བཅོམ་ལྡན་འདས་ཉིད་འདམ་གླིང་འདིར་རྒྱལ་པོ་ཤི་བི་ཞེས་བྱ་བར་སྐུ་འཁྲུངས་ཚུལ།

༈ ཡང་སྔོན་འདས་པའི་དུས་བསྐལ་པ་གྲངས་མེད་པའི་ཕ་རོལ་ན། བཅོམ་ལྡན་འདས་ཉིད་འཛམ་བུ་གླིང་འདིར་རྒྱལ་པོ་ཤི་བི་ཞེས་བྱ་བར་སྐུ་འཁྲུངས་ཏེ། རྒྱལ་པོ་དེ་ནི་འཛམ་བུ་གླིང་འདི་ལ་དབང་མཛད་དེ་ཐམས་ཅད་ལ་བྱམས་པ་དང་སྙིང་རྗེས་མ་ཁྱབ་པ་མེད་དོ། །དེའི་ཚེ་ལྷའི་དབང་པོ་བརྒྱ་བྱིན་ལ་འཆི་ལྟས་བྱུང་བས་ཤིན་ཏུ་མི་དགའ་སྟེ་མྱ་ངན་བྱེད་པ། བི་ཤྭ་ཀརྨས་མཐོང་ནས་རྒྱུ་མཚན་དྲིས་པས། བརྒྱ་བྱིན་གྱིས། ང་ནི་ཚེའི་དུས་བྱེད་དུ་ཉེ་བས་ཚེ་འཕོས་པའི་ལྟས་མངོན་དུ་བྱུང་ན། འཇིག་རྟེན་འདིར་སངས་རྒྱས་ཀྱི་ཆོས་ནི་ནུབ་པར་གྱུར་ཏེ། བྱང་ཆུབ་སེམས་དཔའ་ཡང་མི་བཞུགས་ན། ཁོ་བོ་གང་ལ་སྐྱབས་སུ་འགྲོ་བ་མི་ཤེས་པས་མྱ་ངན་བྱེད་དོ། །བི་ཤྭ་ཀརྨས་སྨྲས་པ། འཛམ་བུ་གླིང་ན་རྒྱལ་པོ་ཆེན་པོ་བྱང་ཆུབ་སེམས་དཔའི་སྤྱད་པ་སྤྱོད་པ་ཤི་བི་ཞེས་བྱ་བ་ཞིག་བཞུགས་ཏེ། ཤིན་ཏུ་ཡི་དམ་བརྟན་ཞིང་བརྩོན་འགྲུས་བརྩམས་པས་གདོན་མི་ཟ་བར་མངོན་པར་འཚང་རྒྱ་སྟེ། དེ་ལ་སྐྱབས་སུ་སོང་ནས་འཇིགས་པ་ལས་རྣམ་པར་ཐར་བར་འགྱུར་རོ། །སྨྲས་པས། བརྒྱ་བྱིན་གྱིས། བདག་ནི་དེ་ལ་ངན་སེམས་མིན། །གསེར་ལྟར་སད་ན་མངོན་པར་འགྱུར། །བདེན་པ་རྟོགས་པར་འདོད་པས་ན། །བྱང་ཆུབ་སེམས་དཔའ་སད་པར་བྱ། །ཞེས་སྨྲས་ནས། བྱང་ཆུབ་སེམས་དཔའ་ཡིན་མིན་ཉམས་སད་པའི་ཕྱིར། བི་ཤྭ་ཀརྨ་ཕུག་རོན་དང་། བརྒྱ་བྱིན་ཁྲར་སྤྲུལ་ནས་བཟུང་ལ་ཐུག་པར་བདས་ནས། ཕུག་རོན་རྒྱལ་པོའི་མཆན་ཁུང་དུ་ཞུགས་ཏེ་རྒྱལ་པོ་ལ་སྲོག་གི་སྐྱབས་གསོལ་ཏོ། །ཁྲ་ཡང་དེའི་མོད་ལ་ཕྱིན་ཏེ། རྒྱལ་པོ་ལ་འདི་བདག་གི་ཟ་སྐལ་ལགས་པས་མྱུར་དུ་བདག་ལ་སྩོལ་ཅིག