སྦྱིན་པ་དང་སྲོག་གཅོད་སྤངས་པའི་འབྲས་བུ་སྐྱབས་འགྲོའི་ཕན་ཡོན་རྣམས་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེའི་ཁྱིམ་བདག་ཕྱུག་པོ་ཞིག་ལ་བུ་མེད་ནས། ལྷ་ལ་གསོལ་བ་བཏབ་པས། ནམ་ཞིག་ན་ཁྱེའུ་ཤིན་ཏུ་མཛེས་ཤིང་ལྟ་ན་སྡུག་པ་ཞིག་བྱུང་བས། ཕ་མ་དང་གཉེན་བཤེས་ཀུན་དགའ་ནས་ཆུ་འགྲམ་ཞིག་ཏུ་བཙས་སྟོན་བྱས་པས། ཁྱེའུ་བལྟ་བའི་ཕྱིར་གཅིག་གིས་གཅིག་ལ་ལག་བརྒྱུད་བྱས་པའི་བར་ནས་ཤོར་སྟེ་ཆུར་ལྷུང་ངོ་། །དེར་ཁྱེའུ་རང་གི་བསོད་ནམས་དང་ལས་ཀྱི་རྒྱུས་མ་ཤི་བར་ཉ་ཆེན་པོ་ཞིག་གིས་མིད་ནས་དེའི་ལྟོ་བ་ན་གསོན་པོར་གནས་སོ། །ཆུ་བོ་དེའི་མཇུག་གི་གྲོང་ཞིག་ན་ཁྱིམ་བདག་ཕྱུག་པོ་བུ་མེད་པ་ཞིག་ཡོད་པ་དེའི་བྲན་རྣམས་ཀྱིས་ཉ་བཤོར་བ་ལས་ཉ་དེ་ཟིན་ནས་ལྟོ་བ་བཀས་པ་དང་། དེའི་ལྟོ་བར་ཁྱེའུ་མཚན་དང་ལྡན་པ་ཞིག་བྱུང་ནས་ཁྱིམ་བདག་གི་ཆུང་མས་བླངས་ཏེ་བདག་ཅག་ལ་ལྷས་གནང་ངོ་བསམ་ནས་གསོས་སོ། །དེ་ནས་དེའི་གཏམ་ཐོས་པས་གྲོང་གོང་མའི་ཁྱིམ་བདག་གིས་བདག་གི་བུ་ཁྱེད་ཀྱིས་རྙེད་པ་ཕྱིར་བྱིན་ཅིག དེས་བདག་ལ་ལྷས་བྱིན་པ་ཡིན་ཏེ། ཉའི་ལྟོ་བ་ནས་རྙེད་པས་མི་སྦྱིན་ནོ། །དེ་ལྟར་དེ་གཉིས་རྩོད་པ་ན། ཡུལ་གྱི་རྒྱལ་པོས་ཁྱེའུ་དེ་གཉིས་ཀས་ཐུན་མོང་དུ་གསོས་ལ། ཆེར་སྐྱེས་ནས་གཉིས་ཀའི་ཁྱིམ་དུ་ཆུང་མ་རེ་ལོངས་ལ་བུ་བྱུང་བ་དང་སོ་སོར་ཁྱེར་ཅིག་ཅེས་བཅད་དོ། །དེ་ནས་ཁྱིམ་གཉིས་ཀས་གསོས་པས་མིང་ཡང་། རིགས་གཉིས་པ་ཞེས་གྲགས་སོ། །དེ་ཉིད་ཆེར་སྐྱེས་པ་ན་བཙས་མ་ཐག་པར་ཆུར་ལྷུང་བ་དང་ཉས་མིད་པ་སོགས་ཀྱི་སྡུག་བསྔལ་དྲན་པས་ཡིད་སྐྱོ་ནས་ཕ་མ་ལ་གནང་བ་ཞུས་ཏེ། སྟོན་པའི་སྤྱན་སྔར་རབ་ཏུ་བྱུང་བས་