ཟབ་པ་སྒྲུབ་སྡེའི་སྐོར།

གཉིས་པ་ཟབ་པ་སྒྲུབ་སྡེའི་སྐོར་ནི། སྤྱིར་སློབ་དཔོན་ཤཱནྟིཾ་གརྦྷས་གནུབས་ཆེན་སོགས་ལ་བརྒྱུད་པའི་གཤེད་སྐོར། སློབ་དཔོན་ཧཱུྃ་ཀ་རས་དགེ་སློང་ནམ་མཁའི་སྙིང་པོ་ལ་བསྩལ་པའི་ཡང་དགསློབ་དཔོན་བི་མ་ལས་གཉགས་ལ་བསྟན་པའི་བདུད་རྩི། ཨོ་རྒྱན་ཆེན་པོས་ལས་ཅན་སོ་སོ་ལ་བསྩལ་པའི་རྟ་མགྲིན་དང་ཕུར་པ་སོགས་ཀྱིས་མཚོན་རྒྱུད་དང་གདམས་པའི་བཀའ་སྲོལ་མཐའ་ཡས་པ་བྱུང་ཞིང་། བྱེ་བྲག་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་གསང་མཛོད་ཟབ་མོའི་ཐེག་པ་འདི་ལ་འཕགས་བོད་དུ་བཀའ་བབས་པའི་མཁས་གྲུབ་མང་པོ་བཞུགས་མོད་ཀྱི། ཐམས་ཅད་ཀྱི་དབུས་ན་མཆོག་ཏུ་འཕགས་ཤིང་འགྲན་ཟླ་དང་བྲལ་བའི་བཀའ་སྲོལ་ལ། རྒྱ་གར་གྱི་པཎ་གྲུབ་བཞི་བོད་ཀྱི་བཞི་སྟེ་བརྒྱད་དུ་ཡོད་པ་ལས། དང་པོ་བཞི་ནི། ཡི་དམ་ལྷས་དབང་བསྐུར་ཐོབ་པ་སློབ་དཔོན་དགའ་རབ་རྡོ་རྗེ། བཀའ་རྒྱུད་རྟགས་ཀྱི་གླེགས་བམ་གྱི་དབང་བསྐུར་ཐོབ་པ་སྐལ་ལྡན་རྒྱལ་པོ་ཛཿ། རང་རིག་པ་རྩལ་གྱི་དབང་བསྐུར་ཐོབ་པ་གུ་རུ་པདྨ་སམ་བྷ་ཝ། དགེ་བའི་བཤེས་གཉེན་གྱིས་དབང་བསྐུར་ནས་ཐོབ་པ་པཎ་ཆེན་བི་མ་མི་ཏྲ་དང་བཞིའོ། །བོད་དུ་དབང་གི་ཆུ་བོ་བཞིའི་མགོ་བོ་ནི། པད་འབྱུང་། བི་མ། ནམ་སྙིང་། བཻ་རོ་བཞི་སྟེ། དེ་ཡང་གསང་བདག་ཕྱག་ན་རྡོ་རྗེའི་སྤྲུལ་པ་གུ་རུ་པདྨ་འབྱུང་གནས་ལ། རྒྱ་གར་གྱི་བཀའ་བབ་གསུམ་པོའི་དབང་གི་ཆུ་བོ་ཡང་འདུས་ཤིང་། བོད་དུ་རྗེ་བཙུན་རིག་འཛིན་ཆེན་པོ་དེ་ཉིད་ཀྱིས་བསམ་ཡས་མཆིམས་ཕུའི་བྲག་དམར་ཀེའུ་ཚང་དུ་དཔལ་སྒྲུབ་པ་ཆེན་པོ་བཀའ་བརྒྱད་ཀྱི་དཀྱིལ་འཁོར་དུ་རྗེ་འབངས་ཐུགས་ཀྱི་སྲས་དགུར་དབང་བསྐུར་བའི་ཚེ་མངའ་བདག་རྒྱལ་པོའི་མེ་ཏོག་དབུས་སུ་བབ་པ་སོགས་སོ་སོའི་རིགས་ཀྱི་དཀྱིལ་འཁོར་བསྒྲུབས་པས་ཞལ་མཐོང་ཞིང་དངོས་གྲུབ་ཐོབ་ནས་རྫུ་འཕྲུལ་སྣ་ཚོགས་སྟོན་པར་མཛད་དོ། །དེ་དག་གི་བཀའ་ཡང་གཉགས་ཛྙཱ་ན་ལ་བབས་སོ། །ཡང་འཕོ་ཆེན་རྡོ་རྗེའི་སྐུ་བརྙེས་པའི་སློབ་དཔོན་བི་མ་མི་ཏྲས་ཡར་ལུང་མཆོང་གི་ཡོང་རྫོང་དུ། གསང་བ་མཆོག་གི་དཀྱིལ་འཁོར་བཞེངས་ནས་ཞང་གི་བནྡེ་ཛྙཱ་ན་ལ་དབང་བསྐུར་མཚན་དྲི་མེད་ཟླ་ཤར་དུ་བཏགས་ནས་གྲུབ་པ་ཐོབ། ལྷ་སྲས་རལ་པ་ཅན་གྱི་ཕྱག་རྒྱས་བཏབ་པ་དབང་གི་ཆུ་བོ་གཅིག་གོ །ཡང་སངས་རྒྱས་རྣམ་པར་སྣང་མཛད་ཀྱི་སྤྲུལ་པ་ལོ་ཆེན་བཻ་རོ་ཙཱ་ནས་རྒྱ་གར་དུ་སློབ་དཔོན་དགའ་རབ་རྡོ་རྗེ་དངོས་དང་། དེའི་སློབ་མ་འཇམ་དཔལ་གྱི་ཞལ་དངོས་སུ་མཐོང་བ་སློབ་དཔོན་འཇམ་དཔལ་བཤེས་གཉེན་གཉིས་ལས་དབང་ཐོབ་ཅིང་བཻ་རོ་ཙཱ་ནས་རྒྱལ་མོ་གཡུ་སྒྲ་ལ་བསྐུར། དེས་ཡར་ལུང་ཤེར་གྱི་བྲག་ཕུག་ཏུ་ཞང་ཛྙཱ་ན་ལ་དབང་བསྐུར་བའོ། །ཡང་ཉི་ཟླ་རྟོད་ལ་གནོན་པར་ནུས་ཤིང་མི་སློབ་པའི་ཟུང་འཇུག་གི་གོ་འཕང་མངོན་དུ་བརྙེས་པའི་གནུབས་སྟོན་ནམ་མཁའི་སྙིང་པོས་རྒྱ་གར་གྱི་ཡུལ་གསེར་བྲག་བྱ་ཁྱུང་ཚལ་དུ་བཛྲ་ཧཱུྃ་ཀ་ར་ལ་དབང་ནོས་ནས་གཉལ་གྱི་དགེ་རི་རུ་མར་མེ་དགུ་པ་བཞེངས་ནས་ཞང་ལ་དབང་བསྐུར་བ་ཡིན་ནོ། །དེ་ལྟར་སློབ་དཔོན་བཞི་པོ་དེ་དག་གི་དབང་གི་ཆུ་བོ་བཞི་ཀ་གཅིག་ཏུ་འདུས་པ་ཞང་ཛྙཱ་ན་ཀུ་མ་ར་དེ་ཉིད་ཀྱིས་གྲའི་མན་ཁང་དང་སོག་པོ་ལྷ་དཔལ་དང་། གནུབས་སངས་རྒྱས་ཡེ་ཤེས་རིན་པོ་ཆེ་ལ་དབང་བསྐུར། སངས་རྒྱས་ཡེ་ཤེས་ཀྱིས་གནུབས་ཡོན་ཏན་རྒྱ་མཚོ་སོགས་གཙང་གི་མི་བཞི་ལ་བསྐུར། དེའི་ནང་ནས་བཀའ་ཐམས་ཅད་བབས་པའི་མཆོག་གནུབས་ཡོན་ཏན་རྒྱ་མཚོ་གསང་མཚན་གཏེར་བཞད་རྩལ་ལ་སྔོན་གྱི་དབང་བཀའ་བཞིའི་སྟེང་དུ་ཕྱིས་དྷ་ན་དྷ་ལའི་དབང་བཀའ་དང་ལྔ་འདུས་ཤིང་། དེ་ལས་རིམ་པར་གྲུབ་ཐོབ་དངོས་གྲུབ་ཀྱི་བར་དུ་བརྒྱུད་ནས་མངའ་བདག་ཉང་རལ་པ་ཅན་གྱིས་གསན། འདི་ནི་ཆོས་རྒྱལ་ཚངས་པ་ལྷ་ཡི་མེ་ཏོག་གི་སྐྱེ་འཕྲེང་བཅུ་དྲུག་པ་ཡིན་པས་བཀའ་མའི་དབང་བརྒྱུད་དུ་མ་ཟད་བདེ་གཤེགས་འདུས་པའི་ཆོས་གཏེར་གྱི་བཀའ་བབས་པས་ཆོས་ཀྱི་འཁོར་ལོས་སྒྱུར་བ་ཆེན་པོ་ཡིན་ལ། དེ་ནས་རིམ་པར་བརྒྱུད་དེ་ཆོས་ཀྱི་རྒྱལ་པོའི་སྤྲུལ་པ་མངའ་རིས་པཎ་ཆེན་པདྨ་དབང་གི་རྒྱལ་པོ་སོགས་མཁས་གྲུབ་བརྙེས་པའི་རྡོ་རྗེ་སློབ་དཔོན་ཟམ་མ་ཆད་པ་ལས་རིམ་པར་བརྒྱུད་ནས། ཆོས་རྒྱལ་ཆེན་པོ་འབྲས་བུ་མཐར་ཕྱིན་པའི་ཡེ་ཤེས་ཀྱི་རོལ་གར་གངས་ཅན་མཁས་གྲུབ་ཡོངས་ཀྱི་འཁོར་ལོས་སྒྱུར་བ་ཆེན་པོ་ངོ་མཚར་བཀའ་བབས་བདུན་གྱི་བདག་ཉིད་པདྨ་འོད་གསལ་མདོ་སྔགས་གླིང་པས་གསན་ཅིང་། ཁྱད་པར་དུ་གྲུབ་པའི་རིག་འཛིན་བརྒྱད་དང་གུ་རུ་མཚན་བརྒྱད་དབྱེར་མེད་པའི་དཔལ་སྒྲུབ་སྡེ་ཆེན་པོ་བརྒྱད་ཀྱི་དཀྱིལ་འཁོར་གྱི་བདག་པོ་རྣམས་ལས། ལམ་འདིའི་སྨིན་གྲོལ་ཐུན་མོང་དང་ཐུན་མོང་མ་ཡིན་པ་རྒྱ་མཚོ་ལྟ་བུ་དངོས་སུ་གསན་ཅིང་ཡོངས་སུ་རྫོགས་པའི་བཀའ་བབས། དམ་པ་དེ་ཉིད་དང་ལོ་ཆེན་བཻ་རོ་བསམ་བཞིན་སྲིད་པར་རྗེས་སུ་ཆགས་པའི་རང་གཟུགས་ཀུན་མཁྱེན་པདྨ་གར་གྱི་དབང་ཕྱུག་ཕྲིན་ལས་འགྲོ་འདུལ་རྩལ་གཉིས་ཆར་ལས། རྗེ་བཙུན་འཇམ་པའི་རྡོ་རྗེ་ངུར་སྨྲིག་གར་གྱི་རོལ་པ་འཕགས་ཡུལ་གྱི་ཤིང་རྟ་ཆེན་པོ་རྣམས་དང་མཁྱེན་རྟོགས་ཐ་མི་དད་ཅིང་ངོ་མཚར་བའི་སྙན་པས་ཕྱོགས་ཀུན་ཏུ་ཁྱབ་པའི་ཀུན་མཁྱེན་བླ་མ་མི་ཕམ་འཇམ་དཔལ་དགྱེས་པའི་རྡོ་རྗེའམ་ཆེ་མཆོག་དགྱེས་པ་རྩལ་གྱིས་ཉེ་བརྒྱུད་དང་རིང་བརྒྱུད་ཀྱི་སྨིན་གྲོལ་རྒྱབ་རྟེན་བཤད་དཀའ་དམར་{སྨར}ཁྲིད་དང་བཅས་ཡོངས་རྫོགས་གསན་ཅིང་ཐུགས་ཉམས་སུ་བཞེས་ནས་དོན་བརྒྱུད་ཀྱི་རྒྱལ་ས་ཟིན་པར་མཛད