སྟག་མོ་ལུས་སྦྱིན་གྱི་རྣམ་ཐར།

༈ གཞན་ཡང་གླེང་གཞི་སྟོན་པ་མཉན་ཡོད་ན་བཞུགས་པའི་ཚེ། གྲོང་ཁྱེར་དེར་རྒན་མོ་ཞིག་ལ་བུ་རྟག་ཏུ་རྐུ་བ་གཉིས་ཤིག་ཡོད་པ་དེ། ནོར་བདག་གིས་ཟིན་ནས་ཁྲིམས་ལ་སྦྱར་བས་བསད་པ་ལ་ཐུག་ནས་གཤེད་མས་གསོད་པའི་གནས་ཁྲིད་པ་ན། བཅོམ་ལྡན་འདས་རྒྱང་རིང་མོ་ནས་གཤེགས་པ་མཐོང་སྟེ། མ་སྨད་ཀྱིས་དེའི་ཕྱོགས་སུ་ཕྱག་འཚལ་ནས་གུམ་ལ་ཐུག་པ་འདིའི་སྐྱབས་མཛད་དུ་གསོལ་ཅེས་སྨྲས་པས། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་ཏེ། རྒྱལ་པོ་ལ་གསོལ་བ་འདེབས་སུ་བཏང་བ་དང་རྒྱལ་པོས་ཀྱང་བཅོམ་ལྡན་འདས་ཀྱི་བཀའ་བཞིན་དུ་བཏང་བས། དེ་གཉིས་བཅོམ་ལྡན་འདས་ཀྱི་བཀའ་དྲིན་དྲན་པས་རབ་ཏུ་དགའ་བ་སྐྱེས་ཏེ། སྟོན་པའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པའི་གོ་འཕང་ཐོབ་ཅིང་། མ་རྒན་མོ་དེ་ཡང་ཆོས་ཐོས་པས་ཕྱིར་མི་འོང་གི་འབྲས་བུ་ཐོབ་བོ། །དེའི་ཚེ་ཀུན་དགའ་བོ་ངོ་མཚར་དུ་གྱུར་པ་ལ་བཅོམ་ལྡན་འདས་ཀྱི་བཀའ་སྩལ་པ། མ་སྨད་གསུམ་པོ་འདི་ནི་ངས་ད་ལྟར་འདི་འབའ་ཞིག་ཏུ་མ་ཟད། སྔོན་གྱི་དུས་ན་འང་བཀའ་དྲིན་གྱིས་གསོས་པ་ཡིན་ཏེ། སྔོན་འདས་པའི་དུས་བསྐལ་པ་གྲངས་མེད་པའི་ཕ་རོལ་ན། འཛམ་བུ་གླིང་འདིར་རྒྱལ་པོ་ཤིང་རྟ་ཆེན་པོ་ཞེས་བྱ་བ་ཞིག་བྱུང་སྟེ། དེ་ལ་སྲས་གསུམ་གྱི་ཆེ་བ་སྒྲ་ཆེན་པོ། འབྲིང་པོ་ལྷ་ཆེན་པོ། ཐ་ཆུང་སེམས་ཅན་ཆེན་པོ་ཞེས་བྱ་སྟེ། ཕྱི་མ་ནི་བྱམས་པ་དང་སྙིང་རྗེ་ལྡན་ཏེ་ཐམས་ཅད་ལ་བུ་གཅིག་པ་དང་འདྲའོ། །དེའི་ཚེ་རྒྱལ་བློན་བཙུན་མོ་སྲས་དང་བཅས་ཕྱི་རོལ་དུ་སྐྱོ་སངས་སུ་ཆས་པ་ལས། རྒྱལ་བློན་རྣམས་ཅུང་ཟད་ངལ་གསོ་བའི་བར་དུ་སྲས་གསུམ་པོ་ནགས་ཁྲོད་དུ་སོང་བ་ལས། སྟག་མོ་ཞིག་བུ་བྱུང་ནས་ཞག་དུ་མ་ལོན་པ་བཀྲེས་ཤིང་སྐོམ་པས་ཉེན་ཏེ། ཕྱིར་ཡང་བུ་ཟོས་ལ་ཐུག་པ་ཞིག་མཐོང་ནས་ཐ་ཆུང་གིས་ཕུ་བོ་གཉིས་ལ། སྟག་མོ་འདིས་ཟས་སུ་ཅི་ཟ་དྲིས་པས། དེ་གཉིས་ཀྱིས། བསད་མ་ཐག་པའི་ཤ་རློན་པ་དང་ཁྲག་དྲོན་མོའོ། །ཡང་གང་སུ་ཡང་རུང་སྟེ་དེ་ལྟ་བུའི་དངོས་པོས་འདིའི་སྲོག་སྐྱབས་ནུས་པ་ཡོད་དམ། དེ་གཉིས་