རང་ལུགས་སྔ་འགྱུར་གྱི་ཆོས་དེ་རྣམ་དག་ཡིན་པའི་སྒྲུབ་བྱེད་འགོད་པ།

ད་ནི་རང་ལུགས་སྔ་འགྱུར་གྱི་ཆོས་དེ་རྣམ་དག་ཡིན་པའི་སྒྲུབ་བྱེད་འགོད་པ་ལ། གང་ཟག་དང་། ལུང་དང་། རིགས་པའི་དན་དཔང་གསུམ་ཡོད་དེ། དང་པོ་ནི། སྔ་དུས་ཀྱི་པཎ་ཆེན་ལོ་ཙཱ་ཆོས་རྒྱལ་གདན་འཛོམས་དུས་སུ་བསྒྱུར་བ་འདི་དག་ནི་གང་ཟག་ཁྱད་པར་ཅན་དེ་དག་དན་དཔང་ཡོད་པས་ཡིད་ཆེས་སུ་རུང་བ་ཉིད་དེ། དེ་དུས་ཆོས་མིན་མི་སྤེལ་བར་ངེས་ཤིང་། རྫུན་ཆོས་དར་བར་བྱར་མེད་པའི་བཀའ་བཙན་ཁུངས་བཙུན་གྱི་རྒྱུ་མཚན་ཡོད་པའི་ཕྱིར། དཔེར་ན་ཁྱོད་ཀྱིས་རྒྱ་གར་ནས་བྱུང་བ་ཙམ་གྱིས་ཆོས་རྣམ་དག་གི་ཁུངས་སུ་རུང་ན། རྒྱ་གར་ནས་བྱུང་ཚད་ཆོས་རྣམ་དག་ཡིན་པའི་རྒྱུ་མཚན་གཞན་མེད་དེ། འཕགས་ཡུལ་གྱི་པཎ་གྲུབ་ཚད་མ་ལས་བརྒྱུད་པ་ཉིད་རྒྱུ་མཚན་ཡིན་ཏེ། འཇིགས་བྱེད་དང་། དུས་འཁོར་ལྟ་བུ་རྒྱ་གར་དུ་གསར་དུ་བྱུང་མོད། ལ་ལི་ཏ་དང་། དུས་ཞབས་པ་སོགས་གང་ཟག་ཚད་མ་ལས་བརྒྱུད་པའི་ཕྱིར་རྒྱ་བོད་སུས་ཀྱང་ཐེ་ཚོམ་མི་ཟ་བ་བཞིན་ནོ། །གལ་ཏེ་གང་ཟག་ཚད་མས་མ་གྲུབ་ན། འཇིགས་བྱེད་ལ་ལི་ཏས་རྩོམ་པ་དང་། དུས་འཁོར་དུས་ཞབས་པས་རྩོམ་པ་དང་། འབུམ་རྒྱས་པ་ཀླུ་སྒྲུབ་ཀྱིས་རྩོམ་པ་སོགས་སུ་ཅིས་མི་འགྱུར་ཏེ་རྒྱུ་མཚན་མཚུངས་པས་འདི་འདྲའི་སྨྲ་ངན་དེ་ཁྱོད་ལ་སུས་བགོས་པ་ཡིན། རྒྱ་གར་བས་རྒྱུད་མི་རྩོམ་ལ། བོད་ཀྱིས་རྩོམ་པའི་ངེས་པ་ཡོད་ན་སྨྲོས་ཤིགཁྱོད་ཕྱིར་རྒོལ་མཁན་པོ་ལ་སྨྲ་རྒྱུ་ཡོད་ན་སྨྲ་བའི་དུས་ཡིན་ཏེ་སྨྲ་ལྕེ་ནང་དུ་བསྡུ་བའི་དུས་མིན་མོད། སྨྲ་རྒྱུས་དབུལ་ན་སྨྲ་བཅད་ལས་འོས་མེད་དོ། །གཞན་ཡང་སངས་རྒྱས་འདས་ནས་ལོ་བདུན་བརྒྱ་ན་བདུད་སྡིག་ཅན་གྱི་བཀའ་ལ་ལྷད་ཞུགས་ཚུལ་ལུང་བསྟན་པ་དང་། དགེ་སློང་ལྷ་ཆེན་པོས་ཧུ་ལུ་ཧུ་ལུ་སོགས་རུང་བ་མ་ཡིན་པའི་གཞི་བཅུ་བསྒྲགས་པ་དང་། བྲམ་ཟེ་རྒྱལ་བཤེས་ཀྱིས་གསུང་རབ་ཀྱི་གླེགས་བམ་བསྡུས་ནས་མེར་བསྲེགས་རྗེས། འདུལ་བ་གཞུང་བླ་མའི་དཔེ་བཙལ་ཀྱང་མ་རྙེད་ནས། ཁ་ཆེའི་ཡུལ་དུ་དགེ་སློང་ཞིག་གིས་གཞུང་བླ་མ་འདོན་ཏོ་ཞེས་ཐོས་ནས་དགེ་སློང་རྣམས་དེའི་དྲུང་དུ་ཕྱིན་པ་ན། དེས་སྨྲས་པ། ཅུང་ཟད་ཅིག་ནི་དྲན། ཅུང་ཟད་ཅིག་ནི་མི་དྲན་ནོ། །དེ་དག་གིས། ཇི་ལྟར་དྲན་པ་དེ་ཁོ་ན་བཞིན་ཐོན་ཅིགདེས་ཀྱང་དེ་ལྟར་ཁ་ཏོན་བྱས་ཏེ། ཕྱིས་ཚིག་དང་དོན་གྱི་སྒོ་ནས་རྣམ་པར་དཔྱད་དེ་སྦྱར་བར་བྱའོ་སྙམ་དུ་བསམས་ནས་བྲིས་པ་ལས། ཕྱིས་འཕྲལ་གྱི་བྱ་བས་རྣམ་པར་གཡེངས་ནས། དུས་རིང་མོ་ཞིག་གི་བར་དུ་ཇི་ལྟ་བ་བཞིན་མ་འགྲུབ་ཅིང་། དགེ་སློང་གཞན་དག་ཀྱང་ཡུལ་གཞན་དུ་འདོན་པར་གྱུར་ཏེ། དེའི་ཕྱིར་ཡང་དག་བསྡུ་བའི་གཞི་ཉམས་པས། གཞུང་བླ་མ་འདི་ལ་འདོན་པ་ཡང་རྣམ་པ་དུ་མ་ལ། དོན་ཡང་རྣམ་པ་དུ་མ་སྟེ། དེའི་ཕྱིར་བཙུན་པ་ཡོན་ཏན་འོད་ཀྱིས་འདུལ་བའི་བཤད་པ་ལས། ཡང་དང་ཡང་དུ་ཞུས་པ་ལས་འདི་སྐད་འབྱུང་ངོ་ཞེས་གསུངས་པ་དང་། ཨ་བྷ་ཡས། ཐིག་ལེ་མང་ཉུང་ཡོད་པ་ཡིག་སྐྱོན་སོགས་རྒྱ་གར་ན་ཡང་ཡོད་པར་བཤད། རྒྱ་ལས་བྱུང་ཚད་ཆོས་རྣམ་དག་ཡིན་པར་བསྒྲུབ་པར་ག་ལ་ནུས་ཏེ། མུ་སྟེགས་པའི་གཞུང་ཐམས་ཅད་རྒྱ་གར་ནས་བྱུང་ཡང་སངས་རྒྱས་ཀྱི་བཀའ་དང་། དེའི་དགོངས་འགྲེལ་དུ་མི་འདོད་པ་བཞིན་ནོ། །དེས་ན་རྒྱ་གར་གྱི་ཡུལ་ཕལ་ནས་བྱུང་བ་ཙམ་ཁུངས་སུ་བྱེད་པ་ལས། རྒྱ་གར་གྱི་པཎ་གྲུབ་ཀུན་གྱི་ནང་ན་ཉི་ཟླ་ལྟར་འཕགས་པའི། མཁན་སློབ་གཉིས་དང་། བི་མ་མི་ཏྲ། སངས་རྒྱས་གསང་བ། ཛི་ན་མི་ཏྲ་སོགས་གང་ཟག་དམ་པ་འདི་རྣམས་དང་། ས་བཅུའི་དབང་ཕྱུག་སྤྲུལ་པའི་སྐུ་བཻ་རོ་ཙཱ་ན་དང་། སྐ་ཅོག་སོགས་ཀྱིས་འགྱུར་བ་ཉིད་ཁུངས་སུ་ཆེ་དགོས་ཏེ་རྒྱ་གར་རང་ནའང་དེ་ལས་ལྷག་པའི་སྒྲུབ་བྱེད་མེད་དོ། །གཞན་ཡང་རྒྱ་གར་ནས་མ་བྱུང་ཞེས་པའི་མཚང་རྐུབ་རྡོལ་ཞིང་བྱུང་བའི་རྒྱུ་མཚན་ཡོད་དེ། གསང་སྙིང་རྨ་རིན་གྱིས་བརྩམས་པར་བསྒྲགས་ཀྱང་། ཕྱིས་བསམ་ཡས་ནས་གསང་བ་སྙིང་པོའི་རྒྱ་དཔེ་ཁ་ཆེ་པཎ་ཆེན་གྱི་ཕྱག་ཏུ་བྱུང་བ་རྟ་སྟོན་གཟི་བརྗིད་ལ་བབས། དེ་ནས་ཤ་གད་ལོ་ཙཱ་ལ་བྱུང་བ། བཅོམ་ལྡན་རིག་པའི་རལ་གྲིས་བླངས་ཏེ་འགྱུར་བཅོས་དང་སྔར་མ་འགྱུར་བའི་ལེའུ་གཉིས་འགྱུར། གསང་སྙིང་སྒྲུབ་པ་རྒྱན་གྱི་མེ་ཏོག་ཞེས་པའི་བསྟན་བཅོས་ཀྱང་མཛད་དེ་དྲིལ་བསྒྲགས། རྒྱུད་ཕྱི་མ་ཐར་པ་ལོ་ཙཱས་བསྒྱུར་པ་དང་། བལ་པོ་བྷི་ཧ་ར་ནས་གློ་བོ་ལོ་ཙཱ་བ་དཔལ་ལྡན་བྱང་ཆུབ་ཀྱིས་རྙེད་པའི་རྒྱ་དཔེ་ལས་འབྲི་གུང་ལོ་ཙཱ་བ་མ་ཎི་ཀ་ཤྲཱི་ཛྙཱ་ནས་ཟུར་མཁར་དགའ་ལྡན་གླིང་དུ་བསྒྱུར་པ་དང་། དེར་མ་ཟད་རྡོ་རྗེ་བཞད་པས་མཛད་པའི་གསང་འདུས་ཀྱི་འགྲེལ་པ་དང་། འདུས་པ་ཕྱི་མའི་འགྲེལ་པ་སློབ་དཔོན་བི་ཤྭ་མི་ཏྲས་མཛད་པ་དང་། བརྒྱ་བྱིན་སྡོང་པོས་མཛད་པའི་མཉམ་སྦྱོར་འགྲེལ་པ་སོགས་སུའང་གསང་སྙིང་གི་ལུང་མང་དུ་དྲངས་ཤིང་། པཎ་ཆེན་ཇོ་བོ་རྗེས་ཀྱང་ལམ་སྒྲོན་གྱི་རང་འགྲེལ་དུ་རྒྱུད་འདིའི་ལུང་དྲངས་ཤིང་ཚད་མར་མཛད། དེ་བཞིན་དུ་པདྨའི་ཐུགས་དམ་གཤིན་རྗེ་པྲ་ཁོག་སྣང་བའི་རྒྱུད་གནུབས་སངས་རྒྱས་ཡེ་ཤེས་ཀྱིས་བརྩམས་པར་བསྒྲགས་ཀྱང་། རྒྱུད་དེ་སློབ་དཔོན་ཤནྟི་པས་སྤྱོད་རྒྱུད་དུ་བཀྲལ་ཅིང་སློབ་དཔོན་དཔལ་འཛིན་གྱིས་བྱ་རྒྱུད་དུ་བཞེད་དེ་རྒྱ་དཔེའི་དངོས་པོས་ཁུངས་བརྟོལ། གཞན་ཡང་འགོས་ཀྱིས་རྒྱལ་བུ་སྤྲིན་གྱི་ཤུགས་ཅན་ལས་གཤིན་རྗེའི་འཆར་ཀའི་རྒྱུད་སྒྲུབ་ཐབས་མདོས་གཞུང་སོགས་ཞུས་པ་འཆར་ཀ་འགོས་ལུགས་སུ་གྲགས་པ་དང་། ཁ་ཐུན་སྐོར་རང་སློབ་རྡོག་ཝ་བ་ཅན་ལ་བརྒྱུད་པ་དེང་སང་གི་བར་དུ་ཡོད་པ་དང་། ཡང་དག་མེ་གཅིག་ཐོད་གཅིག་སྐོར་པཎ་ཆེན་ཤཱཀྱ་ཤྲཱི་དང་ཁྲོ་ཕུལ་ལོ་ཙཱས་བསྒྱུར། ས་སྐྱ་པཎྜི་ཏས་ཕུར་པ་རྩེ་དུམ་གྱི་རྒྱུད་ལ་འགྱུར་བཅོས་མཛད་པ་སོགས་རྙིང་ཆོས་ཕྱིས་གསར་དུ་བསྒྱུར་པ་དང་འགྱུར་བཅོས་མཛད་པའང་མང་དུ་མཆིས་ཤིང་། དེས་མཚོན་ནས་རྒྱ་གར་དང་ཨོ་རྒྱན་སོགས་ཐམས་ཅད་དུ་རྒྱུ་ནུས་ཤིང་བཀའ་ཡི་གཉེར་ཁ་བ་མཁའ་འགྲོའི་ཚོགས་དབང་དུ་ཁོལ་ནུས་པ་ཞིག་ཡིན་ན། རྙིང་རྒྱུད་ཐམས་ཅད་ལའང་རྒྱ་དཔེ་དང་མཁའ་འགྲོའི་གསང་མཛོད་ཀྱི་དཔེ་ཡོད་པ་གོར་མ་ཆག་སྟེ་ཅི་རིགས་པ་བོད་དུ་བསྒྱུར་པ་འདིས་དན་དཔང་བྱས་པ་ཡིན་ནོ། །དེས་མི་ཆོག་པ་རེ་རེ་བཞིན་དུ་རྒྱ་དཔེ་རེ་རེ་གསར་དུ་མ་མཐོང་བར་ཡིད་མ་ཆེས་ན། ཕྱིས་ཀྱི་བསྒྱུར་པའི་ཆོས་ཐམས་ཅད་ལ་རྒྱ་དཔེ་རེ་རེ་སྟོན་རྒྱུ་ཁྱེད་ཚོ་ལ་ཡོད་དམ་སོམས་ཤིགམཁས་གྲུབ་ཨོ་རྒྱན་པས། བལ་པོ་ན་རྒྱ་དཔེ་མང་དུ་འདུག་པ་ལ། ངས་བོད་ཀྱི་སྔགས་པ་རྣམས་ལ། ཁྱེད་རང་ཚོ་མང་ཡུལ་དུ་འདེང་། ངས་རྙིང་མའི་པཎྜི་ཏ་དང་རྒྱ་དཔེ་ཚུར་དགུགལོ་ཙཱ་བ་ངས་བྱས་ཏེ་བསྒྱུར་བྱས་པ་ལ། བོད་ཀྱི་སྔགས་པ་རྣམས་བུ་སྨད་གསོ་བས་གཡེངས་ཏེ་མ་འགྲུབ། ད་དུང་འགྱུར་མང་དུ་བྱ་རྒྱུ་འདུག་པ་ལ་གསུངས་ཤིང་། ལོ་ཙཱ་བ་གཟུས་དགའ་རྡོར་གྱིས་དཔལ་ནཱ་ལེནྡྲའི་གཙུག་ལག་ཁང་ན་ལྷ་ཁང་ལ་རྒྱུད་ཀྱི་པུསྟི་ཆར་བབས་པའི་རི་མོ་བྲིས་པ་མཐོང་བ་དང་། ལོ་ཙཱ་བ་འགའ་ཞིག་གིས་རྒྱ་གར་གྱི་པཎྜི་ཏའི་ཕྱག་དཔེའི་ནང་རྙིང་མ་བཀའ་བརྒྱད་ཀྱི་སྒྲུབ་ཐབས་ཉུང་ངུ་རེ་མཐོང་ཡང་། པཎྜི་ཏ་ལ་དྲིས་དུས། མི་ཤེས་མི་ཤེས་སྔར་གྱི་བླ་རྒན་ཚོའི་རེད་ཟེར་ནས་གསང་བས་ཟབ་ཆོས་ཡིན་པའི་ལོ་རྒྱུས་དང་། དེར་མ་ཟད་རྙིང་མའི་ཚེ་བདག་གནུབས་ཀྱིས་རྩོམ་པར་འགོས་ལྷས་བཙས་ཀྱིས་འདོད་བཞིན། ཁོ་རང་ལ་རྙིང་མའི་མཐུ་རྟགས་བྱུང་ནས་རྒྱ་གར་དུ་དེ་ལ་ཕན་པའི་ཟབ་ཆོས་ཚོལ་དུ་ཕྱིན་པའི་ཚེ་པཎྜི་ཏ་ནག་པོ་པས་རྙིང་མའི་ཚེ་བདག་གནང་སྟེ་ལོ་ཙཱ་བ་ཁོང་ཉིད་ཀྱིས་བསྒྱུར་པ་ད་ལྟ་བསྟན་འགྱུར་ཁྲོད་ན་ཡོད་པ་དེས་དན་དཔང་བྱས་པ་ཡིན། འགོས་འདི་ལོ་ཙཱ་བ་མཁས་པ་ཞིག་ཡིན་ཚོད་ཀྱང་། རྙིང་མ་ལ་ཞེ་སྡང་བ་སྔོན་ཟུར་པའི་ཆོས་གྲལ་ནས་ཕུད་པའི་ཞེ་ནད་ཀྱིས་ཁ་ནས་སྐུར་འདེབས་མང་པོ་སྨྲ་བ་ཞིག་ཡིན་ཚོད་གདའ་སྟེ། མི་གཤིས་ཞིག་གི་དེ་འདྲ་ཡིན་པར། ག་ཡ་ངྷ་ར་ལའང་སྐུར་པ་བཏབ་ཚུལ་དང་། འབྲོག་མི་ལོ་ཙཱ་བའི་གམ་དུ་བྱོན་དུས་སུའང་ཆོས་འགའ་མ་གནང་བས་ཐུགས་མུག་སྟེ་རྒྱ་གར་དུ་གསུང་བ་ནའང་། སློབ་གཉེར་ཕུལ་ཕྱིན་ཅིག་མ་བྱུང་ན་འབྲོག་སྡོམ་དེ་ལ་ངོ་ཚ་བ་ཡོད་ཅེས་རང་གི་བླ་མ་ལའང་སྐུར་འདེབས་མཛད་པ་ཞིག་ཡིན་པར་གྲགས་ལ། འོན་ཀྱང་འབྱམས་ཡིག་འདི་འགོས་ལོ་དངོས་ཀྱི་མིན་པར་ཁ་གཡར་བ་གཞན་ཞིག་གིས་བྱས་ཟེར་བ་བདེན་ཤས་ཆེ་སྟེ། འབྱམས་ཡིག་འདི་ལ་བླུན་པོ་ཅི་ཡང་མི་ཤེས་པ་ཞིག་གི་ཚིག་དངོས་སུ་གསལ་འདུག་པས་སོ། །གལ་ཏེ་འགོས་ལོ་ཡིན་ནའང་མ་བརྟགས་གྱ་ཚོམ་གྱི་ཚིག་ཕྲག་དོག་ཁོ་ནས་སྨྲས་པ་རང་མཚང་སྟོན་བྱེད་དུ་སོང་བ་དངོས་གསལ་འདི་འདྲའོ། །དེ་བཞིན་དཔལ་འཛིན་གྱི་རྩོད་ཡིག་ཆོས་དང་ཆོས་མ་ཡིན་པ་རྣམ་པར་དབྱེ་བའི་རབ་ཏུ་བྱེད་པ་ཞེས་པ་དེ་འདི་ནི། རྙིང་བསྟན་ལ་སྙིང་ནས་ཞེ་སྡང་དྲག་པོས་སྨྲས་པ་དངོས་སུ་གསལ་ལ། དེ་ཡང་རང་གི་སློབ་དཔོན་ལ་ཞེ་སྡང་བས་ཡིན་ཚུལ་བཤད། གང་ལྟར་ཡང་ཆོས་ལ་ཞེ་སྡང་བས་མཐར་ལས་{ལུས}དེས་ས་གས་ནས་སོང་བའི་ཤུལ་དེང་སང་ཡང་ཡོད་ཚུལ་ལྔ་པ་རིན་པོ་ཆེ་སོགས་ཀྱིས་གསུངས་ཤིང་། ཁ་ཅིག་ས་སྤྱོད་དུ་གཤེགས་ཟེར་ཡང་། ལྷས་བྱིིན་ལྟར་ཡིན་ནམ། རྙིང་མའི་མཐུ་ཅི་ཡིན་ཡང་རུང་། རྡོ་རྗེའི་དམྱལ་བ་ཨ་ལ་ལ་ཞེས་ཁྲག་གིས་བྲིས་པའི་རྡོ་ཆར་བབ་སྟེ་ས་འོག་ཏུ་སོང་བ་ནི་རྫུན་གཏམ་མ་ཡིན་ཏེ། ལོ་རྒྱུས་འདི་ལྟར་གྲགས་པ་ལ། ཕྱིས་སྟག་ལུང་ངག་དབང་གྲགས་པས་ཞིབ་ཏུ་རྩད་གཅོད་མཛད་པས། ཁུངས་ཐུབ་མང་པོས་བདེན་པར་གླེང་གི་འདུག་གསུངས། རྙིང་མར་ཁ་ཟེར་བའི་ཐོག་མ་ཡིན་པར་འདུགལོ་ཆེན་རིན་བཟང་དང་། ཡེ་གྲགས་ཡེ་ཤེས་འོད་སོགས་ཀྱིས་སྔགས་འཆལ་ཆེས་བཀག་པའི་བདེན་གསུང་རང་གཞན་སུས་ཀྱང་དེ་ལྟར་ཤེས་དགོས་པ་ཞིག་འདུག་གོ །དཔྱད་ན་གང་ཟག་གི་རྒྱུད་དང་ཆོས་འཛོལ་བའི་སྔགས་ལོག་སུན་འབྱིན་ཡིན་གྱི་རྙིང་ཆོས་ལ་སྐུར་འདེབས་གཏན་ནས་མེད་དོ། །མི་ཤེས་པ་དག་གིས་དེ་དག་རྙིང་མ་བཀག་པ་ཡིན་པར་སེམས་ཀྱང་། དེའི་ཚིག་ལ་དཔྱོད་དང་ཆོས་ལ་སྐུར་འདེབས་གཏན་མེད། ཞི་བ་འོད་ཀྱིས་རྙིང་རྒྱུད་རྣམས་རྩོམ་ཆོས་ཡིན་ཞེས་འགོག་པའི་དམ་བཅའ་ཙམ་ལས་རིགས་པ་ཅི་ཡང་མེད། དཔལ་འཛིན་གྱིས་སུན་འབྱིན་མི་རིགས་པ་སྣ་ཚོགས་སྨྲས་པ་ནི་རིགས་པས་སུན་དབྱུང་སླ་བ་འབའ་ཞིག་སྟེ། མཁས་གྲུབ་ཆེན་པོ་སོག་བཟློག་པས་ཀྱང་ལན་ལེགས་པར་གདབ་པས་ཆོག་པར་གདའ། གཞན་རྒྱ་ར་ཀློང་ཆེན་པ་སོགས་སྔ་ཕྱིའི་མཁས་པས་མཛད་པའི་རྩོད་ལེན་དུ་མ་ཡོད་དོ། །གཉིས་པ་ལུང་གི་དན་དཔང་ནི། གསར་རྒྱུད་ཐམས་ཅད་ཀྱི་རིམ་གཉིས་རྣལ་འབྱོར་བཤད་པ་དང་རྙིང་རྒྱུད་ཕྱོགས་མཐུན་ལ། དེ་དག་གི་གནད་ཟབ་མོ་རྒྱུད་འདི་དག་ཏུ་གསལ་བས། རྒྱུད་འདི་དག་ཡིན་ན་ཡིན་མཉམ་མིན་ན་མིན་མཉམ་སྟེ་ལུང་གི་དཔང་པོའོ། །ཁྱད་པར་རྫོགས་ཆེན་ཆོས་སྐད་ཐུན་མིན་རྣམས། མཐར་ཐུག་གི་གསང་ཆེན་འབྲས་བུའི་ལུང་རྣམས་ཀྱིས་སྒྲུབ་པར་ནུས་ཤིང་། ཆོས་སྐད་ཟུར་པ་རེ་ཟུང་གསར་རྒྱུད་ཡོངས་གྲགས་རེ་ཟུང་དང་མི་འདྲ་བས་སངས་རྒྱས་ཀྱི་བཀའ་མིན་སྙམ་པ་བློ་རྒྱ་ཤིན་ཏུ་ཆུང་བ་བྱིས་པའི་གཏམ་སྟེ། སངས་རྒྱས་ཀྱིས་གསུང་གིས་ཆོས་བསྟན་པའི་སྒོ་སྣ་ཚོགས་ཚད་མེད་ཀྱི། གཅིག་ཡང་ཡང་བསྐྱར་ཟློས་ཁོ་ནས་མ་ཡིན་ཏེ། དུས་འཁོར་ལའང་གཟའ་སྐར་ཤར་དུ་འགྲོ་བ་དང་། རྒྱ་ནག་བོད་ཀྱི་བྱང་དུ་ཡོད་པར་གསུངས་པ་སོགས་ལ་རྒྱུད་ཡང་དག་མིན་པར་རིག་རལ་སོགས་ཀྱིས་བཤད་པ་དང་། རེ་མདའ་བས་ཀྱང་། རྩ་བའི་རྒྱུད་ལ་ཨེ་ཝཾ་མེད་པ་དང་། །བསྡུས་པའི་རྒྱུད་ལ་འགལ་བ་དུ་མ་མཐོང་། །གང་ལས་བླངས་པའི་ཁུངས་ཀྱང་མི་སྣང་ན། །འཕྱོན་མའི་བུ་བཞིན་འདི་ལ་སུ་ཡིད་རྟོན། །ཞེས་སོགས་རྣམ་གྲངས་དུ་མས་དགག་པ་བརྗོད་མོད། དེང་སང་དུས་འཁོར་རྒྱུད་ཀུན་གྱི་རྩེ་མོར་ཡོངས་ལ་གྲགས་ཤིང་གྲུབ་པས་དུས་འཁོར་གྱི་རྒྱུད་འདི་ལ་བརྟེན་ནས། རྫོགས་ཆེན་གྱི་ཐོད་རྒལ་སོགས་ཁྱད་ཆོས་རྣམས་ལམ་གྱི་མཐར་ཐུག་ཏུ་འགྲུབ་ནུས་པ་བཞིན་ཡིན་ཏེ། སངས་རྒྱས་ཀྱི་བཀའི་རྒྱུད་རྣམས། རྒྱུད་རྣམས་རྒྱུད་གཞན་གྱིས་ཤེས་བྱ། །ཞེས་སོགས་གསུངས་པ་ལྟར། གསང་འདུས་སོགས་སུ་རྒྱུད་དོན་མཐའ་དྲུག་གིས་དཔྱད་དགོས་པ་རྡོ་རྗེའི་ཚིག་ཏུ་སྦས་པ། ཟབ་མོའི་རྒྱུད་འགའ་ཞིག་ཏུ་མ་སྦས་པར་བཤད་པས་དུས་འཁོར་ལ་སངས་རྒྱས་རིན་ཆེན་ཟ་མ་ཏོག་ཁ་འབྱེད་པ་ཞེས་གསུངས་པ། དེ་ལས་ཀྱང་དབང་བཞི་པའི་ཡེ་ཤེས་གསལ་བར་རྫོགས་ཆེན་གྱི་རྒྱུད་ནས་སྟོན་པའི་ཕྱིར་རྒྱུད་ཀུན་གྱི་འབྲས་བུའི་མཐར་ཐུག་དགོངས་པའི་སྐྱེལ་སོར་ངེས་ནུས་སོ། །གསུམ་པ་རིགས་པའི་དཔང་པོ་ནི། རྒྱུད་ཀྱི་གཞུང་ཉིད་ལ་དཔྱད་པ་གསུམ་གྱིས་དག་པར་བྱས་ཏེ་སྔགས་རྒྱུད་སྤྱི་དང་མི་འགལ་ལ་ཐུན་མིན་མན་ངག་གི་གནད་ཡོད་པར་ངེས་པ་བསྐྱེད་དགོས་ཀྱང་། དེ་དག་ནི་རྒྱུད་དང་མན་ངག་གི་ཡིག་ཆས་སོ་སོར་རྒྱས་པར་བསྟན་གྱི་འདིར་ཡི་གེ་མང་དོགས་ནས་མ་བྲིས་ཏེ། སྤྱིར་རྒྱུད་སྡེའི་དཀའ་གནད་རྣམས་ཚུར་མཐོང་གི་རིགས་པ་ཁོ་ནས་དཔག་བྱ་གཏན་ནས་མིན་ཡང་། ཅི་རིགས་མཐར་ཐུག་དཔྱོད་པའི་རིགས་པས་མི་འགྲུབ་པའང་མ་ཡིན་ལ། རིགས་པས་གནོད་པ་མི་འབྱུང་བ་ནི་ལུང་རིགས་ཀྱིས་འགྲུབ་ནུས་སོ། །དེ་ལྟར་དན་དཔང་གསུམ་པོ་འདི་བདག་ཅག་གི་རྒྱུད་རྣམས་ལ་ཡོད་པས་ཡིད་ཆེས་སུ་རུང་བ་ཉིད་དོ། །ཕྱིས་ཀྱི་འགྱུར་ཕལ་ཆེར་ལ་སྔ་འགྱུར་དང་མཐུན་པ་རྣམས་དེར་ཟད། སྒྲུབ་ཐབས་སོགས་ཡིག་ཆ་སྣེ་ཕྲན་མང་པོ་ལ་ནི་སྔ་འགྱུར་དང་མཚུངས་པའི་ཁུངས་བཙུན་སྒྲུབ་མི་ནུས་ཏེ། རོག་ཤེས་རབ་འོད་ཀྱི་གསུང་ལས་ཀྱང་འདི་ལྟར། དུས་ཕྱིས་རྒྱ་གར་དུ་བསྟན་པའི་གྲ་ཉམས། རྒྱུད་སྡེ་ཆེན་པོ་རྣམས་རིམ་གྱིས་ནུབ། རྒྱ་དཔེ་རྣམས་ཀྱང་ཕལ་ཆེར་ཆུད་ཟོས། གྲུབ་ཐོབ་ཁ་ཡར་གྱིས་མཁའ་འགྲོའི་གསང་མཛོད་ནས་བླངས་པ་རྣམས་ཁོང་དུ་མ་ཆུད་དེ་གཉེར་ཚགས་མ་བྱས། དེའི་ཚེ་བསྟན་པ་ཕྱི་དར་དུ་གྲགས་པའི་སྐབས་ན་རྒྱ་པཎ་གསེར་འདོད་རྣམས་ཀྱིས་བོད་ན་ཆོས་གང་རྩིས་ཆེ་དྲིས་ནས་བཅོས་མ་མང་པོ་བྱས། ལོ་ཙཱ་མཁས་གྲགས་འདོད་པ་རྣམས་ཀྱིས་དབྱར་མང་ཡུལ་དུ་བསྡད། དགུན་བལ་ཡུལ་དུ་འཁྱམས། སྔོན་གྱི་ལོ་པཎ་བྱང་སེམས་ཀྱིས་བསྒྱུར་པ་རྣམས་ལ་རང་བཟོའི་འགྱུར་བཅོས་སྣ་ཚོགས་བྱས། རྩ་རླུང་ཐིག་ལེ་སོགས་ཕྱི་རོལ་པ་དང་ཐུན་མོང་བའི་ཆོས་ལ་ངོ་མཚར་བའི་གནས་སུ་བྱས་ནས་རྒྱ་གར་བའི་ཁུངས་བཟང་དྲངས་ཏེ་གསར་ཆོས་རྩིས་ཆེ་བྱས་པས་བསྟན་པ་ཉམས་དམས་པ་ཡིན་ཞེས་གསུངས། དེས་ན་དེ་འདྲའི་གསེར་འདོད་ཀྱི་པཎྜི་ཏ་རྣམས་ལས། གསེར་གྱིས་ས་སྟེང་བཀང་ཡང་དགོས་པ་མེད་པའི་པད་འབྱུང་བི་མ་སོགས་གཞན་དོན་འབའ་ཞིག་གིས་དབྱིངས་ཀྱི་མཁའ་འགྲོའི་སྙིང་ཁྲག་ལྟ་བུའི་ཆོས་སྡེ་བོད་དུ་སྤེལ་བ་རྣམས་བཀའ་བཙན་ལ་ཁུངས་བཟང་བར་ཅིས་མི་འགྱུར། པཎ་གྲུབ་དེ་དག་གིས་གསེར་བསྒྲུབས་ནས་རང་ཡུལ་དུ་ལོག་པའི་ལོ་རྒྱུས་མི་སྣང་བ་འདིས་ཀྱང་སྔ་འགྱུར་དུས་ཀྱི་གང་ཟག་རྣམས་ལ་ཡིད་བརྟན་ལྷག་པར་ཆེ། པཎ་ཆེན་ཇོ་བོ་རྗེས་ཀྱང་བསམ་ཡས་ཀྱི་རྒྱ་དཔེ་རྣམས་གཟིགས་དུས། སྔར་མ་གཟིགས་པའི་རྒྱ་དཔེ་མང་པོ་འདུག་པས། གསང་སྔགས་འདི་ལ་མིས་ཤེས་པ་མེད་པའི་མཁའ་འགྲོ་མ་རྣམས་ཀྱིས་ཀྱང་ནམ་མཁར་གཞལ་མེད་ཁང་དཔག་ཏུ་མེད་པའི་སྒོ་ཕྱེས་ནས་རྒྱུད་སྡེ་མང་པོ་བསྟན་པ་ལའང་འདི་རྣམས་མི་གདའ། ཐེག་ཆེན་གསང་སྔགས་འདི་ལ་མཐའ་མངོན་རྒྱུ་རང་ཡོད་པ་མི་འདྲ་གསུངས་ནས་ཐུགས་རྒྱལ་ཆགབོད་ཀྱི་རྒྱལ་པོ་ལ་རྗེས་སུ་ཡི་རང་མཛད། བོད་དུ་བསྟན་པ་དར་བའི་དུས་དེ་འདྲ་རྒྱ་གར་དུ་ཡང་མ་བྱུང་། རྒྱ་གར་དུ་མེ་དགྲ་ལན་གསུམ་བྱུང་བས་ཚིག་པ་འདྲ། རྒྱ་གར་ན་མེད་པའི་དཔེ་མང་པོ་འདི་ན་སྣང་གསུངས་ནས་བཙལ། ཞལ་བཤུས་ནས་རྒྱ་གར་དུ་བསྐུར། སློབ་དཔོན་པདྨས་ནམ་མཁར་བྱོན་ནས་ལྷ་ཀླུ་དང་ནཱ་ལེནྡྲ་སོགས་ནས་རྒྱུད་སྡེ་ཐམས་ཅད་བསམ་ཡས་སུ་གདན་དྲངས་པས། རྒྱུ་མཚན་དེས་རྒྱ་གར་བས་བོད་མང་བ་ཡིན་གསུངས་པ་ཇོ་བོའི་རྣམ་ཐར་ཆེན་མོར་སྣང་། སྔ་རྒྱུད་རྫུན་ཡིན་ན་བདག་ཉིད་ཆེན་པོ་དེས་འདི་རྒྱ་གར་ན་མེད། བོད་རྫུན་རེད་གསུངས་རིགས་ཀྱི། ཕྱིས་སུ་རྒྱལ་བསྟན་བྱི་དོར་མཛད་པའི་གཙོ་བོ་འདི་མཚུངས་གཞན་མེད་པའི་ཕྱིར་རོ། །དེའི་ཕྱིར་སྔར་གྱི་ལོ་པཎ་ཆེན་པོ་དེ་རྣམས་ནི་ཆོས་ཀྱི་སྡུད་པ་པོ་རིགས་གསུམ་མགོན་པོ་སོགས་ཀྱི་སྤྲུལ་པར་གདོན་མི་ཟ་སྟེ། ཅིས་ཤེས་ན་ལུང་རིགས་ཀྱིས་ཏེ། ལུང་ནི་དུས་འཁོར་འགྲེལ་ཆེན་དྲི་མེད་འོད་ལས། རྒྱལ་བཀའ་རྣམས་བོད་དུ་ནི་བོད་ཀྱི་སྐད་ཀྱིས་བྲིས་སོ། །གསུངས་པ་འདིས་བོད་ཀྱི་ལོ་ཙཱ་ཆེན་པོ་དེ་དག་བཀའ་ཡི་སྡུད་པ་པོ་རྣམས་སུ་གྲུབ་སྟེ། འདི་རྣམས་ཀྱི་སྔོན་དུ་རྒྱལ་བའི་བཀའ་བོད་ཀྱི་ཡི་གེར་བྱས་པ་མེད་པའི་ཕྱིར་ཞེས་མཁས་མཆོག་བུ་སྟོན་སོགས་བཞེད་ལ། རིགས་པའི་དབང་དུ་བྱས་ན། བོད་དུ་ཆོས་དར་བར་མཁན་སློབ་ཆོས་གསུམ་སྨོན་ལམ་བཏབ་པ་བཞིན། མཁན་པོས་ལོ་དགུ་བརྒྱར་ཆོས་རྒྱལ་བསྒུག་ཚུལ་དང་། པད་འབྱུང་ནི་རྒྱ་བོད་དུ་ཡོངས་གྲགས། གཞན་བི་མ་ལ་སོགས་པཎྜི་ཏ་དང་། ཐུ་མིའི་སམྦྷོ་ཊ་དང་། བཻ་རོ་སོགས་སྤྲུལ་པའི་ལོ་ཙཱ་བ་དེ་རྣམས། མདོ་དང་རྒྱུད་སྡེའི་གནད་ཟབ་མོ་འདི་རྣམས་བོད་སྐད་དུ་ཐོག་མར་སྒྱུར་བ་ལ་ངེས་པའི་ཚིག་སོ་སོ་ཡང་དག་པར་རིག་པ་ཐོབ་པ་མིན་ན་ཇི་བཞིན་མ་ནོར་བར་བསྒྱུར་མི་ནུས་ཏེ། བོད་སྐད་ལ་དེའི་སྔོན་དུ་གསུང་རབ་འགྱུར་བའི་བརྡའ་ཆད་མེད་པས་ལམ་སྲོལ་གསར་འཛུགས་དགོས་ལ། ལེགས་སྦྱར་གྱི་སྐད་གཅིག་ལའང་མིང་དོན་སྣ་ཚོགས་སུ་འཇུག་པ་ཡོད་པས། དོན་ཇི་བཞིན་པ་ངེས་ཚིག་ཐད་ཀར་བསྒྱུར་པས་དོན་ཐོག་ཁེལ་དཀའ། ཁྱད་པར་རྒྱུད་ཀྱི་ཚིག་རྣམས་ནི་ཕལ་ཆེར་མཐའ་དྲུག་གིས་རྒྱས་བཏབ་པས་མངོན་ཤེས་ཅན་མིན་པར་ཐད་ཀར་སྤྲོད་མི་ནུས་ཞེས་དྲི་མེད་འོད་ལས་གསུངས་པ་ལྟར་ངེས་ཏེ། རྒྱ་གར་དུ་ས་ར་ཧ་དང་ལུ་ནག་དྲིལ་གསུམ་སོགས་རྡོ་རྗེ་འཆང་དང་བཀའ་ཡི་སྡུད་པོ་དཔའ་བོ་མཁའ་འགྲོ་རྣམས་ཀྱིས་ལུང་བསྟན་པའི་གྲུབ་པ་ཆེན་པོ་རྣམས་ཀྱིས་དགོངས་པ་བཀྲལ་ནས་གཏན་ལ་ཕབ་པ་བཞིན། རྟོག་གེའི་ཡུལ་མ་ཡིན་པའི་མདོ་རྒྱུད་ཀྱི་ཆོས་ཐམས་ཅད་དོན་འགྱུར་མཛད་པས་དོན་ལ་ནོར་འཁྲུལ་རྡུལ་ཙམ་མེད་ཅིང་། ཚིག་བྱིང་ཆེ་གོ་བདེ་སྙན་ལེགས་རྒྱ་གཞུང་དང་བསྡུར་ནའང་ཚིག་ཟུར་མ་ཉམས་པ། ཕྱིས་ཀྱི་ལོ་ཙཱ་མཁས་པས་རྒྱ་དཔེ་བོད་དཔེ་ཀུན་ནས་བརྟག་དུས་ལྷག་པར་ཡིད་ཆེས་སྐྱེ་ཡིས་བཅོས་དགོས་མི་སྣང་བ་ཤ་སྟག་ཡིན་ཏེ། ཕྱིས་ཀྱི་ལོ་ཙཱའི་ནང་ནས་མཆོག་ཏུ་གྱུར་པའི་རྔོག་ལོ་ཙཱ་བ་ཆེན་པོས་ཀྱང་། མདོ་རྒྱན་ནང་ར་ག་ར་གའི་སྒྲ་ཁོ་ན་སྣང་བས་འགྱུར་མ་ཤེས། སྔ་འགྱུར་གཟིགས་པས། མ་ཆགས་མི་ཆགས་སོགས་སུ་བསྒྱུར་པ་ལ་ཡ་མཚན་སྐྱེས་ཏེ། བཻ་རོ་ཙཱ་ན་ནམ་མཁའི་མཐའ་དང་མཉམ། །སྐ་ཅོག་རྣམ་གཉིས་ཉི་ཟླ་ཟུང་གཅིག་ལ། །རིན་ཆེན་བཟང་པོ་ཐོ་རངས་སྐར་ཆེན་ཙམ། །ཁོ་བོ་དེ་དྲུང་སྲིན་བུ་མེ་ཁྱེར་བཞིན། །ཞེས་སྔ་ཕའགྱུར་གྱི་ལོ་ཙཱ་བ་ལ་བསྔགས་པ་ཆེར་མཛད་ཅིང་། སྒྲ་དང་དོན་གྱི་གནས་ལ་མཁས་པ་ས་སྐྱ་པཎྜི་ཏས་ཀྱང་། ལེགས་པར་སྦྱར་ལས་བོད་སྐད་དུ། །མཁས་པས་བསྒྱུར་པ་ཐམས་ཅད་དག །སྒྲ་མི་ཤེས་པས་བསྒྱུར་པ་ལ། །ཚིག་དོན་ནོར་བ་ཅི་རིགས་མཐོང་། །དེ་འདྲ་བདག་གིས་བཅོས་ནས་བཤད། །སྐ་ཅོག་སོགས་ཀྱིས་བསྒྱུར་པ་ལ། །འགའ་ཞིག་སྒྲ་དང་ཅུང་མ་མཐུན། །འགའ་ཞིག་དོན་འགྱུར་དག་ཏུ་བྱས། །འགའ་ཞིག་བརྡའ་རྙིང་གོ་བ་དཀའ། །འགའ་ཞིག་སྔ་མ་བཙན་པར་བྱས། །ལ་ལ་གསར་བཅད་དག་གིས་བཅོས། །ལ་ལ་རྒྱ་སྐད་སོར་བཞག་སྣང་། །ལ་ལ་ཁམས་ཀྱི་བྱེ་བྲག་གིས། །རྒྱ་སྐད་གཅིག་ལ་བཤད་ཚུལ་གྱིས། །བོད་ཀྱི་སྒྲ་འགྱུར་ཐ་དད་སྣང་། །འདི་འདྲའི་ཚིག་དོན་འདྲ་མི་འདྲ། །དེ་དག་ལེགས་པར་དཔྱིས་ཕྱིན་པ། །བླུན་པོ་རྣམས་ཀྱིས་ལྟ་ཅི་སྨྲོས། །མཁས་པ་ཡིས་ཀྱང་ཤེས་པར་དཀའ། །དེ་དག་བདག་གིས་ཐ་སྙད་ལ། །སྦྱངས་པའི་སྟོབས་ཀྱིས་ལེགས་པར་ཤེས། །འོན་ཀྱང་སྐྱེ་བོ་ཆགས་སྡང་དང་། །བླུན་ཕྱིར་བདག་ནི་ཁྱད་དུ་གསོད། །འདི་འདྲ་བདག་གིས་ཤེས་མ་ཤེས། །མགོན་པོ་སྲས་དང་བཅས་པས་མཁྱེན། །ཞེས་གསུངས། འདིས་ནི་ངེས་པའི་ཚིག་སོ་སོ་ཡང་དག་པར་རིག་པ་ཐོབ་པར་སྒྲུབ་ནུས་ཏེ། དེ་ལྟར་བསྒྱུར་ནས་ད་ཕྱིན་ཆད་ཀྱང་དེ་ལྟར་མ་བསྒྱུར་ན་ཚིག་དང་དོན་ལེགས་པར་སྟོན་མི་ནུས་པའི་ཕྱིར། སྒྲ་སྦྱོར་བམ་པོ་གཉིས་པ་སོགས་སུ་རྒྱ་སྐད་བོད་སྐད་སྦྱར་ཏེ་བསྒྱུར་ཚུལ་འདི་འདྲ་དགོས་པའི་གནད་བཀས་བཅད་པ་བཞིན་ཕྱིས་ཀྱི་ལོ་ཙཱ་ཐམས་ཅད་དེའི་རྗེས་སུ་ཞུགས་ནས་འགྱུར་བ་ཤ་སྟག་ཡིན། ཤིན་ཏུ་རྒྱ་ཆེ་དོན་ཟབ་མདོ་དང་རྒྱུད་ཀྱི་གཞུང་དེ་དག་གི་དོན་འགྲེལ་ཆེན་མོ་རྒྱ་གར་པཎ་གྲུབ་ཀྱིས་བརྩམས་པ་རྣམས་དང་བསྟུན་དུས་ཚིག་དོན་གང་ནས་ཀྱང་སྔར་ལྟར་སོར་བཞག་ལས་བཅོས་མི་དགོས་པ་འདི་མཁས་པས་བལྟས་ན་ངོ་མཚར་རྨད་དུ་བྱུང་བའི་གནས་ཡིན་ནོ། །ཁ་ཅིག་གིས་དོན་འགྱུར་ཞེས་པ་བསྟན་བྱའི་དོན་ཡོད་ཙམ་ལས། ཚིག་གི་ཚུལ་རྒྱ་སྐད་དང་ཐད་སོར་མི་མཐུན་པ་ཞིག་ཡིན་ནམ་སྙམ་ན་དེ་མིན་ཏེ་བསྟན་བྱའི་དོན་ཇི་བཞིན་ཁོང་དུ་ཆུད་ནས་ཚིག་དེ་ཉིད་རྒྱ་བོད་སྐད་རིགས་མི་འདྲ་ཡང་དོན་འདྲ་བས་ཚིག་དོན་གཉིས་ཀ་མ་ཉམས་པར་བསྒྱུར་བ་ལ་ཟེར་བ་ཡིན། དཔེར་ན་གོ་སྒྲ་གཅིག་ལའང་། ས་དང་བ་ལང་དང་རྡོ་རྗེ་སོགས་དོན་དགུ་ལ་འཇུག་པ་ཡོད་ཀྱི་སྐབས་དེའི་གོ་སྒྲ་གང་ལ་འཇུག་པའི་དོན་དེ་ཉིད་མ་ཤེས་ན་འགྱུར་ཉེས་འོང་བས། ཕྱིས་ཀྱི་ཚིག་འགྱུར་ཕལ་ཆེར་དོན་ནོར་ཞིང་ཚིག་སྡེབ་མི་ལེགས་པ་བྱུང་བ་ཡིན། སྔར་ལོ་པཎ་འཛོམས་ནས་བོད་སྐད་དུ་བསྒྱུར། སླར་ཡང་མ་ནོར་བར་ཞུས་དག་བྱས། དེའི་འཆད་ཉན་གྱིས་གཏན་ལ་ཕབ་པ་ཡིན་པས་སྔ་འགྱུར་ཟོལ་མེད་ཡིན་ན་ཤིན་ཏུ་ཡིད་ཆེས་སུ་རུང་བ་ཉིད་དེ། འདུལ་བ་མདོ་སྡེའི་གཞུང་ཐམས་ཅད་བཞིན་ནོ། །ཁ་ཅིག་ཆགས་སྡང་གི་བསམ་པས་སྔ་འགྱུར་ལས་ཕྱི་འགྱུར་རྩིས་ཆེ་བར་བྱེད་པ་ནི་ཞེན་ལྟ་རྒྱུ་མཚན་མེད་པ་སྟེ། དབུ་མ་རྩ་ཤེས་ལྟ་བུ་སོགས་ལ། པ་ཚབ་ཀྱིས་འགྱུར་མི་བཅོས་སུ་མི་རུང་བ་རྣམས་བཅོས་ཞེས་འཇུག་པའི་གཞུང་སོགས་ལ་བརྟེན། འཕགས་པ་ཡབ་སྲས་ཀྱི་ལུགས