ཡིད་དཔྱོད་ལྟ་སྒོམ་ཕལ་དང་འདི་མི་མཚུངས།

༄༅། །ཡིད་དཔྱོད་ལྟ་སྒོམ་ཕལ་དང་འདི་མི་མཚུངས། ན་མོ་གུ་རུ་པདྨཱ་ཀ་ར་ཡེ། འཁོར་འདས་ཆོས་ཀུན་བྱེད་པོ་རང་གི་སེམས། །སེམས་ཉིད་དུས་གསུམ་སྐྱེ་འགག་འཕོ་འགྱུར་བྲལ། །ད་ལྟའི་ཤེས་རིག་མ་བཅོས་རྫོགས་པ་ཆེ། །སྐུ་གསུམ་དགོངས་པའི་ངོ་བོར་ཡེ་གནས་ཀྱང་། །རང་ངོ་མ་ཤེས་སྲིད་པའི་འཁོར་ལོར་འཁྱམས། །མེད་སྣང་སྡུག་བསྔལ་བརྒྱ་ཕྲག་རིམ་གྱིས་མནར། །སུས་ཀྱང་མ་བྱས་རང་རང་ལས་གྱི་མཐུ། །བདག་མེད་ཆོས་ལ་བདག་ཏུ་བཟུང་བས་འཁྲུལ། །མཉམ་པ་ཉིད་ལ་ཕྱོགས་རིས་བལྟས་པས་ནོངས། །བློ་བྱས་ཆོས་གྱི་བློ་བྲལ་གདེང་མི་རྙེད། །བྱ་བྱེད་སྤྲོས་པས་བྱར་མེད་དོན་མི་མཐོང་། །ཚིག་གི་སྦུན་པས་དོན་དམ་སྒྲིབ་ཉེན་ཆེ། །ཀྱེ་མ་དེང་སང་སྙིགས་མའི་སྒོམ་བྱེད་ཕལ། །ཡང་དག་དགེ་བའི་བཤེས་ཀྱིས་མ་ཟིན་ཅིང་། །ཟབ་གསང་གདམས་པའི་ཉིང་ཁུ་མ་ཐོབ་པས། །ཐོམ་མེ་ཡེ་རེའི་ངང་དུ་མི་ཚེ་ཟད། །ཁ་ཅིག་རྣམ་རྟོག་གཙེས་པས་སྙིང་རླུང་ལྡང། །ལ་ལ་ཡིད་དཔྱོད་ཚིག་ལ་གློ་བ་འཆེལ། །གཞན་དག་ཟ་ཟིའི་ཉམས་ཀྱི་མགོ་བོ་འཁོར། །ཕལ་ཆེར་ཁོ་ཐག་མ་ཆོད་ཡི་མུག་སྐྱེ། །དོན་མེད་ལས་ལ་དལ་འབྱོར་ཆུད་རེ་གསོན། །རིན་ཆེན་གླིང་ནས་ལག་སྟོང་ཕྱིན་ལ་ཉེ། །དེ་བས་སྐལ་བཟང་ཐར་པ་འདོད་རྣམས་ཀྱིས། །རང་མཐོང་དྲེགས་པས་རང་ཚུགས་མ་བཟུང་བར། །མཉེས་པ་གསུམ་གྱིས་དམ་པའི་ཞབས་པད་བསྟེན། །གོ་ལོ་ཐོས་ལོའི་ངང་དུ་མ་བཞག་པར། །མན་ངག་ཟབ་མོའི་སྒྲོ་འདོགས་ཆོད་པར་མཛོད། །དེ་ཡང་ཤེས་པ་ཙམ་གྱིས་མི་ཆོག་སྟེ། །ཐབས་ཚུལ་དུ་མས་རྒྱུད་ལ་སྦྱོར་བ་གལ། །ཆུ་བོ་ཐོས་དང་མཚན་ཉིད་ཤེས་ཙམ་གྱིས། །མ་བཏུང་སྐོམ་པ་སེལ་བར་འདུག་གམ་སོམས། །དང་པོའི་ལས་ཅན་འདུ་འཛིའི་གནས་ན་གཡེངས། །ལེགས་པར་བསམས་ཀྱང་གཉེན་པོས་སྟོབས་མི་ཆོམ། །དེ་བས་རྒྱལ་བསྔགས་དབེན་པའི་རི་བོ་རུ། །གཡེང་བ་སྤོང་ལ་རྩེ་གཅིག་སྒོམ་པ་གཅེས། །ཐོག་མ་ཉིད་དུ་ངེས་འབྱུང་འབའ་ཞིག་བསམ། །འདི་མེད་སྲིད་པ་གསུམ་ལས་འདའ་མི་ནུས། །དེ་ནས་བྱམས་དང་སྙིང་རྗེ་བྱང་སེམས་སྒོམས། །འདི་མེད་ཐེག་པ་ཆེན