བཅོམ་ལྡན་འདས་ནི་སྔོན་བསྐལ་པ་གྲངས་མེད་པ་འདས་པའི་ཕ་རོལ་ན། འཛམ་བུའི་གླིང་འདིར་རྒྱལ་པོ་ཆེན་པོ་ཁ་དོག་དམ་པ་ཞེས་བྱ་བར་འཁྲུངས་ཚུལ།

༈ འདིར་དད་པ་བསྐྱེད་པའི་སྒོ་ཙམ་དུ་ཐོག་མར་མདོ་སྡེ་མཛངས་བླུན་ནས་གསུངས་པའི་དོན་གྱི་སྙིང་པོ་མདོར་བསྡུས་ཏེ་བརྗོད་ན། བཅོམ་ལྡན་འདས་ནི་སྔོན་བསྐལ་པ་གྲངས་མེད་པ་འདས་པའི་ཕ་རོལ་ན། སེམས་ཅན་གྱི་དོན་དུ་ཐོས་པ་ཚོལ་ཞིང་ཚོལ་བ་ན། ཆུང་ངུ་ནས་ཚིགས་སུ་བཅད་པ་གཅིག་ཙམ་གྱི་སླད་དུ་ཡང་བདག་གི་ལུས་དང་ཆུང་མ་དང་། བུ་དང་བུ་མོ་སོགས་ཀྱང་ཡོངས་སུ་གཏོང་བར་མཛད་པ་ཡིན་ཏེ། དེ་ཡང་སྔོན་འདས་པའི་དུས་ཡུན་རིང་པོ་ན། འཛམ་བུའི་གླིང་འདིར་རྒྱལ་པོ་ཆེན་པོ་ཁ་དོག་དམ་པ་ཞེས་བྱ་བར་འཁྲུངས་ཏེ། རྒྱལ་པོ་དེ་ལ་རྒྱལ་ཕྲན་བརྒྱད་ཁྲི་བཞི་སྟོང་། ལྗོངས་སྟོང་ཕྲག་དྲུག་ཅུ་ན་གྲོང་ཁྱེར་སྟོང་ཕྲག་བརྒྱད་ཅུ་བཙུན་མོ་སྟོང་ཕྲག་ཉི་ཤུ། བློན་པོ་ཆེན་པོ་སྟོང་ཕྲག་བཅུ་སྙེད་མངའ་ཞིང་། རྒྱལ་པོ་དེའི་གཟི་བརྗིད་དང་མཐུ་ཡིས། རྒྱལ་ཁམས་སུ་འབྱོར་པ་དང་བདེ་བ་དང་ལོ་ལེགས་པ་སོགས་ཕུན་སུམ་ཚོགས་པའི་དཔལ་གྱིས་སྐྱེ་བོ་ཐམས་ཅད་དགའ་བར་བྱེད་པ་ཞིག་ཏུ་གྱུར་ཏོ། །དེའི་ཚེ་རྒྱལ་པོ་དེས། བདག་གི་རིན་པོ་ཆེ་དང་། ལོངས་སྤྱོད་ཀྱིས་འགྲོ་བ་ཐམས་ཅད་ལ་ཕན་བཏགས་ཀྱི། དམ་པའི་ཆོས་ཀྱིས་ཕན་འདོགས་པར་མ་གྱུར་ཏེ། འདི་ནི་བདག་གི་སྐྱོན་དུ་འགྱུར་གྱིས། དམ་པའི་ཆོས་གང་ན་མཆིས་པ་དེ་བཙལ་ཏེ་ཐམས་ཅད་གྲོལ་བར་བྱའོ་སྙམ་དུ་དགོངས་ནས། འཛམ་བུ་གླིང་འདི་ན་སུ་ལ་དམ་པའི་ཆོས་ཡོད་པ་དེ་བདག་ལ་སྟོན་པར་གྱུར་ན། དེ་ཡིད་དང་མི་འགལ་བར་ཅི་དང་ཅི་འདོད་པ་སྦྱིན་ནོ་ཞེས་ཕྱོགས་ཐམས་ཅད་དུ་དྲིལ་བསྒྲགས་ཀྱང་སྟོན་ནུས་པ་མ་བྱུང་ནས་རྒྱལ་པོ་མྱ་ངན་གྱིས་གདུང་བར་གྱུར་པ་ལ། དེེའི་ཉམས་སད་པའི་སླད་དུ། རྒྱལ་པོ་ཆེན་པོ་ངལ་བསོ་པོས་རང་གི་ལུས་གནོད་སྦྱིན་མདོག་ཤིན་ཏུ་སྔོ་བ། གནག་པ་མིག་ཁྲག་ལྟར་དམར་བ་མཆེ་བ་གྱེན་དུ་བྱུང་བ། སྐྲ་གྱེན་