དགྲ་བཅོམ་པའི་གོ་འཕང་ཐོབ་བོ། །དེར་དགེ་སློང་རྣམས་ཐེ་ཚོམ་དུ་གྱུར་ནས་ཀུན་དགའ་བོས་ལས་ཀྱི་རྒྱུ་ཞུས་པ་ན། སྔོན་སངས་རྒྱས་རྣམ་གཟིགས་འཇིག་རྟེན་དུ་བྱོན་པའི་ཚེ་ཁྱིམ་བདག་གཅིག་གིས་སྦྱིན་པ་དང་ཚུལ་ཁྲིམས་ཀྱི་བསྔགས་པ་རྒྱ་ཆེར་ཐོས་ནས་རབ་ཏུ་དད་དེ་སངས་རྒྱས་ཀྱི་སྤྱན་སྔར་སྲོག་མི་གཅོད་པ་ལ་སོགས་པའི་བསླབ་ཚིགས་གསུམ་ནོས་ནས་དོང་ཙེ་གཅིག་ཕུལ་ལོ། །རྒྱུ་དེས་བསྐལ་པ་དགུ་བཅུ་རྩ་གཅིག་གི་བར་དུ་ལོངས་སྤྱོད་ཆེན་པོ་དང་ལྡན་པར་གྱུར་ལ། ད་ལྟར་ཡང་སྦྱིན་པའི་འབྲས་བུས་ལོངས་སྤྱོད་དང་ལྡན་པ་དང་། སྲོག་གཅོད་པ་སྤངས་པས་ཆུར་ལྷུང་སྟེ་ཉས་མིད་ཀྱང་མ་ཤི་བ་དང་། དཀོན་མཆོག་ལ་སྐྱབས་སུ་སོང་བས་ད་ལྟར་ང་དང་ཕྲད་ནས་དགྲ་བཅོམ་པར་གྱུར་ཏོ་གསུངས། འདིས་ནི་སྦྱིན་པ་དང་སྲོག་གཅོད་སྤངས་པའི་འབྲས་བུ་སྐྱབས་འགྲོའི་ཕན་ཡོན་རྣམས་བསྟན་པ་ཡིན་ནོ། །

༈ ཡང་བཅོམ་ལྡན་འདས་ཡངས་པ་ཅན་ཨ་མྲའི་ཚལ་ན་བཞུགས་པའི་ཚེ། ཀུན་དགའ་བོ་ལ། རྫུ་འཕྲུལ་གྱི་རྐང་པ་བཞི་ཐོབ་ན་བསྐལ་པ་གཅིག་གི་བར་དུ་འཇིག་རྟེན་ན་གནས་པར་གྱུར་ཏོ། །ངས་ཀྱང་རྫུ་འཕྲུལ་གྱི་རྐང་པ་བཞི་ཤིན་ཏུ་བསྒོམས་པས། ང་དེ་བཞིན་གཤེགས་པ་འཇིག་རྟེན་ན་སྐུ་ཚེ་ཇི་སྲིད་ཀྱི་བར་དུ་བཞུགས་པར་རིགས་ཞེས་ལན་གསུམ་གྱི་བར་དུ་བཀའ་སྩལ་པ། ཀུན་དགའ་བོ་བདུད་ཀྱིས་ནོན་ཏེ་ཅང་མི་སྨྲ་བ་ན། དེའི་འོག་ཏུ་བདུད་སྡིག་ཅན་འོངས་ནས་མྱ་ངན་ལས་འདས་པར་གསོལ་བ་བཏབ་པས། ཟླ་བ་གསུམ་ན་མྱ་ངན་ལས་འདའ་བར་གནང་ངོ་། །དེར་ཀུན་དགའ་བོས་རྨི་ལམ་དུ་ཤིང་ལྗོན་པ་བཟང་པོ་རླུང་གིས་གཏོར་བ་རྨིས་ནས། ཡིད་མི་དགའ་བར་གྱུར་ནས་གསོལ་པ་དང་། ད་སྟེ་ཟླ་བ་གསུམ་ན་མྱ་ངན་ལས་འདའ་འོ་གསུངས་པས། དགེ་སློང་རྣམས་རབ་ཏུ་མི་དགའ་ནས་མྱ་ངན་དུ་གྱུར་པ་ན། འཕགས་པ་ཤཱ་རིའི་བུས་བདག་ནི་བཅོམ་ལྡན་འདས་མྱ་ངན་ལས་འདས་པར་མཐོང་བར་མི་བཟོད་དེ་ཅི་ནས་ཀྱང་བདག་སྔར་མྱ་ངན་ལས་འདའ་འོ། །ཞེས་གསོལ་ཏེ། འཁོར་མང་པོ་ལ་ཁྱེད་རྣམས་ནི་སྔོན་གྱི་དགེ་བའི་རྩ་བས་སངས་རྒྱས་འབྱུང་བ་དང་ཕྲད་མོད་ཀྱི་མདོ་སྡེ་དང་ཆོས་ཐོས་པ་ཤིན་ཏུ་དཀའ། མིའི་ལུས་ཐོབ་པ་ཡང་ཤིན་ཏུ་དཀའ་བ་ཡིན་གྱི། བསོད་ནམས་ཀྱི་ཚོགས་སུ་འགྱུར་ཞིང་འཁོར་བ་ལས་གྲོལ་བའི་ལས་ལ་བརྩོན་པར་གྱིས་ཤིག ཅེས་གདམས་ནས་མྱ་ངན་ལས་འདས་སོ། །དེའི་ཚེ་ཀུན་དགའ་བོས། ཤཱ་རིའི་བུ་ཆོས་ཀྱི་བདག་པོ་གཙོ་བོ་ཆེན་པོ་ཡང་མྱ་ངན་ལས་འདས་ན་བདག་ཅག་གིས་སུ་ལ་གནས་བཅའ་ཞིང་སྐྱབས་སུ་མཆི། བཀའ་སྩལ་པ། ཤཱ་རིའི་བུ་མྱ་ངན་ལས་འདས་ཀྱང་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་རྣམ་པར་གྲོལ་བས། རྣམ་པར་གྲོལ་བའི་ཡེ་ཤེས་གཟིགས་པ་དང་། ཆོས་ཀྱི་སྐུ་ནི་མྱ་ངན་ལས་མ་འདས་སོ། །ཤཱ་རིའི་བུ་ནི་ད་ལྟར་འབའ་ཞིག་ཏུ་མྱ་ངན་ལས་འདའ་བར་མཐོང་བར་མི་བཟོད་དེ་སྔར་མྱ་ངན་ལས་འདས་པ་འདིར་མ་ཟད་ཀྱི། སྔོན་འདས་པའི་དུས་ནའང་ང་ཚེ་འཕོ་བ་ལ་མི་བཟོད་པར་སྔར་ཚེ་འཕོས་པ་ཡིན་ཏེ། སྔོན་བསྐལ་པ་གྲངས་མེད་པ་འདས་པའི་ཕ་རོལ་ན། འཛམ་བུ་གླིང་འདིར་རྒྱལ་པོ་ཟླ་འོད་ཅེས་བྱ་བ་འཛམ་བུ་གླིང་ལ་དབང་བྱེད་པ་ཞིག་བྱུང་སྟེ། དེས་དཀོར་མཛོད་མཐའ་དག་སྦྱིན་པར་གཏོང་བའི་གྲགས་པ་ཆེན་པོས་འཛམ་གླིང་ཀུན་ཁྱབ་པར་གྱུར་པ་ན། ཡུལ་མཐའ་འཁོབ་ཀྱི་རྒྱལ་ཕྲན་བྱེ་མ་སེ་ན་ཞེས་བྱ་བ་ཞིག་ཕྲག་དོག་གིས་ཡིད་མི་བདེ་བར་གྱུར་ནས། རྒྱལ་པོ་དེ་ཉིད་མེད་པར་གྱུར་པའི་ཐབས་ཀུན་རྒྱུ་རྣམས་ལ་སྦྲན་ཡང་དེ་དག་སྤྲོ་བ་མེད་པར་གྱུར་ནས་ཤིན་ཏུ་ཡང་མི་དགའ་བར་གྱུར་ཏེ། གང་དག་རྒྱལ་པོ་ཟླ་འོད་ཀྱི་མགོ་བཅད་དེ་འོང་བ་ཞིག་ཡོད་ན། དེ་ལ་རྒྱལ་སྲིད་ཀྱི་ཕྱེད་ཀྱང་སྦྱིན་ལ་བུ་མོའང་སྦྱིན་ནོ་ཞེས་བསྒྲགས་པས། དེའི་ཚེ་རི་བྲགས་ཀྱི་ཁོང་ཞིག་ན་བྲམ་ཟེ་ལེའུ་ཏེ་ཙ་ཞེས་བྱ་བ་ཞིག་ཡོད་པ་དེས་ཁས་བླངས་ནས། རྒྱལ་པོ་ཟླ་འོད་ཀྱི་ཡུལ་དུ་ཆས་སོ། །དེའི་ཚེ་རྒྱལ་པོ་ཟླ་འོད་ཀྱི་ཡུལ་དུ་ལྟས་ངན་པ་སྣ་ཚོགས་བྱུང་ཞིང་། རྒྱལ་ཕྲན་བརྒྱད་ཁྲི་བཞི་སྟོང་གི་རྨི་ལམ་དུ་རྒྱལ་པོའི་གསེར་གྱི་རྒྱལ་མཚན་ཆག་པ་དང་། གསེར་གྱི་རྔ་རལ་བ་རྨིས་ཤིང་། ཁྱད་པར་དུ་བློན་པོའི་མཆོག་ཟླ་བ་ཆེན་པོ་ཞེས་བྱ་བའི་རྨི་ལམ་དུ། ཡི་དྭགས་ཞིག་གིས་རྒྱལ་པོའི་གསེར་གྱི་ཅོད་པཎ་ཕྲོགས་པ་རྨིས་པས་ཐམས་ཅད་མྱ་ངན་གྱིས་ནོན་པར་གྱུར་ཏོ། །དེའི་ཚེ་ཕོ་བྲང་སྲུང་བའི་ལྷས་བྲམ་ཟེས་རྒྱལ་པོའི་དབུ་སློང་བར་ཤེས་ནས་ནང་དུ་མ་བཏང་བ་དང་། གཙང་རིས་ཀྱི་ལྷས་སྦྱིན་པའི་ཕར་ཕྱིན་རྫོགས་པར་ཤེས་ནས་རྒྱལ་པོའི་རྨི་ལམ་དུ་སྦྲན་ནས་ནང་དུ་བཏང་ངོ་། །དེར་རྒྱལ་པོའི་དབུ་བསླངས་པ་ན། བློན་པོ་ཟླ་བ་ཆེན་པོས་རིན་པོ་ཆེ་སྣ་བདུན་ལས་སྣ་གཅིག་ལའང་མགོ་ལྔ་བརྒྱ་ལྔ་བརྒྱ་བྱས་ཏེ་བྲམ་ཟེ་ལ་བྱིན་ནས། རྒྱལ་པོའི་དབུ་ནི་ཤ་དང་ཁྲག་སོགས་མི་གཙང་བ་ཡིན་ན་དེས་ཅི་ཞིག་བྱ། དེ་བས་རིན་པོ་ཆེ་སྣ་བདུན་གྱི་མགོ་འདི་དག་ཁྱེར་ཅིག་དང་ཁྱོད་ཚེ་གཅིག་ཏུ་ཕྱུག་པར་འགྱུར་རོ་ཞེས་ཐབས་སྣ་ཚོགས་ཀྱིས་ཟློག་ཀྱང་མ་ཉན་ནས་དབུ་སློང་བས་བློན་པོ་ཟླ་བ་ཆེན་པོ་སྙིང་གས་ཏེ་དེ་ཉིད་དུ་ཚེ་འཕོས་སོ། །དེར་རྒྱལ་པོས་བློན་པོ་ཞིག་གླང་པོ་ཆེ་དཔག