སངས་རྒྱས་ལ་སེམས་དྭངས་པས་མཆོད་པའི་ཕན་ཡོན།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཁྱིམ་བདག་གཅིག་གི་ཆུང་མ་ལ་བུ་ཞིག་བཙས་པ་ལ་མིང་གསེར་དབྱིག་ཏུ་བཏགས་ཏེ་དེ་ནི་བྱད་གཟུགས་ལེགས་པར་བཟང་ཞིང་ཤིན་ཏུ་མཛེས་པ་འཇིག་རྟེན་ན་ཟླ་མེད་པ། ལག་གཉིས་ཁུ་ཚུར་བཅང་བཞིན་དུ་བྱུང་བ་ན་ཕ་མ་གཉིས་ཀྱིས་ཁུ་ཚུར་ཁ་ཕྱེས་ཏེ་བལྟས་པ་ན་གསེར་གྱི་དོང་ཙེ་རེ་རེ་བྱུང་སྟེ། དེ་ཉིད་བླང་བས་ཡང་བྱུང་སྟེ་འཛད་པ་མེད་པར་གྱུར་ནས་བང་མཛོད་ཐམས་ཅད་ཡོངས་སུ་གང་བར་གྱུར་ཏོ། །དེ་ཉིད་ཆེར་སྐྱེས་ཏེ་ཕ་མ་ལ་ཞུས་ནས་སྟོན་པའི་བསྟན་པ་ལ་རབ་ཏུ་བྱུང་ཞིང་། ཕྱིས་ལོ་གྲངས་ཚང་བ་ན་བསྙེན་པར་རྫོགས་པའི་སྐབས་སུ་དགེ་འདུན་ལ་རིམ་གྱིས་ཕྱག་བྱས་པས། ལག་གཉིས་ས་ལ་གང་རེག་དེར་གསེར་གྱི་དོང་ཙེ་རེ་ཡོད་པར་གྱུར་ཏོ། །དེ་བསྙེན་པར་རྫོགས་ནས་བརྩོན་འགྲུས་བརྩམས་པས་དགྲ་བཅོམ་པའི་འབྲས་བུ་མངོན་དུ་བྱས་སོ། །དེའི་ཚེ་ཀུན་དགའ་བོས་སྔོན་གྱི་ལས་ཀྱི་རྒྱུ་ཞུས་པས། བཅོམ་ལྡན་འདས་ཀྱིས་སྔོན་འདས་པའི་དུས་ན་བསྐལ་པ་དགུ་བཅུ་རྩ་གཅིག་གི་ཕ་རོལ་དུ་སངས་རྒྱས་གསེར་ཐུབ་འཇིག་རྟེན་དུ་བྱོན་པའི་ཚེ། མི་དབུལ་པོ་ལོངས་སྤྱོད་ཅིའང་མི་བདོག་པ་གཅིག་རྟག་ཏུ་རི་ལ་ཤིང་འཐུ་ཞིང་འཚོང་བ་ལས། ཕྱིས་ཤིང་བཙོངས་པའི་རིན་དུ་དོང་ཙེ་གཉིས་རྙེད་པ་སངས་རྒྱས་དགེ་འདུན་དང་བཅས་པ་ལ་དད་པས་ཕུལ་ཞིང་། བཅོམ་ལྡན་འདས་ཀྱིས་ཀྱང་ཐུགས་བརྩེ་བར་དགོངས་ཏེ་བཞེས་སོ། །རྒྱུ་དེས་བསྐལ་པ་དགུ་བཅུ་རྩ་གཅིག་གི་བར་དུ་ལག་ན་གསེར་གྱི་དོང་ཙེ་རྟག་ཏུ་ཐོགས་པར་གྱུར་ཏེ། ནོར་དང་རིན་པོ་ཆེ་དང་། འཚོ་བའི་ལོངས་སྤྱོད་ཟད་མི་ཤེས་པར་གྱུར་ཏོ། །ཅི་སྟེ་དགྲ་བཅོམ་པའི་འབྲས་བུ་མ་ཐོབ་པ་ན་ཡང་མ་འོངས་པའི་འབྲས་བུ་རྣམ་པར་སྨིན་པ་ཚད་དཔག་ཏུ་མེད་དོ། །དེ་བས་ན་ཀུན་དགའ་བོ་སེམས་ཅན་ཐམས་ཅད་ཀྱིས་སྦྱིན་པ་སྦྱིན་པའི་ལས་ལ་བརྩོན་པར་བྱའོ། །ཞེས་བཀའ་སྩལ་ཏོ། །འདིས་ནི་སངས་རྒྱས་ལ་སེམས་དྭངས་པས་མཆོད་པའི་ཕན་ཡོན་བསྟན་ཏོ། །