སངས་རྒྱས་ཀྱི་སྨོན་ལམ་དང་བཟོད་པའི་ཆེ་བ་བསྟན་པ།

༈ ཡང་སྟོན་པ་འོད་མའི་ཚལ་དུ་བཞུགས་སྟེ། སངས་རྒྱས་ནས་རིང་པོར་མ་ལོན་པ་ཞིག་ན། ཐོག་མར་ཀོཎྜི་ནྱ་ལ་སོགས་པའི་དགེ་སློང་ལྔ་དང་། དེའི་འོག་ཏུ་ཆུ་བོ་འོད་སྲུང་སྤུན་སོགས། དགེ་སློང་སྟོང་རབ་ཏུ་བྱུང་ཞིང་། དེ་ནས་ཀྱང་རབ་ཏུ་བྱུང་བའི་ཆོས་ལ་གནས་པ་མང་དུ་བྱུང་བས། རྒྱལ་པོའི་ཁབ་ཀྱི་མི་རྣམས་དགའ་བ་ཚད་མེད་པ་སྐྱེས་ཏེ། སངས་རྒྱས་འཇིག་རྟེན་དུ་བྱོན་པ་ནི་ངོ་མཚར་རོ་ཞེས་བསྟོད་ཅིང་། ཐོག་མར་རབ་ཏུ་བྱུང་ཞིང་ཆོས་ཐོས་པ་དེ་དག་སྔོན་དེ་བཞིན་གཤེགས་པ་དང་ཕྲིན་ལས་གང་མཐུན་ནས་དེ་ལྟར་གྱུར་སྙམ་དུ་སེམས་ཤིང་། དེའི་དོན་གསོལ་པས། བཀའ་སྩལ་པ། སྔོན་འདས་པའི་དུས་འདི་དག་གི་ཕྱིར། ངས་ཡིད་དམ་ཆེན་པོ་བཅས་ཏེ། ནམ་མངོན་པར་རྫོགས་པར་སངས་རྒྱས་ནས་སྔར་འདི་དག་གི་དོན་བྱེད་པར་ཤོག་ཅེས་སྨོན་ལམ་བཏབ་སྟེ། སྔོན་བསྐལ་པ་གྲངས་མེད་པའི་ཕ་རོལ་ཡུལ་ཝཱ་རཱ་ཎ་སཱི་ན་རྒྱལ་པོ་རྩོད་བྱུང་བྱ་བ་ཞིག་བྱུང་སྟེ། དེའི་ཚེ་ཡུལ་དེ་ན་དྲང་སྲོང་བཟོད་པ་ཅན་ཞེས་བྱ་བ་སློབ་མ་ལྔ་བརྒྱ་དང་བཅས་བཟོད་པ་བསྒོམ་ཞིང་གནས་སོ། །དེའི་ཚེ་རྒྱལ་པོ་འཁོར་དང་བཅས་པ་ནགས་སུ་ཕྱིན་པ་ལས་རྒྱལ་པོ་དེ་ངལ་ཞིང་དུབ་སྟེ་གཉིད་དུ་སོང་བའི་ཚེ། བཙུན་མོའི་འཁོར་རྣམས་ཚལ་དུ་རྒྱུ་ཞིང་ཕྱིན་པ་ལས། དྲང་སྲོང་དེ་མཐོང་ནས་དད་པའི་སེམས་སྐྱེས་ཏེ་མདུན་དུ་འཁོད་ནས་ཆོས་ཉན་པ་ན། རྒྱལ་པོ་གཉིད་སངས་ནས། བཙུན་མོ་རྣམས་མི་སྣང་བ་དང་། བློན་པོ་བཞི་དང་བཅས་ཕྱི་བཞིན་ཕྱིན་པས། བཙུན་མོ་རྣམས་དྲང་སྲོང་གི་མདུན་དུ་འཁོད་པ་མཐོང་ནས། རྒྱལ་པོས་དྲང་སྲོང་ལ་ཁྱེད་ཀྱི་སྐྱེ་མཆེད་མུ་བཞི་དང་། ཚངས་པའི་གནས་པ་བཞི་དང་། བསམ་གཏན་བཞི་རྣམས་ཐོབ་བམ་ཞེས་རིམ་པར་དྲིས་པས། དེ་དག་གང་ཡང་མ་ཐོབ་བོ། །འོ་ན་འདིར་ཅི་བྱེད། བཟོད་པ་བསྒོམ་མོ། །དེར་རྒྱལ་པོ་ཁྲོས་ཏེ། བཟོད་དམ་མི་བཟོད་ལྟའོ་ཞེས་རལ་གྲི་ཕྱུང་ནས