ལྟ་སྒོམ་སྤྱོད་པའི་མདོ་འགག་ཚིག་གསུམ་ཞུ།

༄༅། །ལྟ་སྒོམ་སྤྱོད་པའི་མདོ་འགག་ཚིག་གསུམ་ཞུ། གདོད་ནས་རྣམ་གྲོལ་འོད་གསལ་གཉུག་མའི་གཤིས། །ལྟ་སྒོམ་སྤྱོད་གསུམ་བྲལ་བའི་དབྱིངས་ཆེན་པོར། །བཏང་བཞག་འགྲོ་འོང་བྲལ་བས་ཕྱག་འཚལ་ནས། །ལྟ་སྒོམ་སྤྱོད་པའི་མདོ་འགག་ཚིག་གསུམ་ཞུ། །འཁོར་འདས་ཆོས་ཀུན་སེམས་ཀྱི་རོལ་པ་ཙམ། །སེམས་ཉིད་དུས་གསུམ་སྐྱེ་འགག་འཕོ་འགྱུར་བྲལ། །བརྟག་པས་མི་མཚོན་དཔྱད་པའི་བློས་མི་རེག །མཐའ་བྲལ་ཆོས་ཉིད་ཡངས་པའི་ཀློང་དུ་ཞོག །གང་ལྟར་འཛིན་པ་དེ་བཞིན་ཉིད་དུ་མིན། །ཇི་ལྟར་བཟུང་ཡང་ཕྱིར་ཞིང་འཁྲུལ་བའི་གཟེབ། །ཡང་དག་དོན་ལ་རྟོགས་དང་མ་རྟོགས་མེད། །དེ་བས་སེམས་འཛིན་དམིག་གཏད་བོར་ན་ལེགས། །སྒོམ་པ་མ་ཡིན་འདི་སྒོམ་གཏད་སོ་ཞིག །མི་སྒོམ་མིན་ཏེ་ཡེངས་འཁྲུལ་གདོད་ནས་དག །བློ་བྲལ་གཤིས་ལ་ཕེབས་ན་རྣལ་མའི་དོན། །རང་དྭངས་མི་གཡོ་འོད་གསལ་ཆེན་པོར་ཞོག །ཡེ་གྲོལ་ཉིད་ལ་བསྐྱར་གྲོལ་མི་དགོས་ཕྱིར། །རྩལ་གྱི་རྟོག་ཚོགས་བཟང་ངན་གང་ཤར་ཡང་། །རང་གིས་རང་གྲོལ་གཉེན་པོས་འཆོས་པ་སྤོངས། །མ་བཅོས་གཉུག་མར་ཀློད་པའི་ལམ་ཁྱེར་གཅེས། །སྟོང་གསལ་ཤར་གྲོལ་འགགས་མེད་རིག་པའི་གཤིས། །ཡེ་ནས་སྐུ་གསུམ་དགོངས་པའི་ངོར་གནས་པས། །ཡིན་ལུགས་ཅོག་བཞག་བཞི་ཡི་གསེང་ལམ་ནས། །གདོད་མའི་གསང་ཆེན་ཚེ་འདིར་འགྲུབ་པར་མཛོད། །མདོར་ན་ཅིར་སྣང་ལྷ་སྐུའི་ཕྱག་རྒྱ་ཆེ། །སྒྲ་གྲགས་བརྗོད་པ་གྲགས་སྟོང་སྙིང་པོ་གསུང་། །དྲན་རྟོག་རང་གྲོལ་འོད་གསལ་རྒྱལ་བའི་ཐུགས། །རྡོ་རྗེ་གསུམ་གྱི་རྣལ་འབྱོར་འབྲལ་མེད་མཛོད། །དེ་སྐད་མཆོག་སྤྲུལ་གྲུབ་པའི་སྤྱོད་འཆང་གི། །གསུང་གིས་བསྐུལ་ངོར་མི་ལྡོག་གཡར་ཁྲལ་ཙམ། །སྤྲུལ་མིང་འགྱུར་མེད་པདྨ་རྣམ་རྒྱལ་གྱིས། །བྲིས་པའི་དགེ་བས་འགྲོ་རྣམས་སངས་རྒྱས་ཤོག །
༈ རྗེ་མཚུངས་མེད་ཆོས་ཀྱི་རྒྱལ་པོར་འདུད། །སྤྲང་བློ་སྣ་ཆོས་ལ་བསྒྱུར་དུ་གསོལ། །ང་ལྟ་བ་མཐོ་མཐོ་ཞིག་བསམ་བསམ་ནས། །ཁ་འབྱམས་ཀྱི་ཚིག་གི་ལྟ་བར་ཞེན། །བློས་བྱས་ཀྱིས་བློ་འདས་སྒྲིབ་ནས་གདའ། །ད་གཏད་མེད་ཀྱི་ངང་དུ་མི་སྡོད་རེ། །སྒོམ་པ་དྭངས་དྭངས་ཤིག་བསམ་བསམ་ནས། །གསལ་སྟོང་གུད་བཅད་ཀྱི་ཉམས་ལ་ཞེན། །བློ་གཉིས་འཛིན་གྱི་གཟེབ་དུ་ཚུད་ནས་གདའ། །ད་འཛིན་མེད་ཀྱི་ངང་དུ་མི་ཉལ་རེ། །སྤྱོད་པ་མཛེས་མཛེས་ཞིག་བསམ་བསམ་ནས། །ཕྱི་ཚུལ་གྱི་ཀུན་སྤྱོད་རྟགས་ལ་ཞེན། །ཚུལ་འཆོས་ཀྱིས་སྒྲོག་གིས་བཅིངས་ནས་གདའ། །ད་རང་གཤིས་ལྷུག་པར་མི་སྟོན་རེ། །འབྲས་བུ་བཟང་བཟང་ཞིག་བསམ་བསམ་ནས། །ལྟ་སྒོམ་དང་ཉམས་ཀྱི་ཞེན་པས་བཅིང་། །རེ་དོགས་ཀྱི་འཕྲང་དུ་བསྐྱུར་ནས་གདའ། །ད་བྱར་མེད་ཀྱི་ངང་དུ་མི་སྡོད་རེ། །ཚུལ་དེ་སྐད་ལྟ་སྒོམ་སྤྱོད་པའི་གླུ། །སྤྲང་ཆོས་མེད་ཀུན་བཟང་བསྟན་རྒྱལ་གྱིས། །རང་ཉམས་སུ་ཤར་ནས་འགོགས་མེད་བླང་། །དགེ་དེས་ཀྱང་འགྲོ་ཀུན་ཡོངས་གྲོལ་ཤོག །
༈ ཨ་ཧོ། ད་ལྟའི་རིག་པ་མ་བཅོས་ཐ་མལ་གྱི་ཤེས་པ། །ཡེ་ནས་ཀ་དག་ཆོས་ཟད་རྗེན་པ་རུ་འདུག་པས། །ཚིག་སྐམ་གྲུབ་མཐར་ཞེན་པའི་ཨ་འཐས་དེ་མ་དགོས། །ངོ་རང་ཐོག་ཏུ་འཕྲོད་པའི་ཆོས་གྲོགས་ཚོ་སྐྱིད་དོ། །རང་བྱུང་གཞི་ནས་རིག་པ་སྐུ་གསུམ་གྱི་དགོངས་པ། །ཡེ་ནས་འདུ་འབྲལ་མེད་པའི་ངང་ཚུལ་འདི་སྐྱོངས་དང་། །བླུན་སྒོམ་བྱས་ཡུས་འདྲེན་པའི་ཨུ་ཚུགས་དེ་མ་དགོས། །ཐག་གཅིག་ཐོག་ཏུ་ཆོད་དང་རྡོ་རྗེ་ཡི་སྤུན་ཚོ། །གང་ཤར་དགག་སྒྲུབ་བྲལ་བའི་གཤིས་ལུགས་ལ་ལྟོས་དང་། །སྦྲུལ་མདུད་རང་སར་གྲོལ་འདྲའི་ངང་ཚུལ་འདི་མཚར་རོ། །སྤང་གཉེན་གཞན་ནས་འཚོལ་བའི་རྩོལ་སྒྲུབ་དེ་མ་དགོས། །གདེང་གྲོལ་ཐོག་ཏུ་ཆོས་པའི་རྣལ་འབྱོར་ཚོ་བདེའོ། །བརྒྱུད་པ་བཟང་པོ་ཀུན་བཟང་པདྨ་ཡི་བུ་རྒྱུད། །དོན་བརྒྱུད་བྱིན་རླབས་འཕོས་པའི་རྟོགས་ལྡན་གྱི་ཕྲེང་བ། །བཤད་ཡམ་ཚིག་ལ་འཆེལ་བའི་རྟོག་གེ་དེ་མ་ཡིན། །འུ་ཅག་ཇི་ལྟར་བྱས་ཀྱང་སྐྱིད་པོ་རུ་འདུག་གོ། སྣང་ཟོས་གང་བདེར་སྐྱོང་བ་རྒྱལ་ཁམས་གྱི་གཅེས་ཕྲུག །འགྱུར་མེད་ཀུན་བཟང་བསྟན་པའི་རྒྱལ་མཚན་དུ་འབོད་དེས། །ཡིད་ལ་ཤར་བཞིན་དབེན་པའི་རི་ངོགས་སུ་སྨྲས་སོ། །དགེ་བས་འགྲོ་ཀུན་རྒྱ་གྲོལ་ཕྱལ་བ་རུ་ཤོག་ཅིག །