གལ་མདོ་གནད་ཀྱི་གདམས་པ།

༄༅། །གལ་མདོ་གནད་ཀྱི་གདམས་པ། ན་མོ་གུ་རུ་པདྨཱ་ཀ་ར་ཡ། འདི་ལྟར་སྣང་སྲིད་འཁོར་འདས་ཆོས་རྣམས་ཀུན། །བྱེད་པོ་གཞན་ན་མེད་དེ་རང་གི་སེམས། །ཐོག་མེད་དུས་ནས་བག་ཆགས་གོམས་པའི་མཐུས། །མེད་བཞིན་སྣང་བ་རྨི་ལམ་གྲོང་ཁྱེར་བཞིན། །བདེ་དང་སྡུག་བསྔལ་སྣ་ཚོགས་སོ་སོར་སྨིན། །ལེགས་པར་བརྟགས་ན་ཡེ་སྟོང་རྩ་བྲལ་ཀློང་། །བཟུང་ཡུལ་མི་དམིགས་ཆུ་ཟླ་འཇའ་ཚོན་འདྲ། །འཛིན་པའི་སེམས་མེད་ཡེ་སྟོང་ནམ་མཁའི་བབས། །ཡེ་ཡིན་ཀུན་ཡིན་ཐམས་ཅད་མཉམ་པ་ཉིད། །སྤང་བླང་བྱར་མེད་ཐོབ་དང་མ་ཐོབ་མེད། །འཁོར་འདས་རོ་མཉམ་ཐིག་ལེ་ཉག་གཅིག་ཀློང་། །སྐྱིད་ཉལ་ཆོག་པ་རྫོགས་ཆེན་རྣལ་འབྱོར་བདེ། །གནད་འདི་མ་ཤེས་བྱིས་པའི་སྐྱེ་བོ་རྣམས། །བདག་མེད་ཆོས་ལ་བདག་ཏུ་བཟུང་བས་འཁྲུལ། །མཉམ་པ་ཉིད་ལ་ཕྱོགས་རེའི་བློ་ཡིས་བསླད། །ཡེ་གྲོལ་རིག་པ་ཡོངས་གྲོལ་རེ་བས་བཅིངས། །མཐའ་བྲལ་ཤེས་པ་སྤྲོས་མཐའི་དྲྭ་བར་བཙུད། །གླང་པོ་ལོན་ནས་གླང་རྗེས་ནགས་སུ་དེད། །ཐ་སྙད་ཚིག་གིས་ཆོས་ཉིད་རྟོགས་པར་རློམ། །འཇུར་དྲན་སྒོམ་གྱིས་གཉུག་མའི་རང་ཞལ་སྒྲིབ། །རྣམ་རྟོག་གཙེས་པས་སྙིང་རླུང་རྙོགས་མ་སྡང་། །ཁོ་ཐག་མ་ཆོད་ཡི་མུག་ཁོང་ནས་སྐྱེས། །ཕལ་དག་བླུན་སྒོམ་མུན་ནང་རྡོ་འཕེན་གྱིས། །ཐོམ་མེ་ཡེ་རེའི་ངང་དུ་མི་ཚེ་ཟད། །ཁ་ཅིག་ཟ་ཟའི་ཉམས་ཀྱིས་བློ་བྲིད་ནས། །རང་མཐོང་ང་རྒྱལ་གཞན་མ་ཁྱད་དུ་གསོད། །རྐྱེན་དང་འཕྲད་ཚེ་རང་མཚང་ལྷུག་པར་ངོམ། །མིས་འཕྱ་རང་སྡུག་འཆི་ཁར་འགྱོད་པའི་རྒྱུ། །མཁས་རློམ་ཁ་ཅིག་ཡོད་མེད་སྣང་སྟོང་སོགས། །ཐལ་འགྱུར་སྤྲོས་པ་མང་པོའི་ཁས་ལེན་གྱིས། །ཚིག་གི་ན་ཡམ་དོན་གྱི་རང་ཞལ་བསྒྲིབས། །སྤྲ་སྤྲོ་མང་པོས་མི་ཚེའི་ཉི་མ་འཕུལ། །ཆོས་ཉིད་རྣལ་མའི་དོན་ལ་རེག་པ་མེད། །འགའ་ཞིག་ཞུས་ཞུས་ཐོབ་ཐོབ་རྣམ་གྲངས་མང་། །སྒོམ་སྒོམ་བཟླས་བཟླས་བྱས་ཡུས་འདྲེན་ནའང་། །མ་བཅོས་གཉུག་མའི་རང་གནད་མ་འཚལ་བའི། །བྱས་ལོ་ཐོས་ལོས་རང་མགོ་འཁོར་བ་མང་། །དེས་ན་སྐལ་བཟང་ཐར་པ་དོན་གཉེར་རྣམས། །བརྒྱུད་ལྡན་བླ་མའི