། དམ་པ་དེ་ཉིད་ལ་ཁོ་བོ་ཅག་གིས་གསོལ་བ་བཏབ་པ་ལ་བརྟེན་ནས་རྒྱ་བོད་ཀྱི་མཁས་པ་མི་བཞིའི་དགོངས་པ་གཅིག་ཏུ་དྲིལ་བ་དཔལ་སྒྲུབ་པ་ཆེན་པོ་བཀའ་བརྒྱད་ཀྱི་སྤྱི་དོན་རྣམ་པར་བཤད་པ་དངོས་གྲུབ་སྙིང་པོ་ཞེས་དུས་གསུམ་དུ་འབྱུང་བར་དཀའ་བ་ཨུ་དུམྦཱ་ར་ལྟ་བུའི་བསྟན་བཅོས་མཛད་ནས་སྙིགས་མའི་དུས་མཐའ་འདིར་ཆེས་གསལ་བར་མཛད་པ་ཡིན་ནོ། །དེ་བཞིན་དུ་གྲུབ་པའི་སློབ་དཔོན་ཆེན་པོ་རྡོ་རྗེ་ཧཱུྃ་ཀ་རས་རྒྱུད་ལས་ལུང་དུ་བཏུས་པ་ཡང་དག་གྲུབ་པ་ལ། རིག་འཛིན་གྱི་སློབ་དཔོན་ཆེན་པོ་པདྨ་སམ་བྷ་ཝཱས་མ་ཚང་བ་ཁ་བསྐངས་ཤིང་མན་ངག་གིས་འཁྲུགས་བསྡེབས་ནས་གསང་བའི་ཏིག་འགྲེལ་དུ་མཛད་པ་དགེ་སློང་ནམ་མཁའི་སྙིང་པོས་བསྒྱུར་ཅིང་བསམ་ཡས་མཆིམས་ཕུ་རུ་རྗེ་འབངས་བདུན་ལ་དབང་དང་མན་ངག་རྫོགས་པར་གནང་ནས་རེ་ཞིག་བོད་འབངས་སུ་ལའང་མི་སྤེལ་བའི་བཀའ་རྒྱས་བཏབ་པའི་ཡང་དག་གསང་འགྲེལ་ཆེན་མོའང་ཀུན་མཁྱེན་བླ་མ་རྡོ་རྗེ་གཟི་བརྗིད་ཀྱིས་ཉེ་བརྒྱུད་དུ་གསན་ནས་བོད་ཆེན་པོའི་ལྗོངས་འདིར་ཚིག་དང་དོན་གྱི་སྒོ་ནས་མི་ནུབ་པར་མཛད་པ་ལ། ཀུན་མཁྱེན་བློ་གྲོས་མཐའ་ཡས་ཀྱིས་བསྙེན་སྒྲུབ་ཀྱི་ཡིག་ཆ་ལག་ལེན་སྒྲུབ་མཆོད་སོགས་ཀྱི་རྒྱུན་སྤེལ་བར་མཛད་པ་དང་། འཇམ་དཔལ་དགྱེས་པས་ཡང་དག་གྲུབ་པའི་ཚིག་འགྲེལ་མདོར་བསྡུས་དང་། རྣམ་བཤད་གསང་འགྲེལ་ཆེན་མོའི་དོན་བསྡུས་རབ་གསལ་གཉིས་མཛད་ནས་ཆེས་གསལ་བར་མཛད། རྡོ་རྗེ་ཕུར་པ་རྩ་བའི་དུམ་བུའི་རྒྱུད་ཀྱི་བཤད་བཀའ་འང་ཉེ་བརྒྱུད་དུ་ཕེབས་པ་ལ་རྡོ་རྗེ་འཆང་བློ་གྲོས་མཐའ་ཡས་ཀྱིས་འགྲེལ་པ་དཔལ་ཆེན་དགྱེས་པའི་ཞལ་ལུང་བསྩལ་ནས་གསལ་བར་མཛད། གཞན་ཡང་གུ་རུ་རིན་པོ་ཆེས་མཛད་པའི་མན་ངག་ལྟ་བའི་ཕྲེང་བ་སོགས་ཉེ་བརྒྱུད་ཁྱད་འཕགས་བྱོན་པ་རྣམས་ལའང་རྣམ་འགྲེལ་ཁྲིད་