གསུམ་པ་རྫོགས་པ་ཆེན་པོ་ཨ་ཏི་ཡོ་ག

༈ གསུམ་པ་རྫོགས་པ་ཆེན་པོ་ཨ་ཏི་ཡོ་གའི་སྐོར་ནི། ཇི་སྐད་དུ། ཉོན་མོངས་རྒྱུད་དྲག་ནུས་མཐུ་ཞན། །ལས་ཀྱིས་ཚེ་ཐུང་བཀའ་དོན་སྟོར། །བསྟན་སྙིང་གྲུབ་མཐའ་ངན་པས་བསྒྱུར། །གཉེན་པོས་མི་ནོན་སྒྲུབ་ཚུགས་ཞན། །དེ་ཚེ་རིག་པའི་རྣམ་རྟོག་ཤར། །ཞེས་གསང་ཆེན་བསྟན་པ་འབྱུང་བའི་དུས་དྲུག་ལ་བབ་པའི་ཚེ། ཤན་འབྱེད། ལ་བཟླ། རང་གྲོལ་མངོན་སུམ་དུ་སྟོན་པ་རྩོལ་མེད་རྫོགས་པ་ཆེན་པོ་ཨ་ཏིའི་ཐེག་པ་འབྱུང་བའི་དུས་ལ་བབས་པས། སུམ་བཅུ་རྩ་གསུམ་གྱི་ལྷ་དེ་བ་བཟང་སྐྱོང་གི་བུ་སེམས་ལྷག་ཅན་ལ་རྨིས་ལྟས་ཁྱད་པར་ཅན་བཞི་བྱུང་བ་དང་མཐུན་པར་རྡོ་རྗེ་སེམས་དཔས་རྒྱལ་ཐབས་སྤྱི་བླུགས་ཀྱི་དབང་བསྐུར་ཞིང་མན་ངག་བྱིན་པས་ལྷའི་གནས་སུ་དར། དེ་ནས་མི་ཡུལ་དུ་གསང་བའི་བདག་པོས་དུར་ཁྲོད་མེ་རི་འབར་བར་གསང་སྔགས་ཀྱི་ཆོས་འཁོར་བསྐོར་བ་དེའི་ཚེ། ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་ཞེས་བྱ་བར། བདེ་བྱེད་བརྩེགས་པ་ཞེས་བྱ་བའི་ལྷ་ཁང་ཆེན་པོ་གཅིག་ལ་ལྷ་ཁང་ཆུང་ངུ་སྟོང་དྲུག་བརྒྱ་བརྒྱད་ཀྱིས་བསྐོར་བའི་དཔལ་འབྱོར་ཕུན་སུམ་ཚོགས་པའི་གནས་དང་མི་རིང་བར་གསེར་གྱི་བྱེ་མ་བདལ་བའི་གླིང་དུ། རྒྱལ་པོ་ཨུ་པ་རཱ་ཛའི་སྲས་མོ་སུ་དྷརྨ་བྱ་བའི་དགེ་སློང་མ་ཞིག་རྩའི་སྤྱིལ་བུ་ཆུང་ངུ་ཞིག་ལ་གནས་བཅས་ཏེ། གཡོག་མོ་བདེ་བའི་སྙིང་ལྡན་མ་དང་ལྷན་ཅིག་ཏུ་རྣལ་འབྱོར་བསྒོམས་ཤིང་གནས་པའི་ཚེ་རྨི་ལམ་དུ་མི་དཀར་པོ་དྲི་མ་མེད་པ་གཅིག་གིས་ཤེལ་གྱི་བུམ་པ་ༀ་ཨཱཿཧཱུྃ་སྭཱ་ཧཱས་མཚན་པ་གཅིག་སྤྱི་བོར་ལན་གསུམ་བཞག་པས་བུམ་པ་དེ་ལས་འོད་འཕྲོས་པས་ཁམས་གསུམ་པོ་གསལ་བར་མཐོང་བ་ཞིག་རྨིས། དེ་ནས་མི་རིང་བ་