་ཚད་བརྒྱ་སྟོང་དུ་འགྲོ་བ་ལ་བསྐྱོན་ནས། ད་སྟེ་ཞག་བདུན་ན་རྒྱལ་པོ་ཟླ་འོད་ཀྱིས་བྲམ་ཟེ་ལ་དབུ་སྦྱིན་པར་མཛད་པ་མཐོང་བར་འདོད་པ་ཐམས་ཅད་མྱུར་དུ་ཤོག་ཅིག་ཅེས་སྨྲས་པས། ཐམས་ཅད་འདུས་པས་རྒྱལ་ཕྲན་བརྒྱད་ཁྲི་བཞི་སྟོང་། བློན་པོ་སྟོང་ཕྲག་བཅུ། བཙུན་མོ་སྟོང་ཕྲག་ཉི་ཤུ། རྒྱལ་བུ་ལྔ་བརྒྱ་པོ་ཐམས་ཅད་ཀྱིས་སོ་སོ་ནས་དབུ་མི་སྦྱིན་པར་གསོལ་བ་བཏབ་ཀྱང་མ་གནང་ནས། རྒྱལ་པོས་འཁོར་དེ་དག་ལ། ཐོག་མ་མེད་པ་ནས་འཁོར་བར་འཁོར་ཏེ། ངན་སོང་གསུམ་ལ་སོགས་པར་ལུས་གྲངས་མེད་པ་ཞིག་བོར་ཡང་བསོད་ནམས་སུ་མ་གྱུར་པར་ཆུད་ཟོས་པས། ད་རེས་བདག་གི་ལུས་འདི་ཡོངས་སུ་བཏང་ནས་བླ་ན་མེད་པའི་བྱང་ཆུབ་བསྒྲུབ་པར་བྱ་བ་ཡིན་པས་ནམ་སངས་རྒྱས་པ་ན་ཁྱེད་རྣམས་ཀྱང་སྡུག་བསྔལ་ལས་བསྒྲལ་བར་བྱའོ། །དེ་བས་ན་བདག་གི་བྱང་ཆུབ་སྒྲུབ་པའི་གེགས་མ་བྱེད་ཅིག་ཅེས་གསུངས་ནས་བྲམ་ཟེ་ལ་ད་མགོ་བླང་བའི་དུས་ལ་བབ་ཀྱིས་ལོངས་ཤིག་གསུངས་པས། བྲམ་ཟེས་འཁོར་རྣམས་ཀྱི་གཟི་བྱིན་མ་བཟོད་ནས་སྐྱེད་མོས་ཚལ་དུ་གཤེགས་པར་ཞུས་པས། དེར་བྱོན་ཏེ་དབུ་ཤིང་གི་ཡལ་ག་ལ་བཏགས་ནས་བྲམ་ཟེ་ལ། ཁྱོད་ཀྱིས་ངའི་མགོ་ཆོད་ལ་ངའི་ལག་ཏུ་བཞག་ནས་ངའི་ལག་ནས་ལོངས་ཤིག ངས་ཁྱོད་ལ་མགོ་སྦྱིན་པའི་བསོད་ནམས་འདིས་ནི་ཁམས་གསུམ་གྱི་བདེ་བའི་ལོངས་སྤྱོད་འདོད་པའི་ཕྱིར་མ་ཡིན་གྱི། འགྲོ་བ་མང་པོ་སྐྱོབ་པའི་ཕྱིར་བླ་ན་མེད་པའི་བྱང་ཆུབ་འདོད་དོ་གསུངས། བྲམ་ཟེས་རལ་གྲི་ཕྱར་བ་ན་དེར་གནས་པའི་ཤིང་གི་ལྷ་མོས་ཐལ་ལྕག་གི་བསྣུན་པ་བྲམ་ཟེ་དེ་སར་འགྱེལ་ལོ། །དེར་རྒྱལ་པོས་ཤིང་གི་ལྷ་མོ་ལ། སྔོན་འདས་པའི་དུས་ན་ངས་ཤིང་འདིའི་དྲུང་དུ་མགོ་དགུ་བརྒྱ་དང