གྲུ་གཟིངས་སོགས་ལས་བདེ་བར་བསྒྲལ་བའི་ཕན་ཡོན་ཀྱང་བསྟན་པ།

༈ ཡང་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་མཉན་དུ་ཡོད་པ་ན་ཆུ་ཀླུང་ཁང་ལྡན་གྱི་འཇུག་ངོགས་མཉན་པའི་གྲོང་ཁྱེར་དུ་བཞུགས་པའི་ཚེ་མཉན་པ་རྣམས་འོངས་ནས་ཆུ་ཀླུང་ཁང་ལྡན་གྱི་འགྲམ་རྡོ་དང་། གསེག་མ། གྱོ་མོ་མེད་པར་བྱས་ཏེ་རྒྱལ་མཚན་དང་བ་དན་ནི་བསྒྲེངས། མེ་ཏོག་སྣ་ཚོགས་ནི་གཏོར། སྤོས་དང་ཞལ་ཟས་དང་མེ་ཏོག་སོགས་མཆོད་རྫས་རབ་ཏུ་མང་པོ་ནི་སྟ་གོན་བྱས། གྲུ་ཟམ་གྱི་སྟེང་ཡང་མེ་ཏོག་གི་ཁང་པ་དག་གིས་བརྒྱན་ནས་སངས་རྒྱས་འཁོར་དང་བཅས་པ་སྤྱན་དྲངས་ཏེ། བཟའ་བཅའ་གཙང་མ་བཟང་པོ་རྣམ་གྲངས་དུ་མས་ཚིམས་པར་བྱས་ཏེ་ཅི་བཞེད་པར་བསྟབས་ནས་ཆོས་མཉན་པའི་ཕྱིར་འཁོད་པ་ན། བཅོམ་ལྡན་འདས་ཀྱི་དེ་དག་གི་བསམ་པ་དང་བག་ལ་ཉལ་སོགས་ཐུགས་སུ་ཆུད་ནས་འཕགས་པའི་བདེན་པ་བཞི་རྟོགས་པར་འགྱུར་བའི་ཆོས་བསྟན་པས། དེ་དག་ཕལ་ཆེར་འབྲས་བུ་བཞི་ལ་བཀོད་ཅིང་། བྱང་ཆུབ་གསུམ་དུ་སེམས་བསྐྱེད་པ་སོགས་དགེ་རྩ་དཔག་ཏུ་མེད་པ་ལ་བཀོད་དོ། །དེ་ནས་མཉན་པ་དེ་དག་གིས་སངས་རྒྱས་དགེ་འདུན་དང་བཅས་པ་ཐབས་ཅིག་ཏུ་བཀུར་སྟི་ཆེན་པོ་དང་ལྡན་པས་གྲུ་ཟམ་ལས་བསྒྲལ་ཏོ། །དེའི་ཚེ་དགེ་སློང་རྣམས་སེམས་དགའ་བར་གྱུར་ནས། བཅོམ་ལྡན་འདས་ལ་སྔོན་གྱི་དགེ་བའི་རྩ་བ་ཅི་ཞིག་མཛད་ནས་འདི་ལྟར་གྱུར་གསོལ་པས། བཅོམ་ལྡན་འདས་ཀྱིས་སྔོན་བྱང་ཆུབ་སེམས་དཔའ་ཉིད་དེད་དཔོན་ཆེན་པོ་འཁོར་བརྒྱ་ཕྲག་དུ་མ་དང་ལྡན་པ་ཞིག་ཏུ་གྱུར་པའི་ཚེ། ཡང་དག་པར་རྫོགས་པའི་སངས་རྒྱས་ཤིང་རྟ་སྐལ་ལྡན་འཁོར་དགྲ་བཅོམ་པ་དྲུག་ཁྲི་ཉིས་སྟོང་དང་བཅས་ཏེ་ཆུ་བོ་གང་གཱའི་ཀླུང་དུ་གཤེགས་པ་ན། ཞམ་རིང་བྱས་ཏེ་འབྱོར་པ་ཆེན་པོ་དང་ལྡན་པ་གྲུ་ཟམ་ལས་བསྒྲལ་ཏེ་ཞལ་ཟས་བཟང་པོས་ཀྱང་ཚིམས་པར་བྱས་ཏེ། བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་པའི་རྒྱུ་དེས། ངས་འཁོར་བ་ན་བདེ་བ་ཆེན་པོ་མཐའ་ཡས་པ་ཉམས་སུ་མྱོང་ལ། ད་ལྟར་བླ་ན་མེད་པའི་ཡེ་ཤེས་མངོན་དུ་བརྙེས་པ་ནའང་འདི་ལྟ་བུའི་མཆོད་པ་བྱས་སོ་གསུངས། འདི་ནི་གྲུ་གཟིངས་སོགས་ལས་བདེ་བར་བསྒྲལ་བའི་ཕན་ཡོན་ཀྱང་བསྟན་ཏོ། །ཡང་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ཡུལ་ཀུ་རུའི་ལྗོངས་རྒྱུ་ཞིང་གཤེགས་ནས། མཐར་ཀུ་རུའི་གྲོང་ཁྱེར་དུ་བྱོན་ཏེ་ཀུ་རུའི་སྐྱེ་བོའི་ཚོགས་དེ་དག་ཀྱང་སངས་རྒྱས་ཀྱི་གདུལ་བར་འགྱུར་བ་སེམས་རྒྱ་ཆེན་པོ་དང་ལྡན་པ་སྦྱིན་པ་ལ་སྲེད་པ་ཤ་སྟག་གོ །དེར་བཅོམ་ལྡན་འདས་ཀྱི་འཇིག་རྟེན་པའི་ཐུགས་བསྐྱེད་པས། ལྷའི་དབང་པོ་བརྒྱ་བྱིན་འཁོར་དང་བཅས་པ་དང་། རྒྱལ་པོ་ཆེན་པོ་བཞི་དང་། ལྷ་ཀླུ་གནོད་སྦྱིན་དྲི་ཟ་གྲུལ་བུམ་གྱི་ཚོགས་མང་པོ་ལྷགས་ཏེ། ཙནྡན་ས་མཆོག་གི་ཀ་བ་ཁྱེར་འོངས་ནས། ཧ་ཧ་ཞེས་ཅ་ཅོ་དང་ག་ཞ་བཏོན་ཏེ་སྐད་ཆེན་པོ་ཕྱུང་ནས་ཙནྡན་ས་མཆོག་གི་ཁང་བཟང་བརྩིགས་ཤིང་དེར་ལྷའི་དབང་པོས་བཅོམ་ལྡན་འདས་འཁོར་དང་བཅས་པ་ལ་ལྷའི་ཞལ་ཟས་དང་། ལྷའི་གཟིམས་ཆ་དང་གདན་དང་སྤོས་དང་མེ་ཏོག་ལ་སོགས་པས་མངོན་པར་མཆོད་པར་བྱས་སོ། །དེར་ཀུ་རུའི་སྐྱེ་བོའི་ཚོགས་དེ་རྣམས་ཀྱིས་ལྷའི་འབྱོར་པ་ཆེན་པོ་མཐོང་བས་ཤིན་ཏུ་ངོ་མཚར་ནས། དབང་པོ་དང་བཅས་པའི་ལྷ་རྣམས་ཀྱིས་ཀྱང་མཆོད་ན། འདི་ནི་འཇིག་རྟེན་ན་མཆོག་ཡིན་ནོ་སྙམ་སྟེ་བཅོམ་ལྡན་འདས་ཀྱི་ཞབས་ལ་ཕྱག་བྱས་ཏེ་ཕྱོགས་གཅིག་ཏུ་འཁོད་ནས་ཁང་བཟང་དེ་ལ་ལྟ་བར་བྱེད་པ་ན་བཅོམ་ལྡན་འདས་ཀྱིས་ཁང་བཟང་དེ་ཉིད་མི་སྣང་བར་མཛད་ནས། མི་རྟག་པ་ཉིད་དང་ལྡན་པའི་འཕགས་པའི་བདེན་པ་བཞིའི་ཆོས་བསྟན་པས་ཡུལ་ཀུ་རུའི་མི་རྣམས་ཕལ་ཆེར་དགེ་སྦྱོང་གི་འབྲས་བུ་བཞི་ལ་བཀོད་ཅིང་བྱང་ཆུབ་གསུམ་དུ་སེམས་བསྐྱེད་པ་སོགས་དགེ་རྩ་དཔག་ཏུ་མེད་པ་བསྐྱེད་པར་མཛད་དོ། །དེར་དགེ་སློང་རྣམས་ཀྱང་སངས་རྒྱས་ཀྱི་མཆོད་པ་མཐོང་བས་སེམས་དགའ་བར་གྱུར་ཏེ། བཅོམ་ལྡན་འདས་ཀྱིས་དགེ་བའི་རྩ་བ་འདི་དག་གང་དུ་མཛད་ཅེས་གསོལ་བའི་ལན་དུ་བཀའ་སྩལ་པ། སྔོན་བྱང་ཆུབ་སེམས་དཔའ་རྒྱལ་པོ་རྒྱལ་རིགས་ཀྱི་སྤྱི་བོ་ནས་དབང་བསྐུར་བ་ཞིག་ཏུ་འཁྲུངས་པའི་ཚེ། ཡང་དག་པར་རྫོགས་པའི་སངས་རྒྱས་ཚངས་པ་ཞེས་བྱ་བ་འཇིག་རྟེན་གྱི་ཁམས་སུ་བྱོན་པར་གྱུར་ཏེ། སངས་རྒྱས་དེ་འཁོར་དགྲ་བཅོམ་པ་དྲུག་ཁྲི་ཉིས་སྟོང་དང་བཅས་པ་རྒྱལ་པོ་དེས་སྤྱན་དྲངས་ཏེ་ཟླ་བ་གསུམ་གྱི་བར་དུ་བསྙེན་བཀུར་ཕུལ་ཏེ་མཐར་བླ་ན་མེད་པའི་བྱང་ཆུབ་ཏུ་སྨོན་པའི་འབྲས་བུ་འཁོར་བ་ནའང་བདེ་བ་ཆེན་པོའི་མཐའ་ཡས་པ་ཉམས་སུ་མྱོང་ལ་ད་ལྟར་མངོན་པར་སངས་རྒྱས་པའི་སྐབས་ན་ཡང་འདི་ལྟ་བུའི་མཆོད་པ་བྱས་སོ་གསུངས།