཐོབ་ནས། །བག་ཡོད་མིས་ནི་བཀུར་སྟིས་མཆོད་པར་གྱིས། །ཞེས་སངས་རྒྱས་ཉིད་ཀྱིས་རྗེས་སུ་འདོམས་པར་མཛད་པ་ལགས་པས་རྒྱལ་བའི་བཀའ་ལ་ཡིད་ཆེས་པར་བྱས་ཏེ། དཀོན་མཆོག་གི་རྟེན་གསརདུ་བཞེངས་པ་དང་། རྙིང་པ་འཆོས་པ་དང་། ཕྱོགས་གང་དུ་བཞུགས་པ་ལ་དད་པ་དག་སྣང་བསྐྱེད་དེ་ཕྱག་བསྐོར་མཆོད་པ་དང་དམ་ཆོས་འཛིན་པ་སོགས་ལ་བརྩོན་པ་བསྐྱེད་ན་གནས་སྐབས་མཐར་ཐུག་ཀུན་ཏུ་ལེགས་ཚོགས་ཀྱི་དཔལ་ཡོན་གོང་ནས་གོང་འཕེལ་དུ་འགྱུར་བ་ཡིན་པས་སྙིང་ཐག་པ་ནས་འབད་པར་མཛོད་ཅིག་ཅེས་ཐལ་མོ་སྦྱར་ཏེ་མཆོག་དམན་ཀུན་ལ་གསོལ་བ་འདེབས་པ་ལགས། སླར་ཡང་སྨྲས་པ། ཀྱེ་ཧོ་གསོན་དང་སྐལ་བཟང་སྐྱེ་བོའི་ཚོགས། །སྲིད་ན་ཕན་བདེའི་དངོས་པོ་ཇི་སྙེད་པ། །དེ་ཀུན་དཀོན་མཆོག་མཆོད་ལས་བྱུང་བས་ན། །གྲོགས་དག་ལའུར་བརྩོན་པའི་དཔུང་བསྐྱེད་འཚལ། །མཐོ་རིས་ཡོན་ཏན་བདུན་གྱི་འཁྲི་ཤིང་རྩེར། །ཕུན་ཚོགསསྡེ་བཞིའི་མེ་ཏོག་ཆེས་བཀྲ་བས། །སྐྱེ་དགུའི་ཡིད་ཀྱི་རྐང་དྲུག་འགུགས་པའི་དཔལ། །སྔོན་བསགས་བཟང་པོའི་མཐུ་ལས་གཞན་གྱིས་མིན། །བསོད་ནམས་བྱེ་བའི་ཟོང་གིས་ཁུག་མིན་པའི། །མཆོག་གསུམ་མཚན་སྙན་ནོར་བུའི་ཅོད་པཎ་ཆེ། །དད་གསུམ་གཙུག་ན་འཆིང་བའི་སྐལ་བཟང་མཆོག །ཨེ་མ་མངོན་སུམ་ཐོབ་འདི་རྨི་ལམ་མིན། །དད་གསུམ་དབྱར་རྔའིསྒྲ་ཡིས་བསྐུལ་མཁས་ན། །གྲུབ་གཉིས་འདོད་དགུའི་ཆར་རྒྱུན་འཇོ་བ་ཡིས། །ཕན་བདེའི་མྱུ་གུ་ཅི་དགར་བསྐྱེད་མཛད་པའི། །ཡ་མཚན་ངོ་མཚར་གཟུགས་ཅན་བཞིན་དུ་རྒྱུ། །མཉམ་པ་ཆེན་པོའི་དགོངས་སྤྱོད་གདེང་གྱུར་པའི། །བློ་མཆོག་མངའ་རྣམས་གཞན་རྐྱེན་ལྟོས་མིན་ཡང་། །དང་པོའི་ལས་ཅན་ཚོགས་གཉིས་བསགས་པའི་རྟེན། །འཆི་མེད་དཔག་བསམ་ལྗོན་པས་དཔེར་བྱ་མིན། །དོན་དམ་ཆོས་སྐུ་སྤྲོས་མཚན་ཡུལ་མིན་ཡང་། །ཀུན་རྫོབ་འགྲོ་ངོར་མཚན་བཅས་ཕྱག་རྒྱའི་འཕྲུལ། །རང་སྐལ་