ཚེ་གཅིག་ཏུ་ཚངས་པར་སྤྱོད་པ་སྤྱད་ནས་འཆི་ཁར་སྨོན་ལམ་བཏབ་པའི་རྒྱུ་ལས་བྱུང་བ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེ་ན་ཁྱིམ་བདག་བཟའ་བྲན་གཉིས་འདུག་པ་དཀོན་མཆོག་ལ་དད་པར་གྱུར་ཏེ་སྐྱབས་འགྲོ་དང་བསླབ་གཞི་ཡང་བླངས་སྦྱིན་པ་དག་བྱིན་ཅིང་བསོད་ནམས་དག་ཀྱང་བྱེད་དེ། ཁྱིམ་དེ་ནི་ཆུ་དོང་ལྟ་བུར་གྱུར་ཏོ། །དེ་ནས་ཕྱི་ཞིག་ན་སངས་རྒྱས་འཁོར་དང་བཅས་པ་དེའི་ཁྱིམ་དུ་སྤྱན་དྲངས་ཤིང་། བཅོམ་ལྡན་འདས་ཀྱིས་མཐུན་པའི་ཆོས་བསྟན་པས་རྒྱུན་དུ་ཞུགས་པ་ཐོབ་ཅིང་། དེའི་ཕྱི་ཞིག་ན་འཕགས་པ་ཤཱ་རིའི་བུ་སོགས་བྱོན་ནས་ཡོན་བསྔོ་མཛད་ཅིང་ཆོས་བསྟན་པས་དེ་གཉིས་ཀྱིས་ཕྱིར་མི་འོང་བའི་འབྲས་བུ་ཐོབ། དེ་ནས་དེ་གཉིས་ཀྱིས་ཁྱིམ་སྤངས་ཏེ་རབ་ཏུ་བྱུང་ནས་དགྲ་བཅོམ་པ་ཉིད་མངོན་དུ་བྱས་སོ། །དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། དེ་གཉིས་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ཞིང་སྦྱིན་པ་དང་བསོད་ནམས་དག་བྱས་ཏེ། ཚེ་གཅིག་ཏུ་ཚངས་པར་སྤྱོད་པ་སྤྱད་ནས་འཆི་ཁར་སྨོན་ལམ་བཏབ་པའི་རྒྱུ་ལས་བྱུང་བར་གསུངས་སོ། །