དཀོན་མཆོག་མཆོད་པའི་ཕན་ཡོན་དང་ལྷ་དང་བཅས་པའི་འཇིག་རྟེན་ན་སྐྱབས་ཀྱི་མཆོག་ནི་སངས་རྒྱས་ཉག་གཅིག་ཡིན་པར་ཡང་བསྟན་པ།
༈ ཡང་སྟོན་པ་རྒྱལ་པོའི་ཁབ་ན་བཞུགས་པའི་ཚེ་ལྷའི་དབང་པོ་འཁོར་དང་བཅས་པ་བདེན་པ་ལ་བཀོད་པར་མཛད་དེ། དེ་ཡང་སུམ་ཅུ་རྩ་གསུམ་གྱི་ལྷའི་ནང་ན་ལྷའི་དབང་པོ་བརྒྱ་བྱིན་ལ། ལུས་ཀྱི་འོད་ཆུང་བ་དང་། གོས་རྒྱན་སོགས་ལས་སྒྲ་མི་སྙན་པར་གྲགས་པ་དང་། གོས་ཀྱིས་རེག་ན་རྩུབ་པར་གྱུར་པ་དང་། ལུས་ལ་དྲི་མ་ཆགས་པ་དང་། མིག་འཛུམ་པ་སྟེ་ཉེ་བའི་ལྟས་ལྔ་བྱུང་བས་འཆི་འཕོ་བར་ཤེས་ནས་མི་དགའ་བར་གྱུར་པ་ལ། ལྷ་མ་ཡིན་གྱི་བུ་མོ་བདེ་སོགས་མས་བསྐུལ་བས་འཛམ་བུ་གླིང་དུ་འོངས་ནས། དགེ་སྦྱོང་དང་བྲམ་ཟེ་དང་ཁོང་དགེ་བའི་རང་བཞིན་ཅན་དུ་གྲགས་པ་ཐམས་ཅད་ཀྱི་ཐད་དུ་འོངས་ནས། ཐབས་ཅི་ཞིག་གིས་ན་ལྷའི་བུ་འཆི་འཕོ་བར་གྱུར་པ་ལས། འཆི་འཕོ་བར་མི་འགྱུར་ཞེས་དྲིས་པས། དེ་དག་གིས་བདག་ལ་ལྷའི་དབང་པོ་བརྒྱ་བྱིན་བལྟར་འོངས་པ་འདི་ནི་བདག་ཅག་གིས་རྙེད་པ་ལེགས་པར་རྙེད་དོ་ཞེས་ཟེར་ནས། དེ་དག་དབང་པོ་བརྒྱ་བྱིན་ཉིད་ལ་སྐྱབས་སུ་འགྲོ་བར་བྱེད་པས། བརྒྱ་བྱིན་གྱིས་བསམ་པ། འདི་ལྟར་བདག་ནི་འདི་རྣམས་ལ་འདྲི་བར་འདོད་ཅིང་སྐྱབས་སུ་འགྲོ་བར་འདོད་པ་ལས། འདི་དག་བདག་ལ་སྐྱབས་སུ་འགྲོ་བར་བྱེད་ན། བདག་དགེ་སྦྱོང་དང་། བྲམ་ཟེ་འདི་ལྟ་བུ་ལ་འདྲི་ཅི་དགོས་སྙམ་སྟེ་རེ་ཐག་ཆད་དོ། །དེའི་ཚེ་བྱང་ཆུབ་སེམས་དཔའ་དགའ་ལྡན་གྱི་གནས་ནས་གཟིགས་པ་རྣམ་པ་བཞིས་གཤེགས་ཏེ་ཡུམ་གྱི་ལྷུམས་སུ་ཞུགས་པ་མཐོང་བས་བརྒྱ་བྱིན་རབ་ཏུ་དགའ་བར་གྱུར་ནས་ད་ནི་དེ་ལས་བདུད་རྩི་རྟོགས་པར་འགྱུར་རོ་སྙམ་ནས་ལྷའི་བུ་བཞི་སྲུང་བར་བཏང་ཞིང་། དུས་དུས་སུ་བདག་ཉིད་ཀྱང་འོངས་ནས་སྲུང་བར་བྱེད་ལ། བལྟམས་པའི་ཚེ་ཡང་བདག་ཉིད་ཀྱིས་བླངས་ཤིང་། སྐུ་ཆེར་སྐྱེས་པའི་ཚེ་ཡང་སྐྱོ་བ་བསྐྱེད་ནས་ངེས་པར་འབྱུང་བར་བསྐུལ་ཞིང་། བྱང་ཆུབ་ཀྱི་སྙིང་པོར་ཡང་བསྲུང་བའི་ཕྱིར་སོང་ངོ་། །དེ་ནས་བྱང་ཆུབ་སེམས་དཔའ་བླ་ན་མེད་པའི་ཡེ་ཤེས་བརྙེས་ནས། ལྔ་སྡེ་དང་། ཉེ་བའི་ལྔ་སྡེ་དང་། གྲོང་གི་བྱིས་པ་སྟོང་ལྔ་བཅུ་དང་། བཟང་སྡེའི་སྡེ་ཚན་རྣམས་བཏུལ་བ་དང་། དགའ་མོ་དང་དགའ་སྟོབ་མ་བདེན་པ་ལ་བཀོད་པ་དང་། ལྟེང་རྒྱས་འོད་སྲུང་དང་། ཆུ་ཀླུང་འོད་སྲུང་སྤུན་རབ་ཏུ་བྱུང་བ་དང་། ག་ཡར་གཤེགས་ནས་ཆོ་འཕྲུལ་རྣམ་པ་གསུམ་བསྟན་པ་དང་། རྒྱལ་པོའི་ཁབ་ཏུ་གཟུགས་ཅན་སྙིང་པོ་ལྷ་བརྒྱད་ཁྲི་དང་ཡུལ་མ་ག་དྷཱའི་བྲམ་ཟེ་དང་ཁྱིམ་བདག་སྟོང་ཕྲག་དུ་མ་བདེན་པ་ལ་བཀོད་པ་དེའི་ཚེ་རྣམས་སུ་ལྷའི་དབང་པོ་བརྒྱ་བྱིན་གྱིས་ད་དུང་བདག་གི་ཞུ་བ་ལུང་བསྟན་པའི་དུས་ལ་མ་བབ་བོ་སྙམ་མོ། །དེ་ནས་བཅོམ་ལྡན་འདས་འོད་མའི་ཚལ་དུ་བཞུགས་པ་ན། མཆོག་ཟུང་གཉིས་རབ་ཏུ་བྱུང་སྟེ་བསྟན་པ་རྒྱས་པར་མཛད་ནས། ད་ནི་ལྷ་ཡི་དབང་པོ་བརྒྱ་བྱིན་འཁོར་བརྒྱད་ཁྲི་དང་བཅས་པ་བདེན་པ་ལ་དགོད་པར་བྱའོ་སྙམ་དུ་དགོངས་ནས། རྒྱལ་པོའི་ཁབ་ནས་མི་སྣང་བར་གྱུར་ཏེ། ལྷོ་ཕྱོགས་བྲམ་ཟེའི་གྲོང་ཨ་མྲའི་ནགས་ཁྲོད་ཅེས་བྱ་བ་དེའི་བྱང་ཕྱོགས། རི་བི་དེ་ཧའི་དབང་པོའི་བྲག་ཕུག་ཏུ་གཤེགས་ནས་མེའི་ཁམས་ལ་སྙོམས་པར་ཞུགས་སོ། །དེར་ལྷའི་དབང་པོ་བརྒྱ་བྱིན་གྱིས་དུས་ལ་བབ་པར་རིག་ནས་ལྷའི་འཁོར་བརྒྱད་ཁྲི་དང་། ལྷ་མ་ཡིན་གྱི་བུ་མོ་བདེ་སོགས་དང་། དྲི་ཟའི་བུ་ཟུར་ཕུད་ལྔ་པ་དང་ཐབས་ཅིག་ཏུ་གནས་དེར་ལྷགས་པས་ལྷ་དེ་རྣམས་ཀྱི་འོད་ཀྱིས་རི་བི་དེ་