བྱམས་པའི་སེམས་བསྒོམ་པའི་ཕན་ཡོན་ཀྱང་བསྟན་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། རྒྱལ་པོ་གསལ་རྒྱལ་གྱིས་བློན་པོ་ཞིག་ལ་ཁྲིམས་བཅད་དེ་བཙོན་ཁང་དུ་མུ་གེས་ཤི་བར་གྱུར་པ་ལས། དེའི་འཆི་ཁར་སྨོན་ལམ་ལོག་པ་བཏབ་པའི་དབང་གིས་གནོད་སྦྱིན་མ་རུངས་པ་ཞིག་ཏུ་སྐྱེས་ཏེ་མི་ནད་ཆེན་པོ་བཏང་སྟེ་ཡུལ་ཀོ་ས་ལའི་སྐྱེ་བོ་ཕལ་ཆེར་ཁ་དག་པར་གྱུར་པ་ན་ལྟས་མཁན་རྣམས་ཀྱིས་དེ་ལྟར་གྱུར་པར་རིག་ནས། རྒྱལ་པོ་གསལ་རྒྱལ་གྱིས་བཅོམ་ལྡན་འདས་ལ་དེ་ཉིད་འདུལ་བར་གསོལ་བ་བཏབ་པས། བཅོམ་ལྡན་འདས་ཀྱིས་གནོད་སྦྱིན་དེ་རྒྱལ་བྱེད་ཀྱི་ཚལ་གྱི་འདབ་ཏུ་བཀུག་སྟེ། ཕྱི་རོལ་ཐམས་ཅད་མེ་ཆེན་པོས་འཁོར་བ་སྤྲུལ་པས། དེས་བཅོམ་ལྡན་འདས་ཀྱི་ཞབས་དྲུང་འབའ་ཞིག་ཞི་བར་མཐོང་ནས་དེར་ཕྱིན་ཞིང་སྐྱབས་སུ་འགྲོ་བ་དང་བསླབ་པའི་གཞི་རྣམས་ཀྱང་ཡང་དག་པར་བླངས་ཏེ་མཉན་ཡོད་ཀྱི་སྐྱེ་བོ་རྣམས་སྲུང་བ་དང་སྐྱོབ་པར་ཁས་བླངས་སོ། །དེར་དགེ་སློང་རྣམས་ངོ་མཚར་དུ་གྱུར་པ་ལ། ད་ལྟར་འབའ་ཞིག་མ་ཡིན་ཏེ། སྔོན་གྱི་དུས་ཀྱང་གནོད་སྦྱིན་མ་རུངས་པ་འདི་བཏུལ་ནས། སྐྱེ་བོ་ཐམས་ཅད་འཇིགས་པ་མེད་པའི་གནས་སུ་བཀོད་པ་ཡིན་ཏེ། སྔོན་ཝཱ་རཱ་ཎ་སཱིར་རྒྱལ་པོ་ཚངས་བྱིན་ཞེས་པས་རྒྱལ་སྲིད་བྱེད་པའི་ཚེ། ཡུལ་ཀཱ་ཤིར་ཀླུ་གདུག་པ་དུག་མི་བཟད་པ་ཞིག་བྱུང་སྟེ་དེས་གྲོང་དང་ལྗོངས་རྣམས་སྟོང་པར་བྱས་པས། རྒྱལ་པོ་ཚངས་བྱིན་གྱིས་དཔུང་གི་ཚོགས་བསགས་ཏེ་དེ་དག་ལ་ཀླུ་གདུག་པ་ཅན་དེ་སོད་ཅིག་ཅེས་བསྒོའོ། །དེ་དག་གིས་ཕྱག་བྱས་ཏེ་ལྷ་དེ་ནི་དཔུང་གི་ཚོགས་ཀྱིས་དགུམ་པར་མི་ནུས་ཀྱིས། སྔགས་སམ་སྨན་གྱིས་དེ་དགུམ་པར་ནུས་ལགས་སོ། །ཡང་ན་དགེ་བའི་ཚུལ་གྱིས་བཀུར་བའི་དགེ་སྦྱོང་དང་། བྲམ་ཟེ་རྣམས་ཀྱིས་འདུལ་བར་ནུས་སོ་ཞེས་གསོལ་ཏོ། །དེའི་ཚེ་ཡུལ་དེ་ཉིད་ན་གདོལ་པའི་ཁྱེའུ་བྱམས་པའི་རང་བཞིན་ཅན་སྙིང་རྗེ་ཆེ་བ་སེམས་ཅན་ལ་བྱམས་པ་ཞིག་ཡོད་པ་དེས་སྐྱེ་བོ་མང་པོ་ལ་སྙིང་བརྩེ་བའི་དབང་གིས་དེ་ཉིད་འདུལ་བར་ཁས་བླངས་པ་ན། དེའི་ཕ་མ་གཉིས་ཀྱིས། དེ་ནི་དབུགས་གདུག་པ་ཡིན་ཏེ་ཁྱོད་ཀྱིས་གདུལ་མི་ནུས་སོ། །ཁྱེའུས་སྨྲས་པ། བྱམས་པའི་གོ་ཆ་གྱོན་པ་ལ་དེས་ཅུང་ཟད་ཀྱང་གནོད་པར་བྱེད་མི་ནུས་སོ་ཞེས་བྱས་ཏེ། ཕྱོགས་དེར་སོང་བ་ན། ཀླུ་དེས་ཁྱེའུ་དེ་མཐོང་ནས་ཁྲོས་པས། དབུགས་བཏང་བར་གཟས་པ་ན། ཁྱེའུ་དེས་བྱམས་པ་ལ་སྙོམས་པར་ཞུགས་ནས་བྱམས་པའི་མིག་གིས་ཀླུ་དེ་ལ་བལྟས་པས། དེའི་མོད་ལ་ཀླུ་དེའི་དུག་མེད་པར་གྱུར་ནས། ཀླུ་དེ་ཉིད་ལག་པ་གཉིས་ཀྱིས་བླངས་ནས། མི་མི་གནས་པའི་ས་ཕྱོགས་སུ་བཞག་གོ །དེ་ཐོས་པ་དང་རྒྱལ་པོ་ཚངས་བྱིན་དགའ་ནས་རང་ཉིད་གདོལ་པའི་ཁྱེའུའི་ཐད་དུ་ཕྱིན་ནས་དམ་པ་སྣ་གཅིག་འདམ་དུ་བཅུག་པ་ལས། ཁྱེའུ་དེས་རྒྱལ་པོ་རང་ཉིད་ཀྱང་དགེ་བཅུའི་ལས་ལམ་ཡང་དག་བླངས་ཏེ་གནས་པར་མཛོད་ལ་ཡུལ་མི་གཞན་རྣམས་ཀྱང་དགེ་བཅུའི་ལམ་ལ་གཟུད་པར་མཛོད་ཅིག དེས་ཀྱང་དེ་ལ་ལོངས་སྤྱོད་ཆེན་པོ་བྱིན་ཅིང་། དགེ་བཅུའི་ལམ་ཡང་དག་པར་བླངས་ཏེ་མངའ་འབངས་མཐའ་དག་དགེ་བཅུའི་ལམ་ལ་བཀོད་དོ། །དེའི་དུས་ཀྱི་གདོལ་པའི་ཁྱེའུ་བྱང་ཆུབ་སེམས་དཔའི་སྤྱོད་པ་ལ་གནས་པ་དེ་ནི་ང་ཉིད་ཡིན་ལ། ཀླུ་གདུག་པ་ཅན་དེ་ནི་གནོད་སྦྱིན་མ་རུངས་པ་འདི་ཡིན་ནོ་གསུངས། འདིས་ནི་བྱམས་པའི་སེམས་བསྒོམ་པའི་ཕན་ཡོན་ཀྱང་བསྟན་པ་ཡིན་ནོ། །