འཕགས་པ་ལ་བསྙེན་བཀུར་བགྱིས་པ་དང་སྨོན་ལམ་བཏབ་པའི་འབྲས་བུ་བསྟན་པ།
༈ ཡང་གྲོང་ཁྱེར་སེར་སྐྱ་ན་རྒྱལ་པོ་སེང་གེ་འགྲམ་གྱི་སྲས་ཟས་གཙང་མས། ཡུལ་སྤོང་བྱེད་ཀྱི་རྒྱལ་པོ་ཤཱཀྱ་རབ་སད་ཀྱི་བུ་མོ་སྒྱུ་འཕྲུལ་མ་དང་སྒྱུ་འཕྲུལ་ཆེན་མོ་གཉིས་ཁབ་ཏུ་བཞེས་པའི་ཚེ། ཤཱཀྱ་རབ་སད་ཀྱིས་བུ་མོ་དེ་གཉིས་ལ་ཤཱཀྱའི་བུ་མོ་སྐྲ་ལྡན་མ་ཞེས་བྱ་བ་སྐྲ་མཁན་དུ་བྱིན་ནོ། །དེ་ནས་སྒྱུ་འཕྲུལ་ཆེན་མོ་ལ་བྱང་ཆུབ་སེམས་དཔའ་སྐུ་འཁྲུངས་ནས་ཞག་བདུན་ལོན་པའི་འོག་ཏུ་འདས་ནས་སུམ་ཅུ་རྩ་གསུམ་གྱི་ལྷའི་ཡུལ་དུ་སྐྱེས་སོ། །ཕྱིས་བྱང་ཆུབ་སེམས་དཔའ་ཁྱིམ་སྤངས་ནས་རབ་ཏུ་བྱུང་ཞིང་མངོན་པར་སངས་རྒྱས་པ་ན། གདུལ་བྱའི་དོན་དུ་གྲོང་ཁྱེར་སེར་སྐྱར་གཤེགས་པའི་ཚེ། སྐྱེ་དགུའི་བདག་མོ་ཆེན་མོ་གོ་ཏ་མ་རབ་ཏུ་བྱུང་ངོ་། །དེའི་ཚེ་སྐྲ་ལྡན་མ་ཡང་རབ་ཏུ་བྱུང་བས་དགྲ་བཅོམ་པ་ཉིད་མངོན་དུ་བྱས་ཏེ། དེ་བཅོམ་ལྡན་འདས་ཀྱིས་བརྩོན་འགྲུས་རྩོམ་པ་རྣམས་ཀྱི་མཆོག་ཏུ་ལུང་བསྟན་ཏོ། །དེའི་ཚེ་དགེ་སློང་རྣམས་ཀྱིས་སྐྲ་ལྡན་མའི་ལས་ཀྱི་རྒྱུ་ཞུས་པས། བཅོམ་ལྡན་འདས་ཀྱིས། དེ་ནི་སྨོན་ལམ་གྱི་དབང་ལས་གྱུར་ཏེ། སྔོན་འདས་པའི་དུས་བསྐལ་པ་དགུ་བཅུ་རྩ་གཅིག་པ་ལ་སངས་རྒྱས་རྣམ་པར་གཟིགས་འཇིག་རྟེན་དུ་བྱོན་ཏེ་དེ་གྲོང་ཁྱེར་གཉེན་ལྡན་དུ་གཤེགས་པ་ན། ལྕམ་གཉིས་ཀྱིས་བཤོས་གསོལ་པ་ན། དེར་གཅིག་གིས་སྨོན་ལམ་བཏབ་པ་བདག་ལས་འདི་ལྟ་བུའི་སྐྱེས་བུ་རིན་པོ་ཆེ་བཙས་ཏེ། དེ་མཉེས་པ་བྱེད་པར་གྱུརཅིག མི་མཉེས་པ་བྱེད་པར་མ་གྱུར་ཅིག ཅེས་བྱས་སོ། །བུ་མོ་ཅིག་ཤོས་ཀྱིས། བདག་ཀྱང་གང་དང་གང་དུ་སྐྱེ་བ་དེ་དང་དེར་ཁྱོད་ཀྱི་སྤུན་དུ་གྱུར་ཅིག བདག་འདི་ལྟ་བུའི་སྐྱེས་བུ་རིན་པོ་ཆེ་དེ་འཚོ་བར་གྱུར་ཅིག་ཅེས་བྱས་སོ། །དེ་སྤུན་གཉིས་ཀྱི་སྐྲ་མཁན་བྱེད་པའི་བུ་མོ་ཞིག་ཡོད་པ་དེས་དེ་ལྟར་ཐོས་པ་དང་། སངས་རྒྱས་རྣམ་པར་གཟིགས་ལ་བཀུར་སྟི་བྱས་ཏེ། བདག་ཀྱང་དགེ་བའི་རྩ་བ་འདིས་འདི་གཉིས་གང་དང་གང་དུ་སྐྱེས་པ་དེར་བདག་ཀྱང་སྐྲ་མཁན་ནམ་བསྙེན་བཀུར་བྱེད་པར་གྱུར་ནས་འདི་གཉིས་ཀྱི་བུ་རིན་པོ་ཆེ་དེ་མཉེས་པར་བྱེད་པར་གྱུར་ཅིག མི་མཉེས་པར་བྱེད་པར་མ་གྱུར་ཅིག ཅེས་སྨོན་ལམ་བཏབ་བོ། །འདི་ཉིད་དགྲ་བཅོམ་པར་གྱུར་ནས་བརྩོན་འགྲུས་ཅན་གྱི་མཆོག་ཏུ་ལུང་བསྟན་པའི་རྒྱུ་ནི། སངས་རྒྱས་འོད་སྲུང་གི་བསྟན་པ་ལ་འདི་ཉིད་དགེ་སློང་མར་གྱུར་ནས་ཚེ་གཅིག་ཏུ་ཚངས་པར་སྤྱོད་པ་སྤྱད་ནས་འཆི་ཁར་བདག་གི་མཁན་མོ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བརྩོན་འགྲུས་རྩོམ་པ་རྣམས་ཀྱི་མཆོག་ཏུ་ལུང་བསྟན་པ་དེ་བཞིན་དུ་བདག་ཀྱང་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པའི་གོ་འཕང་ཐོབ་ཅིང་བརྩོན་འགྲུས་རྩོམ་པ་རྣམས་ཀྱི་མཆོག་ཏུ་ལུང་བསྟན་པར་གྱུར་ཅིག་ཅེས་སྨོན་ལམ་བཏབ་པའི་འབྲས་བུ་ཡིན་པར་གསུངས་སོ། །འདིས་ནི་འཕགས་པ་ལ་བསྙེན་བཀུར་བགྱིས་པ་དང་སྨོན་ལམ་བཏབ་པའི་འབྲས་བུ་བསྟན་པ་ཡིན་ནོ། །