ཧ་ཐམས་ཅད་སྣང་བ་ཆེན་པོས་ཁྱབ་པར་གྱུར་ཏོ། །དེར་དྲི་ཟའི་བུ་གཙུག་ཕུད་ལྔ་པ་འཁོར་ལྔ་བརྒྱ་དང་བཅས་པས་བཻཌཱུཪྱའི་པི་ཝང་བླངས་ནས་ཚིགས་སུ་བཅད་པའི་དབྱངས་ཀྱིས། བཅོམ་ལྡན་འདས་ཏིང་ངེ་འཛིན་ལས་བཞེངས་སུ་གསོལ་པ་ན་བཅོམ་ལྡན་འདས་ཀྱིས་ལྷའི་དབང་པོ་འཁོར་མང་པོ་དང་བཅས་པར་གཟིགས་ནས་བྲག་ཕུག་དེ་ཡང་ཤིན་ཏུ་ཡངས་པར་བྱིན་གྱིས་བརླབས་སོ། །དེ་ནས་ལྷའི་དབང་པོ་འཁོར་དང་བཅས་པ་བཅོམ་ལྡན་འདས་ཀྱི་དྲུང་དུ་སོང་ནས་ཞབས་ལ་ཕྱག་བྱས་ཏེ་ཆོས་མཉན་པའི་ཕྱིར་སྤྱན་སྔར་འདུག་ནས། བརྒྱ་བྱིན་ལྷའི་དབང་པོས་བཅོམ་ལྡན་འདས་ལ་ཞུ་བ་དང་ཞུ་ལན་རབ་ཏུ་མང་པོ་མཛད་པའི་མཐར་བརྒྱ་བྱིན་རབ་ཏུ་མགུ་ནས། ལྷ་དང་བཅས་པའི་འཇིག་རྟེན་ན། །གང་ཟག་ཁྱོད་ཀྱི་ཟླ་མ་མཆིས། །དཔའ་བོ་ཆེན་པོ་ཁྱོད་ལ་འདུད། །སྐྱེས་མཆོག་ཁྱོད་ལ་ཕྱག་འཚལ་ལོ། །ཞེས་སོགས་ཀྱིས་བསྟོད་ཅིང་བཅོམ་ལྡན་འདས་ཀྱིས་ཆོས་བསྟན་པས་ལྷའི་དབང་པོ་བརྒྱ་བྱིན་དང་། ལྷ་བརྒྱད་ཁྲིས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བར་སྐྱེས་ཏེ། བདེན་པ་མཐོང་བའི་མཇུག་ཐོག་དེ་མ་ཐག་པར་སྟན་དེ་ལ་འཁོད་བཞིན་དུ་ལྷའི་དབང་པོ་བརྒྱ་བྱིན་དེ་ཉིད་ཚེ་འཕོས་ཏེ། སྟན་དེ་ཉིད་དུ་ཕྱིར་སྐྱེས་སོ། །དེ་ལྟར་ཤི་འཕོས་པ་དང་སྐྱེས་པ་ནི། མིག་མི་འཛུམ་པ་དང་། མི་སྣང་བར་གྱུར་པ་དང་། ལུས་ཀྱི་རེག་པའི་སྒོ་ནས་རྟོགས་པར་འགྱུར་ཏེ། བརྒྱ་བྱིན་རང་ཉིད་དང་བདེ་སོགས་མ་ལས་ལྷ་གཞན་གྱིས་རྟོགས་པར་མི་འགྱུར་རོ། །དེ་ནས་ལྷའི་དབང་པོ་དང་དྲི་ཟའི་རྒྱལ་པོ་ལ་སོགས་པ་འཁོར་དང་བཅས་པས་ཇི་སྲིད་འཚོའི་བར་དུ་སྐྱབས་སུ་འགྲོ་བ་དང་བསླབ་པའི་གཞི་རྣམས་ཀྱང་བླངས་ཏེ། ལྷའི་དགེ་བསྙེན་ཆེན་པོ་དག་གིས་བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་བསྐོར་བ་ལན་གསུམ་བྱས་ཏེ། སླར་ལྷའི་ཡུལ་དུ་གཤེགས་སོ། །དེར་དགེ་སློང་རྣམས་ངོ་མཚར་དུ་གྱུར་ནས་ལྷའི་དབང་པོ་འཁོར་དང་བཅས་པའི་ལས་ཀྱི་རྒྱུ་ཞུས་པ་ན། བཀའ་སྩལ་པ། དེ་ནི་སྨོན་ལམ་གྱི་དབང་ལས་གྱུར་ཏེ། སྔོན་སངས་རྒྱས་འཁོར་བ་འཇིག་འཇིག་རྟེན་དུ་བྱོན་ཏེ་སངས་རྒྱས་པ་ན་རྒྱལ་པོའི་ཕོ་བྲང་མཛེས་ལྡན་དུ་གཤེགས་ཏེ། དེའི་ཚེ་རྒྱལ་པོ་མཛེས་པས། གཙུག་ལག་ཁང་ལྔ་བརྒྱ་བརྩེགས་ཏེ་གནས་ཁང་དྲུག་སྟོང་བྱས་ནས་སངས་རྒྱས་འཁོར་དང་བཅས་པ་ལ་འབུལ་ཞིང་གཙུག་ལག་ཁང་དེ་དག་ཏུ་ཡོ་བྱད་ཐམས་ཅད་སྦྱར་ནས། རྒྱལ་པོ་དེ་ཉིད་འཁོར་བརྒྱད་ཁྲི་དང་བཅས་པས་མཆོད་པའི་ལས་ལ་བརྩོན་ཅིང་། མཐར་སྐུ་མྱ་ངན་ལས་འདས་པའི་ཚེ་ནའང་། སྐུ་གདུང་ལ་མཆོད་རྟེན་བརྩེགས་ཏེ། མཆོད་པ་རྒྱ་ཆེན་པོས་མཆོད་ནས་སྨོན་ལམ་བཏབ་པས། དགེ་བའི་རྩ་བ་འདིས་བདག་གང་དང་གང་དུ་སྐྱེས་པ་དེར་གལ་ཏེ་ལྷར་སྐྱེས་ན་ནི་ལྷ་ཆེ་བར་གྲགས་པ་ལྷ་རྣམས་ཀྱིས་མངའ་བདག་ཏུ་གྱུར་ཅིག གལ་ཏེ་མིར་གྱུར་ན་ནི་ཆེ་བར་གྲགས་པ་མི་རྣམས་ཀྱིས་ནང་ནས་རྒྱལ་སྲིད་ཀྱི་མངའ་བདག་ཏུ་གྱུར་ཅིག་ཅེས་བྱས་སོ། །དེའི་ཚེ་འཁོར་བརྒྱད་ཁྲི་པོས་བདག་ཅག་གང་དུ་སྐྱེས་པ་དེར་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེ་བ་དང་། རྒྱལ་པོ་ཁྱོད་ལ་བརྟེན་ནས་སྟོན་པ་འདི་ལྟ་བུ་མཉེས་པར་བྱེད་པར་གྱུར་ཅིག མི་མཉེས་པར་བྱེད་པར་མ་གྱུར་ཅིག་ཅེས་བྱས་སོ། །དེའི་དུས་ཀྱི་རྒྱལ་པོ་མཛེས་པ་ནི་ལྷའི་དབང་པོ་བརྒྱ་བྱིན་འདི་ཉིད་ཡིན་ཏེ་ལས་དེའི་རྣམ་པར་སྨིན་པས་ཆེད་འགའ་ལྷར་སྐྱེས་ཏེ་ལྷ་རྣམས་ཀྱི་མངའ་བདག་བྱས་ལ། ཆེད་འགའ་མིར་སྐྱེས་ཏེ་མི