་དྲང་སྲོང་གི་ལག་པ་གཉིས་བཅད་དེ་ཁྱོད་སུ་ཡིན། བདག་ནི་བཟོད་པ་ཅན་ནོ། །དེ་བཞིན་དུ་རྐང་པ་གཉིས་བཅད་ནས་དྲིས་ཀྱང་སྔ་མ་བཞིན་ནོ། །དེའི་ཚེ་ས་རྣམ་པ་དྲུག་ཏུ་གཡོས་པས་ཉེ་གནས་ལྔ་བརྒྱ་པོ་ཡང་ནམ་མཁའ་ལས་འཕུར་ཏེ་དེར་ལྷགས་ནས། སློབ་དཔོན་དེ་ལ་འདི་ལྟ་བུའི་སྡུག་བསྔལ་ཉམས་སུ་མྱོང་ན་བཟོད་པའི་སེམས་ཉམས་པར་མ་གྱུར་ཏམ། དྲང་སྲོང་གིས། བདག་གི་སེམས་མ་ཉམས་སོ། །རྒྱལ་པོས་དེ་གང་གིས་ཡིད་ཆེས། དྲང་སྲོང་གིས་བདག་གི་སྨྲས་པའི་ཚིག་འདི་བདེན་ན་ཁྲག་འོ་མར་གྱུར་ཅིང་། ལུས་སྔ་མ་ཁོ་ན་བཞིན་དུ་གྱུར་ཅིག ཅེས་བརྗོད་པས་དེ་བཞིན་དུ་གྱུར་པ་ན། རྒྱལ་པོའང་འགྱོད་པ་སྐྱེས་ཏེ་བཤགས་པ་ཕུལ་ལོ། །དྲང་སྲོང་གིས་ཁྱོད་ཀྱི་བུད་མེད་ཀྱི་ཕྱིར་མཚོན་ཐོགས་ནས་བདག་གི་ཡན་ལག་གཅོད་མོད་ཀྱི་བདག་གི་བཟོད་པ་ནི་ས་དང་འདྲ་བས། ཕྱིས་མངོན་པར་སངས་རྒྱས་པ་ན། ཤེས་རབ་ཀྱི་རལ་གྲིས་ཁྱོད་ཀྱི་དུག་གསུམ་གཅོད་པར་གྱུར་ཅིག་ཅེས་སྨྲས་སོ། །དེའི་ཚེ་རིའི་ཀླུང་དང་ལྷ་རྣམས་ཁྲོས་ནས་ཐོག་སེར་ཕབ་སྟེ་རྒྱལ་པོ་བསད་པར་བརྩམས་པ་ན་དྲང་སྲོང་གིས་བསྐྱབས་སོ། །དེ་ནས་དྲང་སྲོང་དེ་རྒྱལ་པོའི་ཕོ་བྲང་དུ་སྤྱན་དྲངས་ནས་མཆོད་པ་ལ་ཀུན་ཏུ་རྒྱུ་སྟོང་ཕྲག་ཙམ་ཕྲག་དོག་སྐྱེས་ཏེ། ལྐོག་ཏུ་རྡུལ་དང་འབགས་བཙོག་གིས་གཏོར་བ་ལ། བདག་བཟོད་པ་བསྒོམས་པའི་འབྲས་བུས་ནམ་སངས་རྒྱས་པ་ན་བདུད་རྩིའི་ཆུས་ཁྱེད་རྣམས་ཀྱི་དྲི་མ་བཀྲུས་ཏེ། འདོད་པའི་བཙོག་པ་ཡོངས་སུ་དག་པར་ཤོག་ཅིག ཅེས་སྨོན་ལམ་བཏབ་བོ། དེའི་ཚེ་ན་དྲང་སྲོང་བཟོད་པར་སྨྲ་བ་ནི་ང་ཡིན་ལ། རྒྱལ་པོ་དང་བློན་པོ་བཞི་ནི་ཀཎྜི་ནྱ་སོགས་དགེ་སློང་ལྔ་དང་། ཀུན་ཏུ་རྒྱུ་སྟོང་ནི་འོད་སྲུང་ལ་སོགས་པའི་དགེ་སློང་བརྒྱ་ཕྲག་བཅུ་ཡིན་ཏེ། སྔོན་དམ་བཅས་པ་བཞིན་དུ་ད་ལྟར་ཡང་སྔོན་ལ་འདི་དག་སྡུག་བསྔལ་ལས་གྲོལ་བར་མཛད་དོ་གསུངས། འདིས་ནི་སངས་རྒྱས་ཀྱི་སྨོན་ལམ་དང་བཟོད་པའི་ཆེ་བ་བསྟན་པ་ཡིན་ནོ། །