སྔར་གྱི་སྨོན་ལམ་བཏབ་པས་འབྲས་བུ་ཐོབ་པ།

༈ དེ་ལ་སྟོན་པ་མཉན་ཡོད་དུ་བཞུགས་པའི་ཚེ། ཡུལ་དེ་ན་ཁྱིམ་བདག་ཕྱུག་ཅིང་ནོར་མང་བ་རྣམ་ཐོས་བུ་ཡི་ལོངས་སྤྱོད་ལ་འགྲན་པ་མུ་སྟེགས་ཅན་ལ་དགའ་བ་ཞིག་ཡོད་པ་དེ་ལ། ཁྱེའུ་ཞིག་ཡོད་པ་ལ་རྩེར་གཞུག་པའི་ཕྱིར་ཕ་དེས་ཁྱི་གུ་མོ་ཞིག་བྱིན་པ་དེ་ཆེར་སྐྱེས་པ་ན་མུ་སྟེགས་བྱེད་རྣམས་མཐོང་བ་ན་རྒྱུག་ཅིང་རྨུག་པར་བྱེད་ལ། དགེ་སློང་དག་མཐོང་ན་དྲུང་དུ་འགྲོ་ཞིང་ལྕེས་བལྡགས་ཏེ་མཇུག་མ་དྲིལ་ཞིང་གཡས་ཕྱོགས་སུ་བསྐོར་བ་བྱེད་དོ། །དེ་ཤཱ་རིའི་བུས་ཉན་ཐོས་ཀྱི་སྤྱན་གྱིས་གཟིགས་ནས་འདུལ་བའི་དུས་ལ་བབ་པར་རིགས་ནས་ཁྱིམ་བདག་དེའི་ཁྱིམ་དུ་བྱོན་པ་ན། ཁྱི་མོ་དེས་རྒྱང་རིང་བ་ནས་བསུས་ཏེ་གུས་པར་ལྕེས་བལྡགས་ཏེ་བསྐོར་བ་བྱེད་པ་ན། ཁྱིམ་བདག་དེས། ཁྱི་མོ་ལོག་པར་ལྷུང་བའི་ལུས་ཅན་འདིིས་ཀྱང་འདི་ལྟ་བུའི་བཀུར་སྟི་བྱེད་ན། དགེ་སློང་འདི་ནི་བདག་ཉིད་ཆེན་པོ་ཞིག་གོ་སྙམ་སྟེ་ནང་དུ་སྤྱན་དྲངས་པ་ནས་བསོད་སྙོམས་ཕུལ་ཞིང་། འཕགས་པས་ཆོས་བསྟན་པས་ཁྱིམ་གང་གི་མི་རྣམས་ཀྱིས་རྒྱུན་ཞུགས་ཀྱི་འབྲས་བུ་ཐོབ་ཅིང་སྐྱབས་འགྲོ་དང་བསླབ་པའི་གཞི་རྣམས་བླངས་ཏེ་སྦྱིན་པ་དག་སྦྱིན་ཅིང་བསོད་ནམས་དག་བྱེད་དེ། དུས་སུ་འཕགས་པ་ཤཱ་རིའི་བུ་ཡང་བྱོན་ཏེ་ཆོས་གསུངས་པ་ལས་ཁྱི་མོ་དེས་ཀྱང་དད་པས་ཉན་པར་བྱེད་ཅིང་། ཁྱིམ་བདག་དེས་ཀྱང་བདག་འཕགས་པ་དང་ཕྲད་ཅིང་ཆོས་ཐོས་ནས་འབྲས་བུ་ཐོབ་པ་འདི་ཁྱི་མོ་འདིའི་དྲིན་ཡིན་ནོ་སྙམ་ནས་ཁྱི་མོ་དེ་ཤིན་ཏུ་སྐྱོང་བར་བྱེད་པ་ལས། ནམ་ཁྱི་མོ་དེ་ནད་ཀྱིས་ཟིན་པ་ན། ཤཱ་རིའི་བུས། བུ་འདི་ལྟར་འདུས་བྱས་ཐམས་ཅད་ནི་མི་རྟག་པའོ། །འདུས་བྱས་ཐམས་ཅད་ནི་སྡུག་བསྔལ་བའོ། །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ནི་ཞི་བའོ། །ང་ལ་སེམས་དགའ་བར་གྱིས་ཤིག་དང་། དུད་འགྲོའི་སྐྱེ་གནས་དང་འབྲལ་བར་འགྱུར་ཡང་སྲིད་དོ། །ཞེས་གསུངས་ཤིང་ཁྱི་མོ་དེ་ཡང་སེམས་དགའ་བཞིན་དུ་ཤི་བར་གྱུར་པ་ན་ཁྱིམ་བདག་དེའི་ཆུང་མ་ཆེན་མོའི་མངལ་དུ་སྐྱེས་སོ། །ཤཱ་རིའི་བུས་ཁྱི་མོའི་རོ་དེ་ཕྱོགས་དབེན་པ་ཞིག་ཏུ་ཞོག་ཅིག་དང་རུས་པ་དེས་ཕྱིས་དེ་ཉིད་ལ་ཕན་པར་འགྱུར་རོ་གསུངས་པས་ཁྱིམ་བདག་དེས་ཀྱང་སུས་མི་མཐོང་བའི་ཕྱོགས་ཤིག་ཏུ་བཞག་གོ །དེར་ཟླ་དུས་ཚང་བ་ན་བུ་མོ་ལྟ་ན་སྡུག་པ་ཞིག་སྐྱེས་ཏེ། དེ་ཉིད་ཆེར་གྱུར་པ་ན་བྱད་གཟུགས་དང་ལང་ཚོས་དྲེགས་ནས་ཕན་ཚུན་དུ་གཡེངས་ཏེ་ཆོས་ཉན་དུ་མི་བཏུབ་པར་གྱུར་པ་ན། ཤཱ་རིའི་བུས་སྔར་གྱི་ཁྱི་མོའི་རུས་པ་དེ་མདུན་དུ་བཞག་ནས། དེ་ཉིད་ཀྱི་ཚེ་རབས་དྲན་པར་བྱིན་གྱིས་བརླབས་པས། བུ་མོ་དེ་རབ་ཏུ་སྐྱོ་བ་སྐྱེས་ཤིང་འཕགས་པའི་དྲིན་དྲན་ནས། དགའ་བས་ཆོས་ཉན་པས་རྒྱུན་དུ་ཞུགས་པའི་འབྲས་བུ་ཐོབ་ཅིང་རབ་ཏུ་བྱུང་བར་གསོལ་པས། ཕ་མས་ཀྱང་གནང་ཞིང་འཕགས་པས་སྐྱེ་དགུའི་བདག་མོ་ཆེན་མོ་ལ་གཏད་དེ་རབ་ཏུ་བྱུང་ཞིང་བསྙེན་པར་རྫོགས་པས་རིང་པོར་མ་ལོན་པར་དགྲ་བཅོམ་མའི་གོ་འཕང་ཐོབ་ཅིང་འཕགས་པ་ཤཱ་རིའི་བུ་ལ་དྲིན་བཟོ་བའི་ཚིག་བརྗོད་ཅིང་བཀུར་སྟི་བྱེད་དོ། །དེར་ཐམས་ཅད་ངོ་མཚར་དུ་གྱུར་ནས་བཅོམ་ལྡན་འདས་ལ་ལས་ཀྱི་རྒྱུ་ཞུས་པས། སྔོན་བསྐལ་པ་བཟང་པོ་འདི་ཉིད་ཀྱི་སྐྱེ་དགུ་རྣམས་ཚེ་ལོ་ཉི་ཁྲི་ཐུབ་པའི་དུས་སུ་སངས་རྒྱས་འོད་སྲུང་བྱོན་ཅིང་། དེའི་བསྟན་པ་ལ་འདི་ཉིད་དགེ་སློང་མ་ཞིག་ཏུ་གྱུར་ཏེ། སྡེ་སྣོད་གསུམ་ལ་བསླབས་པས་རིག་པ་དང་གྲོལ་བའི་སྤོབས་པ་དང་ལྡན་པའི་ཆོས་སྨྲ་བར་གྱུར་ཏེ། རྙེད་པ་མང་པོ་བྱུང་བ་དང་། བདག་གིས་ཚངས་པ་མཚུངས་པར་སྤྱོད་པ་རྣམས་ལ་ཕན་གདགས་པར་བྱའོ་སྙམ་དུ་བསམས་ནས་ཆོས་བཞིན་དུ་དགེ་འདུན་སྡེ་གཉིས་ཀྱི་ཞལ་ཏ་བ་བྱས་སོ། །དེ་ནས་ཕྱིས་བྲེལ་བ་ཞིག་བྱུང་སྟེ། སློབ་པ་དང་མི་སློབ་པའི་དགེ་སློང་མ་མང་པོ་ཞིག་ལ་ལས་བཅོལ་པས། དེ་དག་གིས་བདག་ཅག་གི་དགེ་བའི་ཕྱོགས་བཏང་སྟེ་ཁྱེད་ཀྱི་དོན་མི་གྲུབ་བོ་ཞེས་སྨྲས་པས། དེ་ཁྲོས་ནས། ངས་ནི་ཁྱི་མོ་དང་འདྲ་བ་ཁྱེད་རྣམས་རྟག་ཏུ་གསོ་བར་བྱེད་ན་ཁྱེད་ནི་སྐད་ཅིག་ཙམ་ཡང་བདག་གི་དོན་མི་བྱེད་དམ་ཞེས་སྨྲས་སོ། །དེ་ནས་དེ་རྣམས་ཀྱིས་དེ་ལ་ཐུགས་བརྩེ་བའི་དབང་གིས། ཁྱེད་ཀྱིས་ངེད་སུ་ཡིན་པ་དང་། ཁྱོད་བདག་སུ་ཡིན་པ་ཤེས་སམ། དེས་སྨྲས་པ། ངས་ཤེས་ཏེ་ཁྱོད་ཀྱང་རབ་ཏུ་བྱུང་བ་ཡིན་ལ་ང་ཡང་རབ་ཏུ་བྱུང་བ་ཡིན་ནོ། །དེ་དག་གིས་སྨྲས་པ། ཆེ་ཞེའུ་ཅག་རབ་ཏུ་བྱུང་བར་འདྲ་མོད་ཀྱི། ཁྱོད་ནི་བཅིང་བ་ཐམས་ཅད་ཀྱིས་བཅིངས་པའི་སོ་སོའི་སྐྱེ་བོ་ཡིན་ལ་ངེད་ཀྱི་བྱ་བ་བྱས་པ་ཡིན་གྱིས་ཉེས་པ་ལ་ཉེས་སོ་ཞེས་བཤགས་པར་གྱིས་ཤིག ཁྱེད་འཁོར་བ་ན་འཁོར་ཞིང་སྡུག་བསྔལ་ཆེན་པོ་རྙེད་ཏ་རེ། དེ་ཐོས་པ་དང་འགྱོད་པ་ཆེན་པོ་སྐྱེས་ནས་བཤགས་པ་བྱས་ཤིང་། ལྷག་པར་ཡང་ཆོས་བཞིན་དུ་གཉིས་གའི་དགེ་འདུན་གྱི་ཞལ་ཏ་བྱས་ཏེ་ཚེ་གཅིག་ཏུ་ཚངས་པར་སྤྱོད་པ་སྤྱད་ནས། འཆི་ཀར། བདག་འོད་སྲུང་གི་བསྟན་པ་རབ་ཏུ་བྱུང་ནས་ཚེ་གཅིག་ཏུ་ཚངས་པར་སྤྱོད་དེ་ཆོས་བཞིན་དུ་ཞལ་ཏ་བགྱིས་པའི་དགེ་བས་གང་དུ་སྐྱེས་པ་དེར་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེ་བ་དང་། གཟུགས་བཟང་ཞིང་ལྟ་ན་སྡུག་པར་གྱུར་ཅིག ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལུང་བསྟན་པ་གང་ཡིན་པའི་སངས་རྒྱས་བཅོམ་ལྡན་འདས་དེ་བདག་གིས་མཉེས་པར་བྱེད་པར་གྱུར་ཅིག མི་མཉེས་པར་བྱེད་པར་མ་གྱུར་ཅིག དེའི་བསྟན་པ་ལ་རབ་ཏུ་བྱུང་ནས། ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་དུ་བྱེད་པར་གྱུར་ཅིག བདག་ཁྲོས་ནས་ཚངས་པ་མཚུངས་པར་སྤྱོད་པ་རྣམས་ལ་ཚིག་རྩུབ་སྨྲ་བའི་རྣམ་པར་སྨིན་པ་མྱོང་བར་མ་གྱུར་ཅིག ཅེས་སྨོན་ལམ་བཏབ་བོ། །དེའི་དུས་ཀྱི་དགེ་སློང་མ་དེ་ནི་འདི་ཡིན་ཏེ། ཚིག་རྩུབ་སྨྲས་པའི་རྒྱུ་དེས་སྐྱེ་བ་ལྔ་བརྒྱར་ཁྱིར་སྐྱེས་ཤིང་། འཕགས་པ་ཤཱ་རིའི་བུ་ལ་སེམས་དགའ་བར་གྱུར་པས་མིར་སྐྱེས་པ་དང་། སྔར་གྱི་སྨོན་ལམ་བཏབ་པས་འབྲས་བུ་ཐོབ་པར་གསུངས་སོ། །