་དང་མི་མཐུན་པའི་འགྱུར་ཉེས་ཡོད་པ་ལྟ་བུར་བསྟན་འདུག་ཀྱང་། འགྱུར་ཉེས་མིན་ཡང་ཡིག་སྐྱོན་འདྲ་སོང་བ་བསལ་ཡོད་ན་ཐང་བ་ལས། དངོས་དོན་མི་བཅོས་མི་རུང་བ་ནི་ཅི་ཞིག་བཅོས་འདུག་དཔྱད་ན་ངོ་བོ་ཉིད་ཟེར་བ་ཐམས་ཅད་རང་བཞིན་དུ་བསྒྱུར་བ་འགྱུར་ཁྱད་ཙམ་ལས་དོན་སྔར་དང་མི་འདྲ་བ་སྣེ་གཅིག་མི་འདུག་སྟེ། པ་ཚབ་ཀྱི་འགྱུར་བཅོས་ཅན་གྱི་རྩ་ཤེས་རྩ་བ་དང་། དབུ་མ་ཤེར་སྒྲོན་ལེགས་ལྡན་འབྱེད་ཀྱི་འགྲེལ་པའི་ནང་གི་རྩ་བ་སྔ་འགྱུར་དང་བསྟུན་ཏེ་ལྟོས་དང་གསལ་བར་འགྱུར་རོ། །དེས་མཚོན་འགྱུར་རྙིང་དང་འགྱུར་གསར་ལ་དཔྱད་ན། དོན་ཟབ་བརླིང་ཚིག་གོ་བདེ་རླབས་ཆེ་བ་སྔ་འགྱུར་དང་མཚུངས་པ་མེད་ལ། དེ་ཉིད་བསྡུས་པ་སོགས་ཕྱི་ནང་གི་རྒྱུད་སྡེ་ཕལ་ཆེར་སྔར་ཡོད་ལ་རྒྱ་དཔེ་དང་བསྟུན་ཞུས་དག་རེ་ཙམ་བགྱིས་ནས། སྔ་འགྱུར་གྱི་འགྱུར་བྱང་སྔ་ན་མེད་པའམ་ཡོད་ཀྱང་མ་བཞག་པར། རིན་བཟང་སོགས་ཕྱིས་ཀྱི་ལོ་ཙཱ་བའི་འགྱུར་བྱང་གསར་མ་དག་གིས་ཕྱོགས་ཞེན་གྱིས་བྱས་པར་མངོན་པས་ནོར་འཁྲུལ་མེད་དོན་དེ་ལས་བྱུང་། ཕྱིས་ཀྱི་ལོ་ཙཱ་བ་མཁས་པས་བསྒྱུར་པ་ལ་ནོར་འཁྲུལ་མེད་པ་ཡོད་མོད་ཀྱི། སྔ་འགྱུར་ལོ་པཎ་འཛོོམས་ནས་བསྒྱུར་བ་ལ་འགྲན་ཟླ་མེད་པས། རིན་བཟང་རྔོག་ལོ་ས་པཎ་བུ་སྟོན་སོགས་ཕྱིས་ཀྱི་ལོ་ཙཱ་བ་ཐམས་ཅད་ཀྱིས་ཀྱང་ཚད་མར་འཛིན་ཅིང་དེ་ལ་ཁུངས་གཏུགས་ཏེ་སྔར་མ་འགྱུར་བ་རྣམས་ཀྱང་དེའི་འགྱུར་ཚུལ་དང་མཚུངས་པར་བསྒྱུར་པ་ཡིན། དེང་སང་རྒྱ་སྐད་ཀྱི་མཚམས་སྦྱོར་དང་མིང་ལེ་ཙམ་ཡང་ཡིད་ཆེས་ཤིང་དཔྱིས་ཕྱིན་པར་མི་ཤེས་པས་འགྱུར་བཟང་ངན་དཔྱད་པ་ནི། ཆུ་བྲན་བརྒལ་བར་མི་ནུས་པར་རྒྱ་མཚོ་ཆེན་པོ་རྐྱལ་གྱིས་ཆོད་པར་རློམ་པ་དང་འདྲའོ། །དེས་ན་བདག་ཉིད་ཆེན་པོ་རིན་བཟང་དང་པ་ཚབ་སོགས་ལ་སྔ་འགྱུར་ཁྱད་དུ་གསོད་པའི་བསམ་པ་མི་མངའ་ཞིང་བྱས་པ་གཟོ་བའི་ཐུགས་མངའ་མོད་ཀྱི། ཕྱིས་ཀྱི་ཕྱོགས་ཞེན་ཅན་དག་གིས་རང་ཆེ་འབྱིན་པའི་ཚིག་ཟུར་ཅི་རིགས་བསྣན་པར་བྱས་པ་ཡིན་ནོ། །དེ་བཞིན་དཀར་ཆག་འཕང་ཐང་མ་སོགས་སུ་ཚད་མ་རྣམ་འགྲེལ་སོགས་གཞུང་བསྒྱུར་ཀྱང་ཞུས་དག་མ་བྱས་པས་འགྱུར་བྱང་མ་ཕོག་པ་ཕལ་མོ་ཆེ་ལ་ཕྱིས་ཀྱི་འགྱུར་བྱང་བཏབ་ཅིང་། མཁས་པ་རྣམས་ཀྱིས་འགྲེལ་པ་སོགས་བསྒྱུར་ཏེ་འཆད་ཉན་གྱིས་གཏན་ལ་ཕབ་པ་དུ་མ་ཡོད་པ་ཡིན་མོད། དེ་ཐམས་ཅད་སྔ་འགྱུར་གྱི་དྲིན་ལས་བྱུང་བར་མི་ཤེས་པར་སྔ་འགྱུར་པ་དམན་པར་སེམས་པ་ནི་བྱས་པ་ཁྱད་དུ་གསོད་པའི་ཁྲེལ་མེད་ཡིན་ནོ། །དེས་ན་སྔ་འགྱུར་གྱི་དུས་སུ་བསྒྱུར་པའི་མདོ་རྒྱུད་འདི་དགརྒྱལ་བའི་བཀའ་ལ་ཚད་མེད་ཀྱང་དེའི་ནང་གི་ཟབ་རྒྱས་ཀྱི་དོན་ཚང་ཞིང་ལམ་གྱི་ལུས་རྫོགས་པའི་སྙིང་པོ་གསེར་ཞུན་ལྟ་བུ་རྣམས་སྤྲུལ་པའི་ལོ་པཎ་ཆོས་རྒྱལ་རྣམས་ཀྱི་བཀའ་དྲིན་ལས་བོད་ཀྱི་སྐལ་བར་ཐོབ་པ་ཡིན་པ་ཀུན་གྱིས་ཤེས་དགོས་སོ། །དེ་ལྟར་ལེགས་པར་དཔྱད་ན། སངས་རྒྱས་ཀྱི་བཀའ་ཡིན་མིན་གྱི་ཐག་ཆོད་པ་སོ་སྐྱེ་སུས་ཀྱང་མི་ནུས་ཏེ། མངོན་སུམ་ཚད་མས་སངས་རྒྱས་ཀྱི་བཀའ་མིན་པར་ཇི་ལྟར་ནུས་ཏེ། གཞུང་དེ་དངོས་སུ་རྫུན་རྩོམ་བྱེད་པར་མཐོང་ན་དེར་ཟད། དེ་མིན་ན་མངོན་ཤེས་མེད་ན་སངས་རྒྱས་ཀྱི་བཀའ་ཡིན་མིན་མི་ཤེས་ཏེ། བཀའ་ཡིན་པར་འདོད་པ་འདི་རྣམས་ཀྱང་བླ་མ་བརྒྱུད་པ་ཚད་ལྡན་ལས་ཡིད་ཆེས་པར་བྱ་བ་ཡིན་གྱི་སངས་རྒྱས་ལས་དངོས་སུ་ཕྱིས་ཀྱི་ལོ་ཙཱ་བ་སུས་ཀྱང་བླངས་པའི་ལོ་རྒྱུས་མེད་ལ། རིགས་པས་དཔྱད་ནའང་སངས་རྒྱས་ཀྱི་བཀའ་ནི་ཡུལ་གྱི་སྐད་སྣ་ཚོགས་ཀྱིས་གསུངས་པ་ཡིན་ཏེ། རྣམ་པ་ཐམས་ཅད་པའི་གསུང་ཡིན་པས་གདུལ་བྱའི་མོས་པ་བཞིན་དུ་འཆར་བའི་གསུང་གཅིག་ལས་རང་གི་མོས་པ་དང་འཚམ་པར་ཚིག་རྒྱས་བསྡུས་སྣ་ཚོགས། དོན་སྦས་མ་སྦས་སྣ་ཚོགས་ཡོད་པས་གཞུང་ཉི་ཚེ་བ་གཅིག་ལ་ཆག་བཞག་ནས་ཐམས་ཅད་དེ་དང་མཐུན་མི་མཐུན་དཔྱད་པས་བཀའ་ཡིན་མིན་འབྱེད་ག་ལ་ནུས། གསུང་ཚུལ་རྒྱུད་ཀྱི་གླེང་གཞི་སྟོན་འཁོར་སོགས་སངས་རྒྱས་ཀྱི་གསུང་ཚུལ་ཡོད་པ་ཙམ་གྱིས་གསུང་དུ་མི་ངེས་ཏེ་རྒྱུད་བརྫུས་པ་རྩོམ་ཤེས་མཁན་ཞིག་ཡིན་ན་གླེང་གཞི་སོགས་སྦྱར་ཏེ་སངས་རྒྱས་ཀྱིས་གསུངས་པ་ལྟ་བུར་མ་བརྫུས་ན། ཁོ་བོས་བྱས་སོ་ཞེས་གསལ་བར་བརྗོད་ན་སངས་རྒྱས་ཀྱི་བཀར་བརྫུས་པར་མི་འགྱུར་རོ། །ཚིག་རིས་ལ་དཔྱད་ན་རྒྱ་སྐད་ལས་བསྒྱུར་བའི་ཉམས་དང་། བཀའ་དང་དགོངས་འགྲེལ་རྣམས་ལ་ཚིག་གི་