རྩ་བར་བྱུར་པ་རྒྱུད་སྡེ།
ཏནྟྲ་སྡེ་བཅོ་བརྒྱད་ཀྱི་རྩ་བ་ལྟ་བུར་གྱུར་པ་སྒྱུ་འཕྲུལ་གསང་བ་སྙིང་པོའི་སྐོར་རྣམས་སློབ་དཔོན་བི་མ་ལས་རྨ་གཉགས་གཉིས་ལ་བཤད་ཅིང་བསྒྱུར། རྨས་གཙུག་རུ་རིན་ཆེན་གཞོན་ནུ་དང་། གྱེ་རེ་མཆོག་སྐྱོང་གཉིས་ལ་བཤད། དེ་གཉིས་ཀས་ཞང་རྒྱལ་བའི་ཡོན་ཏན་དང་། དར་རྗེ་དཔལ་གྱི་གྲགས་པ་ལ་བཤད་ནས་བརྒྱུད་པ་དང་། ཡང་སློབ་དཔོན་པདྨས་གཉགས་དྲི་མེད་ཟླ་ཤར་ལ་བཤད་ཅིང་མན་ངག་ལྟ་བའི་ཕྲེང་བའང་བསྟན། ཡང་བཻ་རོ་དང་ནམ་སྙིང་གིས་ཤྲཱི་སེང་དང་ཧཱུྃ་ཀར་སོ་སོ་ལས་གསན་པའི་རྒྱུན་ཡང་གཉགས་ལ་བབས། གཉགས་ཀྱིས་སོག་པོ་དཔལ་ཡེ་ལ་བཤད། དེ་དང་ཞང་གཉིས་ཀས་གནུབས་སངས་རྒྱས་ཡེ་ཤེས་ལ་བཤད་དོ། །གཞན་ཡང་སློབ་དཔོན་སངས་རྒྱས་གསང་བས་སྒྱུ་འཕྲུལ་ལམ་རྣམ་བཀོད། ལམ་རིམ་ཆེ་ཆུང་། ཞི་བ་དྲ་ཆེན་དྲ་ཆུང་། ཁྲོ་བོ་དམ་པའི་རྒྱན་སོགས་སྒྱུ་འཕྲུལ་སྙིང་པོའི་སྐོར་མང་དུ་བསྒྱུར་ནས་སྐྱེས་སུ་གནང་བ་དང་། བཻ་རོས་ཁམས་འོང་དུ་བྱམས་ཆེན་གྱི་གཙུག་ལག་ཁང་དུ་ཉི་སེང་གི་རྒྱ་ཆེར་འགྲེལ་ལ་བསྒྱུར་བཤད་མཛད། གནུབས་ཆེན་ནས་རིམ་པར་བརྒྱུད་དེ་ཟུར་མེས་དབོན་གསུམ་ལ་བཀའ་བབས་ཏེ་ཟུར་ལུགས་སུ་གྲགས་པ་དང་། སྒྲོ་ཕུག་པའི་སློབ་མ་འཛམ་སྟོན་འགྲོ་བའི་མགོན་པོ་ལས་ཀཿདམ་པ་བདེ་གཤེགས་ཀྱིས་གསན་པའི་རྒྱུན་ཕྱིས་ནས་དབུས་སུ་ཡར་འཕེལ་བ་ལ་སྒྱུ་འཕྲུལ་ཁམས་ལུགས་སུ་གྲགས་པ་དང་། རོང་ཟོམ་ཆོས་བཟང་ལ་པདྨ་བཻ་རོ་སོགས་ཀྱི་བརྒྱུད་པའི་བཀའ་བབས་པས། སྙིང་འགྲེལ་དཀོན་མཆོག་འགྲེལ་དུ་གྲགས་པ་མཛད་པ་རོང་ལུགས། ཀུན་མཁྱེན་དྲི་མེད་འོད་ཟེར་གྱིས་ཕྱོགས་བཅུའི་མུན་སེལ་མ་ཧཱའི་ཨ་ཏིར་བཀྲལ་པ་དང་། རོག་ཤེས་རབ་འོད་ལ་སོ་ཟུར་སྐྱོར་ལུགས་སོགས་མང་དུ་འདུས་ཤིང་དེ་ལས་རོག་ལུགས་སུ་གྲགས་པ་བྱུང་། ཕྱིས་གསར་མའི་འགོས་སོགས་ཀྱིས་དགག་པ་བྱ་བ་ལ་བཅོམ་ལྡན་འདས་རིག་པའི་རལ་གྲིས་སློབ་དཔོན་ཆེན་པོའི་ཕྱག་དཔེ་རྒྱ་དཔེ་དངོས་རྙེད་ནས་ཐར་པ་ལོ་ཙཱ་ལ་བསྒྱུར་བར་བསྐུལ་ཞིང་གསང་སྙིང་སྒྲུབ་པ་རྒྱན་གྱི་མེ་ཏོག་མཛད་ནས་སྤེལ་བ་སོགས་ཀྱིས་ཕྱིས་ཀྱི་རྟོག་གེ་པ་རྣམས་ལའང་རྩོད་མེད་དུ་གྱུར་ཅིང་། ལུགས་སྲོལ་ཀུན་གྱི་ནང་ནས་ཁྱད་པར་དུ་འཕགས་པ་དཔལ་ལྡན་ཟུར་པའི་བཀའ་སྲོལ་ཕྱིས་ཉག་ཕྲར་གྱུར་པ་ན། ལོ་ཆེན་བཻ་རོ་ཡབ་སྲས་སྔ་འགྱུར་བསྟན་བའི་མེ་རོ་སློང་བ་ལ་བསམ་བཞིན་དུ་སྐྱེ་བ་བཞེས་པ་སྨིན་གཏེར་སྐུ་མཆེད་ལས། གཏེར་ཆེན་རིན་པོ་ཆེས་རྒྱུད་རྒྱལ་འདི་ཉིད་ཀྱི་གཙོས་སྔ་འགྱུར་བཀའ་མའི་ཆོས་སྐོར་རྣམས་འབད་རྩོལ་དུ་མས་གསན་ཅིང་སོ་སོའི་སྒྲུབ་ཐབས་དཀྱིལ་ཆོག་གི་ཡིག་ཆ་ཁྱད་པར་ཅན་དུ་མ་མཛད་ཅིང་། སྒྱུ་འཕྲུལ་ཞི་ཁྲོ་ལའང་སྒྲུབ་དཀྱིལ་ཉུང་ལ་གསལ་བར་མཛད་ནས་དེ་དག་གི་ལག་ལེན་དང་སྒྲུབ་མཆོད་ཀྱི་རྒྱུན་བཙུགས། ལོ་ཆེན་དྷརྨཱ་ཤྲཱིས་རྒྱུད་རྒྱལ་གསང་བ་སྙིང་པོའི་སྤྱི་དོན་གསང་བདག་ཞལ་ལུང་། འབྲུ་འགྲེལ་གསང་བདག་དགོངས་རྒྱན་གཉིས་མཛད། དེ་དག་གི་ཞལ་སློབ་རབ་འབྱམས་པ་ཉེར་གཅིག་བྱུང་བར་གྲགས་པའི་ནང་ཚན་རབ་འབྱམས་པ་ཨོ་རྒྱན་ཆོས་གྲགས་ཀྱི་ཟིན་བྲིས་རིན་ཆེན་ཕྲེང་བ། ཕྱིས་ཀཿཐོག་མ་ཧཱ་པཎྜི་ཏ་འགྱུར་མེད་ཚེ་དབང་མཆོག་གྲུབ་ཀྱི་སྤྱི་དོན་ལེགས་བཤད་རོལ་མཚོ་སོགས་ལ་བརྟེན་ཏེ་བཤད་རྒྱུན་ཁྱད་པར་དུ་འཕགས་པ་ད་ལྟའི་བར་དུ་བྱུང་བས་བསྟན་པའི་མེ་རོ་རྨང་ནས་གསོས་པ་ཡིན་ནོ། །དེ་བཞིན་དུ་ཀུན་མཁྱེན་བླ་མ་འཇམ་དཔལ་དགྱེས་པའི་རྡོ་རྗེས་ཀྱང་གསང་ཆེན་རྒྱུད་སྡེའི་མངའ་བདག་མཁན་ཆེན་པདྨ་བཛྲ་སོགས་ལས་བཤད་རྒྱུན་གསན་ཅིང་སྙིང་པོའི་སྤྱི་དོན་འོད་གསལ་སྙིང་པོར་གཏན་ལ་ཕབ་པ་སོགས་ལ་བརྟེན་ནས་རྗེ་དབོན་མཁས་པ་ཆེན་པོ་གུ་ཎའི་ཞབས་ཀྱིས་རྒྱ་ཆེར་སྤེལ་བའི་བཀའ་དྲིན་ལས་དེང་སང་ཕྱོགས་བཅུའི་མུན་སེལ་གྱི་བཤད་སྲོལ་ཆེར་དར་ཞིང་། ཀཿཐོག་པ་ནམ་མཁའ་རྡོ་རྗེའི་མཆན་འགྲེལ་ལ་བརྟེན་ནས་རྒྱ་འགྲེལ་རིན་ཆེན་སྤར་ཁབ་དང་། རོང་ཟོམ་དཀོན་མཆོག་འགྲེལ། གཡུང་འགྲེལ་གསལ་བྱེད་མེ་ལོང་སོགས་ཀྱི་བཤད་ལུང་གི་རྒྱུན་ད་ལྟའི་བར་{བར་ཞུ་མཆན།} མ་ཆད་པར་བཞུགས་པར་སྣང་ཞིང་ཕལ་ཆེར་བདག་གིས་ཀྱང་ཐོས་སོ། །གཞན་ཡང་བསྟན་པ་སྔ་དར་གྱི་སྐབས་དེར། ཐུགས་རྒྱུད་གསང་བ་འདུས་པ་རྡོ་རྗེ་བཞད་པའི་ལུགས་གཉིས་ལོ་ཙཱ་བ་ལྕེ་བཀྲ་ཤིས་ཀྱིས་བསྒྱུར་ནས་བཤད་པ་དང་། སངས་རྒྱས་མཉམ་སྦྱོར་སོགས་ཀྱང་བཤད་སྒྲུབ་ཀྱི་སྲོལ་དར་བར་མཛད་དོ། །