ཞར་བྱུང་ཚིག་སྡུད་བཤད་པ་དང་བཅས་དགུ་{བཅུ}ལས།

༈ འཇམ་དཔལ་དབྱངས་དང་ཚངས་སྲས་མ། །གངས་ཅན་ཡང་དག་མཁས་པ་ལ། །ཕྱག་བྱས་རང་དང་སྐལ་མཉམ་འགར། །སྨན་སླད་སླར་ཡང་གསལ་བར་བཤད། །དེ་ཡང་འདི་ལྟར་རྗེས་སུ་ཐོས་ཏེ། ལྷ་མོ་དྲི་མ་མེད་པའི་མདོ་ལས། ང་ཡོངས་སུ་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་ན་གདོང་དམར་ཅན་གྱི་ཡུལ་དུ་དམ་པའི་ཆོས་དར་བར་འགྱུར་རོ། །ཞེས་དང་། དུས་འཁོར་འགྲེལ་ཆེན་ལས་བོད་ཀྱི་ཡུལ་དུ་ནི་ཐེག་པ་གསུམ་བོད་ཀྱི་སྐད་ཀྱིས་བྲིས་ཏེ། ཞེས་ལུང་བསྟན་པ་དང་མཐུན་པར། ཤཱཀྱ་ལི་ཙ་བཱིའི་རིགས་ལས་བྱོན་ཞིང་། འཇམ་དཔལ་རྩ་རྒྱུད་ལས་རྒྱལ་པོ་མིའི་ལྷ་ཞེས་བསྔགས་པའི། ཆོས་སྐྱོང་བའི་རྒྱལ་པོ་སྲོང་བཙན་སྒམ་པོའི་སྐུ་རིང་ལ། འཕགས་པ་འཇམ་དཔལ་གྱི་རྣམ་པར་འཕྲུལ་བ་ལོ་ཙཱ་བ་ཆེན་པོ་ཐུ་མི་སཾ་བྷོ་ཊ་རྒྱ་གར་འཕགས་པའི་ཡུལ་དུ་བརྟོལ་ཏེ། པཎྜི་ཏ་ལྷ་རིག་པའི་སེངྒེ་དང་། བྲམ་ཟེ་ལི་བི་ཀ་ར་སོགས་བསྟེན་ནས་ཕྱི་ནང་གི་རིག་པའི་གནས་ཐམས་ཅད་ཁོང་དུ་ཆུབ་པར་མཛད་ནས་སླར་བོད་དུ་བྱོན་པའི་ཚེ། སྐུ་མཁར་མ་རུར་ལཱཉྩ་དང་ནཱ་ག་རའི་ཡི་གེར་དཔེར་བྱས་ནས་བོད་ཀྱི་ཡིག་གཟུགས་བརྩམས་ཏེ་བོད་ཡི་གེ་མེད་པ་ལ་ཡི་གེའི་སྲོལ་བཏོད། སུམ་ཅུ་པ་དང་རྟགས་ཀྱི་འཇུག་པ་གཙོ་བོར་གྱུར་པའི་བསྟན་བཅོས་བརྒྱད་མཛད་ནས་སྨག་ལ་སྒྲོན་མེ་བཏེགས་པ་བཞིན་དུ་ཤཱཀྱའི་བསྟན་པ་བྱང་ཕྱོགས་སུ་གསལ་བར་མཛད་པ་ཡིན་ཏེ། རྗེ་ཞྭ་ལུ་ལོ་ཆེན་གྱིས། བོད་ཡུལ་དབུས་ཀྱི་རྒྱལ་པོ་མཆོག །གནམ་རི་སྲོང་བཙན་ཡན་ཆད་ལ། །བོད་ལ་ཡི་གེ་མེད་ཅེས་གྲགས། །ཆོས་རྒྱལ་སྲོང་བཙན་སྒམ་པོའི་དུས། །མཁན་པོ་ཐོན་མི་སམྦྷོ་ཊས། །ལཱཉྩའི་ཡི་གེར་དཔེར་མཛད་ནས། །དབྱངས་ཡིག་ཨི་ཨུ་ཨེ་ཨོ་བཞི། །གསལ་བྱེད་ཀ་སོགས་སུམ་ཅུ་མཛད། །ཅེས་དང་། བཀའ་སྲོལ་དེ་ཉིད་ལ་བརྟེན་ནས། །ལོ་པཎ་སྐྱེས་མཆོག་དུ་མ་ཡིས། །རྒྱ་གར་རྒྱ་ནག་ཁ་ཆེ་དང་། །ལི་དང་བལ་པོའི་ཡུལ་སོགས་ནས། །ཐུབ་པའི་གསུང་རབ་སྣ་ཚོགས་བསྒྱུར། །བརྡར་ཡང་མི་འདྲ་སྣ་ཚོགས་གྱུར། །ཆོས་རྒྱལ་རལ་པ་ཅན་གྱི་དུས། །སྐ་ཅོག་ཞང་སོགས་མཁས་མང་གིས། །རྒྱལ་པོའི་བཀས་བསྐུལ་གསར་བཅད་ཀྱི། །སྐད་ཀྱི་བརྡའ་སྦྱར་གཏན་ལ་ཕབ། །སླད་ནས་རིན་ཆེན་བཟང་པོ་དང་། །བློ་ལྡན་ཤེས་རབ་ལ་སོགས་པ། །མཁས་མཆོག་རྣམས་ཀྱང་དེ་ལ་བརྟེན། །ཞེས་གསུངས་ཏེ། འདིས་ནི་སྔོན་གྱི་ལོ་པཎ་བྱང་ཆུབ་སེམས་དཔའ་ས་ཆེན་པོ་ལ་བཞུགས་པ་རྣམས་ངེས་པའི་ཚིག་སོ་སོ་ཡང་དག་པར་རིག་པ་ལ་དབང་འབྱོར་པར་བསྟན་པ་ཡིན་ཞིང་། གཞན་ཡང་། གང་ཞིག་གསུང་རབ་རྣམས་ཀྱི་དོན། །གཏན་ལ་འབེབས་ན་སྨོས་ཅི་དགོས། །འཇིག་རྟེན་ཕལ་པའི་རྣམ་གཞག་ཅིག །བྱེད་ཀྱང་ཚིག་གི་སྦྱོར་བ་གཅེས། །འདི་ནི་མཁས་རྨོངས་འབྱེད་པ་སྟེ། །དོན་འདི་ཁོང་དུ་ཆུད་པའི་མི། །མང་པོ་འདུས་པའི་ནང་དག་ཏུ། །མཁས་པའི་སྟན་ལ་འདུག་པར་དབང་། །ཞེས་གསུངས་པ་བཞིན། དགོས་པ་དེ་ལྡན་གྱི་གཞུང་རྩ་བ་དེང་སང་རྒྱུན་བཞུགས་སུམ་རྟགས་དང་དེའི་རྗེས་འབྲང་སྔོན་གྱི་དམ་པ་རྣམས་ཀྱིས་ལེགས་པར་བཤད་པའི་གསུང་གི་སྣང་བ་ལ་བརྟེན་ནས་རང་འདྲའི་བློ་གྲོས་གསར་བུ་པ་རྣམས་ལ་སྨན་པའི་བསམ་པས་ཡིག་སྡེབ་ཀྱི་སྦྱོར་བ་ཉུང་ཤས་ཤིག་འགོད་པར་འདོད་ནས། ཡི་གེའི་ངོ་བོ་ངེས་ཚིག་སྐྱེ་གནས་དང་། །བྱེད་རྩོལ་དབྱེ་བསྡུ་འཇུག་ཚུལ་རྣམ་དབྱེ་ཕྲད། །སྡུད་ཚུལ་དང་བཅས་རྣམ་གྲངས་བཅུ་རུ་འདོད། །ཅེས་གོང་དུ་སྡོམ་གྱིས་བསྡུས་ཏེ། དེ་ཡང་། ཡི་གེའི་ངོ་བོ། ངེས་ཚིགསྒྲའི་སྐྱེ་གནས། རྐྱེན་གྱི་བྱེད་རྩོལ། གྲངས་ཀྱི་དབྱེ་བསྡུ། ཇི་ལྟར་འཇུག་པའི་ཚུལ། དོན་གྱི་རྣམ་དབྱེ། ཚིག་གི་ཕྲད། ཞར་བྱུང་ཚིག་སྡུད་བཤད་པ་དང་བཅས་དགུ་{བཅུ}ལས། དང་པོ་ངོ་བོ་ནི། ངོ་བོ་ཨེ་ཝཾ་ཐབས་ཤེས་ཟུང་དུ་འཇུག །ཅེས་སྨོས་ཏེ། དེ་ཡང་དབྱིངས་སྐྱེ་བ་མེད་པ་ཤེས་རབ་སྟོང་པ་ཉིད་མཚོན་པའི་ཡེ་གེ་ཨེ་དང་། ཐབས་བདེ་བ་ཆེན་པོ་འགག་མེད་ཀུན་ཁྱབ་ཀྱི་ཡེ་ཤེས་མཚོན་བྱེད་ཝཾ་སྟེ། དོན་ལ་དབྱིངས་དང་ཡེ་ཤེས་སམ་ཐབས་དང་ཤེས་རབ་ཟུང་དུ་ཆུད་པའི་ལྷག་པའི་བདེན་གཉིས་དབྱེར་མེད་གནས་ལུགས་བསམ་གྱིས་མི་ཁྱབ་པ་སྒྱུ་འཕྲུལ་དྲྭ་བ་ཆེན་པོའི་འཁོར་ལོ་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་སྣང་སྟོང་ཐབས་ཤེས་མཉམ་པ་ཉིད་རང་སེམས་ལྷན་ཅིག་སྐྱེས་པའི་ཡེ་ཤེས་ཀུན་བྱེད་རྒྱལ་པོ་ཉིད་ལ་ཡི་གེ་ཞེས་བྱ་སྟེ། སྒྱུ་འཕྲུལ་ལས། ཨ་ནི་སྟོང་དང་མི་སྟོང་གི། །དབུ་མའང་དམིགས་སུ་ཡོད་མ་ཡིན། །ཐམས་ཅད་མིང་ཙམ་སངས་རྒྱས་ཀུན། །ཡི་གེའི་ཕྲེང་བ་ཉིད་ལ་གནས། །ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོར་དེ་ཉིད་ངེས། །ཨེ་མ་ཧོ་ངོ་མཚར་ཡ་མཚན་གྱི། །འཕྲུལ་ཆེན་བཞི་བཅུ་རྩ་ལྔའི་མིང་། །ཚིག་རྣམས་མ་ལུས་འཛིན་པའི་གནས། །སྣ་ཚོགས་དོན་ཆེན་སྨྲ་ཞིང་སྟོན། །དངོས་མེད་ཡི་གེའི་རང་བཞིན་སེམས། །བདག་མེད་མཐའ་བྲལ་མི་དམིགས་ཀྱང་། །དབྱིབས་དང་ཁ་དོག་མིང་ཚིག་གི། །རོལ་པ་ཅིར་ཡང་སྤྲུལ་ཞིང་སྟོན། །ཞེས་དང་། སྤྱི་མདོ་ལས། རབ་འབྱོར་ཡི་གེ་ནི་དོན་དམ་པར་མ་སྐྱེས་པ་སྟེ་ཨའི་ངོ་བོ་ཉིད་དོ། །ཨའི་ངོ་བོ་གང་ཡིན་པ་དེ་ནི་སེམས་ཀྱི་རང་བཞིན་ཏེ། དངོས་པོ་དང་དངོས་པོ་མེད་པ་ཐམས་ཅད་ལས་ཡང་དག་པར་འདས་པའོ། །ཞེས་དང་། ཀུན་འདུས་ལས། དབྱིངས་ལས་ཨ་བྱུང་ཨ་ལས་ནི། །ཡི་གེ་སྣ་ཚོགས་རྣམས་སུ་འཕྲོ། །ཞེས་སོ། །དེས་ན་ཡུལ་ཆོས་ཀྱི་དབྱིངས་ལ་ཡུལ་ཅན་མཚན་མ་མེད་པའི་ཤེས་རབ་ཀྱིས་བྱ་རྩོལ་མེད་པར་བྲིས་པས་ན་ཡི་གེ་ཞེས་བྱ་སྟེ། སྒྱུ་འཕྲུལ་ལས། དབྱིངས་ལ་དབྱིངས་ཀྱིས་བྲིས་པ་སྟེ། །དེ་ཕྱིར་ཡི་གེ་ཞེས་ནི་བརྗོད། །ཅེས་སོ། །དེ་ཉིད་གདུལ་བྱའི་སྣང་ཚུལ་གྱི་དབང་དུ་བྱས་ན། རྒྱུ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡེ་ཤེས་རྡོ་རྗེའི་བྱིན་རླབས་དང་། རྐྱེན་གདུལ་བྱའི་དཀར་པོ་རྣམ་པར་སྨིན་པའི་དབང་ལས། རྟེན་འབྱུང་འགག་པ་མེད་པའི་རང་རྩལ་ཅི་ཡང་འཆར་བས་ན། མཁའ་ཁྱབ་ཀྱི་གདུལ་བྱ་རྒྱ་མཚོ་གནས་སྐབས་དང་མཐར་ཐུག་གི་ཕན་བདེའི་དཔལ་ཆེན་པོ་ལ་སྦྱོར་བའི་ཕྱིར་ངོ་བོ་ཡེ་ཤེས་ཀྱི་ཕྱག་རྒྱ་རྣམ་པ་ཡི་གེའི་གཟུགས་སུ་འཕྲུལ་ནས་འགྲོ་བའི་དོན་མཛད་པ་ཡིན་ཏེ། མདོ་ལས། ལྔ་བརྒྱ་ཐ་མར་གྱུར་པའི་དུས། །ང་ཉིད་ཡི་གེའི་གཟུགས་སུ་སྣང་། །ང་ཡིན་སྙམ་དུ་ཤེས་བྱོས་ལ། །དེ་ཚེ་ང་ལ་གུས་པ་བསྐྱེད། །ཅེས་དང་། ཡི་གེ་སངས་རྒྱས་སྤྲུལ་པ་སྟེ། །བསྟན་པ་ནུབ་ན་མི་འབྱུང་ཞིང་། །མུ་སྟེགས་ཀླ་ཀློ་སོགས་ལ་མེད། །དེ་ཕྱིར་ཡི་གེ་སྤྲུལ་པ་ཡིན། །ཞེས་སོ། །ཐ་སྙད་ཀྱི་དབང་དུ་བྱས་ནས་ཡི་གེས་དོན་སྟོན་པ་ནི། ཡི་གེ་འཇུག་པའི་གནས་བརྒྱད་ལ་བརྟེན་པ་ཡིན་ཏེ། སྒྲ་དང་། སྐད་དང་། མིང་དང་། མཚན་མ་དང་། བརྡ་དང་། ཐ་སྙད་དང་། ཚིག་དང་། དོན་རྣམས་སོ། །དེ་ལ་སྒྲ་ནི། སྤྱིར་ཟིན་མ་ཟིན་སོགས་ཀྱི་དབྱེ་བ་ཡོད་ཀྱང་། འདིར་ཟིན་པའི་སྒྲ་སེམས་ཅན་དུ་སྟོན་ཅིང་ལུང་སྟོན་པའོ། །སྐད་ནི། ལེགས་སྦྱར་ལ་སོགས་པ་ཡུལ་སོ་སོའི་སྐད་དེ། སྤྱིར་ཡུལ་དབུས་ལས་མཐའ་འཁོབ་པའི་སྐད་རྣམས་ཟུར་ཆག་ཏུ་བསྡུ་བར་གསུངས་པ་སོགས་ཡོད་ཀྱང་། བྱེ་བྲག་བོད་ཀྱི་སྐད་ནི། སྒྲ་དག་སྐད་སྙན་སཾ་ཀྲྀ་ཏ་དང་མཚུངས། ཞེས་མཁས་པས་བསྔགས་པར་མཛད་པའོ། །མིང་ནི། ཆོས་མངོན་པའི་ལུགས་ཀྱི་ཡི་གེ་འདུས་པའི་བདག་ཉིད་ཅན་དང་། བརྡ་སྤྲོད་པའི་ལུགས་ལ། རྣམ་དབྱེའི་མཐའ་ཅན་ནི་ཚིག་གོ །རྣམ་དབྱེ་མེད་པ་ནི་མིང་ངོ་ཞེས་འབྱུང་ཡང་། བོད་སྐད་ལ་དེ་འདྲ་མི་འབྱུང་གཤིས་དོན་གྱི་ངོ་བོ་ཙམ་སྟོན་པའི་སྒྲ་སྟེ་ཀ་བ། བུམ་པ་སོགས་དངོས་མིང་བླ་དྭགས་སོ། །མཚན་མ་ནི། མིང་དེས་དོན་དེ་མཚོན་པར་བྱེད་ཅིང་སྣང་བར་ནུས་པའི་ཆ་སྟེ། བུམ་པ་ཞེས་བརྗོད་པས་ལྟོ་ལྡིར་གྱི་རྣམ་པ་མཚོན་ནུས་པ་ལྟ་བུའོ། །བརྡ་ནི། མིང་དང་མིང་ཅན་འབྲེལ་བར་བྱེད་པ། སྒྲ་དང་དོན་སྤྱིའི་རྣམ་པ་ཅན་ཏེ། དཔེར་ན་མེ་ཞེས་བརྗོད་དུས་དེ་གཉིས་ཀའི་བློ་ལ་ཚ་འབར་གྱི་རྣམ་པ་ཅན་གྱི་དོན་སྤྱི་འཆར་ཞིང་། དེ་ལ་བརྟེན་ནས་དོན་རང་མཚན་གྱི་ཡུལ་ལ་འཇུག་ལྡོག་བྱེད་པའོ། །ཐ་སྙད་ནི། དངོས་ལ་ཐ་སྙད་མེད་པ། འཇུག་ལྡོག་བྱེད་པའི་ཕྱིར་ནན་གྱིས་བཏགས་པ་སྟེ། གདུང་འདེགས་ཀྱི་ཤིང་ལ་ཀ་བ་ཞེས་བཏགས་ནས་བསྟན་པ་ན་འདི་ཀ་བ་ཡིན་ནོ་སྙམ་པའི་ཤེས་པ་ནི་བཏགས་པའི་ཤེས་པ་དང་། དེ་སླར་ཀ་བ་ཞེས་སྒྲར་བརྗོད་པ་ནི་བརྗོད་པ། དེས་གདུང་འདེགས་སོགས་ཀྱི་བྱ་བ་ལ་འཇུག་པར་བརྩམ་པ་ནི་འཇུག་པ་སྟེ། ཤེས་བརྗོད་འཇུག་གསུམ་ག་སྐྱེ་བར་བྱེད་པའི་གཞི་བརྡ་ལས་ཐོབ་པའི་བློ་དེའོ། །ཚིག་ནི། ཆོས་མངོན་པའི་ལུགས་ཀྱིས། མིང་འདུས་ནས་དོན་གྱི་ཁྱད་པར་བརྗོད་པ་སྟེ། འདུས་བྱས་མི་རྟག་ཅེས་པ་ལྟ་བུ་དང་། བརྡ་སྤྲོད་པའི་ལུགས་ཀྱིས་རྣམ་དབྱེ་ཏིང་སུ་པྲ་གང་རུང་གི་མཐའ་ཅན་དོན་གྱི་ངོ་བོ་དང་ཁྱད་པར་ཅི་རིགས་པ་བརྗོད་པའོ། །དོན་ནི། ཆོས་རྣམས་ཀྱི་གནས་ལུགས་ཇི་ལྟར་གནས་པ་ཉིད་དོ། །དེ་ལྟར་སྒྲ་སྐད་སོགས་བརྒྱད་པོ་དེ་དག་ལ་ཡི་གེའི་འཇུག་ཚུལ་ནི། སྒྲ་དོན་འདྲེས་འཛིན་གྱི་བློའི་དབང་གིས་ཏེ། བློ་དེ་སྐྱེ་བ་ལ་ཡང་། བརྡ་བྱེད་པའི་དུས་ན་ཤེས་པ་གཞན་ལས་ཁྱད་པར་དུ་བྱེད་པའི་ཆོས་ལྔ་དང་ལྡན་དགོས་ཏེ། དེ་ཡང་། དོན་ལ་དམིགས་པས་དོན་སྤྱིའི་ནུས་པ་སྐྱེད། སྒྲ་ལས་བྱུང་བས་སྒྲ་སྤྱིའི་རྣམ་པ་སྐྱེད། མཐུན་པར་སྣང་བ་དང་ཐུན་མོང་དུ་གྲགས་པ་གཉིས་ཀྱིས་ཞེན་པ་སྐྱེ་ཞིང་གཞན་ལ་གོ་བར་བྱེད་ནུས། མངོན་པར་ཞེན་པས་ནི་མིང་དང་མིང་ཅན་འབྲེལ་བར་བྱེད་པ་ཡིན་ནོ། །དེ་ཡང་གདུང་འདེགས་ཀྱི་ཤིང་མཐོང་ན་འདིའི་མིང་ཅི་སྙམ་པ་དང་། ཀ་བ་ཞེས་པའི་སྒྲ་ཐོས་ན་འདི་གང་གི་མིང་ཡིན་སྙམ་པའི་བློ་སྐྱེ་ལ། དེའི་ཚེ་གཞན་གྱིས་བརྡ་སྤྲད་པ་ན་མིང་དང་མིང་ཅན་འབྲེལ་བའི་ཤེས་པ་སྐྱེ། དེ་མངོན་སུམ་དུ་གྱུར་ནས་ཕྱིས་དེ་དང་འདྲ་བའི་རྣམ་པ་ལ་དེ་ཉིད་དུ་མངོན་པར་ཞེན་པ་སྐྱེ། དེ་ལས་སྒྲ་དོན་འདྲེས་རུང་གི་མངོན་ཞེན་ཁོང་དུ་ཆུད་པར་འགྱུར་ལ། གང་ཟག་བསྟན་བཅོས་ལ་བློ་མ་བྱང་བ་རྣམས་ཡི་གེ་སྟོན་པའི་གཟུགས་ལ་ཡི་གེ་ཉིད་དུ་འཛིན་པ་དང་། སྒྲ་སྤྱིའི་རྣམ་པའང་ཡིག་གཟུགས་ལ་ཞེན་ཅིང་གླེགས་བམ་དུ་བྲིས་པ་ལ་བརྗོད་ཡུལ་དུ་བྱེད་པ་ཡིན། སྨྲ་བ་པོ་དང་ཉན་པོ་བརྡ་ལ་བྱང་བ་དག་ལ་སྒྲ་བྱུང་གི་ཤེས་པ་སྐྱེ་ཚུལ་ནི་སྨྲ་བ་པོས་སྒྲ་དེ་བརྗོད་པ་ན་སྔོན་བརྡ་བྱེད་པའི་དུས་ཀྱི་ཁྱད་ཆོས་ཡན་ལག་ལྔ་ལ་ཚུལ་བཞིན་དུ་འདྲིས་པར་བྱས་པས་ཐ་སྙད་འདོར་ལེན་གྱི་སྐབས་ཚུལ་དེ་འབད་མེད་དུ་འབྱུང་སྟེ། སྨྲ་བ་པོས་སྒྲ་རང་མཚན་པ་བརྗོད་པའི་ཚེ་ཉན་པ་པོས་དང་པོར་སྒྲ་ཙམ་གྱི་རྣམ་པ། དེ་ནས་དོན་གྱི་རྣམ་རྟོགདེ་ནས་སྒྲ་དོན་འདྲེས་རུང་གི་བློ། དེ་ལས་སྣང་ཞེན་གྱི་དམིགས་པ། དེ་ནས་མཐུན་པར་སྣང་བའི་ཤེས་པ། དེ་ནས་མངོན་པར་ཞེན་པའམ་ཤེས་པའི་བློ་ཚུལ་བཞིན་སྐྱེ་བ་ཡིན་ལ། ཐུན་མོང་དུ་མ་གྲགས་པའི་ཡུལ་དབུས་པས་མཐའ་འཁོབ་པའི་སྒྲ་བརྗོད་པ་ལྟ་བུ་ལ་ནི་ཡན་ལག་མ་ཚང་བས་མཚན་ཉིད་འདི་ལྟར་འབྱུང་བ་མ་ཡིན་ནོ། །གཞན་ཡང་། དཔང་ལོ་ཆེན་པོས། རྣམ་རྟོག་དབང་གི་རླུང་གཡོས་ཤིང་། །དེ་ཡིས་གནས་དང་བྱེད་པ་དང་། །རྩོལ་བ་བསྐྱེད་དེ་དབུགས་དབྱུང་དང་། །ལྷན་ཅིག་ཡི་གེའི་གདངས་རྣམས་སྐྱེ། །ཞེས་གསུངས་པས། དང་པོར་བརྗོད་[འདོད་ཞུ་མཆན།] ཀྱི་རྣམ་རྟོག་སྐྱེ། དེའི་དབང་གིས་རླུང་གཡོས་ཤིང་། དེ་ལས་འཆད་འགྱུར་གྱི་གནས་དང་བྱེད་རྩོལ་གྱི་རྐྱེན་དང་འཕྲད་པ་ལས། དབུགས་ཕྱིར་དབྱུང་བ་དང་ལྷན་དུ་ཡི་གེའི་གདངས་རྣམས་སྐྱེ་བར་འགྱུར་ལ། གདངས་དེའང་མིག་འཛུམ་གཅིག་གི་ཚད་དུ་གནས་པ་ཡིན་ཏེ། རྣམ་འགྲེལ་ལས། ཡི་གེ་བདག་ཉིད་ཀུན་མཐའ་ཡང་། །མིག་འཛུམ་ཚད་དུ་གནས་པ་ཡིན། །ཞེས་གསུངས། ཞིབ་པར་ཐུང་རིང་ཤིན་ཏུ་རིང་བ་སོགས་སྒྲའི་བཀླག་ཐབས་སོགས་ལས་ཤེས་པར་བྱ་ལ། ཡི་གེའི་གཟུགས་ནི་རྒྱ་ཆེ་རོལ་པ་ལས་ཡི་གེའི་རྣམ་གྲངས་དྲུག་ཅུ་རྩ་བཞིར་གསུངས་པ་སོགས་ཡོད་ཀྱང་། འདིར་མཁོ་བ་ནི་གོང་བཤད་ཐུ་མིས་མཛད་པ་ཉིད་ཡིན་ལ། དེ་ཡང་དཔལ་དུས་ཀྱི་འཁོར་ལོ་སོགས་གསང་རྒྱུད་རྣམས་ལས་རྩ་དང་ཐིག་ལེའི་གཟུགས་སུ་གནས་པར་གསུངས་པ་བཞིན། ཡུལ་སོ་སོའི་མིར་རྩ་ཐིག་གི་ཡི་གེའི་གཟུགས་མི་འདྲ་བ་དང་། དེ་ལས་སྐད་ཀྱི་རིགས་ཐ་དད་སོ་སོར་འབྱུང་བའི་ཕྱིར། འཇམ་མགོན་ཐུ་མིས་རྩ་ཁམས་ཀྱི་ཡི་གེའི་གནས་ཚུལ་ཇི་བཞིན་པ་གཟིགས་པས། བོད་ཡིག་དབྱངས་བཞི་དང་། གསལ་བྱེད་སུམ་ཅུར་གྲངས་ངེས་པ་ལ། ནང་གསེས་ཀྱི་དབྱེ་བ། དབུ་ཅན། འབྲུ་མ། གཤར་མ། དཀྱུས་ཡིག་སོགས་སུ་དབྱེར་ཡོད་པ་སྟེ། མདོར་ན་ཡི་གེ་འདུས་པ་ལས་མིང་། མིང་འདུས་པ་ལས་ཚིགཚིག་དུ་མ་འདུས་པ་ལས་བརྗོད་བྱའི་དོན་རྫོགས་པར་སྟོན་པར་བྱེད་པ་ཡིན་ལ། འདི་གསུམ་དམ་པའི་ཆོས་མངོན་པ་ལས་ལྡན་མིན་འདུ་བྱེད་ཀྱི་ཕུང་པོར་བསྡུ་བར་བཞེད་དེ། བསྟན་བཅོས་ཆེན་པོ་ཤེས་བྱ་ཀུན་ཁྱབ་ལས་ཀྱང་། ཤེས་བྱའི་གཞི་མ་ཡི་གེའི་སྦྱོར་བ་སྟེ། །སྐད་དང་ཡི་གེའི་རིགས་གྱུར་མཐའ་ཡས་ཀྱང་། །རྩ་བ་དབྱངས་གསལ་གཉིས་ཡིན་སྒྲ་ཙམ་ནི། །རྣམ་སྨིན་སྐྱེས་མིན་རྒྱུ་མཐུན་རྒྱས་བྱུང་འདོད། །ཡི་གེའི་ངོ་བོ་སྐད་གདངས་མིག་འཛུམ་ཚད། །གཅིག་གཉིས་གསུམ་ཡུན་ཐུང་རིང་ཤིན་ཏུ་རིང་། །ཆ་ཤས་སྐད་ཅིག་རེ་རེ་གཞན་རྣམས་རྒྱུན། །ལྡན་མིན་འདུ་བྱེད་ཉིད་དུ་འཛོད་ལས་བཤད། །ཅེས་སོ། །གཉིས་པ་ངེས་ཚིག་ནི། ངེས་ཚིག་ཨཀྵ་ར་སྟེ་མི་འགྱུར་གསལ། །ཞེས་སྨོས་ཏེ། དེ་ཡང་ཇི་སྐད་དུ། མི་འགྱུར་བ་དང་གསལ་བར་བྱེད། །རྗོད་པར་བྱེད་དང་ནུས་ལྡན་ཕྱིར། །ཡི་གེ་ཞེས་ནི་བརྗོད་པ་ཡིན། །ཞེས་པ་ལྟར། ལེགས་སྦྱར་གྱི་སྐད་དུ་ཨཀྵ་ར་སྟེ་འགྱུར་མེད་དམ་མི་འགྱུར་བ་སྟེ། ཡུལ་སོ་སོའི་སྐད་འགྱུར་ཡང་དབྱངས་གསལ་གྱི་རང་བཞིན་འགྱུར་བ་མེད་པའམ། ཨའམ་ཀ་ལྟ་བུའི་གཟུགས་གཅིག་རྣམ་གྲངས་གཞན་དུ་མི་འགྱུར་བ་དང་། ཡང་བྱཉྫ་ན་སྟེ་མིང་ཚིག་མཐའ་དག་འདིས་གསལ་བས་ན་གསལ་བྱེད་དང་། ཡང་བརྞ་སྟེ་དོན་མཐའ་དག་འདིས་རྗོད་པར་བྱེད་པའི་ནུས་པ་དང་ལྡན་པའི་ཕྱིར་རྗོད་བྱེད་ཅེས་ཀྱང་བྱའོ། །གསུམ་པ་ཡི་གེའམ་སྒྲའི་སྐྱེ་གནས་ནི། སྐྱེ་གནས་མགྲིན་པ་རྐན་སོ་མཆུ་ལྕེ་སྣ། །ཞེས་སྨོས་ཏེ། སྤྱིར་སྟོན་པ་ལོངས་སྤྱོད་རྫོགས་སྐུའི་སྐུའི་གནས་སོ་སོ་ནས་ཆོ་འཕྲུལ་སྤྲུལ་པའི་ཡི་གེ་རྣམ་པར་ཕྱུང་བའི་ཚུལ་སོགས་ཕྱི་ནང་སྦྱར་བའི་འཆད་ཚུལ་ཐུན་མིན་ཡོད་མོད་ཀྱི། འདིར་ཐུན་མོང་བ་ལྟར་བཤད་ན། ཙནྡྲ་པའི་ཡི་གེའི་མདོར། གནས་དང་བྱེད་པ་དང་རྩོལ་བ་ཞེས་གསུམ་དུ་བཤད་པ། བོད་ཀྱི་ཡི་གེ་རྣམས་ལ་སྦྱོར་བའི་ཚེ། སོ་སོའི་གནས་ནི། ཀ་ཁ་ག་ང་འ་ཧ་ཨ་རྣམས་ཀྱི་སྐྱེ་གནས་མགྲིན་པ། ཅ་ཆ་ཇ་ཉ་ཙ་ཚ་ཛ་ཞ་ཡ་ཤ་ཨི་ཨེ་རྣམས་ཀྱི་སྐྱེ་གནས་རྐན། ཏ་ཐ་ད་ན་ཟ་ལ་ས་རྣམས་ཀྱི་སྐྱེ་གནས་སོ། པ་ཕ་བ་མ་ཝ་ཨུ་ཨོ་རྣམས་ཀྱི་སྐྱེ་གནས་མཆུ། ར་ཡི་སྐྱེ་གནས་ལྕེ་རྩེ་དང་ཉེ་བའི་སྤྱི་བོ་སྟེ་ལྕེ་རྩེའི་སྟེང་ཕྱོགས། ང་ཉ་ན་མ་རྣམས་རང་རང་གི་གནས་སུ་མ་ཟད་སྣ་དང་བཅས་པའོ། །
