རིགས་གཟུགས་ཀྱི་དྲེགས་པས་གཞན་ལ་བརྙས་པ་སོགས་ཀྱི་ཉེས་དམིགས་དང་སྦྱིན་པ་དང་བསླབ་གཞི་སྲུང་བའི་ཕན་ཡོན་བསྟན་པ།

༈ ཡང་གླེང་གཞི་ཡངས་པ་ཅན་དུ་བཞུགས་ཏེ། དེའི་ཚེ་གྲོང་གི་སྡེ་དཔོན་སེང་གེ་ཞེས་བྱ་བའི་ཆུང་མ་ལ་བུ་ཆགས་ནས། དེའི་མཐུས་བུད་མེད་དེའི་ལུས་ཐོག་ཐག་ནས་ཕྱི་སའི་དྲི་འབྱུང་ལ། ཕྱིས་ཟ་བའི་སེམས་ཅན་ཀྱང་སྐྱེས་པར་གྱུར་ཏེ། དེ་ཟླ་བ་དགུའམ་བཅུ་ལོན་པ་དང་། དེའི་བུ་མི་སྡུག་པའི་རྣམ་གྲངས་བཅོ་བརྒྱད་དང་ལྡན་པ་ཞིག་བཙས་ནས། དེ་བཙས་མ་ཐག་ཏུ་ཁྱིམ་དེའི་ཐོག་ཐག་ཏུ་ཕྱི་སའི་དྲིས་གང་བར་གྱུར་ཏོ། །དེ་ནས་དེ་བཀྲུས་ཏེ་སྤོས་སྣ་ཚོགས་ཀྱིས་བྱུགས་ཀྱང་ཕྱི་སའི་དྲི་མེད་པར་མ་གྱུར་ནས། ཆུང་མས་སྡེ་དཔོན་སེང་གེ་ལ་བསྟན་མ་འདོད་པ་ལས་བུད་མེད་གཞན་ཞིག་གིས་བསྙད་པས་དེ་མི་དགའ་བར་གྱུར་ནས་ནམ་སྲོས་ཁྱི་ལ་སྦྱིན་ནམ་སྙམ་པ་ན། བར་སྐབས་དེར་སྡེ་དཔོན་སེང་གེ་དགེ་བའི་བཤེས་དང་འཕྲད་དེ་བཅོམ་ལྡན་འདས་ལས་ཆོས་ཐོས་པས་བདེན་པ་མཐོང་བར་གྱུར་ཏེ། དེས་བསམ་པ། སེམས་ཅན་འདི་ལས་ལས་སྐྱེས་ཏེ། འདི་ཆེར་བསྐྱེད་བསྲིངས་ནས་དཀོན་མཆོག་ལ་བསྙེན་བཀུར་བྱེད་བཅུག་ན་སྐྱེ་བ་གཞན་དུ་འདི་ལྟ་བུའི་ལུས་ངན་མི་ལེན་པར་འགྱུར་རོ་སྙམ་སྟེ་གསོས་ནས་ཆེར་སྐྱེས་པ་ནས་ཕས་བསོད་ནམས་ཀྱི་ལས་ལ་བསྐུལ་བས་དེས་ཀྱང་ཕའི་ངག་ཉན་དེ་དཀོན་མཆོག་ལ་བཀུར་སྟི་བྱེད་པར་གྱུར་ཏོ། །དེ་ནས་ཕྱི་ཞིག་ཁྱེའུ་དེས་ཕ་མ་ལ་གསོལ་ཏེ་སངས་རྒྱས་དགེ་འདུན་དང་བཅས་པ་ཁྱིམ་དུ་སྤྱན་དྲངས་ནས་བཤོས་དྲང་བའི་འོག་ཏུ་ཆོས་ཉན་པར་འཁོར་བ་ན། བཅོམ་ལྡན་འདས་ཀྱིས་དེའི་བསམ་པ་དང་བག་ལ་ཉལ་སོགས་ཐུགས་སུ་ཆུད་ནས་ཆོས་བསྟན་པས་ཁྱེའུ་དེ་སྟན་དེ་ལ་འཁོད་བཞིན་དུ་བདེན་པ་མཐོང་ནས། བདག་ལུས་འདི་ལྟ་བུར་མ་གྱུར་ན་སངས་རྒྱས་ཀྱི་བསྟན་པ་ལ་རབ་ཏུ་བྱུང་བར་བྱ་སྟེ་སྙམ་དུ་བསམ་པའི་མོད་ལ་ཁྱེའུ་དེའི་བྱད་བཞིན་མི་སྡུག་པ་དང་དྲི་མི་ཞིམ་པ་དེ་མེད་པར་གྱུར་པས་ལྷག་པར་ཡང་དགའ་སྟེ། བཅོམ་ལྡན་འདས་ལ་གསོལ་བས། སྟོན་པས་ཚུར་ཤོག་གིས་བསྙེན་པར་རྫོགས་ཏེ་བརྩོན་པས་དགྲ་བཅོམ་པའི་གོ་འཕང་ཐོབ་བོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པས། སྔོན་འདས་པའི་དུས་ན། རི་ཁྲོད་ཀྱི་གྲོང་ཞིག་ན་བྲམ་ཟེ་གཟུགས་བཟང་ཞིང་ལྟ་ན་སྡུག་པ་ཞིག་གནས་པ་དེས་བྱད་གཟུགས་ཀྱི་དྲེགས་པས་དགེ་སྦྱོང་དང་བྲམ་ཟེ་ཐམས་ཅད་ལ་བརྙས་པར་བྱེད་པ་ལས། ནམ་ཞིག་བྲམ་ཟེ་དེ་ཁང་སྟེང་དུ་འདུག་པ་ན། རང་སངས་རྒྱས་ཞིག་གྲོང་ནས་བསོད་སྙོམས་བླང་སྟེ་སྒོ་དྲུང་ནས་བྱོན་པ་མཐོང་ནས། བྲམ་ཟེ་དེའི་མདུན་དུ་རྫའི་གྱོ་མོ་ཕྱི་སས་གང་བ་ཞིག་འདུག་པ་དེ་རྐང་པས་ཕུལ་ནས་རང་སངས་རྒྱས་ཀྱི་སྟེང་དུ་བོར་བས་དེའི་གོས་དང་ལུས་དང་ལྷུང་བཟེད་ཐམས་ཅད་གོས་པར་གྱུར་ཏེ། རང་སངས་རྒྱས་དེས་ཡར་བལྟས་པ་དང་བྲམ་ཟེ་དེ་དགའ་ཆེས་ནས་བཞིན་མི་སྡུག་པར་བསྒྱུར་ཏེ་ལུས་ཀྱི་ལས་ཀྱིས་ཐོ་བཙམས་སོ། །དེར་རང་སངས་རྒྱས་དེ་དེ་ལ་ཐུགས་བརྩེ་བའི་སླད་དུ། ནམ་མཁའ་ལ་འཕགས་ཏེ་རྫུ་འཕྲུལ་སྣ་ཚོགས་པ་བསྟན་པས། སོ་སོ་སྐྱེ་བོ་ནི་རྫུ་འཕྲུལ་གྱིས་མྱུར་དུ་དད་པ་སྐྱེ་བར་འགྱུར་བས་ན། རབ་ཏུ་དད་ནས་འགྱོད་པས་ཕྱག་འཚལ་ཞིང་ཁྱིམ་དུ་སྤྱན་དྲངས་པ་ན་རང་སངས་རྒྱས་དེ་ཡང་ཐུགས་བརྩེ་བས་ས་ལ་བབ་སྟེ་དེའི་ཁྱིམ་དུ་བྱོན་པ་ན་བྲམ་ཟེ་དེས་གོས་རྣམས་ཕུད་ནས་སྐུ་ལ་ཁྲུས་བྱས་ཤིང་སྤོས་ཀྱིས་བྱུགས་ནས་ཆོས་གོས་གསར་དུ་ཕུལ་ཞིང་། བཟའ་བཅའ་ཇི་ལྟར་བཞེད་པ་ཕུལ་ནས་ཞབས་ལ་ཕྱག་བྱས་ཏེ་བཟོད་པར་གསོལ་ནས། བདག་གིས་ཡོན་གནས་འདི་ལྟ་བུ་ལ་གནོད་པ་བྱས་པའི་འབྲས་བུ་མི་མྱོང་ཞིང་གང་དུ་སྐྱེས་པར་ཕྱུག་ཅིང་ནོར་མང་བ་དང་། འདི་བས་ཀྱང་ཆེས་ཁྱད་པར་དུ་འཕགས་པའི་སྟོན་པ་དང་ཕྲད་ནས་མཉེས་པར་བྱས་ཏེ་ཡོན་ཏན་འདི་ལྟ་བུ་ཐོབ་པ་དང་། གལ་ཏེ་ལས་ཀྱི་འབྲས་བུ་མི་སྡུག་པ་མྱོང་ནའང་། དེ་རབ་ཏུ་བྱུང་བར་འདོད་པའི་མོད་ལ་བྱང་བར་གྱུར་ཅིག ཅེས་སྨོན་ལམ་བཏབ་བོ། །དེའི་དུས་ཀྱི་བྲམ་ཟེ་དེ་ནི་སེང་གེའི་བུ་འདི་ཡིན་ཏེ། ལས་དེས་གང་དུ་སྐྱེས་པར་མི་སྡུག་པའི་མཚན་མ་བཅོ་བརྒྱད་དང་ལྡན་ཞིང་ལུས་ལ་ཕྱི་སའི་དྲི་བྲོ་བར་གྱུར་ལ། སླར་བསྙེན་བཀུར་བགྱིས་ཤིང་སྨོན་ལམ་བཏབ་པས་སྨོན་པ་བཞིན་གྱི་འབྲས་བུ་ཐོབ་བོ་གསུངས། དེ་ནས་དགེ་སློང་རྣམས་ཀྱིས་སྡེ་དཔོན་སེང་གེའི་ལས་ཀྱི་རྒྱུ་ཞུས་པས། སྔོན་སངས་རྒྱས་འོད་སྲུང་གི་བསྟན་པ་ལ་དགེ་བསྙེན་དུ་གྱུར་ཏེ། སྦྱིན་པ་དག་བྱིན་བསོད་ནམས་དག་བསགས། ཚེ་གཅིག་ཏུ་སྐྱབས་འགྲོ་དང་བསླབ་གཞི་རྣམས་བསྲུངས་ནས་འཆི་ཁར་སྨོན་ལམ་བཏབ་པའི་རྒྱུ་དེས་གང་དང་གང་དུ་སྐྱེས་པ་དེར་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ཏེ། ད་ལྟར་ཡང་སངས་རྒྱས་མཉེས་པར་བྱས་ཏེ་མི་མཉེས་པར་མ་བྱས་སོ་གསུངས། འདིས་ནི་རིགས་གཟུགས་ཀྱི་དྲེགས་པས་གཞན་ལ་བརྙས་པ་སོགས་ཀྱི་ཉེས་དམིགས་དང་སྦྱིན་པ་དང་བསླབ་གཞི་སྲུང་བའི་ཕན་ཡོན་བསྟན་པའོ། །