ངག་གི་ཉེས་པར་བྱས་པའི་འབྲས་བུ་དང་སངས་རྒྱས་ལ་དད་པའི་ཕན་ཡོན།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། རྒྱལ་པོ་གསལ་རྒྱལ་གྱི་བཙུན་མོ་འཕར་ལི་ཞེས་བྱ་བ་ལ། བུ་མོ་ཞིག་བཙས་པ་ལ་མིང་རྡོ་རྗེར་བཏགས་སོ། །དེ་ནི་བཞིན་མི་སྡུག་པ། ལུས་ཀྱི་ཤ་ཤིན་ཏུ་རྩུབ་པ་སྟག་ལྤགས་ལྟར་སྲ་བ། སྐྲ་ཡང་རྟ་རྔོག་ལྟར་བཤོར་བ་ཞིག་སྟེ། རྒྱལ་པོས་ཀྱང་བུ་མོ་དེ་མི་སྡུག་པས་མི་དགའ་ནས། ཕོ་བྲང་གི་ནང་དུ་སུས་ཀྱང་མི་མཐོང་བའི་གནས་ཤིག་ཏུ་ཆེར་བསྐྱེད་ནས། ཕྱིས་རྗེ་རིགས་དབུལ་པོ་ཞིག་ལ་ལྐོག་ཏུ་ཕྱིན་ནས་སུ་ལའང་མ་སྟོན་ཅིག་ཅེས་བསྒོས་ནས། དེ་ཉིད་ལོངས་སྤྱོད་ཀྱིས་མི་བྲེལ་བར་བྱས་ཏེ། རྒྱལ་པོའི་བློན་པོར་བཅུག་གོ །ཕྱིས་ཤིག་ན་རིགས་ཆེ་ཞིང་མཐོ་བ་གཞན་དང་སྟོན་མོ་བྱ་བར་བསྒྲོས་ནས། སྟོན་མོ་ལ་ཁྱོ་ཤུག་དང་བུ་ཚ་ཡང་འདུས་ཏེ་བརྩེ་བར་བྱས་པ་ལས། གཞན་ཀུན་ནི་ཆུང་མ་དང་འགྲོགས་ཏེ་འོངས་ཀྱང་བློན་པོ་དེ་ཉིད་འབའ་ཞིག་གི་ཆུང་མ་མ་འོངས་པས་གཞན་ཀུན་ཀྱང་ཐེ་ཚོམ་ཟོས་ཏེ། བློན་པོ་དེ་ཆང་གིས་ར་རོ་བར་བྱས་ནས་ལུས་ལས་ལྡེ་མིག་བརྐུས་ཏེ། མི་ལྔ་དེའི་ཆུང་མ་ལ་བལྟ་བར་བཏང་ངོ་། །དེའི་ཚེ་ཆུང་མ་དེས་སྔོན་བདག་གི་སྡིག་པ་ཅི་བགྱིས་ནས་ཁྱིམ་ཐབ་སྡང་སྟེ། འདི་འདྲའི་མུན་ཁུང་དུ་བཅུག་ནས་ཉི་མ་དང་ཟླ་བ་ཙམ་ཡང་བལྟར་མེད་དེ། མི་གཞན་ཡང་མི་མཐོང་སྙམ་སྟེ། ཡིད་མི་དགའ་ནས་ཡང་འདི་ལྟར་དུ་སེམས་ཏེ། སངས་རྒྱས་བཅོམ་ལྡན་འདས་འཇིག་རྟེན་ན་བཞུགས་ཏེ། སེམས་ཅན་གང་སྡུག་བསྔལ་གྱི་གདུང་བ་དག་གི་མགོན་དང་སྐྱབས་མཛད་དེ་ཐར་བར་མཛད་དོ་ཞེ་ན། བཅོམ་ལྡན་འདས་ལ་བདག་རྒྱང་མ་ནས་ཕྱག་འཚལ་ལོ། །ཐུགས་བརྩེ་བར་དགོངས་ཏེ། བདག་གི་མདུན་དུ་མངོན་སུམ་དུ་གཤེགས་ཤིང་། བདག་ལ་ཅུང་ཟད་ཅིག་ཞལ་སྟོན་པར་གྱུར་ཀྱང་ཅི་མ་རུང་སྙམ་མོ། །དེ་བཅོམ་ལྡན་འདས་ཀྱིས་མཁྱེན་ནས་དེའི་ཁྱིམ་དུ་གཤེགས་ཏེ། ཐོག་མར་དབུ་སྐྲ་མཐོན་མཐིང་གིས་མཚན་པ་བསྟན་པས། དེ་ལྷག་པར་ཡང་དགའ་ཞིང་བསམ་པ་དག་པར་གྱུར་པས་དེའི་སྐྲ་ཤིན་ཏུ་འཇམ་ཞིང་ཁ་དོག་དང་ལྡན་པར་གྱུར་ཏོ། །དེ་བཞིན་དུ་ཞལ་གྱི་དཀྱིལ་འཁོར་བསྟན་པས་དེའི་ལུས་ཀྱི་མི་སྡུག་པ་དང་རྩུབ་པ་ཡང་མེད་པར་གྱུར། སྐུའི་སྟ་ཟུར་ཏེ་སྐུ་སྐེད་ཡན་ཆད་བསྟན་པས། ལུས་ཀྱི་མི་སྡུག་པ་ཐམས་ཅད་མེད་པར་གྱུར་ཏེ་ཤིན་ཏུ་མཛེས་པ་ལྷ་ཡི་བུ་མོ་ལྟ་བུར་གྱུར་ཏོ། །དེ་ནས་སྐུ་ཡོངས་རྫོགས་བསྟན་པ་སྔར་བས་ཀྱང་དགའ་མགུ་རངས་པར་གྱུར་པས་ལུས་ཀྱི་མཚན་འཇིག་རྟེན་ན་དཔེ་ཟླ་མེད་པར་གྱུར་ཏོ། །དེར་ཆོས་བསྟན་པས་རྒྱུན་དུ་ཞུགས་པའི་འབྲས་བུ་ཐོབ་ནས། བཅོམ་ལྡན་འདས་ཀྱང་སླར་གཤེགས་སོ། །དེ་ནས་མི་ལྔ་པོས་སྒོ་ཕྱེས་ཏེ། ནང་དུ་འོང་བ་ན། དེའི་ཆུང་མ་རབ་ཏུ་མཛེས་ཤིང་དཔེ་ཟླ་མེད་པར་མཐོང་ནས་ཕྱིར་སོང་སྟེ་མ་ཚོར་བར་ལྡེ་མིག་བློན་པོའི་ལུས་ལ་བཏགས་སོ། །དེ་ནས་དེ་ར་རོ་བ་སངས་ནས་ཁྱིམ་དུ་འོངས་པ་དང་། བདག་གི་ཆུང་མ་མཛེས་ཤིང་ལྟ་ན་སྡུག་པ། མིའི་ནང་ནས་དཀོན་པར་གྱུར་པ་མཐོང་ནས་རབ་ཏུ་དགའ་ནས། རྒྱུ་མཚན་དྲིས་པར་ལོ་རྒྱུས་ཞིབ་ཏུ་བཤད་དེ། དེ་ཉིད་ཡབ་རྒྱལ་པོ་ལའང་གོ་བར་བྱས་པས་ཐམས་ཅད་ངོ་མཚར་དུ་གྱུར་ནས་བཅོམ་ལྡན་འདས་ཀྱི་དྲུང་དུ་ལྷགས་ནས་ཞབས་ལ་ཕྱག་བྱས་ཏེ། རྒྱལ་པོ་གསལ་རྒྱལ་གྱིས་སྔོན་གྱི་ལས་ཀྱི་རྒྱུ་ཞུས་པར། བཀའ་སྩལ་པ་སྔོན་ཝཱ་རཱ་ཎ་སཱི་ན་ཁྱིམ་བདག་ཕྱུག་ཅིང་ནོར་མང་བ་ཞིག་བྱུང་སྟེ། དེས་ཁྱིམ་ན་ཅི་བདོག་པ་ཐམས་ཅད་རང་སངས་རྒྱས་ཞིག་ལ་མཆོད་ཅིང་རྟག་ཏུ་དེའི་ཁྱིམ་དུ་བྱོན་པ་ལས་རང་སངས་རྒྱས་དེ་ནི་སྐུ་ཤིན་ཏུ་རྩུབ་ལ་ངན་པ་མི་སྡུག་པ་སྐེམ་པ་ཞིག་སྟེ། དེ་ལ་ཁྱིམ་བདག་གི་བུ་མོ་ཞིག་ཡོད་པ་དེ་མ་དད་ནས་བརྙས་སྨྲ་དང་། བྱད་བཞིན་མི་སྡུག་ལ་ལུས་ཀྱི་པགས་པ་རྩུབ་པ་ཞེས་འཕྱ་བར་བྱེད་པ་ལས། ཕྱིས་རང་སངས་རྒྱས་དེ་མྱ་ངན་ལས་འདའ་བར་བསམ་སྟེ། ཁྱིམ་བདག་གི་སྟེང་གི་ནམ་མཁར་འཕགས་ཏེ་སྐུ་ལས་མེ་འབར་བ་དང་ཆུ་འབབ་པ་སོགས་ཀྱི་ཆོ་འཕྲུལ་རྣམ་པ་སྣ་ཚོགས་པ་བསྟན་པས། བུ་མོ་དེ་ཤིན་ཏུ་འགྱོད་པས་རང་སངས་རྒྱས་ལ་བཤགས་པ་ཕུལ་ཞིང་དེས་ཀྱང་འགྱོད་ཚངས་བྱེད་པར་གནང་ངོ་། །དེའི་དུས་ཀྱི་བུ་མོ་དེ་ནི་རྒྱལ་པོའི་བུ་མོ་འདི་ཡིན་ལ། དེའི་ཚེ་ངན་སྨྲས་ཀྱི་ཉེས་པས་རྟག་ཏུ་གཟུགས་མི་སྡུག་པར་གྱུར་ལ་འགྱོད་ཚང་བགྱིས་པས་ཕྱིས་གཟུགས་བཟང་བ་དང་མཆོད་པ་ཕུལ་བས་རིགས་མཐོ་ཞིང་ལོངས་སྤྱོད་དང་ལྡན་པ་དང་མཐར་གྱིས་རྣམ་པར་གྲོལ་བར་གྱུར་ཏོ། །དེས་ན་རྒྱལ་པོ་ཆེན་པོ་ཇི་ཙམ་དུ་སེམས་ཅན་གྱི་རིགས་སུ་གཏོགས་པ་ཐམས་ཅད་ནི་ལུས་དང་ངག་གི་ཉེས་པ་ཤིན་ཏུ་བསྲུང་ཞིང་གཞན་ལ་བརྙས་པ་དང་སྨད་པར་མི་བྱའོ། །ཞེས་གསུངས། འདིས་ནི་ངག་གི་ཉེས་པར་བྱས་པའི་འབྲས་བུ་དང་སངས་རྒྱས་ལ་དད་པའི་ཕན་ཡོན་ཀྱང་བསྟན་པ་ཡིན་ནོ། །