དཀོན་མཆོག་མཆོད་པའི་ཕྱིར་དབྱངས་རོལ་སོགས་བགྱིས་པའི་ཕན་ཡོན་ཀྱང་བསྟན་པ།
༈ ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། མཉན་དུ་ཡོད་པ་ན་རོལ་མོ་མཁན་མཛའ་སྡེ་ལྔ་བརྒྱ་ཙམ་འཁོད་དོ། །དེའི་ཚེ་རོལ་མོ་མཁན་གྱི་རྒྱལ་པོ་རབ་དགའ་ཞེས་བྱ་བ་ཞིག་གསར་དུ་འོངས་ཏེ། དེའི་མཐུ་ནི་རྒྱུད་གཅིག་ལས་སྐད་སྣ་བདུན་དང་ཁོང་དུ་འཁྱིག་པ་སྣ་ཉི་ཤུ་རྩ་གཅིག་འབྱུང་བར་ཤེས་སོ། །དེས་གྲོང་ཁྱེར་ཆེན་པོ་དྲུག་ཡུལ་ཆེན་པོ་མ་ཡིན་པར་བསྒྲགས་ཏེ་མཉན་ཡོད་དུ་ཕྱིན་ནས། རྒྱལ་པོོ་གསལ་རྒྱལ་རོལ་མོ་ལ་ཤིན་ཏུ་མཁས་པར་གྲགས་པས་དེ་ལ་འགྲན་པར་བསྐུལ་བ་ན་གསལ་རྒྱལ་གྱིས། ངའི་མཁན་པོ་རོལ་མོ་མཁན་གྱི་རྒྱལ་པོ་བླ་ན་མེད་པ་དེ་ད་ལྟ་རྒྱལ་བྱེད་ཀྱི་ཚལ་ན་བཞུགས་ཀྱིས་ཚུར་ཤོག་དང་དེར་འདོང་ངོ་ཞེས་བྱས་ཏེ། རྒྱལ་པོ་གསལ་རྒྱལ་འཁོར་རོལ་མོ་མཁན་ལྔ་བརྒྱ་ཙམ་གྱིས་ཞབས་འབྲིང་བྱས་ནས། རོལ་མོ་མཁན་གྱི་རྒྱལ་པོ་རབ་དགའ་དང་། མི་འབུམ་ཕྲག་མང་པོ་རྒྱལ་བྱེད་ཀྱི་ཚལ་དུ་འོང་བ་ན། བཅོམ་ལྡན་འདས་ཀྱིས་དེ་གདུལ་བའི་དུས་ལ་བབ་པར་མཁྱེེན་ནས་འཇིག་རྟེན་པའི་ཐུགས་བསྐྱེད་པས། དྲི་ཟ་ཟུར་ཕུད་ལྔ་པ་འཁོར་དྲི་ཟ་བདུན་སྟོང་གིས་བསྐོར་བ་འོངས་ཏེ་ཚུལ་བཞིན་དུ་མཆོད་པ་བྱས་ནས་བཅོམ་ལྡན་འདས་ལ་གཞི་བཻཌཱུཪྱ་ལས་བྱས་པས་པི་ཝང་ཕུལ་ལོ། །དེར་རོལ་མོ་མཁན་གྱི་རྒྱལ་པོོ་རབ་དགའ་བཅོམ་ལྡན་འདས་གྱི་སྤྱན་སྔར་པི་ཝང་བླངས་ཏེ། གོང་དུ་སྨོས་པ་ལྟ་བུའི་ཚུལ་གྱིས་བྱུང་བས། རྒྱལ་པོ་ལ་སོགས་པའི་སྐྱེ་བོ་ཕལ་ཆེར་ཡ་མཚན་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཀྱང་བཻཌཱུའི་པི་ཝང་ཕྱག་ཏུ་བླངས་ནས་སྦྲེངས་པས་དེ་ལས་རྒྱུད་གཅིག་ལས་ཀྱང་སྐད་ཀྱི་ཁྱད་པར་སྣ་དུ་མ་དང་ཁོང་དུ་འཁྱིག་པའི་སྣ་གྲངས་དུ་མ་འགྱུར་བར་བསྟན་ཞིང་། དེ་དག་ལས་ཀྱང་སྟོང་པ་དང་བདག་མེད་པའི་རྣམ་པར་གྲག་ཅིང་། ལུས་འདི་ཡང་པི་ཝཾ་དང་སྐད་རྣམས་ནི་དབང་པོ་དང་། ཁོང་དུ་འཁྱིག་པ་རྣམས་ནི་སེམས་ཀྱི་ཁམས་དང་འདྲ་བར་བསྟན་ཏེ། དེ་ཐོས་པས་རོལ་མོ་མཁན་གྱི་རྒྱལ་པོ་རབ་དགའ་དད་པ་སྐྱེས་ནས་པི་ཝང་དྲི་གཙང་ཁང་དུ་ཕུལ་ཏེ་རབ་ཏུ་བྱུང་ནས་བརྩོན་པས་དགྲ་བཅོམ་པའི་གོ་འཕང་ཐོབ་བོ། །དེ་ནས་ལྷ་དང་ཀླུ་དང་གནོད་སྦྱིན་དང་ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་ཀྱང་དད་པར་གྱུར་ནས། བཅོམ་ལྡན་འདས་ཀྱི་བསྟན་པ་སྲུང་བ་དང་བསྐྱབ་པ་དང་སྦ་བར་ཁས་བླངས་སོ། །རོལ་མོ་མཁན་ལྔ་བརྒྱ་པོ་རྣམས་ཀྱིས་ཀྱང་རྒྱལ་པོ་ལ་ཞུས་ཏེ། ཡུལ་མི་འཁོར་དང་བཅས་པ་དང་བསྡོངས་ནས་མཉན་ཡོད་ཀྱི་གྲོང་ཁྱེར་འབྱོར་པ་ཆེན་པོས་བརྒྱན་ཏེ་སངས་རྒྱས་འཁོར་དང་བཅས་པ་སྤྱན་དྲངས་ཏེ་རོལ་མོའི་རིག་བྱེད་དཔག་ཏུ་མེད་པས་མཆོད་ཅིང་བསྙེན་བཀུར་བྱས་སོ། །དེའི་ཚེ་བཅོམ་ལྡན་འདས་ཀྱི་ཞལ་འཛུམ་པ་མཛད་ནས་འོད་ཟེར་རྣམས་མཛོད་སྤུར་མི་སྣང་བར་གྱུར་པ་དང་། ཀུན་དགའ་བོས་དེའི་རྒྱུ་ཞུས་པས། རོལ་མོ་མཁན་ལྔ་བརྒྱ་པོ་འདི་དག་མ་འོངས་པ་ན། རང་སངས་རྒྱས་སྐད་སྙན་ཞེས་པ་ཤ་སྟག་ཏུ་འགྱུར་བར་ལུང་བསྟན་ཏོ། །དེར་དགེ་སློང་རྣམས་ངོ་མཚར་དུ་གྱུར་ནས་སྔོན་གྱི་ཕྲིན་ལས་ཇི་ལྟ་བུ་མཛད་ཅེས་གསོལ་བས། སྔོན་བཅོམ་ལྡན་འདས་ཉིད་ཡུལ་གྱི་རྒྱལ་པོ་རྒྱལ་རིགས་ཀྱི་སྤྱི་བོ་ནས་དབང་བསྐུར་བ་ཞིག་ཏུ་འཁྲུངས་པའི་ཚེ་སངས་རྒྱས་རྟོོགས་མཛད་ཅེས་བྱ་བ་འཇིག་རྟེན་དུ་བྱོན་ནས། རྒྱལ་པོའི་སྐྱེད་མོས་ཚལ་དུ་གཤེགས་ནས་མེ་ཡི་ཁམས་ལ་སྙོམས་པར་ཞུགས་ཏེ་བཞུགས་པ། རྒྱལ་པོ་དེ་བུད་མེད་ཀྱི་སིལ་སྙན་དང་རོལ་མོའི་སྒྲ་སྒྲོགས་པ་དག་དང་བཅས་ཏེ་སྐྱེད་མོས་ཀྱི་ཚལ་དུ་ཕྱིན་པ་ན་མཇལ་ཏེ་སེམས་དགའ་བར་གྱུར་ནས་སིལ་སྙན་རྣམ་