་རྣམས་ཀྱི་རྒྱལ་སྲིད་བྱས་སོ། །དེའི་ཞམ་རིང་བ་བརྒྱད་ཁྲིར་གྱུར་པ་གང་ཡིན་པ་དེ་ནི་ལྷ་བརྒྱད་ཁྲི་པོ་འདི་དག་སྟེ། ཚེ་རབས་ཐམས་ཅད་དུ་ཕྱུག་ཅིང་ནོར་མང་བར་གྱུར་ལ། འདི་རྣམས་ཀྱིས་ད་ལྟར་ང་མཉེས་པར་བྱས་ཀྱི་མི་མཉེས་པར་མ་བྱས་སོ་གསུངས། འདིས་ནི་དཀོན་མཆོག་མཆོད་པའི་ཕན་ཡོན་དང་ལྷ་དང་བཅས་པའི་འཇིག་རྟེན་ན་སྐྱབས་ཀྱི་མཆོག་ནི་སངས་རྒྱས་ཉག་གཅིག་ཡིན་པར་ཡང་བསྟན་པ་ཡིན་ནོ། །ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེའི་བྲམ་ཟེ་ཞིག་རང་གི་ཆོས་ལུགས་ལྟར་ལོ་བཞི་བཅུ་རྩ་བརྒྱད་ཀྱི་བར་དུ་ཚངས་པར་སྤྱོད་པ་སྤྱད་ནས། དེའི་འོག་ཏུ་ཆུང་མ་བླངས་པ་ལས། ཆུང་མ་ནི་གཟུགས་བཟང་ལྟ་ན་སྡུག་པ་གཡེམ་ལ་དགའ་བར་གྱུར་ཏེ་ཁྱིམ་ཐབ་ནི་རྒན་པོར་གྱུར་པས་དེ་ལ་མི་དགའ་ཞིང་ལྷན་ཅིག་ཏུ་གནས་པར་མི་འདོད་པ་ལ། བྲམ་ཟེ་དེས་ཆུང་མའི་ངོ་སྲུང་བའི་ཕྱིར་ནོར་འཚོལ་དུ་འོང་བ་ལས། །མལ་དུ་མི་རྒོད་ཀྱིས་བཅོམ་པས་ཤིན་ཏུ་སྡུག་བསྔལ་བར་གྱུར་ཏེ་བདག་ཁྱིམ་དུ་སོང་ན་ནི་ཆུང་མས་འཐབ་པར་འགྱུར་གྱིས། ད་འདི་ཉིད་དུ་སྲོག་འདོར་བར་བྱའོ་སྙམ་ནས་ནགས་ཁུང་ཐིབས་པོར་སོང་སྟེ་ཤིང་གི་ཡལ་ག་ལ་ཐག་པ་བཏགས་ནས་འགག་པར་བརྩམས་པ་ན་བཅོམ་ལྡན་འདས་ཀྱིས་དེ་ཉིད་འདུལ་བའི་དུས་ལ་བབ་པར་དགོངས་ནས། ནགས་ཁུང་ཐིབས་པོ་དེར་གཤེགས་ཏེ་བྲམ་ཟེ་དེ་ལ། ཁྱོད་གཟུ་ལུམ་མ་བྱེད་ཅིག ངས་ཁྱོད་ལ་ནོར་སྦྱིན་ནོ་ཞེས་བཀའ་སྩལ་ཏེ་གཏེར་ཆེན་པོ་བསྟན་པས། དེས་ཀྱང་ནོར་རྣམས་ཁྱེར་ཏེ་རང་གི་ཁྱིམ་དུ་སོང་ནས། དེའི་ཁྱིམ་འབྱོར་པ་རྒྱས་པར་བྱས་ཏེ་བཞག་ནས་སྦྱིན་པ་དག་བྱིན་ཞིང་བསོད་ནམས་དག་བྱེད་པ་ལ་ཞུགས་སོ། །དེ་ནས་དེས་ཕྱི་ཞིག་ན་བཅོམ་ལྡན་འདས་ཀྱི་བཀའ་དྲིན་དྲན་ནས་རབ་ཏུ་བྱུང་བར་འདོད་དེ་སྤྱན་སྔར་ཕྱིན་པ་ན། བཅོམ་ལྡན་འདས་ཀྱིས་དེ་ལ་མཐུན་པའི་ཆོས་བསྟན་པས་རྒྱུན་དུ་ཞུགས་པ་ཐོབ་ཅིང་། ཚུར་ཤོག་གིས་བསྙེན་པར་རྫོགས་ནས་དགྲ་བཅོམ་པའི་གོ་འཕང་མངོན་དུ་བྱས་སོ། །དེར་དགེ་སློང་རྣམས་ངོ་མཚར་དུ་གྱུར་པ་ལ། བཅོམ་ལྡན་འདས་ཀྱིས། ད་ལྟར་འབའ་ཞིག་མ་ཡིན་ཏེ། འདས་པའི་དུས་ནའང་བྲམ་ཟེ་འདི་དབུལ་བས་འཇིགས་ནས་བདག་ཉིད་འཆི་བར་བྱས་པ་ལས། ངས་ནོར་གྱི་ཕུང་པོ་ཆེན་པོ་བྱིན་ནས། དགེ་བ་བཅུའི་ལས་ཀྱི་ལམ་ལ་བཀོད་པ་ཡིན་ཏེ། སྔོན་གྲོང་ཁྱེར་ཝཱ་རཱ་ཎ་སཱི་ན་རྒྱལ་པོ་དབང་ཆེན་སྡེ་ཞེས་བྱ་བས་རྒྱལ་སྲིད་བྱེད་དེ། རྒྱལ་པོ་དེ་ནི་སེམས་ཅན་ཐམས་ཅད་ལ་བུ་སྡུག་པ་བཞིན་དུ་བྱམས་པའི་རང་བཞིན་གང་ལ་ཅི་འདོད་པ་ཐམས་ཅད་སྦྱིན་ཞིང་ཐམས་ཅད་དགེ་བཅུའི་ལམ་ལ་བཀོད་དེ་རྒྱལ་སྲིད་ཆོས་བཞིན་དུ་བསྐྱངས་པར་བྱས་པས་མི་མ་ཡིན་པ་རྣམས་ཀྱིས་ཀྱང་དེ་ལ་བསྲུང་ཞིང་སྐྱོབ་པར་བྱེད་པས་ལོ་ལེགས་ཤིང་ཕྱུགས་འཕེལ་བ་སོགས་ཡུལ་ཁམས་ཐམས་ཅད་ཤིན་ཏུ་འབྱོར་པར་གྱུར་ཏོ། །དེའི་ཚེ་ཉི་འོག་གི་རྒྱལ་པོ་ནི་ཆོས་མ་ཡིན་པ་འབའ་ཞིག་གིས་རྒྱལ་སྲིད་བྱེད་པས་སྐྱེ་བོ་རྣམས་སྐྱོ་བར་གྱུར་ནས་ཐམས་ཅད་དབང་ཆེན་སྡེའི་ཡུལ་དུ་ཕྱིན་པས། ཉི་འོག་གི་རྒྱལ་ཁམས་ནས་ཡུལ་སྟོང་པར་གྱུར་པ་མཐོང་ནས་བློན་པོ་རྣམས་ལ་དྲིས་པ་ན་རྒྱུ་མཚན་ཞིབ་པར་ཐོས་པས་ཉི་འོག་གི་རྒྱལ་པོ་དེ་ཤིན་ཏུ་ཁྲོས་ཏེ་དཔུང་ཚོགས་ཡན་ལག་བཞི་དང་བཅས་རྒྱལ་པོ་དབང་ཆེན་སྡེའི་སྟེང་དུ་ཕྱིན་པ་ན། རྒྱལ་པོ་དབང་ཆེན་སྡེས་ཐོས་ཏེ་བློན་པོ་རྣམས་ལ་སྨྲས་པ། ཀྱེ། ངས་ནི་ཚེ་གཅིག་གི་འཚོ་བ་ཙམ་གྱི་ཕྱིར་སྡིག་པ་བྱེད་མི་ཕོད་ཀྱིས། གལ་ཏེ་ཁྱོད་རྣམས་ཡུལ་ཕུང་བར་འགྱུར་མི་འདོད་ན་ནི་ཉི་འོག་གི་རྒྱལ་པོ་དེ་ལ་ཕྱག་འཚོལ་ཅིག ངས་ནི་དེ་ལ་གནོད་པ་བྱེད་མི་ཕོད་དོ། །ནགས་ཀྱི་ནང་དུ་ཤིང་ཤུན་ཤར་བུའི་གོས་གྱོན་ཅིང་། །འབྲས་བུ་ཟ་ལ་གཅན་གཟན་དག་དང་འགྲོགས་ཀྱང་སླའི། །འཇིག་རྟེན་ཕ་རོལ་དག་གིས་འཛེམ་པའི་མི་རྣམས་ཀྱིས། །རྒྱལ་སྲིད་དག་གི་ཕྱིར་ནི་གསོད་དང་བཅིང་མི་བྱ། །ཞེས་བྱས་ཏེ་དཀའ་ཐུབ་ཀྱི་ནགས་སུ་སོང་ངོ། །དེ་ནས་བློན་པོ་རྣམས་ཀྱིས་ཉི་འོག་གི་རྒྱལ་པོ་ལ་བབ་ཕུལ་ཞིང་། དེས་ཀྱང་ཡུལ་དེ་ཆམ་ལ་ཕབ་སྟེ་འདུག་པ་ན། རི་ཁྲོད་ཀྱི་གྲོང་ཞིག་ནས་བྲམ་ཟེ་དབུལ་པོ་ཞིག་བཟའ་མི་མང་བས་དེ་དག་བསྐྱང་མ་ནུས་ནས་ཝཱ་རཱ་ཎ་སཱིར་རྒྱལ་པོ་དབང་ཆེན་སྡེ་ལ་སློང་དུ་འོང་བ་ན། དེས་རྒྱལ་པོ་ནགས་སུ་གནས་བཅས་པར་ཐོས་ཏེ་མྱ་ངན་གྱི་ནོན་བཞིན་དུ་དཀའ་ཐུབ་ཀྱི་ནགས་སུ་ཕྱིན་ནས་བྱང་ཆུབ་སེམས་དཔའ་ལ་ནོར་བསླང་བས། བདག་དཀའ་ཐུབ་ཀྱི་ནགས་ན་གནས་བཅས་པ་མ་ཐོས་སམ། བདག་ལ་ནོར་ག་ལ་ཡོད་གསུངས་པས། བྲམ་ཟེ་དེ་རེ་ཐག་ཆད་ནས་ས་ལ་འགྱེལ་ཞིང་བརྒྱལ་སངས་པ་ན་གནས་དེར་འཆི་བར་བྱའོ་སྙམ་སྟེ་ཤིང་གི་ཡལ་ག་ལ་ཐག་པ་བཏགས་ནས་འགག་གྲིར་བཏང་བར་བརྩམས་པ་ན། བྱང་ཆུབ་སེམས་དཔའ་ལྷག་པར་ཡང་སྙིང་རྗེ་ཆེན་པོ་སྐྱེས་ཏེ། བྲམ་ཟེ་དེ་ལ་སྨྲས་པ། ཁྱོད་ཀྱིས་གཟུ་ལུམ་མ་བྱེད་དང་། ངས་ཁྱོད་ཀྱི་དབུལ་བ་གཅད་པར་བྱའོ། །བྲམ་ཟེ་ཁྱོད་ཚུར་ཤོག་ལ། ངའི་ལག་པ་རྒྱབ་ཏུ་བསྣོལ་ཏེ་དམ་པོར་ཆིངས་ལ། ཉི་འོག་གི་རྒྱལ་པོའི་དྲུང་དུ་ཁྲིད་ཅིག་དང་། དེས་ཁྱོད་ལ་ནོར་གྱི་ཕུང་པོ་ཆེན་པོ་སྦྱིན་པར་འགྱུར་རོ། །དེ་ལས་ཐབས་གུད་ན་མ་མཐོང་ངོ་། །དེ་ནས་བྲམ་ཟེ་དེས། དེ་ལྟར་བྱས་ཏེ་རྒྱལ་པོའི་ཕོ་བྲང་གི་སྒོར་ཁྲིད་པ་ན། རྒྱལ་པོ་དེས་མཐོང་སྟེ་ཡིད་མ་ཆེས་ནས། བྲམ་ཟེ་དེ་ལ་འདི་ཁྱོད་ཀྱིས་ག་ནས་ཁྲིད་དེ་འོངས། བྲམ་ཟེས། འདི་ནི་ལྷའི་དགྲ་ལགས་ཏེ། འདི་ནི་བདག་གིས་དཀའ་ཐུབ་ཀྱི་ནགས་ཚལ་ན་གནས་པ་ལས་མཐུས་བཟུང་ནས་ཁྲིད་དེ་མཆིས་སོ། །དེར་རྒྱལ་པོ་དེས་བསམ་པ། རྒྱལ་པོ་འདི་ནི་ལུས་ཆེ་ཞིང་སྟོབས་ཆེ་ལ། བྲམ་ཟེ་འདི་ནི་ལུས་ཉམ་ཆུང་བས་ན་འདིས་འདི་བཟུང་བར་ག་ལ་ནུས་ཏེ། འདི་ནི་སྙིང་རྗེ་ཆེ་ལ་སེམས་ཅན་ལ་བྱམས་པས་ན། འདིས་བདག་གིས་བདག་བཅིངས་ནས། འདི་ལ་བྱིན་གོར་མ་ཆག་སྙམ་སྟེ་བྲམ་ཟེ་དེ་ལ་འདི་ཁྱོད་ཀྱིས་ཇི་ལྟར་བཟུང་བ་དྲང་པོར་སྨྲོས་ཤིག དེ་ནས་དེས་ཀྱང་དྲང་པོར་བཤད་པས། རྒྱལ་པོ་དེ་དད་པར་གྱུར་ནས། སེམས་ཅན་དག་པ་འདི་ལྟ་བུ་ལ་བདག་གིས་གནོད་པ་བྱས་སོ་སྙམ་ནས་བདག་ཉིད་ཀྱིས་བཀྲོལ་ཏེ། རྒྱལ་པོའི་ཕོ་བྲང་དུ་སྤྱན་དྲངས་ནས་ཡན་ལག་ཐམས་ཅད་ཀྱིས་འཁྱུད་དེ་སེང་གེའི་ཁྲིའི་སྟེང་དུ་བཞག་ནས། རང་གི་ཅོད་པཎ་དབུར་བཅིངས་ཏེ་ཁྱོད་ནི་རྒྱལ་པོར་འོས་ལགས་ཀྱི་བདག་ནི་འོས་མ་ལགས་སོ་ཞེས་བྱས་ནས། དེས་དེ་ལ་དཔུང་གི་ཚོགས་དང་། དཀོར་མཛོད་རྣམས་ཕུལ་ནས་བཟོད་པར་གསོལ་ཏེ་རང་གི་ཡུལ་དུ་སོང་ངོ་། །དེ་ནས་རྒྱལ་པོ་དབང་ཆེན་སྡེས་བྲམ་ཟེ་དེ་ལ་ནོར་གྱི་ཕུང་པོ་ཆེན་པོ་བྱིན་ནས། དགེ་བ་བཅུའི་ལས་ཀྱི་ལམ་ལ་གནས་པར་བྱས་སོ། །དེའི་དུས་ཀྱི་རྒྱལ་པོ་དབང་ཆེན་སྡེར་གྱུར་པ་དེ་ནི་ང་ཡིན་ལ། བྲམ་ཟེར་གྱུར་པ་དེ་ནི་འདི་ཡིན་ནོ་གསུངས། འདིས་ནི་བྱང་ཆུབ་སེམས་དཔའི་བཟོད་པ་དང་སྙིང་རྗེའི་སྟོབས་བསྟན་པ་ཡིན་ནོ། །སྐབས་འདིར་འཚོ་བྱེད་གཞོན་ནུ་གསོས་ཀྱི་སྨན་མར་ལྕགས་མདའ་ཞེས་པ་བསྐོལ་བ་དང་། ལྷ་བྱིན་གྱི་སྨན་དེ་མ་ཞུ་བ་ལས་འཕྲོས་པའི་སྔོན་གྱི་རབས་རྣམས་ཀྱང་གསུངས་སོ། །