ཤར་རྒྱལ་མོ་རོང་པ་རྒྱ་མཚོ་ལགས་ཀྱི་ངོར།
༄༅། །ཤར་རྒྱལ་མོ་རོང་པ་རྒྱ་མཚོ་ལགས་ཀྱི་ངོར། ༀ་སྭསྟི། འཆི་མེད་ཞི་བའི་གནས་ཐོབ་པའི། །སྐྱོབ་པ་མཆོག་ལ་ཕྱག་བྱས་ནས། །དད་པ་ཅན་གྱི་མཆིད་ལན་དུ། །ཉུང་གསལ་གཏམ་འདི་སྒྲོགས་ཀྱིས་གསོན། །སྐྱོབ་པ་མཆོག་དེས་བདུད་རྩིའི་སྒོ། །ཐོག་མ་ཉིད་དུ་དབྱེ་བ་ཡང་། །འདུས་བྱས་མི་རྟག་ཉིད་དུ་གསུང་། །འདི་ལ་ཐེ་ཚོམ་མི་ཟའོ། །གང་ལ་སྐྱེ་བ་ཡོད་དེ་ནི། །མཐར་གྱིས་ངེས་པར་འཆི་འགྱུར་ཕྱིར། །རྟག་འཛིན་བདུད་དབང་མི་གཏོང་བར། །སྙིང་ནས་ཆོས་ལ་བརྩོན་པར་རིགས། །ཚེ་ནི་རྟག་ཏུ་འཛད་འགྱུར་ཞིང་། །སྣོན་པ་གུད་ནས་འོང་མིན་ལ། །གློ་བུར་འཚེ་བ་ཆེས་མང་ཕྱིར། །རྒྱུན་རིང་སྡོད་མཐུ་ཡོད་མ་ཡིན། །སང་ཙམ་འཆི་འམ་སུས་ཤེས་ཀྱི། །དེ་རིང་ཉིད་དུ་བརྩོན་ཏེ་སྒྲུབ། །འཆི་བདག་སྡེ་ཆེན་དེ་དང་ནི། ཁྱོད་ཉིད་བཤེས་པ་མིན་ཞེས་གསུངས། །དེས་ན་ཡུན་རིང་སྡོད་པའི་བློ། །དོར་ནས་རྟག་ཏུ་དགེ་ལ་བརྩོན། །དེ་ཡིས་ཁྱེད་ལ་གོད་མེད་ཅིང་། །དོན་ཆེན་དག་ཀྱང་འགྲུབ་པར་འགྱུར། །ཐུབ་པས་རྗེས་ནང་ཁྱུ་མཆོག་དང་། །མེ་ཏོག་ནང་ནས་པད་མ་དཀར། །འདུ་ཤེས་ནང་ནས་མི་རྟག་པ། །རྗེས་སུ་དྲན་པ་མཆོག་ཡིན་གསུངས། །དེ་སླད་སྔོན་གྱི་དམ་པ་རྣམས། །དོན་འདི་དགོངས་ནས་དབེན་པར་གཤེགས། །ཡུན་རིང་བརྩོན་པའི་དཔུང་བསྐྱེད་པས། །དོན་གཉིས་ཡོན་གྱིས་འབྱོར་གྱུར་ཏེ། །དབང་ཕྱུག་མི་ལ་རས་པས་ཀྱང་། །འཆི་བས་འཇིགས་ནས་རི་ལ་ཕྱིན། །ནམ་འཆི་ཆ་མེད་སྒོམ་སྒོམ་ནས། །འཆི་མེད་གཉུག་མའི་བཙན་ས་ཟིན། །འཆི་བའི་འཇིགས་པ་བོར་ཞེས་གསུངས། །དེང་སང་རང་རེ་ཆོས་གཟུགས་རྣམས། །འཆི་བ་སྐད་ཅིག་མ་བསམ་རྒྱུས། །ཅི་བྱེད་ཚེ་འདིའི་ལག་ཆར་སོང་། །ཕྱི་མར་ཕན་པའི་ལམ་རྒྱགས་མེད། །འཆི་ཁར་བྲང་ལག་འཐབ་ཀྱང་འཕྱིས། །འདི་ལས་བསླུས་པ་གཞན་ཡོད་མིན། །དེ་ཕྱིར་སྙིང་ལ་རི་མོ་བྲིས། །དོན་ཆེན་དགེ་ལ་སྦྱོར་མཛོད་དང་། །ཁྱེད་ལ་བདེ་ལེགས་འབྱུང་བར་འགྱུར། །རྒྱལ་བའི་ཆོས་ཚུལ་བསམ་མི་ཁྱབ། །མཐའ་དག་སུས་ཀྱང་ཤེས་མི་ནུས། །གང་ཤེས་རང་གི་རྒྱུད་སྦྱར་ན། །དེ་ཡིས་དགོས་པ་གྲུབ་པ་ཡིན། །ཤི་གསོན་ལེགས་ཉེས་ཅི་བྱུང་ཡང་། །བློ་གཏད་དཀོན་མཆོག་གསུམ་ལ་ཞུས། །འདི་ཡིས་ནམ་ཡང་བསླུ་མི་སྲིད། །དགོས་པའི་དུས་སུ་སྐྱོབ་པར་ངེས། །འགྲོ་ཀུན་ཕ་མར་ཤེས་པའི་བློས། །བྱམས་དང་སྙིང་རྗེའི་དཔུང་བསྐྱེད་ནས། །དེ་ཀུན་སྲིད་ལས་སྒྲོལ་བའི་ཕྱིར། །རྫོགས་བྱང་གོ་འཕང་དོན་གཉེར་བའི། །བློ་ནི་སྨོན་པ་སེམས་བསྐྱེད་ཡིན། །སྲོག་གི་ཕྱིར་ཡང་མི་གཏོང་གལ། །ཀུན་སློང་མཆོག་དེའི་རྩིས་ཟིན་ཅིང་། །བྱང་ཆུབ་ཆེན་པོར་ཡོངས་བསྔོས་པའི། །དགེ་ཚོགས་མི་འཛད་གོང་དུ་འཕེལ། །ངེས་པར་རྣམ་མཁྱེན་རྒྱུ་རུ་འགྲོ། །དེར་ཡང་མངོན་ཞེན་སྤང་བ་གཅེས། །ཚུལ་འདི་ཐུགས་ལ་ལེགས་བཅངས་ནས། །ཅི་བྱེད་དགེ་བའི་ལམ་ལ་དྲིལ། །བསླབ་བྱ་ཐམས་ཅད་འདི་ལ་འདུ། །ཐེག་ཆེན་ལམ་གྱི་མདོ་འགག་ཡིན། །ཐུགས་ལ་ཆོངས་ཤིག་དགེ་བའི་གྲོགས། ལག་ཏུ་ལོངས་ཤིག་དད་པ་ཅན། །ཚེ་ཆོས་མཐར་ཕྱིན་སྨོན་ལམ་ཞུ། །དགེ་བས་རྣམ་མཁྱེན་ཐོབ་གྱུར་ཅིག །ཅེས་པའང་ཤར་རྒྱལ་མོ་རོང་པ་རྒྱ་མཚོ་ལགས་ནས་ནམ་འཆི་དང་དེའི་ཚེ་གང་གིས་ཕན་ཞེས་ནན་ཆེར་དྲིས་པའི་ངོར་ཞེ་ཆེན་པ་དགེ་སྦྱོང་རྒན་པོ་འགྱུར་མེད་པདྨ་བསྟན་འཛིན་གྱིས་ངེས་པར་འབྱུང་བའི་བློས་བྲིས་ཤིང་མཚམས་མལ་ནས་ཕུལ་བ་དོན་དང་ལྡན་པར་གྱུར་ཅིག