པ་སྣ་ཚོགས་པའི་སྒྲ་བསྒྲགས་ཏེ། བཅོམ་ལྡན་འདས་དེ་ཏིང་ངེ་འཛིན་ལས་བཞེངས་སུ་གསོལ་ནས། ཞལ་ཟས་བཟང་པོས་ཀྱང་མཆོད་ཅིང་བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་པའི་རྒྱུ་དེས། ད་ལྟར་ང་ལ་རོལ་མོ་མཁན་རྣམས་ཀྱིས་འདི་ལྟ་བུའི་བསྙེན་བཀུར་བྱས་སོ་གསུངས། འདིས་དཀོན་མཆོག་མཆོད་པའི་ཕྱིར་དབྱངས་རོལ་སོགས་བགྱིས་པའི་ཕན་ཡོན་ཀྱང་བསྟན་པ་ཡིན་ནོ། ། ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། མཉན་ཡོད་ན་གཞན་གྱི་ཆུང་མ་ལ་བྱི་བོ་བྱེད་པ་ཞིག་ཡོད་པ་དེ། རྒྱལ་པོའི་ཁྲིམས་ལ་ཐོགས་ནས་གཤེད་མས་གསོད་སར་ཁྲིད་པ་ན། བཅོམ་ལྡན་འདས་ཕྱོགས་དེར་གཤེགས་ཏེ། ཀུན་དགའ་བོ་རྒྱལ་པོ་ལ་གསོལ་དུ་བཏང་བས། རྒྱལ་པོས་ཀྱང་ཕུལ་ནས་མི་དེར་རབ་ཏུ་བྱུང་བས་དགྲ་བཅོམ་པའི་གོ་འཕང་ཐོབ་བོ། །དེར་དགེ་སློང་རྣམས་ངོ་མཚར་དུ་གྱུར་པ་ན། སྔོན་སངས་རྒྱས་དབང་པོའི་རྒྱལ་མཚན་ཞེས་བྱ་བ་འཇིག་རྟེན་དུ་བྱོན་ནས་རྒྱལ་པོའི་ཕོ་བྲང་གི་འཁོར་ཞིག་ཏུ་ལྗོངས་རྒྱུ་ཞིང་བྱོན་པ་ན། དེར་བཅོམ་ལྡན་འདས་ཉིད་བྲམ་ཟེ་རིག་བྱེད་དང་རིག་བྱེད་ཀྱི་ཡན་ལག་ཐམས་ཅད་མཐར་ཕྱིན་པ་ཞིག་ཏུ་གྱུར་ཏེ། དེ་སངས་རྒྱས་དབང་པོའི་ཏོག་ལ་ཚིགས་བཅད་བརྒྱས་བསྟོད་ཅིང་ཞལ་ཟས་བཟང་པོ་ཡང་གསོལ་ནས་བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་བོ། །གཞི་དེས་ཡུལ་གྱི་རྒྱལ་པོ་དང་བློན་པོ་དང་ཕོ་བྲང་གི་འཁོར་གྱི་མི་རྣམས་ཀྱང་དད་པ་སྐྱེས་སོ། །ལས་དེས་འཁོར་བ་ན་ཡང་བདེ་བ་མཐའ་ཡས་པ་ཉམས་སུ་མྱོང་ལ། ད་ལྟར་ཡང་ངས་ཅི་བསམ་པ་དང་ཅི་འདོད་པ་དེ་དག་ཐམས་ཅད་གྲུབ་པ་ཡིན་ནོ་གསུངས། ཡང་སྟོན་པ་འོད་མའི་ཚལ་ན་བཞུགས་པའི་ཚེ། རྒྱལ་པོ་གཟུགས་ཅན་སྙིང་པོ་འཁོར་འབུམ་ཕྲག་དུ་མ་དང་བཅས་པས་བདེན་པ་མཐོང་ནས། བཅོམ་ལྡན་འདས་ལ་དྲིན