ཡིག་སོགས་གསལ་བྱེད་ཀྱི་ཡི་གེ་ཁྱད་འཕགས་དང་བཅས་གདམས་མཛོད་སྤྲུལ་པའི་གླེགས་བམ་དུ་བཀའ་བསྡུ་མཛད་པ་དང་། རྣམ་འཇོམས་ཁྲོ་བོ་དཀར་ནག་འཁོན་ལུགས་ཡང་ཕུར་གཙོར་གྱུར་སྔ་འགྱུར་བཀའ་མའི་སྐོར་ལ་གསལ་བྱེད་ཀྱི་ཡིག་ཆ་དང་བཀའ་བསྡུ་མཛད། ཁྱད་པར་གུ་རུ་རིན་པོ་ཆེས་བཀའ་བབས་ལས་ཅན་ཉེར་གཅིག་ལ་མནོག་ཆོས་སུ་སྩལ་པ་བཀའ་འདུས་ཆོས་ཀྱི་རྒྱ་མཚོ་ཚོམ་བུ་ཉེར་གཅིག་ཏུ་སྒྲུབ་པས་མཚོན། སྤྱི་བྱེ་བྲག་གི་སྒྲུབ་བཀའ་མཐའ་ཡས་པ་ཞིག་རིང་བརྒྱུད་དང་ཉེ་བརྒྱུད་དང་ཡང་གཏེར་དང་རྗེས་དྲན་སོགས་ཀྱི་སྒོ་ནས་གཏན་ལ་ཕབ་ཅིང་གསལ་བྱེད་ཀྱི་ཡིག་ཆ་བཅས་རིན་པོ་ཆེ་གཏེར་གྱི་མཛོད་སོགས་སུ་བཀའ་ཡི་བསྡུ་བ་མཛད་པས་དུས་ཀྱི་མཐར་ཡང་ཉམས་པ་མེད་པར་རྒྱལ་དབང་པདྨའི་ཕྲིན་ལས་ཉིན་མོ་བཞིན་དུ་གསལ་བར་གྱུར་ཏོ། །གཞན་ཡང་སྔ་འགྱུར་གྱི་སྐབས་སུ་གུ་རུ་རིན་པོ་ཆེ་དངོས་ལས་གདམས་པ་ནོད་ཅིང་ཡོ་ག་གསུམ་གྱི་སྒོ་ནས་དངོས་གྲུབ་བརྙེས་པ་རྗེ་འབངས་ཉི་ཤུ་རྩ་ལྔ། ཡེར་བའི་གྲུབ་ཆེན་བརྒྱད་ཅུ། ཆུ་བོ་རིའི་སྒོམ་ཆེན་བརྒྱ་རྩ་བརྒྱད། ཡང་རྫོང་གི་སྔགས་པ་སུམ་ཅུ། ཤེལ་བྲག་གི་རྟོགས་ལྡན་ང་ལྔ། མཁའ་འགྲོ་མ་ཉི་ཤུ་རྩ་ལྔ། རྣལ་འབྱོར་མ་བདུན་སོགས་དང་། ཨ་མེས་བྱང་ཆུབ་འདྲེ་བཀོལ། རྒྱུས་བྱང་ཆུབ་གཞོན་ནུ། རོག་བན་ནམ་མཁའ་ཡེ་ཤེས། ཉང་དེ་བཞིན་གཤེགས་པ། སྤང་རྗེ་བཙན་ཁྲོམ། ཤ་མི་གོ་ཆ། ངབ་མི་དང་ངབ་འབྲེ། ལྕེ་རྒྱ་མཚོ་གྲགས། འབྲེ་ཤེས་རབ་གྲགས། རླང་ཁམ་པ་གོ་ཆ་སོགས་ནམ་མཁའ་ལ་བྱ་བཞིན་འགྲོ་བ། ཆུ་ལ་བྱེའུ་ཟུལ་གྱིས་འགྲོ་བ། རི་བྲག་ལ་ཐོགས་མེད་དུ་གཤེགས་པ། ལུས་ལྷའི་དཀྱིལ་འཁོར་དུ་སྐྱེ་བོ་མང་པོ་ལ་སྟོན་ནུས་པ། ལུས་དེ་ཉིད་ཀྱིས་ཟུང་འཇུག་གི་གོ་འཕང་བརྙེས་པ་བགྲང་གིས་མི་ལང་བར་བྱོན་པ་ཡིན་ནོ། །