ཁྲིམས་གྲོགས་མེད་པར་གཅིག་པུར་བུད་མེད་དང་མཉམ་དུ་འགྲོགས་པའི་ཉེས་དམིགས་ཀྱང་བསྟན་པ།
༈ ཡང་སྟོན་པ་རྒྱལ་པོའི་ཁབ་ན་བཞུགས་པའི་ཚེ། རྒྱལ་པོ་གཟུགས་ཅན་སྙིང་པོའི་གླང་པོ་ཆེའི་བླ། གླང་ཆེན་སྙིང་པོ་ཞེས་བྱ་བའི་བུ་ནག་པ་གླང་ཆེན་གནས་ཞེས་བྱ་བ་ཕྱུག་ཅིང་ནོར་མང་ལ་བཟོ་དང་སྒྱུ་རྩལ་གྱི་རིགས་ཐམས་ཅད་ལ་བྱང་བར་བྱས་པ་ཞིག་ཡོད་པ་དེ། ཕ་མ་ཤི་བའི་འོག་ཏུ་རྒྱལ་པོ་གཟུགས་ཅན་སྙིང་པོས་གླང་པོ་ཆེའི་བླར་བསྐོས་ཏེ། ཕའི་ལས་ཐབས་དེ་ཉིད་བྱིན་ཅིང་། ཆུང་མ་དང་བཅས་ཏེ་ཁྱིམ་དུ་དགའ་མགུར་སྤྱོད་པ་ལས། ཕྱིས་སངས་རྒྱས་ཀྱི་བསྟན་པ་ལ་དད་པ་རྙེད་ནས་རབ་ཏུ་བྱུང་ཞིང་། སྡེ་སྣོད་གསུམ་བསླབས་ཏེེ། རིག་པ་དང་གྲོལ་བའི་སྤོབས་པ་དང་ལྡན་པའི་ཆོས་སྨྲ་བར་གྱུར་ཅིང་བསམ་གཟུགས་ཀྱི་ཏིང་ངེ་འཛིན་རྣམས་ཀྱང་བསྐྱེད་ནས། འཁོར་སློབ་མ་ལྔ་བརྒྱ་ཙམ་བསྡུས་ཏེ་ལྗོངས་རྒྱུ་བ་ལས་མཐར་གྱིས་རྒྱལ་པོའི་ཁབ་ཏུ་རང་གི་ཁྱིམ་དང་ཉེ་བར་ཕྱིན་པ་ན། སྔར་ཁྱིམ་ན་གནས་པའི་ཆུང་མ་དེས་ཁྱིམ་དུ་སྤྱན་དྲངས་ནས། དེའི་རྒྱུད་བརྟགས་པས་དེས་འཕགས་པའི་ཆོས་མ་ཐོབ་པར་རིག་ནས་ཐབས་སྣ་ཚོགས་པས་འཁོར་རྣམས་དང་ཕྲལ་ནས་གཅིག་པུར་གྱུར་པ་ན། ངན་གཡོས་བསླུས་ཏེ་དེས་ཀྱང་བསླབ་གཞི་ཕུལ་ཏེ་ཁྱིམ་དུ་གནས་པར་གྱུར་ཏོ། །དོན་དེ་དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པས། བཀའ་སྩལ་པ། དགེ་སློང་དག་རིགས་ཀྱི་བུ་དེ་ནི་ཡུན་རིང་དུ་ཁྱིམ་ན་མི་གནས་ཏེ། དེ་ནི་ཡང་ངའི་བསྟན་པ་ལ་རབ་ཏུ་བྱུང་ནས། ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་དུ་བྱེད་པར་འགྱུར་རོ་གསུངས། དེ་ནས་ཕྱི་ཞིག་ན་ནག་པ་གླང་ཆེན་གནས་དེ་ཉིད་འདུལ་བའི་དུས་ལ་བབ་པར་གཟིགས་ནས། བཅོམ་ལྡན་འདས་ཀྱིས་རྒྱལ་པོའི་ཁབ་ནས་བསོད་སྙོམས་བཞེས་ཏེ་ཚུར་ཕེབས་པའི་ལམ་ཀར་དེའི་སྒོ་དྲུང་དུ་བྱོན་ནས་ནག་པ་གླང་ཆེན་གནས་ལ། ཁྱོད་ཁྱིམ་ན་གནས་པ་ཐོངས་ལ་ཚུར་ཤོག