་གཟོ་བ་དང་། སྐྱེ་བོ་མང་པོ་དགེ་བའི་རྩ་བ་ལ་འགོད་པར་འདོད་ནས་སངས་རྒྱས་འཁོར་དང་བཅས་པ་རྒྱལ་པོའི་ཕོ་བྲང་དུ་གདུགས་ཚོད་ལ་སྤྱན་དྲངས་ཏེ། དེའི་ཚེ་མ་ག་དྷཱའི་ཕོ་བྲང་འཁོར་གྱི་མི་རྣམས་ལ་བསྒོ་བ། བཅོམ་ལྡན་འདས་གྲོང་ཁྱེར་དུ་གཤེགས་པ་ལ་མེ་ཏོག་དང་། མེ་ཏོག་གི་ཕྲེང་བ་དང་། སྤོས་དང་བྱུག་པ་རྣམས་ཀྱིས་མཆོད་པ་གྱིས་ཤིག རྒྱལ་པོའི་ཁབ་ཀྱི་གྲོང་ཁྱེར་ཐམས་ཅད་ཀྱང་རྡོ་དང་གསེག་མ་སོགས་མེད་པར་གྱིས་ཤིག མེ་ཏོག་སྣ་ཚོགས་ཀྱིས་གཏོར་ལ་རྒྱལ་མཚན་དང་བ་དན་སྒྲེངས་ཤིག འོད་མའི་ཚལ་ནས་རྒྱལ་པོའི་ཁབ་ཀྱི་བར་གྱི་ལམ་ཐམས་ཅད་ཀྱང་རས་ཀྱིས་ཁེབས་པར་གྱིས་ཤིག ཅེས་བྱས་ཏེ་བློན་པོ་རྣམས་ཀྱིས་ཀྱང་དེ་ཐམས་ཅད་བྱས་སོ། །དེར་རྒྱལ་པོ་རང་གིས་བཅོམ་ལྡན་འདས་ཀྱི་དབུའི་སྟེང་དུ་གདུགས་རྩིབས་བརྒྱ་པ་དང་། གཞན་སྟོང་གིས་དགེ་སློང་སྟོང་གི་གདུགས་ཐོགས་སོ། །དེ་ནས་བཅོམ་ལྡན་འདས་དུལ་བ་འཁོར་ཡང་དུལ་བ། ཞི་བ་ལ་འཁོར་ཡང་ཞི་བ། གྲོལ་ལ་འཁོར་ཡང་གྲོལ་བ། དབུགས་ཕྱིན་ལ་འཁོར་ཡང་དབུགས་ཕྱིན་པ། བྱང་ལ་འཁོར་ཡང་བྱང་བ། དགྲ་བཅོམ་པར་གྱུར་ལ་འཁོར་ཡང་དགྲ་བཅོམ་པར་གྱུར་པ། འདོད་ཆགས་དང་བྲལ་ལ་འཁོར་ཡང་འདོད་ཆགས་དང་བྲལ་བ། མཛེས་ལ་འཁོར་ཡང་མཛེས་པ་སྟེ། ཁྱུ་མཆོག་བ་གླང་གི་ཚོགས་ཀྱིས་བསྐོར་བའམ། འཁོར་ལོས་སྒྱུར་རྒྱལ་རྒྱལ་བུ་སྟོང་གི་ཚོགས་ཀྱིས་སམ། ཚངས་པ་ཚངས་རིས་ཀྱི་ལྷས་བསྐོར་བ་བཞིན་དུ་ཤིན་ཏུ་མཛེས་པར་ལྷམ་མེ་ལྷང་ངེ། གླང་ཆེན་གྱི་རྒྱལ་པོ་རྒྱགས་པ་མེད་པ་ལྟ་བུར་དབང་པོ་ཤིན་ཏུ་དྭངས་པ་དང་སྤྱོད་ལམ་གྱི་ཚུལ་མ་འཆལ་བར། སངས་རྒྱས་ཀྱི་ཆོས་མ་འདྲེས་པ་དུ་མས་བརྒྱན་པའི་བཅོམ་ལྡན་འདས་གྲོང་ཁྱེར་དེར་གཤེགས་ཏེ་ཞབས་སྒོའི་ཐེམ་པ་ལ་བཞག་པའི་མོད་ལ་ས་ཆེན་པོ་རྣམ་པ་དྲུག་ཏུ་གཡོས་ཤིང་སྒོ་དོག་པ་རྣམས་ཡངས་པར་