སྒོམ་ཆེན་རྒན་པོ་སྒོམ་གྱིས་བཅིངས་ནས་གདའ།
༄༅། །སྒོམ་ཆེན་རྒན་པོ་སྒོམ་གྱིས་བཅིངས་ནས་གདའ། བླ་མ་ལ་ཕྱག་འཚལ་ལོ། །ཆོས་ཀུན་རྩ་བ་རང་རིག་བྱང་ཆུབ་སེམས། །ཐིག་ལེ་ཉག་གཅིག་སྤྲོས་མཐའ་ཀུན་བྲལ་ཀློང་། །ཐེག་དང་གྲུབ་མཐའི་མཚན་འཛིན་ཡེ་ནས་དང་། །བལྟ་བྱ་མེད་ལ་བློ་ཡིས་ཇི་ལྟར་རྟོག །རྟོགས་སོ་སྙམ་པའི་ཞེན་པས་བསླུས་ནས་གདའ། །ད་ནི་བློས་བྱས་ལྟ་བ་བོར་ལ་ཐོངས། །སེམས་ཉིད་དུས་གསུམ་འགྲོ་འོང་འཕོ་འགྱུར་བྲལ། །མ་བཅོས་མ་བསླད་རང་བབས་གཉུག་མའི་གཤིས། །བསྒོམ་བྱ་མེད་ལ་སྒོམ་མཁན་ཇི་ལྟར་ཡོད། །སྒོམ་ཆེན་རྒན་པོ་སྒོམ་གྱིས་བཅིངས་ནས་གདའ། །ད་ནི་སྒོམ་འཛིན་ཐག་པ་ཆོད་ལ་ཐོངས། །བྱ་རྩོལ་གཉེན་པོ་མེད་པའི་སེམས་ཉིད་ལ། །བྱས་ཆོས་སྤྲོས་པ་མང་པོས་ཅི་བྱར་ཡོད། །བྱ་བྱེད་མང་པོས་བྱར་མེད་བསྒྲིབས་ནས་གདའ། །ད་ནི་ཚུལ་འཆོས་སྤྱོད་པ་ཤིག་ལ་ཐོངས། རིག་པའི་ཀློང་དུ་འཁོར་འདས་ཆོས་ཀུན་རྫོགས། །ཐིག་ལེ་ཉག་གཅིག་གྲུབ་བསལ་འཕོ་འགྱུར་བྲལ། །བཅིངས་པ་མེད་ལ་གང་ཞིག་འགྲོལ་དུ་ཡོད། །ཐོབ་བྱ་མེད་ལ་ཐོབ་བོ་སྙམ་པས་བསླུས། །ད་ནི་རེ་དོགས་མདུད་པ་ཁྲོལ་ལ་ཐོངས། །བལྟ་བྱ་མེད་ལ་བློ་ཡིས་བཟུང་བས་འཁྲུལ། །བསྒོམ་བྱ་མེད་ལ་སེམས་འཛིན་ཞེན་པས་བཅིངས། །སྤྱོད་བྱ་མེད་ལ་དགག་སྒྲུབ་འཆིང་བས་བསླུས། །ཐོབ་བྱ་མེད་ལ་རེ་དོགས་འཛིན་པས་བསྒྲིབས། །དེ་བས་མ་བཅོས་རྣལ་མའི་དོན་ལ་སྦྱོར། །བྱར་མེད་ངང་དུ་བདེ་བར་གཉིད་ལོག་དང་། །བྱ་བྲལ་བློ་བདེའི་ཉི་མ་ཁོང་ནས་འཆར། །ཆོས་ཉིད་དོན་གྱི་པད་འབྱུང་མངོན་དུ་འགྱུར། །དེ་སྐད་གྲུབ་པའི་གནས་མཆོག་སེང་གེ་རྫོང་། །བདེ་ཆེན་འོད་གསལ་ཕུག་གི་དབེན་སྐྱིལ་ནས། །དམ་པས་རྗེས་བཟུང་ཆོས་མེད་སྙོམ་ལས་མཁན། །པདྨ་རྣམ་པར་རྒྱལ་བས་དེ་སྐད་ལོ། །