ཡང་ངའི་ཐད་དུ་རབ་ཏུ་ཕྱུངས་ཤིག་ཅེས་བཀའ་སྩལ་ཏོ། །འདི་ལྟར་བཅོམ་ལྡན་འདས་ཀྱིས་ནི། སྐུ་ཚེ་སྔ་མ་རྣམས་སུ་བླ་མ་དང་བླ་མའི་གནས་ལྟ་བུར་གྱུར་པ་སུའི་ངག་ཀྱང་མ་བཅག་པས་ན། བཅོམ་ལྡན་འདས་ཀྱི་བཀའ་ཡང་སུས་ཀྱང་གཅོག་མི་ནུས་པས། ངེས་ཀྱང་བཀའ་བཞིན་དུ་འཚལ་ལོ་ཞེས་གསོལ་ཏེ་ཕྱི་བཞིན་དུ་འབྲངས་ནས་འོད་མའི་ཚལ་དུ་ཁྲིད་ནས་རབ་ཏུ་བྱུང་སྟེ་བསྙེན་པར་རྫོགས་ནས་ལུང་ཕོག་པ་དང་། བརྩོན་པས་དགྲ་བཅོམ་པའི་གོ་འཕང་ཐོབ་བོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པས། སྔོན་རི་ཁྲོད་ཀྱི་གྲོང་ཞིག་ན། ཁྱིམ་བདག་ནག་པ་ཞེས་བྱ་བ་ཕྱུག་ཅིང་ནོར་མང་བ་ཞིག་མཆིས་པ་དེ་སྐྱེད་མོས་ཚལ་དུ་རྩེ་བ་ན། རང་སངས་རྒྱས་ཞིག་བསོད་སྙོམས་ལ་བྱོན་པ་དང་འཕྲད་ནས་དད་པའི་སེམས་སྐྱེས་ཏེ་བསོད་སྙོམས་ཕུལ་ཞིང་། རང་སངས་རྒྱས་དེ་བཞུགས་པའི་གནས་དྲིས་ཏེ་དུས་དང་དུས་སུ་བཤོས་ཕུལ་ཞིང་བསྙེན་བཀུར་གྱི་ཕྱིར་འགྲོ་བ་ལས། ཕྱིས་ཞིག་ནས་རབ་ཏུ་བྱུང་འདོད་ཀྱི་བློ་སྐྱེས་ཏེ། རང་སངས་རྒྱས་དེ་ལས་རབ་ཏུ་བྱུང་བར་གསོལ་བ་གདབ་པས། དེས་སྨྲས་པ། དེ་ནི་རབ་ཏུ་བྱུང་བར་མི་བྱེད་དོ། །དྲང་སྲོང་རྣམས་ཀྱི་ཐད་དུ་སོངས་ཤིག དེ་ནས་དེས་ཁྱིམ་བཏང་སྟེ་དྲང་སྲོང་རྣམས་ཀྱི་ནང་དུ་རབ་ཏུ་བྱུང་སྟེ་བསམ་གཏན་བཞི་དང་མངོན་ཤེས་ལྔ་ཡང་བསྐྱེད་དོ། །དེ་ནས་དེས་སྔོན་གྱི་རང་སངས་རྒྱས་ལ་བསྙེན་བཀུར་བྱ་བར་འདོད་ནས་སོང་བ་དང་དེ་ཉིད་མྱ་ངན་ལས་འདས་ཟིན་པས་དེའི་སྐུ་གདུང་ལ་མཆོད་རྟེན་བརྩེགས་ནས་བཀུར་སྟི་བྱས་ཏེ་སྨོན་ལམ་