འཁོར་ལྔ་སྡེ་བཟང་པོ་དགྲ་བཅོམ་པའི་གོ་འཕང་ལ་འགོད་པར་མཛད་པ་དེའི་ཚེ་དགེ་སློང་ལྔ་པོ་ངོ་མཚར་དུ་གྱུར་པ་ལ་བཀའ་སྩལ་པ།
༈ ཡང་བཅོམ་ལྡན་འདས་མངོན་པར་སངས་རྒྱས་ནས་ཝཱ་རཱ་ཎ་སཱིར་གཤེགས་ཏེ་དྲང་སྲོང་སྨྲ་བ་རི་དྭགས་ཀྱི་ནགས་སུ་འཁོར་ལྔ་སྡེ་བཟང་པོ་དགྲ་བཅོམ་པའི་གོ་འཕང་ལ་འགོད་པར་མཛད་པ་དེའི་ཚེ་དགེ་སློང་ལྔ་པོ་ངོ་མཚར་དུ་གྱུར་པ་ལ་བཀའ་སྩལ་པ། དགེ་སློང་དག་ད་ལྟར་འབའ་ཞིག་མ་ཡིན་ཏེ་འདས་པའི་དུས་ནའང་ངས་དགེ་སློང་ལྔ་སྡེ་པོ་འདི་རྣམས་ལ་བདག་གི་སྲོག་དང་བསྡོས་ཏེ་ཆུའི་རྒྱ་མཚོ་ཆེན་པོ་ལས་བསྒྲལ་ནས་རིན་ཐང་ཆེ་བའི་རིན་པོ་ཆེ་རྣམས་ཀྱི་སྐལ་ཤས་ཇི་ལྟར་བྱིན་པ་དེ་ཉོན་ཅིག སྔོན་འདས་པའི་དུས་ན་ཝཱ་རཱ་ཎ་སཱིའི་གྲོང་ཁྱེར་ན་རྒྱལ་པོ་ཚངས་པས་བྱིན་ཞེས་པས་རྒྱལ་སྲིད་བྱེད་པའི་ཚེ། ཡུལ་དེ་ན་དེད་དཔོན་དབྱིག་ཅེས་བྱ་བའི་བུ། དབྱིག་དགའ་ཞེས་བྱ་བ་ཞིག་བྱུང་སྟེ། དེ་ཉིད་ཀྱིས་རང་གི་ཕ་ཤི་བའི་འོག་ཏུ་སྦྱིན་པ་དག་སྦྱིན་བསོད་ནམས་དག་བྱས་ཏེ། རྒྱ་མཚོ་ཆེན་པོར་ལན་དྲུག་གི་བར་དུ་ཕྱིན་པས་ཉེ་ཞོ་མེད་པར་འཁོར་ཏེ་བསོད་ནམས་ཀྱི་གྲགས་པ་ཆེར་གྱུར་ཏོ། །དེའི་ཚེ་གྲོང་ཁྱེར་གཞན་ལྔ་ན་དེད་དཔོན་ལྔ་ཡོད་པ་རྣམས་ཀྱི་གྲུ་མ་རུངས་པར་གྱུར་ནས། དེད་དཔོན་དབྱིག་དགའི་ཐད་དུ་ཕྱིན་ནས་གསོལ་བ་གདབ་པ་ན། དེས་སྨྲས་པ། ཀྱེ་རྒྱ་མཚོ་ཆེན་པོའི་ཆོས་ཉིད་ཀྱི་གྲུ་བདུན་པ་ནི་མ་རུངས་པར་འགྱུར་ཏེ་སྔོན་ཆད་གང་གིས་ཀྱང་རྒྱ་མཚོའི་གྲུའི་དོན་ལས་བདུན་དུ་གྲུབ་པ་སུ་ཡང་མེད་དོ། །འོན་ཀྱང་ཁྱེད་ཀྱི་བསམ་པ་ཡོངས་སུ་བསྐང་བར་བྱ་སྟེ། ཁྱེད་ཁོ་ན་ལ་སྙིང་བརྩེ་བའི་ཕྱིར། ལན་བདུན་དུ་རྒྱ་མཚོའི་ནང་དུ་འགྲོ་བར་བྱའོ་ཞེས་སྨྲས་ནས། དེད་དཔོན་དབྱིག་དགས་གཞན་ལྔ་བོ་ཁྲིད་དེ་རྒྱ་མཚོ་ཆེན་པོའི་ནང་དུ་སོང་བ་ལས་རིན་པོ་ཆེའི་གླིང་དུ་ཕྱིན་ནས་རིན་པོ་ཆེས་གྲུ་བཀང་སྟེ་འཛམ་བུ་གླིང་དུ་ཕྱིར་ལོག་པ་ན། རྒྱ་མཚོ་ནས་བདེ་བར་ཕྱིར་འཁོར་བའི་མཚན་མ་མཐོང་ནས་དེད་དཔོན་དབྱིག་དགས་རིན་པོ་ཆེ་རིན་ཐང་ཆེ་བ་རྣམས་ཀྱིས་སྒྱེའུ་བཀང་སྟེ་རྐེད་པ་ལ་བཅིངས་ནས་གལ་ཏེ་གྲུ་འདི་མ་རུངས་པར་གྱུར་ན་ཁྱེད་རྣམས་ཀྱིས་ངའི་ལུས་ལ་འཇུས་ཤིག་ཅེས་སྨྲས་སོ། །དེ་ནས་ཕྱིས་ཞིག་ན་ཆུ་གནས་ཀྱིས་གྲུ་བཤིག་པར་གྱུར་ཏེ། དེད་དཔོན་ལྔ་པོས་དབྱིག་དགའི་ལུས་ལ་འཇུས་སོ། །དེར་དབྱིག་དགས་བསམ་པ། བདག་གིས་འདི་རྣམས་གསོན་བཞིན་དུ་བསྒྲལ་མི་ནུས་ཀྱི། རྒྱ་མཚོ་ཆེན་པོ་ནི་ཤི་བའི་རོ་དང་ལྷན་ཅིག་ཏུ་གནས་པ་ནི་མི་སྲིད་དེ། སྐབས་མེད་པས། བདག་ཤི་བ་དང་རྒྱ་མཚོ་ཆེན་པོ་ལས་མྱུར་དུ་བརྒལ་བར་འགྱུར་རོ་སྙམ་ནས། དེ་དག་ལ། ཀྱེ་ཁྱེད་རྣམས་བརྟན་ཞིང་སྤྲོ་བ་ཆེར་སྐྱེད་ཅིག་དང་། ངས་གནོད་པ་མེད་པར་ཕ་རོལ་དུ་བརྒལ་བར་བྱའོ། །བརྒལ་ཟིན་ནས་ཀྱང་ངའི་ལུས་མ་དོར་བར་རྐེད་པར་བཅིང་པའི་རིན་པོ་ཆེ་རིན་ཐང་ཆེ་བ་རྣམས་ལོངས་ལ་སྤྱོད་ཅིག དེས་ཁྱེད་ཀྱི་གཉི་གའི་ཕྱོགས་ཀྱི་བདུན་རྒྱུད་འཚོ་བར་འགྱུར་རོ་ཞེས་སྨྲས་སོ། །དེ་ནས་དེས། སེམས་ཅན་གྱི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་ནས། མཚོན་རྣོན་པོ་བླངས་ཏེ་རང་གི་མགུལ་པ་བཅད་པས། རྒྱ་མཚོའི་ཀླུ་གཙང་སྦྲ་ལ་དགའ་བ་རྣམས་ཀྱིས་འགྲམ་དུ་ཕུལ་ནས་ཐང་ལ་བོར་རོ། །དེ་ནས་དེ་དག་གིས་དེའི་རོ་ལས་རིན་པོ་ཆེ་རྣམས་བཀྲོལ་ཏེ་བགོ་བཤའ་བྱས་ནས། དེའི་རུས་བུ་ལ་མཆོད་པ་བྱས་ཏེ་དོང་ངོ་། །དེའི་དུས་ཀྱི་དེད་དཔོན་དབྱིག་དགའ་གང་ཡིན་པ་དེ་ནི་ང་ཡིན་ནོ། །དེའི་ཚེ་དེད་དཔོན་ལྔ་པོར་གྱུར་པ་གང་ཡིན་པ་དེ་ནི་དགེ་སློང་ལྔ་པོ་འདི་རྣམས་ཡིན་ཏེ། དེའི་ཚེ་ན་ཡང་ངས་རང་གི་སྲོག་དང་བཅས་བསྡོས་ཏེ། ཆུའི་རྒྱ་མཚོ་ལས་བསྒྲལ་ནས་རིན་པོ་ཆེ་རིན་ཐང་ཆེ་བའི་སྐལ་ཤས་བྱིན་ཏེ་ཉེ་ཞོ་མེད་ཅིང་བདེ་བའི་གནས་སུ་བཀོད་ལ། ད་ལྟར་ཡང་ངས་འདི་རྣམས་འཁོར་བའི་རྒྱ་མཚོ་ལས་བསྒྲལ་ཏེ། དབང་པོ་དང་སྟོབས་དང་བྱང་ཆུབ་ཀྱི་ཡན་ལག་རིན་པོ་ཆེའི་སྐལ་ཤས་བྱིན་ནས། གཡུང་དྲུང་གི་མཐའ་ཐུག་པའི་གྲུབ་པ་དང་བདེ་བ་མྱ་ངན་ལས་འདས་པ་ལ་བཀོད་དོ་གསུངས།