དེ་བས་ན་ཉེས་པ་དེ་ལྟར་མི་འོང་བར་བྱ་བའི་ཕྱིར་སེར་སྣ་སྤང་བ་ལ་བརྩོན་པ།

༈ ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། མོའུ་འགལ་གྱི་བུ་ཤིང་དྲུང་ཞིག་ཏུ་བཞུགས་པ་ན་ཡི་དྭགས་མོ་ཞིག་གིས་བདག་བཀྲེས་སོ་སྐོམ་མོ་ཞེས་ཉམ་ཐག་གི་སྐད་འབྱིན་པ་གསན་ནས་དེར་གཟིགས་པ་ན། སྨོས་མ་ཐག་པ་ལྟ་བུའི་ཡི་དྭགས་མོ་ཞིག་གཟིགས་ནས། གཏམ་དྲིས་པ་ན། དེས་བཅོམ་ལྡན་འདས་ལ་ཞུས་ཤིག་དེ་ནས་མོའུ་འགལ་ཆེན་པོ་བཅོམ་ལྡན་འདས་ཀྱི་སྤྱན་སྔར་ལྷགས་ཏེ་སྔ་མའི་ཚུལ་གྱིས་དོན་དེ་གསོལ་པ་ན། བཅོམ་ལྡན་འདས་ཀྱིས་སྔོན་སངས་རྒྱས་འོད་སྲུང་འཇིག་རྟེན་དུ་བྱོན་པའི་ཚེ། ཝཱ་རཱ་ཎ་སཱིའི་ཁྱིམ་བདག་གཅིག་གི་ཆུང་མ་སེར་སྣ་ཅན་འཇུངས་པ་ཡོ་བྱད་རྣམས་ཀུན་ཏུ་འཛིན་པ། ཁྭ་ལའང་གཏོར་མ་མི་སྟེར་ན་གཞན་དག་ལ་ལྟ་ཅི་སྨོས་ཏེ། དགེ་སྦྱོང་དང་བྲམ་ཟེ་དང་སྡུག་ཅིང་ཕོངས་པ་དང་། བཀྲེས་པ་དག་མཐོང་ན་སེམས་ཀྱིས་སྡང་བར་བྱེད་དོ། །རེ་ཞིག་ན་དགེ་སློང་བསོད་སྙོམས་པ་ཞིག་ཁྱིམ་དུ་འོངས་པ་ན། ཕྱིས་ཀྱང་འོང་གིས་དོགས་ནས་དེ་ནང་དུ་བོས་ཏེ་སྒོ་བཅད་ནས་སྨྱུང་དུ་བཅུག་གོ །དེ་ལ་མང་དུ་སྤྱོས་ཏེ། དགེ་སློང་ཁྱོད་ལ་བཀུར་སྟི་མ་ཡིན་པ་བྱས་པ་འདི་ཡིན་གྱིས། ཕྱིན་ཆད་ཁྱིམ་འདིར་མ་འོངས་ཤིག་ཅེས་བྱས་སོ། །དེ་ནས་དེ་སེར་སྣ་ཀུན་ཏུ་བརྟེན་ཅིང་བསྒོམས་ཏེ་མང་དུ་བྱས་པ་དེ་ཡི་དྭགས་སུ་སྐྱེས་སྟེ། དེ་ལྟ་བུའི་སྡུག་བསྔལ་ཉམས་སུ་མྱོང་ངོ་། །དེ་བས་ན་ཉེས་པ་དེ་ལྟར་མི་འོང་བར་བྱ་བའི་ཕྱིར་སེར་སྣ་སྤང་བ་ལ་བརྩོན་པར་བྱའོ་གསུངས། །ཡང་སྟོན་པ་རྒྱལ་པོའི་ཁབ་འོད་མའི་ཚལ་ན་བཞུགས་པའི་ཚེ། འཕགས་པ་མོའུ་འགལ་གྱི་བུ་ཆེན་པོ་ཡི་དྭགས་ཀྱི་ནང་དུ་བྱོན་པ་ན། དེར་ཡི་དྭགས་མོ་སྔར་སྨོས་པ་ལྟ་བུ་ལ་དེས་མཐོང་བ་ཙམ་གྱིས་ཆུ་ཀླུང་ད ང་ཁྲོན་པ་རྣམས་སྐམ་པར་འགྱུར་བ་དང་གང་གི་ཚེ་ཆར་འབབས་པ་དེའི་ཚེ་དེའི་སྟེང་དུ་མེ་སྟག་འཕྲོ་བའི་མདག་མེའི་ཆར་འབབས་པ་ཞིག་མཐོང་ནས་སྔ་མའི་ཚུལ་གྱིས་བཅོམ་ལྡན་འདས་ལ་གསོལ་པས་བཀའ་སྩལ་པ། སྔོན་སངས་རྒྱས་འོད་སྲུང་གི་དུས་སུ་དགེ་སློང་ཞིག་ལམ་དུ་ཞུགས་པ་དེ་སྐོམ་གྱིས་གདུངས་ཏེ། ཁྲོན་པའི་དྲུང་དུ་སོང་བ་ན་བུ་མོ་ཞིག་བུམ་པ་ཆུས་བཀང་སྟེ་འདུག་པ་ལ། དགེ་སློང་དེས་ཆུ་བསླངས་པས། བུ་མོ་དེ་སེར་སྣ་སྐྱེས་ཏེ། དགེ་སློང་བདག་གི་བུམ་པ་འགྲིབ་ཏུ་འོང་གིས་གལ་ཏེ་ཁྱོད་ཤི་ནའང་ཆུ་མི་སྦྱིན་ནོ་ཞེས་སྨྲས་པས། དགེ་སློང་དེ་སྐོམ་གྱིས་གདུང་བཞིན་དུ་རེ་ཐག་ཆད་ནས་སོང་ངོ་། །དེ་ནས་བུ་མོ་དེས་སེར་སྣ་ཀུན་ཏུ་བརྟེེན་ཅིང་བསྒོམས་ཏེ། མང་དུ་བྱས་པ་དེ་ལྟ་བུས་ཤི་ནས་ཡི་དྭགས་སུ་སྐྱེས་ཏེ། དེ་ལྟ་བུའི་སྡུག་བསྔལ་མི་བཟད་པ་མྱོང་ཞིང་འདུག་གོ་གསུངས་སོ། །ཡང་བཅོམ་ལྡན་འདས་འོད་མའི་ཚལ་ན་བཞུགས་པའི་ཚེ། ཚེ་དང་ལྡན་པ་མོའུ་འགལ་གྱི་བུ་སྔ་དྲོའི་དུས་སུ་རྒྱལ་པོའི་ཁབ་ཏུ་བསོད་སྙོམས་ལ་བྱོན་ནས་ཕྱི་དྲོ་བྱ་རྒོད་ཕུང་པོའི་རི་བོ་ལ་འཛེགས་ཏེ་ཤིང་དྲུང་ཞིག་ན་བཞུགས་པའི་ཚེ། ཡི་དྭགས་མོ་སྔར་སྨོས་པ་ལྟ་བུ་ལ། ལུས་ལ་ཕྱི་སའི་དྲི་བྲོ་ཞིང་ཟས་སུ་ཕྱི་ས་ཟ་ལ་དེ་ཡང་བདེ་བླག་ཏུ་མི་རྙེད་པ་ཞིག་གཟིགས་ནས་དོན་དེ་བཅོམ་ལྡན་འདས་ལ་གསོལ་པ་ན། སྔོན་ཝཱ་རཱ་ཎ་སཱི་ན་རང་སངས་རྒྱས་ཞིག་བཞུགས་པ་དེ་གྲོང་དུ་བསོད་སྙོམས་ལ་གཤེགས་པའི་ཚེ། ཡུལ་དེའི་ཚོང་དཔོན་ཞིག་ལ་བསོད་སྙོམས་བསླངས་པས། དེས་རང་གི་མནའ་མ་ལ་འཕགས་པ་ལ་ཁ་ཟས་མཐུན་པ་ཕུལ་ཅིག་ཅེས་བྱས་པས། མནའ་མ་དེ་སེར་སྣ་སྐྱེས་ནས་སླད་མི་འོང་བའི་ཕྱིར་ལྷུང་བཟེད་བླངས་ནས་ཕྱོགས་གཅིག་{ཅིག}ཏུ་སོང་སྟེ་དེ་ཕྱི་སས་བཀང་ཞིང་སྟེང་དུ་འབྲས་ཆེན་གྱིས་བཀང་སྟེ་རང་སངས་རྒྱས་ལ་ཕུལ་ལོ། །རྒྱུ་དེས་ཚོང་དཔོན་གྱིས་མནའ་མ་དེ་དེ་ཕྱིན་ཆད་རྟག་ཏུ་སེམས་ཅན་དམྱལ་བ་དང་། དུད་འགྲོ་དང་། ཡི་དྭགས་རྣམས་སུ་སྐྱེས་ཏེ་རྟག་ཏུ་ཕྱི་ས་ཟ་བར་གྱུར་ཏོ། །དེ་བས་ན་སེར་སྣ་སྤང་བ་ལ་བརྩོན་པར་བྱ་སྟེ། ཉེས་པ་དེ་ལྟ་བུ་དག་འོང་བར་མི་འགྱུར་བ་ལ་བསླབ་པར་བྱའོ་ཞེས་བཀའ་སྩལ་ཏོ། །ཡང་སྟོན་པ་འོད་མའི་ཚལ་ན་བཞུགས་པའི་ཚེ། རྒྱལ་པོའི་ཁབ་ཀྱི་ཕ་རོལ་འོད་མའི་ཚལ་གྱི་ཚུར་རོལ་ན། སྔར་སྨོས་པ་ལྟ་བུའི་ཡི་དྭགས་མོ་ཤིན་ཏུ་མི་སྡུག་ཅིང་སྡུག་བསྔལ་ལ་ཉམ་ཐག་པའི་སྐད་འབྱིན་པ་ལྔ་བརྒྱ་ཙམ་ཁྭ་ཁྱུས་ལྡིང་བ་བཞིན་དུ་ནམ་མཁའ་ལ་འཁོར་ཏེ། གང་དུ་ཡང་འདུག་ས་མི་རྙེད་པ་འཕགས་པ་མོའུ་འགལ་བུས་གཟིགས་ནས། དེ་དག་འཕགས་པའི་དྲུང་དུ་འོངས་ཏེ་ཚིག་མཐུན་པར། བཙུན་པ་མོའུ་འགལ་གྱི་བུ་བདག་ཅག་ནི་རྒྱལ་པོའི་ཁབ་ཏུ་ཚོང་དཔོན་ལྔ་བརྒྱར་གྱུར་ཏེ། བདག་ཅག་སེར་སྣ་ཅན་འཇུངས་པ་ཡོ་བྱད་རྣམས་ལ་ཀུན་ཏུ་འཛིན་པར་གྱུར་ནས། བདག་ཉིད་ཀྱིས་ཀྱང་སྦྱིན་པ་མ་བྱིན་ལ་གཞན་དག་སྦྱིན་པ་བྱེད་པ་ལ་ཡང་གེགས་བྱས་སོ། །སྦྱིན་པའི་གནས་རྣམས་ལ་ཡང་ཡི་དྭགས་ཀྱི་ཚིག་ལྟ་བུས་མང་དུ་སྤྱོས་ཏེ་ཁྱེད་ནི་ཡི་དྭགས་སུ་སྐྱེས་པ་བཞིན་དུ་གཞན་གྱི་ཁྱིམ་ཕྱི་ཉུག་པའོ། །ཞེས་བྱས་སོ། །དེས་ན་བདག་ཅག་ཤི་བའི་འོག་ཏུ་འདི་ལྟ་བུའི་ཡི་དྭགས་སུ་སྐྱེས་སོ། །བཙུན་པ་མོའུ་འགལ་གྱི་བུ་ཆེན་པོ་དེ་བས་ན་བདག་ཅག་གི་ཉེ་དུ་རྒྱལ་པོའི་ཁབ་ན་གནས་པ་དེ་དག་ལ་བདག་ཅག་གི་ལས་ཀྱི་རྣམ་པ་ཤེས་པར་མཛོད་ལ་དད་པ་དྲིས་ཏེ། སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བཤོས་གསོལ་ནས། བདག་ཅག་གི་སླད་དུ་ཡོན་བསྔོ་བར་ཞུས་ཤིག དེས་བདག་ཅག་ཡི་དྭགས་ཀྱི་སྐྱེ་གནས་ནས་ཐར་ཀྱང་སྲིད་དོ་ཞེས་གསུངས་ཤིག་ཅེས་སྨྲས་སོ། །དེ་ནས་ཚེ་དང་ལྡན་པ་མོའུ་འགལ་གྱི་བུས་དེ་དག་གི་ཉེ་དུ་རྣམས་ལ་གཏམ་སྨྲས་ཏེ། ཕྱི་ཉིན་དེར་སངས་རྒྱས་འཁོར་དང་བཅས་པ་སྤྱན་འདྲེན་པར་བྱས་ནས། ཡི་དྭགས་དེ་རྣམས་ལ། སང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་བཤོས་ལ་སྤྱན་དྲངས་ཀྱིས་ཁྱེད་ཀྱང་དེར་ཤོག་ཅིག་བྱས་སོ། །དེ་དག་གི་ཉེ་དུ་རྣམས་ལའང་། ཁྱེད་ཀྱང་ཤོག་དང་ཉེ་དུའི་མཆོད་སྟོན་བྱེད་པ་དེར་ཡི་དྭགས་དེ་རྣམས་ཀྱང་མཐོང་བར་འགྱུར་རོ་ཞེས་བྱས་སོ། །དེ་ནས་ཚེ་དང་ལྡན་པ་མོའུ་འགལ་གྱི་བུ་ཉིད་མཆོད་སྟོན་གྱི་ཞལ་ཏ་བྱེད་པ་ལ་ཞུགས་ནས་ནངས་པར་གྱི་གདུགས་ཚོད་ལ་བབ་པ་ན་ཡི་དྭགས་དེ་རྣམས་མི་སྣང་ནས་མཐར་མངོན་ཤེས་ཀྱི་རྩལ་ཅི་ཡོད་ཀྱིས་བལྟས་ཀྱང་མ་མཐོང་ངོ་། །དེ་བཅོམ་ལྡན་འདས་ལ་གསོལ་པ་ན་བཀའ་སྩལ་པ་ཁྱོད་མི་དགར་མ་བྱེད་ཅིག ཉན་ཐོས་དང་རང་སངས་རྒྱས་ཐམས་ཅད་ཀྱི་ས་ལས་འདས་པའི་འཇིག་རྟེན་གྱི་ཁམས་ཚད་མེད་པ་དག་ཡོད་དེ་དེ་དག་ཏུ་ལས་རླུང་གིས་འཕངས་མོད་ཀྱིས། འོན་ཀྱང་དེ་བཞིན་གཤེགས་པའི་སྟོབས་ལ་ལྟོས་ཤིག ཐམས་ཅད་མཁྱེན་པའི་ཡེ་ཤེས་གཟིགས་པ་མངོན་པར་བྱའོ། །དེ་བཞིན་གཤེགས་པའི་རྫུ་འཕྲུལ་གྱིས་རྣམ་པར་འཕྲུལ་བ་ཡང་བསྟན་གྱིས་གཎྜི་རྡུངས་ཤིག