བཏབ་བོ། །དེ་ནས་ཕྱི་ཞིག་ན་དེ་ཚེ་འཕོས་ཏེ་ཚངས་པའི་འཇིག་རྟེན་དུ་སྐྱེས་སོ། །དེའི་དུས་ཁྱིམ་བདག་ནག་པར་གྱུར་པ་གང་ཡིན་པ་དེ་ནི་འདི་ཉིད་ཡིན་ཏེ། དེའི་ཚེ་རང་སངས་རྒྱས་ལ་མཆོད་པས་ཕྱུག་ཅིང་ནོར་མང་བ་དང་། སྨོན་ལམ་བཏབ་པས་སངས་རྒྱས་དང་ཕྲད་ཅིང་འབྲས་བུ་ཐོབ་པའི་བར་དུ་གྱུར་ཏོ། །གཞན་ཡང་སྔོན་འདས་པའི་དུས་གྲོང་ཁྱེར་ཝཱ་རཱ་ཎ་སཱིར་རྒྱལ་པོ་ཚངས་བྱིན་ཞེས་པས་རྒྱལ་པོ་བྱེད་པའི་ཚེ། དེའི་མདུན་ན་འདོན་བྲམ་ཟེ་མེས་སྦྱིན་ཞེས་པའི་ཆུང་མ་ལ་ཁྱེའུ་གཉིས་བྱུང་སྟེ། དེ་གཉིས་གཅིིག་མིང་ལ་མེ་བུ་དང་། གཅིག་ལ་མེ་ལྕེ་ཞེས་བཏགས་སོ། །དེ་གཉིས་ཆེར་སྐྱེས་པ་ན་ཁྱིམ་བཏང་སྟེ་ནགས་སུ་སོང་བས་དེ་གཉིས་ཀྱི་བསམ་གཏན་བཞི་དང་མངོན་ཤེས་ལྔ་ཡང་གྲུབ་སྟེ་རང་གི་ཁྱིམ་དུ་ཕ་མ་ལ་བལྟར་ཕྱིན་པས། ཕ་མའང་ཤིན་ཏུ་དགའ་སྟེ་མངོན་པར་མཆོད་ནས་དེའི་སྐྱེད་མོའི་ཚལ་དུ་སྤྱིལ་པོ་བཅས་ཏེ་དྲང་སྲོང་དེ་གཉིས་འཁོད་པ་ན། རྒྱལ་པོ་ཚངས་བྱིན་ཡང་དད་ནས་སྤྱན་དྲངས་པས། དུས་དུས་སུ་དྲང་སྲོང་དེ་གཉིས་ནམ་མཁའ་ལ་འཕུར་ནས་རྒྱལ་པོའི་ཕོ་བྲང་དུ་འགྲོ་བར་བྱེད་པ་ལ། རྒྱལ་པོས་ཀྱང་ནམ་མཁའ་ནས་པང་པས་བླངས་ཏེ་སྟན་ལ་བཞག་ནས། ཁ་ཟས་བཟང་པོས་ཚིམས་པར་བྱས་ཏེ་ཆོས་མཉན་པའི་ཕྱིར་མདུན་དུ་འཁོད་པ་ལས། ཕྱིས་ཞིག་ན་རྒྱལ་པོ་ཚངས་བྱིན་གྱིས་འབངས་རི་ཁྲོད་པ་རྣམ་ལོག་ནས་དཔུང་གི་ཚོགས་དང་བཅས་ཆས་ནས། བུ་མོ་ལ་སྔར་ལྟར་དྲང་སྲོང་གཉིས་འོངས་ན་བཀུར་སྟི་གྱིས་ཤིག་བྱས་སོ། །དེ་སོང་བའི་འོག་ཏུ་དྲང་སྲོང་མེ་ལྕེ་ཕོ་བྲང་དུ་ཕྱིན་པ་ན་བུ་མོ་དེས་པང་པས་བླངས་པས། བུ་མེད་རྣམས་ནི་རེག་ན་གདུག་པ་ཡིན་པས། དེས་རེག་མ་ཐག་ཏུ་དྲང་སྲོང་མེ་ལྕེ་རྫུ་འཕྲུལ་ལས་ཉམས་སོ། །དེ་ནས་རྒྱལ་པོའི་བུ་མོ་དེའང་བྲམ་ཟེ་ལ་ཆགས་ཏེ་ཕན་ཚུན་འཁྲིག་པའི་ཆོས་བསྟན་ཏེ། དེ་ཉིད་དུ་གནས་པ་དང་། རྒྱལ་པོའང་ཕྱིར་འཁོར་ཏེ་ཐེ་ཚོམ་དུ་གྱུར་པ་ན། དྲང་སྲོང་མེའི་བུ་དཀའ་ཐུབ་ཀྱི་ཚལ་ན་གནས་པས་མངོན་ཤེས་ཀྱིས་བརྟགས་པས་དེའི་དོན་རིག་ན། འདི་དེང་དུ་སྲོག་ཡལ་བར་གྱུར་སྲིད་དོ་སྙམ་ནས་རྫུ་འཕྲུལ་གྱིས་ནམ་མཁའ་ལ་འོངས་ནས། རྒྱལ་པོའི་ཕོ་བྲང་དུ་ཕྱིན་ནས་རྒྱལ་པོ་ལ་མགུ་བར་འགྱུར་བའི་ཆོས་བཤད་ནས། ནུ་བོ་ཁྲིད་དེ་སྟེང་གི་ནམ་མཁའ་ལས་དཀའ་ཐུབ་ཀྱི་ནགས་སུ་སོང་ཞིང་། དེ་ལ་ཡིད་བྱེད་ཀྱི་མན་ངག་ཕོག་པས། ཕྱིར་ཡང་བསམ་གཏན་དང་མངོན་ཤེས་ལ་བཀོད་དོ། །དེ་ནས་རྒྱལ་པོས་སྔར་གྱིས་གཏམ་ཐོས་པས་ཁྲོས་ནས། དཔུང་གི་ཚོགས་དང་བཅས་དྲང་སྲོང་དེ་གསོད་པའི་ཕྱིར་དཀའ་ཐུབ་ཀྱི་ཚལ་ན་འོང་བའི་ཚེ། དྲང་སྲོང་གིས་ཀྱང་དེའི་དོན་རིག་ནས་སྟེང་གི་ནམ་མཁའ་ལ་རྫུ་འཕྲུལ་གྱིས་འཁོད་ཅིང་སླར་ཡང་བསམ་གཏན་དང་མངོན་ཤེས་ཐོབ་པར་བསྟན་པས་རྒྱལ་པོ་ཡང་དགའ་བར་གྱུར་ཏེ་རྐང་པ་ལ་ཕྱག་བྱས་ཤིང་བཟོད་པར་གསོལ་ནས་སོང་ངོ་། །དེའི་ཚེ་དྲང་སྲོང་མེའི་བུར་གྱུར་པ་བྱང་ཆུབ་སེམས་དཔའི་སྤྱོད་པ་ལ་གནས་པ་དེ་ནི་ང་ཡིན་ལ། དེའི་ནུ་བོར་གྱུར་པ་དེ་ནི་ནག་པ་གླང་ཆེན་གནས་འདི་ཁོ་ན་ཡིན་ཏེ། དེའི་ཚེ་རྒྱལ་པོའི་བུ་མོར་གྱུར་པ་དེ་ནི་ཆུང་མ་འདི་ཉིད་དོ། །དེའི་ཚེ་ན་ཡང་འདི་ཚངས་སྤྱོད་ལས་ཉམས་པར་བྱས་པ་ངས་དྲངས་སོ། །གཞན་ཡང་སངས་རྒྱས་འོད་སྲུང་གི་དུས་འདི་ཉིད་རབ་ཏུ་བྱུང་ནས་ཚེ་གཅིག་ཏུ་ཚངས་སྤྱོད་ལ་གནས་ཤིང་། དབང་པོ་རྣམས་ཡོངས་སུ་སྨིན་པར་བྱས་པས་ད་ལྟར་རྣམ་པར་གྲོལ་བར་གྱུར་ཏོ་གསུངས། འདིས་ནི་ཁྲིམས་གྲོགས་མེད་པར་གཅིག་པུར་བུད་མེད་དང་མཉམ་དུ་འགྲོགས་པའི་ཉེས་དམིགས་ཀྱང་བསྟན་པ་ཡིན་ནོ། །