སྒྲུབ་བརྒྱུད་ཕྱི་མ་རྣམས་མདོར་བསྡུས་རྗེ་བླ་མའི་གསུང་ཉིད་འབྲི་བ།

༈ ད་ནི་སྒྲུབ་བརྒྱུད་ཕྱི་མ་རྣམས་མདོར་བསྡུས་རྗེ་བླ་མའི་གསུང་ཉིད་འབྲི་བ་ལ། གཉིས་པ་བཀའ་གདམས་པ་ནི། སངས་རྒྱས་སྣང་བ་མཐའ་ཡས་ཀྱི་རྣམ་འཕྲུལ་ས་གསུམ་དུ་གྲགས་པས་ཁྱབ་པ་ཇོ་བོ་རྗེ་དཔལ་ལྡན་ཨ་ཏི་ཤ་བོད་དུ་ཕེབས། ལོག་པའི་རྒྱལ་པོ་གླང་དར་མས་ཆོས་རྒྱལ་མེས་དབོན་གྱི་བསྟན་པ་བསྣུབས་པའི་སྐྱོན་གྱིས་མདོ་འདུལ་ཉམས། གསང་སྔགས་འཆོལ་བར་སྤྱོད་པ་འགོག་ཅིང་ཐུབ་བསྟན་དྲི་མ་མེད་པ་སླར་ཡང་གསལ་བར་མཛད་པའི་སླད་དུ་མདོ་སྡེ་རྒྱན་དང་བྱང་ས་སོགས་ཀྱི་བསྟན་དོན་སྐྱེས་བུ་གསུམ་གྱི་ལམ་རིམ་ཡོངས་སུ་རྫོགས་པ་བྱང་ཆུབ་ལམ་སྒྲོན་མཛད། ལྟ་བ་དབུ་མ། སྤྱོད་པ་འདུལ་བ། གདམས་ངག་བྱང་ཆུབ་ཀྱི་སེམས་རིན་པོ་ཆེ་གཙོར་སྟོན། རྒྱལ་བའི་བཀའ་ཐམས་ཅད་གང་ཟག་གཅིག་འཚང་རྒྱ་བའི་གདམས་ངག་ཏུ་ཤར་བའི་ཁྲིད་སྲོལ་བཙུགས་པ་ལས། བརྒྱུད་འཛིན་རྣམས་ལྷ་བཞིའི་ལུས་བརྒྱན་ཅེས། བསྟན་པའི་བདག་པོ་ཤཱཀྱ་ཐུབ་པ། བྱམས་སྙིང་རྗེའི་བདག་པོ་སྤྱན་རས་གཟིགས། ཕྱིའི་བར་ཆད་སེལ་བ་སྒྲོལ་མ། ནང་གི་བར་ཆད་སེལ་བ་མི་གཡོ་བ་རྣམས་དང་། སྡེ་སྣོད་གསུམ་གྱིས་ངག་བརྒྱན། བསླབ་པ་གསུམ་གྱིས་ཡིད་བརྒྱན་ཅེས་དེ་གཉིས་རྗོད་བྱེད་དང་བརྗོད་བྱའི་དབང་གིས་གཅིག་ཏུ་བསྡུས་ཏེ་ལྷ་ཆོས་བདུན་ལྡན་གྱི་མངའ་བདག་ཏུ་གྲགས། ཇོ་བོའི་སློབ་མའི་ཐུ་བོ་རིགས་གསུམ་སེམས་དཔའི་རྣམ་འཕྲུལ་ཁུ་རྔོག་འབྲོམ་གསུམ་ལས། རྔོོག་ལེགས་པའི་ཤེས་རབ་ཀྱིས་གསང་ཕུ་ནེའུ་ཐོག་གི་ཆོས་གྲྭ་བཏབ། ཁུ་སྟོན་བརྩོན་འགྲུས་གཡུང་དྲུང་གིས་སོལ་ནག་ཐང་པོ་ཆེ་ལ་ཉམས་གསོས་མཛད། སྤྱན་རས་གཟིགས་དངོས་འབྲོམ་སྟོན་པ་རྒྱལ་བའི་འབྱུང་གནས་ཀྱིས་བྱང་རྭ་སྒྲེེང་གི་ཆོས་གྲྭ་བཏབ་ཅིང་སློབ་ཚོགས་མཐའ་ཡས་པ་བྱུང་བའི་ནང་ནས་གཙོ་བོ་སྐུ་མཆེད་གསུམ་དུ་གྲགས་པའི། པུ་ཏོ་བ་རིན་ཆེན་གསལ་ལས་གླང་ཤར་ཉི་ཟླ་ཟུང་འབྲེལ་སོགས། སྐྱེས་ཚོམ་དད་པ་སྐྱེད་པའི་གཞུང་། བསླབ་སྤྱོད་སྤྱོད་པ་སྟོན་པའི་གཞུང་། ས་རྒྱན་ཏིང་ངེ་འཛིན་གྱི་གཞུང་སྟེ་གཞུང་དྲུག་གི་བཤད་སྲོལ་འཛིན་པ་བཀའ་གདམས་གཞུང་པ་དང་། སྤྱན་སྔ་ཚུལ་ཁྲིམས་འབར་ལས་བདེན་བཞི་གདམས་ངག་ཏུ་སྟོན་པ་བྱ་ཡུལ་བ་སོགས་བརྒྱུད་པའི་གདམས་ངག་པ། ཕུ་ཆུང་བ་གཞོན་ནུ་རྒྱལ་མཚན་ལས་མན་ངག་ཐིག་ལེ་བཅུ་དྲུག་གི་སྨིན་གྲོལ་རྒྱབ་རྟེན་གསང་ཆོས་གླེགས་བམ་རིན་པོ་ཆེ་བཅས་སྟབས་ཀ་བ་སོགས་ལས་བརྒྱུད་པ་མན་ངག་པ་སྟེ་གསུམ་དང་། གཞན་ཡང་ནག་ཚོའི་བཀའ་བརྒྱུད་རྒྱ་ཆེར་བྱོན་པས་ཁམས་དབུས་ཀུན་ཏུ་ཁྱབ། ཕྱིས་སུ་རང་རྐང་འཛིན་པའི་སྡེ་ཅུང་ཟད་འགྲིབས་པ་ན་འཇམ་དབྱངས་རྣམ་འཕྲུལ་རྗེ་ཙོང་ཁ་པ་བློ་བཟང་གྲགས་པའི་དཔལ་གྱིས་བསྟན་པ་སླར་ཡང་གསལ་བར་མཛད་པའི་ཕྲིན་ལས་ཀྱི་སྣང་བས་བསྟན་པ་ས་སྟེང་ཀུན་ཏུ་ཁྱབ་པར་གྱུར་ཏོ།། །།

གསུམ་པ་ལམ་འབྲས་བུ་དང་བཅས་པ་ནི།

༈ གསུམ་པ་ལམ་འབྲས་བུ་དང་བཅས་པ་ནི། རྣལ་འབྱོར་དབང་ཕྱུག་དཔལ་ལྡན་ཆོས་སྐྱོང་ལ་རྡོ་རྗེ་བདག་མེད་མས་སྤྲུལ་པའི་དཀྱིལ་འཁོར་དུ་དབང་བསྐུར། ས་དྲུག་པའི་རྟོགས་པ་མངོན་དུ་གྱུར་ནས་གྲུབ་ཆེན་བི་རཱུ་པའམ་བིཪྺ་པ་ཞེས་གྲགས་པ་དེ་ཉིད་ཀྱིས། ཀྱཻ་རྡོ་རྗེའི་རྒྱུད་ལ་བརྟེན་ནས་ཤར་ཕྱོགས་ནག་པོ་པའི་དོན་དུ་ལམ་འབྲས་རྡོ་རྗེའི་ཚིག་རྐང་སྩལ། རྒྱུད་ཀྱི་བཤད་བཀའ་བསྡུས་པ་དང་། ལམ་འབྲས་བུ་དང་བཅས་པའི་གདམས་ངག་རྒྱས་པར་གནང་། ཌོམ་བྷི་པ་ལ་རྒྱུད་བཤད་རྒྱས་པ་དང་གདམས་ངག་བསྡུས་པ་གནང་། དེ་དག་ལས་གྲུབ་པའི་སློབ་དཔོན་རྣམས་རིམ་པར་བརྒྱུད་དེ་བྱོན་པ་ལས། བོད་ཡུལ་བསྟན་པ་ཕྱི་དར་གྱི་ལོ་ཙཱའི་ནང་ནས་མར་འགོས་འབྲོག་གསུམ་ཞེས་གསང་སྔགས་རྡོ་རྗེ་ཐེག་པའི་འབྱུང་ཁུངས་སུ་བྱེད་པའི་ཡ་གྱལ་འབྲོག་མི་ལོ་ཙཱ་བ་ཤཱཀྱ་ཡེ་ཤེས་ཀྱིས་ག་ཡ་ངྷ་ར་དང་དཔའ་བོ་རྡོ་རྗེ་ལས་གཞུང་དང་གདམས་ངག་ཡོངས་སུ་རྫོགས་པ་ཞུས། གྲུབ་ཆེན་མཚོ་སྐྱེས་ཀྱི་གདམས་པ་སོགས་ལམ་སྐོར་ཕྱི་མ་བརྒྱད་པོ་རྣམས་ཀྱང་གསན་ནས་བོད་དུ་གནང་བའི་སློབ་མ་གྲུབ་ཐོབ་བདུན། གཞུང་རྫོགས་པའི་སློབ་མ་བདུན། མན་ངག་རྫོགས་པའི་སློབ་མ་བཞི་རྣམས་སུ་བྱོན་པ་ལས་ལམ་འབྲས་སྲས་སློབ་བརྒྱུད་པ་གསུམ་བྱུང་བའི་ནང་ཚན་སེ་མཁར་ཆུང་བ་ལས་ཐོབ་པ་རབ་འབྲིང་ཐ་གསུམ་ལས་འབྲིང་པོ་ཞ་མ་ལས་འཕེལ་བ་ལའང་ལུགས་སྲོལ་བདུན་ཙམ་བྱུང་བ་དང་། རབ་ཐོབ་པ་ཞང་སྟོན་ཆོས་འབར་ལས་ས་ཆེན་ཀུན་དགའ་སྙིང་པོས་གསན་ཅིང་སྔ་བུ་ཕག་གྲུ་དང་ལྕེ་སྒོམ་གྱི་ལུགས། ཕྱི་བུ་ལ་རིང་བརྒྱུད་ཉེ་བརྒྱུད་གཉིས་རྣམས་བྱུང་། གྱི་ཇོ་ལོ་ཙཱ་བས་ཀྱང་ག་ཡ་ངྷ་ར་ལས་གསན་ནས་རིམ་པར་བརྒྱུད་པ་བཅས་ལམ་འབྲས་ལུགས་སྲོལ་བཅོ་བརྒྱད་འབྲོག་ལུགས་ལ། སྐུ་སྲས་ཐུགས་སྲས་གཉིས། སེའི་བརྒྱུད་པ་ཞ་མ་ཕོ་ལ་སློབ་སྲས་གཉིས། མོ་ལ་གསུམ། བསྲེས་བརྒྱུད་བཞི་བཅས་བདུན། ས་ལུགས་ལ་བཞི། མང་ལམ་ཞིང་ཕུག་གཉིས། གྱི་ཇོ་ལུགས་གཅིག་བཅས་བཅོ་བརྒྱད་དོ། །མཆན། དུ་གྲགས་པ་བྱུང་བ་ལས་ས་ལུགས་ཉིད་དེང་སང་གི་བར་དུ་ཕྲིན་ལས་དར་རྒྱས་སུ་བཞུགས། དེ་ཡང་། ཇོ་བོ་རྗེས་ས་དཀར་པོའི་ལོགས་ལ་ངྷཱི་བདུན་ཧཱུྃ་གཅིག་གསལ་བར་གཟིགས་པས་འཇམ་དབྱངས་བདུན་དང་ཕྱག་རྡོར་གཅིག་འབྱོན་པར་ལུང་བསྟན་པ་ལྟར་ཐོག་མར་བརྩེ་བ་ཆེན་པོ་ཀུན་དགའ་སྙིང་པོ་ལ། འབྲོག་མི། མལ་ལོ། རིན་བཟང་། བ་རི་ལོ་ཙཱ་ཆེན་པོ་བཞི་ལས་བརྒྱུད་པའི་གདམས་པའི་བཀའ་བབས། ཁྱད་པར་རྗེ་བཙུན་བིཪྺ་པ་ཆོས་སྒོ་སྐྱེལ་གྱི་ཚུལ་དུ་བྱོན་ཏེ་ལྕགས་རི་ལས་མི་འདའ་བའི་ཟབ་ཆོས་བཞི། རྒྱུད་སྡེ་བདུན་ཅུ་རྩ་གཉིས་ཀྱི་དབང་བཤད་མན་ངགལམ་འབྲས་ཉེ་བརྒྱུད་སྦས་བཤད་བཅས་སྩལ། དེས་རྗེ་བཙུན་བསོད་ནམས་རྩེ་མོ་དང་གྲགས་པ་རྒྱལ་མཚན་མཆེད་ལ་གནང་། སྔ་མ་སྐུ་ལུས་མ་སྤངས་པ་མཁའ་སྤྱོད་དུ་བཞུད། ཕྱི་མ་བོད་ཡུལ་ཙམ་ན་ཆེ་བའི་རྡོ་རྗེ་འཛིན་པ་ཆེན་པོར་གྱུར་ཅིང་ས་ཆེན་གྱི་ཡེ་ཤེས་ཀྱི་སྐུས་ཀྱང་ལམ་འབྲས་ཉེ་བརྒྱུད་བརྡ་དོན་གསལ་བ་གནང་། དེ་ནས་འཇམ་མགོན་ས་སྐྱ་པཎ་ཆེན་དང་། འགྲོ་མགོན་ཆོས་རྒྱལ་འཕགས་པ་སོགས་རིམ་གྱིས་བརྒྱུད་པ་སྟེ། འདི་ལའང་གྲུབ་ཆེན་བུད་དྷ་ཤྲཱི་ལས་ངོར་ཆེན་རྡོ་རྗེ་འཆང་ཀུན་དགའ་བཟང་པོས་གསན་ཅིང་དེ་ནས་རིམ་པར་བརྒྱུད་པ་ངོར་ལུགས་ཚོགས་བཤད་དང་། སྔགས་འཆང་གཟུངས་ཀྱི་དཔལ་བ་ལས་བརྒྱུད་ཅིང་རྡོ་རྗེ་གདན་པ་ཀུན་དགའ་རྣམ་རྒྱལ་བའི་བཀའ་སྲོལ་ལམ་འབྲས་རྫོང་ལུགས་དང་། རྡོ་རིང་ཀུན་སྤངས་པ་ཆེན་པོ་ལས་ཚར་ཆེན་བློ་གསལ་རྒྱ་མཚོས་གསན་ཅིང་ཐུགས་སྲས་ཉི་ཟླ་ལྟ་བུ་འཇམ་དབྱངས་མཁྱེན་བརྩེའི་དབང་ཕྱུག་དང་མང་ཐོས་ཀླུ་སྒྲུབ་རྒྱ་མཚོ་གཉིས་ལས་བརྒྱུད་པ་ཚར་ལུགས་སློབ་བཤད་བཅས་བྱུང་བ་རྣམས་ཀྱང་ད་ལྟའི་བར་བཞུགས་པ་ཉིད་དོ། །སྤྱིར་བླ་ཆེན་འབྲོག་མི་ལོ་ཙཱ་ལ་བཀའ་བབས་ཀྱི་ལམ་སྐོར་དགུར་གྲགས་པའི་གདམས་ངག་ཁྱད་པར་ཅན་གྱི་ཐོག་མ་རྣལ་འབྱོར་དབང་ཕྱུག་བིཪྺ་པས་མཛད་པའི་ལམ་འབྲས་བུ་དང་བཅས་པ་ནི་གོང་དུ་སོང་། ལམ་སྐོར་ཕྱི་མ་བརྒྱད་ལ་བདེ་ཀྱེ་གསང་གསུམ་གྱི་རྫོགས་རིམ་དུ་འགྲོ་བ་དྲུགརྒྱུད་སྡེ་སྤྱི་འགྲེལ་གཉིས་ལས་ཐོག་མར་ཀྱེ་རྡོར་འགྲེལ་པ་ལུགས་ཀྱི་རྫོགས་རིམ། ཌོམྦྷི་ཧེ་རུ་ཀས་རྒྱུད་བརྟག་པ་གཉིས་པ་ལ་བརྟེན་ནས་ལྷན་ཅིག་སྐྱེས་གྲུབ་མཛད། གཉིས་པ་སློབ་དཔོན་པདྨ་བཛྲས་རྡོ་རྗེ་གུར་གྱི་རྒྱུད་ལ་བརྟེན་ནས་སྒྲུབ་ཐབས་མཚོ་སྐྱེས་མཛད་པ་ལ་ཀྱེ་རྡོར་མཚོ་སྐྱེས་ལུགས་སུ་གྲགས་པའི་རྫོགས་རིམ་ཟབ་པའི་ཚུལ་དགུ་དང་མར་མེའི་རྩེ་མོ་ལྟ་བུའི་གདམས་ངགགསུམ་པ་ནག་པོ་སྤྱོད་པའི་རྡོ་རྗེས་བདེ་མཆོག་བཤད་རྒྱུད་ལ་བརྟེན་ནས་ནག་པོ་གཞུང་དྲུག་མཛད། དེ་དག་གི་ནང་ནས་ཨོ་ལ་པ་ཏིའི་ཉམས་ལེན་གཏུམ་མོ་ལམ་རྫོགས། བཞི་པ་སློབ་དཔོན་ཨུ་ཙི་ཏ་འཆི་བ་མེད་པས་མཛད་པའི་དཔྱིད་ཀྱི་ཐིག་ལེའི་རྩ་སྡོམ་ཉམས་སུ་ལེན་པ་ཡོན་པོ་བསྲང་བའི་མན་ངགལྔ་པ་དཔལ་མགོན་འཕགས་པ་ཀླུ་སྒྲུབ་ཀྱིས་གསང་བ་འདུས་པ་ལ་བརྟེན་ནས་བྱང་ཆུབ་སེམས་འགྲེལ་མཛད། དེའི་ཉམས་ལེན་མཆོད་རྟེན་དྲུང་དུ་སེམས་ཐག་གཅོད་པའི་མན་ངག་གསང་འདུས་མི་བསྐྱོད་པ་དང་འབྲེལ་བའི་རྫོགས་རིམ། དྲུག་པ་པཎ་ཆེན་ངག་གི་དབང་ཕྱུག་གྲགས་པས་དཔལ་གསང་བ་འདུས་པའི་དགོངས་པ་གཙོར་བཏོན་པའི་བསྟན་བཅོས་ཡན་ལག་བདུན་པ་སྣང་བྱེད་ལ་སོགས་པ་མཛད་པའི་ཉམས་ལེན། ཡེ་ཤེས་ཞབས་ལུགས་དང་འབྲེལ་བའི་ཕྱག་ཆེན་ཡི་གེ་མེད་པ། བདུན་པ་ཏོག་ཙེ་པས་སམྦུ་ཊི་ལ་བརྟེན་ནས་མཛད་པའི་བསམ་གྱིས་མི་ཁྱབ་པའི་རིམ་པའི་མན་ངགབརྒྱད་པ་ཆོས་རྒྱལ་ཨིནྜ་བྷཱུ་ཏིས་བླ་མེད་ཀྱི་རྒྱུད་སྡེ་ཀུན་ལ་བརྟེན་ནས་དབང་ཡོན་ཏན་གྱི་རིམ་པ་མཛད་པའི་ཉམས་ལེན་ཕྱག་རྒྱ་བཞི་རྫོགས་རྣམས་དང་། འབྲོོག་མི་ལོ་ཙཱས་སློབ་གཉེར་རྫོགས་ནས་བོད་དུ་བྱོན་ཀར་བི་ཀྲ་མ་ཤཱི་ལའི་མཁས་པ་སྒོ་དྲུག་ལ་ཆོས་འབྲེལ་རེ་ཞུས་པ་ལ་གདམས་ངག་རེ་གནང་བའི་སྒོ་དྲུག་ཆོས་འབྲེལ་དུ་གྲགས་པ་སོགས་ཀྱང་ཁྲིད་དང་ལུང་གི་རྒྱུན་བར་མ་ཆད་དུ་བཞུགས་པ་ཡིན་ནོ། །

བཞི་པ་མངའ་བདག་མར་པའི་བཀའ་བརྒྱུད་ནི།

༈ བཞི་པ་མངའ་བདག་མར་པའི་བཀའ་བརྒྱུད་ནི། དཔལ་ཏེ་ལོ་པ་ཆེན་པོས་རིང་བརྒྱུད་འཕགས་པ་ཀླུ་སྒྲུབ་ཌོམྦྷི་པ་ལཱུ་ཧི་པ་སུ་ཁ་སིངྔྷི་རྣམས་ལས་བརྒྱུད་པའི་གདམས་ངག་གྲུབ་ཆེན་སོ་སོ་ལས་གསན་པས་བཀའ་བབས་བཞིའི་མངའ་བདག་ཏུ་གྱུར། སྒྲུབ་པ་ཡུན་རིང་མཛད་ཅིང་ལམ་གྱི་རྟོགས་པ་སྦྱངས་པས་གྲུབ་པའི་དབང་ཕྱུག་ཆེན་པོར་གྱུར་ཏེ་རྡོ་རྗེ་འཆང་དང་རྡོ་རྗེ་རྣལ་འབྱོར་མ་དངོས་ཀྱི་རྗེས་སུ་བཟུང་སྟེ་རྒྱུད་སྡེ་བཞིའི་མཛོད་གཏད། དེ་ལ་པཎ་ཆེན་ནཱ་རོ་པས་དཀའ་བ་ཆེན་པོ་བཅུ་གཉིས་སྤྱད་དེ་བསྟེན་པའི་མཐར་བརྡ་དང་ཚིག་ཙམ་གྱིས་དོན་མ་ལུས་པ་ཁོང་དུ་ཆུད་ཅིང་གྲུབ་པ་བརྙེས། ལྷོ་བྲག་མར་པ་ཆོས་ཀྱི་བློ་གྲོས་འཕགས་ཡུལ་དུ་ལན་གསུམ་མམ་བཞིར་བྱོན་ཅིང་ནཱ་རོ་མེ་ཏྲི་གཙོ་བོར་གྱུར་པའི་མཁས་གྲུབ་མང་པོ་ལས་མདོ་རྒྱུད་མཐའ་དག་གསན་ཅིང་ཁྱད་པར་ནཱ་རོ་པ་ཉིད་སྔ་རྗེས་བསྡམས་པར་ལོ་བཅུ་དྲུག་དང་ཟླ་བ་བདུན་དུ་བསྟེན་ནས་གསན་བསམ་བསྒོམ་པ་ཟུང་དུ་སྦྲེེལ་བས་གྲུབ་པའི་གོ་འཕང་ལ་གནས་པར་མཛད། འབྱོན་ཐེངས་རྗེས་མའི་སྐབས་ནཱ་རོ་པ་སྤྱོད་པ་ལ་གཤེགས་ཟིན་ཀྱང་དཀའ་སྤྱད་ཆེད་པོས་བཙལ་ཞིང་གསོལ་བ་བཏབ་པས་བྱང་པུ་པ་ཧ་རིར་མངོན་སུམ་དུ་མཇལ་ཞིང་ཟླ་བ་བདུན་དུ་བཞུགས་ཏེ་བདེ་མཆོག་ཡབ་ཡུམ་གྱི་སྙན་བརྒྱུད་རྫོགས་པར་གནང་། བོད་ཡུལ་དུ་ཟབ་ཆོས་སྩལ་པའི་སློབ་མའི་གཙོ་བོ་ཀ་ཆེན་བཞི་ལས་མེས་རྔོག་མཚུར་གསུམ་ལ་བཤད་བརྒྱུད་དང་། རྗེ་བཙུན་མི་ལ་རས་པར་སྒྲུབ་བརྒྱུད་ཀྱི་བཀའ་བབས། མི་ལའི་སློབ་མ་མཁའ་སྤྱོད་དུ་གཤེགས་པ་བདུན། རས་པ་མཆེད་བརྒྱད་སོགས་མང་དུ་བྱོན་པ་རྣམས་ཀྱི་གཙོ་བོ་ཐུགས་སྲས་ཟླ་བ་ལྟ་བུ་རས་ཆུང་རྡོ་རྗེ་གྲགས་པ་ལས་རས་ཆུང་བཀའ་བརྒྱུད་བྱུང་། ཚེ་དཔག་མེད་དང་གཏུམ་མོ་སོགས་གདམས་ངག་འགའ་ཞིག་ནི་གངས་ཅན་ཐམས་ཅད་ལ་ཁྱབ། ཉི་མ་ལྟ་བུ་དྭགས་པོ་ཟླ་འོད་གཞོན་ནུ་ཞེས་རྒྱལ་བའི་ལུང་གིས་བསྔགས་པའི་མཉམ་མེད་སྒོམ་པོ་པ་ཆེན་པོ་ནི་སངས་རྒྱས་འཇིག་རྟེན་དུ་བྱོན་པ་དང་ཆོས་མཚུངས་པས་སྨིན་གྲོལ་དུ་མཛད་པའི་སློབ་མ་བསམ་གྱིས་མི་ཁྱབ་ཀྱང་བརྒྱུད་འཛིན་གཙོ་བོ་འབའ་རོམ་པ་དར་མ་དབང་ཕྱུག་ལས་འབའ་རོམ་བཀའ་བརྒྱུད། ཕག་གྲུ་རྡོ་རྗེ་རྒྱལ་པོོ་ལས་ཕག་གྲུ་བཀའ་བརྒྱུད། དཔལ་ལྡན་དུས་གསུམ་མཁྱེན་པ་ལས་ཀརྨ་བཀའ་བརྒྱུད། དབོན་སྒོམ་ཚུལ་ཁྲིམས་སྙིང་པོའི་སློབ་མ་ཞང་ཚལ་བ་བརྩོན་འགྲུས་གྲགས་པ་ལས་ཚལ་པ་བཀའ་བརྒྱུད་དེ་ཆེ་བཞིར་གྲགས་པ་དང་། དྭགས་པོ་རྩ་བའི་གདན་སར་དྭགས་པོ་ཁུ་དབོན་གསུམ་ནས་རིམ་པར་བྱོན་པ་དྭགས་པོ་བཀའ་བརྒྱུད་བཅས་ལྔ་བྱུང་། ཕག་གྲུའི་སློབ་མ་གདུགས་ཐོགས་ལྔ་བརྒྱར་གྲགས་པའི་གཙོ་བོ་རྣམས་ལས་བཀའ་བརྒྱུད་ཆུང་བརྒྱད་དམ་ཟུང་བཞི་ཡ་བརྒྱད་དུ་གྲགས་པ་རྣམས་བྱུང་སྟེ། སྐྱོབ་པ་འཇིག་རྟེན་གསུམ་གྱི་མགོན་པོ་ལས་འབྲི་གུང་བཀའ་བརྒྱུད། ཐང་པ་བཀྲ་ཤིས་དཔལ་བ་ལས་སྟག་ལུང་བཀའ་བརྒྱུད། འགྲོ་མགོན་རྒྱལ་ཚ་ཁུ་དབོན་ལས་ཁྲོ་ཕུ་བཀའ་བརྒྱུད། གླིང་རས་པདྨ་རྡོ་རྗེ་ལས་གླིང་རས་བཀའ་བརྒྱུད། སྨར་པ་རིན་ཆེན་བློ་གྲོས་ལས་སྨར་ཚང་བཀའ་བརྒྱུད། ཡེལ་བ་ཡེ་ཤེས་བརྩེགས་ལས་ཡེལ་བ་བཀའ་བརྒྱུད། ཟར་པ་ཡེ་ཤེས་སེངྒེའི་སློབ་མ་རྒྱལ་བ་གཡའ་བཟང་པ་ལས་གཡའ་བཟང་བཀའ་བརྒྱུད། སྙི་ཕུ་གྱེར་སྒོམ་ཆོས་ཀྱི་སེངྒེ་ལས་ཤུགས་གསེབ་བཀའ་བརྒྱུད་རྣམས་དང་། དེ་རེ་རེ་ལའང་གདན་ས་ཆོས་བརྒྱུད་ཕྲིན་ལས་མཐའ་ཡས་པ་བྱུང་ཞིང་། ཁྱད་པར་གླིང་རས་པའི་ཐུགས་སྲས་འགྲོ་མགོན་གཙང་པ་རྒྱ་རས་ཀྱི་བུ་སློབ་གཙོ་བོ་རྒོད་ཚང་པ་མགོན་པོ་རྡོ་རྗེ་ལས་སྟོད་འབྲུག་གནམ་གྱི་སྐར་མར་གྲགས་པ་དང་། འདིའི་སློབ་བརྒྱུད་ལས་རྒྱལ་བ་ཡང་དགོན་པ། ལ་སྟོད་ཤེས་རབ་མགོན་པོ། འབའ་ར་བ་རྒྱལ་མཚན་དཔལ་བཟང་སོགས་ཀྱི་བཀའ་བརྒྱུད་ཟུར་དུ་བྱུང་། ལོ་རས་དར་མ་དབང་ཕྱུག་ལས་སྨད་འབྲུག་ས་ཡི་དྲེག་པ། གདན་ས་འཛིན་པའི་སེངྒེ་དགུ་ཚར་ལས་བར་འབྲུག་གི་བཀའ་བརྒྱུད་བར་མ་ཆད་དུ་བྱོན། རྗེ་དུས་གསུམ་མཁྱེན་པ་ཉིད་ཐུགས་བསྐྱེད་དང་སྨོན་ལམ་གྱི་ཁྱད་པར་གྱིས་བསམ་བཞིན་དུ་སྐྱེ་བ་བཞེས་པའི་སྐུ་ཕྲེང་རེ་རེའི་བུ་སློབ་དང་ཕྲིན་ལས་བསམ་གྱིས་མི་ཁྱབ་ཀྱང་ཀཾ་ཚང་རྩ་བའི་བཀའ་བརྒྱུད་དུ་འདུ་ཞིང་། རྗེ་ལྔ་པ་དེ་བཞིན་གཤེགས་པས་སྙན་བརྒྱུད་ནོར་བུ་སྐོར་གསུམ་གྱི་བདག་པོར་མངའ་གསོལ་བ་དྲུང་རྨ་སེ་བློ་གྲོས་རིན་ཆེན་ལས་ཟུར་མང་བཀའ་བརྒྱུད་དང་། གར་དབང་དྲུག་པ་ཆོས་ཀྱི་དབང་ཕྱུག་གི་ཞལ་སློབ་མཁས་གྲུབ་ཀརྨ་ཆགས་མེད་ལས་གནས་མདོ་བཀའ་བརྒྱུད་གཉིས་སུ་གྱེས། ཕྱིས་བསྟན་པ་ཅུང་ཟད་ཉམས་པའི་ཚེ། དགྱེས་མཛད་མར་པ་ལོ་ཙཱ་བསམ་བཞིན་སྤྲུལ་པར་བཞེངས་པ་ཀུན་མཁྱེན་ཆོས་ཀྱི་འབྱུང་གནས་ལ། རྗེ་རང་བྱུང་ཞབས་དང་། རྗེ་བདུན་པ། སྤྱན་སྔ་ཆོས་གྲགས་སོགས་སྔོན་གྱི་བཀའ་བརྒྱུད་གོང་མའི་བཞེད་པ་ཉིད་ཕ་ནོར་བུ་བདག་གི་ཚུལ་དུ་ངོ་འཕྲོད་པས་ངེས་དོན་ཕྱིར་མི་ལྡོག་པའི་སེངྒེའི་སྒྲ་ཆེན་པོ་སྒྲོགས་པར་མཛད་པའི་རྟེན་འབྲེལ་ལས་སྒྲུབ་བརྒྱུད་བསྟན་པའི་སྲོག་རྩ་བརླིང་། གཞན་ཡང་མདོ་རྒྱུད་རིག་གནས་དང་བཅས་པ་ཉིན་མོ་བཞིན་དུ་གསལ་བར་མཛད་པས་བསྟན་རྒྱུན་སྤྱི་ལའང་བཀའ་དྲིན་ཤིན་ཏུ་ཆེའོ། །དེ་རྣམས་ལས་ད་ལྟ་ནི་བཀའ་བརྒྱུད་ཆེ་བཞིའི་ཡ་གྱལ་ཀརྨ་བཀའ་བརྒྱུད་དང་། ཆུང་བརྒྱད་ལས་འབྲུག་པ་དང་འབྲི་སྟག་གཉིས་རྐང་ཚུགས་པར་བཞུགས་ཤིང་། གཞན་འགའ་ཞིག་གི་སྨིན་གྲོལ་ཕྲན་ཚེགས་རེའི་རྒྱུན་མ་ནུབ་ཙམ་ལས་ཆེར་མི་སྣང་ངོ་། །

ལྔ་པ་ཤངས་པ་བཀའ་བརྒྱུད་ནི།

༈ ལྔ་པ་ཤངས་པ་བཀའ་བརྒྱུད་ནི། རྒྱལ་བས་ཉན་ཐོས་རྫུ་འཕྲུལ་ཆེན་པོ་ཞེས་ལུང་བསྟན་པའི་མཁས་གྲུབ་ཁྱུང་པོ་རྣལ་འབྱོར་དེ་ཉིད་ཐོག་མར་ཡབ་ཆོས་བོན་དང་རྙིང་མ་ལ་རིམ་གྱིས་ཞུགས་ཏེ་སོ་སོར་མཁས་ཤིང་གྲུབ་པ་བརྙེས་ཀྱང་བྱང་ཆུབ་སེམས་དཔའི་སྨོན་ལམ་དུས་སུ་སོན་པའི་སྟོབས་ཀྱིས་དེ་ཙམ་གྱིས་ཐུགས་མ་ཚིམས་ཏེ་འཕགས་ཡུལ་དུ་བྱོན། རྡོ་རྗེ་གདན་པ་སོགས་རྩ་བའི་བླ་མ་རྣམ་བཞི་གཙོ་བོར་གྱུར་པའི་མཁས་གྲུབ་བརྒྱ་དང་ལྔ་བཅུའི་ཞབས་ལ་གཏུགས་ཏེ་མདོ་སྔགས་ཀྱི་ཆོས་མཐའ་ཡས་པ་གསན། ཁྱད་པར་རྡོ་རྗེ་འཆང་ལས་དངོས་སུ་ཆོས་གསན་ཅིང་དག་པའི་ས་གསུམ་ལ་བཞུགས་པ་ཡེ་ཤེས་ཀྱི་མཁའ་འགྲོ་ནི་གུ་མ་དང་། སུ་ཁ་སིདྡྷི་དངོས་སུ་མཇལ་ཞིང་གདམས་པ་ཟབ་མོ་བསྩལ་པས་སྐུ་ཡི་གནས་ལྔར་གཏུམ་མོ་སྟོན་པའི་མཐར་ཐུགས་དགྱེས་མཛད། ལས་རྒྱ་མཐར་ཐུག་བདེ་མཆོགསྒྱུ་ལུས་འོད་གསལ་མཐར་ཐུག་གསང་འདུས། རྨི་ལམ་མཐར་ཐུག་མ་ཧཱ་མཱ་ཡཱ། ཕྲིན་ལས་མཐར་ཐུག་རྡོ་རྗེ་འཇིགས་མཛད་དེ། རྒྱུད་སྡེ་ལྔ་དངོས་སུ་གྲུབ་པས་མཚོན། མདའ་བསྣུན་ཞབས་སོགས་མཆོག་གི་གྲུབ་ཆེན་རྣམས་དང་དབྱེར་མི་ཕྱེད་པའི་གྲུབ་པའི་དབང་ཕྱུག་ཆེན་པོར་གྱུར། གཙང་གཡས་རུ་ཤངས་ཀྱི་ཞང་ཞུང་དུ་གདན་ས་མཛད་པས་བླ་མ་ཤངས་པ་དང་། བརྒྱུད་འཛིན་རྣམས་ལའང་ཤངས་པ་བཀའ་བརྒྱུད་དུ་གྲགས། དགུང་ལོ་བརྒྱ་དང་ལྔ་བཅུར་བཞུགས་ཤིང་གདུལ་བྱ་བསམ་གྱིས་མི་ཁྱབ་པ་སྨིན་གྲོལ་མཛད་པས་བཤེས་གཉེན་ཁྲི་ཕྲག་བཅོ་བརྒྱད་ལ་སོགས་པའི་བུ་སློབ་རྣམས་ཀྱི་གཙོ་བོ་ནི། དྲི་མེད་ཤེས་རབ་ཀྱི་སྡོང་པོ་རྨེའུ་སྟོན་པ། ཕན་སེམས་ཡལ་ག་གཡོལ་པོ་རྒྱ་མོ་ཆེ། སྙིང་རྗེའི་ལོ་འདབ་དངུལ་སྟོན་རིན་དབང་། བྱམས་པའི་མེ་ཏོག་ལ་སྟོད་དཀོན་མཆོག་མཁར། འོད་གསལ་སྙིང་པོ་ཞང་སྒོམ་ཆོས་སེང་སྟེ། སྔ་བུ་ལྔ་དང་ཕྱི་བུ་རྨོག་ལྕོགས་པ་བཅས་དྲུག་པོ་རྣམས་ཡིན་ཅིང་། དེ་ལས་རྡོ་རྗེ་འཆང་གི་གསང་ཚིག་ཆིག་བརྒྱུད་ཀྱི་བཀའ་བབས་ནི་རྨོག་ལྕོགས་པ་རིན་ཆེན་བརྩོན་འགྲུས་ཁོ་ན་ཡིན་ལ། དེ་ནས་རིམ་བཞིན་དབོན་སྟོན་སྐྱེར་སྒང་པ། སངས་རྒྱས་གཉེན་སྟོན། འགྲོ་མགོན་སྟོན་པའི་བར་དུ་བརྒྱུད། ཆིག་བརྒྱུད་རྡོ་རྗེའི་རྒྱ་རྡོ་རྗེ་འཆང་དང་ཡེ་ཤེས་ཌཱ་ཀིས་ལུང་བསྟན་པ་བཞིན་དུ་རིན་ཆེན་བདུན་པ་ཆོས་རྗེ་སྟོན་པས་བཀྲོལ་ཏེ་གྲུབ་ཐོབ་ཀྱི་སློབ་མས་འཛམ་གླིང་དང་གླིང་ཕྲན་ཚུན་ཆོད་ཁྱབ་པར་མཛད་པ་ལས། བརྒྱུད་འཛིན་གཙོ་བོ་གཙང་མ་ཤངས་སྟོན། བསམ་ལྡིང་པ་གཞོན་ནུ་གྲུབ། འཇག་ཆེན་རྒྱལ་མཚན་འབུམ་སྟེ་མཁས་གྲུབ་རྣམ་པ་གསུམ་གྱིས་གདམས་ངག་ཡི་གེར་བཀོད། འཇག་བསམ་གཉིས་ཀྱི་གདན་ས་སློབ་བརྒྱུད་མཐའ་ཡས་པ་བྱུང་། གཙང་མ་ཤངས་སྟོན་སློབ་མ་ཁྱུང་པོ་ཚུལ་མགོན་སོགས་རིན་ཆེན་རྣམ་བདུན་ཕྱི་མར་གྲགས་པའི་སྐྱེས་ཆེན་ཁྱད་པར་ཅན་བྱོན། གཞན་ཡང་ཆོས་རྗེ་སྟོན་པའི་དངོས་སློབ་གསེར་གླིང་པ་བཀྲ་ཤིས་དཔལ་ལས་གྱེས་པ་དང་། ལ་སྟོད་དཀོན་མཆོག་མཁར་གྱི་སློབ་བརྒྱུད་ལས་གྱེས་པ་སོགས་མཐའ་ཡས་ཤིང་། ཕྱིས་སུ་གྲུབ་ཆེན་ཐང་སྟོང་རྒྱལ་པོས་སྟོད་བརྒྱུད་སྨད་བརྒྱུད་སོ་སོར་གསན་ནས་ཐུགས་ཉམས་སུ་བཞེས་པས་ཡེ་ཤེས་མཁའ་འགྲོ་དངོས་ཀྱིས་རྗེས་སུ་བཟུང་བའི་ཉེ་བརྒྱུད་རིམ་པ་གསུམ་བྱུང་བའང་ད་ལྟའི་བར་རྒྱུན་བཞུགས་པ་དང་། རྗེ་བཙུན་གྲོལ་མཆོག་ཞབས་ཀྱིས་རིང་བརྒྱུད་རྣམས་གྲངས་ཉེར་བཞི་གསན། ཉེ་བརྒྱུད་ཌཱ་ཀིས་གདམས་པ་དངོས་སུ་སྩལ་པའི་ངོ་མཚར་ཤིན་ཏུ་ཉེ་བརྒྱུད་བཅས་པ་བརྒྱུད་པའི་རྣམ་གྲངས་ཉེར་ལྔ་རྗེ་བཙུན་ཏཱ་ར་ན་ཐའི་ཁྲིད་ཡིག་འདིར་འདུ་བ་ཡིན་ལ། མཁས་གྲུབ་ཁྱུང་པོའི་ཁྱད་པར་གྱི་ཆོས་སྐྱོང་མྱུར་མཛད་ཡེ་ཤེས་མགོན་པོའི་ཆོས་སྐོར་ནི་སྔོན་དུས་སྟོད་ལུགས་པས་ཕལ་ཆེར་ལ་ཁྱབ། ཕྱིས་དུས་རི་གོང་ནས་བརྒྱུད་པའི་སྨད་ལུགས་ཀྱིས་གྲུབ་མཐའ་ཕལ་ཆེར་ཁྱབ་ཅིང་ཁྱད་པར་རྗེ་རིན་པོ་ཆེ་ཡབ་སྲས་རྣམས་ཀྱིས་ཆོས་སྐྱོང་གི་གཙོ་བོར་མཛད་པས་དབུས་གཙང་ཁམས་གསུམ་རྒྱ་སོག་ཡན་ཆད་དུ་མཆོད་བསྟོད་སྒྲུབ་ཕྲིན་གྱིས་ཁྱབ། གསེར་ཆོས་རྩ་བ་རྣམས་ནི་རྐང་ཚུགས་པའི་ལུགས་འཛིན་དེང་སང་ཤིན་ཏུ་དཀོན་པར་སྣང་ངོ་། །

དྲུག་པ་ཞི་བྱེད་ཡན་ལག་དང་བཅས་པ་ནི།

༈ དྲུག་པ་ཞི་བྱེད་ཡན་ལག་དང་བཅས་པ་ནི། རྒྱ་གར་བེེ་ཏཱའི་ཡུལ་གྱི་ཙ་ཏ་སེང་ངར་སྐུ་འཁྲུངས་པའི་མཁས་པ་ཆེན་པོ་ཀ་མ་ལ་ཤཱི་ལའམ་བོད་དང་རྒྱ་ནག་ཏུ་ཕ་དམ་པ་སངས་རྒྱས་སུ་གྲགས་པ་དེས་གྲུབ་ཐོབ་ཕོ་མོ་ལྔ་བཅུ་ང་བཞི་ལས་གདམས་པ་ཟབ་མོ་མཐའ་དག་གསན་ནས་རྩེ་གཅིག་ཏུ་སྒྲུབ་པ་མཛད་པས་བཅུད་ལེན་སོགས་གྲུབ་པ་ཆེན་པོ་བརྒྱད་ཐོབ་པས་དགུང་ལོ་ལྔ་བརྒྱ་དང་བདུན་ཅུ་བཞུགས། ཐུགས་དམ་བདེ་གཤེགས་བཅུ་གཉིས་དང་། ངོ་མཚར་མཁའ་སྤྱོད་ཀྱི་བླ་མ་སུམ་ཅུ་རྩ་དྲུག་སོགས་ཀྱིས་ཞལ་གཟིགས། མཆོག་གི་དངོས་གྲུབ་མཐོང་ལམ་ཆེན་པོའི་ཡེ་ཤེས་བརྙེས་པ་དེ་ཉིད་ཀྱིས་རྟེན་གཞིའི་གཙོ་བོ་ཤེར་ཕྱིན་རྒྱས་འབྲིང་བསྡུས་གསུམ། ཨཱ་ལི་ཀཱ་ལི་ཆུ་ཀླུང་ཆེན་པོའི་རྒྱུད་སོགས་ཀྱི་དོན་ཉམས་ལེན་དུ་དྲིལ་བ། རྟེན་སྡོམ་པ་གསུམ་ལྡན། ལམ་དཀའ་ཐུབ་ཀྱི་སྲང་། འབྲས་བུ་གཞན་དོན་སྤྱོད་པ་ཉིད་ཀྱི་རྣམ་པར་ཐར་པ་དང་མཐུན་པར་ལས་ཅན་གནམ་གྱི་སྐར་མ་ཙམ་སངས་རྒྱས་ཀྱི་ས་ལ་བསྒྲལ་བར་མཛད་པའི་དམ་ཆོས་སྤྱི་མིང་སྒེར་དུ་ཆགས་པ་སྡུག་བསྔལ་ཞི་བྱེད་ཅེས་བྱ་བ་འདི་ཉིད་ལ་དབང་པོའི་རིམ་པས་ཁྲིད་ཚུལ་བསམ་གྱིས་མི་ཁྱབ་པ་མཆིས་ཀྱང་། དམ་པ་ཉིད་བོད་ཡུལ་འདིར་སྔ་ཕྱི་ལྔ་ཙམ་ཕེབས། ཞི་བྱེད་ཀྱི་བརྒྱུད་པ་རིམ་པ་གསུམ་དུ་གྲགས་པའི་བརྒྱུད་པ་དང་པོ་ཁ་ཆེ་ཛྙཱ་ན་གུ་ཧྱ་ལ་ཞི་བྱེད་སྒྲོན་མ་སྐོར་གསུམ་གནང་བ་ཨང་པོ་ལོ་ཙཱ་སོགས་ནས་བྱུང་བ་དང་། བརྒྱུད་པ་བར་མའི་གཙོ་བོ་རྨ་སོ་ཀམ་གསུམ་ནི། རྨ་ཆོས་ཀྱི་ཤེས་རབ་ལ་ཕྱག་ཆེན་ཚིག་བརྒྱུད་དོན་བརྒྱུད་སོ་ཆུང་དགེ་འདུན་འབར་ལ་རིག་པ་གཅེར་མཐོང་གི་མན་ངག་ཚིག་བརྒྱུད་དང་དོན་བརྒྱུད། ཀམ་ཡེ་ཤེས་རྒྱལ་མཚན་ལ་ཤེར་ཕྱིན་གྱི་གདམས་པ་ཡས་བརྒྱུད་དང་མས་བརྒྱུད་རྣམས་དང་བརྒྱུད་ཕྲན་གསུམ་ནི། དགེ་བཤེས་གྲ་པ་ལ་ཞི་བྱེད་སྒྲོན་མ་དྲུག་སྐོར། ལྕེ་ཙནྡྲ་ཀཱིརྟི་ལ་མདོ་རྒྱུད་ཞལ་སྦྱོར་གྱི་གདམས་པ། ལྗང་བཀའ་གདམས་པ་ལ་ཤེར་ཕྱིན་ཡི་གེ་མེད་པའི་གདམས་ངག་གནང་བ་དང་། བརྒྱུད་པ་ཐོར་བུ་ལབ་སྒྲོན་ལ་གཅོད་ཀྱི་གདམས་པ་སོགས་གདམས་ཕྲན་བཅོ་ལྔ་ཙམ་བྱུང་བར་གྲགས། བརྒྱུད་པ་ཐ་མ་ནི། དམ་པ་རྒྱ་ནག་ནས་ཡར་ཕེབས་དིང་རིར་བཞུགས་པའི་སྐབས་འཁྲུལ་ཞིག་ཉི་ཤུ་རྩ་དྲུགཁྱད་འཕགས་བུ་ཆེན་བརྒྱ་རྩ། མ་ཇོ་ཉི་ཤུ་རྩ་བཞི། གདན་ནོན་གྱི་སློབ་མ་བཅུ་གཉིས་སོགས་བྱུང་བའི་སོ་སོ་ལ་གདམས་ངག་སྨིན་གྲོལ་གྱི་རྒྱུན་སྲོལ་ཚད་བཟུང་དུ་མ་མཆིས་ཀྱང་གཙོ་བོ་སྒོ་བའི་རྣལ་འབྱོར་པ་བཞི་ཡིན་ཏེ། ཤར་ན་དམ་པ་ཕྱར་ཆེན་གྱིས་བཀའ་མདོ་སྦྱོར་གྱི་སྐོར། ལྷོ་བཛྲ་ཀྲོ་ངྷས་རིན་ཆེན་དོན་སྡེབ་ཀྱི་སྐོར། ནུབ་ན་དམ་པ་ཕྱར་ཆུང་གིས་དུམ་དུམ་ཁྲིད་ཀྱི་སྐོར། བྱང་ན་བྱང་ཆུབ་སེམས་དཔའ་ཀུན་དགས་བཀའ་ཆོ་ལུའི་སྐོར་གྱི་བཀའ་བསྡུ་མཛད་ཅིང་ཡི་གེར་བཀོད། དེ་ལ་བརྒྱུད་པ་བར་པ་ནི་བཀའ་ཐ་མ་ངེས་དོན་གྱི་མདོ་སྡེ་རྣམས་དང་མཐུན་ལ། ཕྱི་མ་ནི་སྔགས་དང་གཙོ་བོར་མཐུན་པར་བཤད། དེ་དག་ཐམས་ཅད་ལས་ཀྱང་ལམ་ཡོངས་སུ་རྫོགས་པས་ཁྱད་པར་དུ་འཕགས་པ་ནི་ཉིད་དང་དགོངས་པ་མཉམ་པར་ཞལ་གྱིས་བཞེས་པ་དམ་པ་ཀུན་དགའི་བཀའ་སྲོལ་ཉིད་ཡིན་ཞིང་། ཆོས་སྐོར་འདི་ལ་ཐུན་མོང་དང་ཐུན་མོང་མ་ཡིན་པའི་སྡེ་ཚན་རྒྱ་ཆེར་བཞུགས་ཤིང་། བརྒྱུད་པ་གསུམ་ག་རོག་བདེ་གཤེགས་ཆེན་པོ་ལ་བཀའ་བབས་ཤིང་། དེ་ནས་རོག་ཐམས་ཅད་མཁྱེན་པ་སོགས་རིམ་གྱིས་བརྒྱུད་དེ་སྔར་དར་རྒྱས་སུ་བཞུགས་པར་འདུག་ཀྱང་དེང་སང་མཚན་ཙམ་དུ་གྱུར་ཅིང་། སྨིན་གླིང་ལོ་ཆེན་དྷརྨ་ཤྲཱིས་འབད་རྩོལ་ཆེན་པོས་རྒྱུན་གང་བཞུགས་གསན་ཅིང་ཡིག་ཆ་བཀླག་ཆོག་ཏུ་མཛད་པའི་བཀའ་དྲིན་ལས། བརྒྱུད་པ་སྔ་ཕྱི་བར་གསུམ་དང་། ཁྱད་པར་དམ་པ་ཀུན་དགའ་ལུགས་ཀྱི་སྨིན་གྲོལ་རྩ་བ་ཙམ་བཞུགས་པར་སྣང་ངོ་། །ཡན་ལག་གཅོད་ཡུལ་ལ་ཕོ་གཅོད་མོ་གཅོད་གཉིས་སུ་གྲགས་པ་ལས། སྔ་མ་ནི། ཕ་དམ་པ་སངས་རྒྱས་ཀྱིས་སྐྱོ་སྟོན་ཤཱཀྱ་ཡེ་ཤེས་དང་ཡར་ལུང་སྨ་ར་སེ་བོ་ལ་མདོ་ལུགས་རང་རྐང་གི་གཅོད་ཨཱརྱ་དེ་བའི་གཞུང་ཆུང་ལྔ་བཅུ་པའི་དོན་གདམས་ངག་བྲུལ་ཚོ་དྲུག་པ་ཞེས་བྱ་བ་གནང་། སྐྱོས་རང་གི་དཔོན་བསོད་ནམས་བླ་མ། དེས་མ་གཅིག་ལབ་སྒྲོན་ལ་བྲུལ་ཚོ་བཞི་གནང་བར་གྲགས། སྨ་ར་སེ་བོ་ལས་བརྒྱུད་པའི་སྐོར་རོག་ཤེས་རབ་འོད་དང་མཁས་གྲུབ་གཞོན་ནུ་གྲུབ་རྣམས་ལས་འཕེལ་བ་ནི་ཕོ་གཅོད་དུ་གྲགས་པའོ། །མོ་གཅོད་ནི་ཡུམ་ཆེན་མོ་ཤེས་རབ་ཕར་ཕྱིན་མི་མོའི་རྣམ་པར་སྣང་བ་མ་གཅིག་ལབ་སྒྲོན་ཉིད། ཤེར་ཕྱིན་བཀླགས་པས་སྟོང་ཉིད་ཀྱི་ལྟ་བ་སྐྱེས། དམ་པས་སྙིང་གཏམ་ཚིག་གཅིག་གསུངས་པས་རྒྱུད་གྲོལ་ཏེ་རང་བཞིན་གྱི་རྣལ་འབྱོར་མར་གྱུར། ཤེར་ཕྱིན་གྱི་དགོངས་དོན་མ་གཅིག་ཉིད་ཀྱི་དགོངས་ཉམས་ལས་འཁྲུངས་པའི་གཅོད་ཡུལ་གྱི་ལམ་སྲོལ་རྒྱ་ཆེན་པོ་ཕྱེས་ཏེ་གདམས་སྐོར་བསམ་གྱིས་མི་ཁྱབ་པ་མཛད་པ་ཐམས་ཅད་ཕ་བརྒྱུད་ཐབས། མ་བརྒྱུད་ཤེས་རབ། གཉིས་མེད་དོན། མཁའ་འགྲོ་ཉམས་ཀྱིས་བརྒྱུད་པ་བཞིས་བསྡུས་ཤིང་། ཞལ་སློབ་གྲུབ་ཐོབ་ཕོ་མོ་བརྒྱ་དང་རྩ་བརྒྱད་སོགས་སློབ་ཚོགས་མང་པོས་བོད་ཁམས་ཁྱབ་པར་གྱུར་པའི་གཙོ་བོ་དབོན་སྲས་རྒྱལ་བ་དོན་གྲུབ། བརྒྱུད་འཛིན་སྟོང་སྡེའི་ངག་གི་དབང་ཕྱུགཐུགས་སྲས་གྲོལ་སྡེ་རྒྱལ་བའི་འབྱུང་གནས། ཁུ་སྒོམ་ཆོས་སེང་སྟེ་ཐུགས་སྲས་བཞི། འབྲོག་ཚ་རྒྱན། དཔལ་ལྡན་རྒྱན། བསོད་ནམས་རྒྱན། རིན་ཆེན་རྒྱན་ཏེ་སྲས་མོ་བཞི། སྐྱེ་མེད་དགའ་ཡན། ཕོ་སྨྱོན་སེང་གེ། སྨྱོན་པ་རང་སྣང་། དོལ་པ་ཟང་ཐལ། ཞིག་པོ་ཧུར་ཐོན། སྐལ་ལྡན་སེང་གེ། རྒྱ་སྒོམ་ཧར་ཐོན། རྗེ་བཙུན་ཟིལ་གནོན་ཏེ་རང་མཉམ་བརྒྱད་བཅས་བཀའ་བབས་བུ་ཆེན་བཅུ་དྲུག་གི་ཕྲིན་ལས་ཀུན་ཏུ་འཕེལ། མདོའི་བརྒྱུད་འཛིན་སྲས་གླང་ལུང་པ་རྒྱལ་བ་དོན་གྲུབ་བརྒྱུད་པའི་གཙོ་བོར་གྱུར། སྔགས་ཀྱི་བརྒྱུད་འཛིན་ཐོད་སྨྱོན་བསམ་འགྲུབ་གྲུབ་ཐོབ་ཡོངས་གྲགས་སུ་གྱུར་པས་གངས་པ་ཞེས་པའི་གཅོད་བརྒྱུད་ཁྱད་པར་ཅན་ཟུར་དུ་བྱུང་། ཟུང་འཇུག་གི་བརྒྱུད་འཛིན་ཁུ་སྒོམ་ཆོས་ཀྱི་སེངྒེའི་བརྒྱུད་པ་གྲུབ་ཐོབ་སོ་སོ་ལས་བརྒྱུད་པ་མང་དུ་འཕེལ། ཁྱད་པར་རྒྱལ་དབང་རང་བྱུང་རྡོ་རྗེས་གནམ་མཚོ་དོ་པ་མི་བསྐྱོད་རྡོ་རྗེ་ལས་གཅོད་ཡུལ་གསན་ཅིང་དེ་ལས་བརྒྱུད་པ་ལ་རུ་བའི་གཅོད་བརྒྱུད་རྣམས་དང་། ཕྱིས་ཟུར་མང་། གནས་མདོའི་ལུགས་རྣམས་འཕེལ། རྗེ་བཙུན་སྐྱ་སེ་རྟོགས་ལྡན་ལས་སྐྱབས་ཆེ་དང་། ཏྲེ་ཧོ་ཆོས་ཀྱི་དབང་པོ་ལས་ཏྲེ་གཅོད་ཀྱི་རྒྱུན་བྱུང་བས་མཚོན་བརྒྱུད་འཛིན་སོ་སོ་ལས་མཐའ་ཡས་པ་འཕེལ། སྲས་མོ་ལ་ལྕམ་ལས་རིམ་པར་བརྒྱུད་པའི་རིང་བརྒྱུད་དང་། རྒྱལ་ཐང་པ་བསམ་གཏན་འོད་ཟེར་གྱིས་བརྒྱུད་སྲོལ་མཐའ་དད་པ་མང་དུ་གསན་ཅིང་མ་གཅིག་དངོས་དང་མཇལ་ནས་གདམས་པ་སྩལ་པ་ཉེ་བརྒྱུད་རྒྱལ་ཐང་ལུགས་དང་། ཟབ་ཆོས་མང་པོ་སློབ་མ་རྣམས་ལ་མ་གནང་བར་གཏེར་དུ་སྦས་ལ་ཕྱིས་མ་གཅིག་ཉིད་ཀྱི་རྣམ་སྤྲུལ་ལ་འདུས་རྡོ་རྗེ་སྒྲོན་མས་བཏོན་པ་དང་། ཁུ་སྒོམ་སྐྱེ་བ་ཀུན་སྤངས་བརྩོན་འགྲུས་སེངྒེས་གཏེར་ནས་བྱུང་བ་ཟབ་ཅིང་རྒྱ་ཆེ་བ་བཞུགས་པ་ལས། ཕྱི་མའི་རྒྱུན་རྒྱ་སྟོན་གཅོད་བརྒྱུད་ད་ལྟ་བར་ཟམ་མ་ཆད་པར་སྣང་ངོ་། །

བདུན་པ་རྡོ་རྗེའི་རྣལ་འབྱོར་སྦྱོར་བ་ཡན་ལག་དྲུག་པ་ནི།

༈ བདུན་པ་རྡོ་རྗེའི་རྣལ་འབྱོར་སྦྱོར་བ་ཡན་ལག་དྲུག་པ་ནི། སྟོན་པ་རྫོགས་པའི་སངས་རྒྱས་ཀྱིས་དཔལ་ལྡན་འབྲས་སྤུངས་ཀྱི་མཆོད་རྟེན་དུ་རྡོ་རྗེ་ཐེག་པ་བླ་མེད་ཀྱི་རྩ་བའི་རྒྱུད་མཐའ་དག་འཇིག་རྟེན་དང་འཇིག་རྟེན་ལས་འདས་པའི་འདུས་པ་ཆེན་པོའི་འཁོར་རྣམས་ལ་བསྟན་པའི་ཚེ། སྤྲུལ་པའི་ཆོས་རྒྱལ་ཟླ་བ་བཟང་པོས་གསོལ་བ་བཏབ་པའི་ངོར་དུས་ཀྱི་འཁོར་ལོའི་རྩ་བའི་རྒྱུད་སྟོང་ཕྲག་བཅུ་གཉིས་པ་གསུངས་པ་ཉིད་ཤམྦྷ་ལའི་ཡུལ་དུ་ཆོས་རྒྱལ་བདུན་རྫོགས་ཀྱི་བར་དར་རྒྱས་སུ་སྤྱོད། དེ་ནས་རིགས་ལྡན་འཇམ་དཔལ་གྲགས་པས་དེ་ལས་བསྡུས་པའི་རྒྱུད་མཛད་པ་ལ། རིགས་ལྡན་པདྨ་དཀར་པོས་འགྲེལ་ཆེན་གྱིས་བཀྲལ། སྤྲུལ་པའི་རིགས་ལྡན་རིམ་པར་བྱོན་པ་རྣམས་ཀྱིས་སྤེལ་བར་མཛད་པ་སས་འཕགས་ཡུལ་དུའང་སྔ་ཐོག་ཞིག་ནས་གྲུབ་ཆེན་རྣམས་ལ་ཐོར་བུར་སྣང་མོད། ཐུན་མོང་གི་སྤྱོད་ཡུལ་དུ་ཐོག་མར་སྣང་བར་མཛད་པ་པོ་ནི་ཙི་ལུ་པཎྜི་ཏ་སྟེ། དེ་ཉིད་ཤམྦྷ་ལར་སེམས་འགྲེལ་ཚོལ་བར་བྱོན་པའི་ལམ་ཀར་རིགས་ལྡན་གྱི་སྤྲུལ་པས་རྗེས་སུ་བཟུང་སྟེ་དབང་རྒྱུད་འགྲེལ་མན་ངག་མཐའ་དག་གནང་ཞིང་བྱིན་གྱིས་བརླབས་པས་མཐའ་དག་ཁོང་དུ་ཆུད། དེའི་སློབ་མ་པིཎྜོ་ཨཱ་ཙརྱ་སྟེ་སློབ་དཔོན་བསོད་སྙོམས་པར་གྲགས་པ་ལས། དུས་འཁོར་ཞབས་ཆེན་པོའམ་ཙི་ལུ་པ་ཆུང་བར་ཡང་གྲགས་པ་འཇམ་པའི་རྡོ་རྗེས་གསན། སྤྲུལ་པའི་རིགས་ལྡན་གྱིས་བྱིན་གྱིས་བརླབས་པའི་མཐུས་གྲུབ་པ་བརྙེས་ཏོ་ཀ་ལཱ་པར་དངོས་སུ་ཕེབས་ཏེ་དབང་རྒྱུད་མན་ངག་རྫོགས་པར་མཛད་འདི་ཉིད་རྩལ་དུ་བཏོན་ཏེ་འཆད་ཉན་མཛད་པས། ནཱ་རོ་པ། རཏྣ་ཀ་ར་གུཔྟ་སོགས་སློབ་མ་མང་དུ་བྱུང་བ་ལས། ཨ་བ་ངྷཱུ་ཏི་པ། ཤྲཱི་བྷ་དྲ་བྷོ་ངྷི། ནཱ་ལེནྡྲ་བ་གསུམ་ལ་དུས་ཞབས་པ་ཆུང་བ་སོ་སོར་གྲགས། བོད་ཡུལ་འདིར་ཐོག་མ་གྱི་ཇོ་ལོ་ཙཱ་བ་ཟླ་བའི་འོད་ཟེར་གྱིས་དུས་ཞབས་པ་ཤྲཱི་བྷ་དྲས་སྤྱན་དྲངས་ནས་རྒྱུད་འགྲེལ་བསྒྱུར་ཅིང་མན་ངག་བསྒྱུར། ཁྲོམ་ལོ་ཙཱ་བ་པདྨ་འོད་ཟེར་སོགས་བུ་ཆེན་བཞིར་གྲགས་པ་བྱུང་། ཁྲོམ་ལོ་ནས་བརྒྱུད་པ་གྱི་ཇོ་ལུགས་དང་། ནཱ་ལེནྡྲ་བའི་སློབ་མ་མཉྫུ་ཀཱིརྟི། དེའི་སློབ་མ་བལ་པོ་ས་མནྟ་ཤྲཱི། དེ་ལས་རྭ་ལོ་ཙཱ་བ་ཆོས་རབ་ཀྱིས་གསན་པའི་རྭ་ལུགས་དང་། ཡང་ནཱ་ལེནྡྲ་བའི་སློབ་མ་ཁ་ཆེ་ཟླ་བ་མགོན་པོ། དེ་ལས་འབྲོ་ལོ་ཤེས་རབ་གྲགས། སྒོམ་པ་དཀོན་མཆོག་སྲུང་སོགས་ལས་བརྒྱུད་པ་འབྲོ་ལུགས་དང་། ནཱ་ལེནྡྲ་བ། ཙཱ་མི་སངས་རྒྱས་གྲགས། དེ་ལས་རིམ་པར་བརྒྱུད་པ་ཙཱ་མི་ལུགས། དེའི་སློབ་མ་སེ་ལོ་ཙཱ་བ་གཞོན་ནུ་ཚུལ་ཁྲིམས། དེ་ལས་གཉོས་དར་མ་འོད་ཀྱིས་གསན་པ་སོགས་གཉོས་ལུགས། ཡང་ནཱ་ལེནྡྲ་བ། ཨ་བྷ་ཡཱ་ཀ་ར། ནིཥྐ་ལངྐ་། བལ་པོ་པཎྜི་ཏ་རེ་བནྡྲ། ཆག་ལོ་ཆོས་རྗེ་དཔལ་ལས་བརྒྱུད་པ་ཆག་ལོ་ལུགས། ཨ་བྷ་ཡཱ། བི་ཁྱཱ་ཏ་དེ་བ། ཁ་ཆེ་པཎ་ཆེན་ཤཱཀྱ་ཤྲཱིར། དཔལ་ཆོས་ཀྱི་བཟང་པོ་ནས་བརྒྱུད་པ་པཎ་ཆེན་ལུགས་སམ་དཔྱལ་ལུགས། རྭ་ཆོས་རབ་ནས། ཡེ་ཤེས་སེདྒེ། འབུམ་སེང་། རོང་བ་རྒ་ལོ་རྣམ་རྒྱལ་རྡོ་རྗེ་སོགས་ལས་བརྒྱུད་པ་རོང་ལུགས། ཙཱ་མི་ནས་ཁམས་པ་རྒྭ་ལོ་གཞོན་ནུ་དཔལ། དེས་ཞང་ཚལ་བ་ལ་གནང་བ་ཚལ་ལུགས། རྒྭ་ལོ་ནས་ས་སྐྱ་པ་ཆེན་པོ་ལ་གནང་བའི་ས་ལུགས། གྲུབ་ཆེན་ཤ་བ་རི་དབང་ཕྱུག་གིས་པཎ་ཆེན་བྷཱུ་ཏི་ཙནྡྲ་ལ་དངོས་སུ་སྩལ། དེས་ཀོ་བྲག་པ་བསོད་ནམས་རྒྱལ་མཚན་ལ་གནང་བ་ཀོ་བྲག་ལུགས། མཉྫུ་ཀིརྟི་དང་ཨ་བྷ་ཡས་གཉན་ལོ་དང་རྒྭ་ལོ་ལ་གནང་། དེ་གཉིས་ཀ་ལས་འགོས་ཀྱིས་གསན་པ་འགོས་ལུགས། ཡང་ཆག་ཆོས་རྗེ་དཔལ་ནས། གོ་ལུང་པ་མདོ་སྡེ་དཔལ། མཁས་གྲུབ་ཨོ་རྒྱན་པ། སྙེ་མདོ་བ་ཀུན་དགའ་དོན་གྲུབ། རྗེ་རང་བྱུང་པ་སོགས་ལས་བརྒྱུད་པ་དང་། ཙཱ་མའི་ལུགས་གཙོ་བོར་བཏོན་པ་ཀར་ལུགས། གཞན་ཡང་ཤངས་དཔང་ནས་བརྒྱུད་པ་བོ་དོང་ལུགས། ལྐོག་འཕྲང་པའི་ལུགས་དང་། ལ་སྟོད་དབང་རྒྱལ་ལུགས་སོགས་མང་དུ་བྱོན་ཀྱང་། ཕྱིས་ནས་དུས་ཀྱི་འཁོར་ལོ་གངས་ལྗོངས་འདིར་ཤིན་ཏུ་དར་བར་མཛད་པ་ནི་ཇོ་ཞལ་གཉིས་ཏེ། འདི་གཉིས་ཀས་དང་པོ་རྭ་པའི་བརྒྱུད་པ་གསན་ཅིང་། ཕྱིས་སུ་འབྲོ་ལུགས་ལ་ཞུགས་པས་རྭ་འབྲོའི་བརྒྱུད་འཛིན་དུ་གྱུར་མོད། བུ་ལུགས་གཙོ་བོར་བཤད་པའི་བཀའ་བབས་ད་ལྟའི་བར་དུ་བུ་སྟོན་ཆེན་པོ་ལས་བརྒྱུད་པའི་རྒྱུད་བཤད་རྒྱུན་མ་ཆད་པར་བཞུགས་པར་སྣང་བ་དང་། ཇོ་ནང་པ་རིགས་ལྡན་སྤྲུལ་པའི་སྐུ་རིམ་པར་བྱོན་པ་རྣམས་ལས་ཀུན་སྤངས་ཆེན་པོས་བོད་དུ་འགྱུར་རོ་ཅོག་གི་དུས་འཁོར་ལུགས་སྲོལ་རྫོགས་པར་གསན། སློབ་མ་ཀུན་སྤངས་བུ་བཞིར་གྲགས་པར་བྱུང་། ཀུན་མཁྱེན་དོལཔོ་པ་ཆེན་པོས་རྣལ་འབྱོར་ཡན་ལག་དྲུག་པའི་ཕྲིན་ལས་ངོ་མཚར་བསམ་གྱིས་མི་ཁྱབ་པ་སྤེལ་བ་ལས། གཙོ་བོར་རང་མཉམ་སློབ་མ་བཅུ་བཞི་པོ་སོ་སོས་གདམས་སྲོལ་སྤེལ་བའི་ཕྲིན་ལས་རྒྱ་ཆེ་ལ་རྒྱུན་ཆགས་པས་སྒྲུབ་བརྒྱུད་ཀྱི་བཀའ་བབས། ཀུན་མཁྱེན་སྒྲོལ་མགོན་ཞབས་སོགས་བརྒྱུད་ཉམས་རྟོགས་ཕུལ་དུ་བྱུང་བའི་རྒྱུན་ད་ལྟ་མ་ཉམས་པར་བཞུགས་པ་ལས། དེ་དག་གི་རྒྱུན་འཇམ་མགོན་རྡོ་རྗེ་འཆང་རྣམ་གཉིས་ལས། ཀུན་མཁྱེན་བླ་མ་འཇམ་དཔལ་དགྱེས་པའི་རྡོ་རྗེས་གསན་ཅིང་། བསྡུས་བརྒྱུད་ཀྱི་འགྲེལ་ཆེན་དང་སྒྲུབ་དཀྱིལ་ཁྲིད་ཡིག་སོགས་སྔ་ན་མེད་པའི་ལེགས་བཤད་ཀྱི་གཏེར་ཆེན་པོ་ཕྱེས་ཏེ་ཤིན་ཏུ་ཡང་གསལ་བར་མཛད་དོ། །སྤྱིར་རྒྱ་གར་འཕགས་པའི་ཡུལ་དུ་དུས་ཞབས་པ་ཆེ་ཆུང་། ཤ་བ་རི་བ། དཔེ་མེད་མཚོ། ཉི་མ་དཔལ་ཡེ་ཤེས། ནཱ་རོ་པཎ་ཆེན། ཁ་ཆེ་པཎ་ཆེན། གྲུབ་ཆེན་ཞི་བ་སྦས་པའི་ལུགས་སོགས་བྱུང་བར་སྣང་ཞིང་། བོད་འདིར་གྲགས་ཆེ་བ་གྱི་ཇོ་འབྲོ་རྭ། དིང་རི་ཆོས་གྲགས་ཏེ་སྔོན་བྱོན་བཞི། མན་ལུང་གུ་རུ། ཐར་ལོ། ཨོ་རྒྱན་པ། བི་བྷཱུ་ཏི་ཙནྡྲ་སྟེ་བར་བྱོན་བཞི། ཤ་བ་རི་ཐོག་མཐའ་བར་གསུམ། ཕྱིས་བྱོན་པཎ་ཆེན་ནགས་ཀྱི་རིན་ཆེན་ལས་བྱུང་བའི་བཀའ་སྲོལ་རྣམས་སུ་སྣང་ངོ་། །

བརྒྱད་པ་རྡོ་རྗེ་གསུམ་གྱི་བསྙེན་སྒྲུབ་ནི།

༈ བརྒྱད་པ་རྡོ་རྗེ་གསུམ་གྱི་བསྙེན་སྒྲུབ་ནི། མཁས་གྲུབ་ཨོ་རྒྱན་པ་རིན་ཆེན་དཔལ་དེ་ཉིད་མདོ་སྔགས་ཀྱི་སྦྱངས་པ་མཐར་ཕྱིན། ཁྱད་པར་དུས་ཀྱི་འཁོར་ལོ་ལ་མཁས་པའི་ཕུལ་དུ་གྱུར། རྒྱལ་བ་རྒོད་ཚང་པ་ལས་རྟོགས་པ་མཐར་ཐུག་སྐྱེས་ཏེ་མཐོང་ལམ་གྱི་བདེན་པ་གཟིགས། ཆོས་རྗེས་ཀྱང་བརྟུལ་ཞུགས་རང་དང་མཉམ་པའི་ཐུགས་སྲས་སུ་བསྔགས་པ་དེས་སྤྱོད་པ་མཐར་ཕྱིན་པར་བྱ་བའི་ཕྱིར་ཛ་ལེནྡྷ་ར་སོགས་གནས་ཡུལ་མང་དུ་བྱོན། ཁྱད་པར་དུ་ནུབ་ཕྱོགས་ཨོ་རྒྱན་གྱི་ཡུལ་དུ་བྱོན་པ་ན་བར་ཆད་དང་ཆོ་འཕྲུལ་མང་དུ་བྱུང་བ་ལྟ་བའི་གདེང་དང་བརྟུལ་ཞུགས་ཀྱི་ཟིལ་གྱིས་མནན། ཡུལ་དབུས་ངྷཱུ་མ་ཐ་ལའི་ཕྱོགས་བཞིར་རིགས་བཞི་མཁའ་འགྲོས་བྱིན་གྱིས་བརླབས། སྤྲུལ་པའི་མཛེས་མས་ལུང་བསྟན་པ་བཞིན་ཀ་པོ་ཀ་ཞེས་པའི་གྲོང་དུ་རྡོ་རྗེ་རྣལ་འབྱོར་མ་ཉིད་སྨད་འཚོང་མའི་གཟུགས་སུ་བསྟན་ནས་བཟའ་བཏུང་དང་རེག་བྱའི་བདེ་བ་སྩལ་ཏེ་རྩ་ཡི་མདུད་པ་བཀྲོལ། སྒྲ་དང་ས་གཡོ་བ་ལ་སོགས་ལྟས་ཆེན་པོ་དང་བཅས་སླར་རྡོ་རྗེ་བཙུན་མོ་དངོས་སུ་སྣང་བས་གདམས་པ་རྫོགས་པར་གནང་། སྔར་གྱི་མཁའ་འགྲོ་བཞི་དང་སེདྒེའི་གདོང་ཅན་ལྔ་པོས་ཀྱང་གདམས་པ་སྣ་རེ་གནང་བས་མཆོག་ཐུན་མོང་གི་གྲུབ་པ་བརྙེས། བོད་དུ་བྱོན་ནས་ཐོག་མར་ལུང་བསྟན་ཐོབ་པའི་སློབ་མ་མཁར་ཆུ་རིན་པོ་ཆེས་གསོལ་བ་བཏབ་པའི་ངོར་རྡོ་རྗེའི་ཚིག་རྐང་ཡི་གེར་བཀོད། དམིགས་རྐང་གནང་བ་རྣམས་བརྗེད་ཐོ་བསྡུས་པའང་མཛད། ཁྲིད་གཉེར་བ་ཟླ་བ་སེངྒེས་མན་ངག་རྣམས་གླེགས་བམ་དུ་བསྡོམས། གོ་ལུང་པ་གཞོན་ནུ་དཔལ་གྱིས་དྲི་བ་ཞུས་པའི་ལན་འདེབས་གནང་བ་ཐོར་བཀོད་པ་དང་། ཟུར་ཕུག་པ་རིན་ཆེན་དཔལ་བས་མཛད་པའི་ཊཱི་ཀ་ཆེན་མོ་དང་། མཁས་པ་ཤངས་སྟོན་དང་། སྙེ་མདོ་ཀུན་དགའ་དོན་གྲུབ་གཉིས་ཀྱི་རྡོ་རྗེའི་ཚིག་རྐང་གི་རྣམ་བཤད་མཛད་པ་རྣམས་ལ་ཊཱིཀ་ཆེན་བཞི་ཟེར། སྦུ་ཏྲ་བ་བསོད་ནམས་འོད་ཟེར་ལས་ཆོས་རྗེ་གངས་པ་བརྒྱུད་དཔལ་ལྡན་བླ་མ་བསོད་ནམས་རྒྱལ་མཚན་ནས་གསན་པ་སོགས་བརྒྱུད་སྲོལ་ཡང་མང་དུ་བྱུང་ཞིང་། ཀུན་མཁྱེན་རང་བྱུང་ཞབས་ཀྱིས་གྲུབ་ཆེན་ཉིད་ལས་གདམས་སྐོར་རྫོགས་པར་གསན་ཏེ་རྡོ་རྗེའི་ཚིག་གི་མདུད་གྲོལ་དང་གདམས་ངག་གི་གནད་གཞན་ལས་ཁྱད་པར་དུ་འཕགས་པའི་ལམ་བཟང་པོ་གསལ་བར་མཛད་དོ། །

དགུ་པ་ཞར་བྱུང་ཕྲན་ཚེགས་གཞན་བྱུང་བ་ནི།

དགུ་པ་ཞར་བྱུང་ཕྲན་ཚེགས་གཞན་བྱུང་བ་ནི། ངོ་མཚར་བའི་གཏམ་བཅོ་བརྒྱད་དང་ལྡན་པའི་གྲུབ་ཆེན་མི་ཏྲ་ཛོ་ཀི་དེ་ཉིད་ཁྲོ་ཕུ་ལོ་ཙཱ་བ་བྱམས་པའི་དཔལ་གྱིས་སྤྱན་དྲངས། ཟབ་ཆོས་ཞུས་པས་ཤེས་བྱའི་ཡན་ལག་ཏུ་བསྟན་པ་ཐུན་མོང་གི་སྐོར། ནང་སྒྲུབ་ཐབས་སུ་བསྟན་པ་ཉམས་ལེན་བྱེ་བྲག་གི་སྐོར། གསང་བ་བྱིན་རླབས་ཀྱི་འཇུག་པ་སྟོན་པ་ཁྱད་པར་གྱི་སྐོར་གསུམ་གནང་བ་ཁྲོ་ཕུ་པ་ལས་རིམ་པར་བརྒྱུད་པ་དང་། ས་ར་ཧས་གནང་བའི་ཕྱག་ཆེན་འཁོར་བ་རྒྱུན་གཅོད་ཀྱི་གདམས་ངག་དོན་མོ་རིར་མཚན་ལྡན་འཁྲུལ་ཞིག་ཆེན་པོ་ལ་གནང་། དེས་རྟོགས་ལྡན་གྲགས་པ་སེང་གེ་ལ་གནང་བ་དང་། ཡང་བལ་རས་ཞེས་བྱ་བའི་རྣལ་འབྱོར་པར་བརྫུས་ནས་གྲགས་པ་སེང་གེ་ལ་མཁའ་སྤྱོད་བསྙེན་སྒྲུབ་གནང་བ་ཕྱི་མ་གཉིས་ལ་མཁའ་སྤྱོད་དབང་པོས་ཡིག་ཆའང་མཛད་པ་དང་། ཡང་མི་ཏྲ་ཁྲིད་དྲུག་ཏུ་གྲགས་པ་པཎྜི་ཏ་ཤཱ་རི་པུ་ཏྲ་ལ་གནང་། དེས་མི་ཉག་གྲགས་རིན་དང་ཀུ་ཅོར་རྟོགས་ལྡན་ལས་བརྒྱུད་པ་དང་། རྡོ་རྗེ་ཕྲེང་པའི་དབང་བསྐུར་བརྒྱ་རྩ་པཎ་ཆེན་དོན་ཡོད་རྡོ་རྗེ་ལས་བརྒྱུད་པ་སོགས་བྱུང་། ཡང་སྤྲུལ་སྐུ་ལ་སྟོད་དམར་པོ་ལ་རྡོ་རྗེ་གདན་པ་ཆེ་བས་གནང་བའི་ཐུགས་རྗེ་ཆེན་པོའི་ཆོས་སྐོར་དང་བསིལ་བ་ཚལ་དུ་མཁའ་འགྲོ་སྡེ་ལྔས་གནང་བའི་གདམས་ངག་གི་སྐོར་རྣམས་དང་། གཙང་ཁ་རག་སྒོམ་ཆུང་བློ་གྲོས་དབང་ཕྱུག་ལ་ཨ་རོ་ནས་བརྒྱུད་པའི་སེམས་ཕྱོགས་དང་། ཇོ་བོ་ནས་བརྒྱུད་པའི་བློ་སྦྱོང་གི་བཀའ་བབས། གདམས་པ་དེ་གཉིས་བསྲེས་པ་ལ་བྱང་ཆུབ་སེམས་སྦྱོང་ཞེས་བྱ་བའི་གཞུང་མཛད། ཕྱིས་ཁ་རག་སྐོར་གསུམ་དུ་གྲགས་ཏེ། ལྷོ་པ་ངྷརྨ་སྐྱབས། བྱང་སྒོམ་མཆེད་གསུམ་སོགས་ནས་རྒྱ་ཆེར་འཕེལ། གཞན་ཡང་། སྤྱན་རས་གཟིགས་ཀྱི་དམར་ཁྲིད་རིགས་བཞི། དུས་ཞབས་ཆེ་ཆུང་ནས་བལ་པོ་ཀཱ་ཡ་ཤྲཱི་སོགས་ལ་བརྒྱུད་པའི་ནམ་མཁའ་སྐོར་གསུམ། ཕྱག་རྒྱ་ཆེན་པོ་ཐིག་ལེའི་སྐོར། མན་ལུང་པའི་སྒོམ་རིམ་གཅིག་ཤེས་ཀུན་གྲོལ་སོགས་གདམས་ངག་གི་རིགས་དང་། ཨ་བྷ་ཡི་རྡོ་རྗེ་ཕྲེང་བ་དང་སྒྲུབ་ཐབས་བརྒྱ་རྩ། ད་ཏྤན་ཨཱ་ཙརྱའི་བྱ་བ་བཏུས་པ་སོགས་དབང་དང་སྒྲུབ་ཐབས་ཀྱི་རིགས་ཚད་དང་ལྡན་ཞིང་སྒྲུབ་བརྒྱུད་ཀྱི་བཀའ་སྲོལ་ཟུར་པ་མེད་པའི་ཕྲན་ཚེགས་ཀྱི་བྱུང་བ་མཐའ་ཡས་སོ། །དེ་ལྟར་སྒྲུབ་བརྒྱུད་ཤིང་རྟ་ཆེན་པོ་བརྒྱད་རྗེས་འབྲང་དང་བཅས་པ་དེ་ཐམས་ཅད་ཀྱི་སྨིན་གྲོལ་བཤད་བཀའ་དེང་སང་རྒྱུན་གང་བཞུགས་ཐམས་ཅད་འཇམ་མགོན་བླ་མ་ཡབ་སྲས་ཀྱིས་འབད་པ་ཆེན་པོས་བཙལ་ཞིང་གསན་ཏེ་ཉམས་བཞེས་མཐར་ཕྱིན་པར་མཛད་ཅིང་། བྱིན་རླབས་ཉེ་བརྒྱུད་ཀྱི་གདམས་པའི་བཀའ་བབས་དང་བཅས་ཏེ་མན་ངག་གི་སྙིང་པོ་མཐའ་དག་གདམས་མཛོད་སྤྲུལ་པའི་གླེགས་བམ་ཆེན་པོར་བཀའ་ཡི་བསྡུ་བ་མཛད་དེ་དུས་ཀྱི་མཐར་ཡང་ཉམས་པ་མེད་པར་བཀའ་གཙིགས་ཕྱག་རྒྱའི་རེ་ཁས་བཏབ་པ་སྟེ། བདག་གིས་ཀྱང་འཇམ་མགོན་རྡོ་རྗེ་འཆང་དངོས་ལས་གདམས་གཏད་ཐུན་མིན་དང་། ཡོངས་ཀྱི་འདྲེན་པ་ཆེན་པོ་རྒྱལ་སྲས་བཀྲ་ཤིས་འོད་ཟེར་གྱི་ཞལ་སྔ་ནས་སྨིན་གྲོལ་ཚངས་སྤྲུགས་སུ་ཐོབ་པའི་སྐལ་བཟང་ཉམས་སུ་མྱོང་བས་དལ་རྟེན་སྙིང་པོར་བྱས་པ་ཡིན་ནོ། །གངས་ལྗོངས་ཡོངས་ལ་གྲགས་པའི་སྒྲུབ་བརྒྱུད་བརྒྱད། །རྡོ་རྗེ་འཆང་ནས་རྩ་བའི་བླ་མའི་བར། །བརྒྱུད་པའི་ཁུངས་དང་རྣམ་ཐར་བསམ་མི་ཁྱབ། །ཟབ་ཁྱད་ཆེ་ཡོན་མཐའ་དག་སུས་བརྗོད་ནུས། །མཚན་ཙམ་གྱིས་ཀྱང་སྲིད་པའི་གྲོང་ཁྱེར་བརྒྱ། །རྡུལ་དུ་གཞིག་ལ་སོམ་ཉིའི་སྐབས་མིན་ན། །ནན་ཏན་ཉམས་སུ་ལེན་རྣམས་སྨོས་ཅི་དགོས། །དེ་ཕྱིར་འདི་དང་འཕྲད་རྣམས་སྐལ་བ་མཆོག །ཕྱོགས་རེར་ཞེན་པའི་བློ་ངན་རང་མཚང་སྐྱོན། །བདག་བསྟོད་གཞན་ལ་སྨོད་པ་མི་དགེའི་བཤེས། །དོན་མེད་དགག་སྒྲུབ་མང་པོའི་གཉེར་མེད་པས། །དག་སྣང་དཀར་པོོའི་མིག་བཟང་བསྐྱེད་འཚལ་ལོ། །

དེ་དག་ཐམས་ཅད་ཀྱི་རྣམ་ཐར་གཅིག་ཏུ་ཟླུམ་པའི་བདག་ཉིད་སངས་རྒྱས་འཇིག་རྟེན་དུ་བྱོན་པ་ལྟ་བུ་ངོ་མཚར་བའི་བཀའ་བབས་བདུན་དང་།

