ཁྱིམ་བདག་དཔལ་སྐྱེས་རབ་ཏུ་བྱུང་ཚུལ།

༈ ཡང་སྟོན་པ་འོད་མའི་ཚལ་ན་བཞུགས་པའི་ཚེ། རྒྱལ་པོའི་ཁབ་དེར་ཁྱིམ་བདག་དཔལ་སྐྱེས་ཞེས་བྱ་བ་ལོ་བརྒྱ་ལོན་པ་རྒས་ཤིང་འཁོགས་པ་ཞིག་ཡོད་པ་དེས་རབ་ཏུ་བྱུང་བའི་ཡོན་ཏན་གྱི་བསྔགས་པ་ཚད་མེད་པར་ཐོས་ནས་ཁྱིམ་གྱི་མི་རྣམས་ལ་གོ་བར་བྱས་ནས་འོད་མའི་ཚལ་དུ་ཕྱིན་པ་ན། སྟོན་པ་མི་བཞུགས་ནས་དེའི་འཁོར་མཁས་པ་དང་ཤེས་རབ་ལྡན་པ་སུ་ཞེས་དྲིས་པས། བཙུན་པ་ཤཱ་རིའི་བུ་ཡིན་པར་ཐོས་ནས། དེར་ལྷགས་ཏེ་རབ་ཏུ་བྱུང་བར་གསོལ་བས་མ་གནང་སྟེ། རྒྱུ་དེས་འོད་སྲུང་ཆེན་པོ་དང་། ཨུ་པཱ་ལི་དང་མ་འགགས་པ་སོགས་དགྲ་བཅོམ་པ་གཞན་རྣམས་ལ་ཞུས་ཀྱང་མ་གནང་བས་འོད་མའི་ཚལ་ནས་ཕྱིར་བྱུང་སྟེ་སྒོ་ཐེམ་ལ་འདུག་ནས་སྐད་ཆེན་པོས་སྨྲེ་སྔགས་ཕྱུང་བ་ན། བཅོམ་ལྡན་འདས་དེའི་དྲུང་དུ་གཤེགས་ནས་ཁྱོད་ཀྱི་ཅིའི་ཕྱིར་ངུ་། ཞེས་བཀའ་སྩལ་པ་དང་། ཇི་ལྟར་གྱུར་པ་ཞུས་པས། བཅོམ་ལྡན་འདས་ཀྱིས་སྙན་པའི་ཚིག་གིས་སྤྲོ་བ་བསྐྱེད་ནས། འཕགས་པ་མོང་གལ་གྱི་བུ་ལ་གཏད་ནས་རབ་ཏུ་བྱུང་བར་གནང་ངོ་། །དེ་ཁ་ཏོན་ལ་བརྩོན་ཡང་རྒས་ཤིང་འཁོགས་པས་ཚུལ་བཞིན་དུ་རིམ་གྲོ་དང་། བསྟི་སྟང་དང་བསུ་སྐྱེལ་དང་། བླ་མ་ལ་གསོང་པོར་སྨྲ་བ་དང་། ཕྱག་འཚལ་བ་ནི་མི་ནུས་སོ། །དེ་ལ་དགེ་སློང་གཞོན་ནུ་སྔར་རབ་ཏུ་བྱུང་བ་གྲལ་མཐོ་བ་དག་གིས། བདག་ཅག་ལ་བཀུར་སྟི་མི་བྱེད་དོ་སྙམ་ནས་རྟག་ཏུ་འཚེ་བར་གྱུར་པས། དེ་རབ་ཏུ་སྐྱོ་ནས་ཆུ་ཀླུང་ཆེན་པོ་ཞིག་གི་འགྲམ་དུ་ཕྱིན་ཏེ། ཆོས་གོས་ཤིང་གི་ཡལ་ག་ལ་བཀལ་ནས། ཕྱི་མར་རབ་ཏུ་བྱུང་བར་སྨོན་ལམ་བཏབ་ནས་འཆི་བར་རྩོམ་པ་ན། དེ་ཉིད་མོའུ་འགལ་གྱི་བུས་ལྷ་ཡི་མིག་གིས་མཐོང་ནས་ཆུར་མ་ཕྱིན་པར་རྫུ་འཕྲུལ་གྱི་མཐུས་བླངས་ནས་ཆུའི་འགྲམ་དུ་བཞག་སྟེ། འདི་ལ་ནི་སྐྱེ་བ་དང་ཤི་བའི་འཇིགས་པ་ཞིག་གིས་མ་བསྡིགས་ན། རབ་ཏུ་བྱུང་བ་དོན་མེད་པར་གྱུར་ཏོ་སྙམ་དུ་དགོངས་ཏེ། ངའི་ཆོས་གོས་ཀྱི་མཐའ་འདི་ལ་དམ་དུ་འཇུས་ཤིག་གསུངས་ནས། རྫུ་འཕྲུལ་གྱིས་ནམ་མཁའ་ལ་འཕགས་ནས། སྐྱེས་བུའི་ལག་པ་བརྐྱང་བསྐུམ་གྱི་ཡུན་ཙམ་གྱིས་རྒྱ་མཚོའི་འགྲམ་དུ་ཕྱིན་ཏོ། །དེར་བུད་མེད་ཤིན་ཏུ་མཛེས་མ་ཤི་མ་ཐག་པའི་རོ་ཞིག་གི་ཁ་སྣ་སོགས་དབང་པོའི་སྒོ་རྣམས་སུ་སྦྲུལ་ཞིག་འཇུག་ཅིང་བྱུང་བར་མཐོང་ནས། དཔལ་སྐྱེས་ཀྱིས་འདི་སུ་ལགས་ཞེས་དྲིས་པས། ནམ་དུས་ལ་བབ་པ་ན་བསྟན་ཏོ་གསུངས། ཡང་སོང་བ་ན། བུད་མེད་གཅིག་ཟངས་ཆེན་པོ་ཞིག་བཙུགས་ཏེ། ཟངས་ཀྱི་ནང་དུ་ཆུ་བླུགས་ནས་འོག་ཏུ་མེ་ཆེན་པོ་བུས་ཏེ་ཆུ་དེ་ཁོལ་བ་དང་གོས་ཕུད་དེ་ནང་དུ་ཞུགས་ཏེ་དེ་མ་ཐག་ཏུ་ཚོས་ནས་ཤ་རུས་སོ་སོར་བྱེ་སྟེ་རུས་པ་རྣམས་ཕྱིར་བྱུང་བ་དང་། རུས་པ་དེ་དག་སླར་རླུང་གིས་བུས་པ་ཐག་ཏུ་མི་ཞིག་ཏུ་གྱུར་ནས། ཟངས་ཀྱི་ནང་ནས་ཤ་ཕྱུང་སྟེ་ཟ་བར་མཐོང་ནས་དྲིས་པ་དང་སྔ་མ་བཞིན་གསུངས་སོ། །ཡང་སོང་བས། ཤིང་ཆེན་པོ་ཞིག་ལོ་མ་དང་ཡལ་གའི་བར་ཁབ་ཀྱི་རྩེ་ཙམ་བཙུགས་པའི་ས་སྟོང་ཡང་མེད་པར་སྲིན་བུ་མང་པོས་ཟ་བ་ལ་སྐད་ཆེན་པོར་ངུར་ཞིང་འབོད་པའི་སྒྲ་དྲག་པོ་ཐོས་པས་དྲིས་པ་ན་སྔར་བཞིན་གསུངས། ཡང་སོང་བས། མིའི་ལུས་ལ་གཅན་གཟན་གྱི་མགོ་ཅན་དུ་འདུག་པའི་ཡི་དྭགས་མང་པོས་མི་ཞིག་བསྐོར་ཏེ། ལག་ན་མདའ་གཞུ་ཐོགས་ཤིང་མདའ་ལ་མེ་འབར་བཞིན་དུ་ཀུན་གྱིས་མི་དེ་ལ་འཕངས་ནས་གཅིག་ཏུ་འབར་བར་མཐོང་ནས་དྲིས་པ་ན་སྔར་བཞིན་གསུངས། ཡང་སོང་བས། རི་ཆེན་པོ་ཞིག་གི་དྲུང་ནས་རལ་གྲི་དང་མཚོན་རྣོན་པོ་སོ་གྱེན་དུ་བསྟན་ཏེ་བཙུགས་པ་ལ་མི་ཞིག་རིའི་རྩེ་མོ་ནས་ཐུར་དུ་རྒྱུགས་ཏེ། རལ་གྲི་དང་མཚོན་གྱིས་ཟུག་ཅིང་འདྲལ་བ་དང་། མཚོན་ཆའི་ཐང་ལ་མི་དལ་བར་རྒྱུགས་པ་མཐོང་ནས་དྲིས་པ་དང་སྔར་བཞིན་གསུངས་སོ། །ཡང་སོང་བས། རུས་པའི་རི་བོ་ཆེན་པོ་མཐོ་ཁྱད་དཔག་ཚད་བདུན་བརྒྱ་པ་ཉི་མ་ཡང་སྒྲིབ་ཅིང་། རྒྱ་མཚོ་ཡང་གྲིབ་མས་མུན་པར་གྱུར་པ་དེ་ལ་མང་གལ་འཛེགས་པའི་ཕྱི་བཞིན་དུ་སོང་ནས་སྟེང་དུ་སླེབས་པ་ན། སྔར་གྱི་དེ་རྣམས་ཞུས་པས། ད་དུས་ལ་བབ་ཀྱིས་བསྟན་པར་བྱའོ་གསུངས། དེ་ལ་སྔར་མཐོང་བའི་བུད་མེད་ཀྱི་ལུས་དེ་ནི། རྒྱལ་པོའི་ཁབ་ཀྱི་ཁྱིམ་བདག་སར་ཕག་ཆེན་པོའི་ཆུང་མ་སྟེ། དེ་ཚོང་པ་ལྔ་བརྒྱ་དང་བཅས་རྒྱ་མཚོར་གྲུར་ཞུགས་པ་ལས། གྲུ་ཞིག་ནས་ཚེ་ཡི་དུས་བྱས་པ་སྟེ། རྒྱ་མཚོའི་ཆོས་ཉིད་ཀྱིས་རོ་ཞག་ལོན་པར་མི་གནས་ཏེ་ཆུ་རླབས་ཀྱིས་ཕུལ་ནས། རྒྱ་མཚོའི་འགྲམ་དུ་ཕྱིན་པ་སྟེ། དེ་ཡང་སེམས་ཅན་གང་ཞིག་ཚེ་ཡི་དུས་བྱས་པ་ན་ཅི་ལ་ཆགས་པ་དེར་སྐྱེ་བར་འགྱུར་ཏེ། སེམས་ཅན་གང་དག་དཀོན་མཆོག་གསུམ་དང་ཕ་མ་ལ་གནོད་པ་བགྱིས་པ་དང་། མིའི་སྲོག་གཅོད་པ་སོགས་ཁ་ན་མ་ཐོ་བ་ཆེན་པོ་བྱས་པ་དག་སེམས་ཅན་ཚ་བའི་དམྱལ་བར་སྐྱེ་སྟེ། མི་དེ་གྲང་ནད་ཀྱིས་ཟིན་པས་ཡིད་ལ་མེ་འདོད་པས་མེའི་ནང་དུ་འགྲོ་བར་བསམ་མ་ཐག་ཏུ་ཚེ་ཡི་དུས་བྱས་ནས་ཤིན་ཏུ་འབར་བའི་སེམས་ཅན་དམྱལ་བར་འགྲོའོ། །གང་དག་སངས་རྒྱས་དང་དགེ་འདུན་ལ་ཕུལ་བའི་མར་མེ་བརྐུས་པའམ། དགེ་འདུན་གྱི་འདུན་ཁང་སོགས་བཤིག་པ་དང་། དགུན་གྱི་དུས་སུ་གཞན་གྱི་གོས་ཕྲོགས་པ་སོགས་དེ་དག་གྲང་བའི་དམྱལ་བར་སྐྱེ་སྟེ། མི་དེ་ཚ་བའི་ནད་ཀྱིས་གཟིར་ནས། གྲང་ཞིང་བསིལ་བར་འདོད་པས་ཚེ་འཕོས་ནས་ཨུཏྤལ་དང་པདྨ་ལྟར་གས་པ་སོགས་ཀྱིས་སྡུག་བསྔལ་བར་འགྱུར་རོ། །གང་དག་སེར་སྣ་ཅན་གཞན་གྱི་ཁ་ཟས་འཕྲོག་པ་དང་། ཁ་ཟས་དུས་སུ་མི་སྟེར་བར་སེམས་ཅན་ལྟོགས་སུ་བཅུག་པ་དེ་དག་ཡི་དྭགས་ཀྱི་གནས་སུ་ལྟུང་སྟེ། མི་དེ་ཁ་ཟས་མི་ཆུད་ཅིང་སྐྱུག་བྲོ་བའི་ནད་ཀྱིས་བཏབ་ནས། ནད་གཡོག་སོགས་ཀྱིས་ཁ་ཟས་རྣམ་པ་མང་པོ་སྦྱར་ཏེ་ནན་གྱིས་སྙོད་པ་ན། དེ་མི་དགའ་ཞིང་སྐྱུག་བྲོ་སྟེ་བདག་ཁ་ཟས་འདི་མིག་གིས་མ་མཐོང་བའི་དུས་ཡོད་དམ་སྙམ་ནས་ཚེ་འཕོས་པས་དེར་སྐྱེའོ། །གང་གླེན་པ་གཏི་མུག་ཅན་དཀོན་མཆོག་ལ་མི་དད་པ། འཕགས་པ་ལ་སྐུར་བ་འདེབས་པ་དག་ནི་དུད་འགྲོར་སྐྱེ་སྟེ། དེ་ནད་ཀྱིས་གཟིར་ནས་དགེ་བའི་ཕྱོགས་ཀྱི་གཏམ་ཉན་པར་མི་འདོད་ཅིང་། གཞན་གྱིས་བསོད་ནམས་ཀྱི་བསྐུལ་ན་ཡང་མ་དད་ཅིང་མི་དགའ་ནས་འདི་མ་ཐོས་པ་ཞིག་ཏུ་སོང་ན་སྙམ་སྟེ། ཚེ་འཕོས་པས་དུད་འགྲོའི་སྐྱེ་གནས་སུ་འགྲོའོ། །གང་དག་མཐོ་རིས་ཀྱི་རྒྱུར་གྱུར་བའི་དགེ་བའི་ཕྱོགས་ལ་བརྩོན་པ་དེ་དག་ནི། ནད་ཀྱིས་ཀྱང་ཤིན་ཏུ་གདུང་བར་མི་འགྱུར་ཞིང་། འཆི་བའི་ཚེ་སེམས་ཀྱང་མི་འཁྲུགས་ཏེ། གཞན་གྱིས་བསོད་ནམས་ཀྱི་གཏམ་བྱས་པ་ནའང་། དེ་ལ་དགའ་ཞིང་དད་ནས་དཀོན་མཆོག་གསུམ་ཡིད་ལ་བྱེད་ཅིང་ཡང་དག་པར་སྨོན་པ་དེ་ནི་མིའི་ནང་དུ་སྐྱེའོ། །གང་དག་ལྷར་སྐྱེ་བའི་རྒྱུ་སྦྱིན་པ་དང་ཚུལ་ཁྲིམས་དང་དགེ་བ་བཅུའི་ལམ་ལ་སྤྱོད་པ་དེ་དག་ཚེ་ཡི་དུས་བྱས་པ་ན། སངས་རྒྱས་ཀྱི་སྐུ་གཟུགས་དང་། ལྷའི་ཕོ་བྲང་སོགས་མཐོང་ཞིང་ལྷའི་རོལ་མོའི་སྒྲ་ཐོས་ཏེ། མདངས་བཟང་ཞིང་ལག་པ་གྱེན་དུ་འདེགས་པ་སོགས་ཀྱི་ལྟས་དང་བཅས་ལྷའི་གནས་སུ་སྐྱེའོ། །དེས་ན་ཁྱིམ་བདག་སར་ཕག་གི་ཆུང་མ་དེ་རང་གི་ལུས་ལ་ཆགས་པས་ཚེ་འཕོས་མ་ཐག་ཏུ་བུད་མེད་ཀྱི་ལུས་དེ་ལ་སྦྲུལ་དུ་སྐྱེས་ཏེ། སྦྲུལ་དེ་ཚེ་འཕོས་པ་ན་སེམས་ཅན་དམྱལ་བ་ཆེན་པོའི་སྡུག་བསྔལ་མྱོང་བར་འགྱུར་རོ། །བདག་གི་ཤ་ལ་ཟ་བའི་བུད་མེད་དེ་ནི། མཉན་ཡོད་ན་ཡོད་པའི་དགེ་བསྙེན་མ་ཞིག་གི་བྲན་མོ་སྟེ། དགེ་བསྙེན་མ་དེས་ཚུལ་ཁྲིམས་རྣམ་པར་དག་པའི་དགེ་སློང་ཞིག་ལ་དབྱར་ཟླ་གསུམ་དུ་བཤོས་འབུལ་བ་ལས། བྲན་མོ་དེ་ལ་སྐྱེལ་དུ་བཏང་བས་ཁ་ཟས་ཞིམ་པོ་རྣམས་མོ་རང་གིས་ཟོས། ལྷག་མ་དགེ་སློང་ལ་ཕུལ་བ་ལས། ཕྱིས་དགེ་བསྙེན་མ་དེ་དོགས་པ་ཟོས་ནས་དྲིས་པ་དང་། དེ་ནི་བདག་གིས་མ་ཟོས་ཏེ། གལ་ཏེ་ཟོས་ན་བདག་གང་དུ་སྐྱེས་ཀྱང་། བདག་གི་ཤ་ཟ་བར་ཤོག་ཅིག་ཅེས་སྨྲས་པས། ལས་ཀྱི་རྣམ་པར་སྨིན་པ་མི་བཟད་པ་འདི་མྱོང་ནས། ད་དུང་ཡང་སེམས་ཅན་དམྱལ་བ་ཆེན་པོའི་སྡུག་བསྔལ་དཔག་ཏུ་མེད་པ་མྱོང་བར་འགྱུར་རོ། །ཤིང་ཆེན་པོ་ལ་སྲིན་བུ་མང་པོས་ཟ་ཞིང་སྡུག་བསྔལ་གྱི་སྐད་འབྱིན་པ་དེ་ནི། ལི་ཏ་ཞེས་བྱ་བའི་དགེ་འདུན་གྱི་ལས་བྱེད་པའི་དགེ་སློང་དེ་ཡིན་ཏེ། དགེ་འདུན་གྱི་དཀོར་ལ་སྤྱོད་ཅིང་། མེ་ཏོག་དང་བཟའ་བཏུང་དག་ཁྱིམ་པའི་ཕྱོགས་སུ་བྱིན་པས་རྣམས་སྨིན་མི་བཟད་པ་འདི་མྱོང་ནས་ཚེའི་དུས་བྱས་མ་ཐག་ཏུ་སེམས་ཅན་དམྱལ་བ་ཆེན་པོར་སྐྱེས་ཏེ། ཤིང་ལ་ཟ་བའི་སྲིན་བུ་དེ་དག་ནི་དགེ་སློང་གིས་བྱིན་པ་ཐོབ་པའི་མི་རྣམས་ཡིན་ནོ། །མི་ཞིག་མི་མང་པོས་བསྐོར་ཏེ་མདས་བཙུགས་ནས་ལུས་གཅིག་ཏུ་འབར་བ་དེ་ནི། རྔོན་པ་ཞིག་སྟེ་དེས་རི་དྭགས་མང་དུ་བསད་པས་སྡུག་བསྔལ་འདི་ལྟ་བུ་མྱོང་སྟེ། ཚེ་འཕོས་ནས་ཀྱང་སེམས་ཅན་དམྱལ་བ་ཆེན་པོར་སྐྱེས་ཏེ་དེ་ལས་ཐར་བའི་དུས་ནི་ཤིན་ཏུ་དཀའོ། །རི་མཐོན་པོ་ལ་རལ་གྲི་དང་མཚོན་ཁར་རྒྱུགས་ཏེ་འཆི་བ་དེ་ནི། རྒྱལ་པོའི་བློན་པོ་ཤིན་ཏུ་དཔའ་བ་ཡིན་ཏེ། རེ་ཞིག་མཚོན་རྣོན་པོ་དང་རལ་གྲི་མདུང་སོགས་ཀྱི་ཁར་རྒྱུགས་ཏེ། དེ་ནས་ཚེ་འཕོས་ནས་སེམས་ཅན་དམྱལ་བ་ཆེན་པོར་སྡུག་བསྔལ་ཡུན་རིང་པོར་མྱོང་བར་འགྱུར་རོ། །རུས་པའི་རི་ཆེན་པོ་འདི་ནི་ཁྱོད་ཀྱི་ལུས་སྔ་མའི་རུས་པ་ཡིན་ཏེ། སྔོན་འཛམ་བུའི་གླིང་འདིར་རྒྱལ་པོ་ཆོས་འཕགས་ཞེས་བྱ་བ་སྦྱིན་པ་དང་ཚུལ་ཁྲིམས་དང་ཆོས་ཉན་པ་ལ་དགའ་ཞིང་སྙིང་རྗེའི་སེམས་དང་ལྡན་པས་སེམས་ཅན་གྱི་སྲོག་མི་གཅོད་པར་དམ་པའི་ཆོས་ཀྱི་སྲིད་འཚོ་བ་ཞིག་བྱུང་སྟེ། དུས་ལན་གཅིག་མིག་མངས་ཀྱིས་རྩེ་བ་ལས། མི་ཞིག་ལ་ཉེས་པ་ཆེན་པོ་བྱུང་ནས་བློན་པོ་རྣམས་ཀྱིས་མི་ཞིག་ཁྲིམས་ལས་འགལ་བའི་ཉེས་པ་ཆེན་པོ་བགྱིས་ན། ཅི་ལྟར་བགྱི་ཞེས་གསོལ་པ་དང་། རྒྱལ་པོ་མིག་མངས་ལ་ཡེངས་པས། རྒྱལ་པོའི་ཁྲིམས་བཞིན་དུ་གྱིས་ཤིག་ཅེས་བསྒོ་ནས། བློན་པོ་རྣམས་ཀྱི་ཁྲིམས་དང་སྦྱར་ནས་མི་དེ་བསད་དོ། །རྒྱལ་པོས་མིག་མངས་རྩེ་ཟིན་པ་དང་། མི་དེ་ག་རེ་ཞལ་ལྕེ་གཅོད་དོ། །ཞེས་བྱས་པས། བློན་པོ་རྣམས་ཀྱིས་ཁྲིམས་ལ་སྦྱར་ནས་བསད་དོ་ཞེས་སྨྲས་པས། རྒྱལ་པོ་བརྒྱལ་ཞིང་འགྱེལ་ལོ། །བརྒྱལ་སངས་པ་ན། རྒྱལ་སྲིད་དང་བཙུན་མོའི་འཁོར་དང་འབྱོར་པ་ཐམས་ཅད་ནི་འདིར་ལུས་ཀྱི་བདག་འབའ་ཞིག་ངན་སོང་དམྱལ་བའི་སྡུག་བསྔལ་མྱོང་བར་འགྱུར་ན། ད་ནི་རྒྱལ་པོ་ཡང་མི་འདོད་དོ་ཞེས་སྨྲས་ནས། རྒྱལ་ཐབས་བཏང་སྟེ་རི་ལ་བདག་སྲུང་ཞིང་འདུག་པ་ལས་ཚེ་འཕོས་ནས་ཆུ་སྲིན་དུ་སྐྱེས་ཏེ། དེ་ཡང་གང་དག་རྒྱལ་པོའམ་བློན་པོ་མཐུ་རྩལ་ཅན་དུ་སྐྱེས་ཏེ། སེམས་ཅན་གྱི་སྲོག་གཅོད་པའམ། འདོད་པ་དང་བྲལ་བའི་ལས་བྱས་སམ། སེམས་ཅན་དུ་འཚེ་བ་བྱེད་པ་དེ་དག་ཤི་འཕོས་ནས། ཕལ་ཆེར་ཆུ་སྲིན་གྱི་རིགས་སུ་སྐྱེས་ཏེ་ལུས་ལ་སྲིན་བུ་མང་པོ་གནས་ཤིང་ཟ་བར་བྱེད་ལ་ཤི་འཕོས་ནས་ཀྱང་ངན་སོང་དམྱལ་བ་ཆེན་པོར་སྐྱེ་བར་འགྱུར་བས། རྒྱལ་པོ་དེ་ཡང་རྒྱ་མཚོ་ཆེན་པོ་ན་ཆུ་སྲིན་ལུས་ཀྱི་ཆེ་ཚད་དཔག་ཚད་བདུན་བརྒྱ་ཡོད་པ་ཞིག་ཏུ་གྱུར་ནས། ཆུ་སྲིན་དེ་གཉིད་ཀྱིས་ལོག་ན་ལོ་བརྒྱ་ན་ལན་གཅིག་སངས་ཏེ། བཀྲེས་པ་དང་། སྐོམ་པས་ཉེན་ནས་ཁ་གདངས་པ་དང་། རྒྱ་མཚོའི་ཆུ་ཁར་འགྲོ་བ་ནི་ཆུ་ཆེན་པོ་རྒྱ་མཚོར་འབབ་པ་དང་འདྲའོ། །དེའི་ཚེ་ཚོང་པ་ལྔ་བརྒྱ་ཙམ་རྒྱ་མཚོར་ཞུགས་ཏེ་འགྲོ་བ་ན། ཆུ་སྲིན་གྱིས་ཁ་གདངས་པ་དང་འཕྲད་པས། གྲུ་ཡང་ཆུ་སྲིན་གྱིས་ཁར་ཤིན་ཏུ་མགྱོགས་པར་སོང་བས། ཚོང་པ་རྣམས་ཀྱིས་སྐད་ཆེན་པོ་ཕྱུང་ནས་རང་རང་གི་འདོད་པའི་ལྷ་གང་ཡིན་པའི་མིང་ནས་བོས་པ་དང་། ཁ་ཅིག་གིས་སངས་རྒྱས་ལ་ཕྱག་འཚལ་ལོ་ཞེས་བོས་པས་ཆུ་སྲིན་དེས་སངས་རྒྱས་ཀྱི་མཚན་ཐོས་མ་ཐག་ཏུ་ཁ་བཙུམ་པས་ཚོང་པ་རྣམས་བདེ་བར་ཐར་ཞིང་། ཆུ་སྲིན་དེ་ལྟོགས་ནས་ཤི་འཕོས་ཏེ་རྒྱལ་པོའི་ཁབ་ཏུ་ཉིང་མཚམས་སྦྱར་ཏེ། ཆུ་སྲིན་གྱི་རོ་རྒྱ་མཚོའི་ངོགས་སུ་ཕྱིར་བྱུང་བའི་རུས་པ་ནི་འདི་ཉིད་ཡིན་ནོ། །དེའི་དུས་ཀྱི་རྒྱལ་པོ་ཆོས་འཕགས་ནི་ཁྱོད་ཉིད་ཡིན་པས། མི་བསད་པའི་རྐྱེན་གྱིས་ཆུ་སྲིན་དུ་སྐྱེས་པ་ཡིན་ལ་ད་ཡང་ཁྱོད་ཀྱིས་མིའི་ལུས་ཐོབ་པ་འདིས། འཁོར་བ་ལ་རྒྱབ་ཀྱིས་མ་ཕྱོགས་ན། ཚེ་འཕོས་ནས་སླར་སེམས་ཅན་དམྱལ་བ་ཆེན་པོར་སྐྱེས་ཏེ་ཐར་པར་དཀའ་འོ། །ཞེས་གསུངས་པས། དེ་ཤིན་ཏུ་སྐྲག་ཅིང་འཁོར་བ་ལ་རྒྱབ་ཀྱིས་ཕྱོགས་པའི་བློ་སྐྱེས་ཏེ་ནན་ཏན་དུ་བརྩོན་པས་དགྲ་བཅོམ་པའི་གོ་འཕང་མངོན་དུ་བྱས་ནས། རྫུ་འཕྲུལ་གྱིས་འཕགས་པའི་ཕྱིར་འབྲང་སྟེ་འོད་མའི་ཚལ་དུ་འོང་ངོ་། །དེར་བཅོམ་ལྡན