དུ་བསྒྲེང་བ། ཁ་ནས་མེ་འབར་བ་ཞིག་ཏུ་སྤྲུལ་ནས་ཕོ་བྲང་གི་སྒོར་མཆིས་ཏེ། སུ་ཞིག་ཆོས་ཐོས་པར་འདོད་པ་ང་ལས་ཉོན་ཅིག་ཅེས་སྨྲས་པས། རྒྱལ་པོ་དེ་ཤིན་ཏུ་དགའ་ནས། དེ་ལ་ཕྱག་བྱས་ཏེ་སྟན་མཐོན་པོ་ལ་བཞག་ནས་རྒྱལ་བློན་འཁོར་དང་བཅས་པ་ཆོས་ཉན་པའི་སླད་དུ་འཁོད་པ་ན། གནོད་སྦྱིན་དེས་རྒྱལ་པོ་ལ་སྨྲས་པ། རྒྱལ་པོ་ཆོས་ཐོས་པར་བྱ་བ་ནི་ཤིན་ཏུ་དཀའ་བས། ཆོས་ཉན་པར་འདོད་ན་འདི་ཙམ་གྱིས་ཆོག་པ་མ་ཡིན་ནོ། །ཞེས་སྨྲས་པ་དང་། རྒྱལ་པོས་དེ་ལ་ཐལ་མོ་སྦྱར་ཏེ། ཁྱོད་ཅི་དང་ཅི་འདོད་པ་དེ་ཐམས་ཅད་མི་འགལ་བར་ཐམས་ཅད་སྦྱིན་ནོ་ཞེས་སྨྲས་སོ། །དེ་ནས་གནོད་སྦྱིན་དེས། རྒྱལ་པོ་ཁྱོད་ཀྱི་བཙུན་མོ་དང་སྲས་གང་ཕངས་པ་དེ། ཁོ་བོར་ཟར་བཅུག་ན་དམ་པའི་ཆོས་སྦྱིན་ནོ་ཞེས་སྨྲས་པ་དང་། རྒྱལ་པོ་དེས་བཙུན་མོའི་ནང་ན་གང་ཕངས་པ་དང་སྲས་ཀྱི་མཆོག་གནོད་སྦྱིན་ལ་ཕུལ་ཞིང་། གནོད་སྦྱིན་གྱིས་ཀྱང་འཁོར་མང་པོའི་ནང་དུ་ཀུན་གྱིས་མཐོང་བཞིན་དུ་ཟོས་སོ། །དེའི་ཚེ་བློན་འབངས་རྣམས་མྱ་ངན་དུ་གྱུར་ནས། ཆོ་ངེ་བཏབ་ཅིང་ས་ལ་འགྲེ་བཞིན་དུ། རྒྱལ་པོ་ཆེན་པོ་མི་རིགས་པའི་ལས་འདི་ལྟ་བུ་ཐོངས་ཤིག་ཅེས་གསོལ་བ་བཏབ་ཀྱང་། རྒྱལ་པོ་དམ་པའི་ཆོས་ཚོལ་བའི་ཕྱིར་ཤིན་ཏུ་བརྟན་པས་བཟློག་མ་ནུས་སོ། །དེའི་ཚེ་གནོད་སྦྱིན་གྱིས་ཚིགས་སུ་བཅད་པ་འདི་སྐད་ཅེས་སྨྲས་སོ། །འདུ་བྱེད་ཐམས་ཅད་མི་རྟག་སྟེ། །ཇི་ཙམ་སྐྱེ་བ་སྡུག་བསྔལ་བཅས། །ལྔ་ཕུང་མཚན་མ་མེད་པས་སྟོང་། །བདག་དང་བདག་གི་བ་ཡང་མེད། །ཅེས་སྨྲས་པས་རྒྱལ་པོ་དགའ་མགུ་རངས་ཏེ། བ་སྤུའི་ཉག་མ་ཙམ་གྱི་འགྱོད་པའི་སེམས་མ་སྐྱེས་སོ། །དེ་ནས་ངལ་བསོ་པོས་བདག་ཉིད་ཀྱི་ལུས་སུ་སླར་བསྒྱུར་ནས་ཤིན་ཏུ་ལེགས་སོ་ངོ་མཚར་རྨད་དོ་ཞེས་བསྟོད་ཅིང་བསྔགས་ཏེ། བཙུན་མོ་དང་སྲས་ཀྱང་སྔོན་བཞིན་དུ་ཅུང་ཟད་ཀྱང་མ་ནོངས་པར་སླར་ཕུལ་ལོ། །རྒྱལ་པོས་ཚིགས་བཅད་དེ་ཡི་གེར་བྲིས་ནས་འཛམ་བུ་གླིང་ཀུན་ཏུ་བསྒྲགས་ཏེ་ཐམས་ཅད་ལ་སློབ་ཏུ་བཅུག་གོ །