དགེ་འདུན་གྱི་ནད་གཡོག་སོགས་བསོད་ནམས་བགྱིས་པའི་ཕན་ཡོན་དང་། སྲོག་བཅད་པ་དང་རྗེས་སུ་ཡི་རང་བའི་རྣམ་སྨིན་སྨོན་ལམ་གྱི་འབྲས་བུ་མཐའ་བཙན་པ་རྣམས་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། རྒྱལ་པོ་རབ་གསལ་རྒྱལ་གྱི་གཅུང་སྟོབས་ཀྱི་གྲོགས་པོ་ཞེས་པའི་བུ་མོ་ལྷ་མཚམས་མ་ཞེས་པ་མཁས་ཤིང་ཡིད་གཞུངས་པ་གཞན་བས་ཁྱད་པར་དུ་འཕགས་པ་ཞིག་ཡོད་པ་དེ། མཉན་ཡོད་ཀྱི་རྒྱལ་པོའི་བློན་པོ་རི་དྭགས་ཞེས་བྱ་བ་ལ་བུ་དྲུག་ཡོད་པའི་ཐ་ཆུང་གི་ཆུང་མར་བྱིན་ཅིང་དེའི་ཁྱིམ་གྱི་བདག་མོ་བགྱིས་པ་ལས། ནམ་ཞིག་རྒྱལ་པོའི་ཁང་སྟེང་དུ་བྱ་ཞིག་གིས་རྒྱ་མཚོའི་གླིང་གི་འབྲས་ཀྱི་སྙེ་མ་ཁུར་འོང་བ་དེ་ལྷུང་བ་ན། རྒྱལ་པོས་བློན་པོ་རྣམས་ལ་སྨན་གྱི་དོན་དུ་ས་ལ་ཐོབ་ཅིག་ཅེས་བསྒོ་བ་ན། གཞན་དག་གིས་བཏབ་པ་ཇི་བཞིན་དུ་མ་སྐྱེས་ཤིང་། ལྷ་མཚམས་མས་བཏབ་པ་མང་དུ་སྐྱེས་པས། དེས་རྒྱལ་པོའི་བཙུན་མོ་ནད་ཀྱིས་ཟིན་པ་གསོས་པ་དང་། ཡང་དགྲ་ཟླའི་རྒྱལ་པོ་ཞིག་གིས་ཉམས་སད་པའི་ཕྱིར་རྒོད་མ་སྨད་གཟུགས་དང་སྤུ་མདོག་སོགས་འདྲ་བ་གཉིས་བསྐུར་ནས་མ་བུ་གང་ཡིན་ངོས་ཟུངས་ཤིག་ཅེས་སྤྲིང་པར་གཞན་གྱིས་མ་ཤེས་ནས་ལྷ་མཚམས་མས་དེ་གཉིས་སོ་སོར་བཏགས་ནས་གཅིག་ལ་རྩྭ་བྱིན་ཅིག་ཤོས་ལ་མ་བྱིན་པས། མ་གང་ཡིན་པ་དེས་བུའི་ཕྱོགས་སུ་མཆུས་རྩྭ་ཕུལ་བས་ཤེས། དེ་བཞིན་དུ་སྦྲུལ་སྦོམ་ཕྲ་རིང་ཐུང་འདྲ་བ་གཉིས་བསྐུར་ནས་དེ་གཉིས་ཀྱི་ཕོ་མོའི་དབྱེ་བའང་དེ་གཉིས་རས་འཇམ་པོའི་སྟེང་དུ་བཞག་པས་ཕོ་དེ་མི་བཟོད་པར་འགྲོ་བ་དང་། མོ་དེ་མི་འགུལ་བར་ཉལ་བས་ཤེས། ཡང་ཤིང་སྦོམ་ཕྲ་དང་རིང་ཐུང་མཉམ་པ་གཉིས་བསྐུར་བ་ན་དེ་གཉིས་ཀྱི་མགོ་མཇུག་ཆུ་ནང་དུ་བཞག་པས་རྩ་བ་ཐུར་དུ་ནུབ་ཅིང་། རྩེ་མོ་གྱེན་དུ་བསྟན་པས་ཤེས་ཏེ་རྒྱལ་པོ་གཉིས་ཀྱང་འདུམ་པར་གྱུར་པས་རྒྱལ་པོ་ཡང་མགུ་ནས་ཤིན་ཏུ་ཉེ་ཞིང་བྱམས་པར་བྱས་སོ། །དེ་ནས་དེ་སེམས་ཅན་དང་ལྡན་པར་གྱུར་ནས་ཟླ་བ་དགུ་ཚང་བ་ན་མངལ་ནས་སྒོ་ང་སུམ་ཅུ་རྩ་གཉིས་བྱུང་སྟེ། དེ་བརྡོལ་བ་ན་ཁྱེའུ་གཟུགས་བྱད་ལྟ་ན་སྡུག་པ་རེ་རེ་བྱུང་སྟེ་ཆེར་སྐྱེས་པ་ན་དེ་རེ་རེས་ཀྱང་མི་སྟོང་ཐུབ་པའི་སྟོབས་དང་ལྡན་པར་གྱུར་པས་ཡུལ་མི་ཀུན་གྱིས་བག་བྱེད་པར་གྱུར་ཏོ། །དེའི་ཚེ་བཅོམ་ལྡན་འདས་དེའི་ཁྱིམ་དུ་གཤེགས་ཏེ་ཆོས་བསྟན་པས་བུ་ཐ་ཆུང་གཅིག་མ་གཏོགས་ཀུན་གྱིས་རྒྱུན་ཞུགས་ཀྱི་འབྲས་བུ་ཐོབ། ཕྱིས་འབྲས་བུ་མ་ཐོབ་པ་དེ་གླང་པོ་ཆེ་ཞིག་ལ་ཞོན་ནས་འགྲོ་བ་ལ། བློན་པོའི་བུ་ཞིག་ཤིང་རྟ་ལ་ཞོན་ནས་འོངས་པས་དེ་གཉིས་ཆུ་ཆེན་པོ་ཞིག་གི་ཟམ་པའི་སྟེང་ནས་འཕྲད་པས་ཕན་ཚུན་བཟུར་རེས་མ་བྱས་པས། དེ་ཁྲོས་ནས་བློན་པོའི་བུ་ཤིང་རྟ་དང་བཅས་པ་ཟམ་པའི་འོག་ཏུ་བསྐྱུར་བས། བློན་པོའི་བུ་དེ་སྨས་པར་གྱུར་ནས་ཕའི་གམ་དུ་སོང་སྟེ་ངུས་པ་དང་། བློན་པོ་དེ་ཁྲོས་ནས་བསམ་ངན་འགྱུས་ནས་བསླུ་སེམས་ཀྱིས། རིན་པོ་ཆེའི་མཁར་བ་ནང་དུ་མཚོན་རྣོན་པོ་ཡོད་པ་སོ་གཉིས་བྱས་ཏེ་ཁྱེའུ་སུམ་ཅུ་རྩ་གཉིས་ལ་བྱིན་ནས་འདི་ཐོགས་ཏེ་ཁྱེད་ཅག་རྩེ་བར་གྱིས་ཤིག་སྨྲས་པས། དེ་དག་གིས་ཀྱང་དེ་ལྟར་བྱས་ཏེ་གང་དུ་འགྲོ་བ་དེར་ཁྱེར་ཏེ་ཕྱིན་ནོ། །དེ་དག་རྒྱལ་པོའི་ཞབས་འབྲིང་ལ་འཁོད་པའི་ཚེ་བློན་པོས་རྒྱལ་པོ་ལ་ཕྲ་མ་བྱས་ཏེ། ཁྱེའུ་སུམ་ཅུ་རྩ་གཉིས་པོ་འདི་དག་གིས་རྒྱལ་པོ་ལ་ངན་དུ་སེམས་ཏེ། གལ་ཏེ་ཐུགས་མི་ཆེས་ན་མཁར་བའི་ནང་དུ་གཟིགས་ཤིག་ཅེས་སྨྲས་པ་དང་། རྒྱལ་པོས་བལྟས་པས་ནང་དུ་སྤུ་གྲི་རྣོན་པོ་རེ་ཡོད་པར་གྱུར་པས། དེ་དག་རེ་རེ་བཞིན་བོས་ཏེ་གྱད་ཀྱིས་བཟུང་ནས་ཐམས་ཅད་བསད་དེ་མགོ་བོ་རྣམས་བཅད་ནས་སྒྲོམ་དུ་བཅུག་སྟེ་ལྷ་མཚམས་མའི་ཁྱིམ་དུ་བསྐུར་རོ། །དེའི་ཉིན་ལྷ་མཚམས་མས་སངས་རྒྱས་བཅོམ་ལྡན་འདས་འཁོར་དང་བཅས་པ་ཁྱིམ་དུ་སྤྱན་དྲངས་ཡོད་པས། རྒྱལ་པོས་མཆོད་པའི་ཡོ་བྱད་ཅིག་བསྐུར་རམ་སྙམ་སྟེ་ཁ་འབྱེད་པར་བརྩམ་པ་ན། སྟོན་པས་རེ་ཞིག་ཁ་མ་འབྱེད་པར་ཐོག་མར་ཞལ་ཟས་དྲོངས་ཤིག་གསུངས། དེར་བཅོམ་ལྡན་འདས་ཀྱིས་ཆོས་བསྟན་པས་ཁྱེའུ་རྣམས་ཀྱི་མས་ཕྱིར་མི་འོང་བའི་འབྲས་བུ་ཐོབ་སྟེ། དེས་སྟོན་པའི་སྤྱན་སྔར་དགེ་སློང་ནད་པ་དག་ལ་མཁོ་བའི་ཡོ་བྱད་སྦྱིན་པ་དང་གཅིག དགེ་སློང་ནད་པའི་ནད་གཡོག་ལ་ཡོ་བྱད་སྦྱར་བ་དང་གཉིས། དགེ་སློང་གློ་བུར་དུ་ལྷགས་པའི་མགྲོན་ལ་ཡོ་བྱད་སྦྱིན་པ་དང་གསུམ། ཡུལ་གཞན་དུ་འགྲོ་བའི་དགེ་སློང་དག་ལ་ལམ་རྒྱགས་འབུལ་བ་དང་བཞི་པོ་ཁས་བླངས་ནས། བཅོམ་ལྡན་འདས་ཀྱིས་ཤིན་ཏུ་ལེགས་སོ། །ཁྱེད་ཀྱིས་གསོལ་པ་བཞི་པོ་ནི་བསོད་ནམས་རྒྱ་ཆེན་པོ་དང་ལྡན་ཏེ་སངས་རྒྱས་མཆོད་པ་དང་མཉམ་མོ་ཞེས་གསུངས། སྟོན་པ་སླར་གཤེགས་པའི་འོག་ཏུ་སྒྲོམ་ཁ་ཕྱེས་པས་བུ་རྣམས་ཀྱི་མགོ་མཐོང་ཡང་། འདོད་པ་དང་བྲལ་བའི་ཕྱིར་མི་དགའ་བར་མ་གྱུར་ཏོ། །དེའི་ཚེ་དེའི་ཉེ་དུ་རྣམས་ཁྲོས་ནས་དམག་གིས་རྒྱལ་པོ་གསོད་པར་རྩོམ་པ་ན་རྒྱལ་པོ་བྲོས་ནས་སངས་རྒྱས་ཀྱི་དྲུང་དུ་སོང་བ་དང་དམག་རྣམས་ཀྱིས་རྒྱལ་བྱེད་ཀྱི་ཚལ་བསྐོར་བར་གྱུར་པ་དང་། ཀུན་དགའ་བོས་ལས་ཀྱི་རྒྱུ་ཞུས་པས་བཀའ་སྩལ་པ། སྔོན་གྱི་དུས་སུ་མི་སུམ་ཅུ་རྩ་གཉིས་པོ་འདི་དག་བཤེས་སུ་གྱུར་པས། དེ་དག་གྲོས་མཐུན་པར་བ་ལང་གཅིག་བརྐུས་ནས། ཡུལ་དེ་ན་རྒན་མོ་དབུལ་མོ་བུ་ཚ་མེད་པ་ཞིག་ཡོད་པ་དེའི་ཁྱིམ་དུ་ཁྲིད་ནས། དེར་བསད་ཅིང་ཤ་ཁྲག་མཉམ་པོར་བསྒོས་ཏེ་རྒན་མོ་ཡང་ཡི་རང་བྱས་སོ། །དེའི་ཚེ་བ་ལང་དེས་གསོད་པར་ཤེས་ནས། ཁྱེད་རྣམས་ཀྱིས་ད་ལྟ་ང་བསད་པས་ན། མ་འོངས་པའི་དུས་སུ་ཅི་སྟེ་འབྲས་བུ་ཐོབ་ན་ཡང་མི་བཏང་སྟེ་གསོད་པར་ཤོག་ཅིག་ཅེས་ཡིད་ཀྱིས་དམོད་བོར་ཏེ། དེའི་དུས་ཀྱི་བ་ལང་དེ་ནི་རྒྱལ་པོ་རབ་གསལ་རྒྱལ་འདི་ཉིད་ཡིན་ལ། དེའི་དུས་ཀྱིས་བརྐུ་བ་རྣམས་ནི་ཁྱེའུ་རྣམས་དང་། རྒན་མོ་ནི་ལྷ་མཚམས་མ་ཡིན་ཏེ། རྣམ་སྨིན་གྱི་འབྲས་བུ་དེས་ཚེ་རབས་ལྔ་བརྒྱའི་བར་དུ་རྟག་ཏུ་གསད་པར་གྱུར་ཏེ། རྒན་མོའང་རྗེས་སུ་ཡི་རང་བར་བྱས་པའི་རྒྱུས་རྟག་ཏུ་དེ་དག་གི་མར་གྱུར་ནས། མྱ་ངན་གྱིས་གདུང་བར་གྱུར་ཏོ། །ཡང་འདི་དག་རིགས་མཐོ་ཞིང་ལོངས་སྤྱོད་དང་སྟོབས་ཆེ་ཞིང་སངས་རྒྱས་དང་མཇལ་བའི་རྒྱུ་ནི། སྔོན་སངས་རྒྱས་འོད་སྲུང་འཇིག་རྟེན་ན་གཤེགས་པའི་ཚེ། རྒན་མོ་དད་པ་ཅན་ཞིག་གིས་རྟག་ཏུ་སྤོས་དང་མར་ཉོས་ནས། ལམ་ཁ་ཞིག་ཏུ་མཆོད་རྟེན་ཞིག་ཡོད་པ་ལ་བྱུག་པར་བྱེད་པ་ལས། མི་སུམ་ཅུ་རྩ་གཉིས་དེར་འོངས་པ་དང་ཕྲད་ནས་དེའི་གྲོགས་བྱས་ཏེ། བསོད་ནམས་འདིས་བདག་ཅག་རྣམས་གང་དུ་སྐྱེས་ཀྱང་མ་སྨད་དུ་གྱུར་ཏེ། དེར་ཡང་རིགས་དང་གཟུགས་དང་ལོངས་སྤྱོད་དང་སྟོབས་ཕུན་སུམ་ཚོགས་པ་དང་ལྡན་ཞིང་རྟག་ཏུ་སངས་རྒྱས་མཐོང་བ་དང་ཆོས་ཐོབ་པ་དང་མི་འབྲལ་ཏེ། འབྲས་བུའང་མྱུར་དུ་ཐོབ་པར་གྱུར་ཅིག་ཅེས་སྨོན་ལམ་བཏབ་པའི་འབྲས་བུ་ལས་བྱུང་བར་གསུངས་པས། དེ་ཐོས་པ་དང་དམག་མི་རྣམས་ཀྱང་ཁྲ་ོབ་ཞི་སྟེ། རྒྱལ་པོས་ཀྱང་མ་ཉེས་ཀྱི་ཁྱེའུ་རྣམས་ཀྱི་སྔོན་གྱི་ལས་ཏེ་བ་ལང་གཅིག་བསད་པ་ལའང་འདི་ལྟ་བུའི་རྣམ་སྨིན་མི་བཟད་པ་མྱང་ངོ་ཞེས་གླེང་ཞིང་རྒྱལ་པོ་དང་མཐུན་པར་བྱས་སོ། །འདིས་ནི་དགེ་འདུན་གྱི་ནད་གཡོག་སོགས་བསོད་ནམས་བགྱིས་པའི་ཕན་ཡོན་དང་། སྲོག་བཅད་པ་དང་རྗེས་སུ་ཡི་རང་བའི་རྣམ་སྨིན་སྨོན་ལམ་གྱི་འབྲས་བུ་མཐའ་བཙན་པ་རྣམས་བསྟན་པ་ཡིན་ནོ། །