་དགུ་བཅུ་རྩ་དགུ་སྙེད་སྦྱིན་པར་བྱས་ཏེ། ད་འདི་ཡིས་སྟོང་དུ་ཚང་སྟེ་སྦྱིན་པའི་ཕར་ཕྱིན་ཡོངས་སུ་རྫོགས་པ་ཡིན་པས། ངའི་བྱང་ཆུབ་ཀྱི་བར་ཆད་མ་བྱེད་ཅིག་གསུངས། དེ་ནས་བྲམ་ཟེ་ལངས་ཏེ་མཚོན་གྱི་དབུ་བཅད་ནས་ཕྱག་ཏུ་ལྷུང་བ་དང་ས་ཡང་རྣམ་པ་དྲུག་ཏུ་གཡོས་ཤིང་། རྒྱལ་པོ་ཟླ་འོད་ཀྱིས་དབུ་སྦྱིན་པར་བཏང་བས་སྦྱིན་པའི་ཕར་ཕྱིན་ཡོངས་སུ་རྫོགས་པར་གྱུར་ཏོ། །ཞེས་ཀུན་ཏུ་གྲགས་པར་གྱུར་ནས། རྒྱལ་པོ་བྱེ་མ་སེ་ནས་དེ་ཐོས་པ་དང་ཕྲག་དོག་གིས་སྙིང་གས་ནས་ཚེ་འཕོས་སོ། །བྲམ་ཟེས་ཀྱང་རྒྱལ་པོའི་མགོ་ཁྱེར་བ་ན་ཀུན་གྱིས་སྤྱོས་ཤིང་ཁ་ཟས་ཀྱང་མ་རྙེད་པས་ཤིན་ཏུ་ཉམ་ཐག་ཅིང་། དབུ་ཡང་རུལ་ཞིང་མི་སྡུག་ནས་ས་ལ་བོར་ཞིང་སོང་བ་ལས། རྒྱལ་པོ་བྱེ་མ་སེ་ན་ཤི་བར་ཐོས་ནས་མྱ་ངན་གྱིས་ཡི་མུག་སྟེ་སྙིང་ཚལ་བ་བདུན་དུ་གས་ཤིང་ཁྲག་བསྐྱུགས་ཏེ་ཚེ་འཕོས་ཏེ་གཉིས་ཀ་མཚམས་མེད་པའི་སེམས་ཅན་དམྱལ་བར་སྐྱེས་སོ། །རྒྱལ་པོ་ཟླ་འོད་ཀྱི་མྱ་ངན་གྱིས་གདུང་སྟེ་ཚེ་འཕོས་པ་རྣམས་ནི་མཐོ་རིས་ཀྱི་ལྷར་སྐྱེས་སོ། །དེའི་དུས་ཀྱི་རྒྱལ་པོ་ཟླ་འོད་ནི་ང་ཡིན་ལ་རྒྱལ་པོ་བྱེ་མ་སེ་ན་ནི་བདུད་སྡིག་ཏོ་ཅན་དང་བྲམ་ཟེ་དེ་ནི་ལྷས་བྱིན་ཡིན་ནོ། །དེའི་ཚེ་ཤིང་གི་ལྷ་མོ་དེ་ནི་མོའུ་འགལ་གྱི་བུ་དང་། བློན་པོ་ཟླ་བ་ཆེན་པོ་ནི་ཤཱ་རིའི་བུ་ཡིན་ནོ། །དེའི་ཚེ་ན་ཡང་ང་ཚེ་འཕོས་པར་མི་བཟོད་པས་སྔར་ཚེ་འཕོས་པ་ཡིན་ནོ་གསུངས་པས་འཁོར་རྣམས་ཀྱིས་མཐུན་པར་དེ་བཞིན་གཤེགས་པའི་ཡོན་ཏན་ལ་མངོན་པར་བསྔགས་ཤིང་བསྒོམ་པ་ལ་ནན་ཏན་དུ་བྱས་པས་ཁ་ཅིག་གིས་དགེ་སྦྱོང་གི་འབྲས་བུ་ཐོབ་ཅིང་ཁ་ཅིག་གིས་བྱང་ཆུབ་ཏུ་སེམས་བསྐྱེད་པར་བྱས་སོ། །