ད་ནི་དེ་དག་ཐམས་ཅད་ཀྱི་རྣམ་ཐར་གཅིག་ཏུ་ཟླུམ་པའི་བདག་ཉིད་སངས་རྒྱས་འཇིག་རྟེན་དུ་བྱོན་པ་ལྟ་བུ་ངོ་མཚར་བའི་བཀའ་བབས་བདུན་དང་། སྔོན་མེད་མཛོད་ལྔའི་ཤིང་རྟའི་ལམ་སྲོལ་གསར་དུ་འབྱེད་པ་པོ་ཀུན་མཁྱེན་བླ་མ་རྣམ་གཉིས་ཀྱི་གཏམ་བརྗོད་པར་བྱ་སྟེ། དེ་ཡང་ལྷ་དང་བཅས་པའི་འཇིག་རྟེན་གསུམ་ན་མཚན་གྱི་རྔ་བོ་ཆེ་སྙན་པར་གྲགས་པ་འཇམ་དབྱངས་མཁྱེན་བརྩེའི་དབང་པོའམ་པདྨ་འོད་གསལ་མདོ་སྔགས་གླིང་པ་ནི། ངོ་བོ་རྒྱལ་ཀུན་ཡབ་གཅིག་རྗེ་བཙུན་འཇམ་པའི་དབྱངས་ཉིད། རྣམ་པ་གང་འདུལ་གདུལ་བྱའི་སྣང་ངོར་འཕགས་ཡུལ་གྱི་སློབ་དཔོན་ཆེན་པོ་འཇམ་དཔལ་བཤེས་གཉེན། བི་མ་ལ། དྲིལ་བུ་པ། སྒོ་མཐའ་ཡས་པའི་བློ་གྲོས། ཕྱིས་བྱོན་ནགས་ཀྱི་རིན་ཆེན་སོགས་དང་། བོད་དུ་ཆོས་རྒྱལ་ཁྲི་སྡེ། རྒྱལ་སྲས་ལྷ་རྗེ། ནག་ཚོ་ལོ་ཙཱ། འབྲོམ་སྟོན་པ། རས་ཆུང་རྡོར་གྲགས། དྭགས་པོ་ལྷ་རྗེ། རྗེ་བཙུན་གྲགས་རྒྱལ། བློ་གྲོས་རྒྱལ་མཚན། ཀློང་ཆེན་རབ་འབྱམས། དགེ་འདུན་གྲུབ། མཁྱེན་རབ་ཆོས་རྗེ། ལྕགས་ཟམ་པ། མཁྱེན་བརྩེའི་དབང་ཕྱུགནམ་མཁའ་འཆི་མེད། རིག་འཛིན་འཇིགས་མེད་གླིང་པ་རྣམས་དང་། གཞན་ཡང་། ཕ་དམ་པ། ཨ་མོ་གྷ་བཛྲ། སྙེ་མདོ་ཐམས་ཅད་མཁྱེན་པ་སོགས་དང་། ཁྱད་པར་ཆོས་རྒྱལ་ཆེན་པོའི་སྐུ་སྤྲུལ་མངའ་བདག་ཉང་རལ། གསུང་སྤྲུལ་གུ་རུ་ཆོས་དབང་། ཐུགས་སྤྲུལ་མངའ་རིས་པཎ་ཆེན། ཡོན་ཏན་གྱི་སྤྲུལ་པ་བཀྲ་ཤིས་སྟོབས་རྒྱལ། ཕྲིན་ལས་ཀྱི་སྤྲུལ་པ་རྒྱལ་མཆོག་ལྔ་པ་རྣམས་དང་། རྒྱལ་སྲས་ལྷ་རྗེའི་སྤྲུལ་པ་གཏེར་སྟོན་སངས་རྒྱས་བླ་མ་ནས་ཆོས་རྗེ་གླིང་པའི་བར་གཏེར་སྟོན་རྐྱང་པའི་སྐྱེ་བ་བཅུ་གཉིས་སོགས་གང་འདུལ་སྒྱུ་འཕྲུལ་རྡོ་རྗེའི་རོལ་མོ་རིམ་དང་ཅིག་ཅར་དུ་སྣང་བས་བསྟན་འགྲོའི་དོན་མཐའ་ཡས་པ་མཛད་ནས། མངའ་བདག་ཉང་རིན་པོ་ཆེའི་གཏེར་ལུང་ལས། རྩེ་སྒང་ཞེས་པའི་རི་བོའི་མདུན༔ཕ་ཝོང་{ཝཾ}ཀླུ་དབང་འཁྱིལ་བའི་སྟེང༔མངའ་བདག་འཇམ་པའི་དབྱངས་ཞེས་འབྱུང༔བཅུ་གསུམ་ཟབ་མོའི་གཏེར་ལ་སྤྱོད༔ཅེས་པས་མཚོན་གཏེར་ཁ་གསར་རྙིང་དུ་མ་ནས་རྡོ་རྗེའི་ལུང་གིས་བསྔགས་པ་བཞིན། མངའ་བདག་གི་སྐུ། པདྨའི་གསུང་། ནམ་མཁའི་སྙིང་པོའི་ཐུགས། བི་མ་ལའི་ཡོན་ཏན། ལང་གྲོ་ལོ་ཙཱའི་ཕྲིན་ལས་ཀྱིས་རྣམ་པར་འཕྲུལ་བའི་ཚུལ་གྱིས། མདོ་ཁམས་གནས་ཆེན་ཉེར་ལྔའི་ནང་ཚན་ཕྲིན་ལས་འགྲོ་འདུལ་སྤྲུལ་པའི་གནས་མཆོག་རི་བོ་དབང་ཞུ་སོགས་གནས་ཆེན་གནས་ཕྲན་མང་པོས་བསྐོར་ཅིང་གཏེར་ཆེན་གཏེར་ཕྲན་དུ་མས་གཏམས་པས་གཏེར་ཀླུང་ཞེས་པའི་ཡུལ་ལྗོངས་སུ། རྒྱབ་རི་རྩེ་སྒང་ཞེས་པའི་མདུན་རོལ། བྲག་རི་སྦྲུལ་འཁྱིལ་བའི་གཟུགས་སུ་གནས་པའི་སྟེང་དིལ་མགོ་ཞེས་པར། རུས་ནི་ཤིང་ཁམས་སྒ་དང་། རིགས་ནི་འོད་གསལ་ལྷ་ལས་ཆད་པའི་མྱོས། ཡབ་དྲུང་ཆེན་རིན་ཆེན་དབང་རྒྱལ་དང་། ཡུམ་སོག་མོ་བཟའ་བསོད་ནམས་མཚོ་གཉིས་ཀྱི་སྲས་སུ། རབ་བྱུང་བཅུ་བཞི་པའི་ལྕགས་འབྲུག་ཆུ་སྟོད་ཟླ་བའི་དཀར་ཕྱོགས་ཀྱི་དགའ་བ་གཉིས་པར་དབུ་སྐྲ་ནག་སི་ལེ་བས་སྙན་ཡན་ཁེབས་པ་དང་། ཕྲུ་མ་ཆོས་གོས་བཞིན་དུ་དཀྲིས་པའི་སྟེང་དུ་རྩ་མཆོག་ཀུ་ཤས་བསྡམས་བཞིན་ངོ་མཚར་བའི་ལྟས་དང་བཅས་ཏེ་བལྟམས། ཐུགས་ཀྱིས་དྲན་ཙམ་དུ་ཡེ་ཤེས་མགོན་པོ་ཕྱག་དྲུག་པ་དང་སྔགས་སྲུང་ཨེ་ཀ་ཛ་ཊིས་ཡང་ཡང་བརྩེ་ཞིང་སྐྱོང་བ་དང་སྔོན་གྱི་སྐྱེ་བ་མང་པོ་རྗེས་སུ་དྲན། ཆུང་ངུ་ནས་ཐེག་པ་ཆེན་པོའི་རིགས་སད་པའི་རྟགས་དང་། སྐུ་རྩེད་ཀྱང་དབང་བསྐུར་ཆོས་བཤད་བཀའ་འདུས་ཀྱི་སྒྲུབ་ཆེན་འཛུགས་པའི་ཚུལ་སོགས་ཕལ་པའི་སྤྱོད་པ་ལས་འདས། མཁྱེན་རབ་དང་རྣམ་དཔྱོད་འགྲན་ཟླ་བྲལ་བས་འབྲི་ཀློག་སོགས་ཚེགས་མེད་པར་མཁྱེན་ཅིང་གླེགས་བམ་ཕལ་ཆེར་ཚར་རེ་གཟིགས་པས་ཚིག་དོན་གྱི་ཆ་ཐུགས་སུ་ཆུད། དགུང་ལོ་བཅུ་གཉིས་པའི་ཐོག་ཐར་རྩེ་མཁན་རིན་པོ་ཆེ་བྱམས་པ་ཀུན་དགའ་བསྟན་འཛིན་ནས་མཁན་ཆེན་ནམ་མཁའ་འཆི་མེད་ཀྱི་སྤྲུལ་སྐུར་ངོས་འཛིན་གནང་ནས་མངའ་གསོལ། འདི་ཡན་ཆད་ནས་རིགས་ཀྱི་ནུས་པ་སད་དེ་ཅིའང་མ་བསླབས་པར་སྙན་ངག་གི་བསྟོད་ཚོགས་དང་། ཉམས་མགུར་སོགས་ཚིག་དོན་ཤིན་ཏུ་བཟང་བས་མཁས་པ་དང་གྲུབ་པ་རྣམས་ཀྱང་ཐུགས་འཕྲོག་ནུས་པ་བྱུང་། དགུང་གྲངས་བཅུ་དྲུག་ཐོག་ལུང་དོན་ལྟར་ཁ་བ་དཀར་པོའི་ཕྱོགས་སུ་ཕེབས་གྲུབ་པ་ཞིག་བྱུང་ན་འབམ་ལྷ་མདུན་དུ་ཡེ་ཤེས་མཚོ་རྒྱལ་གྱི་རྣམ་འཕྲུལ་མཁའ་འགྲོ་ཞིག་ཡོད་པས་གྲོགས་བྱས་ནས་གཏེར་ཁ་བཅུ་གསུམ་རིམ་པར་བཞེས། དབུས་གཙང་མཚམས་སུ་ཆོས་སྡེ་ཞིག་བཙུགས་ནས་གསང་ཆེན་རྡོ་རྗེ་ཐེག་པའི་འབྱུང་གནས་བྱེད། མཐའ་དམག་ལོ་བརྒྱའི་བར་དུ་ཟློགསྐུ་ཚེའི་མཇུག་ཏུ་སྨད་གཡུ་ལུང་གངས་རའི་གནས་སྒོ་འབྱེད་ནས་དེར་འཇའ་ལུས་འཕོ་བ་ཆེན་པོའི་སྐུ་འགྲུབ་པ་ཡིན་ནའང་རྟེན་འབྲེལ་གཞན་དབང་དུ་སོང་བས། བཅུ་བདུན་པར་མཁའ་འགྲོ་དེ་ཉིད་ཀྱང་གཤེགས་པའི་མཚན་རྟགས་བཅས་མཁའ་འགྲོ་འཁྲུགས་པའི་རྐྱེན་གྱིས་སྙུན་དྲག་པོས་ཟིན་ནས་སྐུ་སྐྱེ་འཕོས་པ་ལྟ་བུས་བྲིས་ཀློག་ཚུན་མུ་མཐུད་དུ་མཁྱེན་དགོས་པ་བྱུང་བས་སྔར་གྱི་ཤེས་རབ་དེའི་བཞི་ཆ་ཙམ་ཞིག་ལས་མ་བྱུང་གསུངས། དགུང་གྲངས་བཅོ་བརྒྱད་པར་ཞེ་ཆེན་རི་ཁྲོད་པདྨ་འོད་གླིང་དུ་ཕེབས། བཅུ་ཕྲག་རིག་པའི་གནས་མཐར་སོན་པའི་པཎྜི་ཏ་ཆེན་པོ། སྣང་བ་བདེན་འཛིན་གྱི་འཁྲུལ་པ་གཏད་མེད་དུ་ཞིག་པའི་གྲུབ་བརྙེས་འགྱུར་མེད་མཐུ་སྟོབས་རྣམ་རྒྱལ་དཔལ་བཟང་པོའི་ཞབས་པད་དུ་བསྙེན་ཏེ། བརྡ་སྤྲོད་རིག་པའི་གཞུང་ཆེན་གསུམ། སྡེབ་སྦྱོར། སྙན་དངགས་མེ་ལོང་མ། མངོན་བརྗོད་འཆི་མེད་མཛོད་རྩ་འགྲེལ་སོགས་དུས་ཐུང་ངུས་ཐུགས་སུ་ཆུབ་པས། སློབ་དཔོན་ནས་ཀྱང་མཁྱེན་རབ་ཆེ་བའི་བསྔགས་བརྗོད་བཅས་བརྡ་སྤྲོད་ཀུན་བཤད་ཀྱི་མཚན། ཚངས་སྲས་དགྱེས་པའི་བློ་ལྡན་གདོང་དྲུག་དགའ་བའི་ལང་ཚོ་ཞེས་སྩལ། གཞན་ཡང་མངའ་རིས་པཎ་ཆེན་གྱི་སྡོམ་གསུམ་རྩ་འགྲེལ། སྒྱུ་འཕྲུལ་ཞི་ཁྲོའི་དབང་དང་། རྩ་རྒྱུད་གསང་བ་སྙིང་པོའི་བཤད་པ་གཙོ་བོར་གྱུར་པའི་རྙིང་མ་བཀའ་གཏེར་མང་པོའི་སྨིན་གྲོལ་བཅས་དོན་གྱི་བསྟན་པ་གཏད། དེ་ནས་རིམ་པར་ཉིད་ཀྱི་རྣམ་ཐར་ཞལ་གསུང་མར། ཉེར་གཅིག་ལོ་ཡི་གུང་སོན་ཚེ། །སྨིན་གྲོལ་ཆོས་ཀྱི་གླིང་ཆེན་པོར། །བརྟན་མཁས་རྫོགས་པའི་དགེ་བའི་བཤེས། །རིག་འཛིན་བཟང་པོར་བསྙེན་པར་རྫོགས། །ཁྲི་ཆེན་སངས་རྒྱས་ཀུན་དགའ་ལས། །དབུ་མ་ལུགས་ཀྱི་སེམས་བསྐྱེད་དང་། །དཔལ་ཆེན་ཡང་དག་སོ་ལུགས་དང་། །རིག་འཛིན་ཐུགས་ཏིག་དབང་བསྐུར་ངོས། །སྡོམ་པ་གསུམ་དང་ལྡན་པར་བྱས། །སྔ་ཕྱིར་ཁམས་དབུས་གཙང་གསུམ་དུ། །མི་ལོ་བཅུ་གསུམ་ཐོས་པ་བཙལ། །རྡོ་རྗེ་འཆང་དང་དགེ་བའི་བཤེས། །རིག་བྱེད་གཞུང་ལ་མཁས་པ་སོགས། །གཙུག་ནོར་བརྒྱ་དང་ལྔ་བཅུ་བསྟེན། །བཟོ་གསོ་སྒྲ་ཚད་ཡན་ལག་བཅས། །འདུལ་འཛོད་དབུ་ཕར་བཤད་སྲོལ་ཐོས། །གསར་རྙིང་རྡོ་རྗེ་ཐེག་པ་ཡི། །དབང་དང་བྱིན་རླབས་རྗེས་གནང་སོགས། །བཀའ་གཏེར་བཀའ་གདམས་ས་སྐྱ་པ། །འབྲི་སྟག་མཚུར་དང་གདན་འབྲུག་གི། །སྔོན་གྱི་ལུགས་སྲོལ་མ་ཉམས་པར། །བཞུགས་པའི་སྨིན་གྲོལ་གདམས་ངག་དང་། །བདེ་དགྱེས་གསང་གསུམ་དུས་འཁོར་ལོ། །སྒྱུ་འཕྲུལ་གསང་བ་སྙིང་པོ་སོགས། །རྒྱབ་རྟེན་རྒྱུད་ཀྱི་བཤད་པ་དང་། །བཀའ་བསྟན་དམ་པའི་གསུང་རབ་ལུང་། །གླེགས་བམ་བདུན་བརྒྱ་ལྷག་ཙམ་ཉན། །མདོར་ན་བཤད་རྒྱུད་ཤིང་རྟ་བཅུའི། །རིང་ལུགས་རྒྱུན་བཞུགས་ཕལ་ཆེར་ཐོས། །ཅུང་ཟད་སྦྱངས་ཤིང་ཕྱོགས་ཙམ་ཤེས། །རང་གཞན་གྲུབ་མཐའི་ཁས་ལེན་དང་། །ཆོས་རྒྱུས་ཤིན་ཏུ་ཆེ་བ་བྱུང་། །ཐོས་པ་དེ་རྣམས་ཕལ་ཆེར་ཞིག །ཡང་ནས་ཡང་དུ་འཆད་པ་དང་། །ལན་རེ་མ་འཆད་མེད་པ་ལྟར། །དམ་པའི་སྐྱེས་བུ་མཆོག་རྣམས་དང་། །ཕལ་པ་མུ་ཏོ་ཡན་ཆད་ལ། །ཉིན་མཚན་ཆོས་སྦྱིན་ཅི་ནུས་སྤེལ། །བསྟན་པའི་རྒྱུན་ཙམ་འབྱུང་རེ་བའི། །ལྷག་བསམ་སྨོན་པ་སྙིང་ནས་བགྱིས། གསེར་ཟངས་འབའ་ཞིག་ལས་གྲུབ་པའི། །སྐུ་རྟེན་སྟོང་ཕྲག་གཉིས་ཙམ་དང་། །ཁྱད་པར་གསུང་རྟེན་གླེགས་བམ་ནི། །པུསྟི་བཞི་བཅུ་ཉེ་བའི་སྤར། །བྲིས་དང་སྤར་ལ་བསྡོམས་པ་ཡི། །གླེགས་བམ་སྟོང་ཕྲག་གཉིས་ཙམ་བཞེངས། །དེ་རྣམས་བཞུགས་པའི་ལྷ་ཁང་ཁག །བཅུ་གསུམ་ཙམ་ཞིག་བཀོད་མཛེས་བསྐྲུན། །ཐུགས་རྟེན་མཆོད་སྡོང་ཆེན་མོས་གཙོས། །གསེར་ཟང་ལས་གྲུབ་བརྒྱ་ཕྲག་ལྷག །བཞེངས་ཤིང་ཅི་ནུས་མཆོད་འབུལ་བགྱིས། །གནས་གཞི་གསར་དུ་བཞེངས་པ་ནི། །དུས་ཀྱི་མཐར་འཁྱོལ་དཀའ་བས་ན། །བསྐྲུན་པའི་རྩོལ་བ་མ་མཆིས་ཀྱང་། །ཕྱོགས་འདིར་སྟོད་སྨད་འཁྲུགས་ལོང་གིས། །དགོན་གནས་ཕལ་ཆེར་ཉམས་པ་རྣམས། །རྒྱ་བོད་ཆོས་རྒྱལ་སྡེ་དགེ་བཅས། །དཔོན་བློན་རྣམས་ཀྱི་རྒྱུད་བསྐུལ་ནས། །ཉམས་གསོས་ཞལ་འདེབས་ཞལ་བསྐོས་དང་། །རང་ངོས་མཛུབ་མགོའི་མཆོད་པའི་དཔེས། །དངོས་ཇ་སུམ་སྟོང་ལྷག་པ་ཕུལ། །ཕལ་ཆེར་གསར་བཞེངས་ཉམས་གསོས་སོགས། །ཚགས་སུ་ཚུད་པའི་བྱ་བ་བསྒྲུབས། །ཕན་ཚུན་ཆོས་ཀྱི་སྡེ་རྣམས་སུ། །ལོ་རེ་བཞིན་དུ་ཡོན་སྦྱར་ནས། །གཟུངས་སྔགས་བསྔོ་བ་སྨོན་ལམ་རྟེན། །སྔ་རྗེས་དངོས་ཇ་བཞི་སྟོང་གི། །རྩ་བ་ཉམས་པ་མེད་ཕུལ་ནས། །འབྲེལ་ཚད་དོན་ལྡན་སྨོན་པ་བགྱིས། །ས་ཀར་རྙིང་མ་དགེ་ལུགས་ཀྱི། །བསྟན་འཛིན་སྐྱེས་མཆོག་དམ་པ་སོགས། །དགེ་བའི་བཤེས་གཉེན་མཐའ་ཡས་དང་། །རྒྱ་བོད་དཔོན་ཆེན་གཙོར་གྱུར་པའི། །འདུས་པ་ཚད་གཟུང་མེད་པ་ལ། །ཆོས་ཀྱི་མཆོད་པ་འབུལ་བ་དང་། །རྐྱེན་སེལ་དབང་དང་བྱིན་རླབས་སོགས། །བློ་སྣ་སུན་སུན་རེ་བ་བསྐངས། །གོང་མའི་ཡུལ་རྣམས་ཐམས་ཅད་ལ། །ཅི་ནུས་མཆོད་པའི་སྤྲིན་ཡང་སྤྲོས། །རང་ཉིད་གྲུབ་མཐའ་གང་ལའང་། །གུས་ཤིང་དད་པ་མ་གཏོགས་པ། །ལོག་རྟོག་ཅུང་ཟད་མེད་པའི་མཐུས། །གཡུང་དྲུང་བོན་ལུགས་ཚུན་ཆོད་ཀྱི། །སློབ་འབྲེལ་རྒྱ་ཆེ་མུ་མེད་བྱུང་། །སྤོང་བ་བསམ་གཏན་དེ་ཁོ་ནར། །མཉམ་པར་འཇོག་པ་དཀའ་ནའང་། །ཆུང་ནས་གདུལ་བྱ་གྲོང་ཆོག་སོགས། །རྨི་ལམ་དུ་ཡང་མ་དྲན་ཅིང་། །ཚེ་འདི་བློ་ཡིས་ཐོངས་པ་ཡིས། །བྱ་བཏང་ཁོ་ནའི་ཚུལ་དུ་འཁུམས། །མཆོག་དམན་སུ་ལའང་ངོ་སྲུང་དང་། །རེ་དོགས་སྤྲོས་པ་དམར་ཐག་བཅད། །སྔ་ཕྱིར་མི་ལོ་བཅུ་གསུམ་ཙམ། །ལྷག་པའི་ལྷ་ཡི་བསྙེན་སྒྲུབ་དང་། །ཟབ་ཁྲིད་བརྒྱ་རྩ་ཤར་སྒོམ་བགྱིས། །ཉམས་དང་རྟོགས་པས་དབེན་མོད་ཀྱང་། །ཁས་བླངས་ཆ་ཙམ་བསྒྲུབ་པ་ཡིས། །སྙིགས་དུས་སྐལ་བཟང་བྲལ་ཚུད་ཙམ། །བྱུང་བས་ཡིད་བདེ་འབའ་ཞིག་ཤར། །དེ་ལྟར་འཁོར་ལོ་རྣམ་གསུམ་གྱི། །ཕྱི་ཡི་རྣམ་ཐར་མདོར་བསྡུས་སོ། །ཞེས་གསུང་། སྤྱིར་སྐུ་ཆུང་ངུའི་དུས་ནས་རིམ་བགྲོད་ཐེག་པའི་ལམ་ལ་མ་ལྟོས་པར་འཕགས་ལམ་ཆོས་ཉིད་ཀྱི་བདེན་པ་རང་བཞིན་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་མངོན་དུ་གྱུར་པས་སྣང་སྤྱོད་ཐམས་ཅད་ཡེ་ཤེས་ཀྱི་རང་མདངས་དག་པའི་གཟིགས་སྣང་འབའ་ཞིག་ལ་གཡེངས་པའི་ཕྱིར་དུས་སྐད་ཅིག་མ་རེ་རེར་གཟིགས་པའི་ཤས་ཙམ་ཡང་བརྗོད་ལས་འདས་མོད། ཕྱོགས་ཙམ་རྣམ་ཐར་ཆེན་མོར་གསལ་བ་དང་། འོག་ཏུའང་སྟོན་པས་ཤེས་ནུས་ལ། སྔ་ཕྱིར་སྒྲུབ་པའི་མཚན་རྟགས་ཕལ་པའི་སྤྱོད་ཡུལ་དུ་སྣང་བའང་། ཆུ་བོ་རིའི་ཚེ་ཆུ་ཕུག་དང་། ཡར་ཀླུང་ཚེ་ཆུ་འབུམ་པ་གཉིས་ནས་ཚེ་ཆུ་དངོས་སུ་བབས་པ་དང་། ཇོ་བོ་རང་བྱུང་ལྔ་ལྡན་ལས་རིང་བསྲེལ་ཕེབས་པ། ཁྲོས་ནག་དབང་གི་སྐབས་སུ་དབང་རྟེན་ཐོད་པ་རེག་ཏུ་མི་བཏུབ་ཙམ་གྱི་དྲོད་འབར་བ་དང་། ཚེ་སྒྲུབ་ལོ་གསུམ་མཛད་རིང་ཚེ་ཆང་རྒྱུན་བཞག་དབྱར་མི་རུལ། དགུན་མི་འཁེང་། ཁ་དོག་སེར་སྨུག་ཤིན་ཏུ་སྐ་བའི་ཉམས་ཅན། དབུས་ནས་གྱེན་དུ་ཕྱུར་བ་ལ་དྲི་རོ་གང་གིས་ཀྱང་མཚོན་དུ་མེད་པའི་ཡ་མཚན་ཅན་དང་། རྫ་མ་མོའི་མདོར་དཔལ་སྤྲུལ་རིན་པོ་ཆེའི་རྡོ་འབུམ་ལ་མེ་ཏོག་དངོས་སུ་ཕེབས་པ་དང་། ཚེས་བཅུའི་སྐབས་ཐུགས་ཉམས་འུར་ཏེ་ཌཱ་དྲིལ་བར་སྣང་ལ་བཞག་པ་སོགས་དང་། དད་པ་ཅན་རྣམས་ཀྱིས་ཐོག་མར་མཇལ་སྐབས་ཐང་སྟོང་རྒྱལ་པོ་སོགས་ཀྱི་སྐུར་མཐོང་བ་དང་། འཕགས་མ་ཡིད་བཞིན་འཁོར་ལོའི་སྐུར་མཐོང་བ་སོགས་མང་། ཁྱད་པར་སྒྲུབ་བརྒྱུད་ཤིང་རྟ་བརྒྱད་ཀྱི་རིང་ལུགས་དེང་སང་རྒྱུན་གང་བཞུགས་ཀྱི་རིང་བརྒྱུད་བར་མ་ཆད་པ་ལས་འབད་པ་ཆེན་པོས་གསན་ཅིང་། ཐུན་མོང་མ་ཡིན་པའི་ཉེ་བརྒྱུད་ཀྱི་བཀའ་བབས་བརྙེས་ཚུལ་ནི། སྔ་འགྱུར་རྙིང་མ་ལ། དགུང་གྲངས་ཉེར་བཞིར་བཞེས་པ་ཆུ་ཡོས་ས་ཟླའི་ཚེས་དྲུག་གི་ཉིན་ཤང་མདོའི་སྲམ་པ་སྒྲུབ་ཁང་གི་དཔལ་ཆེན་གྱི་སྐུ་ཉིད་དཔལ་ཆེན་དངོས་སུ་མཇལ། སྒོ་དྲུང་དུ་ཟུར་པ་ཡབ་སྲས་བཞད་གད་ཐིག་གེར་བཞུགས་ནས་རུ་ལུའི་སྔགས་ཀྱི་དབང་། བཛྲ་ས་ཏྭའི་རྒྱུད་བཤད། ཧཱུྃ་ཡིག་གི་མན་ངག་གནང་བའི་ཉམས་སྣང་ཆེས་གསལ་ཞིང་བརྟན་པར་བྱུང་བས་སྒྱུ་འཕྲུལ་གྱི་ཉེ་བརྒྱུད་ཐོབ། མེ་སྦྲུལ་ལོར་ངན་ལམ་རྒྱལ་བ་མཆོག་དབྱངས་ཀྱི་རྣམ་འཕྲུལ་མཁན་པདྨ་བཛྲ་ལས་འདུས་མདོའི་དབང་གསན་སྐབས། དབང་དངོས་གཞིའི་སྐབས་སུ་དཀྱིལ་འཁོར་ཡོངས་རྫོགས་ཀྱི་གསལ་སྣང་བརྟན་པོར་ཤར། དེ་ནུབ་མནལ་ལམ་དུ་སོ་ཡེ་ཤེས་དབང་ཕྱུག་མཇལ་ནས་འདུས་མདོའི་སྨིན་གྲོལ་ཡོངས་རྫོགས་ཀྱི་ཉེ་བརྒྱུད་ཐོབ། དགུང་ལོ་བཅུ་དྲུག་པའི་ཐོག་ས་ཟླའི་ཚེས་བརྒྱད་ལ་མནལ་ལམ་དུ། རྒྱ་གར་རྡོ་རྗེ་གདན་གྱི་ཀེའུ་ཚང་རིམ་དགུའི་རིམ་པ་བརྒྱད་པར་སློབ་དཔོན་འཇམ་དཔལ་བཤེས་གཉེན་མཇལ་ནས་གསོལ་བཏབ་མཛད་པས། གཡོན་ཕྱོགས་ནས་ཤེར་ཕྱིན་སྡུད་པའི་གླེགས་བམ་ཞིག་བླངས་ནས་དབུར་བཞག་སྟེ་དགོངས་པ་གཏད་དེ་མཚན་ཉིད་ཀྱི་ཆོས་ཐམས་ཅད་ཀྱི་བཀའ་ལུང་རྫོགས་པ་ཡིན་ནོ་གསུངས། གཡས་ཕྱོགས་ནས་རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་བླངས་ཏེ་དབུར་བཞག་ནས་དགོངས་པ་གཏད་དེ་གསང་སྔགས་རྡོ་རྗེ་ཐེག་པའི་ཚུལ་སྤྱི་དང་། ཁྱད་པར་རྫོགས་ཆེན་སྡེ་གསུམ་གྱི་ཚིག་དོན་བྱིན་རླབས་ཐམས་ཅད་རྫོགས་པ་ཡིན་ནོ་གསུངས། ལུང་བསྟན་འགའ་ཞིག་ཀྱང་མཛད་པའི་མཐར་དགྱེས་པའི་ཚུལ་གྱིས་འོད་དུ་ཞུ་ནས་རྗེ་ཉིད་ལ་ཐིམས་པས་དར་ཅིག་རྣམ་པར་མི་རྟོག་པའི་ཏིང་ངེ་འཛིན་ལ་འབྱམས། དེ་སང་ནས་ཕྱིར་ཕེབས་ལམ་རྩེག་འོག་མ་རྣམས་སུ་སེམས་སྡེའི་མཁས་པ་ཉེར་གཅིག་སོགས་ལས་བྱིན་རླབས་ཞུས་ནས་སྒོར་ཕེབས་པའི་ཚེ་གཙུག་ལག་གི་སྒོ་དེར་མེ་ཆེན་པོ་ཞིག་འདུག་པ་དེར་ཞུགས་པས་གདོས་བཅས་ཀྱི་ཕྱི་ནང་ཐམས་ཅད་ཚིག་པའི་རྗེས་སུ་སྣང་བ་དེ་དག་འགགས་ནས་ལུས་འོད་ལུས་བི་མ་མི་ཏྲ་ཡིན་སྙམ་པ་དང་བདེ་སྟོང་ཟག་མེད་ཀྱི་ཡེ་ཤེས་མུ་མཐའ་མེད་པར་འབྱམས་སུ་ཀླས་ཏེ་རྫོགས་ཆེན་སེམས་སྡེའི་ཉེ་བརྒྱུད་ཐོབ། ཆུ་བྱི་ཟླ་བ་བཅུ་པའི་ནང་མནལ་ལམ་དུ་ཝ་སེངྒེ་བྲག་ཏུ་སྤང་མི་ཕམ་མགོན་པོ་མཇལ་ཞིང་གསོལ་བ་བཏབ་པས་བརྡ་བཞི་བསྟན་བྱུང་བས་ཀློང་སྡེའི་སྨིན་གྲོལ་ཚང་བར་ཐོབ་པའི་ངེས་ཤེས་སྐྱེས་ནས་ཀློང་སྡེའི་བཀའ་བབས་བརྙེས། ཉེར་གཅིག་པར་གཞོ་སྟོད་ཏི་སྒྲོར་གུ་རུ་ཡབ་ཡུམ་གྱིས་མཁའ་འགྲོ་སྙིང་ཐིག་དང་། གངས་རི་ཐོད་དཀར་དུ་ཀུན་མཁྱེན་ཆེན་པོས་མཁའ་འགྲོ་ཡང་ཏིག་གི་བྱིན་རླབས་བླ་མ་སྒྲུབ་པའི་དབང་དང་ཁྲིད་བཅས་གནང་བ་སོགས་ཀྱིས་མན་ངག་སྡེ་པདྨའི་བཀའ་བབས། ཆུ་ཡོས་ས་ཟླའི་ཚེས་བཅུ་གསུམ་ཉིན་འོ་ཡུག་སྡིང་མའི་ལམ་དུ་ཕེབས་པའི་ཆིབས་ཐོག་ཏུ། ཐོག་མར་སྣང་ཡུལ་ཐམས་ཅད་འོད་དམར་སེར་གྱིས་ཁྱབ་པས་ཐ་མལ་གྱི་རྟོག་པ་འགགས་ཏེ་ཕྱི་གོང་རྫའི་ར་བར་ཕེབས་ནས་ལྕེ་བཙུན་སེངྒེ་དབང་ཕྱུག་ལ་མཁའ་འགྲོ་མང་པོས་བསྐོར་བའི་གྲལ་དུ་འཁོད། འདས་རྗེས་ཞལ་ཆེམས་ཀྱི་ཚུལ་དུ་ལྕེ་བཙུན་སྙིང་ཐིག་སྩལ་པའི་སྔོན་གནས་རྗེས་སུ་དྲན། ཌཱ་ཀི་དཔལ་གྱི་བློ་གྲོས་ཀྱིས་བྱིན་ཀྱིས་བརླབས་པས་ཚིག་དོན་ཐམས་ཅད་ཕྱིས་ཡུན་རིང་མོར་སོང་ཡང་མི་བརྗེད་པར་བཀྲ་ལམ་མེར་ཐུགས་ལ་གནས་པར་བྱུང་བ་ནི་མན་ངག་སྡེ་བི་མའི་ལུགས་ཀྱི་བཀའ་བབས་བརྙེས་པའོ། །གཉིས་པ་བཀའ་གདམས་པ་ནི། བྱང་རྭ་སྒྲེང་དུ་ཕེབས་སྐབས་སྔ་རྗེས། ཇོ་བོ་འཇམ་པའི་རྡོ་རྗེ་དང་། འདྲ་ཐང་དབུ་ཡོན་མ་མཇལ་སྐབས་དེ་དང་དེར་དངོས་སུ་མཇལ་བའི་དག་སྣང་གསལ་བ་དང་། ཤུག་པའི་གསེབ་ཏུ་འབྲོམ་སྟོན་ཡབ་སྲས་རྣམས་བཞུགས་པས་གཞུང་གདམས་མན་ངག་བཅས་པའི་བཀའ་རྫོགས་པར་གཏད་པའི་གསལ་སྣང་བྱུང་། གསུམ་པ་ལམ་འབྲས་ནི། མང་མཁར་དུ་ཚར་ཆེན་གྱིས་བྱིན་གྱིས་བརླབས་ཤིང་། མྱུ་གུ་ལུང་སྒྲ་བསྒྱུར་རྒྱ་གར་ཕུག་ཏུ་འབྲོག་མི་ལོ་ཙཱས་གླེགས་བམ་ཞིག་དབུ་ཐོག་ཏུ་བཞག་ནས། རྒྱུད་ཀྱི་བཤད་བཀའ་འདིས་རྫོགས་པ་ཡིན་མན་ངག་རྗེས་སུ་འབྱུང་གསུང་། ཕྱིས་དགུང་ལོ་ཞེ་གཅིག་པར། ས་ཆེན་སྐུ་ཤིན་ཏུ་གསལ་བར་མཇལ་བའི་སྐུ་འོད་ཀྱི་རང་བཞིན་གྱི་ཐུགས་ཀའི་དབུས་སུ་འོད་ཀྱི་གོང་བུ་ཤེལ་སྔོན་པོའི་མཆོད་རྟེན་དབྱིབས་ལྟ་བུའི་སྟོད་ཆར་ཡང་དག་ལྷ་དགུ། བར་དུ་དགྱེས་རྡོར་ལྷ་དགུ། འོག་གི་ཆར་ཕུར་པ་གཙོ་རྐྱང་བཅས་སྐུ་དངོས་དང་མཚུངས་པར་གསལ་བའི་བླ་མ་ཡི་དམ་དབྱེར་མེད་ཀྱི་ཞལ་ནས་ཡང་ཕུར་དང་། ལམ་འབྲས་བསྐྱེད་རྫོགས་སྙིང་པོ་ཁྱད་པར་ཅན་སྩལ་པ་གསན། བཞི་པ་མར་པའི་བཀའ་བརྒྱུད་ནི། ལྷོ་བྲག་སྲས་མཁར་གྱི་མར་པའི་སྐུ་མཇལ་ཚེ་མར་པ་དངོས་ཀྱི་དག་སྣང་ཤར། དེ་ནུབ་མནལ་ལམ་དུ་ཡེ་ཤེས་མཁའ་འགྲོའི་རྡོ་རྗེའི་ཚིག་རྐང་ལ་གསུང་བཤད་མཛད་པ་གསན། གཞུང་སྤྲེ་ཞིང་དུ་ཕེབས་ལམ་ཆིབས་ཐོག་ནས་མངའ་བདག་མར་པ་སྐུ་དར་ཡོལ་ཞིག་མདུན་མཁར་བཞུགས་ནས་རྒྱུད་དང་གདམས་ངག་གི་སྙིང་པོ་སྩལ། རྔོག་ཆོས་རྡོར་ཡིན་པའི་གསལ་སྣང་ལམ་ཙམ་ཤར། བྱིན་རླབས་ཀྱི་ཟིལ་ཆེན་པོ་བྱུང་། གཞན་ཡང་སྔ་ཕྱིར། མཚུར་ཕུའི་དུས་མཁྱེན་ཕུག་གི་སྣང་བརྙན། ཕག་གྲུའི་འཇག་སྤྱིལ་གྱི་སྐུ་འདྲ། འབྲི་གུང་སྐྱོབ་པའི་གསེར་ཁང་མ། སྟག་ལུང་གཟིམས་སྤྱིལ་གྱི་ཐང་པ། ར་ལུང་རྒྱ་རས་ཀྱི་སྐུ་འབག་ཁམས་གསུམ་ཟིལ་གནོན་རྣམས་འཇལ་སྐབས་དད་མོས་དྲག་པོ་རེས་རྐྱེན་བྱས་ཏེ་སོ་སོའི་སྐུར་དངོས་སུ་འཇལ་བ་དང་བྱིན་རླབས་ཀྱི་བབས་ཆེན་པོ་རེ་བྱུང་ཞིང་། སྔ་རྗེས་འགའ་ཞིག་ཏུ་རས་ཆུང་རྡོར་གྲགས་ཡིན་པའི་གསལ་སྣང་འལ་འོལ་ཤར་གསུངས། ལྔ་པ་ཤངས་ཆོས་ནི། དགུང་ལོ་བཅོ་ལྔ་པའི་ཐོག་གྲུབ་ཆེན་ཐང་རྒྱལ་ལས་ཕྱག་ཆེན་གྭའུ་མ། བོགས་འདོན་ནི་གུ་ཆོས་དྲུག་གསན། ཕྱིས་ཞང་ཞུང་གི་ཁྱུང་པོའི་འདྲ་ཞལ་མཇལ་སྐབས། དབུ་སྟེང་དུ་གདུགས་ལྟ་བུའི་འོད་སྔོན་པོའི་ནང་དུ་རྒྱུད་སྡེའི་ལྷ་ཚོགས་མང་པོ་སྟོང་གཟུགས་ལྟ་བུར་ལམ་གྱིས་ཤར། མཐར་འདྲ་སྐུ་རིན་པོ་ཆེར་ཐིམ་པའི་ཞལ་ནས། ཨེ་ཝཾ་མཱ་ཡཱ་ཧོཿཞེས་པའི་སྔགས་ཀྱི་བརྡ་དང་། ཐུགས་ཀ་ནས་འོད་ཟེར་རང་ལ་ཐིམ། ཤངས་ཆོས་ཀྱི་བག་ཆགས་གསལ་པོར་སད། དྲུག་པ་ཞི་གཅོད་ནི། རྩི་ཁོག་དམ་པའི་སྒྲུབ་ཕུག་ཏུ་ཚོགས་མཆོད་མཛད་པའི་ཚེ། སྒྲུབ་ཕུག་དེ་འོད་ཀྱི་རང་བཞིན་དུ་གྱུར་པའི་མདུན་མཁར་དམ་པ་སངས་རྒྱས་ཉིད་ཆ་ལུགས་ཉི་འདེ་མའི་རྣམ་པར་བཞུགས་པ་མཇལ། ཞི་བྱེད་སྐོར་གྱི་མན་ངག་དགོངས་པ་གཏོད་པའི་ཚུལ་གྱིས་གནང་བའི་མཐར་ཨོ་རྒྱན་པདྨ་སམ་བྷ་ཝར་གནས་གྱུར་ནས་སྙན་བརྒྱུད་སྐོར་གསུངས་པ་ཐུགས་ལ་བཀྲ་ལམ་གྱིས་ཤར་བ་དང་། ཟངས་རི་མཁར་དམར་དུ་མ་ལབ་སྒྲོན་གྱི་འདྲ་སྐུ་མཇལ་སྐབས་ཞལ་བཞད་ཅིང་སྐུ་གཡོ་འགུལ་མཛད་པས་དངོས་སུ་ས་གཡོ་བ་ལྟ་བུ་ཐམས་ཅད་ཀྱིས་ཚོར་བ་བྱུང་། བྱིན་རླབས་ཀྱི་ཟིལ་ཆེན་པོ་ཐོབ་པས་གདམས་པའི་སྙིང་པོ་ཐུགས་ལས་བརྡོལ། བདུན་པ་རྡོ་རྗེའི་རྣལ་འབྱོར་ནི། སྔར་དུས་ཞབས་པ་ཆེན་པོ་རྗེ་བཙུན་བློ་གྲོས་མཐའ་ཡས་དང་། ཞྭ་ལུ་བློ་གསལ་བསྟན་སྐྱོང་ལས་ཇོ་ལུགས་དང་བུ་ལུགས་གསན་པའི་སྐབས་སོ་སོར་བྱིན་རླབས་ཀྱི་བབས་ཆེན་པོ་ཐོབ་པ་དང་ཁྱད་པར་ཇོ་ནང་སྐུ་འབུམ་ཆེན་མོ་མཇལ་བར་ཕེབས་སྐབས། མཁའ་འགྲོའི་རིགས་ཅན་གྱི་བུད་མེད་གཅིག་གིས་སྣ་དྲངས་ནས་ཐོག་མར་ཕེབས་སྐབས་དེ་ལས་རློན་ཟིལ་ལྟ་བུ་ཞིག་སྐུ་ལུས་ལ་ཕོག་པའི་རྐྱེན་གྱིས་བདེ་སྟོང་གི་ཉམས་མུ་མཐའ་མེད་པ་སྐྱེས་པས་རྐྱེན་བྱས། ས་ཕྱོགས་ཐམས་ཅད་དག་པའི་ཞིང་ཁམས་ལྟ་བུ་དང་། ཆོས་རྒྱལ་རིགས་ལྡན་བརྒྱུད་པ་དང་བཅས་པ་དངོས་སུ་མཇལ་བའི་གསལ་སྣང་ཤིན་ཏུ་བརྟན་པའི་མཐར། ནམ་མཁའ་ནས་ཨེ་ཝཾ་གྱི་སྔགས་སྒྲ་ཞིག་གསན་པས་རྒྱུད་དང་མན་ངག་གི་སྙིིང་པོ་ཐུགས་ལ་ལམ་ལམ་འཆར་བ་བྱུང་། བརྒྱད་པ་བསྙེན་སྒྲུབ་ནི། ཨོ་རྒྱན་པའི་དུས་སུ་རྟོགས་ལྡན་ཟླ་བ་སེང་གེ་ཡིན་པའི་ཐུགས་ཤེས་ཤིན་ཏུ་གསལ་བའི་བག་ཆགས་ཀྱིས་ཨོ་རྒྱན་བསྙེན་སྒྲུབ་སྐོར་ཨི་ཐོབ་ཀྱི་ཐུགས་འདུན་བསྟར་ཆགས་སུ་བྱུང་བའི་སྐབས་ཤིག་མནལ་ལམ་དུ། དང་པོ་རྗེ་རང་བྱུང་རྡོ་རྗེ་ལམ་ཙམ་གསལ། སླར་གྲུབ་ཐོབ་ཨོ་རྒྱན་པ་ཡིན་པའི་ཕྱག་ཏུ་པུསྟི་ཞིག་བསྣམས་པ་རྗེ་ཉིད་ཀྱི་དབུ་ལ་བཞག་ནས་བྱིན་གྱིས་བརླབས་པ་ཞིག་བྱུང་ནས་མི་རིང་བར། རྒྱལ་དབང་བཅུ་བཞི་པ་ལས་འདིའི་གདམས་ངག་རྫོགས་པར་གསན་གྲུབ་པར་བྱུང་བས་སྐལ་པ་བཟང་པོར་གྱུར་གསུངས་པས་མཚོན་ནོ། །ཐུན་མོང་མ་ཡིན་པ་རྫོགས་ཆེན་སྡེ་གསུམ་གྱི་ལུང་བྱང་ལས། བཀའ་ནས་བཀའ་བརྒྱུད་བར་མ་ཆད༔ཟབ་མོ་དངོས་དང་དགོངས་པའི་གཏེར༔ཡང་གཏེར་རྗེེས་སུ་དྲན་པའི་གཏེར༔དག་སྣང་སྙན་དུ་བརྒྱུད་པ་ཡི༔བཀའ་བབས་བདུན་གྱི་ཆུ་བོ་ནི༔མངའ་བདག་ཡབ་སྲས་སྐལ་བར་བབས༔སྙིགས་དུས་བསྟན་པའི་བཙས་ཆེན་བྱེད༔ཟབ་རྒྱས་ཉི་འོད་ལྷག་པར་བརྡལ༔ཞེས་སོགས་བསླུ་མེད་རྡོ་རྗེའི་ལུང་གིས་བསྔགས་པ་ལྟར་བཀའ་བབས་བདུན་གྱི་དང་པོ་གསང་སྔགས་གསར་རྙིང་གཉིས་སུ་གྲགས་པ་རྣམས་བཀའ་ནས་བཀར་བརྒྱུད་པའི་བཀའ་བབས་བརྙེས་ཚུལ་ནི། དགུང་གྲངས་བཅུ་དྲུག་པའི་ས་ག་ཟླ་བའི་ཚེས་བཅུའི་ཐོ་རངས་དག་པའི་སྣང་བར་རྔ་ཡབ་པདྨ་འོད་དུ་ཕེབས། དེའང་བྲག་རི་ལྷུན་ཆགས་པའི་ཕུག་པའི་ནང་དུ་སྤྲིན་དཀར་ཤིན་ཏུ་མཛེས་པའི་ཁྲོད་ན་གུ་རུ་མཚོ་སྐྱེས་རྡོ་རྗེ་མཁའ་འགྲོའི་ཚོགས་ཀྱིས་བསྐོར་བའི་བཀོད་པ་ཅན་མཇལ། དགོངས་པས་བྱིན་གྱིས་བརླབས་ཤིང་བརྡ་ཡི་དབང་བསྐུར་བ་དང་བཀའ་བབས་བདུན་འབྱུང་བའི་དབུགས་དབྱུང་རྒྱས་པར་སྩལ་པའི་མཐར་སྤྱན་ལྟ་ལྟངས་དང་བཅས་ཏེ། གཟུང་བའི་ཡུལ་གྱིས་མ་གོས་ཤིང་། །འཛིན་པའི་རྟོག་པས་མ་བསླད་པ། །རིག་སྟོང་རྗེན་པར་བསྐྱངས་པ་ནི། །སངས་རྒྱས་ཀུན་གྱི་དགོངས་པའོ། །ཞེས་གསུངས་ཏེ་འཁོར་དང་བཅས་པ་རྗེ་ཉིད་ལ་ཐིམ་པས་ཐུགས་ཡིད་དབྱེར་མེད་དུ་འདྲེས་པའི་ཉམས་ཤར་ཏེ་གནས་ལུགས་ལ་བརྟན་པ་ཐོབ། དེ་ལ་ཐུགས་སྤྲོ་བ་དང་བརྟས་ནས་གསོལ་འདེབས་ཡང་ཡང་མཛད་པས་མདོ་རྒྱུད་བཀའ་གཏེར་གསར་རྙིང་གི་སྨིན་གྲོལ་རྒྱབ་རྟེན་བཅས་རྒྱུན་ཤིན་ཏུ་དཀོན་པ་རྣམས་ཀྱང་འབད་མེད་དུ་རྙེད་ནས་བསྟན་པའི་མེ་རོ་རྨང་ནས་གསོ་བར་མཛད་པ་སྟེ་ཞིབ་པར་གོང་དུ་བསྟན་པ་དང་རྣམ་ཐར་ཆེན་མོ་སོགས་ལས་གསལ་ལོ། །གཉིས་པ་ས་གཏེར་ནི། གཙོ་བོ་གཙང་གཡས་རུ་རྩིས་ཀྱི་ལྷ་ཁང་དུ་བཞུགས་པའི་རྩ་གསུམ་བཀའ་འདུས་ཆེན་མོ་ཡིན་ནའང་ཕྱག་ཏུ་སྨིན་པ་མ་བྱུང་། གཞན་བྲག་དམར་མགྲིན་བཟང་ནས་ཐུགས་རྗེ་ཆེན་པོ་སེམས་ཉིད་ངལ་གསོའི་སྐོར། འདམ་ཤོད་སྙིང་དྲུང་ནས་བླ་མ་སྐུ་བཞིའི་སྒྲུབ་སྐོར། སེང་ངུ་གཡུ་མཚོ་ནས་ཐུགས་སྒྲུབ་རྡོ་རྗེ་དྲག་རྩལ་དང་། ཏནྟྲ་སྡེེ་བཅོ་བརྒྱད་ཀྱི་རྩ་བ་འདུས་པ་རྩ་གསུམ་སྒྱུ་འཕྲུལ་དྲྭ་བ། ཞི་ཁྲོ་ཕུག་པ་ནས་གྲོལ་ཏིག་སྐོར་གསུམ། ཁྱུང་ཙང་བྲག་ནས་རྩ་གསུམ་བཀའ་འདུས་ཆ་ལག་རྗེ་འབངས་ཉེར་ལྔ་སོ་སོའི་སྒྲུབ་ཐབས། པདྨ་ཤེལ་རི་ནས་རྩ་གསུམ་སྤྱི་འདུས། རྩི་རྐེ་ནོར་བུ་སྤུན་གསུམ་ནས་ཐུགས་སྒྲུབ་ཡིད་བཞིན་ནོར་བུས་མཚོན་མང་ཞིང་ཕྱག་ཁར་འབྱོར་ནའང་བོད་ཁམས་སྤྱི་མཐུན་གྱི་བསོད་ནམས་དང་རྩ་བའི་རྟེན་འབྲེལ་གྱི་དབང་གིས་ཐུགས་སྒྲུབ་ཡིད་ནོར་ཙམ་ལས་གཞན་རྣམས་རྫོགས་པར་གཏན་ལ་དབབ་མ་གྲུབ་ཅིང་ཕལ་ཆེར་ཡང་གཏེར་དུ་སྦས་པར་མངོན་ནོ། །གསུམ་པ་དེ་ལས་འཕྲོས་པའི་ཡང་གཏེར་ནི། དོན་འགྲུབ་ས་ལུག་ལོར་གུ་རུ་རིན་པོ་ཆེ་གཏེར་སྟོན་སངས་རྒྱས་གླིང་པའི་སྐུར་སྣང་བས་གླེགས་བམ་སྩལ་ཅིང་བྱིན་གྱིས་བརླབས་པའི་དག་སྣང་ཁྱད་པར་ཅན་གྱི་སྒོ་ཕྱེས་ཏེ་གཏེར་སྟོན་རྣམས་ཀྱི་རྣམ་ཐར་དང་གཏེར་ཆོས་གང་བཞུགས་ཐུགས་ལ་གསལ་ཞིང་དེ་དག་བཀའ་བབས་པའི་བཀའ་ལུང་ཐོབ་པ་ལྟར། ཕལ་ཆེར་སྔར་གྱི་གཏེར་སྟོན་སོ་སོས་ཡང་གཏེར་དུ་སྦས་པའི་ཤོག་སེར་རྣམས་ཡེ་ཤེས་ཀྱི་མཁའ་འགྲོས་ཕུལ་བ་བརྡ་བསྒྱུར་བ་དང་། འགའ་ཞིག་བརྡ་ཡིག་སྤྱན་ལམ་དུ་ཤར་བ་དང་། དགོངས་པའི་ཀློང་དུ་རྩོལ་མེད་རང་གསལ་བ་ཉིད་གཏན་ལ་ཕབ་ཅིང་། དེ་དག་གི་སྐབས་སུ་གུ་རུ་རིན་པོ་ཆེ་དངོས་དང་གཏེར་སྟོན་སོ་སོའི་སྐུའི་རྣམ་པར་བསྒྱུར་ནས་སྨིན་གྲོལ་ཆིག་རྫོགས་སུ་སྩལ་པའི་ཚུལ་ངོ་མཚར་རྨད་དུ་བྱུང་ཞིང་ཕལ་ཆེར་གཏན་ལ་ཕབ། གཞན་ཡང་གཏེར་རྙིང་རྒྱུན་དཀོན་གྱི་རིགས་བྱིན་རླབས་ཉེ་བརྒྱུད་ཀྱིས་གཏན་ལ་འབེབས་པར་མཛད་དོ། །བཞི་པ་ཟབ་མོ་དགོངས་གཏེར་ནི། དགུང་གྲངས་བཅོ་ལྔ་པར་གྲུབ་ཆེན་ཐང་སྟོང་རྒྱལ་པོས་བྱིན་གྱིས་བརླབས་པ་ལ་བརྟེན་ནས་གྲུབ་ཐོབ་ཐུགས་ཐིག་གི་ཆོས་སྐོར་དང་། ཉེར་གཉིས་པར་གུ་རུ་མཚོ་སྐྱེས་རྡོ་རྗེས་བྱིན་གྱིས་བརླབས་པས། བླ་སྒྲུབ་སྐོར་གསུམ་གྱི་གསང་སྒྲུབ་མཚོ་སྐྱེས་སྙིང་ཐིག་གི་ཆོས་སྐོར་བྱོན། སོ་ལྔ་པར་འཕགས་མ་ཡིད་བཞིན་འཁོར་ལོས་ཞལ་གཟིགས་ཤིང་འཆི་མེད་གྲུབ་པའི་སློབ་དཔོན་རྣམ་གསུམ་གྱིས་བྱིན་གྱིས་བརླབས་པ་ལ་བརྟེན་འཕགས་མ་སྙིང་ཐིག་གི་ཆོས་སྐོར་རྣམས་བྱོན་ནོ། །ལྔ་པ་དེ་ལས་འཕྲོས་པའི་རྗེས་དྲན་ནི། གོང་དུ་སྨོས་པ་ལྟར་ལྕེ་བཙུན་ཆེན་པོ་འོད་ལུས་སུ་གཤེགས་པའི་གནས་དུས་ཇི་ལྟ་བ་རྗེས་སུ་དྲན་ནས་ལྕེ་བཙུན་སྙིང་ཐིག་དང་། ལང་གྲོ་དཀོན་མཆོག་འབྱུང་གནས་ཀྱི་སྔོན་གནས་རྗེས་སུ་དྲན་པའི་ཚེ་སྒྲུབ་བཻ་རོའི་ཐུགས་ཏིགསེང་གདོང་དཀར་མོའི་བཅུད་ལེན་སོགས་སྣང་བར་མཛད་དོ། །དྲུག་པ་དག་སྣང་ནི། འཆི་མེད་ཐུགས་ཏིག་གི་ཚེ་ཡུམ་ཙནྡྲ་ལཱིའི་གདམས་སྐོར་དང་། ཀློང་སྙིང་བླ་སྒྲུབ་ཐིག་ལེའི་རྒྱ་ཅན་གྱི་ཡིག་ཆ། མཆོག་གླིང་བླ་སྒྲུབ་སྐུ་གསུམ་རིགས་འདུས་ཀྱིས་མཚོན་མང་དུ་བཞུགས་པར་སྣང་། བདུན་པ་དེ་མཐུན་སྙན་བརྒྱུད་ནི། དགུང་གྲངས་བརྒྱད་པའི་ཐོག་གུ་རུ་རིན་པོ་ཆེ་ཡབ་ཡུམ་གྱིས་བྱིན་གྱིས་བརླབས་ཤིང་མཚོ་རྒྱལ་གྱིས་ཡང་ཕུར་སྦྲགས་མའི་སྙན་བརྒྱུད་སྩལ་པ་དང་། ཁྱད་པར་དགུང་གྲངས་ཞེ་བརྒྱད་བཞེས་པ་མེ་ཡོས་ཟླ་བ་གསུམ་པའི་ནང་། རྫོང་ཤོད་བདེ་གཤེགས་འདུས་པའི་སྒྲུབ་གནས་སུ་བཞུགས་སྐབས་དག་པའི་སྣང་བར་མཆོད་རྟེན་བདེ་བྱེད་བརྩེགས་པའི་དྲུང་དུ་ཕེབས། དེའི་ཕྱོགས་མཚམས་བརྒྱད་དབུས་དང་དགུར་གུ་རུ་མཚན་བརྒྱད་ཀུན་འདུས་གུ་རུ་རིན་པོ་ཆེ་དང་དགུར་སྣང་བར་མཛད་ནས། རྒྱུད་སྒྱུ་འཕྲུལ་ཞི་ཁྲོ། སྒྲུབ་ཆེན་བཀའ་བརྒྱད་ཀྱི་གཞུང་གདམས་ངག་སོ་སོར་གསན། སློབ་དཔོན་ཆེན་པོས་ལུང་ཨ་ནུ་དང་། རྫོགས་ཆེན་ཨ་ཏིའི་གདམས་པ་རྣམས་ཀྱང་སྩལ་པ་ལས། ཕྱིས་བཀའ་བརྒྱད་ལས་འཇིག་རྟེན་ལས་འདས་པ་ལྔ་དང་། མ་མོ་རྦོད་གཏོང་རྣམས་གཏན་ལ་དབབ་པར་མཛད་དོ། །གོང་སྨོས་ས་གཏེར་སོགས་རེ་རེ་ལའང་། ལུང་བསྟན། ཁ་བྱང་བབས་ཚུལ། སྐུལ་བྱང་། དངོས་གཏེར་སོགས་བཞེས་པའི་སྐབས་དང་། གཏེར་སྒྲུབ་སོགས་ཀྱི་སྐབས་གཟིགས་སྣང་དང་སྨིན་གྲོལ་གསན་པའི་ཚུལ། ཆོས་ཚན་གྱི་བཞུགས་བྱང་སོགས་མཐའ་ཡས་པའི་ཕྱིར་འདིར་ཡི་གེར་འདྲེན་པར་མ་ནུས་ལ། དེར་མ་ཟད་ཟབ་ལམ་གྱི་བཀའ་བབས་ཀྱང་བརྙེས་ཚུལ་བཅས་རྩ་བའི་རྣམ་ཐར་ཆེན་མོ་ལས་ཤེས་པར་བྱ་ཞིང་མཐར་དགུང་གྲངས་དོན་གསུམ་པར་སྤྲུལ་གཞི་རི་བོ་རྩེ་ལྔར་པཎ་ཆེན་བི་མ་ལའི་ཐུགས་ཀར་བསྡུས་ཤིང་། ངོ་མཚར་སྤྲུལ་པའི་ཟློས་གར་གྱིས་རིས་མེད་བསྟན་འགྲོའི་དོན་རླབས་པོ་ཆེ་མཛད་པའི་བསླུ་མེད་རྡོ་རྗེའི་ལུང་གིས་མངོན་རྟགས་ཀྱང་མངོན་དུ་གསལ་བཞིན་པ་འདིའོ། །ཨེ་མ་འཕགས་བོད་མཁས་གྲུབ་ཆེས་མང་ཡང་། །ཀུན་མཁྱེན་བླ་མའི་རྣམ་ཐར་དཔོག་ནུས་སུ། །མཁའ་ངོས་གསལ་བྱེད་ཕྲེང་བས་མཛེས་མོད་ཀྱི། །ཉིན་མོར་བྱེད་པའི་དཔལ་དེ་གཉིས་པ་མིན། །རིས་སུ་མ་ཆད་ལྷར་བཅས་སྐྱེ་དགུའི་མགོན། །ཕྱོགས་སུ་མ་ལྷུང་ཐུབ་བསྟན་ཡོངས་ཀྱི་བདག །ཐུན་མོང་མ་གྱུར་རྣམ་ཐར་བསམ་མི་ཁྱབ། །བརྗོད་འདོད་མ་ཡིན་དོན་གྱི་སངས་རྒྱས་དངོས། །མཚན་ཐོས་ཙམ་གྱིས་གདུལ་བྱ་སྨིན་མཛད་ཅིང་། །དྲན་པ་ཙམ་གྱིས་ཡིད་ལ་ཡེ་ཤེས་སྐྱེད། །ཡིད་བཞིན་ནོར་མཆོག་ཕལ་དང་འདི་མི་མཚུངས། །དེ་སླད་བརྗོད་པ་འདི་ཡང་དོན་ལྡན་ཉིད། །ཚུལ་དེ་ལྟ་བུའི་ངོ་མཚར་རྨད་དུ་བྱུང་བའི་གསང་བ་ཟབ་མོས་གཏན་ལ་དབབ་པར་མཛད་པའི་ངེས་གསང་སྙིང་པོའི་བཀའ་ཡི་སྡུད་པ་པོར་གསང་བདག་རྡོ་རྗེ་ཆོས་ཉིད་སླར་ཡང་སྙིགས་འགྲོའི་མགོན་དུ་བཞེངས་ནས། སྔོན་མེད་མཛོད་ལྔའི་ཤིང་རྟའི་ལམ་སྲོལ་གསར་དུ་འབྱེད་པ་པོ་ཀུན་མཁྱེན་པདྨ་གར་དབང་བློ་གྲོས་མཐའ་ཡས་སམ་འཆི་མེད་བསྟན་གཉིས་གཡུང་དྲུང་གླིང་པ་ནི། མདོ་སྡེ་དུ་མ་ནས་རྫོགས་པའི་སངས་རྒྱས་ཀྱིས་ལུང་བསྟན་པའི་སྐྱེས་བུ་ཡིན་ཏེ། ཏིང་འཛིན་རྒྱལ་པོ་ལས། གང་གི་ལག་ན་ཏིང་འཛིན་མཆོག་ཡོད་པ། །རྒྱལ་བ་བྱམས་པ་གྲགས་པ་མཐའ་ཡས་བཞིན། །སེམས་ཅན་ཀུན་གྱི་དོན་རབ་བྱེད་འགྱུར་ཞེས། །བློ་གྲོས་མཐའ་ཡས་དེ་ནི་ངས་ལུང་བསྟན། །ཞེས་དང་། ཡེ་ཤེས་ཕྱག་རྒྱའི་མདོ་ལས། འདི་དང་ལྡན་པར་འདྲེན་པར་འགྱུར་ཏེ་བློ་གྲོས་མཐའ་ཡས་བློ་གྲོས་མཆོག །ཕྱོགས་བཅུའི་སངས་རྒྱས་བྱེ་བ་ཕྲག་བརྒྱ་མར་པོ་དག་གི་དགོངས་པར་འགྱུར། །མདོ་སྡེ་བརྒྱ་ཡི་ཚུལ་དག་ཤིན་ཏུ་རབ་འབྱེད་བསམ་ཡས་དཔག་མེད་དེ། །མདོ་སྡེ་འདི་ལ་རབ་ཏུ་སྦྱོར་བ་མི་ཟད་གཟུངས་ཐོབ་རྙེད་པར་འགྱུར། །ཞེས་དང་། ལང་གཤེགས་ལས། དེ་ཡི་འོག་ཏུ་བྱས་དུས་ལ། །འདྲེན་པ་བློ་གྲོས་ཞེས་བྱ་བ། །ཤེས་བྱ་ལྔ་རྣམས་སྟོན་པ་པོ། །དཔའ་བོ་ཆེན་པོ་འབྱུང་བར་འགྱུར། །ཞེས་དང་། ཕལ་པོ་ཆེ་ལས། ཡོན་ཏན་རྒྱ་མཚོ་རྣམས་ཀྱི་ཡེ་ཤེས་ཟབ། །མཐའ་དང་དབུས་མེད་དེས་ནི་ཞིང་ཀུན་ཁྱབ། །སེམས་ཅན་བསམ་ལ་སྦྱོར་བ་ཇི་བཞིན་སྣང་། །རྣམ་པར་སྣང་མཛད་ཆོས་ཀྱི་འཁོར་ལོ་འོ། །ཞེས་དང་། སྔ་འགྱུར་སྒྱུ་འཕྲུལ་ཀལྤ་དུམ་བུའི་རྒྱུད་ལས། འཇིག་རྟེན་ཁ་བ་ཅན་ཞེས་སུ༔པདྨའི་སྙིང་པོ་ཀུན་དགའ་དང༔བློ་གྲོས་བཻ་རོ་ཙཱ་ཱན་མཆན་མཐའ་ཡས་ལ་སོགས་པས༔འཛིན་པས་བསྟན་པ་རྒྱས་པར་འགྱུར༔ཞེས་དང་། གཏེར་ཆེན་པདྨ་གླིང་པའི་ལུང་བསྟན་ལས། ལྕགས་རྟ་ལོ་ལ་མཐའ་དམག་བོད་དུ་བརྡོལ༔ང་ཡི་སྤྲུལ་པ་དགེ་སློང་བློ་གྲོས་མིང༔ཁམས་ཕྱོགས་གསེར་ལྡན་འབབ་པའི་འགྲམ་ནས་འབྱུང༔སྨོན་ལམ་དབང་གིས་དུས་ཀྱི་འཁྲུགས་པ་ཟློག༔ལྕགས་ལུག་ལོ་ལ་སྐྱིད་པའི་ཉི་མ་ཤར༔ཞེས་དང་། གཞན་ཡང་གུ་རུའི་གཏེར་ལུང་ལས། བཻ་རོའི་སྤྲུལ་པ་བློ་གྲོས་མིང༔འཆད་རྩོམ་མཐའ་ཡས་བཀའ་བབས་འབྱུང༔ཞེས་དང་། ཁྱད་པར་འཕགས་པའི་སྐྱེས་བུ་ནི༔དགེ་སློང་ཀུན་དགའི་སྤྲུལ་པ་སྟེ༔བློ་གྲོས་རྒྱ་མཚོ་ལྟ་བུ་ཡི༔ཤེས་བྱ་མཐའ་ཡས་ཅན་དུ་འབྱུང༔འབུམ་ཕྲག་ལྔ་ཡི་འགྲོ་བ་འདྲེན༔གང་མཇལ་ཐར་པའི་ལམ་བྱེད་འགྱུར༔མཐའ་མི་དབུས་སུ་མི་ཉེ་བའི༔བརྟུལ་ཞུགས་སྤྱོད་པ་རྒྱུད་དུ་སྐྱོང༔སྐུ་ཚེ་མཐར་ཕྱིན་འགྲོ་དོན་མཛད༔ཅེས་སོགས་གཏེར་ཁ་གསར་རྙིང་དུ་མ་ནས་རྡོ་རྗེའི་ལུང་གིས་བསྔགས་ཤིང་། དོན་དུ་གསང་བ་གྲུབ་པའི་རྒྱུད་ལས། འདི་ཡི་སྡུད་པར་བྱེད་པ་པོ། །གཞན་དག་ཡོད་པ་མ་ཡིན་ཞེས། །བདག་ཉིད་འབའ་ཞིག་སྨྲ་བར་བྱེད། །རྒྱུད་མཛད་པ་ནི་ཐུགས་རྡོ་རྗེ། །ཞེས་དང་། ཡེ་ཤེས་ཐིག་ལེ་ལས། ལྟ་བ་ཀུན་ནི་བསྲུང་དོན་ཕྱིར། །སྣ་ཚོགས་པ་ཡི་གཟུགས་སུ་སྤྱོད། །ལ་ལར་རྡོ་རྗེ་འཛིན་པ་དང་། །ལ་ལར་སངས་རྒྱས་ཀྱི་ནི་གཟུགས། །ལ་ལར་ཧེ་རུ་ཀ་ཡི་གཟུགས། །ལ་ལར་དེ་བཞིན་གཤེགས་པ་དང་། །ལ་ལར་བྱང་ཆུབ་སེམས་པའི་གཟུགས། །ལ་ལར་ཉན་པ་ལྟ་བུར་བཞུགས། །ལ་ལར་འཆད་དོ་དགྱེས་པདྨ། །ལ་ལར་ཀློག་པའི་ཚུལ་དུ་བཞུགས། །ལ་ལར་རྒྱུད་དང་བསྟན་བཅོས་ནི། །མཛད་པ་དང་ནི་ལ་ལར་འཛིན། །མང་དུ་བརྗོད་ལྟ་ཅི་ཞིག་དགོས། །དེ་སྟོན་ཕྱག་ན་རྡོ་རྗེ་རྒྱལ། །ཞེས་བསླུ་མེད་རྡོ་རྗེའི་ལུང་དོན་གསལ་བོར་གྲུབ་པ་བཞིན། ཀུན་བཟང་ཆོས་ཀྱི་སྐུ་ཉིད་དབྱིངས་ནང་གསལ་ཆེན་པོ་ལས་མ་གཡོས་བཞིན་དུ། རང་རྩལ་འགགས་པ་མེད་པའི་རང་མདངས་རྣམ་པར་སྣང་མཛད་གངས་ཅན་མཚོར་བཞེངས་ནས། རྒྱུད་དག་པའི་སེམས་དཔའ་སོགས་གདུལ་བྱ་མཐའ་ཡས་པའི་རང་སྐལ་དང་འཚམ་པར། ཕྱེད་སྣང་དང་། རང་བཞིན་དང་། འགྲོ་བ་འདུལ་བའི་སྤྲུལ་པའི་བཀོད་པ་འབྱམས་སུ་ཀླས་པ་ལས། གསང་བདག་རྡོ་རྗེ་ཆོས། ཀུན་དགའ་བོ། ཨིནྡྲ་བྷཱུ་ཏི། ཆོས་རྒྱལ་ཟླ་བཟང་། རྒྱལ་པོ་ཛཿཨཱརྱ་དེ་ཝ། ནག་པོ་སྤྱོད་པ། ཤནྟི་གརྦྷ། ཐུ་མི་སམ་བྷོ་ཊ། ལོ་ཆེན་བཻ་རོ། ཀླུ་མེས་ཚུལ་ཤེ། ལོ་ཆེན་རིན་བཟང་། རྔོོག་བློ་ལྡན་ཤེས་རབ། བདེ་གཤེགས་ཟུར་པོ་ཆེ། རོང་ཟོམ་པཎྜི་ཏ། གྲྭ་པ་མངོན་ཤེས། བྱ་འདུལ་འཛིན། ཁྱུང་པོ་རྣལ་འབྱོར། ཙཱ་མི་སངས་རྒྱས་གྲགས། ཞང་བརྩོན་འགྲུས་གྲགས། རོག་དོལ་བ་དམར་ཞུར་པ། དཔལ་ཆེན་ཆོས་ཡེ། ས་སྐྱ་པཎ་ཆེན། གཡག་སྡེ་པཎ་ཆེན། ཀློང་ཆེན་རབ་འབྱམས། འབུམ་ཕྲག་གསུམ་པ། བོན་པོ་ལྷ་འབུམ་ར་ཤག་ཆེན་མོ། གྲུབ་ཐོབ་དངོས་གྲུབ། ཞིག་པོ་ཉི་སེང་། གུ་རུ་ཇོ་ཚེ། ཡེ་ཤེས་ཁྱུང་གྲགས། དབུས་པ་སངས་འབུམ། སྙེ་མདོ་ཀུན་དགའ་དོན་གྲུབ། རྡོ་རྗེ་གླིང་པ། ཀུན་སྐྱོང་གླིང་པ། བོ་དོང་པཎ་ཆེན། བཀའ་བཞི་པ་རཏྣ་བྷ་དྲ། བ་ཡོ་ཆོས་ཀྱི་བློ་གྲོས། མུས་ཆེན་སངས་རྒྱས་རིན་ཆེན། མཁས་གྲུབ་སོག་བཟློག་པ། མཆོག་ལྡན་མགོན་པོ། རྗེ་བཙུན་ཏཱ་ར་ནཱ་ཐ། རྩེ་ལེ་པདྨ་ལེགས་གྲུབ། སྨིན་གླིང་གཏེར་ཆེན། རང་སྟོན་པདྨ་བདེ་ཆེན་གླིང་པ། རྟའུ་རོག་རྗེ་གླིང་པ་སོགས་དག་པའི་སྐུའི་སྐྱེ་སྲིད་རིམ་དང་ཅིག་ཅར་གྱི་ཚུལ་དུ་སྣང་བར་མཛད་ནས། སྐུའི་སྐྱེ་སྲིད་སྔ་མ་གྲུབ་ཆེན་ཤེས་རབ་ཡར་འཕེལ་ཉིད་འཆི་སྲིད་ཆོས་སྐུའི་དགོངས་པ་མངོན་དུ་མཛད་པའི་རྗེས་ཐོབ་དེ་མ་ཐག་པར་སྙིང་རྗེས་གཟུགས་སྐུ་འགྲོ་བའི་དོན་དུ་བཞེངས་པ་སྟེ། དེ་ཡང་བྱའི་རིགས་ལ་གྲུབ་ཐོབ་བརྒྱད་བཅུ་འབྱུང་བར་ལུང་བསྟན་པ་ལྟར། རྗེ་བཙུན་མི་ལ་དང་། ཁྱུང་པོ་རྣལ་འབྱོར་སོགས་མཁས་གྲུབ་སྐྱེས་ཆེན་མཐའ་ཡས་པ་བྱོན་པའི་གདུང་ལས་ཡབ་ཁྱུང་པོ་བླ་མ་གཡུང་དྲུང་བསྟན་འཛིན་དང་། ཡུམ་བཀྲ་ཤིས་མཚོ་བྱ་བའི་སྲས་སུ་རབ་བྱུང་བཅུ་བཞི་པའི་ཆུ་མོ་བྱ་ཡི་ལོ་ཟླ་བ་བཅུ་པའི་ཚེས་བཅུའི་ཉི་ཤར་ལ་གནས་མཆོག་པདྨ་ལྷ་རྩེའི་མདུན་རོལ་དུ་ངོ་མཚར་བའི་ལྟས་དང་བཅས་ཏེ་ཡུམ་ལ་གནོད་པ་མེད་པར་སྐུ་འཁྲུངས། ཀ་ཁ་ཙམ་ཡང་མ་བསླབས་པའི་གོང་དགུང་གྲངས་བཞི་པའི་ཐོག་ནས་འཇམ་དཔལ་དཀར་པོའི་སྒྲུབ་ཐབས་རང་རྡོལ་དུ་གསུངས་པ་དང་། བྱིས་པའི་རྩེ་ར་ཚུན་དུ་དབང་བསྐུར་བ། ཆོས་བཤད་པ། ལྷ་ཁང་བཞེངས་པ། རང་ཉིད་གུ་རུའི་རྣམ་འཕྲུལ་དུ་ཞལ་གྱིས་བཞེས་པ་སོགས་དམ་པའི་རྣམ་ཐར་སྒྲིབ་མེད་དུ་གསལ། དགུང་གྲངས་བཅོ་ལྔ་པའི་ཐོག་དག་པའི་གཟིགས་སྣང་དུ་ནམ་མཁར་ཨོ་རྒྱན་རིན་པོ་ཆེ་ཟ་ཧོར་མའི་ཆས་ཅན་འོད་ཀྱི་དཀྱིལ་འཁོར་དམར་སེར་གྱིས་ཁྱབ་པའི་གཟི་བརྗིད་ཉི་འོད་ལྟར་འབར་བ་ལས་འོད་མེ་ལོང་ཙམ་ཞིག་བྱུང་ནས་སྐུ་ལུས་ལ་ཕོག་པས་ཐུགས་གཏད་མེད་དུ་སོང་། དེ་ལས་སད་ཙ་ན། བུད་མེད་འགས་ད་དུང་ནམ་མཁའ་ལ་ལྟོས་དང་སྲིད་པའི་རྒྱལ་མོ་དབུ་བརྒྱ་ཕྱག་སྟོང་བྱོན་འདུག་ཟེར་བ་དང་གཟིགས་པས་ནམ་མཁའ་འཇའ་ཚོན་གྱིས་གང་བའི་ནང་ན་སྐུ་ཅུང་ཟད་གསལ་ཉམས་བྱེད་པ་ཙམ་ལ་སད། དེ་ནས་བཟུང་དགོངས་གཏེར་གྱི་རིགས་དུ་མ་ཐུགས་ལས་བརྡོལ། བཅུ་དྲུག་པའི་ཐོག་སྦྱིན་བདག་ཁང་གསར་པའི་མཐུན་རྐྱེན་ཕྲན་བུ་དང་བཅས། ཞེ་ཆེན་སྒྲུབ་སྡེ་པདྨ་འོད་གླིང་དུ་པཎ་ཆེན་འགྱུར་མེད་མཐུ་སྟོབས་རྣམ་རྒྱལ་གྱི་ཞབས་པད་བསྟེན་ཅིང་། སྐུ་སྔོན་མ་གྲུབ་ཆེན་པའི་ཉེ་གནས་བླ་རྒན་ཨོ་རྒྱན་དཔལ་འབྱོར་གྱི་རྩར་བཞུགས། དེ་ནས་བཟུང་ལོ་དྲུག་གི་བར་དུ་པཎ་ཆེན་བླ་མ་མཆོག་ལས་ཕྱི་ཐ་སྙད་རིག་པ་ཡན་ལག་དང་བཅས་པ། ནང་ཐེག་པའི་རིམ་པ་དང་གྲུབ་མཐའ་རྒྱ་མཚོའི་རྣམ་བཞགགསང་བ་རྡོ་རྗེ་ཐེག་པ་ལམ་རིམ་པ་གཉིས་ཀྱི་མན་ངག་གི་སྐོར་སོགས་གསན་བསམ་མཐར་ཕྱིན་པར་མཛད། ཁྱད་པར་པཎ་ཆེན་བླ་མ་དེ་ཉིད་དུས་གསུམ་སྒྲིབ་མེད་དུ་གསལ་བའི་ཡེ་ཤེས་ཀྱི་གཟིགས་པ་ལ་ཆགས་ཐོགས་རྡུལ་ཙམ་ཡང་མི་མངའ་བས། ཕྱི་མཐར་གཟིགས་པའི་ལུང་བསྟན་ངོ་མཚར་བའི་དབུགས་དབྱུང་དང་བཅས། སྨད་འདུལ་སྔ་འགྱུར་པའི་སྡོམ་རྒྱུན་གྱིས་ཚིག་གསུམ་བར་མ་ཆོད་པའི་བསྙེན་རྫོགས་དང་། འདུལ་བའི་ལག་ལེན་ཞིབ་ཁྲིད། བཀའ་བརྒྱད་དང་འདོད་བུམ་གཙོ་བོར་གྱུར་བའི་གསང་ཆེན་སྨིན་གྲོལ་ཞལ་ཤེས་དམར་ཁྲིད་དང་བཅས་པ། དེ་དག་གི་རྒྱབ་རྟེན་དུ། བཀའ་འགྱུར། རྙིང་རྒྱུད། བླ་མ་དགོངས་འདུས། ཀུན་མཁྱེན་ཡབ་སྲས་ཀྱི་བཀའ་འབུམ། དོལ་པོའི་རི་ཆོས། རང་བྱུང་ཞབས་ཀྱི་ནང་དོན། སྨིན་གླིང་པའི་སྡོམ་གསུམ་སོགས་ཀྱིས་མཚོན་ཆོས་བཀའ་མཐའ་ཡས་པ་སྩལ་ཅིང་རྡོ་རྗེ་སློབ་དཔོན་དུ་མངའ་གསོལ་བའི་རྟེན་འབྲེལ་བཅས་བཤད་སྒྲུབ་ཀྱི་བསྟན་པ་གཏད། དེ་དག་གི་བར་མཚམས་རྣམས་སུ་དེར་བཞུགས་ཀྱི་མཁས་གྲུབ་དུ་མ་ལས་སྨིན་གྲོལ་བཤད་བཀའ་ཉམས་མྱོང་གོ་ཁྲིད་སོགས་ངོམས་མེད་དུ་གསོལ་བ་ལས་སྒྲུབ་ཆེན་བསྟན་འཕེལ་གྱིས་ཐུགས་ཆེན་བདེ་ཀུན་གྱི་དབང་བཞི་པའི་སྐབས་མེ་ལོང་ལ་བརྟེན་ནས་ངོ་སྤྲོད་ཞིབ་མོར་སྩལ་པས་གནས་ལུགས་ཀྱི་གོ་བའི་གཏིང་རྙེད། རི་བསྐོར་ལ་ཕེབས་སྐབས་སྔགས་རམས་པ་ཀུན་བཟང་གསང་སྔགས་ལ་བརྟེན་ནས་བདེ་སྟོང་ཕྱག་རྒྱ་ཆེན་པོ་གཉུག་མ་ལྷན་ཅིག་སྐྱེས་པའི་ཡེ་ཤེས་མངོན་དུ་གྱུར། གནས་འདིར་བཞུགས་རིང་བར་ཆད་ཀྱི་གཡུལ་ལས་རྒྱལ་བའི་རྟགས་མཚན་དང་དག་པའི་གཟིགས་སྣང་མཐའ་ཡས། ཁྱད་པར་གནས་ནང་དེར་གཏེར་རྟགས་དང་གཏེར་སྒོ་གསལ་བར་གཟིགས་ཀྱང་ཆེད་གཉེར་མ་མཛད་མོད། རྡོ་རྗེ་བེ་ཅོན་དང་ལྷ་མོའི་སྐོར་སོགས་དགོངས་གཏེར་གྱི་ཆོས་ཚན་ཆ་ཤས་གཏན་ལ་འབེབས་པར་མཛད་པ་བཅས་ཐོག་མའི་རྟེན་འབྲེལ་ལེགས་པར་འགྲིགས། དེ་ལྟར་ལོ་དྲུག་ཟིན་མཚམས་དེད་དཔོན་ཆེན་པོ་རྒྱ་མཚོ་ནས་དོན་ལེགས་པར་གྲུབ་པ་བཞིན་ལུང་རྟོགས་ཡོན་ཏན་གྱི་འབྱོར་པའི་སྐྱེས་ཚད་མེད་པ་དང་བཅས་གངས་རིའི་ཁྲོད་ཀྱི་ཤམ་བྷ་ལ་དཔལ་སྤུངས་ཡིད་དགའ་ཆོས་འཛིན་དུ་ཕྱག་ཕེབས། རྡོ་རྗེ་འཆང་པདྨ་ཉིན་བྱེད་དབང་པོས་ཐུགས་སྲས་ཀྱི་ཐུ་བོར་བཟུང་ནས། སླར་ཡང་སྟོད་འདུལ་ཁ་ཆེ་ལུགས་ཀྱི་སྡོམ་རྒྱུན་གྱིས་མཚོན་སྡོམ་པ་གསུམ་གྱི་རྒྱུད་སྡོམ་པ་སྔོན་དུ་འགྲོ་བས་ཟབ་རྒྱས་ཀྱི་གདམས་པ་རྒྱ་མཚོ་ལྟ་བུས་རྗེས་སུ་བཟུང་ཞིང་། རྗེ་ཆོས་ཀྱི་འབྱུང་གནས་ཀྱིས། རྒྱལ་དབང་བདུད་འདུལ་རྡོ་རྗེ་དང་། དེས་རྗེ་ཉིད་ལ་བསྟན་པ་གཏད་པ་བཞིན་ངེས་གསང་སྙིང་པོའི་བསྟན་པ་གཏད་ནས་དོན་གྱི་རྒྱལ་ཚབ་གཅིག་པུར་དབང་བསྐུར། གཞན་ཡང་རིས་མེད་ཀྱི་སྐྱེས་ཆེན་བརྒྱ་ཕྲག་ཕྱེད་ཀྱི་ཞབས་པད་བསྟེན་ནས། བོད་འདིར་ཡོངས་སུ་གྲགས་པའི་བཤད་རྒྱུན་འདེགས་པའི་ཀ་ཆེན་བཅུ་དང་། སྒྲུབ་བརྒྱུད་ཤིང་རྟ་བརྒྱད་རྗེས་འབྲང་དང་བཅས་པ་རིང་ལུགས་དེང་སང་རྒྱུན་གང་བཞུགས་ཐུགས་མཚོར་བསྐྱིལ། དེ་དག་ཀྱང་སྒྲུབ་པ་ཉམས་ལེན་གྱི་སྒོ་ནས་གཏན་ལ་ཕབ་སྟེ། གསར་རྙིང་གི་དཀྱིལ་འཁོར་ཆེན་པོ་བརྒྱ་ཕྲག་ཏུ་ཉེ་བའི་ལྗགས་བསྙེན་དང་། དེ་དག་གི་རྫོགས་རིམ་ཟབ་མོ་རྣམས་ཀྱི་ཉམས་བཞེས་མཐར་ཕྱིན་པར་མཛད་པས་སའི་སྟེང་ན་འགྲན་ཟླ་དང་བྲལ་བའི་མཁས་གྲུབ་ཆེན་པོར་གྱུར། དེ་དག་གི་སྐབས་སུ་དངོས་ཉམས་རྨི་ལམ་གྱི་ཚུལ་དུ་གྲུབ་པའི་མངོན་རྟགས་མཐའ་ཡས་པ་བྱུང་བ་ནི། རྗེ་ཉིད་ཀྱི་རྣམ་ཐར་ཞལ་གསུང་མར། ལར་འདི་སྐོར་ནས་དབང་ལུང་གསར་ཐོབ་དང་འདོན་བྱ་ཆེ་ཆུང་གང་བྱས་ཀྱང་དེའི་ལྟས་མཚན་རེ་རྒྱུན་དུ་འོང་བ་ཞིག་ཡོད་ཅེས་གསུངས་པས་མཚོན་ནུས་ལ། གུ་རུ་རིན་པོ་ཆེའི་གཏེར་ལུང་ནས་གསལ་བ་ལྟར་ངེས་གསང་སྙིང་པོའི་བསྟན་པའི་བཙས་གཅིག་པུར་དགོངས་པས་ཙཱ་འདྲ་རིན་ཆེན་བྲག་གི་སྒྲུབ་གནས་སུ་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་རྟེན་དང་བརྟེན་པར་བཅས་པ་གསར་བསྐྲུན་དང་། སྙིང་པོའི་སྒྲུབ་པ་པོ་རྒྱུན་འཇོགདེ་དག་གི་ཉམས་ལེན་གྱི་ཁྲིད་ཀ་སོགས་ཞིབ་པར་ཡང་ཁྲོད་དཀར་ཆག་ཆེན་མོར་གསལ་བ་དང་། རྫོང་ཤོད་བདེ་གཤེགས་འདུས་པའི་གནས་སུའང་ཕལ་ཆེར་དེ་མཚུངས། བོད་ཁམས་བདེ་བའི་ཕྱིར་མདོ་ཁམས་གནས་ཆེན་རྣམས་གཙོ་བོར་གྱུར་པར། སྔ་རྗེས་བཀའ་གཏེར་གྱི་སྒྲུབ་ཆེན་ཁོ་ནའང་བརྒྱ་ཕྲག་ཕྱེད་གཉིས་ལྷག་བཅས་མཚོན་ཨོ་རྒྱན་དུས་གསུམ་མཁྱེན་པའི་ལུང་དོན་བཞིན་བསྟན་འགྲོའི་བདེ་ཐབས་འབའ་ཞིག་ཏུ་བརྩོན་པའི་རྣམ་ཐར་གཅིག་པུའང་སུས་ཀྱང་འགྲན་བྱར་མ་གྱུར་ཞིང་། དེ་དག་གི་སྐབས་སུ་རྩ་བ་གསུམ་གྱི་ལྷག་པའི་ལྷས་ཞལ་སྟོན་པ་དང་དབང་བསྐུར་བྱིན་གྱིས་བརླབས་ཤིང་རྗེས་སུ་གདམས་པ་དང་ལུང་སྟོན་པ་སོགས་ཐུན་མོང་མ་ཡིན་པའི་གསང་བ་ཟབ་མོ་རྣམས་ཕལ་གྱི་སྤྱོད་ཡུལ་དུ་མི་འགྱུར་ནའང་། ངོ་མཚར་བའི་རྟགས་མཚན་ཀུན་གྱི་མཐུན་སྣང་དུ་གྲུབ་པར། སྔར་མཐོང་མ་མྱོང་བའི་འཇའ་འོད་ཀྱི་གུར་དང་མེ་ཏོག་གི་ཆར། དམ་རྫས་ར་ས་ཡ་ན་སྒྲུབ་པའི་དྲིས་རྒྱང་རིང་དུ་ཁྱབ་པ། ཉིན་མཚན་དུ་སྙིང་པོ་སྔགས་ཀྱི་རང་སྒྲ་དིར་དིར་དུ་སྒྲོགས་པ། བདུད་རྩི་ཁོལ་ཞིང་རཀྟ་ཕྱུར་བ། ཚོགས་འཁོར་གྱི་སྐབས་སུ་ཌཱ་ཀི་འདུ་རྟགས་བྱ་རྒོད་མང་པོ་ཚོགས་ལ་ལོངས་སྤྱོད་པ་སོགས་ཆེར་མང་ཞིང་། གཞན་ཡང་སྒྲུབ་ཁང་ལ་ཟང་ཐལ་དུ་གཤེགས་པ། རྡོ་ལ་ཕྱག་ཞབས་ཀྱི་རྗེས་འཇོག་པ། མངོན་ཤེས་སྒྲིབ་མེད་དུ་གསལ་བ། སྙིགས་དུས་ཀྱི་དམ་སྲི་གདུག་པ་ཅན་རྣམས་ཚར་གཅོད་པ་སོགས་གྲུབ་པའི་མངོན་མཚན་སྨོས་ཀྱིས་མི་ལང་། ཁྱད་པར་སྔོན་གྱི་སྨོན་ལམ་དུས་སུ་སྨིན་པའི་དབང་གིས་ཐུན་མིན་མཛོད་ལྔའི་བཀའ་བབས་ཚུལ་ནི། རིགས་ཀུན་ཁྱབ་བདག་ཀུན་མཁྱེན་རྡོ་རྗེ་གཟི་བརྗིད་རྩལ་དང་སྐུ་ཆུང་ངུའི་དུས་ནས་ཕན་ཚུན་ཕ་བུ་འཕྲད་པ་བཞིན་དུ་ཐུགས་ཤིན་ཏུ་ཉེ་བས་དབང་ཆོས་ཀྱི་བདུད་རྩི་སྟོབས་རེས་དང་། ཕྱིས་གོང་དུ་སྨོས་པ་བཞིན་སྒྲུབ་བརྒྱུད་བརྒྱད་དང་བཀའ་བབས་བདུན་གྱི་གསང་མཛོད་ཟབ་མོའི་སྒོ་དབྱེ་བའི་སྐབས་ལུང་ཟིན་རྩ་བའི་ཆོས་བདག་གཅིག་པུར་དགོངས་ནས་ཟབ་རྒྱས་ཀྱི་གདམས་པ་མཐའ་དག་བུམ་པ་གང་བྱོའི་ཚུལ་དུ་སྩལ་ཅིང་བསྟན་པ་གཏད། དེ་བཞིན་དུ་གོང་སྨོས་ལུང་གིས་གསལ་བ་བཞིན། ལྷ་སྲས་རྣམ་འཕྲུལ་སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པ་ལའང་བཀའ་བབས་བདུན་གྱི་གསང་མཛོད་སྤྱི་དང་། ཁྱད་པར་སྔ་འགྱུར་བཀའ་གཏེར་གྱི་བཀའ་བབས་ཐུན་མོང་མ་ཡིན་པ་མངའ་བས་དེ་དག་གི་སྨིན་གྲོལ་གྱི་རྒྱུན་དང་བཀའ་རྒྱ་གདམས་གཏད་ཐུན་མིན་སྩལ་པ་དང་། གུ་རུ་རིན་པོ་ཆེས་ཀྱང་། ལས་འཕྲོ་དང་སྨོན་ལམ་གྱི་ཤུགས་ཡིན་པས་གང་འདོད་བསྡུ་སྒྲིགས་ཆོག་པའི་བཀའ་ལུང་ཐོབ་པ་བཅས་ཀྱིས་ཐུགས་སྤྲོ་བ་བརྟས་ཏེ་བཀའ་ཡི་བསྡུ་བར་ཞུགས་བའི་སྐབས། རབ་ཚེས་མེ་ཡོས་ཟླ་བ་བཅུ་གཅིག་པའི་དགའ་བ་དང་པོར་ཡང་ཁྲོད་སྒྲུབ་ཁང་གི་རབ་གནས་སུ་རྗེ་མཁྱེན་བརྩེ་རིན་པོ་ཆེ་ཕེབས་པར་དག་པའི་སྣང་བ་མུ་མེད་པར་ཤར། སྐབས་ཤིག་རི་བོ་ལྟ་བུའི་མཆོད་རྟེན་ཞིག་གི་ཕྱོགས་བཞིར་སྒོ་བཞི། ནང་དུ་མཛོད་ལྔ་ཡོད་པའི་མཛོད་རེ་རེ་བཞིན་ཆོས་གཏེར་གྱིས་གཏམས་པ་ལ་པཎ་གྲུབ་དང་མཁའ་འགྲོ་མང་པོས་བརྡ་སྤྲད། རྗེ་ཉིད་ནས་ཀྱང་གཟིགས་པ་བཙལ་བས་དེ་དག་ལ་དོན་གང་ཡོད་ཐུགས་ལ་ངེས་ཤིང་དེའི་སྲུང་མ་ཆོས་སྲུང་ཁྱད་པར་ཅན་བཞི་ཡོད་པ་སོགས་ཀྱི་གཟིགས་སྣང་ལ་བརྟེན་མཛོད་ལྔའི་བཀའ་བབས་སུ་ལུང་བསྟན་ཅིང་ཆོས་སྡེ་སོ་སོའི་དཀར་ཆག་གནང་བས་མཚོན་སྔ་རྗེས་ཡང་ཡང་གསུང་བསྐུལ་གནང་བ་བཞིན། གཞི་ལམ་འབྲས་བུའི་བར་གྱི་ཤེས་བྱ་མཐའ་དག་ལ་ཁྱབ་ཅིང་གསལ་བར་སྟོན་པའི་གཞུང་སྐབས་བཅུ་ལ་རྐང་པ་རེ་བཞི་ཡོད་པ་རྩ་བ་དང་འགྲེལ་པར་བཅས་པ་ཐུན་མོང་ཤེས་བྱའི་མཛོད་ནི་ཐར་པ་དང་ཐམས་ཅད་མཁྱེན་པའི་ལམ་གྱི་སྟེགས་ལྟ་བུ། མངའ་བདག་མར་པ་ལོ་ཙཱ་ནས་བརྒྱུད་པའི་བདེ་དགྱེས་གསང་གསུམ་གཙོས་བླ་མེད་ཀྱི་རྒྱུད་སྡེ་ཟབ་ཅིང་གཉན་ལ་ཆེས་དཀོན་པ་རྣམས་ཀྱི་སྨིན་གྲོལ་དང་ལྷག་པའི་ལྷ་འགའ་ཞིག་གི་རྗེས་གནང་སྐོར་ཕྱོགས་གཅིག་བསྡུས་པ། ཕྱོགས་དེར་གཏོགས་པའི་ནང་བརྟགས་རྒྱུད་གསུམ་གྱི་འགྲེལ་པ་སོགས་བཀའ་རྒྱུད་སྔགས་མཛོད་ཆེན་མོ། རྙིང་མ་བཀའ་མའི་གྲས་ཡང་དག་དང་ཕུར་པ་འཁོན་ལུགས། ཡང་དག་སོག་ལུགས་ཀྱི་སྒྲུབ་ཁོག་དང་བསྙེན་ཡིགགཤིན་རྗེ་གདོང་དྲུག་སྒྲུབ་དཀྱིལ་དབང་ཆོགརྣམ་འཇོམས་ཁྲོ་དཀར་ནག་སོགས་ཀྱང་བཀའ་མཛོད་འདིར་གཏོགས་པ་དང་། གཏེར་སྟོན་སངས་རྒྱས་བླ་མ། རྒྱ་ལོ་ཙཱ། རྡོར་འབུམ་ཆོས་གྲགས་ནས་བཟུང་། མཆོག་གི་སྤྲུལ་སྐུ་གསུམ། གླིང་པ་བཅུ་གཉིས་གཙོ་བོར་གྱུར་པའི་གཏེར་ཆེན་གཏེར་ཕྲན། དེང་སང་བྱོན་པའི་གཏེར་སྟོན་རྒྱལ་པོ་ལྔའི་ཡ་གྱལ་པདྨ་འོད་གསལ་མདོ་སྔགས་གླིང་པ་དང་། མཆོག་གྱུར་བདེ་ཆེན་གླིང་པའི་བར་གཏེར་སྟོན་ཉིས་བརྒྱར་ཉེ་བའི་གདམས་ཕྲན་རིགས་ཕྱོགས་གཅིག་བསྡུས་པ་རིན་པོ་ཆེ་གཏེར་གྱི་མཛོད་དེ་འདི་གཉིས་ནི་རིན་པོ་ཆེ་འབྱུང་བའི་མཚོ་ལྟ་བུའོ། །སྐབས་འདིར་དགོས་དབང་ཁྱད་པར་ཅན་དང་རྗེས་སུ་འབྲེལ་བར་དྲན་པ་ཡབ་སྲས་ཀྱི་བླ་སྒྲུབ་ཙམ་འཇོག་གནང་བར་དཔྱོད་ལྡན་ཁ་ཅིག་གི་ཐུགས་ལ་དོགས་པ་འཁྲུངས་བར་སྣང་མོད། ཚུལ་འདི་ལྟ་བུ་ནི་རྒྱལ་བ་རྣམས་ཀྱི་གསང་བ་ཟབ་མོའི་རྣམ་ཐར་ངོ་མཚར་རྨད་དུ་བྱུང་བ་ཡིན་ཏེ། ཕལ་པོ་ཆེ་ལས། ཀྱེ་རིགས་ཀྱི་བུ། དེ་བཞིན་གཤེགས་པའི་སྤྲུལ་པ་ནི་ཚད་མེད་དེ་འགྲོ་བ་གང་དང་གང་འདུལ་བ་དེ་དང་དེའི་གཟུགས་དང་ཁ་དོག་དང་མིང་གིས་དོན་མཛད་དོ། །ཞེས་དང་། ཡུམ་བར་བ་ལས། རབ་འབྱོར་སེམས་ཅན་གྱི་ཁམས་ན་དེ་བཞིན་གཤེགས་པས་འདུལ་བར་མི་འགྱུར་བའི་སེམས་ཅན་དེ་ནི་འགའ་ཡང་མེད་དོ། །ཞེས་དང་། བཟང་པོ་དཔལ་གྱི་ལེའུ་ལས། རྫུ་འཕྲུལ་རྣམ་པར་འཕྲུལ་བས་སེམས་ཅན་འདུལ། །དེ་དག་ཐབས་ཚུལ་རྣམ་པ་སྣ་ཚོགས་ཀྱིས། །འཇིག་རྟེན་རྒྱུ་ཞིང་འགྲོ་བའི་དོན་རྣམས་བྱེད། །འཇིག་རྟེན་མི་ཆགས་ཆུ་ལ་པདྨ་བཞིན། །དགའ་ཞིང་དད་པར་བྱེད་ལ་མངོན་པར་རྒྱུ། །དེ་དག་སྙན་དངགས་མཁན་ལ་སྙན་དངགས་སྦྱོར། །གར་མཁན་རྔ་མཁན་གྱད་དང་རོལ་མོ་མཁན། །བཞག་མཛེས་རྒྱན་ཕྲེང་ཐོགས་ཤིང་གར་བྱེད་དང་། །སྒྱུ་མ་མཁན་པོ་གཟུགས་མང་ཀུན་ཏུ་སྟོན། །གྲོང་པ་གྲོང་དཔོན་ཁ་ལོ་སྒྱུར་བར་འགྱུར། །དེ་བཞིན་དེད་དཔོན་ཚང་དཔོན་ཁྱིམ་བདག་འགྱུར། །རྒྱལ་པོ་བློན་པོ་འདུན་འདོན་ཕོ་ཉ་དང་། །སྨན་པ་འཇིག་རྟེན་བསྟན་བཅོས་ཆོ་ག་མཁན། །དེ་དག་དགོན་པར་ལྗོན་ཤིང་ཆེན་པོར་འགྱུར། །ཞེས་པ་ནས། འཇིག་རྟེན་ལྟ་བས་འཁྲུགས་པ་ཤེས་བྱས་ནས། །ལྟ་བ་ངན་ལ་གནས་པའི་མུ་སྟེགས་ཅན། །ཀུན་ལ་ཕྲ་བའི་གཞི་དང་ཐབས་ཚུལ་གྱིས། །དེ་དག་རྣམས་ལ་བདེན་པ་སྟོན་པར་བྱེད། །ལ་ལར་འགྲོ་ལྡིང་བ་ཡི་སྔགས་ཀྱི་གཞི། །ཤིན་ཏུ་གསང་བའི་གཞི་ཡིས་བདེན་པ་སྟོན། །ལ་ལ་དག་ལ་གསལ་ཞིང་དྲང་ཚིག་གིས། །ལ་ལ་དག་ལ་ལྷ་ཡི་གསང་ཚིག་གིས། །ལ་ལ་དག་ལ་ཡི་གེ་དབྱེ་ཚིག་དང་། དོན་ལ་རྣམ་ངེས་རྡོ་རྗེའི་ཚིག་རྣམས་དང་། །རྒོལ་བ་འདུལ་བ་ཤེས་པའི་ཚིག་རྣམས་དང་། །བསྟན་བཅོས་ཐུབ་མེད་ཐར་པའི་ཚིག་རྣམས་ཀྱིས། །ལ་ལ་དག་ལ་མི་སྐད་ཚིག་རྣམས་དང་། །ཀུན་ལ་འཇུག་པའི་ཚིག་ངེས་ཚིག་རྣམས་ཀྱི། །ལ་ལ་དག་པ་ལྷ་ཡི་ངེས་ཚིག་དང་། །ཀླུ་ཡི་ངེས་ཚིག་གནོད་སྦྱིན་ངེས་ཚིག་གིས། །ལ་ལར་སྲིན་པོ་འབྱུང་པོ་ཤ་ཟ་དང་། །དྲི་ཟ་གྲུལ་བུམ་ལྟོ་འཕྱེ་ཆེ་ཚིག་དང་། །མི་ཅི་ལྷ་མིན་མཁའ་ལྡིང་ཚིག་རྣམས་ཀྱིས། །བདེན་པ་བསྟན་ཅིང་ཐར་པར་འདྲེན་པར་བྱེད། །དེ་དག་བདེན་དང་ངེས་ཚིག་ཚུལ་ཤེས་ཏེ། །ཇི་ལྟར་རྒྱལ་བའི་ཆོས་རྣམས་མ་ལུས་པའི། །ཆོས་ཉིད་བསམ་ཡས་ཚིག་ལམ་ཤེས་པ་སྟོན། །དེ་དག་ཏིང་འཛིན་རྣམ་འཕྲུལ་དེ་འདྲའོ། །ཞེས་པའི་བར་གྱིས་བསྟན་པ་དང་། སྒྱུ་འཕྲུལ་རྩ་རྒྱུད་ལས། ཕྱོགས་བཅུ་དུས་བཞི་བསམ་ཡས་སུ། །འདུལ་བའི་དོན་རྣམས་སོ་སོར་སྟོན། །ཐེག་པ་མཐོ་དམན་ཐམས་ཅད་དང་། །ཕྱིན་ཅི་ལོག་རྣམས་བསམ་ཡས་དང་། །ཞི་ཁྲོའི་ཚོགས་ཆེན་ཐམས་ཅད་ལ། །སོ་སོར་མཐུན་བྱས་ཀུན་ཏུ་སྣང་། །ཞེས་དང་། དཔུང་བཟང་གི་རྒྱུད་ལས། གང་གི་རང་བཞིན་ཆགས་སྡང་རྣམ་བྲལ་ཡང་། །ཆགས་པ་ཅན་ལ་ཆགས་པ་ལྟར་སྟོན་ཅིང་། །གདུག་པ་འདུལ་ཕྱིར་ཁྲོ་ལ་ཁྲོ་བོོར་སྟོན། །ཐབས་ཀྱི་རྣམ་འདྲེན་དེ་ལ་ཕྱག་འཚལ་ལོ། །ཞེས་དང་། རྡོ་རྗེ་དྲྭ་བའི་རྒྱུད་ལས། གང་དང་གང་གིས་གཟུགས་ཀྱིས་ནི། །ལུས་ཅན་རྣམས་ནི་འདུལ་གྱུར་པ། །དེ་དང་དེ་ནི་རྣམ་སྟོན་ཏེ། །སྣ་ཚོགས་ནོར་བུ་ཇི་བཞིན་ནོ། །འདུལ་བའི་ཐབས་ནི་གང་གང་གིས། །སེམས་ཅན་རྣམས་ནི་འདུལ་གྱུར་པ། །རྣམ་པ་དེ་དང་དེ་དག་གིས། །ཆོས་རྣམས་སྟོན་པར་འགྱུར་བ་ཡིན། །ཞེས་དང་། སངས་རྒྱས་གསང་བའི་ལམ་རིམ་ལས། ལྷུན་གྲུབ་རིག་འཛིན་སར་བཞུགས་ནས། །ཞིང་ཁམས་ཐུག་པ་མེད་པ་དག །འདུལ་ཕྱིར་སྤྲུལ་སྐུའི་མཛད་པའང་སྟོན། །སྲིད་གསུམ་འགྲོ་བ་བསམ་ཡས་སུ། །ཐུགས་རྗེས་སྤྲུལ་པ་བསམ་མི་ཁྱབ། །དོན་དང་མཐུན་པ་འབའ་ཞིག་སྟོན། །ཞེས་དང་། ཀླུ་སྒྲུབ་ཀྱིས་བྱང་ཆུབ་སེམས་ཀྱི་རྣམ་བཤད་ལས། སེམས་ཅན་སྐྱབས་པའི་བསམ་པ་ནི། །སྲིད་པའི་འདམ་དུ་སྐྱེ་མོད་ཀྱི། །འོན་ཀྱང་འདམ་གྱི་པདྨ་བཞིན། །སྲིད་པའི་སྐྱོན་གྱིས་གོས་པ་མེད། །ཅེས་སོགས་མདོ་རྒྱུད་བསྟན་བཅོས་ཀུན་ནས་གསལ་པོར་བསྟན་པའི་དོན་ཇི་ལྟ་བར། དཔལ་ཨོ་རྒྱན་ཆོས་ཀྱི་རྒྱལ་པོ་ཉིད་དོན་གྱི་དགོངས་པ་སངས་རྒྱས་ཀུན་དང་རྣམ་དབྱེར་མེད་ཅིང་དབང་བཅུའི་གོ་འཕང་ཁྱད་པར་བ་ལ་མངའ་འབྱོར་པའི་ཕྱིར། དཔེར་ན་བཅོམ་ལྡན་འདས་ཀྱང་དགོས་པའི་དབང་གིས་དྲི་ཟ་རབ་དགའ་སོགས་འདུལ་བའི་ཕྱིར་དྲི་ཟ་པི་ཝཾ་ལེན་པ་སོགས་སུ་སྤྲུལ་པར་མདོ་དུ་མ་ལས་གསུངས་པ་དང་། འཕགས་པ་སྤྱན་རས་གཟིགས་ཀྱིས་ཕྱི་རོལ་པ་རྣམས་འདུལ་བའི་ཕྱིར། སརྦ་ཛྙཱ་ཞེས་པའི་ཏིང་ངེ་འཛིན་ལ་ཞུགས་ནས་སྐུའི་གནས་རྣམས་ལས། ཉི་མ་དང་ཟླ་བ། དབང་ཕྱུག་དང་ཚངས་པ་སོགས་སྤྲུལ་པར་མདོ་སྡེ་ཟ་མ་ཏོག་སོགས་ལས་གསུངས་པ་བཞིན། ངོ་མཚར་བའི་སྐུ་ཡི་བཀོད་པ་དེ་ལྟར་དུ་བསྟན་པ་ཡིན་ཏེ། ཆོས་དབང་གཏེར་བྱོན་གནམ་སྐས་ཅན་གྱི་བཀའ་རྩིས་ལས། རྡོ་རྗེ་གདན་ལ་མཉམ་པར་བཞག་པའི་ཚེ༔སྤྱན་རས་གཟིགས་ཀྱིས་རབ་བསྐུལ་བོད་མཆིས་ཀྱང༔བོན་གྱིས་དབང་བསྒྱུར་དམ་ཆོས་སྤེེལ་དཀའ་ནས༔གཤེན་ལྷ་འོད་དཀར་ཞེས་བྱར་སྐུ་སྤྲུལ་ཏེ༔ཆོས་རྒྱལ་ཐོ་ཐོ་རི་ལ་བཀའ་རྟགས་སྩལ༔ཆོས་ཕྱོགས་མོས་བསྒྱུར་དགེ་སྡིག་ངོ་ཤེས་ཤིང༔གཤེན་རབ་རྣམས་ཀྱང་དཀར་ཆོས་བོན་བློར་བསྒྱུར༔ཞེས་དང་། ཁྱད་པར་གཏེར་ཆེན་ཀློང་གསལ་སྙིང་པོའི་གཏེར་བྱོན་བཀའ་ཡི་ཐང་ཡིག་ལས། དེ་ནས་ཞང་ཞུང་གི་ཡུལ་དུ་བྱོན་པར་དགོངས་པས་གཟིགས་པ་ན། བོན་གྱིས་འདུལ་བ་ཁོ་ནར་གཟིགས་ཏེ༔དེར་སོང་སྟེ་རང་མདངས་ཀྱི་འཁོར་དང་བཅས་པས་འདི་སྐད་དུ༔ཀྱེ་རིགས་ཀྱི་བུ་རྣམས་ཤེས་པར་གྱིས་ཤིག༔ང་ཡི་ཡབ་ནི་དྲན་པ་ཡེ་ཤེས་ཀྱི་ནམ་མཁའ་འོ༔མ་ནི་འོད་ལྡན་འབར་མ་ཡིན་ནོ༔གཅེན་ནི་ཚེ་དབང་རིག་འཛིན་ཡིན་ནོ༔ང་བོན་ཉིད་མི་འགྱུར་བའི་དབྱིངས་ནས་རང་བྱུང་ངོ༔ཞེས་རྟག་པ་དང་ཆད་པའི་མཐའ་ལ་མི་གནས་པའི་བོན་གྱི་གདམས་པ་གྲངས་ལས་འདས་པའི་སྒོ་ཕྱེས་ཏེ་ཚོམ་བུ་འབུམ་ཕྲག་བཅོ་བརྒྱད་གྲོལ་ལོ༔འབྱུང་འགྱུར་ལ་གྲངས་དང་མཐའ་དང་མུ་མེད་དོ༔ཞེས་རྡོ་རྗེའི་ལུང་གིས་གསལ་པོར་བསྟན་ཅིང་། རིགས་པས་ཀྱང་གྲུབ་སྟེ། མགོན་པོ་བྱམས་པས། གཞན་གྱིས་དབང་གིས་ངེས་འབྱུང་དང་། །བདག་དང་སེམས་ཅན་མཚུངས་གཟིགས་དང་། །མཛད་པ་ཡོངས་སུ་མ་རྫོགས་ཕྱིར། །འཁོར་བ་སྲིད་དུ་མཛད་མི་འཆད། །ཅེས་གསུངས་པ་ལྟར། འཕགས་པ་སྤྱན་རས་གཟིགས་ཀྱིས་བོད་ཀྱི་གདུལ་བྱ་མཐའ་དག་འདུལ་བར་ཐུགས་བསྐྱེད་ཅིང་སྨོན་ལམ་བཏབ་པའི་ཕྱིར་དང་། གདུལ་བྱ་བོན་རྣམས་ཀྱང་ཆོས་སྐུ་བདེ་གཤེགས་སྙིང་པོས་ཁྱབ་ཅིང་ཆོས་ཉིད་དག་པའི་རང་བཞིན་ཅན་དུ་རིགས་གཅིག་པའི་ཕྱིར་དང་། དེ་ལྟར་མ་བསྟན་ན་ནི་གདུལ་དཀའ་འདུལ་བར་མི་ནུས་པས་མཛད་པ་ཡོངས་སུ་མ་རྫོགས་པའི་ཕྱིར་ཏེ་རྒྱུ་མཚན་གསུམ་གྱིས་ཡིན་ལ། དེ་ལྟར་སྒྲུབ་པའི་ཚུལ་འདི་ཡང་རྩོད་བྲལ་གྱི་གཏེར་ཆེན་རྒྱལ་པོ་ལྔའི་ནང་ཚན་སྤྲུལ་སྐུ་རྡོ་རྗེ་གླིང་པའི་ཟབ་གཏེར་ལས་བྱོན་པ་སྟེ། དེ་ཡང་དོན་དབྱིངས་དང་ཡེ་ཤེས་གཉིས་སུ་མེད་པའི་སྲས་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་ཆོས་ཐམས་ཅད་ལ་ཡེ་ནས་སངས་རྒྱས་པ་ཉིད་རྣམ་པ་རྟགས་ཀྱི་ལྷ་ཡབ་ཡུམ་སྲས་གསུམ་དུ་བསྟན་ནས་སྒྲུབ་པ་ཡིན་པས། དེ་ལྟར་རྟོགས་ཤིང་གོམས་པ་བྱས་ན་སྣང་སྤྱོད་ཐམས་ཅད་ལ་ཡེ་ཤེས་ཆེན་པོའི་རྩིས་ཐེབས་ཏེ་བསྐྱེད་རྫོགས་ཟུང་འབྲེལ་དུ་འགྱུར་བའི་ཕྱིར་ལས་དང་དངོས་གྲུབ་ཐམས་ཅད་ཐོགས་མེད་དུ་གྲུབ་པར་འགྱུར་ལ། ཚུལ་འདིས་སྐྱབས་སྡོམ་དང་འགལ་མིན་སོགས་ཀྱི་དོགས་པ་མི་དགོས་ཏེ། སྣང་སྤྱོད་ཐམས་ཅད་བླ་མའི་སྐུ་གསུང་ཐུགས་ཀྱི་རོལ་པར་ཤེས་ཤིང་གོམས་པར་བྱ་བ་ལས་ལྷག་པའི་ལམ་ཁྱེར་གཞན་མེད་པའི་ཕྱིར་རོ། །གཞན་ཡང་། བཀའ་རྩིས་ལས། ཆོས་གཏེར་བོན་གཏེར་སྨན་རྩིས་བཟོ་རིགས་སོགས༔གང་ལ་གང་འཐད་ཡིད་དང་གང་འཐད་པ༔རི་བྲག་གཙུག་ལག་ཁང་དང་མཆོད་རྟེན་དང༔ས་མཚན་ཤིང་ཆེན་ཕ་ཝོང་རྒྱལ་ཁབ་སོགས༔ས་ཕུག་ལ་སོགས་ཀུན་ཁྱབ་གཏེར་གྱིས་བཀང༔ཞེས་གསུངས་པ་ལྟར། མ་འོངས་པའི་གདུལ་བྱའི་དོན་དུ་བོན་གཏེར་ཡང་མཐའ་ཡས་པར་སྦ་བར་མཛད་པ་ཕྱིས་དུས་ལ་བབས་པའི་ཚེ། བྱང་གཏེར་རིག་འཛིན་རྒོད་ཀྱི་ལྡེམ་ཕྲུ་ཅན་སོགས་གཏེར་ཆེན་ཚད་མ་རྣམས་ཀྱིས་སྤྱན་དྲངས་ཤིང་གདུལ་བྱ་བོན་གྱི་རིགས་ཅན་རྣམས་ལ་གནང་བར་མཛད་པ་ཡང་མཐའ་ཡས་པས། དེ་ཐམས་ཅད་ཀྱང་གདུལ་དཀའ་རྗེས་སུ་འཛིན་པའི་ཕྲིན་ལས་ཡོངས་ལ་སྙོམས་པར་འཇུག་པའི་སྒོ་ཐབས་མཁས་ཀྱི་མཛད་པ་རྨད་དུ་བྱུང་བ་ཡིན་པས་ཀུན་ལ་དག་སྣང་བསྐྱེད་ནས་རང་གཞན་ཆོས་སྤང་གི་གཡང་ལས་སྲུང་བ་འདི་གལ་ཆེ་བར་སེམས་སོ། །དེ་ལྟར་འཕྲོས་དོན་དུ་སྨྲོོས་ནས། ཡང་སྔ་འགྱུར་རྙིང་མ། བཀའ་གདམས་གསར་རྙིང་། ལམ་འབྲས་བུ་དང་བཅས་པ། བཀའ་བརྒྱུད་ཆེ་བཞི་ཆུང་བརྒྱད། ཤངས་པ་བཀའ་བརྒྱུད། ཞི་བྱེད་དང་གཅོད་ཡུལ། རྡོ་རྗེའི་རྣལ་འབྱོར་ཡན་ལག་དྲུག་པ། རྡོ་རྗེ་གསུམ་གྱི་བསྙེན་སྒྲུབ་བཅས་སྒྲུབ་བརྒྱུད་ཤིང་རྟ་བརྒྱད་དང་། མི་ཏྲའི་གདམས་ཁྲིད་སོགས་ཁྲིད་ཕྲན་མང་པོའི་གཞུང་དང་དབང་གདམས་ངག་ཡོངས་སུ་རྫོགས་པ་ཕྱོགས་གཅིག་ཏུ་བསྡུས་པ་གདམས་ངག་རིན་པོ་ཆེའི་མཛོད་ནི་གང་དུ་ཉེ་བར་བགྲོད་པའི་གྲུ་གཟིངས་བཟང་པོ་ལྟ་བུ་དང་། ཞུགས་ནས་རིན་པོ་ཆེ་བླངས་སྟེ་རང་གཞན་གྱི་དབུལ་བ་སེལ་བ་ལྟ་བུ་ཐུན་མིན་གསང་བའི་མཛོད་ནི། ཉིད་ཀྱི་ཟབ་གཏེར་གྱི་སྐོར་ཏེ། དེ་ཡང་གོང་སྨོས་སྟར་སྐུ་ཆུང་ངུ་ནས་བཀའ་བབས་བརྙེས་ཀྱང་། བར་སྐབས་རྐྱེན་འགའ་ཞིག་ལ་བརྟེན་ནས་བཏང་སྙོམས་སུ་ལུས་པར། ཕྱིས་རྫོང་ཤོད་བདེ་གཤེགས་འདུས་པའི་གནས་ཞལ་ཐོག་མར་འབྱེད་བའི་སྐབས་གཏེར་ཆེན་རྣམ་གསུམ་ཞལ་འཛོམས་ཀྱིས་བཀའ་བརྒྱད་ཀྱི་སྒྲུབ་ཆེན་གྲུབ་པའི་རྗེས་ཐོག་དེར། གཏེར་ཆེན་རྣམས་གཉིས་ནས་ཙིཏྟ་གསང་ཕུག་ཏུ་རྡོ་ཁྲི་མཐོན་པོ་བརྩེགས་པའི་ཁར་བཞུགས་སུ་གསོལ་ནས། སྐུ་གསུང་ཐུགས་རྟེན། རིན་ཆེན་དང་པོའི་མཎྜལ་བཅས། རྗེ་ཉིད་ལ་གུ་རུ་རིན་པོ་ཆེས་གསོལ་བའི་མཚན་ཨོ་རྒྱན་འཆི་མེད་བསྟན་གཉིས་གཡུང་དྲུང་གླིང་པ་ཡིན་པས་ཕྱིན་ཆད་མཚན་དེ་ལྟར་འདོགས་པ་དང་། ཟབ་གཏེར་གྱི་རྟེན་འབྲེལ་ཉམས་པ་སོར་ཆུད་དགོས་པའི་གསུང་ནན་བཅས་ཞབས་བརྟན་གནང་བར་མཛད་པ་སོགས་ཀྱིས་དགུང་གྲངས་ང་བརྒྱད་པར་ལྷ་མདོ་འབུམ་མོ་བདེ་ཆེན་པདྨོ་བཀོད་པ་ནས་རྩ་གསུམ་དགོངས་པ་འདུས་པའི་ཆོས་སྡེ། འཕགས་པ་ཀུན་དགའ་བོའི་སྐུ་ཆོས་སློབ་དཔོན་ཧཱུྃ་ཀ་རའི་གསང་གོས་སོགས་སྤྱན་དྲངས་པ་ནས་བཟུང་རིམ་པར་གཏེར་ཀ་བཅུ་གཅིག་ཙམ་ཕྱག་ཏུ་སྨིན་པ་ལས། ཁྱད་པར་རྩ་གསུམ་དགོངས་འདུས་ཉིད་མཛོད་ལྔ་ཡོངས་སུ་རྫོགས་པའི་ཆོས་སྡེ་ཟབ་ཅིང་རྒྱ་ཆེ་བར་བཞུགས་ཤིང་། བརྡ་ཡིག་ཀྱང་དེ་མཚུངས་རིགས་མི་འདྲ་བ་མང་དུ་བཞུགས་པ་ཡིད་ཆེས་ཤིང་ཐེ་ཚོམ་གྱི་དྲི་མ་བསལ་བའི་ཕྱིར་ཡབ་སྲས་ཞལ་འཛོམས་ཀྱིས་འབེབས་བཞེད་སྐབས། ཀུན་གཟིགས་མཁྱེན་བརྩེ་རིན་པོ་ཆེས། འདི་ལ་མཁའ་འགྲོའི་བརྡ་སྒྱུར་ཆེན་མོའི་དབང་དུ་བྱས་ན་སངས་གླིང་བླ་མ་དགོངས་འདུས་ཙམ་ཞིག་འབྱུང་བར་སྣང་ཡང་བརྡ་བསྒྱུར་འབྲིང་པོའི་དབང་དུ་བྱས་པའི་རྒྱས་བསྡུས་འཚམ་པ་ཞིག་ལེགས་གསུངས་ནས། མཛོད་ལྔའི་ནང་ནས་གལ་ཆེ་བའི་ལུང་གཏེར་གྱི་མཛོད་ལ་རྩ་གསུམ་ཆོས་སྐྱོང་གི་སྐོར་བཞི་བཞུགས་པ་ལས་བླ་མ་རིག་འཛིན་མཆོག་སྒྲུབ་ཀྱི་ཆོས་སྡེའི་ཚན་དྲུག་ཙམ་འབེབས་གནང་སྐབས་ཡབ་སྲས་གཉིས་ཀར་དག་པའི་གཟིགས་སྣང་དང་བྱིན་རླབས་ཀྱི་བབས་སོགས་ངོ་མཚར་རྨད་དུ་བྱུང་བའི་ལོ་རྒྱུས་ཀྱིས་མཚོན་རྣམ་ཐར་ཆེན་མོར་གསལ་བ་ལྟར་ལ། ལེགས་པར་གཏན་ལ་ཕབ་གྲུབ་པ་ནི། གང་སྨོས་རྩ་གསུམ་དགོངས་འདུས་ཀྱི་ཆོས་ཚན་དྲུགཙཱ་འདྲའི་གཏེར་བྱོན་གསང་ཐིག་ཡབ་བཀའ་ཡུམ་བཀའ། རོང་མེ་དཀར་མོ་སྟག་ཚང་གི་གྲོ་ལོད་སྒྲུབ་ཐབས། ལམ་ཟབ་ལེའུ་བདུན་མ། དག་སྣང་ཚིག་བདུན་ཡབ་བཀའ་ཡུམ་བཀའ་སོགས་ཡིན་ལ། དེ་དག་དང་ལྷན་དུ་བྱོན་པའི་དམ་རྫས་རིགས་སོགས་ཀྱི་འགྲོ་ཕན་གྱི་ཕྲིན་ལས་ཀྱིས་ནི་ཁམས་དབུས་གཙང་གསུམ་དུ་ཁྱབ་པར་གྱུར་ཏོ། །མཛོད་ཆེན་ལྔ་དེ་དག་ཅི་རིགས་པ་དང་རྗེས་སུ་འབྲེལ་བའི་གསུང་ཐོར་བུའི་སྐོར་བསྟོད་ཚོགས་ནས་བསྔོ་སྨོན་ཤིས་བརྗོད་ཡན་འཇམ་མགོན་མཁྱེན་བརྩེ་རིན་པོ་ཆེས་དཀར་ཆག་ཏུ་མཛད་པ་ཟླ་བ་ཉ་བའི་གྲངས་ལྡན་བཅས་གསུང་རབ་ཀྱི་གླེགས་བམ་བགྲངས་ན་བརྒྱ་ཕྲག་ཏུ་ཉེ་བ་དང་། དེ་དག་འཆད་སྤེལ་གྱི་ཕྲིན་ལས་ཀྱང་། སྤྱིར་སྒྲ་ཀ་ཙན་དབྱངས་གསུམ། སུམ་རྟགས། སྡེབ་སྦྱོར། སྙན་ངགགསོ་རིགས་རྒྱུད་བཞི། རྩིས་དཀར་ནག་སོགས་ཐ་སྙད་རིག་གནས་ཀྱི་སྐོར་འཆད་པ་ཆེས་མང་ཞིང་། ཁྱད་པར་རྒྱུད་གསང་སྙིང་། ནང་བརྟགས་རྒྱུད་གསུམ་སོགས་ཀྱི་བཤད་པ་ལན་གྲགས་མང་བ་དང་། རྒྱལ་བཀའ་རིན་པོ་ཆེའི་བཀླགས་ལུང་ཚར་གཅིགརྙིང་རྒྱུད་ཚར་གཉིས། བསྟན་འགྱུར་ལས་མཁོ་བཏུས་ཚར་ཁ་ཤས། ཤེས་བྱ་མཛོད་ཀྱི་བཤད་ལུང་ལན་བཞི། བཀའ་བརྒྱུད་སྔགས་མཛོད་ཚར་བདུན། རིན་ཆེན་གཏེར་མཛོད་ཚར་ལྔ། གདམས་ངག་མཛོད་ཚར་གསུམ། སྨིན་གླིང་འདོད་བུམ་ཚར་བརྒྱད། ཇོ་ནང་རིན་འབྱུང་ཚར་གསུམ། གཞན་བཀའ་བརྒྱུད་དང་རྙིང་མ་གཙོར་བྱས་གང་གསན་ཕལ་ཆེར་ལན་གྲངས་དང་། ཐ་ན་ཚར་རེ་མ་འཆད་པ་ནི་གང་ཡང་མི་མངའ་ཞིང་། གོང་སྨོས་མཛོད་ཆེན་བཞི་གཙོར་གྱུར་གསུང་འབུམ་ཡོངས་རྫོགས་སྤར་དུ་འཁོད་པ་དང་། བརྒྱུད་འཛིན་བུ་སློབ་ཀྱིས་ནི་ཤར་ནུབ་རྒྱ་མཚོའི་མཐའ་ཚུན་ཆོད་ཁྱབ་ཅིང་། བསྟན་པ་འཛིན་སྐྱོང་སྤེལ་གསུམ་ནུས་པའི་སྐྱེས་ཆེན་བཟང་ལ་མང་བ་བཅས་སྒོ་དུ་མ་ནས་སངས་རྒྱས་འཇིག་རྟེན་དུ་བྱོན་པ་ལྟ་བུའི་རྣམ་ཐར་ནི་ཚུར་མཐོང་བྱིས་བློའི་སྤྱོད་ཡུལ་ལས་བརྒལ་བ་སྟེ། གསན་སྦྱོང་དང་། འཆད་སྤེལ། སྒོམ་སྒྲུབ། བསྟན་བཅོས་རྩོམ་པ་རྣམས་རེ་རེའང་མི་ཕལ་པའི་ཚེ་གཅིག་ལ་གཏན་ནས་རྫོགས་ཐབས་མེད་པ་ནི་མངོན་སུམ་གྱིས་གྲུབ་པ་འདི་ལྟར་ན། འདི་ལྟ་བུའི་གྲུབ་པའི་སྤྱོད་པ་ལས་གོང་ན་གཞན་མེད་པ་ནི་བློ་གཟུ་བོར་གནས་པ་རྣམས་ཀྱིས་བརྟགས་པས་ཤེས་པར་ནུས་སོ། །དེ་ལྟར་སྐུ་ཚེ་དང་ཕྲིན་ལས་མཐར་ཕྱིན་ཅིང་། དེའི་རིང་ལ་མཐའ་དམག་ཀླ་ཀློའི་འཚེ་བ་ཟློག་པར་མཛད་པ་སོགས་གོང་གི་ལུང་དོན་མཐའ་དག་མངོན་དུ་གྱུར་ཅིང་། མཐར་དགུང་གྲངས་གྱ་བདུན་པར་ངོ་མཚར་བའི་ལྟས་དང་བཅས་ནུབ་ཕྱོགས་ཤཱནྟ་པུ་རིར་དཔའ་བོ་ཐོད་པའི་དུམ་བུ་རྩལ་གྱི་ཐུགས་ཀར་ཐིམ་པའི་ཚུལ་བསྟན་ཅིང་། གང་འདུལ་གདུལ་བྱའི་སྐལ་བ་དང་འཚམ་པའི་རྣམ་འཕྲུལ་ཚད་མེད་པས་འཁོར་བ་མ་སྟོང་གི་བར་དུ་འགྲོ་བའི་དོན་རྟག་ཁྱབ་ལྷུན་གྲུབ་ཏུ་མཛད་པ་དང་། ཁྱད་པར་སྐལ་བཟང་འདིའི་རྣམ་འདྲེན་སྟོང་གི་ཐ་མར་བདེ་གཤེགས་མོས་པར་སྣང་དུ་འཚང་རྒྱ་བའི་ཚུལ་བསྟན་ཏེ་སངས་རྒྱས་སྔ་མ་རྣམས་ཀྱི་སྐུ་ཚེ་དང་མཛད་ཕྲིན་མཐའ་དག་བདག་གིར་བཞེས་ཏེ། ད་ལྟའི་དུས་ཀྱི་མི་མཇེད་ཞིང་འདིའི་འགྲོ་བ་འབུ་སྲིན་ཕྲ་མོ་ཡན་ཆད་ཀྱང་རྣམ་གྲོལ་གསུམ་གྱི་ལམ་ལ་འགོད་པར་མཛད་པ་ནི་བསླུ་མེད་རྡོ་རྗེའི་ལུང་གིས་གྲུབ་པ་ཉིད་དོ། །ཨེ་མ་ཨེ་མ་ཐུབ་པའི་བསྟན་པ་ལ། །ངོ་མཚར་ངོ་མཚར་རྒྱལ་བའི་མཛད་པ་ཅན། །བསམ་གྱིན་བསམ་གྱིན་ཁྱོད་འདྲའི་སྟོན་པ་སུ། །དྲན་ནོ་དྲན་ནོ་སྐུ་དྲིན་འཁོར་མཐའ་ཅི། །ཁྱོད་གསུང་ཉི་འོད་ཀྱིས་བསྐྱངས་བཤད་སྒྲུབ་ཚལ། །ལུང་རྟོགས་འདབ་སྟོང་བཞད་པའི་ཀེ་སར་བཅུད། །སྐལ་བཟང་རྐང་དྲུག་དགའ་བའི་གསོས་སྨིན་འདིས། །རྫོགས་ལྡན་བྲིས་པའི་རི་མོ་ཉིད་དུ་བྱས། །སྲས་བཅས་རྒྱལ་བའི་དགོངས་བཅུད་རཏྣའི་སྒྲོམ། །འབུམ་ཕྲག་གཅིག་ཏུ་བསྡོམས་པའི་མཛོད་ཆེན་སྒོ། །འབྱེད་པའི་རྣམ་དཔྱོད་འདི་ཞེས་མི་བསྟོད་དེ། །ཁྱོད་མིན་གསང་བའི་གཉེར་ཁ་གཞན་མེད་ཕྱིར། །ཇི་ལྟར་འཛམ་གླིང་ཆུ་ཀླུང་བྱེ་བ་སྙེད། །མ་དྲོས་གནས་པའི་ཀླུ་བདག་གང་གི་མཐུ། །དེ་བཞིན་འདི་ལྟའི་ལེགས་མཛད་ཟབ་མོའི་ཚུལ། །རྒྱལ་བའི་བྱིན་རླབས་མཐུ་ལས་གཞན་སུ་ཞིག །དེ་ཚུལ་ཤེས་པའི་བློ་ལྡན་འགའ་མཆིས་ན། །གསེར་ཞིང་ནོར་བུས་གཏམས་པས་མཚོན་མིན་པའི། །འདི་འདྲའི་ཟབ་དོན་ཐོག་མར་བརྡལ་དུས་འདིར། །རང་གཞན་གཏན་གྱི་དབུལ་བ་སེལ་མཛོད་ཀྱེ། །དེ་ལྟར་ཆེ་བའི་ཡོན་ཏན་བསམ་གྱིས་མི་ཁྱབ་པ་དང་ལྡན་ཞིང་། ངོ་མཚར་བའི་རྣམ་ཐར་དང་བཀའ་དྲིན་སུས་ཀྱང་འགྲན་བྱར་མ་གྱུར་པའི་རྗེ་བཙུན་བླ་མ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་དེ་གཉིས་ཀྱི་སྔོན་གྱི་ཐུགས་སྨོན་བཙན་པོ་དུས་སུ་སྨིན་པའི་དབང་གིས། སྙིགས་མ་ལྔའི་མཐར་ཐུག་པའི་དུས་འདི་ལྟ་བུ་ལའང་། ངེས་གསང་སྙིང་པོ་སྒྲུབ་བརྒྱུད་བརྒྱད་ཀྱི་བསྟན་པ་རིས་སུ་མ་ཆད་པར་ཉིན་མོ་བཞིན་དུ་གསལ་བར་མཛད་ཅིང་། དུས་ཕྱི་མའི་མུ་མཐར་ཡང་མི་ཉམས་པར་བྱ་བའི་ཕྱིར་སྔོན་མེད་པའི་བཀའ་ཡི་བསྡུ་བ་མཛད་པའི་ཕན་ཡོན་དང་དགོས་ཆེད་ཀྱང་། བློ་གྲོས་རྒྱ་མཚོས་ཞུས་པའི་མདོ་ལས། དེ་བཞིན་གཤེགས་པའི་དམ་པའི་ཆོས་འཛིན་པ། །དེ་ནི་དེ་བཞིན་གཤེགས་ལ་བྱས་གཟོ་ཡིན། །རྒྱལ་བ་རྣམས་ཀྱི་འཛོད་འཛིན་ཡིད་བརྟན་ཞིང་། །ཕྱོགས་བཅུ་རྣམས་སུ་སངས་རྒྱས་མཆོད་པ་ཡིན། །སངས་རྒྱས་སྤྱན་གྱིས་གཟིགས་པའི་ཞིང་མང་པོ། །རིན་ཆེན་བཀང་སྟེ་དེ་བཞིན་གཤེགས་ལ་ཕུལ། །ཟད་པའི་དུས་ན་ཇི་ལྟར་ཆོས་འཛིན་ལྟར། །བསོད་ནམས་ཕུང་པོ་དེ་ཙམ་འཕེལ་མ་ཡིན། །ཞེས་དང་། དེ་དག་རྣམས་ཀྱི་ཡོན་ཏན་ཕན་ཡོན་རྣམས། །བསྐལ་པ་རྒྱུན་མི་འཆད་པར་བརྗོད་བྱས་ཀྱང་། །དམ་ཆོས་འཛིན་པའི་ཕན་ཡོན་འདི་དག་ནི། །བརྗོད་པས་མཐའ་མར་ཕྱིན་པར་མི་འགྱུར་རོ། །ཞེས་སོགས་ལུང་མཐའ་ཡས་ཤིང་ཕྱོགས་མཚོན་ཙམ་ནི་ཡིད་ཆེས་ལུང་གི་ཉི་མར་བཤད་ཟིན་པས་དེར་བལྟ་བར་བྱའོ། །རྒྱུ་མཚན་དེའི་ཕྱིར་བསྟན་པ་ལ་དགོངས་པའི་དམ་པ་རྣམས་ཀྱིས་འཆད་པ་དང་སྒྲུབ་པའི་སྒོ་ནས་རྒྱལ་བ་རྣམས་ཀྱི་གསང་བའི་མཛོད་ཆེན་པོ་འདི་ཉིད་ཚིག་དང་དོན་གྱི་སྒོ་ནས་འཇིག་རྟེན་གྱི་ཁམས་འདིར་མི་ཉམས་པར་ཡོངས་སུ་འཛིན་པ་ནི་ཅི་ནས་ཀྱང་དོན་ཆེ་སྟེ། མདོ་ལས། གང་ལ་ཕན་ཕྱིར་ང་ཡི་ཆོས། །ཚུལ་བཞིན་བསྟན་པས་མཆོད་འགྱུར་གྱི། །མེ་ཏོག་བྱུག་པ་མར་མེ་ཡིས། །རྒྱལ་བ་ཡང་དག་མཆོད་མ་ཡིན། །ཞེས་དང་། བྱམས་པ་སེདྒེ་སྒྲའི་མདོ་ལས་ཀྱང་། གདྒཱའི་བྱེ་སྙེད་རིན་ཆེན་གསེར་དག་གིས། །བཀང་སྟེ་གང་ལ་སྦྱིན་པ་བྱིན་པ་བས། །དུས་ངན་ཚེ་ན་ཚིགས་བཅད་གཅིག་བརྗོད་པ། །དེ་ཡི་ཕན་འདོགས་ཅི་འདྲ་དེ་ལ་མེད། །ཅེས་དང་། རྟོགས་པ་རྒྱས་པའི་མདོ་ལས། ཐང་ཅིག་བསམ་གཏན་ཐུན་ཞུགས་ན། །ཁམས་གསུམ་གང་བའི་མི་རྣམས་ལ། །སྲོག་སྦྱིན་པས་ནི་འདི་དོན་ཆེ། །ཞེས་དང་། དེ་ཁོ་ན་ཉིད་བསྟན་པའི་མདོ་ལས། ཤཱ་རིའི་བུ། གང་གིས་བསྐལ་པ་གཅིག་གི་བར་དུ་ཉན་པ་བས། གང་གིས་སེ་གོལ་གཏོགས་པ་གཅིག་ཙམ་ཉིད་དུ་དེ་ཁོ་ན་ཉིད་ཀྱི་ཏིང་ངེ་འཛིན་བསྒོམས་ན་བསོད་ནམས་འཕེལ་ལོ། །ཤཱ་རིའི་བུ་དེ་ལྟ་བས་ན་དེ་ཁོ་ན་ཉིད་ཀྱིས་ཏིང་ངེ་འཛིན་འདི་གཞན་ལ་ནན་གྱིས་གདམ་པར་བྱའོ། །ཞེས་དང་། འཕགས་པ་སྤྱན་རས་གཟིགས་ཞེས་བྱ་བའི་མདོ་ལས། གང་དག་ཕྱིན་ཆད་མདོ་སྡེ་འདི་འཛིན་པ། །དེ་དག་རྟག་ཏུ་ང་དང་མཐུན་པའི་སྲས། །སངས་རྒྱས་བྱེ་བས་དེ་དག་བསྔགས་བརྗོད་ཀྱང་། །དེ་དག་བསྔགས་པ་མཐར་ནི་ཕྱིན་མི་འགྱུར། །ཞེས་དང་། དེ་བཞིན་གཤེགས་པའི་གསང་བ་བསྟན་པ་ལས། དམ་ཆོས་འཛིན་པའི་བསོད་ནམས་ནི། །སངས་རྒྱས་ཀུན་གྱིས་ནན་ཏན་དུ། །བསྐལ་པ་བྱེ་བར་བརྗོད་མཛད་ཀྱང་། །མཐར་མི་ཕྱིན་པར་འགྱུར་བ་ལགས། །ཞེས་གསུངས་པ་སོགས་ཀྱིས་མཚོན་ནུས་པས་ན། འདི་དག་གི་ཚུལ་ཐུགས་ལ་བཅངས་ནས་བཤད་སྒྲུབ་ལས་གསུམ་གྱིས་བསྟན་འགྲོའི་དོན་རྒྱ་ཆེན་པོ་མཛད་པར་སྙིང་ཐག་པ་ནས་གསོལ་བ་འདེབས་པ་ལགས་སོ། །

གཞན་ཡང་ཞར་བྱུང་དུ་བསྟན་པའི་གནས་ཚད་ཅུང་ཟད་བཤད་ན།

༈ གཞན་ཡང་ཞར་བྱུང་དུ་བསྟན་པའི་གནས་ཚད་ཅུང་ཟད་བཤད་ན། སྤྱིར་ཐུན་མོང་བ་འདུལ་བ་ལུང་ཕྲན་ཚེགས་ལས་བསྟན་པ་ལོ་ལྔ་སྟོང་དུ་བཤད་པ་དང་། འཕགས་པ་བློ་གྲོས་མི་ཟད་པར་བསྟན་པའི་མདོ་ལས། སླད་མའི་དུས་ལྔ་བརྒྱའི་ཐ་མ་ལ་ཞེས་པའི་འགྲེལ་པར། དཔེར་ན་མིའི་ཚེ་ལོ་བརྒྱ་ཐུབ་པ་ལ་ལོ་ལྔ་བཅུའི་བར་དུ་ནི་འཕེལ་བའི་དུས་ཏེ། ལུས་དང་ཤེས་རབ་དང་རྩལ་ལ་སོགས་པ་འཕེལ་ཞིང་སྐྱེའོ། །དེ་ལྟར་ལོ་ལྔ་བཅུ་འདས་ནས་དེའི་ཕྱི་མ་ལྔ་བཅུ་ནི་འགྲིབ་པའི་དུས་ཏེ། ལུས་དང་ཤེས་རབ་དང་རྩལ་ལ་སོགས་པ་ཉམས་ཤིང་འགྲིབ་པར་འགྱུར་རོ། །དེ་བཞིན་དུ་སངས་རྒྱས་ཤཱཀྱ་ཐུབ་པའི་བསྟན་པ་འབྲས་བུ་ཐོབ་པ་དང་། ཤིན་ཏུ་རྒྱས་པའི་དུས་ནི་ལོ་སྟོང་ཞིག་འཛམ་གླིང་དུ་གནས་སོ། །དེ་ཡང་ཕྱེད་དུ་བགོས་ཏེ། ལྔ་བརྒྱ་པ་སྔ་མ་ནི་འཕེལ་བའི་དུས་སུ་བཞག་ལ། ལྔ་བརྒྱ་ཐ་མ་ནི་འགྲིིབ་པའི་དུས་ཞེས་བྱའོ། །ཞེས་དང་། སྙིང་རྗེ་པདྨ་དཀར་པོོ་ལས། ང་མྱ་ངན་ལས་འདས་ནས་ལོ་སྟོང་དུ་དམ་པའི་ཆོས་གནས་པར་གྱུར་ཅིགཡང་ལོ་ལྔ་བརྒྱར་དམ་པའི་ཆོས་ཀྱི་གཟུགས་བརྙན་གནས་པར་གྱུར་ཅིགཅེས་དང་། ཟླ་བའི་སྙིང་པོོས་ཞུས་པའི་མདོ་ལས། ང་མྱ་ངན་ལས་འདས་ནས་དམ་པའི་ཆོས་ཀྱི་གཟུགས་བརྙན་ལོ་ཉིས་སྟོང་དུ་གནས་པར་འགྱུར་རོ། །ཞེས་དང་། ཆོས་ཉིད་རང་གི་ངོ་བོ་ལས་མི་གཡོ་བར་ཐ་དད་པར་སྣང་བའི་མདོར། འཇམ་དཔལ་ང་མྱ་ངན་ལས་འདས་ནས་ལོ་ལྔ་བརྒྱ་དང་། དགུ་བརྒྱ་དང་། སྟོང་དགུ་བརྒྱ་དང་། ཉིས་སྟོང་དང་། ཉིས་སྟོང་ལྔ་བརྒྱའི་བར་དུ་ཆོས་ལ་བརྟག་པའི་མཐའ་ལྔ་པོ་འདི་དག་ལ་སོ་སོར་རྟོག་པའི་གང་ཟག་རིམ་པས་འབྱུང་ངོ་། །ཞེས་དང་། འཕགས་པ་དགའ་བའི་བཤེས་གཉེན་གྱི་རྟོགས་པ་བརྗོད་པ་ལས་ཡར་འཕེལ་དྲུག་བརྒྱའི་བར་དུ་ཡང་གནས་པར་བཤད། རྡོ་རྗེ་གཅོད་པའི་འགྲེལ་པར། ལྔ་བརྒྱ་ཐ་མ་ལ་ཞེས་བྱ་བ་ལ། བརྒྱ་ཕྲག་ལྔའི་ཚོགས་ནི་ལྔ་བརྒྱ་སྟེ། བཅོམ་ལྡན་འདས་ཀྱི་བསྟན་པ་ལྔ་བརྒྱ་ཕྲག་ལྔའི་བར་དུ་གནས་ཞེས་གྲགས་པས། དེའི་ཕྱིར་ཐ་མ་ཞེས་བྱེ་བྲག་ཏུ་གསུངས་སོ། །ཞེས་དང་། བསྐལ་བཟང་ལས། དམ་པའི་ཆོས་ནི་ལོ་ལྔ་བརྒྱའི་བར་དུ་གནས་སོ། །ལོ་ལྔ་བརྒྱའི་བར་དུ་ནི་དམ་པའི་ཆོས་ལྟར་སྣང་ངོ་། །ཞེས་དང་། དཾཥྚ་སེ་ནའི་འབུམ་ཊཱིཀ་ཏུ། ཕྱི་མའི་དུས་ལྔ་བརྒྱ་ཐ་མར་ཞེས་པ། བཅོམ་ལྡན་འདས་ཀྱི་བསྟན་པ་ལོ་ལྔ་སྟོང་དུ་གནས་པ་ལ་སྟོང་ཕྲག་རེ་རེ་ཕྱེད་ཕྱེད་དུ་བཅད་པས། ལྔ་བརྒྱ་ཕྲག་བཅུ་ལ་ལེའུར་འགྱུར་ཏེ། དེ་ལ་ལྔ་བརྒྱ་པ་དང་པོ་དང་གཉིས་པ་དང་གསུམ་པ་རྣམས་ལ་རིམ་པ་ལྟར་དགྲ་བཅོམ་པ་དང་ཕྱིར་མི་འོང་བ་དང་རྒྱུན་དུ་ཞུགས་པ་མང་དུ་འབྱུང་བས་དེ་རྣམས་ཀྱི་ལེའུ་ཞེས་བྱ་སྟེ་འབྲས་བུའི་དུས་གསུམ་མམ་ཁོང་དུ་ཆུད་པའི་ལེའུ་གསུམ་དང་། དེ་ནས་ལྔ་བརྒྱ་པ་བཞི་པ་དང་ལྔ་པ་དང་དྲུག་པ་རྣམས་ལ་གོ་རིམ་བཞིན་དུ་ལྷག་མཐོང་དང་ཏིང་ངེ་འཛིན་དང་ཚུལ་ཁྲིམས་དང་ལྡན་པ་མང་དུ་འབྱུང་བས་དེ་རྣམས་ཀྱི་ལེའུ་ཞེས་བྱ་སྟེ་སྒྲུབ་པའི་དུས་གསུམ་དང་། དེ་ནས་ལྔ་བརྒྱ་པ་བདུན་པ་དང་བརྒྱད་པ་དང་དགུ་པ་རྣམས་རིམ་བཞིན་མངོན་པ་དང་མདོ་སྡེ་དང་འདུལ་བ་སྟོན་པ་མང་དུ་འབྱུང་བས་དེ་རྣམས་ཀྱི་ལེའུ་སྟེ་ལུང་གི་ལེའུ་གསུམ་དང་། ལྔ་བརྒྱ་པ་བཅུ་པ་ནི། རབ་ཏུ་བྱུང་བའི་རྟགས་ཙམ་ལས་ལྟ་སྤྱོད་རྣལ་མ་དང་མི་ལྡན་པས་རྟགས་ཙམ་འཛིན་པའི་ལེའུ་སྟེ་འདི་ཉིད་ལ་ལྔ་བརྒྱ་པ་ཐ་མ་ཞེས་བྱའོ། །ཞེས་བཤད་དེ་རྣམས་ལས་མཁས་པ་ཕལ་ཆེར་གྱིས་ལོ་སྟོང་སོགས་ནི་དྲང་དོན་དགོངས་པ་ཅན་ཏེ། དེ་ཡང་དགོངས་གཞི་སྟོང་ནས་ཕྱེད་སུམ་སྟོང་གི་བར་ཙམ་ལས་མི་གནས་པར་བཤད་པ་ནི་འབྲས་སྒྲུབ་ཀྱི་བསྟན་པ་ལ་དགོངས། ཡར་འཕེལ་ལ་ཐུག་པར་བཤད་པ་ནི་སྐུ་གདུང་དང་གླེགས་བམ་སོགས་གནས་པ་ཙམ་ལ་དགོངས། དགོས་པ་ཕྱེད་དང་སུམ་སྟོང་གི་བར་ཙམ་ལས་མི་གནས་པར་བཤད་པ་ནི། གདུལ་བྱ་སྐྱོ་བ་བསྐྱེད་དེ་ཆོས་ལ་བསྐུལ་བའི་ཕྱིར་དང་། ཡར་འཕེལ་དུ་གནས་པར་བཤད་པ་ནི་ཧ་ཅང་ཞུམ་པ་གཟེངས་བསྟོད་དེ་ཆོས་ལ་བསྐུལ་བའི་ཆེད་ཡིན། ཡང་དག་པའི་བསྟན་པའི་གནས་ཚད་ལྔ་སྟོང་ཉིད་ལ་ཞལ་མཐུན་པ་ཤས་ཆེ་བ་དང་། ལུང་དང་ཡང་མཐུན་ཤས་ཆེ་བས་རེ་ཞིག་ལྔ་སྟོང་དུ་གནས་པར་ཁས་བླང་ངོ་ཞེས་སྨིན་གླིང་མཁན་ཆེན་ཨ་ཌི་ཡཱ་ན་བཞེད་དེ་ལྟར་གྱིས་འདས་ལོ་ཕུག་ལུགས་ལྟར་བརྩིས་ན། ད་ལྟ་ཚུལ་ཁྲིམས་ཀྱི་ལེའུའི་ཉིས་བརྒྱ་དང་དགུ་བཅུའི་མཚམས་སུ་བསླེབས་པས། འདི་ཕྱིན་གོང་ལྷག་ཚུལ་ཁྲིམས་ཀྱི་ཉིས་བརྒྱ་བཅུ་དང་། ལུང་གི་ལྔ་བརྒྱ་ཕྲག་གསུམ་བཅས་བསྟན་པ་རྣལ་མ་ཆིག་སྟོང་བདུན་བརྒྱ་བཅུ་གནས་ཤིང་། དེའི་སྟེང་དུ་རྟགས་ཙམ་གྱི་ལྔ་བརྒྱ་ཕྲག་གཅིག་གནས་པ་ཡིན་ལ། དུས་འཁོར་དང་བསྟུན་ན་ཕུག་ལུགས་ལས་ལོ་གསུམ་ཉུང་བས་ད་ལྟ་ཉིས་སྟོང་གྱ་བདུན་པ་ཡིན། དེ་ལྟ་ན་ཚུལ་ཁྲིམས་ཀྱི་ཉིས་བརྒྱ་གྱ་བདུན་འདས། ལྷག་ཉིས་བརྒྱ་བཅུ་གསུམ་ཡོད། ཤམྦྷ་ལར་རིགས་ལྡན་ཉི་ཤུ་པ་སྟོབས་པོ་ཆེ་ཁྲི་ལ་བཞུགས་ནས་ལོ་གྱ་གསུམ་པ་ཡིན་པས། རབ་ཚེས་ལྕགས་ཁྱི་འདི་ནས་བཟུང་ལོ་བཞི་བརྒྱ་དང་བཅུ་བདུན་མཚམས་འཁོར་ལོ་ཅན་ཁྲིར་ཕེབས། གོ་བརྒྱད་པ་ལ་ཀླ་ཀློ་འདུལ་དུ་བྱོན་པ་ཡིན་པས། ལྕགས་ཁྱི་ནས་ལོ་ལྔ་བརྒྱ་དང་བཅུ་བཞི་འདས་པ་ན་རིགས་ལྡན་གྱི་སྤྲུལ་པའི་དམག་གིས་ཀླ་ཀློ་བཅོམ་ཞིང་གླིང་འདིར་རྫོགས་ལྡན་འདྲེན་པར་མཛད། དེའི་ཚེ་ན་བསྟན་པ་ལྔ་བརྒྱ་ཕྲག་བཅུ་ལས་ཚུལ་ཁྲིམས་རྫོགས་ནས་མངོན་པའི་དུས་ཀྱི་སྟེང་ནས་སུམ་བརྒྱ་དང་གཅིག་འདས་མཚམས་ཡིན་པར་ཀུན་མཁྱེན་བླ་མ་འཇམ་དཔལ་དགྱེས་པས་བཞེད་དོ། །ངེས་དོན་ཐུན་མོང་མ་ཡིན་པའི་དབང་དུ་བྱས་ན། གསེར་འོད་དམ་པ་ལས། སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་རོ། །ཞེས་དང་། ཡིད་བཞིན་རྣམ་པར་བཀོད་པའི་རྒྱུད་ལས། སེམས་ཅན་ཀུན་གྱི་ཚོགས་ཆེན་པོ། །ཇི་སྲིད་རྣམ་པར་གནས་དེ་སྲིད། །སངས་རྒྱས་སྤྲུལ་པ་རྒྱུན་མི་ཆད། །གྲོལ་བའི་ཆོས་ཀྱང་ནུབ་པ་མེད། །ཅེས་གསུངས་པ་ལྟར། འཆར་གཞི་ནམ་མཁའི་ཟླ་བ་ལྟ་བུ་སངས་རྒྱས་ལོངས་སྤྱོད་རྫོགས་པའི་སྐུའི་དཀྱིལ་འཁོར་རྟག་ཏུ་བྲི་གང་འཕོ་འགྱུར་བྲལ་བར་དུས་བཞི་མཉམ་པ་ཉིད་དུ་བཞུགས་པའི་དབང་གིས་གང་ཟག་སྐལ་པ་དང་ལྡན་པ་རྣམས་ལ། སངས་རྒྱས་མཆོག་གི་སྤྲུལ་པའི་སྐུ་དང་། བྱང་ཆུབ་སེམས་དཔའ་དང་། རིག་པ་འཛིན་པ་དང་། དཔའ་བོ་དང་རྣལ་འབྱོར་མའི་ཚོགས་བསམ་གྱིས་མི་ཁྱབ་པས་རྟག་པར་ཞལ་སྟོན་པ་དང་། གདམས་ངག་དང་རྗེས་སུ་བསྟན་པ་དང་། གླེགས་བམ་འབྱོན་པ་ལ་སོགས་པ་ཐབས་སྣ་ཚོགས་པའི་སྒོ་ནས་དྭངས་པའི་ཆུ་སྣོད་དུ་ཟླ་གཟུགས་འཆར་བའི་ཚུལ་གྱིས་སྲིད་པ་ཇི་སྲིད་གནས་ཀྱི་བར་དུ་ལྷུན་གྲུབ་རྒྱུན་མི་ཆད་པའི་ཕྲིན་ལས་ཀྱིས་འཇིག་རྟེན་ན་དཀོན་མཆོག་གསུམ་གྱི་གདུང་ཆད་པ་མེད་པར་མཛད་པ་ཡིན་པས་བསམ་གྱིས་མི་ཁྱབ་པའི་གནས་འདི་ལ་ཡིད་ཆེས་པར་བྱས་ནས་ཀུན་ཏུ་བཟང་པོའི་སྤྱོད་པ་རྒྱ་མཚོ་ལ་རྟག་ཏུ་བསླབ་པར་མཛོད་ཅིགཤྲཱི་ཤྲཱི་ཤྲཱི་སྭསྟི་སིདྡྷི་ཛ་ཡན་ཏུ། རབ་དཀར་བསོད་ནམས་ཤིང་རྟས་སྲིད་ན་མངོན་མཐོ་གདོང་བཞི་པ་དང་དེ་བཞིན་ཤིས་བརྗོད་ཉན། །དྲག་པོ་རྣམ་གནོན་ཤེ་ཥ་འཁོར་ལོས་སྒྱུར་སོགས་ལྷ་དབང་ཀླུ་མཆོག་མི་ཡི་བདག་རྣམས་ཀྱིས། །ཁེངས་པའི་ལག་པད་ཟུམ་པའི་གཙུག་ནོར་འོད་ཀྱིས་གང་གི་ཞབས་སེན་ཟླ་ཚེས་མངོན་མཛེས་པའི། །མཚོ་སྐྱེས་རྡོ་རྗེ་འགྲོ་བའི་བླ་མས་དུས་གསུམ་ཀུན་ཏུ་དགེ་བའི་ཤིས་པ་སླར་སྩོལ་ཅིག །མཁན་སློབ་ཆོས་རྒྱལ་སྤྲུལ་པའི་ལོ་པཎ་དེད་དཔོན་འཕགས་པའི་ཚོགས་རྣམས་ཀྱིས། །ཐུགས་བསྐྱེད་བ་དན་སྒྲེང་བའི་རྣམ་དཔྱོད་གྲུ་ཡིས་འཕགས་ཡུལ་རིན་འབྱུང་ལས། །མཁས་གྲུབ་ཀླུ་མཆོག་བྱེ་བའི་གཙུག་ནོར་ངེས་གསང་སྙིང་པོ་སྒྲུབ་བརྒྱུད་བརྒྱད། །ཉེར་དྲངས་བསིལ་ལྗོངས་རྒུད་པའི་དབུལ་བསལ་ཐར་གྲོལ་འབྱོར་དགུས་ཕྱུག་པར་བྱས། །གྲགས་པའི་གཏེར་གྱུར་མ་སྨད་{རྨད}ཡོན་ཏན་འབུམ་ཕྲག་རླབས་ཕྲེང་ཆེར་གཡོ་ཞིང་། །རླབས་ཆེན་ཕྲིན་ལས་གཏིང་མཐའ་དཔོག་མིན་རིག་འཛིན་པཎ་གྲུབ་རྒྱ་མཚོ་ཡི། །ཤེར་བརྩོན་མཐུ་ཡིས་རིས་བྲལ་ཐུབ་བསྟན་བཤད་སྒྲུབ་སྙིང་པོའི་ས་ཆེན་ཁྱོན། །དུས་ཀྱི་མཐར་ཡང་མི་ནུབ་བརྟན་པའི་ངོ་མཚར་བཀའ་དྲིན་སུ་ཡིས་འཚོབ། །དེང་སང་ཁ་ཅིག་རྟོག་གེར་མངོན་འཆེལ་ངེས་དོན་ཟབ་མོར་རྒྱབ་ཀྱིས་ཕྱོགས། །ལ་ལ་རྨོང་ཞེན་བདག་བསྟོད་གཞན་སྨོད་ཆགས་སྡང་ཆོས་ཀྱི་སྙིང་པོར་མཛིན། །ཚུལ་དེ་གཉིས་ཀའང་བཟང་པོ་མ་ལགས་དམ་པས་སྨད་འོས་བདུད་ཀྱི་ལས། །དེས་ན་གསུང་རབ་ཐམས་ཅད་གདམས་པར་ཤར་བའི་ཐོས་སྒོམ་གནད་སྨིན་གཅེས། །ཁྲིམས་གཙང་འཛིན་མའི་གཞི་ལ་རྣམ་གསུམ་ཤེས་རབ་གྲོང་ཁྱེར་བཀོད་ལེགས་ཤིང་། །ཆོས་སྤངས་དགྲ་ཡིས་མི་བརྫི་རྟོན་པ་བཞི་ཡི་ལྕགས་རི་མུ་ཁྱུད་བརླིང་། །གཟུངས་དང་ཏིང་འཛིན་འབྱོར་ཚོགས་རྒྱ་ཆེ་གཞན་ཕན་བསྡུ་བཞིའི་ཕྱག་ཡངས་པའི། །བཤེས་གཉེན་མཆོག་དེ་གང་ན་བཞུགས་ཀྱང་ལྷར་བཅས་སྐྱེ་དགུས་མཆོད་པར་འོས། །ཉོན་མོངས་ཉེས་པའི་དྲི་མས་ཡོངས་བཏང་ཕུལ་བྱུང་མཁྱེན་བརྩེའི་འོད་ཟེར་གྱིས། །ས་གསུམ་རྒུད་པའི་མུན་བསལ་ངན་འགྲོའི་ལྡེང་ཀ་སྐེམ་པའི་ཕྲིན་ལས་ཀྱིས། །བདུད་རིགས་འབྱུང་བྱའི་དགའ་བའི་མིག་ཟུམ་སྐལ་བཟང་ཐར་གྲོལ་པདྨོའི་ཚལ། །ཆེས་ཆེར་བཞད་ནུས་བཤེས་གཉེན་ཉིན་མོར་བྱེད་དེ་སུ་ཡིས་བསྔགས་མི་བྱེད། །དམ་པའི་རྣམ་ཐར་གཟུགས་རྒྱན་རང་བཞིན་ཡོན་ཏན་ལྡན་པའི་སྐྱེས་བུའི་བྱད། །སྡེབ་ལེགས་ཚིག་གི་མེ་ལོང་ལ་འཕོས་དེ་ཡིས་དང་བའི་དད་པ་འཕེལ། །དེས་ཀྱང་ཐར་པའི་སྲོག་རྩ་རླིང་བྱེད་དེ་ལས་དོན་གང་ཆེ་བ་སུ། །དེས་ན་བདག་བློ་དམན་ཡང་ཚུལ་འདི་བགྱིད་ལ་གཅིག་ཏུ་སྤྲོ་བ་བརྟས། །འོན་ཀྱང་འཕགས་པའི་རྣམ་ཐར་མཁའ་ལྟར་ཤིན་ཏུ་རྒྱ་ཆེ་གཏིང་ཟབ་པ། །བདག་ལྟ་བློ་ཆུང་སྦྲང་བུའི་རྩལ་གྱིས་བགྲོད་རློམ་མཁས་པའི་བཞད་གད་གནས། །དེ་ལྟ་ན་འང་སྐྲ་རྩེའི་ཆབ་ཀྱིས་རྒྱ་མཚོ་ཆེན་པོའི་རོ་ཤེས་ལྟར། །ཉུང་ངུར་བརྗོད་པ་འདིས་ཀྱང་ཕྱོགས་ཙམ་མཚོན་སླད་འགལ་བ་མེད་སྙམ་བགྱིད། །བདག་གི་བླ་མ་ཐེག་དང་གྲུབ་མཐའ་རྒྱ་མཚོའི་ཕ་རོལ་སོན་གྱུར་པས། །གསར་རྙིང་ཆོས་ལ་ཕྱོགས་རིས་མི་མངའ་ཡོངས་རྫོགས་བསྟན་པའི་ཉི་མ་དངོས། །དེ་སླད་དམ་པའི་དྲིན་གྱིས་ཆོས་སྤངས་སྒྲུབ་པའི་སྙིང་ཁམས་བདག་ལ་མེད། །དེས་ན་བརྗོད་པ་འདི་ཡང་དོན་ལྡན་གཟུར་གནས་ཀུན་དགའི་གསོས་འགྱུར་སྙམ། །འོན་ཀྱང་མ་རྟོགས་ལོག་རྟོག་ཕྱོགས་རྟོགས་བདག་བློ་རྨོངས་པའི་དྲི་མ་ཡིས། །བསླད་དང་ཧ་ཅང་ཚིག་ཉོག་མང་དང་ཧ་ཅང་བསྡུས་པའི་སྐྱོན་ལ་སོགས། །ནོངས་གྱུར་གང་མཆིས་མཁས་པའི་སྤྱན་སྔར་སྙིང་ནས་འགྱོད་པས་བཤགས་བགྱིད་ན། །དམ་པ་རྣམས་ཀྱིས་བརྩེ་བས་རྗེས་དགོངས་དག་ཚངས་ཁྲུས་ཀྱིས་བགྲུང་བར་མཛོད། །ཚུལ་འདིར་འབད་པའི་བསོད་ནམས་ཉུང་ཟད་དེ་རིང་བདག་གིས་འཐོབ་པ་དང་། །དུས་གསུམ་བྱས་བསགས་རྣམ་དཀར་ཆུ་ཀླུང་ཇི་སྙེད་གཅིག་ཏུ་བསྡོམས་པའི་རྒྱུན། །བྱང་ཆེན་རྒྱ་མཚོར་ལེགས་ཞུགས་དེ་མཐུས་འགྲོ་ལ་ཕན་བདེ་འབྱུང་བའི་སྒོ། །མཚུངས་མེད་ཐུབ་པའི་བསྟན་མཆོག་སྲིད་མཐའི་བར་དུ་མི་ཉམས་གནས་གྱུར་ཅིག །མི་ཕམ་རྒྱལ་བའི་དགོངས་པ་ལེགས་རྟོགས་སྤོབས་པ་མི་ཟད་འཇམ་པའི་དབྱངས། །ཕྱོགས་ལས་རྣམ་རྒྱལ་བསྟན་པ་རྒྱ་མཚོའི་མགོན་གྱུར་མཆོག་དང་རིས་བྲལ་གྱི། །ཐུགས་བསྐྱེད་བརྩོན་པའི་ཕྲག་པས་རྒྱལ་བསྟན་ས་ཆེན་འདེགས་པའི་ཁུར་བཟོད་པའི། །མཁས་གྲུབ་ཁྱབ་འཇུག་གཟུགས་ཅན་དེ་དག་བསྐལ་བརྒྱར་ཞབས་པད་བརྟན་གྱུར་ཅིག །ངེས་འབྱུང་འཛིན་མའི་གཞི་ལས་ཉེར་འཁྲུངས་འཕགས་ཚོགས་འདུས་པའི་འདབ་སྟོང་ཚལ། །ཕྱོགས་ལྷུང་འཁྲུགས་རྩོད་རྡོ་རྗེའི་ཆར་དང་འཆལ་སྤྱོད་བ་མོས་རྒུད་མིན་པར། །བསླབ་གསུམ་ཡོན་ཏན་བཟང་པོའི་ཀེ་སར་མཁས་ཚུལ་དགུ་ཡི་ཟིལ་དངར་གྱིས། །ཆེས་ཆེར་གཏམས་པའི་བསུང་ཞིམ་དང་འགྲོགས་ཐུབ་བསྟན་མཚོ་ཆེན་མཛེས་གྱུར་ཅིག །ལྟ་བ་ངན་ཞེན་དུག་ཆུས་རབ་མྱོས་སྡང་བའི་མཚོན་འཁོར་དྲག་བསྐྱོད་པའི། །རྒྱལ་བསྟན་ཡུལ་འཁོར་འཇོམས་ལ་མངོན་ཕྱོགས་བཟློག་དཀའ་ཀླ་ཀློ་གླང་པོའི་དཔུང་། །མཆོག་གསུམ་བདེན་མཐུ་གདོང་ལྔའི་སྡེར་མོས་མ་ལུས་མིང་གི་མཐར་བྱས་ནས། །ཆོས་རྒྱལ་དཔག་བསམ་དབང་པོའི་གྲིབ་བསིལ་སྣུམ་པོར་འགྲོ་ཀུན་ངལ་འཚོར་ཤོག །ལས་ཉོན་མུན་པས་རབ་སྒྲིབ་འཁོར་བའི་གཅོང་རོང་སྟུག་པོར་འཁྱམས་པ་རྣམས། །དེང་ནས་བཤེས་གཉེན་ཟླ་འོད་དང་འགྲོགས་རྣམ་དག་དགེ་བཅུའི་གཞུང་ལམ་ཆེར་། །ཉེར་ཞུགས་ངན་འགྲོའི་གཡང་ས་ཀུན་བཀག་མཐོ་རིས་སྒོ་འཕར་ཡངས་ཕྱེས་ནས། །ཐམས་ཅད་མཁྱེན་པའི་ཁང་བཟང་མཆོག་ཏུ་འགྲོ་འདི་མྱུར་བར་འཇུག་གྱུར་ཅིག །བདག་ཀྱང་དེང་ནས་རྣམ་གཡེང་འདུ་འཛིའི་དགྲ་བོོ་ཐམས་ཅད་ཕམ་བྱས་ནས། །འདོད་ཆུང་ཆོག་ཤེས་འཕགས་པའི་རིགས་དང་ནོར་བདུན་ཡོན་ཏན་འབྱོར་པས་ཕྱུག །དབེན་གསུམ་ལྗོན་པའི་གྲིབ་བསིལ་ལ་བརྟེན་སྒྲུབ་བརྒྱུད་བརྒྱད་ཀྱི་ལམ་བཟང་ལས། །དཀའ་བ་མེད་པར་གདོད་མའི་གསང་མཆོག་ཚེ་འདི་ཉིད་ལ་འགྲུབ་གྱུར་ཅིག །སྐབས་འགར་དཔལ་ལྡན་པདྨ་ལས་འཁྲུངས་རྒྱལ་བའི་བྱིན་མཐུ་རྟ་ལྗོངས་གཟིས། །སྙིང་ལ་ཉལ་བའི་ཀུན་རྨོངས་མུན་བཅིལ་བློ་མཆོག་སྤོབས་པའི་ཨུཏྤལ་དང་། །ལེགས་བཞད་རྩོད་འཆད་རྩོམ་པའི་སྦྲང་རྩིས་བློ་གསལ་ར་ཡིག་གཉིས་པའི་ཚོགས། །ལུང་རྟོགས་ཡོན་ཏན་ལུས་སྟོབས་རྒྱས་བྱས་མཆོག་བསྟན་སྐྱེད་ཚལ་མཛེས་བྱེད་ཤོག །ཇི་སྲིད་ནམ་མཁའ་གནས་པ་དེ་སྲིད་མཐའ་ཀླས་གདུལ་བྱའི་ཁམས་གནས་པས། །དེ་སྲིད་བདག་ཀྱང་ས་སོགས་འབྱུང་བ་ཆེ་ལྟར་སྐྱོ་བའི་སྐབས་མེད་པར། །ཀུན་བཟང་སྤྱོད་པ་རྒྱ་མཚོའི་རྗེས་འགྲོ་ཡིད་ཅན་རེ་བ་རྫོགས་བྱེད་ཅིང་། །སྲས་བཅས་རྒྱལ་བའི་མཛད་པ་མ་ལུས་བདག་ཉིད་གཅིག་པུས་སྒྲུབ་གྱུར་ཅིག །གང་དག་བདག་ཉིད་མཐོང་ཐོས་དྲན་དང་བཟང་ངན་ལས་ཀྱིས་འབྲེལ་གྱུར་པ། །དེ་དག་སྐྱེ་ཀུན་ལུས་སེམས་རྡོ་རྗེ་ལྟར་བརྟན་བདུད་དགྲའི་འཚེ་བ་བྲལ། །འཁོར་ལོ་བཞི་ཡི་ཁྱད་པར་གྱིས་འབྱོར་ལམ་གྱི་རྟེན་འབྲེལ་ཀུན་འགྲིགས་ནས། །དཀའ་བ་མེད་པར་རྫོགས་སྨིན་སྦྱངས་པ་རྒྱ་མཚོ་ལྟ་བུར་འཇུག་གྱུར་ཅིག །བཀྲ་ཤིས་མཁའ་ལ་སྲས་བཅས་རྒྱལ་བའི་ཐུགས་རྗེའི་ཆུ་ཁུར་ཆེར་དཀྲིགས་པས། །བཀྲ་ཤིས་དགེ་མཚན་བྱེ་བའི་དབྱར་གྱི་རྔ་གསང་དར་དིར་སྒྲོགས་པ་དང་། །བཀྲ་ཤིས་དཀར་ཕྱོགས་ལྷ་ཀླུ་རྨ་བྱ་དགའ་བའི་ཟློས་གར་བསྒྱུར་པ་ཡི། །བཀྲ་ཤིས་རྣམ་འཕེལ་ཕྱོགས་དུས་ཀུན་ན་རྫོགས་ལྡན་དཔྱིད་དཔལ་རྒྱས་གྱུར་ཅིག །ཅེས་གསང་ཆེན་སྔ་འགྱུར་རྡོ་རྗེ་ཐེག་པ་གཙོ་བོར་གྱུར་པའི་སྒྲུབ་བརྒྱུད་ཤིང་རྟ་ཆེན་པོ་བརྒྱད་རྗེས་འབྲང་དང་བཅས་པའི་བྱུང་བ་བརྗོད་པའི་གཏམ་མདོར་བསྡུས་ལེགས་བཤད་པདྨ་དཀར་པོའི་རྫིང་བུ་ཞེས་བྱ་བ་འདི་ནི། ཀུན་མཁྱེན་རྡོ་རྗེ་འཆང་རྣམ་གཉིས་ཀྱི་ཚད་མེད་པའི་བཀའ་དྲིན་གྱིས་རྗེས་སུ་བསྐྱངས་པའི་ཤཱཀྱའི་དགེ་ཚུལ་འགྱུར་མེད་པདྨ་རྣམ་རྒྱལ་ལམ། མིང་གཞན་ཀུན་མཁྱེན་བླ་མ་རྡོ་རྗེ་གཟི་བརྗིད་ཀྱི་ཞལ་སྔ་ནས་འགྱུར་མེད་པདྨ་བསྟན་འཛིན་མཁས་གྲུབ་རྒྱ་མཚོའི་དབང་པོ་ཞེས་སུ་སྩལ་པའི་རྨོངས་རྟུལ་སྙོམ་ལས་པས་སྔར་རང་ལོ་ཉེར་ལྔ་པའི་ཐོག་ཏུ་བྲིས་པ་ལ་ཕྲི་བསྣན་ཅུང་ཟད་དང་བཅས་ཏེ། བདག་ཅག་གི་སྟོན་པ་དྲག་པོ་ལྕགས་སྤྲེལ་ལ་བལྟམས་ནས་ལོ་ཉིས་སྟོང་བརྒྱད་བརྒྱ་བདུན་ཅུ་དང་། ཨོ་རྒྱན་སངས་རྒྱས་གཉིས་པ་གངས་ལྗོངས་གདུལ་བྱའི་མགོན་དུ་ཕེབས་ནས་བགྲང་བྱ་ཆིག་སྟོང་གྱ་བརྒྱད་འདས་པ། སངས་རྒྱས་ཀྱི་བསྟན་པ་ལྔ་བརྒྱ་ཕྲག་བཅུ་ལས། ཚུལ་ཁྲིམས་ཀྱི་ལེའུའི་ཉིས་བརྒྱ་དང་དགུ་བཅུའི་མཚམས་སུ་བསླེབས་པ། འཕགས་ཡུལ་གྱི་སྐད་དུ་སཱ་ངྷ་ར་ཎ་ཞེས་འབོད་ཅིང་སྟོད་འགྲེལ་ལས་གངས་ཅན་པའི་སྐད་དུ་ཐུན་མོང་ཞེས་པ་དང་། ཤར་ཕྱོགས་རྒྱ་ནག་གཏང་འཁུན་གྱི་གྲོང་ཁྱེེར་དུ་གིང་ཟུའི། འབྱུང་རྩིས་ལས་དབང་ཐང་དང་བསྟུན་ནས་ལྕགས་ཕོ་ཁྱིར་འབོད་པའི་ལོའི་ནག་པ་ཉ་བའི་འཕེལ་ཕྱོགས་ཀྱི་བཟང་པོ་གཉིས་པར། རང་གནས་དཔལ་ཞེ་ཆེན་བསྟན་གཉིས་དར་རྒྱས་གླིང་གི་བླ་བྲང་ཕུན་ཚོགས་ཡོངས་འདུའི་སྟེང་ཤག་{གཤག}བཀྲ་ཤིས་འཆི་མེད་འོད་སྣང་དུ་ཞལ་བཤུས་གྲུབ་པར་བགྱིས་པ་སྟེེ། འདིས་ཀྱང་བསྟན་པ་རིན་པོ་ཆེ་ཡུན་དུ་གནས་པའི་རྒྱུར་གྱུར་ཅིགདགེའོ། །དགེའོ། །དགེའོ།། །།