བབ། རྒྱ་གཞུང་སྔ་མ་ཚོ་དང་འདྲ་མི་འདྲའི་ཉམས་ཡོད་མོད། སྒྱུར་བྱེད་ལོ་ཙཱའི་འགྱུར་མཛད་ཚུལ་དང་། རྒྱུད་དང་འགྲེལ་པ་རྣམས་ལའང་ཚིག་ཁ་དམ་པ་དང་། ཚིག་ཁ་གསལ་ལྷོད་ལ་སོགས་བོད་གཞུང་ལྟ་བུ་ལའང་གདུལ་བྱའི་དབང་གིས་སྣ་ཚོགས་འབྱུང་བས་ཚིག་རིས་ཙམ་གྱིས་བཀའ་ཡིན་མིན་ངེས་པ་མ་ཡིན་ཏེ། བསྟན་བཅོས་ཆེན་པོ་རྣམས་སུའང་བཀའི་ཚིག་དངོས་ཀྱི་རིགས་འདྲེས་པ་ཡོད་པས། དེ་བཀའ་ནས་ཀྱང་བྱུང་བའི་དཔེ་མཐོང་ཟིན་ན་མ་གཏོགས། ཚིག་རིས་ལ་བལྟས་པས་བཀའ་དང་བསྟན་བཅོས་སོ་སོར་རྟགས་འགོད་པ་ཇི་ལྟར་ཡོད། དོན་ལ་དཔྱད་ནའང་། སྡེ་སྣོད་གསུམ་དང་རྒྱུད་སྡེ་བཞིའི་དགོངས་པ་དང་འགལ་བ་ཞིག་རྒྱུད་བརྫུས་པར་ཅི་ལ་རྩོམ། གལ་ཏེ་འགལ་བ་ལྟར་སྣང་ན་ཡང་། ཕ་དང་མ་ནི་གསད་བྱ་ཞིང་། །ཞེས་སོགས་དང་མཚུངས་པར་སྔགས་རྒྱུད་རྣམས་མཐའ་དྲུག་གིས་རྒྱས་བཏབ་ཡོད་པས་དེའི་ཚིག་སྒྲ་ཇི་བཞིན་ཡིན་མིན་ཡང་ཐེ་ཚོམ་ཆོད་དཀའ་བས་བཀའ་མིན་དུ་ཐག་ག་ལ་ཆོད། རྒྱུད་ལའང་ཚིག་དམ་ཞིང་སྦས་ཚུལ་ཅན་གྱི་རྒྱུད་ཅི་རིགས་རྣམས་བཤད་རྒྱུད་རྣམས་ཀྱིས་གསལ་དགོས་ལ། མ་སྦས་པ་རྣམས་ངེས་དོན་དང་སྒྲ་ཇི་བཞིན་པའང་ཡོད། སྡེབ་སྦྱོར་ཕུན་སུམ་ཚོགས་པའི་ཚུལ་ཅན་ཡང་ཡོད། སྒྲ་ཉམས་པ་ལྟ་བུར་སྣང་བའང་ཡོད། བསྡུས་རྒྱུད་ལྟ་བུའི་ཚིག་དོན་ཕུན་སུམ་ཚོགས་པ་ལས་སྒྲའི་ང་རྒྱལ་བཅག་པའི་ཕྱིར་བདུན་པའི་དོན་ལ་གཉིས་པ་སོགས་ཆེད་དུ་མཛད་པ་བཞིན་དང་། གོ་བདེ་ཞིང་ལྷུག་པར་སྟོན་པའི་བོད་རྩོམ་དང་བོན་པོ་གཏེར་མ་ཕལ་དང་ཚུལ་འདྲ་བའང་གདུལ་བྱའི་སྣོད་ཀྱིས་དབང་གིས་ཏེ། བསྟན་བྱ་ཉི་ཚེ་བ་དང་། རྒྱ་ཆེན་པོ་དང་། སྟོན་ཚུལ་གསལ་མི་གསལ། ཡུལ་སྣ་ཚོགས་ཀྱི་ངེས་ཚིག་ཡོད་པས་ཚིག་རིས་ཙམ་གྱིས་ངོས་མི་ཟིན་ནོ། །དེས་ན་འདི་འདྲའི་རིགས་རྣམས་དཔྱད་པར་དཀའ་བས་ཁ་ཚོན་མི་ཆོད་དེ། བཀའ་ཡིན་པ་ལ་མིན་པར་སྐུར་བ་བཏབ་ན་ཆོས་སྤང་གི་ལས་གསོག་པས། རྙིང་མ་པ་རྣམས་ཀྱིས་བཀའ་དང་བསྟན་བཅོས་ལ་གཡོ་ཅན་གྱི་སྐུར་བ་བཏབ་པ་མི་འདུགབདག་གིས་ཀྱང་བཏང་སྙོམས་སུ་བཞག་པ་ལས་ཤེས་མདོག་གི་ཁ་ཚོན་ནམ་ཡང་གཅོད་པར་མི་བྱ་སྟེ། ངེས་པའི་གཏན་ཚིགས་རྙེད་དཀའ་བས་ཐག་གཅོད་རྒྱུ་ག་ལ་ཡོད། ཚིག་རིས་ལ་བརྟགས་ན་མཁས་པས་རྩོམ་པའི་ཉམས་དང་། དེ་ལྟ་བུ་མིན་པ་གྲོང་ཚིག་གི་གཤིས་ཅན་གང་ཡིན་སུས་ཀྱང་ཤེས་སླ་སྟེ། དེ་ཙམ་གྱིས་བཀའ་ཡིན་མིན་སོགས་ངེས་དཀའ་སྟེ། སངས་རྒྱས་ཀྱི་གསུང་ནི་གདུལ་བྱའི་དབང་གིས་རྗོད་བྱེད་སྣ་ཚོགས་དང་དོན་སྣ་ཚོགས་སུ་ཡོད་པ་མི་ཁེགས་པའི་ཕྱིར་ཏེ། མགོན་པོ་བྱམས་པས། ཇི་ལྟར་བསིལ་དང་ཞིམ་དང་འཇམ་པ་དང་། །ཡངས་པའི་ཆུ་ནི་སྤྲིན་ཆེན་ལས་ཐོན་པ། །ས་ལ་བ་ཚྭ་ལ་སོགས་གནས་འབྲེལ་བས། །ཤིན་ཏུ་མང་བའི་རོ་ནི་འབྱུང་བ་ཡིན། །དེ་བཞིན་འཕགས་ལམ་ཡན་ལག་བརྒྱད་ཆུའི་ཆར། །རབ་ཡངས་བརྩེ་སྤྲིན་སྙིང་པོ་ལས་ཐོན་པ། །འགྲོ་བའི་རྒྱུད་ཀྱི་གནས་ཀྱི་དབྱེ་བ་ཡིས། །རྣམ་པ་མང་པོའི་རོ་དང་ལྡན་པར་འགྱུར། །ཞེས་གསུངས། དེ་བཞིན་སྔགས་ཀྱི་ཡི་གེ་ལའང་། སངས་རྒྱས་ཀྱི་གསུང་ཡིན་ན་ལེགས་སྦྱར་ཁོ་ན་ཡིན་པའི་ངེས་པ་མེད་དེ་ལྷ་ཀླུ་མི་སོགས་སྐད་སྣ་ཚོགས་པར་བྱིན་གྱིས་བརླབས་པའི་སྔགས་ཡོད་པས། ལེགས་སྦྱར་ཁོ་ནར་མ་ངེས་ཏེ། དྲི་མེད་འོད་ལས། ཀུན་མཁྱེན་ལམ་དོན་གཉེར་བ་རྣམས་ལ་སྒྲ་དང་སྒྲ་མིན་རྣམ་དཔྱོད་ཆེན་པོ་མེད། །སྣ་ཚོགས་ཡུལ་སྐད་ངན་པ་ཡིས་ཀྱང་ཆེན་པོ་རྣམས་ཀྱི་ལམ་ལ་རྟག་ཏུ་འཇུག །སེམས་ཅན་རྣམས་ཀྱི་མོས་པའི་སེམས་ཀྱི་དབང་གིས་ཐམས་ཅད་མཁྱེན་པའི་གསུང་མཆོག་ལ། །བརྡའ་སྤྲོད་པ་དང་ཀླུས་བཀོད་སྒྲ་བརྩེགས་རྩོད་པ་དོན་གཉེར་རྣམས་ཀྱིས་དེ་ལས་གཞན། །སྒྲ་ཉམས་པ་དང་ཡུལ་གྱི་སྐད་ལས་ཀྱང་། །རྣལ་འབྱོར་ལྡན་པས་དོན་ནི་འཛིན་བྱེད་དེ། །ཆུ་ལ་འོ་མ་ངེས་པར་ཞུགས་པ་དེ། །ངང་པས་རབ་ཏུ་ཕྱུང་སྟེ་འཐུང་བར་བྱེད། །དོན་དམ་དེ་ཉིད་ཡུལ་ལ་རྟག་ཏུ་ནི། །ཆེན་པོ་དག་རྣམས་ཚིག་ལ་རྟོན་པ་མིན། །ཡུལ་གྱི་སྐད་རྣམས་ཀྱིས་ནི་དོན་ཤེས་ན། །བསྟན་བཅོས་སྒྲ་དག་གིས་ནི་ཅི་ཞིག་བྱ། །གང་ཞིག་ཟུར་ཆག་སྒྲ་དང་སྒྲ་གྱུར་པ། །བརྗོད་པ་དེ་ཉིད་ཡེ་ཤེས་མ་ཡིན་ཞིང་། །གང་ཞིག་འགྲོ་བ་དག་ལས་ཉི་ཚེ་བ། དེ་ནི་ཐམས་ཅད་མཁྱེན་པའི་གསུང་མ་ཡིན། །ཞེས་དང་། བསྡུས་རྒྱུད་ཡེ་ཤེས་ལེའུ་ལས། དུད་འགྲོ་ཡི་དྭགས་ལྷ་མིན་རྣམས་དང་ལྟོ་འཕྱེ་ལྷ་མི་འཕགས་པ་