་པོའི་གྲལ་མི་ཚུད། །རྟག་པར་བླ་མའི་མོས་གུས་འབའ་ཞིག་སྒོམས། །འདི་མེད་རྒྱུད་ལ་བྱིན་རླབས་འཇུག་མི་འགྱུར། །སྡུག་བརྩིར་བསྒོམས་ཀྱང་གནས་ལུགས་རྟོགས་མི་སྲིད། །དེས་ན་ཐོག་མར་ཙབ་ཙུབ་མི་བྱེད་པར། །ངེས་འབྱུང་སྙིང་རྗེ་མོས་གུས་ཐུན་བཞིར་སྒོམས། །བཅོས་མིན་རྒྱུད་ལ་སྐྱེས་ནས་གནས་ལུགས་སྐྱོངས། །ད་ལྟའི་ཤེས་པ་བཟོ་མེད་གཉུག་མའི་ངང་། །ལྟ་སྒོམ་ཞེན་པའི་སྒྲོག་གིས་མ་བཅིངས་ཤིང་། །དུས་གསུམ་རྟོག་པས་མ་བསླད་རིག་པའི་གཤིས། །རང་བབས་ངང་དྭངས་ས་{སལ}ལེ་ཡེ་རེ་བ། །འབོལ་ལེ་ཤིག་གེ་ཟིམ་མེ་རྗེན་ཅེར་རེ། །ཧར་སངས་རྗེས་མེད་ཟང་མ་ཐལ་བྱུང་འདི། །སྤྲོས་བྲལ་རིག་སྟོང་རྗེན་པའི་ཆོས་སྐུ་ཡིན། །སྒྲིན་པོའི་བློ་ཡིས་བརྟག་དཔྱད་བྱེད་མི་དགོས། །རང་བབས་བཞག་ན་ཡེ་ཤེས་ཁོང་ནས་འཆར། །རྩོལ་བས་མ་བསྒྲིམས་ལྷོད་ཀྱིས་ཀློད་ལ་ཞོག །གནས་འགྱུར་དགའ་སྡུག་རེ་དོགས་བོར་ལ་ཐོངས། །སྒོ་ལྔ་རང་ཡན་ཚོགས་དྲུག་ལྷུག་པར་སྐྱོངས། །ཉམས་ལ་མ་ཞེན་དགག་སྒྲུབ་སྤྲོས་པ་དོར། །ཇི་ལྟར་ཤར་ཡང་རིག་པའི་རང་གཤིས་ཡིན། །རང་སར་ལྷོད་དང་ཡེ་ཤེས་ཆེན་པོའི་ངང་། །རང་གྲོལ་གདོད་མའི་གཤིས་ལུགས་ཨ་ལ་ལ། །ཨེ་མ་ཡང་གསང་རྡོ་རྗེ་རྩེ་མོའི་ལམ། །གྲོལ་བ་དྲུག་ལྡན་སྙིང་ཐིག་སྙིང་པོའི་སྲོག །པད་འབྱུང་བི་མའི་དགོངས་ཉམས་གཅིག་དྲིལ་བཅུད། །ཀུན་མཁྱེན་ཆོས་རྗེའི་དྲིན་གྱིས་དེང་ཡང་དར། །མཆོག་གསང་མན་ངག་ཟབ་མོ་འདིར་མཇལ་བ། །བསྐལ་མང་བསོད་ནམས་བསགས་པའི་འབྲས་བུ་ཡིན། །རང་གར་མ་སྐྱུར་རྒྱུད་ལ་སྦྱོར་མཛོད་དང་། །ཡིད་དཔྱོད་ལྟ་སྒོམ་ཕལ་དང་འདི་མི་མཚུངས། །ཐུན་གཅིག་སྒོམ་ཡང་ཡིད་ཆེས་ཁོང་ནས་འཆར། །གཞི་བདེའི་སྟེང་དུ་བློ་བདེ་རྒྱུན་མི་འཆད། །བདེན་ནམ་མི་བདེན་ཉམས་སུ་ལོངས་དང་གསལ། །དེ་སྐད་མཁོས་ཆུང་བག་ཡངས་སྒྲུབ་པ་པོ། །འགྱུར་མེད་པདྨ་རྣམ་རྒྱལ་འབོད་དེ་ཡིས། །བླ་མའི་དྲིན་གྱིས་ཆ་ཙམ་རྟོགས་པའི་ཚུལ། །བདེ་ཆེན་འོད་གསལ་ཕུག་གི་བྲག་སྐྱིབས་ནས། །ཆོས་གྲོགས་རྣམས་ཀྱི་སྙན་དུ་མདོ་ཙམ་གསོལ། །དགེ་བས་འགྲོ་ཀུན་ཀུན་བཟང་གནས་ཐོབ་ཤོག །