་འདས་ཀྱིས་དཔལ་སྐྱེས་ལ་འདྲི་སྨེད་{དམད} མཛད་ནས་ལེགས་སོ། །ཁྱོད་ཀྱིས་འཁོར་བའི་སྡུག་བསྔལ་ཡོངས་སུ་སྤངས་ཏེ། མྱ་ངན་ལས་འདས་པའི་བདེ་བ་ཐོབ་པས། ལྷ་དང་མིར་བཅས་པའི་མཆོད་པའི་གནས་སུ་གྱུར་ཏོ། །ཞེས་བཀའ་སྩལ་པས། སྔར་ཐོ་བཙམས་པའི་དགེ་སློང་གཞོན་ནུ་དེ་དག་རབ་ཏུ་འགྱོད་པས་དཔལ་སྐྱེས་ལ་ཕྱག་བྱས་ནས་བཟོད་པར་གསོལ་ཞིང་། དེས་ཀྱང་ཚངས་པ་བླང་ཞིང་ཡང་དག་པའི་ཆོས་བསྟན་པ་བཞིན། དེ་དག་གིས་ཀྱང་ནན་ཏན་དུ་བརྩོན་པས་དགྲ་བཅོམ་པ་མངོན་དུ་བྱས་སོ། །དེར་ཁྱིམ་བདག་དཔལ་སྐྱེས་ཀྱང་རྒྱལ་པོའི་ཁབ་ཏུ་ཤིན་ཏུ་གྲགས་པར་གྱུར་ཏེ། ཀུན་གྱིས་ངོ་མཚར་དུ་གྱུར་ནས། ཁྱིམ་བདག་རྒན་པོ་ཅི་ཡང་མི་ཤེས་པ་ཡང་སངས་རྒྱས་ཀྱི་བསྟན་པ་ལ་རབ་ཏུ་བྱུང་ནས་དགྲ་བཅོམ་པར་གྱུར་ཏེ། དེ་ལྟ་བུའི་ཆོས་ཀྱང་སྟོན་ཏོ་ཞེས་བརྗོད་ཅིང་། རྒྱལ་པོའི་ཁབ་ཀྱི་མི་ཕལ་ཆེར་བསམ་པ་དག་པའི་སེམས་སྐྱེས་ནས། ཁ་ཅིག་གི་བུ་དང་བུ་མོ་དང་བྲན་ལ་སོགས་པ་རབ་ཏུ་བྱུང་བར་གནང་ཞིང་། ཁ་ཅིག་ནི་བདག་ཉིད་རབ་ཏུ་བྱུང་སྟེ་ཀུན་ཀྱང་རྗེས་སུ་ཡི་རང་བར་གྱུར་ཏོ། །དེ་བས་ན་རབ་ཏུ་བྱུང་བའི་ཡོན་ཏན་ནི་ཚད་མེད་དེ། དཔལ་སྐྱེས་ལྟ་བུ་ལོ་བརྒྱ་ལོན་པ་ཡང་རབ་ཏུ་བྱུང་ནས། ཡོན་ཏན་དེ་ལྟ་བུ་དང་ལྡན་པར་གྱུར་ན་གཞན་དག་ལ་ལྟ་ཅི་སྨོས། ཆོས་ལ་བརྩོན་པ་དག་ནི་རབ་ཏུ་བྱུང་བར་བྱའོ། །གཞན་ཡང་སྐབས་འདིར་སྦྱིན་པ་ལ་སོགས་པའི་བསོད་ནམས་ནི་འཛད་པར་འགྱུར་ལ། རབ་ཏུ་བྱུང་བའི་བསོད་ནམས་ནི་ནམ་བྱང་ཆུབ་ཀྱི་བར་དུ་འཛད་པར་འགྱུར་བ་མ་ཡིན་པ་སོགས་དང་། གང་དག་རབ་ཏུ་བྱུང་བ་ལ་གེགས་བྱེད་པ་དེ་ནི་སེམས་ཅན་དམྱལ་བ་ཆེན་པོར་སྐྱེ་བར་འགྱུར་བ་སོགས་ཀྱི་ཁེ་ཉེན་གྱི་ཁྱད་པར་མང་དུ་གསུངས་སོ། །