བཞི་པ་རྐྱེན་གྱི་བྱེད་རྩོལ་ནི། བྱེད་པ་རྩོལ་བ་ཕྱི་དང་ནང་གཉིས་སོ། །ཞེས་སྨོས་ཏེ། དེ་ཡང་བྱེད་པ་ནི། མགྲིན་པ་དང་མཆུ་ལས་སྐྱེས་པ་རྣམས་རང་རང་གི་གནས་ཀྱི་བྱེད་པ་ཅན་དང་། རྐན་ལས་བྱུང་བ་རྣམས་ལྕེའི་དབུས་ཀྱི་བྱེད་པ་ཅན་དང་། སོ་ལས་བྱུང་བ་རྣམས་ལྕེ་རྩེའི་བྱེད་པ་ཅན་དང་། ར་ཡིག་ནི་ལྕེ་རྩེ་དང་ཉེ་བའི་བྱེད་པ་ཅན་ནོ། །རྩོལ་བ་ལ་ཕྱི་ནང་གཉིས་ལས། ཕྱིའི་རྩོལ་བ་ནི། ཕྱི་རོལ་དུ་སྒྲ་འཐོན་པ་ལྟ་བུའི་བྱེད་རྩོལ་དང་ལྡན་པའི་ཕྱིར་ཏེ། དེ་ལའང་འཐོན་ཆེ་ཆུང་གི་དབྱེ་བས། ག་ང་ཇ་ཉ་ད་ན་བ་མ་ཛ་ཝ་འ་ཡ་ར་ལ་ཧ་ཨ་ཨི་ཨུ་ཨེ་ཨོ་རྣམས་སྒྲ་ལྡན་དང་། ཀ་ཁ་ཅ་ཆ་ཏ་ཐ་པ་ཕ་ཙ་ཚ་ཞ་ཟ་ཤ་ས་རྣམས་སྒྲ་མེད་དང་། སྒྲ་ཕྱིར་དབྱུང་བའི་ཚེ་དབུགས་ཆེ་ཆུང་གི་ཁྱད་པར་གྱིས། ཁ་ཆ་ཐ་ཕ་ཚ་ཞ་ཟ་ཤ་ས་ཧ་ཨ་ཨི་ཨུ་ཨེ་ཨོ་རྣམས་སྲོག་ཆེན་དང་། ཡི་གེ་ལྷག་མ་རྣམས་སྲོག་ཆུང་དང་། དེ་དག་ལས་ཞ་ཟ་ཤ་ས་ཧ་རྣམས་བརྗོད་པའི་ཚེ་དབུགས་དྲོ་བར་འབྱིན་པས་དྲོ་བའང་ཡིན་ནོ། །ནང་གི་རྩོལ་བ་ནི། མགྲིན་པ་གདངས་ནས་བརྗོད་དགོས་པའི་ཕྱིར་ཨ་ཡིག་མ་གཏོགས་པའི་སྲོག་ཆེན་གྱི་ཡི་གེ་རྣམས་ཕྱེ་བའི་རྩོལ་བ་ཅན་དང་། ཨ་ཡིག་མགྲིན་པ་མ་ཕྱེ་བར་བརྗོད་པའི་ཕྱིར་བཙུམ་པའི་རྩོལ་བ་ཅན་དང་། ཡི་གེའི་གནས་རྣམས་འདུ་འཕྲོད་ཀྱི་རྩོལ་བ་ཆེ་བའི་ཕྱིར་ཝ་མ་གཏོགས་པའི་སྡེ་པ་ལྔའི་ཡི་གེ་རྣམས་ཕྲད་པའི་རྩོལ་བ་ཅན་དང་། འདུ་འཕྲོད་ཀྱི་རྩོལ་བ་དེ་དག་ལས་ལྷོད་པའི་ཕྱིར་ཡ་ར་ལ་ཝ་རྣམས་ཅུང་ཟད་ཕྲད་པའི་རྩོལ་བ་ཅན་ནོ། །འདི་ནི་པཎ་ཆེན་ངྷརྨཱ་ཀ་རས་མཛད་པའི་འགྲེལ་ཆེན་ལྟར་བཀོད་པ་ཡིན་ལ། རྗེ་བཙུན་བསོད་ནམས་རྩེ་མོས་མཛད་པའི་ཡི་གེའི་བཀླག་ཐབས་བྱིས་པ་བདེ་བླག་ཏུ་འཇུག་པ་ལས་ནི་འདི་ལྟར་གསུངས་ཏེ། འ་ཧ་ཨ་ཡི་ཡི་གེ་གསུམ། ཁོག་པ་མགྲིན་པའི་གནས་ནས་འབྱུང་། །ཀ་ཁ་ག་ངའི་ཡི་གེ་བཞི། །རྐན་ཕུག་ལྕེ་རྩེའི་ཆ་ལས་འབྱུང་། །ཡ་ཞ་ཅ་ཆ་ཇ་ཉ་ཤ །བདུན་པོ་ལྕེ་དཀྱིལ་རྐན་དབུས་ལས། །ཏ་ཐ་ད་ན་ར་ལ་དྲུག །ལྕེ་རྩེ་རྐན་མཐའི་རྙིལ་ལས་འབྱུང་། །ཙ་ཚ་ཛ་ཟ་ས་ལྔ་པོ། །ལྕེ་རྩེ་སོ་ལས་འབྱུང་བའོ། །པ་ཕ་བ་མ་ཝ་དང་ལྔ། །མཆུ་ལས་རབ་ཏུ་འབྱུང་བ་ཡིན། །ང་ཉ་ན་མའི་ཡི་གེ་བཞི། །རང་རང་གནས་དང་སྣ་ལས་འབྱུང་། །ལྷག་མ་གནས་རིམ་ཇི་བཞིན་དུ། །ཅུང་ཟད་ཙམ་གྱིས་དྲག་ཅེས་བརྗོད། །ཨི་ནི་རྐན་ཕུག་ལྕེ་རྩེའི་ཟུར། །ཨུ་ནི་མཆུ་སྨད་ཨེ་རྐན་ཕུག །ཨོ་ནི་མཆུ་སྟོད་སོ་ལས་འབྱུང་། །ཡན་ལག་རྣམས་ཀྱང་དེ་ལྟར་འབྱུང་། །དྲག་ལ་སྤྱི་བོའི་ཆ་ཅུང་ཟད། །ཡོད་ཅེས་སྔོན་གྱི་མཁས་རྣམས་སྨྲ། །དེ་ལྟར་ཡི་གེའི་གནས་ཤེས་ནས། །རང་རང་གནས་ནས་ཕྱུང་སྟེ་བརྗོད། །ཡི་གེའི་མདོ་ཞེས་བྱ་བ་ལས། །འདི་དང་འབྱུང་གནས་མི་འདྲ་ཡོད། །དེ་ནོར་འདི་བདེན་གང་ཡིན་པ། །རང་གི་ཁ་ལྕེ་ཡིད་ལ་དྲིས། །ཞེས་སོ། །
ལྔ་པ་ཡི་གེའི་གྲངས་ཀྱི་དབྱེ་བསྡུ་ནི། དབྱེ་ན་དབྱངས་གསལ་སྔོན་རྗེས་མིང་གཞི་དང་། །བརྩེགས་འདོགས་འཕུལ་དང་རྣམ་གྲངས་རྣམ་པ་དགུ། །ཞེས་སྤྱི་སྡོམ་དུ་སྨོས་ནས། བྱེ་བྲག་རིམ་པར་བཤད་པ་ལ། དབྱངས་བཞི་གསལ་བྱེད་སུམ་ཅུ་སྔོན་འཇུག་ལྔ། །རྗེས་འཇུག་བཅུ་དང་མིང་གཞིར་བཅུ་ཕྲག་གཉིས། །ཞེས་སྨོས་ཏེ། དེ་ཡང་རྩ་བ་སུམ་ཅུ་པར། ཡི་གེ་ཨཱ་ལི་ཀཱ་ལི་གཉིས། །ཨཱ་ལི་གསལ་བྱེད་ཨི་སོགས་བཞི། །ཀཱ་ལི་སུམ་ཅུ་ཐམ་པའོ། །ཞེས་གསུངས་པ་ལྟར། སྤྱིར་ལྷའི་སྐད་ཀྱི་དབང་གིས་དབྱངས་ཡིག་བཅུ་དྲུག་དང་། གསལ་བྱེད་སུམ་ཅུ་རྩ་གསུམ་དུ་བསྡུ་བ་སོགས་སྐད་ཀྱི་བྱེ་བྲག་དང་སྐབས་ཐོབ་ལས་སྣ་ཚོགས་པར་འགྱུར་ན་ཡང་རིགས་མཐུན་ཚོགས་པར་བྱས་པའི་དབྱངས་གསལ་གཉིས་སུ་དབྱེ་བ་ཙམ་གྱི་སྒོ་ནས་ཡི་གེ་མཐའ་དག་བསྡུས་པ་ཡིན་ལ། དེ་ལས་གངས་རིའི་ཁྲོད་འདིར་ཉེ་བར་མཁོ་བ་ནི་ཨཱ་ལིའི་བྱ་བ་གསལ་བར་མཚོན་པར་བྱེད་པའི་ཡི་གེ་ཨི་ཨུ་ཨེ་ཨོ་སྟེ། དོན་ལ་གི་གུ། ཞབས་ཀྱུ། འགྲེང་བུ། རྣ་རུ་བཞིའོ། །ཀཱ་ལི་མཚོན་པར་བྱེད་པ། ཀ་ཁ་ག་ང་། ཅ་ཆ་ཇ་ཉ། ཏ་ཐ་ད་ན། པ་པ་བ་མ། ཙ་ཚ་ཛ་ཝ། ཞ་ཟ་འ་ཡ། ར་ལ་ཤ་ས། ཧ་ཨ་སྟེ་སུམ་ཅུ་ཐམ་པ་ལ་སྡེ་ཚན་ཕྱེད་དང་བརྒྱད་དོ། །དེ་ལྟ་བུའི་ཀཱ་ལི་སུམ་ཅུ་པོ་དེའི་ནང་ནས། ག་ད་བ་མ་འ་སྟེ་ཡིག་འབྲུ་ལྔ་ནི་ཡི་གེ་ཀུན་གྱི་སྔོན་དུ་འཇུག་པས་སྔོན་འཇུག་ལྔའོ། །ག་ང་ད་ན་བ་མ་འ་ར་ལ་ས་སྟེ་བཅུ་པོ་ནི་ཡི་གེ་ཐམས་ཅད་ཀྱི་རྗེས་སུ་འཇུག་པས་རྗེས་འཇུག་ཅེས་བྱ་ཞིང་། དེ་ལས་ཀྱང་ད་དང་ས་གཉིས་ནི་འདས་ཚིག་སོགས་ཀྱི་སྐབས་ན་ར་ལ་གསུམ་དང་ག་ང་བ་མའི་རྗེས་སུ་མཐའ་རྟེན་གཉིས་པ་ཡང་འཇུག་པ་ཡིན་ནོ། །དེའི་ལྷག་མ། ཀ་ཁ། ཅ་ཆ་ཇ་ཉ། ཏ་ཐ། པ་ཕ། ཙ་ཚ་ཛ་ཝ། ཞ་ཟ་ཡ། ཤ་ཧ་ཨ་སྟེ་ཡི་གེ་ཉི་ཤུ་ནི་སྔོན་རྗེས་གང་དུའང་མི་འཇུག་པས་མིང་གཞིའི་ཡི་གེ་ཞེས་བྱའོ། །དེ་བཞིན་དུ། བརྩེགས་ལ་ར་ལ་ས་སྟེ་མགོ་ཅན་གསུམ། །ཞབས་འདོགས་ཡ་ར་ལ་ཝ་རྣམ་པ་བཞི། །ཞེས་སྨོས་ཏེ། ཡི་གེ་བརྩེགས་མ་ལ་ར་ལ་ས་ཡི་མགོ་ཅན་གསུམ་སྟེ། ར་མགོ་ལ་མགོ་ས་མགོ་ཅན་གསུམ་མོ། །ཞབས་འདོགས་ལ་ཡ་ར་ལ་ཝ་བཞི་སྟེ། ཡ་སྟ་ར་སྟ་ལ་བཏགས་ཝ་ཟུར་དང་བཞིའོ། །འཕུལ་ལ་འཕུལ་བྱེད་ཡི་གེ་རྣམ་པ་ལྔས། །འཕུལ་བྱ་ཝ་འ་ཧ་ཨ་བཞི་ལ་མིན། །ར་ལ་ཕྱེད་འཕུལ་རྐྱང་མིན་བརྩེགས་ལ་ཡོད། །ཅེས་འཕུལ་ཡིག་ལ་འཕུལ་བྱེད་ཀྱི་ཡི་གེ་གོང་དུ་བསྟན་པའི་སྔོན་འཇུག་ལྔ་པོ་དེས། འཕུལ་བྱ་གསལ་བྱེད་ཀཱ་ལི་སུམ་ཅུ་པོ་དེ་ལས། ཡི་གེ་ཝ་སོགས་གོང་སྨོས་བཞི་པོ་ལ་དུས་ནམ་ཡང་མི་འཇུག་ཅིང་། ར་ལ་གཉིས་ལ་ཕྱེད་འཕུལ་ཏེ་རྐྱང་པའི་ཡི་གེའི་སྐབས་སུ་མི་འཇུག་ལ་བརྩེགས་མའི་སྐབས་སུ་འཇུག་པ་སྟེ། དེ་ལྟར་སྔོན་འཇུག་གི་ཡི་གེ་སྦྱོར་ཚུལ་སོགས་ཞིབ་པར་འོག་ཏུ་སྟོན་ནོ། །ཡི་གེའི་རྣམ་གྲངས་ཀྱི་དབྱེ་བ་ལ། རྣམ་གྲངས་རྐྱང་བརྩེགས་འཕུལ་ཏེ་རྣམ་པ་གསུམ། །ཞེས་སྤྱིར་བསྟན་ནས། བྱེ་བྲག་ཏུ། རྐྱང་པ་བོད་ཡིག་སུམ་ཅུ་རྩ་བདུན་ཏེ། །སྲོག་རྐྱེན་རྣམ་བདུན་གསལ་བྱེད་སུམ་ཅུའོ། །ཞེས་སྨོས་ཏེ། སྤྱིར་ཡུལ་སོ་སོའི་སྐད་ཀྱི་བྱེ་བྲག་སོགས་ལ་ལྟོས་ནས་རྩ་བའི་ཡི་གེ་ལ་མང་ཉུང་ཅི་རིགས་སུ་འབྱུང་ན་ཡང་། བོད་ལ་མཁོ་བའི་རྐྱང་པའི་ཡི་གེའི་གྲངས་ནི་སུམ་ཅུ་རྩ་འདུན་དུ་ངེས་ཏེ། དེ་གང་སྙམ་ན། སྲོག་རྐྱེན་གྱི་ཡི་གེ་བདུན་དང་གསལ་བྱེད་ཀ་སོགས་སུམ་ཅུ་པོ་ཡིན་ལ། དེ་ལས་སྲོག་རྐྱེན་གྱི་ཡི་གེ་བདུན་ནི། གོང་དུ་སྨོས་པའི་དབྱངས་ཡིག་ཨི་སོགས་བཞིའི་སྟེང་དུ་ཁྱབ་བྱེད་ཀྱི་ཡི་གེ་གསུམ་བསྣན་པ་སྟེ། ཁྱབ་བྱེད་གསུམ་ནི། སྒྱུ་འཕྲུལ་ལས། མགོ་ནི་མ་ནོར་ལམ་ཡིན་ཏེ། །ཏིག་ནི་ཤེས་རབ་མིང་དུ་སྨྲ། །ཤད་ནི་ཐབས་ཆེན་ཚིགས་སུ་གཅོད། །ཅེས་གསུངས་ཏེ། དེ་ཡང་ཡི་གེའི་མགོ་ནི་བེར་ཀ་རིས་ཏེ་མཚོན་བྱའི་དོན་ཟུང་འཇུག་གཉིས་སུ་མེད་པའི་ཡེ་ཤེས་ཀྱི་རང་བཞིན་ཐུགས་རྡོ་རྗེ་ཉིད་མཚོན་བྱེད་ཡིན་ལ། བྱེད་ལས་ཡི་གེ་རྣམས་ཀྱི་མགོ་འདྲེན་ཅིང་འཇུག་པའི་སྒོར་གྱུར་པ་སྟེ། དཔལ་བྱིན་གྱིས་ཞུས་པའི་མདོ་ལས། མགོ་ནི་ཐོག་མར་མཚོན་པ་སྟེ། །དང་ལ་གཟུགས་སུ་གང་གསལ་བ། །དེ་ནི་ཡི་གེའི་མགོ་ཡིན་ཏེ། །བེར་ཀ་རིས་ལ་མགོ་ཞེས་བྱ། །ཞེས་སོ། །ཡི་གེ་ཏིག་ནི་ཚེག་སྟེ་དོན་ཤེས་རབ་བརྗོད་མེད་ཀྱི་རང་བཞིན་གསུང་རྡོ་རྗེ། བྱེད་ལས་ཡི་གེ་རྣམས་འདུས་པ་ལ་དབྱངས་ཀྱིས་བཅིངས་པས་དངོས་པོ་སོ་སོའི་མིང་དུ་གྲུབ་པས་མ་འདྲེས་པར་སྨྲ་བ་སྟེ། ཡོ་ག་རྒྱན་དམ་པ་ལས། སྡུད་པའི་ཕྱིར་ན་ཚེག་ནི་ཏིག །འཐོར་བ་བསྡུས་ནས་མིང་དུ་སྨྲ། །ཞེས་སོ། །ཡི་གེ་ཤད་ནི་ཐབས་སྙིང་རྗེ་ཆེན་པོས་འདུལ་བའི་རང་བཞིན་སྐུ་རྡོ་རྗེ། བྱེད་ལས་རྐང་པ་བསྡེེབས་ནས་ཚིགས་སུ་གཅོད་པར་བྱེད་པ་སྟེ། སྤྱི་མདོར། གཅོད་པར་མཚོན་པར་བྱེད་པའི་ཡི་གེ་ལ་ནི་མིང་དབྱུག་པ་ཞེས་བླ་དྭགས་སུ་བཏགས་སོ། །ཞེས་སོ། །དེ་ལྟར་ཁྱབ་བྱེད་ཐུགས་གསུང་སྐུ་རྡོ་རྗེའི་རང་བཞིན་ཅན་གྱི་ཡི་གེ་གསུམ་དང་། ཤེས་རབ་དབྱིངས་སྐྱེ་མེད་མཚོན་པའི་དབྱངས་བཞི་བཅས་བདུན་པོ་དང་། ཐབས་འགག་མེད་ཀུན་ཁྱབ་ཀྱི་ཡེ་ཤེས་མཚོན་པའི་ཀཱ་ལི་སུམ་ཅུ་པོ་རྣམས་ནི་ཕན་ཚུན་ཐབས་ཤེས་འབྲེལ་བ་ཅན་གྱི་སྒོ་ནས། ཀུན་རྫོབ་ཏུ་མིང་ཚིག་བརྗོད་པ་ཀུན་གྱི་གཞི་བྱེད་ཅིང་། དོན་དམ་པར་སྨྲ་བསམ་བརྗོད་པ་ཀུན་གྱི་ཡུལ་ལས་འདས་པའི་རང་བཞིན་བརྗོད་མེད་ནཱ་དའི་དོན་སྟོན་པར་བྱེད་པས། ནམ་ཡང་བདེན་པ་གཉིས་ཀྱི་ཚུལ་ལས་མི་འདའ་བ་ཟབ་མོ་དབུ་མའི་དོན་ཉིད་རྟོགས་ཤིང་ཁོང་དུ་ཆུབ་ན་གཟུངས་དང་སྤོབས་པའི་སྒོ་བསམ་གྱིས་མི་ཁྱབ་པ་ལ་དབང་འབྱོར་བར་བྱེད་པ་ཡིན་ཏེ་རྣམ་བཞག་ཞིབ་པར་གཞན་དུ་ཤེས་པར་བྱའོ། །དེ་ལས་འཕྲོས་པའི་ཡི་གེ། བརྩེགས་ལ་ར་མགོ་བཅུ་གཉིས་ལ་མགོ་བཅུ། །ས་མགོ་བཅུ་གཅིག་ཡ་འདོགས་རྣམ་པ་བདུན། །ར་འདོགས་བཅུ་གཉིས་ལ་འདོགས་རྣམ་པ་དྲུག །ཝ་ནི་འར་བསྡུས་ཡན་ལག་ཙམ་དུ་བཞེད། །སུམ་བརྩེགས་བཅུ་བཞི་ཡོངས་དྲིལ་བདུན་ཅུ་གཉིས། །ཞེས་སྨོས་ཏེ། དེ་ཡང་ཡི་གེ་བརྩེགས་མའི་གྲངས་ལ། རྐ་རྒ་རྔ་རྗ་རྙ་རྟ་རྡ་རྣ་རྦ་རྨ་རྩ་རྫ་སྟེ་ར་མགོ་ཅན་བཅུ་གཉིས་དང་། ལྐ་ལྒ་ལྔ་ལྕ་ལྗ་ལྟ་ལྡ་ལྤ་ལྦ་ལྷ་སྟེ་ལ་མགོ་ཅན་བཅུ་དང་། སྐ་སྒ་སྔ་སྙ་སྟ་སྡ་སྣ་སྤ་སྦ་སྨ་སྩ་སྟེ་ས་མགོ་ཅན་བཅུ་གཅིག་གོ །ཞབས་འདོགས་ལ། ཀྱ་ཁྱ་གྱ་པྱ་ཕྱ་བྱ་མྱ་སྟེ་ཡ་འདོགས་བདུན་ཡོངས་གྲགས་དང་ཕྱིས་ཀྱི་མཁས་པ་རྣམས་ད་དང་ཧ་གཉིས་ལ་ཡང་ཡ་འདོགས་མི་འགལ་བར་མཛད། ཀྲ་ཁྲ་གྲ་ཏྲ་ཐྲ་དྲ་པྲ་ཕྲ་བྲ་མྲ་སྲ་ཧྲ་སྟེ་ར་འདོགས་བཅུ་གཉིས། འདིའི་ཐྲ་ནི་འདུལ་བའི་སྐབས་ལྷྭམ་གྱི་སྒྲ་ལ་ཐྲིག་ཐྲིག་སྒྲ་ཞེས་འཇུག་པ་ཙམ་མོ། །ཀླ་གླ་བླ་ཟླ་རླ་སླ་སྟེ་ལ་འདོགས་དྲུག་སྟེ་དེ་རྣམས་ཕལ་ཆེར་ལ་ཞབས་ཀྱུ་ཡང་སྦྲེལ་བར་རུང་ངོ་། །ཝ་ནི་ཀྭ་ཁྭ་གྭ་ལྟ་བུ་ཝ་ཟུར་ཅན་ཏེ་བོད་ཀྱི་སྐད་ལ་ཡན་ལག་ཙམ་ལས་བརྩེགས་ཡིག་དངོས་སུ་མི་བགྲང་བར་བཞེད་དེ། རྗེ་བཙུན་རྩེ་མོས། ཝ་ནི་ཀུན་ལ་གདགས་རུང་ཡང་། །སྐབས་ཀྱི་བཅོ་ལྔ་དག་ལ་འཇུག །ཝ་བཏགས་གུག་སྐྱེད་མི་འཇུག་པས། །དེས་ན་ཝ་ནི་ཡན་ལག་ཡིན། །བོད་ལ་ཝ་ཉིད་འར་བསྡུས་པས། །དེས་ན་མ་ནིང་བརྗོད་ཀྱང་རུང་། །ཞེས་དང་། ཝ་ཡི་དོན་ནི་སྔར་བཤད་པས། །དེ་ནི་བརྩེགས་པར་ཡང་མི་བགྲང་། །ཞེས་སོ། །དེས་ན་ཡི་གེ་ཉིས་བརྩེགས་ཀྱི་གྲངས་ལ་ལྔ་བཅུ་རྩ་བརྒྱད་དང་། སུམ་བརྩེགས་ལ། རྐྱ་རྒྱ་རྨྱ་སྐྱ་སྒྱ་སྤྱ་སྦྱ་སྨྱ་སྟེ་ཡ་འདོགས་བརྒྱད་དང་། སྐྲ་སྒྲ་སྣྲ་སྤྲ་སྦྲ་སྨྲ་སྟེ་ར་འདོགས་དྲུག་བཅས་བཅུ་བཞིའོ། །དེ་ཐམས་ཅད་བསྡོམས་པས་ཡི་གེ་བརྩེགས་མའི་གྲངས་ལ་ཡོངས་གྲགས་བདུན་བཅུ་རྩ་གཉིས་ཏེ། དེ་ལས་གཞན་པའི་ཡི་གེ་ཆ་ཚ་ཝ་ཞ་འ་ཤ་ཨ་རྣམས་ལ་བོད་སྐད་དུ་ནམ་ཡང་བརྩེགས་འདོགས་གཉིས་ཀ་མི་འཇུག་པས་དེ་ལྟར་ཤན་ཕྱེས་ཏེ་ཀ་དཔེ་འབྲི་བ་སོགས་གཅེས་སོ། །དེ་བཞིན་དུ་འཕུལ་ཡིག་གི་གྲངས་ཀྱང་། འཕུལ་ལ་གས་འཕུལ་བཅུ་གཅིག་དས་འཕུལ་དྲུག །བས་འཕུལ་བཅུ་དང་མས་འཕུལ་བཅུ་གཅིག་དང་། །འས་འཕུལ་བཅུ་བཅས་རྐྱང་འཕུལ་བཞི་བཅུ་བརྒྱད། །བརྩེགས་འཕུལ་དས་འཕུལ་དགུ་དང་བས་འཕུལ་བ། །སུམ་ཅུ་རྩ་དྲུག་མས་འཕུལ་རྣམ་པ་བཞི། །འས་འཕུལ་དགུ་བཅས་བརྩེགས་འཕུལ་ང་བརྒྱད་དེ། །འཕུལ་བའི་ཡི་གེ་བརྒྱ་རྩ་དྲུག་ཏུ་འདོད། །འདི་རྣམས་ཀྱི་འཇུག་ཚུལ་གྱི་དབྱེ་བ་ཞིབ་པར་འོག་ཏུ་གསལ་བས་འདིར་མ་སྨོས་ལ། གྲངས་ཀྱི་དབྱེ་བ་ནི་རྗེ་བཙུན་གྱིས། དས་འཕུལ་ལ་བཅུར་གསུངས་པ་འདིར་ཅུང་གྲངས་མ་འགྲིགས་ཤིང་དགོས་གལ་ཡང་ཆུང་བའི་ཕྱིར་དམྲ་ཞེས་པ་ཚུར་ཕྲིས་ནས་དགུར་བྱས་པ་ཙམ་ལས་གཞན་རྣམས་བྱིས་པ་བདེ་འཇུག་ལྟར་ཤེས་པར་བྱ་སྟེ། ཡི་གེའི་ཕ་མ་སུམ་ཅུ་ལ། །ག་ད་བ་མ་འ་ཞེས་བྱ། །འཕུལ་བར་བྱེད་པའི་ཡི་གེ་ལྔ། །འ་ཧ་ཨ་གསུམ་འཕུལ་བ་མེད། །ཝ་ནི་ཡོད་དང་མེད་པའང་ཡིན། །ར་ལ་གཉིས་ནི་ཕྱེད་འཕུལ་ཏེ། །རྐྱང་པ་མི་འཕུལ་བརྩེགས་པ་འཕུལ། །དེ་ལ་ཡི་གེ་གས་འཕུལ་བ། །ཅ་ཉ་ཏ་ད་ན་ཙ་ཞ། །ཟ་ཡ་ཤ་ས་བཅུ་གཅིག་གོ །ཀ་ག་ང་པ་བ་མ་དྲུག །ད་ཡིས་འཕུལ་བར་བྱེད་པ་ཡིན། །ཀ་ག་ཅ་ཏ་ད་ཙ་ཞ། །ཟ་ཤ་ས་ཏེ་དེ་ལྟར་བཅུ། །ཡི་གེ་བ་ཡིས་འཕུལ་བ་ཡིན། །ཁ་ག་ང་ཆ་ཇ་ན་ཐ། །ད་ན་ཚ་ཛ་བཅུ་གཅིག་ནི། །མ་ཡིས་འཕུལ་བར་བྱེད་པ་ཡིན། །ག་ཁ་ཆ་ཇ་ཐ་ད་ཕ། །བ་ཚ་ཛ་སྟེ་བཅུ་པོ་ནི། །འ་ཡིས་འཕུལ་བར་བྱེད་པ་ཡིན། །རྐྱང་པ་འཕུལ་བ་འ་ཡི་མཐའ། །དགོས་ཀྱི་གུག་སྐྱེད་ཅན་ལ་མིན། །དེ་ལྟར་རྐྱང་པ་འཕུལ་བ་ཡི། །ཡི་གེ་བཞི་བཅུ་ཞེ་བརྒྱད་ཡོད། །ད་ནི་བརྩེགས་པའི་འཕུལ་བ་བརྗོད། །གས་འཕུལ་བ་ལ་བརྩེགས་པ་མེད། །དས་འཕུལ་ཀྱ་ཀྲ་གྱ་གྲ་དང་། །པྲ་པྱ་བྲ་བྱ་མྲ་མྱ་བཅུ། །བ་ཡིས་འཕུལ་བའི་ཡི་གེ་ལ། །ཀྱ་ཀྲ་ཀླ་གྱ་ཟླ་གླ་གྲ། །རྐ་རྒ་རྔ་རྗ་རྙ་རྟ་རྡ། །རྣ་རྩ་རྫ་རླ་ལྟ་ལྡ་སྐ། །སྒ་སྔ་སྙ་སྟ་སྡ་སྣ་སྩ། །སྲ་སླ་དེ་ལྟར་སུམ་ཅུ་དང་། །རྐྱ་རྒྱ་སྐྱ་སྐྲ་སྒྱ་སྒྲ་དྲུག །སུམ་བརྩེགས་བས་འཕུལ་སུམ་ཅུ་དྲུག །མས་འཕུལ་ཁྱ་ཁྲ་གྱ་གྲ་བཞི། །མདྲོན་ཞེས་བྱ་བ་སྲིད་པ་ཙམ། །འས་འཕུལ་བ་ལ་ཁྱ་ཁྲ་གྱ། །གྲ་དྲ་ཕྲ་ཕྱ་བྱ་བྲ་དགུ། །དེ་ལྟར་བརྩེགས་འཕུལ་དྲུག་ཅུ་སྟེ། །འཕུལ་བའི་ཡི་གེ་བརྒྱ་རྩ་བརྒྱད། །བགླ་མདྲ་གཉིས་ནི་དགོས་ཆུང་བས། །བརྒྱ་རྩ་དྲུག་ཡིན་མདོར་བསྡུ་ན། །ལུས་ཀྱི་ཡི་གེ་ཉིས་བརྒྱ་དང་། །བརྒྱད་ཀྱི་ལྷག་པར་ཡང་དག་ལྡན། །ཞེས་གསུངས། ཡི་གེ་དེ་རྣམས་ཀྱི་དབྱེ་བསྡུའི་ཁྱད་པར། མདོར་ན་ལུས་ཀྱི་ཡི་གེ་ཉིས་བརྒྱ་བརྒྱད། །དབྱེ་ན་བརྗོད་རུང་ཚད་ཀྱི་ཡི་གེའི་གྲངས། །ཆིག་ཁྲི་བརྒྱད་སྟོང་བདུན་བརྒྱ་ཞེ་ལྔ་ལས། །བོད་སྐད་སྟོང་ཕྲག་བརྒྱད་དུ་འདུ་བར་གསུངས། །དེ་ཡང་རྩ་བའི་ཡི་གེ་ཀཱ་ལི་སུམ་ཅུ་བརྩེགས་ཡིག་བདུན་ཅུ་རྩ་གཉིས། འཕུལ་ཡིག་བརྒྱ་རྩ་དྲུག་བཅས་བསྡམས་པའི་ལུས་ཀྱི་ཡི་གེ་ཉིས་བརྒྱ་དང་བརྒྱད་ལ། ཡན་ལག་གི་ཡི་གེ་དབྱངས་ཡིག་བཞི་དང་རྗེས་འཇུག་ཡང་འཇུག་སོགས་བསྣན་པས་བརྗོད་རུང་གི་གྲངས་ལ། ཁྲི་ཕྲག་གཅིག་དང་སྟོང་ཕྲག་བརྒྱད་བདུན་བརྒྱ་ཞེ་ལྔ་ཡོད་པ་དེ་ཐམས་ཅད་བོད་སྐད་ལ་མི་དགོས་པས{པས་ལྷག}། བོད་སྐད་ལ་གོང་དགོས་སྟོང་ཕྲག་བརྒྱད་དུ་འདུ་བར་རྗེ་བཙུན་གྱིས་བཞེད་དོ། །བསྡུ་ཚུལ། བསྡུ་ན་སྒྲ་ཡིག་ཕ་མ་གཉིས་སུ་འདུ། །སྲོག་རྐྱེན་རྣམ་བདུན་ཨ་ཡི་ཁོངས་སུ་བསྡུ། །ཨ་ཉིད་མ་ལ་གཞན་རྣམས་ཕར་བཤད་དོ། །དེ་ལྟར་ཡང་བྱིས་པ་བདེ་འཇུག་ལས། རྒྱ་སྐད་དབྱངས་དང་གསལ་བྱེད་ཀྱི། །ཡི་གེ་ལྔ་བཅུ་ཐམ་པར་འདུས། །བོད་ཀྱི་ཡི་གེ་སུམ་ཅུ་བདུན། །སྒྲ་ཡི་ཕ་མ་སུམ་ཅུར་འདུས། །སྲོག་རྐྱེན་ཡན་ལག་ཡི་གེ་བདུན། །དེ་ནི་ཨཱ་ཡི་ཁོངས་སུ་འདུ། །ཨ་ཉིད་མ་ཡི་ཡི་གེར་བརྗོད། །ལྷག་མ་རྣམས་ནི་ཕ་ཡིན་ནོ། །ཕ་ནི་ལུས་ཞེས་བརྗོད་པ་སྟེ། །མ་ནི་ཡན་ལག་ཏུ་ཡང་འགྱུར། །དེ་བས་ཡི་གེ་མ་ལུས་པ། །ཕ་མ་གཉིས་ལས་འབྱུང་བར་བརྗོད། །ཅེས་གསུངས་སོ། །ཡི་གེའི་བརྡ་དག་གསལ་བར་སྟོན་པའི་བསྟན་བཅོས་བློ་གསལ་མགུལ་རྒྱན་ལས། །ཡི་གེའི་ངོ་བོ་ངེས་ཚིག་རྣམ་གྲངས་སྤྱིིར་དབྱེ་བའི་སྐབས་ཏེ་གཉིས་པའོ།