ཀྱིས། དེ་ནི་ཤིན་ཏུ་དཀའོ། །དེ་ནས་ཐ་ཆུང་གིས་འདི་སྙམ་དུ་བསམ་སྟེ། བདག་ཡུན་རིང་པོར་འཁོར་བ་ན་འཁོར་ཞིང་། ལུས་སྲོག་གྲངས་མེད་པ་ཞིག་ཆུད་གསན་ཏེ། འགའ་ཡང་དོན་ཡོད་པར་མ་གྱུར་པས། ད་རེས་ལུས་འདི་གཏོང་བར་བྱའོ་སྙམ་ནས། ཕུ་བོ་གཉིས་ལ་མཆེད་གཉིས་སྔར་གཤེགས་ཤིག་དང་། བདག་དོན་ཞིག་གཉེར་ཏེ་སླད་བཞིན་དུ་མཆིའོ། །ཞེས་སྨྲས་ནས། ཐབས་ཀྱི་སྟག་མོའི་དྲུང་ཕྱིན་ཏེ་ཉལ་ཡང་སྟག་མོ་ཁ་འཐམ་པས་ཟ་མ་ནུས་སོ། །དེར་རྒྱལ་བུས་ཤིང་གི་ཚལ་པ་རྣོན་པོས་ལུས་ལ་ཁྲག་ཕྱུང་ནས་སྟག་མོ་ལ་བལྡག་ཏུ་བཅུག་པ་དང་ཁ་ཡང་ཕྱེས་ནས་ལུས་ཀྱི་ཤ་མ་ལུས་པ་ཟོས་སོ། །ཕུ་བོ་གཉིས་ཀྱིས་སྒུག་པས་རིང་ཞིག་ཏུ་མ་འོངས་པས། སྔར་སྨྲས་པའི་ཚུལ་ལ་བརྟགས་ན་གདོན་མི་ཟ་བར་སྟག་མོ་ལྟོགས་པས་བསད་དོ་སྙམ་ནས་བལྟར་ཕྱིན་པས། དེ་ལྟར་མཐོང་ནས་བརྒྱལ་ཞིང་འགྱེལ་ལོ། །དེའི་ཚེ་ཡུམ་གྱི་རྨི་ལམ་དུ། ཕུག་རོན་གསུམ་ཞིག་ཀུན་ཏུ་འཕུར་ཞིང་རྩེ་བ་ལས། ཐ་ཆུང་ཁྲས་ཁྱེར་བ་རྨིས་པས། སད་པ་ན་སྙིང་མི་དགའ་ཞིང་སྲས་གསུམ་ཚོལ་དུ་བཏང་བས། རིང་པོར་མ་ལོན་པར་རྒྱལ་བུ་གཉིས་འོངས་ནས་ལོ་རྒྱུས་བཤད་པས་ཡུམ་ཡང་བརྒྱལ་ཞིང་ས་ལ་འགྱེལ་ལོ། །དེ་ནས་དྲན་པ་རྙེད་པ་ན། རྒྱལ་པོ་ཡབ་ཡུམ་སོགས་གནས་དེར་བལྟ་བར་ཕྱིན་ཏེ་རུས་པ་དང་ཁྲག་འཐོར་བ་ལ་བལྟ་ཞིང་མྱ་ངན་བྱེད་དོ། །དེའི་ཚེ་རྒྱལ་བུ་ཚེ་འཕོས་པ་དགའ་ལྡན་དུ་སྐྱེས་ནས། རང་གི་ཕ་མས་མྱ་ངན་བྱེད་པ་མཐོང་ནས་ནམ་མཁའ་ལས་བབ་ནས་སྟེང་གི་ནམ་མཁར་འཁོད་པས་སྤྲོ་བ་བསྐྱེད་པའི་ཚིག་གིས་ཡབ་ཡུམ་གྱི་མྱ་ངན་སེལ་བར་བྱས་ཤིང་། ཡབ་ཡུམ་གཉིས་ཀྱིས་ཀྱང་རིན་ཆེན་སྣ་བདུན་གྱིས་སྒྲོམ་བུ་བྱས་ཏེ་རུས་བུ་དེའི་ནང་དུ་བཅུག་སྟེ་མཆོད་རྟེན་བྱས་སོ། །དེའི་ཚེ་རྒྱལ་པོ་ཤིང་རྟ་ཆེན་པོ་ནི་ཟས་གཙང་མ་དང་། དེའི་བཙུན་མོ་ནི་ཡུམ་སྒྱུ་མ་ལྷ་མཛེས་མ། སྲས་ཆེ་བ་སྒྲ་ཆེན་པོ་ནི་བྱམས་པ། འབྲིང་པོ་ལྷ་ཆེན་པོ་ནི་བ་མི་སུ་ཏྲ། ཐ་ཆུང་སེམས་ཅན་ཆེན་པོ་ནི་བཅོམ་ལྡན་འདས་ཉིད་དང་། སྟག་མོ་མ་བུ་ནི་ད་ལྟའི་མ་སྨད་གསུམ་ཡིན་པར་གསུངས་པས་འཁོར་རྣམས་ངོ་མཚར་ཞིང་ཡི་རངས་པར་གྱུར་ཏོ། །