གྱུར་པ་དང་ས་རྣམས་མཐོ་དམན་མཉམ་ཞིང་། གླང་པོ་ཆེ་དང་རྟ་དང་ཁྱུ་མཆོག་རྣམས་ཀྱང་སྐད་འབྱིན། རོལ་མོའི་ཆ་བྱད་ཐམས་ཅད་ཀྱང་མ་བསྐུལ་བར་རང་གིས་སྒྲ་འབྱིན། ལོང་བས་མིག་ཐོབ། འོན་པས་སྒྲ་ཐོས། ལྐུགས་པས་སྨྲ་ཤེས། དབང་པོ་མ་ཚང་བ་རྣམས་ཀྱང་དབང་པོ་ཚང་། ཆང་དང་དུག་གིས་མྱོས་པ་རྣམས་ཀྱང་ཞི། ཕན་ཚུན་འཁོན་པ་རྣམས་འདུམ། སྦྲུམ་མ་རྣམས་ཀྱང་བདེ་བར་བཙས། བཙོན་དུ་བཅིངས་པ་རྣམས་ནི་ཐར། ནོར་མེད་པ་རྣམས་ནི་ནོར་རྙེད། བར་སྣང་ནས་ལྷ་རྣམས་ཀྱིས་ཀྱང་མེ་ཏོག་གི་ཆར་འབེབ་པ་དང་བཅས་དེ་ལྟ་བུའི་འབྱོར་པས་རྒྱལ་པོའི་ཕོ་བྲང་དུ་གཤེགས་ཏེ་རྒྱལ་པོ་རང་ཉིད་ཀྱིས་ལག་དར་ཏེ་ཕྱི་རོལ་གྱི་སྒོ་ཁང་དུ་ཙནྡན་ས་མཆོག་གི་ཆུས་སངས་རྒྱས་འཁོར་དང་བཅས་པའི་ཞབས་བཀྲུས་ཤིང་། ནང་དུ་བྱོན་ནས་གདན་ལ་བཞུགས་པ་དང་རོ་བརྒྱ་དང་ལྡན་པའི་ཞལ་ཟས་དྲངས་ཤིང་། ཀ་ཤི་ཀའི་ན་བཟའ་ཡང་ཕུལ་ལོ། །རྒྱུ་དེས་མ་ག་དྷཱའི་ཕོ་བྲང་གི་འཁོར་གྱི་མི་རྣམས་ཀྱང་དད་པར་གྱུར་ཏོ། །དེའི་ཚེ་དགེ་སློང་རྣམས་ངོ་མཚར་དུ་གྱུར་ནས་དེའི་རྒྱུ་ཞུས་པ་ན། སྔོན་བཅོམ་ལྡན་འདས་ཉིད་རྒྱལ་རིགས་ཀྱི་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ཞིག་ཏུ་འཁྲུངས་པའི་ཚེ། སངས་རྒྱས་བཅོམ་ལྡན་འདས་བདེ་མཛད་ཅེས་བྱ་བ་འཇིག་རྟེན་དུ་བྱོན་ཏེ། རྒྱལ་པོ་དེས་སངས་རྒྱས་དེ་འཁོར་དང་བཅས་པ་རྒྱལ་པོའི་ཕོ་བྲང་དུ་སྤྱན་དྲངས་ནས་ཞལ་ཟས་རོ་བརྒྱ་པ་དང་འབུམ་རི་བའི་ན་བཟའ་ཡང་ཕུལ་ཞིང་། སངས་རྒྱས་དེ་མྱ་ངན་ལས་འདས་པའི་མཆོད་རྟེན་ཡང་ཁོ་ར་ཁོར་ཡུག་ཏུ་དཔག་ཚད་གཅིག་འཕང་དུ་རྒྱང་གྲགས་གཅིག་ཡོད་པ་བརྩིགས་སོ། །རྒྱུ་དེས་ངས་འཁོར་བ་ན་ཡང་བདེ་བ་ཚད་མེད་པ་ཉམས་སུ་མྱོང་ཞིང་། ད་ལྟར་སངས་རྒྱས་པ་ནའང་རྒྱལ་པོ་གཟུགས་ཅན་སྙིང་པོས་འདི་ལྟ་བུའི་མཆོད་པ་བྱས་སོ་གསུངས།