བདག་ནི་བཀྲེས་པས་རབ་ཏུ་ཉེན་ནོ། །ཞེས་སྨྲས་པ་དང་། རྒྱལ་པོས་ཁོ་བོས་ནི་བདག་ལ་སྐྱབས་སུ་འོངས་སོ་ཅོག་ལ་ཕྱིར་མི་གཏོང་བར་དམ་བཅས་པས། འདི་ཡང་མི་སྦྱིན་ནོ། །ཁྲས་སྨྲས་པ། ཐམས་ཅད་ཀྱི་སྐྱབས་མཛད་དོ་ཞེ་ན། གལ་ཏེ་བདག་གི་ཟས་མི་བསྩལ་ན་བདག་ཀྱང་འཚོ་བ་དང་བྲལ་ན། ཅི་བདག་ཀྱང་ཐམས་ཅད་ཀྱི་ནང་དུ་མ་གཏོགས་སམ། རྒྱལ་པོས་སྨྲས་པ། ཁྱོད་ལ་ཤ་གཞན་ཞིག་བྱིན་ན་ཟའམ། ཁྲས་སྨྲས་པ། གསར་དུ་བསད་པའི་ཤ་རློན་པ་མཆིས་ན་རུང་ངོ་། །དེར་རྒྱལ་པོས། གསར་དུ་བསད་པའི་ཤ་རློན་པ་གཞན་ཞིག་སྦྱར་ན། གཅིག་བསད་དེ་གཅིག་གསོ་བར་རིགས་པ་མ་ཡིན་ཞིང་སེམས་ཅན་ཐམས་ཅད་ནི་སྲོག་ཕངས་པར་མཚུངས་པས་བདག་ཉིད་ཀྱི་ཤས་བསླུ་བར་རིགས་སོ་སྙམ་ནས་གྲི་རྣོན་པོས་རང་གི་བརླའི་ཤ་བཅད་ནས་ཁྲ་ལ་བྱིན་ཏེ། ཕུག་རོན་གྱི་སྲོག་བསླུས་སོ། །དེར་ཁྲས་སྨྲས་པ། རྒྱལ་པོ་ཁྱོད་སྦྱིན་བདག་ཏུ་གྱུར་ཏེ་ཐམས་ཅད་ལ་སྙོམས་ན། ཕུག་རོན་གྱི་ལྕིད་དང་མཉམ་པར་མཛོད་ཅིག རྒྱལ་པོས་སྲང་བླང་སྟེ། ལོགས་ཤིག་ཏུ་ཕུག་རོན་བཞག ལོག་ཤིག་ཏུ་ཤ་བཅད་དེ་སྤུངས་པ་དང་། བརླའི་ཤ་ཟད་ཀྱང་ཕུག་རོན་པས་ཡང་ངོ་། །ཕྲག་པ་གཉིས་དང་། རྩིབ་ལོགས་གཡས་གཡོན་དང་། ལུས་ཀྱི་ཤ་ཟད་པར་བཅད་ཀྱང་། ཕུག་རོན་དང་མཉམ་པར་མ་གྱུར་ནས། རྒྱལ་པོ་ཉིད་བཞེངས་ཏེ་སྲང་གི་ནང་དུ་འགྲོ་བར་བརྩམས་པ་ན་ཉམས་ཀྱིས་མ་ནུས་ཏེ་ས་ལ་འགྱེལ་ནས་བརྒྱལ་ལོ། །བརྒྱལ་སངས་པ་ན་བརྩོན་འགྲུས་བརྩམ་པའི་དུས་ལ་བབ་སྟེ། ལེ་ལོ་བྱ་བའི་དུས་མ་ཡིན་ནོ་སྙམ་དུ་དགོངས་ཏེ་རང་གི་སེམས་ལ་སྒོ་དུ་མ་ནས་སྨད་དེ། འབད་པ་ཆེན་པོས་སྲང་གི་ནང་དུ་ཕྱིན་པ་དང་། ད་ནི་ལེགས་སོ་ཞེས་རབ་ཏུ་དགའ་བའི་སེམས་སྐྱེས་སོ། །དེའི་ཚེ་ས་རྣམ་པ་དྲུག་ཏུ་གཡོས་ནས། གཟུགས་ཁམས་མན་གྱི་ལྷ་རྣམས་ཀྱིས་མངོན་པར་མཆོད་དོ། །དེར་བརྒྱ་བྱིན་རང་གི་གཟུགས་སུ་བསྒྱུར་ནས། འདི་ལྟ་བུའི་དཀའ་བ་མཛད་པ་འདིས་ཅི་ཞིག་བཞེད། བྱང་ཆུབ་སེམས་དཔས་སྨྲས་པ། བདག་འདོད་པ་ནི་ཁམས་གསུམ་གྱི་ཆེ་བ་ཅན་གྱི་ལོངས་སྤྱོད་འདོད་པ་མ་ཡིན་ཏེ། བསོད་ནམས་ཅི་བྱེད་ཀྱང་བླ་ན་མེད་པའི་བྱང་ཆུབ་འདོད་དོ་ཞེས་སྨྲས་པ་དང་། བརྒྱ་བྱིན་གྱིས། འདི་ལྟར་སྡུག་བསྔལ་བ་ལ་མི་འགྱོད་དམ། རྒྱལ་པོས་འགྱོད་པ་མེད་པའི་བདེན་པའི་ཚིག་བརྗོད་པས་ལུས་སྔོན་བས་ཀྱང་ལྷག་པར་བཟང་བར་གྱུར་ཏེ། ལྷ་དང་མིའི་འཇིག་རྟེན་དུ་བཅས་པ་ཐམས་ཅད་དགའ་མགུ་རངས་ཏེ། ངོ་མཚར་བར་གྱུར་ཏོ། །གཞན་ཡང་ཚངས་པའི་རྒྱལ་པོས་དེ་བཞིན་གཤེགས་པའི་སྤྱན་སྔར་ཐལ་མོ་སྦྱར་ཏེ་དེ་བཞིན་གཤེགས་པས་སྔོན་གྱི་སྐུ་ཚེ་ལ་ཆོས་ཇི་ལྟར་བཙལ་བ་དང་། སེམས་ཅན་གྱི་སླད་དུ། དབུ་སྟོང་ཙམ་ཡང་བཏང་བར་གྱུར་ཏོ། །ཞེས་བསྟོད་ཅིང་བསྔགས་པར་བྱས་སོ། །ཞེས་གསུངས་པས་མཚོན་ཏེ་སངས་རྒྱས་བཅོམ་ལྡན་འདས་ནི་རྒྱུ་མེད་པར་བརྩེ་བའི་བདག་ཉིད་དེ། སེམས་ཅན་མང་པོ་བསྐྱབ་པའི་སླད་དུ། དམ་པའི་ཆོས་འཚོལ་བ་སོགས་ཀྱི་ཕྱིར། རང་གི་སྐུ་སྲོག་ལའང་མ་གཟིགས་ཏེ་དཀའ་བ་དཔག་ཏུ་མེད་པ་བསྒྲུབས་ནས། རྩོད་པའི་དུས་འདིར་མངོན་པར་སངས་རྒྱས་ཏེ། ཆོས་ཀྱི་འཁོར་ལོ་བསྐོར་བར་མཛད་པས་འཇིག་རྟེན་ན། དཀོན་མཆོག་གསུམ་པོ་མངོན་སུམ་དུ་གྱུར་ཏོ། །དེའི་ཕྱིར་སངས་རྒྱས་ཀྱི་བཀའ་དྲིན་རྗེས་སུ་འཚོབ་པ་དང། དམ་པའི་ཆོས་རྙེད་པར་དཀའ་བའི་ཚུལ་ལ་ལེགས་པར་བསམ་ནས་གུས་པས་ཉན་ཅིང་ནན་ཏན་གྱིས་སྒྲུབ་པ་ལྷུར་ལེན་པར་བྱའོ། །