དགེ་སློང་མ་ལ་རྫོགས་པ་ཆེན་པོ་ལྷ་ཡུལ་དུ་དར་བར་བྱེད་པ་པོ་རྡོ་རྗེ་སེམས་དཔའི་རྣམ་འཕྲུལ་ལྷའི་བུ་སེམས་ལྷག་ཅན་རྒྱལ་བའི་སྲས་སུ་བཙས་སོ། །དེར་དགེ་སློང་མ་ཤིན་ཏུ་ཡང་ངོ་ཚ་ནས་སྨྲེ་སྔགས་མང་དུ་བཏོན་ཏེ་ཐལ་དོང་དུ་བསྐྱུར་པས་སྒྲ་དང་འོད་ལ་སོགས་པའང་བྱུང་ངོ་། །ཞག་གསུམ་ན་བལྟས་པས་ཅི་ཡང་མ་ཉེས་པར་མཐོང་བས་སྤྲུལ་པ་ཡིན་པར་ཤེས་ཏེ་བཀུར་སྟི་ཆེན་པོ་དང་བཅས་སྤྱན་དྲངས་པས་བར་སྣང་གི་ལྷ་རྣམས་ཀྱིས་ཆེད་དུ་བརྗོད། མཁའ་འགྲོ་མ་དང་ལྷ་ཀླུ་གནོད་སྦྱིན་སོགས་འཇིག་རྟེན་སྐྱོང་བ་རྣམས་ཀྱིས་མཆོད་པར་བྱེད་དོ། །ཞག་བདུན་སོང་བ་ན་རྒྱལ་པོའི་མཆོད་གནས་པཎྜི་ཏ་ལྔ་བརྒྱ་དང་བགྲོ་གླེང་བརྒལ་བརྟག་གི་རིམ་པ་མང་དུ་མཛད་པས་དེ་རྣམས་ཀྱི་སྤོབས་པ་བཅོམ་པས་ཞབས་སྤྱི་བོར་བླངས་ཤིང་བཀུར་སྟི་ཆེན་པོས་མཆོད་ནས་མཚན་པྲཛྙཱ་བྷ་བར་གསོལ། རྒྱལ་པོ་ངོ་མཚར་ཞིང་དགའ་བས་དགའ་རབ་རྡོ་རྗེ་དང་། སྔར་ཡུམ་གྱིས་བཀྲོང་ཡང་མ་ཉེས་པས་རོ་ལངས་བདེ་བའམ་རོ་ལངས་ཐལ་མདོག་ཏུ་གསོལ། དེ་ནས་བྱང་ཕྱོགས་ཀྱི་རི་བོ་ཉི་མ་རབ་ཏུ་སྣང་བྱེད་དུ་ལོ་སུམ་ཅུ་རྩ་གཉིས་ཀྱི་བར་དུ་ཏིང་ངེ་འཛིན་ལ་བཞུགས་ཤིང་། དཔལ་རྡོ་རྗེ་སེམས་དཔའ་ལས་རྫོགས་པ་ཆེན་པོའི་རྒྱུད་གདམས་ངག་དང་བཅས་པ་གསན་ཏེ་མི་སློབ་པའི་ཡེ་ཤེས་མངོན་དུ་མཛད་པའི་ཚུལ་བསྟན། དེའི་ཚེ་ས་ལན་བདུན་དུ་གཡོས་ཤིང་མུ་སྟེགས་ཀྱི་བསྟན་པ་ཉམས་པར་བྱས་སོ་ཞེས་པའི་སྒྲ་ནམ་མཁའ་ནས་གྲགས་པས་མུ་སྟེགས་ཀྱི་རྒྱལ་པོས་བཀྲོང་བར་བརྩམས་པ་ན་ནམ་མཁའི་ལམ་ནས་གཤེགས་པ་མཐོང་བས་རབ་ཏུ་དད་ནས་རྒྱལ་པོ་འཁོར་བཅས་ནང་པའི་བསྟན་པ་ལ་ཞུགས་སོ། །དེ་ནས་ཐེག་པ་ཕྱི་ནང་གི་སྡེ་སྣོད་དང་། ཁྱད་པར་རྫོགས་པ་ཆེན་པོ་འབུམ་ཕྲག་དྲུག་ཅུ་རྩ་བཞི་ཐུགས་ལ་བཞུགས་པ་རྣམས། རྡོ་རྗེ་དབྱིངས་ཀྱི་མཁའ་འགྲོ་མ་བདེ་བའི་རོ་ལྡན་མ་དང་། བདེ་བྱེད་སེར་མོ་ཡོན་ཏན་མཐའ་ཡས་པའི་མཁའ་འགྲོ་མ་དང་ལྷན་ཅིག་ལོ་གསུམ་གྱི་བར་ཚིག་དང་ཡི་གེ་དཀར་ཆག་ཏུ་བཏབ་ནས་རང་བྱུང་རང་བབས་ཀྱི་ཡི་གེ་སྤྲུལ་པའི་སྐུ་དང་བཅས་མཁའ་འགྲོ་མ་མངོན་པར་འབྱུང་བའི་ཕུག་ཏུ་བཞུགས་སུ་གསོལ། སློབ་དཔོན་ཉིད་དུར་ཁྲོད་བསིལ་བའི་ཚལ་དུ་མཁའ་འགྲོ་མ་ཉི་མའི་འོད་ཟེར་སོགས་ལ་ཆོས་སྟོན་ཅིང་བཞུགས་སོ། །དེའི་ཚེ་སྔར་སྨོས་པའི་སློབ་དཔོན་འཇམ་དཔལ་བཤེས་གཉེན་དེ་ཉིད་ལ། འཕགས་པ་འཇམ་དཔལ་གྱིས་ལུང་བསྟན་ཏེ་དུར་ཁྲོད་བསིལ་བའི་ཚལ་དུ་བྱོན་ནས་སྤྲུལ་སྐུ་དགའ་རབ་རྡོ་རྗེ་དང་མཇལ། ལོ་བདུན་བཅུ་རྩ་ལྔའི་བར་དུ་ཆོས་ཉན་ཅིང་། གདམས་པ་དང་རྗེས་སུ་གདམས་པ་མཐའ་དག་བསྩལ་པའི་འོག་ཏུ་ཆུ་བོ་དན་ཏིག་ཞེས་བྱ་བར་སློབ་དཔོན་ཆེན་པོ་དགའ་རབ་རྡོ་རྗེ་ཉིད་ཟག་པ་མེད་པའི་དབྱིངས་སུ་མྱ་ངན་ལས་འདའ་བར་མཛད་དོ། །དེ་ཚེ་འཇམ་དཔལ་བཤེས་གཉེན་གྱིས། ཀྱེ་མ་ཀྱི་ཧུད་ཀྱེ་མ་ཀློང་། །ཞེས་སོགས་གདུང་ཚིག་བཏོན་པས་ནམ་མཁའ་འོད་ཕུང་གི་དཀྱིལ་ནས་སློབ་དཔོན་གྱིས་སྐུ་མངོན་དུ་སྣང་བར་མཛད་ནས་གསེར་གྱི་ཟ་མ་ཏོག་སེན་གང་བ་གཅིག་ཕྱག་ཏུ་བབས་པས་ཚིག་གསུམ་གནད་དུ་བསྡེབས་པའི་འདས་རྗེས་ཀྱི་གདམས་པ་བཞག་གོ །དེ་ནས་འཇམ་དཔལ་བཤེས་གཉེན་གྱིས་འབུམ་ཕྲག་དྲུག་བཅུ་རྩ་བཞིའི་གྲངས་ལས་རྫོགས་པ་ཆེན་པོ་སྡེ་གསུམ་དུ་ཕྱེས་ཏེ། སེམས་གནས་རྣམས་ལ་སེམས་ཀྱི་སྡེ། བྱ་བྲལ་རྣམས་ལ་ཀློང་གི་སྡེ། གནད་གཙོ་བ་ལ་མན་ངག་གི་སྡེ་དང་གསུམ། དེ་ལས་ཀྱང་ཁྱད་པར་དུ་བསྡུས་པ་ཐིག་ལེ་རང་གནད་དུ་དབབ་པ་འདི་ལ་སྙན་བརྒྱུད་དང་བཤད་རྒྱུད་གཉིས་སུ་ཕྱེས་ནས་སྙན་བརྒྱུད་རྣམས་མཆན་དུ་བཏབ། བཤད་རྒྱུད་སྙིང་ཐིག་གི་བཀའ་རྣམས་རེ་ཞིག་སྤེལ་བའི་གནས་མ་རྙེད་ནས་རྡོ་རྗེ་གདན་གྱི་བྱང་ཤར་དུ་སྦས་ཏེ་མི་སྣང་བར་བྱས། སློབ་དཔོན་ཉིད་དུར་ཁྲོད་སོ་ས་གླིང་དུ་མཁའ་འགྲོ་མ་རྣམས་ལ་ཆོས་སྟོན་ཅིང་ལོ་བརྒྱ་རྩ་དགུའི་བར་དུ་ཏིང་ངེ་འཛིན་ལ་བཞུགས་སོ། །སློབ་དཔོན་ཆེན་པོ་སངས་རྒྱས་ཡེ་ཤེས་ཞབས་ཀྱང་འདིའི་སློབ་མ་སྟེ། དེས་མཛད་པའི་བསྟན་བཅོས་རྣམས་སུ་སེམས་སྡེའི་ཆོས་སྐད་གྲུབ་མཐའ་གཞན་དང་མ་འདྲེས་པར་གཙང་སིང་ངེ་འབྱུང་བ་ཡིན་ནོ། །དེའི་ཚེ་རྒྱ་ནག་པོའི་གྲོང་ཁྱེར་ཤོ་ཁྱམ་ཞེས་པར་ཁྱིམ་བདག་དགེ་བའི་ཡིད་ཅན་དང་བུད་མེད་སྣང་གསལ་རབ་ཏུ་མཁྱེན་མ་གཉིས་ཀྱི་སྲས་སློབ་དཔོན་ཤྲཱི་སེདྷ་ཞེས་བྱ་བ་སྦྱངས་པའི་ཡོན་ཏན་དང་ལྡན་པའི་མཁས་པ་ཆེན་པོ་ཞིག་གྲོང་ཁྱེར་གསེར་ལྡན་དུ་འགྲོ་བའི་ལམ་དུ། འཕགས་པ་སྤྱན་རས་གཟིགས་ཀྱིས་ལུང་བསྟན་པས། འབྲས་བུ་བླ་ན་མེད་པ་ཉིད་རྟོགས་སླ་བའི་ཕྱིར་ད་དུང་ཡང་གསང་སྔགས་ཀྱི་རྒྱུད་སྡེ་གཞན་ལའང་མཁས་པར་བྱའོ་དགོངས་ནས་རི་བོ་རྩེ་ལྔར་གདོལ་པའི་སློབ་དཔོན་བྷེ་ལ་ཀིརྟིར་སྔགས་ཕྱི་ནང་གི་ཆོས་རྣམས་གསན་པས་མཐའ་དག་ཉམས་འོག་ཏུ་ཆུད། སླར་འཕགས་པས་བསྐུལ་ནས་ཞབས་ས་ལ་མི་རེག་པའི་རྫུ་འཕྲུལ་དང་བཅས་དུར་ཁྲོད་སོ་ས་གླིང་དུ་བྱོན་ནས་སློབ་དཔོན་འཇམ་དཔལ་བཤེས་གཉེན་དང་མཇལ། ལོ་ཉེར་ལྔའི་བར་དུ་གདམས་པ་དང་རྗེས་སུ་གདམས་པ་མཐའ་དག་བསྩལ་ནས་སློབ་དཔོན་ཉིད་སྐུ་འོད་ཕུང་དུ་ཡལ། སྒོམ་ཉམས་དྲུག་པ་ཞེས་པའི་འདས་རྗེས་ཤྲཱི་སེང་གི་ཕྱག་ཏུ་བབས་པས་དགོངས་པའི་གདེང་དང་ལྡན་པར་གྱུར་ཏོ། །དེ་ནས་དཔལ་གྱི་སེང་གེས་རྡོ་རྗེ་གདན་གྱི་འོག་ནས་སྔར་སྦས་པའི་རྒྱུད་རྣམས་བཏོན་ནས་རྒྱ་ནག་ཏུ་བྱོན་ཅིང་། རྫོགས་པ་ཆེན་པོ་མན་ངག་གི་སྡེ་ལ། ཕྱི་སྐོར། ནང་སྐོར། གསང་སྐོར། གསང་བ་བླ་ན་མེད་པ་བཞིར་ཕྱེས་ནས། སྐོར་སྔ་མ་གསུམ་སྤྲོས་བཅས་གྱི་དོན་དུ་བསྡེབས་ནས་བྱང་ཆུབ་ཤིང་གི་ལྷ་ཁང་བྱ་འདབས་སུ་གཏེར་དུ་སྦས། གསང་བ་བླ་མེད་ཀྱི་སྐོར་རྣམས་མཁའ་འགྲོའི་ལུང་བཞིན་བཀྲ་ཤིས་ཁྲི་སྒོའི་ཀ་བར་སྦས་ནས་སློབ་དཔོན་ཉིད་དུར་ཁྲོད་བསིལ་སྦྱིན་དུ་ཏིང་ངེ་འཛིན་ལ་བཞུགས་སོ། །དེའི་ཚེ་འཕགས་ཡུལ་ནུབ་ཕྱོགས་གླང་པོའི་སྒང་དུ་ཡབ་ཁྱིམ་བདག་བདེ་ལྡན་འཁོར་ལོ་དང་ཡུམ་བདག་ཉིད་གསལ་རིགས་མའི་སྲས་བི་མ་མི་ཏྲ་དང་། ཤར་ཕྱོགས་ཀ་མ་ཤཱི་ལའི་ཤར་གྱི་གྲོང་ཁྱེར་དུ་ཡབ་གདོལ་པ་ཞི་བའི་ལག་པ་དང་ཡུམ་དགེ་བའི་སེམས་ཅན་གྱི་སྲས་ཡེ་ཤེས་མདོ་ཞེས་བྱ་བའི་མཁས་པ་ཆེན་པོ་གཉིས་ལྷན་དུ་བཞུགས་པ་ལ་དཔལ་རྡོ་རྗེ་སེམས་དཔའ་མངོན་སུམ་དུ་བྱོན་ནས་ལུང་བསྟན་པས། བི་མ་ལས་དེ་ཉིད་དུ་ལྷུང་བཟེད་དང་ཆོས་གོས་བླངས་ནས་བྱོན་པས་སློབ་དཔོན་ཤྲཱི་སེངྷ་དང་མཇལ། ལོ་ཉི་ཤུའི་བར་དུ་སྙན་བརྒྱུད་ཕྱི་ནང་གསང་གསུམ་གྱི་གདམས་པ་བསྩལ་མོད་དཔེ་ནི་མ་གནང་ངོ་། །དེར་བི་མ་ཐུགས་ཚིམས་ནས་རྒྱ་གར་དུ་བྱོན་ཏེ་སློབ་དཔོན་ཛྙཱ་ན་སཱུ་ཏྲ་ལ་ལོ་རྒྱུས་བཤད་པས། ཁོང་ཡང་འབད་རྩོལ་ཆེན་པོས་རྒྱ་ནག་ཏུ་བྱོན་ཏེ་ཌཱ་ཀིའི་ལུང་བསྟན་པ་བཞིན་དུར་ཁྲོད་བསིལ་སྦྱིན་དུ་མཇལ། ལོ་དགུའི་བར་དུ་སྙན་རྒྱུད་དཔེ་དང་བཅས་པ་གནང་། དེས་ཚིམས་ནས་འབྱོན་པར་བརྩམས་པ་ན། སློབ་དཔོན་གྱི་གཏད་པ་མེད་དོ་གསུངས་པས་རྟོག་པ་སྐྱེས་ཏེ་སླར་རབ་ཏུ་ཟབ་པའི་གདམས་པ་ཞུས་པས། སྤྲོས་བཅས་སྤྲོས་མེད་ཤིན་ཏུ་སྤྲོས་མེད་རབ་ཏུ་སྤྲོས་མེད་རྣམས་ཀྱི་དབང་བསྐུར་ཞིང་མན་ངག་མཐའ་དག་རྫོགས་པར་གནང་། དེ་