དེ་ནས་གཎྜི་བརྡུངས་པ་དང་དགེ་སློང་གི་དགེ་འདུན་ཐམས་ཅད་ཀྱང་འདུས། ཡི་དྭགས་ཀྱི་ཉེ་དུ་རྣམས་དང་ཡི་དྭགས་མཐོང་བར་འདོད་པའི་སེམས་ཅན་གཞན་དག་ཀྱང་ལྟད་མོ་ལ་ལྷགས་ཏེ་འདུས་སོ། །དེ་ནས་བཅོམ་ལྡན་འདས་ཀྱིས་ཅི་ནས་ཡི་དྭགས་རྣམས་ཀྱིས་སངས་རྒྱས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་བཤོས་གསོལ་བ་མཐོང་བར་འགྱུར་བ་དང་བདག་ཅག་གི་ཕྱིར་ཉེ་དུ་རྣམས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་བཤོས་གསོལ་ཞིང་འཁོད་དེ་སྙམ་དུ་དྲན་པ་རྙེད་པར་འགྱུར་བ་དེ་ལྟ་བུའི་རྫུ་འཕྲུལ་བསྟན་ཏོ། །དེ་ནས་ཡོན་གྱི་རབས་གསུངས་པ། སྦྱིན་པ་འདི་ཡི་བསོད་ནམས་གང་། །དེ་ནི་ཡི་དྭགས་ཕྱི་བཞིན་སོང་། །ཡི་དྭགས་འཇིག་རྟེན་རབ་འཇིགས་ལས། །དེ་དག་མྱུར་དུ་ཐར་གྱུར་ཅིག ། ཅེས་བསྔོ་བར་མཛད་ཅིང་། གཞི་དེ་ལ་བརྟེན་ནས་དེ་དང་མཐུན་པའི་ཆོས་བསྟན་པས། སྲོག་ཆགས་འབུམ་ཕྲག་དུ་མ་སེར་སྣའི་དྲི་མ་སྤངས་ཏེ་བདེན་པ་མཐོང་བར་གྱུར་ཏོ། །ཡི་དྭགས་དེ་རྣམས་བཅོམ་ལྡན་འདས་ལ་སེམས་དགའ་བར་གྱུར་ཏེ་ཤི་འཕོས་ནས་སུམ་ཅུ་རྩ་གསུམ་གྱི་ལྷའི་ཡུལ་དུ་སྐྱེས་ཏེ་གནས་གསུམ་ལ་བརྟགས་ནས་ཞག་མ་ལོན་པར་བཅོམ་ལྡན་འདས་ཀྱི་སྤྱན་སྔར་འོངས་ཏེ་ཆོས་མཉན་ནས་བདེན་པ་མཐོང་སྟེ་ཕྱིར་ལྷ་ཡུལ་དུ་སོང་ངོ་། །དེར་བཅོམ་ལྡན་འདས་ཀྱིས་ཚེ་དང་ལྡན་པ་མོའུ་འགལ་གྱི་བུ་ལ་བཀའ་སྩལ་པ། ཁྱོད་ཀྱི་ཡི་དྭགས་མང་པོ་དག་ལྷའི་ནང་དུ་བཀོད་ནས། དེ་དག་ཀྱང་མདང་སུམ་ངའི་ཐད་དུ་འོངས་ཏེ། དེ་དག་ལ་ངས་ཆོས་བསྟན་ནས་དེ་དག་གིས་རྙེད་པར་བྱ་བ་རྙེད་དེ་མཐོང་བར་འགྱུར་བ་རྙེད་ནས་དོང་བ་དེ་ནི། ཁྱོད་ཀྱིས་ཞལ་ཏ་བྱས་པ་འབྲས་བུ་ཡོད་པར་གྱུར་ཏེ་ལེགས་སོ་ལེགས་སོ། །དེ་ནས་དེ་མོའུ་འགལ་ཆེན་པོས་ཉེ་དུ་ རྣམས་ལ་གོ་བར་བྱས་པས་མཆོག་ཏུ་ཡ་མཚན་དུ་གྱུར་ཏེ་བཅོམ་ལྡན་འདས་ལ་བཀུར་སྟི་བྱས་སོ། །ཡང་སྟོན་པ་འོད་མའི་ཚལ་ན་བཞུགས་པའི་ཚེ། རྒྱལ་པོའི་ཁབ་ཀྱི་གྲོང་ཁྱེར་ན་ཚོང་དཔོན་ཕྱུག་ཅིང་ནོར་མང་བ་རྣམ་ཐོས་བུའི་ནོར་དང་འགྲན་པ་ཞིག་གིས་ཆུང་མ་ལ། རྒྱུ་སྐར་ཆུ་སྨད་ལ་བབ་པའི་རེས་ཤིག་ན་ཁྱེའུ་ཞིག་བཙས་པ་ལ་མིང་ཆུ་སྨད་ཅེས་བཏགས་སོ། །དེ་ཆེར་སྐྱེས་ནས་ཕ་ཤི་བའི་འོག་ཏུ་ཁྱིམ་གྱི་བདག་པོར་གྱུར་ནས་ཉོ་འཚོང་གིས་འཚོ་བར་བྱེད་ཅིང་། ཉིན་རེ་བཞིན་སངས་རྒྱས་ཀྱི་སྤྱན་སྔར་འགྲོ་ཞིང་ཆོས་ཉན་པས་དད་པར་གྱུར་ཏེ། རབ་ཏུ་བྱུང་བར་འདོད་པ་ན། མ་དེས་བདག་མ་ཤིའི་བར་དུ་རབ་ཏུ་མ་བྱུང་ཞིག