འདི་དང་གཏན་དུ་དགེ་བའི་བསླབ་བྱ།
༄༅། །འདི་དང་གཏན་དུ་དགེ་བའི་བསླབ་བྱ། སྐྱབས་ཀུན་འདུས་ཞལ་དྲིན་ཆེན་ཆོས་ཀྱི་རྗེ། །འབྲལ་མེད་སྙིང་དབུས་པདྨོར་རྟག་བཀོད་ནས། །འདི་དང་གཏན་དུ་དགེ་བའི་བསླབ་བྱའི་ཕྲེང་། །ཁྱེད་གསུང་མི་ལྡོག་ཙམ་དུ་མདོ་ཙམ་བྲི། །དལ་འབྱོར་རྙེད་དཀའ་འབུངས་གསུམ་ཆོས་ལ་ཐོན། །ནམ་འཆི་ཆ་མེད་བརྩོན་འགྲུས་ལྕག་གིས་བྲོབས། །རྒྱུ་འབྲས་བསླུ་མེད་བླང་དོར་ཚུལ་བཞིན་གྱིས། །འཁོར་བའི་སྡུག་བསྔལ་བཟོད་དཀའ་སྐྱོ་བ་སྐྱེད། །ནམ་ཡང་མི་བསླུ་མཆོག་གསུམ་སྐྱབས་སུ་བསྟེན། །ཡོན་ཏན་གཞི་རྟེན་ཚུལ་ཁྲིམས་རྣམ་དག་སྲུངས། །ཐེག་ཆེན་རྩ་བ་བྱང་ཆུབ་སེམས་མཆོག་བསྐྱེད། །བློ་སྦྱོང་སྙིང་པོ་བྱམས་དང་སྙིང་རྗེ་སྒོམས། །གསང་སྔགས་ལམ་སྲོག་དམ་ཚིག་རྣམ་དག་བྱོས། །བྱིན་རླབས་རྩ་བ་བླ་མར་མོས་གུས་རེམས། །དངོས་གྲུབ་གཞི་མ་ཡི་དམ་བསྙེན་སྒྲུབ་འབུངས། །ཕྲིན་ལས་ཐོག་མེད་མཁའ་འགྲོ་ཆོས་སྐྱོང་མཆོད། །ཁྱད་པར་དབང་རྣོན་ཚེ་འདིར་གྲོལ་བའི་ཐབས། །བླ་མ་སངས་རྒྱས་དངོས་སུ་མཐོང་བའི་བློས། །གསོལ་བཏབ་དབང་བླངས་ཐུགས་ཡིད་དབྱེར་མེད་བསྲེས། །བློ་བྲལ་རྫོགས་པ་ཆེན་པོའི་དགོངས་པ་སྐྱོངས། །ཆོས་ཉིད་འོད་གསལ་གདོད་མའི་མཁའ་དབྱིངས་ལས། །རོལ་པ་འཁོར་འདས་སྤྲིན་ཚོགས་ཅིར་ཡང་ཤར། །ཕན་གནོད་མེད་དེ་རང་བྱུང་རང་ལ་ཐིམ། །ཆོས་ཉིད་ནམ་མཁའ་ལྟ་བུའི་གཤིས་ལུགས་སྐྱོངས། །ད་ལྟའི་རིག་པ་རང་བབ་རྫོགས་པ་ཆེ། །ལྟ་བས་མ་བསླད་སྒོམ་གྱིས་མ་འཆིང་ཞིང་། །བློ་དང་ཡིད་དཔྱོད་མཚན་མས་མ་བསྒྲིབས་པར། །མངོན་སུམ་རྗེན་པར་ངོ་འཕྲོད་གནད་དུ་ཟབ། །རང་རིག་ངོ་བོ་སྟོང་པ་ཆོས་ཀྱི་སྐུ། །རང་བཞིན་གསལ་ཆ་མ་འགགས་ལོངས་སྤྱོད་རྫོགས། །ཐུགས་རྗེའི་རིག་རྩལ་ཤར་གྲོལ་སྤྲུལ་པའི་སྐུ། །སྐུ་གསུམ་དགོངས་པའི་རང་མདངས་སྐྱོང་བར་འཚལ། །ཡེ་ནས་གྲོལ་བས་བསྐྱར་གྲོལ་འབད་རྩོལ་བྲལ། །གང་ཤར་རང་གྲོལ་གཉེན་པོའི་འཛིན་སྟངས་ཤིག །གཅེར་གྲོལ་ཅོག་བཞག་ཆེན་པོར་ལ་བཟླ་བའི། །མཐའ་གྲོལ་ནམ་མཁའ་ལྟ་བུའི་ངང་ལ་ཞོག །རྩལ་གྱི་རྟོག་ཚོགས་བཟང་ངན་གང་ཤར་ཡང་། །དགག་སྒྲུབ་མ་བྱེད་རང་བབ་གཉུག་མར་ཀློད། །དུག་ལྔ་ཡེ་ཤེས་ལྔ་ཡི་ངོ་བོ་སྟེ། །ཅིར་སྣང་ཀུན་བཟང་སྤྱོད་པའི་རྒྱན་དུ་འཆར། །མདོར་ན་སྣང་གྲགས་རྟོག་གསུམ་གང་ཤར་ཡང་། །ཤར་རྗེས་མ་གཅོད་ཤར་མཁན་ངོ་བོ་ལྟོས། །འཛིན་པའི་རྟོད་ཕུར་ཆོས་དབྱིངས་དོན་གྱུར་ཚེ། །ཆོས་ཉིད་དངོས་པོའི་གཤིས་ལུགས་མཐོང་བ་ལགས། །ཚུལ་འདི་ས་སྐྱོད་{སྤྱོད}ཡེ་ཤེས་ཌཱ་ཀི་ནི། །སྐལ་བཟང་སྒྲོན་མ་དཔོན་སློབ་ཐུགས་བཞེད་བཞིན། །མདོ་མེད་སྤྲང་འཁྱམས་པདྨ་བི་ཛས་བྲིས། །དགེ་བས་འགྲོ་ཀུན་གཏད་མེད་ཡོངས་གྲོལ་ཤོག །