སྐབས་འདིར་ཤི་བི་ཞེས་པའི་གཏམ་རྒྱུད་གཉིས།

༈ ཡང་སྐབས་འདིར་ཤི་བི་ཞེས་པའི་གཏམ་རྒྱུད་གཉིས་འབྱུང་སྟེ། དང་པོ་ནི། བཅོམ་ལྡན་འདས་གྱད་ཀྱི་ཡུལ་དུ་ལྗོངས་རྒྱུ་ཞིང་གཤེགས་པ་ལས། ཆུ་ཀླུང་མཐའ་ལྡན་དང་། གྲོང་ཁྱེར་ཀུ་ཤའི་བར་གྱི་ལམ་ནས་གུད་དུ་བཟུར་ཏེ་དེའི་ཚེ་འཁོར་གྱི་ནང་ན་ཉན་ཐོས་ཀྱིས་འདུལ་བར་བྱ་བ་དང་། སངས་རྒྱས་ཉིད་ཀྱིས་འདུལ་བར་བྱ་བ་ཆ་གཉིས་ཡོད་པར་གཟིགས་ཏེ་དེར་ཆོས་གོས་བཞི་བལྟབས་སུ་བྱས་པ་ལ་གློས་ཕབ་སྟེ་གཟིམས་ནས། ཀུན་དགའ་བོ་ལ། ངའི་རྒྱབ་མི་བདེ་བས་རེ་ཞིག་བསྟི་བར་བྱའོ། །ཁྱོད་ཀྱིས་བྱང་ཆུབ་ཀྱི་ཕྱོགས་ལས་སྤོབས་པར་གྱིས་ཤིག ཅེས་བཀའ་སྩལ་པས། ཀུན་དགའ་བོས་འཁོར་གྱི་ཚོགས་དེ་དག་ལ། དྲན་པ་དང་། ཆོས་རབ་ཏུ་རྣམ་པར་འབྱེད་པ་དང་། བརྩོན་འགྲུས་དང་། དགའ་བ་དང་། ཤིན་ཏུ་སྦྱངས་པ་དང་། ཏིང་ངེ་འཛིན་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་ལས་བརྩམས་ཏེ་ཆོས་བསྟན་པས། གང་དག་ཉན་ཐོས་དང་འབྲེལ་བར་དགེ་བའི་རྩ་བ་བསགས་པ་རྣམས་སྟན་དེ་ཉིད་ལ་འཁོད་བཞིན་དུ་དགྲ་བཅོམ་པའི་གོ་འཕང་ཐོབ་བོ། །དེར་བཅོམ་ལྡན་འདས་ཀྱིས་སྐུ་དྲང་པོར་བསྲངས་ཤིང་དྲན་པ་མངོན་དུ་བཞག་སྟེ་བཀའ་སྩལ་པ། ཀུན་དགའ་བོ་བརྩོན་འགྲུས་ནི་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཏུ་འགྱུར་རོ་ཞེས་སོགས་བྱང་ཆུབ་ཀྱི་ཕྱོགས་འདི་ཉིད་ལས་བརྩམས་ཏེ་མཐུན་པའི་ཆོས་བསྟན་པས། གང་དག་སངས་རྒྱས་དང་དགེ་བའི་རྩ་བ་འབྲེལ་བ་དེ་དག་སྟན་དེ་ཉིད་དུ་དགྲ་བཅོམ་པའི་གོ་འཕང་མངོན་དུ་བྱས་སོ། །དེའི་ཚེ་དགེ་སློང་ཞིག་གིས། དམ་ཆོས་རིན་ཆེན་འདི་སྟོན་པའི། །ཆོས་ཀྱི་མངའ་བདག་དེ་ཉིད་ཀྱང་། །དམ་ཆོས་གསན་པར་བཞེད་གྱུར་ན། །གཞན་ལྟ་ཅི་ལྟར་དེ་མི་ཉན། །ཞེས་སོགས་ཀྱི་ཚིགས་སུ་བཅད་པ་བརྗོད་ཅིང་ཐམས་ཅད་ངོ་མཚར་དུ་གྱུར་པ་ལ། བཅོམ་ལྡན་འདས་ཀྱིས། ད་ལྟར་འབའ་ཞིག་ལེགས་པར་སྨྲས་པ་གསུང་པ་དང་། ལེགས་པར་སྨྲས་པ་བཞེད་པར་མ་ཡིན་གྱིས། དེ་བཞིན་གཤེགས་པ་ནི་འདས་པའི་དུས་ན་ཡང་ལེགས་པར་སྨྲ་བ་གསུང་བ་དང་། ལེགས་པར་སྨྲས་པ་བཞེད་པ་ཡིན་ཏེ། ལེགས་པར་སྨྲས་པའི་དོན་གྱིས་ཕྱིར་ངས་མཆོག་ཏུ་དཀའ་བ་ཇི་ལྟར་སྤྱད་པ་ནི། སྔོན་རྒྱལ་པོའི་ཕོ་བྲང་བཞི་ལྡན་ཞེས་བྱ་བ་ན། རྒྱལ་པོ་ཤི་བི་ཞེས་བྱ་བས་རྒྱལ་པོ་བྱེད་དེ་རྒྱལ་པོ་དེ་ནི་བྱམས་པ་དང་། སྙིང་རྗེའི་རང་བཞིན་སེམས་ཅན་ཐམས་ཅད་ལ་བུ་གཅིག་པ་ལྟར་བྱམས་པས། ཐམས་ཅད་ལ་གང་ཅི་མཁོ་བའི་དངོས་པོ་ཐམས་ཅད་སྦྱིན་ཞིང་། ཐམས་ཅད་དགེ་བ་བཅུའི་ལས་ཀྱི་ལམ་ལ་བཀོད་པས། དེ་ནས་ཤི་འཕོས་པ་ཐམས་ཅད་ལྷའི་ཡུལ་དུ་སྐྱེས་པས་ལྷ་རྣམས་འཕེལ་བར་གྱུར་པ་ན། ལྷའི་དབང་པོ་བརྒྱ་བྱིན་གྱིས་དེའི་དོན་རྟོགས་ནས། བྱང་ཆུབ་སེམས་དཔའ་ལ་ཉམས་སད་པའི་ཕྱིར་དུ་རང་ཉིད་སྲིན་པོའི་གཟུགས་སུ་སྤྲུལ་ནས། རྒྱལ་པོའི་ཁང་སྟེང་དུ་འདུག་སྟེ། ཀྱེེ་མ་འདུ་བྱེད་རྣམས་མི་རྟག ། སྐྱེ་ཞིང་འཇིག་པའི་ཆོས་ཅན་ཡིན། །ཞེས་སྨྲས་པ་དང་། རྒྱལ་པོས་ཚིགས་སུ་བཅད་པ་དེའི་ལྷག་མ་གསན་པར་བཞེད་པ་ན། སྲིན་པོ་དེས་བདག་ནི་བཀྲེས་སོ་སྐོམ་མོ། །གལ་ཏེ་མིའི་ཤ་ཁྲག་དྲོན་མོ་དག་གི་བཟའ་བཏུང་གིས་ཚིམ་པར་བྱེད་ནུས་ན་སྨྲའོ། །དེར་རྒྱལ་པོ་དེས་གཞན་ལ་འཚེ་བ་ནི་བདག་གི་ཆ་མ་ཡིན་ལ། དེ་བས་རང་གི་ཤ་ཁྲག་དག་སྦྱིན་པར་བྱའོ་དགོངས་ཏེ། དེ་ལྟར་སྦྱིན་པར་བྱས་པས་དེས་སྔར་གྱིས་ཚིག་གཉིས་པོའི་གཤམ་དུ། སྐྱེས་ནས་འགག་པར་འགྱུར་བ་སྟེ། །དེ་དག་ཉེ་བར་ཞི་བ་བདེ། །ཞེས་སྨྲས་པས། བྱང་ཆུབ་སེམས་དཔས་གུས་པས་མནོས་ཏེ་བློ་ལ་བྱང་བར་བྱས་ནས། འདི་ནི་མྱ་ངན་ལས་འདས་པའི་གྲོང་ཁྱེར་དུ་འཇུག་པའི་སྒོ་ཡིན་ནོ་སྙམ་ནས། སྤུ་གྲི་རྣོན་པོས་རང་གི་བྲང་གི་ཤ་བཅད་དེ་དེ་ལ་བྱིན་ནས། གྲོགས་པོ་འགྲངས་སམ། དེས་མ་འགྲངས་སོ། །དེ་བཞིན་དུ་དཔུང་པ་སོགས་ཀྱི་ཤ་བཅད་དེ་བྱིན་ནས། དྲིས་ཀྱང་སྔར་ལྟར་གྱིས། མཐར་བདག་གི་ལུས་རིལ་པོ་གཏོང་བའི་དུས་ལ་བབ་པོ་སྙམ་ནས། རྫོགས་པའི་བྱང་ཆུབ་ཏུ་སྨོན་ལམ་བཏབ་ནས་བྱིན་པས་དེའི་ཚེ་ས་རྣམ་པ་དྲུག་ཏུ་གཡོས་ཤིང་མེ་ཏོག་གི་ཆར་ཡང་འབབས་པས། བརྒྱ་བྱིན་ངོ་མཚར་དུ་གྱུར་ཏེ། རང་གི་གཟུགས་སུ་བསྒྱུར་ནས་འགྱོད་པར་མ་གྱུར་ཏམ་དྲིས་པས། རྒྱལ་པོས་ཀྱང་འགྱོད་པར་མ་གྱུར་པའི་བདེན་ཚིག་བརྗོད་པས་ལུས་སྔ་མ་བཞིན་དུ་གྱུར་ཏེ། བརྒྱ་བྱིན་གྱིས་དེའི་ཞབས་ལ་ཕྱག་བྱས་ཏེ་བཟོད་པར་གསོལ་ནས། ནམ་བྱང་ཆུབ་ཐོབ་པ་ན་བདག་ལའང་དྲན་པར་མཛོད་ཅིག་ཅེས་སྨྲས་ཏེ་མི་སྣང་བར་གྱུར་ཏོ། །དེའི་དུས་ཀྱི་རྒྱལ་པོ་བྱང་ཆུབ་སེམས་དཔའི་སྤྱོད་པ་ལ་གནས་པ་དེ་ནི་ང་ཉིད་ཡིན་ནོ་གསུངས།