ཡི་དྭགས་ཀྱི་གནས་སུ་བྱོན་པ།

༈ ཡང་གླེང་གཞི་སྔར་ལྟར་ལས་འཕགས་པ་མོའུ་འགལ་གྱི་བུ་ཡི་དྭགས་ཀྱི་གནས་སུ་བྱོན་པས། ཡི་དྭགས་ལུས་ལ་མེ་འབར་ཞིང་། སེང་གེ་སོགས་སྲོག་ཆགས་ལྕགས་ཀྱི་མཆེ་བ་ཅན་མང་པོས་དེའི་ལུས་ཀྱི་ཤ་བཅད་ནས་ཟ་བས་སྡུག་བསྔལ་ཏེ་ཕན་ཚུན་དུ་རྒྱུག་པར་བྱེད་ཅིང་གལ་ཏེ་དེ་ཆབ་ཀྱི་ནང་དུ་ཞུགས་ན་ནི་ལྕགས་ཀྱི་མཆེ་བ་ཅན་གྱི་ཆུ་སྲིན་རྣམས་བྱུང་ནས་ཟ་བར་བྱེད་ལ། ནམ་མཁའ་ལ་མཆིས་ན་ནི་གདུག་པའི་བྱ་ལྕགས་མཆུ་ཅན་དག་གིས་ཟ་བར་བྱེད་པ་ཞིག་གཟིགས་པས། དོན་དེ་བཅོམ་ལྡན་འདས་ལ་གསོལ་བ་ན། དེ་ཡང་སྔོན་སངས་རྒྱས་འོད་སྲུང་གི་དུས་སུ་དགེ་སློང་ཞལ་ཏ་བར་གྱུར་ཏེ། དེས་སྦྱིན་བདག་མང་པོ་ལ་བསྐུལ་ནས་དགེ་འདུན་དང་མཆོད་རྟེན་གྱི་ཕྱིར་བསླངས་ནས་ཅི་དགའ་བར་སྤྱོད་ཅིང་གཞན་དག་ལའང་བྱིན་པའི་རྒྱུ་དེས་ཡི་དྭགས་སུ་སྐྱེས་ཏེ་སྡུག་བསྔལ་དེ་ལྟ་བུ་མྱོང་བར་གསུངས་སོ། །