འཚམ་པར་ཇི་སྙེད་འཆར་བའི་སྤྲིན། །ཞིང་ཁམས་རྒྱ་མཚོར་རྒྱས་པར་དཀྲིགས་འདི་མཚར། །གང་གང་འདུལ་ལ་དེ་དེར་སྟོན་པའི་འཕྲུལ། །རྟོག་མེད་ལྷུན་གྲུབ་རྒྱལ་བའི་ཕྲིན་ལས་ཕུལ། །རྩོལ་མེད་འཇུག་པའི་གསང་བ་ཟབ་མོའི་ཚུལ། །ཚུར་མཐོང་བྱིས་པའི་བློ་ཡིས་གཞལ་བྱ་ཅི། །རྒྱལ་བའི་ཐུགས་བསྐྱེད་སྨོན་པའི་ཆུ་ཤེལ་དབང་། །འགྲོ་བསོད་དགེ་བའི་རྫིང་བུ་དྭངས་པའི་དཔལ། །ལྷན་ཅིག་འཚོགས་ལས་སྤྲུལ་པའི་གཟུགས་བརྙན་འབུམ། །འགོག་མེད་འཆར་འདི་རྟེན་འབྱུང་ཆོས་ཉིད་ལགས། །ཡེ་ཤེས་གཅིག་ལས་གསེར་དང་གསེར་རྒྱན་བཞིན། །རྣམ་འཕྲུལ་དཔག་ཡས་ཆོས་དབྱིངས་མཉམ་པར་ཞུགས། །དེ་ལ་དམན་མཆོག་འཛིན་པ་བྱིས་པའི་མཚང་། །དག་སྣང་དཀར་པོའི་བློ་རྒྱ་བསྐྱེད་པར་རིགས། །དོན་དམ་སྤྲོས་མཚན་ཀུན་བྲལ་གཤིས་ལུགས་དང་། །ཀུན་རྫོབ་སྣ་ཚོགས་སྣང་བའི་རྒྱུ་འབྲས་ཆོས། །འགལ་མེད་རྟེན་འབྱུང་ཟབ་མོར་རོ་མཉམ་པ། །མཚུངས་མེད་རྒྱལ་བ་དགྱེས་པའི་ལམ་སྲོལ་ཡིན། །དེ་སླད་ཡང་དག་ལྟ་བའི་མིག་ལྡན་འགྲོ། །འགྲོ་སྒྲོལ་དམ་བཅའི་ཤིང་རྟ་ལ་ཞོན་ནས། །ཚོགས་གཉིས་དགེ་བའི་ལམདུ་ཞུགས་མཁས་ན། །རྣམ་མཁྱེན་གྲོང་ཁྱེར་བགྲོད་ལ་དཀའ་བ་ཅི། །རྒྱལ་རྣམས་ཏིང་འཛིན་རོལ་མོ་བསམ་འདས་ཀྱང་། །ཐུགས་རྗེའི་འཇུག་པ་གདུལ་བྱའི་ཡུལ་ལ་རག །རྒྱུ་རྐྱེན་རྟེན་འབྲེལ་མེ་དང་སྤྲ་བ་བཞིན། །ལེགས་པར་ཤེས་ནས་དད་པའི་དཔུང་བསྐྱེད་འཚལ། །བསྟན་འགྲོའི་བདེ་སྐྱིད་དཀོན་མཆོག་རྟེན་ལ་རག །བསོད་ནམས་རྒྱུན་ཆགས་མཐོ་རིས་ཨརྒྷའི་རྒྱུན། །རྣམ་མཁྱེན་རྒྱ་མཚོར་གཞོལ་ལས་གཞན་དུ་མིན། །སེམས་ཤེས་ཡོད་ན་འདི་ལ་བརྩོན་པར་རིགས། །མཚན་ཐོས་ཙམ་གྱིས་སྲིད་པའི་འཇིགས་ཀུན་འཕྲོག །ངན་པར་འབྲེལ་ཡང་འཁོར་བ་མཐའ་ཅན་བྱེད། །གུས་པས་སྲི་ཞུས་བསྙེན་རྣམས་སྨོས་ཅི་དགོས། །བཟང་པོས་འབྲེལ་རྣམས་འདུན་མ་ལེགས་པའི་རྩེ། །ཐོག་མཐའ་བར་དགེ་ཐེག་གསུམ་དམ་པའི་ཆོས། །སྲིད་པའི་རིམས་ནད་འཇོམས་པའི་སྨན་ཆེན་པོ། །བཤེས་གཉེན་འཚོ་བྱེད་མཁས་པའི་ཞལལུང་བཞིན། །བསྟེན་པར་མི་བྱེད་མི་གང་ཕྱུགས་ལས་བླུན། །གངས་ལྗོངས་བཤད་ཀ་བཅུ་དང་སྒྲུབ་བརྒྱུད་བརྒྱད། །བརྒྱུད་པའི་ཁུངས་དང་རྣམ་ཐར་སོ་སོར་ཆེ། །ཀུན་ཀྱང་ངེས་དོན་སྙིང་པོའི་ཀློང་དུ་གཅིག །ཆོས་སྤོང་དྲི་མས་མ་སྦགས་སྐལ་བ་བཟང་། །སྐྱོན་དུ་གང་སྣང་རང་བློ་ཉེས་པའི་སྐྱོན། །རང་རྒྱུད་དག་ན་མ་དག་མིང་མི་རྙེད། །མཁྲིས་ནད་ཅན་ལ་དུང་མདོག་སེར་པོར་སྣང་། །མིག་སྐྱོན་དག་ན་རབ་རིབ་གང་དུ་བཙལ། །ཐུབ་དབང་ལུང་རྟོགས་བསྟན་པའི་མ་ཎི་ཀ །བཤད་སྒྲུབ་རྒྱལ་མཚན་རྩེ་མོར་མཆོད་མཁས་ན། །སྙིགས་ལྔའི་རྒུད་པ་སེལ་ལ་དཀའ་བ་ཅི། །རྫོགས་ལྡན་མགྲོན་དུ་འགུགས་ཐབས་འདི་ཁོ་ན། །ཉིན་ཞག་གཅིག་ཙམ་བསླབ་ཁྲིམས་བསྲུང་བས་ཀྱང་། །ལྷ་མིའི་དཔལ་ཀུན་སུག་མཐིལ་གཏེར་བཞིན་འཐོབ། །ཐབས་ལ་མཁས་ན་རྣམ་གྲོལ་ཐག་མི་རིང་། །ངན་འགྲོའི་སྒོ་འཕར་གཅོད་ལསུ་མི་སྤྲོ། །ཟག་བཅས་དགེ་ཚོགས་དངོས་ངན་གསེར་དགྲའི་ཁམས། །ཟག་མེད་རིན་ཐང་བྲལ་བའི་སུ་ཝརྞར། །སྒྱུར་བྱེད་ཐབས་ཤེས་ཟུང་འབྲེལ་རྩི་ཡི་མཆོག །སོག་པར་བྱེད་གང་མི་ཡི་སེངྒེར་འགྱུར། །ཚེ་འདིའི་སྣང་བ་རྨི་ལམ་རྒྱལ་སྲིད་འདྲ། །མི་བདེན་བདེན་པར་བཟུང་བས་བསླུས་པར་ཟད། །བྱས་པ་དོན་མེད་སྔ་མ་དེ་ཙམ་ལགས། །ད་ནི་དོན་ཆེན་དགེ་ལསྦྱོར་བར་རིགས། །ཁམས་ལྡན་མི་ཡི་གྲུ་ཆེན་རྙེད་ནས་སླར། །སྡུག་བསྔལ་སྲིད་མཚོ་བརྒལ་ལ་མི་བརྩོན་ན། །བསམ་བརླག་དེས་ནི་ནོར་བུ་ཐོབ་ནས་བོར། །སྲིད་ཞིའི་ཁོངས་ན་དེ་ལསསྨད་འོས་སུ། །ལང་ཚོའི་མེ་ཏོག་མི་བརྟན་ཡུད་ཀྱིས་རྙིང་། །དཔལ་འབྱོར་རྩྭ་རྩེའི་ཟིལ་བ་རྣམ་པར་གཡོ། །རྒ་དང་རྒུད་པའི་ཞགས་པས་དམ་བཅིངས་ཏེ། །འཆི་བདག་རལ་གྲི་གདེངས་འདི་མ་ཚོར་ནོངས