བསྙེན་གནས་ཀྱི་ཁུངས་དང་ཚུལ་བཞིན་དུ་བསྲུངས་པའི་ཕན་ཡོན་དང་མ་བསྲུངས་པའི་ཉེས་དམིགས་བསྟན་པ།

༈ ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། ལྷའི་བུ་བསྙེན་གནས་ཞེས་པ་འཁོར་ལྔ་བརྒྱ་དང་བཅས་པ་བཅོམ་ལྡན་འདས་ཀྱི་སྤྱན་སྔར་འོངས་ནས་ཆོས་ཉན་ཏེ་རྒྱུན་དུ་ཞུགས་པའི་འབྲས་བུ་ཐོབ་སྟེ་དགའ་བའི་ཚིག་བརྗོད་ནས་སླར་ལྷ་ཡུལ་དུ་སོང་ངོ་། །དེའི་ཚེ་འོད་ཀྱི་སྣང་བ་མཐོང་ནས་འཁོར་རྣམས་ཀྱིས་ཞུས་པ་ན། གོང་གི་ལོ་རྒྱུས་གསུངས་ནས། སྔོན་སངས་རྒྱས་འོད་སྲུང་འཇིག་རྟེན་དུ་བྱོན་ཏེ་དྲང་སྲོང་སྨྲ་བ་རི་དྭགས་ཀྱི་ནགས་སུ་བཞུགས་པའི་ཚེ། རྒྱལ་པོ་ཀྲི་ཀཱི་དེར་བསྙེན་བཀུར་གྱི་ཕྱིར་འོང་བ་བྲམ་ཟེ་གཉིས་ཀྱིས་མཐོང་ནས། དེ་གཉིས་རྒྱལ་སྲིད་ལ་འདོད་པ་སྐྱེས་ཏེ་དགེ་བསྙེན་ཞིག་ལ་ཐབས་དྲིས་པས། བསྙེན་གནས་ཡན་ལག་བརྒྱད་པ་བསྲུང་བ་ན་དེས་ཅི་བསམས་པ་དང་། ཅི་འདོད་པ་ཐམས་ཅད་འགྲུབ་པར་འགྱུར་རོ་ཞེས་ཐོས་པས། དེ་གཉིས་ཀྱིས་ཁྱིམ་བདག་ཆུ་སྟོད་ལས་བསྙེན་གནས་ཡན་ལག་བརྒྱད་པ་བླངས་པ་ལས། གཅིག་གིས་ཡོངས་སུ་དག་པར་བསྲུངས་པས་དེ་ཤི་ནས་རྒྱལ་པོའི་ཀྲི་ཀཱིའི་བུར་སྐྱེས་ཏེ་མིང་ལེགས་སྐྱེས་ཞེས་བཏགས་ནས་ཕ་ཤི་བའི་འོག་ཏུ་རྒྱལ་པོར་བཅུག་གོ །ཅིག་ཤོས་ཀྱིས་ནི་བསྙེན་གནས་ཉམས་པར་བྱས་པས་དེ་ཤི་ནས་ཀླུར་སྐྱེས་ཏེ། དེའི་སྟེང་དུ་ཉིན་གཅིག་བཞིན་དུ་ལན་བདུན་བདུན་བྱེ་ཚན་བབ་སྟེ་དེས་རུས་པ་འབའ་ཞིག་ལུས་པར་བྱེད་དོ། །དེ་སྡུག་བསྔལ་གྱིས་ནོན་ནས་དེའི་ལས་ཀྱི་རྒྱུ་ལ་བརྟགས་པས་སྔོན་ཇི་ལྟར་གྱུར་པ་ཤེས་ནས། ད་ཡང་བདག་གིས་བསྙེན་གནས་ཡན་ལག་བརྒྱད་པ་བླངས་ཏེ་བསྲུངས་ན་འདི་ལས་ཐར་པར་འགྱུར་ཡང་སྲིད་སྙམ་སྟེ། དེར་བྲམ་ཟེའི་ཆ་ལུགས་སུ་སྤྲུལ་ཏེ། རྒྱལ་པོའི་ཐད་དུ་ཕྱིན་ནས། རྒྱལ་པོ་ལ་རྒྱལ་བར་གྱུར་ཅིག སྐུ་ཚེ་རིང་བར་ཤོག་ཅིག