བོད་ལ་སོགས་རྣམས་ལ། །བྱུང་དང་འབྱུང་འགྱུར་ད་ལྟར་བྱུང་བ་རྣམ་པ་གསུམ་དང་རྟག་ཏུ་ལྡན་པའི་ཆོས་གསུངས་ཤིང་། །རང་རང་སྐད་གཞན་རྣམས་ཀྱིས་སྲིད་གསུམ་མ་ཚང་མེད་པ་ལམ་ལ་ཡང་དག་འགོད་བྱེད་པ། །འདི་ནི་བདེ་ཉམས་འབྲས་བུ་སྟེར་བ་ཐམས་ཅད་མཁྱེན་པའི་གསུང་སྟེ་ལྷ་ཡི་སྐད་ཀྱི་མིན། །ཞེས་གསུངས། དཔེར་ན་ལེགས་སྦྱར་ལ་ཡི་གེ་མང་པོ་བརྩེགས་པ་མེད་ཀྱང་། དུས་འཁོར་ལ་རྣམ་བཅུ་དབང་ལྡན་གྱི་སྔགས་སོགས་དང་། རྙིང་མའི་ཚེ་བདག་ལ་ཨྱེ་ལྟ་བུ་སོགས་ཤིན་ཏུ་མང་ཞིང་། བརྟན་དོན་ཚེའི་སྒོ་ནས་ཨཱོཾ་ལ་རིང་ཆ་བཏགས་པ། སྒྲ་བསྒྱུར་ཏེ་ཀྲོ་དྷ་ལ་ཀྲོ་ཏ་སོགས་སུ་འབོད་པ་སོགས་སྒྲ་ཉམས་སྣ་ཚོགས་པ་ནི་མན་ངག་ཅན་གྱི་སྔགས་ཀྱི་སྒྱུར་སོ་གང་ཞིག་རྣོ་བའི་གནད་དང་ལྡན་པ་ཡིན་ཏེ། འདི་འདྲ་མཐའ་དག་ཕྱོགས་རེའི་དཔྱད་པས་ཤེས་མི་ནུས་ཏེ། དཔེར་ན་མཚན་བརྗོད་ཐིག་ལེ་སྟོང་པ་ཡིག་བརྒྱའི་སྐད་དོད་དང་། ཥ་ཊ་དྲུག་གི་སྐད་དོད་ལ། ཐིག་སྟོང་ཡིག་དྲུག་གི་མཚོན་བྱེད་དབྱུག་པའི་རྣམ་པ་དྲུག་འདུས་པའི་ཨེ་ཡིག་ཏུ་གྲུབ་པ་དེ་ཡིན་ལ། ཥ་ཊ་ཤ་ཏར་བསྒྱུར་ན་བརྒྱ་ཡི་སྐད་དོད་དེ། ཡི་གེ་བརྒྱའམ་ལ་བརྒྱ་ཡིས་བོན་དུའང་རུང་བ་ལྟ་བུ། བརྒྱ་དང་དྲུག་ཁྱད་ཆེ་ཡང་དོན་ལ་མི་འགལ་བ་ལྟ་བུ་འདི་འདྲ་ཕལ་གྱི་བློ་ངོར་མི་འཐད་ཀྱང་མཁས་པ་ལ་ཆེས་མཛེས་གསུངས། རྙིང་མའི་སྔགས་ཕལ་ཆེར་བོད་སྐད་ཡིན་པས་འདི་ལ་ཐེ་ཚོམ་ཟ་འདུག་ཀྱང་། གསར་རྒྱུད་ཕྱག་རྡོར་གསང་བ་མངོན་བསྟན་གྱི་རྒྱུད་སོགས་ནའང་དེ་འདྲ་བོད་སྐད་ཀྱི་སྔགས་མང་དུ་ཡོད་ལ། ཀྱེ་རྡོ་རྗེའི་རྡོ་རྗེའི་གླུ་སོགས་རྒྱུད་ཕལ་མོ་ཆེའི་སྔགས་སམ་གླུ་རྣམས་ཀྱང་ལེགས་སྦྱར་ཁོ་ན་མིན་པར་ཟུར་ཆག་སོགས་དུ་མ་ཡོད། དེའི་ཕྱིར་མཁའ་འགྲོ་གསང་བའི་བརྡའ་དང་ལྷ་ཀླུ་གནོད་སྦྱིན་རྣམས་དང་། མི་ཡི་སྐད་ཀྱི་བྱེ་བྲག་ལེགས་སྦྱར་ཟུར་ཆག་སོགས་བཞི་དང་། བོད་སོགས་ཡུལ་སོ་སོའི་སྐད་དུ་བྱིན་གྱིས་བརླབ་པ་ཡོད་དེ། ཆོས་རྣམས་ཀྱང་ངེས་ཚིག་སྣ་ཚོགས་ཀྱིས་མ་བསྟན་ན། སྐད་རིགས་གཅིག་གིས་ཡུལ་གཅིག་གི་སྟོན་པར་འགྱུར་གྱི་ཡུལ་ཐམས་ཅད་དུ་སྟོན་མི་ནུས་ཀྱི། ངེས་ཚིག་སོ་སོ་ཡང་དག་རིགས་པ་ཐོབ་པའི་སངས་རྒྱས་བྱང་སེམས་རྣམས་ཀྱིས་སྐད་སྣ་ཚོགས་ཀྱིས་སྟོན་པ་ནི། ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་བདག་གིས་ཆོས་བསྟན་ཏོ། །ཞེས་གསུངས་པ་བཞིན་ནོ། །དེ་བཞིན་དུ་བཟླ་བྱའི་སྔགས་ཀྱང་ལེགས་སྦྱར་ཁོ་ནར་བྱིན་གྱིས་རློབ་ཀྱི་གཞན་པའི་སྐད་ལ་བྱིན་བརླབ་མི་ནུས་པ་མ་ཡིན་ཏེ་གང་ལའང་བརླབ་ནུས་སོ། །དེའི་ཕྱིར་རྙིང་རྒྱུད་རྣམས་སུ་རྒྱ་སྐད་དུ་བྱིན་གྱིས་རློབ་པའི་སྔགས་སོར་བཞག་པའང་ཡོད། ཤམ་བུ་སོགས་དང་སྔགས་དངོས་ལའང་བོད་སྐད་དུ་བྱས་པ་ཡོད་དེ། དེ་དག་རྣོ་མྱུར་ཁྱད་དུ་འཕགས་པར་སངས་རྒྱས་ལས་མི་གཞན་པའི་པདྨ་འབྱུང་གནས་སོགས་ཀྱིས་དགོངས་ནས་བསྟན་པ་ཡིན་ལ། དེ་ལྟར་བཟླས་ན་བསླུ་བ་མེད་པ་ནི། པུ་ཏྲ་བྷ་དྲའི་སྔགས་ཞང་ཞུང་གི་སྐད་དུ་ཡོད་པ་བསམ་ཡས་སུ་གཏེར་དུ་སྦས། ཕྱིས་ཁ་ཅིག་གིས་བཏོན་པའི་ཚེ་ལོ་ཙཱ་རིན་བཟང་གིས་ལས་སྦྱོར་མཛད་པས་རྒྱ་སྐད་ཀྱི་སྔགས་ཀྱིས་མ་གྲུབ་ལ། ཞང་ཞུང་གི་སྐད་ལྟར་གྱི་སྔགས་ཀྱིས་དགྲ་ཐུལ་བས་པད་འབྱུང་དུས་གསུམ་མཁྱེན་པ་ཡིན་ནོ་ཞེས་བསྔགས་པར་ས་སྐྱའི་མགོན་པོད་སོགས་སུ་གསུངས་པས་མཚོན་ནས་ཤེས་སོ། །དེས་ན་དབྱིག་གཉེན་གྱིས། དམ་ཆོས་ཚུལ་ལ་ཚད་མ་ཐུབ་རྣམས་ཡིན། །ཞེས་གསུངས་པ་ལྟར། ཆོས་དང་གང་ཟག་གི་ཚད་འཛིན་འདི་ཤིན་ཏུ་དཀའ། རང་ཐེ་ཚོམ་མི་ཟ་བའི་ཆོས་ཞིག་ལ་ཡིད་གཏད། གཞན་ལ་སྒྲོ་སྐུར་མི་བྱ་བར་བཏང་སྙོམས་སུ་བཞག་ན་ལེགས་ཏེ། མགོན་པོ་བྱམས་པས། ཡིད་ཀྱི་ཉེས་པ་རང་བཞིན་གདུག་པ་སྟེ། །མི་རིགས་པ་ཡི་གཟུགས་ལའང་མི་རིགས་ན། །ཐེ་ཚོམ་ཟ་བའི་ཆོས་ལ་སྨོས་ཅི་དགོས། །དེ་བས་བཏང་སྙོམས་བཞག་ལེགས་ཉེས་པ་མེད། །ཅེས་གསུངས། ངེས་པར་ཟོག་པོས་ཆོས་ལ་བསླད་བཏང་ནས་བསྟན་པའི་ཚིག་དང་དོན་དཀྲུགས་པ་མཐོང་ན་བསྟན་པ་ལ་གཅེས་སྤྲས་ཀྱིས་མ་དག་པ་སུན་འབྱིན་པར་གནང་བ་ཡིན་ཡང་། སྔར་ཡོད་ཀྱི་ཆོས་འདི་དག་ལ་ཧ་ཅང་དག་མ་དག་གི་དཔྱད་ར་དང་བརྗོད་པ་མང་བ་ལ་དགོས་པ་ཆེར་མ་མཐོང་ངོ་། །དེ་ལྟར་གསར་རྙིང་གྲུབ་མཐའི་ཆགས་སྡང་གིས་རྙིང་ཆོས་མི་དག་པར་སྨྲ་བའི་ཚུལ་རྣམས་ལེགས་པར་བརྟགས་ཏེ་ཐེ་ཚོམ་བཅད་ནས།