། །ལྷ་དབང་ལྷ་ཡི་འབྱོར་པས་མངོན་མཐོ་ཞིང་། །མི་དབང་མི་ཡི་རྗེ་བོས་ཕྱག་བྱས་ཀྱང་། །ཟློག་མེད་དུས་ཀྱི་ཁྲིམས་ལ་འཐོག་པའི་ཚེ། །བསོད་ནམས་ལས་གཞན་གྲོགས་བགྱིར་སུ་ཞིག་ཡོད། །འདོད་ཡོན་རྣམས་ནི་ལན་ཚྭའི་ཆུ་དང་འདྲ། །ཅི་ཙམསྤྱོད་ཀྱང་ངོམས་མེད་ཕྱིར་ཞིང་སྲེད། །སྟོང་ཁམས་བདོག་པ་ཐོབ་ཀྱང་འཚེངས་མི་འགྱུར། །ད་ནི་གཏན་གྱི་རྒྱགས་ཕྱེ་ཆུབ་པར་མཛོད། །ཀྱི་ཧུད་མཆིལ་པས་ཉ་ལ་འདེབས་པ་བཞིན། །མི་རྣམས་ཉིན་བཞིན་ཁྱིམ་ནས་དྲངས་པའི་ཚུལ། །མངོན་དུ་གྱུར་ཀྱང་མི་འཇིགས་སྙིང་ཁམས་ཅན། །མ་རུངས་སེམས་ཁྱོད་རྡོ་ཡི་གོང་བུར་ངེས། །གསོད་སྲེད་གཏུམ་པོའི་མཆེ་བས་ཟིན་གྱུར་ཚེ། །བསོད་ནམས་འདོད་ཀྱང་དེ་དུས་འཕྱིས་ནས་མེད། །དུག་སྦྲུལ་ཁར་ཆུད་སྦལ་པའི་ང་རོ་བཞིན། །དུས་མ་ཡིན་ལ་འགྱོད་པས་ཅི་བྱས་ཡོད། །སྡིག་པའི་རང་གཟུགས་འཁྲུལ་བའི་གཞན་དབང་ཅན། །གྲོང་ཁྱེར་དྲུག་གི་བཙོན་ར་ཉམ་ང་བར། །རྣམ་གསུམསྡུག་བསྔལ་ཆད་པས་མནར་བའི་འགྲོ། །སྐྱོབ་ནུས་དཀོན་མཆོག་ལས་གཞན་སྲིད་ན་སུ། །དེ་སླད་བློ་ལྡན་དོན་མཐུན་གྲོགས་པོ་དག །རང་སེམས་རང་ལ་མི་དཀར་དབང་མེད་པས། །གཏན་གྱི་འདུན་མ་ལེགས་ཉེས་ད་རེས་ཡིན། །དཀོན་མཆོག་མཆོད་ལ་སངས་རྒྱས་འགྱུར་བར་གྱིས། །གྲོས་འདི་སྙིང་ནས་ཡིན་གྱི་ཟོལ་སྦྱོར་མིན། །ཕན་སེམས་བཟང་པོས་ཡིན་གྱི་རང་གར་མིན། །ལེགས་པར་བརྟགས་ནས་ཡིན་གྱི་གྱ་ཚོམ་མིན། །ཀུན་གྱིས་གསན་འོས་ཡིན་གྱི་འདོར་བྱ་མིན། །བདག་ནི་འཆིང་བ་བརྒྱ་ཡིས་བཅིངས་མོད་ཀྱི། །བརྗོད་པའི་ངག་འདི་རྒྱལ་གསུང་དཔང་པོར་བྱས། །དེ་སླད་ཚེར་མའི་ཤིང་ལས་སྦྲང་རྩི་བཞིན། །བློ་ལྡན་རྣམས་ཀྱིས་དང་དུ་ལེན་པར་འོས། །དགེ་བ་འདི་ཡིས་མཐའ་ཀླས་སྐྱེ་དགུ་ཀུན། །མཆོག་གསུམཐུགས་རྗེའི་གྲུ་གཟིངས་ལ་བརྟེན་ནས། །ཉམ་ང་སྲིད་པའི་རྒྱ་མཚོ་རབ་བརྒལ་ཏེ། །དོན་གཉིས་ནོར་བུའི་གླིང་ལ་ངལ་འཚོ་ཤོག །ཕན་བདེའི་གཞིར་གྱུར་རྒྱལ་བསྟན་རིན་པོ་ཆེ། །སྲིད་མཐའི་བར་དུ་དབྱར་མཚོ་ལྟར་རྒྱས་ཤིང་། །བསྟན་འཛིན་ཞབས་བརྟན་བཤད་སྒྲུབ་མངའ་ཐང་དར། །ནག་ཕྱོགས་ཀླ་ཀློའི་འཇུག་པ་མིང་མེད་ཤོག །ཁྱད་པར་བདག་གི་ཡོངས་འཛིན་དགེ་བའི་བཤེས། །སྔོན་རབས་བྱོན་རྣམས་ཐུགས་དགོངས་རབ་རྫོགས་ཤིང་། །ད་ལྟར་བཞུགས་རྣམས་སྐུ་ཚེ་རིང་བ་དང་། །ཐུགས་ཀྱི་བཞེད་དོན་མཐའ་དག་འགྲུབ་གྱུར་ཅིག །ཇི་སྲིད་བྱངཆུབ་བར་དུ་མི་འབྲལ་བར། །འདའ་དཀའ་དམ་ཚིག་སྲད་བུས་སྦྲེལ་བ་ཡི། །རྡོ་རྗེའི་མཆེད་པོ་ཀུན་ཀྱང་དུས་རྟག་ཏུ། །དམ་ཚིག་མི་ཉམས་ས་ལམ་མྱུར་བགྲོད་ཤོག །ཡོངས་པའི་ཁྱོནཀུན་དཀོན་མཆོག་རྟེན་གྱིས་ཁེངས། །དེར་ཡང་ཕུལ་བྱུང་མཆོད་པའི་སྤྲིན་གྱིས་མཛེས། །དཀར་ཕྱོགས་ལྷ་ཀླུ་དགའ་བས་རྟག་སྲུང་བས། །མི་ཤིས་མཚན་མའི་མིང་ཡང་མི་གྲགས་ཤོག །རི་ཀུན་སྤང་བ་བསམ་གཏན་སྡེ་ཡིས་འབྱོར། །ཀླུང་ཀུན་ཀློག་པ་ཐོས་བསམ་གྲྭ་ཡིས་ཕྱུག །ཀུན་ཀྱང་ལྟ་སྤྱོད་ཏིང་འཛིན་དོན་མཐུན་པས། །བསླབ་གསུམ་ཡོན་ཏན་ཉིན་བཞིན་གོང་འཕེལ་ཤོག །མི་ཡི་རྗེ་རྣམས་རང་སྲིད་དཔལ་གྱིས་ངོམས། །གཞན་ལ་འཚེ་སྤངས་འབངས་འཁོར་བྱམས་པས་སྐྱོང་། །ཀུན་ཀྱང་ཕན་ཚུན་ཕ་མའི་འདུ་ཤེས་ཀྱིས། །འཐབ་རྩོད་འཁྲུགས་སོགས་དེང་ནས་རྒྱུན་ཆད་ཤོག །སྐྱེ་དགུ་མཐའ་དག་དཀོན་མཆོག་བསྟན་ལ་དད། །ལས་འབྲས་ཡིད་ཆེས་ལྟ་བས་རྒྱུད་གྲོལ་ཏེ། །བཅུད་ཀྱི་སྤྱོད་པས་སྣོད་ལ་ཤིས་པ་སྒྲུབས། །རྫོགས་ལྡན་ཉི་མ་གསར་དུ་འཆར་གྱུར་ཅིག །དུག་ལྔའི་རང་གཟུགས་པད་རྣམ་རྨོངས་པ་ཡང་། །ཆོས་བརྒྱད་འཁྲུལ་པའི་ཆིངས་རྒྱ་ལ་འུར་གྲོལ། །འབྲེལ་འདྲིས་བྲེལ་བ་དབེན་པའི་ནགས་ཁྲོད་དུ། །སྲོག་དང་བཅས་པའི་ལུས་འདི་གཡོ་བར་ཤོག །སྐྱེ་བ་ཀུན་ཏུ་རྒྱལ་བའི་ཆོས་མཛོད་འཛིན། །ཟང་ཟིང་མེད་པས་འགྲོ་ཁམས་སྨིན་བྱས་ནས། །རྫོགས་པའི་སངས་རྒྱས་བློ་གྲོས་མཐའ་ཡས་ཀྱི། །དགོངས་སྤྱོད་རྒྱ་མཚོར་མཉམ་པ་ཉིད་གྱུར་ཅིག །བདག་ལ་བཟང་ངན་ལས་ཀྱིས་འབྲེལ་བའི་འགྲོ། །ཀུན་ཀྱང་སྡིག་ཟད་ཉོན་མོངས་མེད་གྱུར་ཏེ། །ཚེ་དེས་སྲིད་པའི་རྒྱ་མཚོ་རབ་བརྒལ་ནས། །རྣམ་མཁྱེན་གདོད་མའི་གྲོང་ཁྱེར་མཛེས་བྱེད་ཤོག །བཀྲ་ཤིས་གང་ཞིག་ཕན་དགོངས་ཐུགས་རྗེའི་གཏེར། །བླ་མ་སྲས་བཅས་རྒྱལ་བའི་བདེན་བྱིན་གྱིས། །ཇི་ལྟར་གསོལ་ཞིང་སྨོན་ལམ་བཏབ་པའི་འབྲས། །གེགས་མེད་མྱུར་དུ་འགྲུབ་པར་མཛད་དུ་གསོལ། །ཞེས་བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་བཞེངས་ཤིང་བསྙེན་བཀུར་བགྱིས་པའི་ཕན་ཡོན་ལས་འཕྲོས་པའི་གཏམ་ཚོགས་གཉིས་པད་ཚལ་བཞད་བྱེད་ཡིད་ཆེས་ལུང་གི་ཉི་མ་ཞེས་བྱ་བ་འདི་ནི། གངས་ཅན་མཁས་གྲུབ་ཡོངས་ཀྱི་འཁོར་ལོས་སྒྱུར་བ་པདྨ་འོད་གསལ་མདོ་སྔགས་གླིང་པ་དང་། རྒྱལ་བས་ལུང་བསྟན་པདྨ་གར་དབང་བློ་གྲོས་མཐའ་ཡས། གངས་ཁྲོད་སྨྲ་བའི་སེང་ཆེན་མི་ཕམ་འཇམ་དབྱངས་རྣམ་རྒྱལ་རྒྱ་མཚོ། རྨད་བྱུང་བྱང་ཆུབ་སེམས་ཀྱི་མངའ་བདག་ཡོངས་ཀྱི་འདྲེན་པ་མཁན་ཆེན་ཀརྨ་བཀྲ་ཤིས་འོད་ཟེར། འཁོར་ལོའི་དབང་ཕྱུག་རབ་འབྱམས་ལྔ་པ་རིན་པོ་སོགས་སངས་རྒྱས་དངོས་བྱོན་གྱི་སྐྱེས་ཆེན་དུ་མའི་ཞབས་ཀྱི་པདྨ་ལ་སྤྱི་བོས་རེག་པའི་སྐལ་བཟང་ཉམས་སུ་མྱོང་ཡང་། རང་རྒྱུད་ཤིང་ལྟར་རེངས་པའི་དུས་མཐའི་བཙུན་གཟུགས་འཇམ་དབྱངས་བློ་གྲོས་རྒྱ་མཚོའམ། རྒྱལ་སྲས་གཞན་ཕན་ཆོས་ཀྱི་བློ་གྲོས་སོགས་མིང་མང་དང་ལྡན་པའི་འདུ་གསུམ་པས། རང་གནས་དཔལ་ཞེ་ཆེན་བསྟན་གཉིས་དར་རྒྱས་གླིང་གི་བླ་བྲང་ཕུན་ཚོགས་ཡོངས་འདུའི་སྟེང་ཤག་བཀྲ་ཤིས་འཆི་མེད་འོད་སྣང་དུ་གྲུབ་པར་བགྱིས་པསྟེ་འདིས་ཀྱང་བསྟན་པ་དང་སེམས་ཅན་ལ་ཕན་ཐོགས་རྒྱ་ཆེན་པོ་འབྱུང་བའི་རྒྱུར་གྱུར་ཅིགདགེའོ། །དགེའོ། །དགེའོ། །།