རྒྱལ་པོ་ཆེན་པོ་བསྙེན་གནས་ཡན་ལག་བརྒྱད་དང་ལྡན་པ་བདག་ལ་འཚལ་གྱིས་ལྷས་བསྙེན་གནས་ཡན་ལག་བརྒྱད་དང་ལྡན་པ་སྩལ་ཏུ་གསོལ། གལ་ཏེ་མ་བསྩལ་ན་གདོན་མི་འཚལ་བར་ལྷའི་དབུ་ཚལ་པ་བདུན་དུ་གས་པར་འགྱུར་རོ་ཞེས་བྱས་ཏེ་དེ་ཉིད་དུ་མི་སྣང་བར་གྱུར་ཏོ། །དེར་རྒྱལ་པོ་ཤིན་ཏུ་སྐྲག་ནས་གསེར་འབུམ་ཡོད་པའི་སྣོད་རྒྱལ་མཚན་གྱི་རྩེ་མོ་ལ་བཏགས་ཏེ་ཡུལ་ཐམས་ཅད་དུ་དྲིལ་བསྒྲགས་ནས། སུས་ང་ལ་བསྙེན་གནས་ཡན་ལག་བརྒྱད་དང་ལྡན་པ་སྟོན་པ་དེ་ལ་གསེར་འབུམ་འདི་སྦྱིན་ཞིང་བཀུར་སྟི་ཆེན་པོས་ཀྱང་བཀུར་བར་བྱའོ་ཞེས་བསྒོའོ། །དེར་ཤིང་མཁན་གྱི་བུད་མེད་རྒན་མོ་ཞིག་གིས། རྒྱལ་པོ་ལ་ཀ་བ་ཞིག་བསྟན་ཏེ། སྔོན་བདག་གི་ཕས་ཀ་བ་འདི་ལ་སྤོས་དང་བདུག་པ་དང་མེ་ཏོག་དག་གིས་མཆོད་པར་བགྱིད་ན་འདི་ཕྱུང་སྟེ་གཟིགས་ཤིག དེར་ཀ་བ་དེ་ཕྱུང་བ་དང་། དེའི་འོག་ནས་བསྙེན་གནས་ཡན་ལག་བརྒྱད་དང་ལྡན་པ་དང་། དགེ་བསྙེན་གྱི་བསླབ་པའི་གཞི་ལྔ་དང་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་གསེར་གྱི་གླེགས་བམ་ལ་བྲིས་པ་ཞིག་རྙེད་དོ། །དེ་ནས་རྒྱལ་པོས་ཀླུ་དེ་ལ་བསྙེན་གནས་ཡན་ལག་བརྒྱད་པ་བྲིས་ཏེ་བྱིན། དྲང་སྲོང་སྨྲ་བ་ན་གནས་པའི་དྲང་སྲོང་ཁྲི་ཉིས་སྟོང་གིས་ཀྱང་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་མངོན་དུ་བྱས་སོ། །ཀླུ་དེས་བསྙེན་གནས་ཡན་ལག་བརྒྱད་པ་བསྲུངས་ནས་ཐང་ལ་ཕྱུང་སྟེ་ལུས་བོར་ནས་ཟས་བཅད་དེ་ཤི་འཕོས་ཏེ་གཡོག་འཁོར་ལྔ་བརྒྱ་དང་བཅས་ཏེ་སུམ་ཅུ་རྩ་གསུམ་གྱི་ལྷར་སྐྱེས་སོ། །དགེ་སློང་དག་བསྙེན་གནས་ནི་དེ་ལས་བྱུང་སྟེ་མིང་ཡང་དེ་ལས་བཏགས་སོ་ཞེས་བཀའ་སྩལ་ཏོ། །འདིས་ནི་བསྙེན་གནས་ཀྱི་ཁུངས་དང་ཚུལ་བཞིན་དུ་བསྲུངས་པའི་ཕན་ཡོན་དང་མ་བསྲུངས་པའི་ཉེས་དམིགས་བསྟན་པ་སྟེ། འདི་དང་གོང་གི་མཛངས་བླུན་གྱི་དེ་གཉིས་སྤྱིའི་ཁོག་གཅིག་ཀྱང་ཁྱད་པར་ཅུང་ཟད་སྣང་ངོ་། །