བུད་མེད་ཀྱི་ཕྱིར་གཞན་ལ་གནོད་པ་བགྱིས་པ་དང་སེམས་ཅན་གྱི་མིག་ཕྱུང་བའི་རྣམ་སྨིན་བསྟན་པ།

༈ ཡང་བཅོམ་ལྡན་འདས་ཡུལ་མི་ཐི་ལ་ན། ལྷ་ཆེན་པོའི་ཨ་མྲའི་ཚལ་ན་བཞུགས་པའི་ཚེ་ཡུལ་དེའི་ཁྱིམ་བདག་ཕྱུག་པོ་རྣམ་ཐོས་ཀྱི་བུའི་ནོར་དང་ལྡན་པ་ཚོགས་ཅན་ཞེས་བྱ་བའི་ཆུང་མ་ལ་བུ་བྱད་ངན་པོ་ལོང་བ་ཞིག་བཙས་པས། ཕ་མ་གཉིས་མི་དགའ་བར་གྱུར་ནས། བུ་དེ་ནམ་སྲོས་སུ་ལམ་སྲང་དུ་བོར་ཏེ་ཁྱི་ལ་བྱིན་ནོ། །དེར་བཅོམ་ལྡན་འདས་ཀྱིས་ཁྱེའུ་དེ་ལུང་བསྟན་པའི་དུས་ལ་བབ་ཅིང་དེ་ལ་བརྟེན་ནས་སྐྱེ་བོ་མང་པོའི་དོན་འབྱུང་བར་གཟིགས་ཏེ། དེ་ནུབ་ཁྱིས་མི་ཟ་བར་བྱིན་གྱིས་བརླབས་ཏེ། ནང་པར་དགེ་སློང་གི་དགེ་འདུན་གྱི་འཁོར་གྱིས་བསྐོར་ཏེ་དེར་གཤེགས་པ་ན། སྔོན་གྱི་དགེ་རྩས་བསྐུལ་ཏེ་སྐྱེ་བོ་མང་པོ་དག་ཀྱང་འདུས་སོ། །དེར་བཅོམ་ལྡན་འདས་ཀྱིས་ཁྱེའུ་དེའི་སྔོན་གྱི་ལས་དྲན་ཅིང་སྨྲ་ཤེས་པར་བྱིན་གྱིས་བརླབས་ཏེ་བཀའ་སྩལ་པ། ཁྱེའུ་ཁྱོད་མི་སྡུག་པ་ཡིན་ནམ། བཅོམ་ལྡན་འདས་མི་སྡུག་པ་ལགས་སོ། །བཀའ་སྩལ་པ། ཉེས་པར་སྤྱོད་པའི་ལས་ཀྱི་འབྲས་བུ་རྣམ་པར་སྨིན་པ་མི་སྡུག་པ་ཉམས་སུ་མྱོང་བ་ཡོད་དམ། གསོལ་པ། ཉམས་སུ་མྱོང་བ་མཆིས་ལགས་སོ། །བཀའ་སྩལ་པ། ཁྱོད་ཀྱི་མི་དགེ་བའི་བཤེས་གཉེན་སུ་ཡིན། གསོལ་པ། རང་གི་སེམས་ལགས་སོ། །དེར་སྐྱེ་བོ་རྣམས་ཐེ་ཚོམ་དུ་གྱུར་པ་ན། ཀུན་དགའ་བོས་འདི་ཉིད་སུ་ལགས་ཞེས་གསོལ་བས། བཅོམ་ལྡན་འདས་ཀྱིས། འདི་ནི་མི་དགེའི་ལས་བྱེད་པ་སྟེ། སྔོན་བྱུང་བ་འདས་པའི་དུས་ན་ཡུལ་མི་ཐི་ལ་འདི་ཉིད་ན་རྒྱལ་པོ་མི་སྡུག་པ་ཞེས་བྱ་བ་ཞིག་བྱུང་སྟེ། དེ་ནི་ཕྲག་དོག་ཅན་དུ་གྱུར་ནས། རང་གི་བཙུན་མོའི་འཁོར་རྣམས་ལ་གཞན་གྱི་མིག་གིས་བལྟས་པ་ཙམ་ལའང་ཁྲོ་བར་གྱུར་ནས། དེའི་མིག་འབྱིན་པར་བྱེད་ཅིང་། ཕྱིས་ཞིག་ན་དེ་སྐྱེད་མོས་ཚལ་དུ་སོང་བ་ན། རང་སངས་རྒྱས་ཞིག་དེར་བྱོན་པ་དང་འགྲིགས་ནས། བཙུན་མོའི་འཁོར་རྣམས་ཀྱིས་དེ་ལ་ཕྱག་བྱས་པས། རྒྱལ་པོ་དེ་ཁྲོས་ནས། འདིའི་མིག་ཕྱུངས་ཤིག་ཅེས་སྨྲས་པས། རང་སངས་རྒྱས་དེ་ཡང་སྔོན་གྱི་ལས་མྱོང་བར་གྱུར་པ་དེ་མངོན་སུམ་དུ་གྱུར་ནས་རྫུ་བ་ཡང་མ་དྲན་ན། འཕྲུལ་བ་ལྟ་ཅི་སྨོས། དེ་ནས་ཞབས་འབྲིང་བ་དེ་རྣམས་ཀྱིས་དེའི་མིག་གཉིས་ཕྱུང་བའི་འོག་ཏུ་རང་སངས་རྒྱས་དེ་འབར་བ་ལ་སོགས་པའི་ཆོ་འཕྲུལ་བསྟན་ནས་མྱ་ངན་ལས་འདས་སོ། །དེར་རྒྱལ་པོ་དེ་ཡང་འགྱོད་པར་གྱུར་ཏེ་དེའི་སྐུ་གདུང་ལ་མཆོད་པ་བྱས་ཤིང་སྨོན་ལམ་ཡང་བཏབ་བོ། །དེའི་དུས་ཀྱི་རྒྱལ་པོ་མི་སྡུག་པ་དེ་ནི་ལོང་བ་འདི་ཁོ་ན་ཏེ། དེས་རང་སངས་རྒྱས་ཀྱི་མིག་ཕྱུང་བ་དང་། སེམས་ཅན་སྟོང་ཕྲག་དུ་མའི་མིག་མེད་པར་བྱས་པས། དེ་ལས་དེའི་རྣམ་སྨིན་གྱིས་སེམས་ཅན་དམྱལ་བ་ཆེན་པོའི་སྡུག་བསྔལ་མྱོང་ཞིང་། དེ་ནས་ཀྱང་ཡི་དྭགས་ཀྱི་སྐྱེ་བ་ལྔ་བརྒྱ་དང་། དུད་འགྲོའི་སྐྱེ་བ་ལྔ་བརྒྱ། མིའི་སྐྱེ་བ་ལྔ་བརྒྱ་སྟེ་དེ་ཐམས་ཅད་དུ་དམུས་ལོང་འབའ་ཞིག་ཏུ་གྱུར་ནས་སྡུག་བསྔལ་མྱོང་བར་གྱུར་ཏོ་གསུངས། ཡང་ཀུན་དགའ་བོས་སེམས་ཅན་འདི་སྡུག་བསྔལ་ལས་ནམ་ཐར་བར་འགྱུར་ཞུས་པས། མ་འོངས་པ་དུས་རིང་མོ་ཞིག་ན་སངས་རྒྱས་ཡིད་བཟང་ཞེས་བྱ་བ་འཇིག་རྟེན་དུ་འབྱོན་པར་འགྱུར་ལ། དེའི་བསྟན་པ་ལ་འདི་ཉིད་མིར་སྐྱེས་ཏེ། དབང་པོ་ཚང་བར་འགྱུར་ཞིང་། རབ་ཏུ་བྱུང་ནས་དགྲ་བཅོམ་པ་ཐོབ་ནས་ཀྱང་། ལས་ལས་སྐྱེས་པའི་བྱ་རོག་དག་ལྷགས་ནས་མིག་གཉིས་འབྱིན་པར་འགྱུར་ལ། དེ་གཞི་དེ་ལས་མྱ་ངན་ལས་འདའ་བར་འགྱུར་ཏེ། དེར་ལས་འདི་ལས་ཐར་བར་འགྱུར་རོ། །ཞེས་གསུངས་པས་སྐྱེ་བོ་ཕལ་ཆེ་སེམས་རབ་ཏུ་སྐྱོ་བར་གྱུར་པ་ལ། དེ་དང་མཐུན་པའི་ཆོས་བསྟན་པས་ཐེག་པ་གསུམ་གྱི་ལམ་ལ་ཡང་དག་པར་གཞོལ་བར་གྱུར་ཏོ། །འདིས་ནི་བུད་མེད་ཀྱི་ཕྱིར་གཞན་ལ་གནོད་པ་བགྱིས་པ་དང་སེམས་ཅན་གྱི་མིག་ཕྱུང་བའི་རྣམ་སྨིན་བསྟན་པ་ཡིན་ནོ། །