དགེ་བའི་གྲོགས་བགྱིས་པ་དང་། སྨོན་ལམ་བཏབ་པའི་འབྲས་བུ་མི་བསླུ་བར་བསྟན་པ།

༈ ཡང་སྟོན་པ་མཉན་ཡོད་དུ་བཞུགས་པའི་ཚེ། ཁྱིམ་བདག་མགོན་མེད་ཟས་སྦྱིན་གྱི་བུ་མོ་ཐ་ཆུང་སུ་མ་ན་ཞེས་བྱ་བ་མཛེས་ཤིང་ལྟ་ན་སྡུག་པ་ཞིག་ཡོད་པ་དེ། ནམ་ཞིག་ཁྱིམ་བདག་སངས་རྒྱས་ལ་ཕྱག་འཚལ་དུ་འགྲོ་བའི་ཕྱི་བཞིན་དུ་སོང་བས། བུ་མོ་དེ་སངས་རྒྱས་མཐོང་བ་དང་ལྷག་པར་དགའ་བ་སྐྱེས་ཏེ། སྤོས་ཀྱི་སངས་རྒྱས་ཀྱི་བཞུགས་གནས་ཀུན་ཏུ་བྱུག་པར་བསམ་པ་དང་། དེའི་ཚེ་བུ་མོའི་ལག་ཏུ་ཨ་མྲའི་འབྲས་བུ་ཞིག་ཡོད་པ་བཅོམ་ལྡན་འདས་ཀྱིས་འདིར་བྱིན་ཅིག་གསུངས། དེ་ཕུལ་བ་དང་བཞེས་ནས་སྤོས་གྱི་མིང་མང་པོ་བྲིས་ནས་བུ་མོ་ལ་གནང་ངོ་། །དེར་བུ་མོས་སྤོས་དེ་རྣམས་རྩེས་ནས་རྒྱལ་བྱེད་ཀྱི་ཚལ་དུ་འོངས་ནས། ཉིན་རེ་བཞིན་བདར་ཏེ་བྱུག་པ་འབུལ་བ་ལས། སྐབས་ཤིག་ན་ཡུལ་ཏིག་ཅ་ཤི་རིའི་རྒྱལ་པོའི་བུ་ཞིག་རྒྱལ་པོའི་ཁབ་ཏུ་མངགས་ནས་ཉུལ་ཞིང་སོང་བ་ལས། མཐར་རྒྱལ་བྱེད་ཀྱི་ཚལ་དུ་ཕྱིན་ནས་བུ་མོས་སྤོས་བདར་ཞིང་འདུག་པ་མཐོང་ནས་དེ་ལ་ཆགས་ཏེ། དུས་གཞན་ཞིག་ན་རྒྱལ་བུས་གླང་པོ་ཆེ་ལ་བསྐྱོན་ནས་བྲོས་ཏེ་ཡུལ་དུ་ཕྱིན་ཏེ་ཕན་ཚུན་འདུས་པར་གྱུར་པ་ལས། བུ་མོ་དེ་སེམས་ཅན་དང་ལྡན་པར་གྱུར་ནས་ནམ་དུས་ལ་བབས་པ་ན་མངལ་ནས་སྒོ་ང་བཅུ་བཙས་ཏེ་དེ་བཅག་པ་ལས་ཁྱེའུ་ལྟ་ན་སྡུག་པ་རེ་རེ་བྱུང་སྟེ། དེ་དག་ཆེར་སྐྱེས་པ་དང་དཔའ་ཞིང་རྩལ་དང་ལྡན་པས་རི་དྭགས་གསོད་པ་ལ་དགའ་བར་གྱུར་ནས། མས་བཟློགས་ཀྱང་མ་ཉན་པ་ལས་ངན་སོང་དམྱལ་བའི་སྡུག་བསྔལ་དང་སྲོག་གཅོད་ཀྱི་རྣམ་སྨིན་རྒྱས་པར་བཤད་པས། དེ་གང་ལས་ཐོས་ཞེས་དྲིས་པ་ན། སངས་རྒྱས་ཀྱི་ཞལ་ལས་ཐོས་སོ་སྨྲས་པས། དེ་དག་གིས་སངས་རྒྱས་ཞེས་པ་ཅི་ལྟ་བུ་ཞེས་དྲིས་པས། མས་སངས་རྒྱས་ཀྱི་བསྔགས་པ་རྒྱ་ཆེར་བརྗོད་པས་དེ་དག་དགའ་ཞིང་དད་པར་གྱུར་ནས་མཉན་ཡོད་དུ་ཕྱིན་ཏེ། བཅོམ་ལྡན་འདས་ཀྱི་སྤྱན་སྔར་མེས་པོ་མགོན་མེད་ཟས་སྦྱིན་གྱིས་ཁྲིད་ནས་རབ་ཏུ་བྱུང་བར་གསོལ་པས། ཚུར་ཤོག་གིས་བསྙེན་པར་རྫོགས་ནས་བཅུ་ཀས་རིང་པོར་མ་ལོན་པ་དགྲ་བཅོམ་པའི་གོ་འཕང་ཐོབ་སྟེ། དེ་དག་གཅིག་ལ་གཅིག་དགའ་བས་འགྲོ་ན་ཡང་ལྷན་ཅིག་ཏུ་འགྲོ་འདུག་ན་ཡང་ལྷན་ཅིག་ཏུ་འདུག་སྟེ་ཡུལ་མི་རྣམས་ཀྱང་དགའ་ནས་རྗེས་སུ་ཡི་རང་ངོ་། །དེའི་ཚེ་ཀུན་དགའ་བོས་ལས་ཀྱི་རྒྱུ་ཞུས་པ་ན། སྔོན་འདས་པའི་དུས་བསྐལ་པ་དགུ་བཅུ་རྩ་གཅིག་གི་ཕ་རོལ་ན། སངས་རྒྱས་ཐམས་ཅད་སྐྱོབ་ཅེས་བྱ་བ་འཇིག་རྟེན་དུ་བྱོན་ནས་མྱ་ངན་ལས་འདས་པའི་རིང་བསྲེལ་རྒྱས་པར་སྤེལ་ནས་མཆོད་རྟེན་ཚད་མེད་པར་བྱུང་བ་ལས། མཆོད་རྟེན་གཅིག་ཞིག་རལ་དུ་གྱུར་ནས་རྒན་མོ་གཅིག་གིས་ཞིག་གསོ་བྱེད་པ་ལ། མགྲོན་པོ་བཅུ་དེར་སོང་བས་མཐོང་ནས་ལྷག་པར་དགའ་ཞིང་གྲོགས་བྱས་པའི་འོག་ཏུ། གཞོན་ནུ་བཅུ་ཆར་རྒན་མོ་དེའི་བུར་སྐྱེས་པར་གྱུར་ཅིག་ཅེས་སྨོན་ལམ་བཏབ་པས། དེ་ཚུན་ཆད་ངན་སོང་གི་གནས་སུ་མ་ལྷུང་ཞིང་ལྷ་དང་མི་ཡི་གནས་སུ་ལྷན་ཅིག་ཏུ་སྐྱེས་ཤིང་། གཟུགས་བཟང་བ་དང་། ཀུན་གྱིས་བཀུར་བ་དང་། རྟག་ཏུ་ཚེ་རིང་བ་སྟེ་ཡོན་ཏན་གྱི་དངོས་པོ་འདི་གསུམ་གྱིས་མི་གཞན་ལས་ཁྱད་པར་དུ་འཕགས་པར་གྱུར་ཅིང་། ད་ལྟ་ང་དང་ཕྲད་ནས་རྡུལ་དང་དྲི་མ་ཀུན་བྲལ་ནས་དགྲ་བཅོམ་པར་གྱུར་ཏོ། །དེའི་དུས་ཀྱི་རྒན་མོ་དེ་ནི་སུ་མ་ན་དང་། མི་གཞོན་ནུ་བཅུ་པོ་ནི་དགྲ་བཅོམ་པ་འདི་བཅུ་ཡིན་ནོ། །ཞེས་བཀའ་སྩལ་ཏོ། །འདིས་ཀྱང་དགེ་བའི་གྲོགས་བགྱིས་པ་དང་། སྨོན་ལམ་བཏབ་པའི་འབྲས་བུ་མི་བསླུ་བར་བསྟན་པ་ཡིན་ནོ། །