དེའི་འོག་ཏུ་ཅི་དགའ་བར་བྱོས་ཤིག དེ་ནས་དེས་ཀྱང་མ་ཡི་ངག་ཉན་ཏེ་ཅི་སྙེད་པ་ཐམས་ཅད་མ་ལ་བྱིན་ཏེ། ཡུམ་འདིས་དགེ་སྦྱོང་དང་བྲམ་ཟེ་དང་སྡུག་ཅིང་ཕོངས་པ་དང་བཀྲེན་པ་རྣམས་ལ་སྦྱིན་པ་དག་གྱིས་ཤིག་ཅེས་བྱས་སོ། །དེའི་མ་དེ་ནི་བརྐམ་ཆགས་ཅན་འཇུངས་པ་ཡོ་བྱད་རྣམས་ཀུན་ཏུ་འཛིན་པ་ཞིག་སྟེ་ཀཱཪྵ་པ་ཎ་དེ་དག་སྦས་ཏེ། དགེ་སློང་དང་བྲམ་ཟེ་གང་དག་ཟས་འདོད་དེ་ཁྱིམ་དེར་འོངས་པ་དེ་དག་ལ་ཁྱེད་ནི་ཡི་དྭགས་སུ་སྐྱེས་པ་བཞིན་དུ་ཁྱིམ་ཕྱི་ཉུག་ཅིང་སློང་ངོ་ཞེས་ཟེར་རོ། །བུ་དེ་ལ་ཡང་སླུ་བར་བྱེད་དེ། བདག་གིས་ཉིན་གཅིག་བཞིན་དུ་དགེ་སློང་འདི་སྙེད་ཅིག་ལ་ཟན་བྱིན་ནོ་ཞེསཟེར་རོ། །ཕྱིས་རེ་ཞིག་ན་ཤི་སྟེ་ཡི་དྭགས་སུ་སྐྱེས་ཤིང་བུ་ཆུ་སྨད་ནི་མ་དང་བྲལ་བའི་མྱ་ངན་གྱིས་ནོན་ཏེ་སྦྱིན་པ་དག་བྱིན་བསོད་ནམས་དག་བྱས་ནས་ཁྱིམ་གྱི་འཁོར་བཏང་སྟེ་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་བརྩོན་པས་རིམ་གྱིས་དགྲ་བཅོམ་པའི་གོ་འཕང་ཐོབ་བོ། །དེ་ནས་དེ་ཕྱིས་ཞིག་ན་ཆུ་ཀླུང་གང་གའི་འགྲམ་དུ་ལོ་མའི་སྤྱིལ་པོ་བྱས་ཏེ་གནས་པ་ན། དེའི་མ་ཡི་དྭགས་སུ་སྐྱེས་པ་དེ་འོངས་ནས་སྨྲས་པ། བུ་གཅིག་གང་ལས་བཙས་པ་ཡི། །བྱམས་པའི་མ་ནི་བདག་ཡིན་ཏེ། །ཟས་དང་སྐོམ་དང་བྲལ་བ་ཡི། །ཡི་དྭགས་རྣམས་ཀྱི་ནང་དུ་སྐྱེས། །བདག་ནི་ཤི་བའི་དུས་འདས་ནས། །ལོ་གྲངས་ཉི་ཤུ་ལྔ་ལོན་ཏེ། །ཆུ་ཡི་བག་ཀྱང་མ་མཐོང་ན། །ཁ་ཟས་ལྟ་ཞིག་ག་ལ་མཐོང་། །འབྲས་བུར་ལྡན་པའི་ཤིང་རྣམས་ནི། །དྲུང་སོང་དེ་དག་འབྲས་མེད་འགྱུར། །གང་བའི་མཚོ་འགྲམ་བདག་སོང་ཡང་། །དེ་དག་ཀྱང་ནི་སྐམ་པར་འགྱུར། །བཙུན་པའི་ཤིང་དྲུང་བདེ་བ་ལགས། །ཁྱོད་ཀྱི་སྣོད་ནང་ཆུ་ཡང་བསིལ། །བཀྲེན་པ་དག་ལ་ཐུགས་རྗེ་སྐྱེད། །སྐོམ་གྱིས་གདུངས་ཀྱིས་ཆབ་སྩོལ་ཅིག ། དེ་ནས་ཆུ་སྨད་ཀྱིས་མ་ལ་སྨྲས་པ། ཡུམ་ཁྱོད་མིར་གྱུར་པའི་ཚེ་བདག་གི་སྦྱིན་པ་དག་སྦྱིན་ཞིང་བསོད་ནམས་དག་བྱེད་དུ་མ་བཅུག་གམ། ཡི་དྭགས་མོས་སྨྲས་པ། བུ་གཅིག་བདག་ནི་སེར་སྣས་ནོན་པས་སྦྱིན་པ་དག་ཀྱང་མ་བྱིན་བསོད་ནམས་དག་ཀྱང་མ་བྱས་སྟེ་ནོར་རྙེད་པ་དེ་དག་སྡིག་པའི་སེམས་ཀྱིས་དོང་དུ་སྦས་སོ། །བུ་གཅིག་དེ་བས་ན་བདག་གི་ཕྱིར་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བཤོས་གསོལ་ནས་ཡོན་གྱི་རབ་འདོན་པར་གསོལ་ཅིག