འཇམ་དཔལ་སྨྲ་བའི་སེང་གེ་ལ་བསྟོད་པ་འཇམ་མགོན་དགྱེས་པའི་རོལ་མོ།

༄༅། །འཇམ་དཔལ་སྨྲ་བའི་སེང་གེ་ལ་བསྟོད་པ་འཇམ་མགོན་དགྱེས་པའི་རོལ་མོ་བཞུགས། ན་མོ་གུ་རུ་མཉྫུ་ཤྲཱི་སྭ་ར་སྭ་ཏྱེ། འདི་ན་བློ་མཆོག་སྨྲ་བའི་ཟླ་བ་རྣམས། །བསྐྱེད་པའི་ཡབ་ཏུ་གྱུར་ཀྱང་གཞོན་ནུའི་ཚུལ། །གཏིང་དཔག་དཀའ་བའི་ཡོན་ཏན་ནོར་བུའི་གཏེར། །ཡེ་ཤེས་མེ་ལོང་སྙིང་ལ་རོལ་བར་མཛོད། ༡ །ཤེས་རབ་ཕར་ཕྱིན་དོན་དམ་བདེན་པའི་གཤིས། །སྙིང་རྗེ་སྒྱུ་མར་འཕྲུལ་བའི་ཚངས་སྲས་མ། །སྙན་ངག་ཆུ་བོ་ཀུན་གྱི་འབྱུང་གནས་མཆོག །མགྲིན་པའི་མཚོར་རོལ་ངག་ལ་ཤིས་པ་བྱིན། ༢ །གང་ཁྱོད་ཆོས་དབྱིངས་ཟབ་མོར་རྗེས་ཞུགས་པས། །ཡི་གེ་སྨྲ་བས་རྟོགས་པའི་ཡུལ་མིན་ཀྱང་། །བསམ་གྱིས་མི་ཁྱབ་ཡེ་ཤེས་སྒྱུ་མའི་སྤྲིན། །ལྷ་སྔགས་ཕྱག་རྒྱར་འཕྲུལ་བའི་ངོ་མཚར་འབར། ༣ །སྟོང་དང་རྟེན་འབྱུང་ཟུང་འབྲེལ་དབུ་མའི་གཤིས། །སྙིང་རྗེའི་ཐབས་ལ་རོལ་པའི་ངོ་མཚར་དབྱངས། །ཞིང་ཁམས་རྒྱ་མཚོར་སྒྲོགས་པའི་ཁྱད་པར་ལས། །བརྗོད་དང་བྲལ་གང་བརྗོད་པའི་འབབ་སྟེགས་གྱུར། ༤ །རབ་མཛེས་ཨིཎྜ་ནི་ལའི་ལྷུན་པོ་ལ། །ཐུན་མཚམས་ཆུ་འཛིན་གསར་པས་འཁྱུད་པའམ། །འཇམ་པའི་རྡོ་རྗེའི་ཞབས་བཏེགས་གདོང་ལྔ་ཞེས། །མ་འཚལ་དབང་པོས་མིག་སྟོང་སྤྲུལ་པ་བཞིན། །དེ་ཚེ་སྲིད་ན་མཛེས་པའི་དངོས་པོ་ཀུན། །བྱེད་པོས་གཅིག་བསྡོམས་འདབ་སྟོང་ཟོལ་གྱིས་ནི། ༥ །བཀའ་ལ་ཆེས་མཚར་བདེ་འབྱུང་རང་གི་ཐོད། །བཀོད་ཚེ་རྒྱུ་སྐར་ཚོགས་རྣམས་འདར་བ་འདྲ། ༦ །ཤེས་བྱར་འཁོན་པའི་ལག་འགྲོ་གདུག་པའི་དཔུང་། །མ་ལུས་ཟོས་པའི་འདབ་བཟང་དབང་པོའི་ལྟོར། །རྒྱལ་ཀུན་ཡེ་ཤེས་གཙུག་ནོར་བྱེ་བའི་བཅུད། །གཅིག་ཏུ་བསྡོམས་པའི་སྙིང་པོ་སྐྱུག་པའི་གར། ༧ །དམར་མཐིང་ལང་ཚོས་མྱོས་པའི་དྷཱིཿཧྲཱིཿའི་ཕྲེང་། །ཕན་ཚུན་སྒེག་པའི་ཉམས་འགྱུར་བརྒྱ་ཕྲག་གིས། །རྗེས་ཆགས་འབར་བའི་མེ་ཡིས་བཞུས་པ་ལས། །ངོ་མཚར་ཉི་མ་འཆར་ཀའི་གཟི་བྱིན་འབར། །རིན་ཆེན་བུམ་བརྒྱ་སྐྱེས་ཀྱི་ས་འཛིན་སྤོར། །གུར་གུམ་ཆར་གྱིས་བྲན་པས་མཚོན་མིན་པ། །ཟུང་བཞིའི་ན་ཚོད་མཛེས་པའི་ཉི་དགའི་ཕྲེང་། །མཚན་དཔེའི་གེ་སར་རྒོད་པའི་ཆོ་གས་སྤུད། ༩ །རབ་མཛེས་ཟུར་ཕུད་ལྔ་པའི་ཐོར་ཚུགས་རྩེར། །རིན་ཐང་བྲལ་བའི་ནོར་བུའི་ཐོད་རྒྱན་ལྕིད། །འདེགས་པས་བསྙེལ་བར་དོགས་ནས་དབང་གཞུའི་ཕྲེང་། །རིངས་པའི་སྟབས་ཀྱིས་ལག་པས་སྐྱོར་བ་འདྲ། ༡༠ །འབུམ་ཕྲག་རིན་པོ་ཆེ་ཡི་རྒྱན་ཆ་དང་། །རབ་མཛེས་པཉྩ་ལི་ཀའི་ན་བཟའ་ཟུང་། །ཕན་ཚུན་འབྱོར་པའི་ཁྱད་པར་འགྲན་པ་ལ། །འཕྱ་བའི་ཟོལ་གྱིས་ཅུང་ཟད་འཛུམ་པ་བཞིན། ༡༡ །ལུས་ཅན་སྙིང་ལ་གབ་པའི་ལུས་མེད་དཔུང་། །འཇོམས་ལ་དཔའ་བའི་ཕྱག་གི་འཁྲི་ཤིང་རྩེར། །མཁྱེན་རབ་རལ་གྲི་གདེངས་པའི་འཕྲུལ་གཅིག་གིས། །སྲིད་པའི་དམ་བཅའ་མ་ལུས་མིང་ཙམ་བྱས། ༡༢ །ཀུན་མཁྱེན་ཡེ་ཤེས་ཟབ་མོའི་སྤོབས་པའི་གཏེར། །སྦྱིན་ལ་སྤྲོ་བས་ལེན་པོ་སུ་ཡོད་ཅེས། །དུས་དྲུག་ཕྱོགས་བཅུར་གཟིགས་ནས་པུསྟིཀཿ། །གཏོད་འདི་གཟིགས་ནས་རྒྱལ་རྣམས་ཤིས་པ་སྒྲུབ། ༡༣ །མཚན་གྱི་སྤྲིང་ཡིག་དབྱར་སྐྱེས་རྔ་གསང་མཆོག །ལན་གཅིག་ཐོས་འཛིན་བཅུད་སོན་མདངས་མཐའ་ཅན། །གྲུབ་གཉིས་ཟློས་གར་རྩེན་པའི་ངོ་མཚར་གྱིས། །གྲགས་དཀར་སྲིད་ཞིའི་ཁོངས་སུ་ཅི་སྟེ་ཤོང་། ༡༤ །ཉི་མས་དབང་སྔོན་བཞུས་པའི་ཁུ་བ་ཡིས། །ལན་སྟོང་བྱུགས་པའི་ཚངས་སྲས་འོ་འཛིན་ཁུར། །སྐེད་སྐབས་ཕྲ་བས་འདེགས་པར་མ་བཟོད་ནས། །ཅུང་ཟད་ཡོན་པོའི་ཚུལ་གྱིས་བཞུགས་པར་དོགས། ༡༥ །རྣམ་སད་བྱེ་བའི་རྒྱན་གྱིས་མི་མཚོན་པའི། །དུ་མའི་ཆ་ལུགས་བཟང་པོས་བརྒྱན་གྱུར་ཀྱང་། །ད་དུང་མཛེས་སྐུའི་ཉམས་འགྱུར་མཚར་སྡུག་དཔལ། །སྒྲིབ་སྙོམ་ཏམྦུ་རུ་སོགས་སྡང་བ་སྐྱེད། ༡༠ །ཁྲག་ཁྲིག་དབྱངས་ཀྱིས་མཚན་པའི་གསུང་གི་གདངས། །མཉན་འདོད་ཚངས་ཆེན་རྣ་བརྒྱད་སྤྲུལ་པའི་ཚེ། །སྙན་སྒྲོགས་ཁེངས་པ་ཞུམ་པའི་གཙུག་ནོར་རྡུལ། །ཞབས་སེན་ཆུ་སྐྱེས་རྩེ་ལ་ཆགས་པ་འདྲ། ༡༧ །རྨོངས་ལ་ཁྲོ་ཞིང་མཁས་ལ་འཛུམ་པའི་སྤྱན། །གང་ལ་ཆགས་དེས་ཀུན་རྨོངས་མིང་མཐར་སྦྱར། །ཐམས་ཅད་མཁྱེན་པའི་མཛོད་དང་ཐུན་མོང་དུ། །སྤྱོད་ན་ཕྱག་མཚན་གདེངས་པའི་དགོས་པའང་ཅི། ༡༨ །བསྒྲང་བྱ་བརྒྱ་ལ་བཅུ་ཕྲག་གིས་ཕྲི་བའི། །རྒན་གཞུག་དག་ཀྱང་ཁྱོད་ལ་གུས་པའི་མོད། །ལོ་བརྒྱད་བུས་པའི་ལུས་ལ་རྒན་པོའི་བློ། །གྲགས་པའི་རྔ་ཆེན་ཚངས་པའི་ཞིང་ལས་བརྒལ། ༡༩ །ཕུལ་བྱུང་རིགས་སྔགས་ཟབ་མོའི་ཉི་གཞོན་མཆོག །གྲུབ་མཆོག་ཁྱུང་སྔོན་སྐྱེས་ཀྱིས་ཉེར་དྲངས་མཐུས། །བློ་མཆོག་བློ་ཡི་པད་ཚལ་བཞད་པའི་རྒྱུས། །གངས་ཅན་ལྗོངས་ཞེས་བརྗོད་པ་དོན་ལྡན་བྱས། ༢༠ །ལེགས་བྱས་བྱེ་བའི་ཟོང་གིས་བསྐལ་པ་བརྒྱར། །ཁུག་མིན་འཇམ་པའི་རྡོ་རྗེའི་རིགས་སྔགས་བཅུད། །དད་གསུམ་སྙིམ་པས་འཐུང་བའི་སྐལ་བཟང་དཔལ། །ཨེ་མ་ཉམས་སུ་མྱོང་འདི་རྨི་ལམ་མིན། ༢༡ དེ་སླད་འཇམ་དཔལ་ཡབ་ཡུམ་ཡོན་ཏན་ཕུལ། །ཐོས་པས་རབ་དགའ་དད་གསུམ་སོར་མོ་ཡིས། །བསྟོད་བསྔགས་རྒྱུད་མང་གསར་པ་འདི་སྒྲོགས་ན། །ཡིད་ལ་ཡེ་ཤེས་སྣང་བ་དེང་སྩོལ་ཅིག ༣༢ །སྐྱེ་བ་འདི་ནས་ཚེ་རབས་ཐམས་ཅད་དུ། །འཇམ་མགོན་ཡབ་ཡུམ་ཞབས་ཀྱི་ཆུ་སྐྱེས་རྡུལ། །སྤྱི་བོར་ལེན་པའི་སྐལ་བཟང་ཡོལ་མིན་པས། །དོན་གཉིས་མཐར་ཕྱིན་འཇིག་རྟེན་སྒྲོན་མར་ཤོག །༢༣ ཅེས་པའང་འཇམ་པའི་རྡོ་རྗེའི་རིགས་སྔགས་ལ་མོས་པ་འཆང་བ་གཞན་ཕན་ཆོས་ཀྱི་བློ་གྲོས་དབྱངས་ཅན་དགྱེས་པའི་སྡེས་བྲིས་པ་བདག་གཞན་ཀུན་གྱི་རྒྱུད་ལ་ཡེ་ཤེས་ཀྱི་སྣང་བ་མྱུར་དུ་འཇུག་པའི་རྒྱུར་གྱུར་ཅིག