་མན་ངག་བདུད་རྩིའི་རོས། །གཟུང་འཛིན་འཁོར་བའི་གཅོང་ནད་གཞིལ་བར་མཛོད། །ཡོད་དང་མེད་པར་འཛིན་པ་ལྟ་བའི་མཐའ། །སྣང་སྟོང་ཕྱོགས་རེར་ཞེན་པ་སྒོམ་པའི་མུ། །དབུ་མར་འཛིན་ལའང་བློ་ཡི་འཛིན་སྟངས་ཡོད། །འཛིན་པ་ཡོད་རིང་འཁོར་བའི་ས་བོན་ཏེ། །མ་བཅོས་རྣལ་མའི་དོན་ལ་རེག་པ་མེད། །བློས་བྱས་ལྟ་བས་བློ་བྲལ་གདེང་མི་རྙེད། །ཡིད་དཔྱོད་བསྒོམས་པས་གཉུག་མའི་དོན་མི་མཐོང་། །མཚན་འཛིན་སྤྱོད་པས་ཡང་དག་ལམ་མི་བགྲོད། །རེ་དོགས་བློ་ཡིས་འབྲས་བུ་ཐོབ་མི་འགྱུར། །དེ་བས་སྤྲ་སྤྲོས་རང་མགོ་མ་བསྐོར་བར། །དབེན་པའི་གནས་སུ་རེ་དོགས་ཁོང་ལྷོད་ནས། །བླ་མའི་མོས་གུས་ལམ་དུ་བྱེད་པ་ཡིས། །མ་བཅོས་གཉུག་མའི་ངང་དུ་ངལ་སོས་ཤིག །གདོད་མའི་ཤེས་པ་ཀ་དག་གཉུག་མའི་ངང་། །བླ་མའི་བྱིན་རླབས་མཐུ་ཡིས་ནམ་རྟོགས་ཚེ། །མུན་ཁང་ནང་དུ་སྒྲོན་མེ་བཏེགས་པ་བཞིན། །ཡེ་ཤེས་རང་ལ་གསལ་བ་ངོ་མཚར་ཆེ། །ཡོད་མེད་སྣང་སྟོང་ཞེན་པའི་དམིགས་གཏད་ཞི། །མཐར་འཛིན་ལྟ་བའི་མུན་པ་དབྱིངས་སུ་སངས། །སོ་མར་རང་གནས་ཡེ་རེ་རྗེན་ནེ་བ། །འབོལ་ལེ་ཤིག་གེ་ཕྱལ་ལེ་སིང་ངེ་བ། །འཛིན་མེད་རང་གསལ་རྒྱ་ཡན་ཧར་སངས་ངང་། །ཟང་མ་ཐལ་བྱུང་བརྗོད་མེད་གཉུག་མའི་བབས། །ཚིག་གིས་མི་མཚོན་བློ་བྲལ་རྗེན་པའི་གཤིས། །ངོ་ཤེས་ཐག་ཆོད་བློ་བདེ་ཁོང་ནས་འཆར། །དེ་ཚེ་མ་བཅོས་རང་བབས་རང་ཡན་ངང་། །ལྟ་སྒོམ་ཞེན་པའི་དམིགས་གཏད་བོར་ལ་ཐོངས། །བྱ་བྱེད་ཚོལ་འཕྲོ་བློ་ཡི་འཛིན་སྟངས་དོར། །སྒོ་ལྔ་རང་ཡན་ཚོགས་དྲུག་ལྷུག་པར་སྐྱོངས། །རེ་དོགས་ཁོང་ལྷོད་སྤྲོས་པ་རྒྱངས་ཀྱིས་སྐྱུངས། །ཉམས་ལ་མ་ཞེན་གཉུག་མའི་གཏན་སྲིད་ཟུངས། །འདི་ནི་གལ་མདོ་གནད་ཀྱི་གདམས་པ་སྟེ། །བླ་མའི་དྲིན་གྱིས་ཕྱོགས་ཙམ་རྟོགས་པའི་ཚུལ། །སྐལ་བཟང་གྲོགས་མཆོག་རྣམས་ལ་མདོར་བསྡུས་གདམས། །ཉམས་སུ་ལོངས་དང་ཡིད་ཆེས་སྐྱེ་བར་འགྱུར། དེ་སྐད་རང་བྱུང་པདྨའི་སྒྲུབ་གནས་མཆོག །བདེ་ཆེན་འོད་གསལ་ཕུག་གི་བྲག་སྐྱིབས་ནས། །དམ་པས་བྱིན་རླབས་བག་ཡངས་སྒྲུབ་པ་པོ། །པདྨ་རྣམ་རྒྱལ་མཆིད་ནས་བྱུང་རྒྱལ་ཐལ། །