དེས་བདག་ཡི་དྭགས་ཀྱི་སྐྱེ་གནས་ནས་ཐར་པ་ཡང་སྲིད་དོ། །ཆུ་སྨད་ཀྱིས་དེ་ལྟར་བགྱི་ཡིས་ཁྱོད་ཀྱང་གྲལ་དཔོན་གྱི་མདུན་དུ་འདུག་ཅིག ཡི་དྭགས་མོས། བདག་ནི་གཅེར་བུར་འདུག་པས་ངོ་ཚ་སྟེ་མི་ནུས་སོ། །ཆུ་སྨད་ཀྱིས། ཡུམ་ཁྱོད་སྡིག་པ་བྱེད་པའི་ཚེ་ངོ་མི་ཚ་ན། ད་ལྟ་འབྲས་བུ་མྱོང་བའི་ཚེ་ཅིའི་ཕྱིར་ངོ་ཚ། ཡི་དྭགས་མོས་འོ་ན་དེ་བཞིན་དུ་འོང་བར་བྱའོ། །དེ་ནས་ཆུ་སྨད་ཀྱིས་ཉེ་དུ་རྣམས་ལ་བསྐུལ་ནས། དེའི་ཕྱི་ཉིན་དུ་སངས་རྒྱས་འཁོར་དང་བཅས་པ་བཤོས་ལ་སྤྱན་དྲངས་ནས། གདུགས་ཚོད་ལ་བབ་པ་ན་སངས་རྒྱས་ལ་སོགས་པ་དགེ་སློང་གི་དགེ་འདུན་དག་ཀྱང་འདུས། ཡི་དྭགས་མོ་ཡང་གྲལ་དཔོན་གྱི་མདུན་དུ་འདུག་སྟེ། སྲོག་ཆགས་འབུམ་ཕྲག་དུ་མ་འདུས་པ་རྣམས་ཀྱིས་ཡི་དྭགས་མོ་དེ་མཐོང་ངོ་། །དེ་དག་གིས་དེའི་ལུས་མི་སྡུག་པ་མཐོང་ནས་ཤིན་ཏུ་སྐྱོ་བ་སྐྱེས་ཏེ་སངས་རྒྱས་ལ་སེམས་དགའ་བར་གྱུར་ཏོ། །དེ་ནས་ཚེ་དང་ལྡན་པ་ཆུ་སྨད་ཀྱིས་སངས་རྒྱས་འཁོར་དང་བཅས་པ་ཞལ་ཟས་བཟང་པོས་ཚིམས་པར་བྱས་ནས་ཡི་དྭགས་མོའི་ཆེད་དུ་ཡོན་བསྔོ་བར་གསོལ་པ་བཏབ་པས། བཅོམ་ལྡན་འདས་ཀྱིས་ཀྱང་གོང་དུ་བསྟན་པའི་ཚིགས་བཞི་པོ་དེ་གསུངས་ནས་ཡོན་བསྔོ་བར་མཛད་ཅིང་། གཞི་དེ་ལ་བརྟེན་ནས་མཐུན་པའི་ཆོས་བསྟན་པས་སྲོག་ཆགས་འབུམ་ཕྲག་དུ་མས་ཐོས་ནས་བདེན་པ་མཐོང་བར་གྱུར་ཏོ། །ཡི་དྭགས་མོ་དེ་ཡང་སེམས་དགའ་བར་གྱུར་ཏེ་ཤི་ནས་ཡི་དྭགས་རྫུ་འཕྲུལ་ཆེན་མོར་སྐྱེས་སོ། །དེར་ཆུ་སྨད་ཀྱིས་སྨྲས་པ། ཡུམ་ད་ནི་མཐུ་ཡོད་ཀྱིས་སྦྱིན་པ་ཡོངས་སུ་གཏོང་བར་གྱིས་ཤིག དེར་སྨྲས་པ། བུ་གཅིག་བདག་ནི་སྦྱིན་པ་ལ་དགའ་བ་མེད་དེ་མི་ནུས་སོ། །དེར་ཆུ་སྨད་ཀྱིས། ཆགས་པའི་མུན་པས་མིག་ནི་རབ་བསྒྲིབས་ཏེ། །ཁྱོད་ཀྱིས་ཡི་དྭགས་འཇིག་རྟེན་བསྒྲུབས་པ་ཡི། །ཁྱོད་ཀྱིས་རུས་བུ་ཆེན་པོ་ཤ་མེད་པ། །རུས་པ་པགས་པ་སྐྱི་རྣམས་ད་དུང་འདུག ། ཅེས་སྤྱོས་ཏེ་ལན་མང་དུ་སྨྲས་པས། དེའི་འོག་ཏུ་དེ་ལས་རས་ཟུང་ཅིག་ཐོབ་བོ། །དེ་ཆུ་སྨད་ཀྱིས་དགེ་འདུན་ལ་ཕུལ་ཞིང་། དེ་ལས་དགེ་སློང་ཞིག་གིས་ཉོས་ནས་གོས་ཀྱི་གདང་ལ་བཞག་པ་ན། ཡི་དྭགས་མོ་དེ་མཚན་མོ་འོངས་ནས་ཕྱིར་བརྐུས་སོ། །དེ་ནས་དགེ་སློང་དེས་ཆུ་སྨད་ལ་བསྙད་ནས་ཆུ་སྨད་ཀྱིས་ཡི་དྭགས་མོ་ལ་སྤྱོས་ནས་ཕྱིར་བཀུག་སྟེ་བྱིན་ནོ། །དེ་བཞིན་དུ་ལན་གསུམ་གྱི་བར་དུ་ཕྱིར་བརྐུས་པ་ཚུར་བཀུག་པའི་འོག་ཏུ་དགེ་སློང་དེས་ཀྱང་རས་དེ་གཤགས་ནས་ཕྱོགས་བཞིའི་དགེ་སློང་གི་དགེ་འདུན་གྱི་སྟན་ལ་གླན་པས་དེ་ཕྱིན་ཆད་མ་བརྐུས་སོ། །དེ་བས་ན་སེམས་ཅན་རྣམས་ལ་སེར་སྣས་དེ་ལྟར་མཐོ་འཚམ་པར་བྱེད་པ་མཐོང་ནས། ཅིས་ཀྱང་ཡི་དྭགས་མོ་དེའི་ཉེས་པ་དེ་ལྟ་བུ་མི་འབྱུང་བའི་ཕྱིར་སེར་སྣ་སྤང་བ་ལ་བརྩོན་པར་བྱའོ་གསུངས། འདི་གཉིས་ཀྱིས་སེར་སྣའི་ཉེས་དམིགས་དང་གཤིན་པོ་སོགས་ཀྱི་ཕྱིར་ཤུལ་གྱི་ཉེ་དུ་རྣམས་ཀྱིས་དགེ་རྩ་བགྱིས་ཤིང་བསྔོས་པའི་ཕན་ཡོན་གྱི་ཁུངས་ཀྱང་བསྟན་ཏོ། །འདིར་ཚེ་དང་ལྡན་པ་དགའ་བྱེད་ཀྱིས་ཡི་དྭགས་མོ་དམུས་ལོང་གཟིགས་པའི་ལོ་རྒྱུས་འབྱུང་སྟེ་གོང་གི་ལས་བརྒྱ་པའི་སྐབས་དང་ཕྱོགས་འདྲའོ། །ཡང་སྟོན་པ་རྒྱལ་བྱེད་ཀྱི་ཚལ་དུ་བཞུགས་པའི་ཚེ། མཉན་ཡོད་ཀྱི་ཚོང་དཔོན་ཕྱུག་པོ་རྣམ་ཐོས་བུའི་ནོར་དང་ལྡན་པ་ཞིག་ཡོད་པ་དེ་རྒྱལ་བྱེད་ཀྱི་ཚལ་དུ་སོང་ནས། བཅོམ་ལྡན་འདས་ལས་འཁོར་བ་ལས་སྐྱོ་བར་འགྱུར་བའི་ཆོས་ཐོས་པས། དེ་རབ་ཏུ་བྱུང་བས་ཀུན་ལ་གྲགས་པ་དང་བསོད་ནམས་ཆེན་པོ་དང་ལྡན་པར་གྱུར་ཏེ། གོས་དང་། ཟས་དང་། མལ་ཆ་དང་། སྟན་དང་། ནད་གསོས་དང་། སྨན་ཟོང་རྣམས་རྙེད་པར་གྱུར་ཏོ། །དེས་རྙེད་དོ་ཅོག་རང་གིས་གསོག་པར་བྱས་ཏེ་དགེ་སློང་རྣམས་ལ་བགོ་བཤའ་མ་བྱས་ཤིང་རང་གི་ཡོ་བྱད་ལ་ལྷག་པར་ཞེན་བཞིན་དུ་ཤི་ནས་རང་གི་གནས་ཁང་དུ་ཡི་དྭགས་སུ་སྐྱེས་སོ། །དེ་ནས་དེའི་ཚངས་པ་མཚུངས་པར་སྤྱོད་པ་རྣམས་ཀྱིས་གཎྜི་མཇུག་མེད་པ་བརྡུངས་ནས་ཕུང་པོ་ཕྱིར་ཕྱུང་ངོ་། །དེ་ནས་དེའི་རུས་བུ་ལ་རུས་པའི་མཆོད་པ་བྱས་ནས་ཕྱིར་གཙུག་ལག་ཁང་དུ་ལྷགས་ནས་གནས་ཁང་གི་སྒོ་ཕྱེ་སྟེ་ཆོས་གོས་དང་ལྷུང་བཟེད་དགེ་འདུན་གྱི་སྤྱན་སྔར་འབྲིམ་པ་ལ་ཞུགས་པ་ན། དེར་ཡི་དྭགས་རྐང་ལག་དང་མིག་མི་སྡུག་ལ་ལུས་མཆོག་ཏུ་འཇིགས་པ་ཞིག་ཆོས་གོས་དང་ལྷུང་བཟེད་དེ་འཛིན་ཅིང་འདུག་པ་མཐོང་ངོ། །དེ་མཐོང་བ་དང་དགེ་སློང་རྣམས་མི་དགའ་བར་གྱུར་ཏེ། བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས་དེ་ལ་ཕན་གདགས་པ་དང་སློབ་མའི་ཚོགས་རྣམས་སྐྱོ་བ་བསྐྱེད་པ་དང་སེར་སྣའི་རྣམ་པར་སྨིན་པ་མི་སྡུག་པ་ཡང་དག་པར་བསྟན་པའི་ཕྱིར་དགེ་སློང་གི་འཁོར་གྱིས་བསྐོར་ནས་དེར་གཤེགས་པས། ཡི་དྭགས་དེས་དེ་ལྟར་གཤེགས་པ་མཐོང་ནས་བཅོམ་ལྡན་འདས་ལ་སེམས་དགའ་བ་སྐྱེས་ཤིང་རང་ཉིད་ངོ་ཚ་བར་ཡང་གྱུར་ཏོ། །དེར་བཅོམ་ལྡན་འདས་ཀྱིས་བཀའ་སྩལ་པ། བཞིན་བཟང་ཁྱོད་ཉིད་ཀྱིས་བདག་ཉིད་ཕུང་བའི་ཕྱིར་ཆོས་གོས་དང་ལྷུང་བཟེད་འདི་བསྒྲུབས་ཏེ། དེས་ན་ཡི་དྭགས་སུ་སྐྱེས་པ་ཡིན་གྱིས། དེ་ཡང་ང་ལ་སེམས་དགའ་བར་གྱིས་ལ་ཡོ་བྱད་འདི་ལ་ཡང་སེམས་མ་ཆགས་པར་བྱོས་དང་ལེགས་སོ། །འདི་ནས་ཤི་འཕོས་ནས་ཀྱང་སེམས་ཅན་དམྱལ་བ་ཆེན་པོར་སྐྱེས་ཏ་རེ། དེ་ནས་ཡི་དྭགས་དེས་ཆོས་གོས་དང་ལྷུང་བཟེད་དགེ་འདུན་ལ་ཕུལ་ནས། བཅོམ་ལྡན་འདས་ཀྱིས་ཞབས་ལ་ཕྱག་བྱས་ནས་ཉེས་པ་བཤགས་སོ། །དེ་ནས་བཅོམ་ལྡན་འདས་ཀྱིས་ཡི་དྭགས་ཀྱི་ཕྱིར་ཡོན་བསྔོ་བར་མཛད་དོ། །དེ་ནས་ཡི་དྭགས་དེ་བཅོམ་ལྡན་འདས་ལ་སེམས་དགའ་བཞིན་དུ་ཚེ་འཕོས་ཏེ་ཡི་དྭགས་རྫུ་འཕྲུལ་ཆེན་པོར་སྐྱེས་པ་དེ་ཉིད་རྒྱན་ཐམས་ཅད་ཀྱིས་བརྒྱན་ཅིང་ལུས་ལ་སྤོས་ཀྱིས་བྱུགས་ཏེ། ལྷའི་མེ་ཏོག་སྣ་ཚོགས་པས་ཐུ་བ་བཀང་ནས། དེའི་མཚན་མོ་འོངས་ཏེ་འོད་མའི་ཚལ་ཀྱིས་ཁོ་ར་ཁོར་ཡུག་ཐམས་ཅད་འོད་ཆེན་པོས་སྣང་བར་བྱས་ཤིང་། བཅོམ་ལྡན་འདས་ཀྱི་སྐུ་ལ་མེ་ཏོག་སྣ་ཚོགས་པས་གཏོར་ཏེ་ཆོས་ཉན་ནས་སེམས་ལ་དགའ་བ་ཆེན་པོ་སྐྱེས་ཏེ་སོང་ངོ་། །དེར་དགེ་སློང་སྲོད་དང་ཐོ་རངས་མི་ཉལ་བར་བརྩོན་འགྲུས་རྩོམ་པ་རྣམས་ཀྱིས་འོད་ཀྱི་སྣང་བ་དེ་མཐོང་ནས་ཕྱིར་ནངས་བཅོམ་ལྡན་འདས་ལ་མདང་སུམ་མི་མཇེད་ཀྱི་བདག་པོ་ཚངས་པའམ་བརྒྱ་བྱིན་ནམ་རྒྱལ་པོ་ཆེན་པོ་བཞི་སུ་ཞིག་བཅོམ་ལྡན་འདས་ལ་བལྟ་བའི་ཕྱིར་མཆིས་ལགས། བཅོམ་ལྡན་འདས་ཀྱིས་དགེ་སློང་དག་མི་མཇེད་ཀྱི་བདག་པོ་སོགས་འོང་བ་མ་ཡིན། ཡི་དྭགས་དེ་ཤི་ནས་ཡི་དྭགས་རྫུ་འཕྲུལ་ཆེན་པོར་སྐྱེས་ཏེ་དེ་མདང་{མདངས}སུམ་འོངས་ནས་ངས་དེ་ལ་ཆོས་བསྟན་པས་དེ་དགའ་བ་སྐྱེས་ནས་སོང་ངོ་། །དགེ་སློང་དག་དེ་བས་ན་ཅི་ནས་ཚོང་དཔོན་ལས་ཡི་དྭགས་སུ་གྱུར་པ་དེའི་ཉེས་པ་དེ་ལྟ་བུ་འབྱུང་བར་མི་འགྱུར་བར་སེར་སྣ་སྤང་བ་ལ་བརྩོན་པར་བྱ་སྟེ་དེ་ལྟར་བསླབ་པར་བྱའོ་ཞེས་བཀའ་སྩལ་ཏོ། །