ནས་ལོ་བཅུ་དྲུག་ཏུ་ཉམས་སུ་བླངས་ནས་བསྒོམས། སློབ་དཔོན་ནི་ཁྱད་པར་གྱིས་སྤྱོད་པ་སྣ་ཚོགས་ལ་གནས་ཤིང་དུས་གཞན་ཞིག་ན་ལི་ཡུལ་གྱི་རྒྱལ་པོས་སྤྱན་དྲངས་ཏེ་དེར་བཞུད་པའི་ཞག་བདུན་ན་སྐུ་འོད་ཕུང་དུ་ཡལ་ཏེ་གཟེར་བུ་བདུན་པའི་ཞལ་ཆེམས་ཡེ་ཤེས་མདོའི་ཕྱག་ཏུ་བབས། དེར་སློབ་དཔོན་གྱི་ལུང་བཞིན་བཀྲ་ཤིས་ཁྲི་སྒོའི་ཀ་བའི་ནང་ནས་སྙིང་ཐིག་གསང་བའི་དཔེ་རྣམས་ཕྱུང་ནས་རྒྱ་གར་གྱི་དུར་ཁྲོད་བྷ་སེང་དུ་བྱོན་ཅིང་མཁའ་འགྲོ་མ་རྣམས་ལ་གསང་བ་སྙིང་ཐིག་གི་ཆོས་འཁོར་བསྐོར་བཞིན་བཞུགས་སོ། །དེའི་ཚེེ་སློབ་དཔོན་བི་མ་མི་ཏྲ་ལ་ཌཱ་ཀིའི་ལུང་གིས་བསྐུལ་ནས་དུར་ཁྲོད་བྷ་སེང་དུ་ཛྙཱ་ན་སཱུ་ཏྲ་དང་མཇལ་ཞིང་ཆེས་ཟབ་པའི་གདམས་པ་གནང་བར་ཞུས་པས་སློབ་དཔོན་གྱིས་ཆོ་འཕྲུལ་སྣ་ཚོགས་པར་སྣང་བར་མཛད་ནས་དབང་དང་གདམས་ངག་དཔེ་དང་བཅས་རྫོགས་པར་གནང་བས་སེམས་ཀྱི་གནས་ལུགས་རྗེན་པར་མ་ཐོབ། ཤངས་རྩེར་ཨ་དཀར་པོ་ཟག་ལ་ཁད་པ་གཅིག་ཀྱང་བྱུང་། དེ་ནས་ལོ་བཅུའི་བར་དུ་ཞུན་ཐར་བཅད་ནས། དེའི་འོག་ཏུ་སློབ་དཔོན་ཛྙཱ་ན་སཱུ་ཏྲ་སྐུ་འོད་ཕུང་དུ་ཡལ་ཏེ་བཞག་ཐབས་བཞི་པ་ཞེས་བྱ་བའི་འདས་རྗེས་སློབ་དཔོན་དྲི་མེད་བཤེས་གཉེན་གྱི་ཕྱག་ཏུ་བབས་པས་ཚིག་ལ་ཆད་ལྷག་དོན་ལ་ནོར་འཁྲུལ་མེད་པའི་གདེང་ཐོབ། གསང་བ་མཆོག་གི་དཔེ་རྣམས་ཚར་གསུམ་དུ་བྲིས་ནས་ཨོ་རྒྱན་གྱི་ཡུལ་རྒྱ་མཚོ་གསེར་གྱི་བྱེ་མ་བདལ་བའི་གླིང་དང་ཁ་ཆེའི་ཡུལ་གསེར་གླིང་ཞེས་པའི་བྲག་སྐྱིབས་དང་། དུར་ཁྲོད་ཆེན་པོ་རབ་ཏུ་སྣང་བྱེད་དང་གསུམ་དུ་སྦས། སློབ་དཔོན་ཉིད་མཐར་གྱིས་འཕོ་བ་ཆེན་པོའི་སྐུར་བཞེངས་སོ། །ལོ་རྒྱུས་རྒྱས་པར་ཤེས་འདོད་ན་གསང་བ་སྙིང་ཐིག་གི་བབས་ལུགས་ཆེན་མོར་བལྟ་བར་བྱའོ།། །།